YOB

YOB

OKILA           

YOB kaket ya nisung tajung ka shibai timtem toushi ajurua tesama tulu koda pei chirtem o rongsen ajak samar ano pei mang nung tashitak tamajung agi okrongdaktsü iba indang Otsü lir. Iba kaket ya ken aser sangro kakettem talisa Tejen Laishiba nung kanga tongtibang lir. Idaki timtemba nisung (Yob) den, nisung asemi arua sensaksemba nung Yob aser pa medemer asem rongnung iba timtem atema tangatetba balala liasü ta kaket nungjagi kanga jangja-a angur. Tatem nung Tsüngrem shibai meimchir den koma benshir iba indang tatongi zülu pai Yob dangi jungkai adok.            

Yob tembar asemi timtemji tamangba yimsüyim nungi rasaa ashitsü merang. Kechiaser Tsüngremi nisung tajunger moatsür, saka tamajungpur merenshir, anungji Yobi aibelenba yong pa merenshir ta ashi. Saka Yob atemabo ibai kanga tongmelang liasü kechiaser pa ya tangar memesüki temeshi aser nisung tajung ka liasü, Kechiba Tsüngremi yamala nisung madaki ya arudaktsür ta Yobi tasü ita Tsüngrem dangi aben. Yobi pei tamang makai mekümdaktsür, saka paji nisung tajung ta angateta pa tetushi akhi ama kodaser akümtsü ta iba asoshi yongya.  

Yobi asüngdangbatemji Tsüngremi telangzüba magütsü, saka pai Yob tamang teyongyabaji pa tashi ain, aser shisatsüji ajanga telangzüba agütsü, Idangji Tsüngremer shisatsü aser tashiji Yobi angatet aser pai ain adoka jembiba asoshi temulung meyipa liasü.       

Otsü tatem jagi kodaser Yob pa pei mezüng jenjang dangi anir arua, mezüng dang nungi kanga agi timba küma pa rongsen moatsü aji jangjatsür. Yob timtem mangatetba atema Yober tembar asem dang Tsüngremi temetongshiba agütsü. Tamangba yimsüyim nung ajemdaker sayuba dang nungibo Tsüngremjiang tuluba ta Yobibo angateta liasü.

            Keta Alibatem       

Okila 1:1-2:13

Yob aser Pa Tembartem 3:1-31:40

(a) Yob Timtemba 3:1-26

(b) Mezüngbuba Sensaksem 4:1-14:22

(c) Tanabuba Sensaksem 15:1-21:34

(d) Tasembuba Sensaksern 22:1-27:23

(e) Shisatsü Tenüng Asangba 28:1-28

(f) Yob Tatembang O 29:1-31:40

Elihui Jembiba 32:1-37:24

Yob Dangi Tsüngremer Telangzüba 38:1-42:6

Tatem O 42:7-17

        Keta Alibatem

Okila Yob 1:1-2:13
Yober Kibong Yob 1:1-5
Mojingi Yob Tendangba Yob 1:6-12
Yober Tanur Aser Rongsentem Samaba Yob 1:13-22
Satani Tanabenbuba Yob Tendangba Yob 2:1-10
Yob Tembar Asem Yob 2:11-13
(a) Yob Timtemba Yob 3:1-26
Yobi Pa Asoba Anogo Atakatemba Yob 3:1-26
Yob aser Pa Tembartem Yob 3:1-31:40
(b) Mezüngbuba Sensaksem Yob 4:1-14:22
Elifazi Jembir: Yobi Temenen Menaogo (4:1-14:22) Yob 4:1-21
Elifaz-i Maneni Jembir: Teyari Asoshi Ayimtenang Yob 5:1-27
Yobi langzür: Kü Temenen Oji Atangji Yob 6:1-30
Yobi Maneni Jembir: Kü Timtem Tatem Maka Yob 7:1-21
Bildadi Jembir: Yobi Temulung Meyiptsüla Yob 8:1-22
Yobi Langzür: Tetsüngdai Air Shinga Mali Yob 9:1-35
Yobi Tsüngremdang Mepelar: Ni Kü Taküm Sensamasatsür Yob 10:1-22
Zofari Jembir: Yobi Aibelenba Yong Merenshir Yob 11:1-20
Yobi Langzür: Ni Menüdong Kümogo Yob 12:1-25
Yobi Maneni Jembir: Yob 13:1-28
Yobi Maneni Sarasademer: Takümji Tatsü Aser Timtemtsü Ka Yob 14:1-22
(c) Tanabuba Sensaksem Yob 15:1-21:34
Elifazi Maneni Jembir: Yobi Yimsü Lutsüba  (15:1-21:34) Yob 15:1-35
Yobi Elifaz Dang Langzür: Pei Temeten Indang Jembiba Yob 16:1-22
Yobi Anisüngzük Asoshi Sarasademba Yob 17:1-16
Bildadi Tanaben Jembir: Tsüngremi Tamajunger Merenshir Yob 18:1-21
Yobi Langzür: Kü Kibur Taküm Lir Ta Ni Metet Yob 19:1-29
Zofazi Tanaben Jembir: Tamajunger Pei Yari o Bendanger Yob 20:1-29
Yobi Langzür: Tamajungerji Aiben Memerenshi Toktsür Yob 21:1-34
(d) Tasembuba Sensaksern Yob 22:1-27:23
Elifazi Tasemben Jembir: Yob Temenenji Ulura (22:1-27:23) Yob 22:1-30
Yobi Langzür: Kü Timtemji Taku Yob 23:1-17
Yobi Maneni Jembir: Yobi Alima Nung Azü Tokshiba Anemer Yob 24:1-25
Bildadi Tasemben Jembir: Tsüngremji Tsübutsüla Yob 25:1-6
Yobi Langzür: Tsüngremer Sentsüwangshi Masadangtettsü Yob 26:1-14
Yobi Maneni Jembir: Yobi Pa Temeshi Ta Sayuba Yob 27:1-23
(e) Shisatsü Tenüng Asangba Yob 28:1-28
Yobi Ano Maneni Jembir: Shisatsüji Kong Angutsü Yob 28:1-28
(f) Yob Tatembang O Yob 29:1-31:40
Yobi Maneni Jembir: Yobi Pa Timtem Indang Ashiba Yob 29:1-25
Yobi Maneni Jembir: Yob Timtem Yob 30:1-31
Yobi Ano Maneni Jembir: Yobi Pa Temeten O Jembiba Yob 31:1-40
Elihui Jembiba Yob 32:1-37:24
Elihu-I Jembir: Elihui Yob Tembartem Arütsüba (32:1-37:24) Yob 32:1-22
Elihui Jembir: Yob, Kü Dang Angang Yob 33:1-33
Elihui Maneni Jembir: Elihui Tsüngrem Ochi Obendang Sangdongba Yob 34:1-37
Elihui Maneni Jembir: Pei Sasa Temeshi Ta Sayuba Aitsür Yob 35:1-16
Elihui Maneni Jembir: Tsüngrem Ajungba Indang Sangdongba Yob 36:1-23
Elihui Tsüngrem Tamaren Indang Sangdongba Yob 36:24-33
Elihui Maneni Jembir: Yob 37:1-24
Yob Dangi Tsüngremer Telangzüba Yob 38:1-42:6
Kibubai Jembir: Yob Dang Tsüngremer Telangzüba  (Lip.1:1-10) Yob 38:1-41
KIBUBAi Maneni Jembir: Yob 39:1-30
KIBUBAi Maneni Jembir: Ni Ajak Takoksang Tsüngrem Yob 40:1-24
KIBUBAI Maneni Jembir: Nai Molutzürang Putetdima? Yob 41:1-34
Tatem O Yob 42:7-17
Yob Ajemaluba Yob 42:1-9
Yob Tesü Tia Anasübu Agi Tajungba Akümba Yob 42:10-17

YOB 1

Yober Kibong

1Uz lima nung nisung ka tenüng agi Yob liasü. Iba nisung tetemjen aser tindang, shibai Tsüngrem tsübu aser temenen sempa. 2Pa jabaso tenet aser jala asem liasü. 3Pa rongsena san meyi tenet, ut meyi asem, alu alaba nashi pungchi noklang pungu, gado noklang pungu, aser kilir jenti liasü. Aji agi anüdoklen alir ajak dang iba nisung tulutiba liasü. 4Pa jabasotem parnok ki shia pei ataba anogo nung benjong yanglu; aser parnok den chia ajemtsü asoshi par tenu tetsür asem jali asü. 5Kodangsa parnok benjong anogo atem, Yobi parnok ja-a meshitettsü, aser anepungi saaka parnok ajak asoshi tarongba tenla kaka tenla; kechiyong Yobi ashi, “Ashiko ozü chirtemi temenen menaogo südi, aser parnok mulungjang nung Tsüngrem atakatemogo südi.” Yamaji Yobi maneni inyak.

Mojingi Yob Tendangba

6  Kenü anogo Tsüngrem chirtemi Kibuba madangi ajuruteptsü aru, aser parnok den Satana aru. 7Kibubai Satan dang ashi, “Na kolen nungi?” Idangji Satani Kibuba dang langzü, “Alima nung oli aruli ta, aser angji tuli aluli ta nungi.” 8Aser Kibubai Satan dang ashi, “Kü tenzüker Yob dak nai tenük yokogo ma? Kechiaser alima nung tetemjen aser tindang nisung, Tsüngrem tsübur aser tamajung sempar pa ama shinga mali.” 9 Idangji Satani Kibuba dang langzüa ashi, “Yobi Tsüngrem dang tsübur ama? 10Pa meketa, par ki meketa, aser pa akaba ajak meketa, ajaklen nai atsü matsü ama? Nai pa teka mapa moatsüogo aser ali nung pa rongsen züiner. 11Saka tang neka songtoka pa akaba ajak dak kongshiangjo, pai ne jakdang na atakatemtsü.” 12Kibubai Satan dang ashi, “Ajiang, pa akaba ajak neka nung lir; pa dak dang nai tekongshi.” Anungji Satani Kibuba madang nungi pila-a ao.

Yober Tanur Aser Rongsentem Samaba

13Kenü anogo kodang Yober chirtem parnok tedi tambusanger kidang benjong chia liasü, 14Osangbener ka arua Yob dang ashi, “Nashi pungchitem alu alaya liasü aser aji anasa gadotem chimya liasü, 15aser aoksa-a Sabea nungeri amak aser item ajak bener ogo. Parnoki kilirtem ajak lepsetogo, aser ne dang ashitsü kü kija dang jentet.” 16Pai shiya alidang ano tangar ka arua ashi, “Anüng nungi Tsüngrem mi tsük aser san o kilirtem rongsetogo; aser ne dang ashitsü ni kija dang jentet.” 17Pai shiya alidang ano tangar ka arua ashi, “Kaldi nungeri telok asem kümer arua uttem dak amtak aser item bener ogo; nok agi kilirtem lepsetogo; aser ne dang ashitsü ni kija dang jentet.” 18Pai shiya alidang ano tangar ka arua ashi, “Ner chirtem parnok tedi tambusang kidang chiyunga-jema liasü, 19aser ajiang, arem nungi mopung tulu ka adok aser ki kinük pezüsü dak aon aser ner chirtem dak chirep aser parnok süogo; aser nia ne dang ashitsü ni kija dang jentet.” 20Idangji Yobi arameso, aser semoksü shisa, aser pa tekolak sütok, aser ali nung lao, aser külem; 21aser pai ashi, “Kütsü pok nungi ni mangsa adok, aser ilenjagi ni mangsa aotsü; Kibubai agütsü aser Kibubai bener ao; Kibuba tenüng moajang.” 22Ya ajak nung Yobi temenen memena, mesüra mashi-i Kibuba dak matong.

YOB 2

Satani Tanabenbuba Yob Tendangba

1Ano kenü anogo Tsüngrem chirtemi Kibuba madangi ajuruteptsü aru, aser parnok rongnung Satana aru. 2Kibubai Satan dang ashi, “Na kolen nungi?” Satani Kibuba dang langzü, “Alima nung oli aruli ta, aser angji tuli aluli ta nungi.” 3Aser Kibubai Satan dang ashi, “Kü tenzüker Yob dak nai tenük yokogo ma? Kechiaser alima nung tetemjen aser tindang nisung, Tsüngrem tsübur aser tamajung sempar pa ama shinga mali; aser kecha masü nung pa raksatsütsü pa anema nai ni mesüzükaka, tang tashi pai shitakba nung ameta lir.” 4Aser Satani Kibuba dang ashi, “Teküp melen teküp, hau, taküm sottsü asoshi nisungi pa akaba ajak agütsütsü. 5Saka tang neka songtoka pa teret aser tetsü dak kongshiangjo, pai ne tejak nung atakatemtsü.” 6Kibubai Satan dang ashi, “Ajiang, pa neka nung lir; pa taküm dang sotang.”

7Satani Kibuba madang nungi pila-a ao, aser tenüklang nungi tekujong tashi komo tulu agi Yob kangshi. 8Aser pa sasa anakshitsü asoshi pai porep ka bena aru, aser pai aut rongnung amen. 9Idangji tebutsüi pa dang ashi, “Na ano shitakba nung ameta alir no? Tsüngrem atakatemang aser süadokang.”

10Saka pai la dang ashi, “Nai tamashitsür ka ama jembir. Koda, asenokbo Tsüngrem ket nungi tajungdang agizüker tamajungbo magizüktsü asü?” Ya ajak nung Yobi pa tebang mechi agi temenen memena.

Yob Tembar Asem

11Tang pa dak lendong aruba ajak Yob tembar asemi angashia, parnoki pei pei talidak nungi aru; Teman nunger Elifaz, Shuhai nunger Bildad, aser Namat nunger Zofar; aser pa dang tejashi sayutsü aser pa süneptsütsü asoshi parnoki külemi mapang lemtet. 12Kodang ojita nungi parnoki pa angu, parnoki pa anarongtena-ang ajitet, parnoki ola adoka ajeb aser pei süoshi shisa aser parnok kolak nung aut palok. 13Yamaji anogo tenet aser aonung tenet parnoki pa den ali nung amen, aser shingaia pa dang o kata mashi; kechiaser pa timtem kanga tulu ta parnoki ajitet.

YOB 3

Yobi Pa Asoba Anogo Atakatemba

1  Ajiser Yobi tebang lapok aser pa asoba anogo atakatemtsü tenzük. 2Pai ashi,

3Ni asoba anogo, aser aonung kobai “tebur ka soogo” ta ashi,

aji sama-ang.

4Iba anogo tammang liang!

Temalen nungi aji Tsüngremi tebushi,

mesüra idakji tesangwa teyaloktsü.

5Tammang aser ammang temelem agi nembangjang,

iba manung mepettem süloka lidakjang;

anogo mangdaktsüba agi aji tsübudakjang.

6Iba aonung yamai sang,

tammang temelem agi aji sübangang.

Küm anogo yongsük nung aji tetendaktsü;

ita asükba nung aji tesükuk.

7Paonungji tapung liang,

tepela ola idakji tangashidaktsü,

8Shirnoki anogotem atakatemer,

shirnoki Leviathan sakdaktsütsü renema lir.

9Züngia alidang anguba petinutem mangdakjang;

tesangwa imla-a lidakjang saka aji tadokdaktsü,

anepdang nüngjang sangwa tengudaktsü.

10Kechiba iba anogoi kütsü pok meshibang,

mesüra künük dang nungi timtem memiimbang.

11Kechiba ni tasodang masüaka na?

Kechiba ni sozüklidang masüaka na?

12Kechiba temokok agi ni agizükar na?

Mesüra kechiba ni ayongtsüsa mama aliar na?

13Kechiaser tangibo ni ontaker ajem-ajema lila;

ni mejanger lila,

idangjiang ni anisüngzük ngula süng;

14Alima nung chuba aser yimsüsür shirnoki

pei asoshi lungki tulu yanglu, par den,

15mesüra, hon akar chubatem,

shirnoki pei ki taribi agi sünga nangten,

16Mesüra ita mabensadang sor miima ayuba ama,

oda kinüi kodanga tesangwa mangu medem süla sang.

17Idakjibo tamajungertemi joko merasar,

aser angji tebelemertem anisüngzüka lir.

18Idakji puoka alirtem pei sünütsü asür;

parnoki kibur ola mangashir.

19Idakji tilar o tulur na lir;

aser kiburi kilir dang kecha mashir.

20Kechiba toushi nung alir nem tesangwa,

aser tanela nung kurema alir nem taküm agütsüaka na?

21  Parnoki tasü yongyar,

saka aji marur;

aser rema aliba rongsen dang tali aji tua bushir,

22Parnoki kodang leper ngudir,

parnoki kanga pelar aser lungsor.

23Kechiba lenmang mungui alir nisung nem,

aser Tsüngremi atsübanger alir nem,

tesangwa agütsür aka na?

24Kechiaser chiyungtsü shizüka ni anünger,

aser tzü ayimba ama ni arrür.

25Kechiaser koba ni tsübuseta ali,

aji agi kü dak atonger.

Aser ni kechi tsübua ali aji kü dangi arur.

26Ni tiptem mali,

ajemajema ka meliteter,

mesüra ni anisüngzük maka,

saka timtem arujen arur.

YOB 4

Elifazi Jembir: Yobi Temenen Menaogo

(4.1—14.22)

1Idangji Teman nungba Elifazi langzü;

2Kati ne den jembidi süra nai jashidi ma?

Saka shibai mejembi-i litet?

3Ajiang, nai koda aika sayuogo,

aser tashi maiter nai yariogo;

4Laoa alir ne o agi mesoogo,

aser temokok nung tashi maitertem nai tashi ittsüogo.

5Saka tang ya ne dak atong nung na lular;

iba agi ne dak kongshi nung nai maremer.

6Nai Tsüngrem tsübuba dak temulung alemer südi?

Aser nai shitak noktakba nung teimla akar südi?

7Ya bilemtetang ta ni ne dang mepishir,

tai makar shibasa sama?

Mesüra tindanger kongsa jentok?

8Ni ngua arubabo, shirisa temenen lu inyaker

aser tamajung metsü proker,

parnoki aji arur.

9Tsüngrem tangula agi parnok samar.

Aser pai mit adokba agi parnok meyokadoker.

10Molusongzü, arrürba,

molusongzü tesashi ola,

aser molusongzü atura tepu, item raksar.

11Shi tachitsü manguba yong,

molusongzüji samar aser molusongzü techanutemji tangalen prokshir.

12Tang kü dangi ola ka tanemi arur,

kü narongi aji tera ajepzük.

13  Aonung mangdang bilema alidang,

Teyiprung mapang nung,

14Atentena kü dangi tetsübu aru,

koba agi kü teret ajak anokshidaktsü.

15Idangji kü jakdang tanela ka süi;

ni ku meronga adok.

16Ibaji marakzüi noktak,

saka pa komama ni majitet;

kü nükdang langka mesüka angu;

aser ni ola tila ka angashi.

17Tsüngrem madang tasütsüba

nisung meshia litetdi ma?

Pei teyanglur madang merüka litetdi ma?

18Ajiang, pei tenyar dak pai temulung malemer;

aser pa kotak tenyartem tai apur;

19Ajangla lishi ki nung alir.

Shir kimung auyi manung lir,

koba tarütsü agi raksar,

parnok koda züngshitsü?

20Manger mesangwa dang

parnok ajasa aor;

shingaia hau ta meli-i parnok samar.

21Parnok süki lisü lokdokra parnok asür masü no?

Aser ajia temetetba makai dang asür masü no?

YOB 5

Elifaz-i Maneni Jembir: Teyari Asoshi Ayimtenang

1Shisadangang jong;

ne dang langzütsü kar danga ali asü?

Aser temeshipur shiba dangi na aotsü?

2Kechiaser tamashir pesaprung agi süngdaktsür,

aser tongmelanger tenükmerem agi tepseter.

3Tamashirji ni tera ayangba angu;

saka aoksa-a pa talidak atakatem,

4Par chirtem lendong nung lir,

aser süngkhüm nung parnok menüngreper,

aser parnok kümzükera shinga mali.

5Parnok aluruba yaseta alirtemi chimatsür,

aser sensakertemi tsükjong bener aor,

aser tzürartemi par tzübu nung tzü atar.

6Kechiaser ali nungi tekangshi madoker,

mesüra ali nungi timtem mapoker;

7Saka mitsü azüki yimketa atu medem to

nisung timtemtsü soa lir.

8Saka ni ka asübo, ni Tsüngrem bushila,

aser kü o indang Tsüngrem nem agütsüla;

9Pai mangajemba mapa tulu inyaker,

aser mezüngteti tesüngmangtsü mapa inyaker;

10Pai alima nung tzünglu agütsür,

aser alu nung tzü yoker;

11Tekübok tia alir pai temaleni ajungkettsür,

aser mangyimer tejenbu leni tudaktsür.

12Parnok tebilemba parnoki matongtsüsa,

tesangra nisungi tasa asaba pai raksatsür.

13  Pai tashirtem parnok pei tasa nung apur,

aser teraksar tebilemba belensatsür.

14Anüngdang parnoki tammang ajurur,

aser aonung ama parnoki teruto nung ajemzüa senzür.

15Saka parnok tebang nok nungi sensakertem

aser tashi taiter teka nungi parnokji pai kümzüker.

16Aji asü nung sensaker teimlatsü kar,

aser ochimashir tebang nembangtsür.

17  Ajiang, Tsüngremi shiba arütsür,

iba nisung tepelatsü;

anungji ajak Takoksangi merenshiba mezüngmeshi tesü;

18  Kechiaser pai ayako tendaktsür,

aser paisa anebtsür. Pai yirutsür,

aser pa teka agisa anebtsür.

19Lendong trok nungi pai na kümzüktsü;

hau, tenetbuba nung na kecha masütsü;

20Ayawara, tasü nungi,

aser rara nung nok ain nungi,

pai na alangzüktsü.

21Temeli wara nungi na atsükadoktsü,

aser tesamaba arudang nai metsübutsü.

22Tesamaba mapang nung aser ayawara nung nai menütsü;

mesüra alima arem shirurutem nai metsübutsü.

23Kechiaser alu nung lung den na lungjemtsü,

aser ne den arem shiruru yimjung nung alitsü.

24Aser ne süki meraksai lir ta nai metettsü;

aser nai ne talidak semdangtsü aser ajak abensa-a angutsü.

25Ne metsü ulutsü ta nai metettsü,

aser alima nung ai ama ner chirtem alitsü.

26Mendi tashi kümerang asükba medem,

na tambur kümerang lepi aitsü.

27Ya ajiang, onoki bushitetba ya shitak lir;

onoki angadangogo, aser na ajungtsü asoshi

aji meteta yuang.

YOB 6

Yobi langzür: Kü Temeten Oji Atangji

1Idangji Yobi langzü;

2Oh kü pesaprung ya odangla sang,

aser kü timtem ajak seret nung odangla sang!

3Kechiaser tzüyim lisem dangbo taretba asütsü;

abenji ni o mashi-i jembiogo.

4Kechiaser ajak Takoksang lijakjang,

kü dak janga lir, iba mim kü nelai jemdar;

Tsüngrem tetsübutsütem ni anema noktaka lir.

5Arem gadoi pa rem aka dang asadi ma?

Mesüra nashi pungchi-i pei chiyungtsü yur asadi ma?

6Kechi aon manang aji metsü meteni chiteter ma?

Mesüra entsü temesüng dak tanang chiteter ama?

7Kü bangi item metangshinür;

itemji ni asoshi talaktsü lir.

8Oh ni aginüba ngutetla sang,

aser ni yongyaba Tsüngremi melala sang!

9Aser ni lensettsü Tsüngremi mulungla sang,

aser pa teka sala-a ni jentokla sang!

10Idangjiang ni tesünep ngula;

hau, mapayuba tekangshi nung ni pelala;

kechiaser Temeshiba otem ni menangzüki mali.

11Ni atasatsüsa kü tashi kong ali?

Aser ni aremzüktetaka timtem ya kong atemtsü?

12Ni lung ama tashi ait asü?

Mesüra kü shi ya merang asü?

13Kü dak lenmang kecha mali masü no?

Aser kü dak nungi inyaktettsü tasa aridokadoker masü no?

14Shiri pei tembar asoshi temeim sota ayur,

pai ajak Takoksang tsübuba sendoker.

15Ayongnu ama,

aser aji tayimdak sama-a aoba ama,

kü adianutemi külaka benshiogo;

16Rürjep lung agi item ayongnu nakrema akümer,

aser item manung rürjep aremer.

17Kodang lema kümdir, parnok samadoker;

kodang tsüka kümdir, parnok tangula kümadoker.

18Aeni aor telok lenmang aia aor;

parnoki aremi oa samar.

19Tema nunger aeni aor teloki tzü bushir;

Sheba teloki imlar.

20Parnoki imla-a aliba mangu nung parnok mak asü;

parnok ajagi aru, aser mangmangadok.

21Yamaji nenok kü madang kümogo;

nenoki kü timtem angur, aser tsübur.

22Kü nem langka kua,

mesüra nenok rongsen nungi sempet ka agüjang, ta ni ashi asü?

23Mesüra, tsükchir ket nungi ni kümzükang ta,

mesüra rishikangshir ket nungi ni alangzükang, ta ni ashi asü?

24Kü dang sayuang, ni mokorai lidi,

aser ni kong aibelener aji angatetdakjang.

25O shitak koda tashi tait;

saka nenoki arütsüba nung kechi tashi ali?

26Koda masüba nisungi jembiba oji mopung ama ta bilemaka,

nenoki arütsütsü atonger na?

27Hau, nenokibo lajartem dak an toktangtsü;

aser tembar ka dak tajangzük achitsü.

28Saka tang, kü dak ranglokang;

kechiaser shitak ni nübur jakdang meyazütsü.

29Ojang sang ta ni mepishir, tamajung tagütsü;

hau, nenok temulung melenshiang,

ni ano meshimeshia lir.

30Kü meli nung memeshiba ali asü?

Nibo tajung tamajung mechitettsü asü?

YOB 7

Yobi Maneni jembir: Kü Timtem Tatem Maka

1Alima nung nisung asoshi rara mali asü?

Pa takümji ayanger anogo memesük no?

2Alari akhümpok aginüa yongyaba ama,

aser ayangeri taa dang yongyaba medem to,

3Ni itasa ita tazüngla dang lidaktsür,

aser ni asoshi aonung tuokrongtsü lemzükja lir.

4Kodang ni ondaker, ni ashir,

“Ni Kodang shishitsü?”

Saka aonung talang lir;

aser anepdang züngia tashi ni kü mang meyipshijen meyipshir.

5Kü mang mesen aser arü agi sünga lir;

kü teküp meranga akümer, ajiser tenpoker;

6Kü anogo sütaker süksen dang nungi tekaraba aor,

aser teimla makai akümer.

7Oh, kü taküm ya tangula ta bilemtetang;

kü tenük agi joko tajungbo mangutsü.

8Shiba tenük agi ni anüker, pai joko ni mangutsü;

ne tenük agi ni bushitsü, saka nibo malitsü.

9Mepet mungui samadokba medem to,

shiba lepi idir joko pa madoktsü.

10Joko par kidangi pa meshilangtsü,

mesüra pa talidakia pa meshitettsü.

11Anungji nia kü bang meshibangtsü.

Ni kü nela okrongba indang ni jembitsü,

aser kü nela taku indang ni nemnemtsü.

12Miter nem mitdaktsütsüsa;

ni tzüyim asü, mesüra tzüyim shiruru asü?

13Kü yipteni ni süneptsütsü,

kü mejangdaki kü taochi tera jungtsütsü

ta kodang ni shidir;

14Idangji nai pungmang agi ni aoksatsür,

aser mangdang ajanga ni tsübudaktsür;

15Anungji kü nelai lensetakang sünür;

aser ni timtem dangbo tasüang sünür.

16Ni kü taküm agi lakogo;

ni tetibo malitsü;

ni odang tokjang,

kechiaser kü taküm tangula dang,

17  Nai ulutsütsüsa;

aser nai pa dak temulung agütsütsüsa,

nisunga kechi?

18Aser anepdang shia nai semdangtsüsa,

aser mapang shia tendangtsüsa, nisunga kechi?

19Kopiga na kü tsütsü tejak mashitsü;

mesüra ni metsü meyok matatettsü?

20Ni temenen mena süra;

Oh na nisung tanüker,

ni ne dang kechi inyaktsüla?

Ni kü sasa khuret abentsüsa;

kechiba nai ni tenük yokdak kümdaktsü?

21Aser ni ozüng raksaba tai kechiba matoker

aser kü menen kechiba bener maor?

Kechiaser tang ni auyi nung mejangtsü;

aser nai ni rongjena bushitsü, saka ni malitsü.

YOB 8

Bildadi Jembir: Yobi Temulung Meyiptsüla

1Idangji Shuhai nungba Bildadi langzü;

2Kopiga nai itemi jembitsü?

Aser ne o mopung tesashi ama kopiga alitsü?

3Tsüngremi obendang belensatsür asü?

Mesüra ajak Takoksangi ochiba belensatsür asü?

4Ner chirtemi pa anema temenen mena süra,

ajangla pai parnok tai asoshi merenshiogo.

5Nai dang temulung agüja Tsüngrem bushira;

aser ajak Takoksang dang mepishira;

6Na temerük aser tindang lira;

atangji pai na tepu akümtsü,

aser ne temeshiba talidak shia agütsütsü.

7Aser na tila ka agi tenzükaka,

na tesü-tatem nung jenti arentsü.

8Kechiaser ni ne dang mepishir,

alemli putupur dang asüngdangang;

aser par tsüraburi kechi bushiteta aru,

aji ne sasa tendangang.

9Kechiaser asenokbo yashi chir dang

aser kecha memetet;

kechiaser alima nung asen takümji akhüm ka ama dang.

10Parnoki ne dang mesayuli ma aser meshili ma?

Aser parnoki metetba o madokli ma?

11Lishitsüng malidak naten meyidi ma?

Tzü malidak tzütok meyidi ma?

12Ibaji ano lanu kümyanga alidang, melepsai,

tanga süngo ajak dang temelaba azülar.

13Iba amaji Tsüngrem amadoker ajak lenmang atemer,

aser yamaji Tsüngrem mamangba pur teimla samar.

14Pa temulung alemba süktanger;

aser pa tamangji sorak ki ka mesük.

15Pai pei ki dak mangaloker,

saka aji menoktaktsü;

pai idakji tashi agi soter, saka aji agi matir.

16Anü tsüngdang tzü peria agia ainba süngdong mesüka pa lir,

atsü meketa iba labi mesangshir.

17Pa tera lungnang meketa züloker;

pai lung tsüngdai air.

18Pa par tesem nungi atsüngdokra,

tesem jagi pa menangzüktsü aser ashitsü “Ni na kodanga munguka.”

19Ajiang, pa taküm lenmang nung tepelaji lir;

aser auyi nungi tangar ka adoker.

20Ajiang, Tsüngremi tetemjen nisung meindoktsü,

mesüra pai tamajung inyakertem meyaritsü.

21Pai nebang menüshishi agi,

aser nebangmechi ayimtenba agi tanaben süngtsütsü.

22Ne temerirtem taak agi süngtsütsü,

aser tamajunger süki makai akümtsü.

YOB 9

Yobi Langzür: Tetsüngdai Air Shinga Mali

1Idangji Yobi langzü;

2  Atangji ya shitak ta ni metet;

saka Tsüngrem madang kodaser nisungi meshia litet?

3Kati pa den o kadi süra;

meyi ka nung khendanga pai melangzütettsü.

4Pa mulungjang tetemjen, aser pa tashi tait;

pa anema temulung merangertem shirsa azükaru?

5Pai tenem belenshir, aser parnoki aji memeteter;

pai ain adoka itemji mekepsatsür.

6Pai alima pa tamentakdak nungi anokshir,

aser iba tongshitem atentener.

7Pai anü nem ozüng agütsür, aser aji madoker;

aser pai petinutem shibangtsür.

8Pai dang anüngtem sadakjema salar.

Aser tzüyim tzüsem manung jajar.

9  Pai anüng nung petinu tejep tejep,

oda Arcturus, Orion, Pleiades,

aser anüng tentsülen taktangtem yanglu.

10Mangajemba mapa tulu pai inyaker,

hau, mezüngteti tesüngmangtsü mapa inyaker.

11Ajiang, pai ni anasai süir, aser ni pa mangur;

pa kü madang süir, saka ni pa majiteter.

12Ajiang, pai rakzükra shibai pa noktangtettsü?

“Na kechisür” ta shibai pa dang shitettsü?

13Tsüngremi ain adokba mesoter;

Rahab yarirtemia pa kübok mokremer.

14Ajangla pa dang koda ni langzütsü?

Aser pa den o ashishiteptsü asoshi kü o koda shimtsü?

15Ni temeshi liaka, ni pa dang melangzütet;

joko kü obendanger dang taochi asoshi ni mepishitsüba dang;

16Ni pa jala sang, pai kü dang langzüla;

aji saka pai kü ola angatsü ta tamanga mamangla.

17Kechiaser pa yipru agi ni yirutsür;

aser kecha masü nung kü komo moratsür.

18Pai ni tangula sashitsü memelar,

saka taku agi ni süngtsür.

19Tashi dang toktepdi süra,

pa tashi tait lir!

Aser ochi indang okai odi süra,

shibai pa jazüktsü?

20Ni temeshi liaka, kü bang agi ni aitsütsü;

ni tetemjen, saka pai ni tekirak ta ajar.

21Ni tetemjen; ni kü sasa züngshia mali;

ni kü taküm sensamasar.

22Ya ajak kasa dang; anungji ni ashir;

tajungera tamajungera pai samatsür.

23Kodang wara jagi aoksa-a südaktsür,

shir tai maka par kangshiba pai menütsür.

24Alima ya tamajunger ket nung agütsüogo;

idakji obendanger tejak pai nembangtsür;

pai mesüra shibai asütsü?

25Kü anogotem asemjena odagi,

parnoki jena aor aser kecha tajung mangur.

26Itemi rong tekara ama jua aor,

orijai pei chiyungtsü dak khenyongi yimlok ama.

27Ni kü nemnemba amadokdi;

kü tejak mekümba sangwadi ta shira;

28Ni kü timtem ajak tsübur;

kechiaser nai ni tai maka ta mashitsü ni metet.

29Ni aitsütsüsa;

ajangla amajok nung kechiba ni belemer?

30Rürjep agi kü sasa shitokra;

aser kü teka sabon agi metsükra;

31Idangji nai ni lishitsüngi nungoktsütsü,

aser kü süoshi agia ni sempatsü.

32Kechiyong ni pa dang langzütsüsa,

aser küna o bendangi aotsüsa;

pa ni ama nisung masü.

33Künaprongla dak teka yitettsüsa;

küna tsüngda nung tebendanger shinga mali.

34Kü tsüngdang nungi pai pa ajok bener odakjang;

aser pa tetsübutsü agi ni taoksadaktsü;

35Idangjiang pa metsübui ni jembitsü;

kechiaser kü dak tetsübu kecha mali.

YOB 10

Yobi Tsüngrem Dang Mepelar: Ni Kü Taküm Sensamasatsür

1Ni kü taküm agi alaker;

Ni kü timtem atema nemnemtsü;

Kü tanela taku indang ni jembitsü.

2Ni Tsüngrem dang ashitsü, Ni taitsü;

Kechisünung nai kü den tokteper;

Kü dang sayuang.

3Nai rishikangshitsü,

nai yangluba mapa mesenmetutsü,

aser tamajunger tasa nung pelatsü;

Ya na asoshi tepelatsü asü?

4Ne dak nisung tenük aten asü?

Mesüra nisungi anguba ama nai angur asü?

5Nisunger ama ne anogo tatsü asü?

Mesüra nisunger ama ne arishi tatsü asü?

6Kü tai apuba aser kü menen bushiba ya kechiba?

7Ni tamajunger masü;

Aser neka nungi kümzüktsü shinga mali ta nai metetaka, kechiba yamai benshir?

8Neka agi ni yanglua renemtsü;

Saka meyiper nai ni raksatsütsü atonger!

9Nai ya bilemtetang, ajongli ama nai ni yangluogo;

Aser ano nai ni auyisa kümdaktsütsü no?

10Nai ni mamatzü ama yimzüker;

Mamatzü telong ama mekümdaktsü ama?

11Nai kü teküp aser shi agi meyipangtsüogo,

aser teret aser tetsü agi alenteptsüogo.

12Nai kü nem taküm agütsü aser temeim sayu,

aser nai anebaluba agi kü nela kümzükogo.

13Yongjia itemi ne mulung nung rema ayu;

Ne tebilemba ya liasü ta ni metet.

14Ni temenen menara nai aji ajioka ayur.

Aser kü tai nungi nai ni mekümzüker.

15Ni aibelenra ni asoshi aiatai;

Aser ni temeshi lira, kü kolak angaka matuteter;

Kechiyong ni taak aser timtem agi sünga lir.

16Kü kolak angaka tura,

molusongzü ama nai ni arishir;

Aser ni anema ne aintem sayur.

17Ni anema nai kuli tasen yoker,

aser kü madang tali rasar,

Aser ni anema temeranger telok aser tongbang yokjen yoker.

18Aji asünung kechiba nai ni kütsü pok nungi agitet?

Ni süadok tajungba aser shingaia ni mangu tajungba süla.

19Oda ni taküm mali tajungba süla;

Sozükli lepi aben tajungba süla.

20Kü arishi anogo ishika dang masü no?

Kü kija tokjang aji oda ni mapang tatsüka asoshi pela-a alitsüsa,

21kodanga meyipa meshilangtsüba limai ni maodang;

Tammang aser ammang temelem limai;

22Oda kecha lemteta maliba lima;

kong tesangwajia tammang dang.

YOB 11

Zofari Jembir: Yobi Aibelenba Yong Merenshir

1Idangji Namat nungba Zofari langzü;

2Oh paikati melangzüi toktsütsü no?

Nisung ka jembijen jembiba agi pa metentsü no?

3Na asüküma jembira tangar ajem-ajema alitsü asü?

Aser kodang nai ataladir,

shingaia na mak mesüdaktsütsü asü?

4Kechiaser nai ashir, “Kü tamangba temeshi lir, aser ne nükdang ni merüka lir.”

5Saka, Oh Tsüngremi jembila sang;

Aser na anema tebang lapokla sang;

6Aser pai tashi temetet kipok o,

Oda aji agi koda tesüngmangtsü inyaker,

aji sayula sang!

Anungji, Tsüngremi ne menen yari masü

oda tilaba akhanger ta metetang.

7Nai oda bushiba agi Tsüngrem ngudi ma?

Ajak Takoksang indang nai ajak tabensa ngudi ma?

8Ibai anüng dang nungi talangba;

Nai kechi inyaktet?

Sheol dang nungi tarokba;

Nai kechi metettsü akok?

9Aji alima tasazük dang nungi talangba;

Aser tzüyim danga tesademba;

10Pa ajanga süira, aser puokra;

Aser o bendangtsü mungdang jakzükra;

Shibai pa noktangtsü akok?

11Kechiaser pai samesa nisungji meteter;

Kodang pai temenen ajitetdir, pai aji yutsüdi ma?

12Anungji kodang arem gado chanu nisung kümdir,

Idangjiang teladak nisungi shisatsü angutsü.

13Nai ne mulungjang shitak anishira;

Aser pa tsütsü teka songlara;

14Neka nung temenen lira,

aji talangi endokang;

Aser ne süki nung memeshiba temungdaktsü.

15Atangji idangjibo tarak meketi nai ne tejak sayutsü;

Hau, na akanga alitsü aser metsübutsü.

16Kechiaser ne timtemba nai mamatsü;

Tzü yima oadok amato nai aji bilemtettsü;

17Aser ne taküm anüngdang nungibo tejangjaba asütsü;

Ammangji anepdang ama akümtsü.

18Aser na kümzüka alitsü,

kechiaser teimlatsü lir;

Hau, nai meketa reprangshiranger,

tejenbudak nai anisüngzüktsü.

19Shingaia na metsübudaktsüi na mejangtsü;

Hau, aikati ne den temba yimnütsü.

20Saka tamajunger tenük makai akümtsü;

Aser parnoki kolenianga majentsü;

Aser tangula sashiba anenbaji dang

parnok teimla asütsü.

YOB 12

Yobi Langzür: Ni Menüdong Kümogo

1Idangji Yobi langzü;

2Atangji nenok dang temeteter,

Aser nenok den tashitemetetjia asütsü.

3Saka nenok den kasa ni angateter;

Nenok dang ni tekübok masü,

Hau, item memetetba shir ali?

4Tembartemi menütsütsüsang nibo kümogo;

Oda ni Tsüngrem dang sarasademer aser pai langzü

Ni tai makasang aser tetemjen sang!

5Shiba tiptema ali pa mulung nung tia makar sempar;

Alangya alir asoshi aji renema kar.

6Rakzükraktemer süki azükarur;

Aser shiri Tsüngrem ain adokdaktsür

parnok kecha masür;

Parnoki pei ainji Tsüngrem ta bilemer!

7Saka tang arem shiruru dang asüngdangang,

aser parnoki na sayutsü;

Aser anüng ozü dang asüngdangang,

aser parnoki ne dang ashitsü.

8Mesüra ali nung ayazür dang asüngdangang,

aser parnoki na sayutsü;

Aser tzüyim angotemi ne dang sangoktsütsü.

9Item ajak ajanga,

Kibuba teka agi ya inyak ta shibai meshitettsü?

10Taküm aliba ajak tanela,

aser meimchir ajak tangula, pa ket nung lir.

11Temeli-i aon menakdangba ama,

tenarongi o matitanger ama?

12Tambur dak temetetba shisatsü lir,

aser ar-ashir dak tangatetba mali no?

13Shisatsü aser temetetbaji Tsüngrem nungi;

Pa dak tasa aser tangatetba lir.

14Pai raksara, shingaia meyanglutettsü;

Pai kar shibangra shingaia melapoktettsü.

15Pai tzüji sotra, itemji kongadoker;

Pai itemji yokra, parnoki alimaji mobanger.

16Pa dak tashi aser tasa tajung lir,

shibai aibelener aser shibai aibelendaktsür,

parnok pa meyong.

17Pai yimsüsürtem tasa raksatsür,

aser obendangertem suwar kümtsür.

18Pai chubatem yinzü salatsür;

Aser parnok teperem lisü agi alentsür.

19Pai putirtem alener aor,

aser shir tashi ita ali parnok atsüngdoker.

20Pai tatartem o magir;

Aser tambur tebilemba endoker.

21Pai chubatem mak sütsür;

Aser tashi taiter shiküp salatsür.

22Pai tammang nungi oset tarok angur;

Aser ammang tanakji tesangwai bener adoker.

23Pai kintem züindaktsür aser itemji raksatsür;

Pai kintem prokshidaktsür aser oda toktsür.

24Alima nung tongtipur tebilemba magir,

Aser lenmang malidak azüngmeyakdak nemzüdaktsür;

25Milen makai parnoki ammang nung nemzür,

Aser yi agi meseper ama ayazüdaktsür.

YOB 13

Yobi Maneni Jembir:

1Ajiang, ni ajak nguogo;

Kü narongi angashiogo, aser angatetogo.

2Nenoki kechi metet, nia metet;

Ni nenok dang tekübokba masü.

3Saka ni ajak Takoksang den jembinür,

aser Tsüngrem den o ashishiteptsü ni aginüa yongyar.

4Saka nenok tiyazü yanglurtem,

Nenok ajak amajok mozü metetbatem dang.

5Oh, nenoki dang mokorai ali asübo,

Aji nenok tashi temetet süla!

6Tang ni kü bang agi jembiba angang;

Aser kübangmechi agi mepishiba angang.

7Nenoki Tsüngrem tenüng nung tiyazü

aser tekülak jembidi ma?

8Nenoki pa tejak reprangdi ma?

Aser Tsüngrem asoshi tepu kümdi ma?

9Pai na tai bushitsüji tajung ama?

Mesüra nisungi külakoktsüba ama nai pa külakoktsüdi ma?

10Nai kipok nung tejak reprangra,

Pai atangji na metongshitsütsü.

11Pa sentsü agi na metsübuli ma?

Aser pa akhüm agi mewangshili ma?

12Nenoki tatishitsü shinbatemji aut dang;

Nenok temeten otemji ajongli dang.

13Tokora, ni jembitsü asoshi, ni odang tokjang,

Aser kechi südir süang.

14Kü shi nung koda sür kü tepu ajangtsü?

Aser kü taküm kü teka nung koda ayutsü?

15Ajiang, pai ni lepsettsü; ni teimla maka;

aji saka ni pa madang kü temeden bushitsü.

16Aji kü tekümtetba alitsü;

Kechiaser Tsüngrem metsübuba nisungi pa dangi marutsü.

17Kü o jungjunga angang,

Aser ni kazükba o ne narong nung lidakjang.

18Tang ajiang, ni kü o tatongi agütsüogo;

Ni metentsütsü ta ni metet.

19Kü den o akatsü shiba ali?

Yamaji asü nung dang ni mokorai alitsü aser asütsü.

20Nai kü dang o ana ya mela-angma,

Idangjibo ni küjak na nungi matsüktsü.

21Neka kü dang nungi talangka piladakjang;

Aser ni tetsübutsü agi ni taoksadaktsü.

22Idangjiang nai jaang aser ni atangtsü;

Mesüra ni jembidi, nai langzüang.

23Kü tai aser temenen kwika ali?

Ni ozüng raksaba aser kü temenen metetdakjang.

24Kechiba ne tejak nembanger?

Aser niji tsükchir ta züngshir?

25Mopungi oner oya aliba to ka nai aoksatsüdi ma?

Tsüksü takongji nai arishidi ma?

26Kechiaser nai ni anema o taku züluoktsür,

Aser kü lanuwa temenentem

kü nem senmang amangdaktsü;

27  Aser nai kü tsüng tsüngden chioker,

aser kü tsüngsü apur;

Nai kü tsüng meketa arrtsü yanglua ayur.

28Ni shizüka aoba oset ka ama liaka;

aser tarütsüi achiba sü ka ama liaka,

nai ya ajak kü dang inyaker.

YOB 14

Yobi Maneni Sarasademer: Takümji Tatsü Aser Timtemtsü Ka

1Tetsüri asoba nisung arishi tatsü,

aser timtem agi sünga lir.

2Naro ka ama pa apunger, aser azüla-a adoker;

Ano akhüm ka ama ajener, aser meli-i akümer.

3Aser ibala ka dak nai ne tenük yoker ama?

Aser ne den kü o bendanger ama?

4Shibai memerükba nungi temerük oset adokdaktsütet?

Shinga melika.

5Pa anogo atakzüka lira,

pa ita kwi alitsü nai meteta lira,

aser pai ajanga motettsüsa nai pa arrtsü yangluja lira;

6Ayangeri pei anogo temer jangratema kazüba ama;

Pa anisüngzüktsütsü asoshi nai pa dak nungi ne tenük tangalen ranglokang.

7Kechiaser süngdong ka asoshibo teimla lir;

Aji lensükra, ano meitsü aser iba süngsem mesamatsü.

8Iba tera ali nung tain kümaka;

Aser ali nung iba tembang süaka,

9Angjia, tzü tashi agi aji meitsü;

Aser süng lanu ama kongsang asangtsü.

10Saka nisungbo süadoker, aser sama-a aor;

Hau, nisung asür, aser pa kong ali?

11Awatsüng nung tzü akongba ama;

Aser ayong ka sama-a akongba medem;

12Yamaji nisung ondaker aser meshishir;

Anüng mesama tashi parnoki mesaktsü;

Mesüra parnok mejangba nungi mesaktsü.

13Oh, nai ni Sheol nung atsüka toktsü asübo,

Na ain adok mesüngzük tashi,

nai ni miima ayu asübo,

aser ni asoshi mapang ka lemtetja

ni bilemtet asübo!

14Nisung ka süra pa ano shia arudi ma?

Ni kü taküm wadang tepiyong ni atatsü, oda ni mechiok tashi.

15Nai jara, ni langzükla;

Aser neka agi renemba ka asoshi nai yongyaseta lilasang.

16Saka tang nai kü mera züngtetlasang;

Nai kü menen madak nüka melila.

17Ni ozüng raksaba juli ka nung alenbanga yutsüla;

Aser nai kü tai nembangtsüla.

18Aser atangji tenem anenzüka alur, menüngsa-a aor;

Aser lungji pei talidak nungi aenshir;

19Tzü agi lungtem sentemer;

Aser aji moshia ayimba agi alima nung auyi oker aor;

Aser yamaji nai nisung teimla raksatsür.

20Teti asoshi pa anema nai akoker, aser pai oadoker;

Nai pa tejak melenshitsür aser pa yokadoker.

21Par chirtem nüngsang angur, aser aji pai memeteter;

Aser parnok ludaktsür, saka pai item meshiteter.

22Pa shi dang ayako atener;

Aser pa tanelai telung nung pei asoshi mang ayimer.

YOB 15

Elifazi Maneni Jembir: Yobi Yimsü Lutsüba

(15.1—21.34)

1Idangji Teman nungba Elifazi langzü;

2Tashir kati amajok shisatsü agi langzüdi ma?

Aser pa tepok anüdoklen mopung agi süngtsüdi ma?

3Tajangzük makaba o den,

mesüra kecha meinyaktetba o jembiba den,

pai bangsentepdi ma?

4Hau, nai Tsüngrem tsübuba pungdoker;

Aser Tsüngrem madang mokorai külemba noktanger.

5Kechiaser ne menen agi ne bang anishir,

Aser nai tekülaker temeli shimer.

6Ni masü, nebang agi pei sasa aitsür;

Aser nebangmechi agi na anema kuli agütsür.

7Ajak dang na tama aso asü?

Mesüra tenemtem meyangludang na aküm asü?

8Tsüngrem kipok mungdang nung na tendang asü?

Aser tashi temetet shisatsü ne tsüta dang aküm asü?

9Nai metetba onoki kechi memetet?

Nai angatetba onokibo mangateter asü?

10Nebu dang kanga tambu,

onok den kupu apur aser kanga tamburtem lir.

11Tsüngremi süneptsüba,

aser ne den o anüka jembitsübaji

na asoshi ilara asü?

12Kechiba ne mulung mazüokteter?

Aser kechiba ne tenük remshir?

13Kechiba ne nelai Tsüngrem anema noktaker,

aser ibala o nebang nungi chioker?

14  Pa merüka alitsüsa nisungji kechi?

Aser tetsüri asoba koda meshia litet?

15Ajiang, pai temeshipur daka temulung malemer.

Hau, pa nükdang anüngtemjia memerük.

16Ajangla tesempatsü aser memerükba,

aser tzü ama temenen ajemba nisung

balaka koda tilaba züngshitsü?

17Ni sayudi, nai angang;

Aser ni kechi ngua aruogo aji shidi;

18Koba tashirtemi pei tsürabur nungi,

miima meyui shin;

19Shir nem dang aliji agütsü,

Aser shir den aener shinga mali asü.

20Arishi tepiyong, oda rishikangshir asoshi küm kwi züngzüka ali;

Papigaji tamajungerji timtem agi kangshir.

21Pa narong nung tetsübu ola lir;

Azükarudang rakzükraktemer pa dangi arutsü.

22Pa tammangdak nungi shilangtsü ta pai mamanger,

Aser pa asoshi nok renema lir.

23Pai chiyungtsü bushia senzür aser ashir,

“Aji kong ali?”

Pa asoshi tammang anogo pa madang lir ta pai meteta lir;

24Timtem aser toushi agi pa tsübudaktsür;

Chuba ka tongbangi aotsü renemba ama,

parnoki pa akoker;

25Kechiaser pai Tsüngrem anema teka sala,

Aser ajak Takoksang anema asüküm.

26Jong temelem apunger,

Pai arishia pa dak pungloker;

27Kechiaser pa tejak temo dang,

Aser tenük-telen yira-yira-a kümdaktsüogo;

28Aser pai yimtok nung alir,

Idakji kidang shinga malir,

Aser aji lungnang akümer.

29Pa takar makümer, pa rongsen tatem akümtsü;

Mesüra pa tsükjong alilen mashitsü.

30Pa tammangdak nungi mepilatsü;

Milak agi pa kongsang merutsü,

Aser pa tebang tangula agi pa apudoktsü.

31Pa sasa külakokja,

pai amajok nung temulung telemdaktsü;

Kechiaser pa tajangzükji amajok dang asütsü.

32Anojungi pa kongsang leptoktsü,

Aser pa kongsang lanu malitsü.

33Tsükmenatzü zü nungi ama pai tsükmenatzü tazü tsükdaktsütsü,

Aser oliv dong ama pa teben pungdoktsü.

34Kechiaser Tsüngrem metsübur telok tapung alitsü;

Aser süpokrem achir sükitem mi agi meyoktsü.

35Parnoki tamajung nu tangloker aser temenen sotsür,

Aser parnok tepok agi maksü bena arur.

YOB 16

Yobi Elifaz Dang Langzür: Pei Temeten Indang Jembiba

1Idangji Yobi langzü;

2Ibala o aika ni angashiogo;

Nenok ajak timtem tali agütsüba tesüneptsür dang.

3Amajok o tatem kadi ma?

Mesüra nenoki langzütsüsa kechi agi nenok tawaktsü atudaktsür?

4Nenok amaji nia jembitet;

nenok nelaji kü nela den melentep asübo;

Nenok anema ni o metentepla;

Aser nenok dak kü kolak angümloktsüla.

5Kü bang agi nenok tashi itdaktsüla;

Aser kü bangmechi tanep agi nenok tejashi süneptsüla.

6Ni jembiaka kü tejashi mesüngzüker;

aser ni aremzükaka aji meyipa maor.

7Saka tang pai ni bilemtettsüogo;

Pai kü tembar ajak jendaktsüogo.

8Pai ni kangtendaktsür;

Aser ni kongraba ya ni anema kuli ka ama lir,

aser yagi kü tejak nung kuli asür.

9Pa ain-abong agi ni shisatsüogo;

Aser tesempa agi ni arishiogo;

Pai ni anema tepu shitepogo;

Kü tsükchiri kü dak tenük kanga yokdar.

10Parnoki ni anema tebang tulu ka kaogo;

Parnoki sensaja kü tenibung nung maogo;

Parnoki ni anema arok akümer.

11Tsüngremi memeshiba pur nem ni agütsüogo;

Aser tamajunger ket nung langkoshishi mereploktsür.

12Ni sünütsü sa-a liasü, saka pai ni ana küma süktangtsü;

Hau, pai tekong nung leneter anükanüka ajasatsüogo;

Ano pai takatsü asoshi ajioka yuogo.

13Pa lijak amertemi ni meketbanger;

Taochi makai pai kü tezüngjang sangdangtsür;

Ali nung pai kü tasü taku yimshidaktsür.

14Pai kü dak zübu ketjen kettsür,

aser nokinketer ka ama kü dak pungloker.

15Kü mang nung ni süjen arlokogo,

aser kü tenütsü auyi nung melangshiogo.

16Tajepba agi küjak meremer,

kü nükeptsü naknaka lir.

17Kü teka nung azü tokshiba meliaka,

kü sarasadem temerük lir.

18Oh alima, kü azü nai tenembang;

Aser kü tajepba tanendaktsü.

19  Tang, ajiang, kü kuli kotak nung lir;

Aser shibai kü o nung asemer pa temalen lir.

20Kü tembartemi ni sensatsür;

Tsüngrem dangi kü nüktzü ayimer;

21Oda Tsüngrem den nisung ka timi benshitsü;

Nisung kati kiyonger den timi liteptsü merangba ama!

22Kechiaser küm ishika lirbo,

Kodanga meshilangtsüba limai ni aotsü.

YOB 17

Yobi Anisüngzük Asoshi Sarasademba

1Kü tanela raksaogo, kü anogo maka,

Ni asoshi lep renema lir.

2Atangji tatalartem ni meketa lir;

Aser parnoki tawaktsü atudaktsüba agi kü tenük rabanger.

3Ni ya mepishir, ne den ni alangzüktsü nai tenangzükba kuli kua;

Ne dak alaka kü den teka amteptsü shiba ali?

4Kechiaser tangatetba nungi nai parnok mulung miima yuogo;

Anungji nai parnok nem mokokdaktsütsü.

5Shibai shilem ka angutsü meji pei tembartem dang tiyazü jembir,

par chirtema tenük pokdaktsütsü.

6Kintemi otsü asütsüsa;

Aser nisungi kü dak metsü metsüloktsütsüsa pai ni yanglutsüogo.

7Kü tejashiba agi kü nüki mejangjai angur;

Aser kü tenük-telen ajak akhüm ka ama dang.

8Tindangertemi iba nung süngmangtsü;

Aser tai makari Tsüngrem dak mamanger asoshi shisa bulur.

9Yongjia temeshipuri pei lenmang metoktsür;

Aser shiba teka temerük lir tali tashi taitba akümtsü.

10Saka nenok ajak tang arungjong;

Aser nenok rongnung tashir ka danga mangutsü.

11Kü anogo süiogo, kü sentongtem raksaogo;

Oda kü mulung nung tebilemba raksaogo.

12Parnoki ammangji anüngdang kümtsür,

Aser ashir, “Tesangwaji tammang anasa lir.”

13Ni Sheolji ozü ki ta reprangra;

Tammangdak ni yipten lemra;

14Ni Sheol dang na “kü aianu” ta shira;

Aser ni achiba mesen dang “na kütsü aser kübu” ta shira;

15Ajangla kü teimla kong ali?

Aser kü teimla shibai reprangtsü?

16Parnok kü den Sheoli alutsü asü?

Mesüra onok külemi auyi jagi aitsü asü?

YOB 18

Bildadi Tanaben Jembir: Tsüngremi Tamajunger Merenshir

1Idangji Shuhai nungba Bildadi langzü;

2O aputsü asoshi kopiga sang asotsü?

Bilemdangang, aser tesü onoki jembidi.

3Kechisü nung onok shiruru ama züngshir,

aser kechiba ne nükdang onok tamachi kümdaktsür?

4Na ne sasa ain adoka pungtenra;

Ne meji alimaji azüngmeyak kümdi ma?

Mesüra, lung ka talidak nungi jokendi ma?

5  Hau, tamajunger meyong milen remseper;

Aser pa mi milak mejangrur;

6Pa süki nung milenji manga lir,

aser pa tekolak nung pa milenji remseper.

7Pa tashi tait mera tatsüba akümtsü;

Aser pei tasa agi pa laodaktsütsü.

8Kechiaser pei tetsüng sang nung atemer;

Aser pai sang lisü mesangba manung jajar.

9Pa tenüklangji sang agi apur;

Aser sang jagi pa apur.

10Pa asoshi ali nungji sang lisü mesanga lir;

Aser pa taolen sangji yua lir.

11Ajaklen tetsübutsü agi pa aoksatsür;

Aser tetsüng nung nepeta arishir.

12Pa tashi lular;

Aser pa metsütakdang lendong atongtsü renema lir.

13Tashitak agi pa teküp chimar;

Aser tashitak tetsüdibai pa tenüktelen chimar.

14Pai temulung lema aliba süki nungi pa atsüdoktsü;

Aser pa tetsübu madak chuba dangi anir aotsü.

15Pa süki nung kecha malitsü;

Pa talidak mitsüktsü lung alatsü.

16Telunglen pa tera süadoker;

Aser temalen pa kongsang azülar.

17Alima nung pa bilemtetba mali;

Aser yimdong nung pa tenüng mali.

18Tesangwa nungi tammangdaki pa yoker;

Aser alima nungi aridoker.

19Par chuba rongnung techira semchira malitsü;

Aser pa alidak shinga anünga malitsü.

20Anüdoklen aliri pa tasü tia ngua pangkar;

Aser anüolen aliri aoksar.

21Atangji memeshiba pur talidak yamaji lir;

Aser shibai Tsüngrem memetet pa talidak ya lir.

YOB 19

Yobi Langzür: Kü Kibur Taküm Lir Ta Ni Metet

1Idangji Yobi langzü;

2Nenoki kopiga kü nela pesaprungdaktsütsü?

Aser o agi ni ajasatsütsü?

3Terben tashi nenoki ni mesüshiogo;

Ni anema tamajung inyakba ya nenok taaka makar?

4Aser atangji niang aibelen süra;

Kü taiji kü dak atutsü.

5Atangji nenoki ni anema pusopulemra;

Aser kü timtemba anema o jembira;

6Ajangla ya metetang,

oda Tsüngremi kü o pelepsatsüogo,

aser pa sang agi ni meketbangogo.

7Ajiang, kü dak teka aiba anema ni ayimtener,

saka kü dang melangzür;

Ni teyari ajar, saka temetenba mali.

8Ni majangtettsüsa pai kü lenmang tongdangogo;

Aser ni taolen pai ammang kümdaktsür.

9Kü sentsüwangshi pai kü dak nungi semzükogo;

Aser kü kolak nungi korangji bener ogo.

10Ajaklen pai ni raksatsüogo, aser ni joko maka;

Aser kü teimlaji süngdong ka ama pai atsütetogo.

11Ano pai ni anema rasar,

aser niji pa tsükchir rongnung ka ta züngshir.

12Par temeranger ajak arur, aser ni anema lenmang noktanger,

aser kü süki meketa parnok menden mesemer.

13Pai kü adianutem ni nungi talangkati piladaktsüogo,

aser kü tembartem kü den khenyongi anemer kümogo.

14Ozü kidongi ni oda toktsüogo,

aser kü akang tembartemi ni amaogo.

15Ozü kidang amungertem aser kü kilitsürtemi ni aener ta bilemer;

Parnok nükdang ni bendanger ka kümogo.

16Ni kü kilir ajar saka pai matanger;

Kü bang agi ni pa mepishitsüba dang.

17Kibutsüi ni sempar,

aser kütsüi asoba chirtem madang ni tesempatsü.

18Tila tanurtemia ni sensatsür;

Ni noktakra, parnoki ni anema jembir.

19Ni temulung lemtetba tembar ajaki ni sempar;

Aser shirnok ni meimer, parnokia ni anema noktaker.

20Kü teret teküp agi dang meibanga lir,

aser anarongtena dang ni jenbua lir.

21Oh, nenok kü tembartem, kü dang aochiang, kü dang aochiang;

Kechiaser Tsüngremi kü dak kongshiogo.

22Tsüngremi arishiba ama,

kechiba nenoki ni arishir;

Aser kechiba kü shi agi nenok jangra matemer?

23Oh, kü o ya züluoka yula sang!

Oh, o itemji kaket ka nung zülula sang!

24Merang kolem aser shesa agi,

lung nung teti asoshi zülula sang!

25Saka ni alangzüksang taküm lir ta ni junga metet;

Aser kenü anogo alima nung pai noktaktsü.

26Aser kü mang shizüka or külen,

Shi nung mesüia ni Tsüngrem nguküm;

27Pa kü tsütsü lir ta ni metettsü;

Pa aener ka masü ta kü tenük agi angutsü,

Ni terongjen agi koda malir.

28Pa dak temenen tera puteterji,

asenoki pa koda arishila, ta nenoki shira,

29Nenoki nok tsübuang;

Kechiaser nenoki obendangba ka lir ta metettsüsa,

terasabai nok temerenshi mena-a arur.

YOB 20

Zofari Tanaben Jembir: Tamajunger Pei Yari o Bendanger

1Idangji Namat nungba Zofari langzü;

2Iba yongji kü tangatetbai kü dang langzür;

Aser ajagi kü mulung nung ya ariteper.

3Ni mak asütsüsa arütsüba ni angashiogo;

Aser ni angatetba nungi kü nelai kü dang langzür.

4Atangji nai metet;

Akhidang alima nung nisung toktsüli nungi;

5Tamajunger takokbaji ari mashir;

Aser Tsüngrem dak mamanger pelabaji kenpiga dang ta nai meteter ma?

6Anüng tonga pa mezümeküm yong;

Aser mepet tonga pa tekolak atu yonga;

7Pa pei jana ama teti asoshi samar;

Shirnoki pa ngua aru parnoki ashir, pa kwa?

8Pungmang ka ama pa yima aor aser mungui akümer;

Aser aonung mangdang ka ama pa aridokadoker.

9Tenük kobai pa angu joko pa mangutsü;

Mesüra pa talidakia joko pa memetettsü.

10Par chirtemi sensaker dang temeim bushitsü;

Aser pa keti pa rongsen shia agütsütsü.

11Pa teret ano asangwa amadang;

Saka auyi nung aji pa den mejangtsü.

12Pa tebang nung tamajungji nangaka;

Aser pa meli agi aji miimbangaka;

13Pai aji mechioki anebaluaka;

Aser pa tebang nung ano aji yuaka;

14Yongjia pa chiyungtsü jagi pa tepok ashir,

aser mim per pa dak lir.

15Pai rongsen meyoker, aser tanaben saktsüdoker;

Pa tepok nungi Tsüngremi itemji saktsütoktsür.

16Per mim pai meseper;

Pei meli agi pa südaktsür.

17Totzü adokba ayong,

aser ninang mojitzü o mamatzü ayimba ayongtem pai mangutsü.

18Pai züsentetba shia agüjaka, pai aji mechishitsü;

Shishilemba dang tajangzük anguba yari pai mepelatsü.

19Kechiaser pai sensakertem kangshi aser oda toktsü;

Pai meyangluba ki ka dak pa teka yia rakzük.

20Pa tepok kodanga masüng nungji,

pai temulung alemba rongsen pai teraka merizüngtettsü.

21Pai merumeru masüba kecha mali;

Anungji pa azükaru tatem matongtsü.

22Pa kechisarena agi abensa-a liaka,

pa anüng-apunger;

Timtemer shiai pa anema lir.

23Tsüngremi pa anema mit tesashi adokba;

Tzünglu ama yokba jagi dang pa tepok sünger liang.

24Pai merang nok o nü nungi ajentsü;

Aser yongmenyin lijakjang kati pa dak ateta akatsü.

25Pai aji teperemleni atsüteter;

Aser sentsüprangba lijakjangji pa tesa nungi atsüteter;

Pa madak tetsübutsü agi atonger.

26Pa rongsenji ajak amajok dang;

Nisungi mapuba mi ka agi pa rongseper;

Pa süki nung tanüngba oset nung aji jangrur.

27Anüngi pa menen jangjadaktsür;

Aser alimai pa anema noktaker.

28Tsüngrem terasaba anogo nung mopungi oset oner ao ama;

Par kidang züsentetba tanga limai bener aor.

29Tsüngrem nungi tamajunger nisung ka asoshi shilemji ya;

Aser Tsüngremi lemzüktsüba senmangji ibai alitsü.

YOB 21

Yobi Langzür: Tamajungerji Aiben Memerenshi Toktsür

1Idangji Yobi langzü;

2Kü o tenarong tena angang;

Aser yagi nenok sünepjang.

3Aremzüka ata-ang aser ni jembitsü.

Aser ni jembimar külen, ni atala-ang.

4Ni ya nisung anema nemnemer asü?

Aser ni kechiba taremzük makai alitsü?

5Ni ajiang, aser pangka-ang;

Aser teka agi nebang nembangang.

6Kodangsa ni bilemtetdir ni shisa bulur;

Aser kü mang tetsübutsü agi asünger.

7Tamajunger kechisü nung taküm alir?

Ar shia alir, aser tashi tulu akümer?

8Parnok den parnok metsü azükaru;

Aser parnok nükdang parnok chirtem kümzüka lir.

9Tetsübu nungi parnok kibongtem jenbua lir;

Mesüra Tsüngrem ajoka parnok dak memekanger.

10Parnok nashi pungchitemi metitemi metsü rendaktsür;

Nashi tzüla techanu mepur aser memeindoker.

11Parnok chirnur san telok ka ama yoker;

Aser parnok chirtem tsüngsanger.

12Parnoki asüm tema aser tsürang kongki wa-a ken atener,

aser jemji ola den lungsoteper.

13Parnoki parnok taküm azükaru nung atemer;

Aser aoksa-a asüyimi alur.

14Aji saka parnoki Tsüngrem dang ashi;

“Onok dang nungi oang, Kechiaser ne yimsü metettsü asoshi onoki mejangrar.

15Onoki pa külemtsüsa ajak Takoksangji shiba?

Aser onoki pa dang sarasademra onok kechi tajangzük alitsü?”

16Ajiang, parnok azükarubaji parnok ket nungi madoker;

Tamajunger tebilembaji ni nungi talangka pila-a lir.

17Tamajunger milen kwibensa remseper?

Kwiben lendong parnok dangi arur?

Kwiben Tsüngrem ain adokdang timtem lemzüktsür?

18Mopung madang parnok monü ama;

Aser tsüksü ama yiprui bener aor?

19Nenoki ashir, “Tsüngremi parnok chirtem asoshi temerenshi rizünga lir;”

Pai aji metettsüsa nisungba nemji aji agütsüdangang.

20Pa tesamaji pa sasa ngudakjang;

Aser ajak Takoksang terasabaji pa nem jemdakjang.

21Kechiaser pa ita-a abensa-adok ta asünung;

Pa sülen par ki nung pai kechi tejangraba alitsü?

22Temalen alir pai o bendanger ta meteta;

Shibai Tsüngrem dang shisatsü sayutsü?

23Kar kaaita pei sünütsü süa lir temsüa asür

24Pa temang temo agi sünga;

Aser teret tenüngla tayi lir.

25Karbo tanela taku nung asür,

Aser tajungji kodanga memenakdang.

26Parnok ajak kasasa auyi nung mejanger;

Aser parnok mesen agi asünger.

27Ajiang, ne tebilemba aser ni anema tasa tamajung kechisa asar,

ni meteta lir.

28Kechiaser nenoki ashir, “Chuba ki to kong ali? Aser tamajunger alidak süki to kwa?”

29Süisübonger dang nenoki masüngdang asü?

Aser parnok kuli nenoki hau ta malir no?

30Lendong anogo nung nisung tamajungji sota ayur;

Aser terasaba anogo nung parnok kümzüker.

31Pa jakdang shibai pa indang rakpoka ashitsü?

Aser pai mapa ka inyakra, shibai taa agütsütsü?

32Ajidang masü, pa leperi apur aor,

aser parnoki pa lep anüker;

33Lenten liji pa dang kanga tajung aser pa jakdang mezüngteti aliba ama;

Nisung ajak pa sülen aor.

34Ajangla, nenok telangzübaji tiyazü dang ta meteta;

Amajok nung kodaser nenoki ni süneptsür?

YOB 22

Elfiazi Tasemben Jembir: Yob Temenenji Ulura

(22.1—27.23)

1Idangji Teman nungba Elifazi langzü;

2  Tsüngrem asoshi nisung kaji tajangzük lidi ma?

Atangji tashirji dang pa asoshi tajangzük asü?

3Na temeshia ta asübaji ajak Takoksang asoshi hau ta ali asü?

Mesüra, ne lenmang temsüa lir ta asübaji pa asoshi tajangzük asü?

4Nai pa tsübu nung pai na arütsür,

aser ne o bendanger asü?

5Ne temenen tulu masü no?

Ne temenenji tatem maka.

6Kechiaser tiyazü nung ne adianu nungi nai sentem agir;

Aser makar dang nungi nai parnok süoshi rakzüker.

7Tebelemer nem tzü tajemtsü nai magütsür.

Aser yaseta alir nem nai chiyungtsü magütsüi ayur.

8Tashi akartem ket nung aliji lir,

aser maongka angurtem yangji alir.

9Amitsürtem nai tazüngla yokogo,

aser lajartem teka nai raksatsüogo.

10Anungji na meketa sang soa lir;

Aser aoksa-a aruba lendong agi na kangshir.

11Ne tesangwa nai mangutsüsa mangogo;

Aser tzümetsüng agi na nembanger.

12Tsüngrem kotak temaba nung mali no?

Aser petinutem ajiang, item koda azük nung lir!

13Aser nai ashir, “Tsüngremi kechi metet?”

Tammang temelem ajanga nai o bendangtetdi ma?

14Pai mangutsüsa mepet temelem agi pa nembanger;

Aser pai kotak temeket nung jajar.

15Koba lenmang nung tamajunger jaja;

Iba tejen lenmang nung na odi ma?

16Anojungi parnok tashi agi rakzüker aor;

Parnok kimungji tzü agi metsüngbang.

17Parnoki Tsüngrem dang ashi,

“Onok dang nungi oadokang, aser ajak Takoksangi onok asoshi kechi inyaktet?”

18Yongjia pai oset tajung agi parnok ki süngtsü;

Saka tamajunger tebilembaji ni nungi talangka pila-a lir.

19Temeshipuri aji angur aser pelar;

Aser tai makartemi parnok sensaja menütsür;

20Aser ashir, “Atangji parnok rongsen samaogo, aser mi agi parnok takaba rongdokogo.”

21Nai Tsüngrem den temba yimang aser yimjung nung liang;

Yamaji asüba agi na azükarutsü.

22Ni ne dang mepishir, pa tebang nungi teinyaktsü ozüng agizükang;

Aser pa o ne mulung nung yuang.

23Nai ajak Takoksang dangi meyipa arura, aser ajemalura;

Ne süki nungi memeshibaji talangkati nai endokra;

24Aser honji auyi nung toktsüra;

Aser ayong nung lung rongnung Ofir honji endokra;

25Idangji ajak Takoksangji ne hon asütsü;

Aser pai sayuba lenmangji senti alitsü.

26Kechiaser idangjibo nai ne sasa ajak Takoksang dak pelatsü;

Aser Tsüngrem tsütsü ne tejak ashitsü.

27Nai pa dangi ne sarasadem yoktsü;

Aser pai ne dang angashitsü;

Aser nai tenangzükba tenlatsü.

28Ano nai langka lemtettsü;

aser aji ne nem ataloktsütsü;

Aser ne lenmang nung tesangwa ayatsü.

29Kechiaser Tsüngremi asükümer ludaktsür;

Saka ajemalur pai kümzüktsü;

30Pai tai makar kümzüker;

Hau, neka merüka lira na kümzüktsü.

YOB 23

Yobi Langzür: Kü Timtemji Taku

1Idangji Yobi langzü;

2Tanüa kü nemnemba taku;

Ni anüngba dang nungi pa teka ang taretba.

3Oh, pa kong angutsü aji metetla sang;

Oda pa amendak tonga ni aotsüsa!

4Ni pa madang kü o tatongi agütsütsü;

Aser kü bang onük tapu tapu agi asüngtsü,

5Pai kechi langzütsü aji ni metetla sang;

Aser pai kü dang kechi ashitsü aji angatetla sang!

6Pa ain tulu agi kü den toktepdisü na?

Masü, saka pai kü o angadangtsü,

7Idakji tindang nisung kati pa den o kateptsü;

Aser teti asoshi kü obendangsang nungi ni kümzüktsü.

8Ajiang, ni anüdokleni aor, saka pa idakji mali;

Aser anüoleni meyiper, saka ni pa majiteter.

9Ni pa anüdoklentip bushia ao saka mangur;

Mesüra anüolentip nunga ni pa mangur.

10Saka pai ni aolen meteta lir;

Kodang pai ni tentangdir, ni hon ama adoktsü.

11Pa tsüngsü nung ni metitemi jajaogo;

Ni pa lenmang nung anitakogo, aser tanga leni mao.

12Pa tebang nungi kazükba ozüngtem ni kodanga meindok;

Kü chiyungtsü dang nungi talisa ni pa o rizüngogo.

13Saka pa temulung ka dang, aser shibai pa melenshitsütsü akok?

Aser pa nelai kechi sünür aji asür.

14Kechiaser ni asoshi kechi lemteta ali aji pai renemtsür;

Aser ibala aika pa mulung nung lir.

15Anungji pa tsüngdang ni koda masür;

Kodang ni bilemdir, ni pa tsübur.

16Kechiaser Tsüngremi kü mulung ilatsüogo;

Aser ajak Takoksangi ni timtemdaktsür.

17Kechiaser tammang agi ni koda masü;

Aser ammang temelem jagi küjak nembang.

YOB 24

Yobi Maneni Jembir: Yobi Alima Nung Azü Tokshiba Anemer

1Kechiba ajak Takoksangi okatsü mapang melemteter?

Aser shiri pa metet, parnoki kechiba pa anogotem mangur?

2Nisungtemi arrtsü lung loktoker;

Parnoki shiruru teloktem rakzüka aor, aser itemji chiyimdaktsür.

3Lajartem meyong gado miener aor;

Aser amitsür meyong nashi pungchi sentsü melen agir.

4Parnoki sensakertem kishileni aridoker;

Alima nung sensaker ajak külemi atsüka alir.

5Ajiang, azüngmeyakdak arem gado ama;

Chiyungtsü kanga kümdanga bushia parnoki parnok mapai aor;

Parnok chirtem asoshi arem jagi chiyungtsü agütsür.

6Parnoki arem nung rem aleper;

Parnoki takar atsü nungi süngjanglijang tejangtem bener aor.

7Parnoki ammang tepiyong mangsa mejanger;

Aser asükwa abentsü sü maka;

8Tenem len nungi aluba tzünglu agi parnok tenlar;

Aser jenokdak maka nung parnoki lungpok nung atsüker.

9Lajartem mama teyongdak rakzüker;

Aser sensaker kinüji sentsü melen agir;

10Karbo tabentsü makai mangsa aor,

aser lumiseta parnoki tsükjong abener;

11Atsü jaratem tsüngda nung parnoki totzü menünger;

Parnoki totzü menüngdak inyaker aser tzüraseta alir.

12Tasürtemi anüngba ola yimti nungjagi adoker;

Aser yirua alirtem tanelai teyari asoshi ayimtener;

Saka Tsüngremi parnok sarasadembaji hau ta mali.

13Parnokji tesangwa anema noktakertem lir;

Shirnoki tesangwa lenmang meshitet;

Mesüra item lenmang nung mejajar.

14Sensaker aser makartem tepsettsü asoshi mesangwa dang nisung tepseteri shishir;

Aser aonung pai auya-a senzür.

15Nüktapangtari züngia aliba mapang atar;

Aser ashir, “Shingaia ni mangutsü” aser pai süko meir.

16Ammang nung parnoki ki rakpoker;

Anüngdang parnok atsüka alir;

Parnoki tesangwaji mungudanger.

17Kechiyong parnok ajak asoshi ammang temelemji anepdang ama lir;

Kechiaser parnok ammang temelem tembar lir.

18Parnoki tzü manung kara kara aor;

Parnok tsüta alima nung atakatemogo;

Parnok lui shinga maor.

19Tsüngsarusa aser tatsük agi rürjep tzü ruseptsür;

Yamaji Sheoli temenen pur meyoker.

20Tetsüpoki parnok amadoktsü;

Mesen agi parnok nangnanga achitsü;

Parnok joko kodanga mebilemtettsü;

Aser memeshibaji süngdong ka ama kosüker.

21Parnoki tetsür tapung mejungi amshir;

Aser amitsür dang tajung meinyaker;

22Aji saka parnok ain ajanga Tsüngremi tashi taiter taküm lidaktsür;

Parnok taküm alitsü ta pai mamangaka, pai shishir.

23Tsüngremi parnok nem temulung lemtetba melar;

Aser parnoki idakji mangadaker;

Aser parnok aolen pai tenük yoker.

24Tatsüka asoshi parnok ajungketer aser parnok oadoker;

Hau, parnok ludaktsür, tangar ajak ama parnok leptoker;

Aser mendi talak ama parnok leptoker.

25Aser tang yamaji mesüra, shibai ni tiyazü ta kuli agütsütsü?

Aser kü o amajok kümtsütsü?

YOB 25

Bildadi Tasemben Jembir: Tsüngremji Tsübutsüla

1Idangji Shubai nungba Bildadi langzü;

2Yimsüsüba aser ain pa den lir;

Pai pa talidak anüngtem nung yimjung yanglur.

3Pa temeranger telok züngtetdi ma?

Aser pa tesangwa shiba madak mayar?

4Ajangla kodaser Tsüngrem madang nisung meshiteta alitsü?

Aser tetsüri asoba nisung koda temerük litet?

5Ajiang, pa nükdang itajia sentsü meperangaka;

Aser petinutem mejangjaka;

6Nisung koda tachemba züngshitsü! shiba mesen ka dang;

Kechiaser nisung chir mesen ama lir.

YOB 26

Yobi Langzür: Tsüngremer Sentsüwangshi Masadangtettsü

1Idangji Yobi langzü;

2Ain malir nisung dang nai koda yariogo!

Tashi maitba tepen nai koda kümzükogo!

3Shisatsü makar dang nai koda kipok nung sayutsüngiogo;

Aser ochiba shisatsü ajak sayuogo!

4Shiba teyari ajanga naia jembi?

Aser na nungi shiba nela adok?

5Asür tanelatem tzü telung nung aser idakji alirtem atentener;

6Pa madang Sheolji mangsa lir;

Aser Teraksatsüsang tenembangtsü maka.

7Pai tazüngla nung anüdoklentipji sadakjema songlar;

Aser alimaji kecha nunga mesentaki yinzüdaktsür.

8Mepet temelemtem nung tzüji atemer;

Aser item kübok mepetji meshisar.

9Pai ita tejak nembanger;

Aser iba manung mepet sülokdaktsür.

10Tzü manung pai arrtsü yanglur;

Tesangwa aser tammang bendangtsü asoshi;

11Kotak tongshitem atentener;

Aser pai arütsüba nung pangkar;

12Pa ain agi pai tzüyimji süngjemdaktsür;

Aser pa tangatetba agi pai ngüm molutzürang yirudaktsür.

13Pa mopung agi anüng tobur jungtsür;

Pa teka agi jena oya aliba per tsüngseter.

14Ajiang, itemi pa senzülen lenmang tezülen dang;

Aser pa indang koda tera ka dang angashir!

Saka pa ain tsüngmok shibai angatettsü akok?

YOB 27

Yobi Maneni Jembir: Yobi Pa Temeshi Ta Sayuba

1Yobi ano pa o entepba maneni ashi;

2Tsüngrem taküm ali nungji, shibai kü temeden rakzükogo;

Aser ajak Takoksang, shibai kü nela kuremdaktsüogo;

3Kechiaser ni ano tangula sashir;

Aser Tsüngrem tanela kü taküm nung lir;

4Atangji kübangmechi agi tiyazü mejembitsü;

Mesüra kü meli-i tekülak madoktsü;

5Na shitak lir ta ni kodanga mashitsü;

Ni masü tashi ni shitakba nung ametba mechioktsü.

6Kü temeshiba ni jungjunga ameta lir, aser ni mechioktsü;

Ni taküm ali tashi kü mulungjangi ni anema kecha malitsü.

7Kü tsükchirji tamajunger den saku;

Aser ni anema adoksangji memeshiba den saku lidakjang.

8Kechiaser kodang Tsüngremi leptokdir,

oda kodang Tsüngremi pa taküm bener odir,

Tsüngrem metsübur asoshi teimla kechi ali?

9Pa dangi timtem arudang pai ayimtenra,

Tsüngremi angatsü asü?

10Ajak Takoksang dak pai peladi ma?

Aser mapang ajak nung pai Tsüngrem dang jadi ma?

11Tsüngrem mapa indang ni ne dang sayudi;

Ajak Takoksang tebilemba kechi ali, aji ni miima mayutsü.

12Ajiang, nenoki nenok sasa ya ajak nguogo;

Ajangla kechiba nenok amajok aküm?

13Tsüngrem nungi tamajunger shilemji ya;

Aser rishikangshirtem senmang,

koba parnoki ajak Takoksang nungi agizüker;

14Par chirtem renlokra, aji nok asoshi;

Aser pa nungi jakzükbatemji tepok masünger.

15Shirnok pa nungi anüngzük,

parnokji tashitak wara agi aremtsü;

Aser pa amitsürtemi mang mayimtsü.

16Pai auyi ama taribi nangtenaka,

aser ajongli ama sobutsü renemaka;

17Pai aji renemtsü akok, saka ochishiri aji semoktsü;

Aser tai makari taribiji lemsatsü.

18Pai sorak ama par ki yanglur;

Aser mitkar ama semtu yanglur.

19Pai takar küma mejanger, saka aji ojang;

Pai tenük lapoker aser pa rongsen malir.

20Tzü ama tetsübutsü agi pa dak atonger;

Aonung yipru agi pa oner aor.

21Anüdoklen mopung agi pa bener aor, aser pa pila-a aor;

Aser aji agi pa talidak nungi oktoker.

22Kechiaser Tsüngremi taochi makai pa dak onloktsür;

Pa ket nungi pai jena aotsü.

23Pa dak nisungi teka matentsü;

Aser pa talidak nungi apudoktsü.

YOB 28

Yobi Ano Maneni Jembir: Shisatsüji Kong Angutsü

1Atangji taribi atudak ka lir;

Aser hon meludak tesem ka lir.

2Ali nungi merang agiteter;

Aser lung nungi yongmenyin meluteter.

3Nisungi tammangji tatembang kümdaktsür;

Aser nakjanga anakba lungtem kinük okshia bushir.

4Temalen nisung alidak nungi pila-a oa pai ali tupoka air;

Tetsüng agi jajartemi luagi alirtemji ali mali memetet;

Nisung nungi talangka pila-a lur, parnoki lisü nung onshishir.

5Alimaji küla, idak nungjagi chiyungtsü adoker;

Saka ali telung nungbo mi agi rongsar ama.

6Luagi lungtem nungji sapfir sentilung alidak lir;

Aser idakji hon tanük lir.

7Iba lenmang ozü tulu kechaia memetet;

Mesüra mongzü nükia mangur;

8Asükümba shirurutemi ilenji mejajadang;

Mesüra tesashi molusongzüia ilenji mesüidang.

9Lung temerangdakji pai teka air;

Tazünglen nungi pai tenemji mekepsar.

10Lungkerak tsüngpoka pai lenmang yanglur;

Aser pa nüki senti oset ajak angur.

11Tzü yimoka maitsüsa pai ayongtem atanger;

Aser kechi oset miima ali, aji temai adokdaktsür.

12Saka tashi temetetba kong angutsü?

Aser tangatetba alidak kong ali?

13Nisungi ajagi aotsü lenmang meshitet;

Mesüra meimchir alidak aji tangua mangur.

14Tarokdaki ashir, “Aji kü dak mali”

Aser tzüyimi ashir, “Aji kü den mali.”

15Hon yong aji malitet;

Mesüra iba jenjang asoshi taribi muozüktet.

16Ofir hon agi,

oniks sentilung mesüra sapfir agi aji jenjang malangtet.

17Hon aser aina agi iba den jenjang kasa masü;

Mesüra hon temeja oset den aji melenteptsüa makok.

18Koral mesüra jasper tezüngshitsüa masü;

Hau, sentilung dang nungia temetetba shisatsü angutsüji tasakba.

19Ethiopia topaz agi aji madoksatsü;

Mesüra hon temejaba den jenjang madoktet.

20Ajangla kolen nungi tashi temetet arur?

Aser tangatetba alidakji kong ali?

21Kechiyong akümlir ajak tenük nungi aji miima lir;

Aser anüng ozütem dang nungi miima yua lir.

22Teraksatsüsang aser Tasübai ashir,

“Onok narongi iba indang olulu ka angashiogo.”

23Ilenji aotsü lenmang Tsüngremi shiteta lir;

Aser iba talidakji pai meteta lir.

24Kechiaser alima tatem ajaklen pai repranger;

Aser anüng ajak kübok pai angur.

25Kodang pai mopungji taret yanglu;

Aser tzüyimtemji seret agi odang;

26Kodang pai tzünglu asoshi ozüng yanglu;

Aser tsüngmok tsüngpret asoshi lenmang yanglu;

27Idangji pai aji angu, aser rizünga ayu;

Pai aji renem, hau, pai aji bushitet.

28  Aser nisung dang pai ashi;

Ajiang, Kibuba akhümtsübuba, aji temetetba shisatsü lir;

Aser tamajung nungi pilara, aji tangatetba lir.

YOB 29

Yobi Maneni Jembir: Yobi Pa Timtem Indang Ashiba

1Ano tanaben Yobi maneni o jembia ashi;

2Oh, ni tesüiba itatem mapang nung ama ali asübo;

Oda Tsüngremi ni nüka aliba amato asübo;

3Kodang pa milen kü kolak dang yadaktsü,

aser pa tesangwa agi tamangdak ajanga ni jaja;

4Ni aturadang ama, koba mapang nung,

Tsüngremi ozü süki awabanga liasü;

5Kodang ajak Takoksang ano kü den liasü,

aser ozü chirtem ni meketa liasü;

6Kodang maken agi kü lenkong shitok,

aser lung jagi kü nem totzü ayong küma yimdaktsü!

7Kodang ni yimti nung süngkhüm jagi ao,

aser kodang yimjak manung ni amen;

8Idangji asangurtemi ni ngura atsükadokli asü,

aser tamburtemi aramesoa noktakli asü;

9Yimsüsürtemi o mejembi,

aser teka agi parnok tebang nembang;

10Tamarenertemi ola madok,

aser parnok temeli tebang tawa nung neplok.

11Kechiaser kü indang angashirtemi ni moatsü;

Aser ni angurtemi kü nem kuli agütsü;

12Kechiaser teyari meshir sensaker;

Ano lajar, aser teyari malir, ni kümzük.

13Tesamar dang alir nungi temoatsüji kü dangi aru;

Aser amitsür mulungjang nung ni tepela ken tendaktsü.

14Ni kü sasa temeshi sobu, aser iba jagi ni amokbang;

Ni shitak o bendangbaji kü semoksü aser kolakjen liasü.

15Nükpoker tenükji ni liasü;

Aser tsüngtsüker tetsüngji ni liasü.

16Sensaker dang ni tebu ama liasü;

Ni meshiteter indangji ni bushitet.

17Tamajungpur tepu techiratemji ni tsüktoktsü;

Aser pai mangema alirtemji ni pa tebang nungi agitet.

18Idangji ni ashi, “Ni kü tesep nung asütsü;

Aser anogotemji lisem ama alitsü.

19Kü tera tzü nung ayanger;

Aser ammang tepiyong kü kongsang nung azüngtsü ala;

20Kü sentsüwangshi kü den tasen lir;

Aser kü teka nung lijakji teti tasen alitsü.”

21Nisungtemi kü dang tenarong aten, aser ata;

Aser kü kipok sayutsüngi angatsü ola madok.

22Ni jembizüker külen parnoki ola madok;

Aser kü o parnok den süoki ai.

23Tzünglu aru ata ama parnoki ni ata;

Aser tzükla tzünglu ata ama parnoki tebang tulu aka.

24Parnoki kü o mamangdang ni parnok menütsü;

Aser küjak tesangwa parnoki meshimakdaktsü.

25Ni parnok lenmang tuyu aser kibur ama amen;

Aser temeranger telok madak chuba ama ni ali;

Oda mangyimertem süneptsür ka ama ni liasü.

YOB 30

Yobi Maneni Jembir: Yob Timtem

1Saka tangbo kü dang tanubutemi ni sensatsür;

Shir tsürabur ozü shiruru telok nung azüa memeyongi ni züngshi.

2Hau, parnok teka nung tashi aliba jagi kechi asütsü?

Kechiaser parnok tashi ajak ogo.

3Kecha makaba aser ayaba nungi parnok kongrasüker;

Parnoki ali takong achir, koba azüngmeyakdak aser pentok nung nemzür.

4Parnoki arem nungi süngo-lio metsükzüker;

Aser kümpok teraji parnok chiyungtsü.

5Telok rongnungi parnok aridoker;

Auür ka ama parnokji asa-a arishir;

6Lenten tarokdak, ongken nung,

aser lungpok nung parnok alitsüla.

7Süngsem rongnung parnoki gado ama asar;

Munger kübok parnok abangteper.

8Parnok suwar chirtem, hau, kita chirtem;

Parnok linük nungi aridokogo.

9Saka tangbo niji parnok ken kümogo;

Aser parnoki niji otsü ka küma tetshir.

10Parnoki ni sempar, parnoki ni nungi atsünga aor;

Taochi makai küjak nung metsü metsüloktsür.

11Kechiaser Tsüngremi kü lijak lisü salatsüogo, aser ni mak sütsüogo.

Aser parnoki ni anema apusoogo.

12Ni anema kü tajichilen par tamajung teloki apusor;

Aser parnok teraksa mapa agi ni anema nangbanger.

13Parnoki kü lenmang raksatsür;

Ni ama teyarir malir ka parnoki lendong agi tongtsür.

14Tongti set rakpoka ayimba ama parnok arur;

Teraksaji ajanga parnoki ni metsüngbanger.

15Tetsübutsütem kü dangi arur;

Parnoki kü tenüng tajung mopung ama oner aor;

Aser mepet ama kü rongsen jena aor.

16Saka tang kü tanela tzü ama kümogo;

Timtem anogoi kü dak atonger.

17Aonung kü teret nungi shi shisar;

Aser ni tashitsü atubaji tanena manener.

18Tashitak teshinem agi kü süoshi menentsür;

Aji agi süoshi agi alen ama alener.

19Tsüngremi ni lishitsüngi nungoktsür,

aser ni auyi aut ama kümogo.

20Ni ne dang ayimtener, saka nai melangzür;

Ni noktaker, saka nai ni merepranger.

21Nai kü dang maochi-i kümogo.

Ne teka ain agi ni rishikangshir;

22Nai ni ajungkettsür aser mopung manung sangdaktsür;

Aser nai ni yipru nung metensatsür.

23Kechiaser nai ni südaktsütsü,

aser akümlir ajak asoshi atemzüka aliba atenshidaki anitsü ta ni metet.

24Aji saka, laoya aliri teka memesangtsü ama?

Mesüra lendong mapang nung kati teyari memeshili ma?

25Timtem nung alir asoshi ni mejebka ma?

Makar asoshi kü nela mejashika ma?

26Saka ni tajung imla nung tamajung aru;

Aser ni tesangwa ata nung tammang aru.

27Kü poknüng menüngsar, aser koda malir;

Tekangshi anogotem kü dangi aruogo.

28Ni mang yima sünak abener tammang nung aor;

Ni mungdang dak noktaker teyari meshir.

29Ni shirongtem den adianu;

Aser ostrich ozü tembar.

30Kü teküp tanak akümer aser aji ajaker;

Aser shirang aitba agi kü teret tsüktsüka akümer.

31Anungji kü tsürang kongki mangyim ken awar;

Aser kü jemji jepteper ola ama apur.

YOB 31

Yobi Ano Maneni Jembir: Yobi Pa Temeten O Jembiba

1Ni kü tenük den o züngtepogo;

Ajangla kodaser ni aiür dak rangloktsü?

2Kechiaser temalen nungi Tsüngremi lemzüktsüba kü shilemji kechi?

Mesüra azüklen nungi ajak Takoksangi agütsüba kü senmangji kechi?

3Memeshipur dangi lendong,

aser temenen inyakba pur nem teraksa agütsür masü no?

4Pai ni taolen mangur ama;

Aser kü tsüngsü ajak puteta mali ama?

5Ni tiyazü nung jaja-a lira;

kü tsüngi kara kara-a ashioktsütsü oa lira;

6Toudangba shitak nung ni odangang;

aser Tsüngremi ni shitakba nung noktaka ali asü mali ajidangang.

7Kü mera terü leni mejaka oa lira;

Aser kü nükdang ajungleni kü mulungjang jaja-a lira;

Aser kü teka nung langka tarak danga lira;

8Ajangla ni metsü prokdi aser tangari chidakjang;

Aser ozü lu nungi adokba atsüdokang.

9Tetsür ka dangi kü mulung mesüoka lira;

Aser ozü kidanger kikümdang ni mita lira;

10Ajangla kübutsü tangar lar kümdakjang,

aser tangari la den mejangdakjang.

11Kechiaser aji met tulu;

Aser yimsüsürtemi merenshitsüba temenen mapa lir;

12Kechiaser aji Teraksatsüsang tonga mi agi arongtsüba lir;

Aser ni züsentetba ajak rongdoktsüba lir.

13Ozü lar mesüra kilitsüri kü den o akadang,

Ni parnok o mangai toktsüra;

14Tsüngremi o bendangtsü noktak dang ni kechi inyaktsü?

Aser pai tasüngdangi arudang, ni kechi langzütsü?

15Shibai kütsü pok nung ni yanglu, pai pa-a meyangluka ma?

Aser kati dang asenok tetsü pok nung meyanglu ama?

16Sensakeri aginüba ni langka danga sota lira;

Mesüra amitsüri imla-a ataba magütsüi lira;

17Mesüra kü tsüta ni dang chia lira;

Aser lajartemi aji mechishi-i lira;

18Ni lanuwa nungi tsürabur ama ni pa mesütet;

Aser tasodang nungi ni amitsürtem anebalur.

19Süoshi makabayong kar tasür ta;

Aser sensaker sobutsü maka ta, ni ngura;

20Pa tenüktelen agi kü nem temoatsü magütsüi lira;

Aser ozü san züng agi pa lemja melira;

21Obendangdak ni asemer lir ta meteta,

ni lajartem anema teka mekanga lira;

22Ajangla tapubangret nungi kü tapubang tongzüka ludakjang;

Aser kü tepen teret kosükdakjang.

23Kechiaser Tsüngrem nungi aruba lendongji ni asoshi tetsübutsü liasü;

Aser pa akhüm agi ni kecha mesütet.

24Ni honji kü teimla kümdakja lira;

Aser hon temeja dang, “Ni ne dak temulung alemer” ta danga shia lira;

25Kü rongsen ulu nung;

Aser kü ket agi aika bena aru nung ni pela-a lira;

26Ni anü apudang,

mesüra ita jangja jangja ayadang aji ngua;

27Kü mulungjang miima mesüzüka ora;

Aser tebangi kü teka mesepra;

28Ajia, yimsüsürtemi sen achitsüsa temenen mapa ka lir;

Kechiaser yamaji süra, temalen aliba Tsüngrem ni menangzüker.

29Ni sempar lendong angudang ni pela-a lira;

Aser temenen agi pa atongdang ni joka tua pelara;

30Hau, pa taküm atakatemjang ta,

kü bang agi shia ni temenen menara;

31Par shi den shibai jangratema mechiyung? ta

ozü süki nung alirtemi meshira;

32Aenertem yimdong nung manen;

Saka aener asoshi ni ozü ki lapok;

33Tangar ama, kü teku nung kü menen miimbanga;

Ni ozüng raksaba nembanga lira;

34Kechiaser ni telok tuluji tsübu, aser kin kidongi sempaba ajanga ni aoksadaktsü;

Anungji ola madok, aser kimai metugu;

35Oh, kari danga kü dang angala sang!

Ajiang, yangi kü temaitsü lir;

Ajak Takoksangi kü dang langzüang;

Aser kü tsükchiri ni anema züluba kaketji lila sang!

36Atangji aji ni kü tapubang nung aputsü;

Korang ka ama ni aji meketa alenloktsü.

37Kü mera yongsük ni sayutsü;

Chuba ka ama ni aji pa nem agütsüla.

38Ozü li-i ni anema ayimtenra;

Aser alu lar aliba ali jagi aroki jebra;

39Idakji adokba temelen magütsüi ni chira;

Aser ali kiburtem südaktsüra;

40Tsük melen ai adokdakjang;

Aser barley tsük melen tezüknem menemba ai adokdakjang.

Yob o tembanger.

YOB 32

Elihu-i Jembir: Elihui Yob Tembartem Arütsüba

(32.1—37.24)

1Anungji item nisung asemi Yob dang melangzüi anen, kechiaser pai pei sasa temeshi ta bilem. 2Idangji Ram kidong Buzai nunger Barakeler chir Elihui ain adok; Yob anema pa mit adok, kechiaser Tsüngrem dangbo pa ang shitak ta pai bilem. 3Ano pa tembar asem anemaka pa mit adok, kechiaser parnoki telangzüba shitakji mungutet, aser Yob taiji ya-a ta mesayutet. 4Tang Elihu Yob den jembitsü ata-a ali, kechiaser parnok pa dang tambu. 5Aser nisung asem bang nung telangzütsü mali ta kodang Elihui ajitet, pa mit adok. 6Aser Buzai nungba Barakel chir Elihui langzü;

Ni tanur, nenok kanga tambur;

Anungji ni tsübua liasü, aser nenok dang kü tebilemba kodakang mesayu.

7Ni ashi, “Tamburtemi jembiang,

aser arishi talangpuri temetetba shisatsü sayuang.”

8Saka ashir-ashi nisung ka dak tanela ka lir;

Aser pa dak ajak Takoksang tangula lir, aji agi parnok nem shisatsü agütsür.

9Tambura süra shisatsü akar masü,

mesüra arishi talangpuri angatetera masü;

10Anungji ni ashir, “Kü dang angang;

Nia kü tebilemba sayudi.”

11Ajiang, ni nenok o ata-a liasü;

Ni nenok tashir o anga-a liasü;

Nenoki kechi jembitsü ta bushia alidang;

12Ni nenok dang tenarong tena liasü;

Aser ajiang, nenok shingaia Yob taiji ya-a ta mesayutet,

mesüra pai jembiba nenok rongnung shingaia melangzütet.

13Onoki tashi temetet nguogo ta shia lir kümdangang; nisungi masü

Tsüngremi pa ludaktsütsü.

14Ibala o pai kü dang mashi;

Aser nenok o agi ni pa dang melangzütsü.

15Parnok bangkar, parnoki joko melangzür;

Parnoki tashitsü kecha mali.

16Aser parnoki mejembira, parnok ola madoki noktaka lira;

Aser joko melangzüra, nibo odang ata-a alitsü na?

17Nia kü shilembo langzütsü,

aser nia kü tebilemba ashitsü.

18Kechiaser ni o agi sünga lir;

Tejembinü agi ni koda malir.

19Ajiang, kü tepok ya tapok mapaba meso mesüker;

Yi meso tasen amato aji pokmadi asür.

20Ni tangula sashitettsüsa kü nem jembidakjang;

Kü tebangmechi lapokdakjang aser langzüdakjang.

21Ni ya mepishir, ni nisung shinga jaka mereprangli;

Mesüra shinga nema ni tenüngsang magütsütsü.

22Kechiaser ni tenüngsang magütsütet;

Aji mesüra, kü Teyangluri ni yakta bener aotsü.

YOB 33

Elihui Jembir: Yob, Kü Dang Angang

1Oh Yob, kechi südir süaka,

nai yimlibilema ni jembiba angang;

Aser kü o ajak angang.

2Tang ajiang, ni kü bang lapokogo;

Kü meli-i jembiogo.

3Kü mulungjang tindang indang ni jembitsü;

Aser kechi ochi aji ni jembitsü.

4Tsüngrem tanelai ni yangluogo;

Aser ajak Takoksang tangulai kü nem taküm agütsür.

5Nai kokra kü dang langzüang;

Ne o tatongi renemang, aser arungjong.

6Ajiang, Tsüngrem madang na ama nia lir;

Nia ajongli agi aküm.

7Ajiang, kü tetsübutsü agi na maoksatsü;

Mesüra ne dak kü teka kangabo maitsü.

8Atangji kü narong nung nai jembiogo;

Aser nai yamai shiya-a ni angashiogo;

9“Ni temerük, ozüng meraksa;

Ni tai maka, kü dak temenen mali.

10Ajiang, pai ni anema tai bushir;

Pai ni tsükchir ta züngshir.

11  Pai kü dak tsüngden yoker;

Pai ni taolen ajak ajioka ayur.”

12Ajiang, ni ne dang shidi, yangi na tai lir;

Kechiaser Tsüngremji nisung dangbo tuluba.

13Kechisünung nai pa den toktepa yamai ashir,

“Pai kü o ka danga melangzü?”

14Kechiaser Tsüngremi khen anaben jembir;

Saka nisungi aji mangateter.

15  Pungmang nung, aonung mangdang nung, teyiprep mapang nung;

Nisung yipten nung mejangba mapang nung;

16Idangji pai nisung narong lapoktsür;

Aser tekümdangtsü agi parnok amokmerener;

17Oda meimchiri temenen mapa nungi atsüngentsü asoshi;

Aser nisung nungi asüküm agientsü asoshi;

18Pa tanela ongken nungi sota ayutsü asoshi,

aser pa taküm nok o nü nungi kümzüktsü asoshi;

19Pa yipten nung tashitsü ajanga pa azüoker,

aser pa teret angoba matanger.

20Pai chiyungtsü metangshir;

Aser pa nelai anükalem chiyungtsü mebangnanger.

21Pa shi tenük agi mungui kongrasüka aor,

aser pa teret mungui aliba to adoker.

22Aser yamaji pa tanela ongken anasai,

aser telepseter madangi pa taküm aor.

23Tang kechi shitak lir aji nisung dang sayutsü asoshi,

pa den kotak tenyar ka;

0-tongtar ka, meyi ka nung ka lira;

24Aser pai pa dak aochira, aser ongkeni meludaktsüi pa chiokra;

Ni pa taküm asoshi talangzükba nguogo ta shira;

25Pa shi ano lanu kümshir;

Aser pa lanuwa mapangi meyipdakjang.

26Pai Tsüngrem dang sarasademer aser pai pa dang temeim sayur;

Pai Tsüngrem tejak tepela agi angur;

Aser pai nisung nem pa temeshiba shia agütsür.

27Pai nisung madang ken atener, aser ashir,

“Ni temenen mena, aser metonga aliba kirakdaktsü;

Saka pai kü menen yari memerenshi;

28Pai kü nela ongkeni meyidaktsüi alangzük;

aser kü takümi tesangwaji angutsü.”

29Ajiang, item ajak Tsüngremi inyaker;

Nisung ka den anaben asemben tashi,

30oda pa nela ongken nungi meyipa anitettsü asoshi;

Aser taküm tesangwa ngujema angutsü asoshi.

31Oh Yob, temulung agüjang, kü dang angang;

Ni jembidi, tokora.

32Nai tashitsü kar danga lira, kü dang langzüang;

Kechiaser na tai maka ta sayunür.

33Yamaji mesüra, nai kü dang angang;

Na mokorai liang, aser ni ne dang tashi temetet o sayutsü.

YOB 34

Elihui Maneni Jembir: Elihui Tsüngrem Ochi Obendang Sangdongba

1Ano Elihui maneni ashi;

2Nenok tashirtem, kü o angang;

Aser nenok shisa akartem, kü dang tenarong tenang.

3Kechiaser temeli-i menakdangba ama,

tenarongi o tendanger.

4Asenok asoshi kechi shitak lir aji asenoki shimdi;

Kechi tajung aji asenok rongnung meteta yudi.

5Kechiaser Yobi shiogo, “Ni temeshi, aser Tsüngremi kü temeden rakzükogo;

6Ni shitak dang liaka, ni timatemer! Ni ozüng meraksai liaka, kü komo maneber ta.”

7Tesensatsüba tzü ajemba,

Yob ama nisung shiba ali?

8Temenen inyaker den temba ayimba,

aser tamajunger nisung den jajaba, pa ama shiba ali?

9Kechiaser pai shiogo,

“Tsüngrem den putepa alitsübaji Nisung asoshi kecha tajangzük maka.”

10Anungji nenok tangatetertem, kü dang angang;

Tsüngremi tamajung inyak ta,

aser Ajak Takoksangi temenen inyaktsü ta, aji kodanga masü.

11  Kechiaser nisung mapa yari pa nem taa agütsür;

Aser nisung shia pei lenmang yari agütsür.

12Hau, atangji Tsüngremi tamajung meinyaker;

Aser Ajak Takoksangi tiyazü mebendanger.

13Shibai pa ket nung alimaji agütsü?

Mesüra alima ajak khu shibai pa nem benloktsü?

14Pai pa nela pei dangi shilangdaktsünüra;

Aser pa tangula pei dangi anitenüra;

15Shi ajak külemi samatsü;

Aser nisung auyisa akümtsü.

16Na tangatetba lira, ya angang;

Kü ola angang.

17Shibai ochi sempar pai yimsü südi ma?

Aser ochishir aser tashi taiter nai aitsütsü asü?

18Shibai chuba dang, “Na samesa!” ta,

aser tamarener dang, “Nenok majung” ta ashir?

19Shibai chuba chir dang tejak merepranger;

Mesüra sensaker dang tali takar mezüngshir?

Kechiaser parnok ajak pai yanglubatem.

20Aoksa-a, oda ayatrem nung, parnok asür;

Takartem dak teka air aser parnok samar,

aser tashi taitertem nisung teka meteni bener oadoker.

21Kechiaser nisung aolen pa tenük yoka lir;

Aser pa tsüngsü ajak pai angur.

22Temenen inyakertem atsüktettsüsa;

Tammang mesüra ayatrem maka.

23Kechiaser nisung ka Tsüngrem madangi okai aotsü asoshi;

Pai anogo mezüngzüktsür.

24O mebushi-i pai tashi taitertem ajasatsür;

Aser parnok melen tangar toktsür.

25Yamaji pai parnok mapa meteta lir;

Aser aonung parnok meküpsaja menüngsatsür.

26Pai mit agi tamajunger raksatsür;

Aser ajaki repranga lia pai parnok dak azüker.

27Kechiaser parnoki pa sülen manitak;

Aser pa yimsü ka danga hau ta mali;

28Oda sensaker ayimtenba pa dangi odaktsütsü;

Aser makartem asaba pai angashitsüsa;

29Pai tesünep agütsüra, shibai pa aitsütsü?

Pai pa jak nembangra, shibai pa angutsü?

Kin ka dang süaka, nisung ka dang süaka, saku dang;

30Oda Tsüngrem metsüburi yimsü masütsü;

Aser nübur asoshi sang malitsüsa.

31Kechiaser Tsüngrem dang ni temerenshi nguogo,

“Ni joko tai memenatsü ta ashitsü asü?”

32Ni manguba nai sayuang;

Ni temenen menara, joko aji ni memenatsü, ta nisungi shiali ma?”

33Nai bilemba ama pai taa agütsüdi ma?

Ajagi nai aji magizüker; kechiaser ni masü, nai shimtsüla;

Anungji nai kechi metet shiang.

34Tangateter nisungi, kü dang ashir;

Kü dang angaashiba tashir jagi kü dang ashitsü;

35“Yobi kecha memeteti jembir, aser pa o tashir o ama masü.”

36Yobi tatem tonga jembila sang jungla;

Kechiaser pai tamajunger ama o langzür.

37Kechiaser pa temenen dak alaka pai anema apusoba bendenloker;

Onok rongnung pai teka matena atalar aser Tsüngrem anema o apoker.

YOB 35

Elihui Maneni Jembir: Pei Sasa Temeshi Ta Sayuba Aitsür

1Ano Elihui ashi;

2Nai ya shitak ta bilemer asü?

Tsüngrem nungi ni temeshi lir ta nai ashir asü?

3“Ni asoshi aji kechi tajangzük?

Temenen mena-aka, memena-aka ni kechi tajangzük” ta nai bilemer?

4Ne dang aser ne tembartem dang ni langzüdi.

5Anünglen reprangang, aser ajiang;

Aser mepetji ajiang, itemji ne dang talangba.

6  Nai temenen menara, pa balaka akümer asü?

Aser nai ozüng aika raksara, pa asoshi aji kechi?

7Na temeshi süra, nai pa nem kechi agütsür?

Mesüra neka nungi pai kechi angur?

8Ne menen agi na amala nisung ka dang kangshitsü;

Aser ne temeshibaji nisung chir ka asoshi dang tajangzük.

9Rishikangshi onsara nung nisungtemi ayimtener;

Tashi taiter tepen majet nung parnok teyari meshir;

10Saka shingaia yamai mashir,

“Kü Teyanglur Tsüngrem shibai ammang nung ken agütsür, pa kong ali?

11Shibai alima shiruru dang nungi asenok tali sayur;

Aser anüng ozü dang nungi tashiba kümtsür?”

12Nisungtemi ayimtendang pai melangzür;

Kechiaser tamajunger asükümba yong pai melangzür.

13Atangji Tsüngremi amajok ayimtenba mangashir;

Mesüra ajak Takoksangi aji mezüngshir.

14Ajangla, nai pa mangur ta ashidang kodaka pai angatsü;

Aser nai pa atar ta ashir süra, koda tilaba züngshitsür!

15Tang pai ain adoka mesemdang nung,

Mesüra tai kangabo mebushi nung,

16Yob amajok nung pa tebang lapoker;

Kecha memeteti pa o apoker.

YOB 36

Elihui Maneni Jembir: Tsüngrem Ajungba Indang Sangdongba

1Ano Elihui maneni ashi;

2Tatsüka ata-ang, aser ni ne dang sayudi;

Kechiaser Tsüngrem melen ni ano tashitsü tera lir.

3Talang nungi ni kü shisatsü bener arutsü;

Aser ni kü Teyanglur nem temeshiba agütsütsü.

4Kechiaser atangji kü o tiyazü masü;

Shisatsü nung teperibaji ne den lir.

5Ajiang, Tsüngrem tashi tait,

aser shinga mezüngmeshi masür;

Pa tangatetba tashi nung kanga tulu.

6Pai tamajunger taküm metoktsür;

Saka timtemer nem par tim agütsür.

7Temeshipur nungi pai pa tenük mechioker;

Saka chuba menden nung chubatem den

pai parnok teti lidaktsür, aser parnok tudaktsür.

8Aser pai parnok tsüngden chiokra,

aser parnok timtem lisü nung pura;

9Idangji pai parnok mapa sayur;

Aser asüküm inyakogo ta parnok ozüng raksaba sayur.

10Ano tesayutsü angatettsüsa pai parnok narong lapoktsür;

Aser parnok temenen nungi meyipang ta ozüng agütsür.

11Parnoki pa dang angara, aser tenzükra,

parnok anogo azükaru nung,

aser parnok küm tepela nung süitsü.

12Saka parnoki mangara, parnok nok agi samatsü;

Aser shisatsü mungui parnok samatsü.

13Saka shiri Tsüngrem metsübur,

parnok mulung nung ain-apung bendener;

Pai parnok alenaka parnoki teyari majar.

14Parnok asangwa alidang asür;

Aser parnok taküm maksü nung atemer.

15Pai timtemertem parnok timtemba ajanga kümzüker;

Aser toushi ajanga parnok narong lapoktsür.

16Hau, lendong nungi pai na mesüzüka;

Temesü malidak tesademdaki anir ola,

aser na chiyungba langbang nung kechi toktsür aji temo dang süla.

17Saka na tamajunger obendangba agi sünga lir;

Obendangba aser ochiba agi na tonga lir.

18Kechiaser mit adokba agi na mesüzüka atalar ka küma lira, kümdangang;

Aser talangzükba tulu agi na mashileni tuodaktsü.

19Timtem makai iba denji ne rongsen kasa südi ma?

Mesüra tashi ajak den kasa südi ma?

20Aonung teyongya,

koba mapang nung kintem parnok talidak nungi leptoker.

21Kümdangang, temenen leni tuo;

Kechiaser nai timtem dangbo temenen ang shimogo.

22Ajiang, Tsüngremi pa tashi nung majettsüsa inyaker;

Pa ama tesayur shiba ali?

23Shibai pa nem pa teinyaktsü lemzüktsü?

Aser shibai, “Nai tai inyakogo” ta shitet?

Elihui Tsüngrem Tamaren Indang Sangdongba

24Pa mapa tushia uludakjang;

Koba indang nisungi ken atener.

25Nisung ajaki aji reprangdagi;

Nisungi aji talang nungi angur.

26Ajiang, Tsüngremji tulu, aser asenoki pa memetet;

Pa küm kwi aji memetet.

27Kechiaser pai tzüyim nungi tzüjang mesepketer;

Pai itemji tzüsü nungi tzünglu küma yanglur.

28Koba anüngi tsükdaktsür;

Aser nisung madak talubosa ludaktsür.

29Hau, mepet alungba, aser pa süki tsüngmok atenba;

Shibai angatettsü akok?

30Ajiang, pa meketa pai tsüngpret yoker;

Aser tzüyim tarokdak aji agi sübanger.

31Kechiaser item ajanga pai kintem mesür;

Pai chiyungtsü talubosa agütsür.

32Teka anaprongla agi pai tsüngpret amer;

Aser ajioka ayudak alatsü pai ozüng agütsür.

33Tsüngmok jagi pai rasaba sayur;

aser yipru agi pa mit sayur.

YOB 37

Elihui Maneni Jembir:

1Yagi kü mulungjanga atentener,

aser iba talidak nungi juka aor.

2Pa ola asaba,

aser pa tebang nungi adokba ola, nenoki angang.

3Kotak kübok ajakleni pai aji yoker;

Aser alima tatem tashi pa tsüngpret yoker.

4Iba sülen pa ola arrür;

Ola tulu agi pai tsüngmok atener;

Aser pai tsüngprettemji sota mayur;

Pa tebang nungi pa ola angashir.

5Tsüngremi pa ola agi tesüngmangtsüka tsüngmok atener;

Asenoki mangatetba mapa tulu pai inyaker.

6Kechiaser pai rürjep dang ashir, alima nung tsükang;

Ano tsüngsak aser tzünglupu dang, “Tashi itshiang ta ashir.”

7Pai nisung shia teka anendaktsür;

Oda nisung ajaki pa mapa metettsüsa.

8Idangji shirurutemi temejangdaki aor,

aser parnok leprungki nung anisüngzüker.

9Pei taktang nungjagi Tsüngrem mopung adoker;

Aser prokshia aliba mopung nungi temokong adoker.

10Tsüngrem tangula agi rürjep lung yanglur;

Aser tzüyim lentenji mesüa kümtsür.

11Hau, pai mepet temelemji tayi agi süngtsür;

Aser mepeti pa tsüngpret prokshidaktsür.

12Aser nisung aliba lima nung,

pai kechisa meladir pai inyaktsü asoshi;

Ibaji ileni khen, küleni khen, ta pa sasa anishia meketzür.

13Alima meimchir metongshitsütsü asoshi,

mesüra temeim agi pai aji adokdaktsür.

14Oh Yob, ya angang; marakzüi noktakang;

Aser Tsüngrem tesüngmangtsü mapa bilemdangang.

15Tsüngremi parnok madak kodaser pa mapa lemsar;

Aser mepet tesangwa koda ayar nai meteter ma?

16Mepettem kodaser timi alir;

Aser shisatsü nung teperisangi tesüngmangtsü inyakba meteter ma?

17Anüolentip mopungi alimaji mokonga alidang;

Nenok süoshi talem lidi ma?

18Nai pa ama tanüdangtsü temelem mesüka

anüngtem mesangshia yanglutetdi ma?

19Asenoki pa dang kechi ashitsü aji kü dang shiang;

Kechiaser mashi-malu aliyong asenoki asen o tatongi shia magütsütet;

20Ni jembitsüa ta pa dang shidisü?

Mesüra, ni meyokadokang ta nisungi shia ali asü?

21Aser tang nisungi anüngtem tesangwaji mejangjai angur;

Saka mopung ona itemji süshia odaktsür.

22Anüdoklentip nungi sentsüprang tesangwa arur;

Tsüngrem dak tetsübutsü sentsü lir.

23Ajak Takoksang, asenoki pa mebushitet;

Ain aser obendangba nung pa tashi tulu;

Aser temeshiba agi sünga ali nung, pai tai mebendanger.

24Anungji nisungi pa tsübur;

Shibai temulung nung tashir ta bilemer pai aji züngshia mali.

YOB 38

Kibubai Jembir: Yob dang Tsüngremer Telangzüba

(Lip. 1.1-10)

1Idangji yipru mopung nungi Kibubai Yob dang langzü;

2Kecha memetetba o agi kü tebilemba miimbangba ya shiba?

3Tashikar ka ama nai tang pei nangri kangang;

Aser ni ne dang asüngdangtsü, aser nai kü dang shiang.

4Ni alima yangerdang na kong liasü?

Nai meteta lira shiangjong;

Ne dak tangatetba lira shiangjong.

5Nai metet süra, shibai iba tasazükba renem?

Mesüra shibai iba manung lisü mesang?

6Iba tongshitemji kong azüng;

Mesüra iba kinük lung shibai atem?

7Kodang anepdang petinutem külemi ken aten;

Aser Tsüngrem chir ajaki tepela nung ayimten?

8  Mesüra kodang ali nungi pokteta adok;

Shibai tzüyim nung kishiji shibang?

9Kodang iba semoksü asoshi ni mepet yanglu;

Aser iba temeibangba kinü sü mepet temelem yanglu;

10Aser aji asoshi arrtsü yanglu;

Aser kishi aser tartangba yanglu,

11aser ashi, “Ya tashi na arutet, saka ya tashi dang,

aser ne asükümba yangi anentsü.”

12Sozükli nungi tang tashi nung nai anepdang ozüng mela ama?

Mesüra koba mapang nung züngia akümtsü aji nai pa dang shiogo ma?

13Oda aji agi alima tatem ajak ambangtsü asoshi;

Aser idak nungjagi tamajungerji rüktoktsüsa;

14Süng agi atep nung ajongli melenshiba ama aji melenshir;

Aser osak nung sü aremba ama akümer.

15Tamajunger dang nungi tesangwaji sota ayur;

Aser asükümba tepenji raksar.

16Tzüyim apokdaki na aruogo ma?

Mesüra tarok-tenem nung jajaogo ma?

17Tasü süngkhümtem ne dang sayuogo ma?

Mesüra tammangdak kishitemi nai ngudangogo ma?

18Nai alima tasazük meteta yuogo ma?

Nai aji ajak metetra, shiangjong.

19Tesangwa yaloktsüdak kong nungi arur aser tammang talidak kong lir?

20Aji nai arrtsü tashi agitsüsa aser aji lenmang ngutettsüsa;

21Tesangwa kolen lir, kechiaser idangji na sor liasü;

Aser na arishi kanga talang!

22Rürjep rizüngdaki na yidangogo ma?

Mesüra rürjep lung jendang nguogo ma?

23Koba ni timtem mapang asoshi renema ayu,

Kintem rara aser tongbang mapang asoshi renema ayu.

24Mopung lemsadak, aser alima nung

anüdoklen mopung prokshidak, lenmangji kolen?

25Tzünglu alutsü asoshi lenmang shibai chipok;

Mesüra tsüngmok tsüngpret asoshi lenmang shibai pipok?

26Nisung malidak aser azüngmeyakdak tzünglu arudaktsütsü asoshi;

27Ali teraksa dak aser tamajungdak tenladaktsütsü asoshi,

aser ali takongdak ai lanu meidaktsütsü asoshi;

28Tzünglu tebu ali asü?

Ajangla aonung shibai azüngtzüjang aludaktsür?

29Shiba pok nungi rürjep lung adok?

Aser anüng nung tzüsü temokong shibai poktetdaktsü?

30Lung ka ama tzüji telong akümer,

aser tarokdakji nembanger.

31  Pleiades petinu tejepji nai alen asü?

Mesüra Orion lisüji nai sala asü?

32Nai Mazzarotji pa tsüngkhüm nung adokdaktsür asü?

Mesüra Arcturusji par chirtem den nai anishir?

33Nai anüng ozütem metet asü?

Alima nung ozüngji nai yanglur asü?

34Tzünglu bulua arudaktsütsü asoshi,

nai mepet dangi ola tashi agi yoker asü?

35“Tsüngpretji oang” ta nai melar asü?

Aser parnoki ne dang, “Onok yangi lir” ta ashi asü?

36Telunglen shibai shisatsü enok?

Mesüra shibai temulungjang nung tangatetba agütsü?

37Tashi temetet agi shibai mepetji züngdangtet?

Mesüra shibai anüng tzüshi izüktet?

38Aliji merang ama meranga akümdang;

Aser likongtem külemi mejatepa akümdang.

39Molusongzü tetsüdi asoshi nai shi bushidi ma?

Mesüra molusongzü pungtu tepok süngtsüdi ma?

40Molusongzü pei lungpok nung mejanga alidang;

Aser mür nung mita alidang?

41Waro chanutemi taya nung chiyungtsü atema kü dang ayimtendang;

Parnok ayaba nai süngzükdaktsütettsü asü?

YOB 39

Kibubai Maneni Jembir:

1Lungren shiotem kodang techanu mepur, nai meteter ma?

Mesüra mesüi kodang techanu mepur nai angu asü?

2Item ita kwi techanu abener nai azünger asü?

Mesüra itemji kodang mepur aji nai metet asü?

3Item jagi koda mokremer techanu mepur,

Aser kodang alima dangi parnok techanu anir arur, nai metet asü?

4Item techanu tashi tait aser parnok moapu nung yinteter;

Itemji aor, aser joko meshilanger.

5Arem gadoji shibai chiok?

Mesüra arem gado shibai sala?

6Azüngmeyakdakji pa ki;

Aser aitji pa talidak ni yanglutsü.

7Pai yimti nung nanüngtepbaji menütsür;

Mesüra shingaia pa azüoktsü makoker.

8Tokong nung pa chiyimdak bushir;

Aser süngolio ajak pai bushir.

9Sümung kati na tenzükdi ma?

Mesüra pai nashi ki nung mejangdi ma?

10Nai sümungji lisü agi sentaker alu ladi ma?

Mesüra ne sülen pai alu alatsüdi ma?

11Pa tashi tulu asünungji nai pa dak tamang kadi ma?

Nai ne lu nung inyaktetbaji pa nem toktsüdi ma?

12Ne metsü pai bener arutsü aser jendangi itemji bendentsü ta;

Nai pa dak tamang kadi ma?

13Ostrich ozü tashikang tepela agi ayipshir,

Saka Pinion aser tzü ozü tezüng den medemdangtsü makok.

14Kechiaser lai pei entsü ali nung toktsür;

Aser lisem nung mokdaktsür.

15Aser aji tangari raksatsütsü ta,

aser arem shirurui ajemsatsü ta mebilemteter.

16Lar techanuji pa meyong ama mesüi meketmeseni benshir;

La mapaji amajok akümtsü kecha tsübua mali;

17Kechiaser Tsüngremi la nem shisatsü magütsü;

Aser tangatetba shilem melemzüktsü.

18Kodangsa asemtsü tenzükdir;

Lai kor aser iba dak asangba nisung menütsür.

19Nai kor ka nem tashi agütsür asü?

Nai pa tekong tezüng agi süngtsü asü?

20Pa tetsübutsü ka akhüm keta asadang;

Jangkok ama nai pa joktendaktsür asü?

21Pai pa tashi nung tepela agi pungtener;

Aser nok o nü ajurutsü aor.

22Pai tetsübutsüji hau ta mali, aser tezü matanger;

Mesüra nok nungi memeyiper.

23Lijakbong, nülak, aser sangja pa dak akoshir.

24Mit adokba tetsübutsüka pa alidak angur;

Mesüra jangzü apudang pa marakzüi meliteter.

25Jangzü apu-aben pai, Aha, ta asar.

Apiga nungi pai tongbang tanishir arrürba aser jatenba menemteter.

26Ne kolak ajanga mongzü yima aobaji ne dang nungi angazükba asü?

27Mesüra ne ozüng agi orijai yimketa tur,

azük talang nung tesep yanglur asü?

28Lungbang nung pa alir aser lungren nung,

aser tenem kolak nung pa talidak lir.

29Ang nungjagi pai chiyungtsü ayimer;

Talangka nungi pai ajiteter.

30  Pa techanutemi azü mereper;

Aser kong tasü mang lir, idakji pa lir.

YOB 40

Kibubai Maneni Jembir: Ni Ajak Takoksang Tsüngrem

1Ano Kibubai Yob dang ashi;

2Shibai tenüng asener pai ajak Takoksang den toktepdi ma?

Shibai Tsüngrem den o ashishiteper, pai aji langzüang.

Yobi Tsüngrem Dang Langzüba

3Idangji Yobi Kibuba dang langzü;

4Ajiang, ni kecha malang;

Ni ne dang kechi langzütsü? Ni kü bang nembangdi.

5Ni khen jembiogo;

Hau, anaben tashi, saka ojang, ni melangzütsü.

Tsüngremi Yob Jazükba

6Idangji Kibubai Yob dang yipru mopung nungi langzü;

7Tashikar ama ne nangri kangang;

Ni ne dang asüngdangtsü, aser nai kü dang langzütsü.

8Nai koda kü o bendangba mezüngshitsü asü?

Na metentsü mechi nai ni aitsütsü?

9Mesüra Tsüngrem tepen ama ne dak aket asü?

Aser pai ola tulu agi tsüngmok atenba ama nai akok asü?

10Kwa, na akhüm keta sobudangangjong;

Aser sentsüpranga süoshi abendangangjong.

11Ne ain adokbaji tera tali lidakjang;

Aser shirsa asükümer, ajak dak rangloka parnok ludakjang.

12Asükümer ajak dak rangloka, parnok ludakjang;

Aser tamajungerji parnok noktakdak nungi ajemzüka yokang.

13Auyi nung parnok külemi nembangang;

Manguba lima nung parnok tejak meyibangang.

14Idangjiang nia na asangtsü;

Oda neka tajichi agi takok ngura;

15Tang kentok, shiruru tulubaji ajiang, koba na ama ni yanglu.

Nashi pungchi ama pai rem achir;

16Pa tashi teperem nung lir;

Aser pa ainji pa tepok tetsü nung lir.

17Cedar süng ama pa teben arakzür;

Pa tepi tetsüji telong lungteta lir.

18Pa teret yongmenyin ama;

Pa tetsüng, tepen merang jok ama.

19Tsüngremi yangluba rongnung pa tongtiba;

Shibai pa yanglu pai dang nok agi azüokteter.

20Kechiaser tenemi chiyungtsü pa nem adokdaktsür;

Idakji shiruru ajak asayar.

21Lapu naro kübok kümpok rongnung,

aser lishitsüng nung pa mejanger;

22Labu naro dong agi pa akhümbanger;

Ayongbang narotemi pa meketjema lir;

23Ajiang, ayong ka tzü metsüngra, pa maoksar;

Yordan ayong pa tebang tonga metsüngaka, pa temulung lema lir.

24Pai mita alidang kari danga pa pudi ma?

Mesüra, merang sang agi pa teni ateta tsüngtetdi ma?

YOB 41

Kibubai Maneni Jembir: Nai Molutzürang Putetdima?

1  Nai ango boroki agi molutzürang atsütetdi ma?

Mesüra pa temeli lisü agi nemzüka yoktetdi ma?

2Nai pa teni nung süngzü rüoktetdi ma?

Mesüra boroki agi pa teküm tupoktetdi ma?

3Pai ne dang aiben mepishidi ma?

Mesüra ne dang o tanep jembidi ma?

4Nai teti asoshi kilir agiang ta,

pai ne den tezüngzüktepba yangludi ma?

5Ozü ka den asayar ama nai pa den asayadi ma?

Mesüra ner aiürtem asoshi sendaka yudi ma?

6Angopur teloki pa jenjang tangdi ma?

Shishir rongnung parnoki pa lemsadi ma?

7Merang taju agi nai pa teküp tsüngsatetdi ma?

Mesüra pa tekolak ne angotsüngtsü agi tsüngtetdi ma?

8Nai pa dak tekongshi danga kongshidangang;

Aser koteka raratsü bilemdangang;

nai pa dak mekongshitettsü,

9Ajiang, pa dak kongshiang; teimlatsü maka;

Pa tangudang angu nunga pa tsübur.

10Pa dak shingaia mekongshitettsüsa pa kanga tesashi;

Ajangla shibai kü tsüngdang noktaktet?

11Shibai kü den toktep aser ni shiba majet?

Anüng ajonga teküboklen kechisa ali aji kü meyong.

12Pa tetsüng-tepen, pa tashi tulu;

Mesüra pa asoajen tajung indang ni mejembi-i malitsü.

13Shibai pa temaba sü semzüktet?

Pa teküp temelem anasa shibai arutet?

14Shibai pa tebang kishitem lapoktet?

Pa tepu meketa tetsübutsüka lir.

15Pa terongdong jong ama tip temelem agi,

akang akanga mejatepa lir.

16Tetsüngdai mopung teraka maitsüsa

kati ka den tsüngtepa lir.

17Itemji kati ka den metentepa lir;

Melepsatettsüsa itemji atongtepa lir;

18Pai hachi ta asüdang milak adoker;

Aser pa tenükji anepdang anümerem ama.

19Pa tebang nungi mi adoker;

Aser mitsü apoker.

20Mimung nung chipo jaa atu ama;

Pa teni nungi mokozü adoker.

21Pa tangula sashidang mijang nung mi aputeter;

Aser pa tebang nung milak jangrur.

22Pa tashi pa tekong nung lir;

Aser pa tsüngdang tetsübu tsüngsanger.

23Pa shi tetsütem ka küma metentepa lir;

Itemji akang akanga aser meraksatsüsa lir.

24Pa mulungjang lung ama temerang;

Hau, lungzük ama temerang.

25Pa aramesodang tashikartem tsübur;

Tatenten agi parnok mangmanger.

26Nok agi pa dak lepoka mair;

Mesüra nü agia, lijakjang agia, aser merang taju agia kecha masür.

27Pai merangji monü ama,

aser yongmenyinji süng tap ama züngshir.

28Lijakjang agi pa maridokteter;

Lungtema süngjok ama akümer.

29Süngten agi merepbaji modong ama züngshir;

Aser nü tsükdaktsüdang menütsür.

30Pa tepoklen porep techira ama lir;

Lishi nung pa mejangdakji

motsüngnem yanglu ama taren taren lir.

31Tarokdakji pai po ka ama jaa atudaktsür;

Pai tzüyimji totzü ama kümdaktsür.

32Tarokdakjia mesüngdaktsü amato,

pa sülen pai lenmangji sentsüpranga adokdaktsür.

33Alima nung kecha metsübuba;

Pa ama shiruru kecha yanglua mali.

34Pai temabatem dak metsübui rangloker;

Asükümba chir ajak madak pa chuba lir.

YOB 42

Yob Ajemaluba

1Idangji Yobi Kibuba dang langzü;

2Nai ajak inyaktet ta;

Aser ne tebilemba kecha sota meyutet ta ni metet.

3  Shisatsü makaba o agi Tsüngrem tebilemba miimbangba ya shiba?

Anungji ni mangateti jembiogo aser ni memeteti tesüngmangtsü indang jembiogo.

4  Yimlibilema angang, aser ni jembidi;

Ni asüngdangdi, nai kü dang sayuang.

5Kü narong agi dang ni ne indang angashi;

Saka tangbo kü tenük agi na angur.

6Aji asünung, ni kü sasa ni aitsür;

Aser auyi aser aut manung mena ni temulung meyiper.

Yob Tembartem Ajemaluba

7Yamai adok, Kibubai Yob dang jembizüker külen, Kibubai Teman nungba Elifaz dang ashi, “Na anema, aser ne temba ana anema, ni ain adoker, kechiaser Yobi jembiba ama kü indang kechi tim aji nenoki mejembi. 8Aser tang, nashi pungchi tenet aser nabong tepung tenet bener kü kilir Yob dangi oang, aser nenok asoshi tarongba tenla tenla-ang, aser kü kilir Yobi nenok asoshi sarasademdakjang; kechiaser ni nenok den maochi-i mebenshitsüsa ni pa sarasadem agizüktsü; kechiaser kü kilir Yob ama, kü indang kechi tim aji nenoki mejembir.” 9Teman nungba Elifaz, aser Shuhai nungba Bildad, aser Namat nungba Zofar oa Kibubai ashiba ama inyak aser Kibubai Yob sarasadem agizük.

Yob Tesü Tia Anasübu Agi Tajungba Akümba

10Yobi tembar asoshi sarasademtsür külen, Kibubai Yob tia melenshitsü; aser Kibubai Yob mezüng akaba ajak anasü agi tali agütsü. 11Aser par adianu ajak aser pa aianu ajak aser mezüng pa shiteter ajak aru aser par kidang pa den chiyung; aser parnoki pa den tejashi lemsatep aser Kibubai pa dak tamajung tongdaktsüba ajak asoshi süneptsü; aser parnok nisung shiai sen terara aser hon angoti kaka agütsü. 12Aser Kibubai Yob taküm mezüng dang nungi tesü tali moatsü; aser yamaji san meyi terpezü, ut meyi trok, alu alaba nashi pungchi jura meyi ka, aser gado tsüla meyi ka ta pa meyong aküm. 13Par jabaso tenet aser jala asem liasü. 14Aser pai tantsüla tenüng Yemima aja, tanabula Kezia aja, aser tasembula Keren-happuk ta aja. 15Aser Yober jala ama alima nung tobur tajung tetsür shinga mali asü; aser parnok tebui par tedi nunger den senmang agütsü. 16Yaser Yob küm noklang ka ser lir taküm ali, aser putu pezü tashi par chir aser semchir angu. 17Aser Yob anogo tabensa nung tambur kümer asü.