YIHUSUA

YIHUSUA

OKILA

Mosa melen Yihusua tanishir kümer külen, Israel nungertemi Kanan lima amakba indang Yihusua kaket nung angutsü. Tongtibang tatalokbatem rongnung: Yordan ayong ajangba Yeriko jara laoba, Ai anema raraba aser Tsüngremi pei nüburtem den tezüngzüktepba akangshiba ya lir. Iba kaket ajonga tongtibang Lai tekong kaji: "Nenoki shiba tenzüktsü tanüsa shimtetang…saka ni aser ozü kibongbo onoki KIBUBA tenzüktsü" (24:15).

Keta Alibatem

Kanan Amakba 1:1-12:24

Alinük Lemsaba 13:1-21.45

(a) Yordan Anüdoklen Linük 13:1-33

(b) Yordan Anüolen Linük 14:1-19.51

(c) Jenokdak Yimtitem 20:1-9

(d) Levi Nunger Yimtitem 21:1-45

Anüdoklen Kintem Pei Litsüi Meyipa Aruba 22:1-34

Yihusua Tepila O 23:1-16

Shekem Nung Tezüngzükba Akangshiba 24:1-33

        Keta Alibatem

Kanan Amakba YIHUSUA 1:1-12-24

Kanan Amaktsü Tsϋngremi Yihusua Dang Melaba YIHUSUA 1:1-9

Yihusuai Nϋburtem Nem Ozϋng Agϋtsϋba YIHUSUA 1:10-18

Yihusuai Yeriko Ladangi Yokba YIHUSUA 2:1-7

Rahab o Itdangiter na Tsϋngda Tenangzϋktepba YIHUSUA 2:8-21

Itdangitertem Meyipa Aruba YIHUSUA 2:22-3:17

Nϋngshi Long Terana YIHUSUA 4:1-18

Gilgal Atongba YIHUSUA 4:19-5:1

Gilgal Nung Majeptokba YIHUSUA 5:2-12

Yihusua Aser Noklangnok Amba Nisung YIHUSUA 5:13-15

Yeriko Laoba YIHUSUA 6:1-27

Akan Temenen YIHUSUA 7:1-26

Ai Yimti Amakba YIHUSUA 8:1-29

Ebal Tenem Nung Ozϋng Azϋngba YIHUSUA 8:30-35

Gibeon Nungeri Yihusua Ashioktsϋba YIHUSUA 9:1-27

Amor Nunger Akokba YIHUSUA 10:1-15

Yihusua Amor Nunger Chuba Pungu Apuba YIHUSUA 10:16-27

Yihusuai Amor Nunger Yimti Amakba YIHUSUA 10:28-43

Yihusuai Yabin Aser Pa Telok Akokba YIHUSUA 11:1-15

Yihusuai Agiba Linϋktem YIHUSUA 11:16-23

Mosai Akokba Chubatem YIHUSUA 12:1-6

Yihusuai Akokba Chubatem YIHUSUA 12:7-24

Alinük Lemsaba YIHUSUA 13:1-21:45

(a)    Yordan Anüdoklen Linük YIHUSUA 13:1-33

Ano Tagitsϋ Aliba Linϋktem YIHUSUA 13:1-14

Reuben Kin Nem Lemzϋktsϋba Linϋk YIHUSUA 13:15-23

Gad Nem Lemzϋktsϋba Linϋk YIHUSUA 13:24-28

Manase Nem Lemzϋktsϋba Linϋk YIHUSUA 13:29-33

(b)   Yordan Anüolen Linük YIHUSUA 14:1-19:51

Yordan Anϋolen Linϋk Yihusuai Lemsaba YIHUSUA 14:1-5

Kaleb Nem Hebron Agϋtsϋba YIHUSUA 14:6-15

Yihuda Nem Lemzϋktsϋba Linϋk YIHUSUA 15:1-12

Kalebi Hebron Aser Debir Akokba (Obe.1:11-15) YIHUSUA 15:13-19

Yihuda Nem Agϋtsϋba Yimtitem YIHUSUA 15:20-63

Efraim Aser Manase Nem Lemzϋktsϋba Linϋktem YIHUSUA 16:1-4

Efraim Nem Lemzϋktsϋba Linϋktem YIHUSUA 16:5-10

Manase Nem Lemzϋktsϋba Linϋktem YIHUSUA 17:1-13

Efraim Aser Anϋolen Alir Manase Kidongi Alinϋk Tali Meshiba YIHUSUA 17:14-18

Tanϋngba Linϋk Lemsaba YIHUSUA 18:1-10

Benjamin Nem Lemzϋktsϋba Alinϋk YIHUSUA 19:1-11

Zebulun Nem Lemzϋktsϋba Alinϋk YIHUSUA 19:10-16

Issakar Nem Lemzktsϋba Alinϋk YIHUSUA 19:17-23

Asher Nem Lemzϋktsϋba Alinϋk YIHUSUA 19:24-31

Naftali Nem Lemzϋktsϋba Alinϋk YIHUSUA 19:32-39

Dan Nem Lenzϋktsϋba Alinϋk YIHUSUA 19:40-48

Israel Nϋburtemi Yihusua Nem Agϋtsϋba Alinϋk YIUSUA 19:49-51

(c)    Jenokdak Yimtitem YIHUSUA 20:1-9

Jenokdak Yimtitem YIHUSUA 20:1-9

(d)   Levi Nunger Yimtitem YIHUSUA 21:1-45

Levi Nem Agϋtsϋba Yimtitem YIHUSUA 21:1-42

Israel Nϋburtem Alinϋkji Senmang Amangba YIHUSUA 21:43-45

Anüdoklen Kintem Pei Litsüi Meyipa Aruba YIHUSUA 22:1-34

Anϋdok Nisungtem Yihusuai Meyipa Yokba YIHUSUA 22:1-34

Yihusua Tepila O YIHUSUA 23:1-16

Yihusuai Tatembang O Jembiba YIHUSUA 23:1-16

Shekem Nung Tezüngzükba Akangshiba YIHUSUA 24:1-33

Yihusuai Nϋburtem Den Shekem Nung Jembiba YIHUSUA 24:1-28

Yihusua Asϋba YIHUSUA 24:29-33

YIHUSUA 1

Kanan Amaktsü Tsüngremi Yihusua Dang Melaba

1 Kibuba tenzüker Mosa sür külen Mosa yarir Nun jabaso Yihusua dang Kibubai ashi, 2“Kü tenzüker Mosa süogo, anungji tang aramesoang, ni Israel nübur nem agütsüba lima jagi na aser iba nübur ajak Yordan ajanga oang. 3 Ni Mosa dang nangzükba ama ne tetsüng ajemoklen ajakji nenok nem agütsüogo. 4Lisem lima aser iba Lebanon nungi ayong tulu, Eufrata ayong tashi, Het nunger lima ajak aser anüolen tzüyim tulu tashi ne arrtsü alitsü. 5 Ne arishi tepiyong na anema noktaktsü akokba nisung kata malitsü; ni Mosa den atenba ama ne den atentsü, ni na tamakok maludaktsütsü mesüra na sentoka meyutsütsü.

6  “Tashi itang aser tasü itang, kechiaser ni par tsürabur nem agütsütsü asoshi koba nangzük, iba lima nai iba nübur nem senmang amangdaktsütsü. 7Kü tenzüker Mosai ne dang melaba ozüng ajak benshia inyaktsüsa tashi aser tasü dang kanga itang. Na kongisa odir oaka takok angutsüsa iba ozüng nungi tajichileni mesüra tabeleni temeyip, 8Iba ozüng kaket ya ne bang nungi mepilatsü, saka idakji zülua aliba ajak timi benshitettsüsa nai ammang sangwa aben aji shisadangtsü; aji agi nai ne taküm lenmang azükarutsü aser nai takok tajung angutsü. 9Ni ne dang memela ama? Tashi itang aser tasü itang; tsübua teli mesüra temulung ajema teküm, kechiyong na kongisa odir oaka Kibuba ne Tsüngrem ne den lir.”

Yihusuai Nüburtem Nem Ozüng Agütsüba

10Idangji Yihusuai nübur tanishirtem dang mela-a ashi, 11“Tanendak sema oa nüburtem dang ozüng agüja shiang, ‘Nenok sasa apok-atsü renemang, kechiaser Kibuba nenok Tsüngremi nenok nem agütsüba limaji agitsü asemnü tsüngda nung nenoki Yordan ajanga aotsüla.’ ” 12Aser Reuben Gad aser Manase kidong tesadang dang Yihusuai ashi, 13“Kibuba tenzüker Mosai nenok dang melaba bilemtetang, Kibuba ne Tsüngremi nenok nem anisüngzük agütsür, aser iba linük nenok nem agütsüogo. 14Yordan külenji Mosai nenok nem agütsüba lima nungji nenok kinungtsür, nenok tila tanurtem, aser nenok kiset shiruru alitsü; 15Saka Kibubai nenok nem agütsüba ama nenok adianu nem anisüngzük magütsü tashi, aser Kibuba nenok Tsüngremi parnok nem agütsüba limaji parnoki magi tashi tasü tait temeranger ajak nenok adianu jakdang nok o nü bener aotsü, aser parnok yaritsü; idangjiang Kibuba tenzüker Mosai Yordan ajanger anüdoklen aliba nenok nem agütsüba linük jagi meyiptsü aser aji agitsü.” 16Idangji parnoki Yihusua dang langzü, “Nai onok dang melaba ajak onoki inyaktsü aser nai onok kongisa yokdir onoki aotsü. 17Onoki Mosa dang ajak angaba ama ne dang onoki angatsü; Mosa den atenba ama ne den dang Kibuba ne Tsüngrem dena liang. 18Aser shibaisa ne ozüng anema apusodir aser nai melaba ajak nung o mangalir pa südaktsütsü; tashi aser tasü dang ita liang.”

YIHUSUA 2

Yihusuai Yeriko Ladangi Yokba

1  Nun jabaso Yihusuai nisung ana itdangiter ama miima Shittim nungi yoka ashi, “Oang alinükji talisa Yeriko ajiokang.” Anungji tena oa nüktapangtatsür ka tenüng agi Rahab kidangi ia idakji anen. 2Aser Yeriko chubai par linük ladangtsü asoshi Israel chirtem kar paonungji arua lir ta angazük. 3Anungji Yeriko chubai Rahab dangi osang benertem yoka ashi, “Ne dangi arua ner kidangi aitba nisungtemji anir arung, kechiaser alinük ajakji ladangtsü asoshi parnok arua lir.”

4Saka tetsür jagi tenaji anioker miima ayu, aser lai langzü, “Hau nisungtemji kü dangi aru, saka parnok kong nungi aru ni memetet, 5aser aonung yimti süngkhüm shibangba mapang nisungtemji oadok; parnok koleni ao ni memetet, yakta parnok aria oang, kechiaser nenoki parnokji meneptsü.” 6Saka lai tenaji kilemi anir tua lai tatongi shia kilem nung ayuba kümbok tepong nung tenaji miim. 7Anungji nisungtemi tenaji Yordan ayong tzütendak tashi aria ao, aser aria aortemji oli dang süngkhümji shibangadok.

Rahab Aser Itdangiter na Tsüngda Tenangzüktepba

8Aser parnok ano memejangi alidang, lai parnok dangi kilem jagi atu; 9aser lai nisungtem dang ashi, “Kibubai nenok nem alinükji agütsü aser nenok tsübuba onok dak alu, aser iba lima nung alir ajak nenok madang yimsa-a aor ta ni metet. 10 Kechiyong nenok Ijip nungi adokdang Kibubai Temerem Tzüyim nenok tsüngdang koda konga yok; aser Yordan ajanga or aliba Amor nunger chuba ana Sihon aser Og, shirnok nenoki meshimeshia samatsü, item dang nenoki kechi inyak onoki angashi. 11Aser onoki ya angashidang, nenok tsübuba agi onok mulungjang yimsa; joko onok shinga daka tasü aitba tanela anünga mali; kechiyong Kibuba nenok Tsüngremji temalen anüng aser teküboklen alima aliba Tsüngrem lir. 12Anungji tang ni nenok dang meima benshiba amaji nenoki kübu kidong dang temeim agi benshitsü, aser kü nem ochi temaitsü ka agütsütsü Kibuba agi kü dang azüngashiang ta ni nenok dang mepishir. 13Aser nenoki kübu, aser kütsü, aser kü adianu, aser kü aianu taküm, aser parnok akaba ajak, onok taküm tasü nungi kümzükangma.”

14Aser nisungtem jagi la dang ashi, “Onok taküm na asoshi sang; oda onoki inyakba mapa ya nai mejembira, kodang Kibubai onok nem alinükji agütsüdir, onoki ne dak temeim aser ochi agi benshitsü.”

15Idangji lai parnokji kichiba ajanga lisü agi ludaktsü, kechiyong lar kiji yimti jara tsüki temalen liasü aser la jara temalen ali. 16Aser lai parnok dang ashi, “Tenem jagi tuang, mesüra nenok arirtemi nenok arizüktsü aser nenok arirji meyipa mao tashi idakji asemnü atsüka liang; ajiser külen nenoki pei lenmangi aotsü akok.” 17Aser nisungtemi la dang ashi, “Onoki azüngashidaktsüba ne tenangzükba indang onok kecha tai malitsü. 18Ajiang, onoki linükji agitsü arudang iba lisü temerem, koba agi nai onok odaktsü ya kichiba nungji alentsüla, aser nebu, netsü, ne adianu aser nebu kinunger ajak ne kidangi jatenang. 19Aser ya ataloktsü, shirnoki ne ki kishi nungi adoka yimtong jagi odir, pa züji pa kolak manung alitsü, aser ya indang onok tai malitsü; aser shibai ne kidang alir kar dak teka sangdir, pa züji onok kolak manung alitsü. 20Saka onok mapa indang nai tebang jushira, idangji nai onok dang azüngashia nangzükba indang onok tai malitsü.” 21Aser lai ashi, “Nenok o amaji lidakjang.” Aser lai parnok yok aser parnoki apusoa ao aser lai temerem lisüji kichiba nungji alenoka ayu.

Itdangitertem Meyipa Aruba

22Aser parnok apusoa tenemlen jagi aru, aser parnok arishirtemji meyipa mao tashi anogo asemnü yangji ali. Tang parnok arishirtem jagi lenmang ajak nung parnokji bushi saka parnokji mangu. 23Idangji nisung anaji meyipa aru, aser tenem nungi alu, aser aji ajanga süia Nun jabaso Yihusua dangi aru; aser parnok dak kechi atalok ajak pa dang ashi. 24Aser parnoki Yihusua dang ashi, “Shitakba Kibubai linük ajakji asenok ket nung bendanga agütsüogo; ano iba dak alaka linük nung alir ajak asenok madang yimsa-a aor.”

YIHUSUA 3

1Yihusua anepdang yakta sak, pa aser Israel nüburtem Shittim nungi apusoa Yordani aru, aser ayongji ajanga maodang parnoki idakji anen. 2Asemnü lir külen tanishirtemji tanendak ajanga süi 3aser nüburtem dang ozüng agüja ashi, “Kodang Kibuba nenok Tsüngrem ozüng süngdenji Levi putirtemi bener oya ngudir, idangji nenoki pei alidak nungi aenshia iba sülenji aotsüla. 4Saka nenok o iba na tsüngda nungji süklep meyi ana shi alitsüla. Nenok koba lenmangi aotsü tim aji metettsüsa ibaji anasa nenoki maotsüla, kechiaser nenok iba lenmangi ano mesüidang.”

5Idangji Yihusuai nüburtem dang ashi, “Nenok meshiteta liang kechiaser asüng Kibubai nenok rongnung tesüngmangtsü mapa inyaktsü.” 6Aser Yihusuai putirtem dang ashi, “Ozüng süngdenji bener nüburtem jakdang süiang.” Anungji parnoki ozüng süngdenji bener nüburtem jakdangji ao.

7Tang Kibubai Yihusua dang ashi, “Tanü Israel ajaki ngua ni na uludaktsütsü tenzüker, oda Mosa den ni dena aliba ama ni ne den atenba parnoki metettsü. 8Ozüng Süngden abener putirtem dang shiang, ‘kodang nenok Yordan ayongkhümi arudir, nenoki Yordan nungji marakzüi noktakang.’ ”

9Aser idangji Yihusuai Israel purtem dang ashi, “Yagi arung aser Kibuba nenok Tsüngrem otem angang. 10Yagi teti tatem makaba Tsüngrem nenok rongnung lir ta nenoki metettsü aser Kanan nunger, Het nunger, Hiv nunger, Periz nunger, Girgas nunger, Amor nunger aser Yebus nunger ajakji pai nenok nungi atangji aridoktsü. 11Ajiang, alima ajak madak Kibuba tezüngzüktepba Ozüng Süngden nenok den Yordan ajanga aor. 12Anungji Israel kin nungi nisung terana, kin shia nungi nisung ka ka shimtetang. 13Aser ya ataloktsü, alima ajak madak Kibuba Tsüngrem, Kibuba tezüngzüktepba Ozüng Süngden apur putirtem jagi kodang Yordan tzü nung tetsüng ajemokdir temalen nungi yima aluba Yordan tzüji sadangtsü aser telong ka dang küma atatsü.”

14Israel nüburtemi Yordan ajangtsü pei tanendak nungi aenshi, aser Ozüng Süngden apuba putirtemji parnok jakdang ao. 15Tang Yordan ayongji aluruwa mapang, ajak nung tzü metsünga liasü, aji saka Ozüng Süngden apuba putirtem tetsüng kodang Yordan tzü nung ajemok, 16temalen nungi yima aluba tzüji anenadok, aser Zaretan anasa Adam yimti nungi talangka or aji telong ka dang küma atsüngten; aser Araba tzüyim nungi Metsü Tzüyim dena kongadok. Anungji nüburi Yeriko tsütsü leni ajanga ao. 17Aser Israel kin ajonga meshimeshia ali takong manung ajanga mesüitem tashi Kibuba tezüngzüktepba Ozüng Süngden apur putirtemi Yordan tiyong ali takong manung akang akanga noktak.

YIHUSUA 4

Nüngshi Lung Terana

1Kodang kin ajongai Yordanji meshi meshia ajang, Kibubai Yihusua dang ashi, 2“Nüburtem rongnungi nisung terana, kidong shia nungi ka ka shimtetang, 3aser parnoki Yordan tiyong kong putirtem tetsüng akang akanga noktak, idak nungjagi lung terana agiteta taonung nenok tanendaki bener oang ta shiang.”

4Anungji Yihusuai Israel nüburtem nungi shimtetba kidong shia nungi nisung ka ka aja, 5aser parnok dang ashi, “Kibuba nenok Tsüngrem Ozüng Süngdenji ajanga Yordan jagi iang. Nenok nisung shiai pei kin züngsem apir lung ka ka pei tapubang nung benang, 6ibai nenok atema temaitsü ka alitsü, aser tesülen nenok chirnuri ibai kechi tetezü? ta asüngdangra, 7nenoki parnok dang ashitsü, ‘Kechiaser Yordan ayongji Kibuba Ozüng Süngden tsüngdang sadang; kodang yagi Yordan ajanga süi Yordan tzütemji sadangadok.’ Anungji item lung ya tarutsü nung Israel chirtem asoshi tatem makai nüngshi ama alitsü.”

8Israel chirtemi Yihusuai melaba amaji inyak; Kibubai Yihusua dang ashiba ama, Israel chirtem kin apir parnoki Yordan tiyong nungi lung terana agitet aser parnok den itemji tanendak bener oa ayu. 9Aser kong tezüngzüktepba Ozüng Süngden apur putirtem noktak, yangji Yihusuai lung teranaji azünga ayu, aser itemji tang tashi idakji lir. 10Kechiaser Mosai Yihusua dang melaba ama Kibubai Yihusua dang nübur dang ashitsü melaba merenem tashi Ozüng Süngden apur putirtemji Yordan tiyong nung noktaka ata; aser nüburtemi ilunga ajanga ao.

11Kodang nisung ajaki ajanga ao, Kibuba Ozüng Süngden aser putirtemji nübur madang atena aru. 12Aser Mosai parnok dang ashiba ama Reuben chirtem, Gad chirtem, aser Manase kidong tesadang nok o nü bener Israel chirtem jakdangji ao; 13raratsü renemba nübur meyi lir shi Kibuba madangji süia tongbangi Yeriko lenteni ao. 14Panüji Kibubai Yihusua Israel nunger nükdang uludaktsü aser parnoki Mosa tsübuba ama pa taküm tepiyong parnoki pa tsübu.

15Idangji Kibubai Yihusua dang ashi, 16“Ozüng Süngden abenba putirtemji Yordan nungi adoktsü melaang.” 17Anungji Yihusuai putirtem dang ashi, “Yordan nungi adokang.” 18Aser kodang Kibuba tezüngzüktepba Ozüng Süngden apur putirtem Yordan tiyong nungi adok, aser putirtem tetsüng ali takong nungji ayaket, Yordan tzüji parnok pei alidaki meyip, aser mezüng ama tzüküm ajakji moshia ayim.

Gilgal Atongba

19Aser mezüngbuba ita, anogo ternübuba nung nüburtemji Yordan nungi apusoa Yeriko anüdoklen tsütsü Gilgali arua anen. 20Yordan nungi agitetba lung teranaji Yihusuai Gilgal nung azünga ayu. 21Aser pai Israel nüburtem dang ashi, “Tarutsü nung nenok semchisemnuri item lung tetezü kechi? ta par tsüraburtem dang asüngdangra, 22Israel ali takong manung iba Yordan ayong ajanga aru ta parnok dang shiang. 23Kibuba nenok Tsüngremi Temerem Tzüyim dang inyakba ama, asenok ajanga motem tashi asenok jakdang aji kongdaktsü, yamaji Kibuba nenok Tsüngremi nenok ajanga motem tashi Yordan tzüji nenok jakdang kongdaktsü. 24Kechiaser alima nung alir nisung ajaki Kibuba tekaji tashi tulu ta metettsüsa aser nenok Kibuba nenok Tsüngrem dang tatem makai tsübutsüsa pai aji inyaker.”

YIHUSUA 5

1Kodang Yordan atener anüolen aliba Amor nunger chubatem aser tzüküm nung aliba Kanan nunger chubatemi; Kibubai Israel nüburtem jakdang parnok ajanga motem tashi Yordan ayong kongdaktsüba indang angashi, parnok mulung yimsa, aser Israel nunger tsübuba agi parnok dak tanela meli-i aküm.

Gilgal Nung Mejeptokba

2Iba mapang nung Kibubai Yihusua dang ashi, “Nai kotari techira yangluang aser Israel chirtemji tanaben mejepang.” 3Aser Yihusuai kotari techira yanglu aser Israel chirtemji Gibeat-ara-lot tenem nung mejeptoktsü. 4Aser Yihusuai kechiba mejeptoktsü iba kuliji ya: Ijip lima nungi aruba nübur rongnung, tebur ajak, oda Ijip lima nungi adoker külen arem nung lendang raraba nisung ajak süadok. 5Kechiaser Ijip nungi adokba nisung ajak mejeper liasü; saka parnok adoker lisem lima nung asoba ajak memejeptoki liasü. 6 Kechiaser Israel nüburtem lisem lima nung küm lir, oda Ijip nungi adokba raraba nisungtem mesama tashi senzü; kechiaser parnoki Kibuba dang tashi manga. Aser Kibubai parnok tsüraburtem dang ninang mojitzü aser mamatzü yima aliba lima agütsütsü ta nangzükba limaji parnok nem mungudaktsütsü ta azüngashi. 7Anungji parnok chirtem shirnoki parnok melen, itemji Yihusuai mejep, kechiaser parnokji lendang memejepi liasü.

8Kodang kin ajonga mejep parnok maneb tashi tanendak pei kidang ali. 9Aser Kibubai Yihusua dang ashi, “Tanü ni ne dak nungi Ijip lima alar tia maaksü endoktsüogo.” Anungji iba linük dangji tanü tashi Gilgal ta ajar.

10  Israel nüburtemi Yeriko lenten Gilgal nung iba ita anogo terpezünübuba nikongdang süia aoba benjong amung. 11Aser süia aoba benjongji munger, tasüngji iba lima adokba piyazü meinokba amtsük aser kongnüng achi. 12 Aser parnoki iba lima nungi adokbatemji chir külen, tasüng nungjagi manaji joko mangu, anungji Israel nüburtemi Kanan lima nungi adokba chiyungtsütem paküm nungjagi achi.

Yihusua Aser Noklangnok Amba Nisung

13Kodang Yihusua Yeriko anasai aru, pai pei tenük lapok aser rokasoa reprang aser ajiang, idakji nisung ka pa teka nung nok amer pa anema noktak aser Yihusuai pa dangi oa ashi, “Na onok asoshi asü mesüra onok anemer asoshi?” 14Aser pai ashi, “Masü, saka Temeranger Kibubar walunir ama ni arur;” aser Yihusuai pa tejak ali nung apudaka külem, aser pa dang ashi, “Kü kiburi pa tenzüker dang kechi ashitsü aka?” 15Aser Kibuba temeranger walunir jagi Yihusua dang ashi, “Ne tetsüng nungi ne tsüngsem semzükang, kechiaser na noktakdak aliji temeshi lir.” Aser Yihusuai yamaji inyak.

YIHUSUA 6

Yeriko Laoba

1Tang Israel nüburtem tsübuba agi Yeriko yimtiji akang akanga shibanga liasü; shinga metugu mesüra shinga mait. 2Idangji Kibubai Yihusua dang ashi, “Ajiang, Yeriko aser idakji aliba chuba aser tasü tait aser tesashi nisungtemji ni ne ket nung agütsür. 3Na aser raraba nisung ajaki yimtiji meketa khen aotsü. Yamajisa nenoki anogo troknü inyaktsü. 4Aser putir teneti san tezü agi yangluba jangzü tenet, Ozüng Süngden jakdang abentsü, aser tenetnübuba nung nenoki yimtiji tenetben mekettsü aser putirtemi jangzüji aputsü. 5Kodang parnoki jangzüji tashi agi apudir, aser kodang nenoki jangzü olaji angashidir, idangji nisung ajaki ola tulu agi ayimtentsü; aser yimti jaraji remdaka laotsü, aser nisung shia pei jakdangi indang indanga aotsü.”

6Anungji Nun jabaso Yihusuai putirtemji aja aser parnok dang ashi, “Ozüng Süngdenji benang aser Kibuba Ozüng Süngden jakdangji putir tenet nem san zü jangzü tenet bendakjang.” 7Idangji pai nüburtem dang ashi, “Tejakleni oang aser yimtiji meketang, aser raraba nisungtemji Kibuba Ozüng Süngden jakdangji odakjang.”

8Aser kodang Yihusuai nübur dang jembi, putir tenet jagi san tezü tenetji bener Kibuba jakdangji süi aser jangzüji apu, aser Kibuba tezüngzüktepba Ozüng Süngden parnok den anitak. 9Aser nok o nü abener nisungtemji jangzü apur putir jakdangji ao, aser tesübuba telokji Ozüng Süngden sülenji anitak aser parnok aodang putirtemi jangzü apuyonga ao. 10Aser Yihusuai nübur dang ozüng agüja ashi, “Nenok dang ayimtenang ta melaba anogo matong tashi nenoki mayimtentsü, mesüra nenoki olaji tangashidaktsü, mesüra o kata nenok bang nungi tadokdaktsü.” 11Aji oda Kibuba Ozüng Süngden nem yimtiji khen meketa pai odaktsü, aser parnoki tanendak jagi ao aser yangji anenzük.

12Aser Yihusuai anepdang yakta sak aser putirtemi Kibuba Ozüng Süngdenji aben. 13Aser sanzü jangzü tenet amba putir tenetji Kibuba Ozüng Süngden tsüngdangji maneni ao aser jangzüji apu; aser nok o nü abenba nisungtemji parnok jakdang ao, aser tatembuba telokji Kibuba Ozüng Süngden sülen aru. Parnok toudak nung putirtemi jangzü apuyonga ao. 14Aser tanünü parnoki yimtiji khen meket, aser tanendaki meyipa aru. Yamaji troknü tashi parnoki inyak.

15Tenetnübuba nung parnoki anepdang züngia sak aser akhi ama yimtiji meket. Panüji dang parnoki yimtiji tenetben meket. 16Kodang parnoki yimtiji tenetben meket, putirtemi jangzüji aputsü renem. Idangji Yihusuai nüburtem dang ashi, “Ayimtenang, kechiaser Kibubai asenok nem yimtiji agütsüogo. 17Yimti aser idakji aliba ajakji Kibuba dang tenla ka ama raksatsütsüla, saka nüktapangtatsür Rahab aser lar kidang alibatem dang kümzüktsü, kechiaser asenoki yokba itdangitertem lai miima ayu. 18Saka teraksatsü bendanga agütsüba osettem nungi nenok sasa pila-a liang, aji oda mesüra nenoki itemji kar danga agira, nenoki Israel tanendak timtem aser teraksa bener arutsü. 19Taribi, hon, yongmenyin aser merang oset ajakji Kibuba tsüngdang temeshi lir. Itemji Kibuba terizüngdaki bener arutsüla.”

20  Anungji putirtemi jangzüji apu aser nüburi aji angashili tashi agi ayimten, aser jaraji remdaka lao. Idangji nisung ajak pei jakdangi indang indanga yimti jagi ai aser parnoki yimtiji agi. 21Aser parnoki yimti nung aliba ajak oda tebur aser tetsür, tanur-tain, nashi, san aser gado item ajak nok agi samatsü.

22Yihusuai alinük itdangsang nisung anadangji ashi, “Jabujaritsürla kidang jagi iang aser nenoki la dang azüngashiba ama tetsürji aser la akaba ajak idak nungjagi bener arung.” 23Aser itdangiter asangurtemji ai, aser Rahab aser la tebu aser tetsü, la adianutem, aser la akaba ajak anir adok; tenati lar kinunger ajak dena anir adok, aser Israel nunger tanendak tezülenji parnok toktsü. 24Aser parnoki yimti aser idakji aliba ajak mi agi rongdoktsü aser hon aser taribi aser yongmenyin aser merang agi yangluba osettem parnoki Kibuba terizüngdak kidang ayu. 25 Saka jabujaritsürla Rahab, aser tebuer kinunger aser la akaba Yihusuai taküm kümzük, aser la Israel nunger rongnung tanü tashi lir, kechiaser lai Yihusuai Yeriko ladangtsü yokba osang benertem miima ayu.

26  Iba mapang nung Yihusuai parnok dang azüngashia ashi,

“Shibai iba Yeriko yimti yanglushitsü merangdir,

Kibuba atakatem pa dak kaoang.

Shibai yimti kimungji tenzükdir,

pei jabaso tambusang samatsü,

shibai süngkhümji yangludir,

pei jabaso tambusang samatsü.”

27Yamaji Yihusua den Kibuba liasü, aser pa nüngsang linük ajak nung liasü.

YIHUSUA 7

Akan Temenen

1Saka Israel chirtemi bendanga agütsüba oset tsütsülen tamangji raksa kechiyong Yihuda kin Zera chir Zabdier jabaso Karmi chir Akani bendanga agütsüba osetji aben, anungji Israel chirtem anema Kibuba ain adok.

2Aser Yihusua Yeriko nungi Beth-aven anasa Bethel anüdoklen aliba Ai-i nisung yok, aser parnok dang ashi, “Tuang aser alinükji ladangang.” Aser nisungtemi atu aser Ai ladang. 3Aser parnoki Yihusua dangi meyipa arua pa dang ashi, “Nisung ajakbo tetudaktsüi, nisung meyi ana mesüra asem dang tudakjang, aser Aiji makang; nisung ajak oagi belemtsü tesayang, kechiyong parnok ishikadang lir.” 4Anungji ilenji nisung meyi asem shi atu: aser parnoki Ai nunger tsüngdang jena ao. 5Aser Ai nungeri yimti süngkhümbong nungi Sheberim tonga aria lua parnoki Israel nunger semer trok shi tepset, aser nüburtem tasü pelepadok aser parnok temulung yimsa.

6Idangji Yihusuai pei süoshi shisa aser Kibuba Ozüng Süngden madang ali nungji pa tejak chioker, pa aser Israel nunger tamburtemi nikongdang tashi apudak, aser parnoki pei tekolak nung auyi palok. 7Aser Yihusuai ashi, “Aia! Oh Kibuba Tsüngrem, onok Amor nunger ket nung bendanga agüja onok samatsü atema nai kechiba iba nübur Yordan ajanga anir aru? Onok Yordan külenji oa alitsü temulung süa ali tajungba süla! 8Oh Kibuba, Israel nungeri joko pei tsükchir nungi jena arur; ni kechi shila! 9Kechiaser Kanan nunger aser linük nung alir ajaki ibai angashitsü aser onok meketbangtsü aser onok tenüng alima nungi leptoktsü; aser ne tamaren tenüng asoshi nai kechi inyaktsü?”

10 Kibubai Yihusua dang ashi, “Na sakang, kechisünung yamaji ne tejak alilen mechioker alir? 11Israeli tai menaogo; hau, ni parnok dang melaba kü tezüngzüktepba parnoki raksaogo; ano parnoki bendanga agütsüba oseta benogo, parnoki auyaogo, aser parnoki miimbang aser parnoki ibaji pei oset rongnung yuogo. 12Anungji Israel chirtemi parnok tsükchir tsüngdang menoktakteti parnoki tsükchir dang nungi ajener, kechiaser parnok dak atakatem kao. Nenoki bendanga agütsüba osetji nenok nungi mesamara joko ni nenok den atentsü makok. 13Shishiang, nüburji meshitetjang, aser shiang, asüng asoshi nenok sasa meshitetang, kechiaser Israel Tsüngrem, Kibubai yamai ashir, ‘Nenok den bendanga agütsüba oset lir, Oh Israel nunger; nenoki bendanga agütsüba osetji, nenok rongnungi magien tashi, nenoki nenok tsükchir tsüngdang menoktaktettsü.’ 14Anungji anepdang nenok pei kidongtem anasa anir arutsü, aser Kibubai shimtetba kidongji anasa kibongtem arutsü, aser Kibuba shimtetba kibongji nisung kaka anasa arutsü. 15Aser shibai bendanga agütsüba osetji aben pa aser pa akaba ajak mi agi rongsettsü, kechiaser pai Kibuba tezüngzüktepba raksa aser Israel nunger dak tamashi benloktsü.”

16Anungji Yihusuai anepdang yakta sak, aser Israel nungerji kidong kidong anasai anir aru; aser Yihuda kidongji shimtet. 17Aser Yihuda kidongji pa anasa anir aru; aser Zehar kibong shim; aser Zehar kinunger nisung ka arudaktsü, aser Zabdi shimtet. 18Aser pai par kimang nisung ka ka anasa anir aru; aser Yihuda kidong Zera chir Zabdier jabaso Karmi chir Akan shimtet. 19Yihusuai Akan dang ashi, “Kü chir, Israel Tsüngrem Kibuba madang yangi ochi shiang aser nangzükang. Nai kechi inyak tang kü dang shiang, aji kü dang nungi temiim.”

20Akani Yihusua dang ashi, “Atangji Israel Tsüngrem Kibuba anema ni temenen menaogo, aser ni yamai inyak. 21Kodang temakzükba oset rongnung Shinar nunger tema sepoksü ka, taribi shekel noklang ana, aser hon lung ka toudangba nung shekel tenem ni angu; idangji itemji ni azüabung, aser itemji ni agi; aser ajiang, kü süki kübok taribiji telung sür ni itemji ali nung rema lir.”

22Anungji Yihusuai nisung kar yoka parnoki süki jagi asema oa taribiji telung sür pai süki nung miima alibaji angu. 23Aser parnoki aji süki nungjagi agiteta Yihusua aser Israel nübur ajak dangi bener aru, aser parnoki itemji Kibuba tsüngdang toktsü. 24Aser Yihusua aser pa den aliba Israel nunger ajaki Zera jabaso Akan aser taribi aser sepoksü aser hon lung aser par jabaso, aser jalatem, par nashi aser par gado, par san, par süki aser pa akaba ajak meshir, parnoki item ajak Akhor lenteni bener aru. 25Aser Yihusuai ashi, “Kechiba nai onok timtemdaktsü? Tang Kibubai na timtemdaktsütsü.” Aser Israel ajaki Akan lung agi onset, ano parnoki par kibong aser pa akaba ajak dak lung agi aon aser itemji mi nung arong. 26Aser parnoki pa manung lungnang tulu ka anang, aji tanü tashi lir; aser Kibubai pa tetsübutsü ain ait nungi meyip, iba yongji tanü tashi iba linük dang Akhor lenten ta ajar.

YIHUSUA 8

Ai Yimti Amakba

1Idangji Kibubai Yihusua dang ashi, “Tetsübu, mesüra temulung ajema teküm, raraba nisung ajak ne den anir apusoa Ai-i tuang ni Ai chuba aser par nübur, par yimti aser par linük ne ket nung agütsüogo. 2Nai Yeriko aser iba chuba dang benshiba ama Ai aser iba chuba danga inyaktsü; saka idakji aliba oset aser kiset shiruruji nenok temakzükba oset amato abentsü. Yimti tesülen nisung kar atsüka ata-ang.”

3Anungji Yihusua aser raraba nisung ajak Ai-i aotsü apuso, aser Yihusuai nokinketer nisung meyi semer shimteta parnokji aonung yok. 4Aser parnok dang mela-a ashi, “Ajiang, yimtiji anema nenoki arü amentsü, yimti tesülenji; yimti nungjagi talang ka tuo, saka nenok ajak renema liang. 5Ni aser kü den alir ajak yimti anasai arutsü, aser kodang parnok anasai arudir, mezüng amato onoki parnok tsüngdang ajentsü. 6Mezüng amato item Israel nungertemji asenok jakdang jena odagi ta parnoki bilemtsü, idangji parnoki onok aria arutsü, aser onoki parnokji yimti nungjagi piladaktsütsü. 7Aser nenoki arü amendak nungjagi adoktsü aser yimtiji agitsü; kechiyong Kibuba nenok Tsüngremi nenok ket nung aji bendanga agütsütsü. 8Aser kodang nenoki yimtiji atsüngtetdir, Kibubai nenok dang melaba ama nenoki yimti nungji mi asentsüla. Ajiang ni nenok dang melaogo.” 9Aser Yihusuai parnok yok aser parnoki arü amentsü ao aser Ai anüolen tsütsü Ai aser Bethel na tsüngda nung ali, saka paonungji Yihusua nübur rongnungji anen.

10Yihusuai anepdang yakta sak aser nüburtem ayongten, aser Israel tamburtem den Ai nunger jakdangi atu. 11Aser raraba nisungtem pa den alir ajak atu aser yimti anasa oa Ai anüdoklentip tsütsü anen, aser idakji parnok aser Ai Bethel na tsüngda ali lenten ka liasü. 12Aser pai nisung meyi pungu shi shimtet aser Ai aser Bethel na tsüngda, yimti anüolen tsütsü parnokji arü mena toktsü. 13Anungji raraba nisungtem telok tanendak anüdoklentip nungi anüolen tsütsü arü mena alirtem ajakji tongbang asoshi renema toktsü, aser Yihusuai paonungji lenten nungji amen. 14Kodang Ai chubai aji angu, anepdang yakta pa aser yimti nung alir ajak Araba jakdang Israel anema tongbangi ao. Saka yimti tesülen telok ka pa anema arü mena lir ta pai memetet. 15Yihusua aser Israel nunger ajaki makok amai parnok tsüngdang sayu, aser lisem lima len jagi ajen. 16Aser parnok aria aotsü yimti nung alir nisung ajak külemi ayongten, aser parnoki Yihusua aria ao aser parnok yimti nungjagi pila-a aru. 17Aser Israel nunger sülen maoba nisung kata Ai aser Bethel nung anünga mali asü, aser parnoki yimtiji menüki toktsür, Israel nungerji aria ao.

18Idangji Kibubai Yihusua dang ashi, “Ne ket nung aliba nüji Ai tsütsü ajungketang, kechiaser ni ibai ne ket nung agütsüogo.” Anungji Yihusuai pa ket nung aliba nüji yimti tsütsüji ajungket. 19Aser arü mena aliba telokji yakta parnok alidak nungi adok, aser pai tekaji songdokli-i parnokji asema ao, aser yimti jagi ia aji atsüngtet aser parnoki ilunga yimti nungji mi asen. 20Aser kodang Ai nisungtemi tesülenji reprang, yimti nungi adokba mokozüji anüng tonga tua parnoki angu; aser parnok ileni mesüra ilenji ajentsü lenmang maliasü, kechiaser lisem limai jena aortemi meyiper parnok aria ao. 21Kodang atsüka aliba teloki yimtiji agiba aser yimti nungi mokozü anüng tashi tua angu, idangyongji Yihusua aser Israel ajak tanaben meyip aser Ai nisungtemji tepset. 22Aser tangartemji yimti nung jagi parnok anema adok; parnok külen külen na Israel nunger yongtsü nung liasü, kar ileni aser kar ilenji; aser parnoki parnokji shinga metoktsüi aser mejendaktsüi tepset. 23Saka Ai chubaji parnoki taküm apu, aser Yihusua dangi anir aru.

24Kodang Israel nungeri lisem lima nung parnok aria arur Ai nunger ajak nok agi tepset, parnok Ai-i meyipa aru aser yangji alirtem nok agi samatsü. 25Panüji laoba nisung Ai nunger tetsür tebur ajak agi meyi terana liasü. 26Kechiaser Ai nung alir ajak mesamatsü tashi Yihusuai nü ajungketba teka memeyip. 27Kibubai Yihusua dang melaba o ama Israel nungeri yimti nung makzükba oset aser kiset shiruru dang terakzükba oset amato parnok asoshi bener ao. 28Anungji Yihusuai Ai rongtoktsü aser teti asoshi ibaji alinang ka dang kümdaktsü, tanü tashi ibaji tesama yimti ka dang lir. 29Anungji pai Ai chuba nikongdang tashi süngdong ka nung meta aser anü ludaka nung Yihusuai ozüng agütsü aser parnoki süngdong nungi pa temang agizük aser aji yimti kikümbang tayidak toktsü aser tanü tashi idakji lungnang tulu ka nanga lir.

Ebal Tenem Nung Ozüng Azüngba

30  Idangji Yihusuai Ebal tenem nung Israel nunger Tsüngrem Kibuba atema tenladak ka yanglu; 31Kibuba tenzüker Mosai Israel chirtem dang melaba ama aser Mosa ozüng kaket nung zülua aliba ama lung agi tenladak ya yanglu, koba manung nisung shingaia merang kata majungket, aser idakji parnoki Kibuba nem tarongba tenla aser yimjung tenla agütsü. 32Aser pai lung manungji pai züluba Mosa ozüng ajizüka, Israel nunger chirtem tsüngdang zülu. 33 Aser Israel nunger ajak, aser par tambur aser bangdakpur aser par o bendangertem Ozüng Süngden külen tsütsü noktak, aser tip külen Levi putir jakdang, Kibuba Ozüng Süngden abener, aser senso aser aener ajak; parnok tesadang ka Gerazim jakdang aser tesadang ka Ebal tenem jakdang noktak, kechiyong Kibuba tenzüker Mosai melaba ama Israel nunger tamasa moatsütsüla. 34Aser kenpiga lir, pai ozüng kaket ajonga nung zülua aliba ama, temoatsü aser atakatem ozüng ajak azüng. 35Mosai melaba o ajak kata meindoki Yihusuai Israel telok ajak, tetsürtem, tila tanurtem, aser parnok den aenersa munga alir ajak sentepa lia azüng.

YIHUSUA 9

Gibeon Nungeri Yihusua Ashioktsüba

1Aser kodang Yordan külen alir tenem lima aser lenten lima nung alir, aser Lebanon jakdang tzüyim tulu tzüküm nung aliba Het nunger, Amor nunger, Kanan nunger, Periz nunger, Hiv nunger, aser Yebus nunger chuba ajaki aji angashi, 2parnoki Yihusua aser Israel nunger den raratsü temulung ka sür külemi atenshi.

3Saka kodang Gibeon nung alir nisungtemi Yeriko aser Ai dak kechi inyak aji angashi, 4parnoki külaka inyak aser parnoki o tongdartem amai aküm, aser parnoki juli tejen aser yi meso tejen teshisa aser talentep, parnok gado rongdong nung aben. 5Aser tsüngsem tejen aser tartep parnok tetsüng nung semok aser süoshi tejen parnoki sobu aser parnok chiyungtsü amtsük ajakji takong aser mangrang punga kümer liasü, 6aser parnoki Gilgal nung tanendak Yihusua dangi ao, aser pa aser Israel nisungtem dang ashi, “Onok alima talang ka nungi aru, anungji tang nenoki onok den tezüngzüktepba ka yangluang.”

7  Saka Israel nisungtemi Hiv nunger dang ashi, “Ashiko nenok onok den alir nisung asütsüa memetet nung, kodaser onoki nenok den tezüngzüktepba ka yanglutsü?”

8Parnoki Yihusua dang ashi, “Onok ne kilirtem lir.” Aser Yihusuai parnok dang asüngdang, “Nenok shir aser nenok kong nungi aru?”

9Parnoki pa dang ashi, “Kibuba ne Tsüngrem tenüng atema ne kilirtem linük talangka nungi aru; kechiyong onoki pa indang aser pai Ijip lima nung inyakba ajak, 10 aser Yordan atena or aliba Amor nunger chuba ana dang inyakba ajak, Heshbon chuba Sihon dang aser Ashtarot aliba Bashan chuba Og dang inyakba angashi. 11Aser ozü tamburtem aser ozü lima nung alir ajaki onok dang ashi, Lenmang atema chiyungtsü nenok ket nung benang, aser parnok lenji oang, aser parnok dang shiang, onok nenok kilir; anungji tang nenoki onok den tezüngzüktepba ka yangluang. 12Nenok dangi arutsüba anogo nung iba amtsük onok chiyungtsü atema kidang nungi talem bener aru, saka tang ajiang, aji takong lir, aser mangrang pungogo; 13aser onoki süngtsüba yi meso tasen liasü, saka ajiang, parnok shisaogo, aser onok lenmang nung talangka senzüba yong onok süoshi aser onok tsüngsem tejen kümogo.”

14Anungji Kibuba dang masüngdangi parnoki chiyungtsüji parnok nungi agizük. 15Aser Yihusuai parnok den yimjung yanglu, aser parnok taküm lidaktsütsü tezüngzüktepba ka yanglu; aser telok tanishirtemi parnok dang azüngashi.

16Gibeon nunger den parnok yimjung yanglur külen anogo asemnübuba nung Israel nüburtemi itemji parnok anasa aliba kiyongertem ta angashi. 17Aser Israel nüburtem apusoa anogo asemnübuba nung parnok yimtitem tonga aru. Parnok yimtitemji Gibeon, Kefira, Berot aser Kiriat-jearim. 18Saka Israel nüburtemi parnok metepset, kechiaser telok tanishirtemi Israel Tsüngrem Kibuba agi parnok dang azüngashir liasü. Anungji telok ajaki tanishirtem anema nemnem. 19Saka tanishirtemi telok dang ashi, “Israel Tsüngrem Kibuba agi asenoki parnok dang azüngashiogo, anungji asenoki parnok dak tamajung meinyaktsüla. 20Asenoki azüngashiba ama parnok lidaktsütsüla; aji mesüra asenoki azüngashiba yong terasaba ain ait asenok dak alitsü. 21Aser tanishirtemi parnok dang ashi, parnok taküm lidakjang, saka telok ajak atema parnokji süngsor aser tzütar kümdakjang.” Anungji tanishirtemi jembiba amaji parnoki inyak.

22Idangji Yihusuai Gibeon nungertemji aja aser ashi, “Nenok onok rongnung lir nung, onok nenok nungi talang nung oagi lir ta kechiba onok ashioktsür? 23Anungji tang nenok atakatem kümogo, nenok teti asoshi alar küma kü Tsüngrem kin asoshi tzütar aser süngsor küma alitsü.”

24Aser parnoki Yihusua dang ashi, “Kibuba ne Tsüngremi pa tenzüker Mosa dang nenok nem ali ajak agütsütsü, aser iba lima nung alir ajak nenok jakdang samatsütsü ta melaba, aji ne kilirtem dang chichia ashi; aji asünung onoki pei taküm asoshi nenok kanga dang tsübua aküm, aser iba mapa ya inyak. 25Aser tang ajiang, onok ne ket nung lir aser nai onok dang inyaktsü kechi shitak aser junger ta ajiteter aji inyakang.” 26Aser pai parnok dang yamaji benshi, aser Israel chirtem ket nungi anitet, aser parnoki parnok metepset. 27Saka Yihusuai panüji telok asoshi aser Kibubai shimtetdak tesem asoshi süngsor aser tzütar asütsü parnok kümdaktsü, koba tanü tashi yamaji lir.

YIHUSUA 10

Amor Nunger Akokba

1Kodang Yirusalem chuba Adonizedeki Yihusuai Yeriko aser iba chuba dang inyakba ama Ai aser iba chuba dak inyakba, Ai atsüngteta ibaji meshimeshia samatsüba, aser Gibeon nungeri Israel nüburtem den yimjung yanglua parnok anasa aliba angashi. 2Parnoki kanga tsübu, kechiaser Gibeonji chuba yimti tulutem rongnung ka liasü, aser ibai Ai dang tuluba aser idakji alir nisung ajakji temeranger liasü. 3Anungji Yirusalem chuba Adonizedeki Hebron chuba Hoham aser Yarmut chuba Piram, Lakis chuba Yafia, Eglon chuba Debir dangi osang yoka ashi, 4“Kü dangi atung, aser ni yariang, asenoki Gibeon samatsüdi kechiaser parnoki Yihusua aser Israel nüburtem den yimjung yangluogo.” 5Idangji Amor nunger chuba pungu: Yirusalem chuba, Hebron chuba, Yarmut chuba, Lakis chuba, aser Eglon chuba; parnok temeranger ajak külemi senden aser Gibeon anema rara.

6Idangji Gibeon nisungtem Yihusua tanendak Gilgali osang yoka ashi, “Ne kilirtem nungi ne ket sota teli; onok dangi yakta atua yariang, aser onok kümzükang; kechiaser tenem lima nung aliba Amor chubatem ajak onok anema adenshia lir.” 7Anungji Yihusuai pa aser raraba nisung ajak aser temeranger ajak pa den Gilgal nungi atu. 8Aser Kibubai Yihusua dang ashi, “Nai parnok tetsübu, kechiyong ni ne ket nung parnok bendanga agütsüogo; parnok rongnung ne tsüngdang noktaktettsüba nisung kata mali.” 9Anungji Yihusuai ajongbena parnok dangi aru, kechiyong aonung tepiyong pai Gilgal nungi ao. 10Aser Kibubai Israel nunger tsüngdang parnok makdok aser Gibeon nung pai parnok jenti tepset, aser Beth-horon lenmangi atuba tashi aria oa Azeka aser Makkeda tashi parnok tepset. 11Aser ya adok, Israel nunger tsüngdang nungi parnok jena or parnok Beth-horoni aluya alidang Azeka nung parnok dak Kibubai rür lung tulu anüng nungi aludaktsü aser parnok asü; Israel chirtem nok agi parnok tepsetba dang nungi rür lung agi asüba timba liasü.

12 Kibubai Israel nunger nem Amor nunger bendanga agütsüba anogo nung Yihusuai Kibuba dang jembi aser pai Israel chirtemi ngua ashi,

Anü, na Gibeon manung marakzüi noktakang,

Aser ita, na Aijalon lenten nung marakzüi noktakang.

13  Aser anüi marakzüi noktak, aser itai ata, oda kin jagi pei tsükchir dak mang mayang tashi. Ya Yasher kaket nung zülua mali ama? Aser, anüji anüng tiyong nung ata, aser anogo tepiyongshi melui ata.

14Aser Kibubai nisung ka ola angaba ama akhidang mesüra iba sülen iba anogo ama mali asü; kechiyong Kibubai Israel atema rara.

15Iba sülen Yihusua aser Israel nübur ajak pa den Gilgal nung tanendaki shilang.

Yihusuai Amor Nunger Chuba Pungu Apuba

16Item chuba pungu jena ao aser Makkeda nung parnok sasa lungpok nung atsükok. 17Aser Yihusua dang yamai ashi, “Chuba pungu to Makkeda lungpok nung atsükoka lir.” 18Anungji Yihusuai ashi, “Lungpok kikümbang nung lung tulu ajunglokjang, aser parnok anüktsü aji anasa nisung tokjang. 19Saka nenoki idakji ata-a teli, nenok tsükchirtem aria oang, aser parnok rongnung tesübuba tashi tepsetang, aser parnok pei yimtitemi teidaktsü; kechiyong Kibuba nenok Tsüngremi parnok nenok ket nung agütsüogo.” 20Aser parnok mesamatsü tashi aser parnok rongnung jenteta oa alirtem kümzüka aliba yimti jagi mai tashi, kodang Yihusua aser Israel chirtemi parnok jenti tepsetba tatem küma aru, 21idangji Makkeda nung tanendak jagi Yihusua dangi yimjung nung meyipa aru; shingaia Israel chirtem kar danga anema temeli marakzü.

22Idangji Yihusuai ashi, “Lungpok kikümbang lapokang aser lungpok nungi item chuba pungu kü dangi anir arung.” 23Aser ashiba ama parnoki inyak, aser item chuba pungu, Yirusalem chuba Hebron chuba Yarmut chuba, Lakis chuba, aser Eglon chuba lungpok nungi aniteta pa dangi anir aru. 24Aser kodang parnoki item chuba Yihusua dangi anir aru, Yihusuai Israel nisung ajak aja, aser pa den aoba temeranger madak tongtipurtem dang pai ashi, “Anasai arung, item chuba tekong manung nenok tetsüng yuang.” Aser parnoki anasai aru, aser parnok tetsüng parnok tekong manung ayu. 25Aser Yihusuai parnok dang ashi, “Tsübua teli mesüra temulung ajema teküm, tashi aser tasü itang; kechiyong nenok tsükchirtem shir anema nenoki raradir, Kibubai ajak dang yamai inyaktsü.” 26Aser kenpiga lir, Yihusuai parnok kangshi aser parnok südaktsü, aser parnok süngdong pungu nung meta; aser nikongdang tashi parnok süngdong nung meta-a ayu. 27Aser anü talu mapang nung Yihusuai ozüng agütsü aser parnoki süngdong nungi parnok agizük aser kechi nung parnok sasa atsükok iba lungpok kikümbang nung enoka yutsü aser lungpok kikümbang nung lung enoka ayu aser aji tanü tashi lir.

Yihusuai Amor Nunger Yimtitem Amakba

28Panüji Yihusuai Makkeda agi, aser iba yimti aser yangji aliba chuba nok agi lepset; pai itemji aser idakji aliba nisung shinga anünga metoktsüi meshimeshia samatsü; aser pai Yeriko chuba dang benshiba ama Makkeda chuba dang inyak.

29Yihusua aser Israel nunger ajak pa den Makkeda nungi aenshia Libna atong, aser Libna anema rara; 30aser Kibubai ibaia aser idakji aliba chuba Israel ket nung bendanga agütsü, aser pai yimti aser idakji alir nisung ajak nok agi lepset; pai yangji shinga anünga metoktsü; pai Yeriko chuba dang benshiba ama iba chuba dang inyak.

31Yihusua aser Israel nunger ajak pa den Libna nungi aenshia Lakis atong aser aji anema raratsü renem. 32Aser Kibubai Israel nunger ket nung Lakis bendanga agütsü aser tananübuba nung pai aji agi: aser Libna dang inyakba ajak ama, pai yangji aliba nisung ajak nok agi samatsü. 33Idangji Gezer chuba Harami Lakis yaritsü aru, aser nisung shinga anünga meyutsüi Yihusuai pa aser pa nisungtem samatsü.

34Aser Yihusua aser Israel nunger ajak pa den Lakis nungi aenshia Eglon atong, aser parnoki ibaji anema raratsü renem; 35aser panüji parnoki aji agi, aser nok agi aji raksatsü, aser idakji aliba nisung ajak pai samatsü; pai Lakis dang inyakba amato yangji alir nisung ajak meshimeshia samatsü.

36Yihusua aser Israel nunger ajak pa den Eglon nungi Hebroni atu aser parnoki aji anema rara. 37Aser parnoki aji agi, aser pai Eglon dang inyakba ajak mesüka idakji aliba chuba aser iba yimti ajak aser nisung ajak pai shinga anünga metoktsüi nok agi samatsü; ano pai iba aser yangji alir nisung ajak meshimeshia samatsü.

38Yamaji Yihusua aser Israel ajak pa den Debiri meyipa aru aser aji anema rara, 39aser idakji aliba chuba aser iba yimti ajak pai meshimeshia samatsü, pai Hebron aser Libna chubatem dak benshiba ama Debir aser iba chuba dang benshi.

40Yamaji alinük ajak, tenem linük aser anüdoklentip, aser ali lenten aser atang linük, aser item chuba ajak Yihusuai atsüngtet. Israel Tsüngrem Kibubai melaba ama pai shinga anünga metoktsü, saka taküm aliba ajak meshimeshia samatsü. 41Aser Yihusuai kadesh-barnea nungi Gaza, Goshen lima ajak aser Gibeon tonga parnok samatsü. 42Aser item chuba ajak aser par lima Yihusuai mapang ka nung dang agi, kechiaser Israel Tsüngrem Kibubai Israel asoshi rara. 43Yihusua aser Israel nunger ajak pa den Gilgal tanendak jagi shilang.

YIHUSUA 11

Yihusuai Yabin Aser Pa Telok Akokba

1Kodang Hazor chuba Yabini iba indang angashi, Madon chuba Yobab, Shimron chuba, Aksaf chuba, 2aser anüdoklentip aliba tenem linük nung alir chubatem aser Khinerot anüdoklentip Araba nung alir aser iba lenten nung alir aser anüolen Dor tenem kolak nung alir, 3aser anüdoklen aser anüolen alir Kanan nunger, Amor nunger, Het nunger, Periz nunger, tenem linük nung Yebus nunger, aser Mizpa linük nung Hermon kübok Hiv nunger dangi pai osang yok. 4Aser parnok den temeranger telok ajak nisung jenti oda tzüyimküm nung lisem ama, kor aser talungtsü jenti den ao. 5Item chuba ajak külemi ajurutep aser parnoki arua Israel nunger den raratsü Merom tzü nung anen.

6 Kibubai Yihusua dang ashi, “Parnokji tetsübuma, kechiaser asüng iba mapang nung ni Israel asoshi parnok ajakji tepsettsü. Nai parnok kortem tetsüng jendangtsütsü aser par kor talungtsütem mi agi rongtoktsütsüla.” 7Anungji Yihusua aser pa den aliba raraba nisung ajak ajongbena Meron tzü anasa aru aser parnok amak. 8Kibubai parnok Israel nunger ket nung bendanga agütsü, aser parnok samatsü, aser Sidon yimtiba aser Misrefot Maim aser Mizpa anüdoklen lenten tonga parnok aria ao; parnoki shinga anünga metoktsü tashi parnok tepset. 9Kibubai ashiba ama Yihusuai parnok dang benshi; pai parnok kortem tetsüng jendangtsü, aser parnok talungtsütem mi agi rongtoktsü.

10Idangji Yihusuai oa Hazor agi aser iba chuba nok agi tepset; kechiaser iba mapang nungji item chuba yimli ajak madak Hazor tashi tuluba liasü. 11Idakji aliba taküm ajak kata anünga meyutsüi parnoki tepset, aser parnoki Hazor mi agi rongtok.

12 Kibuba tenzüker Mosai melaba ama item chuba yimtitem ajak aser parnok chubatem Yihusuai nok agi tepset, aser idakji taküm kata metoktsüi mi agi rongtoktsü. 13Saka Yihusuai rongtoktsüba Hazor dak alaka, tenem nung aliba yimtitembo Israel nungeri merongtoktsü. 14Aser item yimti nung telaluba oset ajak aser kiset shiruru Israel chirtemi terakzükba oset ama parnok asoshi aben: saka parnok shinga taküm metoktsüi ajak nok agi tepset. 15Kibubai pa tenzüker Mosa dang melaba ama, Mosai Yihusua dang mela, aser Yihusuai yamaji inyak; Kibubai Mosa dang melaba ajak pai meinyaki metoktsü.

Yihusuai Agiba Linüktem

16Anungji Yihusuai alinük ajak, tenem linük aser Negeb, Goshen lenten, Araba lima, Israel tenem aser lenten linük ajak agi. 17Halak tenem nungi atuba Seir tashi, Hermon aser Hermon tenem kübok Lebanon lenten nung Baal-gad tashi. Item chuba ajak pai agi aser pai parnok dak azük aser parnokji südaktsü. 18Item chuba ajak den Yihusuai mapang talangka anem. 19Gibeon nung alir Hiv nunger dak alema yimti katia Israel chirtem den yimjung meyanglu; ajak tongbang nung akok. 20 Kechiyong Kibubai Mosa dang melaba ama parnok dak yimlibilem mesayutsü saka pai parnok samatsütsü aser pai parnok meshimeshia samatsütsüsa tongbang nung Israel nunger anema arutsü Kibubai parnok mulung uludaktsü.

21Aser iba mapang nung Yihusua aru, aser tenem linük nungi, Hebron nungi, Debir nungi, Anab nungi, Yihuda tenem linük ajak nungi, aser Israel tenem linük ajak nungi, Yihusuai Anakim samatsü; parnok yimtitem den külemi parnok meshimeshia samatsü. 22Israel chirtem linük nung Anakim nunger shinga anünga mali asü; oda Gaza, Gat aser Ashdod nung dang kar anünga liasü. 23Yamaji Kibubai Mosa dang jembiba ajak amato, Yihusuai linük ajak agi, aser parnok kin telemsa atonger, Yihusuai Israel nunger nem linükji senmangtsü agütsü. Aser linük rara nungi anisüngzük angu.

YIHUSUA 12

Mosai Akokba Chubatem

1  Tang Yordan ajanga or anüdoklen tsütsü Araba ajak, anüdoklen Arnon lenten nungi Hermon tenem tashi Israel nungeri agiba linük aser atsüngtetba chubatem ya lir: 2Amor nunger chuba Sihon, shibai Heshbon nung lia Arnon lenten tatem nung aliba Aroer aser lenten tiyong nung aliba yimti nungi Ammon chirtem arrtsü Yabbok ayong, Gilead tesadang tashi, 3aser Araba anüdoklen tsütsü Khinerot tzüyim, aser anüdoklen Beth-jeshimot tsütsü aliba tashi, aser anüdoklentip Pisga kübok atang tashi yimsü asü. 4Ano parnoki Shira nisung Refaim telok tesübuba Bashan chuba Og arrtsü tashi, shibai Edri aser Ashtarot nung liasü. 5Pa yimliji Hermon tenem, Salika aser Bashan ajak oda Geshun aser Maka arrtsü tashi, aser Gilead tesadang aser Heshba chuba Sihon arrtsü tashi liasü. 6 Kibuba tenzüker Mosa aser Israel chirtemi parnok atsüngtet aser Kibuba tenzüker Mosai Reuben, Gad aser Manase kin tesadang nem aji parnok meyong asütsü agütsü.

Yihusuai Akokba Chubatem

7Yordan anüdoklen tsütsü aliba item chubatem aser par linük, Lebanon lenten aliba Baalgad nungi Seiri atuba Halak tenem tashi Yihusua aser Israel nüburtemi maktet. Aser Yihusuai parnok kidong apir itemji lemsa-a senmangtsü asoshi parnok nem agütsü. 8Itemji: tenem linük, anüolen ali telemok, Araba linük, tenemtsüng wabetsa, lisem lima aser Negeb, Het nunger, Amor nunger, Kanan nunger, Perez nunger, Hiv nunger, aser Yebus nunger; 9Yeriko chuba, Bethel tezü aliba Ai chuba; 10Yirusalem chuba, Hebron chuba; 11Yarmut chuba, Lakis chuba; 12Eglon chuba, Gezer chuba; 13Debir chuba, Geder chuba; 14Horma chuba, Arad chuba; 15Libna chuba, Adullam chuba; 16Makkeda chuba, Bethel chuba; 17Tappua chuba, Hefer chuba; 18Apek chuba, Lasharon chuba; 19Madon chuba, Hazor chuba; 20Shimron Meron chuba, Aksaf chuba; 21Taanak chuba, Megiddo chuba; 22Kedesh chuba, Karmel nung Yokneam chuba; 23Dor tenem kolak nung Dor chuba; Gilgal nung aliba bendanger chubatem; 24Tirza chuba, parnok ajak agi chuba semer ka liasü.

YIHUSUA 13

Ano Tagitsü Aliba Linüktem

1Tang Yihusua tambur aser kanga tasa liasü; aser Kibubai pa dang ashi, “Na tambur aser kanga tasa liaka, ano linük jenti anünga lir. 2Anünga aliba linükji ya lir; Filistia aser Geshur nunger linük ajak; 3Ijip jakdang aliba Shihor nungi Kanan nunger ta züngshiba anüdoklentip tsütsü Ekron arrtsü tashi; Filistia nunger yimti pungu, Gaza, Ashdod, Ashkelon, Git, aser Ekron, ano anüdoklentip aliba Avim dena; 4Kanan nunger linük ajak aser Sidon nunger meyong Meara, Amor nunger arrtsü Afek tashi; 5aser anüdoklen tsütsü Gebal o Lebanon nunger linük Hermon kübok Baal-gad nungi Hamat matong tashi; 6 tenem nübur aliba linük ajak Lebanon nungi Misrefot Maim tashi, oda Sidon nunger ajak dena; Israel chirtem jakdang nungi ni parnok aridoktsü; ni ne dang melaba ama, nai ibaji dang Israel nunger nem senmangtsü asoshi timi lemdangang. 7Anungji tang kin tuku aser Manase kin tesadang nem iba linük ya lemsajang.”

8  Yordan anüdoklen tsütsüji Kibuba tenzüker Mosai Manase kin tesadang, Reuben, aser Gad kin nem senmangtsü asoshi agütsür liasü. 9Arnon lenten tatem nung aliba Aroer nungi, aser lenten tiyong nung aliba yimti den Medeba ali lenten ajak Dibon tashi; 10aser Amor nunger chuba Sihon shibai Hesbon nungi Ammon chirtem arrtsü tashi yimsü asü, par yimti ajak; 11Gilead aser Geshur o Maakat nunger arrtsü aser Hermon tenem ajonga Bashan ajak Salka tashi; 12Bashan nung Og chuba shibai Ashtarot aser Edrei koba Refaim nung tanüngzük toktsüba nung yimsü asü; pa yimli ajak den agütsüba ama, kechiaser Mosai itemji atsüngtet aser parnok aridok. 13Aji saka Israel chirtemi Geshur aser Maakat nunger maridok aser tanü tashi Geshur aser Maakat Israel rongnung lir, 14 Saka Levi kin nem pai senmangtsü kecha magütsü, kechiaser Kibubai Mosa dang ashiba ama, Israel Tsüngrem Kibuba dang tarongba agi tenlaba nungi parnok senmang angutsü.

Reuben Kin Nem Lemzüktsüba Linük

15Mosai Reuben kin nem parnok kibong apir senmangtsü asoshi alinükji agütsü. 16Anungji parnok arrtsüji Arnon lenten tatem nung aliba Aroer nung lenten tiyong nung aliba yimti Medeba ali lenten ajak, 17Heshbon aser iba lenten linük nung aliba yimti ajak; Dibon aser Bamoth-baal aser Beth, Baalmeon; 18aser Yahaz aser Kedemot aser Mefaat; 19Kiriathaim, Sibma aser lenten temesong Zarethsahar; 20Beth-peor aser Pisga atang, aser Beth-yeshimot; 21lenten lima yimti ajak, Amor nunger chuba Sihon yimli ajak shibai Heshbon nung yimsü asü aser shiba Mosai Midian nunger tongtipur Evi, Rekem, Zur, Hur, aser Reba, linük nung alir Sihon kübok kiburtem den atsüngdok. 22Aser ano tetepseter rongnung anünga aliba Beor jabaso Balaam temezünger Israel chirtemi nok agi tepset. 23Aser Reuben chirtem arrtsü Yordan aser iba temeket liasü. Yangji aliba yim aser yimtitemji kibong apir Reuben chirtemi senmang amanga liasü.

Gad Nem Lemzüktsüba Linük

24Ano Mosai Gad kin nem parnok kibongtem apir alinük itemi senmangtsü asoshi agütsü. 25Parnok arrtsüji Yaza, aser Gilead yimti ajak anüdoklen Ammon nunger kinük tesadang ka nungi Rabba anüdoklen tsütsü Aroer tashi; 26Heshbon nungi Ramath-mizpa tashi, Betonim aser Mahanaim nungi Debir arrtsü tashi; 27lenten linük nung Beth-hamaram, aser Bethnimra aser Sukkot, Zafon, Heshbon chuba Sihon yimti tanüngba Yordan aser iba temeket anüdoklen tsütsü Yordan ajanga or Khineret tzüyim tatem tashi liasü. 28Yangji aliba yim aser yimtitemji parnok kibong apir Gad chirtemi senmang amangba liasü.

Manase Nem Lemzüktsüba Linük

29Mosai Manase kin tesadang ka nem parnok kibongtem apir senmangtsü asoshi alinük itemi agütsü. 30Parnok arrtsüji Mahanaim nungi Bashan ajak, Bashan chuba Og yimli ajak, aser Bashan nung Jair yimtsüng roker tashi, 31Gilead tesadang ka, Bashan yimli nung Og chuba yimtitem Ashtarot aser Edrei. Item ajakji Manase jabaso Makhir chirtem tesadang ka nem senmangtsü agütsü.

32Yordan ajanger Yeriko anüdoklen tsütsü Moab lenten nung, Mosai lemsatsüba senmanger itemji lir. 33 Saka Mosai Levi kin nem senmangtsü magütsü; pai parnok dang jembiba ama Kibuba Israel Tsüngrem par senmang lir.

YIHUSUA 14

Yordan Anüolen Linük Yihusuai Lemsaba

1Itemi Eleazar putir, Nun jabaso Yihusua aser Israel chirtem kin kidong shia tamburtemi Israel nübur nem Kanan lima senmangtsü agütsübaji lir. 2 Kibubai Mosa dang melaba ama kin tuku ser tesadang parnok senmangji an toktangba agi lemsa. 3 Kechiaser kin ana ser tesadang senmangbo Mosai Yordan ajanga or agütsüogo; saka parnok rongnung Levi kin nembo senmangtsü magütsü. 4Kechiaser Yosef chirtem kin ana liasü, Manase aser Efraim; aser parnok kiset shiruru chiyimdak aser parnok chiyungtsü li den parnok alitsü yimtitem dak alaka pai linük nungji Levi kin nem shilem kecha magütsü. 5Kibubai Mosa dang melaba ama, Israel chirtemi inyak; aser parnoki linükji lemsa.

Kaleb Nem Hebron Agütsüba

6Idangji Gilgal nung Yihuda chirtem Yihusua anasai aru; aser Keniz nunger Yefune jabaso Kalebi pa dang ashi, “kadesh-barnea nung ne aser kü indang Kibubai Tsüngrem nisung Mosa dang jembiba nai meteta lir. 7Kibuba tenzüker Mosai linük itdangtsü kadesh-barnea nungi ni yokdang ni küm lir tain liasü, aser kü mulung nung aliba ama pa nem osang meyipa bener arutsü. 8Aji saka, kü den aoba adianutemi nübur mulung yimsadaktsü, saka Kibuba kü Tsüngrem sülen ni bendanga anitak. 9 Aser panüji Mosai azüngashia ashi, ‘Atangji ne tetsüng ajemokdak linük na aser ne chirtem asoshi teti senmang alitsü kechiaser Kibuba kü Tsüngrem sülen bendanga nai anitak.’ 10Aser tang ajiang, Israel arem nung jajadang, Kibubai Mosa dang iba o jembiba mapang nungi, pai jembiba ama, Kibubai item küm lir pungu ni taküm yutsü, aser ajiang tanü ni küm tirpungu tain lir. 11Saka Mosai ni yokba anogo nung ama, tanü anogo tashi, raratsü aser oli aruli ta asütsü tanga kü tashi lir. 12Anungji Kibubai iba anogo nung ashiba ama, iba tenem linük ya kü nem agüjang; kechiaser idakji Anakim nunger aser yimti tulutem jara agi atsübanger koda liasü, aji nai iba anogo nungto angashiogo; Kibubai jembiba ama kü den atentsü aser ni parnok aridoktsü akok.”

13Aser Yihusuai pa moatsü aser pai Yefune jabaso Kaleb nem Hebron senmangtsü agütsü. 14Anungji tanü tashi, Hebron Keniz nunger Yefune jabaso Kaleb senmang aküm, kechiaser Israel Tsüngrem Kibuba sülen bendanga pai anitak. 15Tang Arba Anakim nunger rongnung nisung tulutiba asüba yong akhidang Hebron tenüngji Kiriath-arba liasü. Aser linükji rara nungi anisüngzük angu.

YIHUSUA 15

Yihuda Nem Lemzüktsüba Linük

1Yihuda kin parnok kibongtem apir lemzükba linükji itemi: Anüolentip Edon arrtsü nungi Zin lisem lima anüolentip tatembang tashi. 2Parnok anüolentip arrtsüji Metsü Tzüyim tatembang nungi anüolentip tzüyimbang tashi; 3aji Akrabbim-i atuba anüolentip tsütsü Zin atena or kadesh-Barnea anüolentip leni oa Hezron atena Addari tur Karbai leni meyip; 4aser Azmon atena or Ijip ayongi tur tzüyim nung tema oa liasü. Aji anüolentip Yihuda arrtsü liasü.

5Anüdoklen arrtsüji Metsü Tzüyim nungi Yordan ayongbang tashi liasü. Anüdoklentip arrtsüji idak nungjagi tenzüker, 6Beth Hoglah tashi aser yang nungjagi Beth Araba anüdoklentip atena oa Reuben jabaso Bohan lung tashi liasü. 7Ayong anüdoklentip aliba Adummini atuba den indangtepa Gilgal tsütsü shia aliba anüdoklentip tsütsü Akhor lenten nungi Debir tashi ao, aser En-shemes tzü atema oa Enrogel nung atem; 8aser Hinnom lenten leni anüolentip Yebus yimti Yirusalem, aser Refaim anüolentip lenten tatem nung aliba anüolen Hinnom lenten jakdang tenem kolak tashi arrtsüji atu; 9aser tenem kolak nungi Neftoa tzüpokdak tashi aser Efron tenem nung yimtitem tashi arrtsü ao; aser arrtsüji Baala tonga metenlok aji Kiriath-jearim; 10aser arrtsüji Baala anüdoklen nungi meyipa Yearim tenem anüolentip tsütsü aji Chesalon atena or Seir tenem tashi, aser Timna leni atena oa Beth-shemes tashi alu. 11Aser anüdoktip tsütsü Ekron tashi arrtsü liasü; aser Shikkeron tashi arrtsü renlok aser Baala tenem atena oa Yabaneel nung atem; aser arrtsü tatemji tzüyim nung liasü. 12Aser anüdoklen arrtsü tzüyim tuluba aser iba temeket liasü. Aser parnok kibong apir Yihuda chirtem temeket arrtsü ya liasü.

Kalebi Hebron Aser Debir Akokba

(Obe. 1.11-15)

13 Kibubai Yihusua dang melaba ama Yihuda linük nungi shilem kar Yihuda chir rongnung Yefune jabaso Kaleb nem Kiriath Arba nung Hebron agütsü. Arbaji Anak tebu liasü. 14 Aser Anak chir asem Sheshia, Ahiman, aser Talami, Anak chirtem, idak nung jagi Kalebi aridok. 15Aser idak nungjagi pai Debir alir nisungtem anema atu. Tang Debir tenüng akhidang Kiriath-sefer liasü. 16Kaleb-i ashi, “Shibai Kiriath-sefer atsüngtetdir aser aji agidir, pa nem kinungtsü asoshi kü jala Aksa agütsütsü.” 17Aser Kaleb adianu Kenaz jabaso Othnieli aji agi; aser pai par jala Aksa pa nem kinungtsü asütsü agütsü. 18Kodang la pa dangi aru, lai tebu dang alu ka asüngdangtsüsa pa mesüzük, aser lai gado nungi alu; aser Kalebi la dang ashi, “Nai kechi aginür?” 19Lai langzü, “Nai ni Negeb lima nung alitsüsa kümdaktsüogo, anungji kü nem sempet kar agüjangma, ano kü nem tzüpokdakjia agüjangma.” Anungji Kalebi Hebron anasa yimbang aser yimlanglen tzüpokdakji agütsü.

Yihuda Nem Agütsüba Yimtitem

20Ibai Yihuda kin parnok kidong aser kibong apir senmangtsü lemzüktsübaji lir. 21Anüdoklentip Edom arrtsü tsütsü Yihuda kin yimti itemi liasü: Kabzeel, Eder, Yugur; 22Kina, Dimona, aser Adada; 23Kedesh, Hazor, aser Ithnan; 24Zif, Telem, aser Bealot; 25Hazor-hadatha, aser Kerioth-hezron aji Hazor; 26Amam, Shema, aser Molada; 27Hazorgadda, Heshmon, aser Beth-pelet; 28Hazar-shual, Beersheba, aser Biziothia; 29Baala, Iim aser Ezem; 30Eltolad, Chesil, aser Horma; 31Ziglak, Madamanna, aser Sansanna; 32Lebaot, Shilhim, Ain, aser Rimmon; parnok yim dena yimti ajak agi metsür-tuku lir.

33Ali telemok nung itemi lir: Eshtaol, Zora aser Ashna; 34Zanoa, Engannim, Tappua, aser Enam; 35Yarmut, Addullam, Sukkot, aser Azeka; 36Shaaraim, Adithaim, Gedara, aser Gederothaim; parnok yim dena yimti terpezü.

37Zenan, Hadasha, aser Migdalgad; 38Dilean, Mizpa, aser Yoktheel; 39Lakis, Bozkath, aser Eglon; 40Kabbon, Lahman, aser Kitlis; 41Gererot, Beth-dagon, Namaa, aser Makkeda; parnok yim dena yimti tertrok.

42Libna, Ether, aser Ashan; 43Ifta, Ashna, aser Nazib; 44Keila, Akzib, aser Mersha; parnok yim dena yimti tuku.

45Ekron, iba yimti aser yim dena; 46Ekron nungi Ashdod anasa aliba ajak parnok yim dena tzüyim tashi.

47Ashdod, iba yimti aser yim; Gaza, iba yimti aser yim; Ijip ayong aser tzüyim tulu temeket arrtsü tashi.

48Aser tenem lima nung Shamir, Yathir, aser Soko; 49Danna, aser Kiriathsanna (aji Debir); 50Anab, Esthemo aser Anim; 51Goshen, Holon, aser Gilo; parnok yim dena yimti terka.

52Arab, Duma, aser Eshan; 53Yanin, Beth-tappua, aser Afeka; 54Humta, Kiriath-arba (aji Hebron) aser Zior; parnok yim dena yimti tuku.

55Maon, Karmel, Zif, aser Yuta; 56Yezreel, Yokdeam, aser Zanoa; 57Kain, Gibea, aser Timna; parnok yim dena yimti ter.

58Halhul. Beth-zur, aser Gedor; 59Maarat, Beth-anot, aser Eltekon; parnok yim dena yimti trok.

60Kiriath-baal mesüra Kiriathjearim aser Rabba; parnok yim dena yimti ana.

61Lisem lima nung Beth-araba, Middin, aser Sekaka; 62Nishan, Metsü Yimti, aser En-gedi; parnok yim dena yimti trok.

63  Saka Yirusalem nung alir Yebus nungerbo Yihuda chirtemi maridoktet; anungji Yirusalem nung Yihuda chirtem den Yebus nungerji tanü tashi lir.

YIHUSUA 16

Efraim Aser Manase Nem Lemzüktsüba Linüktem

1Yosef chirtem nem lemzüktsüba linükji Yeriko anasa Yordan ayong Yeriko anüdoklen tsütsü tzü nungjagi tenzüker lisem lima tashi tur Bethel tenem linük tashi liasü. 2Bethel nungi Luz tashi or Arki nunger linük Atarot tashi; 3yang nungjagi anüolen tsütsü Yaflet nunger linüki lur Bethhoron yimlang nungi aser Gezer tashi aser aji Tzüyim nung tema liasü.

4Yosef dak jakzükba Manase aser Efraim, parnok senmangtsü asoshi iba linükji lemzük.

Efraim Nem Lemzükba Linüktem

5Efraim chirtem parnok kibongtem apir lemzüktsüba senmangji ibai lir: anüdoklen arrtsüji Atarot-Adder nungi Beth Horon yimbang tashi, 6Yang nungjagi tzüyimi atu; anüdoklentip tsütsü Mikhemthath, anüdoklen arrtsü Taanath Shilo tashi oa Yanoa anüdoklen tashi liasü. 7Idak nungjagi Yonoa nungi Atarot aser Naarat tashi aser Yeriko tonga Yordani alu. 8Tappua nung anüolen tsütsüi Kana ayong tashi arrtsü ao aser idak nungjagi aoba tzüyim nung atem. Efraim chir kin parnok kibong apir senmang amangba ya lir. 9Manase chirtem senmang nungi Efraim chirtem atema balaka agiteta ayuba yimtitem den külemi parnok yim den yimti ajak parnok kibong apir agütsüba Efraim chirtem senmang ya lir. 10 Aser Gezer nung aliba Kanan nunger parnoki maridoktet; aji oda tanü tashi, Kanan nunger Efraim kin rongnung alir, aser kangshia inyaktsü kilir aküm.

YIHUSUA 17

Manase Nem Lemzüktsüba Linüktem

1Item linük ya Manase kidong asoshi lemzük, kechiaser pa Yosef mezüng jabaso liasü. Manase mezüng jabaso Makir, Gilead tebu pa nokinketer ka liasü, anungji pa nem Gilead aser Bashan lemzüktsü. 2Aser Manase chir tanüngba kintem asoshi item linükji lemzüktsü: Abiezer, Helek, Asriel, Shekem, Hefer aser Shemida. Itemji Yosef jabaso Manase dak jakzükba teburtem lir.

3Saka Manase jabaso Makir chir Gileader chir Hafer jabaso Zelofehad jabaso mali, jala dang liasü. Parnok tenüng itemi: Mala, Noa, Hogla, Milka aser Tirza. 4 Parnoki Eleazar putir aser Nun jabaso Yihusua aser tanishirtem dangi arua ashi, “Onok adianu rongnung külemi onok nem senmangtsü agütsütsü Kibubai Mosa dang melaogo.” Anungji Kibubai melaba ama parnok tebu adianutem den külemi pai parnok nem senmang agütsü. 5Anungji Yordan ajanga or Bashan aser Gilead linük dak alaka shilem ter Manase lemzük; 6kechiaser Manase jabasotem den külemi pa jalatema senmang lemzük, aser Gilead limaji tanüngba Manase chirtem meyong aküm.

7Manase arrtsü Asher nungi Shekem anüdoklen Mikmeta tashi, yang nungjagi anüolentipleni oa Entapua nunger alidak tashi liasü. 8Tappua linükji Manase meyong liasü, saka Tapua yimti Manase arrtsü nung alibajibo Efraim chirtem meyong liasü. 9Yang nungjagi arrtsüji Kana ayongnu tashi lua liasü. Ibaji Manase linük saka ayongnu anüolen tsütsü aliba yimtitemji Efraim meyong liasü. Manase arrtsüji ayongnu anüdoklentipleni tur tzüyim nung tema liasü. 10Anüolentip linükji Efraim meyong aser anüdoklentip linükji Manase meyong tena arrtsüji tzüyimji liasü; anüdoklentip Asher tashi, aser anüdoklen Issakar tashi. 11Issakar aser Asher arrtsü tsüngda Manase-i itemi agi: Bethshan aser Ibleam iba den parnok yimti temeket; Dor aser item yimtsüngtem, Endor, Tanak, Magiddo aser parnok temeket yimtitem, aser asembubaji Nagat liasü. 12 Saka Manase chirtemi item yimti nung alirtemji maridoktet, anungji Kanan nungeri idakji maneni ali. 13Kodang Israel nüburtem tashi ita aküm parnoki Kanan nungerji tashiyim agi mapa inyakertem kümdaktsü, aser parnok meshi meshiabo maridok.

Efraim aser Anüolen Alir Manase Kidongi Alinük Tali Meshiba

14Aser Yosef chirtemi Yihusua dang ashi, “Kibubai moatsüba ama onok nisung jenti sür nung senmangtsü asoshi kechiba nai telemzük ka aser shilem ka dang kü nem agütsü?”

15Aser Yihusuai parnok dang ashi, “Nenok nisung jenti süra arem jagi tuang aser idakji nenok asoshi Periz aser Refaim nunger linükji leptetang, kechiyong Efraim tenem limajibo nenok asoshi kanga mesütsü.”

16Aser Yosef chirtemi ashi, “Tenem limaji onok asoshi teperi masü, aser Bethshean aser iba yimtitem aser Yezreel lenten anaprongla linük nung aliba Kanan nunger merang talungtsütem kar.”

17Aser Yihusuai Yosef kidong Efraim aser Manase kidong dang ashi, “Nenok nisung jenti lir aser tashi tulu lir, nenok shilem ka dang malitsü; 18saka tenem linük nenok meyong alitsü, kechiyong aji arem liaka nenoki aji leptoktsü aser iba tatem tashi nenok meyong alitsü; kechiyong parnok tashi itaka aser merang talungtsütem liaka nenoki Kanan nunger aridoktsü.”

YIHUSUA 18

Tanüngba Linük Lemsaba

1Israel nüburtemi alinükji atsüngteter külen parnok ajak Shilo nung adenshia sentep süki idakji yanglu. 2Israel nübur rongnung ano kin tenet senmang melemzüki liasü. 3Anungji Yihusuai Israel nüburtem dang ashi, “Kibuba, nenok tsürabur Tsüngremi nenok nem agütsüba linüki yia aji agitsü nenoki kopiga anüalema alitsü? 4Nenok kin shia nungi nisung asemsem shimtetang; ni parnok yoktsü, aser parnoki apusoa linük sema aotsü aser parnok senmang atema linük reprangoktsü; aser parnok kü dangi arutsü. 5Aser parnoki aji shilem tenet küma lemsatsü; Yihuda anüdoklentip pa arrtsü nung alitsü, aser Yosef kidong anüolentip parnok arrtsü nung alitsü. 6Nenoki alinükji shilem tenet küma lemsatsü aser iba tasazükji kü dangi yagi bener arutsü; aser Kibuba asen Tsüngrem tsüngdang nenok asoshi ni yangi an toktangtsü. 7Kechiyong nenok rongnung Levi kidongbo shilem mali, kechiyong Kibuba atema putir mapa parnok senmang lir; aser Gad, Reuben aser Manase kidong tesadang anüdoklen; Yordan ajanger Kibuba tenzüker Mosai parnok nem agütsüba senmang parnoki agizükogo.”

8Aser nisungtemi apusoa ao, aser Yihusuai linük ladangi aor dang ya ozüng agüja ashi, “Sema senzüang aser aji ladangang aser kü dangi meyipa osang bener arung, aser Shilo nung Kibuba tsüngdang ni nenok asoshi an toktangtsü.” 9Aser nisungtemi ao aser linük sema ao, aser aji kaket ka nung yimtitem apir shilem tenet küma lemsa, aser parnoki Shilo nung tanendaki Yihusua dangi aru. 10Shilo nung Kibuba tsüngdang Yihusuai parnok asoshi an toktang; aser parnok telemsa apir, Yihusuai Israel chirtem nem linükji lemsatsü.

Benjamin Nem Lemzüktsüba Alinük

11Benjamin chir kidong parnok kibong apir lemzük; aser parnok shilem arrtsü Yihuda chirtem o Yosef chirtem na tsüngda nung liasü. 12Anüolentip len parnok arrtsü Yordan nungi liasü, aser aji anüolentip Yeriko tsütsüi tua anüolen tsütsü tenem lima ajanga ao, aser idak nungjagi aoba Beth-aven arem nung tema liasü. 13Idak nungjagi arrtsüji anüdoklentip Luz lima Wabetsa (aji Bethel) tashi, aser yang nungjagi Beth Horon yimlang anüolentip aliba tenem anasa Atarot-Addar tashi arrtsüji lua liasü. 14Aser anüolen linük idak nungjagi metenloker anüdoklentip tsütsü nungjagi arua anüdoklentip tsütsü Beth-horon jakdang aliba tenem nungi Yihuda chirtem yimti ka Kiriath-baal (aji Kiriath-jearim) nung tema liasü; ya anüolen linük shilem liasü. 15Aser anüdoklentip linük shilem Kiriath-jearim tatembang nungi liasü, anüolen tsütsüi aoba Neftoa tzü tzüpokdak tashi arrtsü liasü; 16aser anüolentip tsütsü Refaim lenten nung aliba Hinnom jabaso lenten jakdang tenem tatem tonga arrtsü lua liasü, aser aji Hinnom lenteni alua anüdoklentip Yebus nunger tsütsü aser En-roel tashi alu; 17aser aji maneni anüolentip tsütsü En-shemesi ao Adummim tsüng aliba Gelilot tashi ao aser Reuben jabaso Bohan lung tashi alu; 18aser aji anüolentip len Araba tsütsü atena or Araba tashi alua liasü; 19aser anüolentip Beth-hogla tsütsü atena arrtsü ao; aser Yordan anüdoklentip tatembang nung anüolentip Metsü Tzüyim kümbang nung arrtsü tema liasü; anüdoklentip linük arrtsü ya lir. 20Anüdoklen linük arrtsü Yordan liasü. Item temeket arrtsü ya parnok kibong apir anguba Benjamin chirtem senmang liasü.

21Parnok kibong apir agütsüba Benjamin chirtem yimti itemi: Yeriko, Beth-hogla, aser Emek-keziz, 22Beth-araba, Zemarain, aser Bethel; 23Avim, Para, aser Ofra; 24Chefar Ammoni, Ofni, aser Geba; parnok yim tena yimti terana; 25Gibeon, Rama, aser Beeroth; 26Mizpa, Chefra, aser Moza; 27Rekem, Irpeel, aser Taralah; 28Zela, Elef, aser Yebus nunger (aji Yirusalem), Gibeah, aser Kiriat; parnok yim tena yimti terpezü. Ibai Benjamin chirtem parnok kibong apir anguba senmang lir.

YIHUSUA 19

Simeon Nem Lemzüktsüba Alinük

1Tanabuba shilem Simeon asoshi, oda Simeon chir kidong asoshi parnok kibong apir angu: aser par senmang Yihuda chir senmang rongnung liasü. 2 Parnok senmang asoshi parnoki itemi angu; Beersheba mesüra Sheba aser Molada; 3Hazarshual, Bala, aser Ezem; 4Eltolad, Bethul, aser Horma; 5Ziglak, Beth-markabot, aser Hazar-susa; 6Beth-lebaot aser Sharuhen; parnok yim dena yimti terasem.

7Parnok meketa aliba yimtitem den ano yimti pezü: Ain, Rimmon, Ether aser Ashan, parnok yimtsüng dena yimti pezü. 8Item yimti meketa aliba yim ajak Baalath-beer, aji anüdoklentip Rama tashi liasü. Simeon chirtem kidong par kibong apir anguba senmang ya lir. 9Yihuda chirtem shilem nungi agiteta Simon chirtem senmang liasü; kechiaser Yihuda chirtem senmang parnok asoshi onsara liasü, anungji Simeon chirtem senmang par senmang rongnung liasü.

Zebulun Nem Lemzüktsüba Alinük

10Tasembuba shilem parnok kibong apir Zebulun chirtem asoshi agütsü. Aser par senmang arrtsü Sarid tashi liasü. 11Yang nungjagi arrtsüji anüolen Mareal tashi tua Dabbeshet aser Yokenam anüdoklen aliba ayongnu tashi liasü. 12Sarid nungi anüdoklen Kislot Tabor Yafia arrtsü tashi; Daberat aser Yafia tashi liasü; 13idak nungjagi anüdok tsütsü Gath-hefer aser Et-kazin atener Rimmoni ao aser Nea tashi zünglok; 14anüdoklentip tsütsü arrtsüji Hanathon leni or Iftahel lenten nung tema liasü. 15Kattat, Nahalal, Shimron, Idala aser Bethlehem tashi, parnok yim dena yimti terana; 16parnok yim dena item yimti parnok kibong apir anguba Zebulun chirtem senmang lir.

Issakar Nem Lemzüktsüba Alinük

17Pezübuba shilem Issakar, aser Issakar chirtem asoshi parnok kibong apir agütsü. 18Parnok arrtsü Yezreel, Chesulot, aser Shunem; 19Hafaraim, Shion, aser Anoharat; 20Rabit, Kishion, aser Ebez; 21Remet, Engannim, Enhadda, aser Bethpazzez tashi liasü. 22Aser Tabor, Shahazuma, aser Bethshemes tonga arrtsü liasü; aser parnok arrtsü Yordan nung tema liasü; parnok yim den yimti tertrok. 23Ya parnok kibong apir anguba parnok yim den yimtitem, Issakar chirtem kidong senmang lir.

Asher Nem Lemzüktsüba Alinük

24Pungububa shilem Asher chirtem kin asoshi parnok kibong apir angu. 25Parnok arrtsü Helkath, Hali, Beten, Akashaf; 26Allammelek, Amad, aser Mishal liasü; aser aji anüolen tsütsü Karmel aser Shihor-libnat tashi atong; 27anüdoklen tsütsü Beth-dagon leni meyiper, Zebulun anüolentip tsütsü Iftahel lenten Beth-emek aser Neiel atong, aser tabelen nung Kabul; 28aser Ebron, Rehob Hammom, aser Kana, oda Zidon tuluba tashi ao; 29atsü agi atsübangba Tur yimti tashi Ramai arrtsü meyip aser arrtsüji Hosa leni meyip aser idak nungjagi aoba Akzib linük anasa tzüyim nung tema liasü; 30Umma, Afek, aser Rehob dena; parnok yim den yimti metsür-ana. 31Parnok yim den item yimti ya Asher kidong chirtem parnok kibong apir anguba senmang liasü.

Naftali Nem Lemzüktsüba Alinük

32Trokbuba shilem Naftali chirtem atema, oda parnok kibong apir Naftali chirtem asoshi liasü. 33Parnok arrtsü Helef Zaanammin nung sülemdong, aser Adami-nekeb aser Yabneel nungi Lakkum tashi liasü, aji Yordan nung tema liasü; 34aser arrtsüji anüolen tsütsü Azothtabori meyip, aser Hukkoki ao, aji anüdoklentiplen Zebulun, anüolen Asher, aser anüdoklen tsütsü Yordan nung Yihuda tonga ao. 35Lung tsüki agi meketbangba yimti itemi liasü; Sidim, Zer, Hammat, Rakkat, aser Khineret; 36Adama, Rama, aser Hazor; 37Kedesh, Edrei, aser En-hazor; 38Iron, Migdalel, Horem, Beth-anat, aser Beth-shemes; parnok yim den item yimti ter-tuku. 39Parnok yim den item yimti ya Naftali kidong chirtem parnok kibong apir anguba senmang liasü.

Dan Nem Lemzüktsüba Alinük

40Tenetbuba shilem Dan chirtem kidong asoshi parnok kibong apir adok. 41Par senmang arrtsü ya liasü; Zora, Esrhaol, aser Irshemes; 42Shaalabbin, Aijalon, aser Itla; 43Elon, Timna, aser Ekron; 44Elteke, Gibbethon, aser Baalat; 45Yehud, Bene-berak, aser Gathrimon; 46Mejarkon, Rakkon, aser Yopa jakdang arrtsü dena. 47 Dan chirtem kidong arrtsü itemi atena ao kechiyong Dan chirtemi oa Leshem anema rara, aser aji atsüngtet aser aji nok agi samatsür parnok meyong aküm; aser idakji lia parnok tebu Dan nüngtem Leshem dang Dan aja. 48Parnok yim den yimti item ya Dan chirtem kidong parnok kibong apir anguba senmang lir.

Israel Nüburtemi Yihusua Nem Agütsüba Alinük

49Kodang Israel nüburtemi senmangtsü asoshi linük arrtsü lemsabaji atem, parnoki Nun jabaso Yihusua nem senmangtsü asoshi alinük kar agütsü. 50Kibubai melaba ama, parnoki pai asüngdangba yimti Efraim tenem linük nung Timmat Sera agütsü.

51Shilo nung Kibuba tsüngdang sentep süki kikümbang nung an toktanga senmangtsü asoshi Eleazar putir, aser Nun jabaso Yihusua, aser Israel chirtem kidong tanishirtemi lemsatsüba senmang itemi lir. Aji oda parnoki linük alemba tatem aküm.

YIHUSUA 20

Jenokdak Yimtitem

1  Idangji Kibubai Yihusua dang ashi, 2“Israel nüburtem dang shiang, ni nenok den Mosa ajanga jembiba ama jenokdak yimtitem shimtetang. 3Nisung kari memeteti mesüra aibelena kar tepsetra, pai ajagi oa jenoktsü, nenok asoshi itemji tetepsetba mangyanger nungi jenokdak alitsü. 4Aser pai item yimti kati jena aotsü aser yimti süngkhüm talidak noktaker pa osang iba yimti nung tongtipur narong nung ayimoktsütsü aser parnoki pa parnok dangi yimti-i anir aotsü aser pa nem talidak ki ka agüja pa parnok den alitsü akoktsü. 5Aser tetepsetba mangyangeri pa aria arura, idangji parnoki tetepsetsangji pa ket nung bendanga magütsütsü, kechiyong akhidang pai pa mesempa, saka aibelena pai pei kiyonger tepset. 6Aser iba tendak temaba putir masü tashi mesüra o bendangtsü asoshi pa telok jakdang menoktak tashi, pa iba yimti nung alitsü; ajiser-ang nisung tetepsetsangji pei yimti-i meyipa arua, pei yimti aser pei kidangi arutsü.”

7Anungji parnoki Naftali tenem lima nung Galil nungi Kedesh, Efraim tenem lima nungi Shekem, aser Yihuda tenem lima nungi Kiriath Arba (aji Hebron) shimteta ayu. 8Aser Yordan ajanga Yeriko anüdok tsütsü parnoki Reuben kidong nungi lisem lima lenten nung Bezer, Gad kidong nungi Gilead nung Ramot, Manase kidong nungi Bashan nung Golan shimtet. 9Israel nübur ajak aser parnok den mungsema alir aener asoshi itemji teshimtet yimtitem, oda kari aibelena nisung tepsetra, ajagi ajentsü. Anungji pa obendang dak menokdak tashi tetepsetba mangyanger ket nung masütsü.

YIHUSUA 21

Levi Nem Agütsüba Yimtitem

1Idangji Levi kidong tanishirtemi Eleazar putir, aser Nun jabaso Yihusua, aser Israel chir kidong tongtipurtem anasai aru; 2 aser Kanan lima Shilo nung parnoki parnok dang ashi, “Talidak yimtitem den onok kiset shiruru asoshi chiyimdak li onok nem agütsütsü Kibubai Mosa ajanga melaogo.” 3Aser Kibuba ozüng ama, Israel chirtemi parnok senmang nungi item yimti den chimdak li Levi kidong nem agütsü.

4Kohat nunger kidong asoshi shilem adok; aser Levi kin Aron putir chirtem shilem yimti terasem, Yihuda kin nungi, Simeon kin nungi aser Benjamin kin nungi angu. 5Tanüngba Kohat chirtem shilem yimti ter Efraim kin kidong nungi, Dan kin kidong nungi, aser Manase kin tesadang nungi angu.

6Gershon chirtem shilem yimti ter-asem Issakar kin kidong nungi, Asher kin nungi, Naftali kin nungi, aser Bashan nungi Manase kin tesadang nungi angu.

7Merari chirtem shilem parnok kibong apir Reuben kin nungi, Gad kin nungi, aser Zebulun kin nungi, yimti ter-ana angu.

8 Kibubai Mosa ajanga melaba ama, Israel chirtemi item yimti den chiyimdak li shilem Levi nunger nem agütsü. 9Yihuda aser Simeon kidong nungi parnoki item yimtitem ya agütsü, 10aser itemji Kohat kidong Levi chirtem Aron semchirtem atema liasü, kechiaser mezüngbuba shilemji parnoki angu. 11Parnok nem Yihuda tenem lima aser iba temeket chiyimdak li Kiriath-Araba, Arbaji Anak tebu liasü, aji Hebron agütsü. 12Saka yimti moaputem aser yimtsüngtemji parnoki Yefune jabaso Kaleb meyong asütsü atema agütsü.

13Anungji Aron putir semchir nem parnoki jenokdak yimti Hebron, Libna den item yimtitem agütsü. 14Yattir, Eshtemoa, 15Halon. Debir, 16Ain, Yutta aser Bethshemes den parnok chiyimdak li, item kin ana nungjagi yim tuku, 17Benjamin linük nungi Gibeon aser Geba, 18Anathot, aser Almon den parnok chiyimdak li tena yim pezü. 19Aron chirtem putirtem yimti ajak agi chiyimdak dena terasem liasü.

20Levi kin Kohat chir kibongtem nem Efraim kin nungi yimtitemji lemzüktsü. 21Nisung tepseter asoshi jenokdak yimti Efraim tenem nung Shekem den iba chiyimdak li, Gezer, 22Kibzaim, aser Beth Horon den iba chiyimdak li dena yimti pezü; 23aser Dan kin nungi Elteke, Gibbeton, 24Aijalon, aser Gathrimon den parnok chiyimdak li dena yimti pezü agütsü. 25Manase kin tesadang nungi yimti ana Taanak aser Gad Rimmon den chiyimdak parnoki agütsü. 26Item yimti ter den chiyimdak li ajakji tenüngba Kohat kidong nem agütsü.

27Levi nunger Gershon kibongtem nem Manase kin tesadang nungi yimti ana, nisung tepseter jenokdak yimti Golan nung Bashan, aser Be-eshtera den parnok chiyimdak dena agütsü. 28Issakar kin nungi yimti pezü: Kishon, Daberat, 29Yarmut aser Engannim den parnok chiyimdak dena, 30Asher kin nungi yimti pezü: Mishal, Abdon, 31Helkath, aser Rehob den chiyimdak dena, 32Naftali kin nungi yimti asem, nisung tepseter jenokdak yimti Galil nung Kedesh den chiyimdak li, Hammoth Dor, aser Karten den parnok chiyimdak li, 33Gershon küm parnok kibong apir anguba ajak agi yimti terasem den parnok chiyimdak li liasü.

34Aser tanüngba Levi kin Merari chir nem Zebulun kin nungi yimti pezü Yohneam, Karta, 35Dimana, aser Nahalal den parnok chiyimdak li. 36Aser Reuben kion nungi yimti pezü, Bezer den iba chiyimdak li, Yahaz den iba chiyimdak li, 37Kedemot, Mefaat den iba chiyimdak li. 38Gad kin nungi yimti pezü, nisung tepseter jenokdak yimti Gilead nung Ramoth den iba chiyimdak, Mahanaim, 39Heshbon, aser Yazer den iba chiyimdak li. 40Anungji Merari chirtem tanüngba Levi kibongtem parnok kibongtem apir anguba yimti ajak agi terana liasü.

41Israel chirtem shilem li rongnung Levi kin yimti ajak agi lirti den item chiyimdak li liasü. 42Item yimti shia parnok temeket nung chiyimdak li liasü; item yimti ajak yangji liasü.

Israel Nüburtem Alinükji Senmang Amangba

43Anungji parnok tsürabur dang nangzükba lima ajak Kibubai Israel nem agütsü, aser parnoki aji agi aser idakji ali. 44Aser pai parnok tsürabur dang nangzükba ama parnok temeket nung Kibubai parnok nem anisüngzük agütsü, aser parnok tsükchir nisung katia parnok tsüngdang menoktaktet; parnok tsükchir ajak Kibubai parnok ket nung bendanga agütsü. 45Aser Kibubai Israel kidong dang jembiba ama mapa tajung ajak ka danga tamakok malu; ajak ataloka aru.

YIHUSUA 22

Anüdok Nisungtem Yihusuai Meyipa Yokba

1Idangji Yihusuai Reuben, Gad aser Manase kidong tesadang jar, 2 parnok dang ashi, “Kibuba tenzüker Mosai nenok dang melaba ajak nenoki benshi, aser ni nenok dang melaba ajak nung nenoki kü ola anga; 3tanü tashi item anogo aika nungi Kibuba nenok Tsüngrem ozüng inyaka nenoki nenok adianu metoktsü. 4Aser tang pai parnok den jembiba ama, Kibuba nenok Tsüngremi nenok adianu nem anisüngzük agütsüogo; anungji Yordan ajanger Kibuba tenzüker Mosai nenok nem agütsüba pei linüki nenok süki-i meyipang. 5“Ne mulung ajak agi, ne tanela ajak agi pa tenzüktsü, pa dak sotaka alitsü, pa ozüng benshitsü, pa lenmang ajak nung jajatsü, aser KIBUBA nenok Tsüngrem meimtsü; aser Kibuba tenzüker Mosai nenok dang melaba ozüng dang temulung agüja benshiang.” 6Yamaji Yihusuai parnok moatsü aser parnok yok; aser parnoki pei kidangi meyipa ao.

7Tang Manase kin tesadang ka nem Mosai Bashan nung senmang agütsü, saka tanga tesadang ka nem Yihusuai parnok adianu rongnung Yordan ajanger anüolen tsütsü agütsü. Iba dak alema Yihusuai parnok kidangi yokdang pai parnok moatsü, 8aser parnok dang ashi, “Rongsen jenti, kiset shiruru jenti, hon, taribi, yongmenyin, merang, aser süoshi jenti den nenok pei kidangi meyipa arung; aser nenok tsükchir nungi anguba rongsen nenok adianu den lemsaang.”

9Aser Reuben chirtem aser Gad chirtem aser Manase kin tesadang meyipa arua, Mosa ajanga Kibuba I melaba ama, Kanan lima nung aliba Shilo nungi adoka Israel chirtem nungi pila, aser parnoki agitsüba lima Gileadi ao.

10Kodang parnoki Kanan nung aliba Yordan temeket linüki aru, Reuben chirtem, Gad chirtem aser Manase kin tesadangi Yordan anasa tenladak tulu ka yanglu. 11Saka kodang parnoki Israel chirtem litsü nung Yordan anasa Kanan arrtsü nung tenladak yangludaki ta Israel nüburtemi angashi, 12Israel telok ajak parnok anema rarai aotsü Shilo nung senten.

13Aser Israel chirtem Eleazar putir jabaso Finehas aser pa den kibur ter Israel kin shia asoshi tebu kidong nungi kibur ka; 14Reuben chirtem, aser Gad chirtem aser Manase kin tesadang dangi Gilead limai yok; aser parnokji nisung shia Israel nunger meyirijang rongnung tebu kidong madak tebudi liasü. 15Aser parnoki Reuben chirtem, Gad chirtem aser Manase kin tesadang dangi Gilead limai arua parnoki parnok dang ashi, 16 “Kibuba telok ajongai yamai ashir; Kechiba nenoki Israel Tsüngrem anema iba temenen ya inyak? Nenoki iba tenladak yangluba ajanga Kibuba sülen anitakba nungi meyipa pa anema apusoogo. 17 Peor nung inyakba temenen to asenok atema teperi masü no? Kibubar telok madaki tetsübutsü wara ka aruaka, tanü tashi asenok iba temenen nungi memerükteti lir. 18Tang nenoki pa sülen anitaktsü memulunger ama? Tanü nenoki pa anema noktakra, asüngbo pai Israel telok ajonga dang ain adoktsü.”

19“Saka nenok shilem alinük memerüki lira, ajangla nenoki Kibuba shilem linük, kong Kibuba tekülemdak süki lir ajagi arung aser onok rongnung liang, saka Kibuba asen Tsüngrem tenladak alema tanga tenladak ka yangluba agi nenoki Kibuba anema, mesüra onok anema tapuso. 20 Zera jabaso Akani bendanga agütsüba oset nung tai menaba ajanga Israel telok ajak madak temerenshi mali ama? Aser pa tai asoshi iba nisung kija dang mesama.”

21Idangji Reuben, Gad aser Manase kidong tesadangi Israel nübur kidong shia tanishirtem dang langzü, 22“Tulusang, Tsüngrem, Kibuba, pai metet, aser Israeli metettsü; ibai anema apusoba mapa süra, aser Kibuba anema tai menara tanü onok tekümzük. 23Kibuba sülen anitakba nungi meyiptsü, mesüra yangji tarongba tenla tenlatsü, mesüra chiyungtsü tenla, mesüra iba manung yimjung tenla ka tenlatsü onoki tenladak yanglua lira aji Kibubai pei sasa mang yangang. 24Saka Israel Tsüngremi Kibuba den nenok kechi shilem aka? ta nenok chirtem tarutsü anogotem nung onok dang shia lir ta tsübuba agi onoki ibai inyakogo. 25Kechiaser nenok Reuben aser Gad kidong, nenok aser onok tsüngda nung Kibubai Yordanji arrtsü kümdaktsüogo! Kibuba nung nenok shilem kecha maka. Yamaji nenok chirtemi onok chirtem Kibuba tsübuba nungi anendaktsütsü. 26Anungji onoki ashi, arung asenoki tenladak ka renemdi, tarongba tenla mesüra tetepsetba tenla asoshi masü; 27saka ibai nenok aser onok tsüngda nung kuli ka alitsü, aser asenok pa tsüngdang tarongba tenla agi, aser tetepsetba tenla agi, aser yimjung tenla agi Kibuba tenzüktsü; aser tarutsü mapang nung, nenok chirtemi onok chirtem dang nenok Kibuba nung shilem maka ta mashitsü.” 28Anungji onoki ashi, “Kodang parnoki onok dang mesüra tarutsü mapang nung onok pututem dang shidir, ya oda asütsü, asen tsüraburtemi yangluba tenladak tatishitsü ajiang; ya tangbo tenla asoshi mesüra tetepsetba tenla asoshi masü, saka nenok o onok na tsüngda nung kuli ka lir. 29Pa tekülemba süki jakdang Kibuba asen Tsüngrem tenladak alaka, Kibuba anema meraratsü mesüra tanü nungi Kibuba sülen anitakba nungi memeyiptsü tarongba tenla asoshi, chiyungtsü tenla asoshi, mesüra tetepsetba tenla asoshi tenladak meyanglutsüba Tsüngremi nungtemang.”

30Kodang putir Finehas aser Israel telok kidong shia madak tanishirtemi, Reuben, Gad aser Manase kidongi jembiba oji angashi, parnok pela-a liasü. 31Aser Eleazar putir jabaso Finehas-i Reuben, Gad aser Manase kidong dang ashi, “Tanü asenok rongnung Kibuba lir ta asenoki metetogo, kechiaser nenoki Kibuba anema iba tai memena. Tang nenoki Kibuba ket nungi Israel nüburtem kümzükogo.”

32Idangji Eleazer putir jabaso Finehas aser tanishirtemji Gilead lima nung Reuben aser Gad chirtem nungi adoka Kanan limai meyipa osang bener Israel nüburtem dangi shilang. 33Iba osangji angashia Israel nüburtemi Tsüngrem tenüng asang, aser Reuben aser Gad chirtem aliba linük raksatsütsü aser parnok anema rarai aotsü joko parnoki mejembi.

34Aser Reuben aser Gad chirtemi iba tenla sabang dang “Kuli” ta aja. Kechiaser parnoki ashi, “Kibubaji Tsüngrem ta iba yagi asenok tsüngda kuli sayur.”

YIHUSUA 23

Yihusuai Tatembang O Jembiba

1Mapang talangka lir külen, kodang Kibubai Israel nem parnok meketa aliba tsükchirtem ajak nungi anisüngzük agütsü, Yihusua kanga tambur liasü, 2idangji Yihusuai Israel ajak, parnok tamburtem, tanishirtem, obendangertem aser ketdangpurtem ajak aja aser parnok dang ashi, “Tang ni kanga tambur kümogo. 3Kibuba nenok Tsüngremi nenok atema item kintem dang inyakba ajak nenoki nguogo, kechiaser Kibuba nenok Tsüngremi nenok asoshi raraogo. 4Ajiang, item anünga aliba kintem nenok kin asoshi senmangtsü, Yordan nungi ni atsüngtetba kin ajak dena anüolen tsütsü tzüyim tulu tashi, ni nenok nem lemsa-a agütsüogo. 5Aser Kibuba nenok Tsüngremi parnok nenok jakdang nungi aridoktsü aser Kibuba nenok Tsüngremi nenok dang jembiba ama nenoki parnok linük agitsü.

6“Anungji Mosa ozüng kaket nung zülua aliba ajak inyaka benshitsü, aser iba nungi tajichileni mesüra tabeleni memeyiptsü kümdangang, 7aser nenok rongnung anünga aliba item kin den nenoki memeyokteptsü, mesüra par tsüngrem tenüng metetshitsü mesüra parnok agi azüngashi masütsü; parnok metenzüktsü mesüra parnok madang nenoki mapudaktsü; 8saka tanü tashi nenoki inyakba ama Kibuba nenok Tsüngrem dak azüita alitsü tasü ita liang. 9Kechiaser Kibubai tashi tait kin tulu ajak nenok jakdang nungi aridoktsü, aser tanü tashi shingaia nenok anema menoktaktettsü. 10 Nenok rongnung nisung katia parnok meyirijang ka aria aotsü kechiyong pai nenok dang jembiba ama Kibuba nenok Tsüngremi nenok asoshi rarar. 11Anungji Kibuba nenok Tsüngrem teti meimtsü kanga kümdanga liang. 12Mesüra nenoki khenyongi meyipa oa item anünga aliba kin den meyoktepa nenok parnok dangi oa aser parnok nenok dangi arua parnok den kibakiyira, 13ya jungjunga metetang, nenok Kibubai item kin joko nenok nungi maridoktsü, saka Kibuba nenok Tsüngremi nenok nem agütsüba iba tobur tajung lima nungi nenok mesama tashi, parnokji nenok asoshi sang ka aser lunglen ka, nenok tesa nung tareptsü aser nenok tenük nung ai alitsü.

14“Tang ni tasütsü mapang anasa lir. Nenok nisung shia mulung aser tanela nung ya meteta kar, oda Kibuba nenok Tsüngremi nangzükba ama tajung ajak agütsüogo. Tenangzükba ajak ka danga tamakok maludaktsüi ataloka aruogo. 15Saka Kibuba nenok Tsüngremi nangzükba tajung ajak atalokdaktsüba ama, Kibuba nenok Tsüngremi ashiba nenoki mangara nenok nem agütsüba iba tobur tajung lima nungi nenok mesamatsü tashi pai nenok dangi temenen mapa ajak bener arutsütsü. 16Kibuba nenok Tsüngremi nenok dang melaba tezüngzüktepba raksar nenoki tangar tsüngremtem madang apudaka külema itemji tenzükra, idangjibo nenok anema Kibuba ain aittsü, aser pai nenok nem agütsüba iba tobur tajung lima nungi nenok yakta samatsütsü.”

YIHUSUA 24

Yihusuai Nüburtem Den Shekem Nung Jembiba

1Idangji Yihusuai Israel kin ajak Shekemi atenshidaktsü, aser par tamburtem, tanishirtem, obendangertem aser ketdangpurtem aja, aser parnoki Tsüngrem tsüngdangi aru. 2 Yihusuai nüburtem ajak dang ashi, “Israel Tsüngrem Kibubai yamai ashir, ‘alemli nenok tsüraburtem Abraham aser Nahor tebu Tera tena Eufrata ayong külen oa ali, aser parnoki tangar tsüngremtem tenzük. 3 Idangji ni nenok tebu Abraham Ayong külen nungjagi anir arua Kanan lima ajak ajanga ani, aser pa metsü aika kümdaktsü. Ni pa nem Isak agütsü, 4 aser Isak nem Esau aser Yakob agütsü. Ni Esau nem senmangtsü asoshi Seir tenem linük agütsü, saka Yakob aser par chirtem Ijip limai alu. 5 Aser ni Mosa o Aron na yok, aser ni yangji inyakba ama ni Ijip wara agi merenshi; aser tesülen ni nenok anitet. 6 Aser ni nenok tsürabur Ijip nungi anitet, aser nenok tzüyimi aru, aser Ijip nungeri talungtsü aser kor nung mener Temerem Tzüyim tashi nenok tsürabur aria aru. 7Aser kodang parnoki Kibuba dang ayimten, pai nenok o Ijip nunger na tsüngda tammang kümdaktsü aser parnok madak tzüyim bener arua parnok nembang; aser ni Ijip nung kechi inyak, aji nenok tenük agi nguogo; aser anogo aika nenok arem nung ali.

8  “Yordan ajanger aliba Amor nunger limai ni nenok anir aru, parnoki nenok den rara, aser ni parnok nenok ket nung agütsü, nenoki parnok linük agi, aser nenok jakdang ni parnok samatsü. 9 Idangji Moab chuba Zippor jabaso Balaki Israel anema apuso aser rara; pai Beor jabaso Balaam ja-a nenok dak atakatemtsü yok; 10saka ni Balaam dang manga, anungji pai meyiper nenok moatsü; yamaji ni pa ket nungi nenok anitet. 11 Aser nenoki Yordan atena or Yerikoi aru, aser Yeriko nisungtem, Amor aser Periz nunger, Kanan nunger, Het nunger, Girgas nunger, Hiv nunger, aser Yebus nungertemi nenok anema rara; aser ni parnok nenok ket nung bendanga agütsü. 12 Aser nenok lijak mesüra nenok nok mamshi-i nenok tsüngdang nungi Amor nunger chuba ana dena parnok aridoktsü ni nenok jakdangi nati yok. 13 Aser linük ka kechi nung nenok mebelem, koba yimtitem nenoki meyanglu aser kong nenoki tsükmenatzü aser Oliv süng metsünüi nenoki achir, ni nenok nem aji agütsü aser idakji nenok alir.

14“Anungji tang Kibuba tsübuang, pa dang nentaka aser tamang kateta tenzükang; Ijip nung aser Ayong ajanger nenok tsüraburtemi tenzükba tsüngremtem agienang, aser Kibuba tenzükang. 15Aser Kibuba tenzüktsü nenoki memulungra nenoki shiba tenzüktsü tanüsa shimtetang. Ayong ajanger nenok tsüraburtemi tenzükba tsüngremtem asü, mesüra nenok tang aliba Amor nunger tsüngremtem tenzüktsü. Saka ni aser ozü kibongibo, onoki Kibubaji tenzüktsü.”

16Idangji nüburtemi langzü, “Onoki kodanga Kibuba senzüka toktsür tangar tsüngremtem metenzüktsü! 17Kechiaser Kibuba ozü Tsüngremi onok tsüraburtem Ijip alar tia nungi anitet, pai temaitsü tulu inyakba onoki nguogo aser onoki ajanga süiba nisung ajak nungi onok kümzüka ayu. 18Aser Kibubai nisung ajak oda Amor nungertem onok jakdang nungi aridok; anungji onokia Kibubaji tenzüktsü, kechiaser pa asenok Tsüngrem lir.”

19Saka Yihusuai nüburtem dang ashi, “Nenoki Kibubaji metenzüktettsü, kechiaser pa temeshi Tsüngrem, aser tenükmiba Tsüngrem lir; pai nenok tai temenentem matoktsü. 20Nenoki Kibubaji senzüka toktsür aener tsüngremtem tenzükra pai nenok dang junga benshia liaka pai meyiper nenok merenshitsü aser samatsütsü.”

21Saka nüburtemi Yihusua dang ashi, “Masü, onoki Kibuba tenzüktsü.”

22Idangji Yihusuai parnok dang ashi, “Nenoki Kibuba tenzüktsü shimtetbaji nenok sasa kuli süogo.” Aser parnoki langzü, “Hau, iba kuliji onok lir.”

23Yihusuai ashi, “Ajangla tang nenok rongnung aliba bendanger tsüngremtemji endokang aser nenok mulung Israel Tsüngrem Kibuba dangi meyipang.”

24Aser nüburtemi Yihusua dang ashi, “Onoki Kibuba asen Tsüngrem tenzüktsü aser pa dang angatsü.”

25Anungji panüji Yihusuai Shekem nung nüburtem aser Tsüngrem na tsüngda tezüngzüktepba ka yanglua ozüng aser yimsü-ozüng ka parnok nem agütsü. 26Yihusuai itemji Tsüngremer ozüng kaket nung zülu, aser pai lung tulu ka bena arua Kibuba tekülemdak ki anasa sülemdong züngdang aji azüng. 27Aser Yihusuai nisung ajak dang ashi, “Ajiang iba lung ya asenok asoshi kuli ka alitsü. Kibubai asenok dang ashiba o ajak iba lung yagi angashiogo; anungji nenoki Tsüngrem dang ochi meshira, iba ya nenok anema kuli ka alitsü.” 28Idangji Yihusuai nüburtemji pei senmangdagi odaktsü.

Yihusua Asüba

29Itemji süir külen, Nun jabaso Kibuba tenzüker Yihusua arishi küm noklang ka ser ter nung asü. 30 Aser parnoki pa Gaash tenem anüdoklentip Efraim tenem lima nung aliba pa senmang arrtsü Timnath Sera nung arem.

31Aser Yihusua mapang ajak nung aser Yihusua sülen aliba tamburtem mapang ajak nung Israeli Kibuba tenzük; aser pai Israel asoshi inyakba mapa ajak meteta liasü.

32  Aser Israel chirtem Ijip nungi bener aruba Yosef teret Shekem tebu Hamor jabasotem nungi Yakobi sen noklang ka agi aliba ali tila ka Shekem nung arem; aser itemji Yosef semchir senmang aküm.

33Aser Aron jabaso Eleazar asü, pa nem agütsüba Efraim tenem lima nung pa jabaso Finehas tenem nung parnoki pa arem.