FILIPI

FILIPI 

NUNGER DANGI PAUL SHITI

    OKILA 

Filipi nunger dangi züluba Paul shiti ya Pauli Europe lima nung mezüngbuba tenzükba arogo, Rom yimli Makedonia lima nung liasü. Iba shiti ya Paul tepuokdak lia; oda Filipi nung tiyazü tesayurtem aser pa anema apusoba Khristantem kübok timtemba mapang ka nung zülu, Saka Pauli Khrista dak pei tamang takang ayuba ajanga pai tepela aser tesünep angutsü ta imla. 

Shiti nükidongji: Filipi arogopurtemi Paul timtem mapang pa nüngdak ajak agütsüba atema parnok nem tenüngsang agüja züluba lir. Kasa mapang nung ano pai parnok tasü tait aser tamang katetba mapatemji tarutsü timtem mapang nunga maneni inyaktsü ajungshi. Asükümba aser pei ajung indang mebilemi Yisu dak parnok tamang ayutsü pai parnok dang mepishi. Parnok Khrista den telungjem alibaji Tsüngrem sempet, koba parnok tamang ajanga agizük, saka ibai parnok Yihuda nunger ozüng aser tekülemba yimsü dang tashi angaba agi anguba masü ta parnok nem bilemtetdakttsütsü asoshi liasü.

 Iba shiti nung tepela, tamang katetba, telungjem, talangka aremzükba, itemji Khristan taküm nung koda tongtibang iba indang rateta zülu. Ano Pauli Filipi arogo dang kanga meimba indang angur.

    Keta Alibatem

    FILIPI 1

    Salem O 1:1-2

1 Paul aser Timoti, Yisu Khrista lartem Filipi nung aliba Khrista Yisu nung amangba purtem ajak aser tanükertem O dikontem dangi: 

2 asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

    Pauli Filipi Nunger Asoshi Sarasademba 1:3-11

3 Nenok bilemtetba mapang shia nung ni kü Tsüngrem tenüng asanger: 

4 aser nenok asoshi kü sarasademba mapang shia nung, ni pela-a sarasademer, 

5 kechiaser mezüng anogo nungi tang tashi osang¬tajung sayutsüngiba nung nenoki telungjem sayu. 

6 Kechiyong shibai nenok dak mapa tajung tenzük, pai Yisu Khrista anogo tashi ajisa abensa tsütsü ta ni amanger.

7 Yamai nenok ajak atema bilemtsü tim, kechiaser ni kü temulung nung nenok ayur, kechiyong kü talenba nung aser osangtajung sotba aser akangdaktsüba mapa nung nenok ajak kü den taochi nung lemsatepertem lir, 

Nenok ajak: asoshi kü mulung nung koda ni yongyar aji Khrista Yisu aria bilemba temeim nungi adokba ta Tsüngremji kü kuli lir. 

9 Ni ya sarasademer: nenok temeim tali tali rendakjang, temetetba aser teratetba nung tali moshia kümjang. 

10 Anungji kechi tajungtiba aji nenoki shimtsü akoktsü. Idangji Khristar Anogo nungji tai makai temeshi alitsü, 

11 Aser Tsüngrem sentsüngwangshi aser tenungsang atema temeshiba tejang, koba Yisu Khrista ajanga lir, aji agi nenok süngdaktsütsü, 

    Ni Asoshi Taküm Alibaji Khrista     1:12-30

12 Ano adianutem, kü dangi kechi adok aji agi osangtajungji taliang ayimsunga aküm ta nenok nem metetdaktsünür, 

13 Obndangba ki ajak nung aser tangar tanüngba ajak dang kü talenba Khrista atema lir ta jungkai adok; 

14 aser Kibuba nung adianu ni alenba agi temulung ulua küma; Tsüngrem O metsübui jembitsü kanga tali tasü ita akümer, 

15 Kari atangji mokokajiba aser rara bangsen agi Khrista O sayutsüngir, saka kari temulung tajung agi sayutsüngir, 

16 kechiaser osangtajung sottsü asoshi ni atadaktsü ta parnoki metet. 

17 Saka tangari kü talenba nung tali timtem agütsütsü bilema, ochiba agi mesui, telemsatepba agi Khrista sangoktsür.

18 Ajangla kechi? Ibai dang, anemsüba nung süshia; atangji nung süshia ajaklen Khrista sangokja lir; aser iba nungji ni pelar, aser ana pelatsü. 

19 Kechiyong nenoki mepishiba ajanga, aser Yisu Khrista Tanelai agütsüba ajanga ni kümzüktsü asoshi ibai akümtsü ta hi metet. 

20 Anungji ni tenok tenoka bilema imlaba : amato, ni kecha maksü mangutsü, saka tasü aitba ajak agi, teti ama, taküm agi süshia, tasüba agi süshia, tanga kü mang nung Khrista uludaktsütsü.

21 Kechiaser ni asoshi taküm alibaji Khrista, aser tasütsüji tajangzük lir. 

22 Saka shi nung taküm lira, aser kü mapa nungji süngjang tangra, idangji ni koba shimtettsü aji ni memetet. 

23 Saka ana tsüngda nungji ni terata nung lir, kechiyong ni asoshibo pila-a Khrista den linür; aji kanga agia tajungba. 

24 Saka ni nenok asoshi shi nung alitsüji tenüngdaktsü tali lir, 

25 Aser aji meteta, ni .nenok dangi tanaben aruba agi Khrista Yisu nung kü dak nenok uluba tali akümtsü asoshi, 

26 tamang nung nenok arentsü aser pelatsü asoshi, ni taküm alitsü ta ni metet.

27 Ni arua nenok ngur sü-shia, ni maden dang sü-shia, nenoki osangtajung tamang atema merangtepba, nenok tanela ka nung temulung ka sür akang akanga noktaker ta, 

28 aser tsukchirtemi kecha nunga metsübudaktsü ta, nenok tia indang ni angashitsü asoshi nenok taküm yimya Khrista osang tajung temsüa lidakjang. Nenok tetsübu malibaji parnok asoshi tesamatsü kuli tejangja lir, saka ibaji nenok asoshi Tsüngrem nungi tekümtet indang kuli lir. 

29 Khrista dak amangtsü asoshi dang masü, saka ano pa atema timatemtsü nenok nem agütsü. 

30 Kechiaser kü dak koda raraba nenoki angu, aser tanga kü dak lir ta angashir, iba raraba nenokia raradagi.

    FILIPI 2

    Khrista Ajemaluba Indang 

1 Anungji Khrista nung langka tajungshiba lira, temeim nungi langka tesüngzük lira Tanela nung langka telungjem lira, aria bilemba aser yimlibilem lira, 

2 kü pelaba süngdaktsütsü asoshi nenoki putepa liang, kasa temeim akatsüla, taküm telungjem liang, aser kati ka den putepang. 

3 Ambangyim aser amajok asüküm agi kecha teinyak; saka ajemalu shisatsü agi nisüng shiai pei dang nungibo pi taoba ta züng¬shiangma. 

4 Nenok nisüng shiai pei indang mebilemi pi indang bilemangma. 

5 Anungji Khrista Yisu dak koba mulungsentsü liasü, aji nenok daka liang:

6 "Pa Tsüngrem mesükba nung liaka, Tsüngrem den sakü alibaji sota ayutsü tim ta mezüngshi. 

7 Saka pei sasa tazüngla kümer, alar ama küma nisung ama aküm. 

8 Aser sorobangru nung nisüng ama kümer, pei sasa ajemalu küma, tasütsü, oda kangki nung asütsüa tashi anga-a aküm

9 Anungji Tsüngremi pa tematiba jenjangi ajungket, aser ajak dang taoba tenüng Pa nem agütsü; 

10 Anungji Yisu tenüng nung kotak nung alirtem, alima aser ali telung nung alirtem ajaki pa dang temokok agi apudaka külemtsü; 

11 aser 'Yisu Khristaji Kibuba' ta Tebu Tsüngrem nem, sentsüwangshi agüja temeli ajaki ayimtentsü." 

Alima nung Petinu Sangwatem Ama 

12 Anungji kü temeimbatem, ni nenok den alidang nenoki kü dang teti tashi anga-a aliba ama, tang ni nenok den dena malidanga kü dang tashi angatsübaji kanga agi tongtibangba lir. Nenoki atentena aser tsübua pei tekümtet inyakang. 

13 Kechiyong shibai pei temulung chia inyakdaktsütsü asoshi nenok dak temulungtettsü aser teinyaktsü anaprongla adokdaktsür, aji Tsüngrem, 

14 Aji asünung kangkokangji mesüra tashishiba kecha medeni inyakang. 

15 Anungji iba mashiküshi aser tekirak putu nung nenok teindang Tsüngrem chirtem, ochi aser tai meketi tesangwa ama ayatsü, 

16 aser nenoki parnok dang taküm osangji sangoktsü dang parnok rongnung petinu sangwa ama ayatsü, Anungji Khrista Anogo nungji ni amajok nung masem mesüra amajok nung meinyak ta ni nümadanga shitettsü. 

17 Aser ano nenok tamang tenla aser tenzükba manung ni tenla agütsüra, ni pelar, aser nenok ajak den pelateper. 

18 Aser yamaji nenoka pela-ang; aser kü den pelatepang.

    Timoti aser Epafrodita 

19 Saka nenok indang meteta nia pelatsü asoshi nenok dangi Timoti yakta yoktsü Kibuba nung ni imlar. 

20 Kechiyong pa ama temulung tepu¬tep aser nenok indang shitak shia bilemba nisüng shinga mali. 

21 Kechi¬yong ajaki Yisu Khrista masü pei ajungtsü indang bushir. 

22 Saka tanur kati kechi koda tebu tenzüker, yamaji osangtajung renlokdaktsütsü asoshi pai kü den tenzük ta nenoki pa indang küli metet. 

23 Anungji kü indang kechi koda asütsü, aji meteta kümli-i nenok dangi idangyongjisa pa yoktsü imlar. 

24 Saka nia kü sasa yakta arutsü ta ni Kibuba nung amanger. 

25 Saka kü adianu, külem inyaker, aser külem tamang nung rarar, Epafrodita, kü nüngdak nung shiba tenyar aser teyariteper lir, nenok dangi pa yoktsü ta ni bilemer. 

26 Pa shiranga liasü ta nenoki angashiogo ta meteta pai nenok ajak ajurutsü yongyaba agi tip medemi liasü. 

27 Kechiyong pa tasütsü ama shi¬ranga liasü, saka Tsüngremi pa dang yimlibilem sayu. 

28 Anungji nenoki pa tanaben ngua pelatsü asoshi, aser kü tejashia ajema akümtsü asoshi ni pa mulungsoa Yokogo.

29 Anungji Kibuba nung pelashishia pa agizükang aser ibala nisung akhüm tsübuang, 

30 Kechiaser nenoki meya¬ritetba mapa kar nung ni yaritsü asoshi pa taküm lendongia ia Khrista mapa atema tasür dang liasü. 

FILIPI 3

1 Tatemsa, kü adianutem, Kibuba nung pela-ang. Ni iba O kasa nenok dangi zülutsü ni atangji mala¬ker, saka aji nenok asoshi teküm¬dangdaktsüba. 

2 Azütem asoshi küm¬dangang, tamajung inyakertem.asoshi kümdangang, rangtokertem asoshi kümdangang. 

3 Kechiyong shiri Tsüngrem Tanela agi külemer, aser Khrista Yisu nung ulur aser shi nung meimlar, aji asenok temejeptokertem lir. 

4 Aji saka nibo shi nung imladi süra, tangar kari shi nung imlatsü koker ta bilemra, ni tali akoktsü; 

5  ni Israel kin Benjamin kidong nungi, Ibri rongnung Ibri; tinu buba nung mejeptok; ozüng tsütsü nungi ni Farisi; 

6 tejangraba tsütsü nungi arogo rishikangshiba nisung;' aser oziing nung aliba temeshiba tsütsü nungi tai meketi angu. 

7 Saka kechisa ni asoshi tajangzük liasü, itemji Khrista atema tesama ta ni züngshir.

8 Itemji dang masü, kü Kibuba Khrista Yisu temetetba .shisatsü, koba ajak dang sentiba Iir, ya atema ajak endokogo; 

9 aser pa den lungjema akümtsü. Ozüng dang tashi angaba teme¬shibaji joko ni magizüker, saka Tsüngrem nungi aruba temeshiba, koba tamang dak amendaka lir, aser Khrista dak tamang akaba ajanga agütsüba temeshibaji ni kar. 

10 Ni metetnüba ajongaji Khrista aser pa shia aruba tashi-ain aser pa toushiba nung Iungjemba, 11 aser anarongtena danga ni tasüba nungi shia arutsüji imlar. 

Alizüng Atongtsü Arishir 

12 Ni tang aji nguogo ta masü, mesüra ni tabensa kümogo ta masü, saka kechi asoshi Khrista Yisui ni puadok aji tongtettsü ta ni arishir. 

13 Adianutem, ni aji tongtetogo ta ni mashir, saka ni ya inyaker; taoba indangji amadoker, tejaklen alibaji ni tongtettsü meranger. 

14 Khrista Yisu nung temalen nungi Tsüngremer tajaba tajangzük alizüngji tongtettsü ni arishir. 

15 Anungji asenok kwika tabensa lir, iba mulungsentsüjisa lidi, aser nenoki langka nung temulungsentsü balaka lira, ajia Tsüngremi nenok dang jungkai adokdaktsütsü. 

16 Saka asenoki kechi tashi tongtetogo, iba ozüng jagisa asenok jajadi. 

17 Adianutem, nenok külemi kü jilu ajizükertem liang; nenok tatishitsü asoshi onok lir aser shiri onok ama jajar parnok ajizükang. 

18 Kechiyong Khrista kangki tsük¬chirtem ama aikati jajar ta ni nenok dang aiben shiogo, aser tanga ni jeba ashir. 

19 Tatem nung parnok sama¬tsü, parnok tsüngrem pei tepok lir, parnok uluba parnok maksü nung lir, aser parnoki alima oset indang bilemer. 

20 Saka asen senso kotak nung lir, aser ano idak nungjagi Kümtetdakba ka oda Kibuba Yisu Khrista arutsü aji asoshi asenoki atar. 

21 Pai koba inyakba agi ajak pei kübok ayutsü akok, aji inyakba amato pai asen tajemzük temangji melenshia, pa sentsüwangshiba temang ama tasen kümdaktsütsü.  

    FILIPI 4 

1 Anungji ni meimba aser yongya¬ba adianutem, nenok kü tepela aser takokba lir; kü temeimbatem Kibuba nung akang akanga noktakang. 

    Tajungshi O

2 Euodia aser Sintike, Kibuba nung adianutem ama putepa alitsü ni ajungshir. 

3 Hau, kü den atangji sungra ka nung apurtem nenoki item tetsürtem dang yariang ta ni nenok dang mepishir, kechiyong parnoki Klement den külemi inyaker tangar¬tem, shir tenting taküm kaket nung zülua lir, parnok den item tetsüri osangtajung nung inyak. 

4 Teti Kibuba nung pela-ang; tanabena ni shidi, pela-ang. 

5 Nenok tazüzükba nisung ajak nem metetdakjang. Kibuba anasa lir. 

6 Kecha nunga temulung tatem ma, saka ajak nung sarasademba aser mepishiba aser tenungsang agi nenoki mepishiba Tsüngrem nem metetdakjang. 

7 Aser Tsüngrem tesunep kobai tangatetba ajak atentanger ajagi Khrista. Yisu nung nenok temulung aser tebilemba nuka alitsü. 

8 Tatemsa, adianutem, kechisa ochi lir, kechisa akhüm tsübutsü tim, kechisa temeten lir, kechisa temerük lir, kechisa temeim¬tsü lir, kechi indangsa osangtajung lir aser langka nüngsang lira item indang bilemdangang. 

9 Kechisa nenoki kü dak angazük aser agizük, aser angashi aser angu, itemji inyakang; aser tesünep Tsüngremji nenok den alitsü. 

Tenla Agizükba Indang Shisemer 

10 Saka tang tatem nung nenoki kü indang aria bilema asentenshiogo ta, ni Kibuba nung kanga pelar; aji saka nenokia teti bilema liasü, saka nenoki ni yaritsü mapang tajung mangu. 

11 Maka-mait indang ni jem¬bir masü kechiaser kechi tia nungsa ni lidir, iba nungji ni temulung süa alitsü ni angazükogo: 

12 Kechi koda ajemzüka alitsü aji ni metet, aser kechi koda jenti ka-a alitsü ajia ni metet, kechisarena nung aser ajak nung, sünga alitsüa aser ya-a alitsüa, jenti ka-a alitsüa aser anünga alitsü, iba miim oji ni angazükogo. 

13 Khrista shibai ni tashi itdaktsür pa dak ni ajak inyaktsü akok. 

14 Aji saka nenoki kü timtem toushi lemsatep nung, nenoki tajungba benshi. 

15 Aser ano osangtajung tetenzük nung, ko¬dang ni Makedonia nungi pila, nenok dak alema tangar arogo shingaia tenla agütsüba aser agizükba nung kü den melungjem ta, nenok Filipi nungeri metet. 

16 Kechiyong ni Tesalonika nung alidanga ken anaben ka kü tenüngdaktsü nenoki bendaktsü. 

17 Ni sempet asoshi bushir masü, saka nenok tenüng nung arenba süngjang asoshi ni bushir. 

18 Saka ni ajak kar, aser jenti kar. Ni nenok nungi teronem tajung menem¬ba, temulung achiba, nenok nungi aruba tagizüktsü tetemsü tenla, Epafrodita nungi agizüka, ni sünga lir. 

19 Aser kü Tsüngremi Khrista Yisu nung pa sentsüwangshi nung pa rongsen yari nenok tenüngdaktsü ajak agütsütsü. 

20 Tang asen Tebu Tsüngrem dang teti tatem makaba sentsüwangshi sang. Amen. 

Tatem Salem O

21 Khrista Yisu nung amangba temeshipurtem nem salem agüjang. Kü den aliba adianutemi nenok nem salem agütsür. 

22 Temeshipur ajaki aser tongtibangsa Kaisar kibong nung alirtemi, nenok nem salem agütsür.

23 Kibuba Yisu Khrista taochi nenok tanela den liang. 

1.1 : TMa. 16.12

1.13 : TMa. 28.30

1.30 : TMa. 16.19

2.10,11 : Isa. 45.23

2.15 : Taz. 32.5

3.5 : TMa. 23.6; 26.5; Rom 11.1 

3.6 : TMa. 8.3; 22.4; 26.9

3.17 : 1 Ko. 4.16; 11.1