GALATIA
GALATIA
NUNGER DANGI PAUL SHITI
OKILA
Yisü indang osangtajung prokshia aodang Bendanger aikati aji agizük. Idangji chichiba Khristan ka kümtettsü atema Bendanger jagi Mosa Ozüng benshitsü tim asü masü ta tasüngdangba ka adok. Pauli ibaji nüngdak mali ta o toktepa zülu. Atangji Khrista nung taküm ka tamendakdakji tamangji dang lir; koba agi Tsüngrem den paji putepdaktsür. Saka Rom yimli Asia linük nung aliba Galatia arogotem nung nisüng kari Paul anema noktak; aser item nisüng shir temulung meyipa arur parnokji Mosa Ozüng küboki aitba ajanga dang Tsüngrem den yimjungji yanglutettsü ta noktak.
Tai tesayubatem ajanga shirnoksa atsür ao, itemji shitakba tamang lenmangi tanaben meyipa anir arutsü nüklanung Pauli iba shiti zülu, Pauli pei sasa Yisü Khrista tenyar ka ta temeten O shia item purtem anema noktak. Pa tenyar ka asütsü tajabaji nisüng tashi agi masü, saka Tsüngrem nungi, aser pa nem nungloktküba mapaji tongtibangsa Bendangertem atema ta pai kuli asü. Iba sülen pai ana tamang ajanga dang meimchirtemji Tsüngrem den putepdaktsür ta sayu. Kaket tatemlenji Pauli amangbapur ka taktim jaklaliroji Khrista dak amangba nungi adokba temeim nungi dang adoker ta zülu.
Keta Alibatem
Okila 1:1-10
Tenyar Ka Ama Paul Tashi 1:11-2.21
Tsüngremer Taochi Osangtajung 3:1-4:31
Khristan Nüji Aser Teinyaktsü 5:1-6.10
Tatem O 6:11-18
Okila 1:1-10
GALATIA 1
Salem O 1:1-5
1 Paul, tenyar ka, nisüngi mesüra nisüng ajanga masü, saka Yisü Khrista aser Tebu Tsüngrem ajanga lir, shibai pa tasü nungi shia arudaktsü.
2 Aser kü den aliba adianutem ajak nungi Galatia arogotem dangi;
3 asen Tebu Tsüngrem aser Kibuba Yisü Khrista nungi nenok dangi taochi aser tesünep sang.
4 Pai asen Tebu Tsüngremi mulungba amato, tang aliba iba lima tamajung nungi asenok kümzüktsü asoshi asen temenentem atema pei sasa agütsü.
5 Pa dang teti tatem maka sentsüwangshi sang Amen.
Tanga Osangtajung Kecha Mali 1:6-10
6 Khrista shibai pa taochi nung nenok aja, pa dak nungi pila-a tanga osangtajung dangi nenok kanga yakta aenshia aoba meteta ni süngmanger.
7 Ibai tanga osangtaujung ka masü, saka nisüng kari nenok timtemdaktsütsü asoshi Khrista Osangtajungji melenshidaktsütsü meranger.
8 Saka onoki nenok dang sayutsüngiba osangtajung dak alema onoki süshia kotak nungi tenyar kati süshia tanga osangtajung ka sayutsüngira paji atakatem sang.
9 Onoki tejaklen mezüng ashiba amato ni ano tanaben ashir, nenoki mezüng agizükba osangtajung dak alema tanga osangtajung ka nisüng kari sayutsüngira paji atakatem sang.
10 Kechiyong tang nisüng mulung chidaktsütsü ni bushir asü? Mesüra Tsüngrem? Mesüra ni nisung peladaktsütsü meranger ama? Ni nisüng peladaktsüra, ni Khrista lar masü.
Tenyar Ka Ama Paul Tashi 1:11-2.21
Paul Tenyar Ka Akümba Indang 1:11-24
11 Saka adianutem, ni sayutsüngiba osangtajungji nisünger osangtajung masü ta ni nenok dang shinür.
12 Kechiyong nisüng shinga nungia ni ya magizük, mesüra shingaia ya sü dang mesayu; saka Yisü Khrista ajanga ya sü dangi jungkai adok.
13 Kechiyong ni akhidang Yihuda yimsü nung koma taküm liasü; aser ni koda Tsüngremer arogo raksatsütsü kangameranga aji rishikangshia liasü, iba indangji nenoki angashiogo;
14 aser sü tetsü-teboutem alemli otsü asoshi ni kanga jangra-a Yihuda yimsü amangba nung sü medemsortem rongnung ni takangba liasü.
15 Saka ni masodang nungi Tsüngremi ni shimtet aser pa taochi agi ni aja.
16 Anungji pai pei Chir kü dangi jungkai adoka sayutsü mulunga liasü, aser aji agi pa indang Osangtajungji Bendangertem rongnung sayutsüngitettsü asoshi nisüng shinga dena ni masüngdangtep.
17 Mesüra ano kü dang tamasa nungi aliba tenyartem dangi ni Yirusalemi matu, saka ni tamasa Arabiai oadok, aser Damaskai tanaben meyipa aru.
18 Küm asem lir külen-ang Kefa den metetteptsü ni Yirusalemi atu, aser pa den anogo terpungunü amung,
19 saka Kibuba tenu Yakob dak alema tenyartem rongnung tangar ka danga ni mangu.
20 Tang ni nenok dangi kechi zülu, item indang ajiang, Tsüngrem tsüngdang ni meyazür.
21 Idangji ni Siria aser Kilikia temeket limai aru.
22 Aser Yihuda linük nung aliba Khristar arogotem den ni metettepa maliasü.
23 Parnoki ya dang angashia liasü, "Shibai asenok ken rishikangshia liasü pa jagi pai ken samatsütsü merangba tamangji sayutsüngidagi;"
24 aser ni asoshi parnoki Tsüngrem tenüng asang.
GALATIA 2
Tangar Tenyartemi Paul Agizükba 2:1-10
1 Idangji küm terpezü renteter, ni Barnaba aser Tita kü den anir tanaben Yirusalemi atu.
2 Ni atutsüla ta Tsüngremi jungkai adoka ashiba agi ni atu. Aser Osangtajung kechi ni Bendangertem dang sayutsüngi, aji kibok nung miima tanishirtem den dang jembitep; kechiyong taoba mapang nung aser tang inyakba mapatemji ni amajok mekümdaktsünü.
3 Saka kü den aliba Tita Grik nunger liaka, pa memejeptokdaktsü.
4 Aji saka onok alar kümdaktsütsü asoshi, Khrista Yisü nung aliba onok nüji tia miima ladangtsüsa, tiyazü adianutem miima aniok.
5 Kechiaser osangtajung ochibaji nenok den maneni litettsü asoshi, onok kenpiga danga parnok küboki mai.
6 Saka tanishirtem ta aküba nisüng kar, parnokji shirsa kechi ama liasü, aji ni asoshi kecha masü, kechiyong Tsüngremi nisüng jak merepranger, parnoki kü dang kecha mesayu ta ni ashir.
7 Saka kechi koda temejeptoker asoshi Osangtajungji Peter nem nungloktsü, yamaji memejeptoker asoshi Osangtajungji kü nem nungloktsüogo ta parnoki angu.
8 Kechiyong kechi koda Tsüngrem tashi agi Peter temejeptoker asoshi tenyar ka kümdaktsü, aji oda bendanger asoshi nia kümdaktsü.
9 Anungji Yakob, Peter aser Yohan, shir tongshitem amai lir, parnoki kü nem agütküba taochiji aser parnoki Barnaba aser kü den telungjem temaitsü teka tajichi amtep. Anungji onok Bendanger dangi aotsü, aser parnok temejeptoker dangi aotsü.
10 Onoki sensaker bilemtettsü tim ta parnoki onok dang mepishi, aser iba mapajisa inyaktsü ni jangra-a liasü.
Antiok Nung Pauli Peter Arütküba 2:11-14
11 Saka kodang Peter Antioki aru, ni pa jakdang pa anema noktak, kechiaser pa dak tai liasü.
12 Kechiyong nisüng kar Yakob nungi marudang, pai Bendangertem den chiyung, saka kodang parnok aru, pai parnok temejeptokertem rongnungi ta meteta pai tkübua meyipa oa balaka aküm.
13 Aser tangar Yihuda nunger ajaki pa den balakati ao, aser yamaji parnok anemküba agi Barnaba-a anir ao.
14 Saka parnoki Osangtajung ochiba nungji shitakba mejajar ta ni kodang angu, ni ajak madang Peter dang ashi, “Na Yihuda nunger sürnung, Yihuda nunger ama meli-i Bendanger ama alir süra, ajangla Bendangertem Yihuda nunger ama alitsü nai koda akanger?"
Yihuda Nungertem Bendangertem Ama Tamang Agi Kümzüktsü 2:15-21
15 Yimya agi asenok Yihuda nungertem lir, saka temenenpur Bendangertem ama masü;
16 aji saka nisüng kaji ozüng mapatem agi masü, saka Yisü Khrista dak tamang ayuba agi metendaktsür ta asenoki metet. Anungji Yisü Khrista dak amangba ajanga asenok temeten angutsü asoshi asenoki pa dak amanger, kechiaser ozüng dak amangba ajanga shinga temeten mangutsü ta asenoki metet.
17 Khrista ajanga temeten angutsü asoshi asenoki bushira, asenoka Bendangertem ama temenenpur masü ama? Ajangla Khristai temenen züindaktsü asü? Masü, yamaji kodanga masü!
18 Kechiyong ni kechi raksa aji tanaben yanglura, ni kü sasa tai benshir ta kuli agütsür.
19 Kechiyong Tsüngrem atema ni taküm alitsü asoshi ozüng ajanga ni ozüng nungi pila-a asü.
20 Kechiaser Khrista den ni kangki nung angenlokogo, aser ni ano taküm mali, saka kü dak Khrista taküm alir, aser Tsüngrem Chir shibai ni meim aser pei sasa ni atema agütsü, pa dak tamang agi ni taküm alir.
21 Ni Tsüngrem taochi amajok mekümdaktsür, kechiyong ozüng ajanga nisüng kaji Tsüngrem tsüngdang temeshi kümra, aji agi Khrista amajok nung asü ta sayur.
Tsüngremer Taochi Osangtajung 3:1-4:31
GALATIA 3
Ozüng Aser Tamang 3:1-14
1 Oh nenok tamashi Galatia nungertem! Nenok kechi agi puadaktsü? Nenok shir jakdang Yisü Khrista kangki nung angenlokba shisang shisanga sayuogo;
2 nenok nungi ni ya metetnür. Nenoki ozüng mapatem benshiba agi asü mesüra tamang ajanga angashiba agi nenoki Tanela agizük?
3 Nenok yamai tamashi asü no? Nenoki Tanela nung tenzüker tang joko shi agi temdaktsür no?
4 Nenoki amajok nung paikati kangshia aru no? Yamaji ataloka alinungbo itemji atangji amajok küma laluogo.
5 Anungji shibai nenok nem Tanela agütsü aser nenok rongnung tesüngmangtsü sayatenyatem inyak, aji nenoki ozüng mapatem benshiba agi asü mesüra angashir amang nung pai aji inyak?
6 Oda, "Abrahami Tsüngrem dak amang aser aji pa asoshi temeshiba ta züngshi."
7 Anungji shiri amanger parnok Abraham chirtem ta nenoki metetang.
8 Aser Tsüngremi Bendangertem tamang ajanga metendaktsütsü ta Laishibai akhidang ngua, Abraham dang tamasa Osangtajung sayutsüngia yamai ashi. "Na ajanga kin ajak moatsütsü."
9 Anungji shiri amanger parnokji tamang akasang Abraham den moatsür.
10 Kechiyong kwikati ozüng benshiba agi alir parnok ajak atakatem kübok alir. Kechiaser ya zülua lir, "Kwikati Ozüng kaket nung zülua aliba ajak tashi anga-a mebenshir parnok atakatem Iir."
11 Saka ozüng agi Tsüngrem tsüngdang shinga memetendaktsür ta meteta lir. Kechiyong tamang agi temeshipur taküm alitsü.
12 Saka ozüngji tamang dak metaloka mali, saka Lai nung ashir, "Nisüng shibai ozüng mapatem tashi anga-a inyaker itemjagi pa taküm alitsü."
13 Khrista Yisü nung Abraham temoatsü Bendangertem madaki arutettsü asoshi, aser asenoki tamang agizüktettsü asoshi,
14 Khrista Yisü nenok atema atakatemba aküm nung pai ozüng atakatem nungi asenok alangzükogo.
Ozüng aser Tenangzükba 3:15-20
15 Adianutem, ni nisünger tatishitsü ka shinur, Kodang nisünger tsüngda nung tezüngzüktepba ka ayur, aji akangteper külenbo, shingaia aji amajok mekümdaktsür mesüra talia mebendenloker.
16 Tang Tsüngremi Abraham aser pa metsü den tenangzükbatem yanglu. "Aser Laishibai pa metsütem dang" ta mashir koba tetezü nisüng aika, saka iba jagi, "Ne metsü dang" ta ashir, koba tetezü nisüng ka shiba Khrista lir.
17 Aser ni ya ashir; Tsüngremi tezüngzüktepba akhidang akangdaktsür kulen küm noklang pezü ser semer renteter, aruba ozüng agi aji mesamadaktsür, mesüra tenangzükbaji ozüng agi amajok makümer.
18 Kechiyong ozüngji senmang agi süra, aji ano tenangzükba agi masü, saka aji Tsüngremi tenangzükba agi Abraham nem agütsüogo.
19 Ajangla ozüngji kechiba aru? Koba metsü dang tenangzükbaji agüja jembi, pa maru tashi, tai benshi nung ozüngji agütsü; aser ibaji kotak tenyartem ajanga tetsüngdai aiba teka agi renemdaktsü.
20 Saka nisüng ka dang alidakjibo tetsüngdai air ka tenüngdaktsü maka. Aser Tsüngremji ka dang lir.
Alarlem aser Techirtem 3:21-4:7
21 Ajangla ozüngji Tsüngremer tenangzükbatem anema ali asü? Yamaji kodanga masü. Kechiyong nisüng nem taküm agütsütettsüsa ozüngji ali akübo, iba ozüng jagi temeshiba adokdaktsür lila.
22 Saka Yisü Khrista dak tamang ayurtem nem kechi tenangzükba agüja ali, ibaji shirisa amanger parnok nem agütsütsü asoshi alima ajongaji temenen kübok puoka Iir ta Laishibai metetdaktsür.
23 Tamang marudang, oda tamangji jungkai madokdaktsü tashi asenokji ozüng kübok puoka liasü.
24 Anungji tamang agi asenok metendaktsütsü asoshi Khrista dangi anitsü ozüngji asen leniba küma liasü.
25 Saka tang tamang aru nung, asenok joko ozüng leniba kübok mali.
26 Kechiyong Khrista dak tamang akaba ajanga asenok Tsüngrem chirtem lir.
27 Kechiyong nenok shirsa Khrista nung baptiogo, nenok Khrista dak kübuogo.
28 Yihuda nungera masü Grik nungera masü, alara masü, nüjia masü, tebura masü, tetsüra masü, kechiyong nenok ajak Khrista Yisü nung ka dang lir.
29 Aser nenok Khrista nübur süra, ajangla nenok Abraham semchirtem lir aser tenangzükba amato nenok senmangertem lir.
GALATIA 4
1 Saka senmangerji rongsen ajonga madak kibur liaka, pa tanur asüdangbo pa alar dang nungi kecha balaka masü.
2 Saka tebui süktettküba anogoji matong tashi paji anebalurtem aser ketdangpurtem kübok alir.
3 Aji oda asenok kodang tanur liasü asenoka alima amato tanelatem kübok alar küma liasü.
4 Saka kodang tabensaba mapangji aru, tetsür ka agi asoba, aser ozüng kübok asoba oda Tsüngremi pei Chir yok.
5 Oda ozüng kübok alirtemji alangzüktsü asoshi aser Tsüngrem chirtem kümdaktsüba agizüktsü asoshi,
6 aser nenok pa chirtem asünung, aji sayutsü asoshi Tsüngremi pa Chir Tanela asenok mulungjangi yok, aser iba Tanelai "Aba, Oba" ta ayimtener.
7 Anungji na joko alar ama masü, saka techir lir aser techir ka süra Tsüngremi na pa senmanger kümdakja lir.
Pauli Galatia Nunger Indang Bilemba 4:8-20
8 Saka taoba mapang nung kodang nenoki Tsüngrem memeteti liasü, idangji shir yimya agi tsüngremtem masü, parnok kübok nenok alar ama liasü.
9 Saka tang nenoki Tsüngrem meteta akümdang, mesüra oda Tsüngremi nenok meteta akümdang kodasür item tashi mait atamata tanelatem dangi meyipa or külen parnok kübok nenoki tanaben alar ama küma Iinur?
10 Nenoki anogotem, ita tsüngküm mongpu aser küm, item kar nung anemponga amunger.
11 Nenok asoshi ni kechi mapa inyak aji amajok nung inyak asü ta, ni nenok asoshi shisa bulua bilemer.
12 Adianutem, ni ama kümang ta ni mepishir, kechiaser nia nenok ama küma lir. Nenoki kü dak tai kecha meinyak.
13 Saka ni temang nung mokokmin asünung, ni tamasa nenok dang osangtajung sayutsüngi ta nenoki metet.
14 Aser kü tiaji nenok madang tetendangba ka saka, nenoki ni matala mesüra mesensatsü, saka niji Tsüngrem tenyar ka ama oda Khrista Yisü ama nenoki agizük.
15 Tang nenok tepela to kechi aküm? Kechiyong akok asübo, nenoki nenok tenüktem arokteta itemji kü nem agütsütsü mulunga liasü ta ni kuli asür.
16 Anungji ni nenok dang ochi ashi nung, ni nenok tsükchir aküm asü?
17 Item tangar nisüngtem jagi nenok dak temulung kanga agüja sayur. Saka parnok nükjidongji tajung masü; nenok dang parnoki inyakba amaji parnok tsütsü nenokia aria bilema aitdaktsütsü asoshi, parnoki aginubaji oda nenokji onok nungi piladaktsütsü asoshi dang lir.
18 Aser ni nenok den alidang dang masü nükjidong tajung asoshi tangartem atema teti temulung agütsütsüji junger.
19 Kü temeimba tila tanurtem, nenok dak Khristaji madoktet tashi tetsür nuso kangshiba ama ni nenok asoshi tanaben kangshir.
20 Nenok tsütsü kü yimyayimpong ni balaka melenshitsü asoshi ni tang mapang nunga nenok rongnung dena alia ta dang sünüali. Kechiaser nenok indang ni kanga shisa bulua ratar.
Hagar aser Sara Tatishitsü 4:21-31
21 Nenok ozüng kübok linürtem, kü dang shiangjo, nenoki ozüngji mangali ma?
22 Kechiyong ya zülua lir, Abraham techir ana liasü, alartsür agi asoba ka aser nüjitsür agi asoba ka.
23 Saka alartsüri asobaji shi amato aso aser nüjitsüri asobaji tenangzükba ajanga aso.
24 ltem tetezü O kar, tetsür ana, jagi tezüngzüktepba O ana sayur; ka Sinai tenem nungi arur aser alar tanur asor.
25 Ibaji Hagar, aser iba Hagarji Arabia nung aliba Sinai tenem lir, aser aji tang aliba Yirusalem yimti tatishitsü lir, kechiyong la pei chirtem den külemi alar tia nung lir.
26 Saka temalen aliba Yirusalemji nüji tatishitsü lir. Ibaji asen tetsü.
27 Kechiyong ya zülua lir: "Na tapungla aser tanur masola pela-a liang, Na nuso ashitsü matula, ola agüjang aser ayimtenang. Kechiyong kinungpu aliba tsür dangbo, kija alir tsür tanur tali lir."
28 Aser adianutem, Isak amato asenok tenangzükba chirtem lir.
29 Saka alemli kechi koda shi amato asoba tanuri Tanela agi asoba tanur rishikangshi yamaji tanga lir,
30 Saka Laishibai kechi ashir? "Alartsür aser la chirji endokang. Kechiyong alartsür chiri nujitsür chir den senmang mamangtsü."
31 Anungji adianutem, asenok alartsür chirtem masü, saka nujitsür chirtem lir.
Khristan nüji aser teinyaktsü 5:1-6.10
GALATIA 5
Khrista Nung Nüjiba 5:1-15
Nüjiba asoshi Khristai asenok nuji kümdaktsüogo. Anungji akang akanga noktakang aser joko tanaben alar tapuba süngra nung tapu.
2 Ajiang, nenok temejeptokertem kümra, Khrista agi nenok tajangzük maka ta ni Pauli nenok dang ashir.
3 Aser temejeptokba shia dang, pai ozüng yimsü ajak benshitsü pa sentsü tsüa lir ta ni tanaben kuli agutsür,
4 Nenok ozüng agi metendaktsütsü merangertem Khrista nungi pila-a lir; taochi nungi nenok tsüka lir.
5 Kechiyong tamang agi tanela ajanga asenoki temeshiba teimla asoshi ata-a alir.
6 Kechiyong Khrista Yisü nung temejeptokba kecha balaka mali; saka temeim ajanga tamangi mapa inyakbaji dang tongtibang lir.
7 Nenoki jungjunga asemya liasü, nenoki ochibaji tashi mangadaktsütsüsa shibai nenok songtem?
8 Shibai nenok aja, pa nungi iba ama temesüzükba maru.
9 Piyazü tila ka agi am rangben pokraka atudaktsür.
10 Nenoki kü tebilemba tashi angaba dang nungi tanga tebilemba indang kecha mebilemtsüla ta ni tamang kanga akar. Saka shibai nenok nem timtem agütsür paji shibasa südir sang pai obendangbaji angutsü.
11 Saka adianutem, temejeptoktsüba indang ni ano sayutsüngira, ni kechiba ano rishikangshitsü? Yamaji inyak asübo ni kangki indang sayutsüngiba nungi timtem melila.
12 Shiri nenok ratadaktsür, ni parnok pei sasa meshimeshia rangtokdaktsünur,
13 Adianutem, nüjiba asoshi nenok aja, saka iba nüjibaji nenok shi inyaknülen inyaktsü asoshi dang tamshima, saka temeim agi kati ka den tenzüktepang.
14 Kechiyong O ka nung ozüng ajak ataloker, iba oji ya: "Nai ne kiyonger dang pei ama meimang."
15 Saka nenoki shiruru ama kati ka den tepu agi nguteper aser chiteper süra kati ka mechimatsü kümdangang.
Tanela Tejang aser Shi Mapatem 5:16-26
16 Saka nenoki Tanela agi jajaang, aser shi tejangrabatemji tatalokdaktküma.
17 Kechiaser shi tejangrabaji Tanela anema lir, kechiyong iba anaji kati ka anema lir. Anungji nenoki inyaknübaji nenoki meinyakteter.
18 Saka nenok Tanela nem anitaktsüra, nenok ozüng kübok mali.
19 Saka shi mapatem jungkai adoka lir, itemji ya: nüktapangta, memerükba, jabujariba.
20 Süngyanglu külemba, arasenba, tsükchitep, rarabangsen, nükmerem, mit adokba, pei ajung dang asaba, obang mapu, lemsatepba,
21 tenükshiba tepsetba, yi mesepba, kimakba aser yamala. Shiri ibala benshidir parnoki Tsüngrem Yimli senmang mangutsü ta ni kechi koda nenok tejaklen kümdangdaktsü yamaji tanga ni nenok kümdangdaktsür.
22 Saka Tanela tejang itemi: temeim, tepela tesünep, taremzük, kümli tajung, tejungnü, temulung lemtetba,
23 ajemaluba, pei sasa azüokba. Item anema tanga ozüng kecha mali.
24 Aser shir Khrista Yisü nüburtem lir, parnoki shi-azü taginüba aser tejangrabatem kangki nung angenlokogo.
25 Tanela agi asenok taküm lira, asenoki Tanela agi ano jajadi.
26 Asenoki kati ka mejashidaktsüli mesüra mokokaji melidaktsüli, mesüra tiak mesangli.
GALATIA 6
Kati Ka Khu Bentepang 6:1-10
1 Adianutem, nisüng ka langka tai nung pura, nenok shir Tanela taküm jenjang nung lir, nenoki iba nisüngji ajemaluba tanela nung melenshidakjangma. Nenok matitang daktsütsüsa nenok pei sasa tendangang.
2 Kati ka den khu bentepang, aser aji oda Khrista ozüng atalokdakjang.
3 Kechiyong nisüng kati kodang pa kecha masü sürnung paji langka ta bilemer, pai pei sasa küakoktsür.
4 Saka nisüng shiai pei mapa tendangang, idangji pi indang masü, pai pei indang dang tenüngsang angutsü.
5 Kechiyong nisüng shiai pei khu abentsüla.
6 Saka shiba dang ochi sayua lir pai oset tajung ajak tesayur den lemsatepang.
7 Tekülakokdaktsü, Tsüngremji mezüngrneshi tesü. Kechiyong kechisa nisüngi prokdir ajisa pai meyipa arutsü.
8 Shibai pei shi nung prokdir, pai shi nungi tesamaba angutsü, saka shibai Tanela nung prokdir, Tanela nung teti taküm angutsü.
9 Aser asenoki tajung inyakba nung : melakli, kechiyong asenoki temulung makai mekümra, mapang shitak nung arutsü, 10 Anungji asenoki mapang ajak nung inyaklen lira, nisüng ajak asoshi aser tongtibangsa tamangertem asoshi tajung inyakdi.
Tatem O 6:11-18
Tatem Tekümdangtsü Aser Salem O 6:11-18
11 Koda zülujang tulu agi kü ket agi ni nenok dangi zülur, aji reprangang.
12 Kwikati shi nung ulunür, parnoki nenok mejeptokdaktsütsü meranger, saka Khrista kangki atema parnoki rishikangshi mangutsü asoshi dang aji inyaker.
13 Ano shir temejeptokba akümer, parnoki pei sasa ozüng mebenshir. Saka nenok shi nung ulutsü asoshi parnoki nenokji mejeptokdaktsünür.
14 Saka asen Kibuba Yisü Khrista kangki, koba ajanga kü tsütsü alima aser alima tsütsü ni kangki nung metaogo, iba kangki dak alema ni kecha nunga moulutsü Tsüngrerni nungtemang.
15 Kechiyong nisüng tasen akümba dak alema temejeptokba süshia, memejeptokba süshia kecha mali.
16 Aser kwikati iba ozüng agi jajadir, parnok madak Tsüngremer Israel pur ajak madak tesünep aser yimlibilem sang.
17 Tang nungi shingaia ni timtetemdaktsü kechiyong ni kü mang nung Yisü taraktem abener.
18 Adianutem, asen Kibuba Yisü Khrista taochi nenok tanela den liang. Amen.
1.13: TMa. 8.3; 22.4; 26.9
1.14: TMa. 22.3
1.15,16: TMa. 9.3; 22.6; 26.13
1.18: TMa. 9.26
2.1: TMa. 11.30; 15.2
2.6: Ani. 10.17
1.16: TKe. 143.2; Rom 3.20, 22
3.6: Lip. 15.6; Rom 4.3
3.7: Rom 4.16
3.8: Lip. 12.3
3.11: Hab. 2.4
3.12: Lev. 18.5
3.13: Taz. 21.23
3.16: Lip. '12.7
3.17: Ani. 12.40
3.18: Rom 4.14
3.29: Rom 4.13
4.5-7: Rom 8.15
4.22: Lip. 16.15; 21.2
4.27: Isa. 54.1
4.29: Lip. 21.9
4.30: Lip. 21.10
5.9: 1 Ko. 5.6
5.14: Lev. 19.18
5.17: Rom 7.15
Comments
Post a Comment