Tenüngsang Ken 1-150

TENÜNGSANG KEN

OKILA           

TENÜNGSANG KEN kaket ya ken aser sarasademba kaket ka lir. Ibai mapang talangka tezϋlur balalai mapang balala nung bendena yutsϋba ϋr. Sarasademba aser ken balala nisung balalai atenba itemji tesϋlen Israel nϋburtemi bendena parnok tekϋlem nung amshia aru.

Item tamangba yimsϋ atema yangluba sangrutemji ano tapu balala lir, tenϋngsang agϋtsϋba ken aser Tsüngrem kϋlemdang atenba; teyari asoshi sarasademba, tekϋmzϋk aser tekϋmtet, temenen nangzϋkba, Tsϋngrem temoatsϋ asoshi TENÜNGSANG agϋtsϋba ken aser tsϋkchir asoshi mepishitsϋba. Item ajakji kija aser lokti ajonga asoshi, kari nisung kar den kanga junga sentaktepa aliba, aser kari Tsüngrem nüburtem taginϋba indang ashibatem lir. Yisuia iba tenϋngsang ken nungi sayua liasϋ aser Tasen Lai zϋlurtemi iba nungi agiteta amshi.

            Keta  Alibatem

TENÜNGSANG KEN 1-41

TENÜNGSANG KEN 42-72

TENÜNGSANG KEN 73-89

TENÜNGSANG KEN 90-106

TENÜNGSANG KEN 107-150

        Keta  Alibatem

(SHILEM KA: 1-41) TENÜNGSANG KEN 1-41
Chichiba Tepela TENÜNGSANG KEN 1
Tsüngrem-i Shimtetba Chuba TENÜNGSANG KEN 2
Absalom nungi jena aodang Dawidi atenba: Anepdang Sarasadem (2 Sa.15:13-17:22) TENÜNGSANG KEN 3
Dawid Ken: Nikongdang Sarasadem TENÜNGSANG KEN 4
Dawid Ken: Teyari Asoshi Sarasademba TENÜNGSANG KEN 5
Dawid Ken: Timtem Mapang Sarasademba TENÜNGSANG KEN 6
Dawid Ken:Ochi asoshi Sarasademba TENÜNGSANG KEN 7
Dawid Ken: Tsüngrem Sentsüwangshiba TENÜNGSANG KEN 8
Dawid Ken: Tsüngrem Tenüng Sangang TENÜNGSANG KEN 9
Ochiba Asoshi Sarasademba: TENÜNGSANG KEN 10
Dawid Ken: KIUBA Dak Tamang Akaba TENÜNGSANG KEN 11
Dawid Ken: Teyari asoshi Sarasademba TENÜNGSANG KEN 12
Dawid Ken: Tamang Katetba Temeshiba TENÜNGSANG KEN 13
Dawid Ken: Suwar Nisung (TKen. 53) TENÜNGSANG KEN 14
Dawid Ken: KIBUBAi kechi Akanger TENÜNGSANG KEN 15
DawidKen: Tamang Katetba Sarasadem TENÜNGSANG KEN 16
Dawid Ken: Ochishir Sarasadem TENÜNGSANG KEN 17
Dawidi Takok Anguba Ken  (2 Sa.22:1-51) TENÜNGSANG KEN 18
DawidKen:Teyangluba Madak Tsüngrem Sentsüwangshi. TENÜNGSANG KEN 19
Dawid Ken: Takok asoshi Sarasademba TENÜNGSANG KEN 20
Dawid Ken: Takok asoshi Tenüng Asangba TENÜNGSANG KEN 21
DawidKen: Timtem aser Tenüngsang TENÜNGSANG KEN 22
Dawid Ken: Sannüker Tajung TENÜNGSANG KEN 23
Dawid Ken: KIBUBAji Alima Chuba Lir TENÜNGSANG KEN 24
Dawid Ken: Teyari asoshi Sarasademba TENÜNGSANG KEN 25
Dawid Ken: Ochishir Nisung Sarasadem TENÜNGSANG KEN 26
Dawid Ken: Tenüngsang Sarasadem TENÜNGSANG KEN 27
Dawid Ken: Teyari asoshi Sarasademba TENÜNGSANG KEN 28
Dawid Ken: Tsüngmok Nung KIBUBA Ola TENÜNGSANG KEN 29
Dawid Ken: Tenüngsang Agütsüba Sarasadem TENÜNGSANG KEN 30
Dawid Ken: Tamang Akaba Sarasadem TENÜNGSANG KEN 31
Dawid Ken: Tatok Anguba Tepela TENÜNGSANG KEN 32
Dawid Ken: Tenüngsang Agütsüba Ken TENÜNGSANG KEN 33
Dawid Ken: KIBUBAji Tushiang TENÜNGSANG KEN 34
Dawid Ken: Teyari Asoshi Sarasademba TENÜNGSANG KEN 35
Dawid Ken: Meimchir Tamashi TENÜNGSANG KEN 36
Tsüngrem Ajungba Indang TENÜNGSANG KEN 36:5-12
Dawid Ken: KIBUBA Dak Amangang TENÜNGSANG KEN 37
Dawid Ken: Timtemba Nisung Sarasadem TENÜNGSANG KEN 38
Dawid Ken: Tatokba Asoshi Sarasadem TENÜNGSANG KEN 39
DawidKen: Tenüingsangba Ken TENÜNGSANG KEN 40
Teyari asoshi Sarasademba (TKe.70) TENÜNGSANG KEN 40:12-17
Dawid Ken: Shirangba Mapang Sarasadem TENÜNGSANG KEN 41
(SHILEM ANA: 42-72) TENÜNGSANG KEN 42-72
Kora Chirtem,Ken: Tsüngrem Asoshi Yongyaba TENÜNGSANG KEN 42
Kora Chirtem Ken: Timtem Mapang Sarsademba TENÜNGSANG KEN 43
Kora Chirtem Ken: Teyari Asoshi Sarasademba TENÜNGSANG KEN 44
Kora Chirtemi Atenba Nüknarar Ken: Chuba Kiyimba Ken TENÜNGSANG KEN 45
Kora Chirtem Ken: Tsüngrem Asen Atsükokdak TENÜNGSANG KEN 46
Kora Chirtem Ken: KIBUBAji Tematiba Chuba TENÜNGSANG KEN 47
Kora Chirtem Ken: Tsüngrem Yimti Zion TENÜNGSANG KEN 48
Kora Chirtem Ken: Rongsen dak Temulung Telem TENÜNGSANG KEN 49
Asaf Ken: Chichiba Tekülem TENÜNGSANG KEN 50
Dawid Ken: Temenen Nangzϋkba Sarasadem TENÜNGSANG KEN 51
Dawid Ken: Tsüngremer Obendangba aser Taochi TENÜNGSANG KEN 52
Dawid Ken: Suwar Nisung (TKe.14) TENÜNGSANG KEN 53
Dawid Ken: Tsükchirtem nungi Kümzüktsü Sarasademba TENÜNGSANG KEN 54
Dawid Ken: Rishikangshi Mapang Sarasademba TENÜNGSANG KEN 55
Dawid Ken: Tsüngrem Dak Tamang Akaba TENÜNGSANG KEN 56
Dawid Ken: Teyari Asoshi Sarasademba TENÜNGSANG KEN 57
Dawid Ken: Tamajunger Merenshitsϋ Sarasademba TENÜNGSANG KEN 58
Dawid Ken: Tekümzük asoshi Saeasademba TENÜNGSANG KEN 59
Dawid Ken: Tekümzük Asoshi Sarasademba TENÜNGSANG KEN 60
Dawid Ken: Tsüngrem Küi Jenokdak TENÜNGSANG KEN 61
Dawid Ken: Tsüngrem Dak Tamang Akaba TENÜNGSANG KEN 62
Dawidi Atenba: Tsüngrem Asoshi Yongyaba TENÜNGSANG KEN 63
Dawid Ken: Teyari Asoshi Sarasademba TENÜNGSANG KEN 64
Dawid Ken; Tenüngsang Agütsüba Ken TENÜNGSANG KEN 65
Tenüngsang Agüja Sarasademba Ken. TENÜNGSANG KEN 66
Tenüngsang Agütsüba Ken TENÜNGSANG KEN 67
Dawid Ken: Takok Anguba Ken TENÜNGSANG KEN 68
Dawid Ken: Teyari Asoshi Ayimtenba TENÜNGSANG KEN 69
Dawid Ken: Teyari Asoshi Sarasademba  (TKen. 40:13-17) TENÜNGSANG KEN 70
Tambur Nisung Sarasademba TENÜNGSANG KEN 71
Solomon Ken: Chuba Asoshi Sarasademba TENÜNGSANG KEN 72
(SHILEM ASEM: 73-89) TENÜNGSANG KEN 73-89
Asaf Ken: Tsüngrem Ochiba TENÜNGSANG KEN 73
Asaf Ken: Israel Kümzüktsü Sarasademba TENÜNGSANG KEN 74
Asaf Ken: Tsungremji Obendangsang TENÜNGSANG KEN 75
Asaf Ken: Tsüngremji Takoksang TENÜNGSANG KEN 76
Asaf Ken: Timtem Mapang Tesünep TENÜNGSANG KEN77
Asaf Ken: Timtem Mapang Tesünep TENÜNGSANG KEN 77
Asaf Ken: Tsüngrem aser Pa Nüburtem TENÜNGSANG KEN 78
Asaf Ken: Israel Kin Asoshi Sarasademba TENÜNGSANG KEN 79
Asaf Ken: Israel Tekümtet Asoshi Sarasademba TENÜNGSANG KEN 80
Asaf Ken: Benjong Asoshi Atenba TENÜNGSANG KEN 81
Asaf Ken: Ochiba Asoshi Sarasademba TENÜNGSANG KEN 82
Asaf Ken: Tsükchir Madak Takok TENÜNGSANG KEN 83
Kora Chirtem Ken: Tsüngrem Ki Asoshi Yongyaba TENÜNGSANG KEN 84
Kora Chirtem Ken: Yimjung Asoshi Sarasademba TENÜNGSANG KEN 85
Dawid Ken: Timtem Mapang Sarasademba TENÜNGSANG KEN 86
Kora Chirtem Ken: Yirusalem Tenüng Asangba TENÜNGSANG KEN 87
Kora Chirtem Ken: Teyari Asoshi Ayimtenba TENÜNGSANG KEN 88
Ezra Yimer Ethan Ken: Kin Timtem Mapang Atenba TENÜNGSANG KEN 89
Dawid Dang Tsüngremer Tenangzükba TENÜNGSANG KEN 89:19-37
Chuba Koktaktsüba Atema Mangyimba TENÜNGSANG KEN 89:38-52 

(SHILEM PEZÜ: 90-106) TENÜNGSANG KEN 90-106
Mosa Ken: Tatem Makaba Tsüngrem TENÜNGSANG KEN 90
Tsüngrem Asen Tekümzüker TENÜNGSANG KEN 91
Tenüngsang Agütsüba Ken TENÜNGSANG KEN 92
Tsüngremer Sentsüwangshi TENÜNGSANG KEN 93
Tsüngremji Alima Obendangsang TENÜNGSANG KEN 94
Tenüng Asangba Ken TENÜNGSANG KEN 95
Tsüngremji Tematiba Chuba (1Pu.16:23-33) TENÜNGSANG KEN 96
Tsüngrem Yimsüsüba Sentsüwangshi TENÜNGSANG KEN 97
KIBUBAi Sayatenya Inyaker TENÜNGSANG KEN 98
KIBUBAji Chuba Lir TENÜNGSANG KEN 99
Tsüngrem Asanen Ayongzükba TENÜNGSANG KEN 100
Dawid Ken: Tetemsü Yimsüsüba TENÜNGSANG KEN 101
Timtem Mapang Sarasademba TENÜNGSANG KEN 102
Dawid Ken: Tsüngrem Ajungba Indang TENÜNGSANG KEN 103
Teyanglur Tenüng Asangba (Lip.1:1-31) TENUNGSANG KEN 104
Tsüngrem Dak Tamang Katetba  (Ani.7:8-11, 10; 1 Pu. 6:8-22) TENUNGSANG KEN 105
KIBUBA Dang Temenen Nangzükba TENUNGSANG KEN 106
(SHILEM PUNGO: 107-150) TENÜNGSANG KEN 107-150
Timtem nungi Kümzükba TENÜNGSANG KEN 107
Dawid Ken: Tsükchir Anema Sarasademba (TKe.57:7-11; 60:5:12) TENÜNGSANG KEN  108
Dawid Ken: Timtemba Nisung Sarasadem TENÜNGSANG KEN 109
Dawid Ken: KIBUBA Aser Pai Shimtetba Chuba (Mat.22:44; TMa.2:34-35) TENUNGSANG KEN 110
KIBUBA Tenüng Asangba TENÜNGSANG KEN 111
Ochishir nisung Temoatsü TENUNGSANG KEN 112
Tsüngrem Sentzüwangshi aser Taochi TENÜNGSANG KEN  113
Tsüngremi Israel Anitetba (Ani.14:1-31) TENÜNGSANG KEN  114
Süngyanglu aser Ochiba Tsüngrem TENÜNGSANG KEN 115
Tasütsü Nungi Kümzükba Nung Tsüngrem Asangba TENÜNGSANG KEN 116
KIBUBA Tenüng Asangba TENÜNGSANG KEN 117
Takok Asoshi Tenüngsang TENÜNGSANG KEN 118
KIBUBA Ozüng TENÜNGSANG KEN 119
KIBUBA Telatetba Obendang Ozüng TENÜNGSANG KEN 119:9-15
KIBUBA Ozüng Nung Tepelatsü TENÜNGSANG KEN 119:17-15
KIBUBA Ozüng Angatsü Terenemba TENÜNGSANG KEN 119:26-40
KIBUBA Ozüng Dak Amangba TENÜNGSANG KEN 119:41-48
KIBUBA Ozüng Dak Tamang Akaba TENÜNGSANG KEN 119:49-56
KIBUBA Ozüng nung Bendanga Agütsüba TENÜNGSANG KEN 119:57-64
KIBlJBA Ozüng Jenjang TENÜNGSANG KEN 119:65-72
KIBUBA Ozüng Ochiba TENÜNGSANG KEN 119:73-80
Tekümzük asoshi Sarasademba TENÜNGSANG KEN 119:81-88
KIBUBA Ozüng Nung Tamang Akaba TENÜNGSANG KEN 119:89-96
KIBUBA Ozüng Meimba TENÜNGSANG KEN 119:97-104
KIBUBA Ozüng Nungi  Tesangwa TENÜNGSANG KEN 119:105-112
KIBUBA Ozüng Nung Tekümzük TENÜNGSANG KEN 119:113-120
KIBUBA Ozüng Tashi Angaba TENÜNGSANG KEN 119:121-128
KIBUBA Ozüng Angatsü Tejangraba TENÜNGSANG KEN 119:129-136
KIBUBA Ozüng Ochiba TENÜNGSANG KEN 119:137-143
Kümzüktsü Asoshi Sarasademba TENÜNGSANG KEN 119:144-152
Teyari asoshi Mepishiba TENÜNGSANG KEN 119:153-160
KIBUBA Asoshi Bendanga Agütsüba TENÜNGSANG KEN 119:161-168
Teyari Asoshi Sarasademba TENÜNGSANG KEN 119:169-176
Teyari Asoshi Sarasademba TENÜNGSANG KEN 120
KIBUBAji Asen Tekümzüker TENÜNGSANG KEN 121
Dawid Ken: Yirusalem Tenüng Asangba TENÜNGSANG KEN 122
Taochi Asoshi Sarasademba TENÜNGSANG KEN 123
DawidKen: Tsüngremji Tekümzüker TENÜNGSANG KEN 124
Tsüngremi Pei Nübur Kümzüker TENÜNGSANG KEN 125
Israel Kümzüktsü Asoshi Sarasademba TENÜNGSANG KEN 126
Solomon Ken: Tsüngremi Dang Kibong Moatsür TENÜNGSANG KEN 127
KIBUBA Nungi Tashi Angaba Sempet TENÜNGSANG KEN 128
Israel Tsükchir Anema Sarasademba TENÜNGSANG KEN 129
Teyari Asoshi Sarasademba TENÜNGSANG KEN 130
Dawid Ken: Ajemalu Tamang Sarasadem TENÜNGSANG KEN 131
Tenla Ki Asoshi Tenüngsang Agütsüba  TENÜNGSANG KEN 132
Dawid Ken: Telungjem Nung Aliba Temoatsü TENÜNGSANG KEN 133
Tsüngrem Tenüng Asangtsü Ajaba TENÜNGSANG KEN 134
Tenüngsang Agütsüba Ken TENÜNGSANG KEN 135
Tenüngsang Agütsüba Ken TENÜNGSANG KEN 136
Israel Tepuokdak Mangyimba TENÜNGSANG KEN 137
Dawid Ken: Tenüngsang Agütsüba TENÜNGSANG KEN 138
Dawid Ken: Ajak Metetsang Tsüngrem TENÜNGSANG KEN 139
Dawid Ken: Tsükchir Nungi Kümzüktsü Sarasademba TENÜNGSANG KEN 140
Dawid Ken: Nikongdang Sarasadem TENÜNGSANG KEN 141
Dawid Ken: Teyari Asoshi Sarasademba TENÜNGSANG KEN 142
Dawid Ken: Teyari asoshi Sarasademba TENÜNGSANG KEN 143
Dawid Ken: Takok Asoshi Tenüngsang Agütsüba TENÜNGSANG KEN 144
Dawid Ken: Tenüngsang Agütsüba Ken  TENÜNSANG KEN 145
Kümzüksang Tsüngrem Asangba TENÜNGSANG KEN 146
Ajak Takoksang Tsüngrem Asangba TENÜNGSANG KEN 147
Teyangluba Ajaki Pa Asangtsü  TENÜNGSANG KEN 148
Tenüngsang Agütsüba Ken TENÜNGSANG KEN 149
KIBUBA sangang TENÜNGSANG KEN 150

TENÜNGSANG KEN 1

SHILEM KA

(TKe. 1—41)

Chichiba Tepela

1Shibai tamajungpur tasa nung mejajar,

mesüra temenenpur lenmang nung menoktaker,

mesüra sensamatsür menden nung mamener,

iba nisungji tepelatsü.

2Saka pai Kibuba ozüng nung jangra atemer,

aser pa ozüng nung mangli-sangwali pai shisadanger.

3  Ayongkhüm nung atemba süngdong,

kobai pei tsüngkhüm nung tejang tangtsür, pa aji mesüka lir,

Pa toa mazülar; pai kechisa inyakdir azükarur.

4 Tamajungpur yamaji masü!

Parnokji mopungi oner aoba tsüksü ama.

5 Anungji tamajungpur obendangdak menokdaktettsü,

mesüra temenenpuri temeshipur mungdang dak menoktaktsü.

6 Kechiaser Kibubai temeshipur lenmang metet,

saka tamajungpur lenmangji samatsü.

TENÜNGSANG KEN 2

Tsüngremi Shimtetba Chuba

1  Kechiba kintemi rongrongteper,

aser nisungtemi amajok nung tasa asar?

2 Kibuba aser pai mezüja shimtetba anema

alima chubatemi noktaker,

aser yimsüsürtemi külemi tasa asar.

3 Parnoki ashir,

“Asenoki parnok talenba raksatsüdi,

aser parnok yimsüsüba asenok dak nungi endokdi.”

4 Kotak yimli nung amenbai menütsür;

Kibubai parnok sensamasatsür.

5 Idangji pai ain adoka parnok arütsütsü aser pa ain adokba

parnok nem tsübudakja ashitsü,

6 “Kü temeshi tenem Zion nung ni kü chuba mendaktsüogo.”

7  Ni Kibuba ozüng metetdaktsütsü:

pai kü dang ashi,

“Na kü jabaso, tanü ni na aso.”

8 Kü dang meshiang, aser kintemji ne senmang kümdaktsüdi,

aser alima tatem tashiji ne meyong asütsü.

9  Nai parnok merang ajok agi raksatsütsü.

Nai parnok ali po ama anüka akusatsütsü.

10 Anungji tang, nenok chubatem shisa ka-ang;

nenok yimsüsürtem kümdangang.

11 Kibubaji tsübuseta tenzükang,

aser atentena pela-ang.

12 Techir dang külemang,

aji oda mesüra pa ain adoka nenok lenmang nung samatsü,

kechiaser pa ain yakta adoktsüsa kar.

Shirnokisa pa dak jenoker parnok tepelatsü.

TENÜNGSANG KEN 3

Absalom Nungi Jena Aodang Dawidi Atenba: Anepdang Sarasadem

(2 Sa. 15.13—17.22)

1 Kibuba, kü tsükchirtem koda tali aküm!

Aikati ni anema apusodagi!

2 Aikati kü indang yamai ashir,

“Tsüngremi pa mekümzüktsü.”

(Selah)

3 Saka na, Oh Kibuba, ni meketa jong lir;

nai kü nem sentsüwangshi agütsü,

aser kü kolak ajungket.

4 Kibuba dang ni tashi agi ayimten,

aser pai pei temeshi tenem nungi kü dang langzü.

(Selah)

5 Ni ontaker aser amua aor;

ni ano saker, kechiaser Kibubai ni kümzüker.

6 Kinük ajaklen ni anema noktakba pur meyirijangsa ter ni metsübutsü.

7 Aramesoang, Oh Kibuba!

Ni kümzükang, Oh kü Tsüngrem!

Kü tsükchir ajak dak nai tenibung nung maokjang;

tamajungpur tepu raksajang.

8 Kibuba nungi tekümtet arur,

ne nüburtem dak ne temoatsü lidakjang.

(Selah)

TENÜNGSANG KEN 4

Dawid Ken: Nikongdang Sarasadem

1 Kodang ni sarasademdir, kü dang langzüang;

Oh kü temeshiba Tsüngrem.

Ni timtem nung alidang nai yari;

Kü dang aochiang aser kü sarasadem angang.

2 Oh nisungtem, nenoki kopiga kü sentsüwangshi ludaktsütsü?

Nenoki kopiga amajok meimtsü,

aser tiyazü benshitsü?

(Selah)

3 Temeshipur Kibubai pei asoshi shimtetogo ta metetang;

Kodang ni Kibuba dang jadir, pai angashitsü.

4  Ain adoka temenen tebenshi;

kodang na yipten nung ondakdir,

ne mulungjang bushiang aser ajemajema liang.

(Selah)

5 Tim tanela agi Kibuba dang tenla-ang,

aser pa dak temulung lemang.

6 Aikati ashir, “Shibai onok dang langka tajung sayutsü?”

Oh Kibuba, ne tejak tesangwaji onok dak yalokjang.

7 Parnok tsük aser yi tali akümdang pelaba dak tali

nai kü mulungjang nung tepela enoktsüogo.

8 Kodang ni ontakdir ni tesünep nung amua odi;

kechiaser Oh Kibuba nai dang ni kümzüka lidaktsür.

TENÜNGSANG KEN 5

Dawid Ken: Teyari Asoshi Sarasademba

1 Oh Kibuba, kü o nung tenarong tenang,

kü tanüngba angang.

2 Teyari asoshi ni ayimtenba ola angang,

kü chuba aser kü Tsüngrem;

Kechiaser ni ne dang sarasademer.

3 Oh Kibuba, anepdang nai kü ola angashir,

anepdang ni kü temepishiba ne dangi abentsü,

aser yongyaseta atatsü.

4 Na tamajung nung pelaba Tsüngrem ka masü;

Ne den temenen alitsü makok.

5 Mezümekümeri ne nükdang menoktaktsü;

Nai temenen benshir ajak sempar.

6 Tiyazü jembirtem ajak nai samatsür;

Azü jangraba aser tekülak Kibubai sempar.

7 Saka nibo ne taochi tulu ajanga ne kidangi aitsü;

Ne temeshi tekülemdak na tsübuseta ni ne dang külemtsü.

8 Oh Kibuba, kü tsükchir jenti ali nung,

ne ochiba dangi ni aniang;

Kü jakdang ne lenmang indanga yanglujang.

9  Parnok tebang nungi adokba o ka danga tamangtsü mali;

Parnok temulung teraksa agi sünga lir.

Parnok trok lapoka aliba leper lir;

Parnok temeli agi tiyazü jembir.

10 Parnok tai ta metetdakjang Oh Tsüngrem;

Parnok tasa agi parnok laodakjang.

Parnok tai jenti asoshi merenshiang,

kechiaser parnoki na anema apuso.

11 Saka shiri ne dak jenoker parnok ajak peladakjang;

Parnok nem tepela ken teti tendakjang.

Shirnoki ne tenüng meimer parnok pelatsüsa ne tekümzükba parnok madak lidakjangma.

12 Kechiaser nai temeshipur moatsür;

Oh Kibuba, jong agi ama ne temeim agi parnok awabanger.

TENÜNGSANG KEN 6

Dawid Ken: Timtem Mapang Sarasademba

1  Oh Kibuba, ne ain adokba agi nai ni tarütsüma,

mesüra ne terasaba agi ni tazüokma.

2 Kü dang aochiang, Oh Kibuba, kechiaser ni lula-a lir;

Ni anebjang Oh Kibuba, kechiaser kü teret kangshir.

3 Kü tanela tekangshi nung lir.

Kopiga, Oh Kibuba, kopiga?

4 Arung aser ni kümzükang Oh Kibuba;

Ne temeim taochi agi ni kümzükangma.

5 Kechiaser tasü yim nung na bilemtetba maka,

shibai sheol nungi na asangtsü?

6 Ni anüngba agi aniseta lir;

Konungamati ni kü yipten nüktzü agi mobanger aser nüktzü agi kü yipten tenlar.

7 Tejashi agi kü nük chilar;

Kü tsükchirtem alibayong kü tenük ajener.

8  Nenok temenen menar ajak ni nungi aenshiang.

Kechiaser Kibubai ni ajepba angashiogo.

9 Kibubai ni mepishiba angashiogo.

Kibubai kü sarasadem langzüogo.

10 Kü tsükchirtem ajak maksü nung akseta alitsü;

Ajongben makmakshishi ajanga parnok aridoktsü.

TENÜNGSANG KEN 7

Dawid Ken: Ochi Asoshi Sarasademba

1 Oh Kibuba kü tsüngrem, ne dak ni jenoker.

Shirnokisa ni arishir, parnok ajak nungi ni kümzükangma.

2 Aji oda mesüra parnoki kü taküm molusongzüi shisatsüba ama,

tekümzüker shinga meli-i anüka shisatsütsü.

3 Oh Kibuba, kü Tsüngrem;

ni ya inyaka lira aser kü dak tai lira,

4 kü dang yimjung nung aliba tembar ka anema ni tai inyaka lira,

mesüra kecha masü nung kü tsükchir meyong rakzüka lira,

5 tsükchiri kü taküm arishidakjang aser ni agidakjang.

Hau, pa nem kü taküm agidakjang aser kü khonang auyi nung lidakjang.

(Selah)

6 Ne ain adok nung aramesoang, Oh Kibuba.

Kü tsükchirtem mit adok anema nai noktakang.

Ni asoshi aramesoang, Oh Kibuba,

kechiaser nai ochiji aginür.

7 Adenshia aliba nüburtemji na anasa noktakdakjang,

Parnok madak temalen nungi yimsü süang.

8 Kibubai nüburtem o bendanger.

Oh Kibuba, kü temeshiba yari aser,

kü tsüngchiba yari o bendangangma.

9  Oh temeshiba Tsüngrem,

shibai shisatsü aser temulungjang bushir,

temenenpur mapatemji tatem kümdakjang,

aser temeshipur kümzüka yuang.

10 Tsüngremji kü jong lir,

shibai temulung tindanger kümzüker.

11 Tsüngremji ochi obendanger lir,

shibai anogoshia temenenpur anema rasar.

12 Nisungi temulung memeyipra,

pai pei nok arangshitsü.

Pai pei lijak azüa arua renemtsü.

13 Pai mim aketba nok o nü renemogo,

pai mi aketba lijak renemogo.

14 Ajiang pa temenen agi mashisa lir,

aser tamajung agi mashisa küma tiyazü aser lendong soogo.

15 Shibai kangla ka tangar asoshi yanglur,

pai yangluba kangla nungji pa asonga lir.

16 Pa mapa tamajung pa dangi meyipa shilanger.

Pa sentong tamajung pa tekolak nung atemer.

17 Pa ochiba yari ni Kibuba nem tenüngsang agütsütsü,

aser Tematiba Kibuba tenüng nung ni ken atentsü.

TENÜNGSANG KEN 8

Dawid Ken: Tsüngrem Sentsüwangshiba

1 Oh Kibuba ozü Kibuba,

alima ajak nung ne tenüng koda tamaren!

Nai ne sentsüwangshi anüngtem temalen adokdaktsür.

2  Ne tsükchir aser ne mangyangertem mokorai kümdaktsütsü asoshi,

kinü aser tanur bang nungi ne nüngsang atener.

3 Kodang nai yangluba anüngtem,

ne teka mapatem, ita aser petinutem indang ni bilemdangdir,

4  nai temulung agütsütsüsa meimchira kechiaka?

Aser nai anebalutsüsa nisung chira kechiaka?

5 Kechiaser nai parnok kotaker dang nungi tera agi dang tekübokba yanglu;

aser parnok nem sentsüwangshi aser tetushi korang semtsür.

6  Ne teka mapatem madak nai parnok kibur kümdaktsüogo;

nai parnok tetsüng kübok kechisarena yutsüogo;

7 San, nashi aser arem shiruru ajak,

8 anüng ozütem aser tzüyim ango;

aser tzüyim lenmangtem nung senzüba ajak.

9 Oh Kibuba, ozü Kibuba,

alima ajak nung ne tenüng koda tamaren lir!

TENÜNGSANG KEN 9

Dawid Ken: Tsüngrem Tenüng Sangang

1 Ni kü mulungjang ajak agi na sangdi, Oh Kibuba.

Ne tesüngmangtsü mapa ajak indang ni ashitsü.

2 Na asoshi ni tepela agi ken tendi,

ne nüngsang ken ni tendi, Oh tematiba Tsüngrem.

3 Kodang kü tsükchir meyip;

parnok ne madang lao aser sama.

4 Kechiaser nai kü tsütsü shia o bendangogo.

Ne chuba menden nungi nai ochi o bendanger.

5 Nai bendanger kintem arütsüogo,

aser tamajungertem samatsüogo.

Nai parnok tenüng tatem makai aidokogo.

6 Tsükchirji tatem makai samatsü.

Nai parnok yimtitem atsüdokogo,

aser parnok meshi meshia amadokogo.

7 Saka Kibubai tatem makai chubar.

O bendangtsü asoshi pai pei chuba menden renemogo.

8 Temeshiba agi pai alima o bendangtsü;

aser pai ochi agi nüburtem madak yimsü asütsü.

9 Ajemrepa alirtem asoshi Kibubaji jenokdak lir,

timtem mapang mitsa tulu.

10 Shirnoki ne tenüng metet,

parnoki ne dak temulung alemtsü.

Kechiaser Kibuba, shirnoki na bushir,

nai parnok kodanga senzüka metoktsütsü.

11 Zion chuba menden nung amenba,

Kibuba dang tenüngsang ken tenang.

Pai inyakba mapatem nübur rongnung ayimokjang.

12 Kechiaser Tsüngremi timtemba pur bilemtettsü.

Parnoki ayimtenba ola pai mamadoker;

aser shiri parnok timtemdaktsür,

pai parnokji merenshitsü.

13 Kü dang aochiang, Oh Kibuba!

Kü tsükchirtemi ni timtemdaktsüba reprangang;

tasütsüba nungi ni kümzükang, Oh Kibuba.

14 Anungji Zion jala süngkhüm nung,

ni ne nüngsang metetdaktsütsü,

aser ne tekümzük nung pelatsü.

15 Pei sasa yangluba kangla nung,

bendanger kintem asongogo.

Parnoki mesanga ayuba sang nung parnok tetsüng puogo.

16 Kibubaji pa ochi obendang agi meteter.

Tamajungerji pei teka mapa nung puogo.

(Higgaion Selah)

17 Tsüngrem amadokba kintem ajak;

tamajungertemji leperi shilangtsü.

18 Nüngdakba purtem tetibo mesendoktsü,

mesüra sensaker teimla tetibo mesamatsü.

19 Aramesoang, Oh Kibuba, nisung nem tekokdaktsü;

kintemji ne madang o bendangdakjang.

20 Parnok tetsübu nung yujang, Oh Kibuba;

kintem nem parnok nisung dang ta metetdakjang

(Selah)

TENÜNGSANG KEN 10

Ochiba Asoshi Sarasademba:

1 Oh Kibuba kechiba na talang nung noktaka alir?

Timtem mapang nung na kechiba atsükadoker?

2 Tamajungeri asüküma sensaker rishikangshir,

parnok tasa nung itemji pudaktsür.

3 Tamajungeri pei mulungi aginüba nung mezümekümer;

merumerur-i Kibuba atakatemer aser magizüker.

4 Tamajungeri pei asüküm nung Kibuba mebushir.

Pai mezümeküma Tsüngrem mali ta pei mulung nung bilemer.

5 Pa lenmang ajak nung azükarur.

Ne obendangba pa dang nungi talang nung lir;

pai tsükchir dang sensaja repranger.

6 Pai pei sasa ashir, “Ni marakzütsü; putu ajak nung ni timtema malitsü.”

7  Atakatem, tiyazü aser tekangshitsü agi pa tebang sünga lir.

Tamajung aser tekülak pa temeli kübok lir.

8 Pai yim anasa nükdanga atar;

tai makar tepsettsü arür amener.

Teyarir malirtem anema pai mita atar.

9 Molusongzüi munger kübok miima aliba ama pai miima atar.

Sensaker aputsü asoshi pai ata-a alir,

pai teyarir malirtemji apur aser atsür aor.

10 Teyarir malirtem pai menüngsatsür,

pa tashi kübok parnok laor.

11 Pai pei sasa ashir, “Tsüngremi amadokogo; pai pei tejak nembanger, aser kodanga mangur.”

12 Aramesoang, Oh Kibuba, ne teka songtokang,

Oh Tsüngrem, timtem nung alirtem tamadok.

13 Kechiba tamajungeri Tsüngrem atalar?

“Pai kü dang kecha mashitsü” ta kechiba pai pei sasa ashir?

14 Saka Oh Kibuba nai timtem aser tejashir dang repranger.

Timtemeri ne nem bendanga agütsür;

tebu malirtem dang nai yarir.

15 Tamajung aser temenen nisung tekaji raksajang.

Parnoki tanaben temenen meinyaktsüsa nai parnok merenshiang.

16 Kibubaji teti tatem maka chuba lir.

Kintem pa lima nungi samatsütsü.

17 Oh Kibuba, ajemaluri mepishiba nai angashitsü,

nai parnok mulungjang tashi ittsütsü.

18 Alima nung aliba nisungi tetsübu mangutsüsa,

tebu malir aser tekangshi nung alir tsütsü ne narong atentsü.

TENÜNGSANG KEN 11

Dawid Ken: Kibuba Dak Tamang Akaba

1 Kibuba dak ni jenoker,

ajangla “Ozü ka ama na tenemi jenang”

ta kodaser nai kü dang ashir.

2 “Kechiaser ajiang tamajungeri parnok lijak azüa arua,

temulung tindanger dak ammang nung akatsü asoshi,

parnoki parnok lijak nung lijakjang janga lir.

3 Kodang kimungji raksadokdir,

temeshi nisungi kechi inyaktet?”

4 Kibubaji pa temeshi tenem nung lir;

Kibubaji pa chuba menden kotak nung lir,

pai nisung chirtem dang meimer,

pa tenük agi nisung chirtem dak repranger.

5 Kibubai temeshipur tendanger,

saka tamajunger shiri azü tokshitsü jangrar parnokji sempar.

6 Tamajunger madaki sang,

mi aser jangrua aliba mitsüktsü lung,

aser mopung tesashi agi tongtsütsü.

7 Kechiaser Kibubaji temeshi lir,

Pai temeshibaji meimer;

tindangeri pa jak angutsü.

TENÜNGSANG KEN 12

Dawid Ken: Teyari asoshi Sarasademba

1 Onok yariang, Kibuba,

kechiaser Tsüngrem tsübur meli-i kümogo;

tamang akartem nisung rongnungi samaogo.

2 Parnok kati ka dang yazür;

tiyazü tebang mechi aser temulung ana tener parnoki jembir.

3 Tiyazü tebangmechi aser asüküm o,

jembir temeli Kibubai leptokjang,

4 Shirnoki ashir, “Onok temeli onoki akoktsü;

Onok tebangmechi onok meyong,

onok madak kibur shiba lir?”

5 Kibubai yamai ashir, “Sensakertem kangshiba yong,

aser makamaiteri anüngba yong,

ni aramesotsü aser parnoki yongyaba jenokdak parnok yutsüdi.”

6 Kibuba oji temerük lir,

mimung nung tenetben tashi molutetba taribi ama lir.

7 Oh Kibuba, nai onok kümzükang,

aser yamala nisungtem nungi onok kümzükangma.

8 Kodang nisungtemi nüngdak makaba mapatem aser temenenji tajung lir ta aji asanger,

idangji tamajungeri ajaklen sadema senzür.

TENÜNGSANG KEN 13

Dawid Ken: Tamang Katetba Temeshiba

1 Oh Kibuba, kopiga nai ni teti asoshi sendoktsü?

Kopiga nai ne tejak kü dang nungi miimtsü?

2 Kopiga ni kü tebilembatem den raratsü

aser anogopiyong kü mulung nung tejashi alitsü?

Kopiga kü tsükchirtemi kü madak takok ngudaktsütsü?

3 Kü dak reprangang aser langzüang,

Oh Kibuba kü Tsüngrem.

Kü tenük sangwajang, mesüra ni tasü yipten nung mejangtsü.

4 Kü tsükchirtemi ashir, “Ni pa kokogo.”

Aser ni alangba ngua kü tsükchirtemi pelateptsü.

5 Saka ne tanen makaba temeim nung ni amanger,

ne tekümtet nung kü mulungjangi pelatsü.

6 Ni Kibuba dang ken atentsü,

kechiaser pai kü dang kanga meimogo.

TENÜNGSANG KEN 14

Dawid Ken: Suwar Nisung

(TKe. 53)

1  Suwari pei mulung nung ashir,

“Tsüngrem mali.”

Parnokji teraksa, parnok mapaji tesempatsü lir;

aser parnok rongnung tajung inyaker shinga mali.

2 Tangatetba aser Tsüngrem bushir kar danga ali mali reprangdangtsü asoshi

Kibubai kotak nungi ajizüka yok.

3 Parnok ajak mashileni meyipogo,

parnok ajak külemi raksaogo;

parnok rongnung tajung inyaker ka danga mali,

hau ka danga mali.

4 Tamajung inyakertem dakji shisatsü mali asü?

Shiri amtsük achiba ama kü nübur meyoker aser Kibuba dang majar.

5 Yangji parnok tetsübu tulu nung alitsü,

kechiaser temeshi putu den Kibuba dena alir.

6 Nenoki sensakertem sentong raksatsür,

saka Kibubaji parnok jenokdak lir.

7 Oh, Israel tekümtet Zion nungi arulasang!

Kodang Kibubai pei nübur tia yanglutsüdir,

Yakobi lungsoteptsü aser Israeli pelateptsü!

TENÜNGSANG KEN 15

Dawid Ken: Kibubai Kechi Akhanger?

1 Kibuba, ne kidangi aitsüsa shiba temsüa ali?

Mesüra ne temeshi tenem nung shiba alitsü?

2 Shibai indang indanga jajar,

aser temeshi mapa inyaker,

shibai pei mulungjang nungi ochi jembir,

3 aser pei temeli nung tiyazü mali,

mesüra pei tembar dang tamajung meinyaker,

mesüra pei kiyonger den mebangsenteper,

4 shibai tamajungpur sempar,

saka shibai Kibuba tsübur, pa dang akhümtsübur,

pei akoksatsüsa kümaka shibai pei azüngashiba memelenshir,

5 shibai pei sen sentem keter maputsür,

aser tai makar anema süpokrem magizüker.

Shibai itemi inyakdir, pa kodanga marakzütsü.

TENÜNGSANG KEN 16

Dawid Ken: Tamang Katetba Sarasadem

1 Ni kümzükang Oh Tsüngrem,

kechiaser ni ne dak jenoker.

2 Ni Kibuba dang ashir, “Na kü Kibuba;

ne dak alema tajung kecha melika.”

3 Kibubar tamang katetba temeshipurtemji koda tamaren!

Parnok dak kü tepela ajak lir.

4 Shiri tangar tsüngremtem sülen anidaker,

parnok tejashi tali akümtsü.

Ni parnok tetepsetba tenlatem nung matentsü;

mesüra kü tebangmechi-i parnok tenüng metetshitsü.

5 Kibuba, kü senmang aser kü marok,

kü tarutsü tia nai dang kümzüka ayur.

6 Tasadangba lisüji ni asoshi tajung dak tsükogo;

atangji ni jangratemtsü senmang ka kar.

7 Ni Kibuba sangdi, shibai ni süneptsür;

aonung kü mulungjangi kü dang sayur.

8  Ni Kibubaji kü jakdang maneni ayutsü;

kechiaser pa kü teka tajichilen alinung ni marakzütsü.

9 Aji asünung kü mulung pelar aser kü nela pelaseter,

kü temanga teimla nung anisüngzüktsü.

10  Kechiaser nai kü nela sheol nungi kümzüktsü;

ne tadenba nung tabensa tepela lir.

11 Nai kü dang taküm lenmang sayur;

ne tatenba agi ni peladaktsür,

ne teka tajichi nung tatem maka jangratemtsü lir.

TENÜNGSANG KEN 17

Dawid Ken: Ochishir Sarasadem

1 Oh Kibuba, Ochiba asoshi ni mepishiba angang;

ni ayimtenba angang.

Kü sarasademba angang,

kechiaser tiyazü jembiba nungi kü tebangmechi pila-a lir.

2 Kü obendangba ne dak nungi adokdakjang;

kechi ochi lir ne nüki ngudakjang.

3 Nai kü mulung tendanga, aonung nai ni atidangra,

nai ni tendangaka, nai kü dak tamajung kecha mangutsü.

Kü bangi temenen memenatsü ni mulungtetogo.

4 Nebang nungi adokba otem ni rizünga ayur;

aser tesashir lenmangtem nungi ni kü sasa pilaogo.

5 Ne lenmangtem nung ni kümdanga jajaogo,

anungji kü tsüng majudok.

6 Ni ne dang ajar, Oh Tsüngrem,

kechiaser nai kü dang langzütsü;

ne tenarong kü tsütsü shiang aser kü ola angang.

7 Ne tesüngmangtsü temeim kü dang sayuang;

ne dak shiri jenoker parnok anema apusortem nungi nai ne teka tajichi

agi parnok kümzüker.

8 Ne nükdang tenükshitsü ka ama nai ni kümzükang;

ne tashikang akhüm nung ni jenokdakjang,

9 oda ni kangshir tamajunger nungi,

aser tesashi tsükchiri ni meketbangba nungi.

10 Parnok mulung nung taochi maka,

aser parnoki ngasangatem o jembir.

11 Ni kolenisa odir parnoki ni meketbanger;

ni ali nung laodaktsütsü asoshi parnoki tenük yoker.

12 Anüka shisatsütsü yongyaba molusongzü ama parnokji lir,

atsüka ataba molusongzü pungtu mesüka lir.

13 Oh Kibuba, parnok anema apusoang aser parnok laodakjang;

tamajunger nungi ne nok agi ni kümzükang.

14 Oh Kibuba, iba lima taküm nung

pei aginüba ajak akartem nungi ni kümzükang.

Nai rizünga akaba timtem agi parnok merenshiang;

itemji par chirtem asoshi teperi kümdakjang,

aser parnok semchirtem asoshi anünga yujang.

15 Ni asoshibo temeshiba sempetji ne tejak angutsübaji lir;

kodang ni sakdir, na nüklai arua ni pelatsü.

TENÜNGSANG KEN 18

Dawidi Takok Anguba Ken

(2 Sa. 22.1-51)

1 Ni na meimer, Oh Kibuba, kü tashi;

2 Kibuba kü lung, aser kü mitsa, aser kü kümzükba;

kü Tsüngrem, kü Lung, shiba dak ni jenoker.

Pa kü Jong, ni kümzükba jangzü, kü tashi tait mitsa.

3 Ni Kibuba dang jadi, shiba tenüng asangtsü tetemsü.

Anungji kü tsükchirtem nungi ni kümzüka alitsü.

4 Tasüba lisüi ni naibang;

teraksatsüba tzüsemi ni anema ayimer.

5 Sheol lisü agi ni meketbang;

tasüba sang kü dangi aru.

6 Kü timtem nung ni Kibuba dang aja;

teyari asoshi ni kü Tsüngrem dang ayimten;

pai pa tenla ki nungi kü ola angashi;

teyari asoshi ni ayimtenba pai angashi.

7 Idangji alimai atenten aser anokshi,

tenem tamentakdaktemi atenten;

aser anokshi kechiaser Tsüngremi ain adoka liasü.

8 Pa teni nungi mokozü adok,

pa tebang nungi milak aser jangrua aliba mijang adok.

9 Pai anüngtemji rakpoka alu,

aser pa tetsüng kübok mepet tanak liasü.

10 Pai cherubim ka dak sanger yima ao,

pai mopung tashikang nung sanger ao.

11 Pa meketbangtsü asoshi pai tammangji yanglu,

pa meketa mepet tanak temelem tzü agi sünga liasü.

12 Pa jakdang nungi prangshiba tsüngpret mi

aser rürlung adok, aser mepet tammangji ajanga ao.

13 Kibubai anüngtem nungi tsüngmok aten,

tematibai ola adokbaji rürlong aser jangrua aliba mijang liasü.

14 Pai lijakjang yok, aser tsükchirtemji prokshidaktsü.

Pai tsüngpret pret aser parnok asemtepa odaktsü.

15 Nai arütsü nung Oh Kibuba,

ne teni nungi tangula saloktsü nung;

tzüyim bonglang angu, aser alima tamentakdak mangsa aküm.

16 Pai temalen talang nungi songtok aser kü dak amet,

pai tzü tarok nungi ni atsütet.

17 Kü tsükchir tashi tait nungi,

aser tashi tulu kü sempartem nungi ni kümzük.

18 Kü lendong anogo nung parnoki ni anema aru,

saka Kibuba kü teyarir liasü.

19 Pai ni tesadem tesem kati anir adok;

pai kü dang pela nung pai ni kümzük.

20 Kibubai kü temeshiba yari kü nem sempet agütsüogo,

kü teka merükba yari pai kü nem meyipa agütsüogo.

21 Kechiaser ni Kibuba lenmangtem yuogo,

ni kü Tsüngrem nungi asüküma meyipa mao.

22 Pa ozüngtem ajak kü jakdang liasü,

pa temelabatem nungi ni meyipa mao.

23 Ni pa tsüngdang tai makai liasü,

kechiaser ni kü sasa tai nungi pila-a liasü.

24 Anungji kü temepishiba yari aser kü teka merükba yari,

Kibubai kü nem sempet agütsüogo.

25 Tamang katetertem dang na tamang katetba ama sayur,

tai makartem dang na tai makaba ama sayur.

26 Temerükertem dang na temerük ama sayur,

saka tekiraker dang na tekirak ama sayur.

27 Nai ajemalurtem kümzüker,

saka mezümekümer nai anizüktsü.

28 Oh Kibuba, nai kü milen sangwatsütsü,

Kibuba Tsüngremi kü tamang sangwatsü.

29 Kechiyong ne teyari ajanga ni temeranger telok ka koktettsü,

kü Tsüngrem denbo ni yimti jaratem pungdanga aotsü.

30 Tsüngrem mapabo tabensa lir, Kibuba O shitak.

Shiri pa dak jenoker parnok asoshi paji jong lir.

31 Kechiaser Kibuba dak alema shiba Tsüngrem lir?

Aser asen Tsüngrem dak alaka shiba lung lir?

32 Shibai ni tashi agi nangri kangtsür;

aser kü lenmang tabensa kümdaktsür ibaji Tsüngrem lir.

33  Pai kü tetsüng mesü tetsüng ama kümdaktsür,

aser tenem kolak ma nung ni noktakdaktsür.

34 Pai ni tongbang asoshi renemtsür,

anungji ni yongmenyin lasang azüa arutsü.

35 Nai ne tekümzük jong kü nem agütsüogo,

ne teka tajichi agi ni sotogo;

ne ajemalu agi ni uludaktsüogo.

36 Nai kü kübok kü mera sadema kümdaktsüogo,

anungji kü tetsüng majudok.

37 Ni kü tsükchirtem arishi aser parnok menep;

parnok mesamatsü tashi ni memeyip.

38 Parnok mesaktettsüsa ni parnok ajensatsü;

parnok kü tsüng kübok lao.

39 Tongbang asoshi tashi agi nai ni nangri kangtsü;

kü anemertem nai kü tsüng kübok yutsüogo.

40 Nai kü tsükchirtem kü tsütsü tesülen shidaktsü,

anungji ni sempartem ni leptoktsüogo.

41 Teyari asoshi parnoki ayimten,

saka parnok kümzüktsü shinga maliasü,

Kibuba dang parnoki aja,

saka pai parnok dang melangzü.

42 Ni parnok menüngsa,

anungji parnokji mopungi oner aoba auyi ama liasü;

ni parnok dak yimtong nung lishi ama ajemshi.

43 Ni anema noktakba nisungtem nungi nai ni kümzükogo, kintem madak nai ni tekolak kümdaktsüogo;

nübur shirnok ni memetet,

parnok kü küboki aitogo.

44 Parnoki kü ola angashili kü dang angatsü,

bendangertemia kü dang apudaktsü.

45 Bendangertem temulung makai akümtsü,

aser parnok mitsa nungi atentena adoktsü.

46 Kibuba taküm lir! Kü lung tenüng sangang!

Kü Tsüngrem shibai ni kümzüker pa tenüng sangdongang!

47 Shibai kü nem takok agütsür

aser kintem kü kübok yutsür.

48 Shibai kü tsükchir nungi ni kümzüker,

kü tsükchirtem anema nai ni ajungketer;

tesashi nisungtem nungi nai ni kümzüker.

49  Anungji kintem rongnung ni na sangdi, Oh Kibuba,

ni ne tenüng nung tenüngsang ken tendi.

50 Tsüngremi pei chuba nem takok tulu agütsür;

pai mezüja shimtetba Dawid aser pa metsü dang tatem makai yimlibilem sayur.

TENÜNGSANG KEN 19

Dawid Ken: Teyangluba Madak Tsüngrem Sentsüwangshi

1 Anüngtemi Tsüngrem sentsüwangshi metetdaktsür,

iba yagi pai inyakbatem indang sangdonger.

2 Anogo shia iba indang shisatsü sayur,

aser aonung shia ibaji lepshir.

3 Parnok odong mesüra oshi kecha mali,

parnok ola angashitsü makoker.

4  Aji saka parnok ola alima ajak ajanga aor,

aser aji alima ajaklen nungi angashir.

Parnok dak Tsüngremi anü asoshi ki ka yangluogo.

5 Kiyimsang pei kilung nungi adokba ama,

aser tashi tait tasemteper nisung ka;

pei tasazük lenmang nung asemtsü pelaseta adokba ama.

6 Ibai anüng tatem külen nungi adoker,

aser tatem külen tashi alonger;

iba tatsük nungi kecha miima mali.

7 Kibuba ozüngji tetemjen lir,

aser tashi tasen agütsür.

Kibuba temelabatemji temulung alemtsüba lir,

tongmelangertem shisa kadaktsür.

8 Kibubar ozüngtemji tabensa lir,

temulung peladaktsür; tenük asoshi tesangwa;

Kibuba temelabaji temerük lir,

aser temulung nung tangatetba agütsür.

9 Kibuba tsübubaji temerük lir,

ibai teti tatem makai alitsü.

Kibuba obendangbaji ochi aser temeshi lir.

10 Itemji hon temeja dang nungia sentiba,

aser ninang mojitzü temeja dang nungia tanangba lir.

11 Item yagi ne tenzüker kümdangdaktsür,

itemji benshi nung sempet tulu lir.

12 Shibai pa tai ajitettsü akok?

Miima aliba tai nungi ni meshitetjang.

13 Metet-sümonga aibelenba taitem nungi ne tenzüker kümzüka yuang;

item jagi ni tanishidaktsü.

Idangji ni tai meketi alitsü aser ozüng raksaba tulu nungi,

merükteta alitsü.

14 Kü bang nungi adokba otem,

aser kü mulung nung bilemdangbatemji,

ne madang tagizüktettsü kümdakjang,

Oh Kibuba, kü lung aser kü alangzüksang.

TENÜNGSANG KEN 20

Dawid Ken: Takok Asoshi Sarasademba

1 Timtem anogo nung Kibubai ne dang langzüang,

Yakob Tsüngremi na kümzükangma.

2 Temeshidak nungi pai ne dangi teyari yokdakjang,

aser zion nungi teyari arudakjangma.

3 Ne tenla ajak pai bilemtetdakjang,

aser ne tarongba tenlatem pai agizükdakjang

(Selah)

4 Ne mulungjangi aginüba ajak agüjang,

aser ne sentong ajak atalokdakjang.

5 Kodang nai takok ngudir,

onoki tepela agi ayimtentsü,

aser onok Tsüngrem tenüng nung onoki nisan asongtsü.

Nai mepishiba ajak Kibubai atalokjangma.

6 Kibubai pei sasa mezütsüba dang yarir ta ni tang meteter;

pai pei temeshi kotak nungi pa dang langzü,

aser pa tashi-ain tulu agi takok agütsür.

7 Kari talungtsü dak aser kari kor dak temulung alemer,

saka onokibo Kibuba ozü Tsüngrem tenüng nung temulung alemer.

8 Item nisungtemji metsüdaktsü aser alangtsü,

saka onokbo tashi ita noktaktsü.

9 Oh Kibuba, chubaji kümzükang;

kodang onoki jadir Pai onok dang langzüangma.

TENÜNGSANG KEN 20

Dawid Ken: Takok Asoshi Sarasademba

1 Timtem anogo nung Kibubai ne dang langzüang,

Yakob Tsüngremi na kümzükangma.

2 Temeshidak nungi pai ne dangi teyari yokdakjang,

aser zion nungi teyari arudakjangma.

3 Ne tenla ajak pai bilemtetdakjang,

aser ne tarongba tenlatem pai agizükdakjang

(Selah)

4 Ne mulungjangi aginüba ajak agüjang,

aser ne sentong ajak atalokdakjang.

5 Kodang nai takok ngudir,

onoki tepela agi ayimtentsü,

aser onok Tsüngrem tenüng nung onoki nisan asongtsü.

Nai mepishiba ajak Kibubai atalokjangma.

6 Kibubai pei sasa mezütsüba dang yarir ta ni tang meteter;

pai pei temeshi kotak nungi pa dang langzü,

aser pa tashi-ain tulu agi takok agütsür.

7 Kari talungtsü dak aser kari kor dak temulung alemer,

saka onokibo Kibuba ozü Tsüngrem tenüng nung temulung alemer.

8 Item nisungtemji metsüdaktsü aser alangtsü,

saka onokbo tashi ita noktaktsü.

9 Oh Kibuba, chubaji kümzükang;

kodang onoki jadir Pai onok dang langzüangma.

TENÜNGSANG KEN 22

Dawid Ken: Timtem Aser Tenüngsang

1  Kü Tsüngrem, kü Tsüngrem, kechiba nai ni toktsür?

Ni kümzüktsü aser kü tanüngba ola nungi kechiba na papigati pilar?

2 Oh kü Tsüngrem,

ni anüngdang ayimtener,

saka nai melangzür,

aonung ni ajar, saka anisüngzük mangur.

3 Saka na temeshisang lir,

shiba Israel tenüngsangma nung mena lir.

4 Ozü tsüraburtemi ne dak amang;

parnoki amang aser nai parnok kümzük.

5 Parnoki ne dang ayimten aser parnok kümzük;

parnoki ne dak amang aser parnok mak mesüdaktsü.

6 Saka nibo joko nisung ka ama masü,

nisung ajaki atalaba aser mesenmetuba mesen ka lir.

7  Ni angur ajaki ni atala-a menütsür,

parnoki tebang mejuloktsür aser tekolak angümlokja ashir,

8  “Pai Kibuba dang amang; Kibubai pa kümzükdakjang.

Kibubai pa dak temulung achir süra,

pai pa kümzükdakjang.”

9 Saka ni nu menden nungi agitetbaji na lir,

oda kütsü teku nung alidang nungi ne dak amangtsü sayu.

10 Tasodang nungi kü teimla na liasü;

aser tang tashi na kü Tsüngrem lir.

11 Ni nungi talangka pila-a teli,

kechiaser timtem ana nung lir,

aser teyarir shinga mali.

12 Nashi pungchi aikati ni meketbangogo;

tashi tait Bashan nashi pungchi-i ni lungbangogo.

13 Arüa aliba molusongzüi pei chiyungtsü shisaba ama,

kü dang parnoki tebang kaloktsür.

14 Ali nung tzü shitokba ama, kü tashi kümogo.

Kü teret ajak lokshiogo;

kü mulungjang nirep ama lir;

Telunglen ya yimsa-a aor.

15 Kü tashi porep ama kümogo;

aser kü temeli kü tebang tawa nung menaloker;

nai ni tasüba auyi dangi ania aruogo.

16 Tamajunger telok kati ni lungbangogo;

azü lokti-i ama parnoki ni meketbangogo,

parnoki kü teka aser tetsüng nung tsüngogo.

17 Ni kü teret ajak züngdangteter;

nisungtemi kü dak rangshia ajir.

18  Parnoki kü sobutsü parnok rongnung lemsar,

aser kü sepoksü atema parnoki an toktanger.

19 Saka na Oh Kibuba,

ni nungi pela-a teli;

Oh kü tashi, yakta arua ni yariang.

20 Kü nela nok nungi kümzükang;

item azütem tashi nungi kü taküm kümzükang.

21 Molusongzü bang nungi ni kümzükang;

arem nashi pungchi tezü nungi nai kümzükang.

22  Ni kü adianutem dang ne nüng metetdaktsüdi;

telok nung ni na sangdi.

23 Nenok Kibuba tsüburtemi pa sangang!

Nenok Yakob metsütemi pa sentsüwangshidakjang!

Israel nübur ajaki pa külemang.

24 Kechiaser sensakertem pai mesentok,

mesüra parnok timtem pai mereprangi mali;

pai pa tejak parnok dang nungi memiim,

saka teyari asoshi parnoki ayimtenba pai angashi.

25 Telok tulu nung ni ne nem tenüngsang agütsütsü,

shiri na tsübur parnok tsüngdang ni kü tenangzükba agütsütsü.

26 Sensakertemi achitsü aser tipatemtsü;

shirnoki pa bushir, parnoki Kibuba asangtsü.

Nenok mulungjang teti asoshi lidakjang!

27 Kin ajaki Kibubaji bilemtettsü,

aser alima ajaklen nungi parnoki pa dangi meyiptsü;

kin kidong ajaki pa dang külemtsü.

28 Kechiaser yimliji Kibuba meyong lir,

aser kintem madak pai yimsü asür.

29 Alima nung jangratema alir ajaki pa madang apudaktsü,

auyi dangi alur ajaki pa tsüngdang apudaktsü;

aser kü nelai pa asoshi alitsü.

30 Tarutsü pututemi pa tenzüktsü,

tarutsü putu dang nisungtemi Kibuba indang jembitsü.

31 Ano mesoi aliba nüburtem dang,

pa temeshiba indang aser pa tekümzükba indang sangoktsütsü.

TENÜNGSANG KEN 23

Dawid Ken: Sannüker Tajung

1 Kibuba kü sannüker, ni kechaia manüngtsü.

2  Pai ni rem lanu rongnung mejangdaktsür,

pai ni tzü tasüngtet anasai anir.

3 Pai kü nela süngzükdaktsür.

Pai ni temeshi lenmang nung pa nüng atema anir.

4 Hau, ni tasü ammang ayongkhüm ajanga jaja-aka,

ni kecha lendong metsübutsü;

kechiaser na kü den lir,

ne mechi aser ajok agi ni sünepdaktsür.

5 Nai kü tsükchir jakdang,

kü madang chiyungtsü langbang renemtsür.

Nai kü kolak nung totzü mezütsür,

kü marok moshia lir.

6 Atangji tajung aser taochi kü arishi tepiyong kü sülen anitaktsü;

aser ni Kibuba kidang teti alitsü.

TENÜNGSANG KEN 24

Dawid Ken: Kibubaji Alima Chuba Lir

1  Alima aser yangji aliba,

alima aser yangji alirtem Kibuba meyong lir.

2 Kechiaser pai aji tzüyim manung,

aser ayongtem manung yanglu.

3 Kibuba tenemi shiba atutsü

pa temeshidak shiba noktaktsü?

4  Shiba teka nung ar mali aser temulung temerük lir,

shiba dak tiyazü mulungsentsü mali,

mesüra tekülak agi azüngashi masür.

5 Pai Kibuba nungi temoatsü agizüktsü,

aser pa kümtetdakba Tsüngrem nungi temeshiba angutsü.

6 Shiri pa bushir, shiri Yakob Tsüngrem tejak bushir,

parnok putu yamaji alitsü.

(Selah)

7 Oh Süngkhümtem, nenok kishi lapokang;

akhi kishitem nenok kolak aka asoang;

aser sentsüwangshi chuba aittsü.

8 Sentsüwangshi chubaji shiba?

Kibuba tashi tait tulusang,

Kibuba rara nung takoksang.

9 Oh Süngkhümtem nenok kishi lapokang,

sentsüwangshi Chubaji aitettsüsa,

nenok akhi kishitem, tekolak aka-asoang.

10 Sentsüwangshi chubaji shiba?

Kibuba tulusang pa sentsüwangshi chubaji lir.

TENÜNGSANG KEN 25

Dawid Ken: Teyari Asoshi Sarasademba

1 Oh Kibuba, ni ne dangi kü nela aka asor;

2 Oh kü Tsüngrem, ni ne dak amanger,

ni mak tesüdaktsü, mesüra kü tsükchiri kü madak takok tengudaktsü.

3 Shirnoki ne dak imlar parnok mak tesüdaktsü,

saka shirnoki na anema apusor parnok maak südakjang.

4 Oh Kibuba, ne lenmangtem kü dang sayuang,

itemji kü nem metetdakjang.

5 Ne ochiba lenmangi ni aniang aser kü dang sayuang,

kechiaser na kü tekümtet Tsüngrem lir;

aser anogo tepiyong ni na asoshi atar.

6 Oh Kibuba, ne taochi aser temeim bilemtetang,

koba nai akhidang nungi sayuogo.

7 Oh Kibuba, na ajungba aser temeim yari kü lanuwa temenen aser tai tebilemtetma;

saka ne taochi yari ni bilemtetangma.

8 Kibubaji tajung aser tindang lir;

anungji pai temenen purtem dang lenmang sayur.

9 Ajemalurtem pai ochiba lenmangi anir,

aser sensakertem dang pai lenmang sayur.

10 Shiri Kibuba tezüngzüktepba aser ozüngtem benshir,

parnok asoshi pa lenmangtem temeim aser ochi lir.

11 Oh Kibuba, ne tenüng atema,

kü temenen tulu liaka itemji tokangma.

12 Nisung shia shibai Kibuba tsübur,

pai koba lenmang shimtsü pai pa dang sayutsü.

13 Pa takümji azükaru nung alitsü,

aser pa metsüi alima senmangji amangtsü.

14 Shiri Kibuba tsübur parnokji pa tembar lir,

aser pai parnok dang pa tezüngzüktepba metetdaktsütsü.

15 Kü tenük teti Kibuba dak lir,

kechiaser pai dang kü tsüng sang nungi agitettsü.

16 Kü dangi meyipang aser kü dang aochiang,

kechiaser ni azüngmeyaka aser kangshia lir.

17 Kü mulung timtem züina lir,

kü timtem nungi ni anitetang.

18 Kü timtem aser tekangshi indang bilemdangang,

aser kü temenen ajak tokangma.

19 Kü tsükchirtem koda renloker reprangang,

aser parnoki koda sashia ni sempar.

20 Kü taküm sotang aser ni kümzükang;

ni mak tesüdaktsü, kechiaser ni ne dak jenoker.

21 Temeshiba aser ochibai ni kümzükangma,

kechiaser kü teimla ne dak lir.

22 Israel kümzükang, Oh Tsüngrem,

parnok timtem ajak nungi.

(Selah)

TENÜNGSANG KEN 26

Dawid Ken: Ochishir Nisung Sarasadem

1 Oh Kibuba, kü o bendangang,

kechiaser ni ochi nung jajaogo;

Ni marendaki Kibuba dang amangogo.

2 Ni atitangang Oh Kibuba, aser ni tendangang,

kü mulungjang aser tebilemba tendangang.

3 Kechiaser ne temeim kü nükdang lir,

aser ni ne ochiba nung maneni jajar.

4 Tiyazü nisungtem den ni mamener,

mesüra anemsürtem den ni memedemer.

5 Temenen inyaker telokji ni sempar,

aser tamajunger den külemi ni mamentsü.

6 Oh Kibuba, tai makaba nung kü teka metsüker,

aser ne tekülemdaki aor den adener.

7 Ne nüngsang ken tashi agi tena,

aser ne tesüngmangtsü mapa ajak indang ashitsü.

8 Oh Kibuba, na aliba ki, kong ne sentsüwangshi alir,

ni ibaji meimer.

9 Temenenpurtem den kü tanela tanima,

mesüra azü jangraba nisungtem nungi ni kümzükangma;

10 Shirnok teka agi teti tamajung inyaker,

shirnok teka tajichi süpokrem agi sünga lir.

11 Saka nibo ochi nung jajaogo,

kü dang aochiang aser ni kümzükang.

12 Kü tetsüng shitak nung noktaka lir,

telok tulu nung ni Kibuba asangtsü.

TENÜNGSANG KEN 27

Dawid Ken: Tenüngsang Sarasadem

1 Kibubaji kü tesangwa aser kü tekümtet lir;

ni shiba tsübutsü?

Kibubaji kü taküm jenokdak ni shiba dang tsübutsü?

2 Kodang temenen nisungtemi kü shi achitsü ni anema arudir,

kodang kü arür aser tsükchirtemi ni anema apusodir,

parnok metsüdaktsü aser alangtsü.

3 Temeranger telok kati ni meketbangaka,

kü mulungi metsübutsü;

ni anema rara adokaka,

ni Tsüngrem dak tamang ayutsü.

4 Ni Kibuba dang langka asüngdangogo,

ni ibaji bushitsü, oda kü arishi anogo tepiyong,

Kibuba kidang lia Kibuba tobur ajungba reprangtsü,

aser tenla kidang pa dang asüngdangtsü.

5 Kechiaser timtem anogo nung pai ni kümzüktsü;

pa tekümlemdak pai ni kümzüka ayutsü aser lungma nung ajungkettsü.

6 Idangji ni meketa aliba tsükchirtem madak ni takok angutsü,

pa tekümlemdak ni tepela ola den tenla agütsütsü,

ni ken atentsü, ni Kibuba nüngsang ken atentsü.

7 Oh Kibuba, kodang ni jadir kü dang angang,

kü dang aochiang aser langzüang.

8 “Kü tejak bushiang” ta nai ashidang,

kü mulungi ne dang ashi,

“Oh Kibuba ni ne tejak bushidi”

9 Kü dang nungi ne tejak temiim,

ain adoka ne tenzüker teindok;

na kü teyarir süa aruogo,

ni teindok mesüra tesendok,

Oh kü tekümtet Tsüngrem.

10 Kütsü aser kübui ni senzüka yujaka,

saka Kibubai ni asoshi anebalutsü.

11 Kü tsükchirtem alibayong,

Oh Kibuba ne lenmang kü dang sayuang,

aser ni ochiba lenmangi aniangma.

12 Kü tsükchir mulungba nem kü taküm tagütsü,

kechiaser tiyazü kulitemi ni anema amok merener.

13 Ni ya amanger,

ni akümlir lima nung Kibuba ajungba angutsü.

14 Kibuba dak amangang,

tashi itang, aser ne mulung tasü itang;

aser Kibuba dak ne teimla yuang.

TENÜNGSANG KEN 28

Dawid Ken: Teyari Asoshi Sarasademba

1 Oh Kibuba, ni ne dang ajar;

kü lung, kü dang mangai telima.

Nai kü dang ola madoki lira,

kanglai aiba nisungtem ama nia akümtsü.

2 Kodang teyari asoshi ni ayimtendir,

aser ne temeshitiba tsütsü kü teka mekangdir,

kü ola angangma.

3 Tamajung aser temenen inyakertem,

shirnoki pei kiyongertem den yimjung jembir,

saka parnok mulung nung tamajung lir,

parnok den ni anir tuoma.

4  Parnok mapatem aser parnok temenen mapatem yari parnok nem meyipa agüjang.

Parnok teka mapa tamajung yari aser parnok dak alangba yari parnok nem agüjang.

5 Kibubai inyakba aser pai yangluba teka mapatem nung,

parnoki temulung magütsü;

anungji pai parnok raksatsütsü

aser parnok joko meyanglushitsü.

6 Kibuba nem tenüngsang agüjang,

kechiaser ni teyari asoshi ayimtenba pai angashiogo.

7 Kibuba kü tashi aser kü jong,

ni pa dak amanger aser teyari angur.

Kü mulungjang tepela agi sünga lir,

aser ni pa dang tenüngsang ken atentsü.

8 Kibubaji par nübur tashi lir.

Pai mezüja shimtetba pur asoshi tekümtet mitsa.

9 Ne nüburtem kümzükang aser ne senmang moajang;

parnok sannüker na süang aser teti asoshi parnok anebaluang.

TENÜNGSANG KEN 29

Dawid Ken: Tsüngmok Nung Kibuba Ola

1  Kibuba tushiang Oh nenok kotak tsüngrulartem,

pa sentsüwangshi aser tashi tenüng sangang.

2 Pa tenüng dak alangba tetushi Kibuba nem agüjang,

temeshi sobutsü sobur Kibuba külemang.

3 Kibuba ola tzüyimtem madak lir,

sentsüwangshi Tsüngremi tsüngmok atener;

aser pa olaji tzüyim tulutem manung lir.

4 Kibuba olaji tashi-ain lir,

Kibuba olaji tamaren lir.

5 Kibuba olai cedar süngdong raksatsür;

Kibubai Lebanon nung aliba cedar süng anüka raksatsür.

6 Pai Lebanon tenemji nashi chanu ama pungtendaktsütsü,

aser Sirion sümong chanu ama pungtendaktsütsü.

7 Kibuba olaji tsüngpret lashiba ama lir.

8 Kibuba olai lisem lima anokshitsür,

Kibubai Kadesh lisem lima anokshitsür.

9 Kibuba olai sülemdong anokshitsür,

aser min nungji kecha makai kümdaktsür;

aser pa tenla kidang ajaki ashir, “Sentsüwangshi.”

10 Kibubai tzümetsüng madak chuba menden nung amener;

Kibubai tatem makai chubatsü.

11 Kibubai pei nübur nem tashi agütsür;

Kibubai yimjung nung pei nübur moatsür.

TENÜNGSANG KEN 30

Dawid Ken: Tenüngsang Agütsüba Sarasadem

1 Ni na tushidi Oh Kibuba, kechiaser nai ni meso,

aser tsükchirtem kü madak mepeladaktsü.

2 Oh Kibuba, kü Tsüngrem,

teyari asoshi ni ne dang ayimten, aser nai ni anebtsüogo.

3 Oh Kibuba, nai ni Sheol nungi anitet;

kanglai malutsüsa nai kü taküm yutsü.

4 Kibuba dang tenang nenok temeshipurtem;

pa temeshi tenüng sangang.

5 Kechiaser pa ain adok kenpiga dang,

saka pai saklokbajibo taküm tepiyong,

tajepbaji konung dang alitsü,

saka anepdang tepela arur.

6 Ni kü azükaru nung ashir,

“Ni kodanga marakzütsü.”

7 Oh Kibuba kodang nai kü dak saklok,

nai ni tenem tulu ka mesüka kümdaktsü.

Saka kodang nai ne tejak ni nungi miim,

ni temulung makai liasü.

8 Oh Kibuba, ni ne dang ayimten;

teyari asoshi ni Kibuba dang mepishi.

9 Ni kanglai ira kü tasübaji kechi tajangzük ali?

Auyi agi na asangtsü ama?

Mesüra item jagi ne tamang katetba indang sangoktsütsü ama?

10 Oh Kibuba kü dang angang aser aochiang,

Oh Kibuba na kü teyarir süang.

11 Nai kü mangyimba tsüngsangba agi melentsüogo,

nai kü anemsü pungzüktsüogo aser ni tepela agi sobutsü.

12 Anungji ni ola madoki malitsü;

ni ne nüngsang ken atentsü;

Oh Kibuba, kü Tsüngrem, tatem makai ni na asangtsü.

TENÜNGSANG KEN 31

Dawid Ken: Tamang Akaba Sarasadem

1 Oh Kibuba, ni ne dak jenoker;

ni kodanga mak tesüdaktsü;

ne temeshiba nung ni kümzükang.

2 Ne tenarong kü tsütsü shiang,

ni kümzüktsü yakta arung;

ni kümzüktsü asoshi kü jenokdak lung,

aser tashi tait mitsa süang.

3 Kechiaser na kü lung aser kü mitsa,

ne tenüng atema kü dang sayuang aser ni aniang.

4 Ni asoshi yangluba sang nungi ni kümzükang,

kechiaser na kü mitsa.

5  Neka nung ni kü nela yutsür,

ni kümzükang, Oh Kibuba tamang katetba Tsüngrem.

6Amajok süngyanglu külemertem ni sempar;

saka ni Kibuba dak amanger.

7 Ni ne marakzüba temeim nung pelatsü,

kechiaser nai kü timtem nguogo aser

kü tanela tepetzük tia nai nguogo.

8 Nai ni kü tsükchir ket nung mamoktsü;

nai kü tetsüng tesademdak ajemetdaktsü.

9 Kü dang aochiang, Oh Kibuba,

kechiaser ni timtem nung lir;

kü tenük, kü tanela,

aser kü temang tejashi agi tashi mait akümer.

10 Kü taküm tejashi den aser kü arishi tanüngba nung süidaktsür,

kü timtem kü tashi agi metizüker,

aser kü terettem jena akümer.

11 Kü tsükchir ajaki ni züngdokogo,

kü kiyonger tsüngdang ni tesempatsü ka,

aser kü tembartem asoshi ni tetsübutsüka kümogo; yimtong nung shirnoki ni angur parnoki ni nungi ajener.

12 Nibo asür ka ama parnok temulung nungi amadoka lir,

nibo po teraksa ka ama dang lir.

13 Kechiaser aikati nemnemba ni angashir,

ajaklen tetsübutsü dang lir.

Parnoki ni anema tasa asar, aser kü taküm agitsü atonger.

14 Saka ni ne dak amanger, Oh Kibuba,

ni ashir, “Na kü Tsüngrem lir.”

15 Kü mapangtem neka nung lir,

kü tsükchirtem nungi aser ni rishikangshirtem nungi ni kümzükang.

16 Ne tenzüker dak ne tejak yalokjang,

ne marakzüba temeim nung ni kümzükang.

17 Ni mak tesüdaktsü, Oh Kibuba,

kechiaser ni ne dang jaogo.

Tamajungerji maak südakjang;

parnokji asüyimi ola madoki odakjang.

18 Parnok tebangmechi,

kobai temeshipur anema asüküm aser tatala o jembir, ola tatokdaktsü.

19 Na ajungba koda tesüngmangtsü,

koba nai na tsüburtem asoshi rizüng!

Koba nai meimchir madang,

oda ne dak jenokertem asoshi nai inyak.

20 Nai parnok nisung tasa nungi ne talidak miimtsü,

nisung temeli rara nungi nai parnok ne talidak kümzüka ayu.

21 Kibuba nem tenüngsang agüjang,

kechiaser makbanga aliba yimti nung alidang,

pai pa tesüngmangtsü temeim kü dang sayu.

22 Pa jakdang nungi ni aridokogo ta ni tsübuseta bilem,

saka kodang ni teyari asoshi ayimten pai kü ola angashi.

23 Nenok pa temeshipur ajaki Kibubaji meimtsüla,

Kibubai temeshipur kümzüka ayur,

saka asükümer nembo temerenshi moshia meyipa agütsür.

24 Kibuba dak imlar ajak,

tashi itang aser tasü itang.

TENÜNGSANG KEN 32

Dawid Ken: Tatok Anguba Tepela

1  Shiba ozüng raksaba asoshi tatok nguogo,

shiba temenen nembangogo pa tepelatsü.

2 Shiba nem Kibubai tai magütsür,

shiba tanela nung tekülak mali pa tepelatsü.

3 Kodang ni kü temenentem menangzüki ali,

anogo tepiyong anüngba agi ni lurepdaktsü.

4 Kechiaser mangli sangwali aben nai ni merenshi,

meiwa tatsük agi mopung kongdaktsüba ama kü tashi makai kümogo

(Selah)

5 Idangji ni kü temenen ne nem metetdaktsü,

aser ni kü tai miima mayu.

Ni ashi, “Ni kü ozüng raksabatem Kibuba dang nangzüktsü”

aser kü ozüng raksaba tai nai atok.

(Selah)

6 Anungji Tsüngrem tsübur nisung ajaki timtem mapang ne dang sarasademdakjang,

kodang tzümetsüng ama timtem tulu arudir,

iba jagi parnok dak matongtsü.

7 Na kü tatsükokdak, timtem nungi nai ni kümzüka ayur,

tekümzükba kentem agi nai ni meketbanger

(Selah)

8 Kibubai ashir, “Koba lenmangi na aotsü aji ni ne dang sayutsü,

ni na anüktsü aser sayu o ashitsü.

9 Tangatettsü shisatsü maliba kor mesüra gado ama teli,

koba azüoktsü asoshi tanishiba lisü aser temangemba merang dak parnok azüoktsü tashi lir.”

10 Tamajunger asoshi tejashi aika lir,

saka shibai Kibuba dak amanger,

yimlibilem agi pa meketbanger.

11 Nenok temeshipurtem, Kibuba dak temulung chiang aser pela-ang;

nenok temulung tindang purtemi tepela agi ayimtenang.

TENÜNGSANG KEN 33

Dawid Ken: Tenüngsang Agütsüba Ken

1 Oh temeshipur, nenoki Kibuba dang pela-ang;

tindangeri pa asangtsü tapet lir.

2 Kongki agi Kibuba nem tenüngsang agüjang,

lisü ter aketba tzürang kongki agi pa nem tenüngsang agüjang.

3 Pa nem ken tasen ka tenlokjang;

tepela ola tulu den kongki temang,

4 Kechiaser Kibuba o shitak aser ochi lir;

aser pa mapa ajak tamang kateta inyaker.

5 Pai temeshiba aser ochi obendang meimer;

Kibuba yimlibilem agi alimaji sünga lir.

6 Kibuba o agi anüngtemji yanglu;

aser idakji aliba ajak pa tangula agi yanglu.

7 Pai tzüyim tzüji bongdang ka nung ama bendener;

aser azü taroktemji jendang bendener ama.

8 Alima ajaki Kibubaji tsübuang;

alima nung alir ajaki pa tsübudakjang.

9 Kechiaser kodang pai jembi aji adok,

pai ozüng agütsü aser kechisarena adok.

10 Kintem sentongji Kibubai benjatsür,

nisungtem tasaji pai amajok kümdaktsür,

11 Saka Kibuba sentongbo tatem makai alir,

pa mulung nung bilembaji putusa putu majener.

12 Kin koba Tsüngremji Kibuba lir, tepelatsü;

shir kin pa meyong asütsü shimtetogo.

13 Kibubai kotak nungi repranger;

aser meimchir ajak angur.

14 Pa amenba chuba menden nungi,

alima nung alir ajak pai repranger.

15 Pa shibai parnok mulungjang yanglu,

paisa parnok mapa meteter.

16 Chuba shinga pei temeranger telok agi mekümzüker,

mesüra nokinketer ka pei tashi agi mekümzüker.

17 Takok asoshi raraba kortem dak metalokbaji amajok,

kechiaser parnok tashi tulu jagi mekümzüktet.

18 Saka shirnoki pa temeim yimlibilem nung imlar,

parnok madak Kibuba tenük lir.

19 Tasüba nungi parnok kümzüktsü,

aser ayawara nunga parnok taküm lidaktsütsü.

20 Onok tanelai Kibuba asoshi atar,

pa onok teyarir aser jong.

21 Onok temulungjangi pa dak pelar,

kechiaser onoki pa temeshi tenüng nung amanger.

22 Oh Kibuba, onoki ne dak imlaba yari,

ne temeim yimlibilem onok dak lidakjang.

TENÜNGSANG KEN 34

Dawid Ken: Kibubaji Tushiang

1 Ni teti Kibuba nem tenüngsang agütsütsü;

pa nüngsangba maneni kü bang nung alitsü.

2 Kü nelai Kibuba nung sentsüwangshir,

ajemalurtemi aji angashiang aser pela-ang.

3 Kü den külemi Kibuba uluba sangokjang;

asenok külemi pa tenüng tushidi.

4 Ni Kibuba bushi aser pai kü dang langzü;

aser kü tetsübu ajak nungi ni kümzük.

5 Shirnoki pa dak rangloker,

parnok tejak tesangwa alitsü,

aser kodanga akseta malitsü.

6 Iba sensakeri ayimtenba ola Kibubai angashir,

aser pai timtem ajak nungi pa kümzüker.

7 Shiri Kibuba tsübur parnok meketa pa tenyartem alir;

aser parnok kümzüker.

8  Oh, Kibubaji junger ta menakdangang aser metetang,

shibai pa dak jenoker pa tepelatsü.

9 Kibubaji tsübuang,

nenok pa temeshipurtem;

kechiaser shiri pa tsübur,

parnok kecha agia manüngtsü.

10 Molusongzü chanu anünger aser aya agi kangshir;

saka shiri Kibuba bushir,

parnok tajung kecha agia manüngtsü.

11 Tanurtem arung, kü dang angang;

ni nenok dang Kibuba tsübuba sayudi.

12  Nenok shibaisa taküm tajung linür.

Shibai arishi talang aser jangratema linür?

13 Ne temeli tamajung nungi sotang,

aser tekülak jembiba nungi nebangmechi sotang.

14 Tamajung nungi pila-ang aser tajung inyakang;

yimjung bushiang aser aji arishiang.

15 Kibuba tenük temeshipur madak lir,

parnoki ayimtenba tsütsü pa tenarong shia lir.

16 Saka Kibuba tejak,

tamajung inyaker anema lir,

parnok mebilemtettsüsa alima nungi meshimeshia atsüdoktsü.

17 Temeshipurtemi ayimtenba Kibubai angashir;

pai parnok timtem ajak nungi kümzüker.

18 Temulung teraksa nung alir tsütsü Kibuba lir,

aser teimla samar alirtem pai kümzüker.

19 Temeshi nisung ka timtem aika lir,

saka item ajak nungi Kibubai pa kümzüker.

20  Pai pa teret ajak anüker,

parnok ka danga meraksatsü.

21 Temenen agi tamajungerji tepsettsü,

aser shiri temeshipur sempar parnok aitsütsü.

22 Kibubai pa tenzükertem taküm alangzüker,

aser shirisa pa dak jenoker parnok shinga mesamatsü.

TENÜNGSANG KEN 35

Dawid Ken: Teyari Asoshi Sarasademba

1 Oh Kibuba, shiri kü den tokteper, parnok den toktepang;

shiri kü den rarar parnok den rara-ang.

2 Tekümzükba jong aser tezükdokba jong am-ang,

aser kü teyari asoshi aramesoang.

3 Shiri ni arishir parnok anema nü atsütetang,

kü taküm dang shiang,

“Ni ne tekümtet.”

4 Shiri kü taküm bushir,

parnok mak südakjang,

shiri ni timtemdaktsütsü bushir,

parnok maaksü nung meyipdakjang.

5 Parnok Kibuba tenyar madang,

mopungi ona aoba tsüksü ama lidakjang.

6 Kibuba tenyari parnok arishidang,

parnok lenmang tammang aser tanüla lidakjang.

7 Kechiaser kecha masü nung parnoki ni asoshi miima sang ayu,

aser kecha masünung parnoki ni asoshi kangla ka atu.

8 Memeteti pa dangi tesama arudakjang,

aser pai miima yangluba sang nung pa shidakjang.

Kangla nungji pa tsükdakjang.

9 Idangji ni Kibuba dang pelatsü,

aser pa tekümtet nung jangra atemtsü.

10 Kü teret ajaki ashitsü,

“Kibuba na mesüka shiba lir?

Nai tashi maiter tashi taiter nungi kümzüker,

sensaker parnok rishikangshir nungi nai kümzüker.”

11 Tiyazü kulitem ni anema agütsür,

ni kechi memetet, iba indang parnoki kü dang asüngdanger.

12 Parnoki kü nem tajung melen tamajung agütsür,

aser kü nela lurepdaktsür.

13 Saka kodang parnok shirangdir,

ni anem sü abener ajemalua lumir.

Ni kü kolak mechioker sarasademer,

14 Tembar ka mesüra adianu ka ama;

aser pei tetsü asoshi mang ayimba ama,

timtem aser tejashi nung ni apudak.

15 Saka kodang ni metsüdakdir,

parnoki külemi senteper ni menütsür,

ni memetetba kü anemertemi ni anema senteper.

Parnoki tanen makai kü dak azüker.

16 Tsüngrem memetetba pur benjongdak ama,

parnoki kü dak parnok tepu shitepa sayu.

17 Oh Kibuba nai kopiga repranga atatsü?

Parnoki raksatsüba nungi ni kümzükang,

item molusongzütem nungi kü taküm kümzükang.

18 Idangji mungdang tulu nung ni na asangtsü,

nisung aika sendena alidak ni na sangdi.

19  Kü tsükchirtem, shir tiyazürtem lir,

parnok kü madak tepeladaktsü,

kecha masü nung shiri ni sempar,

parnok tenük kü dak teremlokdaktsü.

20 Kechiaser parnoki yimjung indang mejembir,

saka shir linük nung ajem ajema alir,

parnok anema tekülak o jembir.

21 Parnoki kü dak tebang remlokja ashir,

“Ah-ha! Onok tenük agi aji nguogo.”

22 Oh Kibuba nai aji nguogo, mokorai teli;

Oh Kibuba, ni nungi pila-a teli.

23 Arakzüang, Oh Kibuba, aser ni kümzükang.

Kü Tsüngrem aser kü Kibuba,

ni asoshi aramesoang.

24 Oh Kibuba, ne temeshiba yari kü o bendangang,

aser parnok kü madak tepeladaktsü.

25 “Aha,Onoki imlaba ama atalokogo” ta,

parnoki pei temulung nung teshidaktsü,

mesüra onoki pa meyokogo ta teshidaktsü.

26 Kü tejashi madak pelateper ajak külemi mak südakjang.

Shiri ni anema tetushi angu parnok maksü aser tejak ashiba agi sobudakjang.

27 Kü ochi mapa nung shiri pelar parnoki tepela agi maneni ayimtendakjang.

Shiri pa tenzüker yimjung nung aliba ngua pelar parnoki “Kibubaji tulu lir” ta maneni shidakjang.

28 Idangji anogo tepiyong ne temeshiba,

aser ne nüngsang indang kü temeli agi jembitsü.

TENÜNGSANG KEN 36

Dawid Ken: Meimchir Tamashi

1  Tamashi nisung temulungjang telungtiba nung ozüng raksaba temeneni jembir;

pa nükdang Tsüngrem tsübubaji mali.

2 Kechiaser pai pei tai majitettsü,

aser itemji mesembatsü ta pei sasa pei nükdang asanger.

3 Pa tebang nungi adokba otemji tamashi aser tashioktsübatem lir;

pai shisa ka-a aser tajung inyaktsü anenogo.

4 Pai pei yipten nung ontaker tasa tamajung asar,

aser tamajung kata mesendoker.

Tsüngrem Ajungba Indang

5 Oh Kibuba, ne temeimi anüng atonger,

ne temulung lemtetba agi mepettem atonger.

6 Ne temeshibaji Tsüngrem tenemtem ama,

ne obendang tzü tarok ama lir.

Oh Kibuba, nai meimchir aser shiruru kümzüker.

7 Oh Tsüngrem, ne yimlibilem koda senti!

Ne tashikang kübok meimchirtem jenoker.

8 Ne kidang moshia akaba nungi parnok tipatemer,

ne jangra atemba ayong nungi nai parnok nem jemdaktsür.

9 Kechiaser taküm ajak ne dak apok,

ne tesangwa nung onoki tesangwa angur.

10 Shiri na metet parnok den ne temeim maneni liang,

temulung tindangpur den ne temeshiba maneni liang.

11 Asüküm tetsüng ni anema tarudaktsü,

mesüra tamajunger teka agi ni taridokdaktsü.

12 Tai inyakertem laoa alibaji ajiang,

parnok saktsü mokoki laoa lir.

TENÜNGSANG KEN 37

Dawid Ken: Kibuba Dak Amangang

1 Tamajunger asoshi shisa tebulu,

mesüra shiri tai inyaker parnok tenükshi.

2 Kechiaser kopi meli-i ai ama akongtsü,

aser süngo-lio lanu ama parnokji akongtsü.

3 Kibuba dak amangang, aser tajung inyakang;

aji süra na ali nung taso shia alitsü.

4 Kibuba dak pela-ang,

aser pai ne mulungi aginüba agütsütsü.

5 Ne lenmang Kibuba nem bendanga agüjang,

ano pa dak amangang, aser pai aji inyaktsü.

6 Pai ne temeshiba tesangwa ama kümdaktsütsü,

aser ne temedenba anüngdang anü ama kümdaktsütsü.

7 Kibuba madang ajemajema liang,

aser pa dang arema ata-ang.

Kodang nisung kar azükarua ngudir,

aser parnok temenen mapa inyakba nung takok ngudir,

parnok atema tenemnem.

8 Rasaba nungi anenang aser terasaba tokjang,

tenemnem, iba jagi tamajung inyakleni dang anir.

9 Kechiaser tamajung inyakertem leptoktsü,

saka shiri Kibuba dak imladir,

parnoki alima senmangji amangtsü.

10 Kenpiga dang lirbo tamajungji malitsü,

nai pa talidak junga bushiaka nai pa mangutsü.

11  Saka ajemaluri alima senmangji amangtsü,

aser yimjung nung azükarutsü.

12 Tamajungeri ochishir anema tasa asar,

aser pa dak tepu shiloktsür.

13 Saka pa taküm tatem anasa lir ta meteta,

Kibubai pa dak menüloktsür.

14 Sensaker aser timtemer anema tamajungeri nok atsütetaka aser lasang azüa aruaka;

aser ochishirtem tepsettsü merangaka,

15 Parnok nok parnok temulungjangi ateta aitsü,

aser par lasangji ang raksatsü.

16 Temeshipur rongsen ishika akabaji,

tamajungpur rongsen jenti akaba dang taoba;

17 Kechiaser tamajunger nok o nüji raksatsü,

saka Kibubai temeshipurji kümzüker.

18 Tai makar anogotem Kibubai metet,

Parnok senmang tatem makai alitsü.

19T amajung mapang nung parnok tim matemtsü,

ayawara anogotem nunga parnok peria alitsü.

20 Saka tamajungerbo samatsü,

Kibuba anemertemji arem süngo ama samatsü,

mokozü dang nungia tekaraba parnok samatsü.

21 Tamajungeri apur,

saka kodanga meyipa magütsür,

saka temeshi nisungi mulungsoa agütsür.

22 Shirnok Kibubai moatsür parnoki alima senmangji amangtsü,

saka shir pai atakatemer, parnokbo leptoktsü.

23 Nisung ka lenmang nung Kibubai pelara,

pai pa meratemji tashi itdaktsür.

24 Pa metsüdakaka, pa malangtsü,

kechiaser Kibubai pei ket agi pa soter.

25 Tangbo ni tambur kümogo,

saka kü lanuwa nungi temeshipur senzüka yutsüba ni mangu,

mesüra pei chirtem meshimetsüba ni munguka.

26 Pai teti aochir aser mulungsoa aputsür,

par chirtemji teti temoatsü ka-a alitsü.

27 Tamajung nungi pila-ang aser tajung inyakang,

süra na tatem makai alitsü.

28 Kechiaser Kibubai ochishir meimer,

aser pai tamang katetbatem mesendoktsü.

Parnokji tatem makai kümzüka alitsü,

saka tamajunger metsüjibo leptoktsü.

29 Temeshipuri alima senmangji amangtsü,

aser yangji tatem makai alitsü.

30 Temeshipur tebangi shisa taka o jembir,

aser pa temeli agi ochi jembir.

31 Pa Tsüngrem ozüng pa mulung nung lir,

pa tetsüng kodanga majudoktsü.

32 Kodang tamajungeri temeshipur miter,

aser pa tepsettsü bushir;

33 Kibubai pa ket nung pa magütsütsü,

mesüra obendangdak pa maitsütsü.

34 Kibuba asoshi ata-ang aser pa lenmang nung liang,

aser alima senmangji amangtsü asoshi pai na uludaktsütsü;

kodang tamajungpurji leptokdir, nai aji angutsü.

35 Tamajunger nisung ka ni angu;

pa Lebanon nung cedar süngdong ama mesangshia aoba ni nguogo.

36 Saka kodang ni ajagi ao, pa yangji maliasü;

ni pa bushiaka paji mungutet.

37 Nisung tajung aser tindang nisung ajioka yuang;

kechiaser yimjung nisung asoshi tarutsü teimla kar.

38 Saka temenenpur ajak samatsütsü,

tamajunger tarutsüji leptoktsü.

39 Temeshipur tekümtetji Kibuba nungi aru;

timtem mapang nung pa parnok mitsa lir.

40 Kibubai parnok yarir aser kümzüker,

pai parnok tamajungpur nungi kümzüktsü;

kechiaser parnoki pa dak jenok.

TENÜNGSANG KEN 38

Dawid Ken: Timtemba Nisung Sarasadem

1Oh Kibuba, nai ni ain adoka tarütsü,

mesüra nai mit adoka ni temerenshi.

2Kechiaser ne lijakjang agi ni ateta atsünger,

aser ne teka agi kü dak azüker.

3Ne ain adokba yong kü shi nung kecha tesünep mali;

mesüra kü menen aliba yong kü teret nung anisüngzük maka.

4Kechiaser kü tai kü kolaki tuogo;

Khu taret ama, parnok ni asoshi onsara taret.

5Kü tamashiba yong kü zübu,

tesembatsüka aser tamajungba kümogo.

6Ni kanga kangshir aser angümzüka alur;

anogo tepiyong ni mang ayimer.

7Kü teperem twangwangba agi sünga lir,

aser kü shi nung anisüngzük maka.

8Ni lula-a lir, aser kanga raksa-a lir,

kü mulung mesüngjemtetba yong ni anünger.

9Oh Kibuba, kü taginüba ajak ne tsüngdang lir;

kü tanüngba ne madang miima mali.

10Kü mulungjang toktoker,

ni tashi mait akümer;

oda kü tenük tesangwa kü dak nungi pilaa ogo.

11Kü temeimbatem aser kü medemertemi kü

tekangshi nungi talangka pila-a noktaker;

oda kü adianutemia talangka nungi ni ajir.

12Shiri kü taküm bushir parnoki sang asor,

ni raksatsütsü bushirtemi o tamajung jembir;

aser anogo tepiyong tekülak shisadanger.

13Saka tenarong tajaker ama ni mangashir,

temeli tatsük shibai pei tebang melapoker yamaji ni lir.

14Angashitsü makokba nisungi,

yakta telangzütsü magütsüba ama ni lir.

15Saka Oh Kibuba, ni ne dak imlar,

aser nai langzütsü,

Oh Kibuba kü Tsüngrem.

16Kodang kü tetsüng ajudoker,

parnoki kü madak tepeladaktsü mesüra ni anema parnok tasükümdaktsü.

17Kechiaser ni talanger dang lir,

aser kü tejashi teti kü jakdang lir.

18Hau, ni kü tai nangzüker,

kü temenen asoshi ni jashiseter.

19Kechiaser kü tsükchirtem tashi tait aser aika lir,

aser kuli kecha makai parnoki ni sempar.

20Shirnoki tajung melen tamajung shia agütsür,

parnokji ni anema lir,

kechiaser kechi tajung lir aji ni inyaker.

21Oh Kibuba, nai ni tesendok,

Oh kü Tsüngrem ni nungi pila-a tuo.

22Ni yaritsü asoshi yakta arung,

Oh Kibuba, kü kümzüksang.

TENÜNGSANG KEN 39

Dawid Ken: Tatokba Asoshi Sarasadem

1Ni ashi, “Kü temeli agi temenen memenatsü asoshi, ni aolen kümdangdi.

Tamajunger kü madang ali tashi ni kü tebang nung lakem yudi.”

2Saka kodang ni ola madoki ajem ajema

oda kecha tajung mejembi-i liasü;

kü tejashi dang tali züin.

3Kü mulung telung nung tarongba liasü,

kodang ni iba indang shisadanga liasü, miji jangru;

aser ni jembitsü tenzük,

4“Oh Kibuba, kü taküm tatembang,

aser kü anogotem kwika kü nem metetdakjang;

aser kü arishi koda tatsü aji metetdakjang.”

5Nai kü anogotem aka piga dang yanglu,

kü arishi ajonga ne madang kecha nunga.

Oda alima nung alir meimchir ajak tangula dang lir.

(Selah)

6Akhüm ka ama parnok oli aruli ta jajar,

aser parnoki bendenba rongsentemji tangula ka ama,

aji shibai rizüngtsü parnoki memetet.

7Süra tang Kibuba,

ni kechi asoshi atatsü?

Kü teimla ne dak lir.

8Ozüng raksaba ajak nungi nai ni sotang,

tamashiri sensatsütsüsa ni tekümdaktsü.

9Ni mokorai liasü aser kü tebang melapok,

kechiaser item ajakji nai dang inyak.

10Ne temerenshi kü dak nungi piladakjang,

ne temerenshi agi ni aniseta lir.

11Tai menaba atema nai nisung merenshir,

shipo agi ama nai parnok chimar,

atangji meimchir ajak tangula ka dang lir.

(Selah)

12Kü sarasadem angang, Oh Kibuba,

ni ayimtenba nung tenarong tenang;

kü nüktzü ngur nai ola madoki teli.

Kechiaser kü tsüraburtem ama ne den bendanglen amunger ka ama lir.

13Kü taküm tatembang kati marudang,

ni ano khen pela-a alitsüsa kü kija tokjang.

TENÜNGSANG KEN 40

Dawid Ken: Tenüng Asangba Ken

1Ni Kibuba asoshi arema ata,

aser pai kü tsütsü meyipa ni ayimtenba angashi.

2Pai ni tetsübutsü kangla lishitsüng nungi anitet;

pai kü tsüng lungma nung noktakdaktsü,

aser kü mera kümzüka ayu.

3Pai kü bang nung ken tasen ka enoktsü,

oda asen Tsüngrem nüngsang ken ka.

Aikati aji angutsü aser tsübutsü,

aser parnoki Kibuba dak temulung alemtsü.

4Shibai Kibuba dak temulung lemdir,

aser asükümer dak merangloker mesüra

tiyazü tsüngremtem tsütsüi memeyiper pa tepelatsü.

5Oh Kibuba kü Tsüngrem,

nai onok asoshi inyakbatemji onsara tesüngmangtsü lir!

Nai onok asoshi bilembaji aika lir;

ne den medemdangtsüsa shinga melika!

Item indang ni lepshia ashitsü asübo,

mezüngdangmai onsara aika lila.

6  Tarongba tenla aser tenlatsü oset nung nai mepelar

nai kü narong lapoktsüogo;

tarongba tenla aser temenen tenla nai memeshir.

7Idangji ni ashi, “Ajiang ni yangi lir,

kaket nung kü indang yamai zülua lir.

8Oh kü Tsüngrem, nai mulungba inyaktsü ni jangrar,

kü mulung telunglen ne ozüng lir.”

9Mungdang tulu nung ni ne temeshiba metetdaktsüogo,

ni ne indang memetetdaktsüi mali ta nai metet, Oh Kibuba.

10Ni kü mulung nung ne temeshiba miima mayu,

ni ne tamang katetba aser tekümtet indang metetdaktsüogo.

Mungdang tulu madang ni ne temeim,

aser ochi indang mejembi-i maliasü.

11Oh Kibuba, ne temeim taochi ni nungi tesot,

ne temeim aser ochi agi ni maneni sota yuangma.

Teyari asoshi Sarasademba

(TKe. 70)

12Züngdangtsü makokba timtem jenti agi ni meketbangogo,

kü tai agi ni menepogo, angji ni angutsü makoker.

Parnokji kü kolak ku dang nungia timba,

aser ni tasü maiti kümogo.

13Oh Kibuba, arung aser ni kümzükang,

Oh Kibuba, ni yaritsü ilungang.

14Shiri kü taküm agitsü bushir,

parnok ajak mak südakjang aser tamadakjang;

shiri ni samatsütsü jangrar,

parnok ajak maksüa tesülen shidakjang.

15Shiri kü dang “Aha! ta ashir,

parnok tamakok nung mak südakjang.

16Saka shiri na bushir parnok ajak ne dak peladakjang,

Shirnoki ne tekümtet meimer,

parnoki teti “Kibuba uludakjang” ta shidakjang.

17Saka nibo sensaker aser anüngakonger,

Kibubai kü indang bilemtsür.

Na kü teyarir aser kü tekümzüker,

Oh kü Tsüngrem, menua teli.

TENÜNGSANG KEN 41

Dawid Ken: Shirangba Mapang Sarasadem

1Shibai sensaker aser tashi maiter indang bilemtsür, pa tepelatsü,

timtem mapang Kibubai pa kümzüktsü.

2 Kibubai pa anüktsü;

taküm arishi talang,

aser alima nung temoatsü agütsütsü;

aser tsükchiri mulungba nem pa magütsür.

3Shirang yipten nung Kibubai pa yaritsü,

pa shirang tashitak ajak anebtsütsü.

4Ni ashi, “Oh Kibuba, kü dang aochiang;

ni anebjang, kechiaser ni temenen menaogo.”

5Kü tsükchirtemi ni anema ashir,

“Kodang pa asütsü aser pa tenüng samatsü?”

6Kodangsa kari ni semdangi arudir,

pa mulung ashikülak aser tiyazü agi asünger;

kodang kimai tugudir item osang prokshir.

7Kü tsükchir ajaki ni anema nemnemer,

parnoki kü tia tamajung indang bilema ashir,

8“Tashitak tamajung kati pa tongogo;

pa ondaka alidak nungi joko pa kodanga mesaktsü.”

9  Oda, kü akang tembar aser temulung lemtetba tembar,

shibai kü den külemi langbang nung amtsük achi,

paia ni anema aramesogo.

10Saka Oh Kibuba, kü dang aochiang,

parnok dak küpzüktsüsa ni mesoang.

11Yagi ni Kibuba dang pelar ta ni metettsü,

kechiaser kü tsükchir kü madak takok mungudaktsütsü.

12Kechiaser ni indanga alibayong,

nai ni yarir aser tatem makai ne jakdang yutsür.

13  Tatem maka nungi tatem maka tashi,

Israel Tsüngrem Kibuba tenüng sangang.

Amen aser amen.

TENÜNGSANG KEN 42

SHILEM ANA

(TKe. 42—72)

Kora Chirtem Ken: Tsüngrem Asoshi Yongyaba

1Mesüi ayongtzü yongyaba ama,

ni na asoshi yongyar, Oh Kibuba.

2Kü nelai Tsüngrem oda taküm Tsüngrem asoshi tzürar,

ni kodang aotsü aser Tsüngrem jak angutsü?

3Kodang nisungtemi,

“Ne Tsüngrem kong lir?”

ta asüngdangdir, mangli sangwali kü nüktzü chiyung shizüka ayimer.

4Kü mulung nung tejashi tokzüka yutsüdang,

ni ibai bilemteter,

kodang telok den külemi ni Tsüngrem kidangi ao,

tepela ola aser tenüngsang agüja ayimtenba telokji ni anir ao.

5Oh kü nela na kechiba tipmatemer?

Kechiba na kü telunglen jashir?

Tsüngrem dak imla-ang,

kechiaser ni pa asangtsü.

Kü tekümzüker aser kü Tsüngrem.

6Oh kü Tsüngrem,

kü taküm temulung makai kümogo;

anungji Yordan lima aser Hermon tenem aser Mizar tenem kolak nungi ni na bilemtettsü.

7Ne tzüyim tarok ola arrürba ama,

aser tzüyim tzüsem nungshiba ajak kü madak aor.

8 Kibubai anüngdang pa temeim aser aonung pa nüngsang ken ka aser

kü taküm Tsüngrem dang sarasademba ka kü den lidakjang.

9Ni kü Tsüngrem,

kü lung dang ashitsü,

kechiba nai ni amadok?

Kü tsükchiri kangshiba yong kechiba ni mang yimdaktsür?

10Kü tsükchiri kangshiba yong kü teret teraksa lir,

anogo tepiyong parnoki “Ne Tsüngrem kong lir?”

ta kü dang asüngdanger.

11Oh kü nela, na kechiba tipmatemer?

Kechiba na telunglen jashir?

Tsüngrem dak imla-ang,

kechiaser ni pa asangtsü pa kü tekümzüker aser kü Tsüngrem.

TENÜNGSANG KEN 43

Kora Chirtem Ken: Timtem Mapang Sarasademba

1Kü o bendangang, Oh Tsüngrem,

aser memeshiba nisungtem anema ni kümdangang,

tekülak aser ochi mashiba nisungtem nungi ni kümzükang.

2Oh Tsüngrem, na kü jenokdak kechiba nai ni sentoker?

Ni mang ayimtsüsa kechiba kü tsükchirtemi ni kangshidaktsür?

3Ne tesangwa aser ochibaji yokang,

ajiang, Tsüngremi ni anidakjang;

parnoki ni ne temeshi tenemi aser ne tekülemdak ki-i anir arudakjangma.

4Idangji Tsüngrem tekülemdak sabangi ni aotsü,

kong tepela agi ni laya kongki tema,

Oh Tsüngrem;

kü Tsüngrem ta tenüngsang agütsütsü.

5Oh kü nela kechiba na tip matemer?

Kechiba na lular?

Tsüngrem dak imla-ang, kechiaser ni pa asangtsü,

kü tekümzüker aser kü Tsüngrem.

TENÜNGSANG KEN 44

Kora Chirtem Ken: Teyari Asoshi Sarasademba

1Oh Tsüngrem, akhidang tetsü-tebou mapang nung nai kechi mapasa inyak,

item indang onok narongi angashia parnoki onok dang shiogo.

2Nai ne teka agi kintemji aridok,

aser ozü tsüraburtem linük nungji lidaktsü;

nai kintemji kangshi, saka ne nüburtem moatsü.

3Kechiaser parnok nok agi alimaji makok,

mesüra par nok o nü agi takok mangu.

Saka ibai ne teka tajichi agi aser ne tepen agi aser ne tejak tesangwa agi lir,

kechiaser nai parnok dang meim.

4Na kü chuba, kü Tsüngrem,

shibai item takoktem Yakob nem agütsü.

5Na ajanga onoki onok anemertem laodaktsütsü;

ne tenüng ajanga onoki onok anemertem dak ajemshitsü.

6Kechiaser ni kü lasang dak temulung malemer,

mesüra kü nok agi kü nem takok magütsür.

7Saka onok anemer madak nai onok nem takok ngudaktsüogo,

aser onok sempartem mak südaktsüogo.

8Anogo tepiyong Tsüngrem dak onoki mezümekümogo,

tatem makai onoki ne nüng asangtsü.

(Selah)

9Saka tangbo nai onok sentokogo aser ajemrepdaktsüogo,

aser ozü temeranger telok den na maor.

10Onok tsükchirtem nungi nai onok meyipdaktsür,

aser shiri onok sempar parnoki onok meyong rakzükraktemer.

11Tetepsetdaki aoba san ama nai onok kümdaktsüogo,

kintem rongnung nai onok prokshidaktsüogo.

12Kecha jenjang makai nai ne nübur ayok,

aser iba ayokba nungji tajangzük mangu.

13Onok kiyonger tsüngdang nai onok temenütsütsü ka kümdaktsüogo,

onok meketa alirtem tsüngdang onok tatalatsü ka kümdaktsüogo.

14Kintem rongnung nai onok telatetshitsü ka kümdaktsüogo,

nisungtemi onok dak parnok kolak angümloktsür.

15Anogo tepiyong kü mera maketba kü madang lir,

aser kü tejak maksü agi nembangogo;

16Tarütsü aser tatalartem alibayong,

tsükchir aser mangyanger aliba agi.

17Onoki na mamadokaka,

mesüra ne tezüngzüktepba nung meyazüaka,

item ajak onok dangi aruogo.

18Onok mulungjang meyipa mao,

aser ozü tetsüng ne lenmang nungi mepila.

19Aji saka nai onok teyari makadak arem shirongtem rongnung toktsü,

aser ammang temelem agi onok nembangtsüogo.

20Onoki ozü Tsüngrem tenüng amadoker lira;

mesüra bendanger tsüngrem dang onok teka mekanger lira,

21Tsüngremi aji mebushitettsü ama?

Kechiaser pai temulung telungtiba nung alibajia meteter.

22  Aji saka na atema anogo tepiyong onok tepseter,

tetepsettsü san ama onok züngshir.

23Sakang, na kechiba mejanger, Oh Kibuba?

Aramesoang, tatem makai onok teindok.

24Kechiba nai ne tejak miimer,

mesüra onok timtem aser tekangshi amadoker?

25Kechiaser onok auyi tashi angüma lua lir,

onok temang ali nung ajemsatsüogo.

26Aramesoang aser onok yariang;

ne temeim yimlibilem atema onok kümzükang.

TENÜNGSANG KEN 45

Kora Chirtemi Atenba Nüknarar Ken: Chuba Kiyimba Ken

1O tajung agi kü mulungjang moshia lir,

chuba atema ni iba ken tenyudang;

tezülur tajung kolem ama kü temeli renema lir.

2Nisung chir rongnung na tobur tajungtiba,

ne tebang mechi yimlibilem agi sünga lir,

anungji Tsüngremi na tatem makai moatsüogo.

3Oh tulusang, ne nok nokleptsü nung semang,

tamarenba nung sentsüwangshia;

4Ne tamarenba nung takok ngua sayur,

ochiba, ajemaluba aser temeshiba nung;

ne teka tajichi agi tetsübutsü mapatem sayudakjang.

5Ne lijakjang techira agi chubar tsükchirtem mulung ateta atsünger,

nüburtem ne tsüng kübok laodakjang.

6  Oh Tsüngrem, ne yimli tatem makai alir,

nai ne nüburtem madak ochi agi yimsü asütsü.

7Nai temeshiba meimer aser temenen sempar,

anungji Tsüngrem, ne Tsüngremi na shimtet;

ne nüburtem madak tepela totzü mezüja na shimtet.

8Ne süoshi ajak nung teronem menemba aloe aser kasia menemer,

shiti pu agi yangluba chuba ki nungi tzürang kongki agi na peladaktsür.

9Ne tetushi tetsürtem rongnung chuba jalatem dena lir,

ne teka tajichilen ofir hon sobuba chubatsür noktaka lir.

10Angang, Oh jala, aser bilemdangang,

aser ne tenarong tenang,

ne nübur aser nebu kia amadokang.

11Idangji chubai ne tobur ajungji aginütsü,

pa ne kibur asünung nai pa dang angatsüla.

12Tair jala sempet bener na mesüzüktsü arutsü,

nüburtem rongnung takaria ne yimlibilem mepishitsü.

13Chubatsürji la menden nung sentsüwangshia lir,

la süoshi nung hon takoka lir.

14Sentsü aika aketba süoshi agir la chuba dangi anir aor,

la tasüngtet medemertem la sülen anitaker,

aser parnok ne dangi anir aor.

15Pelatepa aser lungsotepa parnok anir aor,

aser parnoki chuba kidangi air.

16Ne tsüraburtemji ne jabasotemi melentsü,

aser nai parnok alima ajak nung chuba kümdaktsütsü.

17Putu ajak nung ni ne tenüng bilemtetdaktsütsü,

anungji kintemi tatem makai ne nem tenüngsang agütsütsü.

TENÜNGSANG KEN 46

Kora Chirtem Ken: Tsüngrem Asen Atsükokdak

1Tsüngrem asen jenokdak aser tashi,

timtem nung anasatiba teyarir.

2Anungji alimaji anokshiaka, aser tenemtem,

tzüyim tiyongi ajungokaka onoki metsübutsü;

3Oda yangji aliba tzü arraka aser nungshiaka,

mesüra iba nungshiba jagi tenemtemji anokshiaka.

(Selah)

4Ayong ka lir aser iba ayongnutem jagi,

Tsüngrem yimti tematiba alidakji peladaktsür.

5Tsüngrem yangji lir,

aji marakzütsü,

ibaji yaritsü Tsüngrem teyarir yakta arutsü.

6Kintemji atentener, yimtitem anokshir,

pai ola adokdang alima yimsa-a aor.

7Temeranger Kibuba asenok den lir,

Yakob Tsüngrem asen jenokdak lir.

(Selah)

8Arung, Kibuba mapatem aser pai alima nung,

kechi teraksa inyak ajiang.

9Alima tatem tashi nung pai rara anendaktsür,

pai lasang raksar, nü leptanger, aser rara nung amshiba jong mi nung aronger.

10“Ajemajema liang aser ni Tsüngrem ta metetang,

kintem rongnung ni ajungkettsü,

alima nung ni ajungkettsü.”

11Temeranger Kibuba asenok den lir,

Yakob Tsüngrem asen jenokdak lir.

(Selah)

TENÜNGSANG KEN 47

Kora Chirtem Ken: Kibubaji Tematiba Chuba

1Oh nüburtem, nenok teka matenang,

tepela ola agi Tsüngrem dang ayimtenang.

2Kechiaser tematiba Kibubaji tetsübutsüka lir,

alima ajak nung pa chuba tulu ka lir.

3Kintem asen küboki aser nüburtem,

asen tetsüng küboki pai anizüktsü.

4Pai meimba Yakobi saklokba,

aser senmang asen asoshi pai shimtettsü.

(Selah)

5Tsüngremi ayimtena atu,

Kibubai jangzü ola den atu.

6Tenang, asen Tsüngrem dang ken tenang,

tenang asen Kibuba dang ken tenang.

7Kechiaser Tsüngremji alima ajak madak chuba lir,

tenüngsang ken tena pa sangang.

8Kintem madak Tsüngremi chubar,

Tsüngrem pa temeshi menden nung mena lir.

9Nübur lenirtem, Abraham Tsüngrem nübur den külemi senteper.

Kechiaser tashi tulutemji Tsüngrem meyong lir,

aser parnok madak pa ajungketa lir.

TENÜNGSANG KEN 48

Kora Chirtem Ken: Tsüngrem Yimti Zion

1 Kibubaji tulu lir,

aser asen Tsüngrem yimti temeshi tenem nung asangtsüla.

2  Tobur tajung aser jangratemtsü Zion tenemji alima ajak tepela,

chuba tulu yimti tenem talang anüdoklentip nung lir.

3Yangji aliba chuba yimti nungji,

Tsüngrem parnok jenokdak asütsü ta pai sayuogo.

4Kechiaser ajiang chubatem külemi sentep,

aser ibaji anema atu.

5Kodang parnoki aji angu, parnoki süngmang,

aser tetsübu agi parnoki jena ao.

6Parnok dak tetsübu aser tatenten agi atong,

tetsür nuso ashi ama parnok kangshi.

7Anüdok mopung agi Tarshis rong raksatsüba ama,

nai parnok raksatsü.

8Onoki angashiba aser anguba ama Temeranger Kibuba yimti nung,

asen Tsüngrem yimti nung Tsüngremi aji tatem makai kümzüktsü.

(Selah)

TENÜNGSANG KEN 49

Kora Chirtem Ken: Rongsen Dak Temulung Telem

1Kin ajaki ya angang,

iba alima nung alir ajaki angang,

2Tulur aser tilar,

sensaker aser takar ajaki.

3Kü tebangi shisatsü o jembitsü,

kü mulungjang tangatetba agi sünga alitsü.

4Shin o tsütsü ni kü narong atentsü,

aser kongki agi ni itemji ratettsü.

5Tamajung anogo arudang,

kodang kü tsükchir tai agi ni meketbanger;

6Shiri pei rongsen dak temulung alemer,

aser parnok rongsen aliba yong,

mezümekümdang ni kechiba tsübutsü?

7Parnok shingaia pei taküm malangzüktet,

mesüra pei taküm jenjang Tsüngrem nem magütsütet.

8Taküm alangzükba jenjangji onsara tulu,

kecha agia iba den medemdangtsü makok.

9Aji oda mesüra pai tasüba nungi,

teti taküm koda litettsü.

10Kechiaser shisa taka nisung asür,

tamachi aser shisa makar külemi samar;

aser parnok rongsen tangar nem toktsür ta pai teti angur.

11Khenbo parnoki pei li nem pei tenüng agüjaka,

putu ajak nung tatem makai alitsüba parnok kiji parnok lepertemji lir.

12Saka nisungi pei uluba agi aji mesottet,

kechiaser pa tesamatsüba shiruru ama lir.

13Pei dak temulung alemertem,

aser parnoki ashiba sülen anitakertem tia ya lir.

(Selah)

14San ama parnok Sheol asoshi renema lir,

aser tasübai parnok anüktsü,

tindang nisungi anepdang parnok madak yimsü asütsü.

Parnok temang leper nung shireptsü,

Sheol parnok talidak alitsü.

15Saka Tsüngremi ni Sheol ain nungi alangzüktsü,

kechiaser pai ni pa dangi agizüktsü.

(Selah)

16Kodang nisung ka takar kümdir,

kodang pa rongsen tali ulua kümdir nai pa dak tenük temerem.

17Kodang pa südir, pai pa den kecha bener maotsü,

pa rongsen aser akhüm pa sülen maotsü.

18Pa taküm alidang pa sasa pela-a liaka,

aser pa rongsen asoshi nisungtemi pa sangaka,

19Pa pei tebutem putu nung adentsü,

shirnoki tesangwa kodanga mangutsü.

20Nisung shiba tangatetba makai takar akümer,

paji tesamatsüba shiruru ama lir.

TENÜNGSANG KEN 50

Asaf Ken

1Takoksang Tsügrem, Kibubai jembiogo,

aser anüdok nungi anülu tashi alima pai jazükogo.

2Tobur tajung teperiba Zion nungi Tsüngremi yaloktsütsü.

3Asen Tsüngrem arudagi, saka ola madoki masü,

pa jakdang tetsübutsü tarongba mi lir;

aser pa meketa tetsübutsü yipru lir.

4Pai pei nübur o bendangtsü asoshi,

temalen anüngtem aser alima ajatsü.

5“Kü temeshibatem,

shiri tenla ajanga kü den tezüngzüktepba yangluogo;

parnok kü dangi külemi anitenang.

6Anüngtemi pa temeshiba metetdakjang,

kechiaser Tsüngrem pei sasa obendanger lir.”

(Selah)

7Angang, Oh kü nübur aser ni jembidi,

Oh Israel, ni ne nem kuli agütsüdi;

ni Tsüngrem, nenok Tsüngrem lir.

8Nenok tenlatem asoshi ni nenok marütsür,

nenok tarongba tenlatem kü jakdang lir.

9Ni nenok ki nung nashi pungchi,

mesüra nabong ki nungi nabong tepung magitsü.

10Kechiaser arem shiruru ajak,

aser kü tenemtem nung aliba nashi ajak kü meyong.

11Tenemtem nung aliba ozü ajak ni metet,

arem nung senzüba shiruru ajak kü meyong.

12“Ni yaseta alinungbo ni ne dang aji meshila,

kechiaser alima aser yangji aliba ajak kü meyong lir.

13Ni nashi pungchi shi chidi ma?

Mesüra nabong zü jemdi ma?

14Ne tenüngsang tenla Tsüngrem nem agüjang,

aser tematiba nung aliba nem ne tezüngzükba agüjang.

15Timtemba anogo nung nai kü dang ja-ang,

ni na kümzüktsü aser nai ni sentsüwangshitsütsü.”

16Saka tamashi nisung dang Tsüngremi ashi,

“Kechi atema nenoki kü ozüngtem tetshitsü,

aser kü tezüngzüktepba ne bang nung ayutsü?”

17Kechiaser nai kü tesayuba sempa,

aser ne tesülen kü otem endoker.

18Nai kodang auür ka angu, pa den haura aka,

aser nüktapangtartem den shilem lemzüker aküm.

19Temenen nem nai ne tebang agütsü,

tashioktsüba nem ne temeli agütsür.

20Nai mener ne adianu anema jembir,

aser pei tetsüri asoba adianu anema mezüngmeshi o jembir.

21Itemi nai inyakaka ni ola madoki liasü,

nai niji na ama dang ta bilem;

saka tang ni na merenshitsü,

aser item ajak ne madaki arutsü.

22Nenok shiri Tsüngrem amadoker, ibai bilemdangang,

aji oda mesüra ni nenok anüka shisatsü

aser tekümzüker shinga malitsü.

23Shirisa tepela tenla agütsür parnoki kü dang akhüm tsübur;

aser shibai kü lenmang sülen anitaker pa dang Tsüngrem tekümtet sayutsü.

TENÜNGSANG KEN 51

Dawid Ken: Temenen Nangzükba Sarasadem

1Oh Tsüngrem, ne temeim yimlibilem yari kü dang aochiang;

ne tabensa taochi tulu yari kü ozüng raksaba tai endokjang.

2Kü tai ajak nungi meshimeshia ni shitokjang,

aser kü temenen nungi ni merüktetjang.

3Kechiaser ni ozüng raksaba taitem nangzüker,

aser kü temenen teti kü jakdang lir.

4  Na anema, na anema dang ni temenen menaogo,

aser ne nükdang kechi majung aji inyak.

Anungji kodang nai jembidir,

na shitak ta kuli angur,

aser ne obendangbaji merüka lir.

5Atangji ni temenen nung yanglu;

temenen nung kütsüi ni aben.

6Nai temulung telungtiba nung ochi aginür,

aser temiimdak nai kü dang shisatsü sayur.

7Esop agi ni meshitetjang aser ni merüka alitsü,

ni shitokjang aser ni rürjeb dang temesüngba alitsü.

8Kü nem tepelaba olatem angashidakjang,

anungji nai raksatsüba tereti pelatsü.

9Kü temenentem nungi ne tejak meyipang,

aser kü tai ajak aidokjang.

10Oh Tsüngrem, kü dak temulungjang temerük ka poktetdakjang,

aser shitakba asentenshi tanela ka kü dak poktetdakjang.

11Ne tsüngdang nungi ni teindok,

aser ne temeshiba tanela kü dak nungi tagien.

12Ne tekümtet kü dangi meyipdakjang,

aser nüji tanela agi ni sotang.

13Idangji ozüng raksartem dang ni ne lenmang sayutsü,

aser temenen puri ne dangi temulung meyiptsü.

14Oh Tsüngrem, na kü tekümtet Tsüngrem,

azü tokshiba tai nungi nai ni kümzükang aser kü temeli-i ne temeshiba indang ken atentsü.

15Oh Kibuba nai kü tebang lapokjang;

aser ni ne nüngsang ken atentsü.

16Kechiaser nai tenla nung mepelar mesüra ni aji agütsüla;

nai tarongba tenla nunga mepelar.

17Tsüngremi aginüba tenlaji tanela teraksaji lir,

ajemalu aser temulung teraksaji nai mezüngmeshi masütsü.

18Ne taochi yari Zion dang tajung inyakang,

aser Yirusalem jaratem yangluang.

19Idangji shitakba tenlatem,

tarongba aser rangben tarongba tenla nung nai pelatsü,

aser ne tenla sabang nung nashi pungchitem tenlatsü.

TENÜNGSANG KEN 52

Dawid Ken: Tsüngremer Obendangba Aser Taochi

1Oh tashi tulu akaba nisung,

kechiba nai mapa tamajung nung mezümekümer?

Tsüngrem yimlibilem teti alir.

2Kusünok techira agi külaka inyakba ama,

ne temeli agi tasa tamajung asar.

3Nai tajung dang nungi tamajung temeimba,

aser ochi dang nungi tiyazü jembitsü temeimba.

(Selah)

4Oh na tekülak temeli,

nai ne temeli agi tangar yirutsütsü meimer.

5Anungji Tsüngremi na tatem makai samatsütsü,

pai na aputsü aser süki nungi endoktsü,

aser akümlir lima nungi na atsüdoktsü.

(Selah)

6Temeshipuri aji ngua tsübutsü,

parnoki pa dak menülokja ashitsü,

7“Reprangang, iba nisungi Tsüngremji pa jenokdak mekümdaktsü,

saka pei rongsen tulu dak temulung alem,

aser tangar raksatsüba ajanga tashi ita aküm.”

8Saka nibo Tsüngrem kidang aliba oliv süngdong ama lir,

teti tatem makai Tsüngrem yimlibilem dak ni temulung alemer.

9Nai kechi inyakogo,

iba atema ni tatem makai ne tenüng asangtsü,

ne nüburtem rongnung ni na ajungba indang sangoktsütsü.

TENÜNGSANG KEN 53

Dawid Ken: Suwar Nisung

(TKe. 14)

1  Suwari pei mulungjang nung ashir, “Tsüngrem mali.”

Parnokji ochimashir samesa aser tesempatsü inyakertem;

tajung inyakerbo shinga mali.

2Tsüngrem angateter aser pa bushir ka danga ali mali metettsü asoshi,

Tsüngremi kotak nungi meimchir dak repranger.

3Parnok nisung shia meyipa ogo,

parnok külemi memerüki kümogo;

tajung inyaker shinga mali; ka danga mali.

4Nisungi amtsük achi ama tamajung inyaker shiri

kü nübur chimar aser Tsüngrem tenüng nung majar,

parnoki ibai memetet no?

5Tetsübutsü kecha mali sür nung,

parnok madak tetsübu agi tongdaktsütsü,

na anemertem teret Tsüngremi prokshidaktsütsü,

Tsüngremi parnok sendok nungji parnok maksüdaktsütsü.

6Oh, oda Zion nungi Israel tekümtet arulasang!

Kodang Tsüngremi pei nübur tia kümzükdir,

Yakobi washidakjang aser Israeli peladakjang.

TENÜNGSANG KEN 54

Dawid Ken: Tsükchirtem Nungi Kümzüktsü Sarasademba

1Oh Tsüngrem, ne tenüng agi ni kümzükang,

ne tashi agi kü o bendangangma.

2Oh Tsüngrem, kü sarasadem angang,

kü temepishiba ola angangma.

3Kechiaser aeneri ni anema apusor,

nisung tamajungeri kü taküm bushir,

shirnok dak Tsüngrem tsübubaji mali.

(Selah)

4Saka Tsüngrem kü teyarir lir,

Kibuba kü tekümzüker lir.

5Kü anemer madaki tamajungji meyipa agüjang,

Oh Kibuba, ne ochi agi parnok samajang.

6Mulungsoa ni ne dang tenladi, Oh Kibuba,

ni ne tenüng sangdi,

kechiaser aji tajung lir.

7Kechiaser pai kü timtem ajak nungi kümzükogo,

aser kü tsükchirtem akokba kü nem ngudaktsüogo.

TENÜNGSANG KEN 55

Dawid Ken: Rishikangshi Mapang Sarasademba

1Oh Tsüngrem, kü sarasadem angang,

kü temepishiba nungi miima teli,

2Kü dang angang aser langzüang.

Kü timtem aser tanüngba nungi ni anisüngzük maka.

3Tsükchirtemi ni anema ayimtenba yong,

tamajungeri ni kangshiba yong;

parnoki ni anema timtem agütsüba yong,

ain adoka parnoki mezüngmeshir aser sempar.

4Kü mulung tejashi agi raksa-a lir,

aser tasütsü tetsübu kü madaki arua lir.

5Tetsübu aser tatenten kü dak tonga lir,

taoksaba agi ni meketbangogo.

6Ni ashi, “aia, ni posü ama tashikang lilasang!

Ni yima or anisüngzükla.

7Talangi ni yima ola,

aser idakji arem min nung ni kü ki yanglula.

(Selah)

8Yipru mopung aser tsüngsak nungi,

ni yakta kü jenokdaki aotsü.”

9Oh Kibuba, kü tsükchirtem o benjadakjang,

kechiaser yimti nung azü tokshiba aser raratepba ni nguogo.

10Mangli-sangwali parnoki yimti jaraji meketbanger,

ibai timtem aser tejashi agi sünga lir.

11Iba telunglen teraksa agi sünga lir,

tekangshi aser tashioktsüba yimti yimtong nungi mepilar.

12Oda tsükchiri ni arütsür asübo ni itemji aremzükla;

kü anemer kari pa sasa ni anema noktaker asü nungbo ni pa nungi atsükla.

13Saka ibaji na, kü medemer,

kü temulung lemtetba kü tembar.

14Shiba den ni khen mapang,

Tsüngrem kidang anasatiba telungjem nung jaja,

15Parnok dangi aoksa-a tasüba arudakjang,

kangla jagi parnok taküm idakjang,

kechiaser parnok ki aser temulung nung temenen alir.

16Saka nibo Tsüngrem dang aja,

aser Kibubai ni kümzük.

17Nikongdang, anepdang aser anüngdang,

timtem nung ni ayimten, aser pai kü ola angashi.

18Ni anema adokba rara nungi pai kü taküm meyirutsüi alangzükogo,

kechiaser kü den rarar jenti liasü.

19Tsüngrem, shiba chuba menden nung tatem makai mena lir pai aji

angashitsü aser parnok merenshitsü.

(Selah)

Parnok dak temelenshi kecha mali nung,

parnok dak Tsüngrem tsübuba mali.

20Item nisung jagi parnok den yimjung nung alirtem anema apusor,

aser parnok tezüngzüktepba raksar.

21Pa oji mamatzü temo ama tesüsü,

saka pa mulung nung rara lir;

pa oji totzü dang nungia tanükba,

saka itemji nok techira ama lir.

22Ne khuret ajak Kibuba dak enlokjang,

aser pai na kümzüktsü,

pai temeshi nisungji kodanga marakzüdaktsütsü.

23Saka, Oh Tsüngrem,

nai parnok tasütsü kanglai yoktsü,

azü jangraba aser tekülak nisungi pei arishi küm tesadang kata malitsü.

Saka nibo ne dak amangtsü.

TENÜNGSANG KEN 56

Dawid Ken: Tsüngrem Dak Tamang Akaba

1Kü dang aochiang, Oh Tsüngrem,

kechiaser tsükchirtemi ni kangshir;

kü anemertemi anogo tepiyong ni timtemdaktsür.

2Anogo tepiyong kü tsükchirtemi ni kangshir,

parnok aikati ni anema asüküma rarar.

3Kodang ni tsübudir,

ni ne dak tamang ayutsü.

4Tsüngrem dak ni tamang ayutsü aser metsübutsü,

pai nangzükba asoshi ni pa asangtsü.

Nisungi kü dang kechi ashitsü?

5Anogo shia parnoki kü o meyipsatsür,

parnoki teti ni yirutsütsü indang bilemer.

6Parnok külemi senteper,

aser ni tepsettsü asoshi ni aolen ajak ladanger.

7Temenen menar parnok jentettsü asü?

Oh Tsüngrem, ne ain adokba agi nüburtemji merenshiang.

8Nai kü timtem züngdangogo,

kü nüktzü nai bongdang nung yuang;

itemji ne kaket nung melika ma?

9Idangji ni na ajaba anogo nung kü tsükchirtem meyipa aotsü.

Iba yagi Tsüngrem kü tsütsü lir ta ni metettsü.

10Tsüngrem shiba o ni asanger,

Kibuba shiba o ni asanger.

11Tsüngrem dak ni tamang yuogo,

ni metsübutsü, nisungi kü dang kechi ashitsü?

12Kü tezüngzükba ama ni inyaktsü,

Oh Tsüngrem, ni ne nem tenüngsang tenla agütsütsü.

13Kechiaser nai ni tasütsü nungi kümzük,

aser tamakok nungi kümzük.

Anungji ni Tsüngrem tsüngdang taküm tesangwa nung jajatsü.

TENÜNGSANG KEN 57

Dawid Ken: Teyari Asoshi Sarasademba

1Kü dang aochiang, Oh Tsüngrem.

Kü dang aochiang, kechiaser ni ne dak jenoker.

Item lendong mesüitem tashi ni ne tashikang akhümbok nung jenokdi.

2Tematiba Tsüngrem shibai ni asoshi,

ajak inyaker ni pa dang ayimten.

3Pai kotak nungi yoka ni kümzüktsü,

shiri kü madak ajemshir pai parnok maksüdaktsütsü.

(Selah)

Tsüngremi pa yimlibilem aser tamang katetba kü dang sayutsü.

4Ni nisung shi achitsü jangraba molusongzütem rongnung lir,

shirnok tepu nü aser lijakjang ama,

aser parnok temeli noklang nok ama techira.

5Oh Tsüngrem, anüngtem temalen na ajungketang,

ne sentsüwangshi ali ajak madak lidakjang.

6Ni aputsü asoshi parnoki kü lenmang nung sang ka yuogo,

ni teimla makai lir.

Parnoki kü lenmang nung kangla ka tuogo,

saka parnok pei sasa iba tiyong nung tsüka lir.

(Selah)

7Kü mulung marakzüi lir, Oh Tsüngrem,

kü mulung marakzüi lir,

ni ne nüngsang ken atentsü.

8Sakang, kü nela, jemji aser kongki renemang,

ni kü sasa anepdang yakta saktsü.

9Kintem rongnung ni na asangtsü, Oh Kibuba,

nüburtem rongnung ni ne nüngsang ken atentsü.

10Kechiaser ne yimlibilem anüng tashi,

ne ochi tamang katetbaji mepet tashi.

11Oh Tsüngrem, anüngtem temalen na ajungketang,

ne sentsüwangshi ali ajak madak lidakjang.

TENÜNGSANG KEN 58

Dawid Ken: Tamajunger Merenshitsü Sarasademba

1Yimsüsürtem, nenoki atangji ochi jembia lir ma?

Meimchir ajak dang nenoki ochi agi o bendanga lir ma?

2Masü, nenoki temulungjang nung tamajung inyaktsü bilemer,

nenok tekai alima nung azütokshiba mapa inyaker.

3Tamajungerji nu menden nungi mashileni aor,

aser tiyazü jembir.

4Parnok mim per mim ama lir,

tenarong tangpanger aliba ongyang per mesüka parnok lir.

5Kobai per puar ola mangashir,

mesüra tesangra kentener ola mangar.

6Oh Tsüngrem, parnok tebang nung parnok tepu raksajang,

Oh Kibuba, molusongzü chanutem tepuji loksajang!

7Tzü yima aoba ama parnok mungui kümdakjang.

Parnokji nisung tetsüng agi ajemshiba rem ama takong kümdakjang.

8Yimsa-a aoba küpra ama,

tasü asoba kinüi anü mungudang ama lidakjang.

9Chipoi ongchirang süng takong nung jangrua aliba mi tatsük memetetdang,

tajem süshia jangrua aliba süshia,

parnok yakta mopungi oner aotsü.

10Mang ayangbaji angudang temeshipurtemi pelatsü,

aser tamajunger azü nung parnoki pei tetsüng shitoktsü.

11Idangji nisungtemi ashitsü,

“Atangji temeshipurtem asoshi sempetji lir,

atangji alima nung obendangba Tsüngrem ka lir.”

TENÜNGSANG KEN 59

Dawid Ken: Tekümzük Asoshi Sarasademba

1Oh kü Tsüngrem, kü tsükchirtem nungi ni kümzükang,

ni anema noktakertem nungi ni kümzükang.

2Temenen inyakertem nungi ni sotang,

azü jangrartem nungi ni kümzükang.

3Kechiaser reprangang,

parnoki kü taküm asoshi mita atar;

tashi taitertemi ni anema senteper.

Kü tai mesüra kü temenentem atema masü, Oh Kibuba.

4Kechiaser kü dak tai mali sür nung parnoki asemer aser renemer.

Aramesoang, Kibuba, temeranger telok.

5Oh, Tsüngrem, Israel Tsüngrem, ni kümzükang.

Kin ajak merenshitsü aramesoang,

tamajung inyaker shinga danga yimlibilem tesayu.

(Selah)

6Parnoki nikongdang meyipa shilanger,

aser azü ama ola adoka,

yimti meketa aor.

7Ajiang, parnoki pei tebang agi asanger,

parnok tebangmechi nung nok lir,

aser parnoki ashir,

“Shibai onok dang angar?”

8Saka Oh Kibuba, nai parnok menütsütsü;

mamangba pur ajak nai atalatsü.

9Oh kü tashi, ni na atadi,

Oh Tsüngrem, na kü mitsa tulu lir.

10Kü yimlibilem Tsüngremi kü dangi arutsü;

kü tsükchirtem madak takok angubaji pai kü nem ngudaktsütsü.

11Parnokji tetepset Oh Tsüngrem,

aji mesüra kü nüburtemi amadoktsü,

Oh Kibuba, ozü jong, ne tashi agi,

parnok anizükang aser prokshidakjang.

12Parnok tebang nung temenen aser parnok tebangmechi otem atema,

parnok pei asüküm nung pudakjang,

kechiaser parnoki atakatem aser tiyazü jembiogo.

13Ne ain adok nung parnok samajang,

parnok taküm malitsüsa samajang.

Idangji Yakob madak Tsüngremi yimsü asür,

aser alima ajak madak pa KIBUR ta nisung ajaki metettsü.

(Selah)

14Parnoki nikongdang meyipa shilanger,

aser azü ama ola adoka yimti meketa aor.

15Azüi chiyungtsü bushia senzüba ama,

parnoki peria mangu tashi senzütsü.

16Saka nibo ne tashi indang atentsü,

anepdang ne temeim indang ni ken atentsü,

kechiaser na kü mitsa,

timtem mapang nung kü jenokdak.

17Oh kü tashi, ni ne nüngsang ken atentsü;

Oh Tsüngrem, na kü mitsa,

kü dang meimba Tsüngrem.

TENÜNGSANG KEN 60

Dawid Ken: Tekümzük Asoshi Sarasademba

1 Oh Tsüngrem nai onok sendokogo,

nai onok raksatsüogo,

na ain adoka liasü,

saka tang onok dangi meyipang.

2 Nai alimaji atentendaktsüogo,

nai aji shimatsüogo;

iba teraksaji anebjang, kechiaser aji anokshir.

3 Nai ne nübur dang timtemtsü sayuogo,

onok mangatentsüsa nai onok nem yi jemdaktsüogo.

4 Saka shirnoki na tsübur parnok nem tekümdangtsü ka nai agütsüogo,

anungji teraksatsüba nungi parnok kümzüktsü.

(Selah)

5 Ne teka tajichi agi onok kümzükang aser yariang,

anungji nai shir dang meimer parnokji kümzüktsü.

6 Tsüngremi pei temeshidak nungi jembiogo,

“Tepela nung ni Shekem lemsatsü aser Sukkot lenten lemsatsütsü.

7 Gilead kü meyong,

aser Manase kü meyong.

Efraim kü kolak kümzükba korang,

Yihuda kü chuba nüsong.

8 Moab kü shitokba po,

Edom dak kü tsüngsem mereploktsütsü,

Filistia anema ni kü takokba ayimtentsü.”

9 Shibai tashi tait yimti jagi ni anir arutsü?

Shibai ni Edom dangi anitsü?

10 Oh Tsüngrem, nai onok mesendoka ma?

Aser nai ozü temerangertem den maor.

11 Tsükchirtem anema onok nem teyari agüjang,

kechiaser nisung teyaribo amajok.

12 Tsüngrem den onoki takok angutsü,

kechiaser pai ozü tsükchirtem madak ajemshitsütsü.

TENÜNGSANG KEN 61

Dawid Ken: Tsüngrem Kü Jenokdak

1 Ni ayimtenba angang Oh Tsüngrem,

ni sarasademba angang.

2 Kü mulungjang lulaba agi alima tatem nungi ni ne dang aja.

Kü dang temaba jenokdak lung jagi ni aniang.

3 Kechiaser ni asoshi tsükchir nungi,

jenokdak tashi tait mitsaji na lir.

4 Ne süki nung ni teti lidi,

aser ne tashikang kübok ni jenokdi.

(Selah)

5 Kechiaser nai, Oh Tsüngrem kü tenangzükba angashiogo;

shiri ne tenüng tsübur parnok senmang nai kü nem agütsüogo.

6 Chuba arishi talangka lidakjang,

pa arishi putu aika lidakjang.

7 Pa chuba mendenji Tsüngrem tsüngdang teti lidakjang,

ne temeim yimlibilem agi teti pa nüka lidakjang.

8 Idangji ni ne nüngsang ken teti atentsü,

aser anogo shia kü tenangzükbatem atalokdaktsütsü.

TENÜNGSANG KEN 62

Dawid Ken: Tsüngrem Dak Tamang Akaba

1 Kü taküm Tsüngrem asoshi dang atar;

pa nungi kü tekümtet arur.

2 Paji dang kü lung aser kü tekümtet,

pa kü mitsa takang,

ni kodanga marakzütsü.

3 Kechiaser tashi maitba jara aser atsü teraksa ama,

tashi maitba nisung ka atema nenok kopiga mita atatsü?

4 Ashioktsütsübaji parnok nükjidong mashileni anitsübaji parnok tejangraba lir.

Parnoki tebang agi moatsür,

saka telung nung atakatemer.

5 Kü nela, nai Tsüngrem dak anisüngzükang;

kechiaser kü teimla pa nungi lir.

6 Paji dang kü lung aser kü tekümtet;

pa kü mitsa tulu ni marakzütsü.

7 Tsüngrem dak kü tekümtet aser kü sentsüwangshi lir;

pa kü tashi aser lung lir.

8 Oh nüburtem, nenoki mapang ajak nung pa dak amangang;

pa tsüngdang nenok mulungjang lapokang;

kechiaser Tsüngrem asen jenokdak lir.

(Selah)

9 Nisung ajak tangula ka ama dang lir;

sensaker aser takar anaprongla jenjang kasa;

parnok seret nung odang nung seret matutsü,

parnokji tangula dang nungia tepungpaba.

10 Ochi mashiba mapa dak tamang teyu,

mesüra rakzükraktem dak amajok nung teimla;

ne rongsen aika renlokaka ne mulungjang idakji teyu.

11 Tsüngremi khen jembiogo,

ni ya anaben angashiogo;

oda tashiji Tsüngrem meyong lir.

12  Ano Oh Kibuba, yimlibilem ne meyong lir;

kechiaser nai nisung shia nem pei mapa yari agütsür.

TENÜNGSANG KEN 63

Dawidi Atenba: Tsüngrem Asoshi Yongyaba

1 Oh Tsüngrem, na kü Tsüngrem lir,

ni na yakta bushitsü;

kong takong aser tzü makadak tebelemba lima lir,

yangji kü nelai na asoshi tzürar,

aser kü takümi na asoshi yongyar.

2 Anungji ne tashi aser sentsüwangshi ngua,

tekülemdak ni ne dak reprangogo.

3 Kechiaser ne temeim yimlibilemji taküm dang nungi taoba,

anungji kü tebangmechi-i na asangtsü.

4 Kü taküm ali tashi ni na asangtsü,

ne tenüng nung ni kü teka mekangtsü.

5 Temo aser chiyungtsü tajungtiba agi tipatemba

ama kü nela tipatemtsü;

kü tebangmechi nung tepela ken agi kü tebangi na asangtsü.

6 Kü yipten nung ni na bilemtetdang;

aonung teyiprong nung ni ne dang bilemdanger.

7 Kechiaser na teti kü teyarir,

ne tashikang akhüm nung ni pelatsü.

8 Kü tanela ne dak sotdi;

ne teka tajichi agi ni soter.

9 Shiri kü taküm samatsütsü bushir,

parnokji ali tekübokleni alutsü.

10 Parnokji nok tashi nem bendanga agütsütsü,

parnok shirongtem asoshi chiyungtsü alitsü.

11 Saka chubai Tsüngrem dak pelatsü,

shirisa pa agi azüngashidir parnoki pa nüngsang ken atentsü;

kechiaser tiyazü jembir tebangji anendaktsütsü.

TENÜNGSANG KEN 64

Dawid Ken: Teyari Asoshi Sarasademba

1 Kü timtem mapang ni ayimtenba ola angang, Oh Tsüngrem;

tsükchir tsübuba nungi kü taküm kümzükang.

2 Tamajunger miim tasa nungi ni kümzükang,

temenen benshirtem nungi ni kümzükang.

3 Parnoki pei temeli nok ama arangshiogo,

aser parnok o mim aketba lijakjang ama renemogo.

4 Parnoki atsüka atar tai makar dak akar;

aoksa-a parnoki kecha metsübui pa dak akar.

5 Mapa tamajung atema parnok rongnung ajongshiteper,

parnoki miima sang asotsü bangjemer;

aser ashir, “shibai parnok angutsü?”

6 Parnoki tasa tamajung asar ashir;

“Shibai onok angutsü?”

Meimchir shisatsü aser temulungjang tarok lir.

7 Saka Tsüngremi parnok dak akatsü,

aoksa-a lijakjang ka agi parnok yirutsü.

8 Pai parnok temeli parnok anema meyipdaktsütsü;

aser parnok teküboki ludaktsür.

9 Meimchir ajaki tsübutsü, aser parnoki

Tsüngrem mapatem sangoktsütsü aser pai inyakba mapa bilemdangtsü.

10 Temeshi nisungi Kibuba dak pelatsü,

aser pa dak jenoktsü;

aser temulung tindanger ajaki sentsüwangshitsü.

TENÜNGSANG KEN 65

Dawid Ken: Tenüngsang Agütsüba Ken

1 Oh Tsüngrem,

Zion nung ne nem tenüngsang agütsütsü tetemsü;

ne dang onok tenangzükbatem ataloktsütsü.

2 Kechiaser nai sarasadem langzür;

meimchir ajak ne dangi arutsü.

3 Parnok temenentem atema,

kodang onok temenentem agi onok kokdir nai itemji aidoktsütsü.

4 Ne kidang alitsüsa nai shirnoksa shimtet aser anir aruogo,

parnok tepelatsü.

Ne kidang aliba tajungtem aser ne temeshi tenla ki temoatsütem jagi onok tipatemtsü.

5 Oh Tsüngrem ozü tekümzüker, ne tesüngmangtsü mapa aser temeshiba agi nai onok dang langzütsü.

Alima tatembang ajak aser tzüyim tatembangtibai ne mulung alemer.

6 Nai pei tashi agi tenemtemji akanga yanglu,

na ain agi nangri khanga lir.

7 Tzüyimtemi arrürba aser tzüsemtem ola nai süngjemdaktsür,

aser nüburtem rongrongba nai süngjemdaktsür.

8 Talang nung alirtemi ne temaitsütem tsübur,

alima tatem külen nungi külen tashi ne mapa agi tepela agütsür.

9 Nai alimaji semdang aser tzü agütsü,

nai aji kanga takar kümdaktsü.

Tsüngremer ayongtemji tzü agi sünga lir,

nai parnok nem tsük agütsütsü asoshi,

aji oda nai yanglu.

10 Ali angensa-a alibaji nai tzü agi medema süngdaktsür,

nai aji tzünglu agi anüka kümdaktsür,

aser tsünütsü meidaktsür.

11 Nai angati ajungba aluruba moatsür,

aser ne kolenisa odir talubusa moatsür.

12 Lisem lima ajak ali temo agi asüngtsü,

aser tenem tilatem ajaklen pelateper.

13 San telok agi chiyimdak moapuji sünga lir,

lentenjia tsük agi sünga lir;

parnoki tepela agi ayimtener aser ken atener.

TENÜNGSANG KEN 66

Tenüngsang Agüja Sarasademba Ken

1 Alima ajaki Tsüngrem dang tepela ola adokang;

2 Pa tenüng sentsüwangshi ken tenang,

pa nem sentsüwangshi nüngsang agüjang.

3 Ne mapatem koda tetsübutsü

ta Tsüngrem dang shiang;

ne tashi uluba agi ne tsükchirtemi tetsübu agi ne madang apudaktsü.

4Alima ajaki na külemtsü,

parnoki ne dang ken atentsü,

parnoki ne nüngsang ken atentsü.

(Selah)

5 Arung aser Tsüngremi inyakbatem ajiang,

nisung rongnung pa tesüngmangtsü mapatem.

6  Pai tzüyim jagi ali takong kümdaktsür,

anungji pei nüburtemi ayongji ajanga jaja.

Idakji pai kechi inyak iba asoshi asenoki pa dang peladi.

7 Pei tashi agi pai tatem makai yimsü asür,

shiba tenük agi kintem madak ajir;

tashi mangar shingaia anema tapusodaktsü.

(Selah)

8 Asen Tsüngrem moajang, Oh nüburtem,

pa nüngsangba olaji angashidakjang.

9 Shibai akümlir lima nung asenok lidaktsür,

aser asen tetsüng memetsüdaktsür.

10 Kechiaser nai onok tendangogo, Oh Tsüngrem,

taribi tendangba ama nai onok tendangogo.

11 Nai onok sang nung pudaktsü,

aser onok teperem nung khu taret benloktsü.

12 Onok kolak manung nisungtem nem ajemshidaktsür,

onoki mi aser tzü ajanga ao;

saka nai onok takar linük kati aniok.

13 Ni tarongba tenla ne kidangi bener arutsü,

ni ne nem kü tenangzükba agütsütsü.

14 Koba ni timtem nung alidang kü

tebang mechi-i nangzükogo.

15 Ni ne nem tejebketba shiruru tenla agütsütsü,

san tepung, nashi pungchi aser nabong,

tarongba tenla ni agütsütsü.

(Selah)

16 Nenok Tsüngrem tsüburtem kü dangi arung,

aser pai kü dang kechisa inyak item ajak ni ne dang shidi.

17 Ni pa dang tashi agi ayimten,

aser kü temeli agi pa nüng asang.

18 Ni kü mulung nung temenen sabu asübo,

Kibubai kü dang mangala.

19 Saka atangji Tsüngremi angashiogo,

aser kü sarasademba ola pai angaogo.

20 Tsüngrem tenüng sangang,

kechiaser pai kü sarasadem mesendok mesüra pa yimlibilem temeim kü dak nungi magien.

TENÜNGSANG KEN 67

Tenüngsang Agütsüba Ken

1 Tsüngremi onok dang aochiang aser moajang;

aser pa tejak onok madak yalokjang;

(Selah)

2 Anungji ne lenmangtem alimai metettsü,

aser ne tekümtet kintemi metettsü.

3 Nüburtemi na sangdakjang, Oh Tsüngrem;

nübur ajaki na sangdakjang.

4 Kintemi pelatepdakjang, aser tepela agi ken tendakjang,

kechiaser nai nüburtem ochi agi o bendanger;

aser alima nung kintem anir.

(Selah)

5 Nüburtemi na sangdakjang, Oh Tsüngrem,

nübur ajaki na sangdakjang.

6 Ali-i pei terenlok süngjang tangtsüogo,

Tsüngrem, asen Tsüngremi asenok moatsüogo.

7 Tsüngremi maneni asenok maotsüogo;

Alima tatem nung alir ajaki pa sangdakjang.

TENÜNGSANG KEN 68

Dawid Ken: Takok Anguba Ken

1 Tsüngrem aramesodakjang aser pa tsükchirtem prokshidakjang.

Shiri pa sempar, parnokji pa tsüngdang nungi jenshidakjang.

2 Mopungi mokozü oner aoba ama,

parnok aridokang;

mi tsüngdang nirep yimsa aoba ama,

tamajungertemji Tsüngrem tsüngdang samadakjang.

3 Saka temeshipurtemji peladakjang,

parnok Tsüngrem tsüngdang pelatepdakjang,

parnoki tepela tulu nung ayimtendakjang.

4 Tsüngrem dang ken tenang,

pa nüngsang ken tenang;

Shibai mepet manung mener aor,

pa nem ken ka tenlokjang;

Pa tenüng Kibuba lir,

pa tsüngdang nenok pelatepang.

5 Lajar tebu malirtem,

amitsür kümzüksang,

aji temeshidak aliba Tsüngrem lir.

6 Azüngmeyaka alir nem pai talidak ki ka agütsür,

tepuokertem nem techiokba agütsür;

saka tashi mangartem ali takong nung lidaktsür.

7 Oh, Tsüngrem kodang nai ne nüburtem jakdang ao,

kodang nai lisem limaji ajanga ao;

(Selah)

8  Alimai atenten, aser anüngtemi tzünglu yok,

Sinai Tsüngrem tsüngdangi,

Israel Tsüngrem tsüngdang atenten.

9 Oh Tsüngrem, nai tzünglu talubosa yok,

ania aliba ne li nai yanglushiogo;

10 Kong ne nüburtem parnok talidak nguogo;

Oh Tsüngrem, nai ne ajungba nungi sensaker asoshi renemtsü

11 Kibubai ozüngji agütsür,

aser telok tulu kati iba osangji abener.

12 Chubatem aser par temerangertem ajener;

parnoki ajener;

Tetsürtem shir kidang alir parnoki temakzükba oset lemsar.

13 Parnoki san ki nung mejanger,

posü tashikang taribi agi aser la tezüng hon tanen agi meibanger lir;

14 Ajak Takoksangi kodang chubatemji prokshidaktsüdir,

Zalmon nung rürjeb tsükdaktsür.

15 Oh tenem tulu, Bashan tenem;

tenem mokji aika aliba tenem, Bashan tenem.

16 Oh tenem mokji aika aliba tenem,

kechiba nai Tsüngremi pa alitsü shimtetba tenem anema nai tenük merema repranger?

Kibuba yangji teti alitsü.

17 Tashi tait meyong kor talungtsü,

meyirijang teranasü,

meyirijangsa merijang aika Kibubai Sinai tenem nungi pa tekülemdaki alur.

18  Nai tepuoker aika anir tenem talang jagi atu,

aser nisungtem nungi sempet agizük;

oda na anemertem nungia agizük,

anungji Kibuba Tsüngrem parnok den alitsü.

19 Tsüngrem shiba asen tekümzüker lir,

Kibuba shibai anogo shia asen khu abener pa tenüng sangang.

(Selah)

20Asen Tsüngremji tekümzüker Tsüngrem lir,

Tsüngrem asen Kibubai asenok tasüba nungi kümzüker.

21 Atangji Tsüngremi Pa tsükchirtem kolak zükreptsütsü,

Shiri pei tai nung maneni aor parnok ku agi yangluba chuba korang kolakji zükreptsütsü.

22 Kibubai ashi, “Ni parnok Bashan nungi anir arutsü,

ni parnok tzüyim tarok nungi anir arutsü.

23 Anungji nenoki tsükchirtem zü nung nenok tetsüng shitoktsü,

aser nenok azütem temeli pei shilem ne tsükchir nungi angutsü.”

24 Oh Tsüngrem, na akhüm keta takok ngua aoba angur,

Kü Tsüngrem, kü chuba tekülemdaki aoba parnoki nguogo.

25 Kentenertem tama, kongki awartem tesülen,

aser parnok yongtsü nung aiürtem asüm atemer.

26Mungdang tulu nung Tsüngrem moajang,

Israel kidong ajaki nenok Kibubaji sangang.

27 Parnok rongnung tilaba,

Benjamini parnok anir,

iba sülen Yihuda tamarenertem telok,

aser Zebulun aser Naftali tamarenertem telok.

28Oh Tsüngrem, ne tashi jazükang,

ne tashi tait koba agi onok atema inyak aji sayuang.

29 Yirusalem nung ne tenla ki ali nung,

chubatemi ne dangi sempet bener arutsü.

30 Rangbangnü nung aliba shiruruji arürjang,

oda nashi pungchi aser techanu nübur telokji,

shiri taribi asoshi nisung dak ajemshir;

raratsü jangraba nüburtemji prokshidakjang.

31 Ijip nungi yongmen bener arudakjang,

Ethiopiai la teka Tsüngrem dangi raksadakjang.

32 Oh alima yimlitem Tsüngrem dang tenang,

Kibuba nüngsang ken tenang.

(Selah)

33 Lipok nungi aliba anüngdak shibai asanger,

angang, pai pa ola yoker, Pa ola tulu.

34 Tsüngrem tashi tait indang metetdakjang,

shiba merenba Israel madak lir;

aser pa tashi anüngtem madak lir.

35 Pa Tsüngrem na tekülemdaki arudang koda tetsübutsüka lir,

Israel Tsüngremi pei nübur nem tashi aser ain agütsür.

Tsüngrem temoatsüba süang!

TENÜNGSANG KEN 69

Dawid Ken: Teyari Asoshi Ayimtenba

1 Ni kümzükang, Oh Tsüngrem!

Kechiaser kü tekong tashi tzü agi nungbangogo.

2 Ni lishi tarok nung asonger,

kong tetsüng ajemetdak maka.

Ni tzü tarok daki arua lir,

aser tzümetsüngi ni atsüngbanger.

3 Ayimtenba agi ni aniseter,

aser kü trok akonger.

Kü Tsüngrem teyari atadang kü tenük agi metizüker.

4  Kecha masü nung ni sempar kü kolak ku dang nungia timba kümogo;

kecha masü nung ni samatsütsü bushirtemji aika kümogo.

Ni mauyaba oset ka parnoki kü dang nungi akhanger.

5 Oh Tsüngrem, nai kü temenentem metet,

ni shisa makaba nai meteta lir.

6 Oh Temeranger Kibuba Tsüngrem,

shiri ne dak imlar,

parnokji ni ajanga mak tesüdaktsü,

Oh Israel Tsüngrem, shiri na bushir,

parnokji ni ajanga maksüi teidaktsü.

7 Kechiaser na atema ni tarürtsüba aremzükogo,

aser maksüi küjak nembangogo.

8 Kü adianutem madang ni aener ka ama,

aser kütsü chir rongnung ni bendanger ka lir.

9 Kechiaser ne ki asoshi jangraba agi ni chimar,

shiri na mezüngmeshiogo,

parnok mezüngmeshiba kü dak tongogo.

10 Kodang ni tanela nung ajeb aser lumi,

parnoki iba asoshi ni mezüngmeshi.

11 Kodang anem süji kü sobutsü kümdaktsü,

parnok asoshi niji menüdong ka aküm.

12 Shir süngkhüm nung amener,

parnoki kü indang jembir,

aser yi agi mesepertemi ni agi ken mejemer.

13 Saka ni asoshibo, Oh Kibuba,

mapang shitak nung kü sarasadem ne dangi yoktsü,

Oh Tsüngrem, ne temeim yimlibilem jenti yari kü dang langzüangma.

14 Lishitsüng nung asongba nungi ni kümzükang,

aser kü tsükchir nungi ni kümzükang aser tzü tarok nungi ni kümzükang.

15 Tzümetsüng agi ni tatsüngbangdaktsü,

mesüra tzü taroki ni temeyokdaktsü mesüra kanglai pei tebang kü dak teshibangdaktsü.

16 Kü dang langzüang,

Oh Kibuba, kechiaser ne temeim yimlibilem tajung lir,

ne taochi jenti yari kü dangi meyipang.

17 Ne tenzüker nungi ne tejak temiim,

Kü dang yakta langzüang,

kechiaser ni timtem nung lir.

18 Ni anasa arung aser ni kümzükang,

Kü tsükchirtem nungi ni kümzükangma.

19 Nai kü maksü aser tatalaba aser ni mezüngmeshiba,

item ajak metet, nai ajak meteta lir.

20 Mezüngmeshi agi kü mulung raksaogo,

anungji ni tasü maiti kümogo;

Kü dang aria bilemtsürtem ni bushir, saka shinga maliasü;

ni sünepdaktsütsü bushi,

saka ni shinga mangu.

21  Parnoki chiyungtsü melena mim agütsü,

aser tzüradang parnoki tasentzü agütsü.

22  Parnok langbangji parnok asoshi sang ka kümdakjang,

aser parnok den asemertem asoshi sang ka kümdakjang.

23 Parnoki kecha mangutsüsa parnok tenük manga kümdakjang,

aser parnok teperemi maneni atentendakjang.

24 Ne terasaba parnok dak meküplokjang,

ne ain tesashi agi parnok menepdakjang.

25 Parnok talidak azüngmeyak kümdakjang,

parnok süki nung shinga telidaktsü.

26 Kechiaser nai shiba dak azük,

parnoki pa rishikangshir;

aser nai shir yirutsü,

parnok tekangshi indang parnoki ashir,

27 Parnok tai madak tai enlokjang;

ne tekümtet nung parnok tetendaktsü.

28  Taküm kaket nungi parnok aidokjang,

aser temeshipur den tezülusem.

29Saka ni timtem aser tejashi nung lir,

Oh Tsüngrem, ne tekümteti ni kümzükang.

30 Ken agi ni Tsüngrem tenüng asangtsü,

aser tenüngsang agi ni pa ulutsütsü.

31 Aji Kibuba asoshi nashi pungchi ka,

oda tezü aser temesüla atenba nashi

pungchi tenlaba dang nungi tepelaba alitsü.

32 Tajemrepba purtemi aji ngua pelatsü,

nenok shiri Tsüngrem bushir,

nenok mulung asentenshidakjang.

33 Kechiaser Kibubai sensaker dang teti angar,

aser par nübur shir tepuokdak lir,

parnok mezüngmeshi masür.

34 Anüng aser ali nati,

tzüyim aser yangji ayazüba ajaki pa sangang.

35 Kechiaser Tsüngremi Zion kümzüktsü,

aser Yihuda yimtitem yanglushitsü,

pa nüburtemi aji agitsü aser yangji alitsü.

36 Pa tenzükertem chirtemi aji senmang amangtsü,

aser shiri pa tenüng meimer parnok yangji alitsü.

TENÜNGSANG KEN 69

Dawid Ken: Teyari Asoshi Ayimtenba

1 Ni kümzükang, Oh Tsüngrem!

Kechiaser kü tekong tashi tzü agi nungbangogo.

2 Ni lishi tarok nung asonger,

kong tetsüng ajemetdak maka.

Ni tzü tarok daki arua lir,

aser tzümetsüngi ni atsüngbanger.

3 Ayimtenba agi ni aniseter,

aser kü trok akonger.

Kü Tsüngrem teyari atadang kü tenük agi metizüker.

4  Kecha masü nung ni sempar kü kolak ku dang nungia timba kümogo;

kecha masü nung ni samatsütsü bushirtemji aika kümogo.

Ni mauyaba oset ka parnoki kü dang nungi akhanger.

5 Oh Tsüngrem, nai kü temenentem metet,

ni shisa makaba nai meteta lir.

6 Oh Temeranger Kibuba Tsüngrem,

shiri ne dak imlar,

parnokji ni ajanga mak tesüdaktsü,

Oh Israel Tsüngrem, shiri na bushir,

parnokji ni ajanga maksüi teidaktsü.

7 Kechiaser na atema ni tarürtsüba aremzükogo,

aser maksüi küjak nembangogo.

8 Kü adianutem madang ni aener ka ama,

aser kütsü chir rongnung ni bendanger ka lir.

9 Kechiaser ne ki asoshi jangraba agi ni chimar,

shiri na mezüngmeshiogo,

parnok mezüngmeshiba kü dak tongogo.

10 Kodang ni tanela nung ajeb aser lumi,

parnoki iba asoshi ni mezüngmeshi.

11 Kodang anem süji kü sobutsü kümdaktsü,

parnok asoshi niji menüdong ka aküm.

12 Shir süngkhüm nung amener,

parnoki kü indang jembir,

aser yi agi mesepertemi ni agi ken mejemer.

13 Saka ni asoshibo, Oh Kibuba,

mapang shitak nung kü sarasadem ne dangi yoktsü,

Oh Tsüngrem, ne temeim yimlibilem jenti yari kü dang langzüangma.

14 Lishitsüng nung asongba nungi ni kümzükang,

aser kü tsükchir nungi ni kümzükang aser tzü tarok nungi ni kümzükang.

15 Tzümetsüng agi ni tatsüngbangdaktsü,

mesüra tzü taroki ni temeyokdaktsü mesüra kanglai pei tebang kü dak teshibangdaktsü.

16 Kü dang langzüang,

Oh Kibuba, kechiaser ne temeim yimlibilem tajung lir,

ne taochi jenti yari kü dangi meyipang.

17 Ne tenzüker nungi ne tejak temiim,

Kü dang yakta langzüang,

kechiaser ni timtem nung lir.

18 Ni anasa arung aser ni kümzükang,

Kü tsükchirtem nungi ni kümzükangma.

19 Nai kü maksü aser tatalaba aser ni mezüngmeshiba,

item ajak metet, nai ajak meteta lir.

20 Mezüngmeshi agi kü mulung raksaogo,

anungji ni tasü maiti kümogo;

Kü dang aria bilemtsürtem ni bushir, saka shinga maliasü;

ni sünepdaktsütsü bushi,

saka ni shinga mangu.

21  Parnoki chiyungtsü melena mim agütsü,

aser tzüradang parnoki tasentzü agütsü.

22  Parnok langbangji parnok asoshi sang ka kümdakjang,

aser parnok den asemertem asoshi sang ka kümdakjang.

23 Parnoki kecha mangutsüsa parnok tenük manga kümdakjang,

aser parnok teperemi maneni atentendakjang.

24 Ne terasaba parnok dak meküplokjang,

ne ain tesashi agi parnok menepdakjang.

25 Parnok talidak azüngmeyak kümdakjang,

parnok süki nung shinga telidaktsü.

26 Kechiaser nai shiba dak azük,

parnoki pa rishikangshir;

aser nai shir yirutsü,

parnok tekangshi indang parnoki ashir,

27 Parnok tai madak tai enlokjang;

ne tekümtet nung parnok tetendaktsü.

28  Taküm kaket nungi parnok aidokjang,

aser temeshipur den tezülusem.

29 Saka ni timtem aser tejashi nung lir,

Oh Tsüngrem, ne tekümteti ni kümzükang.

30 Ken agi ni Tsüngrem tenüng asangtsü,

aser tenüngsang agi ni pa ulutsütsü.

31 Aji Kibuba asoshi nashi pungchi ka,

oda tezü aser temesüla atenba nashi

pungchi tenlaba dang nungi tepelaba alitsü.

32 Tajemrepba purtemi aji ngua pelatsü,

nenok shiri Tsüngrem bushir,

nenok mulung asentenshidakjang.

33 Kechiaser Kibubai sensaker dang teti angar,

aser par nübur shir tepuokdak lir,

parnok mezüngmeshi masür.

34 Anüng aser ali nati,

tzüyim aser yangji ayazüba ajaki pa sangang.

35 Kechiaser Tsüngremi Zion kümzüktsü,

aser Yihuda yimtitem yanglushitsü,

pa nüburtemi aji agitsü aser yangji alitsü.

36 Pa tenzükertem chirtemi aji senmang amangtsü,

aser shiri pa tenüng meimer parnok yangji alitsü.

 TENÜNGSANG KEN 70

Dawid Ken: Teyari Asoshi Sarasademba

(TKe. 40.13-17)

1 Oh Tsüngrem, ni kümzüktsü karang!

Oh Kibuba, ni yaritsü ilungang!

2 Shiri kü taküm bushir,

parnok maksüdakjang aser ratadakjang.

Shirnoki ni yirutsütsü jangra,

parnok maksü nung meyipa odakjang.

3 Shiri kü dang “Aha, aha” ta ashir,

parnok maksü nung meyipdakjang.

4 Saka shiri na bushir,

parnok ne dak pelatepdakjang,

shiri ne tekümtet meimer parnok nem teti shidakjang,

“Tsüngremji tulu lir.”

5 Saka ni sensaker aser anüngabonger;

Kü dangi kara arung, Oh Tsüngrem.

Na kü teyari aser tekümzüker lir,

Oh Kibuba, menua teli.

TENÜNGSANG KEN 71

Tambur Nisung Sarasadem

1 Oh Kibuba, ne dak ni jenoker,

Ni kodanga taakdaktsü.

2 Ne temeshiba nung ni kümzükang aser yariang;

Kü dang angang aser ni kümzükang;

3 Na kü jenokdak lung süang,

ni kümzüktsü asoshi tashi tait mitsa,

kechiaser na kü lung aser kü mitsa.

4 Oh kü Tsüngrem, tamajunger kabu nungi,

ni kümzükang,

ochimashir aser temenenpur kabu nungi ni kümzükang.

5 Na kü teimla lir, Oh Kibuba,

Oh Kibuba, asangwa nungi na kü mulung alemdak.

6 Taso dang nungi ni ne dak metaloker,

kütsü nu menden nungi ni agitetbaji na lir;

Maneni ni na asangtsü.

7 Aika atema niji tesüngmangtsü ka lir.

Saka na kü jenokdak tashi tait.

8 Anogo tepiyong ne nüngsang,

aser na tushiba agi kü bang sünga alitsü.

9 Tambur akümdang nai ni tesendok,

tashi makai akümdang nai ni senzüka teyutsü.

10 Kechiaser kü tsükchirtemi ni anema jembir,

shiri kü taküm asoshi miter,

parnoki külemi bangjemer.

11 Parnoki ashir, “Tsüngremi pa sentokogo,

arishiang aser pa puang;

kechiaser pa kümzüktsü shinga mali.”

12 Oh Tsüngrem ni nungi pila-a teli;

Oh kü Tsüngrem,

ni yaritsü kara-ang.

13 Shiri ni arishir,

parnok maksü nung samadakjang.

Shiri ni kangshitsü bushir,

parnok tatala aser maksü agi süngdakjang.

14 Saka nibo maneni imlatsü,

aser tali tali na asangtsü.

15 Kü tebangi ne temeshiba indang,

aser ne tekümtet indang anogo tepiyong ashitsü;

kechiaser itemji ni angatettsüba dang nungia tali.

16 Ni Kibuba Tsüngrem tashi tulu tenüng sanga arutsü.

Ni ne temeshiba, oda ne indangji dang ashitsü.

17 Oh Tsüngrem, kü asangwa mapang nungi nai kü dang sayu;

aser tang tashi ne tesüngmangtsü mapatem indang ni sangdongogo.

18 Tang, Oh Tsüngrem,

ni tambur aser kupu pua aküm nung nai ni tesendokma,

taruba pututem dang ni ne tashi aser uluba indang metetdaktsütsü.

19 Ne temeshibai anüngtem atonger.

Nai mapa tulu inyakogo, Oh Tsüngrem,

na mesüka shiba lir?

20 Na shibai lendong timtem tulu aika kü nem ngudaktsüogo,

nai tanaben ni sakdaktsütsü;

ali tarok nungi nai ni tanaben anitettsü.

21 Nai kü khonang rendakjang,

aser tanaben ni sünepdakjang.

22 Oh kü Tsüngrem,

ne temulung lemtetba indang ni tzürang kongki agi ne tenüng asangtsü,

Oh, Israel Temeshisang,

kongki agi ni ne nüngsang ken atentsü.

23 Kodang ni ne nüngsang ken tendir,

kü tebang mechi-i tepela agi ayimtentsü;

aser nai alangzükba takümi kanga pelatsü.

24 Kü temeli-i anogo tepiyong ne temeshiba teyari indang jembitsü;

kechiaser shiri ni yirutsütsü bushi,

parnok tatala nung mak süogo.

TENÜNGSANG KEN 72

Solomon Ken: Chuba Asoshi Sarasademba

1 Oh Tsüngrem, ne obendang chuba nem agüjang;

aser ne temeshiba chuba chir nem agüjang.

2 Anungji pai ne nübur temeshiba agi o bendangtsü,

aser ne nübur sensaker temeshiba agi o bendangtsü.

3 Tenemi nüburtem dangi yimji-yimjung,

aser ungsemtemi temeshiba bena arutsü.

4 Pai nübur rongnung sensakba pur kümdakjang,

meshimejunger kümzükang aser rishikangshir ajasajang.

5 Putu ajak songtema anü aser ita,

merema maküm tashi pa lidakjang.

6 Rem lanu madak tzünglu ajalok ama,

tzünglupui ali tayi kümdaktsüba ama pa aludakjang.

7 Pa anogotem nung temeshiba rendakjang,

aser ita sangwa marem tashi yimjung lidakjang.

8  Tzüyim nungi tzüyim tashi,

Ayong nungi ali tatem tashi pai yimsü asütsü.

9 Lisem lima alirtemi pa tsüngdang apudaktsü;

aser tsükchirtemi auyi menaktsü.

10 Tarshis aser asetkong chubatemi alimelen agütsütsü,

Sheba aser Seba chubatemi sempet agütsütsü.

11 Chuba ajaki pa dang apudaktsü,

kin ajaki pa tenzüktsü,

12 Kechiaser meshimejungeri ayimtendang,

aser teyarir malir sensaker pai kümzüktsü.

13T ashi maiter aser meshimejunger dang pai ajunger,

aser meshimejunger tasütsü nungi kümzüker.

14 Tekangshi aser azütokshir nungi pai parnok kümzüktsü;

kechiaser parnok züji pa madang senti lir.

15 Pa taküm talangka lidakjang,

pa nem Sheba hon agüjang.

Nisungtemi pa dang maneni sarasademdakjang,

aser anogo tepiyong pa moajang.

16 Linük nung tsük jenti adokdakjang,

tenem nungi ayipshidakjang

iba süngjangji Lebanon ama süngdakjang,

moapu nung ai agi sünga aliba ama,

yimtitem nung nisungtem sünga rendakjang.

17 Pa tenüng tatem makai lidakjang,

anü sangwa marem tashi pa nüngsang maneni alitsü.

Kin ajak pa ajanga moajang,

aser parnoki pa dang tepelatsü ta ajatsü.

18 Israel Tsüngrem Kibuba temoatsüba,

shiba kisüngi sayatenya inyaker.

19 Pa sentsüwangshi tenüng tatem makai sangang,

ali ajak pa sentsüwangshi agi süngdakjang,

Amen aser Amen.

20 Idaki Yesse chir Dawid sarasadem tatem.

TENÜNGSANG KEN 73

SHILEM ASEM

(TKe. 73—89)

Asaf Ken: Tsüngrem Ochiba

1 Atangji Tsüngremi Israel dang ajunger.

Shirnok temulung temerük lir parnok dang ajunger.

2 Saka nibo kü tetsüng talangba oadoker liasü;

Kü jenjang ajujitsü anasa liasü.

3 Kechiaser ni asükümertem aser tamajungpur,

azükaruba ngua tenük merem.

4 Parnok temang anema aser tashi ita ali nung,

tamajung pur tekangshi mali.

5 Tangar ama parnok tekangshi mali,

tangar ama parnok timtem mali.

6 Anungji asükümerji parnok tekong nung azük ama;

aser azü tokshibaji parnok sobutsü lir.

7 Parnok tenük temo agi wakbanga mesonger,

parnok mulungsentsü nungi tekülak moshir,

8 Parnoki tatala aser tamajung atema jembir;

tekangshitsü o parnoki kanga jembir.

9 Parnoki anüng anema parnok tebang lapoker,

aser parnok temeli alima sema senzür.

10 Anungji nüburtem ajagi meyipa aor,

aser moshia aliba tzüji ajemer.

11 Parnoki ashir,

“Tsüngremi koda metet?

Tematiba dak temetetba shisatsü lir ma?”

12 Ajiang tamajungerji itemi lir;

parnok rongsen arener aser jangratema alir.

13 Kü mulungjang merüktetba aser tai makaba nung kü teka shitokbaji amajok asü?

14 Ni anogo tepiyong kangshir,

aser anepdang shia ni merenshir.

15 Ni yamaji jembir ali asübo, ajiang,

ni ne chirtem ashioktsür lila.

16 Anungji ni ibaji angatettsü merang,

saka ibai kanga tasak liasü;

17 Oda ni Tsüngrem külemdaki or külenang,

parnok tamajunger tatembangji angatet.

18 Atangji nai parnok ali tanüla dak yutsü;

aser tesamadak nai parnok endoker.

19 Aoksa-a parnok nai samatsür,

tetsübutsü agi parnok meshimeshia samatsüogo.

20 Kodang nisung ka sakdir pungmang noksa sama ama;

Oh Kibuba, kodang na sakdir,

nai parnok tebilemba amajok kümdakjang.

21 Kodang kü mulung korema liasü aser kü nela jashia liasü,

22 Ni tamachi aser shisa maka,

oda ne tsüngdang shiruru ama liasü.

23 Aji saka ni maneni ne den lir;

nai kü teka tajichi nung sot.

24 Nai ne shisatsü agi ni anitsü;

aser tatem nung sentsüwangshidaki anitsü.

25 Kotak nung ne dak alema ni asoshi shiba ali?

Aser alima nunga ne dak alema ni aginüba shinga melika.

26 Kü shi aser kü mulungi tamakok nguaka,

saka teti Tsüngrem kü mulungjang tashi aser shilem lir.

27 Saka shir na nungi talangka pilar lir,

parnok atangji samatsü;

shiri na senzüka toktsür, nai parnok samatsütsü.

28 Saka ni asoshi Tsüngrem anasa alibaji tajungtiba;

ne mapa ajak indang ashitsüsa ni Kibuba Tsüngrem kü jenokdak kümdaktsüogo.

TENÜNGSANG KEN 74

Asaf Ken: Israel Kümzüktsü Sarasademba

1 Oh Tsüngrem kechiba nai teti asoshi onok jendok?

Kechiba ne chiyimdak aliba santem anema nai ain adoker?

2 Nai akhidang alangzükba ne nübur kin koba nai ne senmangtsü asoshi alangzük, aji bilemtetang.

Ano Zion tenem kong na ali aji bilemtetang.

3 Iba teraksa tulu ya ajiang;

tsükchirtemi tekülemdak kechisarena raksatsüogo.

4 Na anemertemi ne tekülemdak nungi arrloktsüogo,

takok anguba temaitsü parnoki idakji wako yuogo.

5 Arem nung süng aleneri pu agi süng lensaba ama,

parnoki itemji raksatsüogo.

6 Idakji süng agi chitetba noksa ajak,

parnoki pu aser yintem agi akusar.

7 Parnoki ne tekülemdak mi agi rongdoktsüogo;

aser parnoki ne tenüng alinung khenyongi memerüki kümdaktsüogo.

8 Parnoki pei sasa ashi,

“Onoki parnok khenyongi raksatsütsü,”

parnoki linük ajak nung Tsüngrem külemdak ki rongtoktsüogo.

9 Onoki temaitsü kecha mangu,

joko ainkar kata mali,

mesüra yamai kopiga alitsü

onok rongnung shingaia meteta mali.

10 Oh Tsüngrem, tsükchiri kopiga na mezüngmeshitsü?

Tatem makai parnoki ne tenüng atalatsü ama?

11 Kechiba nai ne teka, oda ne teka tajichi sota ayur?

Ne sübok nungi aji adokang aser parnok samajang.

12 Aji saka, akhi nungi Tsüngrem kü Chuba lir,

alima dangi ne tekümtet bener aru.

13  Nai ne tashi agi tzüyimji sadang,

tzü nung aliba ngüm molutzürangtem kolak nai raksatsür.

14  Nai molu tzürang kolak anüka raksatsü,

aser arem shiruru nem parnok chiyungtsü asütsü nai pa agütsü.

15 Tzüpokdak aser ayongnutem asoshi nai lenmang paitsü,

aser teti yima aliba ayong nai kongdaktsü.

16 Anogo ne meyong, aonungjia ne meyong,

Anü aser itaji nai renem.

17 Alima tatembang ajak nai yanglu,

nai mei aser tsüngkhüm yanglu.

18 Oh Kibuba tsükchiri na koda menütsü aji bilemtetang,

tamashi nisungi ne tenüng atalaogo.

19 Ne posü taküm arem shiruru nem tagütsü,

sensaker taküm timtem nung aliba nai teti tamadok.

20 Ne tezüngzüktepba bilemtetang,

kechiaser alima tammangdak ajak nung azütokshiba agi sünga lir.

21 Kangshia alirtem maksüa temeyipdaktsü,

sensaker aser makamaiteri ne tenüng sangdakjang.

22 Aramesoang, Oh Tsüngrem, aser ne indang jembiang,

tamashi nisungi anogo tepiyong na menütsüba bilemtetang.

23 Ne tsükchirtem ola,

na anemertemi asatepba koba ola maneni atur, aji tamadok.

TENÜNGSANG KEN 75

Asaf Ken: Tsüngremji Obendangsang

1 Oh Tsüngrem, onoki ne nem tenüngsang agütsür,

onoki ne nüng asanger, kechiaser na koda tulu,

aser ne tesüngmangtsü mapatem onoki metetdaktsütsü.

2 Nai ashi, “Kodang ni mapang shitak tenjidir, ni ochi o bendangtsü.

3 Alima aser yangji alir yimti laodang;

ni iba nüktangji togima tangit.

(Selah)

4 Asükümer dang, ‘Asüküma tebenshi,

aser tamajunger dang, mezümeküm tesü’ ta ni ashir.

5 Nenok asüküm kolak talangka angaka tetu,

mesüra mezümeküm o tejembi.”

6 Kechiaser anüdoklen aser anüolen nungi,

mesüra anüdoklentip aser anüolentip nungi teyari marur.

7 Saka Tsüngremji obendangsang lir;

pai ka ludaktsür aser ka tudaktsür.

8 Kechiaser Kibuba ket nung yi

tesashi meyoktepba marok ka am-a lir;

Pai aji züzüker aser alima nung tamajungpur ajaki aji khanang dena mejema tashi ajemtsü.

9 Saka ni Yakob Tsüngrem tenüngsang ken atentsü,

aser iba indang tatem makai sangdongtsü.

10 Ano tamajunger tashiji ni leptoktsü;

saka temeshipur tashiji ni tudaktsütsü.

TENÜNGSANG KEN 76

Asaf Ken: Tsüngremji Takoksang

1 Yihuda nung Tsüngrem meteta lir;

Israel nung pa tenüng tulu.

2 Yirusalem nung pa süki lir,

Zion nung pa talidak lir.

3 Idakji pai lasang lijakjangtem,

jong, nok aser raraba osetji raksaogo.

4 Tenemtem dang nungia na sentsü

twangshiba aser tamarenba.

5 Tasü taitertem parnok akaba samaogo,

aser parnok amua ogo;

tashikartemi pei teka mamshitet.

6 Oh Yakob Tsüngrem, nai arütsüba agi,

talungtsü o kor na marakzüteter.

7 Saka na, oda na dang tetsübutsü,

kodang na ain adokdir shibai ne tsüngdang noktaktettsü?

8 Nai anüng nungi obendang yok;

alimai tsübu aser ola madok.

9 Alima nung ala-ashirtem kümzüktsü asoshi;

Tsüngrem obendangdak noktak.

(Selah)

10 Tsükchirtemi mit adokba jagi ne tenüng asangba dang akümer;

shirnok iba mit nungi kümzüker,

parnoki ne tashi metettsü.

11 Kibuba ne Tsüngrem dang nai nangzükbatem atalokdakjang.

Pa meketa alir ajaki shiba dang tsübutsü tim,

pa dangi sempet benang.

12 Pai asükümba yimsüsürtem ajemaludaktsür;

aser alima chuba tulutem tetsübudaktsür.

TENÜNGSANG KEN 77

Asaf Ken: Timtem Mapang Tesünep

1 Timtem mapang ni Tsüngrem dang aja,

ni Tsüngrem dang ayimten, aser pai kü dang anga.

2 Kü timtemba anogo nung ni Kibuba bushi,

aonung tepiyong kü teka mekanga liasü;

Kü nela animesüngzüktet.

3 Ni Tsüngrem bilemtetdang ni anünger;

pa indang bilemdang kü nela lular.

(Selah)

4 Nai ni amua modaktsür;

ni kecha mejembitettsü ta shisa bulur.

5 Tesüiba anogotem indang ni bilemdanger;

taoba kümtem indang ni bilemteter.

6 Aonung ni kü mulung nung shisadanger;

ni ontaker aser kü nelai yamai ashir:

7 “Kibubai teti asoshi sentokdi ma?

Pai kodanga asenok dang mejungli ma?

8 Pa taochi teti asoshi sama asü?

Pa tenangzükbatemji joko amajok asü?

9 Aochia bilemtsü Tsüngremi amadok asü?

Pai ain adokba agi pa taochi shibangadok asü?”

(Selah)

10 Aser ni ashi,

“Ibai kü timtemji lir.

Oda Tematiba teka tajichi ni atema kongadokogo.”

11 Kibuba mapatem indang ni bilemtettsü,

Hau, akhidang ne sayatenyatem ni bilemtettsü.

12 Ano ne mapa ajak indang ni bilemdangtsü,

Aser nai inyakbatem indang jembitsü.

13 Oh Tsüngrem, ne lenmang temeshi lir,

Ozü Tsüngrem uluba ama tangar tsüngrem shiba ali?

14 Sayatenya inyakba Tsüngremji na;

kintem dang nai ne tashi sayuogo.

15 Nai neka agi ne nübur,

Yakob aser Yosef chirtem alangtetogo.

(Selah)

16 Kodang tzüi na angu, Oh Tsüngrem,

parnoki tsübua liasü.

17 Mepettemi tzü aludaktsür;

anüngtemi tsüngmok ola adokdaktsür;

aser ne lijakjangtem ajakleni ao.

18 Ne tsüngmok ola Tsüngrem mopung nung angashir;

ne tsüngpreti alimaji sangwatsür;

alimai atentener aser anokshir.

19 Nai tzüsem ajanga jaja;

nai tzüyim tarok ajanga süi,

saka ne tsüngneptem angutsü makok.

20 Mosa aser Aron ket agi,

sannüker ka ama nai ne nüburtem anishi.

TENÜNGSANG KEN 78

Asaf Ken: Tsüngrem Aser Pa Nüburtem

1 Oh kü nüburtem, kü tesayuba angang,

kü bang otem nung nenok narong tenang.

2  O entepba agi ni kü bang lapoktsü,

Akhidang nungi miima aliba indang ni jembitsü.

3 Koba onoki angashiogo aser metetogo,

aser ozü tsüraburi onok dang shiogo.

4 Onoki itemji par chirtem dang miima mayutsü

saka tarutsü putu dang Kibuba nüngsang;

aser pa tashi aser pa tesüngmangtsü

mapatem indang ashitsü.

5 Kechiaser Yakob ajanga kuli ka pai renemogo,

aser Israel nung ozüng ka yangluogo;

itemji pei chirtem dang sayutsü asoshi pai asen tsüraburtem dang melaogo.

6 Anungji tarutsü putu,

oda tasotsü aliba tanurtemi aji metettsü;

aser parnokia pei chirtem dang aji ashitsü.

7 Aser parnoki pei tamang Tsüngrem dak ayutsü,

aser Tsüngremer mapatem mamadoktsü.

8 Anungji parnok par tsüraburtem,

shir tekong temerang aser anema noktakba putu;

shir temulung mesüngjem aser shir tanela Tsüngrem dak tamang makatet;

iba putu ama parnok malitsü.

9 Efraim chirtem,

lijak agi raratsü renemer,

tongbang anogo nung meyipa ao.

10 Tsüngrem tezüngzüktepba parnoki mayu,

Aser pa ozüng nung mejajatsü;

11 Aser parnoki pai inyakbatem,

aser pai parnok dang sayuba sayatenyatem amadok.

12  Ijip lima nung, Zoan moapu nung,

Par tsürabur madang pai sayatenya inyak.

13  Pai tzüyimji sadang,

aser parnok nem atendangdaktsü;

aser tzüji jara ama noktakdaktsü.

14  Ano anüngdang mepet agi,

Aser ammang tepiyong mi tesangwa agi,

pai parnok ani.

15  Lisem lima nung pai lung jaksatsü,

Aser tarok nungi ama parnok nem tzü talubosa jemdaktsü.

16 Lung nungi pai ayong adokdaktsü;

aser tzü ayong ama yima aludaktsü.

17 Saka lisem lima nung Tematiba anema noktaka,

parnoki pa anema taliang temenen mena,

18  Aser parnok chinütsü chiyungtsü meshia,

parnok mulung nung parnoki Tsüngrem tendang.

19 Hau, parnoki Tsüngrem anema jembi;

parnoki ashi, “Arem nung Tsüngremi benjong agütsütsü kokdi ma?

20 Ajiang, ano tzü moshia adokdakja

pai lung dak kongshi, aser ayongnutem moshia ayim;

pai amtsüka agütsütetdi ma?

Par nübur asoshi pai shi agütsütsü kokdi ma?”

21 Anungji Kibubai angashi, aser rasa;

aser Yakob anema mi ka apu,

aser Israel anema ain adok.

22 Kechiaser parnoki Tsüngrem dak mamang,

aser pa tekümtet tashi nung tamang maka.

23 Yongjia temalen anüngtem dang pai mela,

aser kotak kishitem lapok;

24  Aser pai parnok manung tachitsü asoshi mana tsükdaktsü,

aser kotak nungi parnok nem chiyungtsü agütsü.

25 Nisungi kotaker amtsük achi;

pai parnoki aginüba ajak parnok nem agütsü.

26 Pai anüng nung anüdok mopung ondaktsü;

aser pai ain agi septsü mopung anishi.

27 Pai shi auyi ama,

aser tashikang atenba ozü tzüyimkhüm lisem ama parnok manung tsükdaktsü.

28 Aser pai parnok anendak,

parnok meketa aji tsükdaktsü.

29 Abenji parnoki chiyung aser tepok asüng.

Kechiaser pai parnok nem parnok taginüba agütsü.

30 Saka parnok taginütsü den mepila dang,

chiyungtsü ano parnok bang nung alidang,

31 parnok anema Tsüngrem ain adok,

aser parnok rongnung tashi taitbatem tepset.

Aser Israel asangurtem telungi yok.

32 Yongjia ano parnoki temenen menajen mena,

aser pa sayatenya mapa dak mamang.

33 Anungji parnok anogotem amajok nung,

aser parnok kümtem timtem nung süidaktsü.

34 Pai parnok tepset tashi nungang, parnoki pa bushi;

Aser parnoki temulung meyip aser temulung agüja Tsüngrem bushi.

35 Aser Tsüngremji parnok lung,

parnok alangzüksang Tematiba Tsüngrem ta parnoki bilemtet.

36 Saka parnoki tebang agi pa tiyazü nung asang,

Aser parnok temeli agi pa dang yazü.

37 Kechiaser parnok mulungjang pa den shitak maliasü.

Mesüra pa tezüngzüktepba nung parnoki temulung malem.

38 Saka pa dak aria bilemba ali nung, pai parnok

menen atok, aser mesamatsü;

Hau, aiben dang pai ain madoki aremzük aser pa mit ajakbo madok.

39 Aser parnokji shi dang ta,

aser mopung süia or meyipa maru medem to, ta pai bilemtet.

40 Kwiben arem nung parnoki pa anema apuso,

aser lisem lima nung pa jashidaktsü!

41 Aser parnoki ano Tsüngrem tendangjen tendang,

Aser Israel Temeshisang jashidaktsü.

42 Parnoki pa teka,

mesüra tsükchir nungi,

pai parnok kümzükba anogo mebilemtet;

43 Koda Ijip lima Zoan moapu nung pai temaitsü

aser sayatenyatem sayu, aji mebilemtet.

44  Pai parnok ayongtem azü kümdaktsü,

anungji parnok ayongnutem nungi parnoki mejemtet.

45 Pai manga lokti parnok dangi yok,

koba agi parnok chima;

aser allutem yok kobai parnok samadaktsü.

46  Ano alu nung adokba osettem pai lungben nem,

Aser parnoki inyaktetba jangkok nem agütsü.

47 Pai parnok tsükmenatzü lu rür agi raksatsü,

aser mungu süngdongtem kanga temokong agi südaktsü.

48 Nashitem pai rür agi onsetdaktsü,

aser parnok shirurutem tsüngi agi yisetdaktsü.

49 Pai parnok madaki tashi ain atakatem mit aser terasabatem;

teraksatsüba tenyartem ama yok.

50 Pai pei ain adokba sota mayu,

mesüra tasüba nungi parnok mekümzük;

saka tashitak wara nem parnok agütsü.

51  Aser Ijip nung mezüng jabasotem,

aser Ham süki nung parnok tashi tongtibatem tepset.

52  Saka pai pei nübur san ama anitet,

aser shiruru telok ama arem nung parnok anishi.

53  Aser parnoki metsübutsüsa pai parnok jungjunga anishi.

Saka parnok tsükchirtem tzüyim agi mobang.

54  Aser pai parnok pa temeshi tenem tashi anir aru,

Oda pa teka tajichi agi yangluba iba tenem lima tashi.

55 Kintemjia parnok madang nungi pai aridok,

aser parnok senmang lemsa-a arrtsü agütsü.

Aser Israel kidongtem parnok pei süki nung lidaktsü. 

56  Yongjia Tematiba Tsüngrem anema parnoki atitang aser apuso,

aser pa kulitem mayu;

57 Saka meyipa ao,

aser par tsüraburtem ama külaka benshi;

Ashikülak lijak ka ama parnok prepa-prepa ao.

58 Kechiaser parnok tokong külemba agi pa ain adokdaktsü.

Aser parnok süngyanglu agi pa tenük meremdaktsü.

59 Kodang ya Tsüngremi angashi, pa kanga rasa.

Aser Israel khenyongi sentok.

60  Aji asünung nisungtem rongnung pa alidak süki Shilo nung Pai talidak sentok.

Süki kong meimchir rongnung pa ali.

61  Tepuokdak alirtem nem pai pa tashi agütsü;

aser Pa sentsüwangshi tsükchir ket nung agütsü.

62 Ano pai nübur pi nok nem agütsü,

aser pa senmangertem dang rasa.

63 Mi agi asangurtem meyok;

aser par aiürtemi kiyir ken maten.

64 Par putirtem nok agi asü,

aser par amitsürtemi mang ayim.

65 Idangji mejangba nungi saker ama,

yi agi meseper tashikari ayimtenba ama Kibubai shishi.

66 Aser pai pa tsükchirtem rongdong dak azük.

Pai parnok teti asoshi mak südaktsü.

67 Iba dak alaka pai Yosef süki magizük,

Aser Efraim kin meshim,

68 Saka pai meimba Zion tenem,

Yihuda kin shim.

69 Aser pai pei temeshi tenladak anüng talang ama yanglu.

Teti asoshi pai alima yangluzüka akaba medem.

70  Ano pa kilir Dawida pai shim,

Aser san telok rongnungi agitet.

71 Mamatzü ayimba san sülen anitakba nungi pai pa nübur Yakob aser pa senmang

Israel sannüker asütsü pai anir aru.

72 Anungji pai temulung tindang agi parnok sannüker aküm;

 TENÜNGSANG KEN 79

Asaf Ken: Israel Kin Asoshi Sarasademba

1  Oh Tsüngrem, kintemi ne senmangdaki aitogo;

Ne temeshi tenlaki parnoki menentsüogo;

Parnoki Yirusalem raksatsüogo.

2 Anüng nung ozütem chiyungtsü asoshi parnoki ne tenzüker temangtem agütsüogo,

alima shiruru nem ne temeshi pur shi agütsüogo.

3 Yirusalem meketa tzü ama parnoki parnok zü tokshiogo;

aser parnok aremtsü shinga maliasü.

4 Onok kiyongertemi onok sempar,

aser onok meketa alirtemi sensatsür.

5 Kopiga tashi, Oh, Kibuba?

Tatem maka na ain adokdi ma?

Ne nükmeremji mi ama jangrudi ma?

6 Na memetetba kintem madak,

aser ne dang sarasadem masüba yimlitem madak,

ne terasaba meküplokjang!

7 Kechiaser parnoki Yakob meyokogo,

aser pa talidak raksatsüogo.

8 Ozü tsürabur temenentem onok anema nai tebilemtet.

Ne taochi onok dangi yakta yokang.

Kechiaser onok kanga dang luogo.

9 Ne nüng sentsüwangshitsü,

asoshi onok yariang.

Oh ozü kümtetba Tsüngrem, onok kümzükang,

aser ozü menen tokang.

10 “Parnok Tsüngrem kong ali”, ta kechiba kintemi shidaktsütsü?

Ne tenzükertem azü tokshia mang ayangbaji onoki ngua kin rongnung metetdakjang.

11 Puoka alirtemi anüngba ne dangi arudakjang.

Ne ain tulu yari tasütsüpurji kümzükang.

12 Oh Kibuba, koba tesempa agi parnoki na sempa,

parnok teku dangi tenetben agi tali ozü kiyongertem dang tesempa shia agüjang.

13 Idangjiang onok ne nübur aser ne chiyimdak chiyimer santemi,

teti tatem maka ne tenüng asangtsü.

Putusa putu onoki ne nüngsang metetdaktsütsü.

TENÜNGSANG KEN 80

Asaf Ken Israel Tekümtet Asoshi Sarasademba

1  Oh Israel sannüker,

Na shibai Yosef san ama anishir,

tenarong tenang; na shiba Cherubim madak amen, sentsüwangshiang.

2 Efraim o Benjamin aser Manase madang,

ne tashi akasoang,

aser onok kümzüktsü arung.

3 Oh Tsüngrem, ano onok yanglushijang;

aser onok kümzüktsüa ne tejak sayuang.

4 Oh, Temeranger Kibuba Tsüngrem,

ne nüburi sarasademba anema nai kopiga ain adoktsü?

5 Nai nüktzü agi parnok pok süngdaktsüogo.

Aser tajemtsü nüktzü talubosa agütsüogo.

6 Onok kiyongertem asoshi nai onok tatalaba ka kümtsür,

Aser parnok rongnung ozü tsükchirtemi menütsür.

7 Oh Temeranger Tsüngrem,

ano onok mesoang;

aser onok kümzüktsü,

asoshi ne tejak onok dak yalokjang.

8 Ijip nungi nai tsükmenatzü zü ka bener adok;

nai kintem aridok, aser aji atem.

9 Iba asoshi nai ali tusa,

aser aji tera yanga ai,

aser alima asüng.

10 Iba akhüm agi tenemtem nembang,

aser iba kongsangtemji Tsüngremer cedar dong ama liasü.

11 Tzüyim tonga ajagi pei kongsang asang,

aser ayongji tonga iba süngsem meyi.

12 Ajangla süisüponger ajaki aji metsükzüktsüsa,

nai kechiba iba atsü raksatsü?

13 Arem nungi pungzüi aji mokungsar,

aser moapu nung arem shirurutemi aji achir.

14 Oh Temeranger Tsüngrem,

onoki ne dang mepishir, ano meyipang.

Kotak nungi ajizüka yokang,

aser ajiang, aser iba tsükmenatzü tezü anebaluang.

15 Koba neka tajichi agi atemba dong,

aser na atema nai tashi itdaktsüba kongsang.

16 Aji mi agi aronger; aji lepzükogo.

Nai ain adoka parnok dak reprangang aser parnok samajang.

17 Ne teka tajichi nisung manung nai ametang.

Oda nisung chir shiba nai pei atema tashi itdaktsü.

18 Anungji onok na nungi meyipa maotsü.

Nai onok nem taküm agüjang,

onoki ne dang sarasademtsü.

19 Oh Temeranger Kibuba Tsüngrem,

onok ano mesoang;

aser onok kümzüktsü asoshi ne tejak onok dak yalokjang,

 TENÜNGSANG KEN 81

Asaf Ken: Benjong Asoshi Atenba

1 Asen Tsüngrem dang tashi agi ken tenang;

Yakob Tsüngrem dang tepela ola ayimokjang.

2 Ken tenang, aser ola tajungba kongki temang.

Tzürang kongki den tanganütsü tawaba kongki.

3  Ita tasen dang, anü meidang,

aser benjongnü, jangzü apuang.

4 Kechiaser ya Israel asoshi ozüng ka lir,

Yakob Tsüngremi tenteta akaba yimsü.

5 Kodang pa Ijip lima anema ao,

Kodang ni memetetba oshi ka angashi,

idangji kuli ka asütsü pai aji Yosef shimtet.

6 Pai ashi, Parnok tapubang nungi ni khuretji endoktsüogo.

Parnok khu nungi par tekaji salatsüogo.

7 Timtem dang nai aja,

aser ni na kümzük;

Tsüngmok miima alidak nungi ni ne dang langzü;

Meriba tzü nung ni na atidang.

(Selah)

8 Oh kü nübur, angang,

aser ni ne dang kuli agütsütsü;

Oh Israel, nai kü dang angala sang!

9 Nenok rongnung bendanger tsüngrem malitsüla,

Nenoki aener tsüngrem madang mapudaktsüla.

10 Ni Kibuba ne Tsüngrem,

shibai na Ijip lima nungi anitet.

Ne bang tuluka ka-ang, aser ni süngtsütsü.

11 “Saka kü nüburi kü ola manga;

aser Israeli ni oda toktsü.

12 Anungji parnok temulung merangba leni ni parnok odaktsü,

oda parnok pei bilemba nung jajatsüsa.

13 Oh kü nüburi kü dang angala sang;

Israeli kü lenmang nung jajala sang!

14 Ni par tsükchirtem yakta kokla,

aser par tsükchir anema küka mekangla.

15 Kibuba sempartemji pa küboki yidaktsütsüla,

aser parnok timtem mapang teti tatem makala.

16 Ano pai wheat jang tajungtiba agi parnok mesüla;

Aser lung nungi ninang mojitzü agi ni jangra temdaktsüla.”

 TENÜNGSANG KEN 82

Asaf Ken: Ochiba Asoshi Sarasademba

1 Temeshipur lokti tulu madak Tsüngremji lir,

tsüngremtem madak pai obendangba mita lir.

2 “Kopiga nenoki ochi meshi-i bendangtsü,

aser tamajungertem tejak reprangtsü?”

(Selah)

3 Tashi maiter aser lajar nem ochiba agüjang,

aser takartem o bendangang.

Timtemer aser meshimejunger nem ochiba agüjang.

4 Tashimaiter aser ala-ashia alirtem kümzükang.

Tamajunger ket nungi parnok kümzükang.

5 Parnok temetetba maka aser tangatetba mali.

Tammangdak parnoki oli aruli ta senzür;

alima kimung ajak anokshir.

6 Ni ashi, nenok tsüngremtem lir,

aser nenok ajak Tematiba chirtem.

7 Aji saka nisungtem ama nenok asütsü,

aser yimsüsür ka ama tsüktsü.

8 Oh Tsüngrem, aramesoang, alima o bendangang;

kechiaser kin ajak ne meyong lir.

TENÜNGSANG KEN 83

Asaf Ken: Tsükchir Madak Takok

1 Oh, Tsüngrem na ajem ajema teli;

Nai o jembiang, aser ajemajema teli, Oh, Tsüngrem.

2 Kechiaser, ajiang, ne tsükchirtemi rongronger.

Aser ne sempartemi parnok kolak angaka tuogo.

3 Ne nübur anema parnoki tekülak tasa yanglur,

aser nai awabanga alir anema parnoki o bangjemer.

4 Parnoki ashir,

“Arung, parnok kin ka mekümdaktsüi samatsüdi;

oda Israel tenüng joko mebilemtettsüsa.”

5 Hau, parnok ka küma mulungtepogo;

Na anema parnoki tenangzükba ka yangluogo.

6 Edom o Ishmael nunger na süki,

Moab, aser Hagar nunger;

7 Gebal, Ammon, aser Amalek;

Tair nunger den Filistia;

8 Asiria-a pa den semlokogo;

Parnokji Lot chirtem asoshi tashi tait teka lir.

(Selah)

9 Midian nunger dang ama,

Kishon ayong nung,

Sisera o Yabin dang ama,

nai parnok dang benshiang;

10 Shirnok Endor nung sama,

Shir ali asoshi jana ama aküm.

11 Parnok tulurtem Oreb ama kümdakjang;

Hau, parnok yimsüsür ajak Zeba aser Zalmunna ama kümjang;

12 Shirnoki ashi,

“Tsüngrem talidakji asenoki makdi arung.”

13 Oh kü Tsüngrem,

yima aoba auyi ama,

mopung madang tsüksü ama,

parnok kümjang.

14 Arem mi agi merok ama,

aser milak agi tenemtem arongba ama.

15 Yamaji ne tsüngsak agi parnok arishiang,

Aser ne yipru agi aoksajang.

16 Oh Kibuba, parnoki ne tenüng bushitsüsa,

parnok tejak maksü agi süngjang.

17 Parnok maksüdakjang aser teti asoshi temulung makai kümjang;

hau, parnok mangmangdakjang aser samadakjang;

18 Oda parnoki na dang,

shiba tenüng Kibuba lir,

Alima ajak madak Tematiba ta metetdakjang.

TENÜNGSANG KEN 84

Kora Chirtem Ken: Tsüngrem Ki Asoshi Yongyaba

1 Oh Temeranger Kibuba,

ne talidak koda tobur tajung!

2 Kü nelai yongyar,

hau oda Kibuba tenlaki asoshi lumir;

Kü mulung aser kü shi agi taküm Tsüngrem dang ken atener.

3 Hau alushijaki pei ki ka nguogo,

aser posüi pa techanu yutsütsü asoshi tesep lir.

Oda ne tekülemdak,

Oh Temeranger Kibuba,

kü Chuba, aser kü Tsüngrem.

4 Ne kidang alirtem koda tepelatsü,

Parnoki na maneni asangtsü.

(Selah)

5 Shir tashi ne dak ali,

shir mulung nung Zioni aoba lenmang lir,

parnok tepelatsü;

6 Parnoki Baka takong lenten ajanga aodang,

parnoki aji tzüpokdak kümdaktsür.

Hau, tsükla tzünglu temoatsüi aji süngtsür.

7 Parnok tali tashi taitba taitba akümer;

Parnok tsüngremtem madak Tsüngrem Zion nung angutsü

8 Oh Temeranger Kibuba Tsüngrem, kü sarasadem angang;

Oh Yakob Tsüngrem, angang.

(Selah)

9 Oh Tsüngrem, ozü jong ajiang;

nai shimtetba tejak reprangang.

10 Kechiaser ne kidang anogo kaji tanga nung meyi ka dang nungia tajungba.

Tamajunger süki nung alidangbo,

kü Tsüngrem kidang kishinüker ka-ang nibo sünüali.

11 Kechiyong Kibuba Tsüngremji anü aser jong ama lir;

Kibubai taochi aser sentsüwangshi agütsütsü.

Indang indanga jajartem asoshi pai tajung kecha sota mayur.

12 Oh Temeranger Kibuba,

shiri ne dak amanger parnok tepelatsü.

TENÜNGSANG KEN 85

Kora Chirtem Ken: Yimjung Asoshi Sarasademba

1 Kibuba, ne lima dang nai junga aruogo;

Yakob tia nai shilangtsüogo.

2 Ne nübur menen nai tokogo;

parnok ajak menen nai samatsüogo.

(Selah)

3 Ne terasaba ajak nai agienogo,

Ne ain tulu adokba nungi ne sasa meyipogo.

4 Oh ozü kümtetba Tsüngrem,

onok dangi ano meyipang,

aser onok anema nai ain adokba anenang.

5 Onok dak nai tatem maka ain adoka lidi ma?

Putu ajak dang nai ain adokdi ma?

6 Ne nüburtemi ne dak pelateptsüsa

nai onok asentenshi mesütsüli ma?

7 Oh Kibuba, onok dang temeim taochi sayuang,

aser ne tekümtet onok dang mela-ang.

8 Tsüngrem Kibubai kechi shidir ni angatsü;

kechiaser par nübur aser par temeshipur dang

pai tesünep o jembitsü.

Saka parnok ano tamashi lenmangi teyok.

9 Atangji shiri pa tsübur par anasa pa tekümtet lir,

oda ozü lima nung sentsüwangshi alitsüsa,

10 taochi o ochiba na ajurutepogo;

temeshiba o yimjung na tebang meseptepogo.

11 Ali nungi ochishiba pokteter;

aser kotak nungi temeshibai reprangzüka yokogo.

12 Hau, Kibubai kechi tajung aji agütsütsü;

aser ozü limai talubosa aji adokdaktsütsü.

13 Pa jakdang temeshiba aotsü,

aser pa jajatsü asoshi lenmang yanglutsütsü.

TENÜNGSANG KEN 86

Dawid Ken: Timtem Mapang Sarasademba

1 Oh Kibuba, ne narong kü tsütsü shiang;

aser kü dang langzüang.

Kechiaser ni sensaker aser maka-mait.

2 Kü taküm kümzüka yuang;

kechiaser ni Tsüngrem tsübur;

na kü Tsüngrem,

ne dak amangba ne kilir kümzükang.

3 Oh Kibuba, kü dang aochiang.

Kechiaser anogo tepiyong ni ne dang ajeber.

4 Ne tenzüker taküm peladakjang,

kechiaser, Oh Kibuba,

ne dangi kü taküm mesor.

5 Kechiaser, Kibuba na tajung aser tai atoktsü renema lir,

aser ne dang ajar ajak dang temeim taochi nung talubosa agütsür.

6 Oh, Kibuba kü sarasadem angang,

aser ni mepishiba ola angang.

7 Timtemba anogo nung ni ne dang ajatsü;

kechiyong nai kü dang langzütsü.

8 Oh Kibuba, tsüngremtem rongnung na ama shinga mali.

Ano ne mapa ama tanga kecha mali.

9 Oh Kibuba, nai yangluba kin ajaki arua ne madang külemtsü;

Aser parnoki na sentsüwangshitsütsü.

10 Kechiaser na tulu,

aser sayatenya mapa inyaker.

Na dang Tsüngrem lir.

11 Oh, Kibuba, kü dang ne lenmang sayuang.

Ne ochishiba nung ni jajatsü;

ne tenüng tsübutsü asoshi kü mulung lungjemjang.

12 Oh Kibuba kü Tsüngrem, kü mulung ajak agi ni na asangtsü.

Ni ne nüng tatem maka sentsüwangshitsütsü.

13 Kechiaser kü dang ne temeim taochi kanga tulu;

aser tekübokba Sheol nungi nai kü taküm kümzükogo.

14 Oh Tsüngrem,

ni anema asükümer apusor,

teka air telok kati kü taküm arishiogo,

aser parnoki na züngoka mali.

15 Saka, Oh Kibuba,

na temeim yimlibilem aser taochi Tsüngrem;

ain adoktsü meilungi,

temeim taochi aser ochi nung talubosa.

16 Kü dangi meyipang,

aser kü dang aochiang.

Ne kilir nem ne tashi agüjang,

aser ne kilitsür chir kümzükang.

17 Teti asoshi kü dang temaitsü ka sayuang,

oda ni sempartemi aji ngua mak asütsüsa.

Kechiaser, Kibuba,

nai ni yariogo aser ni süneptsüogo.

TENÜNGSANG KEN 87

Kora Chirtem Ken: Yirusalem Tenüng Asangba

1 Temeshi tenem manung pa yimti kimung lir;

2 Yakob talidak ajak dang nungi,

Kibubai Zion süngkhümbong temeimba.

3 Oh Tsüngrem yimti,

ne indang sentsüwangshi o jembidar.

(Selah)

4 Ni shiteter rongnung Rahab o Babilon ni züngoktsü.

Ajiang, Filistia, aser Tair, Ethopia den;

iba nisung idakji aso, ta parnoki ashir.

5 Hau, Zion indang ya ashitsü,

kintem ajak iba nungji lir;

aser Tematibai la tashi ita kümtsütsü.”

6 Kodang kintem otsü pai züludir,

“Ibai idakji aso” ta Kibubai azüngtsü.

7 Ken tener aser tsüngsangertemi ashitsü,

“Kü tzüpokdak ajak ne dak lir.”

TENÜNGSANG KEN 88

Kora Chirtem Ken: Teyari Asoshi Ayimtenba

1 Oh Kibuba, kü kümtetba Tsüngrem,

ni ne madang ammang sangwa jebogo.

2 Kü sarasadem ne dangi arudakjang.

Ni ajepba nai angang.

3 Kechiaser kü taküm timtem agi sünga lir,

aser kü taküm Sheol anasa lir.

4 Shirnok kanglai alur,

parnok den nia züngsemer.

Ni teyari maliba nisung ka ama lir.

5 Tasür rongnung endokba ama tepsetbatem leper nung mejanga ali ama;

shiba nai joko mebilemteter,

aser neka agi parnok leptangogo.

6 Teküboktiba kangla nung,

tammangdak, tarokdak, nai ni yutsüogo.

7 Na rasaba agi ni nenseter,

aser ne tzüsem ajak agi nai ni kangshir.

(Selah)

8 Kü tembartem kü dang nungi nai talangka odaktsü.

Parnok dang niji tesempatsü ka nai kümtsü.

Ni shibanga lir,

aser ni madokteter.

9 Timtemba agi kü tenük ramia aor;

Oh Kibuba, ni anogo shia ne dang sarasademogo.

Ne dangi teka mekangogo.

10 Tasür asoshi nai sayatenya inyakdi ma?

Tasürtemi shia arua na sangdi ma?

(Selah)

11 Leper nung ne temeim taochi sangoktsüdi ma?

Mesüra Teraksatsüsang dang ne temulung lemtetba indang shidi ma?

12 Tammangdak ne sayatenyatem shitetdi ma?

Tammangdak lima nung ne temeshiba bilemtetdi ma?

13 Saka, Oh Kibuba,

ni ne dang jebogo;

aser anepdang kü sarasadem ne dangi arutsü.

14 Kibuba, nai kechiba kü taküm sentoker?

Küdang nungi kechiba nai ne tejak miimer?

15 Ni lanuwa nungi timtemer aser tasür;

ne taoksatsü agi ni kangshidang ni koda masür.

16 Ne mit tesashi ni ajanga ogo;

ne taoksatsü agi ni leptangogo.

17 Anogo tepiyong tzü ama parnok aru;

parnoki ni khenyongi meketbang.

18 Temeimer o tembar,

aser kü adianutem tammangdaki odaktsü,

ni nungi nai talangka toktsüogo.

TENÜNGSANG KEN 89

SHILEM ASEM

(TKe. 73—89)

Ezra Yimer Ethan Ken: Kin Timtem Mapang Atenba

1 Kibuba temeim taochi indang ni teti ken atentsü.

Putu ajak dang ne temulung lemtetba indang

ni kü bang agi sangoktsütsü.

2 Ne temeim taochiji teti tatem makai yanglutsü ta ni shiogo.

Ne mulung lemtetbaji anüngtem ama akanga lir.

3 Ni shiogo, “Ni shimtetba den ni tezüngzüktepba ka yangluogo;

kü kilir Dawid dang ni azüngashiogo.

4 Ne metsü teti tatem makai ni tenzüka toktsütsü.

Aser putu ajak asoshi ne chuba menden yanglutsütsü.”

(Selah)

5 Oh Kibuba, anüngi ne sayatenya sangdakjang.

Temeshipur mungdangdak ne temulung lemtetba sangdakjang.

6 Kechiaser anüng nung alir shibai Kibuba den medemdangtet?

Kotak tsüngrular rongnung Kibuba ama shiba ali?

7 Temeshipur mungdangdak Tsüngremji kanga tetsübutsü,

Aser pa meketa alir ajaki paji tsübutsü.

8 Oh Temeranger Kibuba Tsüngrem,

Kibuba, na ama tashi tait shiba ali?

Aser ne temulung lemtetba na meketa lir.

9 Nai tashi tait tzüyim madak chubar;

iba tzüsem adokdang nai itemji anendaktsür.

10 Nai Rahab tetepsetba ka mesüka,

anükanüka raksatsüogo.

Ne tashi agi tsükchirtem nai jenshidaktsüogo.

11 Anüngji ne indang,

alijia ne meyong.

Alima aser angji aliba ajak,

nai yangluogo.

12 Septsülen aser tentsülen,

nai itemji poktetdaktsüogo.

Ne tenüng nung Tabor aser Hermoni pelapeter.

13 Na tashi tait tepen ka lir,

ne teka tashi tait aser neka tajichi talang.

14 Temeshiba aser ochi o bendangbaji ne chuba menden kimung.

Ne jakdang temeim aser ochi aor.

15 Benjong ola metetba nübur tepelatsü.

Oh Kibuba, parnoki ne tejak tesangwa nung jajar.

16 Ne tenüng nung parnok anogo tepiyong pelateper.

Aser ne temeshiba nung parnok uludaktsür.

17 Kechiaser parnok tashi sentsüwangshiji na;

aser nai ajungba ajanga onok tezü ajongkettsü.

18 Kechiaser ozü jong Kibuba meyong;

aser ozü chuba Israel Temeshibar meyong.

Dawid Dang Tsüngremer Tenangzükba

19 Idangji ne temeshipur dang nai mangdang nung jembi,

aser ashi, tashi iter ka manung ni korang yutsüogo.

Nübur nungi shimtetba ka ni ajungket.

20 Ni kü kilir Dawid bushitetogo.

Kü temeshi totzü agi ni pa mezüja shimogo.

21 Pa den kü teka semloktsü.

Kü teka agi ni pa tashi itshidaktsütsü.

22 Tsükchir jagi pa mekülakoktsütsü,

mesüra tamajungeri pa meludaktsütsü.

23 Aser pa madang ni pa anemer ludaktsütsü,

aser pa dang sempartem dak azüktsü.

24 Saka kü temulung lemtetba aser kü temeim taochi pa den alitsü;

aser kü nüng nung pa tezüji ajungkettsütsü.

25 Ano pa tekajia tzüyim manung,

aser pa teka tajichi ayongtem nung, ni toktsütsü.

26 Pai kü dang ayimtentsü,

“Na kübu, kü Tsüngrem,

aser kü kümtetba lung.”

27 Ano pa kü jabaso tambu,

Aser alima chuba rongnung tematiba,

kümdaktsütsü.

28 Teti tatem maka kü temeim taochi

ni pa asoshi yuadoktsü.

Aser kü tezüngzüktepba pa den akanga alitsü.

29 Aser pa chuba mendenji kotaker anogo ama,

teti tatem makai ni lidaktsütsü;

pa metsüji teti chuba alitsü.

30 Par chirtemi kü ozüng toktsüra,

aser ni melaba nung mejajara;

31 parnoki ni tenteta akaba raksara,

aser ozüngtem mebenshira;

32 idangji parnok teraksaba anema ni ajok agi merenshitsü.

Aser parnok menen anema ni azüktsü.

33 Saka kü temeim taochi ni khenyongibo pa dang nungi bener maotsü,

mesüra kü temulung lemtetba meludaktsütsü.

34 Kü tezüngzüktepba ni meraksatsü,

mesüra kü bang nungi tuguba memelenshitsü.

35 Kü temeshiba agi ni ken azüngashialajibo;

ni Dawid dang meyazütsü.

36 Pa metsü teti tatem maka alitsü;

aser kü madang anü ama pa chuba menden alitsü.

37 Ita ama aji teti tatem maka tenzüka toktsütsü,

aser anüng nung teti asoshi kuli ama aji alitsü.

(Selah)

Chuba Kokdaktsüba Atema Mangyimba

38 Saka tang nai pa endokogo aser malizük,

nai shimtetba anema nai ain adokogo.

39 Ne kilir den tezüngzüktepba nai sendokogo.

Pa chuba korangji aut nung tsükdakja nai menentsüogo.

40 Nai pa atsü ajak raksatsüogo;

nai pa mitsa laodaktsüogo.

41 Süisüponger ajaki pa dak rakzükraktemer;

par kiyonger madang pa tesempatsü ka kümogo.

42 Nai pa tsükchirtem teka tajichi uludaktsüogo.

Nai pa tsükchir ajak peladaktsüogo.

43 Hau, nai pa nok techira noktanger,

aser tongbang nung nai pa den masem.

44 Nai pa sentsü remdaktsüogo,

aser pa chuba menden ali-i ludaktsüogo.

45 Pa lanuwa mapang nai tatsüba kümdaktsüogo.

Nai pa maksü agi süngtsüogo.

Tekümzük Asoshi Sarasademba

46 Oh, Kibuba, kopiga?

Nai teti tatem maka atsüka lidi ma?

Ne ain mi ama kopiga arongtsü?

47 Oh kü mapang koda tatsü,

aji bilemtetang.

Nisung chir ajak amajok nung yanglu!

48 Sheol ain nungi pei tanela sottsüsa,

alima nung taküm alir shiba masütsü?

(Selah)

49 Kibuba, nai temulung lemtetba tensa

Dawid dang nai nangzükba mezüng temeim taochi kong ali?

50 Kibuba, ne kilirtem maksü bilemtetang.

Tashi tulu kintemi sempaba ni kü mulung nung koda aremer.

51 Koba ajanga, Oh Kibuba,

ne tsükchirtemi sempaogo,

Koba ajanga nai shimtetba aolen parnoki sempaogo.

52 Kibuba teti tatem maka temoatsü sang!

Amen, aser Amen.

TENÜNGSANG KEN 90

SHILEM PEZÜ

(TKe. 90—106)

Mosa Ken: Tatem Makaba Tsüngrem

1 Oh Kibuba, putu ajak nung,

na ozü talidak süa aruogo.

2 Tenemtem makümdang,

mesüra ali aser alima meyangludang,

oda teti tatem makaba mapang nungi,

na Tsüngrem.

3 Nai nisung auyi kümtsür,

aser ashir, “Nenok nisung chirtem, shilangang.”

4 Kechiaser ne tsüngdangbo küm meyi kajia yashi ama dang,

aser ammang nung mitkar ka ama lir.

5 Tzümetsüng agi ama nai parnok punger aor;

parnok pungmang ka ama;

anepdang parnok ai ka meyi ama,

6 anepdang aji apunger aser ainer;

nikongdang aji azülar, aser asür.

7 Kechiaser ne ain agi onok rongsar,

Aser ne mit agi onok koda masür.

8 Ozü menen ne madang nai yutsüogo,

onok kipok menen ne tejak tesangwa nung lir.

9 Kechiaser ne mit nung ozü arishi ajak süitemer.

Tangula ka ama ozü arishi onoki temdaktsür.

10 Ozü arishi anogo tenemer metsü;

mesüra arishiaka küm lir anasü-ang.

Yongjia parnok arishiji oda timtem aser tejashi-ang.

Kechiaser aji yakta atemer,

aser onok yima aor.

11 Ne ain adokba tashi,

aser ne dang tsübutsü tim kodaka;

patakaji ne mit,

aji shibai metettsü akok?

12 Anungji onoki shisa taka mulungjang ka ngutettsüsa,

onok arishi anogo azüngtsü sayuang.

13 Kopiga tashi ne ain adokba alitsü?

Ne kilirtem dang Oh Kibuba temeim sayuang,

14 Oh ne temeim taochi agi anepdang onok jangratemjang.

Oda onoki arishi tepiyong pelatepjen pelatsüsa.

15 Nai onok kangshiba anogotem yari,

aser onok temenen anguba kümtem yari,

nai onok peladakjang.

16 Ne kilir dangi ne mapa,

aser ne chirtem madang,

ne sentsüwangshi jungkai adokjang.

17 Aser ozü Tsüngrem Kibuba temulung achiba onok manung liang.

Aser onok manung onoki inyaktetba mapa tashi itjang;

Hau, onoki inyaktetba mapa nai moajang.

TENÜNGSANG KEN 91

Tsüngrem Asen Tekümzüker

1 Shibai Tematiba jenokdak alir,

pai ajak Takoksang akhümpok nung alitsü.

2 Kibuba indang ni ya ashitsü,

“Pa kü jenokdak aser kü mitsa.

Kü Tsüngrem, shiba dak ni amanger.”

3 Kechiaser ozükümer sang nungi,

tasütsü wara nungi,

pai na kümzüktsü.

4 Pa züng agi na awabangtsü,

aser pa shikang kübok nai jenoktsü.

Pa ochiba jong aser jongkok amai lir.

5 Aonung taoksatsüji,

mesüra anüngdang yima aoba lijakjangji,

nai metsübutsü.

6 Mesüra aonung jajaba wara,

mesüra teruto nung teraksa adokba nai metsübutsü.

7 Ne tsüngdang meyi ka laotsü,

na meketa meyi ter,

Saka nabo meyirutsütsü.

8 Ne tenük agidang reprangtsü,

aser tamajunger tajangzükji angutsü.

9 Kechiaser nai Kibubaji ne jenokdak kümdaktsü.

Tematibaji ne talidak kümdaktsü.

10 Anungji temenen kecha agia na matongtsü,

mesüra ne süki anasa wara kecha marutsü.

11 Kechiaser na aolen ajak nung kümzüktsüsa,

pai kotak tenyartem nem ozüng agütsütsü.

12 Lung nung ne tetsüng metsüa lir ta,

parnoki na parnok ket nung ajungtsü.

13  Nai molusongzü aser per manung ajemshitsü;

Ne tetsüng agi molusongzü pungtu aser perji ajemsatsütsü.

14 Kechiaser pai kü dang meim nungji ni pa kümzüktsü;

Pai kü nüng shitet nung ni pa temalen mendaktsütsü.

15 Pai kü dang sarasademtsü,

aser ni pa dang langzütsü;

timtem dang ni pa den alitsü;

ni pa kümzüktsü, aser akhüm agütsütsü.

16 Arishi talang agüja ni pa jangratemdaktsütsü,

aser kü tekümtet pa dang sayutsü.

TENÜNGSANG KEN 91

Tsüngrem Asen Tekümzüker

1 Shibai Tematiba jenokdak alir,

pai ajak Takoksang akhümpok nung alitsü.

2 Kibuba indang ni ya ashitsü,

“Pa kü jenokdak aser kü mitsa.

Kü Tsüngrem, shiba dak ni amanger.”

3 Kechiaser ozükümer sang nungi,

tasütsü wara nungi,

pai na kümzüktsü.

4 Pa züng agi na awabangtsü,

aser pa shikang kübok nai jenoktsü.

Pa ochiba jong aser jongkok amai lir.

5 Aonung taoksatsüji,

mesüra anüngdang yima aoba lijakjangji,

nai metsübutsü.

6 Mesüra aonung jajaba wara,

mesüra teruto nung teraksa adokba nai metsübutsü.

7 Ne tsüngdang meyi ka laotsü,

na meketa meyi ter,

Saka nabo meyirutsütsü.

8 Ne tenük agidang reprangtsü,

aser tamajunger tajangzükji angutsü.

9 Kechiaser nai Kibubaji ne jenokdak kümdaktsü.

Tematibaji ne talidak kümdaktsü.

10 Anungji temenen kecha agia na matongtsü,

mesüra ne süki anasa wara kecha marutsü.

11 Kechiaser na aolen ajak nung kümzüktsüsa,

pai kotak tenyartem nem ozüng agütsütsü.

12 Lung nung ne tetsüng metsüa lir ta,

parnoki na parnok ket nung ajungtsü.

13 Nai molusongzü aser per manung ajemshitsü;

Ne tetsüng agi molusongzü pungtu aser perji ajemsatsütsü.

14 Kechiaser pai kü dang meim nungji ni pa kümzüktsü;

Pai kü nüng shitet nung ni pa temalen mendaktsütsü.

15 Pai kü dang sarasademtsü,

aser ni pa dang langzütsü;

timtem dang ni pa den alitsü;

ni pa kümzüktsü, aser akhüm agütsütsü.

16 Arishi talang agüja ni pa jangratemdaktsütsü,

aser kü tekümtet pa dang sayutsü.

TENÜNGSANG KEN 92

Tenüngsang Agütsüba Ken

1 Kibuba nem tenüngsang agütsütsü,

aser Oh Tematiba, ne tenüng asoshi tasangba ken atentsü kanga junger.

2 Anepdang ne temeim taochi,

aser aonung shia ne temulung lemtetba sayutsü asoshi,

3 tatemba ter aketba jemji,

aser tzürang kongki;

aser ola nema adokba kongki agi.

4 Kechiaser Oh Kibuba,

nai ne mapa ajanga ni pelatsüogo;

neka mapa nung ni takok ngua pelatsü.

5 Oh Kibuba, ne mapatem koda tulu!

Ne tebilemba-a kanga tarok.

6 Suwar nisungi ya memetet;

Mesüra tamachi-i ya mangateter.

7 Kong tamajunger ai ama adokdir,

aser kodang temenen inyaker ajak azükarudir,

ibaji parnok teti tatem maka samadaktsütsü mapang.

8 Saka Oh Kibuba,

na teti tatem maka temalen lir.

9 Saka, Oh Kibuba, ne tsükchirtem ajiang.

Kechiaser ajiang, ne tsükchirtem samatsü;

temenen inyaker ajak prokshitsü.

10 Saka sü tezü ama nai kü tezü temai tudaktsüogo.

Nai totzü tasen agi ni mezüja shimteter.

11 Kü tsükchirtem laoba kü tenük agia nguogo;

Ni anema apusoba temenen inyakertem tia kü narong agi angashiogo.

12 Seradong ama temeshiba nisung azükarutsü;

Lebanon nung cedar ama pa meitsü.

13 Kibuba kidang parnok tema lir.

Ozü Tsüngrem talidak parnok azükarutsü.

14 Tasa mapang nung parnoki ano süngjang tangtsütsü;

parnok süngtzü agi sünga kümyanga alitsü.

15 Kibubaji indang indanga lir ta sayutsü meji;

pa kü lung lir, aser pa dak memeshiba mali.

AONAGABSI

Parallel

TENÜNGSANG KEN 93

Tsüngremer Sentsüwangshi

1 Kibubai chubar,

pa sentsüwangshi agi sobua lir;

Kibuba tashi tait agi sobua lir;

iba jagi pai pa sasa naibanga lir.

Alimajia marakzütettsüsa tenteta lir.

2 Akhi nungi ne chuba menden tenteta lir.

Na teti tatem maka.

3 Ayongtemi, Oh Kibuba,

ayongtemi parnok ola yoker.

Tzümetsüng agi tzüsem yoker.

4 Tzü aika olatem madak,

tzüyim tashi-i arrürba madak,

temalen Kibuba tashi tait lir.

5 Ne ozüng khenyongi shitak;

Oh Kibuba, ne kidang Teti tatem maka temeshi alitsüji tim dang.

TENÜNGSANG KEN 94

Tsüngremji Alima Obendangsang

1 Kibuba, na mangyangba Tsüngrem lir,

Na mangyangba Tsüngrem, ain adokdang.

2Aramesoang Oh alima o bendangsang,

asükümer nem parnok dak alangba agüjang.

3 Oh Kibuba tamachi nisungtemi kopiga,

kopiga tashi tamachi nisungtemi pelateptsü?

4 Parnoki ngasangatema jembir;

temenen inyaker ajaki parnok sasa asüakümer.

5 Oh Kibuba parnoki ne nübur menüngsatsür,

aser ne senmang kangshir.

6 Parnoki amitsür o aener lepseter,

aser lajartem tepseter,

7 Aser parnoki ashir,

“Kibubai tangua mangutsü,

mesüra Yakob Tsüngremi tangateta mangateter.”

8 Nisung rongnung nenok tamashirtem, angatetang;

aser nenok tamashirtem,

kodangang shisa akatsü?

9 Shibai asen tenarong yanglutsü,

pai mangashili ma?

Shibai asen tenük yanglu,

pai munguli ma?

10 Shibai kintem o bendanger,

pai memerenshilima?

oda shibai nisung dang shisatsü sayur, pa shisatsü melilima?

11 Kibubai nisung mulungjang meteter,

kechiaser parnok tangula ka dang.

12Oh Kibuba, nai shiba merenshir,

aser ne ozüng nungi sayur pa tepelatsü.

13 Oda, tamajunger parnok mapa tamajung asoshi ongken matu tashi,

timtem anogo nung nai pa nem anisüngzük agütsür.

14 Kechiaser Kibubai pei nübur memeindoktsü,

mesüra pa senmang mesentoktsü.

15 Kechiaser obendangbaji temeshileni meyiptsü;

aser temulung tindanger ajaki iba sülen aotsü.

16 Tamajung inyaker anema shibai ni asoshi noktaktsü?

Temenen inyaker anema shibai ni asoshi noktaktsü?

17 Kibubai ni meyarilasang,

kü nela sür lila.

18 “Kü tetsüng ajudoker” ta ni kodang ashi,

ne temeim taochi agi, Oh Kibuba, ni meso.

19 Kü mulungjang shisabulu onsaradang,

ne tesünep agi kü nela peladaktsür.

20 Temenen chuba menden,

kobai temenen ozüng kümdaktsür,

ibaji ne den telungjem lidi ma?

21 Temeshipur tanela anema parnoki külemi senteper,

aser tai makaba zü tokshir,

22 Saka Kibuba kü mitsa takang,

aser kü Kibuba kü jenokdak lung.

23 Aser pai parnok madak parnok pei menen yari meyipa agütsüogo.

Aser parnok pei menen meji samatsüogo.

Ozü Tsüngrem Kibubai parnok samatsütsü.

TENÜNGSANG KEN 95

Tenüng Asangba Ken

1 Oh arung, Kibuba dang asenoki tendi arung.

Asen tekümtet lung dang asenoki tepela ola yokdi arung.

2 Tenüngsang agi asenoki pa tsüngdangi odi arung;

Tenüngsang ken agi asenoki pa dangi tepela ola yokdi arung.

3 Kechiaser Kibubaji Tsüngrem tulu ka lir,

aser tsüngremtem ajak madak Chuba tulu ka lir.

4 Pa ket nung alima tarokdak lir;

tenem kolaktemjia pa meyong.

5 Tzüyim pa meyong, kechiaser pai aji yanglu;

kechiaser pa ket agi ali takongji yanglu.

6 Oh arung, asenoki külemdi aser apudakdi.

Asen Teyanglur Kibuba madang asenoki apudakdi.

7 Kechiaser pa asen Tsüngrem,

aser asenok pai mesüba purtem,

aser pa meyong santem.

Tanü, Oh onoki pa ola angala sang!

8 Meriba nung amato,

arem nung Massa anogo nung ama,

nenok temulung temerang.

9 Koba mapang nung ner tsüraburi ni atidang,

tendang, aser kü mapa angu;

10 iba putu den ni küm lir tashi ain adok, aser ashi,

“Ibai parnok mulung nung mashileni aoba kin ka lir,

aser parnoki kü lenmang mezüngshir.”

11 Aji asünung “Parnoki kü anisüngzükdaki maitsüla” ta,

Ni rasa-a azüngashi.

TENÜNGSANG KEN 96

Tsüngremji Tematiba Chuba

(1 Pu. 16.23-33)

1 Oh, Kibuba dang ken tasen ka tenlokjang;

alima ajaki Kibuba dang tenang.

2 Kibuba dang tenang, pa nüng moajang.

Anogo shia pa tekümtet indang shiang.

3 Kin rongnung pa sentsüwangshi,

nübur ajak rongnung pa tesüngmangtsü mapatem sangdongang.

4 Kechiaser Kibubaji tulu lir,

aser kanga asangtsü tim.

Tsüngrem ajak madak pa akhümtsübutsüla.

5 Kechiaser tangar kin tsüngremtem ajak süngyanglu dang.

Saka Kibubai anüngtemji yanglu.

6 Khonang aser tamarenba pa tsüngdang lir.

Tekülemdakji tashi ita aser tobur junga lir.

7 Alima nung alir kin ajak,

Kibuba nem agüjang,

Kibuba nem sentsüwangshi aser tashi agüjang.

8 Kibuba nem sentsüwangshi pa tenüng dak langa agüjang.

Tenla ka benang aser pa talidaki arung.

9 Oh Kibubaji temeshi sobutsü sobur külemang.

Alima ajak, pa tsüngdang atentenang.

10 Kin rongnung shiang,

“Kibubai chubar;

alimaji marakzütsüsa yanglua lir.

Pai ochi agi kintem o bendangtsü.”

11 Anüngtem peladakjang,

aser alimaji peladakjang;

tzüyim aser idakji aliba ajak arrdakjang.

12 Moapu aser angji aliba ajak pelatepang.

Idangji arem nung süngdong ajaki tepela agi,

13 Kibuba madang atentsü,

kechiaser pa arur;

alima o bendangtsü pa arur.

Pai temeshi agi alima aser pa ochiba agi kintem o bendangtsü.

TENÜNGSANG KEN 97

Tsüngrem Yimsüsüba Sentsüwangshi

1 Kibubai chubar;

alimai pelatepdakjang.

Asetkong teloki pelatepdakjang.

2 Pa meketa mepet aser tammang lir;

Pa chuba menden kimungji temeshiba aser ochishiba lir.

3 Pa jakdang mi ka süir,

aser pa meketa alir tsükchirtem rongseter.

4 Pa tsüngpret agi alimaji sangwadaktsür;

alimai angur aser atentener.

5 Kibuba madang,

tenemtemji nirep ama yimsa-a aor,

alima ajak Kibuba madang.

6 Anungji pa temeshiba shisangdaktsür;

aser nübur ajaki pa sentsüwangshi nguogo.

7 Süngyanglu külemer ajak,

süngyanglu dak asüakümer ajak mak südakjang.

Nenok tsüngremtem ajak, pa külemang.

8 Oh Tsüngrem, ne obendangba yong Zioni angashir aser pelar,

Yihuda jalatem pelateper.

9 Kechiaser, Oh Kibuba,

na alima ajak dang tematiba;

tsüngremtem ajak madak na tuluba.

10 Oh nenok Kibuba meimertem,

temenen sempang;

pa temeshipur tanela pai kümzüka ayur.

Tamajungba ket nungi pai parnok kümzüker.

11 Temeshipur atema tesangwa,

aser temulung tindanger atema tepela adoker.

12 Nenok temeshipur,

Kibuba nung pela-ang;

Aser pa temeshi tenüng bilemteta tenüng sangang.

TENÜNGSANG KEN 98

Kibubai Sayatenya Inyaker

1 Oh Kibuba dang ken tasen ka tenlokjang;

kechiaser pai sayatenya mapa inyakogo.

Pa teka tajichi aser pa temeshi teka agi pa asoshi takok nguogo.

2 Kibubai pa tekümtet metetdaktsüogo;

kintem nükdang pa pei temeshiba jungkai adoka sayuogo.

3 Israel asoshi pai pei temeim yimlibilem aser pa temulung lemtetba bilemtetogo.

Asen Tsüngrem takokba alima tatem ajaki nguogo.

4 Alima ajak, Kibuba dang tepela ola yokang.

Ola adokang aser tepela agi tenang,

hau, tenüngsang ken tenang.

5 Tzürang kongki den aser ola tajung agi tenang.

6 Jangzü o kongki agi Kibuba,

Chuba madang tepela ola yokang.

7 Tzüyimi aser idakji aliba ajaki arr-ang,

alima aser angji alir ajaki!

8 Oh nenok ayongtem, nenok teka matenang;

tenemtemi tepela agi Kibuba madang tendakjang.

9 Kechiaser pai alima o bendangtsü arur;

pai alima temeshiba agi,

aser nüburtem ochi agi, o bendangtsü.

TENÜNGSANG KEN 99

Kibubaji Chuba Lir

1 Kibubai chubar;

nüburtemi atentenang.

Pa cherubim manung amener;

alimaji anokshijang.

2 Zion nung Kibubaji tulu lir;

kin ajak madak pa temaba.

3 Parnoki ne nüng tulu aser tetsübutsü sangdakjang.

Pa temeshi lir.

4 Ano chuba tashi agi ochiba o bendang meimer;

nai saku kümtettsür;

nai ochi aser temeshiba Yakob nung yanger.

5 Asen Tsüngrem Kibuba tushiang,

Aser pa matsüngdang külemang, Pa temeshi lir.

6 Putir rongnung Mosa o Aron,

aser ne dang sarasademer rongnung Samuel;

parnoki Kibuba dang sarasadem,

aser pai parnok dang langzü.

7 Pai mepet tongshi nungi parnok den jembi;

parnok pa kulitem,

aser pai parnok nem agütsüba ozüng ayu.

8 Oh ozü Tsüngrem Kibuba,

nai parnok dang langzü;

nai parnoki inyakba mang yangaka,

parnok tai adokba Tsüngremji na.

9 Asen Tsüngrem Kibuba tushiang,

aser pa temeshi tenem nung külemang.

Kechiaser asen Tsüngrem Kibuba temeshi lir.

TENÜNGSANG KEN 100

Tsüngrem Asangtsü Ayongzükba

1 Nenok alima ajak,

Kibuba dang tepela ola yokang.

2 Tepela agi Kibuba tenzükang.

Pa tsüngdangi ken tena arung.

3 Kibuba, paji Tsüngrem ta nenoki metetang.

Pai asenok yanglu,

aser asenok pa meyong.

Asenok pa nütsüng,

aser pa chiyimdak chiyimba santem.

4 Tenüngsang agi pa süngkhümi iang,

aser pa talidaki sanga iang.

Pa nem tenüngsang agüjang,

aser pa nüng moajang.

5 Kechiaser Kibuba tajung lir.

Pa temeim taochi aser putu ajak dang

pa temulung lemtetba tatem maka.

TENÜNGSANG KEN 101

Dawid Ken: Tetemsü Yimsüsüba

1 Taochi aser ochi indang ni ken atentsü.

Oh Kibuba, ne dang ni tenüngsang atentsü.

2 Ni kü sasa tai makai alitsü,

na kodangang kü dangi arutsü?

Ozü kidang ni temulungjang tindang agi jajatsü.

3 Kü nükdang ni samesa kecha mayutsü.

Shirnoki meyipa aor,

parnok mapa ni sempar.

Iba yagi kü dak mazüitettsü.

4 Tashi mangaba mulungsentsü kü dak nungi pilatsü;

ni temenen kecha memetettsü.

5 Shibai pei kiyonger miima tilur,

ni pa samatsütsü.

Shiba temulungjang mezümeküm aser asüküm ali,

ni pa metoktsütsü.

6 Kü tenük linük nung tsüngchir madak alitsü,

angji parnoki kü den litettsü.

Shibai shitakba lenmang nung jajar,

pai ni tenzüktsü.

7 Shibai tekülak inyaker,

ozü kilung nung malitsü.

Shibai tiyazü jembir,

pa kü tenük jakdang metoktsütsü.

8 Anepdang shia linük nung tamajunger ajak ni samatsütsü.

Kibuba yimti nungi tamajung inyaker ajak leptoktsü.

 TENÜNGSANG KEN 102

Timtem Mapang Sarasademba

1 Oh Kibuba, kü sarasadem angangma;

aser teyari asoshi ni ayimtenba na tonga arudakjang.

2 Kü timtemba anogo nung kü dang nungi ne tejak atsüka telima;

kü dangi ne narong shijang;

ni ajaba anogo nung kü dang yakta langzüangma.

3 Kechiyong kü anogotem mokozü ama sama-a aor,

aser kü terettem mimung ama ronga lir.

4 Kü mulungjang lureper aser ai ama akonger,

ni chiyungtsü achitsü tejangraba sama.

5 Kü tanüngba ola adokba agi,

kü terettem kü shi nung mejaloka lir.

6 Lisem lima nung pokpo ama ni lir,

Azüngmeyakdak pokpo ka ama lir.

7 Ni amua maor,

aser kilem manung rongjena aliba ozü ka ama lir.

8 Anogo tepiyong kü tsükchirtemi ni sensamasatsür;

shirnoki ni anema atalatsür,

kü tenüng tetshia atakatemer.

9 Kechiyong ni amtsük ama aut achir,

aser kü tajemtsü nüktzü den meyokteper.

10 Kechiaser aji ne ain adokba aser ne terasaba yong lir.

Kechiyong nai ni shia aru,

aser ni endokadok.

11 Kü anogotem nikongdang akhüm ka amai lir;

ni ai ama azüla-a aor.

12 Saka nabo, Oh Kibuba, teti tatem maka chuba,

aser ne tenüng putu ajaki bilemtettsü.

13 Na aramesotsü,

aser Zion madak yimlibilem akatsü.

Kechiyong la dang aochitsü iba mapang lir,

hau, tataktet mapang tonga lir.

14 Kechiyong ne tenzükertemi la meimer,

la raksajaka;

parnoki la asoshi aria bilemer, la raksa-a liaka.

15 Anungji kintemi Kibuba tenüng tsübutsü,

aser alima chuba ajaki pa tashi tsübutsü.

16 Kechiyong Kibubai Zion yanglutsü,

Pa pei sentsüwangshi nung adoktsü.

17 Tepetzük nisung sarasademba pai angar,

aser parnok sarasademba pai mesensatsütsü.

18 Ibai tarutsü putu asoshi zülua yuang,

anungji ano mesoi aliba nüburtemi Kibuba asangtsü.

19 Kechiyong pai pa temeshi tenem nungi ajia yok;

anüng nungi Kibubai alima reprang.

20 Tepuokdak alir anüngba angashitsü;

tasütsü aliba purtem chioktsü;

21 Aji asünung Kibuba tenüng Zion nung sangoktsütsü,

aser Yirusalem nung pa nüng asangtsü.

22 Kodang nisungtemji külemi sentepdir,

aser chuba yimlitemi Kibuba külemtsü.

23 Ni tain mekümjongi kü tashi maiti kümogo;

Pai kü anogo tatsü kümdaktsü.

24 Ni ashi, “Oh, kü Tsüngrem,

kü anogo matongdang ni bener tuo.

Ne kümtem putu ajak süitema alir.”

25 Alemli nungi nai alima kimung yanger;

aser anüngtemji ne teka agi yanglu.

26 Parnok samadoktsü,

saka nabo alitsü;

Hau, parnok ajak sobutsü amai ajentsü;

süoshi ama nai parnok melentsütsü,

aser parnok melenshitsü.

27 Saka nabo kasa lir,

aser ne taküm tatembang malitsü.

28 Ne tenzüker chirtem maneni kümzüka alitsü,

aser ne tawabangba kübok parnok metsü kümzüka alitsü.

 TENÜNGSANG KEN 103

Dawid Ken: Tsüngrem Ajungba Indang

1 Oh, kü nela, Kibuba sangang;

aser kü dak aliba ajak agi pa temeshi tenüng sangang.

2 Oh, kü nela, Kibuba sangang;

aser pa teyaritem tamadok.

3 Shibai ne tai ajak atoker;

shibai ne tashitak ajak anebtsür;

4 shibai ne taküm kangla nungi alangzüker;

shibai temeim aser taochi agi ne nem korang semtsür;

5 shibai tajung agi ne tejangraba tiptemdaktsür.

Aji asünung mongzü ama ne asangwa tanaben tasen kümdaktsür.

6 Kibubai rishikangshia alir ajak asoshi o bendangtsür,

aser parnok nem temeden agütsür.

7 Pai Mosa dang pa sentong,

aser Israel chirtem dang pa mapatem metetdaktsü.

8 Kibuba yimlibilem aser taochi agi sünga lir,

ain adoktsü meilungi aser temeim yimlibilem nung talubosa lir.

9 Pai tetibo marütsütsü;

mesüra pa ain adoka tetibo malitsü.

10 Asen temenen yari pai asen dang mebenshir,

mesüra asen tai yari asen nem majangzüktsür.

11 Kechiyong alima temalen talang nung anüng aliba ama,

yamaji pa tsübubatem dang pa temeim yimlibilem lir.

12 Aser anüdoklen nungi anüolen tashi koma talang ali,

papigaji asen ozüng raksabatem pai asen nungi agientsür.

13 Tebui pei chirtem dang aochiba ama,

yamaji Kibubai pa tsübubatem dang aochir.

14 Kechiyong asen kechi agi yanglu pai metet;

asenok auyi dang ta bilemteter.

15 Nisung asoshibo,

pa anogotemji ai ama lir;

moapu nung naro ama, pa apunger.

16 Kechiyong iba manung mopung süia aor,

aser aji makai akümer;

aser iba talidak jagi joko aji memetettsü.

17 Saka shirnoki pa tsübur,

parnok dak Kibuba temeim yimlibilemji tatem maka,

aser pa temeshibaji chirnur nungi chirnur tashi alitsü.

18 Shirnoki pa tezüngzüktepba,

aser pa temelabatem benshitsü bilemteter.

19 Kibubai pa menden anüngtem nung yanglua lir;

aser pa yimli ajak madak chubatsü.

20 Kibuba moajang, nenok pa tenyartem.

Pa ola nung tenarong tena,

pa o angar, nenok tashi tulu rogotem,

21 Kibuba moajang,

par temeranger telok ajak,

Pa tenzükertem shirnoki pa mulungba inyaker!

22 Kibuba moajang, pa mapa ajaki,

yimsüsüba yimli ajak nung!

Kibuba moajang, Oh kü nela!

TENÜNGSANG KEN 104

Teyanglur Tenüng Asangba

(Lip. 1.1-31)

1 Oh Kü nela, Kibuba moajang.

Oh Kibuba kü Tsüngrem,

na kanga tulu lir.

Na tetushi aser tamaren agi sobua lir.

2 Shibai tesangwa agi süoshi ama ne sasa sobua lir;

shibai süki ama anüngtem atsülanga toktsür;

3 shibai pei temaba taktang sangwatsüng tzü nung yutsür;

shibai mepettem pei talungtsü kümdaktsür;

shibai mopung tashikang manung jajar,

4 shibai mopungtem pa osang abenertem kümdaktsür,

pa tenzükertem milak adokba mi kümdaktsür;

5 pai alimaji iba tongshi manung yanglu,

angji teti aji marakzütsü asoshi,

6 nai aji süoshi agi ama molutzü agi nembangtsü.

Tzüji tenem temalen noktak.

7 Nai arütsü nung parnok ajen.

Ne tsüngmok ola agi parnok yakta jena oadok;

8 parnok tenemtem tashi atu,

aser lenten tashi alu koba nai parnok asoshi shimteta toktsü.

9 Parnoki ajanga maotsü nai arrtsü yanglua toktsü.

Angji tanaben parnoki alima meyipa menembangtsü.

10 Nai ayongnutem lenteni yima yoker;

tenem tsüngda nung parnok ayimer.

11 Moapu shiruru shia nem parnoki tajemtsü agütsür;

arem gadotem tzüra atemer.

12 Parnok anasa anüng ozütem parnok talidak lir,

kongsangtem nung parnoki ken atener.

13 Ne temaba taktang nungi nai tenemtem nung tzü agütsür.

Alima ne mapatem süngjang agi sünga lir.

14 Kiset shirurutem asoshi nai ai adokdaktsür,

aser nisungtem asoshi ali nungi chiyungtsü adokdaktsür.

15 Nisung mulung peladaktsütsü asoshi yi,

tejak sangwadaktsütsü asoshi totzü,

aser tashi itdaktsütsü asoshi chiyungtsü.

16 Kibubar süngdongtem tiptema lir;

Lebanon cedar süngdongtem koba pai atem;

17 yangji ozütemi parnok tesep yanglur;

stork ozü pei tesep fir süngdong nung lir.

18 Tenem talangtemji shio atema lir;

aser lung tulutemji shisen jenokdak lir.

19 Nai ita mapang tatakzük sayutsü asoshi yanglu.

Anüi pei aiba mapang meteter.

20 Nai ammang yanglur,

aser aji aonung akümer,

koba nung arem shiruru ajak ayazür.

21 Molusongzü pungtu chanui tetepsettsü shiruru arr-a bushir,

aser Tsüngrem nungi parnok chiyungtsü angur.

22 Anüji adoker, parnok meyipadoker,

aser parnok leprungki nung ontaka alir.

23 Nisung pei mapai aor,

aser aonung matong tashi inyaker.

24 Oh Kibuba, ne mapatem koda jenti lir!

Parnok ajak nai ne shisatsü tesangra agi yanglu.

Ne teyanglubatem agi alima sünga lir.

25 Oagi tzüyim lir, tulu aser tesadem,

kong mezüngdangtetba shirurutem lir;

shiruru tila o tulu na.

26 Yangji rongtem aor;

yangji nai yangluba molu tzürangtem kazüa senzür.

27 Item ajaki, nai parnok nem mapang tetemsü nung,

chiyungtsü agütsütsü ata-a alir.

28 Nai parnok nem agütsüba parnoki bendener.

Nai ne ket salar, parnok tajung agi asünger.

29 Nai ne tejak miimadokdang,

parnok timatemer;

kodang nai parnok chiyungtsü bener oadoker, parnok asür.

Aser tanaben auyi akümer.

30 Kodang ne tangula nai yokdir parnok pokteter,

aser nai alima tejak tasen kümdaktsür.

31 Kibuba sentsüwangshi teti lidakjangma!

Kibubai pei mapa nung pelashishia liangma!

32 Pai alima dak repranger aser aji anokshir.

Pai tenemtem dak kongshir aser

parnoki mokozü alonger!

33 Ni taküm ali tashi Kibuba dang ni ken tenyutsü.

Kü dak taküm alidang ni Tsüngrem dang ken atentsü.

34 Kü teshisadangba pa madang taginütsüsa süangma.

Ni Kibuba nung pelashishia alitsü.

35 Temenenpur alima nungi samadakjangma!

Aser tamajunger joko telidaktsü.

Kibuba moajang, Oh kü nela!

Kibuba sangang.

TENÜNGSANG KEN 105

Tsüngrem Dak Tamang Katetba

(1 Pu. 16.8-22)

1 Oh, Kibuba nem tenüngsang agüjang,

aser pa tenüng nung ja-ang.

Nübur rongnung pa mapatem metetdakjang.

2 Pa dang ken tenang,

pa dang tenüngsang tenang;

pa sayatenya mapa ajak indang shiang.

3 Pa tenüng nung parnok sentsüwangshiang;

Kibuba bushirtem mulungjangji pelashishia lidakjang.

4 Nenoki Kibuba aser pa tashi bushiang;

maneni pa tejak bushiang.

5 Pai inyaka akaba pa sayatenya mapatem,

pa tesüngmangtsütem,

aser pa bang obendangba bilemtetang.

6 Oh Pa tenzüker,

Abraham chirtem pa teshimtet,

Yakob chirtem.

7 Asen Tsüngrem, Kibubaji pa lir,

pa obendang alima ajak nung lir.

8 Pai pa tezüngzüktepba koba o putu meyirijangsa meyirijang dang melaogo.

Aji teti pai ayutsü.

9 Abraham dang pa tezüngzüktepba,

Isak dang pa azüngashiba;

10 Aser pai Yakob dang iba telatet ozüng akangshiba,

Israel dang teti tatem maka tezüngzüktepba;

11 “Ni nenok nem, Kanan lima nenok shilem aser senmang asütsü agütsür” ta ashi.

12 Kodang parnok yongsük ishika dang liasü,

hau, kanga ishika aser yangji aenersa liasü.

13 Kodang parnok kin ka nungi kin kati oli aruli asü,

aser yimli ka nungi tangar nisung dangi,

14 pai nisung shinga nema parnok dak tamajung meinyakdaktsü.

Hau, parnok atema pai chubatem dang tekümdangtsü ashi.

15 “Ni mezüja shimtetba pur dak tekongshi,

aser kü ainkartem dak tamajung teinyak.”

16 Linük madak pai ayawara jaok;

Pai chiyungtsü takaba ajonga raksatsü;

17 Pai parnok jakdang nisung ka yok;

Yosef alar asütsü yoka liasü.

18 Pa tetsüng yinzü agi parnoki yirutsü;

Pa merang yinzü agi alener yutsü;

19 Pa o ataloka aruba mapang matong tashi;

Kibuba o agi pa tendang.

20 Chubai pa chiok,

oda kintem madak yimsüsüri, pa nüji küma yok,

aser pa nüji küma chiok.

21 Pai pa chuba kidang kibur kümdaktsü,

aser alima ajak madak yimsüsür kümdaktsü.

22 Pa sünütsüsa tongtipur sayutettsü,

aser tatartem dang shisatsü sayutsü asoshi.

23 Idangji Israel ano Ijipi aru;

aser Ham lima nung Yakob ali.

24 Pai pei nübur jenti züindaktsü,

aser parnok anemertem dang nungi tashi taitba parnok kümdaktsü.

25 Parnoki par nübur sempadaktsütsü,

par tenzüker dang külakkübonga inyakdaktsütsü

pai parnok mulungjang melenshitsü.

26 Pai pa tenzüker Mosa,

aser pai shimtetba Aron yok.

27 Parnoki pa temaitsütem parnok rongnung yutsü,

aser Ham lima nung sayatenyatem inyak.

28 Pai tammang yok, aser alimaji ammang kümdaktsü;

saka parnoki pa o manga.

29 Pai parnok tzü azü kümdaktsü,

aser parnok angotem südaktsü.

30 Parnok linük allu agi metembang,

parnok chuba ki tashi nung.

31 Pai jembi, aser manga telok aru,

aser parnok lima ajak nung azüpong poktetdaktsü.

32 Tzünglu melen pai parnok nem rürlung agütsü,

aser parnok li nung milak adokdaktsü.

33 Pai parnok tsükmenatzü aser munguzünu südaktsü;

aser parnok lima süngdongtem raksatsü.

34 Pai jembi, aser süngkusen aru,

aser mezüngdangteti menjang serapong adok.

35 Parnok li nung süngolio ajak chiadok,

aser parnok ali nungi adokba süngjang chiadok,

36 Pai ano parnok lima mezüng asoba ajak tepset.

Ijip nunger kibongtem ajak nungi.

37 Idangji pai taribi aser hon den Israel anitet;

aser pa kin rongnung shinga memetsüdak.

38 Parnok aenshia aodang Ijip pela-a liasü;

kechiyong parnok madak tetsübu agi tonga liasü.

39 Tetongdangtsü asoshi pai mepet agi sübangdaktsü;

aser aonung tesangwa asoshi mi agütsü.

40 Parnoki meshi, aser pai opiya ozü bener arutsü;

aser anüng nungi chiyungtsü agi pai parnok tiptemdaktsü.

41 Pai lung pokmadaktsü, aser tzü yima adokdaktsü;

parnok lisem lima nung ayong ama yimdaktsü.

42 Kechiyong pai pa temeshi o,

aser pa tenzüker Abraham bilemtet.

43 Aser pai pei nübur tepela agi anitet,

aser pai shimtetba pur ken tena anitet.

44 Aser pai parnok nem kintem linük agütsü;

Nisungtemi züsentetba parnoki agi.

45 Angji parnoki pa telatet ozüngtem ayutsü,

aser pa ozüngtem benshitsü;

Kibuba sangang.

TENÜNGSANG KEN 106

Kibuba Dang Temenen Nangzükba

1  Nenoki Kibuba sangang,

Oh Kibuba nem tenüngsang agüjang kechiyong pa tajung lir.

Kechiyong pa temeim yimlibilem teti alir.

2Shibai Kibuba mapa tulu indang shitettsü,

mesüra pa nüngsang ajak shibai sangdongtettsü?

3Shirnoki ochiba benshir,

shirnoki mapang ajak nung shitak inyaker,

parnok tepelatsü.

4Ne nübur tsütsü, ne yimli sayudang,

ni bilemtetangma, Oh Kibuba.

Oh ne tekümtet agi ni semdangangma.

5Angji ne teshimtetpur azükaruba ni ngutettsü,

angji ne kin tepela nung ni pelaseta litettsü.

Angji ne senmang den ni sentsüwangshia litettsü.

6Ozü tsüraburtem ama onoki temenen benshiogo,

onoki tai menaogo, onoki tamajung inyakogo.

7  Ozü tsüraburi Ijip nung ne sayatenyatem mangatet.

Parnoki ne temeim yimlibilem jenti mebilemtet;

Saka tzüyim nung, oda Temerem Tzüyim nung anema apuso.

8Aji saka pai pa tashi tulu metetdaktsü.

Pa tenüng atema nai parnok kümzük.

9Pai ano Temerem Tzüyim arütsü,

aser aji konga adok;

Anungji tzüyim ajanga moapu nung ama pai parnok anir ao.

10Parnok shibai sempa pa ket nungi pai parnok kümzük,

aser tsükchir ket nungi parnok alangzük.

11Tzü agi parnok anemertem mobang;

parnok kata anünga maliasü.

12  Idangjiang parnoki pa o amang;

Parnoki pa nüngsang ken aten.

13Saka parnoki yakta pa mapatem amadok;

parnoki pa shisa tajung ata-a mali.

14Saka lisem lima nung parnoki azüabunga aküm,

aser lisem lima nung Tsüngrem atitang.

15Parnok temepishiba pai parnok nem agütsü;

saka ano parnok madak tashitak yok.

16  Parnoki ano Mosa dak

aser Kibubar temeshisang Aron dak tenük merem,

17Aliji lapok aser Dathan meyokadok,

aser Abiramer telok nembang.

18Parnok telok nung mi ka adok;

milak jagi tamajunger rongset.

19  Parnoki nashi chanu ka Horeb nung yanglu,

aser mulusa-a yangluba süngyanglu noksa külem.

20Yamaji Tsüngrem sentsüwangshiji,

ai achiba nashi noksa asoshiji parnoki melentep.

21Parnok kümtettsüba, parnok Tsüngrem parnoki amadok,

shibai Ijip nung mapa tulu inyak.

22Shibai Ham lima nung sayatenya mapatem,

aser Temerem Tzüyim nung tetsübutsü mapatem inyak.

23Aji asü nung pai parnok samatsütsü ta ashi,

pai shimtetba Mosai, parnok pai samaja lir ta,

pa ain adokba nungi meyipdaktsütsü,

pa madang tetsüngda nung noktaka ali.

24  Hau, parnoki alima tajung sensatsü,

parnoki pa o mamang.

25Saka parnoki süki nung nemnem,

aser Kibuba ola manga.

26Aji asünung lisem lima nung parnok samadaktsütsü,

pai parnok madak teka mekang.

27Aser oda kin rongnung pai parnok chirtem senshia odaktsütsü,

aser ali nung parnok prokshidaktsütsü.

28  Parnoki pei sasa Baal-peor nung aden,

aser tasür dang tenlaba tepsetba achi.

29Yamaji parnoki pei mapa agi pa ain adokdaktsü;

aser parnok madak wara adok.

30Idangji Finehas noktak, aser o bendang agütsü;

aser waraji noktang.

31Aser teti asoshi putusa putu,

parnok asoshi aji temeshiba yong ta züngshi.

32  Ano parnoki pa Meriba tzü nung ain adokdaktsü,

aser parnok meji Mosa tamajung kümdaktsü.

33Kechiaser parnoki pa tanela kua kümdaktsü,

aser pai meshisadangi o jembi.

34  Kibubai parnok dang melaba ama,

parnoki nisungtem mesamadaktsü.

35Saka parnok sasa kintem den meyoktep,

aser parnok mapatem angazük.

36Aser parnoki parnok süngyanglu tenzük;

koba parnok asoshi sang ka aküm.

37  Hau, parnoki parnok jabaso,

aser jalatem tsüngremtem nem tenla agütsü.

38Aser tai makaba zü,

oda parnok jabaso aser parnok jala zü tokshi,

shirnok Kanan süngyanglutem dang parnoki tenla agütsü;

aser alimaji azü agi menentsü.

39Yamaji parnoki pei mapatem agi menena liasü,

aser parnoki inyakba nung jabujaria ao.

40  Anungji pei nübur anema Kibuba ain adok,

aser pai pei senmang meketmeseni aküm.

41Aser pai parnok kintem ket nung agütsü,

aser parnok sempartemi parnok madak yimsü asü.

42Parnok tsükchirtemia parnok kangshi,

aser parnok teka kübok parnok aniok.

43Aiben pai parnok kümzük;

saka parnok shisatsü nung parnok tashi manga liasü,

aser parnok tai agi parnok tekübok kümdaktsü.

44Aji saka, kodang pai parnok ayimtenba angashi,

pai parnok timtem reprang.

45Aser parnok asoshi pai pei tezüngzüktepba bilemtet,

aser pa temeim yimlibilem tulu yari pai temulung meyip.

46Shirnoki parnok pur ao,

pai parnok ajak parnok dang aochitsüsa kümdaktsü.

47  Onok kümzükang,

Oh Kibuba ozü Tsüngrem,

aser ne temeshi tenüng nung tepela sayutsü,

aser ne nüngsang nung takok angutsü,

kin rongnungi onok anitenang.

48 Kibuba, Israel Tsüngrem moajang,

putusa putu tashi,

aser nisung ajaki,

“Amen” ta shidakjang

Nenoki Kibuba sangang.

TENÜNGSANG KEN 107

SHILEM PUNGO

(TKe. 107—150)

Timtem Nungi Kümzükba

1  Oh Kibuba nem tenüngsang agüjang;

kechiyong pa temeim yimlibilem teti lir.

2 Kibubai alangtetba purtemi yamaji shidakjang,

shirnok pai anemer ket nungi alangzük;

3aser linüktem nungi aniten.

Anüdoklen nungi aser anüolen nungi,

Anüdoklentip aser anüolentip nungi aniten.

4Parnok arem nung azüngmeyakdak nemzü;

parnoki nisung aliba yimti mangu.

5Parnok yaseta aser tzüraseta liasü,

parnok dak tanela lula-a kümadok;

6Idangji parnok timtem nung parnoki Kibuba dang ayimten,

aser pai parnok timtem nungi kümzük.

7Parnok nisung aliba yimti-i aittsüsa,

pai ano temetongba lenmangi ani.

8Pai ajungba asoshi,

aser nisung chirtem dang pai tesüngmangtsü mapa asoshi,

nisungtemi Kibuba tenüng sangdakjang!

9Kechiyong tzüra-a aliba tanela pai tzüra temdaktsür;

aser yaseta aliba tanela pai tajung agi süngdaktsür.

10Kar tammang nung aser tasü akhüm nung,

timtem toushi aser merang agi alener mena alir.

11Kechiaser parnoki Tsüngrem o anema apuso,

aser Tematiba shisa tajung sensatsü.

12Parnok mulungjang mapa tasak inyakba agi kokrokdakja liasü.

Parnok lao, aser teyaritsü shinga maliasü.

13Idangji parnok timtem nung parnoki Kibuba dang ayimten,

aser pai parnok timtem nungi parnok kümzük.

14Pai parnok ammang nungi aser tasü akhüm nungi anitet,

aser parnok talenba raktangtsü.

15Pai ajungba asoshi,

aser nisung chirtem dang pa tesüngmangtsü mapatem asoshi Kibuba tenüng sangang!

16Kechiyong pai yongmenyin süngkhüm raksatsü,

aser merang tartangtsü leptangtsü.

17Parnok tamajung mapayong,

aser parnok tai menaba yong, tamashi,

aser timtem toushi nung lir.

18Chiyungtsü tapu ajak parnoki aginü;

aser parnok tasü süngkhüm anasa aru.

19Idangji parnok timtem nung parnoki Kibuba dang ayimten,

aser pai parnok tejashi nungi kümzük.

20Pai pa o yok,

aser parnok anebtsü aser parnok tesamatsü nungi kümzük.

21Pai ajungba asoshi,

aser nisung chirtem dang pa tesüngmangtsü mapa asoshi,

nisungi Kibuba sangdakjang!

22Parnok dang tenüngsang tenla tenladakjang,

aser pa mapatem ken tena sangdakjang.

23Shirnok rong nung tzüyimi alur,

oda tzü tulu nung shishilemba asür;

24Parnoki Kibuba mapatem,

aser pa tesüngmangtsütem tzüyim nung angur.

25Kechiyong pai melar,

aser yipru mopung adokdaktsür,

koba agi iba nungi tzüsem adokdaktsür.

26Parnok anüngi atur, tanaben parnok tzüyim taroki alur;

timtemba yong parnok tanela yimsa-a aor.

27Külen küleni parnok naizür,

aser yi pur ama mangmanger,

aser parnok kechiang mesayangi liasü.

28Idangji parnok timtem nung parnoki Kibuba dang ayimten,

aser pai parnok tejashi nungi parnok anitet.

29Pai yipru süngjema kümdaktsür,

anungji iba tzüsem marakzüi aküm.

30Idangji parnok pelatep,

kechiaser parnok ajemajema ali.

Anungji pai parnok yongyaba tejenokdaki anir aru.

31Pai ajungba asoshi,

aser nisung chirtem dang pa tesüngmangtsü mapatem asoshi,

nisungi Kibuba tenüng sangdakjang!

32Nübur mungdangdak ano parnoki pa uludakjang,

aser tatartem menden nung pa tenüng sangdakjang.

33Pai ayongtem lisem li kümdaktsür,

aser yima aliba ayongtem anendaktsür.

34Temo aliba li agi metsü li kümdaktsür,

kechiyong yangji shirnok ali parnok tamajung mapa yong lir.

35Pai lisem limaji ayong agi sünga kümdaktsü,

aser ali takong agi tzü ayong kümdaktsür.

36Aser yangji yaseta alir pai lidaktsür.

Angji parnoki talitsü yimti yanglur.

37Aser moapu nung metsü proka,

aser tsükmenatzü atemtsü,

koba agi süngjang tangtsür.

38Pai ano parnok moatsür,

aji asünung parnok jenti rendaktsür;

aser pai parnok kiset shiruru ajema mekümdaktsür.

39Tanaben tekangshi,

timtem aser tejashi ajanga,

parnok ishiba aser mokrema küma lir.

40Pai tongtipur dak sensamasa meküploktsür,

aser kong lenmang maka yangji parnok nemzüdaktsür.

41Aji saka sensakertem timtem toushi nungi pai temaleni ajungkettsür,

aser san telok ama par kinungertem kümdaktsür.

42Ochishiri aji angutsü aser pela-a alitsü,

aser tamajunger ajaki pei tebang shibangtsü.

43Shir shisa aka,

item mapa nung temulung agütsüdakjang,

aser parnoki Kibuba temeim yimlibilem indang shisadangtsü.

TENÜNGSANG KEN 108

Dawid Ken: Tsükchir Anema Sarasademba

(TKe. 57.7-11; 60.5-12)

1Oh Tsüngrem, kü mulungjang akang akanga lir.

Ni kongki atemtsü aser ken atentsü.

2Sakang, tzürang kongki aser tawaba kongkitem!

Anepdangji ni sakdaktsütsü.

3Oh Kibuba, nübur rongnung ni ne nem tenüngsang agütsütsü;

aser kin rongnung ni tenüngsang ken atentsü.

4Kechiyong ne temeim yimlibilem anüng tanga talangba lir,

aser ne tamang katetbai mepettem atonger.

5Oh Tsüngrem, anüngtem temalen tonga na uludakjang;

aser ne sentsüwangshi alima ajak madak lidakjang!

6Angji nai meimbatem kümzüktettsü,

ne teka tajichi agi kümzükang,

aser onok dang langzüangma.

7Tsüngremi pa temeshidak jembiogo;

“Ni Shekem lemsatsü;

aser Sukkot Lenten kü nübur nem lemsatsütsü.

8Gilead kü meyong lir;

Manase kü meyong lir;

kü kolak tongtangtsü Efraim lir,

Yihuda kü chuba nüsong lir.

9Moabji kü teshitokba susa lir;

Edom madak ni kü tsüngsem ajemshitsü;

Filistia madak ni ayimtentsü.”

10Shibai ni atsübanga aliba yimti-i anir aitsü?

Shibai ni Edomi anir ao?

11Oh Tsüngrem,

nai onok endoktsü masü no?

Oh, Tsüngrem, na onok temeranger telok den maor.

12Anemer anema onok nem teyari agüjang.

Kechiyong nisunger teyaribo amajok dang lir.

13Tsüngrem ajanga onoki tasü ita inyaktsü.

Kechiyong ozü anemertem ajemzüka yoksangji pa lir.

TENÜNGSANG KEN 109

Dawid Ken: Timtemba Nisung Sarasadem

1Ni asangba Tsüngrem,

nai mokorai telima.

2Kechiyong ni anema tamajunger tebang,

aser külak-kübonger tebang parnoki lapokogo.

Parnoki kü den tiyazü temeli agi jembiogo.

3Tesempa o agi parnoki ni meketbangogo,

aser kecha masü nung ni anema raraogo.

4Kü temeim melena parnoki ni anemer.

Saka ni kü sasa sarasadem asü.

5Parnoki kü nem tajung melena tamajung,

aser kü temeim melena tesempa ajangzüktsü.

6Nai pa madak nisung tamajung ka tokjang;

aser pa teka tajichilen anemer ka noktakdakjang.

7Kodang pa o bendangdir,

pa tai adokdakjang;

pa sarasademba temenen kümdakjang.

8  Pa arishi tatsüka kümdakjang;

tangari pa menden atsüngdakjang.

9Pa chirnur tebu malir kümdakjang,

aser pa kibutsü amitsür kümjangma.

10Par chirtem talidak mali kümdakjang,

aser meshimetsüdakjang;

aser azüngmeyakdak parnoki chiyungtsü bushidakjang.

11Terakzükeri pa akaba ajak agidakjang;

aser pai züsenba bendangertemi makzüka odakjang.

12Pa dang yimlibilem sayutsü shinga telidaktsü;

mesüra par tebu malir chirtem dang shingai taochi tekadaktsü.

13Pa metsü leptokdakjang.

Tarutsü putu nung parnok tenüng aidokdakjang.

14Pa tebutem tai Kibubai bilemtetdakjang;

aser pa tetsü temenen taidokdaktsü.

15Itemji Kibuba madang maneni lidakjang.

Angji pai alima nungi parnok mamai aliba leptoktsütsü akok.

16Kechiaser pai yimlibilem sayutsü mebilemtet,

saka sensaker aser meshimejunger nisung,

aser temulungjang teraksa nisung,

parnok lepsettsü pai arishi.

17Hau, pai atakatem meim,

aser aji pa madaki aru;

aser temoatsü nung pai mepela,

aser aji pa dangi marutsü.

18Pa süoshi ama atakatem agi pa aben,

aser aji tzü ama pa daki ait,

aser totzü amai pa tereti ai.

19Aji pa asoshi pa sasa pa nembangba süoshi ama kümdakjang,

aser maneni akangba pa nangri ama kümdakjang.

20 Kibuba nungi ibai kü anemertem,

aser kü taküm anema tamajung jembirtem asoshi tajangzük lir.

21Saka, Oh Kibuba Tsüngrem, ne tenüng atema,

nai ni asoshi inyakangma.

Kechiaser ne temeim yimlibilem tajung lir,

nai ni kümzükangma,

22Kechiyong ni sensaker aser meshimejung nisung,

aser kü mulungjang telunglen yirua lir.

23Akhüm atsülanga akümba ama ni süia odagi.

Süngku ama ni ajebchia yimzür.

24Lumiba agi kü temokok tashi mait lir,

aser kü shi jebzüka kümdagi.

25Ano ni parnok madang sensamasatsü kümdakja lir,

kodang parnoki ni ngudir,

parnoki parnok tekolak angümloktsür.

26Ni yariang, Oh Kibuba kü Tsüngrem.

Ne temeim yimlibilem yari ni kümzükangma.

27Angji parnoki ibai ne teka ta metettsü.

Oda na, Kibubai ibai inyak ta metettsü.

28Parnoki atakatemtsü akok. Saka naibo moajang.

Kodang nai shishidir,

parnok akseta alitsü,

saka ne tenzükerbo pelashishia alitsü.

29Kü anemertem maksü agi abendakjang.

Aser parnok sasa parnok pei maksü agi sobutsü agi ama nembangjang.

30Ni Kibuba dang kü tebang agi tenüngsang tulu agütsütsü.

Hau, telok rongnung ni pa asangtsü.

31Kechiyong shibai pa aitsütsü,

item nungi pa kümzüktsü.

Pai meshimejunger teka tajichilen noktaker.

TENÜNGSANG KEN 110

Dawid Ken: Kibuba Aser Pai Shimtetba Chuba

(Mat. 22.44; TMa. 2.34-35)

1  Kibubai kü kibur dang ashi,

“Ni ne tsükchir ne tsüng ajemetdak

meyutsü tashi na kü tajichilen menang.”

2Zion nungi kü tashi tait chuba nüngsang Kibubai yoker.

Ne tsükchir rongnung yimsü süang.

3Nai raraba anogo nung ne nüburi pei sasa mulungteta adoktsü.

Anepdang nu menden nungi,

ne temeshiba tobur ajungba nung,

ne madak ne asangwa azüngtzü ama arutsü.

4  Kibubai azüngashi, aser pai masetshitsü.

“Na taküm tepiyong putir asütsü,

Melkizedek koma yamaji alitsü.”

5Kibubaji ne teka tajichilen lir,

pa ain adokba anogo nung chubatem dak azüktsü.

6Pai kintem rongnung o bendangtsü,

pai tasü mang agi ali süngdaktsütsü.

Alinük jenti nung pai tongtipur ajasatsütsü.

7Lenmang tezülen ayongnu nungi pai tzü ajemtsü;

Aji asünung pai pei tekolak angüma atutsü.

TENÜNGSANG KEN 111

Kibuba Tenüng Asangba

1Nenoki Kibuba sangang.

Kü mulungjang ajak agi ni Kibuba nem tenüngsang agütsütsü;

ochishir mungdang nung,

aser tamanger telok sentep nung.

2 Kibuba mapatem tulu lir,

Item nung shirnoki pelar parnoki itemji benshiogo.

3Pa mapa tetushi aser akhüm lir,

aser pa temeshiba teti tatem makai alir.

4Pai pa tesüngmangtsü mapatem bilemteta alitsüsa kümdaktsür;

Kibuba taochi aser aria bilemba agi sünga lir.

5Pai pa tsübur nem chiyungtsü agütsür.

Pai teti pa tezüngzüktepba bilemteta alitsü.

6Pai pei nübur nem kintem senmang agütsüba agi,

pa mapa nung ain sayuogo.

7Pa teka mapatem atangji aser ochi lir;

pa ozüng ajak züngpong lir.

8Itemji teti tatem maka yanglua lir;

itemji atangji aser ochi nung inyaka lir.

9Pai nübur asoshi talang yok;

pai pei tezüngzüktepba teti asoshi mela;

pa tenüng temeshi aser akhümtsübutsü lir.

10 Kibuba tsübubaji shisatsü tetenzük lir.

Ya shirnoki inyaker parnok ajak tangatetba tajung lir.

TENÜNGSANG KEN 112

Ochishir Nisung Temoatsü

1Nenoki Kibuba sangang,

Kibuba tsüngken tsübuba nisung tepelatsü,

Shibai pa temelaba nung tepela tulu angur.

2Pa metsü alima nung tashi tulu alitsü.

Tindang putu moatsütsü.

3Azükaru aser rongsen pa kidang alitsü;

aser pa temeshiba teti tatem maka alir.

4Ochishir dangi ammang nung sangwa adoker;

pa taochi, aria bilemba aser temeshiba agi sünga lir.

5Nisung shibai aochia benshir aser aputsür aji junger;

pai pei jenjang ochi nung ayutsü.

6Kechiyong pai kodanga marakzüi alitsü.

Ochishirbo teti tatem maka bilemteta alitsü.

7Pai tamajung osang tsübua malitsü;

Kibuba dak amanga pa mulungjang akang akanga lir.

8Pa anemertem madak pa tejangraba mangu tashi,

pa mulungjang akanga lir,

pa metsübui alitsü.

9  Pai angati lemshir;

pai sensaker nem agütsür;

Pa ochiba teti tatem makai alitsü.

Pa tezü tetushi nung ajungkettsü.

10Tamajungeri aji angutsü aser ain adoka alitsü.

Pai pa tepu shiteptsü,

aser yimsa-a oadoker;

Tamajunger tejangraba samadaktsütsü.

TENÜNGSANG KEN 113

Tsüngrem Sentsüwangshi Aser Taochi

1Nenoki Kibuba sangang.

Sangang, Oh nenok Kibuba tenzükertem.

Kibuba tenüng sangang.

2 Kibuba tenüng,

iba mapang nungi,

aser teti tatem maka temoatsü sang.

3Anüdok nungi anülu tashi,

Kibuba tenüng sanga alitsü!

4Kin ajak madak Kibuba temalen lir,

aser pa sentsüwangshi anüngtem temalen lir.

5 Kibuba asen Tsüngrem mesüka shiba lir?

Shiba temalen mena lir,

6shibai anüngtem aser alima madak,

Talangkati repranga yoker?

7Pai ali nungi sensaker ajungketer,

Aser maka-maiter rüja tanang nungi ajungketer.

8Angji pai tongtipur den pa yutsütsü akoktsü,

Oda pei nübur tongtipur den.

9Pai tetsür tapung nem chirnur,

tepela tetsü kümdakja ki ka agütsür,

Nenoki Kibuba sangang!

TENÜNGSANG KEN 114

Tsüngremi Israel Anitetba

(Ani. 14.1-31)

1  Kodang Israel Ijip nungi adok,

aser Yakob ki dang bendanger oshi nübur nungi;

2Yihuda pa temeshidak aküm;

Israel pa meyong aküm.

3  Tzüyimi aji angu,

aser jena ao;

Yordani meyipa ao;

4Tenemtemi san tepung ama,

aser ungsemi san chanu ama pungten.

5Oh Tzüyim, na kechiba jena ao!

Na Yordan, kechi agi meyipa odaktsü?

6Nenok tenemtitem,

san tepung ama,

nenok tenem tilatem,

san chanu ama;

kechi agi pungtendaktsür?

7Na alima, Kibuba tsüngdang,

Yakob Tsüngrem tsüngdang,

atentenang;

8  shibai lung agi tzütu kümdaktsü,

Züpu lung agi tzüpokdak ayong kümdaktsü.

TENÜNGSANG KEN 115

Süngyanglu Aser Ochiba Tsüngrem

1Onok asoshi masü, Oh Kibuba,

Onok asoshi masü;

saka ne tenüng asoshi sentsüwangshi agüjang.

Ne temeim yimlibilem asoshi,

aser ne temulung lemtetba asoshi.

2Kechisünung kintemi,

“Tang parnok Tsüngrem kong lir?” ta shidaktsütsü?

3Saka asen Tsüngrembo anüngtem nung lir.

Pai kechisa mulung pai inyakogo.

4Parnok süngyanglutem taribi aser hon.

Nisung teka agi yangluba mapa lir.

5Parnok tebang lir,

saka parnoki mejembir.

Parnok tenük lir,

saka parnoki mangur.

6Parnok tenarong lir,

saka parnoki mangashir.

Parnok teni lir,

saka parnoki memenemteter.

7Parnok teka lir,

saka parnoki meinyaker.

Parnok tetsüng lir,

saka parnoki mejajar.

Mesüra parnok trok agi ola madoker.

8Shirnoki parnok yanglu,

nisung shia shibai parnok dak temulung alemer,

parnok mesüka akümtsü.

9Oh Israel, nai Kibuba dak temulung lemang;

pa parnok teyari aser parnok jong lir.

10Oh Aron kidong,

nenoki Kibuba dak temulung lemang;

pa parnok teyari aser jong lir,

11Nenok Kibuba tsüburtem,

Kibuba dak temulung lemang.

Pa parnok teyari aser jong lir.

12 Kibubai asen indang bilemtsür;

pai asenok moatsür.

Pai Israel kidong moatsütsü;

pai Aron kidong moatsütsü.

13  Pai Kibuba tsüburtem,

tila aser tulu anaprong moatsütsü.

14 Kibubai na teti tali züindakjang,

Na aser ne chirtem.

15 Kibuba nungi nenok moajang,

shibai anüng aser ali yanglu.

16Anüngtemji Kibuba anüngtem lir,

saka alimaji nisung chirtem nem agütsü.

17Tasüri Kibuba masanger,

mesüra shiba ola makadaki alur pai masanger;

18Saka onoki Kibuba,

iba mapang nungi teti tatem maka moatsütsü.

Nenoki Kibuba sangang.

TENÜNGSANG KEN 116

Tasütsü Nungi Kümzükba Nung Tsüngrem Asangba

1Ni Kibuba meimer,

kechiaser pai kü ola aser kü temepishiba angashia lir.

2Kechiaser pai kü dangi pa tenarong shitsür.

Aji asünung kopiga ni taküm lidir,

papigaji ni pa dang ajatsü.

3Tasüba lisü agi ni mesangbangogo,

Sheol tekangshi agi kü dak tongogo.

Ni timtem aser tejashi nguogo.

4Idangji ni Kibuba tenüng nung aja,

“Oh Kibuba, ni ne dang mepishir,

kü taküm kümzükangma.”

5 Kibuba taochi lir,

aser temeshi lir.

Hau, asen Tsüngrem yimlibilem lir.

6 Kibubai tongmelanger awabanga ayur.

Ni tajemzük kümdakja liasü,

aser pai ni kümzük.

7Ne anisüngzükdaki meyipang, Oh kü taküm.

Kechiyong Kibubai ne den junga benshiogo.

8Kechiyong tasü nungi kü taküm,

nüktzü ayimba nungi kü nük,

aser laoba nungi kü tetsüng,

nai kümzük,

9Ni Kibuba madang,

taküm alir lima nung jajatsü.

10“Ni kanga kangshia liasü”

ta ni shiaka ni tamang agi;

11ni kü taoksa nung ashi,

“Nisung ajak tiyazürtem lir.”

12Ni Kibuba nem kü dang ajungba

ajak asoshi kechi agütsütsü?

13Ni tekümtet marok agitsü,

aser Kibuba tenüng nung ajatsü.

14Pa nübur ajak matsüngdang

ni Kibuba dang tatemzükba agütsütsü.

15 Kibuba matsüngdang

pa temeshipur asüba senti lir.

16Oh, Kibuba, atangji ni ne tenzüker lir;

ni ne tenzüker,

ne kilitsür jabaso lir;

nai kü alar tia salatsüogo.

17Ni ne nem tenüngsang agütsüba tenla tenlatsü,

aser Kibuba tenüng nung ajatsü.

18Pa nübur ajak matsüngdang;

Ni Kibuba nem kü tatemzükba agütsütsü.

19 Kibuba ki kilempok nung,

Oh Yirusalem, ne tiyong rongnung nenoki Kibuba sangang.

TENÜNGSANG KEN 117

Kibuba Tenüng Asangba

1  Oh Kibuba sangang, kin ajaki;

nisung ajaki, pa ayima sangang.

2Kechiyong asen tsütsü pa temeim yimlibilem tulu lir;

aser Kibuba tamang katetbaji teti tatem maka alir.

Nenoki Kibuba sangang.

TENÜNGSANG KEN 118

Takok Asoshi Tenüngsang

1  Oh Kibuba nem tenüngsang agüjang,

kechiyong pa tajung lir;

pa temeim yimlibilem teti tatem maka alir.

2Tang Israeli,

“Pa temeim yimlibilem teti tatem maka alir,”

ta shidakjang.

3Tang Aron kidongi,

“Pa temeim yimlibilem teti tatem maka alir,”

ta shidakjang.

4Tang Kibuba tsüburtemi,

“Pa temeim yimlibilem teti tatem maka alir,”

ta shidakjang.

5Kü tejashi nung ni Kibuba dang aja.

Kibubai kü dang langzü aser

ni talidak tuluka nung toktsü.

6  Kibuba kü tsütsü lir;

ni metsübutsü;

nisungi kü dang kechi inyaktettsü?

7 Kibuba kü tsütsü ni yaritsü lir.

Aji asünung shirnoki ni sempar, parnok madak takokba nung ni reprangtsü.

8Nisung dak tamang akadang nungibo,

Kibuba dak temulung alem tajungba.

9Tongtipur dak tamang akadang nungibo,

Kibuba dak temulung alem tajungba lir.

10Kin ajaki ni meketbangogo;

Kibuba tenüng nung parnok ajak ni leptoktsü.

11Parnoki ni meketbangaka, hau, lungbangaka,

Kibuba tenüng nung ni parnok samatsütsü.

12Ninang amai parnoki ni metembang;

ai arongba mi ama parnok jangrua lir.

Kibuba tenüng nung ni parnok samatsütsü.

13Ni laotsüsa nungokja liasü,

saka Kibubai ni yari.

14  Kibuba kü tashi aser kü ken lir;

pa kü tekümtet kümogo.

15Temeshi pur süki nung washiba aser tekümzük ola lir;

“Kibuba teka tajichi agi takok inyaker.

16 Kibuba teka tajichi ajungketa lir;

Kibuba teka tajichi agi takok inyaker.”

17Ni masütsü, saka taküm alitsü,

aser Kibuba mapatem sangdongtsü.

18 Kibubai ni kanga arürtsü;

saka pai ni tasüba nem magütsü.

19Temeshiba süngkhüm kü nem lapokjangma;

ajagi ni aitsü, aser Kibuba nem tenüngsang agütsütsü.

20Ibai Kibuba süngkhüm lir;

temeshipur aji agi aitsü.

21Ni ne nem tenüngsang agütsütsü,

kechiyong nai kü dang langzü,

aser na kü tekümtet küma lir.

22  Kisürtemi koba lung magizük,

kinük nung tongtiba küma lir.

23  Ibai Kibubai inyakba mapa lir;

asen nükdang ibai tesüngmangtsü.

24 Kibubai yangluba anogoji ibai lir,

asenoki pelateptsü aser iba nung pela-a alitsü.

25  Tang kümzükang, onoki ne dang mepishir, Oh Kibuba.

Oh Kibuba, onoki ne dang mepishir,

tang takok agüjangma.

26  Kibuba tenüng nung shiba arur

pa temoatsüba süang;

Kibuba ki nungi onoki na moatsütsü.

27 Kibubaji Tsüngrem lir, aser pai asenok nem tesangwa agütsü.

Lisü agi tetepsettsü tenla alenang;

oda tenladak tezü dakji.

28Na kü Tsüngrem lir,

aser ni ne nem tenüngsang agütsütsü;

na kü Tsüngrem lir, ni na ajungkettsü.

29Oh Kibuba nem tenüngsang agüjang;

kechiyong pa tajung lir;

pa temeim yimlibilem teti tatem maka alir.

TENÜNGSANG KEN 119

Kibuba Ozüng

1 Shirnok lenmang nung tamayazür lir,

shirnoki Kibuba ozüng nung jajar parnok temoatsüba.

2 Shirnoki pa temelabatem benshir,

Shirnoki temulung ajak agi pa bushir,

parnok tepelatsü.

3 Hau, parnoki memeshiba meinyaker;

Parnoki pa lenmang nung jajar.

4 Nai ne ochi ozüngtem,

onoki meranga benshitsü onok dang mela.

5 Oh, telatet ozüngtem benshitsü,

kü lenmangtem akanga yanglua lilasang!

6 Kodang ne temelaba ozüngtem ajak nung ni akhümtsübua lidir,

Idangji ni akseta malitsü.

7 Kodang ne temeshi obendang ni angazükdir,

ni ne nem tamayazüba mulungjang agi tenüngsang agütsütsü.

8 Ni ne ozüngtem benshitsü;

Oh, ni bendanga senzüka teyutsüma.

Kibuba Telatet Obendangba Ozüng

9 Asangur nisungi pei lenmang koda merüka yutettsü?

Ne o ama aji mita aliba agi.

10 Kü mulungjang ajak agi ni na bushiogo;

oh ne temelaba ozüng nungi ni nemzüa tuodaktsü.

11 Ni na anema temenen memenatsü,

ne o kü mulung nung rizünga lir.

12 Na temoatsü lir, Oh Kibuba,

Kü dang ne ozüngtem sayuangma.

13 Ne bang nungi ne yimsü ozüng ajak ni kü bang agi sangdonger.

14 Ni ne ozüngtem nung, rongsen ajak nung ama kodaka pelar,

patakaji pelaseta alir.

15 Ni ne ozüng nung shisadanger,

aser ne lenmang nung akhümtsübua lir.

16 Ni kü sasa ne telatet ozüng nung pelar;

ni ne o mamatsü,

Kibuba Ozüng Nung Tepelatsü

17 Ne tenzüker den, ni taküm litettsüsa,

taochi sayua benshiangma.

18 Ne ozüng nungi tesüngmangtsü mapatem,

ni ngutettsüsa, nai kü tenük lapokjangma.

19 Alima nung ni aener ka ama lir,

ne temelabatem kü dang nungi temiimma.

20 Ni ne yimsü-ozüng mapang ajak nung,

tejangraba agi bushir.

21 Asükümer atakatema alirtem,

shirnoki ne temelabatem nungi pila-a aor,

parnok nai arütsür.

22 Kü dang nungi maksü aser tatalaba agienangma;

kechiyong ni ne ozüngtem benshiogo.

23 Ano tongtipuri ni anema tasa asa-a menaka,

ne tenzükeri ne telatet ozüng indang shisadangtsü.

24 Ne kulitem ano kü tepelatsü,

aser kü teshisadangbatem lir.

25 Kü nelai aut nung ondaka lir;

ne o amato ni roka asoa kümdakjang.

Kibuba Ozüng Angatsü Terenemba

26 Ni kü lenmangtem metetdaktsü,

aser nai kü dang langzü;

nai kü dang ne ozüngtem sayuangma.

27 Kü nem ne ozüngtem lenmang angatettsüsa kümdakjang.

Anungji ni ne tesüngmangtsü mapatem indang shisadangtsü.

28 Tejashi agi ni kokroka lua lir.

Ne o amato ni mesoangma.

29 Tiyazü lenmangtem ni nungi talangka pila-a tokjang,

aser aochia ne ozüng kü dang mela-angma.

30 Temulung alemba lenmang ni shimtetogo.

Kü madang ni ne yimsü ozüng yua lir.

31 Ne ozüngtem dak ni azüiter;

Oh Kibuba, ni maksüa teyutsüma.

32 Kodang nai kü mulungjang uludaktsüdir,

ni ne temelaba lenmangi asemtsü.

Telatet Ozüng Angatettsü Sarasademba

33 Oh Kibuba, ne telatet ozüng kü dang sayuangma;

aser aji ni tatem tashi benshitsü.

34 Kü nem tangatetba kua,

aser ni ne ozüng ayutsü.

Hau, ni kü mulungjang ajak agi aji benshitsü.

35 Ne ozüng lenmang nung ni aniang,

kechiyong iba nungji ni pelar.

36 Ne kulitem tsütsü kü mulungjang shijang.

Aser azüabungba len masü.

37 Amajok reprangba nungi kü tenüktem meyipa odakjang,

aser ne lenmangtem nung ni saksalema kümdakjang,

38 Ne tenzüker asoshi ne tenangzükba akangshidakjang,

koba ne akhümtsüburtem asoshi lir.

39 Maksütsü koba ni tsübur,

ni nungi aenshidakjang;

kechiyong ne yimsü-ozüngtem tajung lir.

40 Ajiang, ne ozüng asoshi ni yongya-a liogo;

ne temeshiba nung ni roka asodakjang.

Kibuba Ozüng dak Amangba

41 Oh Kibuba, ano ne temeim yimlibilem,

oda ne tekümzük ne o amato kü dangi arudakjangma.

42 Anungji ni atalatsür dang telangzüba ka akatsü;

kechiyong ni ne o nung temulung alemer.

43 Kü bang nungi atangji o khenyongi bener tuoma;

kechiyong ne obendang nungi ni imla-a liogo.

44 Anungji ni maneni ne ozüng,

teti tatem makai benshitsü.

45 Aser ni matitaki jajatsü;

kechiyong ni ne ozüngtem bushi.

46 Ano ni chubatem madang ne ozüngtem jembitsü,

aser aaka malitsü.

47Ni kü sasa ne temelabatem koba ni meimer,

iba nung pelatsü.

48 Ne temelabatem, koba ni meima ali,

ano kü teka mekangtsü,

aser ne telatet ozüng nung ni shisadangtsü.

Kibuba Ozüng dak Tamang Akaba

49 Ne tenzüker dang ne oji bilemtetangma,

kechiaser nai kü nem imladaktsü.

50 Kü timtem nung ibai kü tesünep lir.

Kechiyong ne o agi ni roka asodaktsü.

51 Asükümeri ni kanga sensatsü,

aji saka ne ozüng nungi ni meyipa mao.

52 Alemli nungi ni ne ozüngtem bilemteta lir, Oh Kibuba,

aser kü sasa sünepdaktsü.

53 Tamajungeri ne ozüng senzüka yutsüba dang,

ni kanga jashia mit adok.

54 Kü temeshi aeni aoba kidang

ne telatet ozüngtem kü ken lir.

55 Ni ne tenüng aonung bilemtet, Oh Kibuba,

aser ne ozüng benshiogo.

56 Ni ne ozüngtem benshiba yong,

iba temoatsü kü dangi aruogo.

Kibuba Ozüng nung Bendanga Agütsüba

57 Kibuba kü shilem lir;

ni ne otem benshitsü nangzükogo.

58 Kü mulungjang ajak agi ne dang mepishir;

ne o amato kü dang aochiangma.

59 Kodang Ni kü lenmang shisadang,

ne ozüng leni kü tsüng meyip.

60 Ne temelaba benshitsü,

ni ilunger, aser menua malir.

61 Tamajunger lisü agi ni naibangaka;

saka ni ne o mamadok.

62 Ne temeshi yimsü ozüngtem ama,

ni ne nem tenüngsang agütsütsü asoshi ayatrem nung shishitsü.

63 Shirnoki na akhümtsübur aser shirnoki ne ozüngtem benshir,

parnok ajak medemerji ni lir.

64 Oh Kibuba, alima ne temeim yimlibilem agi sünga lir;

Kü dang ne telatet ozüngtem sayuangma.

Kibuba Ozüng Jenjang

65 Oh Kibuba, ne o amato,

nai ne tenzüker den junga benshiogo.

66 Obendang tajung aser temetetba shisatsü kü dang sayuangma.

Kechiyong ne temelaba ozüng nung ni amanger.

67 Ni timtem agi metongi alidang,

ni aibelena ao.

Saka tangbo ni ne o benshir.

68 Na tajung lir, aser tajung inyaker;

Kü dang ne telatet ozüngtem sayuangma.

69 Asükümertemi ni atema tiyazü shiogo.

Saka ku mulung ajak agi ne ozüngtem benshitsü.

70 Parnok mulungjang temo ama tekaka lir.

Saka kü mulungjang ajak agi ni ne ozüng benshitsü.

71 Ne telatet ozüngtem ni angazüktsüsa,

ni timtemdaktsübaji ni atema tajung lir.

72 Hon aser taribi meyirijang dang nungi

ne bang ozüng kü tsüngdang tajungba lir.

Kibuba Ozüng Ochi

73 Ne ket agi ni yanglu aser ni renemtsü.

Ne temelaba ozüng ni angazüktsüsa,

kü nem tangatetba kua.

74 Shirnoki ne akhüm tsübur parnoki

ni angutsü aser pela-a alitsü.

Kechiaser ne o nung ni imla.

75 Ni metet, Oh Kibuba,

oda ne o bendang ochi lir,

aser oda tajung atema nai ni timtemdaktsü.

76 Ni ne dang mepishir,

ne tenzüker dang ne o amato,

ne temeim yimlibilem kü tesünep asoshi sangma.

77 Ni taküm litettsü ne taochi

kü dangi arudakjang.

Kechiyong ne ozüng kü tepela asoshi lir.

78 Asükümer akdakjang.

Kechiyong parnoki ni tai agi endoktsü.

Saka ne ozüng nung ni shisadangtsü.

79 Ne akhümtsüburtem kü dangi meyipdakjangma,

aser parnoki ne ozüngtem metettsü.

80 Ne telatet ozüng nung kü mulungjang shitak lidakjangma.

Angji ni aaka malitsü.

Tekümzük asoshi Sarasademba

81 Ne tekümzük asoshi kü nela lula-a akümer;

saka ne tenangzükba nung ni imlar.

82 Ne tenangzükba reprangra kü tenük chilar,

“Nai kodang ni süneptsütsü?”

83 Kechiyong mokozü nung yi shiküp

bongdang ama ni küma lir.

Aji saka ni ne telatet ozüng mamar.

84 Ne tenzükeri kwinü aremzüktsü?

Ni rishikangshir dak nai kodang o bendang agütsütsü?

85 Asükümeri ni asoshi kangla tua lir,

parnoki ne ozüng nung malir.

86 Ne temelaba ozüng ajak atangji lir;

parnoki aibelena ni rishikangshir; nai ni yariangma.

87 Parnoki ni ali nung tesamatsürdang lir;

saka ne ozüng ni senzüka metoktsü.

88 Ne temeim yimlibilem yari ni rokasoa kümdakjangma,

Angji ne bang ozüng ni bilemtettsü.

Kibuba Ozüng Nung Tamang Akaba

89Oh Kibuba, teti tatem maka,

ne o kotak nung akanga noktaka lir.

90 Ne temulung alemba tenangzükba putu ajak dangi lir.

Nai alima yanglur, aser aji akanga noktaka alir.

91 Ne yimsü ozüng amato parnok tanü noktaka lir;

kechiyong ajak ne tenzükertem lir.

92 Ne ozüngji kü tepelatsüsa melilasang,

ni kü timtem nung samar lila.

93 Ni ne ozüng kodanga mamatsü;

kechiyong item jagi nai ni kümzüka ayutsü.

94 Ni ne meyong lir,

ni kümzükangma;

kechiyong ni ne ozüng bushi.

95 Tamajungeri ni samatsütsü ni ata-a ali;

saka ni ne ozüngtem bilemdangtsü.

96 Mapa ajak atema tatem kabosa ni angur;

saka ne temelaba ozüngtembo onsara tesadem lir.

Kibuba Ozüng Meimba

97 Oh, ni ne ozüng koda meimer!

Anogo tepiyong ya kü teshisadangba lir.

98 Ne temelaba ozüngtem agi,

Kü tsükchirtem dang nungi ni shisa takaba kümdaktsür;

Kechiyong itemji teti kü den lir.

99 Kü tesayur ajak dang nungi ni tali tangatetba lir;

kechiyong ne ozüngtemji kü teshisadangba lir.

100 Tambur dang nungi ni tangatetba lir,

kechiyong ni ne ozüngtem benshir,

101 ne o benshitettsü asoshi,

ni kü tsüng tamajung lenmang nungi agien.

102 Ne yimsü-ozüng nungi ni meyipa mao,

kechiyong nai kü dang sayu.

103 Ne otem kü bang dang koda tanang lir!

Hau, kü bang dang mojitzü dang nungi tanangba!

104 Ne ozüngtem ajanga ni tangatetba angur.

Aji asünung ni tiyazü mapa sempar.

Kibuba Ozüng Nungi Tesangwa

105 Ne o kü tsüng asoshi milen,

aser kü lenmang asoshi tesangwa lir.

106 Ne temeshi yimsü ozüng benshitsü.

Ni azüngashiogo,

aser aji ni inyaktsü.

107 Ni kanga timtema lir,

Oh Kibuba, ne o amato kü nem taküm agüjang.

108 Oh Kibuba, kü bang nungi mulungben tenla agizükangma,

aser ne o bendang kü dang sayuangma.

109 Kü taküm maneni kü ket nung lir;

aji saka ni ne ozüng mamar.

110 Tamajungeri ni asoshi sang ka soa lir;

aji saka ne ozüng nungi ni mashileni mao.

111 Ne ozüngtem teti asoshi ni senmang agia lir.

Kechiyong itemji kü mulungjang tepela lir.

112 Ne telatet ozüng benshitsü kü mulungjang ne tsütsü shia lir,

oda tatembang tashi.

Kibuba Ozüng Nung Tekümzük

113 Temulung anasüpur ni sempar;

saka ne ozüng ni meimer.

114 Na kü tatsükokdak, aser kü jong lir;

ni ne tenangzükba nung imlar.

115 Ni nungi aenshiang,

nenok tamajung inyakertem;

angji ni kü Tsüngrem temelaba ozüng benshitettsü.

116 Ne o amato ni ajungketang,

angji ni taküm litettsü;

aser kü teimla asoshi ni maksüa tetoktsüma.

117 Nai ni atsümesoang, aser ni kümzüktsü,

aser maneni ne telatet ozüng asoshi akhüm tsübua alitsü.

118 Ne telatet ozüng nungi aibelena aor ajak,

nai tazüngla kümdaktsü;

kechiyong parnok tekülakbaji tagidak maka.

119 Alima nung tamajunger ajak,

rüja ama nai tatem kümdaktsür;

aji asünung ni ne ozüngtem meimer.

120 Ne tsüngken tsübu agi kü shi atentener;

aser ni ne ozüng tsüngken tsübur.

Kibuba Ozüng Tashi Angaba

121 Ni ochi aser shitak inyakogo;

ni kangshir nem ni tetoktsüma.

122 Kü dang ne o teti asoshi züngzükangma,

mezümekümeri ni tekangshidaktsüma.

123 Ne tekümzük asoshi aser ne temeshi tenangzükba ataloktsü asoshi,

kü nüki reprangtsü mokoki akümer.

124 Ne temeim yimlibilem yari ne tenzüker dang inyakangma,

aser ne telatet ozüng kü dang sayuangma.

125 Ni ne tenzüker lir,

kü nem tangatetba kua;

angji ni ne temelaba ozüng metettsü akoktsü.

126 Ibai Kibuba asoshi inyaktsü mapang lir;

kechiyong parnoki ne ozüng raksatsüogo.

127 Aji asünung ni ne temelaba ozüng meimer.

Hon dang nungi, hau, hon tajung dang nungi tali meimer.

128 Aji asünung kechisarena nung

ne temelaba ozüng ajak shitak ta ni züngshir;

aser tiyazü lenmang ajak ni sempar.

Kibuba Ozüng Angatsü Tejangraba

129 Ne temelaba ozüngtem tesüngmangtsü lir.

Aji asünung ni itemji benshitsü.

130 Ne otem lapokba agi tesangwa agütsür.

Iba yagi tongmelanger nem tangatetba agütsür.

131 Ni tangu satema tebang kar ata-a ali;

kechiyong ni ne temelaba ozüngtem yongya-a liasü.

132 Ne tenüng meimer dang nai inyakba ama,

Na kü dangi meyipang,

aser kü dang aochiangma.

133 Ne o nung kü tsüng jenjang yanglujang;

aser kü madak tai temenen tashi telidaktsüma.

134 Nisungi kangshiba nungi ni alangzükangma.

Anungji ni ne temelaba ozüngtem benshitsü.

135 Ne tenzüker madak ne tejak yalokjangma;

aser ne telatet ozüng kü dang sayuangma.

136 Kü tenük nungi nüktzü ayong ama yima alur,

kechiaser parnoki ne ozüng mebenshir.

Kibuba Ozüng Ochi

137 Oh Kibuba, na temeshi lir,

aser ne obendang ochi lir.

138 Temeshiba nung aser temulung alemba ajak nung,

nai ne kulitem melaogo.

139 Kü tejangraba agi ni chimar,

kechiaser kü anemertemi ne otem amadok.

140 Ne tenangzükbatem tendangogo aser atangji.

Aji asünung ne tenzükeri aji meimer.

141 Ni tilar, aser mezüngmeshiba nisung,

aji saka ne ozüngtem ni mamar.

142 Ne temeshiba teti tatem maka temeshi,

aser ne ozüngtemji atangji lir.

143 Timtem aser touashiba agi kü dak atong;

aji saka ne temelaba ozüng kü tepela lir.

Kümzüktsü Asoshi Sarasademba

144 Ne temelaba ozüngtem teti tatem maka temeshi;

kü nem tangatetba kua, aser ni taküm alitsü.

145 Kü mulung ajak agi ni ayimtener;

kü dang langzüangma, Oh Kibuba;

ni ne telatet ozüng benshitsü.

146 Ni ne dang ayimtener;

ni kümzükangma,

aser ni ne temelaba ozüng benshitsü.

147 Ni mesangwa dang shishir,

aser teyari asoshi ayimtener;

ni ne o nung imlar.

148 Ne o nung ni shisadangtsü asoshi,

kü tenük aonung saksalema alir.

149 Ne temeim yimlibilem yari kü ola angangma,

Oh Kibuba, ne ochiba yari kü taküm wazüka yuangma.

150 Tamajung sülen anitakertemi anasa arur,

saka ne ozüng nungi parnok talangka pila-a lir.

151 Aji saka na ana nung lir, Oh Kibuba;

aser ne temelaba ozüngtem atangji lir.

152 Alemli nungi ne temelaba ozüngtem,

teti asoshi nai yanglu, ta ni metet.

Teyari asoshi Mepishiba

153 Kü timtem bilemdangang,

aser ni kümzükangma;

kechiyong ni ne ozüng mamar.

154 Kü tepu kümang,

aser ni alangzükang;

ne tenangzükba yari kü nem taküm agüjangma.

155 Tamajunger nungibo tekümtet talang nung lir;

kechiyong parnoki ne telatet ozüng mebushi.

156 Ne taochi tulu lir, Oh Kibuba;

ne ochiba yari kü nem taküm agüjangma.

157 Ni rishikangshir aser kü anemer jenti lir;

aji saka ne kulitem nungi ni pila-a mao.

158 Külaka benshirtem ni angu,

aser jashia liasü;

kechiaser parnoki ne o mebenshi.

159 Ni ne ozüng koda meimer shisadangang;

Oh Kibuba, ne temeim yimlibilem yari kü taküm wazüka yuangma.

160 Ne o tatokbaji atangji lir.

Aser ne ochi obendang teti alir.

Kibuba Asoshi Bendanga Agütsüba

161 Kecha masü nung tongtipuri ni rishikangshi;

saka kü mulungjang ne o tsüngken tsübua noktaka alir.

162 Temakzükba oset angur nisung amato,

ni ne ozüng nung pelaseta alir.

163 Ni tiyazü aser yazüyaponger sempar,

saka ne o ni meimer.

164 Anogo ka nung ni tenetben ne nüng asanger;

kechiaser ne ochi obendang lir.

165 Ne ozüng meimertem asoshi tesünep tulu lir;

aser parnok temetsüdaktsü kecha maka.

166 Oh Kibuba, ni ne tekümzük asoshi imla,

aser ne temelaba inyakogo.

167 Kü nelai ne temelaba ozüng benshiogo;

aser itemji kanga meimer.

168 Ni ne ozüng aser temelaba ozüng benshiogo;

kechiyong kü lenmang ajak ne madang lir.

Teyari Asoshi Sarasademba

169 Oh Kibuba, ni ayimtenba na anasa arudakjang;

ne o amato kü nem tangatetba kua.

170 Kü temepishiba ne madangi arudakjang;

ne o amato ni kümzükangma.

171 Kü bang agi tenüngsang adokdakjangma;

kechiyong nai ne telatet ozüng kü dang sayur.

172 Kü meli agi ne o indang ken atentsü,

kechiyong ne temelaba ozüng ajak temeshi lir.

173Ni yaritsü ne teka renema lidakjangma;

kechiyong ni ne temelaba ozüng shimtetogo.

174Oh Kibuba, ne tekümzük asoshi ni yongya-a liasü;

aser ne ozüng kü tepelatsü.

175Kü tanela taküm lidakjang,

aser iba jagi ne nüng asangtsü,

aser ne o bendang agi ni yaridakjangma.

176Tesama san ama ni mashileni ogo;

ne tenzüker bushiangma;

kechiyong ne temelaba ozüngtem ni mamar.

 

TENÜNGSANG KEN 120

Teyari Asoshi Sarasademba

1Kü tejashi nung ni Kibuba dang ayimten,

aser pai kü dang langzü.

2Oh Kibuba, yazüyabongba bang nungi,

aser külakkübong temeli nungi,

kü nela kümzükangma,

3Na külakkübong temeli,

Ne nem kechi agütsütsü, aser

ne dang ano kechi inyaktsü?

4Kioktsü süng mijang tait aliba,

temeranger techira lijakjang ama.

5Ni aiatai, ni Meshek nung alir,

oda ni Kedar süki rongnung alir!

6Talangka yimjung sempar den,

kü taküm lia aruogo.

7Ni yimjung asoshi lir;

saka kodang ni jembidir,

parnok rara asoshi lir.

TENÜNGSANG KEN 121

Kibubaji Asen Tekümzüker

1Ni kü tenük tenem leni rangketa yoktsü;

kolen nungi kü teyari arutsü?

2Kü teyari Kibuba nungi arur,

shibai anüng aser alima yanglu.

3Pai ne tsüng marakzükdaktsütsü;

shibai na anüker pa amua maotsü.

4Ajiang, shibai Israel anüker,

amua maotsü mesüra memejangtsü.

5 Kibuba ne tanüker lir;

ne teka tajichilen madak Kibubaji ne akhüm lir;

6Anüngdang anü agi mesüra aonung ita agi ne dak mazüktsü.

7 Kibubai na tamajung ajak nungi kümzüktsü,

pai ne taküm anüktsü.

8Tang iba mapang nungi aser teti asoshi,

Kibubai na taru tao nung nüka alitsü.

TENÜNGSANG KEN 122

Dawid Ken: Yirusalem Tenüng Asangba

1“Kibuba kidangi asenoki odi ta ashidang,

ni pela-a liasü.”

2Oh Yirusalem,

ne süngkhümbong kübok,

onok tetsüng noktaka lir;

3Yirusalemji yimti ka ama,

akangalunga yanglua lir.

4Ajagi kintem atur,

oda Kibubar kintem,

Kibuba tenüng nung tenüngsang agütsütsü,

aji Israel asoshi agüja aliba ozüng ama.

5Kechiyong obendangba menden,

Dawid kidong menden yanglua liasü.

6Yirusalem yimjung asoshi sarasademang;

“Na meimertem azükarudakjangma.

7Ne jara kübok yimjung,

aser ne chuba kidang azükaru lidakjang.”

8Kü adianutem aser kü tembartem asoshi,

ni tang ashitsü,

“Ne dak yimjung liangma.”

9 Kibuba asen Tsüngrem ki atema ne tajung ni bushitsü.

TENÜNGSANG KEN 123

Taochi Asoshi Sarasademba

1Ne dangi ni kü tenük rangketa yoker,

Oh na, shiba anüngtem nung alir.

2Ajiang, kilirtem tenük pei kibur teka repranga aliba ama,

kilitsürlai pei kiburla teka repranga aliba ama;

yamaji onok tenük Kibuba asen Tsüngrem dang,

pai onok dak taochi maka tashi repranga alir.

3Onok dang aochiangma, Oh Kibuba,

onok dang aochiangma;

kechiyong onok sensamasatsüba agi sünga lir.

4Onok taküm sadoksadoka alirtem tatalaba agi,

aser mezümekümer sensamasatsüba agi onsara sünga lir.

TENÜNGSANG KEN 124

Dawid Ken: Tsüngremji Tekümzüker

1 Kibuba shiba asen tsütsü liasü,

pa ka masü asübo,

tang Israeli shidakjang.

2 Kibuba shiba asen tsütsü liasü,

pa ka masü asübo,

kodang nisungtemi asen anema apuso;

3Kodang asenok anema parnok ain adok;

idangto parnoki asenok taküm meyoker lila;

4Idangto tzüi asenok mobanger lila;

asen taküm madak ayong yima or lila;

5Idangto tzü tesashi asen madak or lila.

6 Kibuba temoatsü süang,

shibai parnok tepu meyong asütsü asenok magütsü!

7Ozü kümertem sang nungi ozü ka ama,

asen taküm jenbuogo!

Sang raksa-a lir, aser asenok jenteta lir.

8Asen teyari Kibuba tenüng nung lir.

Shibai anüng aser alima yanglu.

TENÜNGSANG KEN 125

Tsüngremi Pei Nübur Kümzüker

1 Kibuba dak shirnoki temulung alemer,

Zion tenem ama lir,

koba arakzütsü makok,

saka teti alir.

2Yirusalem meketa tenem aliba ama,

yamaji Kibuba pei nübur meketa lir.

Iba mapang nungi aser teti tatem maka,

3temeshipuri tamajung inyaktsü pei teka chioka lir ta

temeshipur limaji tamajunger chuba mechi kübok pai metoktsütsü.

4Oh Kibuba, tajunger dang,

aser shirnok pei mulungjang indang indanga ali,

parnok dang jungangma.

5Saka shirnoki tekirak lenmangi meyiper,

Kibubai tamajung inyakertem den anir aotsü.

Israel nung yimjung lidakjang.

TENÜNGSANG KEN 126

Israel Kümzüktsü Asoshi Sarasademba

1Kodang Kibubai Zion tepuokba tanaben meyipa arudaktsü,

onok pungmang pungmangertem mesüka liasü.

2Idangji temenüba agi onok tebang sünga liasü,

aser ken atenba agi onok temeli sünga liasü.

Idangji kin rongnung parnoki ashi,

“Kibubai parnok asoshi mapa tulu inyakogo.”

3 Kibubai onok asoshi mapa tulu inyak;

aser onok pela-a lir.

4Onok tia yanglujang, Oh Kibuba;

Negeb nung ayong tzü ama,

5shirnoki nüktzü yima proker,

tepela nung arutsü.

6Shirnoki teproktsü metsü bener jeba aor;

Pa tanaben tepela agi,

pa den tsükpong bener arutsü.

TENÜNGSANG KEN 127

Solomon Ken: Tsüngremi Dang Kibong Moatsür

1 Kibubai kiji meyanglura,

iba kisürtem amajok nung belemer,

Kibubai yimtiji nüka melira,

tanükerji amajok dang nüka alir.

2Nenok amajok nung yakta shishir,

aser kanga menua anisüngzük agir,

aser belema züsentetba amtsük achir.

Kechiyong yamaji pai pa meimba nem mejanga alidang agütsür.

3Angang, chirnurji Kibuba nungi anguba senmang lir;

aser nu menden nungi tejangji pa sempet lir.

4Temeranger nisung ket nung lijakjang ama,

Yamaji atura mapang asoba chirnur lir.

5Nisung shiba lijakjang bongdang sünga lir tepelatsü.

Kodang parnoki parnok tsükchirtem den süngkhüm nung jembidir,

Parnok maksüa malitsü.

TENÜNGSANG KEN 128

Kibuba Nungi Tashi Angaba Sempet

1Nisung shia shibai Kibuba tsüngken tsübur,

shibai pa lenmang nung jajar,

pa tepelatsü.

2Kechiyong ne ket agi züsentetba nai achitsü.

Na tepelatsü alitsü,

aser ne den junga alitsü.

3Ne kidang kilung nung ne kinungtsüji

tejang atangba tsükmenatzü dong ama alitsü.

Ne chirtem, ne langbang meketa oliv süngdong ama alitsü.

4Ajiang, Kibuba tsüngken tsübuba nisungji

yamaji alitsü.

5 Kibubai Zion nungi na moatsütsü;

aser ne arishi tepiyong nai Yirusalem ajungtsü reprangangma,

6Hau, nai ne chirtem chirnur angutsü.

Israel dak yimjung liangma.

TENÜNGSANG KEN 129

Israel Tsükchir Anema Sarasademba

1Kü asangwa nungi parnoki aiben ni timtemdaktsü,

tang Israeli shidakjang,

2kü asangwa nungi parnoki aiben ni timtemdaktsü.

Aji saka parnoki ni anema takok mangu.

3Alu alartemi kü rongdong manung alu ala.

Parnoki meritsüng talang yanglu.

4 Kibuba temeshi lir;

tamajunger lisü pai raktangtsüogo.

5Zion sempar ajak,

parnok maksüa lidakjang aser tesüleni meyipdakjang.

6Parnok kilem manung ai,

meia matudang azüladokba ama kümdakjang,

7Koba agi alurur tekabu masünger,

mesüra tsükpong alanger tapubang masünger.

8Mesüra anasa süirtemi parnok dang,

“Kibuba temoatsü nenok madak liang;

Kibuba tenüng nung onoki nenok moatsür” ta mashitsü.

TENÜNGSANG KEN 130

Teyari Asoshi Sarasademba

1Oh Kibuba, kü timtem telungtiba nungi,

ni ne dang ayimtener.

2 Kibuba, kü ola angangma;

kü temepishiba ola nung ne narong tenjangma.

3 Kibuba, tai menaba nai sükdangdi süra,

Kibuba, shibai noktaktettsü?

4Saka ne tsüngken tsübutsüsa,

ne dak tatok lir.

5 Kibuba asoshi ni atar, kü nelai atar,

aser pa o nung ni imlar.

6Tanükertemi sangwatsü yongyaba dang nungi taoba,

Hau, tanükertemi sangwatsü yongyaba dang nungi taoba,

Kü nelai Kibuba asoshi yongyar.

7Oh Israel, Kibuba dak imla-ang.

Kechiyong Kibuba dak temeim yimlibilem lir,

aser pa dak talubosa tekümzük lir.

8  Pai dang Israel tai ajak nungi alangzüktsü.

TENÜNGSANG KEN 131

Dawid Ken: Ajemalu Tamang Sarasadem

1Oh Kibuba, kü mulungjang mezümeküma mali,

mesüra kü tenük anüngata-a mali;

mesüra kü sasa ni asoshi onsara tulu aser onsara tesüngmangtsü ni meinyaker

2Atangji ni kü taküm ajemajema aser ola madoki,

tetsü den kinü tanur aliba ama,

kü nela kümdaktsü.

3Oh Israel, iba mapang nungi

aser teti asoshi Kibuba dak imla-ang.

TENÜNGSANG KEN 132

Tenla Ki Asoshi Tenüngsang Agütsüba

1Oh Kibuba, Dawid asoshi,

pa timtem ajak, bilemtetangma.

2 Kibuba dang pai koda azüngashi,

aser Yakober Tashi tulusang dang koda atemzük.

3“Atangji kü kidangi ni maitsü,

mesüra kü yipten nung ontaka alitsü ni matutsü.

4Ni kü tenük memejangdaktsütsü,

mesüra kü nükeptsü amua modaktsütsü.

5 Kibuba asoshi talidak ka,

Yakober Tashi tulusang asoshi tekülemdak

süki ka ni mangu tashi.”

6  Angang, aji Efrata nung liasü ta onoki angashi;

onoki aji Yaar moapu nung angu.

7“Pa alidaki asenoki odi,

pa tetsüng ajemetdak asenoki külemdi.”

8Aramesoang, Oh Kibuba,

ne anisüngzükdaki,

na aser ne tashi tait Ozüng Süngden,

9ne putirtem ochiba agi sobudakjang;

Ne temeshipur tepela agi washidakjang.

10Ne tenzüker Dawid atema,

nai shimtetba ajak meyipa teyokma.

11  Kibubai Dawid dang ochi nung azüngashiogo;

pai iba nungi memeyiptsü;

ne chuba menden manung,

“Ne dak nungi jakzükba chirtem rongnung ka ni toktsütsü.

12Ne chirtemi kü tezüngzüktepba,

aser kü kulitem koba ni sayutsü aji benshidi süra,

parnok chirtem ne chuba menden nung teti mendaktsütsü.”

13Kechiyong Kibubai Zion,

pa talidak asütsü pai aji shimtetogo.

14Ibai teti asoshi kü anisüngzükdak lir.

Yangji ni alitsü; kechiyong aji ni aginür.

15Ni pa chiyungtsü angudak talubosa moatsütsü.

Par sensaker amtsük agi tiptemdaktsütsü.

16Lar putirtem ano ni tekümzük agi sobudaktsütsü.

Aser lar temeshipuri tepela agi ola tulu agi washitsü.

17  Yangji ni Dawid tezü temeshi sobudaktsütsü.

Kü temeshitetsang asoshi ni milen ka renema lir.

18Par tsükchirtem maksü agi ni abendaktsütsü;

saka pa dak pei chuba korang sentsüpranga alitsü.

TENÜNGSANG KEN 133

Dawid Ken: Telungjem Nung Aliba Temoatsü

1Ajiang, adianutem külemi telungjem nung alitsü koda tajung aser jangratemtsü lir!

2Ibai tekolak nung senti totzü alokba,

koba bangsemo manung,

oda Aron bangsemo nung yanga aluba;

pa sobutsü tatembanglak tashi aluba mesüka lir.

3Hermon tenem nung azüngtsü,

Zion tenem madak aluba mesüka;

kechiyong yangji Kibubai temoatsü;

teti tatem maka taküm mela.

TENÜNGSANG KEN 134

Tsüngrem Tenüng Asangtsü Ajaba

1Arung, Kibuba moajang,

nenok Kibuba tenzükertem ajak,

shirnoki Kibuba kidang aonung noktaker.

2Temeshidak nenoki teka mekangang,

aser nenoki Kibuba sangang.

3 Kibuba anüng aser alima yanglusangi,

na Zion nungi moajangma.

TENÜNGSANG KEN 135

Tenüngsang Agütsüba Ken

1Nenoki Kibuba sangang.

Nenoki Kibuba tenüng sangang;

pa sangang, Oh nenok Kibuba tenzükertem.

2Nenok Kibuba kidang,

asen Tsüngrem kilempok nung noktakertem.

3Nenoki Kibuba sangang,

kechiyong pa tajung lir.

Pa tenüngsang ken tenang;

kechiyong pa taochi lir.

4Kechiyong pai Yakob pei meyong ama,

aser Israel pei rongsen ama shimteta lir.

5Kechiyong Kibuba tulu,

aser asen Kibuba tsüngremtem ajak madak temaba lir, ta ni metet.

6Kotak nung süshia alima nung süshia,

tzü nung aser tarok ajak nung Kibubai kechisa mulung,

aji pai inyaker.

7Alima tatembang nungi pai tzüsü lunga tudaktsür.

Tzünglu asoshi pai tsüngpret adokdaktsür;

pa terizüngdak nungi pai mopung bener arudaktsür.

8Pai Ijip mezüng asoba,

nisung aser shiruru anaprong tepset.

9Oh Ijip, pai ne dangi, Farao madak aser pa tenzüker ajak madaki,

temaitsü aser sayatenya yok.

10Pai kin aika zükreptsü;

aser tashi tulu chubatem tepset;

11Amor chuba Sihon,

aser Bashan chuba, Og,

aser Kanan chuba yimli ajak,

12aser parnok limaji senmang amangtsü asoshi,

pei Israel asoshi senmang ka asütsü agütsü.

13Oh Kibuba, ne tenüng teti lir;

Oh Kibuba, putu ajak songtema,

na bilemtetba teti alitsü.

14Kechiyong Kibubai pei nübur nem ochiba agütsütsü,

aser pei sasa pei tenzükertem indang aochia bilemtsü.

15  Kintem süngyanglutemji,

nisung teka agi yangluba mapa hon aser taribi lir.

16Parnok tebang lir,

saka parnoki mejembir;

parnok tenük lir,

saka parnoki mangur;

17Parnok tenarong lir,

saka parnoki mangashir;

mesüra parnok tebang nung tangula kecha mali.

18Nisung shia shibai parnok dak temulung lemdir,

shirnoki parnok yanglu parnok mesüka akümtsü.

19Oh Israel kidong,

nenoki Kibuba moajang;

Oh Aron kidong,

nenoki Kibuba moajang;

20Oh Levi kidong,

nenoki Kibuba moajang.

Nenok Kibuba tsüburtem,

nenoki Kibuba moajang.

21Zion nungi Kibuba temoatsü süang,

shibai Yirusalem nung alir,

nenoki Kibuba sangang.

TENÜNGSANG KEN 136

Tenüngsang Agütsüba Ken

1  Oh Kibuba nem tenüngsang agüjang;

kechiyong pa tajung lir.

Kechiyong pa temeim yimlibilem teti alir.

2Oh, tsüngremtem madak Tsüngrem nem tenüngsang agüjang.

Kechiyong pa temeim yimlibilem teti alir.

3Oh kiburtem madak Kibuba nem tenüngsang agüjang.

Kechiyong pa temeim yimlibilem teti alir.

4Sayatenya tulu pa mesüngi dang inyaker,

kechiyong pa temeim yimlibilem teti alir.

5  Shibai shisatsü agi anüngtem yanglu,

kechiyong pa temeim yimlibilem teti alir.

6  Shibai tzüma nung alima sataka yanglu,

kechiyong pa temeim yimlibilem teti alir.

7  Shibai tesangwa tulu yanglu,

kechiyong pa temeim yimlibilem teti alir.

8Anüngdang anüi anishitsü;

kechiyong pa temeim yimlibilem teti alir.

9Aonung ita aser petinutemi anishitsü;

kechiyong pa temeim yimlibilem teti alir.

10  Shibai Ijip nunger parnok mezüng asoba tepset;

kechiyong pa temeim yimlibilem teti alir.

11  Aser parnok rongnungi Israel anitet.

Kechiyong pa temeim yimlibilem teti alir.

12Tashi tait teka agi aser tepen songtokba agi;

kechiyong pa temeim yimlibilem teti alir.

13  Shibai Temerem Tzüyim sadang;

kechiyong pa temeim yimlibilem teti alir.

14Aser iba tiyong nung Israel süia odaktsü;

kechiyong pa temeim yimlibilem teti alir.

15Saka Temerem Tzüyim nung Farao aser temeranger telok araksetdaktsü;

kechiyong pa temeim yimlibilem teti alir.

16Shibai pei nübur arem ajanga ani;

kechiyong pa temeim yimlibilem teti alir.

17Shibai chuba tulutem tepset;

kechiyong pa temeim yimlibilem teti alir.

18Aser nüngtugu chubatem tepset;

kechiyong pa temeim yimlibilem teti alir.

19  Amor nunger chuba Sihon;

kechiyong pa temeim yimlibilem teti alir.

20  Aser Bashan chuba Og;

kechiyong pa temeim yimlibilem teti alir.

21Aser parnok lima senmang amangtsü agütsü;

kechiyong pa temeim yimlibilem teti alir.

22Oda pa tenzüker Israel asoshi senmang ka;

kechiyong pa temeim yimlibilem teti alir.

23Shibai asenok tajemrep tia nung ali dang bilemtet;

kechiyong pa temeim yimlibilem teti alir.

24Aser asen anemertem nungi asenok kümzük;

kechiyong pa temeim yimlibilem teti alir.

25Shibai shi ajak nem chiyungtsü agütsür;

kechiyong pa temeim yimlibilem teti alir.

26Oh anüng Tsüngrem nem tenüngsang agüjang;

kechiyong pa temeim yimlibilem teti alir.

TENÜNGSANG KEN 137

Israel Tepuokdak Mangyimba Ken

1Kodang onoki Zion bilemtet,

Babilon ayong anasa,

yangji onok amen, hau, onoki ajeb.

2Willow süngdong rongnung,

onoki kongki itaka ayu.

3Kechiyong yangji parnoki onok tepuoker küma anir ao,

parnoki onok dang ken atentsü asüngdang,

aser onok rishikangshiri onok dang pelatepang ta aser,

“Onok dang Zion Ken ka tenyuang,” ta ashi.

4Bendang lima nung,

kechi koda onoki Kibuba ken tentettsü?

5Oh Yirusalem,

ni na amadokra,

kü teka tajichiji ashirepdakjang.

6Ni na mebilemtetra,

kü tepela tematiba dang taoba ni Yirusalem meyutsüra,

kü temeli kü teküm nung neploka kümdakjang.

7Oh Kibuba, Edom chirtem anema,

Yirusalem laoba anogo bilemtetangma.

Shirnoki ashir,

“Iba kimung meshimeshia okdokang.”

8  Oh Babilon jala,

na teraksatsür,

nai onok dak inyakba ama,

shibai ne dang benshidir pa tepelatsü.

9Shibai ne tilatem rakzüker

aser lung manung akusatsüdir pa tepelatsü.

TENÜNGSANG KEN 138

Dawid Ken: Tenüngsang Agütsüba

1Kü mulungjang ajak agi,

ni ne nem tenüngsang agütsütsü, Oh Kibuba.

Tsüngremtem madak ni ne nüngsang atentsü.

2Ni ne temeshi tenla ki tsütsü apudaktsü,

aser ne temeim yimlibilem aser ne atangji asoshi,

ni ne tenüng nung tenüngsang agütsütsü.

Kechiyong nai ne tenüng ajak dang ne o tamarenba kümdaktsü.

3Ni na ajaba anogo nung nai kü dang langzü.

Nai kü nela nem tashi agüja ajongshi.

4Alima chuba ajaki ne nem tenüngsang agütsütsü, Oh Kibuba.

Kechiyong parnoki ne bang nungi o angashiogo.

5Hau, parnoki Kibuba lenmangtem indang ken atentsü;

kechiyong Kibuba sentsüwangshi tulu lir.

6Kechiyong temaba nung Kibubai liaka,

aji saka tekübok alir pai züngsemer.

Saka pai talang nungi mezümekümer meteter.

7Ni timtem ajanga jaja-aka,

nai ni awabangtsü;

kü tsükchirtem ain adokba anema nai ne teka songtoktsü,

aser ne teka tajichi agi ni kümzüktsü.

8 Kibubai kü sentong renemtsütsü;

ne temeim yimlibilem, Oh Kibuba, teti alir;

ne ket agi amtakba mapa nai mechioktsü.

TENÜNGSANG KEN 139

Dawid Ken: Ajak Metetsang Tsüngrem

1Oh Kibuba, nai ni bushi aser ni metet.

2Ni amendang aser ni noktakdang nai metet.

Talang nungi kü tebilemba nai angateter.

3Nai kü lenmang aser ni ontaka alidak,

aser kü lenmang ajak den metettepa lir.

4Kechiyong kü meli nung o kata,

Oh Kibuba, nai memetetba kecha mali.

5Na kü tesülen aser tejaklen lir,

aser ne teka nai kü dak nemeter.

6Iba ama shisatsü ni asoshi onsara tesüngmangtsü.

Ibai onsara talang,

iba den ni saku masü.

7Ne tanela nungi ni koleni aotsü?

Mesüra ne tsüngdang nungi ni koleni ajentsü?

8Ni anüng temaleni tura, na yangji lir;

kü yipten Sheol nung yanglura,

ajiang, na yangji lir.

9Ni anepdang tashikang tener,

aser tzüyim tatembang nung oa lira;

10oda idakjia ne teka agi ni anitsü,

aser ne teka tajichi agi ni amettsü.

11“Atangji ammang agi ni meketbangtsü” ta ni shira,

idangji aonungji ni meketa sangwa akümtsü.

12Ammangia na nungi atsüka malir,

saka aonung anüngdang ama sangwar;

ammang aser sangwa ne madang kasa lir.

13Kechiyong nai kü telung yanglu;

kütsü nu menden nung nai ni yanger.

14Ni ne nem tenüngsang agütsütsü;

kechiyong ni tetsübutsüka aser tesüngmangtsüka yanglua lir.

Ne mapatem tesüngmangtsü;

aser aji kü nelai shitak junga metet.

15Kodang ni miima yanglua liasü,

aser alima telungtiba nung yangertet,

idangji ne dang nungi kü mang miimbanga mali asü.

16Ne tenük agi kü mabensaba taküm angu.

Ni asoshi kümdaktsüba anogotem,

ano item kata malidang,

ne kaket nung item ajak zülua liasü.

17Ano kü dang ne tebilembatem koda senti lir, Oh Tsüngrem!

Item ajongaji koda tulu lir!

18Ni itemji züngdangdi asübo,

itemji lisem dang nungi timba lir.

Kodang ni sakdir,

ni ano ne den lir.

19Atangji nai tamajunger tepsettsü, Oh Tsüngrem.

Aji asünung kü dang nungi pila-ang,

nenok azüjemnüba nisungtem.

20Kechiyong parnoki na anema mejungi jembir,

aser ne tsükchirtemi ne tenüng amajok tetshir.

21Oh Kibuba, na sempartem ni mesempar no?

Aser na anema adoker dang ni jashia mali no?

22Shitakba tesempa agi ni parnok sempar;

parnok kü tsükchir ta kü sasa züngshir.

23Oh Tsüngrem,

kü dak bushiang,

aser kü mulungjang metetangma.

Ni tendangang, aser kü tebilemba metetangma.

24Aser kü dak lenmang tamajung kar danga lira reprangangma;

aser teti tatem maka lenmang nung ni aniangma.

TENÜNGSANG KEN 140

Dawid Ken: Tsükchir Nungi Kümzüktsü Sarasademba

1Oh Kibuba, nisung tamajunger nungi ni kümzükang;

Tesashi nisung nungi ni kümzükangma.

2Shirnoki pei mulungjang nung tasa tamajung asar;

maneni parnoki parnok sasa rara asoshi külemi senteper.

3  Per ama parnoki parnok tepu chiradaktsü;

ongyang per mim parnok tebang mechi telung nung lir.

(Selah)

4Oh Kibuba, tamajunger ket nungi ni kümzüka yuang;

tashiyim nisung nungi ni kümzüka yuang;

tesashi nisung nungi ni kümzükangma;

shirnoki kü jenjang mekepdoktsü tasa asar.

5Asükümeri ni asoshi sang aser lisü miima yua lir;

parnoki lenmang tezülen sang mesanga lir;

parnoki ni asoshi lungnen yua lir.

(Selah)

6Ni Kibuba dang ashi, “Na kü Tsüngrem lir.

Kü temepishiba ola nung tenarong tenjang, Oh Kibuba.”

7Oh Kibuba, kü tekümtet asoshi tashi,

tongbang anogo nung nai kü kolak tongbangtsür.

8Oh Kibuba, tamajungeri jangraba temela ma;

parnok tamajung tasa takok tengudaktsüma;

aji mesüra parnoki parnok sasa mezümekümtsü.

(Selah)

9Shirnoki ni meketbanger,

parnok tekolak angaka tetudaktsü;

parnok pei tebang nung tamajung agi

parnok nembangdakjangma.

10Parnok dak jangrua aliba mijang tsükdakjang;

parnok tanaben madoktettsüsa,

kangla tarok nung enokjang.

11Tamajung jembir alima nung tenoktakdak makatsü;

tashiyim nisungji,

pa laodaktsütsü tamajungi arishitsü.

12Ni metet tepetzükba pur asoshi,

aser sensaker tim mapa asoshi Kibuba noktaktsü.

13Atangji temeshipuri ne tenüng nung,

tenüngsang agütsütsü;

tamayazür ne tsüngdang alitsü.

TENÜNGSANG KEN 141

Dawid Ken: Nikongdang Sarasadem

1 Kibuba, ni ne dang ajar,

kü dangi kara arungma;

kodang ni ne dang jadir,

kü ola nung tenarong tenjangma.

2  Teronem ama kü sarasademba,

nikongdang tetepsetba tenla ama kü teka mekangba ne madangi atudakjangma.

3Oh, Kibuba, kü bang madak tanüker ka yujangma;

kü tebangmechi kishi nükangma.

4Nisungtem shirnoki tai inyaker,

parnok tamajung mapa nung matentsü

nai kü mulungjang tamajunglen teshidaktsüma,

aser kü nem parnok chiyungtsü tajung techidaktsüma.

5Temeshi nisungi temeim agi kü dak zükdakjang,

saka tamajunger totzü agibo kodanga kü kolak nung temezüdaktsü;

kechiyong kü sarasadem parnok mapa tamajung anema maneni lir.

6Kodang parnok o bendangtsü asoshi agütsüdir,

idangji parnoki Kibuba otem tajung lir ta metettsü.

7Lungrenbang nungi lung ajasa-a tsükba ama,

parnok teret Sheol bang nung prokshitsü.

8Saka kü tenük ne tsütsü lir,

Oh Kibuba Tsüngrem;

ne dak ni atsükoktsür;

ni tatsükokdak makai tetoktsüma.

9Ni asoshi sang soa aliba nungi;

aser tamajung inyaker lungnen nungi ni kümzüka yuangma.

10Ni jenbua aodang,

tamajung inyakerbo,

parnok pei sang nung pudakjangma.

TENÜNGSANG KEN 142

Dawid Ken: Teyari Asoshi Sarasademba

1 Kibuba dang kü ola agi ni ayimtener;

ni Kibuba dang kü ola agi mepishir.

2Ni pa madang temulung masüba sayur;

ni pa madang kü timtem ashir.

3Kodang kü nela lular,

nai kü lenmang meteter.

Ni jajatsü lenmang nung parnoki ni asoshi sang soa yutsür.

4Teka tajichi reprangang, aser ajiang;

saka ni meteter nisung shinga mali;

ni tejenokdak mali;

nisung shingai kü nela asoshi mebilemtsür.

5Ni ne dang ayimten, Oh Kibuba.

Ni ashi, “Na kü jenokdak.

Akümli nung na kü shilem lir.”

6Ni ayimtenba nung temulung tokangma;

kechiyong ni kanga ludakja lir.

Kü rishikangshirtem nungi ni kümzükang;

kechiyong kü dang nungi parnok tashi taitba lir.

7Ne tenüng nung ni tenüngsang agütsütettsüsa,

kü nela tepuokdak nungi anitetangma.

Temeshipuri ni meketbangtsü;

kechiyong nai kü den talubosa benshitsü.

TENÜNGSANG KEN 143

Dawid Ken: Teyari asoshi Sarasademba

1Kü sarasademba angang, Oh Kibuba;

kü temepishiba nung tenarong tenjangma.

Ne temulung lemtetba nung aser ne temeshiba nung kü dang langzüangma.

2  Ne tenzüker den o tebendangma;

Kechiyong ne tsüngdang taküm alir shinga memetentsü.

3Kechiyong tsükchiri kü nela arishir.

Pai kü taküm ali tonga alua azük.

Shirnok sür talangka liasü item amaji,

pai ni ammang nung lidaktsü.

4Aji asünung kü nela kü telunglen lular;

kü mulungjang telunglen shimaka lir.

5Alemli anogotem ni bilemteter;

nai inyakba ajak indang ni shisadanger.

6Ni kü teka ne dangi songtoker;

ali takong ama kü nelai na asoshi tzürar

(Selah)

7Kü dang langzütsü karangma,

Kibuba; Kü nela lular.

Kü madang nungi ne tejak temiimma;

aji mesüra shirnok kanglai alu

parnok mesüka ni akümtsü.

8Anepdang ne temeim yimlibilem kü nem angashidakjangma;

kechiyong ni ne dak amanger.

Kechi nung ni jajatsü tim kü nem metetdakjangma.

Kechiyong ni kü nela ne dangi ajungketer.

9Kü tsükchirtem nungi,

Oh Kibuba, ni kümzükangma.

Ne dak atsükoktsü ni ne dangi arur.

10Nai mulungba inyaktsü kü dang sayuangma,

kechiyong na kü Tsüngrem lir.

Ne tanela tajungi lenten lenmang nung ni anidakjangma.

11Ne tenüng atema,

Oh Kibuba, kü taküm kümzükangma.

Ne temeshiba agi kü nela timtem nungi anitetangma.

12Aser ne temeim yimlibilem agi kü tsükchirtem leptokadokangma,

aser kü nela timtemdaktsür ajak samadakjang.

Kechiyong ni ne tenzüker lir.

TENÜNGSANG KEN 144

Dawid Ken: Takok Asoshi Tenüngsang Agütsüba

1 Kibuba, kü lung, temoatsüba süang,

shibai rara asoshi kü teka,

aser raratsü kü temeyong sayuteter.

2Kü lung, aser kü mitsa,

kü tashi tait lungki aser kü tekümzüker,

kü jong, aser pa dak ni jenokdak bushir;

shibai nüburtem kübok ayutsü.

3  Kibuba, nai meimchir metetsüsa kechi lir?

Mesüra nai nisung chir züngshitsüsa kechi lir?

4Nisungji tangula ka dang mesüka lir;

pa anogotemji süia aoba akhüm ka mesüka lir.

5Oh Kibuba, ne anüngtem mokremang, aser alung;

tenemtem dak kongshiang, aser parnoki mokozü alongtsü.

6Tsüngpret yokang, aser parnok prokshidakjang;

ne lijakjang yokang, aser parnok lokshia odakjang.

7Temalen nungi ne teka songtokang;

Tzü tulu nungi,

Bendangertem ket nungi, ni sotang,

aser ni kümzükang.

8Parnok tebang agi amajok jembir,

aser shirnok teka tajichi tiyazü teka tajichi lir.

9Oh Tsüngrem, ni ne dang ken tasen ka tenyutsü.

Lisü ter aketba tzürang kongki manung

ni ne dang tenüngsang atentsü.

10Chubatem nem takok agütsübaji pa lir.

Pai pa tenzüker Dawid teyirutsü nok nungi kümzüker.

11Bendangertem ket nungi ni sotang,

aser ni kümzükang, parnok tebangi tiyazü jembir,

aser parnok teka tajichi tiyazü teka tajichi lir.

12Onok jabasotem parnok asangwa nung

süngdonglidong teyintet mesüka,

onok jalatem chuba ki yangertsü

kinük lung angentetba ama kümdakjangma.

13Süngjang tapu meyina rizüngtsüsa onok jen süngdakjang.

Onok san meyirijang aser meyi ter moapu nung adokdakjangma.

14Ozü shirurutem techanu merepdang memepushidaktsüi,

techanu agi reta kümdakjang.

Onok yimdong nung tejashiba ola telidaktsü!

15Iba ama temoatsü angurtem tepelatsü!

Koba nübur Tsüngrem Kibubaji lir,

tepelatsü!

TENÜNGSANG KEN 145

Dawid Ken: Tenüngsang Agütsüba Ken

1Ni na uludaktsütsü, kü Tsüngrem, aser Chuba.

Aser ni ne tenüng teti moatsütsü.

2Anogo shia ni na moatsütsü;

aser ni ne tenüng teti asangtsü.

3 Kibubaji tulu lir,

aser kanga asangtsüla,

aser pa ulubaji tatembang maka.

4Ne mapatem putu kati putu ka dang asangtsü,

aser ne mapa tulu metetdaktsütsü.

5Ne sentsüwangshi akhüm tulu ne tetushi indang,

aser ne tesüngmangtsü mapatem ni shisadangtsü.

6Aser nisungi ne tetsübutsü mapa inyakba tashi indang sayutettsü.

Aser na uluba ni metetdaktsütsü.

7Parnoki nai kanga ajungba nüngsang ayimoktsütsü,

aser ne temeshiba indang pelashishia atentsü.

8 Kibuba taochi aser temeim yimlibilem lir.

Ain adoktsü meilungi aser temeim yimlibilem tulu lir.

9 Kibubai ajak dang ajunger;

aser pa temeim yimlibilem, pa mapa ajak madak lir.

10Ne mapa ajaki ne nem tenüngsang agütsütsü, Oh Kibuba,

aser ne temeshipuri na moatsütsü.

11Parnoki ne yimli sentsüwangshi indang jembitsü,

aser ne ain indang jembitsü.

12Ne mapa tulu nisung chirtem dang metetdaktsütsü,

aser ne yimli akhüm tulu sentsüwangshi indang metetdaktsütsü.

13Ne yimli teti tatem maka chuba yimli lir,

aser ne yimsüsüba yimli putu ajak songtema lir.

Kibubai pa tenangzükba akanga ayur,

aser pa mapa ajak nung taochi lir.

14Shirnok laor,

Kibubai parnok ajak ajongmesor,

aser mechioker alir ajak atsümesor.

15Tenük ajaki ne madak ata-a alir,

aser mapang tetemsü nung nai parnok nem parnok chiyungtsü agütsür.

16Nai pei teka salar,

aser taküm aliba shiai jangraba nai tiptemdaktsür.

17 Kibuba pei lenmang ajak nung ochi lir,

aser pai mapa ajak nung aochir.

18Shiri Kibuba ajar parnok ajak dang pa anasa lir.

Atangji nung shibai ajar ajak dang anasa lir.

19Shirnoki pa tsübur parnoki jangraba pai ataloktsütsü;

pai ano parnoki ayimtenba angashitsü,

aser parnok kümzüktsü.

20Shirnoki pa meimer parnok ajak Kibubai wazüka ayur;

saka tamajunger ajak samatsütsü.

21Kü bangi Kibuba tenüngsang jembitsü;

aser shi ajaki pa temeshi tenüng teti tatem maka moatsütsü.

TENÜNGSANG KEN 146

Kümzüksang Tsüngrem Asangba

1Nenoki Kibuba sangang,

Kibuba sangang, o kü nela.

2Ni taküm ali tashi ni na asangtsü;

ni kü Tsüngrem dang ni taküm alidang tenüngsang ken atentsü.

3Tongtipur dak,

mesüra nisung chir shiba dak teyari mali,

pa dak nenoki temulung telem.

4Kodang pa tangula oadoker,

pa pei ali dangi meyiper.

Iba anogo nungjisa pa tebilembatem samar.

5Shiba pei teyari asoshi Yakob Tsüngrem lir,

shiba teimla Kibuba pa Tsüngrem dak lir, tepelatsü.

6  Shibai anüng aser ali yanglu,

tzüyim, aser item nung aliba ajak;

shibai atangji teti ayur.

7Shibai tajemreper nem ochiba agütsür;

shibai yaseta alir nem chiyungtsü agütsür.

Kibubai tepuokertem chioker;

8 Kibubai nükpoker tenük lapoktsür;

Shirnok mechioka ali parnok Kibubai mesor.

Kibubai temeshipur meimer.

9 Kibubai aenertem madak nüka alir;

pai tebu malir aser amitsür ajungketer;

saka tamajunger lenmang pai raksadaktsür.

10 Kibubai teti chubatsü,

Oh Zion, ne Tsüngrem, putu ajak songtema,

Nenoki Kibuba sangang.

TENÜNGSANG KEN 147

Ajak Takoksang Tsüngrem Asangba

1Nenoki Kibuba sangang;

kechiyong asen Tsüngrem dang tenüngsang ken atentsü junger.

Kechiyong pa yimlibilem lir aser tenüngsang ken atentsü tapet lir.

2 Kibubai Yirusalem mesoa yanglur;

pai sentoka aliba Israel anitener.

3Pai temulungjang teraksa anebtsür,

aser parnok zübu alentsür.

4Pai petinu yongsük sükdanger;

pai parnok ajak nem tenüng agütsür.

5Asen Kibuba tulu lir,

aser ain nung tashi tulu lir.

Pa tangatetba tatembang maka.

6 Kibubai tajemreper ajungketer.

Pai tamajunger ali leni aludaktsür.

7 Kibuba dang tenüngsang agüja ken tenang.

Kongki agi asen Tsüngrem dang ken tenang.

8Shibai anüng mepet agi nembangtsür,

shibai alima asoshi tzünglu renemtsür,

shibai tenem manung ai meidaktsür.

9Pai shiruru nem pei chiyungtsü agütsür,

aser waro chanutem nem asadang chiyungtsü agütsür.

10Kor tashi nung pa mulung mepelar;

nisung tetsüng nung pa mulung mepelar.

11 Kibubai pa tsüngken tsüburtem dak,

pa temeim yimlibilem nung teimla akartem dak temulung pelar.

12 Kibuba sangang, Oh Yirusalem.

Ne Tsüngrem sangang, Oh Zion.

13Kechiyong pai ne süngkhüm tartangtsü tashi itdaktsü;

pai ne chirtem ne dak moatsür.

14Ne litsü nung pai yimjung yanglur;

pai na tsük tesola tajungtiba agi süngdaktsür.

15Alima madak pai temelaba yoker;

pa o kanga kara-a aor.

16Tezüng ama pai rürjeb agütsür;

aut ama pai aon prokshidaktsür.

17Amtsük telong ama pai rürjeb lung tsükdaktsür.

Shibai pa temokong madang noktaktettsü?

18Pai ozüng agütsür aser parnok yimsadaktsür;

Pai pa mopung ondaktsür, aser tzü yimsadaktsür.

19Pai pei o Yakob dang,

Aser pa telatet ozüng aser pa o bendang Israel dang sayur.

20Kin kecha dang pai yamaji meinyak;

Aser pa obendangba indang,

parnoki itemji memetet.

Nenoki Kibuba sangang!

TENÜNGSANG KEN 148

Teyangluba Ajaki Pa Asangtsü Ajaba

1Nenoki Kibuba sangang!

Anüngtem nungi nenoki Kibuba sangang,

temalen pa tenüng sangang.

2Nenoki pa sangang, pa tenyar ajak;

nenoki pa sangang, pa temeranger telok ajak.

3Anü aser ita, nenoki pa sangang.

Pa sangang, nenok prangshiba petinutem.

4Pa sangang, nenok anüngtem madak anüng,

aser anüngtem madak aliba tzü.

5Parnoki Kibuba tenüng sangdakjang,

kechiyong pai mela, aser parnok poktet.

6Pai ano parnok teti asoshi yanglu.

Pai ozüng ka yanglu koba süitema maotsü.

7Alima nungi Kibuba sangang,

nenok tzüyim shiruru, aser tarok ajak.

8Mi, rü, rürjeb aser tzü tangula;

yipru mopung, pa o atalokdakja sangang.

9Tenem aser ungsem ajaki;

tatangba süngdongtem aser cedar süngdong ajak;

10Shiruru aser kiset shiruru,

ayazüba ozüsangnutem!

11Alima chubatem aser nisung ajak;

tongtipur aser alima obendanger ajak.

12Asangur aser aiürtem anaprongla;

tambur aser tantsürtem.

13Parnok nem Kibuba sangdakjang.

Kechiyong pa tenüng kisüng ulua lir.

Pa sentsüwangshi alima aser anüng temalen lir.

14Pai pei nübur tezü ajungketa lir.

Tenüngsangji pa temeshi pur ajak asoshi lir;

oda Israel chirtem, pa anasa aliba nübur.

Nenoki Kibuba sangang!

TENÜNGSANG KEN 149

Tenüngsang Agütsüba Ken

1Nenoki Kibuba sangang!

Kibuba dang ken tasen ka tenang,

aser temeshipur sentepdak pa nüngsang tenang.

2Israeli pei Teyanglusang dak pela-a lidakjang;

Zion chirtem parnok chuba dak pela-a liang.

3Tsüngsangba agi parnoki pa tenüng sangdakjang;

parnoki pa dang asüm aser tzürang kongki agi tenüngsang tendakjang.

4Kechiyong Kibubai pei nübur dak pelar;

pai ajemalur takok agi tobur jungdaktsütsü.

5Temeshipuri sentsüwangshi nung pelatepang;

parnoki tepela agi parnok yipten manung ken tendakjang.

6Parnok bang nung Tsüngrem nüngsang tulu lidakjang,

aser anatsü nok parnok ket nung lidakjang.

7Kintem madak mang ayangtsü,

aser nisungtem madak temerenshi

inyakdaktsütsü asoshi,

8Parnok chubatem yinzü agi alentsü,

parnok tamarenertem merang yinzü agi alentsü.

9Parnok madak obendang zülua aliba inyaktsü.

Iba sentsüwangshi pa temeshipur ajak asoshi lir,

nenoki Kibuba sangang.

TENÜNGSANG KEN 150

Kibuba Sangang

1Nenoki Kibuba sangang.

Pa temeshidak Tsüngrem sangang.

Anüng ali tsüngda nung pa ain asoshi tenüng sangang.

2Pa tashi tulu mapa asoshi pa sangang;

pa kanga uluba asoshi pa sangang.

3Jangzü ola agi pa sangang;

tzürang kongki aser tawaba kongki agi pa sangang.

4Asüm atemba aser tsüngsangba agi pa sangang;

lisü aser jemji agi pa sangang.

5Laya kongki tatsüng agi pa sangang;

laya kongki tsüktepba ola tesashi agi pa sangang.

6Tangula aliba kechisarena agi pa sangang.