TAZÜNGKUNEM

TAZÜNGKUNEM

OKILA

"Tazüngkunem" tetezü "Tanabuba Ozüng." Yihuda nunger shiri Grik oshi jembi, parnok asoshi Tejen Lai Grik oshi nung meyipzüka amshia, ibaji Latin Laishiba nung "Deutronomium" aser English Laishiba nung Deutronomy ta meyipzüka amshiba lir.

TAZÜNGKUNEM kaket nung Mosai tekümdangtsü O koba Moab lenten nung Israel chirtem dang ashi, itemji tatongi zülu a angutsü: Ya parnok arem nung küm lir tashi nemzür tatemsa Kanan limai aitsü mapang nung atalok.

Tongtibang tatalokbatem rongnung item indang kaket nungji zülua angutsü:

(1) Küm lir tiashi patnok nemzüba indang Mosai lepshiba: Parnok arem nung nemzüba mapang Tsüngremi koma anebalua anir aru aji bilemtettsü aser pa dang tashi angatsü aser tsüngchir süa alitsü indang ashiba.

(2) Mosai ozüng ter, meyipa reprangshiba aser mezüngbuba Ozüng tetezü rateta shia nüburtemi KIBUBA dangbendanga agüja tenzüktsü ashiba. Ano iba den tenangzükba lima nung parnok arakmoka ayutsü asoshi ozüngtem yanglushiba.

(3) Tsüngremer tezüngzüktepba parnok den atenba indang Mosai ratettsüba, aser parnok iba nungi mepilai alitsü ashiba,

(4) Tsüngrem nüburtem lenitsü Yihusua shimtetba. Tsüngremer tamang katetba indang Mosai tenüngsang ken atenba. Israel nunger kin shia moatsüba aser Yordan anüdoklen Moab-lima nung Mosa Asüba,

Kaket nükjidongji: Tsüngremi pai meimba aser shimtetba nübur moatsüba aser pa nüburtemi pa meimtsü aser tashi angatsü anungji parnok maneni iba temoatsü manung alitsü.

Kaket temulung tekongji 6:4-6, koba indang Yisui ozüng rongnung tazüngba ta ashi "KIBUBA ne Tsüngrem tie mulung ajak agi, ne tanela ajak agi, aser ne tashi ajak agi meimang" ta ashi, ibaji asütsü.

Keta Alibatem

Mosai-Israel Nüburtem Den Mezüng Jembiba 1:1-4:49

Mosai Israel Nübur Den Tanabenbuba Jembiba 5:1-26:19

(a) Ozüng Ter 5:1-10:22

(b) Tekümdangtsüu Ozüng Otem 11:1-26:19

Kanan Limai Aitsü Indang Tesayuba 27:1-28:68

Tezüngzüktepba akangshiba 29:1-30:20

Mosa Tatembang Otem 31:1-33:29

Mosa Asüba 34:1-12

        Keta Alibatem

Mosai-Israel Nüburtem Den Mezüng Jembiba TAZÜNGKÜNEM 1:1-4:49

Mosai Tanishirtem Shimba TAZÜNGKÜNEM 1:9-18 (Ani. 18:13-27)

Itdangitertem Yokba TAZÜNGKÜNEM 1:19-27 (Zun.13:1-33)

KIBUBA Anema Apusoba TAZÜNGKÜNEM 1:28-33

KIBUBAi Israel Nunger Merenshiba TAZÜNGKÜNEM 1:34-2:12 (Zun.14:20-43)

Zered Ayong Ajangba TAZÜNGKÜNEM 2:13-25

Sihon madak takok anguba TAZÜNGKÜNEM 2:26-3:11 (Zun.21:21-30)

Yordan Anüdoklen Alirtem TAZÜNGKÜNEM 3:12-22 (Zun.32:1-42)

Kanan Limai Mosa Aitsü Memelaba TAZÜNGKÜNEM 3:23-4:14

Süngyanglu Anema Tekümdangtsü TAZÜNGKÜNEM 4:15-31

KIBUBAji Tsüngrem Lir TAZÜNGKÜNEM 4:32-40

Jenokdak Yimtitem TAZÜNGKÜNEM 4:41-43

Ozüng Agütsüba Okila TAZÜNGKÜNEM 4:44-49

Mosai Israel Nübur Den Tanaben buba Jembiba TAZÜNGKÜNEM 5:1-26:19

(a) Ozüng Ter TAZÜNGKÜNEM 5:1-10:22

Nüburtem Tetsübuba TAZÜNGKÜNEM 5:23-6:9 (Ani.20:18-21)

Tashi Mangaba Anema Tekümdangtsü TAZÜNGKÜNEM 5:10-25

KIBUBAr Nüburtem TAZÜNGKÜNEM 7:1-11 (Ani.34:11-16)

Tashi Angaba Temoatsütem TAZÜNGKÜNEM 7:12-8:10 (Taz.28:1-14)

KIBUBA Amadokba Anema Tekümdangtsü TAZÜNGKÜNEM 8:11-20

Nüburtem Tashi Mangaba TAZÜNGKÜNEM 9:1-29

Mosai Tanabenbuba Ozüng Agizükba TAZÜNGKÜNEM 10:1-11 (Ani.34:1-10)

Tsüngremi Kechi Akanger TAZÜNGKÜNEM 10:12-22

(b) Tekümdangtsü Ozüng Otem TAZÜNGKÜNEM 11:1-26:19

KIBUBA Dang Meimang Aser Tashi Angang TAZÜNGKÜNEM 11:1-7

Tenangzükba Lima Temoatsütem TAZÜNGKÜNEM 11:8-32

Tekülemdak Tesem Ka TAZÜNGKÜNEM 12:1-28

Süngyanglu Anema Tekümdangtsü TAZÜNGKÜNEM 12:29-13:18

Temerük Aser Memerük Shirurutem TAZÜNGKÜNEM 14:1-21 (Lev.11:1-47)

Ter Shilem Ozüng TAZÜNGKÜNEM 14:22-29

Techiokba Küm TAZÜNGKÜNEM 15:1-11 (Lev.25:1-7)

Alar Chiokba TAZÜNGKÜNEM 15:12-18 (Ani.21:1-11)

Mezüng Mepuba Nashi Aser San TAZÜNGKÜNEM 15:19-23

Süia Aoba Benjong TAZÜNGKÜNEM 16:1-8 (Ani.12:1-20)

Hapta Benjong TAZÜNGKÜNEM 16:9-12 (Ani.34:22; Lev.23:15-21)

Sempak Benjong TAZÜNGKÜNEM 16:13-17:7 (Lev.23:33-43)

Obendangdak TAZÜNGKÜNEM 17:8-13

Chuba Atema TAZÜNGKÜNEM 17:14-20

Putirtem Shilem TAZÜNGKUNEM 18:1-8

Jenokdak Yimtitem TAZÜNGKÜNEM 19:1-13 (Zün.35:9-28; Yih.20:1-19)

Tejen Artsü TAZÜNGKÜNEM 19:14

Kuli Agütsüba TAZÜNGKÜNEM 19:15-21

Tongpang Rara TAZÜNGKÜNEM 20:1-20

Nisung Züksetba Atema Tenla TAZÜNGKÜNEM 21:1-9

Tepuoker Tetsür Agiba TAZÜNGKÜNEM 21:10-14

Mezüng Jabaso Senmang TAZÜNGKÜNEM 21:15-17

Tashi Mangaba Jabaso TAZÜNGKÜNEM 21:18-21

Ozüng Tapu Balala TAZÜNGKÜNEM 21:22-22:3

Laoa Aliba Shiruru Yariba TAZÜNGKÜNEM 22:4

Tetsür Tebur Tereprangtsü Tepila TAZÜNGKÜNEM 22:5

Ozü Tetsüti Kümzükba TAZÜNGKÜNEM 22:6-12

Tasüngtet Kiyimla TAZÜNGKÜNEM 22:13-21

Nüktapangtaba TAZÜNGKÜNEM 22:22

Ani-asünga Aliba Den Nüktapangtaba TAZÜNGKÜNEM 22:23-27

Tasüngtet Aiür Den Medemba TAZÜNGKÜNEM 22:28-30

KIBUBAr Sentep Nungi Jentokba TAZÜNGKÜNEM 23:1-14

Ozüng Tapu Balala TAZÜNGKÜNEM 23:15-16

Nüktapangta TAZÜNGKÜNEM 23:17-18

Tetemlok Agiba TAZÜNGKÜNEM 23:19-20

Tatemzükba TAZÜNGKÜNEM 23:21-25

Palaba TAZÜNGKÜNEM 24:1-4

Ozüng Tapu Balala TAZÜNGKÜNEM 24:5-7

Zütsüra TAZÜNGKÜNEM 24:8-9

Oset Aputepba TAZÜNGKÜNEM 24:10-16

Aener, Lajar Aser Amitsür TAZÜNGKÜNEM 24:17-25:10

Tim Masüba Mapa TAZÜNGKÜNEM 25:11-12

Chichiba Touzükba TAZÜNGKÜNEM 25:13-16

Amalek Samatsütsü Ashiba TAZÜNGKÜNEM 25:17-19

Mezüngbuba Süngjang Tenla TAZÜNGKÜNEM 26:1-11

Kümsembuba Ter Shilem Tenla TAZÜNGKÜNEM 26:12-15

Tsüngremi Israel Den Tezüngzüktepba Yangluba TAZÜNGKÜNEM 26:16-19

Kanan Limai Aitsü Indang Tesayuba TAZÜNGKÜNEM 27:1-28:68

Tsüngremer Ozüng Lung Nung Züluba TAZÜNGKÜNEM 27:1-10

Temoatsü Aser Atakatem TAZÜNGKÜNEM 27:11-26

Tashi Angaba Temoatsütem TAZÜNGKÜNEM 28:1-14 (Lev.26:3-13; Taz.7:12-24)

Tashi Mangaba Temerenshi TAZÜNGKÜNEM 28:15-68 (Lev.26:14-46)

Tezüngzüktepba akangshiba TAZÜNGKÜNEM 29:1-30:20

Moab Nung Tezüngzüktepba Yangluba TAZÜNGKÜNEM 29:1-29

KIBUBA Dangi Meyipa Aruba Temoatsü TAZÜNGKÜNEM 30:1-14

Taküm Mesüra Tasü Shimba TAZÜNGKÜNEM 30:15-20

Mosa Tatembang Otem  TAZÜNGKÜNEM 31:1-33:29

Yihusuai Mosa Melenba TAZÜNGKÜNEM 31:1-8

Nübur Dang Ozüng Azüngba TAZÜNGKÜNEM 31:9-13

KIBUBAi Tatembangba Temelaba Mosa Nem Agütsüba TAZÜNGKÜNEM 31:14-29

Mosa Ken TAZÜNGKÜNEM 31:30-32:44

Mosai Tatembangba O Jembiba TAZÜNGKÜNEM 32:45-47

Mosa Nebo Tenem Asütsü Ashiba TAZÜNGKÜNEM 32:48-52

Mosai Israel Nüburtem Moatsüba TAZÜNGKÜNEM 33:1-5

Reuben Moatsüba TAZÜNGKÜNEM 33:6

Yihuda Moatsüba TAZÜNGKÜNEM 33:7

Levi Moatsüba TAZÜNGKÜNEM 33:8-11

Benjamin Moatsüba TAZÜNGKÜNEM 33:12

Yosef Moatsüba TAZÜNGKÜNEM 33:13

Zebulun Aser Ussakar Moatsüba TAZÜNGKÜNEM 33:18-19

Gad Moatsüba TAZÜNGKÜNEM 33:20-21

Dan Moatsüba TAZÜNGKÜNEM 33:22

Naftali Moatsüba TAZÜNGKÜNEM 33:23

Asher Moatsüba TAZÜNGKÜNEM 33:24-25

Tazüngkunem O TAZÜNGKÜNEM 33:26-29

Mosa Asüba TAZÜNGKÜNEM 34:1-12

Mosa Asüba TAZÜNGKÜNEM 34:1-12

TAZÜNGKUNEM 1

1Yordan anüdoklen arem Suf tejaklen Araba nung Paran aser Tofel tsüngda Laban Hezerot aser Dizahab nung Israel chir ajak dang Mosai jembiba o itemi lir. 2Horeb nungi Seir tenem lenmang kadesh-Barneai aobaji anogo terkanü lenmang lir. 3Küm lirbuba ita terkabuba mezüng anogo nung Israel nunger asoshi Kibubai pa dang melaba ajak Mosai jembi. 4 Ya Heshbon nung aliba Amor chuba Sihon, Bashan chuba Og shiba Ashtarot aser Edrei nung liasü, pai parnok koker külen liasü. 5Yordan anüdoklen Moab lima nung Mosai iba ozüng ya rasa-a ashi.

6“Kibuba asen Tsüngremi Horeb nung asenok dang ya ashi, ‘Nenok iba tenem nung lishia liogo. 7Aramesoang aser Amor nunger tenem linüki aser Araba ali wabetsa aser iba meketa aliba tenem linüktem, Negeb aser tzüyimküm, Kanan nunger linük aser Lebanon aser ayong tulu Eufrata ayong tashi oang. 8Ajiang ni nenok jakdang alinükji yutsüogo, Kibubai nenok tsürabur Abraham, Isak aser Yakob nem agütsütsü züngzüktepba lima jagi iang aser agiang.”

Mosai Tanishirtem Shimba

(Ani. 18.13-27)

9Iba mapang ni nenok dang shiogo, “Ni kü kijai nenok khu abentsü makok. 10Kibuba nenok Tsüngremi nenok kanga rendaktsüogo, aser tanü nenok anüng petinutem ama lir. 11Kibuba nenok tsüraburtem Tsüngremi nangzükba ama nenok meyirijangben agi tali rendakjang aser moajangma! 12Saka koda sür nenok tebilemtsütem khuret aser nenok tsüngda mangatettep ajak kü kijai abentsü? 13Nenok kidong shia nungi shisa akaba tangatetba akaba aser ajaki akhümtsübuba nisung kar shimtetang, aser ni nenok madak parnok tanishir kümdaktsüdi. 14Aser nenoki kü dang langzüogo, nai ashibaji onok asoshi junger. 15Anungji ni nenok kidong shia nungi tanishirtem shisa taka aser ajaki akhüm tsübua aliba nisungtem shimteta nenok meyirijang noklang, tenem aser ter madak tanishirtem yutsüogo. 16Idangji nenok obendangertem dang ni shiogo, ‘Nenok adianutem tsüngda nung o angang aser nisung kati pei adianu den süshia mesüra pa den aliba bendanger kar den süshia ochi shia o bendangang. 17O bendang kecha nunga tejak tereprang, tulu aser tila ajak dang kasa angang. Nenoki nisung shinga tetsübu kechiaser o bendangbaji Tsüngrem meyong lir. Nenok asoshi o tasakji kü dangi bener arung aser ni aji angatsü. 18Iba mapang nung nenoki kechisa inyaktsü item ajak indang ni nenok dang shiogo.

Itdangitertem Yokba

(Zün. 13.1-33)

19“Idangji Kibuba asen Tsüngremi melaba ama, asenoki Horeb nungi apusoa asenoki anguba tetsübutsü arem tuluji ajanga Amor nunger tenem limaleni oa asenok kadesh-barnea atong. 20Aser ni nenok dang ashi, Kibuba asen Tsüngremi agütsüba Amor nunger limai nenok aruogo. 21Ajiang Kibuba ne Tsüngremi alinükji ne jakdang yutsüogo. Kibuba nenok tsüraburtem Tsüngremi ashiba ama tuang aser alinükji agiang. Tetsübu, mesüra tasü maiti teli. 22 Saka nenok kü dangi arua ashi, asenok asoshi linükji lemdangtsü aser asenok koba lenmangi aotsü aser koba yimtitemi asenok arutsü; iba osang asenok dangi abentsü asen jakdang asenoki nisung yokdi. 23 Ibaji kü nükdanga junga bilem nung ni nenok nisung terana kin shia nungi ka ka shimtet. 24Parnoki tenem linük leni atu aser Eskol lenteni arua aji ladang. 25Linük nung atangba süngjang kar parnoki amer asenok dangi osang bener arua ashi, Kibuba asen Tsüngremi agütsüba limaji kanga tajung lir.

Kibuba Anema Apusoba

26  “Saka nenoki ajagi metuli asü, aser Kibuba nenok Tsüngremi melaba anema apuso; 27aser nenoki nenok süki nung nemnemtepa ashi, ‘Kechiaser KIBUBAi asenok aniteta Amor nunger ket nung samatsütsü anir aru. 28Asenok kongi aotsü? Asen adianutemi asen mulung zürepdakja ashi; nisungtemji asen dang nungi tuluba aser talangba, yimtitemji kanga tulu aser anüng tashi atsübanga lir, aser yangji aso tulu Anakim chirtem onoki angu.

29“Idangji ni nenok dang shiogo, ‘Taoksa mesüra parnok tsübua teli. 30Kibuba nenok Tsüngrem shiba nenok jakdang aor, pai Ijip nung nenoki ngua inyakba amato, nenok asoshi raratsü, 31 aser arem nung tebui pei jabaso apungba ama nenoki iba tesem ya matong tashi Kibuba nenok Tsüngremi nenok lenmang tepiyong anir aruogo.’ 32Ni nenok dang yamaji shiaka nenoki Kibuba nenok Tsüngrem dak mamang, 33shibai nenok süki yangludak bushitsü aser nenok aotsüba lenmang sayutsü asoshi aonung mi nung aser anüngdang mepet nung nenok jakdang ao.

Kibubai Israel Nunger Merenshiba

(Zün. 14.20-45)

34 “Kodang Kibubai nenok otem angashi, pai ain adoka azüngashia ashi, 35‘Iba tamajung putu nisung katia alinük tajung koba nenok tsüraburtem nem ni agütsütsü nangzük, aji mangutsü. 36Saka Yefune jabaso Kalebi dang aji angutsü, aser pa aser par chirtem nem pa tetsüng ajemokdak limaji agütsütsü; kechiaser pai bendanga Kibuba sülen anidak.’ 37Ano nenok meji Kibubai kü dang ain adoka ashi, na-a ajagi maitsü. 38Saka ne teyarir Nun jabaso Yihusua ajagi aitsü, pa ajungshiang kechiaser pai Israel nem aji amangdaktsütsü. 39Ano nenok tila tanurtem shir tetepsettsü asoshi alitsü ta nenoki shiogo, nenok chir shiri tanü tajung tamajung memetet, parnok ajagi aitsü. Parnok nem ni aji agütsütsü aser parnoki aji agitsü. 40Saka nenokbo meyipang aser temerem tzüyim len arem lenmang jagi iang. 41Idangji nenoki kü dang langzü, onoki Kibuba anema tai menaogo, Kibuba asen Tsüngremi melaba ama onoki tudi aser raradi. Anungji nenok nisung shiai tenem len jagi atutsübaji temela ta bilema pei nok o nü renem.

42“Saka Kibubai kü dang ashi, ‘parnok dang shiang, nenoki raratsü asoshi tetu, kechiaser ni nenok den maten. Nenok tsükchirtemi nenok akoktsü.’ 43Anungji ni nenok dang yamaji ashi, saka nenoki manga. Nenoki Kibubai melaba anema apuso aser pei tiyaksanga tenem leni atu. 44Idangji tenem nung aliba Amor nungertemi nenok anema arua ninang arishir ama nenok aridok, aser Seir nungi Horam tashi makdok. 45Idangji nenoki meyip aser Kibuba madang ajeb; saka Kibubai nenok ola mangashi mesüra nenok tsütsü pa tenarong magütsü. 46Anungji nenok kadesh nung amung aser mapang talangka yangji ali.

TAZÜNGKUNEM 2

1  “Ajiser Kibubai kü dang ashiba ama temerem tzüyim tsütsü aremi asenok meyipa mapang talangka Seir tenem meketa senzü.

2“Idangji Kibubai kü dang ashi, 3‘Nenoki iba tenem meketa jajashia jajaogo; anüdoklentip leni meyipang. 4 Nüburtem dang mela-ang, Seir nung aliba nenok adianu Esau chirtem arrtsü atena aotsü tatonger lir, parnoki nenok tsübutsü. Anungji kanga kümdangang; 5Parnok den terara, kechiaser parnok li nungi ni nenok tetsüng ajemetdak kata magütsütsü, kechiyong Seir tenemji ni Esau nem senmang asoshi agütsüogo. 6Nenoki parnok nungi sen agi tachitsü aser tajemtsü tzü alitsü.’

7“Kechiaser Kibuba nenok Tsüngremi nenok teka mapa ajak moatsüogo. Iba arem tulu ajanga nenok senzüba ajak nung pai nenok nüka liasü. Item küm lir tashi Kibuba nenok Tsüngrem nenok den liasü, aser nenok kecha agia anünga maliasü.

8“Anungji Seir nung aliba asen adianu Esau chirtem ajanga asenok Seir Elat aser Ezion Geber nungi asenok Araba lenmangi asenok meyipa aser Moab arem len ajanga ao. 9 Idangji Kibubai kü dang ashi, ‘Moab den tanem mesüra rara temena, kechiaser ni parnok li nenok nem senmang kecha magütsütsü. Ni aji Lot chirtem nem senmang asoshi Ar agütsüogo.’ ”

10Mezüngbo idakji Anak nisungtem ama Emim nisung telok tuluka, nütsüng aika yangji liasü. 11Anak nisungtem dang ama parnok dang Refaim ta aja, saka Moab nungeri parnok dang Emim ta aja. 12Seir nung tamasabo Hor nunger liasü, saka Esau chirtemi parnokji atsüngdok, aser parnok jakdang itemji samatsür parnok idakji ali; oda Kibubai agütsüba alinük nung Israeli inyakba ama.

Zered Ayong Ajangba

13“Tang aramesoang aser Zered ayongji ajanga oang, aser asenoki Zered ayongji ajang. 14 Asenoki kadesh-Barnea nungi apusor Zered ayong ajangba tashi nung küm semer-ti süiogo. Kibubai azüngashiba ama iba mapang tashi nung parnok putu rarai aortem ajak tanendak sama. 15Talisa parnok ajakji meshimeshia mesamatsü tashi par tanendak anema Kibuba teka liasü.

16“Anungji nübur rongnungi rarai aor ajak samadaktsür külen 17Kibubai kü dang ashi, 18 ‘Tanü nenoki Moab arrtsü Ar ajangtsü. 19Kodang Ammon nunger arrtsü anasai nenok arudir, parnok tanem mesüra rara temena, kechiaser Ammon nunger li nungi nenok nem ni senmang kecha magütsütsü. Ni aji Lot chirtem nem senmang asoshi agütsüogo.’ ”

20Iba dang ano Refaim linük ta jaa liasü, kechiaser akhidangbo Refaim nunger yangji liasü, saka Ammon nungeri parnok dang Zamzummim ta aja. 21Parnokjia Anak nübur ama tashi tait aso talang nütsüng aika liasü, saka Kibubai parnok jakdang itemji samatsü. Aser parnoki itemji atsüngdoker par alidak ali. 22Seir nung alirtem Hor nunger dak Esau chirtem jakdang Kibubai inyakba ama pai parnokji aridoker idakji tanü tashi parnok lidaktsü. 23Aser Avim nunger Gaza yimtsüng tashi aliba Kaftor nungi arurtem Kaftor nungertemi parnok samatsü aser parnok alidak ali.

24“Aramesoang, aser Arnon lenten ajanga oang. Ajiang, Amor nunger Heshbon chuba Sihon aser par linük ni nenok ket nung agütsüogo; par linükji amaktsü tenzükang aser pa tongbangi jazükang. 25Tanü nungi tenzüka anüng kübok alir nisung ajak dangi nenok indang taoksatsü aser tetsübutsü enloktsütsü. Kodang parnoki nenok indang osang angashidir, atententsü aser nenok meji temulung ayanga alitsü.

Sihon madak takok anguba

(Zün. 21.21-30)

26“Anungji Kedemot lisem lima nungi osangbenertem Heshbon chuba Sihon dangi yimjung bener yoka ashi, 27‘ni ne lenmang ajanga odakjang. Ni lenmang nungji dang aotsü. Ni tajichilen mesüra tabeleni memeyiptsü. 28Nai kü dang sen yong chiyungtsü ayoktsü aser ni itemji achitsü, aser nai kü dang tajemtsü asoshi tzü sen yong ayoktsü aser ni aji ajemtsü, oda ni dang ne arrtsü ajanga tetsüng agi jaja-a odakjang. 29Kibuba onok Tsüngremi onok nem agütsüba alinüki Yordan ajanga onok mao tashi Seir nung aliba Esau semchirtemi, aser Ar nung aliba Moab nungertemi onok dang inyakba ama.’

30“Saka Hesbon chuba Sihoni pa alinük ajanga asenok mesüidaktsü. Kechiaser Kibuba nenok Tsüngremi pa tekong merangdaktsü aser anema noktakdaktsü, oda tanü nenok ket nung pa bendanga agütsüba ama, oda pai tang inyakba ama.

31“Idangji Kibubai kü dang ashi, ‘Ajiang, Sihon par linük ni ne nem agütsütsü tenzükogo. Par limaji amangtsü asoshi aji agitsü tenzükang.’ 32Kodang Sihon aser pa nüburtem ajak asenok anema noktak, Yahaz nung tongbangi adok, 33Kibuba asenok Tsüngremi asenok nem pa bendanga agütsü; aser asenoki pa, par jabasotem aser pa nübur ajak tepset. 34Iba mapang nung asenoki pa yimti ajak agi, aser shinga taküm metoktsüi tebur, tetsür aser tanur ajak meshi meshia tepset. 35Saka asenoki maktetba yimtitem nungi taküm shirurutem aser temakzükba oset ajak asenoki agi. 36Arnon lenten tatem nung aliba Aroer nungi lenten nung aliba yimti, oda Gilead tashi asenok asoshi yimti ka danga tashi ita maliasü. Kibuba asen Tsüngremi item ajak asenok nem agütsü. 37Saka Kibuba asen Tsüngremi memela nung nenoki Ammon nunger linük anasa mesüra Yabbok ayong tsütsü mesüra tenem linük anasai maru.

TAZÜNGKUNEM 3

1“Ajiser asenoki aenshia Bashan leni atu, aser Bashan chuba Og pa nübur ajak anir asenok anema Endrei nung tongbangi adok. 2Saka Kibubai kü dang ashi, ‘Pa tetsübu, kechiaser pa den pa nüburtem ajak aser pa linük ajak ni ne nem agütsüogo. Amor nunger chuba Heshbon nung yimsüsüsang Sihon dang inyakba ama nai pa dang inyaktsü.’

3“Anungji Kibuba asen Tsüngremi Bashan chuba Og aser pa nüburtem ajak asenok ket nung agütsü, aser asenoki parnok ka danga anünga meyutsüi akok. 4Iba mapang nungjisa asenoki par yimti ajak agi, asenoki magiba yimti ka danga maliasü. Bashan chuba Og-i yimsü asüba Argob linük yimti roker asenoki maktet. 5Item yimtitemji jara talang agi atsübanger süngkhüm aser süngkhümrütsü agi atsübanga liasü, aser ano yimtsüng aika jara agi matsübangi liasü.

6“Heshbon chuba Sihon dang asenoki inyakba ama yimti ajak, tetsür tebur aser tanur ajak asenoki meshi meshia samatsü. 7Saka kiset shirurutem aser temakzükba osettem asenoki bener aru

8“Anungji iba mapang nungji item Amor nunger chuba ana nungi Yordan anüdoklen Arnon lenten nungi Hermon tenem tashi asenoki linükji agi. 9“Hermon dang Sidon nungeri Sirion aser Amor nungeri Senir ta ajar.” 10Lenten nung aliba yimti ajak, Gilead ajak, aser Bashan ajak Saleka aser Edrei tashi Bashan nung Og yimli yimti ajak asenoki agi. 11Saka Bashan chuba Og dang Refaim nunger tanüngba rongnungji dena liasü. Pa yiptenji merang agi yanglua aser aji metong nung süklep tuku aser lenten nung süklep pezü liasü. Aji Amon nunger yimti Rabha nung melikama?

Yordan Anüdoklen Alirtem

(Zün. 32.1-42)

12“Item linük koba asenoki agi, Arnon lenten anüdoklentip Aroer nung Gilead tenem lima tesadang ka, aser item yimtitem Reuben aser Gad chirtem nem ni agütsü. 13Gilead tanüngba aser Bashan nung Og yimli ajak Manase kidong nem ni agütsü.” Bashan nung Argob tokong ajak dang Refaim linük ta ajar. 14Manase jabaso Yani Argob tokong ajak Geshur aser Makat arrtsü tashi agi, aser item yimtitem dang pa nüngkem tenüng agi, anungji tanü tashi Bashan dang Havvoth-Jair ta ajar. 15“Aser ni Makir nem Gilead agütsü. 16Saka Reuben aser Gad kidong nem Gilead nungi Arnon ayong tashi, lenten tepiyong aser iba arrtsü, Amon nunger arrtsü, aser Yabbok ayong tashi ni agütsü.

17“Anüolen arrtsü Araba tsütsü Yordan ayong, Kineret nungi anüdoklen tsütsü Pisga tenem tsüng metsü tzüyim tashi liasü.

18  “Iba mapang nung ni nenok dang mela-a ashi, ‘Kibuba nenok Tsüngremi iba lima nenok meyong asütsü agütsüogo. Saka nenok tasü taiter ajak nok o nü bener ne adianu Israel jakdang aotsüla. 19Sakasa nenok kinungtsürtem, nenok chirtem aser nenok kiset shirurutem, kechiaser nenok kiset shirurutem jenti ta ni metet; parnokbo ni nenok nem agütsüba yimtitem nung alitsü, 20oda nenok nem ama Kibubai ne adianutem nem anisüngzük magütsü tashi, aser Kibuba nenok Tsüngremi parnok nem agütsüba lima Yordan ajanger aliba limaji parnoki magi tashi. Iba sülenjiang nenok ajak nem ni agütsüba dangi nenok nisung shia meyiptsü.’

21“Iba mapang nung ni Yihusua dang mela a ashi, ‘Item chuba ana dang Kibuba nenok Tsüngremi inyakba ajak ne nüki nguogo, yamaji nai ni ajanga aotsüba yimli ajak dang Kibubai inyaktsü. 22Parnok tsübua teli, Kibuba nenok Tsüngremi nenok asoshi raratsü.’

Kanan Limai Mosa Aitsü Memelaba

23  “Iba mapang nungji ni Kibuba dang mepishia ashi, 24‘Oh Kibuba Tsüngrem, nai ne tenzüker dang na uluba aser ne tashi tulu sayutsü tenzükogo, kechiaser anüng nung mesüra alima nung tsüngrem shibai nai inyakba ama mapa tulu inyaktettsü? 25Ni ne dang mepishir, Yordan ajanga or alima tajung aser Lebanon reprangtsü ni odakjangma.’

26“Saka nenok meji nung Kibubai kü dang ain adok aser kü danga manga. Saka Kibubai ashi, ‘Ojang sang, iba indang kü dang joko teshi. 27Pisga tenem kolak jagi tuang aser anüolen aser anüdoklentip, anüolentip aser anüdoklen reprangang. Ne tenük agi alimaji reprangang, kechiaser nai Yordan ajanga ilen jagi maotsü. 28Saka Yihusua nem mapaji bendanga agüjang, pa ajungshiang aser tashi itdakjang, kechiaser pai iba nübur ajagi anir aitsü aser nai anguba limaji parnok nem agidaktsütsü.’ 29Anungji asenoki Bethpeor lenten nung ali.”

TAZÜNGKUNEM 4

1Aser Mosai ashi “Tang, oh Israel, ni nenok dang sayutsüba ozüng aser obendangbaji nenoki angang. Itemji benshiang aser Kibuba nenok tsürabur Tsüngremi nenok nem agütsüba lima nungji nenok taküm alitsü 2Kibuba nenok Tsüngremi melaba koba nenok nem agütsür idakji nenoki tali mebendenloktsüla, mesüra iba nungi nenoki meindoktsüla. 3 Kibubai Baal Peor nung kechi inyak aji nenok tenük agi nguogo. Peor nung Baal sülen anitaker ajak Kibuba nenok Tsüngremi nenok rongnungi samatsüogo. 4Saka nenok shibaisa Kibuba nenok Tsüngrem dak akanga sot, itemji tanü tashi taküm lir.

5“Ajiang, Kibuba kü Tsüngremi kü dang melaba ama, ni ozüngtem aser obendangbatem nenok dang sayuogo, anungji nenoki agitsü oya aliba lima nung nenoki itemji benshitsü. 6Anungji itemji kanga kümdanga benshiang, kechiaser iba yagi kintem madang nenok shisatsü aser tangatetba sayutsü, shirnoki iba indang angashia ashitsü, ‘Atangji iba kin tulu ya shisa taka aser tangatetba nübur lir.’

7“Kechiaser kodangsa asenoki asen Tsüngrem Kibuba dang jadir, Pa asenok anasa aliba ama kechi kin tulu tsüngrem anasa ali? 8Mesüra tanü ni nenok madang yutsüba temeshi telatetba obendangba ozüng ama kechi kin tulu nung ali? 9Nenok pei tenük agi anguba mapatemji mamatsüsa aser parnok taküm ali tashi itemji nenok temulungjang nungi mepilatsü asoshi kümdangang. Itemji nenok chirtem aser nenok semchirtem dang sayuang. 10Horeb nung Kibuba ne Tsüngrem tsüngdang noktakba anogoto bilemtetang, kodang Kibubai kü dang ashi, ‘Nüburtemji kü tsüngdangi atenshidakjang, aser ni parnok nem kü otem angashidaktsütsü; anungji parnok taküm ali tashi parnoki ni tsübutsü aser aji parnok chirtem dang sayutsü.’

11“Nenok tenem tsüng anasa arua noktak, aser ammang mepet aser ammang temelem agi akhümbanger anüng tiyong tonga tenem nungji mi jangru. 12Idangji Kibubai mi nungi nenok den jembi, nenoki ola dang angashi, saka temang mangu; ola dang liasü. 13Anungji pai pei tezüngzüktepba nenok nem metetdaktsü, koba pai nenok dang benshitsü mela, aji ozüng ter; aser pai aji lungpak ana nung zülu. 14Aser iba mapang nungji nenok dang ozüng aser obendangbaji sayutsü Kibubai kü dang mela, anungji nenoki agitsü oya aliba lima nung nenoki aji benshitsü.

Süngyanglu Anema Tekümdangtsü

15“Kibubai nenok dang Horeb nung mi nungi jembiba anogo nung nenoki ola dak alema temang kecha mangu. Anungji nenok pei sasa kanga kümdangang, 16 aji oda nenok aibelen masütsü, aser nenoki tebur mesüra tetsür mesüka süngyanglu kecha nenok asoshi meyanglutsü. 17Mesüra ali nung aliba shiruru kar mesüra anüng nung yimzüba ozü kar mesükba, 18mesüra ali nung ayazüba mesükba, mesüra tzü telung nung aliba ango kar mesüka meyanglutsüla. 19Kodang nenoki anüng reprangdir, anü, ita aser petinutem, aser anüng nung alibatem ngua item madang mapudaktsü kümdangang. Itemji anüng kübok nisung ajak nem Kibubai lemzükja kar. 20 Saka nenokbo Kibubai tanü ama pei nübur akümtsü asoshi Ijip merang misem nungi aniteta anir aru 21 Tang nenok meji Kibubai kü dang ain adok aser Yordan ajanga nibo maotsü mesüra alinük tajung koba Kibuba Tsüngremi nenok nem senmangtsü asoshi agütsür ajagi nibo maitsü ta azüngashi. 22Kechiaser nibo iba lima nung asütsü, ni Yordan ajanga maotsü, saka nenokbo aotsü, aser iba lima tajungji agitsü. 23Anungji Kibuba nenok Tsüngremi koba tezüngzüktepba nenok den yanglu aji mamatsü kümdangang. Kibuba nenok Tsüngremi melaba ama nenoki süngyanglu kecha teyanglu. 24 Kechiaser Kibuba nenok Tsüngremji tesamatsüba mi, tenükmiba Tsüngrem lir.

25“Kodang nenok chirnur aser semchisemnur ngudir, aser linük nung talangka lidir, aser aibelena inyakdir aser Kibuba ne Tsüngrem tsüngdang kechi temenen aji inyaka süngyanglu yangluba ajanga pa ain adokdaktsüdir, 26tanü ni nenok anema kuli asütsü asoshi anüng ali jazüker, oda nenoki Yordan ajanga yir agitsü aliba linük nungji nenok yakta samatsü, nenok idakji talangka malitsü, saka atangji nenok samatsü. 27 Kibubai nenok nüburtem rongnung prokshidaktsütsü, aser Kibubai nenok koleni anidir item kintem rongnung nenok ishika dang alitsü. 28Idakji nisungi yangluba süng aser lung tsüngremtem kobai mangur, mangashir mesüra memenemteter itemji nenoki tenzüktsü. 29 Saka idakji nenoki KIBUBA ne Tsüngrem bushia, ne mulungjang ajak agi, aser ne taküm ajak agi pa bushira nenoki pa angutsü 30Kodang nenok timtem tekangshi nung lidir, aser item ajak nenok dak atalokdir, idangji tesülen nenoki KIBUBA ne Tsüngrem dangi meyiptsü aser pa dang tashi angatsü. 31Kechiaser Kibuba Tsüngremji aria bilemba Tsüngrem lir; pai nenok metoktsütsü, mesüra pai nenok tsürabur dang azüangshia züngzüktepbaji mamadoktsü.

Kibubaji Tsüngrem Lir

32“Nenok masodang tesüiba mapang Tsüngremi alima nung meimchir yangluba anogotem indang asüngdangya-ang, aser anüng tatem külen nungi külen tashi asüngdangang. Iba ama mapa tulu mesüka atalokdang asü, mesüra iba amai tangashi danga angashi asü? 33Tsüngremi mi nungi jembiba nenoki angashiba amai nübur kari angashir taküm ali asü? 34Mesüra Kibuba nenok Tsüngremi nenok asoshi Ijip nung inyakba nenoki anguba ama, tetendangba agi, temaitsü aser sayatenya agi rara agi, tashi tait teka agi, aser pa tepen songtokba agi, aser tetsübutsü tulu agi inyakba ama tangar kin rongnung pei asoshi agitsü tsüngrem kari tasü ita aotsü merangdang asü? 35 Kibubaji Tsüngrem ta nenoki metettsü, aser pa dak alema tangar shinga mali ta nenoki metettsü asoshi itemi sayuogo. 36Nenok azüoktsü asoshi pai anüng nungi pei ola angashidaktsüogo, aser alima nung pa mi tulu nenok nem ngudaktsü, aser mi tiyong nungi nenoki pa ola angashi. 37Kechiaser pai nenok tsürabur meim nung, parnok sülen par metsü shimtet. Aser pai pei tashi tulu agi nenok Ijip nungi anitet. 38Aser nenok dang nungi tuluba aser tashi taitba kintem nenok jakdang aritoka, tanü amai pai nenok nem parnok li senmang amangdaktsü. 39Anungji temalen anüng nung aser teküboklen alima nung Kibubaji Tsüngrem ta nenoki tanü metetang aser nenok temulung nung yuang, tangar shinga mali. 40Kibuba ne Tsüngremi teti asoshi nenok nem agütsüba lima nung nenok sülen nenok chirtem talangka arishia alitsü asoshi tanü ni nenok nem agütsüba pa ozüng aser temelabatemji nenoki benshitsüla.”

Jenokdak Yimtitem

41  Idangji Yordan anüdoklen yimti asem Mosai shimteta ayu, 42oda nisung shibai memeteti akhidang mesempatepi aliba pei kiyonger tepsetdir, pei taküm kümzüktsü asoshi item yimtitem ka nung pai oa jenoktsü. 43Item yimtitemji: Reuben kidong asoshi lisem lima lenten nung Bezer, Gad asoshi Gilead nung Ramoth, aser Manase asoshi Bashan nung Golan.

Ozüng Agütsüba Okila

44Israel nunger madang Mosai yutsüba ozüngji ibai lir. 45Kodang parnok Ijip nungi adok, Mosai Israel nunger madang jembiba kuli, telatet ozüng aser obendangba ozüngji itemi lir. 46Yordan atena or Bethpeor tejaklen lenten nung Heshbon nung aliba Amor nunger chuba Sihon linük nung shirnok Mosa aser Israel nungertem parnok Ijip nungi adokdang akok. 47Aser parnoki par lima aser Bashan chuba Og lima, Yordan atena oa anüdoklen Amor nunger chuba parnoki agi. 48Arnon lenten tatembang nung aliba Aroer nungi oda Sion (aji Hermon) tenem tashi, 49aser Yordan atener anüdoklen Araba ajak, oda Pisga tenem wabetsa kübok Araba tzüyim tashi.

TAZÜNGKUNEM 5

1Mosai Israel ajak aja aser parnok dang ashi, “Angang, o Israel, tanü ni nenoki angashia jembiba telatet ozüng aser yimsü benshitsü nenoki angazükang aser itemji kümdanga benshiang. 2Kibuba asen Tsüngremi Horeb nung asenok den tezüngzüktepba ka yanglu. 3Kibubai asen tsüraburtem den meyanglu, saka tanü idaki taküm alirtem asenok den yanglu. 4Kibubai tenem nung mi tiyong nungi nenok den tejak o tejak na jitepa jembi. 5Iba mapang nungji Kibuba o nenok dang sayutsü asoshi Kibuba aser nenok tsüngda nung ni noktaka liasü, nenoki miji tsübua liasü, aser tenem jagi matu. Pai ashi,

6“Nenok Ijip lima alar ki nungi anitetba Kibuba ne Tsüngremji ni lir.

7“Nai kü madang tangar tsüngremtem kecha telidaktsü.

8  “Temalen anüng mesüra telunglen ali, mesüra teküboklen tzü nung aliba mesüka nai na atema süngyanglu kecha teyanglu. 9Nai parnok madang tapudak mesüra parnok tekülem; kechiaser ni sempaba tsürabur temenen yong par chirtem putu asem pezü tashi merenshiba tenükmiba Tsüngrem ni lir.

10  “Saka shirnoki ni meimer aser kü ozüngtem benshir parnok dang putu meyirijangsa meyirijang aochir.

11  “Nai Kibuba ne Tsüngrem tenüng amajok nung teteshi, kechiaser shibai amajok nung pa tenüng tetshidir, Kibubai pa memerenshi-i malitsü.

12  “Kibuba ne Tsüngremi ne dang melaba ama amungnü meshiteta mungang. 13Anogo troknü nai tasena mapa ajak inyakang, 14saka tenetnübubaji Kibuba ne Tsüngrem asoshi amungnü lir. Iba anogo nungji mapa kecha meinyaktsüla, nai süshia ne jabaso jalai süshia, mesüra ne kiliri aser kilitsür mesüra ne nashi pungchi, gado, mesüra ne kiset shirurutem mesüra ne den semloka alir aener süshia; oda ne kilir aser kilitsür na amaji anisüngzüktsüla. 15Na Ijip lima nung alarsa liasü aser Kibuba ne Tsüngrem tashi tait teka agi aser tepen songtoka na idak nungjagi anir aru ta bilemtetang. Anungji Kibuba ne Tsüngremi amungnü meshiteta ayutsü ne dang mela.

16“Kibuba ne Tsüngremi ne dang melaba ama nebu aser netsü akhüm tsübuang, anungji Kibuba ne Tsüngremi koba linük ne nem agütsür yangji na ari shia aser junga alitsü.

17“Nai nisung tetepset.

18  “Nai nüktapangta tebenshi.

19  “Nai tauya.

20  “Nai ne kiyonger anema tiyazü kuli tagütsü.

21  “Nai ne kiyonger kinungtsü tenükshi. Nai ne kiyonger ki süshia par lushi süshia, kilirba süshia, kilirla süshia, par nashi pungchi süshia, gado süshia mesüra kechisa ne kiyonger meyong lidir aji nai tenükshi.

22“Itemji tenem nung nenok sentepa alidak mi tiyong, mepet aser tammang temelem nungi nenok dang ola tulu agi ayimoktsüba Kibuba otem lir; aser pai tali kecha mebendenlok. Idangji pai itemji lungpak ana nung zülu aser aji kü nem agütsü.

Nüburtem Tetsübuba

(Ani. 20.18-21)

23“Kodang mi agi rongya aliba tenem nung, tammang temelem nungi nenoki olaji angashi, nenok kidong tanishirtem aser nenok tamburtem ajak kü dangi aru. 24Aser nenoki ashi, ‘Ajiang, Kibuba asen Tsüngremi asenok dang pa uluba aser sentsüwangshi sayuogo, aser mi tiyong nungi asenoki pa ola angashiogo. Tsüngremi nisung den jembiaka nisung taküm alir ta tanü asenoki nguogo. 25Saka tang kechiba asenok asütsü? Kechiaser iba mi tulu yagi asenok samatsütsü, kodang asenoki Kibuba asen Tsüngrem ola angashidir idangji asenok asütsü. 26Kechiaser taküm Tsüngremi mi nungi jembiba asenoki angashiba ama shirnoki angashir taküm ali? 27Anasa oang aser Kibuba asen Tsüngremi ashiba ajak angang; aser Kibuba asen Tsüngremi ne dang jembiba ajak nai onok dang shiang, onoki aji angatsü aser inyaktsü.’

28“Kodang nenoki kü den jembi, Kibubai angashi, Kibubai kü dang ashi, ‘Item nisungtemi ne dang ashiba ni angashiogo. Parnoki ashiba ajakji shitak lir. 29Oda parnoki ni tsübua aser kü ozüngtem benshitsü parnok mulungjang teti yamai alitsü asübo, parnok den aser parnok chirnurtem den teti junga lila! 30Oang parnok dang shiang, nenok süki-i meyipa oang 31Saka na yangi ni anasa noktaka ataang, aser ni kü telatet ozüng aser obendangba ajak ne nem agütsüdi, aser ni parnok agitsü agütsüba lima nung parnoki kongshitsü asoshi nai sayutsü.’

32“Anungji Kibuba nenok Tsüngremi kechisa mela aji nenoki inyaktsü, nenoki tajichileni mesüra tabeleni temeyipma. 33Kibuba nenok Tsüngremi melaba lenmang ajak nung jajang, anungji nenoki agitsü aliba lima nung nenok taküm talang alitsü, aser jangratema alitsü.

TAZÜNGKUNEM 6

1“Tang item temelaba tzüzüng ozüngtem aser obendangbatem ya nenok dang sayutsü Kibuba nenok Tsüngremi kü dang mela, anungji nenoki agitsü aliba lima nung nenoki itemji benshitsü, 2anungji na, ner chirtem aser ner semchirtemi Kibuba ne Tsüngrem tsübutsü, aser ni ne nem agütsüba ozüngtem ajak parnoki arishi tepiyong benshitsü, aser na arishi anogo talang alitsü. 3Aji asünung Oh Israel, Kibuba nenok tsürabur Tsüngremi nenok dang nangzükba ama, mamatzü aser ninang mojitzü yima aliba lima nung, nenok azükarutsü aser soyapokyatsü asoshi itemji kümdanga benshitsü asoshi angang.

4  “Angang, Oh Israel, Kibuba asen Tsüngremji Kibuba ka dang lir. 5 Anungji nai KIBUBA ne Tsüngremji ne mulung ajak agi, ne tanela ajak agi, aser ne tashi ajak agi meimang. 6 Tanü ni nenok dang melaba ya nenok mulung nung ayutsüla. 7Itemji nai ne chirnurtem dang nendaka sayutsüla, na kidang mena alidang aser na lenmang nung jajadang aser na mejangdang aser na shishidang item indang jembiang. 8Nai itemji temaitsü asütsü asoshi ne teka nung alenlokang, aser itemji ne tenütsü nung temaitsü asoshi alitsü. 9Itemji ner ki kikümdang aser süngkhüm nung zülutsüla.

Tashi Mangaba Anema Tekümdangtsü

10  “Kodang Kibuba ne Tsüngremi nenok tsürabur Abraham, Isak aser Yakob dang nenok nem agütsütsü azüangshiba lima yimti tulu aser tajungtem koba nenoki meyanglu, ajagi nenok anir arudir, 11nenoki mebendenba osettem agi ki sünga, nenoki matuba tzübutem, nenoki matemba tsükmenatzü aser oliv nungi nenoki jangratema chidir, 12idangji Ijip alar tia nungi anitetba Kibuba mamatsü kümdangang. 13 Nai Kibuba ne Tsüngrem tsübuang aser nai pa dang tenzüktsüla aser pa tenüng agi azüngashitsüla. 14Na meketa aliba bendanger tsüngremtem sülen nai manitaktsüla, 15kechiaser nenok rongnung aliba Kibuba ne Tsüngremji tenükmiba Tsüngrem lir; ashiko nenok anema pai ain adoktsü aser pai nenok alijak nungi samatsütsü.

16  “Massa nung nenoki Kibuba atitangba ama nai Kibuba matitangtsüla. 17Kibuba ne Tsüngremi melaba aser pa ozüngtem nenok dang melabatem ajak nendaka benshitsüla. 18Kibuba tsüngdang kechi shitak aji nenoki inyaktsüla, anungji Kibubai nenok tsüraburtem dang nenok nem agütsütsü azüngashiba limaji nenoki agitsü aser nenok alitsü asoshi, 19Kibubai jembiba ama pai nenok tsükchirtem ajak nenok jakdang nungi aridok.

20“Tarutsü mapang nung kodang ne jabasoi ‘Kibuba asen Tsüngremi nenok dang melaba yimsü ozüng aser o bendangba tetezü kechi?’ ta asüngdangdir, 21parnok dang shiang, asenok Ijip lima nung Farao lar küma liasü, saka Kibuba tashi tait teka agi asenok Ijip nungi anitet. 22Onok nükdang Ijip madak Farao aser pa kidang alir ajak madak temaitsü tulu sayatenya aser tesüngmangtsü mapa sayu. 23Saka asen tsürabur dang pai azüngashiba limaji asen nem agütsütsü aser ajagi anir arutsü asoshi, pai idak nungjagi asenok anitet. 24Kibubai pa ozüngtem ajak tsübutsü aser itemji benshitsü asenok dang mela, anungji tanü amai asenok taküm teti junga alitsü. 25Aji asünung Kibuba asen Tsüngrem madang pai melaba ozüng ajakji asenoki kümdanga benshira, ibaji asen asoshi temeshibaji alitsü.

TAZÜNGKUNEM 7

Kibubar Nüburtem

(Ani. 34.11-16)

1  “Kodang Kibuba ne Tsüngremi nenok agitsü aliba limai nenok anir arudir, aser nenok madang kin aika; Het nunger Girgas nunger, Amor nunger, Kanan nunger, Periz nunger, Hiv nunger aser Yebus nunger ne dang nungi tuluba aser tashi taitba kin tenet nenok madang aridokdir, 2aser kodang Kibuba ne Tsüngremi parnok nenok ket nung agütsüdir, idangji nenoki parnok meshi meshia samatsütsüla. Parnok den tezüngzüktepba kecha teyanglu mesüra parnok dang taochi mesayutsüla. 3Parnok den kipa-kiyi tesü. Ne jalatem parnok jabasotem nem tagütsü, mesüra par jalatem ner jabasotem nem tagidaktsü. 4Kechiaser parnoki ne jabasotem ni nungi meyipa oa tanga tsüngremtem tenzükdaktsütsü, idangji Kibubai na anema ain adoktsü aser pai na yakta samatsütsü. 5 Nenoki parnok dak yamai inyakang. Nenoki parnok tenladak raksajang, parnok temeshi tongshitem akusajang, par Asherin lepzüka yokang aser parnok süngyanglutem mi agi rongdokjang. 6 Kechiaser nenok Kibuba ne Tsüngrem asoshi nenok temeshi nübur lir. Kibuba ne Tsüngremi alima nung kin ajak rongnungi pei agitsü, pei nübur asütsü asoshi nenok shimtet.

7“Tangar dang nungi nenok yongsük timba asüba yong Kibubai nenok dak saklok aser shimtet masü, kechiaser kin ajak dang nungi nenok ishiba lir. 8Saka Kibubai nenok meimyong, aser nenok tsüraburtem dang azüngashiba yong pai tashi tait teka agi nenok anitet aser Ijip chuba Farao ket nung alar ki nungi nenok alangzük. 9Anungji Kibuba ne Tsüngremji Tsüngrem ta metetang; paji tamang katetba Tsüngrem lir. Shirnoki pa meimer aser pa ozüngtem benshir, parnok den putusa meyirijang pai tezüngzüktepba ayu. 10Saka pa sempar dang jaktaka parnok samatsütsü meyipa kepzüker, pa sempar dang pai anü anüa mali, saka jaktaka pa dang kepzüker. 11Anungji tanü ni nenok nem agütsüba temelaba ozüng aser o bendangbatem nai kümdanga benshitsüla.

Tashi Angaba Temoatsütem

(Taz. 28.1-14)

12“Nenoki item ozüng angara, aser kümdanga benshira Kibuba ne Tsüngremi nenok tsüraburtem dang azüngashiba tezüngzüktepba ama nenok den yimlibilem ayutsü. 13Pai na meimtsü aser moatsütsü, aser soyapokyatsütsü. Pai ne nu menden tejang moatsütsü, ne alu metsüjang, ne tsük, yi tasen aser totzü, ne kiset shirurutem aser san, item ajak pai ne tsüraburtem dang nenok nem agütsütsü ta azüngashiba lima nung moatsütsü. 14Kin ajak dang tali pai na moatsütsü, nenok tebur süshia tetsür süshia tapung kata malitsü, mesüra shiruru kata techanu makaba malitsü. 15Kibubai na tashitak ajak nungi kümzüktsü. Nai metetba Ijip tashitak tamajung kecha agia na mekangshidaktsütsü, saka shirnoki na sempar, parnokji pai kangshidaktsütsü. 16Kibuba ne Tsüngremi ne nem agütsüba nisung ajakji nai tepsettsüla. Parnok aochia tebilem, aser parnok tsüngremtem tetenzük, kechiaser itemji na asoshi sang ka ama asütsü.

17“Item kintem kü dang nungi tuluba, ni koda parnok atsüngtoktsü? ta ne mulungjangi ne dang shira, 18nai parnok metsübutsüla, Ijip ajak nung Kibuba ne Tsüngremi Farao dak inyakba bilemtetang. 19Timtem tekangshi tulu, temaitsütem, tesüngmangtsü sayatenyatem aser Kibuba ne Tsüngremi tashi tait teka aser pa tepen songtokba agi nenok anitetba nenok tenük agi nguogo. Anungji Kibuba ne Tsüngremi nai shir tsübur parnok dang yamaji inyaktsü. 20Ano KIBUBA ne Tsüngremi parnok anema nati yoka shirnok anünga ali aser nenok dang atsüka ali, parnok samatsütsü. 21Nai parnok madang taoksa; kechiyong Kibuba ne Tsüngremji tetsübutsü Tsüngrem tulu nenok rongnung lir. 22Kibuba ne Tsüngremi item kinji tanem tanemi ne tsüngdang nungi aridoktsü. Nai parnok khenyongi dangbo mesamatsütsüla, mesüra na asoshi moapu nung arem shirurutemji tali renloka akümtsü. 23Saka Kibuba ne Tsüngremi ne ket nung agütsütsü aser parnok okshia samatsütsü. 24Parnok chubatem pai nenok ket nung bendanga agütsütsü, aser par tenüng anüng kübok nungi nai samatsütsü, nai parnok mesamatsü tashi parnok katia na anema menoktaktsü. 25Par süngyanglu tsüngremtem nai mi agi rongtoktsüla parnok dak aliba taribi mesüra hon aji na asoshi mabentsüla; aji oda mesüra iba sang nung na puadoktsü, kechiaser aji Kibuba ne Tsüngrem tsüngdang tesempatsü lir. 26Ne kidangi tesempatsü kecha bener marutsüla, yamalaji khenyongi samatsütsüla. Itemji nai khenyongi jentoktsüla kechiaser aji atakatemba oset lir.

TAZÜNGKUNEM 8

1“Tanü ni nenok nem agütsüba ozüng ajak kanga kümdanga benshitsüla, yamaji süra Kibubai nenok tsüraburtem dang azüngashiba lima jagi nenok aitsü aser taküm alitsü aser jenti arentsü. 2Aser pai na ajemaludaktsütsü aser na tendangtsü, oda pa ozüngtem benshidisü mebenshilir aser ne mulung nung kechi bilemer itemji metettsü asoshi Kibuba ne Tsüngremi item metettsü asoshi Kibuba ne Tsüngremi item küm lir lisem lima nung na koda anishi ajak nai bilemtettsüla. 3Aser nisungi am tesa agi dangbo taküm malir, saka Kibuba tebang nungi kechisa adokdir aji agi nisung taküm alir ta pai ne nem metetdaktsütsü asoshi, pai na ajemaludaktsü, aser na yaseta kümdaktsü aser mana agi pai na mesü, koba naia mesüra ne tsüraburtemia memeteti liasü. 4Item küm lir ne süoshi tejen maküm mesüra ne tetsünga mawak. 5Anungji nisung kati pei jabaso azüokba ama Kibuba ne Tsüngremi na azüoker ta ne mulung nung bilemang.

6  “Anungji nai Kibuba ne Tsüngrem ozüngtem benshiang, pa lenmang nung jajatsü aser pa tsübuang. 7Kechiaser Kibuba ne Tsüngremi na ayongnu aliba alinük, tzübu aser tzüpokdak, tenem aser lententem nungi yima alidak lima kati na anir arudar. 8Wheat aser barley alidak, tsükmenatzü aser mungudong, aser jaremdong, oliv totzü aser ninang mojitzü alidak lima; 9na kecha agia anüngakong mesüi ne chiyungtsü peria angudak lima, lung nung merang aliba aser tenemtem nungi nai yongmenyin tutettsüba linük lir. 10Kodang nai tepok sünga chidir, Kibuba ne Tsüngremi ne nem linük tajung agütsüba asoshi nai pa tenüng asangtsüla.

Kibuba Amadokba Anema Tekümdangtsü

11“Tanü ni ne nem agütsüba pai melaba, o bendangba aser pa ozüngtem mebenshiba agi Kibuba ne Tsüngrem mamatsü kümdangang. 12Mesüra kodang na tepok sünga chir jangratemdir aser idakji talidak yanglutetdir, 13aser ne nashi telok aser san telok renlokdir aser taribi o hon renlokdir oda ne takaba ajak renloka kümdir; 14idangji ne mulung nung mezümeküma Ijip lima alar ki nungi nenok anitetba Kibuba ne Tsüngrem mamatsü asoshi, 15Pai na per tesashi aser jepja alidak tetsübutsü lisem lima tulu ali takong aser tzü madak ajanga anir aru. Pai ne nem lungkerak nungi tzü adokdaktsü. 16Lisem lima nung nenok tsüraburtemi memetetba mana agi pai na mesü, oda pai na ajemaludaktsütsü aser tatem nung na asoshi tajung inyaktsü asoshi pai na tendang. 17Aji oda mesüra kü ain aser tashi tait teka agi ni item rongsen inyak ta nai pei mulung nung mashitsüla. 18Saka nai Kibuba ne Tsüngrem bilemtettsüla kechiaser ne nem rongsen angutsü ain agütsübaji pa lir, tanü tashi aliba amai ne tsüraburtem dang pai azüngashiba atalokdaktsütsü asoshi aji oda liasü. 19Nai Kibuba ne Tsüngrem amar tangar tsüngremtem sülen jajara aser parnok tenzüka aser külemra, atangji nenok samatsü ta tanü ni nenok anema kuli agütsür. 20Nenok madang Kibubai kintem samadaktsüba ama samatsütsü, kechiaser Kibuba nenok Tsüngremi sayuba o nenoki manga.

TAZÜNGKUNEM 9

Nüburtemi Tashi Mangaba

1“Angang Oh Israel! Tanü na Yordan ajanger aliba linük kong ne dang nungi tashi taitba kintem aser parnok yimti jaratem anüng tonga atsübanger lir ajagi aitsüba lir. 2Nüburtemji tulu aser tar talang Anak chirtem shir indang nenoki angashia ashi, Anak chirtem anema shibai noktaktettsü? 3Kibuba ne Tsüngrem ne tejaklen tesamatsüba mi ama aor ta nai metetang, pai parnok samatsütsü, aser ne madang pai parnok ludaktsütsü, anungji Kibubai ne dang nangzükba ama, nai parnok aridoktsü aser parnok mela mela samatsütsü.

4“Kodang Kibuba ne Tsüngremi ne madang parnok aridokdir nai ne mulung nung yamai teshi, ‘Ni temeshi asüba yong Kibubai iba lima amangtsü anir aru.’ Saka item kintem majungba yong Kibubai nenok madang nungi parnok aridoktsü. 5Ya na temeshi asüba agi mesüra ne mulung tindang asüba yong ya item kintem majungba yong Kibuba ne Tsüngremi parnok ne madang nungi aridoker masü, saka oda pai nenok tsüraburtem: Abraham, Isak aser Yakob dang azüngashiba ataloktsü asoshi liasü. 6Anungji ya metetang, nenok temeshiba yong Kibuba ne Tsüngremi iba linük tajung agitsü ne nem agütsü masü, kechiaser nenok tekong temerang nisungtem lir.

7“Lisem lima nung nai Kibuba ne Tsüngrem koda ain adokdaktsü aji bilemtetang aser tamadok; Ijip lima toktsür aoba anogo nungi iba talidak ya matong tashi nenoki Kibuba anema apusoa aru. 8Horeb nunga nenoki Kibuba rasadaktsü, anungji pai nenok samatsütsüba ain adok. 9 Kodang ni lungpak nung zülubaji agizüktsü tenemi atu, aji nenok den Kibubai züngzüktepba lungpak liasü, ni anogo lir aser aonung lir tenem nungji liasü; ni chiyungtsüa machi, tzüa majem. 10Idangji Kibubai lungpak ana nung Tsüngrem temeyong agi zülur kü nem agütsü; aser telok atenshiba anogo nung mi nungi Kibubai tenem nung nenok dang jembiba o ajak iba manungji zülua lungpak anaji Kibubai kü nem agütsü. 11Aser anogo lir aser aonung lir tatem nung, oda tezüngzüktepba züluba lungpak anaji Kibubai kü nem agütsü.

12“Idangji Kibubai kü dang ashi, ‘Aramesoang, yang nungi kara-a luang, kechiaser nai Ijip nungi anir aruba nüburtemi tai inyakogo. Ni parnok dang melaba lenmang nungi parnoki yakta meyipa ogo; parnoki parnok asoshi süngyanglu ka mulutetogo.’

13“Ano Kibubai kü dang ashi, ‘Iba nübur ya tekong temerang ta ni nguogo. 14Kü kija tokjang, anungji ni parnok samatsütsü aser anüng kübok nungi parnok tenüng jentoktsü. Aser ni na agi parnok dang nungi tashi taitba aser kin tuluba kümdaktsüdi.’

15“Anungji ni tenem nungi meyipa alu aser tenemji mi agi arong. Aser tezüngzüktepba lungpak anaji kü teka nung liasü. 16Aser nenoki Kibuba nenok Tsüngrem anema temenen mena ta ni atangji angu. Nenoki nenok asoshi nashi pungchi chanu ka mesüka süngyanglu muluteter liasü; aser Kibubai nenok dang melaba lenmang nungi nenoki kara-a meyipa or liasü. 17Aser lungpakji ni am aser aji nenok nükdang ondakja aji raksa. 18Idangji mezüng amato ni Kibuba madang anogo lir aser aonung lir apudaka, ni chiyungtsüa machi mesüra tzüa majem, oda Kibuba madang kechi temenen aji nenoki inyaka pa jashidakja pa ain adokdaktsüba yong liasü. 19 Kechiaser Kibubai nenok dang mepelaba agi nenok samatsütsü pa ain adokbaji ni tsübua liasü, saka iba mapang nungjia Kibubai kü dang anga. 20Aser Kibubai Aron samatsütsü pa kanga ain adoka liasü, anungji iba mapang nungjisa ni Aron asoshi sarasadem. 21Ano tesempatsü nashi pungchi chanu koba nenoki yanglu aji ni agi, aser aji mi nung ronger ajensa, aser auyi ama maküm tashi menüngsar; tenem nungi yima aluba ayong nung ni auyiji enoktsü.

22  “Ano nenoki Tabera nung, Massa nung, aser Kibrat-hatava nung Kibuba rasadaktsü. 23 Aser kodang Kibubai nenok kadesh-Barnea nungi yoka, tuang ni nenok nem agütsüba limaji agiang ta ashi, idangji Kibuba nenok Tsüngremi melaba anema nenoki apuso; nenoki pa dang mamang mesüra pa ola manga. 24Ni nenok metetba anogo nungi nenoki Kibuba anema apusoa arur.

25“Anungji Kibuba madang ni anogo lir aser aonung lir apudaka liasü, kechiaser Kibubai nenok samatsütsü ta ashi. 26Aser ni Kibuba dang sarasadem aser ashi, ‘Oh Kibuba Tsüngrem, ne nübur, ne senmang shir na uluba agi alangzük, shir ne tashi tait teka agi Ijip nungi anitet, parnok tesamatsüma. 27Ne tenzükertem: Abraham, Isak aser Yakob bilemtetangma; iba nüburtem temulung temerang, mesüra parnok tamashi mesüra parnok temenen dak tereprangma. 28Aji oda mesüra nai onok anir aruba linüki ashitsü, kechiaser Kibubai parnok dang nangzükba limai parnok anir arutsü makok nung, aser pai parnok sempa nung parnok lisem lima nung tepsettsü pai anir aru. 29Saka parnok ne nüburtem, oda ne senmanger, shir nai ne tashi ain tulu agi aser ne teka songtokba agi anir aru.’

TAZÜNGKUNEM 10

Mosai Tanabenbuba Ozüng Agizükba

(Ani. 34.1-10)

1“Iba mapang nungji Kibubai kü dang ashi, ‘Mezüng amato nai lungpak ana angentetang aser kü dangi tenemi atung. Ano süng agi süngden ka yangluang.’ 2Aser nai tamasa raksaba lungpak nung aliba otemji nai lungpak nungji zülutsüla, aser nai itemji temeshi süngden nungji enoktsü.”

3“Anungji ni akashia süng agi süngden ka yanglu, aser mezüng ama lungpak ana angenteta kü teka nung amer tenem jagi atu. 4Aser mezüng züluba amato ozüng terji pai lungpak nungji zülu, koba nenok atenshiba anogo nung Kibubai tenem nung mi nungi nenok dang jembi; aser Kibubai itemji kü nem agütsü. 5Idangji ni tenem nungi meyipa alu, aser Kibubai kü dang melaba ama ni yangluba süngden nung aji ayu, aser aji tanga idakji lir.”

6  Tang Israel nüburtem Beeroth Bene-yakan nungi apusoa Moserai aru. Idakji Aron asü aser yangji pa rema yutsü aser pa jabaso Eleazari pa melena putir mapa inyak. 7Yang nungjagi parnok Gudgodai apusoa ao; aser Gudgoda nungi ayong tzü alidak Yotbat-i aru. 8 Iba mapang nungji Kibuba Ozüng Süngden abentsü; Kibuba madang noktaktsü, aser pa tenzüktsü aser pa tenüng nung moatsütsü, oda tanü tashi parnoki inyakba amai, Kibubai Levi kidong bendanga ayu. 9Iba yongji Levi pa adianutem den shilem mesüra senmang kecha maka, Kibuba ne Tsüngremi pa dang ashi ama Kibubaji pa senmang lir.

10  “Tang mezüng ama ni tenem nung anogo lir aser aonung lir ali, aser iba mapang nungjia Kibubai kü dang anga aser Kibubai nenok samatsütsü memulungi liasü. 11Idangji Kibubai kü dang ashi, ‘Aramesoang, aser nüburtem tejaklen jagi na oang, parnok tsüraburtem dang ni parnok nem agütsütsü ta azüngashiba linük jagi parnok aitsü aser aji agitsü.’

Tsüngremi Kechi Akhanger

12“Aser tang, Oh Israel, Kibuba ne Tsüngremi ne dang nungi kechi akhanger? Saka Kibuba ne Tsüngrem tsübutsü, pa lenmang ajak nung jajatsü, ne mulung ajak agi aser ne nela ajak agi pa dang meimtsü aser tenzüktsü, 13aser tanü ni nenok nem nenok ajungtsü asoshi agütsüba Kibuba ozüngtem aser pa temelabatem benshitsü. 14Ajiang, anüng aser tematiba anüngtem, alima aser yangji aliba ajak Kibuba ne Tsüngrem meyong lir. 15Aji saka Kibubai nenok tsürabur dak meimtsüsa parnok dak temulung atok, aser tanü amai tangar dang nungi tali par semchirtem oda nenok pai shimtet. 16Aji asü nung nenok mulungjang mejeptokang, aser nenok joko tekong meranga teli. 17 Kechiaser Kibuba ne Tsüngremji tsüngremtem madak Tsüngrem, kiburtem madak Kibur, tulu, tashi tulu aser tetsübutsü Tsüngrem shibai tejak majir, mesüra süpokrem magir. 18Pai lajar aser amitsür asoshi ochi agi o bendanger aser aener nem süoshi aser chiyungtsü agüja meimer. 19Aji asü nung aener dang meimang, kechiaser nenoka khenbo Ijip nung aenersa liasü. 20Nai Kibuba ne Tsüngrem tsübutsüla; Pa dang nai tenzüktsüla, pa dak azüittsüla, aser pa tenüng agi azüngashitsüla. 21Paji ne tenüngsang lir aser paji ne Tsüngrem lir, shibai mapa tulu aser tetsübutsütem ne tenük agi ngua inyak. 22 Ne tsüraburtem parnok ajak agi neter Ijipi alu, aser tangbo Kibuba ne Tsüngremi anüng petinutem ama na aika kümdaktsüogo.

TAZÜNGKUNEM 11

Kibuba Dang Meimang Aser Tashi Angang

1“Anungji nai Kibuba ne Tsüngrem meimtsüla aser pai melaba pa ozüngtem, pa obendangba, aser pa temelaba ajak benshiang. 2Tanü nenoki metetang, nenok chirtem shirnoki ya memetet aser Kibuba ne Tsüngremi tarütsüba, pa uluba, pa tashi tait teka aser tepen songtokba pa temaitsütem mangu, parnok den ni mejembir, 3 aser temaitsütem, pa mapatem Ijip chuba Farao aser Ijip nunger yongtsü nung aser Ijip lima ajak nung inyak; 4 pai Ijip nunger temerangertem parnok kor aser talungtsütem dak kechi inyak, kodang parnoki nenok aria aru, pai parnok temerem tzüyim nung lungbangdaktsü, aser Kibubai parnok meshi meshia samatsü. 5Aser nenok iba yagi maru tashi pai lisem lima nung nenok dak kechi inyak; 6 aser pai Reuben chir Eliab jabaso Dathan aser Abiram dak kechi inyak, koda ali pei tebang lapoka Israel ajak madak par kibong, par süki aser parnok sülen anitakba taküm aliba ajak den parnok meyok; 7saka Kibubai mapa tulu inyakba ajak nenok tenük agi nguogo.

Tenangzükba Lima Temoatsütem

8“Tanü ni nenok dang melaba ozüng ajak nenoki benshitsüla, anungji alinük koba nenoki agitsü idagi ajagi nenok tashi ita litettsü 9aser mamatzü o ninang mojitzü yima aliba lima koba Kibubai nenok tsürabur aser par chirnurtem nem agütsütsü azüngashi, anungji nenok yangji ari shia alitsü. 10Kechiaser alinük koba nenoki agitsü idagi, aji nenok aruba linük Ijip ama kong nenok metsü proka, ne tsüng agi tzü aenba ansotsü tsüki amato masü. 11Saka alinük koba nenoki agitsü idagi, aji tenem aser lenten linük, aser anüng nungi tzü ajemer. 12Kibuba ne Tsüngremi anebaluba linük küm tetenzük nungi tatem tashi maneni Kibuba ne Tsüngremi tenük yokba linük.

13  “Anungji tanü ni nenok dang melaba ozüngtemji nenoki angara, aser ne mulung ajak agi, ne nela ajak agi Kibuba ne Tsüngrem meimtsü aser tenzükdi süra, 14tsüngkhüm shitak nung pai nenok asoshi tzünglu yoktsü, oda mezüng tzünglu aser tesüben tzünglu agütsütsü, anungji nenoki nenok tsük, yi aser totzü bendentsü. 15Ano pai nenok kiset shirurutem asoshi moapu nung rem adokdaktsütsü, aser nenoki chir tipatemtsü. 16Nenok temulungjang ashiokja nenoki tangar tsüngremtem dangi meyipa oa parnok tenzüka mekülemtsü asoshi kümdangang. 17Aji oda mesüra Kibuba ainji nenok anema adoktsü, aser pai anüngtem shibanga tzünglu marudaktsütsü, anungji alinük nungji tzünglu marura ali-i tejang metangtsütsü, idangji Kibubai nenok nem agütsüba linük nungji nenok yakta samatsü.

18  “Anungji nenoki kü otem ya nenok mulung aser tanela nung rizünga yuang; itemji temaitsü ka amato nenok teka nung alenlokang aser tenütsü nung temaitsü asoshi ajenlokang. 19Aser item nenoki pei chirtem dang sayuang, na kidang amendang, na lenmang nung jajadang, na mejangdang aser na shishidang item indang nai jembiang. 20Itemji nai ne ki kikümdong nung aser kima süngkhümtem nung itemji züluang. 21Anungji alima temalen anüngtem ali tashi, Kibubai nenok tsüraburtem dang parnok nem agütsütsü azüngashiba linük nung ne taküm aser ne semchirtem ari shia alitsü.

22“Kechiaser ni nenok nem agütsüba item ozüng ajak ya nenoki kümdanga benshira Kibuba ne Tsüngrem dang meimtsü, pa lenmang ajak nung jajatsü aser pa dak akanga sota lira; 23idangji nenok madang nungi item kin ajak Kibubai aridoktsü aser nenok dang tuluba aser tashi taitba kintem nenoki atsüngdoktsü. 24 Kongsa nenok meyong alitsü; nenok litsüji lisem lima nungi Lebanon tashi aser Eufrata ayong nungi anüolen tzüyim tashi alitsü. 25Nenok anema shingaia menoktaktettsü; aser pai nenok dang ashi ama, Kibuba nenok Tsüngremi nenok kechinungsa tetsüng ayaokdir linük ajak nung nenok tsübuba aser taoksaba adokdaktsütsü.

26“Ajiang, tanü ni nenok madang temoatsü ka aser atakatem ka yutsür: 27tanü ni nenok nem agütsüba Kibuba nenok Tsüngremi melaba nenoki angara temoatsü alitsü; 28Saka Kibuba nenok Tsüngremi melaba mangai, tanü ni nenok dang melaba nungi meyipa or nenoki memetetba tangar tsüngremtem sülen anitaka ora, atakatem alitsü. 29 Kodang nenoki agitsü oya aliba linüki Kibuba ne Tsüngremi nenok anir arudir, nenoki temoatsüji Gerizim tenem nung ayutsü aser atakatemji Ebal tenem nung sangoktsütsüla. 30Moreh nung sülemdong anasa Gilgal tejaklen Araba nung alir Kanan nunger linük nung, Yordan atena or anü ailen itemji mali no? 31Kechiaser Kibuba nenok Tsüngremi nenok nem agütsüba linük agitsü asoshi Yordan ajanga tair lir. Kodang nenoki aji agidir aser idakji lidir, 32tanü ni nenok madang yutsüba telatet ozüng aser obendangba ajak nenoki kümdanga benshitsüla.

TAZÜNGKUNEM 12

Tekülemdak Tesem Ka

1“Kibuba nenok tsüraburtem Tsüngremi nenok nem agütsüba linük iba lima nungji nenok taküm ali tashi item telatet ozüngtem aser obendangbatem nenoki kümdanga benshitsüla. 2Nenoki aridokba kintem par tsüngremtem külemdak tenem talangtem nung, tokong nung aser süngdongtem kübok tesem ajakji meshi meshia raksatsütsüla. 3 Parnok tenladak sabangtemji raksajang, par temeshi tongshitem anüka akusajang aser par Ashera süngratemji rongdokjang; par süngyanglu tsüngremtemji lepzüka yokang aser idakji par tenüngtemji samajang.

4“Parnoki inyakba amaji Kibuba nenok Tsüngrem dang meinyaktsüla, 5saka Kibuba nenok Tsüngremi nenok kidong ajak nungi pa tenüng ayutsü koba tenem shimdir, pa alidak ajagi nenoki bushia arutsüla 6Ajagi nenoki tarongba tenla, nenok tetepsetba tenla, ter shilem, tatemzükba aser temulunger tenla, nashi aser san telok mezüng mepuba nenoki bener arutsüla. 7Idakji Kibuba nenok Tsüngrem madang nenok kibong shiai nenok teka agi inyakba ajak nung Kibuba nenok Tsüngremi moatsüba asoshi pelatepa achitsüla.

8“Tanü asenoki inyakba ama nenok nisung shingaia pei sünütsü süa kecha mebenshitsüla, 9kechiaser Kibuba ne Tsüngremi nenok nem agütsütsü aliba nenok anisüngzükdak aser senmangji nenoki ano matong. 10Saka kodang nenok Yordan ajangdir, aser Kibuba nenok Tsüngremi nenok nem agütsüba lima nung lidir, pai nenok tsükchirtem nungi anisüngzük agütsütsü, aser nenok kümzüka alitsü. 11Idangji Kibuba nenok Tsüngremi pa tenüng ayutsü asoshi koba linük shimtetdir, ajagi ni nenok dang melaba ajak: nenok tarongba tenla, tetepsetba tenla, ter shilem, nenok teka agi inyaktetba tenla, nenoki shimtetba tatemzükba tenla koba nenoki Kibuba dang atemzük, item tenlatem ajakji nenoki abentsüla. 12Aser idakji nenok jabasotem aser jalatem nenok tetsür tebur ajak, oda kilir aser kilitsür, aser Levi nunger shir nenok yimtak alir, kechiaser parnok nenok den senmang maka parnok den pelatepang. 13Nai anguba tesem mashi-i nung tarongba tenla metenlatsü kümdangang, 14saka nenok kidongtem rongnungi Kibubai koba shimdir idakji nai tarongba tenlatemji agüjang, aser yangji ni ne dang melaba ajak inyakang.

15“Aji saka Kibuba ne Tsüngremi ne nem agütsüba temoatsü yari, mesü shi aser shitsü shi ama, nenok süngkhüm kübok meshiteta alir aser memeshiteti alir ajaki pei chinütsü achitsü akok. 16 Nai azü dang machitsüla, nai aji ali nung tzü ama shitokang. 17Ne tsük tenla nungi mesüra tsükmenatzü yi, mesüra totzü mesüra ne san telok nungi mezüng mepuba tenlatem nungi abenba ter shilem mesüra tatemzükba tenla koba nai atemzüka ayu mesüra temulunger tenla mesüra ne teka mapa nungi machitsüla. 18Saka Kibubai shimtetdak na, ne jabaso jalatem, ne kilir aser kilitsürtem aser Levi nunger shirnok yimtitem nung alir, Kibuba ne Tsüngrem madang achitsüla, aser nai inyakba ajak nung Kibuba ne Tsüngrem madang na pelaseta alitsü. 19Na ne li nung ali tashi Levi nunger senzüka metoktsütsü kümdangang.

20“Kodang Kibubai ne dang nangzükba ama ne litsü ulushidaktsüdir, aser nai, ‘Ni shi achitsü’ ta shidir, kechiaser nai shi achitsü jangrar, idangji nai kodaka chinür achitsü akok. 21Aser san telok Kibubai ne nem agütsüba nungi tepsetang, aser ni ne dang melaba ama, na kodaka chinür aji ne süngkhüm kübok chiang. 22Itemji mesü shi o shitsü shi na achiba ama nai chiang; meshiteta alir aser memeshiteti alir ajaki achitsü akok. 23Azü dang machitsü kümdangang, kechiaser azüji taküm lir, aser nai takümji shi den machitsüla. 24Nai aji machitsüla; nai aji ali nung tzü ama shitokang. 25Kibuba nükdang kechi shitak aji nai inyakang, aser ne sülen ne chirtem junga alitsü asoshi nai aji machitsüla.

26“Ne meyong temeshi oset kechisa ali aser ne tatemzükba tenlatemji bener Kibubai shimtetdaki oang. 27Ne tarongba tenlatem shi aser azüji tenladak sabang nung Kibuba ne Tsüngrem dang tenla-ang; aser tetepsetba shiruru züji Kibuba ne Tsüngrem tenladak sabang nungji shiloktsütsü, aser shiji nai achitsüla. 28Nai Kibuba ne Tsüngrem madang dang kechi tajung aser shitak, aji inyakdang na, aser ne sülen ne chirtem junga alitsü. Ne dang melaba ajak benshiang aser angang.

Süngyanglu Anema Tekümdangtsü

29“Kodang Kibuba ne Tsüngremi nenoki agitsü aoba kintemji nenok jakdang nungi samatsüdir, aser nai parnok atsüngtetdir, aser par linük nung lidir, 30aser parnok sang nung mepudaktsütsü asoshi kümdangang, aser nai parnok tsüngremtem indang asüngdangtepa, iba kini parnok tsüngremtem koda tenzüker, oda nia yamaji inyaktsü ta teshi. 31Nai Kibuba ne Tsüngrem dang yamaji teinyak; kechiaser Tsüngrem madang tesempatsü mapa ajak koba pai sempar aji parnoki pei tsüngremtem asoshi inyakogo. Par tsüngremtem asoshi parnoki parnok jabaso jalatem mi agi rongsetdaktsüogo.

32“Ni nenok dang kechisa melar, aji nenoki kümdanga benshiang, nai iba nungji tebendenlok mesüra ajema tekümdaktsü.

TAZÜNGKUNEM 13

1“Nenok rongnung tiyazü ainkar ka mesüra pungmang pungmanger ka adoka temaitsü ka mesüra sayatenya ka nenok nem agütsüra, 2aser asenoki tangar tsüngremtem shir nai memetet item sülen odi aser nenok tenzükdi ta pai nenok dang ashiba temaitsü mesüra sayatenyaji atalokra, 3nenoki iba tiyazü ainkar mesüra pungmang pungmanger oji mangatsüla; kechiaser Kibuba nenok Tsüngremi ne mulung ajak agi aser ne nela ajak agi Kibuba nenok Tsüngremji atangji meimer asü masü aji metettsü nenok tendanger. 4Kibuba nenok Tsüngrem sülen nenoki anitaktsüla, aser pa tsübutsüla, aser pai melabatem benshitsüla, aser pa o angatsüla aser pa dang nenoki tenzüktsüla aser nenoki pa dak akanga azüittsüla 5Saka iba tiyazü ainkar mesüra pungmang pungmangerji südaktsütsüla, kechiaser Kibuba nenok Tsüngrem shibai nenok Ijip alar tia nungi alangzüka anir aru, pa anema pai jembi aser Kibuba ne Tsüngremi ne dang melaba lenmang nungi nenok anientsü pai meranger. Nenoki temenenji nenok rongnung jentoktsüla.

6“Nenui mesüra ne jabasoi mesüra ne jala mesüra nai meimba kinungtsü, mesüra ne tembar chiri na miima mesüzüka, nai mesüra ne tsüraburi memetetba tsüngremtem, 7oda na meketa aliba nübur tsüngremtem, na anasa mesüra na nungi talang nung, ali tatem külen nungi külen tatem tashi aliba tsüngremtemji asenoki külemdi ta shira, 8nai pa dang haura makatsüla, mesüra pa dang mangatsüla, aser ne tenük agi pa dang maochitsüla, mesüra nai pa takümji mekümzüktsüla. 9Saka atangji nai pa tepsettsüla; pa südaktsütsü asoshi pa dak nai tama teka aitsüla, iba sülenjiang tangar teka aitsü. 10Nai pa lung agi onsettsüla, kechiaser na Ijip alar ki nungi anitetba Kibuba ne Tsüngrem nungi na anientsü pai bushi. 11Idangji Israel ajaki aji angashitsü aser tsübutsü, aser iba amala mapa tamajung nenok rongnung kodanga meinyaktsü.

12“Kibuba ne Tsüngremi nenok alitsü agütsüba yimti mashi-i ka nung kari yamai ashiba angashia, 13nenok rongnung samesa nisung kari oagi yimti nung alir kar mesüzüka, ‘Asenok oa nenoki memetetba tsüngremtemji tenzükdi’ ta shira, 14idangji nai ibaji kanga junga asüngdangtepa bushitsüla. Aser nenok rongnung iba tesempatsü mapaji inyakogo ta atangji kuli shitak ngutetra, 15iba yimti nung alirtemji nenoki nok agi meshi meshia samatsütsüla. Idakji aliba nisungtem aser kiset shiruru ajakji nok agi meshi meshia samatsütsüla. 16Temakzükba oset ajakji nai yimdong tiyongi bener arutsü, aser yimti aser temakzükba oset ajakji Kibuba ne Tsüngrem dang ajonga arongba tenla ama mi agi rongtoktsüla, aser aji teti asoshi teraksa aser kodanga meyanglushitsü. 17Idakji menentokba oset kecha ne ket nung malitsüla, anungji Kibubai pa anir adokba nungi meyipa nenok dang taochi sayutsü, oda nenok tsüraburtem dang na soyapokyatsü ta nangzükba ama ne dang aria bilemtsü. 18Tanü ni ne nem agütsüba pa temelabatem ajak nai benshira, aser Kibuba ne Tsüngrem madang kechi shitak aji inyakra aser Kibuba ne Tsüngrem ola nai angashira yamaji alitsü.

TAZÜNGKUNEM 14

Temerük Aser Memerük Shirurutem

(Lev. 11.1-47)

1“Nenok Kibuba nenok Tsüngrem chirtem asünung, tasürtem atema mang ayimdang nenok sasa maleptsüla mesüra nenok tenütsü mesütoktsüla. 2Kechiaser Kibuba nenok Tsüngrem atema nenokji temeshi nübur, aser alijak ajak nungi pei nübur asütsü asoshi Kibubai nenokji shimtet.

3“Nai tesempatsü oset kecha machitsüla 4Item shiruru ya nai achitsü akok: nashi, san, nabong, 5mesü, shitsü, ongbang shitsü, shio, arem nashi aser tenem san. 6Shiruru kobasa temesüla ana küma rangsar lir aser rem shilu mejaker itemji nai achitsü akok 7Aji saka remshilu mejakba aser temesüla rangsaba shiruru rongnung nai itemi machitsüla: ut, azümungshi, shisen, kechiaser remshilu mejak-aka parnok temesüla merangsa, parnokji nenok asoshi memerük lir. 8Ano ak-a memerükba shiruru lir, kechiaser temesüla rangsa-aka remshilu memejaker. Item shiji nenoki machitsüla mesüra item tasümang dak nenoki mekongshitsüla.

9“Tzü nung aliba shiruru ajak nungi nenoki tashikangjok aser tip aliba ajak achitsü akok. 10Saka tashikangjok aser tip maliba kecha nenoki machitsüla; aji nenok asoshi memerük lir.

11“Ozü temerük ajak nenoki achitsü akok. 12Saka item ya nenoki machitsüla: orija, hogon, ango achiba mongzü, 13asür mongzü, osülung, aser mongzü tapu balala, 14waro tapu balala ajak, 15Ostrich, ammang mongzü, tzüyim ozü, mongzü tapu ajak, 16pokpo tulu aser tila, tzü ozü, 17lisem pokpo, hogon, cormorant, 18tzü patak, tzü ozü tapu ajak, ungerkentenbong aser lah. 19Ayazüba shiruru tila tashikang atenba ajak nenok asoshi memerük alitsü, parnokji machitsüla. 20Saka tashikang atenba shiruru kobasa temerük lir itemji nenoki achitsü akok.

21  “Pei sasa asüba kecha nenoki machitsüla. Nenoki aji nenok yimti nung alir aener kar nem agütsütsüla, aser pai aji achitsü akok, mesüra aji bendanger kar dang ayoktsü akok, kechiaser nenok Kibuba ne Tsüngrem asoshi nenokji temeshi nübur lir.

“Nenoki nabong chanu tetsü mamatzü nung memetatsüla.

Ter Shilem Ozüng

22  “Küm shia ne alu nungi adokba ajak nungi ter shilem agütsütsüla. 23Nenok tsük, nenok tsükmenatzü yi tasen, nenok totzü aser nenok nashi aser san telok nungi mezüng mepuba item ter shilem ajakji Kibuba ne Tsüngremi pa tenüng ayutsü asoshi koba tesem shimtetdir, idakji achitsüla, angji nenoki Kibuba aser Tsüngremi nenok moatsüba nungi ter shilemji bener arutsü mokokra; 24nenoki aji bener marutettsüsa lenmangji kanga talang süra, kechiaser Kibuba ne Tsüngremi pa alidak shimtetbaji nenok nungi talangka nung oagi lira, idangji Kibubai kong nenok moatsüdir; 25nenoki aji sen agi melentsüla, aser iba senji Kibuba ne Tsüngremi shimtetba tesem jagi bener aotsüla. 26Item sen jagi nai kechisa alitsü mulunger oda nashi pungchi, san, tsükmenatzü yi mesüra yi tesashi, mesüra nai kechisa alitsü mulunger itemji aliang. Aser aji na aser ner kibongi Kibuba ne Tsüngrem madang achitsü aser pelateptsü. 27Nenok yimti nung aliba Levitem mesendoktsüla, kechiaser nenok den pa shilem mesüra senmang kecha maka.

28“Kümsembuba tatembang shia nenok ter shilem ajak nenok yimtitem nung rizünga ayutsüla, 29aser Levi nunger shir shilem mesüra senmang kecha maka, aser aener tebu malir, amitsür shir nenok yimtitem nung lir parnok arua itemji jangratema achitsü, aser Kibuba ne Tsüngremi nenoki inyakba mapa ajak nung nenok moatsütsü.

TAZÜNGKUNEM 15

Techiokba Küm

(Lev. 25.1-7)

1“Küm tenet tatembang shia nai sentsü ajak atoktsüla. 2Aji nai yamai inyaktsüla, taputsür shiai pei kiyonger nem kechisa apuja ali aji atoktsüla. Pai aji pei kiyonger mesüra adianu nungi khangzüka magitsüla, kechiyong techioktsü Kibubai sangoktsüogo. 3Aener nungi nai aji meshitsü akok, saka ne adianu kari ne dang sentsü tsüa lira nai aji atoktsüla.

4“Kibuba ne Tsüngremi nenok nem senmangtsü agütsütsü aliba linük nungji pai nenok takar kümdaktsütsü, anungji nenok rongnung sensaker shinga malitsü, 5nenoki dang Kibuba ne Tsüngrem dang angara, aser pa temelaba ozüng ajak koba tanü ni nenok nem agütsüdagi aji kümdanga benshira. 6Kechiaser pai nangzükba ama Kibuba ne Tsüngremi na moatsütsü, aser nai kin aika nem aputsütsü saka nai shinga nungia maputsü. Nai kin aika madak yimsü asütsü, saka parnoki ne madak yimsü masütsü.

7  “Kibuba ne Tsüngremi agütsüba linük nungji nenok yimtitem nung ne adianu kar sensaka lira, ne adianu anema ne mulung meranga teküm mesüra pa nungi ne teka mamreptsüla. 8Saka nai ne ket pa dang salatsüla, aser pa tenüngdaktsü kechisa aka ajakji mokoroi aputsütsüla. 9Küm tenetbuba sentsü atokba küm anasa lir ta ne mulung nung tamajung bilema pa nüngdak magütsüi teli, ashiko pai KIBUBA dang na anema ayimtentsü aser na tai nung alitsü. 10 Nai pa nem mulungsoa agütsütsü, aser nai pa nem agütsüdang ne mulung mekuremtsüla; kechiyong ibai asoshi KIBUBA ne Tsüngremi nai kechisa inyakdir ajak nung na moatsütsü. 11Kechiaser alima nung sensaker teti alitsü. Anungji ne adianutem, sensaker aser nüngdakba purtem dang nenok teka sadema salatsü ni nenok dang melar.

Alar Chiokba

(Ani. 21.1-11)

12  “Ne adianu Ibri nunger tebur mesüra tetsür kari pei sasa ne dang yokra pai na küm trok tenzüktsü, saka küm tenetbuba nung nai pa chioktsüla. 13Aser kodang nai pa chiokdir nai pa teka tazüng meyoktsüla. 14Kibuba ne Tsüngremi na moatsüba yari, pa nem nai mokoroi ne san telok nungi, motsüngnem aser tsükmenatzü menüngdak nungi pa nem agütsütsüla. 15Khenbo nenoka Ijip alar tia nung liasü, aser Kibuba ne Tsüngremi nenok alangzük ta bilemtetang. Ibayongji tanü ni nenok nem iba ozüng ya agütsür.

16“Saka pai ne dang ni ne mapa metoktsütsü ta shira, kechiaser pai na aser ner kibong meim, aser ne dang junga inyak, 17idangji nai merang shijok ka bena arua kishileni anir arua pa tenarongji tupoktsü, aser paji teti ne lar asütsü. Yamajisa nai alatsür danga inyaktsüla. 18Nai menungnangi ne mapa nungi pa chioktsüla, kechiaser küm trok nungji ayanger nisung ka ta-a anasü dang nungi talangba pai na tenzükogo, aser nai inyakba ajak nung Kibubai na moatsütsü.

Mezüng Mepuba Nashi Aser San

19  “Ne nashi aser san telok nungi mezüng mepuba ajak Kibuba ne Tsüngrem nem bendanga agütsütsüla. Mezüng mepuba nashi pungchi nem mapa meinyakdaktsütsüla, mesüra mezüng mepuba san züng memejeptsüla. 20Kibubai shimtetdak na aser ner kibongi aji küm shia Kibuba ne Tsüngrem madang aji achitsüla. 21Saka shiruru dakji tajitettsü kar lira, oda tetsüng tatsük mesüra tenük tapok, mesüra onsara mejungi tajitettsü kar lira, nai aji Kibuba ne Tsüngrem nem tenla magütsütsüla. 22Nenoki aji pei amung kübok achitsüla. Aji meshiteta alir aser memeshiteti alir ajaki achitsü akok, oda mesü aser shitsü shi achiba ama. 23 Nenoki azü dang machitsüla, aji tzü ama ali nung shitoktsüla.

TAZÜNGKUNEM 16

Süia Aoba Benjong

(Ani. 12.1-20)

1  “Ahib ita nung Kibuba dang Süia Aoba benjong mungang, kechiaser Ahib ita nung Kibuba ne Tsüngremi aonung na Ijip lima nungi anitet. 2Nenoki süia aoba benjong atema san aser nashi telok nungi kong Kibuba pa tenüng ayutsü shimdir idakji Kibuba ne Tsüngrem dang tenla-ang. 3Piyazü enokba amtsük nai iba den machitsüla, kechiyong anogo tenet nai iba den piyazü meinokba amtsük oda timtemba amtsük nai achitsüla, kechiaser nenok Ijip nungi ilungseta adok, anungji nenok arishi tepiyong nenoki Ijip toktsüba anogo bilemtettsü. 4Nenok alidak kecha nunga anogo tenetnü piyazüji mungudaktsütsüla, aser anogo mezüngnü nikongdang tepsetba shiji anepdang tashi kecha manüngtsüla.

5“Kibuba ne Tsüngremi nenok nem agütsüba yimti kecha nunga nenoki süia aoba benjong tenlaji magütsütsüla, 6saka Kibuba ne Tsüngremi kong pa tenüng ayutsü shidir, yangji nikongdang anü taoi nenok Ijip nungi adokba mapang nenoki süia aoba benjong tenlaji agütsütsüla. 7Idakji Kibuba ne Tsüngremi shimtetdak soruchioka achitsüla. Aser anepdang nenok pei süki dangi meyiptsüla. 8Anogo troknü nenoki piyazü meinokba amtsük achitsüla, aser tenetnübuba nung Kibuba ne Tsüngrem dang temeshi sentep ka alitsü, aser nenoki mapa kecha meinyaktsüla.

Hapta Benjong

(Ani. 34.22; Lev. 23.15-21)

9  “Nenok tsük nung mezüngbuba ninok yokba nungi tenzüka hapta tenet züngdangang, 10aser Kibuba ne Tsüngremi nenok moatsüba yari, ne Tsüngrem dang nisung shiai temulunger tenla agüja hapta benjong amungtsüla, 11ne jala jabasotem, ne kilir aser kilitsürtem, aser nenok yimti nung aliba Levi nunger, aener aser lajar aser amitsür shir nenok rongnung lir, parnok den külemi Kibuba ne Tsüngremi pa tenüng ayutsü shimtetdak Kibuba ne Tsüngrem madang nenoki pelateptsüla. 12Nenoka khenbo Ijip nung alar süa liasü ta nenoki bilemtettsü, anungji nenoki item telatet ozüng kümdanga benshitsüla.

Sempak Benjong

(Lev. 23.33-43)

13  “Ne motsüngnem nungi tsük aser tsükmenatzü menüngdak nungi bendener külen anogo tenet sempak benjong amungtsüla. 14Ne jabaso jala, kilir aser kilitsür, nenok yimti nung aliba Levi nunger, aener, lajar aser amitsür shir nenok rongnung lir, parnok den külemi Kibuba ne Tsüngrem madang nenoki pelateptsüla. 15Anogo tenetnü Kibubai shimtetdak Kibuba ne Tsüngrem asoshi benjong ka akatsüla, kechiaser Kibuba ne Tsüngremi nai züsentetba ajak nung, aser ne keti inyakba ajak nung na moatsütsü, aser ne pelaba teperi akümtsü.

16“Küm nung asemben tashi nenok tebur ajaki Kibuba ne Tsüngrem madangi pai shimtetdaki arutsüla, piyazü menokba amtsük benjong, hapta benjong aser sempak benjong nung. Parnoki Kibuba madangi teka tazüng marutsüla. 17Nisung shia Kibuba ne Tsüngremi ne nem moatsüba yari pai akokba agütsütsüla.

18“Nenok asoshi tanishirtem aser obendangertem nenok kin shia nungi yimti shia shimtsüla, aser parnoki Kibuba ne Tsüngremi nenok nem agütsütsü aliba nungji ochi agi nüburtem o bendangtsü. 19 Nai ochi mashiba mapa meinyaktsüla mesüra tejak mereprangtsüla. Nai süpokrem magitsüla, kechiaser süpokrem agi shisa takar tenük pokdaktsür, aser temeshipur o meyipsatsür. 20Ochi aser ochishiba sülen dang nai aotsüla, anungji Kibuba ne Tsüngremi ne nem agütsütsü aliba linükji nai amangtsü.

21  “Kibuba ne Tsüngrem asoshi tenladak yangluba dak alema nai Ashera ama kecha süngdonga matemtsüla, 22 mesüra nai temeshi tongshi kecha mazüngtsüla, kechiaser itemji Kibuba ne Tsüngremi sempar.

TAZÜNGKUNEM 17

1“Nai Kibuba ne Tsüngrem nem tajitettsü aketba mesüra tarak aketba nashi pungchi mesüra san tetenla; kechiyong aji Kibuba ne Tsüngrem madang tesempatsü lir.”

2Nenok rongnung aser Kibuba ne Tsüngremi ne nem agütsüba yimti nung, pei tezüngzüktepba raksa-a teburi süshia tetsüri süshia Kibuba ne Tsüngrem madang tamajung inyakra, 3 aser oagi tangar tsüngrem tenzükra, oda ni memelaba, anü mesüra ita, mesüra anüng nung aliba telok külema ngura; 4aser aji nenok dang shira, aser nenoki aji angashira, nenoki jungjunga bushiteptsüla, aser ajiang, aji shitak ta kuli adoka oda Israel nung iba ama tesempatsü inyak ta chichia lira; 5idangji nenoki tebur süshia tetsür süshia tamajung inyakba nisungji nenok amung atena anir adoka lung agi onsettsüla. 6 Nisung ana mesüra asem kuli agi taitsüba nisungji südaktsütsüla. 7 Pa südaktsütsü asoshi pa anema kulipurtemi tamasa teka asangtsüla, ajiserang nisung ajaki teka asangtsü; yamaji nenok rongnungi tamajungerji endoktsüla.

Obendangdak

8“Na asoshi obendang agütsütsü kanga tasak kar arura, azü tokshiba süshia, ozüng tsütsü süshia, osettsüset indang mesüra bangsentep kar adokra, idangji nai aramesoa Kibuba ne Tsüngremi shimtetdaki atutsüla. 9Levi nunger shir putir mapa teinyakdak lir, aser obendanger shir lir parnok dang asüngdangi oang, aser parnoki ne dang item indang obendangba metetdaktsütsü. 10Kibuba ne Tsüngremi shimtetdak nungi parnoki kechisa telemtetba ne dang shidir nai yamaji inyaktsüla. Parnoki ne dang kechisa inyaktsü shidir, yamaji nai kanga kümdanga inyaktsüla. 11Ozüngi melaba indang parnoki kechisa ne dang shidir, aser koba obendang telemtetba ne dang shidir, nai yamaji inyaktsüla; koba obendangba parnoki ne dang sayudir iba nungi nai tajichileni mesüra tabeleni memeyiptsüla. 12Nisung shibai Kibuba ne Tsüngrem madang tenzüktsü noktaka aliba putir dangji mesüra obendanger dang mangai, pei sünütsü südir, iba nisungjibo asütsü. Yamaji nenoki Israel nungi temenenji endoktsüla. 13Idangji nisung ajaki ya angashitsü, aser tsübutsü aser pei sünütsü dangbo masütsü.

Chuba Atema

14  “Kodang Kibuba ne Tsüngremi nenok nem agütsüba linük jagi nenok arudir aser aji nenok meyong küma lidir, aser nenok meketa aliba kintem ama chuba ka ayutsü ta lemtetdir, 15Kibuba ne Tsüngremi nenok adianutem rongnungi shiba shimdir nai paji ne madak chuba kümdaktsütsüla. Ne nübur masüba bendanger ka nai ne madak mayutsüla. 16 Aji saka pei asoshi pai kor aika mayutsüla, mesüra kor aika ayutsü asoshi pai nüburtemji Ijipi meyoktsüla, kechiaser Kibubai nenok dang yamai shiogo, ‘Nenoki ilenjagi kodanga memeyiptsüla.’ 17 Mesüra pa mulung meyipa aotsüsa pai kibutsü aika mayutsüla, mesüra taribi aser hon jenti merizüngtsüla.

18“Kodang pai chuba menden nung mendir, Levi putirtem madang aliba ozüng nungi pai pei asoshi iba ozüng ya kaket lung ka nung zülutsüla. 19Ibaji pa den ayutsü aser Kibuba pa Tsüngrem tsübutsü, aser iba telatet ozüngji benshitsü aser kümdanga inyaktsü asoshi pai aji pa taküm tepiyong azüngtsüla; 20aser pei mulung nung pei adianutem den pa tajungba ta mebilemtsü, anungji pa aser par chirtem maneni talangka pa yimli nung alitsü asoshi iba temelaba nungi pai tajichileni mesüra tabeleni memeyiptsüla.

TAZÜNGKUNEM 18

Putirtem Shilem

1Levi putirtem, oda Levi kidong ajak Israel den kecha shilem mesüra senmang maka; Kibuba dang mi agi tenlaba aser Pa nem agütsüba parnoki achitsü, kechiaser ibaji parnok senmang alitsü. 2 Parnok adianutem rongnungi parnok kecha senmang maka, kechiaser pai parnok dang nangzükba ama Kibubaji parnok senmang alitsü.

3Nashi pungchi mesüra san tepseta tenlaba nungi putirtem nübur nungi tangutsü shilem ya alitsü; tepu, teküm anatsü, aser tebin. 4Ano nai ne mezüng atangba tsük, tsükmenatzü yi aser totzü, ne san züng tamasa mejepzükba, nai pa nem agütsütsüla. 5Kechiyong Kibuba ne Tsüngremi ne kidong ajak nungi, Kibuba tenüng nung noktaka pai tenzüktsü, pa aser par jabasotem teti asoshi shimtet.

6Levi nunger kar pei aliba Israel yimti mashi ka nungi adoka, pai jangraba ajak agi Kibubai koba linük shim, aji agi arura, 7idangji pei adianu Levi nungertem Kibuba madang tenzükba ama, pai Kibuba pa Tsüngrem tenüng nung tenzüktsü. 8Pei senmang rongsen ayokba nungi anguba sen dak alaka, parnok shilem ajak nung kasa angutsü.

Limapur Yimsü Anema Tekümdangtsü

9  Kibuba ne Tsüngremi agütsüba limai kodang nenok arudir, idakji aliba kintemi inyakba tesempatsü mapaji majizüktsüla. 10Nenok rongnung shingaia pei jabaso jala mi agi metenlatsüla, arasenba, tetakzür, mesüra atakatemer mesüra temezünger; 11 mesüra tepuar, mesüra süli aor mesüra tanela den jembiba yamalaji shinga malitsüla 12Shibai yamalaji inyakdir Kibuba madang tesempatsü lir, aser item tesempatsü mapa asoshiji Kibuba ne Tsüngremi nenok lenmang nungi parnokji aridoktsü. 13 Kibuba ne Tsüngrem madang na tetemjen alitsüla.

Ainkar Ka Yoktsü Nangzükba

14Koba kinsa nenoki atsüngtettsü ali parnoki tetakzür, arasentsür dang angar, saka nenokbo Kibuba ne Tsüngremi yamaji inyaktsü memelar. 15 Kibuba ne Tsüngremi ne adianu, ne nübur rongnungi ni ama ainkar ka adokdaktsütsü, Pa dang nenoki angang. 16Ibai nenok Horeb tenem nung atenshiba anogo nung Kibuba ne Tsüngrem dang asüngdangba ama, kechiaser nenoki ashi, ‘Onok nem Kibuba ozü Tsüngrem ola tangashidaktsü mesüra onok masütsü asoshi joko iba mi tulu ya onok nem tengudaktsü.’ 17Aser Kibubai kü dang ashi, ‘Parnoki shitak jembiogo. 18Ni parnok asoshi na ama ainkar ka parnok nübur rongnungi adokdaktsütsü; ni pa tebang nung kü o enoktsütsü, aser ni pa dang melaba ajak pai nenok dang ashitsü. 19 Kü tenüng nung pai jembiba dang kari mangara ni iba asoshi pa nem langzüdaktsütsü. 20Saka ainkar shibai ni jembiang ta memela saka pei mulungba agi jembidir, mesüra tangar tsüngremtem tenüng nung jembira, iba ainkarji südaktsütsüla’

21“Aser nai ne mulung nung, Kibubai jembiba o aseni koda metettsü? ta shira, 22kodang Kibuba tenüng nung jembibaji matalokdir, ibaji Kibubai jembiba masü, saka ainkar jagi pei mulungba agi jembiogo, nai paji tetsübu.

TAZÜNGKUNEM 19

Jenokdak Yimtitem

(Zün. 35.9-28; Yih. 20.1-9)

1  Kibuba ne Tsüngremi nenok nem agütsüba linük nung kintemji kodang Kibuba ne Tsüngremi samatsüdir, aser nai parnok atsüngteta parnok yimtitem aser ki nung lidir, 2Kibuba ne Tsüngremi ne nem agütsüba linük tiyongtsü nung yimti asem na asoshi balaka yuang. 3Kibuba ne Tsüngremi ne nem amangdaktsüba linükji shilem asem küma lemsa-ang aser idakji lenmangtem yangluang, anungji nisung tepseter shia ajagi jena aotsü.

4Nisung tepseter shibai pei taküm kümzüktsü idakji jenokdir yamai alitsü, shibai akhidang sempatepa maliba tangar nisung ka tepsetdir, 5oda kodang nisung kati pei kiyonger den süng alentsü aremi odir, aser süng alendang pubang nungi pu adoka tangar dakji merepshira aser pa süadokra, iba nisungji item yimtitem ka nung jenoka alitsü. 6Aji oda mesüra azü tokshiba mang ayanger jagi mit adoka lenmang talang asünung nisung tepseter takümji tasütsü langa meliaka; kechiaser pai akhidang paji sempa-a maliasü pa takümji agiadoktsü. 7Aji asünung nenok asoshi yimti asem balaka ayutsü ni ne dang melar.

8 Kibuba ne Tsüngremi nenok tsüraburtem dang ne litsü ulushitsütsü azüngashiba ama aser pai nangzükba ama alima ajakji nenok nem agütsüra; 9tanü ni ne dang melaba ajak kümdanga benshira, Kibuba ne Tsüngrem meimtsü aser Pa lenmang nung teti jajara, idangji item yimti asem dak alaka nai ano yimti asem enoktsü akok. 10Anungji Kibuba ne Tsüngremi senmangtsü agütsüba linük nung tai makaba zü metokshitsü, aji mesüra azütokshiba tai ne dak enloktsü. 11Saka nisung kari pei kiyonger sempa-a pa asoshi mita atar, pa anema apusoa tasütsüsa züker, item yimtitemji ka nung jenokra, 12idangji yimti nung tamburtemi pa idak nungjagi anir arutsü, aser pa südaktsütsü asoshi azü tokshiba mangyanger ket nung bendanga agütsütsüla. 13Nai pa dang maochitsüla, saka tai makaba zü tokshiba temenen Israel nungi agientsüla, anungji ne den junga alitsü.

Tejen Arrtsü

14  “Kibuba ne Tsüngremi nenok alitsü agütsüba nenoki amangtsü aliba linük nungji akhidang tejen nisungtem ne kiyonger den yanglua akaba arrtsüji nai magientsüla.

Kuli Agütsüba

15  “Ozüng raksaba mesüra tai menaba nisung ka anema kuli ka agi dangbo maitsütsüla. Ibaji kuli ana mesüra asem agi aitsütsü akok. 16Tiyazü kuli kar agi nisung ka tai inyakba anema aitsüra, 17mangatettep adokba nisung anapronglaji Kibuba madang, Putir aser iba mapang aliba obendangertem madang noktaktsüla. 18Obendangeri aji kanga junga bushitsüla, aser pei adianu anema agütsüba kuliji tiyazü ta bushitetra, 19idangji pai pei adianu dak inyakang. Yamaji nai nenok rongnungi temenenji endoktsüla. 20Aser anünga alirtemi aji angashia tsübutsü, aser yamala temenenji nenok rongnung kodanga meinyaktsü. 21 Nai taochi mesayutsüla, taküm melen taküm, tenük melen tenük, tepu melen tepu, teka melen teka, tetsüng melen tetsüng.

TAZÜNGKUNEM 20

Tongbang Rara

1“Kodang ne tsükchirtem anema na tongbangi odir aser kor, talungtsü aser nisungtemji ne dang timba ta nai ngudir, parnokji tetsübuma, kechiaser Ijip nungi na anitetba Kibuba ne Tsüngrem ne den lir. 2Kodang na tongbangi odir, putir tejakleni arur nüburtem den jembitsü. 3Pai yamai ashitsü, ‘Angang, Oh Israel, tsükchirtem anema tanü nenok tongbang odagi. Nenok temulung ajema tekümdaktsü mesüra tetsübu. Parnok tsüngdang tatenten mesüra taoksa, 4kechiaser Kibuba ne Tsüngrem nenok den odagi, pai nenok asoshi tsükchirtem den raratsü aser nenok kümzüktsü.’ 5Ajiser tanishirtemi nübur dang ashitsü, ‘shibaisa ki tasen yanglur aji memeshitet lir, pai kidangi meyipa aotsü akok, aji oda mesüra pa tongbang nung süra, tangar nisungi aji meshitettsü. 6Shibaisa tsükmenatzü tema yur iba nungi süngjang mechidang? Pa kidangi meyipa aotsü akok, aji oda mesüra pa tongbang nung süra, tangar nisungi süngjangji agitsü. 7Shibasa tetsür asünga lir, saka la den ki meyimi lir? Pai kidangi meyipa aotsü akok, aji oda mesüra pa tongbang nung süra tangar nisungi la agitsü. 8Aser tanishirtemi nübur dang ano ashitsü, shibaisa tsübur aser temulung lula-a küma lir? Pa kidangi meyipa aotsüla; aji oda mesüra pa medemer pa ama temulung lula-a akümtsü.’ 9Tanishirtemi nübur dang jembiba atemdang nübur madak temeranger arkotong parnoki shimtsüla.

10“Kodang nai yimti ka anema raratsü arudir, yimjung yanglutsü mela-ang. 11Parnoki aji agizüka par süngkhüm lapoktsüra, idakji aliba nisung ajakji nenok kübok lia nenok tenzüktsü. 12Saka parnoki yimjung yanglutsü memulungra aser ne den rarara, iba yimtiji amaktsüla. 13Kodang Kibuba ne Tsüngremi aji ne nem bendanga agütsüdir, nai tebur ajak nok agi tepsettsüla. 14Saka tetsür aser tanurtem, shiruru aser yimti nung aliba ajak temakzükba ama nai agitsü akok, aser Kibuba ne Tsüngremi ne nem agütsüba tsükchir meyong temakzükbaji nai achitsü. 15Yimti koba na anasa aliba kintem meyong masü, na nungi talang nung oa aliba yimti ajak dang nai yamaji inyakang.

16“Saka Kibuba ne Tsüngremi ne nem senmangtsü agütsüba yimtitem nungji nai taküm ka danga teyutsü. 17Saka Kibuba ne Tsüngremi ne dang melaba ama, Hit nunger, Amor nunger, Kanan nunger, Periz nunger, Hiv nunger aser Yebus nunger ajak nai samatsütsüla. 18Aji oda mesüra parnoki par tsüngremtem tesempatsü mapa inyakba ajak nenok dang sayutsü aser nenoki Kibuba ne Tsüngrem anema temenen menatsü.

19“Kodang nai yimti ka agitsü asoshi mapang talangka aji makbangdir, idakji aliba süngdongtem nenoki pu bener oa malentsüla, kechiaser moapu nung aliba süngdongji nai nisung ama mokbangtsü ama? 20Saka süngdong kobasa tejang matangba süngdong ta nai meteta lir, itemji nai samatsütsü aser lensüktsü aser item nungjagi yimtiji melao tashi ne den raraba yimti anema nai meketa tenokdangtsü yanglutsü.

TAZÜNGKUNEM 21

Nisung Züksetba Atema Tenla

1“Kibuba ne Tsüngremi na alitsü agütsüba lima nungji moapu nung nisung kar, shibai zükset aji memeteti mepitaka ngura, 2nenok tambur aser obendanger aotsüla, aser pa tepsetba temeket yimtitem kopiga aji asadangtsüla, 3aser tasü mang anatiba nung aliba yimti tamburtemi mapa meinyakdangba aser alu maladangba nashi ka agitsüla. 4Iba yimti tamburtemi kodanga alu mayimba metsü meyokdangba tzü yima alidak lenten kati anir alutsü, aser lenten nungji nashi tekongji raksatsütsüla. 5Aser Levi jabaso putirtemi anasa arutsüla, kechiyong parnoki pa tenzüktsü, aser pa tenüng nung moatsütsü Kibuba ne Tsüngremi parnok shimtet, aser yamaji rongrong ajak aser züktepba ajak parnoki bendangtsü. 6Aser iba yimti tambur ajak shir tasü mang anasa alir, lenten nung nashi tekong raksaba manung teka metsüktoktsü. 7Ajiser parnoki ya oda ashitsü, ‘Onok teka agi iba zü metokshi, mesüra onok tenük agi ibai inyakya munguka; 8ne nübur Israel shirnok nai kümzük tai tokang, Oh Kibuba, aser tai makaba zü asoshi ne nübur Israel rongnung ataloka teyutsüma.’ Aser parnok dang azü tokshiba tai atoktsü. 9Yamaji Kibuba madang kechi shitak lir aji nai inyak dang tai makaba zü nenok rongnungi meshitettsü.

Tepuoker Tetsür Agiba

10“Kodang ne tsükchirtem anema na tongbangi odir, aser Kibuba ne Tsüngremi ne ket nung parnok agüja nai parnok tepuoker kümdaktsüdir, 11aser tepuokertem rongnungji tobur tajung tetsür ka ngua nai aginüra, laji ne kibutsü asütsü agitsü akok. 12Laji ner kidangi anir arua, la ku mejeptoktsü aser temezüng lentoktsü, 13aser lai tepuoker süoshi endoktsü, aser la tebu aser tetsü asoshi ita ka mang yima alitsü, iba sülenjiang nai la dangi aitsü aser la ne kinungtsü asütsü. 14Saka nai la maginüra, la onüleni la odakjang. Nai la sen yong mayoktsüla, mesüra alatsür ama mebenshitsüla, kechiaser nai la maksüdaktsüogo.

Mezüng Jabaso Senmang

15“Nisung ka kibutsü ana lira, pai ka dang meimer saka ka dakbo pai memeimer, aser tenapronglai pa nem jabaso sotsü, saka pa mezüng jabasoji pai memeimlai tama aso, 16kodang pei jabasotem nem pei senmang agütsüdir, pai pei mezüng jabaso senmangji pai memeimlai asoba jabasoji shiba tama aso ibaji paitoker pai meimlai asoba nemji pei mezüng jabaso senmangji agütsütsüla. 17Pai memeimlai asoba pei mezüng jabaso nemji pei akaba senmangji shilem anasü agütsütsüla. Kechiaser ibaji pei mezüng tashi tenzükbaji lir. Mezüng asoba jabaso senmangji pa meyong lir.

Tashi Mangaba Jabaso

18“Nisung kar jabaso tekong temerang aser tashi manga, oda pei tebu mesüra tetsüi arüjaka parnok dang tashi mangai lira, 19pa tebu aser tetsüi par yimti tamburtem dang süngkhümi pa anir arutsü. 20Aser parnoki yimti tamburtem dang ashitsü, ‘Ozü jabaso ya tekong temerang aser tashi mangar. Pai onoki ashiba mangar. Pa chidiyungdi aser yi agi mesepba nisung lir.’ 21Idangji yimti nung aliba nisung ajaki pa lung agi onseta südaktsütsüla. Nenok rongnungi nenoki temenenji endoktsüla, aser Israel ajaki ya angashia tsübutsü.

Ozüng Tapu Balala

22“Nisung kari tasütsü temsüa temenen menara, aser paji süngdong ka nung soseta südaktsür, 23pa temangji ammang tepiyong süngdong nungji mayutsüla, saka kasa anogo nungjisa pa remadoktsüla. Kechiaser shibasa soseta südaktsüdir, pa Tsüngrem atakatem kübok lir. Kibuba ne Tsüngremi nenok senmangtsü agütsüba linük nenoki memenentsüla.

TAZÜNGKUNEM 22

1  “Ne adianu nashi pungchi mesüra san len aia aoba ngura, nai aji metoktsütsüla, saka itemji pa dangi anir aotsüla. 2Saka ne adianuji na anasa melira, mesüra aji shir meyong nai memetetra, nai parnokji ner kidangi anir arua pai aji bushia maru tashi ayutsüla. Aser pa nem aji meyipa agütsütsüla. 3Yamajisa ne adianu Gado mesüra süoshi mesüra pa samaba kechisarena atema inyaktsüla. Nai itemji mereprangi metoktsütsüla.

Laoa Aliba Shiruru Yariba

4“Nai ne adianu meyong Gado mesüra nashi pungchi lenmang nung laoa ngura nai aji mereprangi metoktsütsüla. Shiruruji pei tetsüng agi menoktaktet tashi yariang.

Tetsür Tebur Tereprangtsü Tepila

5“Tetsür kati tebur süoshi mesobutsüla, mesüra tebur kati tetsür süoshi mesobutsüla, kechiaser shibaisa yamalaji inyakdir Kibuba ne Tsüngrem madang tesempatsü lir.

Ozü Tetsüti Kümzükba

6“Ne lenmang nung ozü sep ka süngdong nung mesüra ali nung aliba ngura, aser tetsütiji techanu manung mesüra entsü manung muka lira, 7nai techanuji agitsü akok saka tetsütijibo odaktsütsüla; angji na junga aser arishi langa alitsü.

8“Kodang nai ki tasen ka südir, kilemji meketa tetaktangtsü yangluang, anungji nisung kar kilem nungjagi tsükra iba taiji ner kibong madaki bena marutsü.

9  “Nai ne tsükmenatzü lu nung metsü tapu ana meproktsüla, nai yamaji inyakra nai prokba metsü aser tsükmenatzü anapronglaji menenadoktsü.

10“Nai nashi pungchi aser gado külemi alu maladaktsütsüla.

11“Nai tezüngsü aser kümpa sü na külemi taktepba sü mabentsüla. 12 Nai abenba sü nungji kinük pezüsülen sütsüng yangluang.

Tasüngtet Kiyimla

13“Nisung kati tetsür ka agia la den medemer külen laji maginüi, 14maksü mapa la dak enlokja la tenüng menükdakja, ‘Ni iba tetsür agi, aser ni la anasa arudang ni la dak tasüngtet aiür yimya mangu’ ta shira, 15idangji aiürla tebu aser tetsüi yimti tamburtem dangi süngkhümi laji tasüngtet ta kuli sayua anir arutsü. 16Aiürla tebui tamburtem dang ashitsü, ‘Ni kü jala iba nisung nem kibutsü asütsü agütsü, saka pai la sempar, 17aser ajiang pai la maksüdakja ashi, ni ner jala dak tasüngtet aiür yimya mangu. Saka ibai kü jala tasüngtet aiür yimya kuli lir.’ Aser parnoki yimti tamburtem madang sü lema toktsütsü. 18Aser yimti tamburtemi nisungbaji anir arua pa dak azüktsü. 19Parnoki pa dang senchi taribi, noklang ka achitsü, aser aiürla tebu nem aji agütsütsü, kechiaser iba nisungi Israel tasüngtet aiür madak tenüng tamajung bena arutsü. La pa kibutsü asütsü aser pa taküm ali tashi la paladoktsü makok.

20“Saka aji shitak ta putetra, oda la dak tasüngtet aiür yimyaji mungura, 21laji pei tebuer kishi-i anir adoka la yimti nüburtemi lung agi onseta südaktsütsüla, kechiaser la tebuer kidang nüktapangta inyakba ajanga Israel nung temenen benshi. Anungji nai nenok rongnungi temenenji endoktsüla.

Nüktapangtaba

22“Nisung kati tangar kinungtsü den nüktapangtaya ngura, tetsür shiba den tebur medem, aser tebursang den medemba tetsür tenapronglaji asütsü, yamaji nai Israel nung temenenji endoktsüla.

Ani-asünga Aliba Den Nüktapangtaba

23“Aniasünga aliba tetsür kar tebur kati yimti nung ajurua, la den nüktapangtara, 24nai tenapronglaji yimti süngkhümi anir adoka lung agi onsettsüla, tetsürlaji yimti nung liaka lai teyari asoshi mayimten, aser tebursangi pei kiyonger kinungtsü ka aibelendaktsü. Yamaji nai nenok rongnungi temenenji endoktsüla.

25“Saka aniasünga aliba tetsürji tebursang jagi alu nung ajurua la dak tashiyim amshia la den medemra, idangjibo tebur shibai la den medem paji dang asütsü.” 26Tetsürla dak nai kecha teinyak, lai tasütsüsa temenen kecha meinyak, kechiaser ibai nisung kati pei kiyonger anema apusor pa tepsetba ama dang lir. 27Kodang aniasünga aliba tetsürji pai alu nung angu, lai ayimten, saka la kümzüktsüsa yangji shinga maliasü.

Tasüngtet Aiür Den Medemba

28Nisung kati tasüngtet aiür ka shiba ano aniasünga mali, la ngua tashiyim agi la den medemra aser parnokji putetra, 29pai aiürla tebu nem senmen taribi shekel tenem agütsütsüla aser la pa kibutsü asütsü, kechiaser pai la raksatsü. Pa arishi tepiyong pai la paladoktsü makok.

30“Nisung shingaia pei tebu kinungtsü magitsüla, pai pei tebu yipten memenentsüla.”

TAZÜNGKUNEM 23

Kibubar Sentep Nungi Jentokba

1“Tebur shiba pei miim oset menüngrepa mesüra rangtoker ali, pa Kibuba sentepi maitsü.

2“Kita chiri Kibubar sentepi maitsü; terbuba putu tashi pa dak jakzükba pur shingai Kibubar sentepi maitsü.

3  “Ammon nunger mesüra Moab nungeri Kibubar sentepi maitsüla; putu terbuba tashi parnok shinga Kibubar sentepi maitsü. 4 Kechiaser nenok Ijip nungi adokdang parnoki chiyungtsü aser tzü bener nenok lenji maru; aser nenok atakatemdaktsütsü asoshi Mesopotamia nung aliba Pethor nungi Beor jabaso Balaam parnoki a-a. 5 Aji saka Kibubai Balaam o manga, saka Kibuba ne Tsüngremi atakatemji na asoshi temoatsü kümdaktsü, kechiaser Kibuba ne Tsüngremi na meim. 6Nai ne taküm tepiyong parnok den yimjung aser tembar meyanglutsüla.

7“Nai Edom nunger mesempatsüla, kechiaser pa nenok sosem lir. Nai Ijip nunger mesempatsüla, kechiaser par lima nung na aener liasü. 8Putu asembuba nung asoba parnok chirtemi Kibubar sentepi aitsü akok.

9“Kodang nai ne tsükchirtem anema apusodir, temenen mapa ajak nungi meshiteta alitsüla. 10Nenok rongnung nisung kar aonung yimtokba agi memerüki kümra, pa tanendak nungi adokadoktsüla, pai tanendaki maitsüla. 11Saka kodang nikongdang arudir pai tzü chigutsüla, aser anü yir külen pa tanendaki arutsü.

12“Ano tanendak kimalen metsümeshidak ka akatsüla, aser nai ajagi aotsüla. 13Ne nok o nü rongnung ali atepba ka alitsüla, aser kodang na tanendak kimalen metzü-meshidir, nai aji agi aliji atutsüla aser nai endokbaji nembanga yutsütsüla. 14Kechiaser Kibuba ne Tsüngrem nenok kümzüktsü aser ne tsükchirtem nenok ket nung bendanga agütsütsü asoshi nenok tanendak senzür. Nenok tanendakji meshiteta alitsüla, anungji pai nenok rongnung memeshiba mangutsü aser meyipa maotsü.

Ozüng Tapu Balala

15“Alar kar pei kibur nungi jena arua ne den lira, nai pa kibur nemji magütsütsüla. 16Nenok rongnung pai linüdak, aser pai koba yimti nung alitsü mulunga shimtetdir yangji pa ne den lidakjang; nai pa dak tamajung mebenshitsüla.

Nüktapangta

17  “Israeltsür süshia Israel tebur süshia shinga tekülemdak nüktapangtar makümtsüla. 18Kibuba ne Tsüngrem kidangi tatemzükba tenla asoshi tetsür kati mesüra tebur kati nüktapangta mapa nungi taa anguba sen kecha bener marutsüla, kechiaser Kibuba ne Tsüngrem madang anaprongji tesempatsü lir.

Tetemlok Agiba

19“Ne adianu dang tetemlok, oda sen nung süshia chiyungtsü mesüra aputepa agiba kechisarena nung tetemlok keter maputsütsüla. 20Bendanger ka dang nai tetemlok agi aputsütsü akok, saka nai koba lima agitsü yidagi idakji Kibuba ne Tsüngremi na moatsütsü asoshi pei adianu nem nai tetemlok keter maputsütsüla.

Tatemzükba

21  “Kodang nai Kibuba ne Tsüngrem dang langka atemzükdir, aji nai memenui agütsütsüla, kechiaser Kibuba ne Tsüngremi atangji aji na nungi agitsüsa, aser aji na asoshi temenen alitsü. 22Saka nai matemzüki lira na asoshi aji kecha temenen malitsü. 23Ne tebang nungi kechisa jembizüka yokogo nai aji inyaktsüla, kechiaser nai ne mulung agi Kibuba ne Tsüngrem dang atemzükogo.

24“Kodang pei kiyonger tsükmenatzü lui na idir, tsükmenatzü jangji nai chinüba ama achitsü akok, saka nai ne molok nung kecha meinoktsüla.” 25Kodang ne kiyonger tsük lui na idir nai ne teka agi tsükjongji meta achitsü akok, saka ne kiyonger tsük noktaka aliba dakji nai ninok meyoktsüla.

TAZÜNGKUNEM 24

Palaba

1  “Tebur kati tetsür ka den kibong kümer külen la dak langka tajitettsü adokba yong lai pa mepeladaktsüi kümadokra, pai la nem tepalaba shiti ka zülur la ket nung agütsür par ki nungi la yoktsü, 2aser la par ki nungi pilaa or tangar nisung ka kibutsü kümra, 3aser tanabuba kinungpu jagi la anema mepelai kümadokra, pai la nem tepalaba shiti zülur la nem agütsür par ki nungi yokadokra, mesüra pa süadokra, 4idangji la mezüng kinungpu shibai la paladok, lai memerüki aküm nungji pai la tanaben agitsü makok. Kechiaser Kibuba ne Tsüngremi ne nem senmangtsü agütsüya aliba limaji nai memenendaktsütsüla.

Ozüng Tapu Balala

5“Kodang tebur kati tetsür tasen ka agidir, pa tongbangi maotsüla, mesüra pa nem mapa kecha magütsütsü. Küm kabo pa kidang sadem sadema lidaktsütsüla aser pai agiba tetsürji pelaa lidaktsütsüla.”

6“Shingaia temenüngba lung mesüra temenüngba lungpak temaba agi azüngashi masütsüla, ashiko pai aji taküm ka agi azüngashir asütsü.

7  “Nisung kati pei nisung Israel chirtem kar auya-a, aser pa dang alar ama benshiba mesüra ayokba putetra, nisung auyasangji asütsüla, Yamaji nenok rongnungi nai temenenji endoktsüla.

Zütsüra

8  “Zütsüra adokra Levi putirtemi nenok dang kechisa sayudir itemji nendaka inyaktsü kümdangang. Ni parnok dang melaba ama nenoki itemji kümdanga benshitsüla. 9 Nenok Ijip nungi adokdang lenmang nung Kibuba ne Tsüngremi Miriam dak kechi inyak bilemtetang.

Oset Aputepba

10  “Kodang ne kiyonger nem nai langka aputsüdir, pai azüngashir apuba osetji abeni nai par kidangi maitsüla. 11Na kima atatsüla, aser shiba nem nai aputsü pai azüngashiba osetji ne dangi bener adoktsü. 12Nisungbaji sensaker süra pai azüngashiba oset nungji nai memejangtsüla. 13Kodang anü yidir nai pa nem pei osetji meyipa agütsütsüla, anungji pa iba nungji mejangtsü; aji na asoshi Kibuba ne Tsüngrem tsüngdang temeshiba ama alitsü.

14“Nai ne linük yimtitem nung alir ne adianu süshia aener süshia sensaker, anüngakonger aser shiba ayanger lir pa mekangshitsüla. 15Anü maidangsa nai pa anogoshia taaji agüjang, kechiaser pa sensaker asünung aji imlaseta lir.

16  “Chirnur asoshi tsürabur mesüdaktsütsüla, mesüra tsürabur asoshi chirnur mesüdaktsütsüla, nisung shia pei temenen asoshi südaktsütsü.

Aener, Lajar Aser Amitsür

17“Aener mesüra lajar anema nai ochibaji metusatsütsüla, mesüra amitsür süoshiji nai kuli mesüa teyu, 18saka Ijip nung na alar süa liasü, aser Kibuba ne Tsüngremi idak nungjagi na alangzük ta bilemtetang.

19  “Kodang nai ner lu rudir, aser alu nungji nai tsükpong ka amadokdir, nai aji abentsü maotsüla, aji aener, lajar aser amitsür asoshi alitsü, anungji nai inyakba ajak nung Kibuba ne Tsüngremi na moatsütsü 20Kodang ner oliv dong nungi süngjang ongdir, süngsang bushia tanaben maotsüla, aji aener, lajar aser amitsür asoshi alitsü. 21Kodang ner tsükmenatzü jang bendendir, nai tanaben ajagi maotsüla; aji aener, lajar aser amitsür asoshi alitsü. 22Na Ijip nung alar süa liasü ta bilemtetang. Anungji ni ne dang ibai inyaktsü melar.

TAZÜNGKUNEM 25

1“Kodang nisungtem rongnung mangatettep adokdir, parnoki aji obendangdaki bener arutsü, aser obendangertemi parnok o bendangtsü aser parnoki ochishisangji metendaktsütsü, saka aibelena alisangji aitsütsü. 2Taisang dakji azüktsü temsüa lira, obendanger jakdang paji ali nung mepitaka yutsütsü aser pai aibelenba yari pa dak zükdaktsütsü, 3 saka pai lirben dak tali azüktsü melatsü makok. Iba dak alia pa dak zükdaktsüra, nai ne adianu ne nükdang ludaktsür.

4  “Nashi pungchi mo anetdang nai tebang tenembang.

5“Adianu külemi aliba mapang parnok rongnung kar techir meyutsü südokra, tasüba kinungtsüji aener ka den kibong mekümdaktsütsüla. La tebuba adianui la agitsü aser kibong küma la dang adianu kinungpur ka teinyaktsü mapa inyaktsü. 6Lai asoba mezüng jabasoi tasüba adianuji melentsüla, anungji Israel nungi pa tenüngji meindoktsü.

7  “Saka nisungba jagi pei adianu kinungtsüji maginüra, idangji lai yimti süngkhüm nung tamburtem dangi oa ashitsü, ‘Kü kinungpu adianui pa adianu tenüng Israel nung ayutsü memulunger; pai kü dang pei adianu kinungpur teinyaktsü mapa meinyakli asür.’ 8Idangji yimti tamburtemi pa jar jembitsü, saka pai memulungi, ‘Ni la agitsü memulunger’ ta shira, 9idangji pei adianu kinungtsüi Israel tamburtem tsüngdang pa dangi tur pa tetsüng nungi tsüngsem semzüktsütsü aser pa tejak nung metsü metsülokja ashitsü, ‘Nisung shibai pei adianu kibong tarensen meyanglunür, pa dang iba amai inyaktsü.’ 10Aser Israel nung pa tenüng dang, ‘Tsüngsem salaba kibong ta ajatsü.’

Tim Masüba Mapa

11“Kodang nisung ana raratepdir aser ka kinungtsüi pei kinungpu den raraya aliba ket nungi pei kinungpu kümzüktsü asoshi arua tangarba dak la teka songtoka miim oset nung sotakra, 12nai la dang kecha maochi-i la teka leptoktsüla.

Chichiba Touzükba

13  “Ne juli nung touzükba lung tapu balaka, taret aser tepungba mayutsüla. 14Ner kidang tetakzükba melok balala tulu aser tila mayutsüla. 15Kibuba ne Tsüngremi ne nem agütsüba linük nungji na arishi talang alitsü asoshi chichiba touzükba shitak aser tetakzükba tabensa shitak ayutsüla. 16Kechiaser iba ama mapa inyaker, oda ochi mashi mapa inyaker ajak Kibuba ne Tsüngrem madang tesempatsü lir.

Amalek Samatsütsü Ashiba

17  “Nenok Ijip nungi adokdang lenmang nung Amaleki kechi inyak bilemtetang. 18Kodang na tashi maiti aser lula-a liasü, pai ne den ajurutepa aser ne sülen alir tashi maitertem pai leptangadok, pai Tsüngrem metsübu. 19Anungji kodang Kibuba ne Tsüngremi nenok meketa aliba tsükchir ajak nungi nenok nem anisüngzük agütsüdir, anüng kübok Amalek bilemtetba nai aitoktsüla. Nenoki aji mamatsüla.

TAZÜNGKUNEM 26

Mezüngbuba Süngjang Tenla

1“Kodang Kibuba ne Tsüngremi nenok nem senmangtsü agütsüba linüki nenok idir, aser aji atsüngtetdir, aser iba nung lidir, 2 Kibuba Tsüngremi nenok nem agütsüba lima nungi anguba ajak mezüng süngjang nenoki bener arutsü, aser aji molok nung yuang, aser Kibuba ne Tsüngremi pa tenüng koba linük nung lidaktsütsü shimdir ajagi bener aotsüla. 3Iba mapang nung putir bangdakbuba dangi na aotsüla, aser pa dang shiang, ‘KIBUBAi asen tsürabur dang nangzükba limai ni aita lir ta tanü ni KIBUBA ne Tsüngrem dang sangoktsür.’ 4Aser putiri ne ket nungi molokji agizüktsü, aser aji Kibuba ne Tsüngrem tenladak jakdang ayutsü. 5Ajiser nai Kibuba ne Tsüngrem jakdang ashitsü, ‘Kübu nemzüa aliba Aram nunger ka liasü, pa telok tila ka den Ijip nung alitsü alu, aser yangji pa tashi tulu kin ka aküm aser jenti aren, 6Ijip nungeri onok dang sashia benshi, onok ala-ashi, aser onok dang alar mapa nungloktsü; 7saka ozü tsürabur Tsüngrem dang onoki ayimten, aser Kibubai onok ola angashi, aser onok ala-ashiba, onok belema inyakba, aser onok kangshiba angu: 8aser Kibubai tashi tait teka, aser tepen songtoka, tetsübutsü tulu, temaitsü, aser sayatenya agi, onok Ijip nungi anitet; 9aser iba limai onok anir arua, pai onok nem, mamatzü aser ninang mojitzü ayimba lima agütsü. 10Aser tang, ajiang, Oh Kibuba, nai kü nem agütsüba, ali nungi adokba mezüngbuba süngjang, ni bener arur.’ Aser nai Kibuba ne Tsüngrem madang aji toktsütsü aser Kibuba ne Tsüngrem madang külemang, 11aser Kibuba ne Tsüngrem nem aser ner kibong nem agütsüba tajung ajak, na, aser Levi nunger, nenok rongnung aliba aener dena pelatepang.

Kümsembuba Ter Shilem Tenla

12  “Kümsembuba nung, aji ter shilem agütsüba küm, kodang nai züsentetba ajak nungi ter shilem agütsübaji temdir, idangji nai aji Levi nunger, aener, tebu malir aser amitsür nem agütsütsüla, anungji parnoki nenok yimti süngkhüm nung aji chia tip atemtsü. 13Idangji Kibuba ne Tsüngrem dang yamai shiang, ‘Nai kü dang melaba ama, ni ozü ki nungi ter shilem ajak agienogo, aser aji Levi nunger, semloka alir, tebu malir aser amitsür nem agütsüogo. Ne temelaba nungi ni meyipa mao, mesüra itemji ni mamadok. 14Ni itemji kü mangyim dang mechika, ni memerüki alidang ni kecha meindoka, mesüra tasen asoshi kecha magütsüka. Kibuba kü Tsüngrem dang ni angaogo nai kü dang melaba ajak ni inyakogo. 15Ne temeshi talidak kotak nungi reprangzüka yokang, aser ne nübur Israel aser ozü tsürabur dang nangzükba, mamatzü aser ninang mojitzü ayimba lima nung onok moajangma.’

Tsüngremi Israel den Tezüngzüktepba Yangluba

16“Kibuba ne Tsüngremi telatet ozüng aser yimsü ozüngtemji kümdanga benshitsü asoshi, itemji ne mulung ajak agi aser ne nela ajak agi benshitsü tanü melar. 17Kibubaji ne Tsüngrem asütsü, pa lenmang nung jajatsü, pa telatet ozüng, aser pai melaba pa obendangba aser pa o angatsü tanü nai atemzükogo. 18 Aser Kibubai tanü metetdaktsüba ama, oda pai nangzükba ama nenokji pa nübur, pa senmang, aser nenoki pa ozüngji benshitsü. 19Pai metetdaktsüba ama nenokji pai yangluba kin ajak madak tenüngsang, tetushi nung na temaba kümdaktsütsü aser pai nangzükba ama Kibuba ne Tsüngrem asoshi nenokji temeshi nübur alitsü.”

TAZÜNGKUNEM 27

Tsüngremer Ozüng Lung Nung Züluba

1Idangji Mosa aser Israel tantsü tambutemi nüburtem dang ashi, “Tanü ni nenok nem agütsüba temelaba ajak benshiang. 2Aser Kibubai nenok nem agütsüba limai nenok Yordan ajanga aiba anogo nungjisa, lung tulu kar shinü teper nenoki azünga ayutsüla. 3Aser Kibuba nenok tsürabur Tsüngremi nenok dang nangzükba amato Kibuba ne Tsüngremi nenok nem agütsüba, ninang mojitzü aser mamatzü ayimba limai nenok aitsü asoshi nenoki item tema nung iba ozüng o ajak zülutsüla. 4Kodang nenoki Yordan ajangdir, tanü ni nenok dang melaba ama item lungji Ebal tenem nung azüngtsü, aser nai shinü ateptsüla.”

5Yangji Kibuba ne Tsüngrem dang tenladak ka, lung agi yanglutsüla. Iba manungji merang oset kecha mataloktsüla 6Kibuba ne Tsüngrem tenladakji mangenteti aliba lung agi yanglutsüla, aser iba nungji Kibuba ne Tsüngrem dang nai tarongba tenla agütsütsüla. 7 Idakji yimjung tenla agüja aji achitsü, aser nenoki Kibuba ne Tsüngrem madang pelateptsü. 8Aser nai azünga ayuba lung nungji iba ozüng o ya kanga jangja-a zülua ayutsüla.

9Idangji Mosa aser Levi pututemi Israel ajak dang ashi, “Ajem ajema angang Oh Israel! Tanü na Kibuba ne Tsüngrem nübur kümogo. 10Anungji nai Kibuba ne Tsüngrem Oh angang, aser Pa temelaba ozüng koba tanü ni nenok dang melar aji benshiang.”

Temoatsü aser Atakatem

11Panüjisa Mosai nüburtem dang ozüng agüja ashi, 12 “Kodang nenoki Yordan atendir item yagi nüburtem moatsütsü asoshi Gerizim tenem nung noktaktsüla: Simeon, Levi, Yihuda, Issakar, Yosef aser Benjamin, 13aser atakatemtsü asoshi item ya Ebal tenem nung noktaktsüla: Reuben, Gad, Asher, Zebulun, Dan aser Naftali. 14Levi nungeri Israel nübur ajak dang ola tulu agi ashitsü.”

15  “Shibai Kibuba madang tesempatsü mapa teka agi chiteta süngyanglu mesüra mulusa-a yanglur aji temiimdak yudir, pa atakatem sang.”

“Aser nisung ajaki langzütsü, ‘Amen.’

16  “ ‘Shibai tebu mesüra tetsü akhüm metsübulir pa atakatem sang.’

“Aser nisung ajaki ashitsü, ‘Amen.’

17“ ‘Shibai pei kiyonger ali arrtsü atendir pa atakatem sang.’

 “Aser nisung ajaki ashitsü, ‘Amen.’

18  “ ‘Shibai nükpoker lenmang mashileni anidir pa atakatem sang.’

“Aser nisung ajaki ashitsü, ‘Amen.’

19  “ ‘Shibai aener, tebu malir, aser amitsür obendangba ajusatsüdir atakatem sang.’

“Aser nisung ajaki ashitsü, ‘Amen.’

20  “ ‘Shibai pei tebu kinungtsü den nüktapangtadir, pai tebu teperem sü salatsü nungji pa atakatem sang.’

“Aser nisung ajaki ashitsü, ‘Amen.’

21  “ ‘Shibai shiruru kar den danga nüktapangtadir pa atakatem sang.’

“Aser nisung ajaki ashitsü, ‘Amen.’

22“ ‘Shibai pei adianu, tebuer jala mesüra pei tetsüer jala den nüktapangtadir pa atakatem sang.’

 “Aser nisung ajaki ashitsü, ‘Amen.’

23  “ ‘Shibai pei kinungtsü tetsü den nüktapangtadir pa atakatem sang.’

“Aser nisung ajaki ashitsü, ‘Amen.’

24“ ‘Shibai pei kiyonger miima tepsetdir pa atakatem sang.’

“Aser nisung ajaki ashitsü, ‘Amen.’

25“ ‘Shibai tai makaba nisung tepsettsü asoshi süpokrem agidir pa atakatem sang.’

“Aser nisung ajaki ashitsü, ‘Amen.’

26  “ ‘Shibai iba ozüng o meinyaki makangdaktsür pa atakatem sang.’

“Aser nisung ajaki ashitsü, ‘Amen.’

TAZÜNGKUNEM 28

Tashi Angaba Temoatsütem

(Lev. 26.3-13; Taz. 7.12-24)

1  “Ni tanü nenok nem agütsüba, pai melaba ajak benshitsü Kibuba ne Tsüngrem o nenoki nentaka angadi süra, Kibubai alima kin ajak madak nenok yutsütsü, 2aser Kibuba ne Tsüngrem ola nenoki angadi süra, item temoatsü ajak nenok madaki arutsü, aser nenok sülen anitaktsü.

3“Yimti nung na moatsü aser alu nung na moatsü.

4“Ne temang metsü, ne ali süngjang, aser ne kiset shiruru techanu, aser ne nashi aser ne san chanu züinba nung na moatsü; 5Ne molok aser semki moatsü.

6“Na arudang na moatsü, aser na aodang na moatsü.

7“Tsükchir shibai ne den raradir Kibubai ne jakdang jenshidaktsütsü, na anema parnoki lenmang kati arutsü, saka parnoki lenmang tenetsüi ajentsü.

8“Ner jendang nung aser ne ket agi inyakba ajak nung Kibubai ne dangi temoatsü arung ta melatsü, aser Kibuba ne Tsüngremi ne nem agütsüba lima nung pai na moatsütsü.

9“Kibuba ne Tsüngremi melaba nai benshira aser pa lenmang nung jajara, Kibubai ne dang nangzükba ama pa asoshi pai na temeshi nübur ka kümdaktsütsü. 10Aser alima kin ajaki na Kibuba tenüng nung ja-a lir ta angutsü, aser parnoki na tsübutsü. 11Kibubai nenok tsürabur dang ne nem agütsütsü ta nangzükba lima nung, ne mang metsü nung, ne kiset shiruru nung, ne ali süngjang nung Kibubai na jenti azükarudaktsütsü. 12Kibubai ne teka mapa ajak moatsütsü asoshi aser ne ali nung mapang shitak nung tzünglu yoktsü asoshi pai terizüngdak tajung anüng lapoktsütsü. Nai kin aika nem aputsütsü, saka nai parnok nungi maputsü. 13Kibubai na teben masü tekolak kümdaktsütsü; aser na teküboklen masü, temalen dang alitsü; nai dang Kibuba ne Tsüngrem temelaba koba tanü ni ne nem agütsüdar aji kümdanga benshira, 14tanü ni nenok nem agütsüba ozüng nungi pila-a tangar tsüngremtem tenzüktsü asoshi tajichilen mesüra tabeleni temeyip.

Tashi Mangaba Temerenshi

(Lev. 26.14-46)

15“Saka tanü ni nenok nem agütsüba Kibubai melaba aser pa telatet ozüng ajak benshitsü asoshi Kibuba ne Tsüngrem ola mangali süra, item atakatem ajak ne dangi arutsü.

16“Yimti nung na atakatemtsü, aser alu nung na atakatemtsü 17Ne molok aser semki atakatemtsü. 18Ne temang metsü, ne ali süngjang, ne nashi aser san telok chanutem atakatemtsü. 19Na tarudang, aser na taodang atakatemtsü.

20“Nai ni senzüka tokja nai inyakba tamajung atema na mesamatsü tashi aser na yakta marem tashi, Kibubai ne madak nai inyakba ajak nung atakatemba, timtem tejashitsü, aser tarütsüba, yoktsü. 21Na koba lima agitsü idagi iba lima nungi na mesamatsü tashi Kibubai ne dak timtemtsü wara menaloka yutsütsü. 22Kibubai ne dak yaretba, shirang aitba, temang awakba, temang tsüka metaba, aser nok agi, poksatsüba agi, poknüng awakba agi tongdaktsütsü; aser item jagi na mesamatsü tashi na arishitsü. 23Aser ne kolak temalen aliba anüngji yongmenyin alitsü, aser ne teküboklen aliba alimaji merang alitsü. 24Ner lima nung tzüngluji Kibubai auyi aser anak kümdaktsütsü, na mesamatsü tashi anüng nungi aji ne madak aludaktsütsü.

25“Ne tsükchir madang Kibubai na kokdaktsütsü, nai parnok anema lenmang kati aotsü, saka na lenmang tenetsüi parnok madang ajentsü, aser alima yimli ajak madang na taoksatsü ka asütsü 26Ne tasü mangji anüng ozü ajak, aser alima shiruru asoshi chiyungtsü asütsü, aser parnok aridoktsü shinga malitsü. 27Kibubai na kodanga manepba Ijip tepzünu agi, komo agi, poktetra agi, anakra agi tongdaktsütsü. 28Kibubai ne dak yiamataba, tenük apokba, aser taoksaba agi tongdaktsütsü; 29aser nükpokeri ammang nung ajemzüa jajaba ama na anüngdang ajemzüa jajatsü, aser na taküm nung azükaru malitsü, saka teti na dang kangshitsü aser rakzükraktemtsü, aser na kümzüktsü shinga malitsü.

30“Nai tetsür ka aniasüngtsü, saka tangar nisungi la den ayiptsü; nai ki yanglutsü, saka iba nung na malitsü, nai tsükmenatzü lu ayimtsü, aser iba süngjang nai magitsü. 31Ne nashi pungchi ne nükdang tepsettsü, saka nai aji machitsü; ne gado ne jakdang teka yia rakzüka bener oadoktsü, saka ne nem meyipa meshilangtsütsü. 32Ne jabaso jalatem tangar nisung nem agütsütsü, aser anogo tepiyong nai parnok yongyaseta reprangnüaka mangutsü aser ne ket nung kecha tashi malitsü. 33Ne ali süngjang aser nai züsentetba ajak, nai memetetba kin katiang chiadoktsü aser na dang kangshitsü aser menüngsa-a yoktsü; 34anungji nai kechi ngudir iba tanguba jagi na yiamata-a kümdaktsütsü. 35Ne tetsüng temesüla nungi tekolak tekojong tashi Kibubai ne dak tepzünu komo tamajung adokdaktsütsü, koba nungi na anebtsü makoktsü.

36“Kibubai na aser nai ne madak ayuba chuba, nai mesüra ne tsüraburtemia memetetba kin dangi yoktsü, aser yangji nai tangar tsüngremtem tenzüktsü. 37Kibubai na koleni aridokdir iba nüburtem rongnung na taoksatsü, tatishitsü aser tansütsü ka akümtsü.

38“Nai metsü jenti alui bener aotsü, saka tera dang arutsü, kechiyong süngkui aji chimatsütsü. 39Nai tsükmenatzü lu ayimtsü aser inyaktsü, saka nai tsükmenatzü yi majemtsü mesüra tejang mebendentsü, kechiyong meseni itemji achitsü. 40Ner li ajak nung oliv süngdong alitsü, saka nai ne sasa totzü memezütsü, kechiyong ne oliv jetzükadoktsü. 41Na nungi jabaso jalatem jakzüktsü, saka parnok ne meyong masütsü, kechiyong parnok tepuokdaki aitsü. 42Aser ne süngdong ajak aser ne ali süngjang süngkui metembangtsü.

43“Ne den aliba aener ang ne dang temaba temabai atutsü, aser na tekübokba tekübokbai alutsü. 44Pai ne nem aputsütsü, saka nai pa nem maputsütsü; pa tekolak, aser na teben alitsü. 45Aser na mesamatsü tashi, item atakatem ajak ne madak arutsü, aser na arishitsü, aser na manebtsü, kechiyong pai ne dang melaba aser pa telatet ozüngtem benshitsü asoshi Kibuba ne Tsüngrem ola manga. 46Itemi teti asoshi na aser ner chirnur dang temaitsü aser tesüngmangtsü alitsü; 47kechiaser na talubosa aliba mapang nung nai Kibuba ne Tsüngrem pelashishia aser ne mulung tepela agi metenzük; 48aji asünung yaseta, tzüraseta, mangsa, aser oset ajak agi anüngakonga Kibubai na anema yokba tsükchirtem nai tenzüktsü aser na mesamatsü tashi, pai na tekong nung merang süngra pungoktsütsü.

49“Mongzü yimzür ama, Kibubai na anema talang nungi, alima tatem nungi kin ka anir arutsü, iba kin oshiji nai mangatettsü; 50tereprangtsü tetsübutsü kin ka shirnoki tambur dang akhüm metsübur mesüra lanur dang maochir. 51Na mesamatsü tashi parnoki ne kiset shiruru chanu aser ne ali süngjang achitsü. Parnoki ano na meraksatsü tashi ne nem tsük, tsükmenatzü yi tasen, totzü mesüra, ne nashi aser san telok metoktsütsü. 52Nai temulung alemba jara talang ajakji chirepa malu tashi pai ne yimtitem makbangtsü. Kibuba ne Tsüngremi ne nem agütsüba linük nung ne yimtitem ajak parnoki amaktsü.

53“Tsükchirtemi na lungbanga yur timtemdaktsüba agi nai pei chirnur, Kibuba ne Tsüngremi ne nem agütsüba, ne jabaso jalatem shi achitsü. 54Ajemaluba aser temeim agi sünga aliba nisungi pei adianu mesüra pai meimba kibutsü aser anünga aliba par chirtem dang maochitsü. 55Aji asünung pai pei chir shi chia aliba shiji parnok shinga nema magütsütsü. Kechiaser tsükchirtemi nenok yimti ajak makbanga nenok timtemdaktsüba jagi pa tachitsüji aji dang asütsü. 56Nenok rongnung tetsür shiba anebaneba aser anükanüka, oda tanepba aser anükba agi la tetsüng ali nung majemdaknütsüsa lir, lai la meim kinungpu dang aser la jala dang, 57 aser la nu menden nungi aluba nusem, aser lai asoba tanur dang mejungi benshitsü; kechiyong ne yimti nung ne tsükchirtemi kangshia aser nungtepdakja lungbangba agi, kechisarena agi anüngba agi lai miima itemji achitsü.

58“Iba kaket nung zülua aliba ozüng o ajak nai kümdanga mebenshira, aser Kibuba ne Tsüngrem sentsüwangshi aser tetsübutsü tenüngji metsübura, 59idangji Kibubai na aser ne semchirtem dak temerenshi tulu, talangka maneni aliba tetsübutsü wara, tejashitsü aser anebtsü makokba tashitak yoktsü. 60Aser Ijip tashitak, koba nai tsübua liasü ajak pai ne dangi tanaben bener arutsütsü, aser item jagi ne dak azüita alitsü. 61Ano na mesamatsü tashi, iba ozüng kaket nung zülua maliba, shilushira ajak aser wara ajak Kibubai ne madak bener arutsütsü. 62Nenok ken anüng nung petinu yongsük ama liaka, nenok yongsük ishika dang asütsü. Kechiaser nai Kibuba ne Tsüngrem ola manga. 63Kibubai mapang ka nung nenok dang ajungtsü aser renloka kümdaktsütsü pelaba ama, yamaji Kibubai nenok samatsütsü aser südaktsütsü pelatsü; aser nenok koba lima agitsü air, iba lima nungi nenok atsütoktsü.

64“Aser alima külen tatem nungi külen tatem tashi kin ajak rongnung Kibubai nenok prokshidaktsütsü; aser nai aser ne tsüraburi memetetba tangar tsüngremtem süng aser lung tsüngremtem tenzüktsü. 65Item kin rongnung na sadoksadoka malitsü, aser ne tsüng anisüngzük makatsü, saka Kibubai ne nem temulung zürepba, metizüktsüba tenük, aser lurepa aoba tanela agütsütsü; 66ne taküm ne madang arentaka dang alitsü, aser nai aonung aser anüngdang tsübutsü; aser ne taküm indang kecha shitak malitsü; 67ne mulungjang nung tetsübu agi aoksadaktsüba yong, aser ne tenük agi kechi angur iba yongji, anepdang nai ashitsü, ‘Nikongtsütsü ta danga Tsüngremi kümdaktsülasang! Aser nikongdang nai ashitsü, Anepdanga ta danga Tsüngremi kümdaktsülasang!’ 68Kibubai na tanaben Ijipi rong nung bener arutsütsü, koba lenmang indang ni ne dang, nai joko aji tanaben mangutsü, ta ashi aser yangji nenok sasa alar aser alatsür küma ayoktsü, aser shingai nenok malitsü.”

TAZÜNGKUNEM 29

Moab Nung Tezüngzüktepba Yangluba

1 Kibubai Israel nüburtem den Horeb nung tezüngzüktepba yangluba dak alaka, Pai Mosa dang Moab lima nung parnok den tezüngzüktepba yanglutsü melaba o itemi lir.

2Idangji Mosai Israel ajak aja, aser parnok dang ashi, “Ijip lima nung Kibubai Farao dang, pa tenzüker ajak dang, aser par linük ajak dang inyakba nenoki nguogo. 3Tetendangba tulu, temaitsü, aser sayatenya tulutemji nenoki nguogo, 4saka tanü tashi Kibubai nenok nem metettsü temulungjang, tangutsü tenük, tangashitsü tenarong magütsü. 5Küm lir ni nenok arem nung aniogo aser nenok süoshi tejen maküm, mesüra nenok tsüngsem meraksa. 6Nenoki ni Kibuba nenok Tsüngrem ta metettsü asoshi nenoki amtsük machi, aser yi mesüra mejemtzü majem. 7 Kodang nenok iba linüki aru. Heshbon chuba Sihon, aser Bashan chuba Og, asenok anema tongbangi adok, saka asenoki parnok akok, 8 aser par lima asenoki agi, aser aji Reuben nunger nem aser Gad nunger nem aser Manase kidong tesadang nem senmangtsü asoshi agütsü. 9Anungji nenoki inyakba ajak nung azükarutsü asoshi iba tezüngzüktepba otem temulung nung yuang aser itemji inyakang.

10“Tanü nenok ajak Kibuba nenok Tsüngrem madang noktaka lir, ner tanishirtem, ner kidongtem, ner tamburtem aser bangdakpurtem, oda Israel nisung ajak, 11ner tila tanurtem, ner kinungtsütem, aser ne tanendak rongnung aliba aener, süng bener nungi tzütar tashi, 12oda Kibuba ne Tsüngremi tanü ne den yangluya aliba, Kibuba ne Tsüngrem tezüngzüktepbai aser Pa tenangzükbai na itettsü, 13oda Pai ne dang jembiba ama, aser Pai ne tsüraburtem, Abraham, Isak, aser Yakob dang nangzükba ama, oda tanü pai na pei nübur kümdaktsütsü, aser Pa ne Tsüngrem kümdaktsütsü asoshi. 14Iba tezüngzüktepba aser tenangzükba ya, ni nenok den dang yanglur masü; 15saka shiba tanü asenok den Kibuba asen Tsüngrem madang noktaka lir pa den, aser ano tanü asenok den matenba pur den, ni yanglur.

16“Asenok Ijip nung koma liasü aser iba lenmangi arudang tangar kintem koma ajanga aru aji nenoki meteta lir. 17Aser parnok rongnung aliba, par süngyanglu, süng aser lung, taribi aser hon, parnok tesempatsü nenoki nguogo. 18 Nenok rongnung tebur mesüra tetsür, kidong mesüra kin nungi Kibuba asenok Tsüngrem nungi temulung meyipa oa item kin tsüngremtem külemba agi taku tera madokdaktsütsü kümdangang. 19Kodang ibala nisungi iba tezüngzüktepba atakatem otem angashia pei mulung nung, ‘Ni temulung meranga jajaba ni tesünep nung alitsü’ ta shidir, tzü yima aliba limaji takong agi samatsütsü. 20Kibubai pa dang tai matoktsü, saka idangji Kibuba ain adokba aser pa tenükmiba iba nisung anema jangrutsü, aser iba kaket nung zülua aliba atakatem ajak pa dak kaotsü, aser pa tenüng anüng kübok nungi Kibubai aitoktsütsü; 21aser iba ozüng kaket nung züluba, tezüngzüktepba atakatem ajak ama, Israel kidong ajak nungi pa tamajung nem agütsütsü asoshi Kibubai pa agitetadoktsü.

22“Idangji tarutsü aliba putu nung nenok chirnur ne sülen adoktsü, aser alima talang nungi aruba aeneri, Kibubai merenshiba timtem tekangshi aser shilu-shiraji ngua ashitsü, 23‘Alima ajongaji mitsüktsü mozü aser metsü, terongsa, metsü meprokdak aser idakji ai memeyir, oda Kibubai pa ain aser mit adokdang meküpdokba Sodom aser Gomora, Adma aser Zeboiim ama kümogo.’ 24Oda kin ajaki ashitsü, ‘Kechiba Kibubai iba lima nung yamai inyak? Iba ama mit tulu adokba tetezü kechi! 25Idangji nisungtemi ashitsü, kechiaser Kibubai Ijip lima nungi parnok anir adokdang pai parnok den yangluba, Kibuba par tsürabur Tsüngrem den tezüngzüktepba parnoki senzüka yutsü, 26aser parnoki memetetba, aser koba pai parnok nem magütsü, oagi tangar tsüngremtem tenzük, aser parnok külem; 27anungji iba kaket nung züluba atakatem ajak iba madak bener arutsü, iba lima anema Kibuba ain adok: 28aser tanü tashi aliba amai, ain adokba agi, Kibubai parnok lima nungi parnok atsüdok.’

29“Miima alibatem Kibuba asen Tsüngrem meyong lir, saka asenoki iba ozüng otem ajak inyaktsü asoshi jungkai adoka alibatemjibo teti asoshi asenok aser asen chirnur meyong lir.

TAZÜNGKUNEM 30

Kibuba Dangi Meyipa Aruba Temoatsü

1“Kodang item ajak nenok dak atalokdir, temoatsü süshia atakatem süshia ni nenok jakdang kechi yutsüogo, aser koleni Kibuba ne Tsüngremi nenok aridok, item kin ajak rongnung nenok mulung nung item apitetang, 2aser nenok aser nenok chirtem, Kibuba ne Tsüngrem dangi meyipa arura, aser nenok mulung ajak agi aser tanela ajak agi, tanü ni nenok dang melaba pa ola angadi süra, 3idangji Kibuba ne Tsüngremi nenok kolenisa prokshidakja ali, kin ajak nungi tanaben nenok anitena, nenok dang aria bilema, Kibuba ne Tsüngremi nenok tia yanglushitsütsü. 4Nenok jentoka aliba pur kar nüngjang tatemlen oa liaka, idak nungjagi Kibuba ne Tsüngremi nenok anitentsü, aser idak nungjagi pai nenok anir arutsü. 5Aser Kibuba ne Tsüngremi nenok tsüraburi agiba limai nenok anir arutsü aser aji nenoki agitsü; aser pai nenok azükarudaktsütsü, aser nenok tsürabur dang nungi tali soyapokyadaktsütsü. 6Aser nenok taküm lidaktsütsü asoshi, Kibuba ne Tsüngrem ne mulung ajak agi aser ne tanela ajak agi meimdaktsütsü asoshi, Kibuba ne Tsüngremi na aser ne chirnur mulung mejeptoktsütsü. 7Aser Kibuba ne Tsüngremi, iba atakatem ajak ne tsükchirtem shirnoki na sempar aser rishikangshir, parnok dak enloktsütsü. 8Aser nenoki meyipa arutsü aser Kibuba ola angatsü, aser tanü ni nenok nem agütsüba pai melaba ajak benshitsüla. 9Aser Kibuba ne Tsüngremi nenoki inyakba ajak nung azükarudaktsütsü nenok chirnur nung, nenok kiset shiruru jakzükba nung, aser nenok ali nungi adokba nung; kechiyong nenok tsürabur dang ama, tanaben Kibubai nenok azükaruba nung pelatsü. 10Nenoki dang ozüng kaket nung zülua aliba ama, pa ozüng aser melabatem benshia nenoki Kibuba ne Tsüngrem ola anga-a lira; aser Kibuba ne Tsüngrem dangi ne mulung ajak agi aser tanela ajak agi meyipa arura.

11“Kechiyong iba temelaba koba ni tanü nenok dang melar, ya nenok asoshi onsara tasak masü, mesüra nenoki matongtsüsa masü. 12 Aji onoki inyaktsü asoshi, aser aji onok dangi bener arua, onok nem aji angashidaktsütsü asoshi shiba onok asoshi anüngi atutsü! ta nenoki ashitsüsa, aji anüng nung mali. 13Mesüra, onoki aji inyaktsü asoshi, shibai tzüyimi ozü asoshi oa aji onok dangi bener arua, onok nem angashidaktsütsü! ta nai ashitsüsa, aji tzüyim atena oa mali. 14Saka, nai inyaktsü asoshi, aji na kanga anasa, ne bang nung, aser ne mulungjang nung lir.

Taküm Mesüra Tasü Shimba

15“Ajiang, tanü ni ne madang taküm aser tajung, tasüba aser tamajung yutsür. 16Tanü ni nenok nem Kibuba ne Tsüngrem meimba agi, pa lenmang nung jajaba agi, pai melaba aser telatet ozüng, aser yimsü-ozüng anga-a benshidi süra, idangji na taküm alitsü aser soyapokyatsü, aser nenoki agitsü yia aliba lima nung Kibuba ne Tsüngremi nenok moatsütsü. 17Aji saka, nenok mulungjang meyipa oa, aser temulung magütsü, bendanger tsüngrem dang külemtsü, aser parnok tenzüktsü atsüngzüka ora, 18ni tanü nenok dang ashir, nenoki agitsü asoshi Yordan ajanga aiba lima nung talangka meli-i, atangji nenok samatsü. 19Nenok madang taküm aser tasü, temoatsü aser atakatem yutsüogo ta nenok anema tanü kuli asütsü ni anüng aser ali jazüker. Anungji taküm shimtetang, oda na aser ne chirnur taküm litettsü asoshi; 20 Kibuba ne Tsüngrem meimtsü, Pa ola angatsü, aser Pa dak azüita liang; kechiyong Paji ne taküm aser ne arishi anogo lir; oda Kibuba, ne tsürabur Abraham, Isak aser Yakob dang, parnok dang agütsütsü nangzükba lima nung na litettsü.”

TAZÜNGKUNEM 31

Yihusuai Mosa Melenba

1Aser Mosai item o Israel pur ajak dang oa jembi, 2 aser pai parnok dang ashi, “Tanü ni küm noklang ka ser metsü lir; joko ni oli aruli asütsü makoker, aser Kibubai kü dang ashi, nai iba Yordan ajanga maotsüla. 3Kibuba ne Tsüngrem ne jakdang aotsü; Pai item kin ne jakdang nungi samatsütsü, aser nai itemji agitsü; aser Kibubai ashiba ama, Yihusua nenok jakdang aotsü. 4 Kibubai Amor nunger chubatem Sihon aser Og dang, aser par lima dang inyakba ama, parnok dakjia inyaktsü aser parnok samatsütsü. 5Aser Kibubai parnok nenok nem bendanga agütsütsü, aser temelaba ajak amato ni nenok dang ashiba ama nenoki parnok dang inyaktsü, 6Tashi itang, aser tasü itang; tetsübu, aser parnok tsübua teli; kechiyong Kibuba ne Tsüngrem, ne den aosangji pa lir, pai na metoktsütsü, mesüra senzüka meyutsütsü.”

7Idangji Mosai Yihusua aja, aser Israel pur ajak tsüngdang ashi, “Tashi itang aser tasü itang, kechiyong iba nübur den, Kibubai parnok tsürabur nem agütsütsü nangzükba limai na aitsü aser nai parnok nem aji amangdaktsütsü; 8 ne jakdang aosangji pa Kibuba lir, pa ne den alitsü; pai na metoktsütsü mesüra senzüka meyutsütsü, tetsübu mesüra aoksa-a teli.”

Nübur Dang Ozüng Azüngba

9Aser Mosai iba ozüng zülu, aser pai aji Kibuba Ozüng Süngden abener, Levi jabaso putirtem, aser Israel tambur ajak nem bendanga agütsü. 10 Aser Mosai parnok dang mela-a, ashi, “Küm tenet shia tatembang nung, sentsü atokba küm mapang tatazük nung tekülemdak süki benjong nung, 11kodang Israel pur ajak Kibuba ne Tsüngrem madang pai shimtetdak sentepdir, nai Israel pur ajak madang, parnoki angashia, iba ozüng azüngtsüla. 12Teburtem, tetsürtem, tila tanurtem, aser nenok rongnung aliba aener, oda Tsüngrem O angashitsü, aser angazüktsü, aser nenok Tsüngrem tsübutsü, aser iba ozüng o ajak benshia inyaktsü sentepdakjang. 13Parnok chirtem shirnoki iba ozüng memetet, parnoki aji angashitsü aser Yordan ajanger nai agitsü aliba lima nungji ali tashi Kibuba ne Tsüngrem tsübua alitsü.”

Kibubai Tatembangba Temelaba Mosa Nem Agütsüba

14Aser Kibubai Mosa dang ashi, “Na tasütsü anogo anasa aitdagi; Yihusua ja-ang, aser ni pa nem ketdang asütsü mapa agütsütsü asoshi, sentep süki-i nenok arung.” Aser Mosa aser Yihusua ao, aser parnok sasa sentep süki nung noktak, 15idangji süki nung mepet tongshi nung Kibuba adok, aser mepet tongshiji süki temalen noktak.

16Idangji Kibubai Mosa dang ashi, “Ajiang, na ne tsürabur den mejangtsü, aser iba nübur kong parnok alitsü idagi, iba lima bendanger rongnung par tsüngrem sülen jabujaria oa apusotsü, aser ni senzüka toktsütsü, aser tezüngzüktepba koba ni parnok den yanglu aji raksatsü. 17Idangji iba anogo nung kü ain parnok anema adoktsü, aser ni parnok senzüka toktsütsü, aser ni parnok nungi kü tejak miimtsü, aser parnok meyokadoktsü, aser tamajung aser timtem aika parnok dangi arutsü; anungji iba anogo nung parnoki ashitsü, ‘Asen Tsüngrem asenok den maliba yong item timtem tamajung asenok dangi arur masü no?’ 18Aser parnoki tamajung ajak inyaka bendanger tsüngremtem dangi meyipba yong, ni atangji iba anogo nung kü tejak miimadoktsü. 19Anungji tang iba ken züluang aser Israel chirtem dang sayuang, oda Israel chirtem anema iba ken ni asoshi kuli ka asütsü asoshi parnok tebang nung ibai enokjang. 20Kechiyong kodang, mamatzü aser ninang mojitzü yima aliba, parnok tsürabur dang nangzükba limai, ni parnok anir arudir, aser parnok tepok süngdir, aser teyari kümdir; idangji parnoki tangar tsüngrem dangi meyiptsü, aser parnok tenzüktsü, aser ni sensatsütsü, aser kü tezüngzüktepba raksatsü. 21Kodang timtem aser tamajung aika parnok dangi arudir, iba ken ya parnok anema kuli ka amai asütsü; kechiaser parnok chirnuri ibai mamatsü, kechiaser ni parnok nem agütsütsü ta nangzükba limai ni parnok anir maitdangyongi parnok sentong kechi asütsüar ni meteta lir.” 22Anungji Mosai panüjisa iba ken zülu, aser Israel chirtem dang aji sayu. 23 Kibubai Nun jabaso Yihusua nem mapaji bendanga agüja ashi, “Tashi itang aser tasü itang, kechiaser ni parnok dang nangzükba lima jagi Israel nüburtem anir arutsü, aser ni ne den alitsü.”

24Mosai item ozüng o ajakji tetenzük nungi tatem tashi kaket ka nung zülu, 25aser Mosai Kibuba Ozüng Süngden abener Levi nunger dang mela-a ashi, 26“Iba ozüng kaket agiang, oda Kibuba nenok Tsüngrem Ozüng Süngden anasa, yangji nenok anema kuli asütsü yuang. 27Kechiaser nenoki anema noktakba aser tekong merangba ni meteta lir. Ajiang ni nenok den taküm alidang, nenoki Kibuba anema noktak; süra ni süadoker külen nenok koda tali asütsü?” 28Nenok kidong tamburtem, aser bangdakpur ajak narong nung item o jembitsü, aser parnok anema anüng agi kuli asütsü asoshi kü dangi sentepdakjang. 29Kechiyong ni sür külen ni nenok dang melaba lenmang nungi nenoki meyipa oa, nenok sasa kanga majungtsü ta metet, aser tesülenbo tamajung agi nenok dak atongtsü; kechiaser nenok teka mapa ajanga pa ain adokdakja, Kibuba madang koba tamajung aji nenoki inyak.

TAZÜNGKUNEM 32

1“Tenarong tenang, nenok anüngtem, aser ni jembidi;

aser alimai kü bang o angadakjang.

2Kü tesayuba tzünglu ama jenzüka tsükdakjang,

Kü o azüngtsü ama jenzükdakjang;

ai tanep manung tzünglu nana ama,

aser tzünglupu süngolio manung ama;

3ni Kibuba tenüngji sangoktsütsü.

Ozü Tsüngrem uluba tenüng sangang.

4“Pa Lung lir, pa mapa tabensa,

kechiyong pa lenmang ajak shitak;

temulung alemtsü aser tai maketba Tsüngrem,

pa ochi aser tsüngchir lir.

5Pa dang parnoki mejungi benshi,

parnok pa chirtem masü, aji parnok tai lir;

parnok mashileni aoba aser tekirak putu lir.

6Tamashi aser shisa maka nübur nenoki Kibuba dang yamai benshir no?

Pa nenok yangluba nenok Tebu masü no?

Pai nenok yanglu aser yangertet.

7Akhi anogotem bilemtetang,

küm putu aika indang shisadangang,

nebu dang asüngdangang, pai ne dang ashitsü,

ner tamburtem dang asüngdangang aser parnoki ne dang ashitsü.

8  Kodang Tematibai kintem nem senmangtsü agütsü,

kodang meimchir rongnung pai telemsa yanglu,

pai Israel chirtem yongsük yari nüburtem arrtsü toktsü.

9Kechiaser Kibuba shilemji pei nüburtem lir.

Pa senmangtsü lemzükbaji Yakob lir.

10“Pai pa lisem lima nung,

aser tajenzük arüa aliba arem nung angu;

pai pa meketa lungbang, pa asoshi anebalu,

pa nükdang metoklashi ama pai pa nüka ali.

11Mongzüi pei tesep raksaja,

pei techanu madak yimzüba ama,

pai pei tashikang sarar parnok agizük,

pai pei tashikang nung parnok aben.

12 Kibuba mesüngi dang pa anir ao,

aser pa den bendanger tsüngrem maliasü.

13Pai pa alima temalen mendaktsü,

aser pai ali nungi adokba chidaktsü;

aser pai pa nem lung nungi ninang mojitzü,

aser lungkeprak nungi totzü mesepdaktsü.

14Nashi aser san nungi mamatzü,

san chanu tetsüdi nungi temo,

Bashan nashi pungchi aser nabong nungi,

tezüngjang temo aser wheat am;

aser tsükmenatzü zü nungi nai yi ajem.

15“Saka Yeshurun yiraa aküm, aser atepten;

na yiraa lir, na melemmelema yinogo, na süsüa kümogo.

Idangji pa yangluba Tsüngrem pai senzüka toktsüogo,

aser pa tekümtet Lung züpa züpa-a züngshi.

16Bendanger tsüngremtem agi pai nükmia kümdaktsü,

tesempatsü agi parnoki pa jashidaktsü.

17  Parnok memetetba tsüngremtem,

tawa aruba tasen tsüngremtem,

shirnok nenok tsüraburi metsübu,

koba tsüngremtem masü, mojing dang,

parnoki tepseta tenla agütsü.

18Na abenba lung nai senzüka yutsü,

aser na sodaktsüba Tsüngrem nai amadok.

19Aser Kibubai aji angu, aser parnok sempa,

kechiaser par jabaso aser jalatemi ain adokdaktsü.

20Aser pai ashi, Ni parnok nungi kü tejak miimtsü.

Parnok tatem kechi kümdir ni reprangdi.

Kechiyong parnok kanga tashi manga putu,

tamang makatsüba chirtem lir.

21  Koba Tsüngrem masü,

kümdaktsü, iba jagi ni nükmitsüsa;

parnok amajok mapatem agi ni ain aitdaktsü;

anungji shir kin ka masü,

par den ni nükmia kümdaktsütsü;

ni tamashi kin ka den parnok ain adokdaktsütsü.

22Kechiyong, taroktiba kangla tonga ronga,

aser alima telunga aser iba nung adokba meyoka,

aser tenem kimung nung mi adoka,

kü ain adokba nung mi jangrua lir.

23“Ni parnok madak timtemtsü nungtentsütsü,

ni parnok dak kü lijakjang agimatsü;

24Tayaba agi parnok samatsü,

aser mijang tatsük agi meyoktsü,

aser kanga tamajung tesama adoktsü.

Parnok shisatsütsü shirurutem,

aser parnok mimsettsü pertem ni parnok madak yoktsü.

25Kimalen nok agi tasütsü,

aser kilung nung taoksatsü alitsü;

iba agi asangur aser tasüngtet aiür anaprong,

mama ayonger kinü den kupu apur samatsütsü.

26Ni parnok talang nung prokshidaktsütsü,

nisung rongnung ni parnok mebilemtetdaktsütsü, ta ni shila;

27Saka parnok tsükchirtemi mezümekümtsü,

parnok temerirtemi aibelena ayimtentsü,

asen teka agi takok tulu nguogo,

iba mapa kecha Kibubai inyakba masü ta ashitsü ni tsübur.

28“Kechiyong parnok shisatsü makaba kin lir,

aser parnok dak tangatetba mali.

29Oh, parnok shisa ka-a,

parnoki ya angateta,

oda parnok tesülen tia indang shisadanglasang!

30Parnok Lungi parnok mayok asübo,

Kibubai parnok bendanga magütsü asübo,

kodaser kati meyirijang ka arishitsü,

aser anati meyirijang ter jenshidaktsütsü?

31Kechiyong par lung asenok Lung ama masü,

oda asen tsükchiria parnok sasa meteta lir.

32Kechiyong parnok tsükmenatzü zü Sodom nungi

aser Gomora tsüki nungi arur;

par tsükmenatzü taku lir,

parnok tejep taku lir.

33Parnok yiji per mim, aser ongyang per mim tesashi lir.

34“Kü terizüngdak ajemer,

ibai kü den rizünga yua melika ma?

35Parnok tetsüng kodang ajutokdir,

mangyangba, aser meyipa agütsüba kü meyong lir;

kechiyong parnok timatemtsü anogo anasa lir,

aser parnok madak tataloktsütem kara-a arutsü.

36Kechiyong, kodang parnok ain ogo ta ngudir,

aser parnok kata alarsa mesüra nüji tia nunga melilir,

Kibubai pei tenzükertem asoshi aria

bilema pai par o bendangtsü.

37Aser pai ashitsü, Parnok tsüngremtem kong ali?

Parnok jenokba lungji kong ali?

38Shirnoki parnok tetepsetba tenlatem achi,

aser parnok tajemtsü tenla yi ajem,

parnok aramesoa nenok yaridakjang,

parnok dak nenok atsükokang.

39“Ni alema tangar tsüngremtem shinga mali,

ni pa lir, oda Nia, ta tang metetang.

Ni tepseter, aser Ni taküm kümtettsür;

ni zübu kettsür, aser Ni anebtsür:

aser kü ket nungi rakzüktsü shinga mali.

40Kechiyong Ni anünglen kü ket

mekanger aser azüngashia ashir,

41Kü sentsüprang nok ni aitsü,

aser Kü keti ochi nung amettsü;

kü temerir nem Ni mangyangba agütsütsü;

aser Ni sempar dang merenshitsü.

42Tetepsetba aser tepuoker zü agi,

kü lijakjang azü agi mesepdaktsütsü,

tsükchir tanishirtem ku talanglang aliba kolak nungi

kü noki shi meyoktsü.

43  “Kin rongnung pelatepa ayimtenang,

Oh nenok, par nüburtem,

kechiyong pa tenzükertem zü asoshi pai tayang kepzüktsü,

aser par lima, par nübur asoshi pai temenen pungitsü’

44Idangji Mosa aser pa den Nun jabaso Yihusua arua nüburtem ajaki angashia iba ken aten.

Mosai Tatembangba O Jembiba

45Kodang Israel dang jembiba item o ajak Mosai tembanga aru, 46pai parnok dang ashi, “Tanü ni nenok dang tekümdangtsü ashiba iba ozüng o inyaka benshitsü nenok chirnur nem ozüng agütsütsü asoshi ya ajak nenok mulung nung yuang. 47Kechiyong ya nenok asoshi amajok mapa masü; kechiaser ya nenok taküm lir, aser ya ajanga, nenoki Yordan ajanga oa agitsü aliba lima nung nenok arishi anogo talang alitsü.”

Mosa Nebo Tenem Nung Asütsü Ashiba

48Aser Kibubai panüjisa Mosa dang ashi, 49“Moab lima nung, Yeriko len shia aliba, iba Abarim tenem, Nebo tenemi na tuang; aser Kanan lima koba ni Israel chirtemi agitsü agütsü, aji reprangang: 50aser nedi Aron, kechi koma Hor tenem nung asü, aser pa pei pur den densem, yamaji na atudak tenem nung asütsü aser ne pur den atentsü. 51Kechiaser Zin arem nung, Kadesh nung Meriba tzü nung, Israel chir rongnung nenoki ni anema tai mena; kechiaser Israel chir rongnung nenoki ni meshiteta mayu. 52Ne jakdang alimaji nai angutsü akok, saka ni Israel chir nem agütsüba limai nabo maitsü.”

TAZÜNGKUNEM 33

Mosai Israel Nüburtem Moatsüba

1Tsüngrem nisung Mosai pa masü dang Israel nüburtem moatsüba temoatsüji ya lir. 2Pai ashi,

“Kibuba Sinai tenem nungi aru,

aser Seir nungi parnok dangi adok,

pai Paran tenem nungi yaloktsü,

pa temeshipur meyi aika den aru,

pa tajichilen parnok asoshi ozüng tesashi liasü.

3Hau, Pai pei nübur meimer;

pa temeshi pur ajak ne ket nung lir:

aser ne tsüngdang parnok amener;

nisung shiai ne otem agizüktsü.

4Mosai onok dang ozüng ka mela,

Yakober telok asoshi senmang ka.

5Nisungtem tanishir sentepa

Israel kin ajak külemi alidang

pa Yeshum nung chuba aküm.

Reuben moatsüba

6“Reuben mesüi taküm lidakjang,

mesüra pa nütsüng ajema tekümdaktsü

Yihuda Moatsüba

7Aser Yihuda atema pai yamai ashi,

“Yihuda ola angang, Oh Kibuba;

pa pei nübur dangi anir arudakjang.

Pa teka agi pa kümzüka lidakjang.

Pa anemertem anema na pa teyari ka sang.

Levi Moatsüba

8  Aser Levi indang pai ashi,

“Ne Thummim aser ne Urim nai shirnok meimer parnok den lir,

nai parnok Massa nung tendang,

nai parnok den Meriba tzü nung rara.

9Shibai pa tebu aser tetsü indang,

ni parnok mangu, ta ashi,

aser pai adianua magizük aser pei chira mezüngoki aküm.

Kechiyong parnoki ne o benshi aser

ne tezüngzüktepba ayur.

10Parnoki Yakob dang ne obendangba

aser Israel dang ne ozüng sayutsü.

Parnoki ne teni nung teronem enoktsütsü;

aser ne tanela dak tarongba tenla ajonga tenlatsü.

11Moajang, Kibuba, na akaba,

aser pa teka mapa agizükang;

anema adoker aser pa sempartem,

oda pa anema tanaben menoktaktsüsa

parnok teperem loksajang.

Benjamin Moatsüba

12Benjamin indang pai ashi,

“Kibubai meimba pa lir, pa den pai kümzüka alitsü;

anogo tepiyong pai pa awabanga alir;

aser pa tapubang tsüngda nung pa alir.

Yosef Moatsüba

13Aser Yosef indang pai ashi,

“Par lima Kibubai moajang;

anüng temalen rongsen agi, azüngtzü den,

aser punglang makaba tarok tzü agi,

14anü tesangwa nungi senti süngjang-lijang agi,

aser ita shia talubosa adokdaktsüba agi,

15akhidang nungi aliba tenem nung adokba tajungtiba agi,

aser teti aliba tenem rongsen agi,

16alima rongsen aser iba nung sünga aliba agi,

aser süngsem nung aliba pa maongka agi;

Yosef, pa adianu rongnung tamarensang,

pa kolak madak temoatsü aludakjang.

17Pa nashi pungchi mezüng mepubaji akhüm taket lir;

pa tezüji arem süpong ama;

item jagi kin ajak dak atongtsü,

oda alima tatem tashi aridoktsü,

anungji Efraim asoshi yamai meyirijang alitsü.

Zebulun Aser Issakar Moatsüba

18Aser Zebulun indang pai ashi,

“Zebulun, na aolen pelaseta liang,

aser Issakar, ne süki nung na pelaseta liang.

19Parnoki nüburtem tenemi ajatsü;

yangji parnoki temeshiba tenla agütsütsü.

Kechiyong parnoki tzüyim rongsen,

aser lisem nung miima aliba rongsen meseptsü.

Gad Moatsüba

20Aser Gad indang pai ashi,

“Gad tulu kümdaktsüsang temoatsü sang,

pa molusongzü ama atsüka alir aser

tepen aser tekojong shisatsür.

21Pai pei asoshi mezüngbuba shilem shimtet,

kechiyong yimsüsür shilembo wazüka liasü;

aser pai nübur tanishirtem dangi aru,

aser pai Kibuba mulungba ochi aser Israel asoshi obendangba inyak.

Dan Moatsüba

22Aser Dan indang pai ashi,

“Dan, Bashan nungi pungzüka adokba molusongzü chanu lir.

Naftali Moatsüba

23Naftali indang pai ashi,

“Oh Naftali, Kibuba tiptem maongka, aser temoatsü agi sünga,

tzüyim aser anüolentip agiang.

Asher Moatsüba

24Aser Asher indang pai ashi,

“Jabaso agi moatsüsang Asher sang;

pa adianu rongnung agizüktetba sang,

aser pa tetsüng totzü nung ajemokdakjang.

25Ne tsüngsem merang aser yongmenyin alitsü;

aser ne anogotem ama, ne tashi alitsü.

Tazüngkunem O

26“Yeshurun Tsüngrem ama tangar shinga mali,

shibai kotak nung amener aser pa sentsüwangshi anüngtem ajanga na yarir.

27Tatem maka Tsüngremji na talidak

aser teküboklen teti tatem maka teka lir;

aser ne madang nungi pai tsükchir aridok,

aser ashi, ‘Sama-ang.’

28Aser tsük aser yi aliba lima nung,

Yakob tzüpokdak kijadang,

Israel tekümzük nung ali,

hau, pa anüngi azüngtzü tsükdaktsür.

29Oh Israel na tepelatsü: na ama Kibubai kümzükba nübur shir ali?

Nenok teyari asoshi jong aser nenok tamaren nokji pa lir!

Ne tsüchirtemi nenok küboki arutsü.

Aser nai par tokong tenem nung ajemshitsü.”

TAZÜNGKUNEM 34

Mosa Asüba

1Aser Mosai Moab lenten nungi Yeriko tsütsü aliba Nebo tenem, Pisga tenem kolaki atu. Aser Kibubai Gilead lima ajak, Dan tashi sayu; 2aser Naftali ajak, aser Efraim aser Manase lima, aser Yihuda lima ajak, anüolen tzüyim tashi, 3aser Negeb, aser ali telemok, asangdong yimti Yeriko lenten nungi Zoar tashi, pa dang sayu. 4 Aser Kibubai pa dang ashi, “Abraham, Isak aser Yakob dang, ni ne chirnur nem agütsütsü, ta nangzükba limaji ya lir: Ne tenük agi ni ibai ne nem ngudaktsüogo, saka nai ajagi maotsü.” 5Anungji Kibuba o amato yangji Moab lima nung Kibuba tenzüker Mosa asü. 6Aser Bethpeor tejaklen Moab lima nung pai pa arem, saka tanü tashi shingaia pa leper memetet. 7Aser Mosa asü dang küm noklang ka ser metsü liasü, pa tenük merabangi liasü, aser pa temang tashi mejeni liasü. 8Aser Israel chirtemi Mosa asoshi Moab lenten nung anogo semer ajeb, yamaji Mosa asoshi mang yima ajepba anogo abensa, 9Aser Nun jabaso Yihusua shisatsü tanela agi sünga liasü; kechiyong Mosai pa dak pa teka agi nemet, aser Israel chirtemi pa dang anga, aser Kibubai Mosa dang melaba ama inyak. 10 Iba mapang tashi nung Kibubai tejak o tejak na jitepa meteta aliba Mosa ama Israel nung ainkar shinga madoki liasü. 11Kechiaser temaitsü aser sayatenya ajak koba Ijip lima nung Farao, aser pa tenzükertem, aser par linük ajak nung inyaktsü Kibubai pa yok, 12aser tashi tulu teka aser tetsübutsü mapa tulu ajak Mosai Israel nüburtem tsüngdang inyak.