NEHIMIA

NEHIMIA OKILA

OKILA

Nehimia kaket ya shilem pezü lemsatsü akok. (1) Nehimia Yirusalemi meyipa shilanger, Persia chubai pa nem Yihuda lima nung tanüker asütsü yokba. (2) Yirusalem jaratem yanglushiba (3) Tsüngremer Ozüngtem metsünga-reta Ezrai azüngba aser nüburtemi temenen nangzükba (4) Nehimia Yihuda nung governor ka ama mapa jenti inyakba.

Nehimiai Tsüngrem dak kanga aroka amangba, pa dak metalokba aser maneni nendaka sarasademba, itemji ajanga Nehimia kaket nüngtugu aküm.

Keta Alibatem       

Nehimia Yirusalemi Shilangba 1:1-2:20

Yirusalem Jaratem Yanglushiba 3:1-7:73

Ozüng Azüngba aser Teüngzüktepba Akangshiba 8:1-10:39

Nehimiai Inyakba Maneni 11:1-13:31

        Keta Alibatem

Nehimia Yirusalemi Shilangba NEHIMIA  1:1-2:20

Nehemiai Sarasademba NEHEMIA 1:1-11

Nehemia Yirusalemi Aruba NEHEMIA 2:1-10

Nehemiai Yirusalem Jara Benzüba NEHEMIA 2:11-16

Jara Yanglushitsü Lemtetba NEHEMIA 2:17-20

Yirusalem Jaratem Yanglushiba NEHIMIA 3:1-7:73

Mapa Inyaktsü Tenzükba NEHEMIA 3:1-16

Levi Nungertemi Jara Yanglushiba NEHEMIA 3:17-21

Putirtemi Mapa Inyak NEHEMIA 3:22-27

Jara Yanglushidak Atenertem NEHEMIA 3:28-32

Mapa Inyaker Anema Noktakertem NEHEMIA 4:1-23

Sensakertem Timtem Tekangshi NEHEMIA 5:1-13

Nehemiai Governor Chiyungtsü Makang NEHEMIA 5:14-19

Nehemia Anema Tasa Asaba NEHEMIA 6:1-14

Jara Renemba NEHEMIA 6:15-7:4

Tepuokdak Nungi Shilangba NEHEMIA 7:5-73 (Ezr.2:1-70)

Ezrai Nuburtem Dang Azungba NEHEMIA 8:1-12

Semtu Benjung NEHEMIA 8:13-18 (Lev.23:33-43)

Nüburtemi Temenen Nangzükba NEHEMIA 9:1-5

Temenen Nangzüka Sarasademba NEHEMIA 9:6-37

Tezüngzüktepba Zülurtem NEHEMIA 9:38-10:27

Tezüngzükteba O-mulung NEHEMIA 10:28-39

Nehimiai Inyakba Maneni NEHIMIA 11:1-13:31

Yirusalem Nung Alirtem NEHEMIA 11:1-22

Yimtsüng Aser Yimti Tanga Nung Alirtem NEHEMIA 11:23-35

Levi Aser Putirtem NEHEMIA 12:1-26

Jara Meshitetba NEHEMIA 12:27-47

Bendanger Nungi Israel Pilaba NEHEMIA 13:1-3 (Zün.22:24-25)

Nehemiai Yanglishiba NEHEMIA 13:4-22

Temeyoktep Kibalembaba Aitsüba NEHEMIA 13:23-31 (Ezr.9:1-4)

NEHIMIA 1

Nehimiai Sarasademba

1Hakalia jabaso Nehimia o. Tang Shushan nung ni chuba kidang küm metsübuba alidang, Kisliv ita nung atalokba, 2kü adianu rongnung Hanani aser pa medemer kar Yihuda lima nungi kü dangi aru; aser ni parnok dang Yihuda nunger tanüngba, shirnok pua anir aoba nungi jentet, parnok aser Yirusalem indang asüngdang. 3Parnoki kü dang ashi, “Pua bener or anünga aliba purtem iba linük nung timtem tulu aser maksü tia nung lir: Yirusalem yimti jara lokshia ogo aser iba süngkhüm mi agi rongtokogo.”

4Kodang item o ni angashi, ni amen aser ajeb aser anogo ishika mang ayim; aser ni lumi aser kotaker Tsüngrem tsüngdang sarasadem aser ashi, 5“Oh, Kibuba, kotaker Tsüngrem, tulusang aser tetsübutsü Tsüngrem, shibai pa meimer dang aser pa ozüng benshir dang tezüngzüktepba aser taochi sayur; 6ne tenzükeri sarasademba angashitsüsa yimlibilema ne tenarong tenangma aser ne tenük lapokangma; tang sarasadem ya ammang sangwa shia ni ne dangi yoker, ibaji ne tenzüker Israel chirtem asoshi, Israel chirtemi inyakba tai koba onoki na anema inyakogo. Ya ni ne tsüngdang nangzüker; hau, ni aser kübou kidongi tai menaogo. 7Onoki na anema teraksa jenti inyakogo, aser ne tenzüker Mosa dang koba ozüngtem, telatet ozüngtem, aser obendangba kechi nai mela, itemji onoki timi mebenshi. 8 Ni mepishir, nai ne tenzüker Mosa dang, nenoki tai menara ni nenok nübur rongnung ayimsünga perokshidaktsütsü, ta mela-a ashiba o bilemtetangma.”

9  “Saka nenoki kü dangi meyipa arura aser kü ozüngtem yura aser benshira sentoka yutsüba nüburji talangtiba linük nung oa liaka, ni parnok yang nungjagi anitentsü aser ni kü tenüng ayutsü shimtetba linük bushia parnok anitentsü. 10Itemi ne tenzüker aser nübur lir, shirnok nai ne tashi tulu aser ne tashi tait teka agi alangzüka ayu. 11Oh Kibuba, ni ne dang mepishir, tang ne tenzükeri sarasademba aser ne tenüng tsübutsü jangrar ne tenzükertem sarasadem nai angangma. Ni ne dang sarasademer, iba anogo nung nai ne tenzüker azükarua lidakjang aser iba nisung tsüngdang pa taochi ngudakjangma.” Tang ni chubar marok amsang liasü.

NEHIMIA 2

Nehimia Yirusalemi Aruba

1Artazerkzes chuba küm metsübuba, Nisan ita nung, kodang yi pa jakdang yua liasü, aji ni bena aru aser chuba nem agütsü. Iba tejaklen chuba tsüngdang ni kodanga jashia mesayudang. 2Aser chubai kü dang ashi, “Na shiranger masü nung kodaser ne tejak mesangwa? Ya tanga kecha masü, saka temulung nung tejashi aliba yong.” Idangji ni kanga tsübua liasü. 3 Aser ni chuba dang ashi, “Chuba arishia liangma. Kodang kübu aremdak yimti lokshia or teraksa tia nung ali aser yimti jara aser süngkhüm ajak rongsar ali, idangji ni tejashi tejak meteni koda litet?” 4Idangji chubai kü dang ashi, “Nai kechi asüngdangner? Anungji ni kotaker Tsüngrem dang sarasadem,” 5aser ni chuba dang ashi, “Chubai mulungra aser ne tenzükeri mepishibaji tim ta bilemra, kübou nunger aremdak yimti Yihuda lima jagi, teraksa yanglushitsü ni yoktsü mela-angma.” 6Aser chubai kü dang langzüa ashi, (chuba tebutsüa anasa mena liasü) “Ne lenmangji kopiga aotsü aser na kodang meyipa shilangtsü?” Chubai ni yoktsü mulung nung ni mapangji lemtet. 7Ano ni chuba dang asüngdang, “Chubai mulungra ayong külen alir governortem dangi temelaba shiti, ni Yihuda lima matong tashi ajanga süitsü mela-ang ta zülutsütsü mepishir. 8Ano chubar min repranger Asaf dangi, tenlaki mitsa süngkhüm, yimti jara, aser ni alitsü ki item ajonga yanglushidang agitsü tongnü, aser tenüngdaktsü süng ajak kü dang melatsü asoshi shiti ka chubai zülutsütsü mepishir.” Aser Tsüngremer taochi kü teka madak lia kü tenüngdaktsü ajak chubai melatet.

9Idangji ni ayong külen alir governortem dangi ao aser chuba shiti parnok dang sayu. Chubai ni miena temeranger aser kor tanishirtem yok. 10Saka kodang Horon nunger Sanballat aser Ammon nunger Tobia tenati Israel nunger anebalutsü nisung ka arudagi ta angashia kanga dang jashi.

Nehimiai Yirusalem Jara Penzüba

11Idangji ni Yirusalem tonga aru aser idakji asemnü ali. 12Aser ni ammang nung apuso aser nisung kar kü sülen anitak. Yirusalem asoshi kechisa inyaktsü Tsüngremi kü mulung nung apuoktsü, aji ni shinga danga mashi aser ni amenba shiruru alema tanga shiruru kü den maliasü. 13Ni ammang nung lenten süngkhüm, shirong tzübu alidak aser jana süngkhüm tsütsü leni ao aser teraksa Yirusalem jaratem aser idakji terongsa süngkhümtemji benzüa reprang. 14Iba sülen ni tzüpokdak süngkhüm aser chuba awatsüng tonga ao; saka idakji ni amenba shiruru süitsü lenmang mali asü. 15Idangji ni ammang nung ayong kati alu aser jaraji benzü, aser ni tanaben lenten süngkhüm leni meyipa shilang. 16Aser ni kolenisa ao, kechi mapasa inyak tanishirtemi memetet; kechiaser iba indangji ni ano Yihuda nunger, putir, tamarener, yimsüsür, aser tangar nisung shinga danga ano mashi.

Jara Yanglushitsü Lemtetba

17Idangji ni parnok dang ashi, “Nenoki asenok temenen tia nung aliba angur, koda Yirusalem raksa-a aser iba süngkhüm rongsa-a lir; arung, Yirusalem yimti jaratemji asenoki yanglushidi, aji süra asenok maksü nung malitsü.” 18Aser kü Tsüngremi kü dang ajungba aser chubai kü dang ashiba o ajak ni parnok dang ashi. Idangji parnoki ashi, “Arung, asenok apusodi aser kiji yanglushidi.” Idangji mapa tajung asoshi parnok tashi ita aküm. 19Saka kodang Horon nunger Sanballat, aser Ammon nunger Tobia aser Arab nunger Geshem, parnoki ya angashi, idangji onok menüja atala aser ashi, “Nenoki inyakba ya kechi? Nenok chuba anemer asü?” 20Idangji ni parnok dang langzüa ashi, “Kotaker Tsüngremi onok yaritsü; anungji onok pa tenzükertem aka-asoa kiji yanglutsü, saka Yirusalem nung nenok shilem nenok khonang, aser tenüngsang kecha malitsü.”

NEHIMIA 3

Mapa Inyaktsü Tenzükba

1Idangji temaba putir Eliashib aser par adianu putirtem mulung ajongmeso, aser parnoki san süngkhümji yanglushi, parnoki aji meshitet aser kishiji enok; parnoki Hammia aser Hananel lungkitem tonga meshitet. 2Pa sülen Yeriko nungeri yanglu. Aser parnok sülen Imri jabaso Zakuri inyak.

3Ango Süngkhümji Hassena chirtemi yanglushi, idakji parnoki sanenji atalok, kishitem aser idakji tartangtsü merang enok. 4Parnok sülen Hakkoz jabaso Uria chir Meremoti yanglushi. Iba sülen Meshezabel jabaso Berekia chir Mesholami yanglushi. Parnok sülen Baana chir Zadoki yanglushi; 5parnok sülen Tekoa nungeri yanglushi, saka parnok rongnung tulurtemibo Kibuba mapa inyaktsü asoshi memulung.

6Tejenba Süngkhümji Pasea chir Yoiada aser Besodea chir Meshullami yanglushi; parnoki sanenji atalok aser idakji kishi aser tartangtsü merang yok. 7Iba sülen Gibeon nunger Melatia aser Meronot nunger Yadon, ano Gibeon nisungtem aser Mizpa nisungtem shir ayong külen alir governor kübok liasü, parnoki yanglushi. 8Pa sülen hon ayanger Harhaia chir Uzzieli yanglushi. Aser pa sülen teronem menemtsü oset amshir Hananiai yanglushi; aser parnoki Yirusalem tesadang jara tonga yanglu. 9Parnok sülen Hur chir Refaia, shiba Yirusalem linük tesadang nung yimsüsür liasü, pai yanglushi. 10Parnok sülen Harumag chir Yedaiai par ki jakdang aliba jara yanglushi. Ano pa sülen Hashabnia chir Hattushi yanglushi. 11Harim chir Malkija aser Pahath-moab chir Hasshub tenati tanga shilem ka, misen mitsa dena yanglushi. 12Pa sülen Yirusalem linük tesadang nung yimsüsür, Hallohes chir Shallum aser pa jalatemi yanglushi.

13Lenten Süngkhümji Hanun aser Zanoa yimeri yanglushi. Parnoki aji yanglushir kishi aser tartangtsü enok. Ano parnoki Jana süngkhüm tonga jaraji süklep meyi ka tashi yanglushi.

14Beth-hakkerem linük nung yimsüsür Rekab chir Malkijai jana Süngkhüm yanglushi: pai aji yanglur kishi, aser tartangtsü enok.

15Aser Mizpa linük nung yimsüsür Kolhoze chir Shallumi tzüpokdak Süngkhüm yanglushi; pai aji yanglua kishi, aser tartangtsü enok aser chubar atsüki anasa Shila awatsüng jarajia Dawid yimti-i aluba jenjang tonga yanglu. 16Pa sülen Azbuk chir Nehimia, shiba Bethzur linük tesadang nung yimsüsür liasü, pai Dawid chuba leper jakdang nungi tzütu aser tamarener alidak ki tashiji yanglushi.

Levi nungertemi Jara Yanglushiba

17Pa sülen Levi nunger Bani chir Rehuni yanglushi. Aser pa sülen Keila linük tesadang nung yimsüsür Hashabiai par linük shilemji yanglushi. 18Pa sülen par adianu Henadad chir Bavai, shiba Keila linük tesadang nung yimsüsür liasü, pai yanglushi. 19Pa sülen Mizpa yimsüsür Yeshua chir Ezeri jara temeyiplen ka, nok o nü rizüngdak ki leni atulen yanglushi. 20Pa sülen Zabbai chir Baruki kanga nendaka, jara shilem kinük nungi temaba putir Eliashiber kishizüng tonga yanglushi. 21Pa sülen Hakkozer kinunger Uria chir Meremoti Eliashiber kishizüng nungi tenzüker Eliashib ki tatem tashi yanglushi.

Putirtemi Mapa Inyak

22Pa sülen temeket nung alir putirtemi yanglushi. 23Parnok sülen Benjamin aser Hasshub nati parnok ki tindangji yanglushi. Parnok sülen Anania nungi jabaso Maaseia chir Azariai par ki anasa yanglushi. 24Pa sülen Henadad chir Binnui Azariar ki nungi tenzüker jara temeyipdak aser kinük tashi yanglushi. 25Uzai chir Palali jara temeyipdak nungi chubar ki temaba mitsa, tanüker alidak taktang anasa, tashi yanglushi. Pa sülen Parosh chir Pedaiai yanglushi. 26Tang Nethinim nungerji Ofel nung ali, anüdoklen tzü Süngkhüm aser noktaka aliba mitsa tashi, idakji liasü. 27Pa sülen Tekoa nungeri mitsa tuluba nungi Ofel jara tonga tip külen yanglushi.

Jara Yanglushidak Adenertem

28Ano putirtem nisung shiai, kor Süngkhüm temalen, pei ki tindangji yanglushi. 29Parnok sülen Immer chir Zadoki pei ki tindangji yanglushi. Pa sülen, anüdoklen Süngkhüm anüker, Shekania chir Shemaiai yanglushi. 30Pa sülen Shelemia chir Hanania aser Zalap chir trokbuba Hanuni shilem ka yanglushi. Pa sülen Berekia chir Meshullami par takdang jakdang yanglushi. 31Pa sülen hon ayanger Malkijai Nethinim ki tonga yanglushi, aser shishilembartemi Hammifkad Süngkhüm tindang nungi temaba taktangi atulen kinük tonga yanglushi. 32Ano temaba taktangi atulen kinük nungjagi san Süngkhüm tashi hon ayanger o shishilembar nati yanglushi.

NEHIMIA 4

Mapa Inyaker Anema Noktakertem

1Saka kodang onoki jaraji yanglushidaki ta Sanballati angashi, pa ain adoka jashi aser Yihuda nunger atala-a menütsü. 2Aser pai pa adianutem aser Samaria temeranger telok dang jembia ashi, “Item tashi mait Yihuda nunger kechi inyaker? Parnoki parnok sasa noktangtettsü no? Parnoki taküm tenlatetdi ma? Nangtena aliba terongsa nangtenba nungi lungtemji tasen küma parnoki yanglushitetdi ma? 3Tang pa anasa Ammon nunger Tobiai ashi, Parnoki koba yangluya ali, shirong ka tura, lung jaraji chirepa laotsü! 4Angangjo, Oh Tsüngrem, kechiyong onok sensatsüogo; parnok tatala oji meyipa par kolak nung enokjang, aser parnokji alar putendak linük nung rakzükraktem asütsü agüjang; 5parnok taiji nembanga teyu, aser parnok temenen ne jakdang taidokma; kechiaser parnoki kisür tsüngdang ain adoka na sensatsüogo.”

6Aji oda onoki jaraji yanglu aser jara ajakji ajurutepa azük tesadang shi tua yanglu; kechiyong nisungtemi inyaktsü mulungtet.

7Saka kodang Sanballat, Tobia, Arab nunger, Ammon nunger, aser Ashdod nungeri, Yirusalem jara yanglushiba mapaji maneni, aser raksa-a aliba yanglushidagi ta angashi, idangji parnok kanga ain adok; 8aser parnok ajak külemi miima kibok nung ayongteper Yirusalem anema raratsü aser idakji meputep adokdaktsütsü tasa yanglu. 9Saka onoki ozü Tsüngrem dang sarasadem, aser ammang sangwa maneni parnok anema miter ayu.

10Yihudai ashi, “Khu benloka alirtem tashi ajema kümdagi aser teraksa ano jenti anünga lir, anungji jaraji asenoki meyanglushimatsü.” 11Ano onok tsükchiri yamai ashi, “Asenoki parnok alidak tiyong tonga mao tashi aser parnok tepseta mapaji manendaktsü tashi parnoki memetettsü aser mangutsü.” 12Idangji parnok anasa alir Yihuda nungertemi onok dangi atua terbena ashi, “Nenok kolenisa meyipdir, parnoki nenok amaktsü.” 13Anungji ni jara tezülen tarokdak, moapu nung, nisungtem parnok kibong dena aniten aser nisung shia nok-nü aser lijak amdaktsü. 14Ajiser ni reprang aser noktak aser tamarener, yimsüsür aser nütsüngtem dang ashi, “Nenoki parnok tsübua teli, Kibuba shiba tulu aser tetsübutsü lir pa bilemtetang, aser nenok adianu, nenok jabaso-jalatem, nenok kinungtsür aser kibong asoshi rara-ang.”

15Kodang onoki ibaji metetogo ta tsükchiri angashi, aser Tsüngremi parnok tasa tazüngla kümdaktsü, onok ajak jara jagi meyipa aru aser nisung shia pei pei mapa nung sotak. 16Iba mapang nungi tenzüker kü nütsüng tesadang mapa inyakdaktsü aser parnok tesadang nü, jong, lijak, aser merang sobutsü peria sobu; aser yimsüsürtem Yihuda kin ajonga sülen noktakdaktsü. 17Shir jara yanglu, aser shir khu abener, nisung shia teka külen mapa nung sot aser külen nok o nü aben. 18Kisürtema nisung shia nok ka ka anasa ayu. 19Aser tamarener, yimsüsür, aser nütsüng dang ni ashi, “Mapa teinyaktsü tulu aser prokshia lir, aser jara tepiyong asenok ka o ka na tsüngda nung talanglang pilar lir. 20Na kechi nung lidir liaka kodang jangzü ola angashidir, idangyongji onok alidak bushia nenok sentepang; asen Tsüngremi asen asoshi raratsü.”

21Anungji onok mapa nung sotak aser parnok rongnung tesadang ka anepdang anü adokli nungi petinu madok tashi nü amer ata-a ali. 22Idangjisa ni nütsüng dang ashi, “Nisung shia Yirusalem süngkhüm kübok pei tenzüker ka den anenang; parnokji aonung asen madak miter asütsü aser anüngdang mapa inyaktsü.” 23Anungji ni asüyonga, kü adianu aser tenzükertem mesüra kü sülen anidaker mitertem asüyonga, onok shingaia süoshi magizüki nisung shiai tzübui aodanga nok o nü bener dang ao.

NEHIMIA 5

Sensakertem Timtem Tekangshi

1Tang nübur rongnung, kinungtsür dena, parnok adianu Yihuda nunger anema ola tulu ka adok. 2Parnoki yamai shia liasü, “Asenok aser asen jabaso jala jenti kümogo; asenok chiyunga taküm alitsü atema tsük bendendi.” 3Ano kari yamai ashi, “Asen lu, tsükmenatzü lu, aser ki dena temelen agütsüdagi; anungji ayawara asoshi aseni tsük bendendi.” 4Ano kari yamai ashi, “Tsüklu aser tsükmenatzü lu atema chuba nem alimelen agütsütsü onoki sen apu. 5Saka tangbo onok shi onok adianu shi ama, onok chirnur parnok chirnur den saku liaka, aji saka ajiang, onok jabaso-jala alar akümtsüsa onoki anir arur; jala karbo talenba tiai bener aruadokogo; parnok alangzüktsü onok dak tashi mali; kechiyong onok ai aser tsükmenatzü lu tangar ket nung lir.’

6Kodang ni parnoki anema asatepa olaji angashi ni ain kanga adok. 7 Idangji ni kü sasa bilemdanger tamarener aser yimsüsürtem arüja ashi, “Nenoki tashi tali amshia nenok adianu shia nungi sentem tali agi.” Aser ni parnok anema mungdang tulu ka jazük. 8Aser ni parnok dang ashi, “Onok tashi yari onoki pei adianu Yihuda nunger tangar kin dang yokadoker aliba alangzükogo. Ajangla nenoki onok dang yokdi ma?” Idangji parnok süngjema aküm aser ola kata madok. 9Ano ni ashi, “Nenoki inyakba mapaji tajung masü; tsükchiri asen mesensatsütsüsa nenoki Tsüngrem tsübuba nung jajatsü tim masü no? 10Ano ni, kü adianu aser tenzükertemi parnok nem sen aser tsük aputsür. Yimlibilema sentemtsütem asenoki agiendi. 11Ni mepishir, nenoki agia aliba parnok tsüklu, tsükmenatzü lu, oliv lu, aser ki, ano noklang shilem nung sen, ano tsük, yi aser totzü, nenoki agia aliba ajakji tanüsa meyipa shilangjang.” 12Idangji parnoki ashi, “Onoki aji meyipa agütsüdi, aser nai ashiba ama onoki parnok nungi kecha tali magitsü.” Ni putirtem jaok aser tanishirtemi nangzükba amaji azüngashidaktsü. 13Ano ni kü sü temdoka ashi, “Shibai tenangzükba mebenshilir, nisung shia yamai pei ki aser mapa nungi Tsüngremi temdoktsü aser tazüngla kümdaktsütsü.” Aser sentepa alir ajaki ashi, “Amen”, aser Kibuba tenüng asang. Aser nüburtemi nangzükba amaji inyak.

Nehimiai Governor Chiyungtsü Makang

14Ano Yihuda lima nung ni governor shimtetba mapang nungi Artazerkzes chuba küm metsü buba nungi semer ana buba, aji küm terana, ni aser kü adianutemi governor chiyungtsü mechiyungdang.

15Saka kü jakdang governor shir liasü, parnoki nübur nungi jenjang tali agi, oda alimelen taribi sen lir agir-ang ano amtsük aser yi parnok nungi akang; hau, oda parnok kübok tenzükertemia nübur madak tashi tali amshi; saka nibo yamaji mebenshi, kechiaser ni Tsüngrem tsübu. 16Hau, ano ni iba jara yanglushiba mapa nung maneni sotak; onoki ali terakata alizüka mayu, saka kü tenzüker ajak külemi senteper mapa inyak. 17Ano kü chiyungba langbang nung, anasa alir bendanger shir onok dangi aru, parnok alema, Yihuda nunger aser yimsüsür nisung noklang ka ser tenem liasü. 18Anogo ka atema chiyungtsü renemdang, nashi pungchi ka aser teshimtet san trok; ano an-a ishika dena ni asoshi renemli asü, aser anogo ter shia yi tapu ajak rizünga yutsüli ta asü. Saka ni governor chiyungtsü kodanga makang, kechiyong iba nübur madak talenba süngra reta benloka liasü. 19Oh, kü Tsüngrem, nübur asoshi ni kechi inyak, ya asoshi ni bilemtetangma.

NEHIMIA 6

Nehimia Anema Tasa Asaba

1Kodang jaraji renemogo, joko teraksa anünga mali ta Sanballat, Tobia, Arab nunger Geshem aser tanüngba tsükchirtemi angazük, iba mapang nungji ano süngkhüm nung kishi meinoki liasü, 2Sanballat aser Geshem nati kü dangi osang yoka ashi, “Arung asenoki Ono lenten nung yim ka nung külemi ajurutepdi.” Saka parnoki kü dak majung inyaktsü bilem. 3Anungji parnok dang osang bener yoka ashi, “Ni mapa tulu ka inyakdagi anungji ni alutsü makok, ni nenok dangi alutsü atema koda mapaji titema ayutsü?” 4Pezüben tashi yamajisa parnoki kü dangi yok, saka ni telangzüba kasa agütsü. 5Ano punguben buba Sanballati tenzüker ka shiti lapoka bener kü dangi yok, koba nung ya zülua liasü: 6“Kintem dangi iba osang ya aru aser Geshemi aji oda ashi, oda nai aser Yihuda nungeri anemtsü bilemer, ibayongji nai jaraji yangludaki, aser iba osang angashiba agi na parnok chuba asütsü. 7Ano Yihuda lima nung chuba ka lir ta Yirusalem nung ne indang sangdongtsü asoshi nai ainkar shimtet; aser iba osangji tang chuba dangi abentsüla. Anungji arung asenoki külemi lemtepdi.” 8Idangji ni pa dangi yoka ashi, “Nai ashiba ama inyakba mapa kecha mali, saka ne sasa purateta ashir dang.” 9Kechiyong parnok ajaki onok tsübudaktsüdi sür yamai ashi, “Parnok tekaji mapa nung tashi meiti akümtsü, aser aji mekümtettsü.” Saka Oh, Tsüngrem, nai kü teka tashi itshia kümdakjang.

10Ni Mehetabel chir Delaia jabaso Shemaia, shiba ki shibanger ali, par kidangi ao. Pai ashi, “Asenoki Tsüngrem kidang külemi ajurutepdi aser kishiji shibangdi; kechiaser parnok arua na tepsettsü; hau, parnoki aonung arua na tepsettsü.” 11Idangji ni ashi, “Ni ama nisung kati yamaji ajentsü no? Aser ni amala nisung shibai pei taküm kümzüktsü asoshi tenla kidang jenoktsü? Ni aji agi maitsü.” 12Ajiang, ni metet, Tsüngremi pa meyok, saka pai ni anema jembitsü Tobia o Sanballat nati pa nem süpokrem agütsü. 13Yamaji ni tsübudaktsütsü aser tetsübu nung tai menadaktsütsü aser ni anema tamajung osang kar parnoki ngutettsü aser ni atalatsü asoshi tasa agi pa mesüzük. 14Oh Tsüngrem, Tobia o Sanballat nati inyakba mapa, aser ainkarlai Noadia den tanüngba ainkartem ni tsübudaktsütsü kechisa inyakogo, ya nai bilemtetangma.

Jara Renemba

15Yamaji jaraji anogo tenem ser ana nung, Elul ita metsür pungunü buba nung renem. 16Kodang tsükchiri ya angashi, meketa alir kin ajaki onok tsübu aser mereprangnüi aküm, kechiaser ya Tsüngrem mapa ta parnoki angatet. 17Iba mapang nungji Yihuda nunger tamarener nungi Tobia dangi shiti aika yok aser Tobia nungia yamaji parnoki angu. 18Kechiaser pa Ara jabaso Shekania tanük liasü, aser pa jabaso Yehohanani Berekia jabaso Meshullam jala agiba yong, Yihuda nung pa tsüngdang azüngashia nangzüker jenti liasü. 19Parnoki pa mapa tajung indang kü dang ashi, aser kü indanga parnok dang oa ashi. Aser Tobiai ni tsübudakja shiti züluli asü.

NEHIMIA 7

1Kodang ni jaraji renem, aser kishi enoka, kiküm anüker, ken atener aser Levi nunger shimtet, 2idangji mapaji kü adianu Hanani nem, aser mitsa governor Hanania nem, Yirusalem ajonga reprangtsü agütsü; kechiaser aika dang nungi pa tamang akaba aser Tsüngrem tsüngken tsübuba nisung ka liasü. 3Aser ni parnok dang ashi, “Anü tsüka maküm tashi Yirusalem süngkhüm telapok; aser parnoki mita alidang süngkhümji shibangdakjang aser tartangtsü yokdakjang; aser nisung shia pei sasa aser pei ki anüktsü atema Yirusalem nung alir ajonga nungi tanüker shimtettsüla.” 4Tang yimtiji tulu aser tesadem, saka idakji alir nübur ishika dang aser talidak ki ano meyanglu.

Tepuokdak Nungi Shilangertem

(Ezr. 2.1-70)

5Tsüngremi kü dang tamarener, yimsüsür aser nübur anitener parnok koda razüka aru tatongi aser taren sena zülutentsü ashi. Parnok tamapur razüka aruba indang kaketji ni bena arutet, aser idakji yamai zülua ni angu:

6“Itemi province nung alir, Babilon chuba Nebukadnezzari pua bener aor chirtem, shirnok tanaben Yirusalem aser Yihuda limai meyipa pei yimti bushia shilang. 7Parnok Zerubbabel, Yihusua, Nehemia, Azaria, Raamia, Nahamani, Mordikai, Bilshan, Misperet, Bigvai, Nehum aser Baana.”

Israel nütsüng yongsük: 8Paros chirtem meyi ana noklang ka neter ana. 9Shefatia chirtem noklang asem neter ana. 10Ara chirtem noklang trok tenem ser ana. 11Pahath-moab chirtem, Yehusa aser Yoab chirtem, meyi ana noklang ti ser terti. 12Elam chirtem meyi ka noklang ana tenem ser pezü. 13Zatu chirtem noklang ti lir pungu. 14Zakkai chirtem noklang tenet roker. 15Binnui chirtem noklang trok lir ti. 16Babai chirtem noklang trok metsür ti. 17Azgad chirtem meyi ana noklang asem metsür ana. 18Adonikam chirtem noklang trok roker tenet. 19Bigvai chirtem meyi ana roker tenet. 20Adin chirtem noklang trok tenem ser pungu. 21Hezekia chir Ater chirtem tukur ti. 22Hashum chirtem noklang asem metsür ti. 23Bezai chirtem noklang asem metsür pezü. 24Harif chirtem noklang ka terana. 25Gibeon chirtem tukur pungu. 26Bethlehem aser Netofa nübur noklang ka tir ti. 27Anathot nübur noklang ka metsür ti. 28Beth-azmavet nübur lir ana. 29Kiriath-jearim, Chefira, aser Beeroth nübur noklang tenet lir asem. 30Rama aser Geba nübur noklang trok metsür ka. 31Mikmas nübur noklang ka metsürana. 32Bethel aser Ai nübur noklang ka metsür asem. 33Tangar Nebo nungi nübu tenem ser ana. 34Tangar Elam chirtem meyi ka noklang ana tenem ser pezü. 35Harim chirtem noklang asem metsü. 36Yeriko chirtem noklang asem lir pungu. 37Lod, Hadid aser Ono chirtem noklang tenet metsür ka. 38Senaa chirtem meyi asem noklang tuku semer.

39Putirtem: Yeshua kinunger Yedia chirtem noklang tuku neter asem. 40Immer chirtem meyi ka tenem ser ana. 41Pashur chirtem meyi ka noklang ana lir tenet. 42Harim chirtem meyi ka tertenet.

43Levi nunger: Yeshua, Kadmeil, aser Hodeva chirtem neter pezü. 44Ken tener telok: Asaf chirtem noklang ka lir ti. 45Kiküm anüker: Shallum, Ater, Talmon, Akkub, Haitita, aser Shobai chirtem noklang ka semerti.

46Tenla ki nung tenzüker telok: Ziha, Hasufa aser Tabbaot chirtem; 47Keros, Sia, aser Padon chirtem, 48Lebana, Hagaba, aser Salmai chirtem; 49Hanan, Giddel aser Gahar chirtem. 50Rehaia, Rezin, aser Nekoda chirtem; 51Gazzam, Uzza, aser Pasea chirtem; 52Besai, Meunim, aser Nefushesim chirtem; 53Bakbuk, Hakufa, aser Harhur chirtem; 54Bazlit, Mehida, aser Harsha chirtem; 55Barkos, Sisera, aser Tema chirtem; 56Nezia aser Hatifa chirtem.

57Solomoner tenzüker chirtem: Sotai, Soferet aser Perida chirtem; 58Yaala, Darkon, aser Giddel chirtem; 59Shefatia, Hattil, Pachereth-hazzebaim, aser Amon chirtem.

60Nethinim ajak aser Solomon tenzüker chirtem noklang asem tukur-ana liasü.

61Tel-mela, Tel-harsha, Cherub, Addon aser Immer nungi aor denji itemi liasü; saka parnoki pei tejakzükdak kimang mesüra parnok koba metsü, aji mesayutet, oda parnokji Israel nunger asü masü ajia mesayutet. 62Delaia, Tobia, aser Nekoda chirtem noklang trok lir ana. 63Putir rongnung Hobaia, Hakkoz, aser Barzillai shibai Gilead nunger Barzillai jala ka agi aser tenünga par tenüng aja, parnok chirtem. 64Kin ajonga razüka aruba kaket koba nung taren sena zülua ali, idakji parnoki reprangdang nung parnok tenüngbo mangu; anungji parnok memerük ta züngshia putir mapa nungi atsünga adok. 65 Aser governori parnok dang ashi, putir ka Urim aser Thummim den madok tashi temeshitiba osetji parnoki achitsü makok.

66Tesenteper ajak agi meyi lir ana noklang asem roker liasü. 67Iba dak alaka kilitsür aser kilir ajak agi meyi tenet noklang asem semer tenet liasü; aser parnok ken tener tetsür tebur noklang ana lir pungu liasü. 68Parnok meyong kor noklang tenet semer trok, gado noklang ana lir pungu; 69ut noklang pezü semer pungu; gado meyi trok noklang tenet metsü.

70Tebu taren kidong rongnung tongti kari mapa asoshi agütsü. Ano governori hon sen meyi ka, su tenem, aser putir sobutsü noklang pungu semer, sen rizüngdak agütsü. 71Aser kin rongnung tongtipur kari sen rizüngdak hon sen meyi metsü, taribi sen meyi ana noklang ana agütsü. 72Aser tanüngba nüburi agütsüba hon sen meyi metsü, taribi sen meyi ana, aser putir sobutsü roker tenet.

73  Anungji putir, Levi nunger, kiküm anüker, kentener tenla ki nung tenzüker aser ano nütsüng kar Israel ajonga pei yimti nung ali. Aser ita tenetbuba nungbo Israel chir ajonga pei yimti nung liasü.

NEHIMIA 8

Ezrai Nüburtem Dang Ozüng Azüngba

1Kodang ita tenetbuba atong aser Israel nüburtem pei pei talidak mesemteter liasü, nübur ajonga nisung ka ama Tzü Süngkhüm jakdang tesadem moapu nungji senten. Parnoki tezülur Ezra dang Mosa ozüng kaket, koba Kibubai Israel nem agütsü, aji bener arutsü ashi. 2Aser ita tenetbuba mezüng anogo nung, angateta angashitsü akoker tetsür tebur sentena aliba mungdang jagi putir Ezrai ozüng kaketji bener aru. 3Aser Tzü Süngkhüm jakdang tesadem moapu nung adenshia aliba tangatetba pur tsüngdang anepdang nungi anjong tenari dang tashi pai ozüngji azüng aser iba ozüng kaket azüngdang nisung ajaki tenarong tena anga. 4Tezülur Ezra süng sabang ka manung noktak aser pa tajichilen Mattithia, Shema, Anaia, Uria Hilkia, aser Maaseia noktak; pa tabelen nung Pedaia, Mishael, Malkija, Hashum, Hashbaddana, Zekaria, aser Meshullum noktak. 5Aser Ezrai kaketji nisung ajaki ngua lapok kechiyong pa ajak madak temaba nung noktaka liasü aser kodang pai aji lapok, nisung ajak noktak. 6Aser Ezrai tulusang Kibuba Tsüngrem moatsü aser nisung ajaki teka mekanga “Amen, Amen” ta langzük; aser parnok tejak alilen shir apudaka Kibuba külem. 7Ano Yeshua, Bani, Sherebia, Yamin, Akkub, Shabbethai, Hodia, Maaseia, Kelita, Azaria, Yezabad, Hanan, Pelaia aser Levitemi nübur dang ozüngji angajemdaktsü, aser nüburtem pei talidak noktak. 8Aser Tsüngrem ozüng kaket nungi jangja janga-a azüng; aser parnoki tetezü ratettsü, anungji tazüngbaji nisungtemi angatet.

9Idangji governor Nehemia, tezülur aser putir Ezra, aser Levi nunger shirnoki nüburtem sayu, parnoki nübur ajak dang ashi, “Nenok Tsüngrem Kibuba tsüngdang tanü temeshi anogo lir, anungji nenoki tejeb mesüra mang teyim.” Kechiaser ozüng o angashi dang nisung ajaki ajeb. 10Idangji pai parnok dang ashi, “Nenok oang, temo chiang aser yi tanangji jemang, aser renema malir asoshi shilem kar tenla bendakjang, kechiaser Kibuba tsüngdang tanü temeshi anogo lir; nenok jashia telima, kechiaser Kibuba tepelaji nenok tashi lir.” 11Anungji Levi nungeri nübur ajak süngjema kümdakja ashi, “Nenok ajem ajema liang, kechiaser tanü temeshi anogo lir; nenok jashia telima.” 12Aser nisung ajak chia ajemtsü parnok ao, kechiaser parnok dang sangoktsüba oji parnoki angatet.

Semtu Benjong Amungba

(Lev. 23.33-43)

13Tananübuba nung kin ajak nungi tongtipur, putir aser Levi nunger, parnok ajak tezülur Ezra dangi ozüng oji bushitsü senten. 14 Aser Kibubai Mosa dang melaba ozüng nung parnoki yamai zülua angu; Israel chirtem tenetbuba ita benjong nungji semtu nung alitsüla 15Aser yimti ajak nung aser Yirusalem nung parnoki yamai sangdongtsüla, “Tenem jagi tuang aser zülua aliba ama semtu yanglutsü atema oliv kongsang, aser arem oliv kongsang, asang aser myrtel kongsang aser süngo melema aketba süngdong kongsang zülua aliba ama semtu yanglutsü bendenang.” 16Anungji nüburi or item osetji bener aruagi nisung shia pei kilem manung, kima nung, aser Tsüngrem tenla ki kima nung, Tzü Süngkhüm tesadang moapu nung aser Efraim süngkhüm tesadang moapu nung pei sasa semtu yanglu. 17Aser shir pur aoba nungi adoker sentepa ali, parnok ajaki semtuji yanglu aser yangji ali, kechiaser Nun jabaso Yihusua anogo nungi tenzüker iba anogo tashi Israel chirtemi yamaji meinyaki aru. Aser parnok lungsoa pelatepbaji tulu liasü. 18Aser anogo shia, mezüng anogo nungi tatembangba anogo tashi, pai Tsüngrem ozüng kaket nungi azüng. Aser parnoki anogo tenet tashi benjongji ali aser tinübuba nung tatembang benjong sentep ka yimsü amato parnoki ali.

NEHIMIA 9

Nüburtemi Temenen Nangzükba

1Tang iba ita metsür pezünübuba nung Israel chirtem anemsü abener, aser parnok kolak nung aut mezür, lumia sentep. 2Aser Israel purtem metsü bendanger nungi parnok sasa sadanger noktak, aser parnok pei temenen aser tsürabur temenen mapa tai nangzük. 3Aser parnok pei talidak noktak aser panüji shilem pezü nung ka, par Tsüngrem Kibuba ozüng kaket azüng, aser tanga pezü shilem nung ka parnoki Kibuba Tsüngrem dang nangzüka külem. 4Idangji Levi kin taktang nung Yeshua, Bani, Kadmeil, Shebania, Bunni, Sherebia, Bani, aser Chenani noktak, aser Kibuba Tsüngrem dang ola tulu agi ayimten. 5Aser Levi kin Yeshua, Kadmeil, Bani, Hashabnia, Sherebia, Hondia, Shebania, aser Pethahia, parnoki ashi, “Noktakang aser ne Tsüngrem Kibuba tenüng teti tatem makai sangang, tang ne sentsüwangshi tenüng koba temoatsü aser tenüngsang ajak dang tematiba, aji moajang.”

Temenen Nangzüka Sarasademba

6Aser Israel nüburtemi iba sarasadem ya sarasadem; “Na Kibuba, na alema ano mali, nai anüng yanglu, anüngtem madak anüng, idakji alir telok ajak, alima aser idakji aliba oset ajak, tzüyim aser idakji aliba ajak yanglu, aser item ajak nai sota ayur; aser anüng nung alir teloki na külemer. 7 Na Kibuba Tsüngrem, shibai Abram shimtet aser Kaldi nunger lima Ur nungi aniteter aru, pa nem Abraham tenüng agütsü; 8 aser ne dak tamang katetba mulungjang nai pa dak angu, aser Kanan, Het, Amor, Periz, Yebus, aser Girgas lima pa nem agütsütsü züngzüktep, aser ne o mapa küma inyak; kechiaser na temeshi lir.”

9  “Nai Ijip lima nung ozü tsürabur timtem angu aser Temerem Tzüyim nung parnoki ayimtenba ola nai angashi; 10 aser Farao anema aser pa nütsüng aser par linük nübur ajonga dang nai temaitsü aser sayatenya sayu; kechiyong nai metet parnoki asüküma item anema benshi aser tanü anogo ama, ne tenüng meteta kümdaktsü. 11 Aser parnoki tzüyim tiyong ajanga ali takong nung ajangtsüsa nai tzüyimji sadang; aser parnok aria arur tsükchirji, tzü tulu telung nung lung ka ama, tarok nungji samadaktsü. 12 Ano parnok kolenisa odir lenmang nung tesangwa agütsütsü atema nai anüngdang mepet tongshi aser aonung mi tongshi agi nai parnok len ani. 13Nai ano Sinai tenem madaki alu, aser parnok den kotak nungi jembi, aser parnok nem o bendangba shitak aser ochi ozüng, telatet ozüng aser temelaba tajung agütsü; 14nai parnok nem ne tenzüker Mosa ajanga, temeshi amungnü meteta kümdaktsü aser ne ozüngtemji parnok nem agütsü, 15 aser parnok ayadang kotak nungi amtsük agütsü, aser tzüradang tajemtsü tzü lung nungi adokdaktsü, aser nai agütsütsü nangzükba lima jagi oa liang ta mela.”

16  “Saka parnoki aser ozü tsüraburi asüküma tekong meranga ne ozüngtem mangai aküm; 17 aser parnoki ne o manga aser parnok tsüngdang ne sayatenya mapatem parnok mulung nung mayu, saka parnok tekong meranga, tashi manga sayua ano tanaben talenba süngra tiai meyipa aotsü parnoki walunir ka shimtet; saka na tai toktetba Tsüngrem, taochi aser temeim agi sünga aliba Tsüngrem, ain adoktsü meilungi, taochi talubosa aliba Tsüngrem, aser nai parnok metoktsü. 18 Hau, parnoki temuluba nashi pungchi ka parnok sasa yanglu aser ashi, ‘Ibai ne tsüngrem, shibai na Ijip nungi anir aru,’ yamaji parnoki mezüngmeshi mapa tulu inyak. 19 Saka ne taochi onsarabayong nai parnok arem nung sentoka metoktsü; anüngdang leniba mepet tongshi aser aonung mi tongshi agi tesangwa sayutsü, aser parnok aolen lenmang tuyutsü atema parnok metoktsü. 20Parnok sayutsü Tanela tajung parnok nem agütsü, parnok tebang nungi mana nai magien, aser parnok tzüradang nai tzü agütsü. 21Hau, küm lir nai parnok arem nung mesü, parnok kecha agia anünga meyutsü; parnok süoshi tejen küma mao, aser parnok tetsüng waka maküm. 22 Ano nai parnok nem yimlitem aser kintem agütsü, koba shilem nai lemzüka agütsü; yamaji parnoki Heshbon chuba Sihon lima, aser Bashan chuba Og lima dena agi. 23 Parnok chirnur anüng petinu ama nai züindaktsü aser par tetsü-tebou dang koba lima agütsüdi ta ashi, aji agi nai parnok anir arua toktsü. 24 Anungji chirnuri oa iba limaji agi aser yangji alir Kanan nunger chubai anir nütsüng ajonga nai parnok küboki aitdaktsü, oda parnok dang par sünütsü asütsü asoshi. 25 Atsü atsüa aliba yimtitem, aser temo aliba linükji parnoki agi, aser yangji oset tajung agi sünga aliba kitem, yangluteta aliba tzübutem, tsükmenatzü aser oliv tsükitem, aser süngjang dong talubosa parnok meyong aküm; anungji parnoki talubosa chia ajem aser yira-a aküm aser nai junga anebaluba yong parnok pelatep.”

26  “Aji asüyonga parnoki tashi mangai na anema apuso, ne ozüng tesülen sendoka yutsü, ainkar shiri parnok ne dangi meyipa arudaktsütsü kuli asü, parnok tepset aser mezüngmeshi mapa tulu inyak. 27Anungji nai parnok tsükchir ket nung agütsü, shirnoki parnok kangshi; aser timtem mapang nung parnoki ayimtenba ola kotak nungi nai angashi, aser ne taochi tulu agi parnok tsükchir ket nungi kümzüka ayutsü asoshi nai parnok nem tekümzüker agütsü. 28Saka kenpiga dang anisüngzüka lirbo ano parnoki ne madang tamajung inyak; anungji nai parnok tsükchir ket nung senzüka toktsü, aser parnok madak parnoki yimsü asü. Saka kodang parnoki meyipa arua ne tsüngdang ayimten, nai kotak nungi angashi, aser ne taochi agi parnok aiben kümzük. 29 Aser nai parnok ne ozüng küboki anir arutsü asoshi ajang ajanga kuli agütsü; saka parnoki mezümeküma benshi, ne ozüng manga, saka ne o bendangba anema tai mena shibai aji benshir pa taküm alitsü, parnoki tapubang metendak, tekong meranga sayu aser tashi manga. 30 Aji asüyonga nai küm aika parnok dang aremzük aser ne Tanelai ainkar ajanga parnok anema kuli südaktsü; saka parnoki tenarong maten, anungji nai parnok iba linük nung alir nisung ket nung agütsü. 31Aji saka nai parnok kanga aochiba yong, parnok khenyongi mesamadaktsü mesüra sentoka metoktsü, kechiaser na temeim aser taochi akaba Tsüngrem lir.”

32  “Anungji tang, Oh Tsüngrem, tenangzükba aser taochi yutetba tulusang aser tetsübutsü Tsüngrem, Asiria chubatem tendak nungi tanü tashi onok dangi aser onok chubatem, ozü lenir, ozü putir, ozü ainkar, ozü tsürabur aser ne nübur ajak dangi aruba timtem tekangshi ya ne tsüngdang tila amai tekümdaktsü. 33Kechi südir süaka, onok dak atalokba ajak nung nai timi dang inyakogo; kechiaser onoki tamajung mapa inyakaka, naibo ochishia dang inyaker. 34Ozü chuba, ozü tamarener, ozü putir, mesüra tsüraburtemi shingaia ne ozüng mayu, mesüra ne temelaba aser ne kuli manga. 35Nai kanga ajungba ajanga nai parnok nem agütsüba, parnoki yimli aser temo aliba lima tesadem angu, saka idakji parnoki na metenzük mesüra tamajung mapa nungi parnoki memeyip. 36Ajiang, tanü onok alar lir; nai ozü tsürabur nem agütsüba linük nung aser idakji süngjanglijang aser oset tajung achitsü melena onok alar lir. 37Iba li yagi tejang tali renloka tangtsü, saka chubatem shir onok menen ajanga onok madak nai chubadaktsü, parnok nem agütsü, parnok nem ano onok temang nung aser onok kiset shiruru madak parnok benshinütsü benshitsü tashi lir, aser onok timtem tulu nung lir.”

NEHIMIA 10

1Tang ajena ayurtem tenüng: Governor Nehemia, Hakalia jabaso, aser Zedekia, 2Seraia, Azaria, Yerimia; 3Pashur, Amaria, Malkija; 4Hattus, Shebania Malluk; 5Harim, Meremot, Obadia; 6Daniel, Ginnethon, Baruk; 7Meshullam, Abija, Mijamin; 8Maazia, Bilgai, Shemaia; itemi putir liasü. 9Levi kintem: Azania jabaso Yeshua, Henadad chir Binnui, Kadmiel; 10aser par adianutem Shebania, Hodia, Kelita, Pelaia, Hanan; 11Mika, Rehob, Heshabia; 12Zakkur, Sherebia, Shebania; 13Hodia, Bani, Beninu. 14Nübur rongnung tongtipurtem: Paros, Pahath-moab, Elam, Zattu, Bani; 15Bunni, Azgad, Bebai; 16Adonija, Bigvai, Adin; 17Ater, Hezekia, Azzur; 18Hodia, Hashum, Bezai; 19Harif, Anathot, Nebai; 20Magpias, Meshullam, Hezir; 21Meshezabel, Zadok, Yaddua; 22Pelatia, Hanan Anaia; 23Hoshea Hanania, Hasshub; 24Hallohes, Pilha, Shobek; 25Rehum, Hashabna, Maaseia; 26Ahia, Hanan, Anan; 27Malluk; Harim aser Baana.

Tezüngzüktepba O-mulung

28Tanüngba nübur: Putir, Levi nunger, kiküm anüker, kentener, tenla ki nung tenzükertem telok, aser tanüngba ajak shirsa iba linük nung alir nisungtem nungi sadanger Tsüngrem ozüng tsütsü ali, aser parnok kinungtsür, jala jabasotem shir dak tangatetba aser temetetba shisatsü ali, 29parnoki pei adianu aser tamarener den semtep aser atakatemtepa, Tsüngrem tenzüker Mosa nem agütsüba Tsüngremer telatet ozüng nung jajatsü, aser Kibuba ozü Kibubai melaba aser o bendangba aser telatet ozüng ajak benshitsü azüngashi. 30Aser iba linük nung alir nisung nem onok jala magütsütsü aser onok jabasotemia parnok jala magitsü azüngashi. 31Ano iba linük nung aliri oset-tsüset mesüra tsük amungnü tayoktsü bener arura, onoki itemji amungnü mesüra temeshi anogo nung malitsü aser onoki tenetbuba küm aluji endoktsü, aser temeshitsü aliba sentsüh ajak atoktsü.

32Ano onoki Tsüngrem tenla dak ki asoshi shekel shilem asem nung ka küm shia tenlatsü nangzüker. 33Ano langbang nung ayuba am, chiyungtsü tenla, aser tarongba tenla maneni yutsütsü, amungnü, ita tasen, teshimtet benjong, aser temeshi osettem, Israel asoshi pungiba temenen tenla, aser Tsüngrem tenla ki mapa ajak, ya ajak asoshi onoki nangzüker. 34Ano ozüng nung zülua aliba ama, tebu kibong apir, küm shia mapang tatakzük nung süng tenla abentsü aser aji ozü Tsüngrem kidang bendentsü aser Kibuba ozü Tsüngrem tarongba tenla dak arongtsü onoki putir, Levi nunger, aser nütsüng rongnung an toktangtsü. 35 Aser ali nungi adokba mezüng süngjang aser süngdong tapu ajak nung mezüng atangba süngjang küm shia Kibuba ki dangi bendentsü, 36 aser mezüng asoba, kiset shiruru mezüng mepuba, ozüng nung zülua aliba ama, aser shiruru aser san telok mezüng mepuba, Tsüngrem kidangi, putir shiba idakji inyaka ali pa tsüngdangi bener arutsü. 37 Aser onok chiyungtsü nungi mezüng süngjang, onok temeranger tenla, aser süngdong tapu balala süngjang, aser yi aser totzü ozü Tsüngrem ki taktang nung putir tsüngdang onoki bendentsü, ano onok li ter shilem tenlaji Levi nunger nem, kechiyong onok alu ayimdak linük aser yimtsüng ajak nung ter shilemji Levi nungeri sarur. 38 Kodang Levi kintemi ter shilemji agizükdir, parnok den Aron chir putirji alitsüla aser Levi kintemi ter shilem madak ter shilemji Tsüngrem ki taktang jagi bener arua terizüngdakji ayutsü. 39Kechiaser Israel chirtem aser Levi chirtemi temeranger tenla tsük, yi, totzü, itemji temeshi marok ayudak taktang aser idakji inyaker putir, kiküm anüker aser kentener alidak taktangi bendentsü, aser onoki Tsüngrem kiji azüngmeyaka metoktsütsü.

NEHIMIA 11

Yirusalem Nung Alirtem

1Nübur tanishirtem Yirusalem nung ali; tanüngba nübur rongnung ter shilem nung ka Yirusalem temeshi yimti nung alitsü anir arutsü, aser shilem tukuji yimti tanga nung alitsü an toktang. 2Aser Yirusalem nung alitsü shirnoki pei sasa mulungtet parnok ajak nüburi moatsü.

3  Linük nung tongtipur Yirusalem nung alirji itemji lir; saka Yihuda yimti nung pei pei shilem nung alir itemi: Israel, putir, Levi nunger, tenla ki nung tenzükertem aser Solomon tenzüker chirnur. 4Aser Yirusalem nung Yihuda chir rongnung Uzzia jabaso Athaia, Zekaria chir, Amaria chir, Shefatia chir, aser Mahalalel chir, Perez chirtem. 5Baruk jabaso Maaseia, Kolhoze chir, Hazaria chir, Adaia chir, Yoiarib chir, Zekaria chir, aser Shiloni nungba chir. 6Yirusalem nung alir Perez chirtem tasü tait nisung ajak agi noklang pezü roker ti liasü.

7Ano Benjamin jabaso itemi: Meshullam jabaso Sallu, Yoed chir, Pedaia chir, Kolaia chir, Maaseia chir, aser Ithiel chir. 8Pa sülen Gabbai aser Sallai, noklang tuku metsür ti. 9Aser Zikiri jabaso Yoel parnok madak terepranger liasü, aser Hassenua jabaso Yihudaji yimti madak tanabuba liasü.

10Putir rongnung Yoiarib jabaso Yedaia, Yakin, 11Hilkia jabaso Seraia, Meshullam chir, Zadok chir, Meraiot chir, Ahitub chir, shiba Tsüngrem kidang yimsüsür liasü, 12aser parnok adianu kidang inyaker noklang ti metsür ana liasü; aser Yeroham jabaso Adaia, Pelalia chir, Amzi chir,Zekeria chir, Pashhur chir, Malkija chir, 13aser par adianutem tebu taren kin nung tongtipur, noklang ana lir ana; aser Azarel jabaso Amashsai, Ahzai chir, Meshillemot chir, Immer chir, 14aser parnok adianu nüngtugu nokinketer nisung noklang ka metsür ti. Parnok madak terepranger Haggedolim jabaso Zabdiel liasü.

15Levi kin rongnung Hassub jabaso Shemiai, Azrikam chir, Hashabia chir, Bunni chir; 16aser Levi kin nung tongtipur rongnungi Shabbethai aser Yozabad, tena Tsüngrem ki temeket reprangba mapa nung liasü; 17aser Mika jabaso Mattania, Zabdi chir, Asaf chir, shiba tenüngsang sarasadem tenzüker tongtiba liasü, aser par adianu rongnung tanabubaji Bakbukia; aser Shammua jabaso Abda, Galal chir, Yeduthun chir. 18Temeshi yimti nung alir Levi nunger ajak agi noklang ana tir pezü liasü.

19Ano kiküm anüker: Akkub, Talmon aser parnok adianu süngkhüm anüker ajak agi noklang ka neter ana liasü. 20Tanüngba Israel nunger, putir, aser Levi kin ajak Yihuda lima yimti ajak nung nisung shia pei pei senmang amanga ali. 21Saka Nethinim telokbo Ofel nung ali aser Nethinim madak Ziha o Gishpa na liasü.

22Yirusalem nung Levi nunger terepranger Bani jabaso Uzzi, Hashabia chir, Mattania chir, Mika chir, Asaf chirtem ken tener shirnok Tsüngrem kidang mapa repranger liasü. 23Kechiaser parnok atema chuba nungi ozüng ya liasü, oda anogo shia asoshi ken tener telok nem tatakzük chiyungtsü agütsütsüla. 24Aser Meshezabeel jabaso Pethahia, shiba Yihuda jabaso Zera nungi jakzük, pa chuba den atongba liasü, shiba ket nung nübur reprangtsü tashi ajak agütsü.

Yimtsüng Aser Yimti Tanga Nung Alirtem

25Yimtsüng nung alir aser parnok lu reprangtsü asoshi Yihuda chirnur kar Kiriath-arba, Dibon aser Yakabzeel yimtitem aser item temeket nung aliba yimtsüng nungji ali; 26ano Yeshua nung, aser Molada, Beth-pelet nung; 27Hazarshual, Beersheba aser item temeket aliba yimtsüng nung, 28aser Ziklag, Mekona aser temeket yimtsüng nung; 29En-rimon, Zora, Yarmut nung; 30Zanoa, Adullam aser temeket yimtsüng nung Lakis aser iba temeket moapu nung, Azeka aser iba temeket yimtsüng nung. Anungji parnoki Beersheba nungi Hinnom lenten tashi nung kimung mesema ki yanglu. 31Benjamin chirtem Geba nungi liyonga aoba Mikmas, Aija, Bethel aser item yimti temeket nung aliba yimtsüng nung; 32aser Anathot, Nob, Anania, 33Hazor, Rama, Gittaim; 34Hadid, Zeboiim, Neballat; 35Lod, Ono, oset-tsüset ayangdak lenten tashi arua ali. 36Yihuda kidong nung Levi nunger telemsa kari Benjamin kidong yima ao.

NEHIMIA 12

Levi Aser Putirtem

1Tang putir aser Levi nunger shir Shealtiel jabaso Zerubbabel aser Yeshua den ao parnok tenüng yamai: Seraia, Yerimia, Ezra; 2Amaria, Malluk, Hattus, 3Shekania, Rehum, Meremot, 4Iddo, Ginnethoi, Abija; 5Mijamin, Maadai, Bilga; 6Shemia, Yoiarib, Yedaia; 7Sallu, Amok, Hilkia, Yedaia, Yeshua mapang nung itemji putir tazüng aser parnok adianutem liasü.

8Ano Levi nunger: Yeshua, Binnui, Kadmiel, Sherebia, Yihuda aser Mattania shiba tenüngsang ken tener telok tanishiba liasü, pa den par adianutem. 9Ano parnok adianu Bakbukia o Unno na parnok jakdang noktak. 10Yeshua nungi Yoiakim jakzük, Yoiakim nungi Eliashib jakzük, 11Eliashib nungi Yoiada jakzük, aser Yoiada nungi Yonathan jakzük, aser Yoiada nungi Yonathan jakzük, aser Yonathan nungi Yaddua jakzük.

12Yoiakim mapang nung putirtem tebu taren tenük shia nungi tongtiba shimtet. Seraia nungi Meraia; Yerimia nungi Hanania; 13Ezra nungi Meshullam: Amaria nungi Yehohanan; 14Malluki nungi Yonathan; Shebania nungi Yosef; 15Harim nungi Adna; Meraiot nungi Helkai; 16Iddo nungi Zekaria; Ginnethon nungi Meshullam; 17Abija nungi Zikri; Miniamin o Moadia na nungi Piltai; 18Bilga nungi Shammua; Shemaia nungi Yehonathan; 19aser Yoiarib nungi Mattenai; Yadaia nungi Uzzi; 20Sallai nungi Kallai; Amok nungi Eber; 21Hilkia nungi Hashabia; Yedaia nungi Nethanel.

22Levi nunger Eliashib, Yoiada, Yohanan aser Yaddua mapang nungi Persia chuba Dairus chubaba mapang tashi tebu taren tenük shia tenüng zülua liasü. 23Levi jabasotem tebu taren shinük shia nungi tongti tenüng, oda Eliashib jabaso Yonanam mapang tashi putipuyang kaket nung zülua liasü. 24Ano Levi kin nung tongtipur: Hashabia, Sherebia, aser Kadmiel jabaso Yeshua, aser parnok adianutem, Tsüngrem tenyar Dawidi melaba ozüng ama tenüngsang agütsüba mapang nung telemsa shia nung terepranger liasü. 25Terizüngdak taktang nung kiküm anükertemjia Mattania, Bakbukia, Obadia, Meshullam, Talmon aser Akkub liasü. 26Item Yeshua jabaso Yoiakim, Yazadak semchir pa mapang putir aser governor Nehemia aser tezülur Ezra mapang nung liasü.

Jara Meshitetba

27Yirusalem jara meshitetba mapang nung, laya, tzürang kongki, aser tawaba kongki amshia tenüngsang ken atenba agi temeshitetba benjongji lungsodaktsütsü asoshi tesem ajak nungi Levi kintemji bushia Yirusalemi aniten. 28Aser ken tener asangurtem Yirusalem temeket lenten linük aser Nethofath linük aika nungi senden. 29Ano Bethgilgal aser Azmavet o Geba na lenten nungi aru. Kechiaser kentenertemi Yirusalem meketa parnok yim yanglu. 30Putir o Levi nunger parnok sasa merüktet; aser parnoki süngkhüm, jara aser item nübur merüktetdaktsü.

31Idangji ni Yihuda nunger tulurtem jara temalen aniten aser tenüngsang agüja yimtong süa aotsü telok tulu ana shimtet; telok ka jara tajichilen Jana Süngkhüm leni ao; 32aser parnok sülen Hoshaia aser Yihuda nunger tulur tesadang ka, 33aser Azaria, Ezra, Meshullam, 34Yihuda, Benjamin, Shemaia, Yerimia, 35aser putir chirtem kar jangzü den, parnok tenüng; Yonathan jabaso Zekaria, Shemaia jabaso, Mattania jabaso, Mikaia jabaso, Zakur jabaso. Asaf jabaso; 36aser par adianutem Shemaia, Azarel, Milalai, Gilalai, Maai, Nethanel, Yihuda, Hanani, Tsüngrem nisung Dawid meyong kongki tapu balala den anitak aser tezülur Ezra parnok jakdang ao. 37Aser parnoki Tzüpokdak Süngkhüm nungi, Dawider ki tema aliba jara leni atudak, Dawid yimti apu ta ajaba lenmangi anüdoklen aliba Tzü Süngkhüm tonga atu.

38Tenüngsang agüja yimtongsür tanabuba telokji parnok den ajuruteptsü tapeleni ao, aser parnok sülen ni aser jara temalen alir nübur tesadang ka, misen mitsa tema nungi tesadem jaraji tonga atu. 39Aser Efraim Süngkhüm temalen nungi Tejen Süngkhüm o Ango Süngkhüm na, aser Hananel o Hammea mitsa na ajanga, San Süngkhüm tonga atu; aser Miter Süngkhüm jakdang tiptema marakzüi noktak. 40Yamaji Tsüngrem kidang tenüngsang agütsür telok anaprongla noktak, aser ni aser kü den yimsüsürtem tesadang ka; 41aser putirtem Eliakim, Maasiea, Miniamin, Mikaia, Elioenai, Zekaria, Hanania, parnoki jangzü aben; 42aser Maasiea, Shemaia, Eliazar, Uzzi, Yehohanan, Malkija, Elam, Ezer tena noktak. Ano kentenertem parnok tanishiba Yezrahiai anir ken tashi agi tena noktak. 43Panüji parnoki tenla tulu agüja kanga pelatep; kechiaser iba ama tepela tulu katettsübaji Tsüngremi parnok dang mela, aser iba tepela nung tetsür aser tanur chanutem dena pelatep; oda iba Yirusalem pelatepbaji talang nungia angashia liasü.

44Ano panüjisa, putir aser Levi nunger atema ozüng agi shimteta akaba alu nungi temeranger tenla, mezüng süngjang tenla, aser ter shilem tenla bendentsü aser rizüngtsü asoshi terizüngdak taktang balala madak nisung shimtet; kechiaser Yihuda nungeri putir aser Levi nunger asoshi pela-a liasü. 45 Aser Dawid o par chir Solomon nati tentetba ozüng amato, parnoki kentener o kiküm anükertem dena parnok Tsüngrem aser temeshitetba benjongji akanga anüktsü agizük. 46Kechiaser Dawid tendak aser akhi Asaf mapang nung kentener rongnung teshimtetpur ka liasü, aser Tsüngrem asoshi tenüngsang aser tepela ken liasü. 47Aser Zerubbabel o Nehemia na mapang nung Israel nunger ajongai ken tener o kiküm anüker nem, anogo shia parnok tenüngdaktsü aser tangutsü shilem kechi ali, aji peria agütsü; aser Levi nunger shilem kechi, ajia balaka sadanger ayu, aser Levi nungeria Aron jabasotem shilemji balaka shimteta yutsü.

NEHIMIA 13

Israel Nungi Bendanger Pilaba

(Zün. 22.1—24.25)

1  Iba anogo nungji parnoki telok tsüngdang Mosa ozüng kaket nungi azüng aser idakji Ammon aser Moab nunger kodanga Tsüngrem tenla kidang sentepdaki arutsü makok ta zülua liasü. 2 Kechiyong parnoki Israel chirtem den am aser tzü bener arua majurutep; saka parnok anema atakatem o ashitsü atema parnoki Balaam nem taa agütsü; aji saka ozü Tsüngremi atakatemji temoatsü kümdaktsü. 3Kodang parnoki ozüngji angashi, idangji meyoktepa aliba telok ajakji Israel nunger nungi lemdang.

Nehimiai Yanglushiba

4Iba tejaklen, putir Elisahib, shiba Tsüngrem ki taktang ajak madak kibur shimtet, shiba Tobia den adianu kümer liasü, 5taktang tulu ka, kong akhidang chiyungtsü tenla, liangmesen, marok aser su, ter shilem tenla tsük, yi, aser totzü ayudak, Levi nunger nem, kentener o kiküm anüker nem ozüng agi bendenba aser temeranger tenla putir asoshi bendenba, item ajak yua liasü. 6Iba mapang ajak nung ni Yirusalem nung maliasü; kechiaser Artazerkzes Babilon chuba küm semer anabuba nungi ni chuba dangi ao aser anogo ishika lir külen ni chuba dang soti asüngdang, 7aser ni Yirusalemi arur külen Eliashib-i Tsüngrem kidang taktang ka agütsüba ajanga Tobia asoshi kechi tai inyak aji ni angatet. 8Iba jagi ni kanga jashi, anungji ni Tobia osettsüset ajak taktang nungjagi endok. 9Idangji ni ozüng agütsü aser parnoki taktangji merüktet; aser Tsüngrem kidang ayuba marok o su, ano chiyungtsü tenla o liangmesen ajak tanaben iba taktang jagi ni bener aru. 10 Levi nunger nem parnok shilem magütsü ta ni angu, anungji Levi nunger aser kentenertem parnok mapa toktsür nisung shia pei lui meyipa liasü. 11Idangji ni yimsüsürtem arüja ashi, “Kechiba nenoki Tsüngrem ki sentoka toktsür?” Aser ni parnok ajak tanaben aniten aser nisung shia pei mapa nung toktsü. 12 Idangji Yihuda nunger ajaki ter shilem tenla tsük, yi, aser totzü terizüngdaki bener aru. 13Aser ni putir Shelemia, tezülur Zadok, aser Levi rongnung Pedaia ta terizüngdak ketdangpur südaktsü, aser parnok kübok teyarir asütsü Mattania jabaso Zakur chir Hanan shimtet; kechiyong parnok dak tamang kateta liasü, aser adianutem nem lemsa-a agütsütsübaji parnok mapa liasü. 14Oh kü Tsüngrem, iba mapa asoshi ni bilemtetangma, aser kü Tsüngrem ki asoshi ni inyakba mapa tajung aser ni anebalubaji nai taidoktsüma.

15  Item anogo nung Yihuda lima nung kari amungnü tsükmenatzü menüngba, tsükpong abenba aser gado nem khu oshitsüba ni angu; ano yi, tsükmenatzü, mungozünu aser tanga khu jenti amungnü nung Yirusalemi bener aruba ni angu; aser ni iba anogo nung chiyungtsü ayokba noktang. 16Ano idakji Tair nunger shir liasü, parnokia amungnü ango aser tanga oset tapu jenti bener arua Yihuda nunger dang aser Yirusalem nung yokli ta asü. 17Idangji ni Yihuda nunger tongtipur arüja ashi, “Nenoki amungnü menendakja kechiba temenen mapa ya amshir? 18Nenok tsüraburia yamai tamajung meinyak no? Aser ibayongji asen dangi aser iba yimti dangi item timtem tia Tsüngremi bener marutsü no? Aji saka ano nenoki amungnü raksaba ajanga timtem tali Israel dangi bena arutsüogo.” 19Kodang Yirusalem süngkhüm amungnü tejaklen nikongdangji mangsema kümdir, süngkhüm kishi ajak shibangtsü aser amungnü anogo mesüi tashi melapoktsü ni ozüng mela, aser kü tenzüker kar süngkhüm kishi anüker südaktsü aser kechi khu südir saka amungnü mebenokdaktsü. 20Idangji shiti bener aser oset ajak shishilembartemji Yirusalem jara temalen nung khen anaben ka tashi atadaktsü. 21Idangji ni parnok dang ashi, “Kechiba nenoki jara anasa mena kazür? Nenoki tanaben yamaisa anenra ni nenok dak teka sangshitsü.” Iba sülenbo parnoki amungnü maru. 22Aser ni Levi nunger dang, parnok pei sasa meshitettsüla ta aser amungnü meshiteta ayutsü asoshi parnoki süngkhümji anüktsüla ta ozüng mela. Oh kü Tsüngrem, ya asoshia nai ni bilemtetangma aser ne temeim tulu agi ni kümzükangma.

Temeyoktep Kibalembuba Aitsüba

(Ezr. 9.1-4)

23  Ano iba mapang nungsa Yihuda nungeri Ashdod, Ammon aser Moabtsür den kibalembuba ni angu, 24aser parnok chirnur tesadangi Ashdod oshi jembi, aser Yihuda nunger oshi mejembitet, saka kin shiai pei oshi jembi. 25Aser ni parnok den atitep aser atakatem aser kar dakbo tazüka azük, aser ku a pidoktsü; aser Tsüngrem tenüng nung yamai shia nangzükdaktsü, “Nenoki nenok jala parnok jabasotem asoshi magütsütsüla, mesüra parnok jala nenok jabasotem asoshi, aser nenok pei asoshi magitsüla. 26 Israel chuba Solomoni iba ama mapa inyakba ajanga tai bena maru no? Aji saka kin jenti rongnung pa mesük shinga chuba mali asü, aser Tsüngremi pa dang meim aser pa Israel ajonga madak chuba kümdaktsü aji saka pa-a bendangtsür ajanga temenen menadaktsü. 27Ajangla onoki nenok dang bendangtsür ajanga asen Tsüngrem dang tai menatsü aser iba ama tamajung mapa inyaktsü shidi ma?”

28  Yehoiada semchir rongnung ka, putir tazüng Eliashiber jabaso, Horon nunger Sanballat tanük liasü; anungji ni pa kü tsüngdang nungi aridok. 29Oh Tsüngrem, parnok bilemtetangma, kechiyong parnoki putir menden, Levi nunger aser putir tezüngzüktepba menena kümdaktsüogo.

30Yamaji ni parnok ajak bendanger nungi bendanga aser meshiteta kümdaktsü, aser putir o Levi nunger pei mapa nung amtakdaktsü. 31Aser süng tenla aser mezüng süngjang tenla asoshi mapangji lemtet.

Oh kü Tsüngrem, teti asoshi nai ni bilemtetangma