ZÜNGDANGBA

ZÜNGDANGBA

    Okila

Israel nungertem Sinai tenem nungi pilar, Tsüngremi parnok dang nangzükba lima anüdoklen arrtsü tashi küm lir shi senzüba otsü indang iba kaket nung tatongi zülua angutsü. Kaket tenüng tetezü: Mosai Israel nungertem Sinai tenem nung mezüngbuba nütsüng yongsük züngdangba agi iba kaket tenüng “züngdangba” Parnok nütsüng- yongsük anaben tashi züngdangba tsüngda nungji Israel nungertem Kanan anüolentip Kadesh Barnea tashi alu. Saka yang nungjagi parnoki tenangzükba limai meitet. Idakji küm aika lir külen parnoki Yordan anüdoklen tsütsüi arua telok kar idakji toktsü, aser idak nungjagi Kanan, lmai aitsü renemshi. 

Timtem tohshi ajurudang Tsüngrem aser pai shimtetba lenir Mosa anema nüburtemi apusoba indang iba kaket nung angur. Tashi mangaba aser tashi maitba nüburtem anema Tsüngrem dak tamang katetbai parnok maneni anebaluba, Mosa taremzük, aser ken ken ain adokba, Tsüngrem aser pei nübur atema bendanga agütsüba, item indang iba kaket nung angur.

    Keta Alibatem 

Israel Nungertem Sinai Tenem Toktsür Apusotsü Renemba      1:1-9:23

Mezüng Nütsüng Yongsük Züngdangba    1:1-54

(a) Mezüngbuba Nütsüng Yongsük Züngdangba     1:1-4:49

Kidong Shia Tanendak Süki Yanglutsü Lemsaba     2:1-34

Aron Jabasotem    3:1-4

Putir Tenzüktsü Levi Kidong Shimba    3:5-13

Levi Kidong Nütsüng Züngdangba    3:14-39

Kohat Kidong Teinyaktsü    4:1-21

Greshon Kidong Teinyaktsü    4:21-28

Merari Kidong Teinyaktsü    4:29-49

(b) Tzüzüng-ozüng Tapu Balala      5:1-8:26

Tanendak Merüktsü Ozüng    5:1-4

Tai Inyakba Temelen Agütsüba    5:5-10

Tamang Makatetba Kinungertem Tendangba    5:11-31

Nazarittem Atema Ozüng     6:1-21

Putir Temoatsü    6:22-27

Tanishirtemi Tenla Agütsüba    7:1-89

Milendong Atalokdak    8:1-4

Levi Kidong Meshiteta Ayuba    8:5-26

(c) Tanabuba Suia Aoba Benjong      9:1-23

Süia Aoba Benjongmung    9:1-14

Tekülemdak Manung Mepet  (Ani. 40:34-38)   9:15-23

Sinai Tenem nungi Moab Tashi     10:1-21:35

Taribi Jangzü    10:1-10

Sinai Toktsüba    10:11-32

Nüburtem Apusoa Aoba     10:33-36

Tabera Nung KIBUBA Mi    11:1-3

Nüburtemi Mosa Anema Nemnemba    11:4-9

Mosai Tsüngrem Dang Nemnemba    11:10-15

Mosai Tanishir Neter Shimba    11:16-30

Opiya Ozü Yokba    11:31-35

Miriam o Aron Merenshiba    12:1-16

Itdangitertem Yokba    13:1-24

Itdangitertem Osang    13:25-33

Nisungtemi Nemnemba    14:1-12

Mosai Nüburtem Asoshi Sarasademba    14:13-25

KIBUBAi Nisungtem Merenshiba    14:26-38

Alinükji Amaktsü Asoshi Mezüngbuba Merangdangba (Taz.1:41-46)    14:39-45

Tarongba Tenla asoshi Ozüng     15:1-21

Memeteti Temenen Menaba Atema Tenla    15:22-31

Amungnü Raksaba Temerenshi    15:32-36

Sütsüng asoshi Ozüng    15:37-41

Kora Dathan aser Abirimi Anema Apusoba    16:1-35

Mi Susa    16:36-40

Aroni Nisungtem Kümzükba    16:41-50

Aron Ajok    17:1-13

Putir aser Levi Mapatem    18:1-7

Putirtem Shilem    18:8-20

Levitem Shilem    18:21-24

Levitem Ter Shilem    18:25-32

Nashi Temerem Aut    19:1-10

Tasü Mang Dak Kongshiba    19:11-22

Kades nung Atalokbatem (Ani.17:1-7)    20:1-6

Meriba Tzü     20:7-13

Edom Chubai Israel Nunger Yoktsü Noktangba    20:14-21

Aron Asüba    20:22:29

Moab nung Tatalokbatem     22:1-32:42

Kanan Nunger Madak Takok Anguba    21:1-3

Yongmenyin Per    21:4-9

Hor Tenem nungi Mosai Aoba    21:10-20

Sihon Chuba aser Og Chuba Akokba (Taz.2:26-3:11)    21:21-35

Moab Chuba Balaam Tajai Yokba    22:1-20

Balaam aser Gado    22:21-35

Balaki Balaam Pelashishia Agizükba    22:36-41

Balaam Shin O Mezüngbuba    23:1-12

Balaam Shin O Tanabuba    23:13-26

Balaam Shin O Tasembuba    23:27-24:13

Balaam Shin O Pezübuba    24:14:14-25

Peor Nung Israel Chirtem    25:1-9

Finehas Tejangraba    25:10-18

Tanabuba Nütsüng Züngdangba    26:1-65

Zelofehad Jaklatem senmang    27:1-11

Mosa Melen Yihusua Shimba (Taz.31:1-8)    27:12-23

Anogoshi Tenlatem (Ani.29:38-46)    28:1-8

Amungnü Tenla    28:9-10

Ita Tasen Tenla     28:11-15

Süia Aoba Benjong Tenla (Ani.12:14-20; Lev.23:5-14; Taz.16:1-8)    28: 16-25

Aluruba Benjong Tenla (Lev. 23:15-22)    28:26-31

Kümsem Benjong Tenlatem (Lev.23:23-25)    29:1- 6

Temenen Pungiba Anogo (Lev.23:26-32)    29:7-11

Semtu Benjong (Lev.23:33-44)    29:12-40

Tatemzükba    30:1-16

Ijip nungi Moabi Aoba Indang O-mulung     33:1-49

Midian Nunger Dak Mang Ayangba    31:1-12

Rarai Aoertem Mayipa Aruba    31:13-24

Temakzükba Osettem Lemsaba    31:25-54

Yordan Anüdoklen Kintem    32:1-42

Ijip Nungi Yordan Tashi Senzüba    33:1-49

Kanan Lima Senmangtsü Indang Temelaba    33:50-56

Yordan ayong majangdang tekümdangtsü ashibatem     33:50-36:13

Kanan Lima Arrtsü    34:1-15

Alinük Lemsatsü Lenirtem Teinyaktsü    34:16-29

Levi Kidong nem Lemzüktsüba Yimtitem    35:1-8

Jenokdak Yimtitem (Taz.19:1-13; Yih.20:1-9)    35:9-34

Tetsürtem Senmang Indang    36:1-13

ZÜNGDANGBA 1

Mezüng Nütsüng Yongsük Züngdangba

1  Israel nungertem Ijip lima nungi pilar küm tanabuba ita tanabuba mezüng anogo nung Sinai lisem lima süki nung Kibubai Mosa dang ashi, 2“Aron nenati Israel nunger ajak kidong aser kinunger balala nütsüng yongsük züngdangang. Tebur ajak tenüng zülutenang, 3küm metsü nungi temalen Israel nunger shir rarai otettsü parnokji züngdangang. 4Kidong shia nungi tongti nisung kaka na yaritsü asüngdangang.

5“Na yaritsü asoshi kidong shia nungi tenüng itemi alitsü: Reuben nungi Shedeur jabaso Elizur, 6Simeon nungi Zurishaddai jabaso Shelumiel. 7Yihuda nungi Aminadab jabaso Nashon. 8Issakar nungi Zuar jabaso Nethanel. 9Zebulun nungi Helon jabaso Elia. 10Yosef chirtem Efraim nungi Ammihud jabaso Elishama, Manase nungi Pedahzur jabaso Gamaliel. 11Benjamin nungi Gideon jabaso Abidan. 12Dan nungi Ammeshaddai jabaso Ahiezer. 13Asher nungi Okran jabaso Pagiel. 14Gad nungi Deuel jabaso Elisaf. 15Naftali nungi Enan jabaso Ahira.” 16Itemi telok nungi shimtetba tebu nunger kidong lenir, parnok tongtipur liasü.

17Mosa aser Aroni parnok pei tenüng agi ajaba nisung itemi agi. 18Aser parnok telok ajak külemi tanabuba ita mezüngnü sentep, aser tongtiba jagi anir küm metsü nungi temalen nisung shia kidong-kidong, kinünger-kinunger tenüng züludaktsü. 19Kibubai Mosa dang melaba ama Sinai lisem lima nung pai parnok tenüng zülu.

20Küm metsü nungi shir temalen tebur shirnok rarai otettsü akok parnok tenüngtemji kidong shia aser kinunger shia tareni Yakob chir tambusang Reuben nungi tenzüka zülu. 21Reuben kidong nungi nisung meyirijang lir-trok noklang pungu.

22Simeon nungi jakzükba tebur küm metsü tema rarai otettsü purtem züngdang. 23Simeon kidong nungi parnok meyirijang tenemer tuku noklang asem. 24Gad nungi jakzükba tebur küm metsü tema rarai otettsü purtem züngdang. 25Gad kidong nungi parnok meyirijang lir-pungu noklang trok ser tenem.

26Yihuda nungi jakzükba tebur küm metsü tema rarai otettsü purtem züngdang, 27Yihuda kidong nungi parnok meyirijang neter pezü, noklang trok.

28Issakar nungi jakzükba tebur küm metsü tema rarai otettsü purtem züngdang, 29Issakar kidong nungi parnok meyirijang tenemer pezü, noklang pezü.

30Zebulun nungi jakzükba tebur küm metsü tema rarai otettsü purtem züngdang, 31Zebulun kidong nungi parnok meyirijang tenemer tenet, noklang pezü.

32Yosef chirtem Efraim nungi jakzükba tebur küm metsü tema rarai otettsü purtem züngdang, 33Efraim kidong nungi parnok meyirijang lir, noklang pungu.

34Manase nungi jakzükba tebur küm metsü tema rarai otettsü purtem züngdang, 35Manase kidong nungi parnok meyirijang semer ana, noklang ana.

36Benjamin nungi jakzükba kidong-kidong, kinunger-kinunger, tongtibai anir tebur küm metsü tema rarai otettsü purtem tenüng zülu. 37Benjamin kidong nungi parnok meyirijang semer pungu, noklang pezü.

38Dan nungi jakzükba kidong-kidong, kinunger-kinunger tongtibai anir tebur küm metsü tema rarai otettsü purtem tenüng zülu. 39Dan kidong nungi parnok meyirijang roker ana, noklang tenet.

40Asher nungi jakzükba tebur küm metsü tema rarai otettsü purtem züngdang, 41Asher kidong nungi parnok meyirijang lirka noklang pungu.

42Naftali nungi jakzükba kidong-kidong, kinunger-kinunger tongtibai anir tebur küm metsü tema rarai otettsü purtem tenüng zülu. 43Naftali kidong nungi parnok meyirijang tenemer asem noklang pezü.

44Mosa aser Aroni züngdangba item rongnung, Israel tanishir nisung terana dena itemi liasü: parnok nisung shiaji pei kidong asoshi liasü. 45Anungji Israel chir ajak, kinüngerkinünger züngdangba, küm metsü nungi temalen rarai aotsü akoker ajak Israel nunger: 46oda parnok ajak züngdangba meyirijang noklang trok ser asem, noklang pungu ser tenem liasü.

47Levi kidongbo parnok rongnungji mezüngsem, 48kechiaser Kibubai Mosa dang ashi, 49“Levi kidongji nai Israel nungertem den külemi mezüngsemtsüla. 50Saka tekülemdak süki aser Ozüng Süngden aser oset-tsüset ajak madak parnokji ketdang asütsü aser itemji anebalutsü asoshi Levi kidongji shimang. Parnoki tekülemdak süki aser iba oset ajak abentsü aser aji meketa anentsü. 51Kodangsa tekülemdak sükiji aenshia odir Levitemi aji agizüktsü, aser kodangsa aji yangludir, parnoki dang yanglutsüla. Tangar kar danga ibaji anasa arura südaktsütsü. 52Israel nungertemi parnoki süki telok-telok aser kibong shia pei yari yanglutsü. 53Saka Israel nungertem madak ni ain adoka malitsü asoshi Levitemi Ozüng Süngden alidak tekülemdak süki nung ozüng süngdenji anebalutsüla.” 54Anungji Kibubai Mosa dang melaba ajak ama Israel nungertemi inyak.

ZÜNGDANGBA 2

Kidong Shia Tanendak Süki Yanglutsü Lemsaba

1 Kibubai Mosa aser Aron dang ashi, 2“Kodang Israel nungertemi tanendak yangludir, nisung shia pei kidong nisan anasa aser pei lemzükba telok rongnung asütsüla. Aser tanendakji süki meketa yanglutsüla.

3“Anüdoklen tsütsü anü adoklen shia Yihuda kidongi pei tanendak kinunger nisan ayutsü. Yihuda kidong nungi tanishirji Amminadab chir Nashon alitsü. 4Par telok züngdangbaji meyirijang neter pezü, noklang trok liasü.

5Iba sülenji Issakar kidong anentsü. Issakar kidong nungi tanishirji Zoar jabaso Nethanel alitsü. 6Par telok züngdangbaji meyirijang tenemer pezü, noklang pezü liasü.

7“Iba sülenji Zebulun kidong anentsü. Zebulun kidong nungi tanishirji Helon jabaso Eliab alitsü. 8Par telok züngdangbaji meyirijang tenemer tenet, noklang pezü liasü. 9Yihuda tanendak tsütsü lemzüktsüba telok züngdangbaji meyirijang noklang ka tir trok noklang pezü liasü. Parnok tama apusotsü.

10“Anüolentip tsütsü Reuben telok nisan alitsü. Reuben kidong tanishirji Sheduer jabaso Elizur alitsü. 11Par telok züngdangbaji meyirijang lir trok noklang pungu.

12Iba sülenji Simeon kidong anentsü. Simeon kidong tanishirji Zurishaddai jabaso Shalumiel alitsü. 13Par telok züngdangbaji meyirijang tenemer tuku noklang asem.

14Iba sülen Gad kidong anentsü. Gad kidong tanishirji Reuel jabaso Eliasaf alitsü. 15Par telok züngdangbaji meyirijang lir pungu, noklang trok ser tenem. 16Reuben tanendak tsütsü lemzüktsüba telok züngdangbaji meyirijang noklang ka tenemer ka noklang pezü tenem. Tapusodang parnokji tanabuba asütsü.

17“Tanendak lemsaba tiyong nungji süki aser Levitem aotsüla. Parnok telok lemsaba amato telok shia pei nisan kübok aotsüla. 18Anüolen tsütsü Efraim telok nisan alitsü. Efraim kidong tanishirji Ammihud jabaso Elishama alitsü. 19Par telok züngdangbaji meyirijang lir, noklang pungu. 20Iba sülen Manase kidong anentsü. Manase kidong tanishirji Pedahzur jabaso Gamaliel alitsü. 21Par telok züngdangbaji meyirijang semerana, noklang ana. 22Iba sülen Benjamin kidong anentsü. Benjamin kidong tanishirji Gideon jabaso Abidan alitsü. 23Par telok züngdangbaji meyirijang semer pungu, noklang pezü. 24Efraim tanendak tsütsü lemzüktsüba telok züngdangbaji, meyirijang noklang kaser ti, noklang ka. Tapusodang parnokji tasembuba asütsü.

25“Anüdoklentip tsütsü Dan kidong telok nisan alitsü. Dan kidong tanishirji Ammishaddai jabaso Ahiezer alitsü. 26Par telok züngdangbaji meyirijang roker ana, noklang tenet. 27Iba sülen Asher kidong anentsü. Asher kidong tanishirji Ochran jabaso Pagiel alitsü. 28Par telok züngdangbaji meyirijang lirka, noklang pungu. 29Iba sülen Naftali kidong anentsü. Naftali kidong tanishirji Enan jabaso Ahira alitsü. 30Par telok züngdangbaji meyirijang tenemer asem, noklang pezü. 31Dan tanendak tsütsü lemzüktsüba telok züngdangbaji meyirijang noklang ka tenemer tenet, noklang trok.”

32Israel nungertem parnok telok telok züngdangba ajak agi meyirijang noklang trok ser asem, noklang pungu tenem. 33Saka Kibubai Mosa dang melaba ama Israel nungertem yongsük nungji Levitembo maten.

34 Kibubai Mosa dang melaba ama Israel nungertem ajaki inyak. Parnoki pei nisan kübok anen aser parnoki apusodang pei kidong aser kinünger den apuso.

ZÜNGDANGBA 3

Aron Jabasotem

1Sinai tenem nung Kibubai Mosa dang jembiba mapang Aron aser Mosa pututem ya lir. 2 Aron jabaso pezü liasü: tambusang tenüng Nadab, Abihu, Eleazar aser Ithamar. 3Parnokji putir mapa nung tenzüktsü asoshi mezüja shimtet. 4 Saka Nadab aser Abihu nati tim masüba memeshiba mi agi Kibuba dang Sinai tenem nung tenla dang Kibubai parnok tepset. Parnok techir maliasü; anungji Eleazar aser Ithamar nati Aron taküm ali tashi putir mapa inyak.

Putir Tenzüktsü Levi Kidong Shimba

5 Kibubai Mosa dang ashi, 6“Levi kidongji tejakleni anir arua, Aron putir tenzüktsü asoshi pa madang yujang. 7Tekülemdak süki mapa ajak inyaktsü asoshi parnoki Aron aser telok ajak asoshi mapa inyaktsü. 8Tekülemdak amshiba osettsüset ajak parnoki anebalutsü, aser Israel nungertem ajak atema tekülemdak mapa ajak parnoki inyaktsü. 9Aron aser par jabasotem nem Levi nungerji bendanga agüjang, kechiaser Israel nunger rongnungi ni tenzüktsü parnok shimteta lir. 10Aron aser par jabasotem putir mapa inyaktsü nai shimang, nisung kari aji inyaktsü merangra pabo südaktsütsü.”

11 Kibubai Mosa dang ashi, 12“Israel tsürtemi asoba mezüng jabaso ajak melena ni Levi kidongji shimtetogo; parnokji kü meyong alitsü. 13 Kechiaser mezüng asoba ajak kü meyong lir. Ijip lima ni mezüng asoba ajak tepsetba anogo nung Israel nung mezüng asoba nisung aser shiruru ajak ni asoshi meshitet; parnokji kü meyong alitsü. Ni Kibuba lir.”

Levi Kidong Nütsüng Züngdangba

14 Kibubai Sinai lisem lima nung Mosa dang ashi, 15“Levi kidongji kinunger shia züngdangang, tebur shia ita ka tain nungi temalen züngdangang.” 16Kibuba o amato Mosai parnokji züngdang. 17Itemi Levi jabasotem: Gershon, Kohat aser Merari. 18Itemi Gershon dak jakzükba kidong: Libni aser Shimei. 19Kohat dak jakzükba kidong: Amram, Izehar, Hebron aser Uzziel. 20Merari kidong: Mahli aser Mushi. Itemji Levi kidongtem kinunger shia balala.

21Libni kidong aser Shimei kidongji Gershon nungi jakzük. 22Ita ka tain nungi temalen züngdangba tebur yongsük ajak agi meyirijang tenet ser noklang pungu liasü. 23Gershon kidongtemji tekülemdak süki tesülen anüolen tsütsü anentsü. 24Gershon kidong tanishir Lael jabaso Elisaf alitsü. 25Sentep süki, iba nembangba sü aser kishi tetongdangbaji parnoki reprangtsüla, 26aser kimalen teyindangbatem, tekülemdak süki aser tenladak dena kimalen aliba kishi asoshi tetongdangba, iba lisü aser iba mapa asoshi ajak reprangtsü.

27Kohat nungi Amram kidong, Hebron kidong aser Uzziel kidong jakzük. 28Ita ka tain nungi temalen tashi tebur ajak züngdangba yongsük ajak agi meyirijang ti ser noklang trok; 29parnokji süki anüolentip tsütsü anentsüla. 30Parnok tanishibaji Uzziel jabaso Elizafan alitsü. 31Tezüngzüktepba süngden, langbang, milendong atalokdak, tenla sabang, putiri temeshidak amshiba osettsüset, tetongdangba aser iba asoshi mapa ajak parnoki reprangtsüla. 32Levitem rongnung Aron putir jabaso Eleazar tekülemdak repranger ajak madak tanishir tongtiba alitsü.

33Merari nungi Mahli kidong aser Mush jakzük. 34Ita ka tain nungi temalen tashi tebur ajak züngdangba yongsük ajak agi meyirijang trok ser noklang ana. 35Merari kidong tanishir Abihal jabaso Zuriel, tekülemdak süki anüdoklentip tsütsü parnok anentsü. 36Süki süngtsük, iba tarangtsü, iba tongshi, tesembangtsü aser osettsüset ajak aser mapa ajak; 37kimalen meketa tongshitem, tesempangtsü, tazüngtsütem aser item lisü Merari jabasotemi reprangtsü.

38Mosa, Aron aser par jabasotem parnoki süki anüdoklen tsütsü anentsü. Israel nunger ajak tenüng nung parnoki tekülemdak mapa inyaktsü. Nisung kari iba mapa inyaktsü merangra pabo südaktsütsü. 39Kibubai Mosa dang melaba ama Levi kidong ita ka tain nungi temalen tashi tebur yongsük ajaki meyirijang metsür ana liasü.

Israel Chir Mezüng Asoba Melen Levitem Agiba

40 Kibubai Mosa dang ashi, “Israel nunger mezüng asoba tebur ita ka tain nungi temalen ajak züngdangang aser parnok tenüng züluang. 41Israel nunger rongnung mezüng asoba ajak melena Levitemji agiang, aser Israel nunger mezüng mepuba kiset shiruru melena Levitem meyong kiset shiruruji agiang.”

42 Kibubai melaba ama Mosai Israel nunger yongsükji züngdang, 43Mezüng asoba Israel nunger ita ka tain nungi temalen parnok ajak agi meyirijang metsürana noklang ana ser neter asem liasü.

44 Kibubai Mosa dang ashi, 45“Israel nunger mezüng asoba ajak melena Levitem aser parnok kiset shiruru shimtetang. Levitemji kü meyong alitsü. Ni Kibuba lir. 46Mezüng asoba Israel nunger shirnok Levitem dang nungi noklang ana neter asem agi timba lir, parnoki alangzüktsüla. 47Nisung shia asoshi shekel pungu sarutsü, 48aser aji Aron aser par jabasotem nem agütsütsüla.” 49Levitem dak tali koba nütsüng liasü, parnok alangzükba senji Mosai agi, 50Israel nunger mezüng asoba nungi pai senji agi aser aji shekel meyirijang ka noklang asem ser roker pungu liasü 51Mosai iba senji Aron aser par jabaso nem agütsü.

ZÜNGDANGBA 4

Kohat Kidong Teinyaktsü

1 Kibubai Mosa aser Aron dang ashi, 2“Levi chirtem rongnungi Kohat jabasotem kidong, kidong aser kinunger shia züngdangang. 3Küm semer nungi tenem tain tashi parnokji züngdangang. 4Sentep süki temeshitiba oset-tsüsetji Kohat jabasotemi anebalutsü. 5Kodang tanendakji aenshidir, Aron aser par jabasotem telungi aitsü aser tetongdangba meibaji agizüka aji agi ozüng süngdenji nembangtsüla. 6Ibaji shiküp tajung agi meibangtsüla, iba manung anüng sentsü sü amungloktsü aser idakji süngra enoka yanglutsüla.

7“Kibuba dang chiyungtsü tenlaba langbang manung parnoki anüng sentsü sü ka alemtsüla, iba manung aosu, chikok-chisang, susa tajemtsü tenla asoshi marok aser liangmesen arongba po ayutsüla, aser teti aliba amtsükji langbang manung alitsüla. 8Aser item madak parnoki jakjaa meremba sü amloktsüla, aser aji shiküp agi nembangtsüla aser iba manung süngra enoka ayutsüla.

9“Anüng sentsü sü ka agi tesangwa asoshi milendong, milen, mijepru, misü ayuba aser totzü bongdang ajak dena parnoki nembanga ayutsüla. 10Ajiser oset-tsüset ajakji shiküp agi nembanga ayutsüla, aser aji tapuba satem ka nung ayutsüla.

11“Hon tenladak manung parnoki anüng sentsü sü ka alemtsüla aser aji shiküp agi nembangtsü aser süngraji enoktsü. 12Tekülemdak amshiba chipo-anpo ajakji parnoki abentsüla, aji anüng sentsü sü ka nung aleper shiküp agi nembanger satem manung ayutsüla. 13Tekülemdak nungi autji parnoki endoktsüla, aser nakrema meremba sü ka iba manungji lemloktsüla. 14Iba manung tenladak amshiba chipo-anpo ajak miteptsü shijok, tateptsü aser susaji ayutsüla. Item ajakji shiküp agi nembangtsü aser süngraji enoktsü. 15Kodang tanendakji aenshidir, Aron aser par jabasotem tekülemdak amshiba temeshi oset-tsüset ajakji nembanga renemdir, Kohat jabasotemi arua aji abentsüla. Saka parnok süadoka lir ta tekülemdakji parnoki mekongshitsüla. Kohat jabasotemi sentep süki nung aliba oset itemji abentsüla.

16“Aron putir jabaso Eliazari tesangwa asoshi totzü, teronem menemba liangmesen, teti aliba chiyungtsü, aser temezütsüba totzü item ajakji anebalutsüla. Tekülemdak süki aser iba nung oset ajak madak pai ketdang asütsüla.”

17 Kibubai Mosa aser Aron dang ashi, 18“Levi nunger rongnung Kohat kinungertem tejentokma. 19Saka parnok kodang temeshitiba osettem anasai arudir, parnok masütsü asoshi yamai inyakang: Aron aser pa jabasotem aitsü aser nisung shia nem pei mapa aser khu agüjang, 20saka Kohat kinungertemi putirtemi khu renembaji reprangi ira, parnok asütsü.”

Gershon Kidong Teinyaktsü

21Aser Kibubai Mosa dang ashi, 22“Gershon jabaso kidong kidong, kinunger kinunger, tenüng züngdangang, 23sentep süki nung mapa inyaktsü apusoa airtem küm semer nungi tenem tashi tain nai parnok züngdangang, 24Tenzükba aser khu abenba nung ya Gershon kinunger mapa lir: 25Parnok tekülemdak süki teyindangba, sentep süki temeiba aser iba temalen aliba shiküp tenembangba, sentep süki kikümbang tetongdangba; 26aser kimalen iloka alibatem, kimalen kiküm lenmang tetongdangba koba nung tekülemdak süki aser tenladak dena lir, aser item lisü, aser iba mapa atema oset ajak item jagi kechisa inyaktsü ali, iba nung parnok tenzüktsüla. 27Gershon jabasotem teinyaktsü mapa ajak, parnoki abentsü khu ajak nung aser parnoki inyaktsüba ajak nung, Aron aser par jabasotemi melaba kübok alitsü aser nenoki parnok nem par khu ajak nungloka yujang. 28Sentep süki nung Gershon jabaso kinunger mapa ibai lir; aser Aron putir jabaso Ithamar kübok parnok ketdang kümdaktsütsüla.

Merari Kidong Teinyaktsü

29“Merari jabasotem asoshi parnoki kidong-kidong, kinunger-kinunger nai parnok züngdangang. 30Sentep süki nung mapa inyaktsü mapai air nisung shia küm semer tema nungi küm tenem tashi tain nai parnok züngdangtsüla. 31Sentep süki nung parnok khuji ya: tekülemdak süki süngtsüktem, iba tarütangtsü, tongshi, aser item tesembangtsütem, 32aser kimalen meketa tongnütem, aser item tesembangtsü aser tazüngtsü, aser item lisü, oset-tsüset ajak item asoshi kechisarena dena, aser parnok mapa tenüng jaa parnoki abentsü khu nenoki ashitsüla. 33Aron putir jabaso Ithamar kübok Merari jabaso kinungertemi sentep süki nung inyaktsüba parnok mapa ajakji ya lir.”

34Mosa, Aron aser telok tanishirtemi Kohat nunger kidong-kidong, kinunger-kinunger züngdang. 35Sentep süki nung mapa asoshi, mapai air nisung shia küm semer nungi temalen küm tenem tashi, 36aser shirnok kinungertem züngdang, itemji meyirijang ana, noklang tenet ser tenem liasü. 37Mosa teka ajanga Kibubai melaba ama, Kohat kidongtem sentep süki nung mapa inyaker ajak Mosa aser Aron nati züngdangba parnok itemi lir.

38Gershon jabasotem parnok kidong-kidong, kinunger-kinunger züngdangbaji, 39sentep süki nung mapa inyaktsü asoshi mapai air nisung shia küm semer nungi tema küm tenem tashi tain, 40oda parnok kidong-kidong, kinunger-kinunger züngdangba meyirijang ana, noklang trok ser semer liasü. 41Kibubai melaba ama sentep süki nung tenzüker ajak Gershon jabasotem parnok kidong-kidong, kinunger-kinunger Mosa aser Aron nati züngdangba itemi lir.

42Merari jabasotem parnok kidong-kidong, kinunger-kinunger züngdangbaji, 43sentep süki nung mapa inyaktsü asoshi mapai air nisung shia küm semer nungi tema küm tenem tashi, 44oda parnok kidong-kidong, kinunger-kinunger züngdangbaji meyirijang asem, noklang ana liasü. 45Mosa teka ajanga Kibubai melaba ama Merari jabasotem parnok kinunger-kinunger Mosa o Aron nati züngdangba itemi lir.

46Mosa, Aron aser Israel nunger tanishirtemi Levi nunger kidongkidong, kinunger-kinunger ajak züngdang, 47Sentep süki nung khu abentsü mapa, tenzüktsü mapai air nisung shia küm semer tema nungi küm tenem tain tashi, 48oda parnok züngdangba meyirijang ti noklang pungu ser tir liasü. 49Kibubai Mosa ajanga melaba ama nisung shia pei mapa aser kechi khu abentsü aji parnok nem lemsa-a agütsü. Yamaji Kibubai Mosa dang melaba ama parnok züngdang.

ZÜNGDANGBA 5

Tanendak Merüktsü Ozüng

1 Kibubai Mosa dang ashi, 2“Zütsüra aketer mesüra pei mang nungi langka yima aluba mesüra tasümang dak kongshiba agi menena akümba, yamala nisungtemji tanendak nungi aridokang ta Israel nungertem nem ozüng agüjang. 3Tebur saka tetsür saka tanendak kimalen parnokji aridokang, anungji tanendak koba nung ni lir, aji parnoki memenentsütsü.” 4Israel nungertemi yamaji inyak, parnok tanendak kimaleni yokadok. Kibubai Mosa dang ashiba ama parnoki inyak.

Tai Inyakba Temelen Agütsüba

5  Kibubai Mosa dang ashi, 6“Israel nunger dang shiang, tebur mesüra tetsür kati tangar nisung anema aibelenra aser Kibuba anema tamang makatettsüsa inyakra iba nisungji tai alitsü, 7aser pai pei tai nangzüktsüla. Pai pei tai ajak menoktsüla, aser shiba dak pai tamajung inyak pa nem shilem pungu nung ka tali enoksemer agütsütsüla. 8Saka shiba nem tai asoshi temenok agütsütsü ali, iba nisung sosem melira temenok agütsübaji Kibuba meyong alitsü, aser aji putir nem agütsütsüla. Iba den pa temenen pungitsü asoshi san tebong ka alitsü. 9Israel nungertemi temeshi oset kobasa putir dangi bener arur aji pa meyong alitsü.

10“Nisung shia temeshi sempettemji pa meyong alitsü, saka putir nem koba agütsüogo, ajibo putir meyong alitsü.”

Tamang Makatetba Kinungtsütem Tendangba

11 Kibubai Mosa dang ashi, 12“Israel nungertem dang shiang, nisung ka kinungtsü aibelena oa pa anema temenen menara, 13oda tangar den nüktapangtara aser aji pei kinungpu nungi miima lira, la menena kümaka la anema kuli melira kechiaser la jeptaka mapu, 14saka la kinungpui la dak tenük merema la menena meliaka la dak temulung melemra 15idangji pai pei kinungtsüji putir dangi anir aotsü; pai barley am seret ka la asoshi tenla abentsüla. Iba nungji totzü meshioktsüla mesüra liangmesen meinoktsüla, kechiaser ibai temulung malemba chiyungtsü tenla lir, oda temenen bilemtetdaktsütsü chiyungtsü tenla lir.

16“Putiri la anasa anir arua Kibuba madang yutsütsü; 17aser putir jagi ali po ka nungi temeshi tzüji agitsü, aser tekülemdak süki atem nung aliba auyijia agitsü aser aji tzü nungji enoktsütsü. 18Putir jagi tetsürji Kibuba madang noktaka yutsür, la kolak nung kuji saladaktsütsü, aser tebilemtettsü tenla, tenük meremba chiyungtsü tenlaji la ket nung amdaktsütsü, aser atakatem kümdaktsüba tzü takuji pa teka nung ama atatsü. 19Idangji putiri tetsürla nemji azüngashidakja la dang ashitsü, Tebur shingaia ne den memedemi lira, aser nebuba kübok lira nai aibelena melira, iba atakatem bener aruba tzü yagi ne dak tamajung kecha tatokdaktsü. 20Saka nebuba den lia nai aibelena lira aser tangar tebur den medemba agi na menena lira; 21putiri tetsürla nemji atakatem aser azüngashidakji ashitsü, Kibubai na tansütsü ka kümdakjang, ne tepi kongrepa aser ne tepok awakba agi na nübur rongnung atakatem kümdakjang. 22Tang iba atakatemtsüba tzü ya ne tepi kongrepba aser ne tepok waka ne nu mendeni idakjang, aser tetsür jagi langzütsü, ‘Ni mulunger, Kibubai yamaji inyakangma.’

23“Putiri item atakatemji kaketlong ka nung zülutsü aser aji tzü taku nungji shitoktsü. 24Aser atakatem kaoba tzü takuji la nem jemdaktsütsü, aser la dak aji agi kangshidaktsütsü. 25Putir jagi temulung malemba chiyungtsü tenlaji tetsürla teka nungi agitsü, aser Kibuba madang chiyungtsü tenlaji ayipshitsü, aser aji tenladaki bener arutsü. 26Aji bilemtettsü asoshi putir jagi chiyungtsü tenlaji tekapu ka sünga amtsü aser aji tenladak arongtsü, aser tesülen tzüji tetsürla nem jemdaktsütsü. 27Kodang pai la nem tzüji jemdaktsüdir, la menena lira aser la kinungpu anema tai mena-a lira, atakatemdaktsüba tzüji la daki aitsü aser taku akümtsü, aser la tepok awaktsü aser la tepi kongrepa akümtsü; aser tetsürji pei nübur rongnung atakatem ka alitsü. 28Saka tetsürji memeneni meshiteta lira, la dak kecha masütsü, aser lai ano tanur asotsü.

29“Kodang kinungtsüi pei kinungpu kübok lir nung mashileni oa menena kümdir, ibai temulung malemba ozüng lir. 30Mesüra tebursang dakji temulung malemba shisatsü ka arua, pai kinungtsü dak temulung melemi kümdir, idangji pai tetsürji Kibuba madang yutsütsüla aser putir jagi iba ozüng ajak la dak inyaktsü. 31Kinungpuji iba nungi merükteta alitsü saka tetsürlai aibelena lira iba taiji lai abentsü.”

ZÜNGDANGBA 6

Nazirittem Atema Ozüng

1 Kibubai Mosa dang ashi, 2“Israel nunger dang shiang, kodang tebur süshia tetsür süshia pei sasa Kibuba asoshi bendanga taküm alitsü Nazirit tatemzükba, oda balaka atemzükba lidir, 3pai pei sasa yi aser mejemtzü nungi pilatsüla. Pai yi tasentzü mesüra mejemtzü tasentzü mesüra tsükmenatzü yi majemtsüla, mesüra tsükmenatzü tajem mesüra takong machitsüla. 4Pa meshiteta aliba anogo tepiyong tsükmenatzü süngjang agi yangluba; telung nung tejang nungi teküp tashi kecha pai machitsüla.

5“Pa meshiteta aliba tatemzükba anogo ajak nungji pa tekolak nung kusünok kecha mataloktsüla; anogo mabensa tashi koba nung pai pa sasa bendanga meshiteta Kibuba asoshi lidir, pa temeshi alitsü. Pai pa ku talang küma adokdaktsütsüla. 6Pai Kibuba asoshi bendanga meshiteta aliba anogo ajak pai tasü mang anasa maotsüla. 7Pai pei sasa tebu atema mesüra tetsü atema mesüra tedi tenu, mesüra teyi tenu atema parnok asüdang memerük makümtsüla. Kechiaser Tsüngrem atema pa pila-a ayuba temaitsüji pa tekolak nung lir. 8Pa bendanga meshiteta aliba anogo ajak nung Kibuba dang pa temeshi lir.

9“Nisung kar aoksa-a pa anasa süadokra, aser pai meshiteta ayuba kuji menena kümdaktsüra, idangji pai pa meshitetba anogo nung tekolak sütoktsüla. Tenetnübuba nung pai aji sütoktsüla. 10Tinübuba nung guduru ana mesüra guduru chanu ana putir dangi sentep süki kishi jagi bener arutsüla. 11Putir jagi ka temenen tenla asoshi, aser kaji tarongba tenla asoshi tenla-a pa asoshi temenen pungitsü, kechiyong tasümang agi pai pa tai mena. Panüjisa pa kolak meshitettsüla. 12Pa bendanga aliba anogo nung Kibuba asoshi pa pila-a alitsüla. Aser san tepong küm ka chanu ka tai tenla asoshi pai bener arutsüla; saka temalen pai bendanga meshiteta aliba anogotemji pai menendaktsü nungji ajibo mezüngsemtsü.

13  “Nazirit atema ibai ozüng alitsü. Kodang pai pila-a aliba anogotemji abensadir, pai tenlaji sentep süki kikümbangi bener arutsüla. 14Aser pai Kibuba nem pa tenla agütsütsüla. Tarongba tenla asoshi küm ka chanu san tepung tarak maket ka, aser küm ka chanu san tetsü tarak maket ka temenen tenla asoshi aser san tepung tarak maket ka yimjung tenla asoshi tenlatsüla. 15Piyazü meinokba amtsük molok ka, amzü tanük totzü den meyoktepba amtsük telong, aser totzü mezür piyazü meinokba amtsük tapu ka, aser iba den parnok chiyungtsü tenla aser parnok tajemtsü tenlatsüla.

16“Putir jagi itemi Kibuba madang agütsütsü, aser temenen tenla aser tarongba tenla agütsütsü. 17San tepungji piyazü meinokba amtsük molok denji Kibuba madang yimjung tenla tepseta tenlatsü. Iba jagi putiri ano chiyungtsü tenla aser tajemtsü tenla agütsütsü. 18Aser Nazariti pa bendanga meshiteta ayuba tekolakji sentep süki kishi züngdang sütoktsü, aser bendanga meshiteta aliba kuji yimjung tenla tepsetba kübok aliba mi manungji enoktsütsü.

19“Kodang Naziriti bendanga meshiteta ayuba kuji sütokdir, putiri pa nem san tepung shi soa aliba nungi tapu ka agiteta, molok nungi amtsük ka aser piyazü meinokba amtsükji agiteta agütsütsü. 20Aser putir jagi itemji ayipshia tenla asoshi Kibuba madang ayipshitsüla. Ayipshiba tenla teku aser sarutenba tepi dena putir asoshi ibai temeshi lir. Iba sülen jiang Nazirit jagi tsükmenatzü yiji ajemtsü akok.

21“Pa pila-a aliba mapang shibai Kibuba dang tenla asoshi tatemzükba ayur Nazirit asoshi ibai ozüng alitsü. Nazirit ozüngi melaba ama pai atemzükbaji pai benshitsüla.”

Putir Temoatsü

22 Kibubai Mosa dang ashi, 23“Aron aser pa jabasotem dang shiang, nenoki Israel nungertem moatsüdang yamai ashitsüla.

24“Kibubai na moajang aser nüka liang; 25Kibubai pa tejak ne dak yalokjang, aser ne dang yimlibilem sayuang; 26Kibuba tejak ne tsütsüi meyipdakjang, aser ne nem tesünep agüjang.

27“Anungji parnoki Israel nungertem rongnung kü tenüng agi ajatsü, idangji ni parnok dang langzütsü.”

ZÜNGDANGBA 7

Tanishirtemi Tenla Agütsüba

1Kodang Mosai tekülemdak sükiji renem, idakji aliba oset ajakji meshiteta pai totzü mezütsü. Ano tenladak amshiba marok-enrok ajak dak totzü mezüja pai meshitet. 2Iba sülen Israel nung tanishirtem, kinungertem, tekolaktem, aser kidong shia nütsüng yongsük züngdangba madak tanishirtemi tenla agütsü. 3Kibuba dang tenlatsü asoshi parnoki talungtsü trok aser nashi pungchi terana, tanishir shia asoshi nashi pungchi ka ka; tanishir ana asoshi talungtsü ka ta bener aru. Parnoki itemji tekülemdak süki madang agütsü.

4Aser Kibubai Mosa dang ashi, 5“Sentep süki nung amshitsü asoshi itemji parnok nungi agiang, aser Levitem nem nisung shia pei mapa yari itemji agüjang.” 6Mosai talungtsütem aser nashi pungchitemji agia aji Levitem nem agütsü. 7Pai Gershon jabasotem nem parnok mapa yari talungtsü ana aser nashi pungchi pezü agütsü. 8Merari jabasotem nem talungtsü pezü aser nashi pungchi ti, parnok mapa yari agütsü. Parnok ajakji Aron putir jabaso Ithamar kübok liasü. 9Saka Kohat jabasotem nem Mosai kecha magütsü, kechiaser temeshi osettemji anebalutsü aser itemji parnok tapubang nung abentsübaji parnok mapa liasü.

10Kodang tenladakji totzü mezüja meshitet, tanishirtemi parnok tenlatem meshitettsü asoshi itemji bener arua tenladak madang yutsü. 11Idangji Kibubai Mosa dang ashi, “Tenladak meshitettsü asoshi anogo shia tanishir shiai pei tenlaji abentsüla.”

12Mezüng anogo nung shibai tenla agütsü, paji Yihuda kidong nungi Amminadab jabaso Nashon liasü; 13pa tenlaji taribi su ka odangba shekel noklang ka ser semer, aser taribi susa ka shekel neter, anapronglaji chiyungtsü tenla asoshi amzü tanük agi sünga liasü; 14teronem menemtsü agi sünga aliba shekel ter atuba hon chikok ka, 15tarongba tenla asoshi küm ka chanu nashi pungchi ka, san tepung ka, küm ka chanu san ka; 16temenen tenla asoshi nabong tepung ka, 17aser yimjung tenla asoshi nashi pungchi ana, san tepung pungu, nabong tepung pungu küm ka chanu san tepung pungu: ibai Amminadab jabaso Nashon tenla liasü.

18Tananübuba nung Issakar tanishir Zuar jabaso Nethaneli tenla; 19pai pei tenla asoshi tekülemdak amshiba amato taribi su ka shekel noklang ka ser semer, aser taribi susa ka shekel neter: anapronglaji chiyungtsü tenla asoshi totzü den meyokteper amzü tanük agi sünga liasü. 20Shekel ter atuba hon susa ka teronem agi sünga liasü; 21nashi pungchi chanu ka, san tepung ka, tarongba tenla asoshi küm ka chanu san tepung ka, 22temenen tenla asoshi nabong tepung ka; 23aser yimjung tenla asoshi nashi pungchi ana, san tepung pungu, küm ka chanu san tepung pungu, nabong tepung pungu ya Zuar jabaso Nethanel tenla liasü.

24Tasemnübuba nung Zebulun chirtem tanishirtem Helon jabaso Eliabi tenla; 25pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü. 26Shekel ter atuba hon susa ka teronem menemtsü agi sünga; 27nashi pungchi chanu ka, nabong tepung ka, tarongba tenla asoshi küm ka chanu san tepung ka; 28temenen tenla asoshi nabong tepung ka; 29aser yimjung tenla asoshi nashi pungchi ana, san tepung pungu, aser küm ka chanu san tepung pungu: ya Helon jabaso Eliab tenla liasü.

30Pezünü buba nung Reuben chirtem tanishir Shedeur jabaso Elizuri tenla; 31pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter, anapronglaji chiyungtsü tenla asoshi totzü den meyoktepba amzü tanük agi sünga liasü; 32shekel ter atuba hon susa ka teronem menemtsü agi sünga; 33tarongba tenla asoshi nashi pungchi chanu ka, san tepung ka aser küm ka tain san chanu tepung ka; 34temenen tenla asoshi nabong tepung ka; 35aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu: ya Shedeur jabaso Elizur tenla liasü.

36Pungunübuba nung Simeon chirtem tanishir Zurishaddai jabaso Shelumeil tenla: 37pa tenlaji taribi su ka shekel noklang ka ser semer, taribi susa ka tekülemdak odangba amato shekel neter: anapronglaji chiyungtsü tenla asoshi totzü den meyoktepba amzü tanük liasü: 38shekel ter atuba hon susa ka teronem menemtsü agi sünga liasü: 39tarongba tenla asoshi nashi pungchi ka, san tepung ka, aser küm ka chanu san tepung ka; 40temenen tenla asoshi nabong tepung ka; 41aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu: ya Zurishaddai jabaso Shelumeil tenla liasü.

42Troknübuba nung Gad chirtem tanishir Deuel jabaso Eliasafi tenla: 43pa tenlaji taribi su ka shekel noklang ka ser semer, taribi susa ka tekülemdak odangba amato shekel neter, anapronglaji chiyungtsü tenla asoshi totzü den meyoktepba amzü tanük agi sünga liasü; 44shekel ter atuba hon susa ka teronem menemtsü agi sünga liasü; 45tarongba tenla asoshi nashi pungchi ka, san tepung ka, aser küm ka chanu san tepung ka; 46temenen tenla asoshi nabong tepung ka; 47aser yimjung tenla asoshi nashi pungchi ana, san tepung pungu, nabong tepung pungu küm ka chanu san tepung pungu: ya Deuel jabaso Eliasaf tenla liasü

48Tenetnübuba nung, Efraim chirtem tanishir Ammihud jabaso Elishamai tenla: 49pa tenlaji taribi su ka shekel noklang ka ser semer, taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 50shekel ter atuba hon susa ka teronem menemtsü agi sünga liasü; 51tarongba tenla asoshi nashi pungchi ka, san tepung ka, aser küm ka chanu san tepung ka; 52temenen tenla asoshi nabong tepung ka; 53aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu: ya Ammihud jabaso Elishama tenla liasü.

54Tinübuba nung Manase chirtem tanishir Pedahzur jabaso Gamalieli tenla: 55pa tenlaji taribi su ka shekel noklang ka ser semer, taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 56Shekel ter atuba hon susa teronem menemba agi sünga liasü; 57tarongba tenla asoshi nashi pungchi ka, san tepung ka, aser küm ka chanu san tepung ka; 58temenen tenla asoshi nabong tepung ka; 59aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu; ya Pedahzur jabaso Gamaliel tenla liasü.

60Tukunübuba nung Benjamin chirtem tanishir Gideoni jabaso Abidani tenla: 61pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 62shekel ter atuba hon susa ka teronem menemtsü agi sünga, 63tarongba tenla asoshi nashi pungchi ka, san tepung ka aser küm ka chanu san tepung ka; 64temenen tenla asoshi nabong tepung ka; 65aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu; ya Gideon jabaso Abidan tenla liasü.

66Ternübuba nung Dan chirtem tanishir Ammishaddai jabaso Ahiezeri tenla: 67pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 68shekel ter atuba hon susa ka teronem menemtsü agi sünga liasü, 69tarongba tenla asoshi nashi pungchi ka, san tepung ka, küm ka chanu san tepung ka; 70temenen tenla asoshi nabong tepung ka; 71aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu; ya Ammishaddai jabaso Ahiezer tenla alitsü.

72Terkanübuba nung Asher chirtem tanishir Okran jabaso Pagieli tenla: 73pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 74shekel ter atuba hon susa ka teronem menemtsü agi sünga liasü; 75tarongba tenla asoshi nashi pungchi ka, san tepung ka, küm ka chanu san tepung ka; 76temenen tenla asoshi nabong tepung ka; 77aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu; ya Okran jabaso Pagiel tenla alitsü.

78Terananübuba nung Naftali chirtem tanishir Enan jabaso Ahirai tenla: 79pa tenlaji taribi su ka shekel noklang ka ser semer, aser taribi susa ka tekülemdak odangba amato shekel neter; anapronglaji chiyungtsü tenla asoshi totzü den meyoktepba amzü tanük agi sünga liasü; 80shekel ter atuba hon susa ka teronem menemtsü agi sünga liasü; 81tarongba tenla asoshi nashi pungchi ka, san tepung ka, küm ka chanu san tepung ka; 82temenen tenla asoshi nabong tepung ka; 83aser yimjung tenla asoshi nashi pungchi ana, san tepung pungu, nabong tepung pungu, küm ka chanu san tepung pungu; ya Enan jabaso Ahira tenla alitsü.

84Israel tanishirtemi aji totzü mezüja shimtetba anogo nung tenladak meshitetbaji ibai liasü: taribi su terana, taribi susa terana, hon po terana; 85taribi su shia shekel noklang ka ser semer, aser susa shia shekel neter, itemji tekülemdak odangba amato, shekel meyirijang ana noklang pezü liasü; 86teronem menemtsü agi sünga hon susa terana tekülemdak odangba shekel amato, ka ka nung shekel ter: hon susa ajakji shekel noklang ka ser metsü; 87tarongba tenla asoshi nashi pungchi terana, san tepung terana, küm ka chanu san tepung terana, aser item asoshi chiyungtsü tenla: aser temenen tenla asoshi nabong tepung terana; 88aser yimjung tenla asoshi nashi pungchi metsür pezü, san tepung roker, nabong tepung roker, aser küm ka chanu san tepung roker. Tekülemdakji totzü mezüja meshiteter külen tenla agütsübaji itemi liasü.

89Kodang Kibuba den jembitsü asoshi Mosa sentep süki-i ai, idangji taochi menden temalen Ozüng Süngden manung Cherubim ana tsüngda nungi ola jagi pa den jembiba pai angashi. Aser pai pa den jembi.

ZÜNGDANGBA 8

Milendong Atalokdak

1Idangji Kibubai Mosa dang ashi, 2“Aron dang shiang, kodang ni milen tenetji tsüklokdir milendong atalokdak tejaklenji tesangwa agütsütsüla.” 3Aser Aroni yamaji inyak; Kibubai Mosa dang melaba ama, milendong tejaklen sangwatsütsüsa pai milenji tsüklok. 4Tang milendong yanglubaji yamai; temtsüng nungi naro tashi hon agi tsünga liasü. Milendongji Kibubai Mosa dang sayuba tereprangtsü kasa nung yanglu.

Levi Kidong Meshiteta Ayuba

5 Kibubai Mosa dang ashi, 6“Israel chirtem rongnungi Levitemji piladakja parnokji meshitetjang. 7Parnok merükdaktsütsü asoshi nai parnok dang yamai inyakang: temenen pungdoktsü amshiba tzü parnok dak rüklokjang, aser parnok temang ajak kusünok agi ongdokjang, aser parnok süoshi shitokjang aser parnok sasa merüktetdakjang. 8Ajiser parnok nashi pungchi chanu ka agia, aser iba chiyungtsü tenla asoshi totzü den meyoktepba amzü tanük aser nai temenen tenla asoshi nashi pungchi chanu ka agitsüla. 9Levitemji sentep süki madangi anir arua, Israel chirtem telok ajak adenshia alidakji noktakdaktsütsüla. 10Nai Levitemji Kibuba madangi anir arutsüla aser Israel ajaki; Levitem dak teka agi nemettsüla. 11Aroni Levitemji Israel ajak nungi Kibuba madang tayipshiba tenla ka ama agütsütsüla, anungji parnokji Kibuba asoshi mapa inyaktsü renemtettsü. 12Aser Levitemi nashi pungchi ana kolak nungji parnok teka agi nemettsüla; itemji parnok temenen pungitsü asoshi ka, aser kaji tarongba tenla asoshi Kibuba dang tenlatsüla. 13Levitemji Aron aser par jabasotem madang noktakdakjang, aser parnokji Kibuba madang tayipshiba tenla asoshi agütsüdakjang.

14“Yamaji nai Levitemji Israel chirtem nungi piladakjang, aser Levitemji kü meyong alitsü. 15Nai parnok meshitettsü, aser tayipshiba tenla asoshi parnokji tenlar külen, iba sülenji Levitemi sentep süki mapa inyaktsü aitsüla. 16Kechiyong Israel nunger nungi ni asoshi tenzüktsü parnok shimteta lir. Israel pur mezüng asoba ajak, shirnoki tamasa nu menden lapok, parnok melena ni asoshi parnok ni agiogo; 17 kechiyong nisung aser shiruru mezüng anguba anapronglaji Israel chir rongnung ajak kü meyong lir. Ijip lima nung mezüng asoba tepsetba anogo nungi ni parnok ni atema meshiteta yuogo. 18Aser Israel chir rongnung mezüng asoba ajak melena ni Levitem agiogo. 19Israel pur tekülemdaki anasa arudang parnok dak temerenshi agi matongtsü, aser Israel chirtem temenen pungdoktsü asoshi sentep süki nung Israel chirtem mapa inyaktsü Israel chir rongnungi ni Levitem Aron aser pa jabaso nem tenzüktsü agütsüogo.”

20Yamaji Mosa aser Aron, aser Israel pur ajaki Levitem dang inyak. Levitem indang Kibubai Mosa dang melaba amaji Israel purtemi inyak. 21Aser Levitem parnok sasa temenen nungi merükteta parnok pei süoshi shitok, aser Kibuba madang Aroni tayipshiba tenla asoshi parnok tenla. 22Ajiser Aron aser pa jabasotem madang sentep süki nung mapa inyaktsü Levitemi ai. Levitem indang Kibubai Mosa dang melaba amaji parnoki parnok dang inyak.

23 Kibubai Mosa dang ashi, 24“Levitem asoshi ibai ozüng alitsü: parnok küm metsürpungu tain nungi temalen tashi sentep süki nung mapa inyaktsü, 25saka küm tenem abensarbo parnok mapa inyakba nungi anentsüla. 26Parnoki pei adianutem sentep süki nungi mapa inyakertem yaritsü akok, saka parnoki mapaji meinyaktsüla. Yamaji nai Levitem asoshi mapa lemsa-a agütsütsüla.”

ZÜNGDANGBA 9

Süia Aoba Benjongmung

1  Israel chirtem Ijip lima nungi adoka tanabuba küm mezüng ita Sinai lisem lima nung Kibubai Mosa dang ashi, 2“Israel chirtem süia aoba benjongji mapang shitak nung amungtsüla. 3Iba ita anogo terpezünü buba nikongdang mapang shitak nung, yimsü ozüngi melaba amato nenoki ibai amungtsüla.” 4Anungji Israel chirtem süia aoba benjongji amungtsüla ta Mosai ashi. 5Aser tanabuba küm mezüngbuba ita anogo terpezünü buba nikongdang Sinai arem nung parnoki süia aoba benjongji amung. Kibubai Mosa dang melaba amato parnoki inyak.

6Saka parnok rongnung kari tasümang dak kongshiba agi memerüki küma alinung, parnoki kasa anogo nungji iba Benjong makatettsüsa aküm. Anungji iba anogo nungji parnoki Mosa aser Aron dangi arua, 7Mosa dang ashi, “Tasümangdak kongshiba agi onok memerüki lir, saka mapang shitak nung Israel chirtem den külemi Kibuba dang tenla agütsütsüsa kechiba onok sota ayutsü?” 8Mosai parnok dang langzü, “Kibuba nungi nenok indang kechi shidir aji ni mangashi tashi ata-a liang.”

9Idangji Kibubai Mosa dang ashi, 10“Israel chirtem dang shiang: nenok mesüra nenok semchisemnur kari tasümang dak kongshiba agi memerüki kümaka mesüra aenlen oagi lira, parnoki Kibuba süia aoba benjongji amungtsüla. 11Parnoki aji tanabuba ita anogo terpezünü buba nikongdang amungtsüla, piyazü meinokba amtsük aser süngo taku den aji achitsüla. 12 Ibaji parnoki anepdang tashi kecha mayutsüla, mesüra teret kecha meraksatsüla. Süia aoba benjongji yimsü ozüng amato parnoki aji benshitsüla. 13Saka nisung shiba merüka lir aser aenleni oa mali, saka süia aoba benjong mamunger iba nisung pei nübur nungi jentoktsüla kechiaser mapang shitak nung pai pei tenla Kibuba nem magütsü. Iba nisungi pei temenen abentsüla.

14“Ne den amunger bendanger kari Kibuba dang süia aoba benjong kanüra, yimsü ozüng amato aji inyaktsüla. Bendanger aser linük senso anaprongla asoshi yimsü ka dang alitsüla.”

Tekülemdak Manung Mepet

(Ani. 40.34-38)

15Tekülemdak süki renemba anogo nung, tekülemdak Ozüng Süngden ayudakji mepet agi sübang; aji nikongdang nungi anepdang tashi mi ama süki manung mepetji liasü.

16Aser aji teti, oda anüngdang mepet agi aser aonung aji mi ama liasü. 17Kodangsa süki nungjagi mepetji ajungketdir, idangji Israel chirtem apusoa ao; aser kong mepetji anendir, yangji parnoki anen. 18Kibubai melaba ama Israel chirtemi apusoa ao, aser Kibubai melaba ama parnoki anen. Kopiga tekülemdak süki nungji mepetji lidir papigaji parnoki anena liasü. 19Aser kodang mepetji tekülemdak süki manung anogo aika lidir, idangji Israel chirtemi Kibubai melaba ama apusoa mao. 20Aser khen khenbo mepetji tekülemdak süki manung anogo ishika dang liasü; idangji Kibubai melaba ama parnoki anena ali, aser Kibubai melaba ama parnoki apusoa ao. 21Khen khenbo mepetji nikongdang nungi anepdang tashi dang liasü, aser kodang mepetji anepdang ajungketdir, parnoki apusoa ao, mesüra aji anüngdang nungi aonung tashi lira, kodang mepetji ajungketdir idangji parnoki apusoa ao. 22Anogo ana süshia, mesüra ita ka, mesüra küm ka mepetji tekülemdak süki manung süloka alidang Israel chirtemi anena ali, aser apusoa mao; saka aji ajungketdang parnoki apusoa ao. 23Kibubai melaba agi parnok anena ali, aser Kibubai melaba agi parnoki apusoa ao. Mosa ket ajanga Kibubai melaba ozüng parnoki benshia liasü.

ZÜNGDANGBA 10

Taribi Jangzü

1Aser Kibubai Mosa dang ashi, 2“Taribi jangzü ana yangluang, itemji tatsüngba mapa asütsüla. Itemji nai telok ajatsü asoshi aser tanendak nungi apusotsü asoshi amshitsüla. 3Kodang anapronglaji apudir telok ajak ne dangi sentep süki kiküm dangi senteptsüla. 4Saka ka dang apura, tanishirtem Israel nübur meyirijang madak kiburtem dang ne dangi senteptsüla. 5Kodang ar sanga apudir, anüdoklen anena alirtemji apusotsü. 6Aser kodang kasaji tanabena apudir, anüdoklentip anena alirtemji apusotsü; parnok apusotsü asoshi ar sanga jangzü aputsü. 7Saka kodang telok senteptsü lidir, nenoki ar mesangi dang jangzüji aputsüla.

8“Aron putir jabasotemi jangzüji aputsüla. Ibai nenok aser nenok sülen tarutsü putu ajak atema yimsü alitsü. 9Kodang nenok timtemdaktsüba tsükchir anema nenok rarai odir jangzü agi ar asangtsüla. Idangji Kibuba nenok Tsüngremi nenok bilemtettsü, aser nenok tsükchir nungi kümzüktsü. 10Ano nenok pelaba anogo nungi, aser nenok taka-tait benjong akadang, aser nenok ita tetenzük nung, nenoki nenok jangzü tarongba tenla madak, aser yimjung tenla tepsetba madak aputsüla; aser nenok asoshi itemji Kibuba madang tebilemtettsü asoshi alitsü. Ni Kibuba nenok Tsüngrem lir.”

Sinai Toktsüba

11Aser küm tanabuba, ita tanabuba anogo metsübuba nung, tekülemdak süki nung Ozüng Süngden temalen nungi mepetji agienadok. 12Anungji Israel chirtemi tatongi shia Sinai lisem lima arem nungi apusoa ao; aser mepetji Paran arem nung anen. 13Aser Mosa ajanga Kibubai melaba ama parnoki apusoa jajaba ibai mezüngbuba liasü. 14Aser tamasa Yihuda nunger tanendak nungi nisan den par telok apuso. Amminadab jabaso Nashon iba telok madak tanishir liasü. 15Issakar kidong telokji Zuar jabaso Nethaneli anir ao. 16Zebulun kidong telokji Helon jabaso Eliabi anir ao. 17Kodang tekülemdak sükiji lokten, tekülemdak süki abener Gershon aser Merari nunger apuso.

18Ajisür Shedeur jabaso Elizuri anir Reuben nunger tanendak nungi nisan den par telok apuso. 19Simeon kidong telok madak Zurishaddai jabaso Shelumiel liasü. 20Aser Gad kidong telok madak Deuel jabaso Eliasaf liasü. 21Aser Kohat nungeri temeshi osettemji bener apuso, aser parnok matongdang tangartemi tekülemdak sükiji yanglu.

22Ammihud jabaso Elshamai anir telok Efraim kidong tanendak nungi nisan den par telok apuso. 23Aser Manase kidong telok madak Pedahzur jabaso Gamaliel liasü. 24Benjamin kidong telok madak Gideon jabaso Abidan liasü.

25Dan kidong tanendak nungi nisan den par telok apuso. Iba telok madak Ammishaddai jabaso Ahiezer liasü. 26Okran jabaso Pagiel Asher kidong telok madak tanishir liasü. 27Aser Enan jabaso Ahira Naftali kidong telok madak liasü. 28Yamaji Israel chir telok tatongi apuso.

29Idangji Mosai Midian nunger toko Reuel jabaso Hobab dang ashi, “Ni nenok nem ibai agütsüdi ta Kibubai ashiba linüki asenok apusodagi, onok den arung aser onoki ne dang junga benshidi; kechiyong Kibubai Israel dang tajung inyaktsü nangzükogo.” 30Pai langzü, “Nibo nenok den maotsü; saka ni kü linük aser pei nübur dangi meyipa aotsü.” 31Mosai ashi, “Yimlibilema nai onok tetoktsüma, kechiaser arem koba nung onok anentsü aji nai metet, aser na onok asoshi tenük ama asütsü. 32Na onok den arura, Kibubai kechisa onok dak tajung inyakdir, aji oda onokia ne dang inyaktsü.”

Nüburtem Apusoa Aoba

33Aser parnoki Kibuba tenem nungi asemnü lenmang ao, aser Kibuba tezüngzüktepba ozüng süngdenji parnok jakdang asemnü lenmang jelia parnok asoshi tanendak ka bushia ao. 34Aser parnoki tanendak nungi apusoa aodang Kibuba mepetji anüngdang parnok temalen liasü. 35Kodang ozüng süngdenji apusoa odir Mosai ashi,

“Aramesoang; Oh Kibuba;

ne tsükchirtemji prokshidakjang,

ne sempartem ne jakdang jenshidakjang.”

36Kodang aji anendir pai ashi,

“Oh Kibuba,

Israel nunger meyirijangsa meyirijang ter dangi meyipang.”

ZÜNGDANGBA 11

Tabera Nung Kibuba Mi

1Tang nüburtemi Kibubai angashia tamajung jembia nemnem, aser aji angashia pa ain adoka, Kibuba mi parnok rongnung jangru aser tanendak tezülen kar arong. 2Kodang nüburtemi Mosa dang ayimten, pai Kibuba dang sarasadem aser miji remsepadok. 3Anungji iba meta dangji Tabera ta aja, kechiaser Kibuba miji parnok rongnung jangru.

Nüburtemi Mosa Anema Nemnemba

4Parnok den külemi bendangertema liasü, aser parnoki shi kanga chinüa aküm, aser Israel chirtemia tanaben jeba ashi, “Shibai onok nem tachitsü shi agütsütsü? 5Ijip nung onoki angati ango achiba, züngi, mapu-züngi, repchilasüng aser lasüng bilemteter. 6Saka tang onok yaseta lir, aser kecha maka, mana dak alema onok kecha maka.”

7  Manaji Koriander tejang amai tereprangtsü nung berem mesüka liasü, 8 nisungtemi oagi itemji bendena senzü, aser aji lung nung menünga mesüra semki nung asen aser aji chipo nung metar iba jagi amtsük telong yanglu; aser aji tachitsü asoshi totzü den amtsük telong asangba amai liasü. 9Tanendak azüngtsü tsükdang iba manung manaji tsük.

Mosai Tsüngrem Dang Nemnemba

10Mosai nüburtem kinunger shia pei süki kikümbang nung jebtepba angashi, aser Kibuba ain kanga adokba yong Mosa kanga mepelai liasü. 11Anungji Mosai Kibuba dang ashi, “Kechiba ne tenzüker dang nai yamai sashia benshir? Nai iba nübur khuret ajak kü nem benloktsütsüsa na mepelatsü mapa ni kechi inyak? 12Ni item nübur ajak aben asü? Mesüra parnok ne teku nung ajunger nubentsüri mama ayongba tanur abenba amato nai parnok tebou nunger dang azüngashia nangzükba linük jagi bener oang, ta nai kü dang shitettsüsa ni parnok aso asü? 13Ni iba nübur ajak nem kong nungi shi bena arua agütsütsü? Kechiyong onok achitsü shi onok nem kua, ta jeba parnoki kü dang ashir. 14Kü kijai iba nübur khuret ajak abentsü makok, kechiaser ya ni asoshi onsara taret lir. 15Iba amai nai kü dang benshitsü süra, ni khenyongi tepseta tokang ta ni ne dang mepishir; ne tsüngdang ni yimlibilem ngura kü nem joko kü timtem tengudaktsü.”

Mosai Tanishir Neter Shimba

16 Kibubai Mosa dang ashi, “Israel nunger rongnung tanishir nai metetba tambur nisung neter kü dangi anir arung. Parnokji sentep süki-i anir arua idakji ne den külemi noktakdakjang. 17Aser ni alutsü aser yangji ne den jembitsü, aser ne madak aliba tanela kar agia parnok madak yutsütsü, aser nüburtem khu ne kijai masü, parnoki aji ne den abentsü. 18Aser nai nübur dang shiang, nenoki shi achitsü asoshi nenok sasa asüng atema meshitetang, kechiyong Kibubai angashia, shibai onok nem tachitsü shi agütsütsü, kechiyong Ijip nungbo onok taso shia liasü ta nenoki jebogo, anungji nenok nem shi agütsütsü, aser aji nenoki achitsü. 19Nenoki anogo ka mesüra ananü mesüra pungunü, mesüra ternü mesüra metsünü dang machitsü. 20Saka ita songtema teni nungi adoka lakseta achitsü, kechiaser nenok rongnung aliba Kibuba nenoki magizük aser pa jakdang kechiba onok Ijip nungi anir adok? ta jeba ashi.”

21Mosai ashi, “Nübur shir rongnung ni lir tetsüng agi jajar meyi noklang trok lir; aser nai ashi, parnok ita songtema achitsü ni parnok nem shi agütsütsü. 22Parnok peria parnok asoshi san telok aser nashi telok tepsetdi ma? Mesüra tzüyim nung ango ajak parnok asoshi puaka aji agi parnok peridi ma?”

23Aser Kibubai Mosa dang langzü, “Kibuba teka yamaji tatsü no? Kü o atalokdisü mataloklir tang nai angutsü”.

24Mosai oagi nüburtem dang Kibuba oji ashi, aser nübur rongnung tambur neter pai sentepdaktsü, aser süki meketa toktsü. 25Aser mepet nung Kibuba alua pa dang jembi aser pa madak aliba tanela kar agia tambur neter madakji yutsü, aser kodang tanelaji parnok madak liasü, parnoki shin o jembi, saka joko parnoki yamaji meinyak.

26Saka tanendak nisung ana, ka tenüng Eldad aser tangar kaji Medad liasü, aser parnok madak tanelaji alu, parnok tenüng züluoka liasü, saka süki nungi metugu, aser parnoki tanendak shin o jembi. 27Anungji asangur kati asema oa Mosa dang ashi, “Eldad aser Medad nati tanendak shin o jembidar. 28Aser pa teshimtet rongnung ka, Mosa tenzüker Nun jabaso Yihusuai ashi, kü kibur Mosa, parnok anendakjangma. 29Saka Mosai pa dang langzü, nai tenük meremer asü? Kibubai pei tanela parnok dak enokja, Kibuba er nübur ajak ainkar kümdaktsünüali.” 30Aser Mosa o Israel tamburtem tanendaki shilang.

Opiya Ozü Yokba

31Aser tzüyim nungi opiya ozü bener arutsü Kibuba nungi mopung ka ao, aser itemji tanendak anasa külena külena anogoshi lenmang tanendak meketa ali, tema nungi süklep ana shi melema tsükdaktsü. 32Panüji nisungtem ammang tepiyong aser tananüa anogo nungjia opiya ozüji benden. Ajak dang ishiba bena arusangia homer ter benden, aser parnoki itemji parnok tanendak meketa merepshia ayu. 33Saka ano parnoki shiji memejaki tepu tsüngda nung alidang, Kibuba ain nüburtem anema adok, aser Kibuba wara tulu ka agi nüburtemji tepset. 34Anungji iba dangji Kibroth-hattaava ta aja, kechiaser parnoki yangji shi jangrartemji rema yutsü.

35Kibroth-hattaava nungi nüburtemi Hazeroti apusoa oa idakji anen.

ZÜNGDANGBA 12

Miriam o Aron Merenshiba

1Mosai Kushtsür ka agiba atema Miriam o Aron nati pa anema jembi. 2Parnoki ashi, “Kibubai Mosa den dang jembir asü? Pai asenok dena mejembir no?” 3Tang ali jak nung alir ajak dang alema iba nisung Mosa kanga ajemaluba nisung ka liasü.

4Aoksa-a Kibubai Mosa, Aron aser Miriam dang ashi, “Ner asem sentep süki-i adokang.” Aser par asemji adok. 5Aser Kibubai mepet tongshi ka nung alu aser süki kiküm nung noktak, aser Aron o Miriam na aja, aser tenapronglai tejak leni aru. 6Aser pai ashi, “Tang kü o angang nenok rongnung ainkar kar lira, ni Kibubai kü sasa pa dang mangdang nung metetdaktsütsü, ni pa den pungmang nung jembitsü. 7 Kü tenzüker Mosa denbo yamaji masü, kü ki ajak madak pa ketdang yuja lir: 8Pa denbo ni tebang o tebang na agi ajang ajanga jembir, tetezütsü agi masü aser Kibuba temanga pai angur; ajangla kechiba nenoki kü tenzüker Mosa anema jembitsü temulung ulur?”

9Aser Kibubai parnok anema ain adok aser pa pila-a ao. 10Aser süki temalen nungi mepetji agien; aser ajiang, rürjep ama mesünga Miriam dak zütsüra adok, aser Aroni Miriam dak reprang, aser ajiang la dak zütsüra liasü.

11Idangji Aroni Mosa dang ashi, “Oh kü kibur, onoki tamashi inyakba aser onoki temenen menaba yong onok temerenshima. 12Pei tetsü nu menden nungi asodang shi tesadang ka meketi asoba nisung ama la tasü ama tekümdaktsüma ta ni mepishir.” 13Aser Mosai Kibuba dang ayimtena ashi, “Oh Tsüngrem, ni mepishir la anebjangma.”

14  Kibubai Mosa dang langzü, “Tebui la jak nung metsü metsüloktsüra, la maksü nung anogo tenetnü atsüka melilima? Tanendak tezülen tenetnü la shibanga yuang aser iba sülenji la tanendaki anir arutsü akok.” 15Anungji tenetnü tanendak tezülen Miriam shibanga ayu, aser Miriam tanaben meyipa anir maru tashi nisungtemi apusoa mao. 16Iba sülen nisungtemi Hazerot nungi apusoa ao aser Paran lisem lima nung anen.

ZÜNGDANGBA 13

Itdangitertem Yokba

1 Kibubai Mosa dang ashi, 2“Israel nunger nem ni agütsütsü aliba Kanan lima ladangtsü asoshi tebu kidong shia nungi parnok rongnung tanishir ka ka yokang.” 3Kibubai melaba ama Mosai parnokji Paran lisem lima nungi yok. Parnok ajak Israel tanishirtem liasü. 4Itemi parnok tenüng liasü: Reuben kidong nungi Zakur jabaso Shammua. 5Simeon kidong nungi Hori jabaso Shafat. 6Yihuda kidong nungi Yefune jabaso Kaleb. 7Issakar kidong nungi Yosef jabaso Igal. 8Efraim kidong nungi Nun jabaso Hoshea. 9Benjamin kidong nungi Rafu jabaso Palti. 10Zebulun kidong nungi Sodi jabaso Gaddiel. 11Yosef kidong nungi, aji Manase kidong, Susi jabaso Gaddi. 12Dan kidong nungi Gemalli jabaso Ammiel. 13Asher kidong nungi Mikael jabaso Sethur. 14Naftali kidong nungi Vofsi jabaso Nahbi. 15Gad kidong nungi Maki jabaso Geuel. 16Linük ladangtsü Mosai yokba nisungtem tenüngji itemi lir. Mosai Nun jabaso Hoshea tenüngji Yihusua agi melentsü.

17Mosai Kanan limaji ladangtsü parnok yoka ashi, “Anüolentip limai iang aser tenem jagi tuang, 18aser alinükji kechi ama, yangji aliba nisungtemji tashi tait asü mait, parnokji ishika asü aika reprangang. 19Aser parnok aliba limaji kechi ama, ajung asü majung: aser parnok alidak yimtitemji moa nung asü mitsa nung alir; 20aliji kechi ama, temo asü teret, min ali asü mali, nenoki tasü itang aser iba lima nungi adokba süngjangji kar bener arung.” Iba mapangji tsükmenatzü mezüng amenba mapang liasü.

21Anungji parnoki tua Hamat tsütsü Zin lisem lima nungi Rehob tashi alinükji ladang. 22Parnoki anüolentipi ai, aser Hebroni aru, aser yangji Anak chir Ahiman, Sheshai; aser Talmai liasü. (Tang Hebronji Ijip nung Zoan dang nungi küm tenet temalen yanglua liasü). 23Aser parnoki Eshkol lenteni aru, aser idakji tsükmenatzü tejep ka keter lepzük, aser aji nisung anati süngra nung aben; ano parnoki jarem jang aser monguzünu bener aru. 24Anungji iba meta dangji Eshkol lenten ta aja, kechiaser Israel chirtem idakji tsükmenatzü tejep lepzük.

Itdangitertem Osang

25Anogo lirnü linükji ladanger külen itdangitertemji shilang. 26Parnokji Mosa, Aron aser Israel chir telok ajak dangi kadesh nung Paran lisem limai shilang, aser ano idakji atangba süngjangtemji parnok dang sayu. 27Parnoki Mosa dang ashi, “Nai koleni onok yok, iba linük jagi onok oa ladangogo aser atangji ibaji mamatzü aser ninang mojitzü ayimba lima ka lir; aser yangi süngjang ka lir. 28Aji saka yangji alirtemji tashi tait aser parnok yimtitemji atsübanga lir, aser kanga tulu, aser iba dakji alaka onoki Anak chirtem yangji angu. 29Anüolentip linük nungji Amalek nunger lir, aser tenem nung Amor nunger aser Yebus nunger alir; aser Kanan nungertemji tzüyimküm aser Yordan tzüküm nung alir.”

30Mosa tsüngdang aliba nisungtemji ola madokdaktsüi Kalebi ashi, “Asenoki khenyongi tudi aser aji agidi; kechiaser aji kokteta lir.”

31Saka pa den atur nisungtemi ashi, “Asenoki nisungtemji anema atutsü makoktsü, kechiaser parnokji asenok dang nungi tashi taitba lir.” 32Anungji parnoki ladangba linük indangji tiyazü osang ka Israel nungertem dangi prokshia ashi, “Alinük koba onoki ladangtsü ao, idakji adokba jagi nisungtemji meperir, aser idakji aliba nisungtemji aso tulu; 33 aser yangji Nefilim nungi arua Anak chirtem onoki angu, aser onokji parnok tsüngdang süngku amai dang liasü.”

ZÜNGDANGBA 14

Nisungtemi Nemnemba

1Idangji telok ajaki ola adoka ayimten, aser paonungji nisungtemi ajeb. 2Aser Israel chir ajaki Mosa o Aron na anema nemnem, aser telok ajaki tena dang ashi, “Onok Ijip lima nung sür lilasang. 3Kechiba onok nok agi laodaktsütsü Kibubai anir aru? Onok kinungtsütem aser onok chirtem parnoki tepsettsü; onok asoshi Ijipi meyipa aotsü tajungba masü no?” 4Aser parnok kati ka dang ashi, “Asenoki arkotong ka shimdi aser Ijipi meyipa odi.”

5Idangji telok ajak sentepa aliba jakdang Mosa aser Aron na tejak mechiokadok. 6Aser linük ladangi aortem rongnung Nun jabaso Yihusua aser Yefune jabaso Kaleb nati pei süoshi shisa; 7aser Israel chir telok ajak dang parnoki ashi, “Alinük koba ladanga onoki ajanga ao, aji kanga dang alima tajung lir. 8Kibubai asenok dang pelara, pai iba limai asenok anir arutsü, aser mamatzü o ninang mojitzü yima aliba limaji asenok nem agütsütsü. 9 Kibuba anema dang tapuso, mesüra linük nung aliba nisungtemji nenoki tetsübuma; kechiyong itemji asenok asoshi chiyungtsü, parnok tekümzüktsü parnok nungi agienogo aser Kibuba asenok den lir, parnokji tetsübuma.” 10Saka telok ajaki tena dak lung agi aontsü ashi. Idangji Kibuba sentsüwangshi sentep süki nung Israel chir ajak madaki adok.

11Aser Kibubai Mosa dang ashi, “Iba nüburi kopiga ni sensatsütsü? Parnok rongnung temaitsü ajak ni inyakaka, kopiga parnoki kü dang mamangtsü? 12Ni parnok wara agi tepsettsü, aser parnok senmang mamangdaktsütsü, aser parnok dang nungi na agi kin tuluba aser tamarenba kümdaktsütsü.”

Mosai Nüburtem Asoshi Sarasademba

13  Saka Mosai Kibuba dang ashi, “Ajangla Ijip nungeri aji angashitsü; kechiyong parnok rongnungi ne tashi agi nai iba nübur anitet, 14aser aji parnoki iba linük nung alirtem dang ashitsü. Na Kibuba iba nübur rongnung lir ta parnoki angashiogo, kechiyong na Kibuba tejak o tejak na angur aser ne mepet parnok temalen noktaker, aser anüngdang mepet tongshi nung aser aonung mi tongshi nung nai parnok jakdang aor. 15Tang nai iba nübur nisung ka ama tepsetdi ta süra, idangji ne nüngsang angashirtemi ashitsü: 16Kibubai parnok dang nangzükba lima iba nübur pai anir arutsü makok, anungji pai parnok arem nung tepset. 17Aser ni ne dang mepishir, Kibuba ain adoktsü mekara aser yimlibilem nung teperi, temenen menaba aser ozüng raksaba tai atoker; aser iba jagi tai aketba kecha agi memeshitettsür; tsürabur tai menaba asoshi chirnur madak tasembuba aser pezü buba putu tashi semdanger, 18 ta nai jembiba amato Kibuba tashi tulusang. 19Ni ne dang mepishir, ne yimlibilem uluba ama iba nübur tai menaba aser Ijip nungi tang tashi nai iba nübur dang tai atokba ama tai tokangma.”

20Aser Kibubai Mosa dang ashi, “Ne o amato ni tai tokogo. 21 Saka ni taküm alinung, atangji Kibuba sentsüwangshi agi alimaji agütsütsü; 22atangji ni Ijip nung aser arem nung inyakba kü sentsüwangshi aser temaitsütem angurtem ni ano terben atitangogo, aser kü o magi; 23atangji ni par tsürabur dang nangzükba limaji parnoki mangutsü, mesüra ni sensatsür katia aji mangutsü. 24 Saka kü tenzüker Kaleb dak tanela balaka alinung, aser temulung bendanga kü sülen anitak nung, pa aoba linük jagi ni pa anir arutsü, aser par chirtemi aji agitsü. 25Tang Amalek nunger aser Kanan nunger lenten nungji alinungji asüng nenok meyipang aser Temerem Tzüyim leni arem jagi iang.”

Kibubai Nisungtem Merenshiba

26 Kibubai Mosa aser Aron dang ashi, 27“Kopiga ni anema nemnemba iba tamajung telok den ni azüzüktsü? Israel chirtemi nemnemba koba parnoki ni anema jembitep, aji ni angashiogo. 28Parnok dang shiang, Kibubai ashir, Ni taküm alinung atangji nenoki ni angashia jembiba ama, yamaji ni nenok dang inyaktsü. 29 Nenok tasümang iba arem nung tsüktsü; aser nenok yongsük nung atenba küm metsü nungi temalen shirnoki ni anema nemnem, 30atangji Yefune jabaso Kaleb aser Nun jabaso Yihusua dak alema koba lima asoshi nenok lidaktsütsü ni kü teka mekang, aji agi nenok marutsü. 31Saka nenok tila tanurtem shirnok tepsettsü atema alitsü ta nenoki ashi, parnok ni anir arutsü, aser parnoki nenoki magizükba limaji metettsü. 32Saka nenok asoshibo nenok tasümang iba arem nung toktsütsü. 33 Aser nenok chirtem arem nung küm lir sannüker küma alitsü, aser arem nung nenok tasümang shizüka mao tashi nenok jabujari khu nenoki abentsü. 34Nenoki alinük ladangba anogo apir, oda anogo lir anogo kaka shia küm kaka, oda küm lir nenoki menaba tai nenoki abentsü, aser nenoki ni nungi tenoktangba meteta arutsü. 35Ni Kibubai jembiogo, ni anema sentepa aliba iba tamajung telok ajak dang atangji inyaktsü; iba arem nung nenok asütsü.”

36Nisungtem shir linük ladangtsü asoshi Mosai yok, parnoki alinük indangji tiyazü bener aruba ajanga telok ajak pa anema nemnemdaktsü, 37oda linük atemaji tiyazü osang bener arurtem ajak Kibuba madang wara agi südaktsü. 38Saka linük ladangi aortem rongnung Nun jabaso Yihusua aser Yefune jabaso Kaleb tena taküm ali.

Alinükji Amaktsü asoshi Mezüngbuba Merangdangba

(Taz. 1.41-46)

39“Aser Mosai item o Israel ajak dang ashi, aser nisungtemi mang kanga ayim. 40Parnok anepdang shishia tenem kolaki tua ashi, Kibubai jembiba linüki atutsü onok yangi lir, kechiyong onoki temenen menaogo.”

41Saka Mosai ashi, “Takok mangutsü ta meteta kechiba nenoki Kibubai melaba raksatsüyonga aor? 42Nenok tsükchir jakdang nenok tepseta lir tetu; kechiyong Kibuba nenok rongnung mali. 43Kechiyong nenok jakdang Amalek nunger aser Kanan nunger lir, aser parnok nok agi nenok laotsü, kechiaser nenok Kibuba sülen manitaki meyipa oa lir; anungji Kibuba nenok den malitsü.”

44Saka parnoki ma ta tenem jagi atutsü merang, aji saka Kibuba tenangzükba Ozüng Süngden, aser Mosa tanendak nungi aenshia mao. 45Idangji Amalek nunger aser iba tenem nung aliba Kanan nunger alu aser parnok den rara, aser Horma tashi parnoki amak.

ZÜNGDANGBA 15

Tarongba Tenla Asoshi Ozüng

1 Kibubai Mosa dang ashi, 2Israel chirtem den jembiang aser shiang, “Kodang ni nenok nem agütsüba limai nenok arudir, 3aser Kibuba dang tenla agütsüdir, tarongba tenla mesüra tepela tenla mesüra temulunger tenla mesüra nashi o san telok nungi Kibuba asoshi teronem menemba, nenok teti akaba benjong nung tenangzükba atalokba asoshi tenladir, 4idangji shibai pei tenla agütsüdir totzü hin ka shilem pezübuba den amzü tanük efa nung terbuba shilem den meyokteper chiyungtsü tenla Kibuba asoshi agütsütsüla. 5Tajemtsü tenla asoshi tsükmenatzü yi, aser san chanu shia nai tarongba tenla den mesüra tetepsetba den hin ka pezübuba shilem agütsütsüla. 6Mesüra san tepung ka asoshi chiyungtsü tenla nai renemtsü atema amzü tanük efa ka terbuba shilem ana den totzü hin ka asembuba shilem meyokteper nai tenlatsüla. 7Tajemtsü tenla asoshi tsükmenatzü yi ka shilem asembuba teronem tajung asoshi Kibuba dang nai tenla-ang. 8Aser tarongba tenla mesüra balaka tatemzükba atalokdaktsütsü tepseta tenlaba mesüra yimjung tenla asoshi Kibuba atema nai nashi pungchi agütsüdang; 9nashi pungchi denji chiyungtsü tenla amzü tanük efa ter shilem nung asemsü totzü hin tesadang den tenlatsüla. 10Aser Kibuba asoshi teronem menemtsü mi agi tenlaba, tsükmenatzü yi hin ka tesadang tajemtsü tenla asoshi nai tenlatsüla.

11“Yamaji nashi pungchi asoshi süshia mesüra san tepung mesüra san tepung chanu, mesüra nabong chanu asoshi inyaktsüla. 12Nenoki kwika renemdir iba shia asoshi, yamaji item yongsük yari nenoki inyaktsüla. 13Kibuba dang teronem tajung asoshi tenla agütsüdang senso shia iba amai inyaktsüla. 14Aser aener kar ne den lira, mesüra nenok rongnung teti alir süshia, pai Kibuba dang teronem tajung tenlanüra, nenoki inyakba amaji paia shitak inyaktsüla. 15Nenok telok ajak asoshi aser aener shia nenok den amunger, item ajak asoshi yimsü ozüng ka dang alitsü. Nenok putu ajak nung nenok aser aener ajak Kibuba tsüngdang iba ozüng kasa alitsü. 16 Nenok aser aener amunger ajak asoshi ozüng ka aser yimsü ka dang alitsü.”

17Aser Kibubai Mosa dang ashi, 18Israel nunger dang shiang, “Ni nenok anir arutsüba limai nenok kodang idir, 19idangji linük chiyungtsü nenoki achidang, nenoki Kibuba dang tenlatsüla; 20tamasa am yangluba mapang nung motsüngnem nungi sarutenba amato balaka yur, nenoki amtsük ka tenla asoshi agütsütsüla. 21Nenoki tamasa am yangluba nungi nenok putu songtema Kibuba nem shilem ka agütsütsüla.

Memeteti Temenen Menaba Atema Tenla

22“Aser kodang Kibubai Mosa den jembiba item temelabatem mebenshi-i aibelendir, 23oda Mosa ajanga KIBUBAi nenok dang melaba ajak, Kibubai ozüng agütsüba anogo nungi, aser nenok putu songtema; 24idangji aji teloki memeteti inyakra, yimsü ozüng amato chiyungtsü tenla, tajemtsü tenla aser temenen tenla asoshi nabong tepung ka, Kibuba dang teronem tajung asoshi telok yinti-i nashi pungchi ka tarongba tenla asoshi tenlatsüla. 25Aser Israel chir yinti asoshi putiri temenen pungitsü asoshi inyaktsüla, aser parnok dang tai, atoktsü kechiyong aji aibelenba liasü, aser Kibuba dang mi aji tenlaba parnok pei tenla bener aruogo, aser parnoki aibelenba asoshi Kibuba madangi temenen tenla benogo. 26Aser Israel yinti aser parnok rongnung aliba aener tai atoktsü, kechiaser nisung yinti-i aji meshitak inyak.

27  “Nisung kati meshiteti temenen menara, idangji temenen tenla asoshi pai küm ka chanu nabong tsüla ka tenlatsüla. 28Aser aibelenba nisung asoshi putiri temenen pungiba inyaktsüla. Kodang pai Kibuba madang meshiteti temenen menadir, pa asoshi temenen pungitsütsü, aser pa tai atoktsü. 29Israel nunger rongnung linük senso saka mesüra nenok rongnung bendanger saka, shibai meshiteti langka inyakdir, pa asoshi ozüng kasa alitsüla. 30Saka nisung shibai meteta temenen menadir, pa linük senso saka aener saka, pai Kibuba anema sensatsür, anungji iba nisungji pei nübur nungi jentoktsü. 31Kechiaser pai Kibuba o sensatsür, aser melaba raksatsür. Iba nisungji meshimeshia leptoktsü, pai menaba tai pa dak alitsü.”

Amungnü Raksar Temerenshi

32Aser Israel chirtem lisem lima arem nung alidang, parnoki nisung ka amungnü süng kuya angu. 33Shirnoki pa süng kuya angu, parnoki paji Mosa aser Aron aser telok ajak dangi anir aru. 34Aser parnoki paji tepuokdak ayu, kechiaser pa dak kechi inyaktsü aji memetetdaktsüi liasü. 35Idangji Kibubai Mosa dang ashi, “Nisungbaji atangji südaktsütsüla; tanendak alir ajaki pa dak lung agi aontsüla.” 36Anungji Kibubai Mosa dang ashiba ama parnoki pa tanendak nungi anir adoka lung agi pa dak aon, aser pa asü.

Sütsüng Asoshi Ozüng

37Aser Kibubai Mosa dang ashi, 38 “Israel chirtem dang shiang, parnok putu songtema parnok sübang anüng sentsü agi sentaka parnok asoshi sütsüng parnoki yanglutsüla. 39Sütsüngji nenok asoshi nenoki reprangtsüla, aser Kibubai melaba ajak bilemtettsü aser itemji inyaktsü; aser koba sülen nenoki jabujaria ao iba sülen nenok pei temulungjang aser nenok tenük meyoktsü asoshi aji alitsü. 40Oda kü ozüng ajak nenoki bilemteta itemji inyaktsü aser nenok Tsüngrem asoshi meshiteta alitsü asoshi. 41Ni Kibuba nenok Tsüngrem lir, ni nenok Tsüngrem asütsü asoshi Ijip lima nungi nenok anitet. Ni Kibuba nenok Tsüngrem lir.”

ZÜNGDANGBA 16

Kora, Dathan aser Abiriami Anema Apusoba

1  Tang Levi kidong nungi Kohat chir Izhar jabaso Kora, Reuben kidong nungi Eliab jabasotem Dathan aser Abiram aser Pelet jabaso On, 2parnoki Israel chirtem nüngtugu kar shimteter telok tanishir noklang ana ser tenem anir Mosa anema apuso. 3Parnoki Mosa aser Aron anema atenshi aser tena dang ashi, “Nenata yabo onsara, telok ajak oda nisung shia temeshi lir, aser Kibuba parnok rongnung lir; ajangla kechiba nenati Kibuba er telok madak nena sasa yamai ulur?”

4Mosai aji angashi dang pa tejak mechiok, 5ajiser pai Kora aser pa telok dang ashi, “Anepdang Kibubai pa meyong shiba aser shiba temeshi lir aji sayutsü, aser paji pa anasa arudaktsütsü; oda shiba pai shimdir, pai pa anasa arudaktsütsü. 6Ya inyakang: Kora aser par telok ajaki miteptsü susa nenoki benang; 7aser iba nungji mi enokang, aser asüng Kibuba madang liangmesen enokang, aser Kibubai shiba shimdir paji temeshi alitsü; nenok Levi chirtem ya nenoka onsara.”

8Aser Mosai Kora dang ashi, “Tang angang, nenok Kora chirtem. 9Israel pur telok nungi nenok kisüng shimteta pa anasa arudaktsütsü; Kibuba tekülemdak süki nung tenzüktsü aser telok jakdang noktaka parnok tenzüktsübaji nenok asoshi atemata dang asü? 10Aser pai na aser adianutem Levi jabasotem ajak pa anasa anir aru; aser nai putir mapa bushir asü? 11Aji asünung na aser ne medemer ajak sentepba ya Kibuba anema lir, aser nenok Aron anema nemnemtsüsa pai kechi inyak.”

12Mosai Eliab jabaso Dathan aser Abiram tajai yok, aser parnoki ashi, “Onok matutsü. 13Mamatzü aser ninang mojitzü yima aliba linük nungi nai onok anir arua arem nung tepsettsü, aser onok madak ne sasa tanishir asütsü ya atemata ka dang asü? 14Ano nai mamatzü aser ninang mojitzü yima aliba linüki onok anir maru, mesüra onok nem alu mesüra tsükmenatzü tsüki senmang amangtsü magütsü; item nisung tenük nai pokdaktsütsü asü? Onok matutsü.”

15Idangji Mosa kanga ain adok aser Kibuba dang ashi, “Parnoki tenlaba tagizük, ni parnok nungi gado ka danga magika, mesüra parnok shinga maitsü.”

16Mosai Kora dang ashi, “Asüng na aser ne medemer ajak Kibuba madangi arutsüla, na, parnok aser Aron. 17Nenok nisung shiai pei mi susa nung liangmesen enoker benang, nenok nisung shiai Kibuba dangi mi susa abentsü, aji mi susa noklang ana ser tenem alitsü; na aser Aron pei mi susa benang.” 18Parnok nisung shiai pei mi susa aben aser iba manung mi enok, aser iba manung liangmesen ayu, aser sentep süki kikümbang nung Mosa aser Aron den noktak. 19Korai parnok anema sentep süki kikümbang nung telok ajak sentepdaktsü aser Kibuba sentsüwangshi telok ajak madaki adok. 20Aser Kibubai Mosa o Aron dang ashi, 21“Parnok khenyongi samatsütsü asoshi nenok sasa iba telok nungi pila-ang.”

22Saka Mosa aser Aron nati pei tejak mechiok aser ashi, “Oh Tsüngrem, meimchir tanela ajak madak Tsüngrem, nisung kati temenen mena nung nai telok ajonga madak ain adokdi ma?”

23 Kibubai Mosa dang ashi, 24“Kora, Dathan aser Abiram alidak nungi atsüngenang ta telok dang shiang.”

25Mosai aramesoa Dathan aser Abiram dangi ao, aser Israel tambur pa sülen anitak. 26Aser pai telok dang jembia ashi, “Item nisung tamajungtem süki nungi aenshiang, aser parnok meyong kecha nunga tekongshi, aji mesüra parnok temenen ajak den oker aotsü.” 27Anungji Kora, Dathan aser Abiram alidak süki nungi parnok aenshi. Aser Dathan o Abiram parnok kinungtsürtem o tanurtem den parnok süki kikümbang nung adoka noktak.

28Idangji Mosai ashi, “Iba yagi ni pei mulungba agi inyaker masü item mapa ajak inyaktsü Kibubai ni yok ta nenoki metettsü. 29Item nisung, nisung ajak asüba amai, mesüra nisung ajak yimya amato süra, ajangla Kibubai ni meyok. 30Saka Kibubai langka tasen inyakra, aser ali-i pei tebang lapoka parnok akaba ajak meyokadokra, aser parnok taküm dang Sheoli lura, idangji nisungi Kibuba sensatsüogo ta nenoki metettsü.”

31Idangji item o ajak pai jembizükli, parnok kübok aliji sadanga lapok; 32aser ali-i pei tebang lapoka parnok ajak, parnok kibong aser Kora den adener nisung ajak aser oset ajak meyokadok. 33Anungji parnok aser parnok den adener ajak taküm dang Sheoli alu; aser ali-i parnok manung shibang aser telok nungi parnok sama. 34Idangji parnok meketa aliba Israel nunger ajaki ayimtena jena oa ashi, “Asenok ali-i meyoka lir asemang.”

35Aser Kibuba nungi mi adoka liangmesen tenlaba nisung noklang ana ser tenemji meyokadok.

Mi Susa

36Idangji Kibubai Mosa dang ashi, 37“Aron putir jabaso Eleazar dang shiang, jangrua aliba mi susaji shimtenang aser mi susaji ajakleni talang nung prokshidakjang, kechiaser aji temeshi lir. 38Kechiaser item temenen nisungi parnok taküm agi alanga mi susaji temeshi kümdaktsüogo. Tenla dak tenembangtsü asütsü asoshi itemji tematsük küma atsüngtsüla, kechiaser parnokji Kibuba madang tenlaba lir. Parnokji Israel nungertem asoshi temaitsü ka lidakjang.” 39Anungji Eleazar putiri terongsetertemi tenlaba yongmen yin susatemji benden aser aji tenladak tenembangtsü asoshi atsüng. 40Ibai Israel chirtem atema tebilemtettsü ka alitsü, oda Aron semchirtem dak alaka shingaia Kibuba dang liangmesen marongtsü, aji oda mesüra pa Kora aser pa telok ama masütsü asoshi Mosa ajanga Kibubai pa den jembiba ama inyak.

Aroni Nisungtem Kümzükba

41Saka tasüngji Israel chir telok ajaki Mosa o Aron na anema nemnema ashi, “Nenoki Kibubar nüburtem kar tepsetogo.” 42Saka kidong nisungtemi Mosa o Aron na anema sentep, parnoki sentep süki tsütsü reprang; aser ajiang mepet agi aji sübang aser Kibuba sentsüwangshi adok. 43Idangji Mosa o Aron na sentep süki tejakleni aru. 44Aser Kibubai Mosa dang ashi, 45“Ni parnok khenyongi samatsütsü asoshi telok rongnungi atsüngenang.” Aser parnoki pei tejak mechiok. 46Mosai Aron dang ashi, “Ne mi susa bena arung aser aji tenladak nungi iba nung miji enokang, aser iba manung liangmesenji ataloka yujang aser aji telok dangi kara-a bener oang, aser parnok asoshi temenen pungdoktsü inyakang. Kibuba nungi terasaba adokogo, aser wara tenzükogo.” 47Mosai jembiba ama Aroni miji aben aser sentepa aliba tiyongi asüma ai aser ajiang, nisung rongnung wara ji tenzüka liasü; aser pai liangmesenji yutsü, aser nisungtem pungdoktsü pai yanglu. 48Pai tasü o taküm na tsüngda nung noktak, aser waraji anen. 49Tang wara agi asürtemji, Kora mapa asoshi asüba meteni meyirijang terpezü ser noklang tenet liasü. 50Aroni sentep süki kiküm nung Mosa dangi meyipa ao aser waraji anen.

ZÜNGDANGBA 17

Aron Ajok

1 Kibubai Mosa dang ashi, 2“Israel chirtem dang shiang, aser parnok nungi kidong shia ajok ka ka agiang. Parnok kidong tanishir shia nungi ajok ajak agi terana, nisung shia ajok nungji pei tenüng züluang. 3Levi ajok nungji nai Aron tenüng zülutsüla. Parnok kidong shia tanishir ka ka shia ajok ka ka alitsü. 4Aser sentep süki kechi nung ni ne den ajuruteper yangji Ozüng Süngden madang nai itemji yujang. 5Nisung shiba ni shimteter pa ajok nungji temechi adoktsü, aser Israel nunger nemnemba koba parnoki ni anema nemnemer aji ni anendaktsütsü.”

6Anungji Mosai Israel chirtem dang jembi, aser parnok tanishir ajaki pa nem ajok agütsütsü. Parnok kidong shia tanishir shiai ka ka oda ajok terana; aser parnok ajok rongnung Aron ajoka liasü. 7Mosai Ozüng Süngden süki nung Kibuba madang itemji ataloka yutsü.

8  Tasüngji Mosai Ozüng Süngden süki jaki ai, aser Aron ajok koba Levi kidong asoshi liasü, idakji temechi adoka tepen apung aser almond süngjang tamen atang. 9Idangji Mosai Kibuba madang nungi ajok ajakji Israel chirtem dangi bener adok. Parnoki aji reprang aser nisung shiai pei ajok agi. 10Aser Kibubai Mosa dang ashi “Ozüng Süngden madang Aron ajokji anema apusortem anema temaitsü asütsü meyipa yuang. Iba yagi parnoki ni anema nemnemba tatem kümdaktsütsü, anungji parnok masütsü.” 11Kibubai melaba ama Mosai ajak inyak.

12Aser Israel chirtemi Mosa dang ashi, “Ajiang, onok tesamar, onoka makaka, onok ajak makaka. 13Anasa arur nisung shia Kibuba tekülemdak süki anasa arurbo asür aser asenok ajak samatsü asü?”

ZÜNGDANGBA 18

Putir aser Levi Mapatem

1 Kibubai Aron dang ashi, “Ne jabasotem aser nebu kinungertemi tekülemdak aibelenba ajak abentsü; aser putir mapa nung aibelenba ajak asoshi na aser ne jabasotemi dang abentsü. 2Nebu kinunger Levi kin ne adianutem ne den yariteptsü asoshi ne den anir arung, aser na aser jabasotemi Ozüng Süngden jakdang tenzüktsü. 3Parnoki na aser süki mapa ajak anebalutsü, saka parnok aser na masütsü asoshi parnoki tekülemdak oset-tsüset aser tenladak anasa marutsüla. 4Parnoki ne den yaritepa sentep süki mapa inyaktsü saka tangar nisung shinga nenok alidak anasa marutsüla. 5Aser Israel chirtem madak ain adokba malitsü asoshi nenoki tekülemdak aser tenladakji reprangtsüla. 6Aser ajiang, ni ne adianu Levi nunger Israel chirtem nungi shimtetogo; ni asoshi parnokji Kibuba dang sentep süki mapa inyaktsü agütsüba sempet lir. 7Aser na aser ne jabasotemi dang tenladak kechisarena mapa aser teyindangba sü telunglen putir mapa inyaktsü, aser itemji nenoki reprangtsü; ni nenok nem putir mapaji sempet ama agütsüba lir saka tangar nisung shibai ibaji anasa arudir südaktsütsü.”

Putirtem Shilem

8Idangji Kibubai Aron dang ashi, “Ajiang tenladak kü nem agütsüba ajak madak ketdang asütsü ni ne nem agütsür. Israel nungeri agütsüba temeshi tenla ajak ni na aser jabasotem nem teti atema shilem asütsü agütsür. 9Mi nung merongi anüngzükba temeshitiba tenlatemji ne shilem asütsü. Kü nem agütsüba sempet ajak nungi temeshitiba tenlatem, chiyungtsü süshia, temenen tenla süshia, mesüra tai tenla süshia, item ajakji na aser ne jabasotem asoshi alitsü. 10Ajak dang temeshitiba amato aji chiang, tebur shiai aji achitsüla. Nai aji temeshi ta züngshiang.”

11“Ano ibai ne meyong alitsü: parnok tenla, sempet oda Israel chirtem tayipshiba tenla ajak na aser ne jabasotem asoshi teti shilem asütsü ni agütsüogo. Ne kidang shirsa merükteta ali parnoki aji achitsü. 12Totzü tajungtiba aser yi aser tsük tajungtiba ajak, mezüng süngjang koba parnoki Kibuba nem agütsür aji ne nem agütsüogo. 13Parnok linük nung amenba süngjang koba parnoki Kibuba dangi bener arur, aji ne meyong alitsü, ne kidong merüka alir shiai aji achitsü. 14 Israel nungeri kü nem bendanga agütsüba ajakji ne meyong alitsü.

15“Kechisarena mezüng nu menden lapokba, nisung süshia, shiruru süshia, koba Kibuba nem agütsüogo aji ne meyong alitsü, saka mezüng asoba jabaso aser mezüng mepuba memerükba shiruru ajak nai alangzüktsüla. 16Parnokji ita ka tain asüdang talangzükba jenjang tekülemdak amshiba amato yongmenyin sen pungu agi alangzüktsüla. 17Saka mezüng mepuba nashi, san mesüra nabong, itemji nai malangzüktsüla, parnokji temeshi lir. Parnok züji tenladak rüklokjang, aser aji Kibuba dang teronem tanang asoshi mi agi tenlaba alitsü. 18Parnok shiji ne meyong alitsü, oda tayipshiba tenla mamalong aser tajichi tepi, aji ne meyong alitsü.

19“Temeshi oset tenla ajak koba Israel chirtemi Kibuba dang tenlar aji na aser ne jabaso jalatem nem teti shilem asoshi agütsüogo. Ibai Kibuba madang teti tatem makaba tezüngzüktepba na aser ne kinungertem den alitsü.”

20Aser Kibubai Aron dang ashi, “Parnok linük nung na kecha senmang malitsü, mesüra parnok rongnung na shilem kecha makatsü; Israel chir rongnung na shilem aser ne senmangji ni lir.”

Levitem Shilem

21  Kibubai ashi, “Ajiang, ni Levi chir nem oda sentep süki nung parnoki tenzükba mapa taa, Israel nunger tershilem ajak senmangtsü agütsüogo. 22Tang nungi Israel chirtemi parnok temenen menar masütsü asoshi sentep süki anasa marutsüla. 23Saka Levitemi sentep süki mapa inyaktsü, aser parnoki pei tai menaba abentsü; aser parnok putu songtema aji teti asoshi ozüng alitsü, aser Israel chir rongnung parnok senmang makatsü. 24Kechiyong Israel chir ter shilem koba parnoki Kibuba nem tenla agütsür, aji ni Levitem nem senmangtsü asoshi agütsüogo. Anungji ni parnok dang shiogo Israel chir rongnung parnok senmangtsü maka.”

Levitem Ter Shilem

25Idangji Kibubai Mosa dang ashi, 26“Nai Levitem dang shiang, kodang nenoki Israel chirtem nungi nenok senmangtsü parnok nungi ter shilem agizükdir, idangji nenoki Kibuba asoshi ter shilem nungi ter shilem agütsütsüla. 27Nenok tenlaji motsüngnem nung aliba tsük mesüra temenüngdak aliba tsükmenatzü ama züngshitsü. 28Yamaji nenoki Israel chirtem nungi alangzükba ter shilem ajak nungi Kibuba dang tenlatsüla. Item ter shilem nung jagi Kibuba shilemji nenoki Aron putir nem agütsütsüla. 29Nenok nem agütsüba ajak nungi tajungtiba aser temeshitibaji Kibuba nem agütsütsüla. 30Anungji nai parnok dang ashitsü, kodang nenoki tajungba tenladir idangji Levitem asoshi motsüngnem nungi anguba ama, aser tsükmenatzü menüngdak nungi anguba ama aji züngshitsü. 31Aji nenoki ajaklen, nenok aser nenok kinungeri achitsü; kechiyong sentep süki nung nenok mapa asoshi meyipa anguba nenok asoshi tajangzükji ya lir. 32Iba nungi tajungtiba shilem agütsüba ajanga nenok temenen malitsü, saka nenok masütsü aser Israel chirtemi agütsüba temeshi tenlaji nenoki memenentsüla.”

ZÜNGDANGBA 19

Nashi Temerem Aut

1 Kibubai Mosa aser Aron dang ashi, 2“Ibai Kibubai melaba yimsü ozüngji lir; Israel chirtemi nashi temerem ka tarak mesüra pungmen maket aser kodanga süngra meyokdangba ka ne dangi anir arung ta shiang. 3Nai aji Eleazar putir nem agüjang, aser aji tenladak kimaleni anir adoka pa madang tepsettsüla. 4Aser Eleazar putiri iba züji pei temeyong agi bena arur sentep süki tejaklen tsütsü tenetben rükloktsütsü. 5Idangji pa madang nashi teküp, shi, azü aser janaji arongtsü. 6Putiri cedar süng esop aser jakja-a meremba oset kar agia itemji nashi arongba tiyong nungji enoktsütsü. 7Ajiser putiri pei süoshi shitoktsü aser pai tzü chigutsü iba sülenang pai tanendaki aitsü, aser putirji nikongdang matong tashi memerüki alitsü. 8Shibai aji rongdir pai pei süoshi shitoktsü, aser tzü chigutsü aser nikong dang tashi memerüki alitsü. 9 Merükteta aliba nisung kati nashi arongba autji bendentsü aser tanendak kimalen temerükdak toktsütsü. Itemji Israel chirtem teloki merüktettsü atema tzü asoshi ayutsü. Ya temenen nungi meshitetba asoshi alitsü. 10Shibai nashi autji bendendir, pai pei süoshi shitoktsü, aser pa nikong dang tashi memerüki alitsü. Ibai Israel chirtem aser bendanger shir nenok den amunger, ajak asoshi teti atema yimsü ozüng ka alitsü.

Tasü Mang dak Kongshiba

11“Shibai nisung tasü mang dak kongshidir anogo tenetnü tashi memerüki alitsü. 12Pai pei sasa anogo asemnübuba aser tenetnübuba nung tzü nung meshitettsüla; idangji pa merüka alitsü. Saka pai tasemnü aser tenetnübuba nung pei sasa memeshitetra, pa merüka makümtsü. 13Shibai nisung tasümang dak kongshir memerüki lidir aser Kibuba tekülemdak süki menentsüdir; iba nisungji Israel nungi jentoktsüla. Kechiaser merüktettsüba tzüji pa dak merüklok, pa memerüki alitsü; pa memerükbaji ano pa dak alitsü.

14“Kodang nisung ka süki nung südir iba atema ozüng ya alitsü: Süki-i aitba nisung shiba aser süki nung aliba nisung shia anogo tenet memerüki alitsü. 15Chipo-anpo kobasa tenembangtsü keta mali aser lapoka lir ajia memerüki alitsü. 16Shibai moapu nung nok agi tepsetba mesüra odang asüba dak kongshidir, mesüra nisung teret dak mesüra leper dak kongshidir, anogo tenetnü memerüki alitsü.

17“Memerükba nisung asoshi merüktetdaktsüba tenla arongba nungi aut kar agiteta po ka nung enoktsü aser iba ma nung tzü temerük enokang. 18Idangji merükteta aliba nisung kati esop agia aji tzü nungji metener süki aser idakji aliba osettsüset ajak aser idakji aliba nisung ajak dak rükloktsütsü. Ano shibaisa nisung teret dak mesüra tepseta aliba dak, mesüra yimya agi asüba dak kongshir, parnok dak pai rükloktsütsüla. 19Nisung shiba merükteta ali pai memerükba nisung dakji tasemnübuba aser tenetnübuba nung rükloktsütsüla. Aser tenetnübuba nung pai pa meshitettsütsü. Nisung shiba merüka lir pai pei süoshi shitoktsü aser tzü chigutsü aser nikongdang tashi pa-a memerüki alitsü.

20“Saka nisung shiba memerüki lidir, aser pei sasa memeshiteter, iba nisung telok rongnungi jentoktsü, kechiaser pai Kibuba tekülemdak menentsüogo: memerükba tzü pa dak merükloktsü, paji memerüki lir. 21Aser parnok asoshi aji teti yimsü alitsü, aser shibai memerükba tzü dakji kongshidir nikongdang tashi memerüki alitsü. 22Aser memerükba nisungi kechi daksa kongshidir memerüki alitsü, aser nisung shibai iba dak kongshidir nikongdang tashi memerüki alitsü.”

ZÜNGDANGBA 20

Kadesh Nung Atalokbatem

(Ani. 17.1-7)

1Mezüngbuba ita nung Israel nunger telok ajak Zin lisem lima arem atong, aser nisungtemi kadesh nung ali. Yangji Miriam asü aser arem. 2Yangji telok asoshi tzü maliasü, aser nisungtemi külemi Mosa aser Aron anema sentep. 3Parnoki Mosa den toktepba ashi, “Kibuba madang onok adianutem asüdangto onoka sür lilasang; 4Kechiba nai Kibuba er telok onok aser onok kiset shirurutem südaktsütsü yagi anir aru? 5Kechiba nai Ijip lima nungi onok aniteta iba samesa lima yagi anir aru? Yangi tsük mesüra munguzünu, tsükmenatzü mesüra jarem kecha mali. Aser yangi tajemtsü tzüa maka.” 6Idangji Mosa o Aron nati telok tsüngdang nungi oa sentep süki kikümbangi ia parnok tejak mechiok; aser Kibuba sentsüwangshi parnok dangi adok.

Meriba Tzü

7 Kibubai Mosa dang ashi, 8 “Ajokji agiang aser nedi Aron nenati telokji külemi sentepdakjang. Parnok jakdang lung nungjagi tzü adokdaktsütsüsa jembiang. Iba lung nungjagi nai tzü adokdakjang, aji parnok aser parnok kiset shirurutem atema tajemtsü alitsü.” 9Aser pai melaba ama Mosai Kibuba madang nungi ajokji agi.

10Mosa o Aron nati lung jakdangji telokji sentepdaktsü, aser Mosai parnok dang ashi, “Nenok anema apusortem angang; onoki nenok asoshi iba lung nungi tzü adokdaktsütsü asü?” 11Idangji Mosai teka mekanga pa ajok agi lung dakji anaben azük, aser tzü jenti adoka parnok aser parnok kiset shirurutem ajak ajem.

12Saka Kibubai Mosa o Aron dang ashi, “Israel chirtem nükdang nenoki ni meshiteta ayutsü kü dak mamang nungji ni parnok nem agütsüba lima jagi nenoki parnok anir marutsü.”

13Ibai Meriba nung atalok, kong Israel chirtemi Kibuba den toktep, aser kaji parnok rongnung pa temeshi ta pa sasa sayu.

Edom Chubai Israel Nunger Yoktsü Noktangba

14Kadesh nungi Mosai osangbenertem Edom chuba dangi yok. Parnoki ashi, “Ne adianu Israeli yamai ashir, onok dak atalokba timtem ajak nai meteter. 15Ozü tetsü-teboutem Ijipi alu, aser onok idakji küm aika ali, aser Ijip nungeri onok aser onok tsüraburtem dang mejungi benshi, 16saka onoki kodang Kibuba dang ayimten, pai onok ola angashi, aser kotak tenyar ka yoka onok Ijip nungi anitet. Tang onok ne arrtsü tatembang nung aliba kadesh yimti nung lir. 17Yimlibilema onok ner lima ajanga odakjangma. Onoki alu mesüra tsükmenatzü lu ajanga maotsü, mesüra tzübu nungi tzü majemtsü. Onoki chubar alimang leni dang aotsü, aser ne arrtsü ajanga mao tashi onoki tajichileni mesüra tabeleni memeyiptsü.”

18Saka Edom nungeri langzü, “Nenoki ya ajanga süitsü temerang, yamaji mesüra ni nenok anema nok bener arutsü.”

19Ano Israel chirtemi ashi, “Onoki alimang jagi dang aotsü, onok aser onok kiset shirurutemi ner tzü jemra, iba atema onoki jenjang agütsütsü. Onok odang süidakjangma.”

20Saka pai langzü, “Nenoki aji ajanga mesüitsüla.” Idangji Edomi Israel chirtem anema tashi tait nisung aika den aru. 21Edomi pa arrtsü atena aotsü memela nung Israel chirtemi parnok nungi meyipa oadok.

Aron Asüba

22Israel chirtem telok ajak kadesh nungi apusoa Hor tenemi aru. 23Hor tenem nung Kibubai Mosa aser Aron dang ashi, 24“Ni Israel chirtem dang nangzükba limai Aron maitsü. Pa asütsü, kechiaser Meriba tzü nung nenati kü temelaba ozüng anema noktak. 25Aron aser pa jabaso Eleazar anir Hor tenem jagi tuang, 26aser Aron putir sobutsüji sepzüka aji par jabaso Eleazar nem semdakjang; kechiaser Aron pei pur den atentsü, pa idakji asütsü.” 27Kibubai melaba ama Mosai inyak, aser telok ajaki ngua parnok Hor tenemi atu. 28Mosai Aron sobutsüji sepzüka aji pa jabaso Eleazar nem sobudaktsü. Aser tenem kolak nungji Aron asü. Idangji Mosa aser Eleazar tenem nungi alu. 29Kodang telok ajaki Aron süogo ta angashi, Israel kidong ajongai Aron asoshi anogo semer mang ayim.

ZÜNGDANGBA 21

Kanan Nunger Madak Takok Anguba

1  Kodang anüolentip nung aliba Kanan nunger Arad chubai Israel Atharim lenmangi arur ta jembiba angashi, pai Israel anema rara aser kar apu. 2Idangji Israeli Kibuba dang ya oda atemzük, “Nai item nisungtem onok ket nung agütsüra, onoki parnok yimtitem ajak meshimeshiaa samatsütsü.” 3Kibubai Israel ola anga, aser Kanan nungerji bendanga agütsü. Anungji Israeli parnok aser par yimtitem meshimeshia raksatsü; anungji iba linük dang Hormab ta aja.

Yongmenyin Per

4  Parnoki Hor tenem nungi Temerem Tzüyim leni Edom meketdanga ao. Saka nisungtemji lenmang nung tazüzük makai küma, 5 parnoki Tsüngrem aser Mosa anema jembia ashi, “Kechiba nenoki onok lisem lima nung asütsüsa Ijip nungi anir adok? Kechiaser idaki amtsük aser tzüa mali. Iba samesa chiyungtsü yagi onok alaker.” 6Idangji Kibubai parnok rongnung per tesashi yoka item jagi nisungtem dak meji aser Israel nunger aika asü. 7Anungji nisungtemi Mosa dang arua ashi, “Onoki temenen menaogo, kechiaser onoki Kibuba aser na anema temenen jembiogo; onok nungi perji agientsü asoshi Kibuba dang mepishijang.” Aser Mosai parnok asoshi mepishitsü. 8Idangji Kibubai Mosa dang ashi, “Per ka yangluang aser aji rangdong ka nung tulokang; aser shiba daksa per jagi mejidir iba dakji reprangang aser taküm alitsü.” 9 Anungji Mosai yongmenyin agi per ka yanglu aser aji rangdong ka nung ayu. Idangji shirnok daksa peri mejidir, yongmenyin per dakji reprang aser taküm ali.

Hor Tenem nungi Moabi Aoba

10Tang Israel chirtem apusoa oa Obot nung anen. 11Parnoki Obot nungi apusoa oa Abarim lisem lima Moab jakdang aliba anüdoklen tsütsü anen. 12Yang nungjagi parnoki apusoa oa Zered lenten nung anen. 13Idak nungjagi apusoa oa Amor nunger litsü tashi oa aliba Arnon lisem lima külen tsütsü anen, kechiaser Arnonji Moab aser Amor nunger tsüngda Moab arrtsü nung lir. 14Anungji Kibuba Rara kaket nung ya shia lir.

“Sufa nung Waheb,

aser Arnon lententem,

15Aser wabetsa lententem,

koba Ar tashi oagi lir,

aser Moab arrtsü nung metaloka lir.”

16Yang nungjagi Beer tashi maneni ao aser tzübu koba nung Kibubai Mosa dang ashi, “Nisungtem külemi sentepdakjang, aser ni parnok nem agütsüdi.”

17Idangji Israeli iba ken aten:

“Tzü adokang, o tzübu;

Iba tzü indang nenoki ken tenang;

18Chubatemi atuba tzübu indang,

koba nübur tamarenertemi tuok,

tamarenertem ajok agi aser parnok mechi agi.”

Idangji parnoki lisem lima nungjagi Mattania ao. 19Mattana nungi Nahaliel, Nahaliel nungi Bamoth, 20Bamoth nungi Moab lenteni aru kong nungi Pisga kolak nungi lisem limaji reprangzüka yok.

Sihon Chuba Aser Og Chuba Akokba

(Taz. 2.26—3.11)

21Idangji Israeli Amor nunger chuba Sihon dangi osangbenertem yoka ashi, 22“Ner linük ajanga onok odakjang. Onoki alu leni mesüra tsükmenatzü lu leni memeyiptsü, mesüra tzübu kecha nungia tzü majemtsü. Ner arrtsü maten tashi onoki chuba lenmang nungji aotsü.” 23Saka Shioni pa arrtsü atena Israel aotsü memela. Pai pei nübur ajak aniten aser Israel anema aremi ao aser Israel anema Yahaz-i arua Israel anema rara. 24Saka Israeli pa nok agi tepset aser par linük Arnon nungi Yabbok tashi agi, oda Ammon nunger litsü tashi, kechiaser parnok arrtsü tashi ita liasü. 25Israeli Amor nunger yimtitem ajak oda Heshbon aser iba temeket yimtitem agi aser parnok idakji ali. 26Heshbonji Amor nunger chuba yimti, shibai taoba Moab chuba anema rara aser pa nungi alinük ajakji oda Arnon tashi rakzük. 27Anungji ken atener jagi ya oda aten:

“Heshboni arung aser aji yanglushidakjang,

Sihon yimti yangerdakjang.

28Kechiaser Heshbon nungi mi,

Sihon nungi milak adokogo.

Iba jagi Moab nung,

aser Arnon tenem nung kiburtem meyokogo.

29  Oh Moab! Na asoshi aiatai,

nenok raksaogo Oh Khemos nisungtem!

Pai par jabasotem tejenshir kümdaktsüogo,

Aser par jalatem tepuoker kümdaktsüogo,

Amor nunger chuba Sihon ket nung.

30Saka onoki parnok kokogo;

Heshbonji Dibon tashi lua raksatsüogo,

onoki parnok Nofa nungi Medeba tashi oagi samatsüogo.”

31Aji oda Israeli Amor nunger linük nung ali. 32Mosai Yazer ladangi yoker külen parnoki pai temeket nung aliba yimtitem makbang aser yangji aliba Amor nunger aritok.

33Ajiser parnoki Bashan leni meyip, aser Bashan chuba Og-i parnok anema pei nisung ajak Edre-i nung raratsü adok. 34Saka Kibubai Mosa dang ashi, “Pa tetsübu, kechiaser pa, par nübur ajak aser par linükji ni ne nem bendanga agütsüogo. Heshbon nung aliba Amor chuba Sihon dak inyakba ama pa daka inyaktsü.” 35Anungji parnoki pa, par jabasotem aser par nisungtem ajak, oda kata anünga metoktsüi tepset. Aser parnoki par linük ajongaji agi.

ZÜNGDANGBA 22

Moab Chubai Balaam Tajai Yokba

1Idangji Israel nungertem apusoa Moab lenten Yordan anüdoklen külen tsütsü Yeriko nung anen.

2Tang Zippor jabaso Balaki Amor nunger dang Israeli inyakba ajak angu. 3Aser nisungtemji jenti asünung Moabi tsübuadok. Israel chirtemji ngua Moab tetsübu agi asüng. 4Anungji Moabi Median tamburtem dang ashi, “Nashi pungchi-i moapu rem arepba ama iba telok yagi asen meketa aliba menakreptsü.” Anungji Zippor jabaso Balak shiba Moab nung chuba liasü, 5pai Beor jabaso Balaam, shiba Eufrata ayong anasa Pethor nung pei linük nisungtem den liasü; pa dangi osangbener par nübur linük dangi pa tajai yoka ashi, “Ajiang Ijip nungi adokba nisungtem yangi lir! Parnok alijak sünga kü jakdang anena lir. 6Aji asünung tang arung aser iba nübur ni asoshi atakatemang, kechiaser parnokji ni asoshi onsara tashi tulu. Ashiko ni parnok akoktsü aser linük nungi parnokji aridoktettsü südi, kechiaser nai shiba moatsüdir pai moar, aser shiba atakatemdir pa atakatemer ta ni metet.”

7Anungji Moab aser Median tamburtemi parnok den arasenba mapa taa bener apuso, kodang parnoki Balaam dangi aru, parnoki Balaki pa dang ashiba ajak ashi. 8Balaami parnok dang ashi, “Taonung yangi liang, aser Kibubai kü dang jembiba o ni nenok dangi bener arutsü.” Anungji Moab tamburtemi Balaam den anen.

9Idangji Balaam dangi Tsüngrem arua ashi, “Ne den aliba nisungtemji shir?”

10Balaami langzü, “Moab chuba Zippor jabaso Balaki kü dangi osang yok: 11Ajiang, nisung telok ka Ijip nungi arua yagi alijak sünga lir. Tang arung aser ni asoshi item nisungtemji atakatemjang. Ashiko ni parnok den raratsü aser parnokji aridoktettsüa kar.”

12  Saka Tsüngremi Balaam dang ashi, “Na parnok den maotsüla, nai iba nübur madak atakatem masütsüla, kechiaser parnokji moaja lir.”

13Tasüngnepji Balaam shishir Balaker tongtipurtem dang ashi, “Nenok pei linüki oang, kechiaser Kibubai ni nenok den aotsü songtemogo.”

14Anungji Moab tongtipurtem Balak dangi meyipa oa ashi, “Balaami onok den maruli asür.”

15Idangji Balaki mezüng yokba tongtipurtem dang nungi teimba aser nüngtuguba tongtipurtem yok. 16Parnoki Balaam dangi arua ashi, “Zippor jabaso Balaki yamai ashi, yimlibilema na kü dangi arutsü kecha agia tenokdangdaktsüma; 17kechiaser ni na kanga tushidaktsütsü, aser nai kechisa shidir ni inyaktsü. Yimlibilema arung aser ni asoshi iba nübur atakatemangma.”

18Saka Balaami parnok dang langzü, “Balaki par chuba ki taribi aser hon agi sünga kü nem agüjaka, Kibuba kü Tsüngrem temelaba dak alema tuluka süaka tilaka süaka ni inyaktsü makok.” 19Anungji tang Kibubai ano kü dang kechi shidir ni aji metettsü taonung nenok yangi anenang ta ni nenok dang mepishir.

20Paonungji Tsüngrem Balaam dangi arua ashi, “Item nisungtem na ajai arur süra, parnok den oang, saka ni ne dang kechi shidir aji dang nai inyaktsüla.”

Balaam Aser Gado

21Anungji Balaami anepdang shishi aser pai gado nung mener Moab tongtipurtem den ao. 22Saka pa aoba yong Tsüngrem ain adok, aser Kibuba tenyari lenmang nung pa anema noktak. Tang pa pei gado nung mener kilir anati meiner ao. 23Kodang gadoi Kibuba tenyarji pei ket nung nok atsüteta amer lenmang nungji angu, lai lenmang nungjagi meyip aser aremi ai. Saka gadoji lenmang jagi meyipdaktsütsü Balaami azük; 24Idangji Kibuba tenyari tsükmenatzü lu ana tsüngda anatsülen jara alidak noktak. 25Kodang gado jagi Kibuba tenyarji angu, lai jara nungji tsüket aser Balaam tetsüng jara nungji menüng, anungji pai la dak azük. 26Ano Kibuba tenyar jagi tatsüka or külen tajichilena tabelena meyipshitsü makadak temesüdak ka noktak. 27Kodang gadoi Kibuba tenyarji angu, lai Balaam kübok mepitakadok, aser pai ajok jagi gado dakji azük. 28Idangji Kibubai gado tebang lapoktsü aser lai Balaam dang ashi, “Tan yagi asemben tashi nai kü dak azüktsüsa ni ne dang kechi inyak?”

29Balaami gado dang langzü, “Kechiaser nai ni sensatsü, kü ket nung nok ka ali asübo ni na tepseter lila.” 30Gadoi Balaam dang ashi, “Ne taküm tepiyong tanü tashi nai amenba ne meyong gadoji ni masü no? Ni iba amai ne dang benshidang asü?” Pai langzü, “Masü.”

31Idangji Kibubai Balaam tenük lapoktsü, aser pai Kibuba tenyarji nok atsüteter lenmang nungji angu. Anungji pai pei kolak mechioka pa jakdang apudak. 32Aser Kibuba tenyari pa dang asüngdang, “Kechiba nai ne gado dak tan yagi asemben tashi azüker? Ajiang na noktangtsü arubaji ni lir, ne lenmangji kü madang tejashitsü lir. 33Saka ne gadoi ni ngua asemben tashi kü madang nungi meyip. Lai kü madang nungi memeyip asübo ni na tangibo tepseter lila, saka labo taküm lila.”

34Balaami Kibuba tenyar dang ashi, “Ni temenen menaogo, kechiaser ni anema na lenmang nungji liasü ta ni memeteti liasü. Ajangla tang ya ne tsüngdang tepelatsü masü süra ni meyipa odi.”

35Saka Kibuba tenyar jagi Balaam dang ashi, “Nisungtem denji oang, saka ni kechi o shidir aji dang nai jembitsüla.” Anungji Balaami tongtipurtem denji ao.

Balaki Balaam Pelashishia Agizükba

36Kodang Balaki Balaam arudagi ta angashi, pai pa ajurutsü atema arrtsü tatembang Moab yimti Arnon tashi lenji ao. 37Balaki Balaam dang ashi, “Ni na tajai ilunga meyok no? Kechiba nai kü dangi maru? Ni na tushitsü makok no?”

38Balaami langzü, “Ajiang ni ne dangi arua lir! Ni ne dang langka ashitsü tashi kar ma? Tsüngremi kü bang nung enoktsüba o dang ni jembitsü akok.”

39Idangji Balaami Balak den Kiriath-huzoti ao 40Balaki nashi pungchi aser san tepseta Balaam aser pa den aliba tongtipurtem nem agütsü. 41Tasüngnepji Balaki Balaam Bamoth Boali anir atu, aser yang nung jagi pai nisungtemji tesadangka angu.

ZÜNGDANGBA 23

Balaam Shin O Mezüngbuba

1Idangji Balaami Balak dang ashi, “Yangi kü nem tenladak tenet yanglujang, aser kü nem nashi pungchi tenet aser san tepung tenet renemjang.” 2Balaami ashiba ama Balaki inyak, aser tenati tenladak shia nashi pungchi ka ka aser san tepung ka ka tenla.

3Idangji Balaami Balak dang ashi, “Na tarongba tenla anasa noktaka liang, aser ni aenshia odi, ashiko Kibubai kü den ajuruteptsü arutsü südi. Pai kü dang kechisa jungkai adoka sayudir, ni ne dang ashitsü.” Anungji pai tenem kati atu. 4Tang Tsüngremi Balaam ajurutsü aru, aser pai pa dang ashi, “Ni tenladak tenet renemogo, aser tenladak shia ni nashi pungchi ka ka aser san tepung ka ka tenlaogo.”

5Idangji Kibubai Balaam tebang nung o ka enoktsü aser ashi, “Balak dangi meyipang aser iba o pa dang shiang.” 6Anungji pai Balak dangi meyipa ao aser Moab tongtipurtem ajak pa den tarongba tenla anasa noktaka angu. 7Idangji Balaami ainkar o jembi:

“Aram nunger Balaki ni anir aru,

anüdoklen tenem nungi Moab chuba,

arung, ni asoshi Yakob atakatemjang,

arung aser Israel atakatemjang!

8Tsüngremi atakatem masüba ni kodaser atakatemtsü?

Kibubai atakatem masüba ni kodaser atakatemtsü?

9Tenem kolak nungi ni parnok angur,

Tenemtem nungi ni parnok angur.

Balaka pila-a aliba nisungtemji reprangang,

aser kintem rongnung züngdangtsü makokba!

10Shibai Yakober auyi züngdangtettsü?

Mesüra Israel aut züngdangtettsü?

Ochishir tasüba ama ni südakjang,

aser kü tatembang parnok ama lidakjang!”

11Idangji Balaki Balaam dang ashi, “Nai kü dang kechi inyak? Kü tsükchir anema atakatemtsü ni na anir aru, saka ajiang, nai parnok ang moatsüogo.” 12Pai langzü, “Kibubai kü bang nung kechi enoktsü aji dang ni kümdanga mejembitsü no?”

Balaam Shin O Tanabuba

13Idangji Balaki pa dang ashi, “Kü den tesem kati arung, yang nungjagi parnok ajaksa mesüaka na anasa alibaji angutsü. Aser yang nungjagi nai parnok ni asoshi atakatemjang.” 14Anungji pai pa Zofim moapui anir ao Pisga tenem kolaki atu, aser pai idakji tenladak tenet yanglu tenladak shia nashi pungchi ka ka aser san tepung ka ka tenla agütsü.

15Aser Balaami Balak dang ashi, “Na tarongba tenla anasa liang aser ni yangji Kibuba ajurutsü.”

16Idangji Kibubai Balaam den ajurutep aser pa tebang nung o ka enokja ashi, “Balak dangi meyipa oang aser yamai pa dang jembiang.” 17Anungji Balak dangi meyipa aru, aser Moab tongtipurtem den külemi pa tarongba tenla anasa noktaka liasü. 18Idangji Balaami ainkar o jembi:

Aramesoang, Balak, aser angang;

Zippor jabaso, kü dang angang!

19Tsüngremji nisung ama tiyazü jembitsüsa masü,

mesüra pa temulung melenshitsüsa nisung chir ka ama masü.

Pai jembir aji pai meinyaktsü no?

mesüra pai jembir aji pai matalokdaktsütsü asü?

20Ajidang moatsütsü asoshi ni temelaba ka nguogo;

pai moatsüogo, aser aji ni melenshitsü makok.

21Yakob dak tia tamajung majitet,

mesüra Israel dak timtem kecha mangu.

Parnok Tsüngrem Kibuba parnok den lir;

aser chubai ayimtenba parnok rongnung lir.

22Tsüngremi parnok Ijip nungi anitet;

paji parnok atema arem sümong tezü amai lir.

23Yakob anema arasenba kecha mali,

mesüra Israel anema an tokdangba kecha mali.

Tang Yakob aser Israel atema ya oda ashitsü,

reprangang, Tsüngremi kechi inyak!

24Reprangang, nisungtemji molusongzü tetsü ama lir,

aser molusongzü ama parnok sasa noktaka lir;

tetepsetba shiruru machi tashi aser iba zü majem tashi ontaka malir.

25Idangji Balaki Balaam dang ashi, “Parnokji atakatema tesü, mesüra temoatsüa temoatsü!”

26Balaami langzü, “Kibubai kechisa shidir ni aji inyaktsü ta ni ne dang meshika ma?”

Balaam Shin O Tasembuba

27Idangji Balaki Balaam dang ashi, “Arung, ni na tenem kati anir odi. Ashiko yang nungjagi ni atema parnok atakatemtsü Tsüngremi melatsüa kar.” 28Anungji Balaki Peor tenem kolak koba nungi lisem limaji reprangzüka yoker ajagi Balaam anir aru. 29Balaami Balak dang ashi, “Yangi Kü nem tenladak tenet yanglujang, aser kü nem nashi pungchi tenet aser san tepung tenet renemjang.” 30Balaami ashiba amaji Balaki inyak, aser tenladak shia nashi pungchi aser san ka ka tenla.

ZÜNGDANGBA 24

1Kodang Israel moatsüba nung Kibuba pelar ta Balaami ajitet, tanga mapang ama pai shin o bushia mao, saka pai pei tejak lisem lima leni meyip. 2Aser Balaami pei tenük roka asoa reprang aser Israel kin shia tanendak aliba angu, aser Tsüngrem tanela pa dangi aru, 3aser pai ainkar o jembi:

“Beor jabaso Balaam ainkar o,

shiba tenüki jangja-a angu, pa ainkar o.

4Tsüngrem otem shibai angashi item ainkar o.

Shibai ajak Takoksang mangdang angur,

shibai apudaker saka pa tenük saaka lir;

5Ner süki koda tajung, Oh Yakob,

ne talidak, Oh Israel!

6Lenten talang songtoka aliba ama,

ayong anasa aliba atsüki mesüka Kibubai atemba aloe dong mesüka,

ayong anasa cedar dong mesüka;

7pa kongsang nungi tzü ayimtsü,

aser par metsü atema tzü aika alitsü.

Par chuba Agag dang nungi temaba asütsü,

aser par yimti ajungkettsü.

8Tsüngremi parnok Ijip nungi anitet,

paji parnok atema arem sümong tezü tashi amai alitsü;

Parnok tsükchir kintem parnoki meyokadoktsü,

parnok teret anüka menüngsatsü, par lijakjang agi ateta akatsü.

9  Molusongzü ama pai apudak aser mejang,

molusongzü tetsü ama shibai pa mesotsü?

Shibai nenok moatsür parnok moajang,

aser shibai nenok atakatemer atakatem süang!”

10Idangji Balaki Balaam anema ain adok, aser pai teka anatsü maten; aser Balaki Balaam dang ashi, “Kü tsükchirtem atakatemtsü ni na aja, saka nai parnok asemben tashi moatsüogo. 11Anungji tang na pei kidangi jenang! Ni na kanga tushitsütsü ta ashi, saka ajiang Kibubai na tetushi nungi sota ayu.”

12Balaami Balak dang langzü, “Nai kü dangi osangbener yokdang ni ya oda meshika ma? 13Balaki pa chuba ki taribi aser hon agi sünga agüjaka, Kibuba kü Tsüngrem temelaba anema ni kecha inyaktsü makok.”

Balaam Shin O Pezübuba

14Tang ni kü nübur dangi meyipa aor, saka arung, tarutsü nung iba nübur ne nütsüngtem dang kechi inyaktsü ali ni ne dang shidi:

15“Beor jabaso Balaam ainkar o,

shiba tenüki jangja-a angu pa ainkar o;

16Tsüngrem otem shibai angashi pa ainkar o.

Shibai ajak Takoksang mangdang angur,

shibai apudaker saka tenük saaka lir;

17Ni pa angu, saka tang masü,

ni pa repranger saka ana nung masü;

Yakob nungi petinu ka adoktsü,

Israel nungi chuba mechi ka adoktsü,

aser pai Moab kolak ajasatsütsü,

Seth chirtem ajak raksatsütsü.

18Edom koktetadoktsü;

pa tsükchiri Seir agiadoktsü,

saka Israel tashi ita alitsü.

19Yakob nungi yimsüsür ka adoktsü,

aser yimti nung anünga alibatem tepsettsü.”

Balaam Shin O Tatembangba

20Idangji Balaami Amalek dak reprang, aser ainkar o jembi:

“Kintem rongnung Amalek mezüngbuba liasü,

saka tatem nung pa samatsü.”

21Aser Ken nunger dak reprang aser ainkar o jembi:

“Ne talidak tashi tait lir,

ne tesep lung nung yanglua lir.

22Aji saka Ken meshimeshia samatsü,

kodang Ashuri na tepuodaki anir odir.”

23Ano pai ainkar o jembia ashi:

“Aiatai! Tsüngremi ya inyak dang shiba taküm alitsü?

24Saka Kittim nungi rongtem arutsü;

Aser parnok Ashur aser Eber timtemdaktsütsü,

saka parnok tesama agi atongtsü.”

25Idangji Balaami arameso aser pei talidaki meyip, aser Balaka pei lenmangi ao.

ZÜNGDANGBA 25

Peor Nung Israel Chirtem

1Kodang Israel Shittim nung ali, nüburtemi Moab jalatem den nüktapangta benshitsü tenzük. 2Kechiaser parnoki nüburtemji par tsüngremtem asoshi tetepsetdaki aja, aser nüburtemi aji achi aser par tsüngremtem madang apudak. 3Aji oda Israel Peor nung Baal külem. Anungji parnok anema Kibuba ain adok. 4Kibubai Mosa dang ashi, “Israel nunger tanishir ajak ne den aniang, aser itemji anüngdang soseta südakjang, idangji Israel anema Kibuba mit tesashi anentsü.” 5Anungji Mosai Israel nunger o bendangertem dang ashi, “Shirsa Peor nung Baal külemer item nisung shia nenoki tepsettsüla.”

6Idangji parnok sentep süki kikümbang nung jeba alidang Israel chirtem rongnung kati Mosa aser Israel ajak sentepa aliba tsüngdang Midiantsür ka anir aru. 7Kodang Aron putir semchir Finehas aser Eleazar jabasoi aji angu, pai tekülemdak nungi adoka teka nung nü ka am; 8aser Israel nungba sülen anitaka ai, aser Israel nungba dak tsüngoktsüba jagi tetsürla tepok ateta atsüng. Idangji Israel chirtem dak waraji anen. 9Wara agi asürtemji nisung meyirijang metsürpezü liasü.

Finehas Tejangraba

10Idangji Kibubai Mosa dang ashi, 11“Aron putir semchir Eleazar jabaso Finehasi Israel nunger anema kü terasaba anendaktsüogo, kechiaser parnok rongnung pai ya kü tenükmiba agi ibai inyak nung ni Israel chirtem tatem mekümdaktsü. 12Anungji ni pa nem kü yimjung tezüngzüktepba agütsür ta shiang. 13Ibaji pa aser pa dak jakzükbatem asoshi teti atema putir mapa tezüngzüktepbaji alitsü. Kechiaser pai Tsüngrem atema tejangraba agi Israel chirtem atema temenen pungi inyakogo.”

14Tang Israel nunger shiba Midiantsürla den tepset, paji Simeon kidong tanishir Salu jabaso tenüng Zimri liasü. 15Aser tetepsetba Midiantsürla tenüngji Kozbi, Zur jala shiba Midian kidong tanishir liasü.

16Idangji Kibubai Mosa dang ashi, 17“Midian nungerji tsükchir ama züngshiang, aser parnokji tepsetang, 18Kechiaser Peor nung parnoki nenok tsükchir ama benshi, aser Kozbi, Midian nunger tanishir parnok jala, tetsür shiba nenoki Peor nung temenen wara anogo nung tepset.”

ZÜNGDANGBA 26

Tanabuba Nütsüng Züngdangba

1  Waraji süir külen, Kibubai Mosa aser Aron putir jabaso Eleazar dang ashi, 2“Israel nunger telok shia parnok kidong shia küm metsü nungi temalen Israel rarai otettsü pur ajak nütsüng züngdangang.” 3Anungji Mosa aser Eleazar putiri Moab lenten nung Yordan anasa Yeriko nung parnok den jembia ashi, 4“Küm metsü tema nungi nisungtemji züngdangang.” Kibubai Mosa dang melaba ama Mosai inyak. Itemi Israel chirtem shir Ijip lima nungi anir adok.

5Reuben, Israel mezüng asoba dak jakzükbatem: Hanok nungi Hanok kidong; Pallu nungi Pallu kidong; 6Hezron kidong, Karmi nungi Karmi kidong, 7Itemji Reuben dak jakzükbatem parnok nütsüng züngdangba meyirijang lir-asem noklang tenet ser semer. 8Pallu chirtem Eliab, 9aser Eliab chirtem Nemuel, Dathan aser Abiram. Iba Dathan aser Abiram telok rongnungi shimteta Kora telok den Mosa aser Aron den toktepdang Kibuba anema toktep. 10Aser ali-i pei tebang lapoka parnok Kora telok shirnok noklang ana ser tenem liasü parnok meyokadok. Anungji parnokji tansütsü ka aküm. 11Saka Kora chirtembo masü.

12Simeon dak jakzükbatem parnok kidong telemsa: Nemuel nungi Nemuel kidong; Yamen nungi Yamen kidong; Yakin nungi Yakin kidong; 13Zera nungi Zera kidong; Shaul nungi Shaul kidong. 14Itemji Simeon kidongtem parnok nisung meyirijang metsür ana noklang ana.

15Gad dak jakzükbatem parnok kidong telemsa: Zefon nungi Zefon kidong; Haggi nungi Haggi kidong; Shuni nungi Shuni kidong; 16Ozni nungi Ozni kidong; Eri nungi Eri kidong; 17Arad nungi Arad kidong; Areli nungi Areli kidong. 18Itemji Gad kidongtem parnok nisung meyirijang lir noklang pungu.

19Yihuda jabaso Er aser Anan, saka parnok Kanan lima nung süadok. 20Yihuda dak jakzükbatem parnok kidong telemsa: Shela nungi Shela kidong; Perez nungi Perez kidong; Zera nungi Zera kidong. 21Perez dak jakzükbatem: Hezron nungi Hezron kidong; Hamul nungi Hamul kidong; 22Item Yihuda kidongtem parnok nisung meyirijang neter trok noklang pungu.

23Issakar nungi jakzükbatem parnok kidong telemsa: Tola nungi Tola kidong; Pua nungi Pua kidong; 24Yashub nungi Yashub kidong; 25Itemji Issakar kidongtem parnok nisung meyirijang roker pezü noklang asem

26Zebulun nungi jakzükbatem parnok kidong telemsa: Sered nungi Sered kidong; Elon nungi Elon kidong; Yahaleel nungi Yahaleel kidong. 27Itemji Zebulun kidong parnok nisung meyirijang roker noklang pungu.

28Yosef jabaso Manase aser Efraim nungi jakzükba kidong: 29Manase dak jakzükba: Makir nungi Makir kidong. Makirji Gilead tebu aküm, aser Gilead nungi Gilead kidong. 30Itemi Gilead chirtem: Lezer nungi Lezer kidong; Helek nungi Helek kidong; 31Asriel nungi Asriel kidong; Shekem nungi Shekem kidong; 32Shemida nungi Shemida kidong. 33Hefer jabaso Zelofehad jabaso mali, jala dang liasü. Parnok tenüng Mahla, Noa, Hogla, Milka aser Tirza. 34Itemji Manase kidongtem parnok nisung meyirijang tenemer ana noklang tenet.

35Efraim nungi jakzükbatem parnok kidong telemsa: Shuthela nungi Shuthela kidong; Beker nungi Beker kidong; Tahan nungi Tahan kidong; 36Shuthela chirtem nungi Eram kidong. 37Itemji Efraim kidong parnok nisung meyirijang semer ana noklang pungu.

38Benjamin nungi jakzükba kidong telemsa: Bela nungi Bela kidong; Ashbal nungi Ashbal kidong; 39Shufam nungi Shufam kidong; Hufam nungi Hufam kidong; 40Bela jabasotem Ard aser Naaman: Ard nungi Ard kidong; Naaman nungi Naaman kidong. 41Itemji Benjamin kidongtem parnok nisung meyirijang lir-pungu noklang trok.

42Dan nungi jakzükba kidong itemi lir: Shuham nungi Shuham kidong. Itemji Dan kidong telemsa lir. 43Shuham kidong ajak agi parnok nisung meyirijang roker pezü noklang pezü.

44Asher nungi jakzükba kidong telemsa: Imna nungi Imna kidong; Beria nungi Beria kidong. 45Beria jabasotem: Heber nungi Heber kidong, Malchiel nungi Malchiel kidong. 46Asher jala tenüng Sera liasü. 47Itemji Asher kidongtem parnok nisung meyirijang tenemer asem noklang pezü.

48Naftali nungi jakzükbatem: Yahzel nungi Yahzel kidong; Guni nungi Guni kidong. 49Yezer nungi Yezer kidong; Shillem nungi Shillem kidong. 50Itemji Naftali kidongtem parnok nisung meyirijang lir-pungu noklang pezü.

51Itemi Israel chirtem züngdangba parnok nisung meyirijang noklang trok ser ka, noklang tenet semer.

52  Kibubai Mosa dang ashi, 53“Parnok tenüng aser yongsük apir linükji senmangtsü asoshi parnok rongnung lemsa-ang. 54Nütsüng timba nem linükji tuluba aser ishiba nem linükji tilaba ta lemsatsüla. 55Saka aliji antokdangba agi lemsatsüla. Parnok shia senmangji kidong tebouren nungi angutsüla 56An tokdangba agi adokba ama parnok senmangji timba aser ishiba tsüngda nung lemsatsüla.”

57Itemi Levi kin parnok kidong züngdangba: Gershon nungi Gershon kidong; Kohat nungi Kohat kidong; Merari nungi Merari kidong; 58Ano itemia Levi kidongtem lir: Libni kidong; Hebron kidong; Mahli kidong; Mushi kidong; Kora kidong; Kohatji Amram tebu liasü. 59Amram tebutsü tenüng Yokebed, Levi jala shiba Levi nem Ijip nungi sotsü. Lai Amram nem Aron, Mosa aser tena teyi Miriam sotsü. 60 Aronji Nadab, Abihu, Eleazar aser Ithamar tebu liasü.

61  Saka Nadab aser Abihu nati Kibuba madang tim masüba mapa mi tenla dang süadok. 62Levi kin tebur ajak ita ka tain temalen parnok nisung meyirijang metsür asem. Parnokji Israel chirtem züngsem nung maten, kechiaser parnok senmang kecha melemzük.

63Itemi Mosa aser Eleazar putir nati Moab lenten Yordan anasa Yeriko nung züngdangba lir. 64Parnokji Mosa aser Aron putir nati Sinai lisem arem nung Israel chirtem züngdangba rongnung matenba kata maliasü. 65 Kechiaser Kibubai parnok ajak oda Yefune jabaso Kaleb aser Nun jabaso Yihusua na dak alaka parnok ajak arem nung asütsü ta ashi.

ZÜNGDANGBA 27

Zelofehad Jalatem Senmang

1Idangji Yosef chir Manase kidong nungi Manase jabaso Makir aser semchir Gilead chir Hefer jabaso Zelofehad jalatem tejakleni aru. Itemi pa jalatem tenüng lir: Mahla, Noa, Hogla, Milka, aser Tirza. 2Parnoki Mosa, Eleazar putir, tanishirtem aser telok ajak madang sentep süki kiküm nung noktaka ashi, 3“Obala arem nung asü, saka Kibuba anema noktakba telok rongnung pa maten; saka pa pei temenen nung asü, aser par jabasotem maliasü. 4Pa jabaso maliyong kechiba onok tebu tenüng par kidong rongnungi endoktsü? Obala adianutem rongnungi onok nem senmangji kua.”

5Anungji Mosai parnok o Kibuba dangi bener aru. 6Idangji Kibubai Mosa dang ashi, 7 “Zelofehad jalatemi kechi jembiogo aji shitak lir. Atangji nai tebu kinunger den senmangtsü agütsütsüla, aser nai parnok tebu senmangji parnok nem amangdaktsütsüla. 8Ano nai Israel chirtem dang yamai ashitsüla, Nisung ka jabaso metoktsüi süadokra, pa senmangji pa jala dangi odakjang. 9Aser pa jala melira idangji pa senmangji pa adianu nem agüjang. 10Pa adianu melira, idangji pa tebu adianu nem senmangji agüjang. 11Aser tebu adianu melira, idangji pa anasatiba sosem nem senmangji agütsütsüla.”

Mosa Melen Yihusua Shimba

(Taz. 31.1-8)

12  Idangji Kibubai Mosa dang ashi, “Abarim tenemi tuang aser ni Israel chir nem agütsüba linükji ajiang. 13Kodang nai aji ngudir na-a nedi Aron ama pei pur den adentsü; 14Kechiaser nenapronglai Zin lisem lima arem nung kü ozüng anema apuso. Kodang telok ajaki Meriba nung ni anema noktak, nai kü temeshi tenüng anema apuso.” (Itemi Zin lisem lima arem nung Meriba-kadesh tzü lir.)

15Idangji Mosai Kibuba dang ashi, 16“Kibuba meimchir ajak tanela metetsang Tsüngremi telok madak tanishir ka shimjangma. 17Parnok jakdang oli aruli ta asütsüsa pai parnok anir aotsü aser anir arutsü, anungji Kibuba nüburtemji sannüker maliba san telok ama masütsü.”

18  Anungji Kibubai Mosa dang ashi, “Nun jabaso Yihusua shiba dak tanela tajung lir, nai pa agiang aser ne teka agi pa dak nemetang; 19aser pa Eleazar putir aser telok ajak madang noktakdakjang; aser parnoki ngua bendanga agüjang, 20Aser nai pa nem ne mapa kar agüjang, anungji Israel chirtemi pa dang angatsü. 21 Pa Eleazar putir madang noktaktsü aser putir jagi pa asoshi Kibuba madang Urim agi lemtettsü asüngdangtsü. Yamaji Eleazari Yihusua aser Israel nunger telok ajak aotsü indang ashitsü.” 22Kibubai pa dang melaba ama Mosai inyak. Pai Yihusua anir arua Eleazar aser telok ajak madang noktakdaktsü. 23 Aser Kibubai melaba ama pa teka agi Yihusua dak nemet aser bendanga agütsü.

ZÜNGDANGBA 28

Anogoshi Tenlatem

(Ani. 29.38-46)

1 Kibubai Mosa dang ashi, 2“Israel chirtem dang mela-ang aser shiang, nenoki kü dang chiyungtsü tenla teronem tanang asoshi mi agi tenlaba, item mapang shitak nung kü dang tenlatsü asoshi kümdangang.

3“Parnok dang shiang, Kibuba dang nenoki mi agi tenlatsübaji ibai lir: anogoshia maneni tarongba tenla asoshi san tepung tarak maket küm ka chanu ana; 4san chanu ka anepdang tenlatsü aser ka nikongdang tenlatsü, 5iba den chiyungtsü tenla asoshi amzü tanük jangku ka, temenüngzükba oliv totzü süngti marok ka. 6Ibai maneni ronga aliba anogoshi tenla Kibuba dang teronem asoshi mi agi tenlabaji koba Sinai tenem nung tentet.

7“Iba den tajemtsü tenlaji san chanu ka shia süngti marok ka, tekülemdak Kibuba dang tajemtsü tenla asoshi shiloktsütsü. 8Nikongdang san tanabubaji tajemtsü tenla anepdang agütsüba amaji tenla-ang. Ibai Kibuba dang teronem tanang asoshi mi agi tenlabaji lir.

Amungnü Tenla

9“Amungnü küm ka chanu tarak maket san chanu ana den chiyungtsü tenla asoshi amzü jangku ana totzü den meyokteper tenlatsüla. 10Ibai maneni ronga aliba aser tajemtsü tenla dak alema Amungnü tenlaji lir.

Ita Tasen Tenla

11“Ita tasen mezüng anogo nung Kibuba dangi küm ka chanu tarak maket nashi pungchi ana, san tepung ka, san tepung chanu tenet ta tenlatsüla. 12Nashi pungchi ka asoshi chiyungtsü tenla atema amzü tanük jangku asem totzü den meyokteper; aser san tepung asoshi amzü totzü den meyokteper jangku ana; 13aser san tepung chanu ka asoshi chiyungtsü tenla atema amzü tanük den meyokteper jangku ka. Aji teronem tanang asoshi Kibuba dang mi agi tenlabaji lir. 14Nashi pungchi shia den tajemtsü asoshi süngti marok tesadang ka; san tepung den süngti marok shilem nung shilem ka; aser san tepung chanu asoshi süngti marok pezüsü shilem nung shilem ka. Aji ita tasen mezüng anogo nung küm tepiyong tenlaba lir. 15Iba den ano Kibuba nem temenen tenla asoshi nabong tepung ka, maneni tarongba tenla aser tajemtsü tenla agütsüba dak alema tenlatsüla.

Süia Aoba Benjong Tenla

(Ani. 12.14-20; Lev. 23.5-14; Taz. 16.1-8)

16  “Mezüngbuba ita anogo terpezübubaji Kibuba meyong Süia aoba benjong akatsüla. 17 Iba ita anogo terpungunü buba nung benjong ka akatsü, anogo tenet tashi piyazü meinokba amtsük achitsü. 18Mezüngbuba anogo nung temeshi sentep ka akatsü, aser mapa kecha meinyaktsü. 19Kibuba dang mi agi tenlaba tarongba tenla asoshi tarak maket nashi pungchi ana, san tepung ka aser küm ka chanu san tepung tenet agütsütsüla. 20Chiyungtsü tenla asoshi nashi pungchi ka den amzü tanük totzü den meyokteper jangku asem aser san tepung ka den jangku ana. 21San chanu tenet shia jangku ka ka. 22Aser ne menen pungitsü asoshi nabong tepung ka atentsüla. 23Anepdang tarongba tenla koba teti asoshi ronga lir, iba dak alema nai itemi tenlatsüla. 24Yamaji anogo tenetnü anogo shia mi agi tenlaba chiyungtsü tenla aser teronem tajung asoshi Kibuba dang tenlatsüla. Ibai maneni ronga aliba tenla aser tajemtsü tenla dak alema tenlatsüla. 25Anogo tenetnübuba nung nenok temeshi sentep ka akatsü, aser mapa kecha meinyaktsü.

Aluruba Benjong Tenla

(Lev. 23.15-22)

26  “Ano aluruba benjong mezüng anogo nung kodang nenoki Kibuba dang chiyungtsü tasen agütsüdir; nenoki temeshi sentep ka akatsüla aser mapa kecha meinyaktsüla. 27Teronem tajung asoshi nashi pungchi chanu ka, san tepung ka aser küm ka chanu tepung tenet Kibuba dang tarongba tenla asoshi agütsütsüla. 28Aser parnok chiyungtsü tenla asoshi amzü tanük den totzü meyokteper nashi pungchi ka den jangku asem, aser san tepung asoshi jangku ana, 29san chanu ka ka asoshi jangku ka ka, 30ne menen pungitsü asoshi nabong tepung ka. 31Maneni ronga aliba aser chiyungtsü tenla dak alema nai itemji tajemtsü tenla den külemi agütsütsüla. Ano shirurutemji tarak maket asütsüla.

ZÜNGDANGBA 29

Kümsem Benjong Tenlatem

(Lev. 23.23-25)

1“Aser ita tenetbuba mezüng anogo nung nenok temeshi sentep ka akatsüla, aser mapa kecha meinyaktsüla. Nenok asoshi ibai jangzü apuba anogoji lir. 2Kibuba dang teronem asoshi tarak maket nashi pungchi ka, san tepung ka aser küm ka chanu san tepung tenet tarongba tenla agütsütsüla. 3Ano parnok chiyungtsü tenla asoshi amzü tanük totzü den meyokteper nashi pungchi ka asoshi jangku asem, san tepung ka asoshi jangku ana, 4aser san chanu tenet shia jangku ka ka. 5Iba dak alaka ne menen pungitsü asoshi nabong tepung ka tenlatsüla. 6Ano iba dak alaka ita tasen aser anogo shia tarongba tenla aser chiyungtsü aser tajemtsü tenla yimsü ozüng amato Kibuba dang teronem tajung asoshi mi agi tenlatsüla.

Temenen Pungiba Anogo

(Lev. 23.26-32)

7  “Aser ita tenetbuba anogo tenetbuba nung nenok temeshi sentep ka akatsü. Iba nungji nenok sasa mapa nungi ajemalua aser mapa kecha teinyak. 8Nenoki Kibuba dang teronem tajung asoshi tarak maket nashi pungchi chanu ka, tepung ka aser küm ka chanu san tepung tenet tenla agütsütsüla. 9Nashi pungchi denji amzü tanük totzü den meyokteper jangku asem; san tepung denji amzü jangku ana; 10aser san chanu ka ka shia jangku ka ka. 11Iba den ano temenen pungiba tenla asoshi nabong ka, ibaji maneni ronga aliba aser temeim tenla chiyungtsü aser tajemtsü tenla dak tali agütsütsüla.

Semtu Benjong

(Lev. 23.33-44)

12“Ita tenetbuba anogo terpungububa nung nenoki temeshi sentep ka akatsüla, aser mapa kecha meinyaktsüla. Kibuba atema nenoki anogo tenetnü tashi benjong alitsü. 13Kibuba dang teronem tajung asoshi mi agi tenlatsüla. Tarongba tenla asoshi tarak maket nashi pungchi chanu terasem, san tepung ana, aser küm ka chanu san tepung terpezü 14Nashi pungchi terasem shia ka ka den chiyungtsü tenla asoshi amzü tanük totzü den meyokteper jangku asem, san tepung ana ka ka shia jangku ana; 15aser san tepung chanu terpezü ka ka shia jangku ka. 16Maneni tarongba tenla den chiyungtsü aser tajemtsü tenla asoshi nabong tepung ka agütsütsüla.

17“Tananübuba nung nashi pungchi tarak maket terana, san tepung ana aser küm ka chanu san tepung terpezü tenlatsüla. 18Parnok chiyungtsü aser tajemtsü tenla asoshi lateta akaba ama nashi pungchi san tepung aser san chanu asoshi amzüji tenlatsüla. 19Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

20“Tasemnübuba nung tarak maket nashi pungchi terka, san tepung ana, aser küm ka chanu san tepung terpezü renemtsüla. 21Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemtsüla. 22Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

23“Aser pezünübuba nung tarak maket nashi pungchi ter, san tepung ana, aser küm ka chanu san tepung terpezü renemang. 24Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemtsüla. 25Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

26“Pungunübuba nung tarak maket nashi pungchi tuku, san tepung ana, aser küm ka chanu san tepung terpezü renemang. 27Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemtsüla. 28Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

29“Anogo troknübuba nung tarak maket nashi pungchi ti, san tepung ana, aser küm ka chanu san tepung terpezü renemang. 30Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemtsüla. 31Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

32“Anogo tenetnübuba nung tarak maket nashi pungchi tenet, san tepung ana, aser küm ka chanu san tepung terpezü renemtsüla. 33Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemang. 34Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

35“Anogo tinübuba nung nenoki temeshi sentep ka akatsüla, aser mapa kecha teinyak. 36Kibuba dang mi agi tenlaba teronem tanang asoshi tarak maket nashi pungchi ka, san tepung ka, aser küm ka chanu san tenet tarongba tenla agütsütsüla. 37Nashi pungchi, san tepung aser san chanutem den chiyungtsü aser tajemtsü tenla asoshi yimsü ozüng nung aliba ama tatakzük renemang. 38Aser maneni tarongba tenla den chiyungtsü aser tajemtsü tenla dak alaka temenen tenla asoshi nabong tepung ka agütsütsüla.

39“Nenok tatemzükba tenla, temulunger tenla; tarongba tenla; chiyungtsü tenla; tajemtsü tenla aser yimjung tenla dak alaka itemi Kibuba dang nenoki tenlatsüla.” 40Kibubai Mosa dang melaba ama pai Israel chirtem dang ajak ashi.

ZÜNGDANGBA 30

Tatemzükba

1Idangji Mosai Israel chirtem kin shia tanishirtem dang Kibubai melabatem metetdaktsü. 2 “Kodang nisung kati Kibuba dang langka atemzükdir mesüra langka azüngashidir, pai pei oji meraksatsüla saka pai jembizükba o ajakji inyaktsüla.

3“Kodang tetsür kati pei tebu kidang lia langka atemzükdir mesüra tatemzükba ka kübok la lidir, 4aser la tebui lai atemzükbaji angashir la dang kecha meshira, idangji lai atemzükba aser tenangzükba kobasa lai nangzük, item ajak memelenshitsü. 5Saka lai atemzükba aser la tenangzükbaji tebui angashia aji memelara, la tatemzükba aser tenangzükbatem ajakji kecha magitsü; Kibubai la dang tai atoktsü kechiaser tebui la dang aji memela.

6“Lai mebilemdangi la tebangmechi-i jembizüka yokba yong tatemzükba kübok aliba mapang la kiyi ora, 7aser la kinungpui aji angashia la dang kecha meshira, idangji lai tatemzükba aser nangzükba ajakji meraksatsü. 8Saka la kinungpui aji angashir la dang aji memelara, lai mebilemdangi atemzüka akaba tenangzükba ajakji paidoktsü, aser Kibubai la dang tai atoktsü.

9“Saka amitsüri mesüra tepalaba tetsüri kechi atemzükdir aji agi la alena alitsü. 10Tetsür ka kinungpu den lia lai langka atemzükra aser tenangzükba ka kübok la lira 11aser lai kinungpui aji angashir la dang kecha meshira, idangji lai atemzükba ajak kübok la alitsü. 12Saka la kinungpui aji angashia la dang itemji memelara, idangji lai atemzükba o ajak paidoktsü. La kinungpui aji memela aser Kibubai la dang tai atoktsü

13“Tatemzükba aser tenangzükba koba kübok la ajemalua alir, aji la kinungpui inyaktsü mesüra paidoktsü akok. 14Saka la kinungpui aji angashiba anogo nung la dang kecha meshira, idangji lai atemzükba ajak lai inyaktsü. 15Saka pai aji angashir mapang tatsüka lir ang aji paidoktsüra, idangji la temenen lai abentsü.”

16Kinungpu aser kinungtsü na tsüngda tebu den aliba mapang tebu aser jala aser par kidang aliba ajak asoshi Kibubai Mosa ajanga agütsüba ozüng ibai lir.

ZÜNGDANGBA 31

Midian Nunger Dak Mang Ayangba

1Idangji Kibubai Mosa dang ashi, 2“Israel chirtemi Midian nunger dak mang yangang, iba sülen pa pei pur den atentsü.”

3Anungji Mosai nisungtem dang ashi, “Midian nunger anema Kibubai mangyangba aser parnok den raratsü asoshi nenok teburtem renemang. 4Israel kin shiai meyirijang ka ka yokang.”

5Anungji kin shia meyirijang ka ka shimteta parnok rarai aotsü asoshi meyirijang terana renem. 6Kin shia nungi meyirijang ka ka Mosai Eleazar putir jabaso Finehas den yok, shibai tekülemdak nungi oset-tsüset aser ar-asangtsü asoshi jangzü bener ao. 7Kibubai Mosa dang melaba ama parnoki Midian nunger den rara aser tebur shia tepset. 8Parnok tepsetertemji: Evi, Rekem, Zur, Hur, aser Reba: Midian chubatem pungu. Parnoki ano Beor jabaso Balaam-a nok agi tepset.

9Aser Israel chirtemi Midiantsürtem, tanurtem aser Midian nunger kiset shirurutem; san aser nashi telok, aser parnok oset ajak rakzüka agi, 10aser Midian nunger yimtitem aser parnok tanendak ajak parnoki mi agi rongdoktsü. 11Parnoki makzükba oset, shiruru aser nisung ajak parnoki agi. 12Aser parnoki tepuokertem, terakzükba aser temakzükba oset ajakji Mosa aser Eleazar putir, aser Israel chirtem telok sentepi Yordan anasa Yeriko nung Moab lenteni bener aru.

Rarai Aortem Meyipa Aruba

13Mosa, Eleazar putir aser telok tanishirtem ajak tanendak nungi tugua parnok lenji ao. 14Aser Mosai temeranger telok tanishirtem meyirijang madak aser noklang madak arkotong, shir rara nungi meyipa shilang, parnok dang ain adok. 15Pai parnok dang asüngdang, “Tetsür ajak nenoki kümzükogo ma? 16 Ajiang item jagi Balaami shisatsü agütsüba ajanga Israel chirtem Peor nung Kibuba anema aibelendaktsü, anungji Kibuba nübur rongnung wara liasü. 17Aji asünung tang tebur ajak aser tetsür shirnoki tebur den medemdangogo, parnok ajakji tepsetang. 18Saka tebur den memedemba aiür chanutemji nenok asoshi taküm kümzükang. 19Aser nenok shibaisa nisung tepsetogo, aser tasü mang dak kongshiogo; tanendak kimalen anogo tenetnü liang. Anogo asemnübuba aser tenetnübuba nung nenoki puokbatem meshitettsüla. 20Süoshi ajak aser shiküp agi yangluba, nabong tezüng agi yangluba mesüra süng agi yangluba oset ajak merüktetang.”

21Idangji rarai aor nisungtem dang Eleazar putiri ashi, “Kibubai Mosa dang melaba ozüng tentetji ya lir: 22Hon, taribi, yongmenyin, merang, merang tanük, shesa yin, 23aser kechisa mi agi merongsar, itemji mi agi merüktettsüla, idangji aji merükteta akümtsü. Aser kechisa mi agi rongsar itemji tzü agi merüktettsüla. 24Tenetnübuba nung nenok süoshi shitokang ajiser nenok merüka akümtsü. Idangji ang nenok tanendaki arutsü.”

Temakzükba Osettem Lemsaba

25Idangji Kibubai Mosa dang ashi, 26“Eleazer putir nena aser kidong shia tanishirtemi temakzükba nisung aser shiruru ajakji züngdangang. 27Temakzükbaji tongbangi aor aser tanüngba telok asoshi kasa lemdangang. 28Tongbangi aor shilem nungi Kibuba asoshi alimelen agiang. Nisung, nashi, gado, san mesüra nabong shia noklang pungu shia ka ka. 29Ibaji parnok tesadang nungi agizüktsü aser Kibuba shilem asoshi Eleazar putir nem aji agüjang. 30Israel chir nem tesadang agütsüba nungi nisung, nashi, gado, san, nabong mesüra tanga shirurutem nungi tenem shia ka ka. Itemji Levitem shir Kibuba tekülemdak ketdangsertem lir parnok nem agüjang.” 31Anungji Kibubai melaba ama Mosa aser Eleazar putir nati inyak.

32Tang temakzükba koba temerangertemi agiba nungi benden, aji san meyirijang noklang trok neter pungu, 33nashi meyirijang neter ana, 34gado meyirijang roker ka, 35tebur den memedemba tetsür meyirijang semer ana. 36Rarai aortem tesadang shilem nungi san meyirijang noklang asem semer tenet, noklang pungu, 37iba nungi Kibuba shilemji noklang trok neter pungu; 38nashi meyirijang semer trok, iba nungi Kibuba shilem neter ana; 39gado meyirijang semer noklang pungu, iba nungi Kibuba shilem roker ka; 40aser nisung meyirijang ter trok, iba nungi Kibuba shilem semer ana. 41Kibubai Mosa dang melaba Kibuba shilem alimelenji Eleazar putir nem agütsü.

42Israel chirtem shilem tesadang koba temerangertem den Mosai lemsatsü, 43telok meyong tesadangji san meyirijang noklang asem semer tenet noklang pungu, 44nashi meyirijang semer trok, 45gado meyirijang semer, noklang pungu, 46aser nisung meyirijang ter trok.

47Israel chirtem shilem nungi nisung aser shiruru tenem shia ka ka Mosai shimtet. Kibubai pa dang melaba ama pai itemji Levitem shir Kibuba tekülemdak ketdangsertem lir parnok nem agütsü.

48Idangji temeranger telok tanishirtem meyirijang madak aser noklang madak arkotongtemi Mosa dangi ai 49aser parnoki Mosa dang ashi, “Ne kilirtemi onok ket nung aliba temerangertem züngdangogo, aser onok ka danga mesamai lir. 50Kibuba madang onok temenen pungitsü asoshi onok nisung shiai bener aruba kisen, küri aser azük, item nungi Kibuba dangi tenla bener arua lir.”

51Anungji Mosa o Eleazar putir nati parnok nungi hon aser tanga osettemji agizük. 52Meyirijang aser noklang madang arkotongtemi Kibuba nem agütsüba hon ajak agi shekel meyirijang ter trok noklang tenet tenem liasü. 53Temerangertem ajak rara nung temakzükba oset pei asoshi agi. 54Anungji Mosa o Eleazar putir nati temerangertem meyirijang aser noklang madak arkotongtem ket nungi honji agia sentep süki-i bener arua Israel chirtem asoshi Kibuba madang tebilemtettsü asoshi ayu.

ZÜNGDANGBA 32

Yordan Anüdoklen Kintem

1Tang Reuben aser Gad kintem kiset shiruru jenti liasü. Parnoki Yazar aser Gilead linükji parnok kiset shirurutem atema tetemsü ta angu, 2anungji parnoki Mosa o Eleazar putir aser telok tanishirtem dangi arua ashi, 3“Atarot, Dibon, Yazer, Nimra, Heshbon, Eleale, Nebo aser Beon, 4alinük koba Kibubai Israel telok nem kokdaktsü, ya kiset shirurutem asoshi tetemsü lir, aser ne kilirtem kiset shirurutem jenti kar. 5Onok ne nükdang yimlibilem ngura, item linük ya ne kilirtem senmang asoshi agüjangma; Yordan ayongji ajanga onok tani ma.”

6Mosai Reuben aser Gad chirtem dang ashi, “Nenok adianutem rarai aodang nenokbo yangi mena alitsü no? 7Kechiba Kibubai agütsüba limai aotsü atema Israel chirtem tezü tangdaktsür? 8 Linük reprangtsü asoshi Kadesh-barnea nungi ni parnok yokdang nebu nungeri yamai inyak. 9Kechiaser kodang parnoki Eshkol lenteni tur alinükji penzü, Kibubai Israel chirtem nem agütsüba lima jagi parnok maitsüla ta parnok tasü maiti kümdaktsü. 10 Iba anogo nungji Kibubai ain adoka ya oda azüngashi: 11‘Kechiaser parnok temulung ajak agi kü sülen manitak nung, ni Abraham, Isak aser Yakob dang azüngashia nangzükba lima jagi Ijip nungi adoker küm metsü nungi temalen shingaia aji mangutsü, 12oda Keniz nunger Yefune jabaso Kaleb aser Nun jabaso Yihusua dak alema; kechiaser tenati dang temulung ajak agi Kibuba sülen anitak.’ 13Israel anema Kibuba ain adok aser pa madang tamajung inyakertem ajak mesama tashi pai parnok küm lir tashi arem nung nemzüdaktsü. 14Aser tang Israel anema Kibuba tetsübutsü ain adokba tali kümdaktsütsüsa yangi nebu nunger melen temenen telok ka nenok adoka lir. 15Pa sülen manitaki nenoki meyipa ora, pai tanaben nenok arem nung toktsütsü, aser parnok samaba khu ajak nenoki abentsü.”

16Idangji parnoki Mosa dangi arua ashi, “Onoki kiset shirurutem asoshi aser tetsür tanurtem asoshi idaki yimti yanglutsü, 17saka Israel chirtem parnok talidaki anir maru tashi parnok jakdang onok aotsü onok renema lir, saka linük nisungtem nungi kümzüka alitsü atema onok tetsürtem aser tanurtem yimti atsü kübok lidaktsütsü. 18Israel chirtem shia pei senmang melemzük tashi onok meyipa maotsü. 19Yordan külenji onoki senmang kecha magitsü, kechiaser onok meyong senmang Yordan len anüdoklen tsütsü lir.”

20Anungji Mosai parnok dang ashi, “Nenoki ya inyakdi süra, nenoki Kibuba madang raratsü renema lira, 21aser nenok ajaki pei tsükchir maridok tashi Yordan ajanga Kibuba madang odi süra, 22aser kodang Kibuba madang alinükji maktetdir, nenok meyipa oa Kibuba aser Israel chirtem tsüngdang nungi tai makai alitsü aser iba linük ya Kibuba madang nenok senmang alitsü. 23Saka iba mapa nung nenoki tamakok ngura, ajiang nenoki Kibuba anema temenen menar aser nenok temenen asoshi nenok merenshitsü ta metetang. 24Nenok tetsürtem aser tanurtem asoshi yimti aser kiset shirurutem asoshi ki yangluang, saka nenoki kechi nangzükogo aji inyaktsüla.”

25Gad aser Reuben chirtemi Mosa dang ashi, “Onok kiburi ashiba ama ne kilirtemi inyaktsü. 26Onok tanurtem, kinungtsürtem aser onok nashi aser san telok Gilead yimti tem nung alitsü. 27Saka ne kilirtem ozü kiburi ashiba ama Kibuba madang tongbangi ayongji ajanga rarayonga aotsü.”

28  Idangji Mosai Eleazar putir, Nun jabaso Yihusua aser Israel kidong tanishirtem dang parnok atema iba ozüng ya agütsü. 29Pai parnok dang ashi, “Gad aser Reuben chirtem nisung shia tongbang asoshi Kibuba madang nenok den Yordan ayongji ajanga arura, aser kodang alinükji nenoki maktetdir, parnok nem Gilead limaji senmangtsü asoshi agüjang. 30Saka parnoki nenok den ayongji ajanga rarai marura, parnok senmang Kanan lima nung nenok den lemzüktsüla.”

31Idangji Gad aser Reuben chirtemi langzü, “Kibubai kechisa shiogo, ne kilirtemi aji inyaktsü. 32Onoki Kibuba madang ayongji ajanga Kanani nok o nü bener aitsü, saka onok senmangtsü asoshi kechi ngudir ajibo Yordan ajanger dang alitsü.”

33Anungji Mosai Gad aser Reuben chirtem aser Yosef jabaso Manase chirtem tesadang ka nem Amor nunger chuba Sihon yimli aser Bashan chuba Og yimli, item yimtitem aser parnok meketa aliba linük ajongaji agütsü. 34Aser Gad chirtemi Dibon, Atarota, Aroer yanglu, 35Atarot, Shofan, Yazer, Yogbeha, 36Beth Nimra aser Beth Haran jara yimtitemji yanglushi, aser parnok kiset shirurutem asoshi ki yanglu. 37Aser Reuben chirtemi Heshbon, Eleale, Kiriathaim, 38aser ano Nebo aser Baa-meon item tenüngji melenshir aser Sibma parnoki yangluba tenüng tanga aja.

39Aser Manase jabaso Makir chirtemi Gileadi oa yangji aliba Amor nunger nungi aji rakzüka agi. 40Anungji Mosai Manase jabaso Makir chir nem Gileadji agütsü, aser yangji parnoki ali. 41Manase semchir Jair-i oa item yimtsüngtemji atsüngtet, aser item tenüng Havvoth-Yaira ta aja. 42Aser Nobai Kenat aser iba temeket yimtsüngtem agi aser iba tenüngji pa nüngten Noba ta aja.

ZÜNGDANGBA 33

Ijip Nungi Yordan Tashi Senzüba

1Mosa aser Aron nati anir Israel nungertem Ijip lima nungi adoker aodang parnok telok amungdak itemi lir. 2Kibubai melaba ama parnok amungdak Mosai zülua ayu, aser ibai parnok munga munga senzüdak tesem balalaji lir:

3Israel nungertem mezüng ita anogo ter-pungunübuba süia aoba benjong sür tasüngji Ramses nungi apuso. Parnoki tasü ita Ijip nunger ajaki ngua apuso. 4Kodang Ijip nungertem pei mezüng asobatem shir Kibubai tepset, idangji parnok renemya liasü. Kibubai ano parnok tsüngremtem madak temerenshi agütsü.

5Israel nungertemi Ramses toktsür Sukkoti arua anen. 6Aser parnoki Sukkot nungi aenshia oa Etham arembang nung anen. 7Parnoki Etham toktsür Baal-Zefon anüdoklen Pihahiroti meyip aser Migdol nung anen. 8Parnoki Pihahirot toktsür tzüyim ajanga aremi ao aser kodang parnoki Ethem arem nung anogo asemnü jajar Mara nung anen. 9Ano parnoki Mara toktsür Elimi ao, kodang ayongnu terana aser asangdong neter liasü parnoki idakji anen.

10Parnoki Elim toktsür Temerem Tzüyim anasa anen. 11Temerem Tzüyim toktsür ano parnoki Sin arem nung anen. 12Aser Sin arem toktsür parnoki Dofka nung anen. 13Dofka toktsür parnoki Alus nung anen. 14Alus toktsür parnoki Refidim nung anen. Yangji nüburtemi tajemtsü tzü mungutet.

15Refidim toktsür parnoki Sinai arem nung anen. 16Sinai toktsür parnoki Kibrothhattaava nung anen. 17Kibrothhattaava toktsür parnoki Hazerot nung anen. 18Hazerot toktsür parnoki Rithma nung anen. 19Rithma toktsür parnoki Rimmonperez nung anen. 20Rimmonperez toktsür parnoki Libna nung anen. 21Libna toktsür parnoki Rissa nung anen. 22Rissa toktsür parnoki Kehelatha nung anen. 23Kehelatha toktsür parnoki Shefer tenem nung anen. 24Shefer tenem toktsür parnoki Harada nung anen. 25Harada toktsür parnoki Makhelot nung anen. 26Makhelot toktsür parnoki Tahat nung anen. 27Tahat toktsür parnoki Tera nung anen. 28Tera toktsür parnoki Mithka nung anen. 29Mithka toktsür parnoki Hashmona nung anen. 30Hashmona toktsür parnoki Moserot nung anen. 31Moserot toktsür parnoki Benejaakan nung anen. 32Bene-jaakan toktsür parnoki Horhaggidgad nung anen. 33Hor-haggidgad toktsür parnoki Yothatha nung anen. 34Yotbatha toktsür parnoki Abrona nung anen. 35Abrona toktsür parnoki Ezion-geber nung anen. 36Eziongeber toktsür parnoki Zin lisem (aji kadesh) lima arem nung anen. 37kadesh toktsür parnoki Edom linük tatembang Hor tenem nung anen.

38  Kibubai melaba ama Aron putir Hor tenemi atu aser idakji asü. Aji Israel nungertem Ijip nungi adoker küm lirbuba ita pungububa mezüng anogo liasü. 39Aser Aron asüdang pa arishi küm noklang ka metsür asem liasü.

40  Tang Kanan nunger chuba Arad, shiba Negeb nung liasü, pai Israel nungertem aruba angashi.

41Aser Hor tenem toktsür parnoki Zalmonai aru. 42Zalmona toktsür parnoki Punon nung anen. 43Punon toktsür parnoki Oboti aru. 44Obot toktsür parnoki Moab arrtsü nung Iyeabarimi aru. 45Iyeabarim toktsür parnoki Dibon-gad nung anen. 46Dibon-gad toktsür parnoki Almon Diblathaim nung anen. 47Almon Diblathaim toktsür parnoki Nebo madang Abarim tenem nung anen. 48Abarim tenem toktsür parnoki Yordan anasa Yeriko nung Moab lenten nung anen. 49Aser parnok tanendakji Moab lenten nung Yordan süia Beth-yeshimot nungi Abel-shittim tashi liasü.

Kanan Lima Senmangtsü Indang Temelaba

50Idangji Yordan anasa Moab lenten Yeriko nung Kibubai Mosa dang ashi, 51“Israel chirtem dang shiang; kodang nenoki Yordan ajanga Kanan limai idir, 52nenok jakdang aliba nisung ajakji aridoktsüla. Parnoki lung agi angentetba aser merang agi yangluba süngyanglutem aser parnok tokong tekülemdak ajak anüka raksatsütsüla. 53Aser nenoki linükji agia yangji liang, kechiaser alinükji ni nenok nem agütsüogo. 54 An tokdangba agi nenoki alimaji kidong shia lemsatsüla. Telok tuluba nem tuluba aser tilaba nem tilaba ta lemsatsüla. An tokdangba agi kechi adokdir aji parnok shilem asütsü. Nenoki tebouren kidong telemsa agi aji amangtsü. 55Saka yangji alirtem linük nungi nenoki maridokra, nenoki shir lidaktsütsü melar, parnokji nenok tenük nung anak ama aser nenok tesa nung ai amai alitsü. Nenok alitsüba linük nungji parnoki nenok nem timtem agütsütsü. 56Aser ni parnok dang kechi benshitsü liasü aji nenok dak benshitsü.”

ZÜNGDANGBA 34

Kanan Lima Arrtsü

1Idangji Kibubai Mosa dang ashi, 2“Israel nungertem dang ya mela-ang aser shiang, kodang nenok Kanan limai idir, nenoki amangtsüba lima artsüji yamai alitsü. 3Anüdoklentip tsütsü arrtsüji Zin lisem lima nungi Edom tashi. Anüolentip Metsü Tzüyim teküboklen tatembang nungi anüdoklen tashi, 4yang nung jagi anüolentip tsütsü Akrabbim leni atutsü aser Zin leni oa Kadesh-barnea, Hazar-adda aser maneni Azmon tashi aotsü. 5Aser aji Ijip arrtsü lenten tashi oa Tzüyim nungji atemtsü.

6“Anüolen arrtsüji Tzüyim tulu ayongküm tashi, ibai nenok anüolen arrtsü alitsü.

7“Anüdoklentip arrtsüji Tzüyim tulu nungi Hor tenem tashi temaitsü yangluang, 8Hor tenem nungi Lebo Hamad tashi, yang nung jagi Zedad tonga aotsü, 9Aser maneni Zifron aser Hazar Enan tashi oa idakji atemtsü. Ibai nenok anüdoklentip arrtsü alitsü.

10“Anüdoklen arrtsü asoshi Hazar Enan nungi Shefam tashi nenoki temaitsü yangluang. 11Shefam Ribla tashi Ain anüdoklen tsütsü tashi alitsü: aser iba arrtsüji Kinneret Tzüyim tsütsü alipak nungji tangshia alutsü. 12Aser arrtsüji Yordan tashi lua Metsü Tzüyim nung atemtsü. Kinük ajaklen meketa itemji nenok agitsüba lima arrtsüji alitsü.”

13  Anungji Mosai Israel nunger dang mela ashi, “Kin tuku aser tesadang ka nem Kibubai senmang asoshi agütsütsü melaba limaji ibai lir. Alimaji nenok rongnung an tokdanga lemsatsüla. 14Kechiaser Reuben kin parnok kinüngertem, Gad kin parnok kinüngertem aser Manase kin nungi tesadang ka asoshi parnoki senmang agizükogo. 15Item kin ana aser tesadangji Yordan atener anüdoklen Yeriko tashi anüdok tsütsü parnok senmang agizükogo.”

Alinük Lemsatsü Atema Lenirtem Teinyaktsü

16 Kibubai Mosa dang ashi, 17“Nenok senmangtsü atema alinük lemsatsü atema lenirtem tenüngji itemi alitsü: Eleazar putir aser Nun jabaso Yihusua. 18Aser linük lemsatsüba nung yaritsü asoshi kin shia tanishir ka ka shimtetang. 19Parnok tenüngji itemi lir: Yihuda kidong nungi Yefune jabaso Kaleb; 20Simeon kidong nungi Ammihud jabaso Samuel; 21Benjamin kidong nungi Kislon jabaso Elidad; 22Dan kidong nungi Yogli jabaso Bukli; 23Yosef chir Manase kidong nungi Efod jabaso Hamniel; 24Efraim kidong nungi Shiftam jabaso Kemuel; 25Zebulun kidong nungi parnok jabaso Elizafan; 26Issakar kidong nungi Azan jabaso Paltiel; 27Asher kidong nungi Shelomi jabaso Ahuhud; 28Naftali kidong nungi Ammihud jabaso Pedahel. 29Kanan lima nung Israel nunger nem senmangtsü asoshi linük lemsatsütsü Kibubai shimtetba linertemji itemi alitsü.”

ZÜNGDANGBA 35

Levi Kidong Nem Lemzüktsüba Yimtitem

1  Tang Moab lenten Yordan anasa Yeriko nung Kibubai Mosa dang ashi, 2“Israel nunger dang parnoki amangba senmang nungi Levi kidong nem talidak yimtitem agüjang ta shiang; aser yimti meketa chimdak dena Levi kidong nem nai agütsütsüla. 3Item yimtitemji parnok meyong alitsü; aser chiyimdak aliji parnok kiset shirurutem atema alitsü. 4Nai Levi kidong nem agütsüba yimti nung tangloka chiyimdak aliji yimti atsü temalen ajak meketa süklep meyirijang ka alitsü. 5Yimti temalen anüdoklen tsütsü süklep meyirijang ana; anüolentip meyirijang ana aser anüdoklentip tsütsü meyirijang ana, aser yimtiji tiyong nung alitsü. Parnok yimtitem asoshi aji chiyimdak asütsü. 6Nenoki Levi kidong nem agütsüba yimtitem rongnung yimti trok jenokdak yimti alitsü, koba nisung tepsetertem atema jenokdak alitsü; iba dak alaka ano parnok nem yimti lir-ana agütsütsüla. 7Nenoki parnok nem agütsüba yimti ajak agi lir-ti, idakji chiyimdak dena agütsütsüla. 8Israel nunger senmang nungi nenoki Levi kidong nem agütsüba yimtitemji telok tuluba nungi timba aser tilaba nungi ishiba ta parnok telok apir agütsütsüla.”

Jenokdak Yimtitem

(Taz. 19.1-13; Yih. 20.1-9)

9  Idangji Kibubai Mosa dang ashi, 10“Israel chirtem dang shiang: kodang nenoki Yordan ajanger Kanan limai idir, 11jenokdak yimti asütsü asoshi yimti kar shimtetang, idakji ajongbena nisung tepsetertem jenoktsü. 12Nisung tepseterji mungdang madang o bendangdak menoktak tashi mangyanger ket nungi jenbua idakji alitsü. 13Item yimti trok koba nenoki agütsü aji jenokdak yimtitem asütsü. 14Yordan ajanger külenji yimti asem agüjang aser Kanan lima nung yimti asem: itemji jenokdak yimtitem asütsü. 15Item yimti trokji Israel chirtem, semloka alirtem aser Bendangertem shirnoki ajongbena nisung tepseter, parnok atema jenokdak yimti asütsü.

16“Saka nisung kati kar dak merang oset agi zükra aser paji süadokra, paji nisung tepseter lir: nisung tepseterji atangji südaktsütsüla. 17Mesüra pa ket nung nisung asütsüsa lung ka ama lira aser pai nisung dakji onra aser paji süra paji nisung tepseter lir; nisung tepseterji atangji südaktsütsüla. 18Mesüra pa ket nung nisung asütsüsa süng ka lira, aser pai nisung dakji zükra aser paji süra, paji nisung tepseter lir: nisung tepseterji atangji südaktsütsüla. 19Azü mangyanger jagi nisung tepseterji südaktsütsü; kodang pai paji ajurudir pai paji südaktsütsü.

20“Nisung kari tesempa agi tangar ka dak tsüngoktsüra mesüra mita atar pa dakji langka ondaktsüra, aser pa süadokra, 21mesüra tsükchitep agi pa dak teka agi zükra aser pa süadokra, nisung dak azüksangji idangji südaktsütsüla; paji nisung tepseter lir: kodang azü mangyangeri pa ajurudir pai paji südaktsütsü.

22“Saka tsükchitep kecha makai dang aoksa-a pa dak tsüngoktsüra mesüra mita meli-i langka agi pa dak ondaktsüra, 23mesüra mungui pa dak lung kar ondaktsüra, aser pa süadokra, aser pa tsükchir masü mesüra yirutsütsü mebushi, 24idangji iba ozüng yagi teloki pa aser azü mangyanger na tsüngda o bendangtsü 25Azü mangyanger ket nungi teloki pa agizüktsü aser pa jenoka alidak yimti nungji yutsütsü: aser temeshi totzü agi mezüja shimtetba temaba putir masü tashi pa yangji alitsü. 26Saka pa jenoka alidak yimti arrtsü atena ora, 27aser azü mangyanger jagi pa yimti atena ngua pa tepsetra, azü tokshiba asoshi mangyangerdak tai kecha malitsü. 28Kechiaser temaba putir masü tashi pai jenokdak yimti nungji alitsü tim liasü, saka temaba putir sür külenang pa pei senmang bushia shilangtsü. 29Itemi nenok tarutsü putu ajak nung teti atema yimsü ozüngji alitsü.

30  “Shibaisa nisung tepsetdir nisung tepseter anema kulipur bang ajanga pa tepsettsü. Saka kuli ka kisüng ajanga nisung ka mesüdaktsütsüla. 31Tasütsü langa aliba nisung tepseter atema talangzükba sen magitsüla, saka paji atangji südaktsütsüla. 32Jenokdak yimti nung alir temaba putir masüdang pai linüki meyipa arua alitsü asoshi talang sen agütsüra, aji magitsüla. 33Nenok aliba limaji memenentsütsüla. Azü tokshiba agi alimaji menendaktsür, shibai azü tokshir pa zü agi mesüra tanga zü kecha agia alima nung azü tokshiba pungitsü makok. 34Nenok kong alir, iba limaji temenendaktsü, kechiaser nenok kong alir iba nungji nia lir, kechiaser ni Kibuba Israel chir rongnung alir”

ZÜNGDANGBA 36

Tetsürtem Senmang Indang

1Gilead kidong tanishirtem, Yosef semchirtem Manase jabaso Makir jabasotem Mosa aser Israel chir kidong tanishirtem madangi arua ashi, 2 “Kodang Kibubai alinükji senmangtsü asoshi Israel chirtem nem an toktanga agüjang ta kü kibur dang ashi, onok adianu Zelofehad senmangji par jalatem nem agütsütsü pai ne dang melaogo. 3Saka parnoki tangar kin ka den ki yimra, onok tebu senmang nungi parnok shilem agizüka bener oa shir kin den parnok lidir par meyongji kümadoktsü. 4Kodang Israel nunger jubilee küm mungdir, idangjibo parnok senmangji shirnok kiyi parnok ao par meyong nungji adentsü, aji oda onok tebu senmang nungi parnoki par meyong senmang bener oadoktsü.”

5Idangji Kibuba o ama Mosai Israel chirtem dang mela-a ashi, “Yosef kidongi kechi shiogo aji shitak lir. 6Zelofehad jalatem indang Kibubai melabaji ya lir, parnok shir kiyi oner, odakjang saka parnoki tebu kidong kinunger kiyi dang aotsü. 7Israel nung senmang kecha kin kati bener aotsü makok, kechiaser Israel chirtem pei tebu kidong senmang amangtsü. 8Tetsür shirnoki senmang amangdir, lai pei tebu kin aser kidong nungi kar den kiyi ayimtsüla, anungji Israel chirtemi pei tebu meyong senmang amangtsü. 9Senmang kecha kin ka nungi kin kati aotsü makok; kechiaser Israel kin shia pei senmang amangtsüla.”

10Anungji Kibubai Mosa dang melaba ama Zelofehad jalatemi inyak. 11Mahla, Tirza, Hogla, Milka aser Noa, Zelofehad jalatemi par tebu tenu chirtem ki-i ai. 12Parnoki Yosef jabaso Manase kidong dangi ao, aser parnok senmang tebu kinunger kin den liasü.

13Item tzü-züng-ozüng ya Kibubai Israel chirtem nem Mosa ajanga Moab lenten Yordan anasa Yeriko nung agütsü.