LEVI

LEVI

OKILA

Levi kaket nung akhi Israel nunger tekülemba yimya aser yimsü yimpong maparen nung sendakba ozüngtem, aser item mapa ajak anepalua inyaktsü atema putirtem aser Levi kidong nem nungloktsliba indang angutsü.

Kaket tesadang ka nung tenla aser tarongba agütsliba, putirtemi temeshitetba nung ibaji koma inyaktsü iba indang ozüng, aser tesadang ka nung meimchirtem taküm koma merükteta aser anemponga alitsü iba indang ozüng angur.

Kaket tongtibang nükjidongji: Tsüngrem temeshiba, "Israel Tsüngrem temeshiba" dang.parnoki koma kulemtsü aser taküm liba-liro nung pa den koda sendaktepa alitsü, iba tesayuba angutsü.

Kaket ajunga nung tongtibang olen kaji tapu 19:18 "Nai ne kiyonger na ama meimang" koba dang Yisui ozüng rongnung tanabuba ta aja, aji angutsü.

Keta Alibatem

Tenla aser tarongba tenlatem 1:1-7:38

Aron aser pa jabasotem putir mapa asoshi pila-a ayuba 8:1-10:20

Temerük aser memerükba tenla atema 11:1-15:33

Kümtettsü anogo 16:1-34

Taküm anempongba aser tekülem indang 17:27-34

        Keta Alibatem

Tenla aser tarongba tenlatem LEVI  1:1-7:38

Tarongba TenIa LEVI 1:1-17

Chiyungtsü Tenla LEVI 2:1-16

Yimchi-yimjung Tenla LEVI 3:1-17

Memeteti Aibelenba Asoshi Tenla LEVI 4:1-12

Putirtem Atema LEVI 4:13-21

Tatar Atema LEVI 4:22-26

Kija Taküm Atema LEVI 4:27-35

Temenen Tenla Asoshi Ozüngtem LEVI 5:1-6:7

Tarongba Tenla Tenlaba Indang LEVI 6:8-30

Tai Temelen Tenla LEVI 7:1-21

Temo aser Azü Machitsü Noktangba LEVI 7:22-27

Putir Shilem LEVI 7:28-38

Aron aser pa jabasotem putir mapa asoshi pila-a ayuba LEVI  8:1-10:20

Aron aser Par Jabasotem Shimtetba LEVI 8:1-36

Putirtemi Pei Mapa Tenzüba LEVI 9:1-24

Nadab aser Abihu Temenen ajanga Asüba LEVI 10:1-7

Putirtem Atema Ozüng LEVI 10:8 20

Temerük aser memerükba tenla atema LEVI  11:1-15:33

Temerük aser Memerükba Shiruru (Taz.14:3-21) LEVI 11:1-47

Tanur Sor Meshitetba LEVI 12:1-8

Zütsüra atema Ozüng LEVI 13:1-46

Süoshi dak Zütsüra Aketba Indang LEVI 13:47-59

Zütsüra Meshitetba Ozüng LEVI 14:1-32

Kibong Nung Zütsüra LEVI 14:33-57

Temang Memerüki Akümba LEVI 15:1-33

Kümtettsü anogo LEVI  16:1-34

Kümtettsü Anogo (Zün. 29:7-11) LEVI 16:1-19

Anjen Chiok LEVI 16:20-28

Menen Pungi Mung Amungba LEVI 16:29-34

Taküm anempongba aser tekülem indang LEVI  17:27-34

Azü Machitsü Indang LEVI 17:1-16

Shiazü Medemba Anema Ozüng LEVI 18:1-30

Temeshi aser Ochi Ozüng LEVI 19:1-37

Tashi Mangaba Temerenshi LEVI 20:1-27

Putirtem atema Ozüng LEVI 21:1-24

Tenlatem Atema Ozüng LEVI 22:1-16

Magizüktetba Tenlatem LEVI 22:17-33

Benjong Anogotem LEVI 23:1-4

Süia Aoba aser Piyazü Meinokba Am Benjong (Zün.28:26-25) LEVI 23:5-8

Mezüng Süngjang Tenla Benjong LEVI 23:9-14

Aluruba Benjong (Zün.28:26-31) LEVI 23:15-22

Küm Tasen Benjong (Zün.29:1-6) LEVI 23:23-25

Temenen Pungiba Anogo (Zün.29:7-11) LEVI 23:26-32

Semtu Benjong (Zün.29:12-40) LEVI 23:33-44

Milendong Atalokdak (Ani.27:20-21) LEVI 24:1-4

Tsüngrem dang Amtsük Tenlaba LEVI 24:5-9

Ochi Obendangba Tatishitsü LEVI 24:10-23

Küm Tenetbuba (Taz.15:1-11) LEVI 25:1-7

Jubilee Küm LEVI 25:8-17

Küm Tenetbuba Nung Teiynaktsü LEVI 25:18-22

Oset Meyipa Anguba LEVI 25:23-34

Sensaker nem Aputsüba LEVI 25:35-38

Alar Chiokba LEVI 25:39-55

Tashi Angaba Temoatsü (Taz.7:12-24; 28:1-14) LEVI 26:1-13

Tashi Mangartem Merenshiba LEVI 26:14-46

KIBUBA nem Tatemzükba Sempet Agütsüba Indang LEVI 27:1-34

LEVI 1

Tarongba Tenla

1 Kibubai sentep süki nungi Mosa aja, aser ashi, 2“Israel nunger dang shiang, kodang nenoki Kibuba dangi tenla bendir, nenoki san telok nungi mesüra kiset shiruru tulu nungi tenla agüjang.

3“Shiruru telok rongnungi tenla benra, aji nashi tepung tarak maket temeshi ka asütsüla. Pai aji sentep süki kishi züngdang tenlatsüla. Anungji Kibubai pa agizüktsü. 4Aji pa temenen pungitsü asoshi agizüktettsüsa, pa tarongba tenla dakji tekolak nung pa ket agi nemettsüla. 5Ajiser pai nashi pungchiji tepsettsüla, aser Aron jabasotem; putirtemi azüji Kibuba dang tenlatsüla. 6Aser pai tarongba tenla teküpji asatsüla aser anüka alangsatsü. 7Aser Aron jabasotem putirtemi tenladak manung mi apur aji arongtsü. 8Shiruru shi tanükji aser tekolak o temo dena mi nungji enoktsüla. 9Nisung jagi poknüng aser tetsüngji tzü nung shitoktsüla, aser putiri item ajakji tarongba tenla asoshi tenladak arongtsüla. Iba chiyungtsü tenlaba teronemji Kibuba madang tajung lir.

10“Tarongba tenlaji san mesüra nabong telok nungi süra, ibaji tarak maket tepung ka asütsüla. 11Pai aji tenladak septsülen tepsettsüla, aser Aron jabasotem putiri iba azüji tenladak meketa rükloktsütsüla. 12Aser pai aji anüka, tekolak aser temo den alangsatsü, aser tenladak manung aliba mi nung tiptema süng manung putiri itemji ayutsü. 13Poknüng aser tetsüngji tzü agi shitoktsüla, aser putiri tenladak Kibuba madang item ajakji arongtsüla. Iba chiyungtsü tenlaba teronemji Kibuba madak tajung lir.

14“Pai tarongba tenlaji ozü agi tenlara, ibaji posü mesüra guduru asütsüla. 15Putiri aji tenladaki bener arua tekongji mesendanger iba kolakji tenladak arongtsüla, aser azüji tenladak tipleni yimdaktsütsüla. 16Pai tezüng den tejitemji agizüker oa tenladak anüdoklen kong aut endoker idakji endoktsüla. 17Pai aji tashikang nung amer shimatsü, saka bendanga mesadangtsüla, aser aji tenladak süng manung putiri arongtsü. Iba tarongba tenla teronemji Kibuba madang tajung lir.

LEVI 2

Chiyungtsü Tenla

1“Kodang kari tenla atema Kibuba dangi chiyungtsü tenla agütsüdir, pai aji amzü tanük küma menüngsatsüla. Iba manungji pai totzü aser liangmesen enoktsüla, 2aser aji Aron jabasotemi, putirtem dangi bener arutsüla. Putiri amzü tekabu ka, totzü aser liangmesen ajakji agiteta tenladak bilemteta Kibuba madang tarongba tenla asoshi arongtsüla. Iba chiyungtsü tenlaba teronemji Kibuba madang tajung lir. 3Tenla agütsür tanüngbaji Aron aser par jabasotem meyong alitsü, ibai Kibuba nem agütsüba chiyungtsü nungi agitet nungji ya kanga temeshitiba alitsü.

4“Aser kodang nai am yangluba su nung amtsük sanga chiyungtsü tenla agütsüdir, ibaji piyazü meinokba amzü tanük totzü den meyokteper mesüra piyazü meinokba amtsük tapak totzü mezür asütsüla.

5“Ne tenlaji amtsük yangluba susa nungi süra, aji piyazü meinokba amzü tanük totzü den meyoktepba alitsüla. 6Nai aji anüka raksar, iba manung totzü shiloktsütsüla; ibai chiyungtsü tenla lir.

7“Tenlaji po nung asangba amtsük süra, aji amzü tanük aser totzü agi yangluba asütsüla. 8Aser item oset agi yangluba chiyungtsü tenla nai Kibuba dangi bener arutsüla; aser aji putir nem agütsütsü, aser pai aji tenladaki bener arutsü. 9Aser putir jagi chiyungtsü tenla nungi tebilemtettsü asoshi kar agiteta, tenladak manung arongtsü, aji Kibuba dang teronem tajung, mi agi tenlaba lir. 10Aser chiyungtsü tenla agütsüba nungi tanüngbaji Aron aser par jabasotem asoshi alitsü ya temeshi oset lir.

11“Chiyungtsü tenla, koba nenoki Kibuba dang tenladir, aji piyazü agi meyanglutsüla; kechiaser mi agi Kibuba dang tenlaba nung nenoki piyazü mesüra ninang mojitzü marongtsüla. 12Item nai mezüng süngjang tenla atema Kibuba dang tenlatsü akok: saka itemji teronem tajung asoshi tenladak madak mayutsüla. 13Aser chiyungtsü tenlaba shia nung nai metsü enoktsüla; ne Tsüngrem tezüngzükba metsüji ne chiyungtsü tenla nung medeni malitsüla, ne tenla ajak nung nai metsü agütsütsüla.

14“Aser nai mezüng chiyungtsü tenla ka Kibuba tang tenlara, tsük mi nung rur, asentsük kongnüng agi nai tenlatsüla. 15Aser iba nung nai totzü enoker, iba manung liangmesen, enoktsüla ibai chiyungtsü tenla lir. 16Tebilemtettsü tenla amato, tsük temenüngsa aser totzü, aser liangmesen ajakji, putiri arongtsü, ya Kibuba dang mi agi tenlaba.

LEVI 3

Yimchi-yimjung Tenla

1“Kodang nisung kari pei shiruru telok nungi yimchi-yimjung tenla agütsüdir, tepung saka tetsü saka pai Kibuba madang tarak maket agi tenlatsüla. 2Pai shiruru tekolak nung nemettsüla, aser aji Kibuba madang tekülemdak apu kiküm nung tepsettsüla. Aron jabasotem, putirtemi apu meketa azüji rükloktsütsüla. 3Aser Kibuba dang mi agi tenlaba ama yimjung tenla tepseta pai tenlatsüla, poknüng meyiba temo aser poknüng nung aliba temo ajak, 4aser tezüngjang ana, aser iba nung kidangkimo, aser temesen meyiba, tezüngjang denji pai agizükatoktsüla. 5Aser aji Aroner jabasotemi, mi temalen aliba süng manung tarongba tenla manung tenladak arongtsüla; ibai Kibuba dang teronem tajung asoshi tenlaba lir.

6“Yimchi-yimjung tenla atema tepsettsü asoshi Kibuba dang tenlabaji kiset shiruru nungi süra, tepung saka tetsü saka aji tarak maket agi tenlatsüla. 7Pai tenlatsü asoshi san tepung chanu agi tenlara, pai aji Kibuba madakang tenlatsüla. 8Pai iba tekolak nung nemettsü, aser sentep süki jakdang tepsettsüla. Aron chirtemi apu meketa azüji rükloktsütsüla. 9Aser Kibuba dang mi agi tenlaba ama yimjung tenla tepseta pai tenlatsü, iba temo aser tepen temo, ajonga pai tongtiret tashi agizükatoktsü; aser poknüng meyiba temo, aser poknüng nung aliba temo ajak, 10aser tezüngjang ana, iba den aliba kidangkimo, aser temesen meyiba, tezüngjang dena pai agizükatoktsüla. 11Aser aji putiri tenladak manung arongtsü ibai Kibuba dang mi agi tenlaba ama chiyungtsü tenla agütsüba lir.

12“Aser pai tenlabaji nabong süra, aji pai Kibuba madang tenlatsüla, 13aser pa teka agi iba kolak nung nemettsüla aser aji sentep süki madang tepsettsüla; aser Aroner jabasotemi tenladak meketa azüji rükshitsüla. 14Pai iba tenlaji, Kibuba dang mi agi tenla agütsüba ama tenlatsüla; poknüng meyiba temo, aser poknüng nung aliba temo ajak, 15tezüngjang aser iba temo, aser temesen shilem tajungdak. 16Aser aji putiri tenladak manung arongtsüla; iba teronem tajung asoshi mi agi tenlaba ama chiyungtsü tenla lir, temo ajakji Kibuba meyong. 17Nenoki temo mesüra azü machitsü atema nenok alidak putu ajak nung teti asoshi ibai ozüng ka alitsü.”

LEVI 4

Memeteti Aibelenba Asoshi Tenla

1 Kibubai Mosa dang ashi, 2“Israel nungertem dang shiang, kari Kibubai teinyak ta ashiba mapa memeteti inyaka tai menara pai item ozüngtem ya benshitsüla.

3“Tai menasangji totzü mezüa shimtetba putir ka süra, nisungtem dak tai bena arutsüra, idangji pai menenba temenen asoshi pai temenen tenla atema Kibuba dang nashi pungchi chanu ka agüjang. 4Pai nashi pungchiji tekülemdak kishi züngdang bener arua, iba kolak nungji pa ket agi nemettsüla, aser Kibuba madang aji tepsettsüla. 5Idangji mezüja shimtetba putir jagi nashi pungchi azüji tera tekülemdaki bener arutsü. 6Aser putir jagi pei temeyong azü nung metena temeshidak teyindangba sü jakdang Kibuba madang pai azüji tenetben rükshitsü. 7Aser sentep süki nung, Kibuba madang aliba teronem tajung tenladak tezütem manung putiri azü mezütsüla; aser nashi pungchi zü ajakji sentep süki nung aliba tarongba tenla tenladak züngdang meketa pai shiloktsütsüla. 8Aser temenen tenla atema nashi pungchi temo ajakji pai iba nungi agizüktsü; poknüng meyiba temo, aser poknüng nung aliba temo ajak, 9aser tezüngjang ana aser iba nung aliba kidangkimo, aser temesen meyiba, tezüngjang dena pai agizükatoktsüla, 10(yimjung tenla nung nashi pungchi tepseta tenlaba nung agizükba amato), aser aji putir tarongba tenla tenladak manung arongtsü. 11Saka nashi pungchi teküp aser iba den shi ajak, tekolak, tetsüng, poknüng, aser jana, 12nashi pungchi rangbenji tanendak kimalen, merükmerüka alidak, kong aut toktoker idakji mi agi rongang; kong aut toktoker idakji aji arongtsüla.

Putirtem Atema

13“Israel pur telok ajongai memeteti tai menaba, aser aji telok tenük nungi miima lira, aser Kibubai teinyak ta shia lira; 14kodang kechi nung parnoki temenen mena aji metetdir, idangji teloki temenen tenla asoshi nashi pungchi chanu ka agi tenlatsüla, aser aji sentep süki-i bener arutsüla. 15Aser Israel pur tamburtemi nashi pungchi kolak Kibuba madang parnok teka agi nemettsüla, aser Kibuba madang nashi pungchiji tepsettsüla. 16Aser mezüja shimtetba putiri nashi pungchi züji sentep jagi bener arutsü; 17aser putir jagi pa temeyong azü nung metena teyindangba sü jakdang tenetben tashi Kibuba madang aji rükshitsüla. 18Aser tekülemdak nung Kibuba madang aliba apu tezütem dak azüji mezütsüla, aser tanüngba azüji tekülemdak kikümdang aliba tarongba tenla tenladak atem nung pai shiloktsütsüla. 19Aser iba temo ajakji agiteta tenladak manung arongtsüla. 20Yamaji pai nashi pungchi jagi inyaktsüla; temenen tenla nashi pungchi agi inyakba ama, yamaji pai iba agi inyaktsüla; aser parnok asoshi putiri temenen pungitsü inyaktsüla, aser parnok tai atoktsü. 21Aser tanendak kimaleni pai nashi pungchiji bener aotsü, aser aji mezüngbuba nashi pungchi arongba amaji arongtsüla, ibai telok asoshi temenen tenla lir.

Tatar Atema

22“Kodang yimsüsür kati temenen menadir, aser memeteti Kibuba ozüng anema aibelendir, 23aser pai kechi nung aibelen aji meteta kümra, pa temenen asoshi tarak maket nabong tepong ka pai bener arutsüla. 24Pai nabong kolak nung pa ket agi nemettsü, aser aji tenladak septsülen kong tarongba tenla asoshi shirurutem tepseter idakji pai aji tepsettsüla. Ibai pa temenen pungiba tenla lir. 25Putiri shiruru azü nungji pa temeyong metener tarongba tenladak tezütem manungji mezütsü, aser tanüngbaji tenla tenladak züngdang shiloktsütsü. 26Yimchi-yimjung tenla atema shiruru tepseta arongba ama pai temo ajakji tenladak arongtsü. Yamaji putir jagi yimsüsür temenen asoshi tarongba tenlaji agütsütsü, aser pa tai atoktsü.

Kija Taküm Atema

27“Aser Kibubai teinyak ta ashiba mapa kar, inyakdang memeteti telok rongnung kari temenen menara, aser tai lira; 28temenen koba pai menaogo, aji pai meteta kümra, idangji pai menaba temenen asoshi tenla asoshi nabong bener arutsüla, tarak maketba tsüla ka. 29Aser pai temenen tenla tekolak nung pa ket agi nemettsüla, aser tarongba tenla tenladak temenen tenlaji tepsettsüla. 30Aser putiri iba züji pei temeyong agi bena arua tarongba tenla tenladak tezütem manungji mezütsüla, aser azü tanüngbaji tenladak züngdangji shiloktsütsü. 31Aser yimjung tenla tepsetba nung temo ajak agizükba amato iba temo ajak pai agizükatoktsüla, aser Kibuba dang teronem tajung asoshi tenladak manungji aji putiri arongtsüla; aser pa asoshi putiri temenen pungitsü atema inyaktsüla, aser pa tai atoktsü.

32“Aser pai tenla atema san chanu ka bener arua, aji pai tarak maket tsüla ka abentsüla. 33Aser pa temenen tenla agütsüba kolak nung pa ket agi nemettsüla, aser tarongba tenla tepsetdak pai aji temenen tenla atema tepsettsüla. 34Putiri shiruru zü nungi pa temeyong metener tarongba tenladak tezütem manungji aji mezütsü, aser tanüngbaji tenla tenladak züngdang shitoktsüla. 35Aser yimjung tenladang san chanu temo ajak bener aoba ama, pai temo ajak bener aotsüla, aser putiri itemji tenladak manung arongtsüla, aji Kibuba dang mi agi tenlabatem temo lir; aser pai menaba temenen indang putiri pa asoshi temenen pungitsü inyaktsüla, aser pa tai atoktsü.

LEVI 5

Temenen Tenla Asoshi Ozüngtem

1“Aser kari temenen menara, aser azüngashiba ola angashir, aji pai ngur mesüra meteter kuli süa lira, aser pai ola madokra, idangji pa tai pai abentsü. 2Mesüra kari memerükba oset kar dak kongshira, memerükba shiruru tasü mang dak süshia, memerükba kiset shiruru tasü mang dak süshia, mesüra memerükba ayazüba shiruru tasü mang dak süshia, aser aji pa nungi nembanga lira, pa memerüki akümtsü aser pa tai alitsü; 3mesüra nisung memerükba dak pai kongshira, memerükba kechi agisa nisung menendaktsüdir, aser aji pa nungi nembanga lira, kodang pai aji metetdir, idangji pa tai alitsü 4Kari züpazüpa-a tamajung inyaktsü, mesüra tajung inyaktsü pei tebang nungi azüngashira, kechisa nisungi züpazüpa-a azüngashia jembidir, aser aji pa nungi nembanga lira, kodang pai aji metetdir, idangji ibala ajak nung pa tai alitsü.

5Aser kodang item rongnung ka nung tanga tai lidir, kechi nung pai tai mena, iba atema pai tai nangzüktsü, 6aser pai menaba temenen asoshi Kibuba dangi pa tai tenla, san telok nungi tsüla ka, san chanu ka, mesüra nabong ka, temenen tenla, asoshi pai bener arutsü, aser pa temenen indang putiri temenen pungitsü pa asoshi yanglutsü.

7Aser pai san chanu agi tenlatsü mokokra, idangji pai pa tai tenla, kechi nung pai tai mena iba asoshi, guduru ana, mesüra posü chanu ana, Kibuba dangi bener arutsü; ka temenen tenla asoshi, aser ka tarongba tenla asoshi. 8Aser pai itemji putir dangi bener arutsü, aser koba temenen tenla lir, tamasa pai aji tenlatsü, aser pa tekong nungi tekolak mesentsü, saka aji mesadangtsü; 9aser temenen tenlaba züji kar pai tenladak züngdang rükshitsü; aser tanüngba züji tenladang züngdang külentzü nung yimdaktsütsü, ibai temenen tenla lir. 10Aser tanabubaji pai tarongba tenla asoshi yimsü amato agütsütsü, aser pai temenen menaba indang putiri pa asoshi temenen pungitsü yanglutsü, aser pa tai atoktsü.

11“Saka pai guduru ana, mesüra posü chanu ana agütsütsü mokokra, idangji pai kechi nung temenen mena iba asoshi tenla, amzü tanük efa ter shilem nung ka temenen tenla asoshi bener arutsü, pai iba nung totzü süshia mesüra pai iba nung totzü süshia mesüra liangmesen süshia meshioktsüla, kechiaser ibai temenen tenla lir. 12Aser aji pai putir dangi bener arutsü, aser aji putiri pa tekabu ka sünga tebilemtettsü asoshi agitsü, aser Kibuba dang mi agi tenlaba manung, tenladak aji arongtsü, ibai temenen tenla lir. 13Aser item mapa kar pai menaba pa temenen indang pa asoshi putiri temenen pungitsü inyaktsüla, aser pa tai atoktsü; aser chiyungtsü tenla amato, tanüngbaji putir meyong alitsü.”

14Aser Kibubai Mosa dang ashi, 15“Kibuba temeshi oset nung kari meshiteti tai benshira, idangji pai pa tai tenla, san telok nungi tarak maket san tepung chanu ka bener Kibuba dangi arutsüla, aji tai tenla asoshi temeshidak aliba shekel agi nai taribi odangba yari agütsütsü; 16aser temeshi oset nung pai aibelenba asoshi pai temelen agütsütsüla, aser shilem pungusübuba yangji enoker aji putir nem agütsütsüla; aser putir jagi pa asoshi san tepung chanu agi tai tenla pa menen pungitsü atema inyaktsü, aser pa tai atoktsü.

17“Aser kari temenen menara, aser Kibubai teinyak ta ashiba kar inyakra, pai aji memetetaka, pei tai pai abentsü. 18Aser san telok nungi san tepung chanu tarak maket ka, ne shitet agi tai tenla asoshi putir dangi bener arutsüla: aser aibelenba koba pai meshiteti inyak pa asoshi putiri temenen pungitsü inyaktsü. 19Ibai tai tenla lir, atangji Kibuba tsüngdang pa tai lir.”

LEVI 6

1  Kibubai Mosa dang yamai ashi, 2“Nisung kari temenen mena-a KIBUBA anema tai inyakra, aser pei kiyonger den oset rizünga ayuba nung külakoktsüra, mesüra tenangzüktepba nung mesüra rakzükraktem nung mesüra pei kiyonger kangshia lira, 3mesüra langka samaba pai ngur nung mangu ta azüngashiba, mesüra yamala mesükba mapa kar nung tai menara, 4kodang pei temenen mena-a tai benshibaji metetdir, pai rakzükraktema agiba oset mesüra tashiyim agi bena aruba oset mesüra tesamaba oset pai anguba, itemji pai meyipa agütsütsüla, 5mesüra kechi nungsa pai aibelena azüngashia ali, pai item ajakji meyipa agütsütsüla, aser pa temenen tenla agütsüba anogo nung oset kibur nem pungusü nung shilem ka enoksemer agütsütsüla. 6Pa tai asoshi putir dang san telok nungi tarak maket san tepung ka bener arua, pa temenen tenla atema Kibuba nem agütsütsüla, aser aji jenjang talang aketba asütsüla. 7Putiri aji nisungba tai ajak asoshi Kibuba nem tarongba tenla agüja pa temenen pungitsü, aser pa tai ajak atoktsü.”

Tarongba Tenla Tenlaba Indang

8Aser Kibubai Mosa dang ashi, 9“Aron aser pa jabasotem dang mela-a shiang, Ibai tarongba tenla ozüng lir: tarongba tenlaji tenladak manung mimung nung nanger mesangwa tashi alitsüla; aser iba manung tenladak mi jangrua ayutsüla. 10Aser putiri pei kümpa sü sobutsüla, aser pa temang kümpa sü tetsüng semoktsü asemtsüla; aser tenladak tarongba tenla mi agi rongzükba aut pai agizüka tenladak tezülen ayutsüla. 11Aser pai pei sobutsü agizüker tanga sobutsüla, aser tanendak kimalen temerükdaki autji bener arutsüla. 12Aser tenladak miji maneni iba manung jangrua ayutsüla, aji meremseptsüla; aser anepdang shia putiri iba manung süng atsüktsüla, aser iba manung pai tarongba tenla tiptema ayutsüla, aser iba manung yimjung tenla temo arongtsüla. 13Maneni iba mi jangrua ayutsüla, aji meremseptsüla.

14“Aser ibaji chiyungtsü tenla ozüng lir: Aron jabasotemi Kibuba madang tenladak tsüngdang aji tenlatsüla. 15Aser iba nungi pa tekabu ka sünga, chiyungtsü tenla amzü tanük agitettsü, aser iba nungi totzü, aser chiyungtsü tenla manung aliba liangmesen ajak, aser Kibuba dang tebilemtettsü atema tenladak manung teronem tajung asoshi aji arongtsüla. 16Aser iba nung anüngbaji Aron aser pa jabasotem achitsü, aji piyazü meteni temeshidak achitsüla; sentep süki kima nung parnoki aji achitsüla. 17Aji piyazü meinoki asangtsüla. Aji ni parnok nem kü dang mi agi tenlaba parnok shilem agütsüogo; temenen tenla aser tai tenla amato aji kanga temeshi. 18Mi agi Kibuba dang tenlaba nungi putusa putu asoshi tangutsüba shilem amato, Aron chir rongnung tebur shiai aji achitsüla, shibaisa item dak kongshidir temeshi akümtsü.

19 Kibubai Mosa dang ashi, 20“Ibai Aron aser pa jabasotem Kibuba madang totzü mezütsüba anogo nung tenlatsüba lir; teti chiyungtsü tenla asoshi amzü tanük efa shilem ter nung ka anepdang tesadang ka aser nikongdang tesadang ka, 21totzü den kanga junga meyokteper susa ka nung asangtsüla; aser aji tilala küma yanglur Kibuba dang chiyungtsü tenla teronem tanang asoshi agütsütsüla. 22Aron chirtem rongnungi putir, shiba mezüja shimtetdir pa melen, ozüngi melaba ama ibaji pai tenlatsüla. Ajongaji arongtsüla. 23Putir asoshi chiyungtsü tenlaba shia ajakji arongtsüla, aji machitsüla.

24 Kibubai Mosa dang ashi, 25“Aron aser pa jabasotem dang shiang, Ya temenen tenla ozüng lir, tarongba tenla kong tepseter, idakji Kibuba madang temenen tenla tepsettsüla, ya kanga temeshi. 26Putir shibai shiruruji temenen asoshi tenladir, pai iba shiji tekülemdak kima temeshidak ka nung achitsüla. 27Kari mesüra langka agi iba shi nungji kongshira temeshi alitsü. Süoshi kar dak azüji rükloka lira, ibajibo temeshidaki bener oa shitoktsüla. 28Ali po koba nung shiji aso, aji raksatsüla. Saka yongmenyin po nung sora, meyipshia meyur tzü nung shizüka yoktsüla. 29Putir rongnung tebur shiai iba shiji achitsü akok; ya kanga temeshi lir. 30Saka temenen tenla koba nung azü tekülemdak temenen pungitsü bener aiter, ibaji machitsüla; aji mi agi rongtoktsüla.

LEVI 7

Tai Temelen Tenla

1“Item ya tai tenla asoshi ozüng lir, koba kanga temeshi lir. 2Kodang iba atema shiruru tepsetdir aji tenladak septsülen kong tarongba tenla asoshi shirurutem tepseter idakji tepsettsüla, aser iba azüji tenladak meketa rükloktsüla. 3Iba temo ajakji tenlatsüla, teben poknüng nembangba temo, 4tezüngjang aser iba temo aser temesen shilem tajungdak. 5Putiri aji Kibuba dang chiyungtsü tenla ama temo ajakji arongtsüla.Ya tai temelen tenla lir. 6Putir rongnung tebur shiai ya achitsü akok, aser aji temeshidak achitsüla, kechiaser ya kanga temeshi lir.

7“Temenen tenla aser tai tenla asoshi ozüng ya lir: putir shibai temenen aser tai pungitsü inyaker, shiji pa meyong alitsü. 8Shiruru koba tarongba tenla asoshi agütsüdir, aser putir shibai tarongba tenlaji agütsüdir; shiruru teküpji pa meyong alitsü. 9Chiyungtsü tenla asoshi koba amtsük susa nung, mesüra amtsük asangba po nung yangludir, aser putir shibai tenlaji agütsüdir, amtsükji pa meyong alitsü. 10Saka koba chiyungtsü totzü den meyoktepba süaka takong süaka lir, aji Aron jabasotem ajak sakusa lemsatsüla.

11“Kibuba dang tenlatsü asoshi ibai telungjem tenla ozüng lir. 12Kari tenüngsang tenla agütsüra, pai abenba shiruru den piyazü meinokba amtsük temelem totzü den meyokteper, mesüra amtsük tanük totzü den meyokteper agütsütsüla. 13Iba den ano piyazü enoka yangluba amtsük agi tenlatsüla. 14Iba nungi tapu shia ka ka pai Kibuba dang tenla balaka ama agütsütsüla, aser putir shibai shiruru züji tenladak rükloktsüdir, aji pa meyong alitsü. 15Shiji tenla agütsüba anogo nungsa chimadoktsüla, mesüra pai aji anepdang tashi kecha anünga mayutsüla.

16“Nisung kari pai azüngashiba atalokba tenla, mesüra temulunger tenla ama telungjem tenla benra, iba shiji tenla agütsüba anogo nung dang masü, saka anogo tanga nunga achitsü akok. 17Anogo asemnübuba tashi shiji anüngra aji mi nung arongtsüla. 18Iba shiji anogo asemnübuba tashi chira, Tsüngremi nisungba tenlaji magizüktsü. Tenlaji temeshi ta mezüngshitsü, saka aji memerükba ama kümdaktsütsü, aser shibai aji chidir pai iba taiji abentsü.

19“Shi jagi memerükba oset kar dak kongshira, idangji shiji machitsüla, saka mi nung arongtsüla. Shibasa merükteta lir pai shiji achitsü akok, 20saka memerüki nisung kari aji chira, iba nisung Tsüngrem nübur rongnungi jentoktsü. 21Ano kari memerükba oset kar dak, nisung mesüra shiruru dak kongshira külen shiji chira, iba nisung Tsüngrem nübur rongnungi jentoktsüla.

Temo Aser Azü Machitsü Noktangba

22 Kibubai Mosa dang ashi, 23“Israel nunger dang shiang, nenoki nashi, san mesüra nabong temo machitsüla. 24Shiruru tasü mesüra arem shirurui ngusetba item temoji machitsüla, saka tanga nüngdak asoshi amshitsü akok. 25Kibuba nem chiyungtsü tenla asoshi agütsüba temo kari chira, iba nisung Tsüngrem nüburtem rongnungi jentoktsüla. 26Israel nungertem kongsa lidir liaka, parnoki ozü mesüra shiruru zü parnok chiyungtsü asoshi merenemtsüla. 27Kari iba ozüng raksara iba nisung Tsüngrem nüburtem rongnungi jentoktsüla.”

Putir Shilem

28 Kibubai Mosa dang ashi, 29“Israel chirtem dang shiang, shibai telungjem tenla bendir, pai Kibuba dangi sempet balaka ama shilem kar bener arutsüla. 30Chiyungtsü tenla ama aji pei teka nung bener arutsüla. Kibuba ajak dang ayipshitsüla tenla ama shiruru mamalong agi ayipshitsüla, temo den mamalongji pai bener arutsüla. 31Putiri temoji tenladak arongtsü, saka mamalongji putir meyong alitsü. 32Telungjem tenla asoshi tepsetba shiruru tepi tajichi tenla balaka ama agütsütsüla. 33Aron jabasotem shibai telungjem tenla azü aser temoji tenladir, tajichi tepi pa shilem asütsü. 34Shiruru mamalong aser tajichi tepi aji sempet balaka aser tesarutetba nungi tenla ama Kibuba Israel nungertem nungi agiteta putir nem agütsüogo. Israel nungertemi putu ajak nung putir nem aji agütsütsüla.

35“Kibubai parnok putir mapa tenzüktsü shimtetba anogo nung Kibuba nem agütsüba chiyungtsü nungi ibai Aron aser par jabasotem nem agütsüba lir. 36Iba anogo nung Kibubai Israel nungertem dang iba shilemji parnok nem agütsütsü mela. Iba temelaba ozüng ya Israel nungertemi putu ajak nung benshitsüla.”

37Tarongba tenla, chiyungtsü tenla, temenen tenla, telungjem tenla, bendanga agütsüba indang, yimjung tenla, item asoshi iba temelaba ozüng lir. 38Sinai tenem lisem lima kodang Mosai Israel nungertem dang parnoki tenla agütsütsü indang ashi, iba anogo nung Kibubai Mosa nem iba ozüng ya agütsü.

LEVI 8

Aron Aser Par Jabasotem Shimtetba

(Ani. 29.1-37)

1 Kibubai Mosa dang ashi, 2“Aron aser par jabasotem sentep süki jagi anir iang, aser putir sobutsü, temezüba totzü, temenen tenla atema nashi pungchi ka, aser san tepung ana, aser piyazü meinokba amtsük molok itemji bener arung. 3Ano Israel nunger telok ajak jatepang.”

4 Kibubai melaba ama Mosai inyak, aser kodang Israel telok sentep, 5pai parnok dang ashi, “Tang ni kechi inyaktsü lir, aji Kibubai melaba lir.”

6Mosai Aron aser par jabasotem anir arua tzü agi parnok shitoktsü. 7Aser pai Aron nem süoshi sobutsü, aser peremlen jagi pa nai, aser putir temeshi sobutsü sobudaktsür, sangra-a yangluba putir peremlen agi pai pa teperem alendang. 8Pa dak teku semoksü semoktsü, aser Urim aser Thummim enoktsü. 9Kibubai Mosa dang melaba amato pai kolakjen aser kolakjen tejaklen temeshitet bendanga agütsüba tetezü hon süji ataloka ayu.

10Idangji Mosai temezütsüba totzü agi, aser tekülemdak süki aser iba nung aliba ajak dak totzüji mezütsü aser itemji meshitetdaktsü. 11Pai totzüji tera agia tenladak aser oset ajak, aser susa aser tamentakdak ajak nung totzü mezüja meshitet. 12Pai Aron kolak nung totzü shilokja aser pa dak aji mezüja shiteta ayu. 13Iba sülen Mosai Aron jabasotem anir arua Kibubai pa dang melaba ama parnok nem semoksü semtsü, aser peremlen agi alendangtsü aser parnok kolak nung korang alenloktsü.

14Aser Mosai nashi pungchiji temenen tenla asoshi bener aru, aser Aron o par jabasotemi iba kolak nung teka agi nemet. 15Mosai ibaji tepseta azüji kar agi aser idakji pa temeyong metener tenladak tezütem manung rüklokja meshitet. Tanüngbaji tenladak züngdang pai shiloktsü. Yamaji pai aji meshitet. 16Mosai poknüng meyiba temo ajak, temesen shilem tajungdak, tezüngjang aser iba temo, itemji agia tenladak arong. 17Kibubai melaba ama tanüngbaji teküp, shi aser tar, item ajakji tenladak kimalen arong.

18Iba sülen Mosai san tepungji tarongba tenla asoshi bener aru. Aron aser pa jabasotemi iba kolak nung parnok teka agi nemet. 19Mosai aji tepset aser azüji tenladak meketa rükloktsü. 20Pai san tepungji anüka alangsa aser tekolak, shinük aser temo itemji mi nung arong. 21Pai poknüng aser tetsüngji tzü agi shitok, aser san tepung rangben tenladak manung teronem tajung asoshi arong. Aji Kibubai Mosa dang melaba ama liasü.

22Pai san tepung tanabuba koba putirtemi shiteta ayuba nüngtem yua liasü, aji bener arua Aron aser pa jabasotem nem iba kolak nung parnok teka agi nemetdaktsü. 23Mosai aji tepseta, azüji bener arua Aron tajichi tenarongdak, teka tajichi jemtsüba, aser tajichi tetsüng jemtsüba manung rükloktsü. 24Pai Aron jabasotem anir arua parnok tenaronglak tajichi, teka tajichi jemtsüba aser tajichi tetsüng kemtsüba manung azüji rükloktsü. Aser tanüngbaji pai tenladak meketa shiloktsü. 25Pai temo, teben temo, poknüng meyiba temo, aser tepi tajichi agitet. 26Iba sülen pai Kibuba nem bendanga agütsüba amtsük molok nungi amtsük telong ka, totzü mezüba amtsük, piyazü meinokba amtsük tapak ka agiteta itemji temo aser tepi tajichi manung ataloka ayu. 27Pai item ajakji Aron aser par jabasotem ket nung agütsü, aser parnoki aji Kibuba nem sempet palaka asoshi agütsü. 28Mosai parnok nungi chiyungtsüji agia shiteta ayuba tarongba tenla koba itemji tenladak arong. Ibai chiyungtsü tenla lir aser iba teronem Kibuba madang tajung liasü. 29Aser Mosai mamalongji agia Kibuba nem sempet balaka ama agütsü, ibai shiteta ayuba tenla san tepung nungi Mosa shilem liasü. Aser Kibubai melaba ama Mosai ajak inyak.

30Mosai temezütsüba totzü tera aser azü tera tenladak nungi agia Aron aser par jabasotem süoshi nung rükloktsü. Yamaji pai parnok aser parnok süoshi Kibuba nem bendanga agütsü.

31Mosai Aron aser par jabasotem dang ashi, “Shiji sentep süki kishi züngdangi bener oa idakji soang, aser Kibubai melaba ama, bendanga agütsüba molok nung amtsük den aji chiang. 32Amtsük mesüra shi kar danga anüngra mi nung rongang. 33Nenok meshitetba anogo mabensa tashi tenladak nungi anogo tenetnü metugutsüla. 34Nenok temenen pungitsü atema tanü inyakbaji Kibubai melaba lir. 35Nenoki sentep süki kiküm züngdang anüngdang aser aonung lia Kibubai melaba inyaktsüla. Nenoki aji meinyakra, nenok asütsü. Ibai Kibubai kü dang melabaji lir.” 36Anungji Aron aser par jabasotemi Mosa ajanga Kibubai melaba ajak inyak.

LEVI 9

Putirtemi Pei Mapa Tenzükba

1Anogo tinübuba nung Mosai Aron aser par jabasotem aser Israel tamburtem aja. 2Pai Aron dang ashi, “Tarak maket nashi pungchi chanu ka temenen tenla asoshi, aser san tepung ka tarongba tenla asoshi Kibuba nem agüjang. 3Aser Israel nungertem dang shiang, nenoki temenen tenla asoshi nabong tepung ka agiang, tarak maket nashi chanu ka aser san ka küm ka ka tain tarongba tenla asoshi agiang, 4aser nashi pungchi ka aser san tepung ka telungjem tenla asoshi agiang. Itemji chiyungtsü tenla den meyokteper Kibuba nem tenla asoshi agüjang. Parnoki yamaji inyaktsüla, kechiaser tanü parnok dang Kibuba jungkai adoktsü.”

5Mosai ashiba ama parnoki sentep süki-i item ajak bener aru aser telok ajak Kibuba külemtsü sentep. 6Mosai ashi, “Ibai nenoki inyaktsü Kibubai melabaji lir, anungji pa sentsüwangshi nenok dangi jungkai adoktsü.” 7 Idangji pai Aron dang ashi, “Tenladaki oa temenen tenla aser tarongba tenlaji ne menen aser nüburtem menen pungitsü asoshi agüjang. Kibubai melaba amato nüburtem temenen pungitsü asoshi iba tenla ya agüjang.”

8Aroni tenladaki arua pa asoshi temenen tenla nashi pungchi chanuji tepset. 9Pa jabasotem pa dangi azüji bener aru, aser pai azü nungji pa temeyong metener kar tenladak tezü nung rükloktsü, aser tanüngbaji tenladak züngdang shiloktsü. 10Idangji Mosa dang ashiba amato pai tenladak temo, tezüngjang, aser temesen shilem tajungdak, itemji arong. 11Saka shi aser teküpji pai tanendak kimalen arong.

12Aser pa asoshi tarongba tenlaji pai tepset, aser pa jabasotemi pa dangi azüji bener aru, aser pai aji tanendak meketa rükloktsü. 13Parnoki ano pa nem shiruru tekolak aser temang shiji agüja pai aji tenladak arong. 14Iba sülen pai poknüng aser tetsüngji shitoka, tenladak tematiba manung arong.

15Iba sülen pai nüburtem tenlaji agütsü. Nüburtem temenen tenla asoshi nabongji tepseta, pa temenen tenla asoshi agütsüba ama ibaji agütsü. 16Pai ano tarongba tenla asoshi shiruruji bena arua ozüng nung aliba ama tenla. 17Pai chiyungtsü tenlaji agütsü, aser amzü tekabu ka agia tenladak arung. Aji anogo shia tarongba tenla agütsüba dak alia liasü. 18 Nashi pungchi aser san tepungji pai tepseta nüburtem asoshi telungjem tenla agütsü. Aser pa jabasotemi pa dangi azüji bener aru aser pai aji tenladak meketa rükloktsü. 19Saka nashi pungchi temo, aser san tepung temo poknüng, teben temo, poknüng meyiba, temesen shilem tajungdak, tezüngjang meyiba, 20itemji parnoki mamalong den yutsü, aser temoji tenladak arong. 21Aser mamalong den tepi tajichiji Kibuba dangi tenla palaka ama putir nem agütsütsü Kibubai Mosa dang mela.

22  Kodang Aroni tenla agütsüba ajak renem, pai nübur tsütsü teka mekanga parnok moatsü aser pa alu. 23Mosa aser Aron sentep süki-i Kibuba dangi ao, aser kodang parnok adok, parnoki nüburtemji moatsü, aser Kibuba sentsüwangshi nüburtem madak adok. 24Aser Kibuba madang nungi mi adoka tarongba tenla aser temoji meyokadok. Kodang nüburtemi aji angu, parnoki ayimten aser parnok tejak ali nung apudak.

LEVI 10

Nadab Aser Abihu Temenen Ajanga Asüba

1Aron jabaso Nadab aser Abihu nati pai miteptsü bena arua iba manung mi aser liangmesen enoker Kibuba nem agütsü. Saka iba miji temeshi masü, kechiaser Kibubai yamai inyaktsü parnok dang memela. 2Anungji Kibuba madang nungi mi adoka parnok idakji Kibuba madang mi jagi rongset. 3Idangji Mosai Aron dang ashi, “Kibubai ashibaji ya lir, shirnokisa ni tenzüker parnok ajaki kü temeshiba akhüm tsübutsüla; ni kü sentsüwangshi kü nübur dang jungkai adoka sayutsü.” Saka Aroni ola madoki ali.

4Mosai Aron tebu tambu Uzziel jabasotem Mishael aser Elsafan aja, aser parnok dang ashi, “Yagi arua nenok adianutemji temeshi tenladak nungi bener tanendak kimai bener oang.” 5Anungji parnoki Mosai melaba ama tasü mang süoshi nungji amer tanendak kimaleni bener ao.

6Idangji Mosai Aron aser pa jabasotem: Eleazar aser Ithamar dang ashi, “Nenok mangyimba mesayutsü asoshi nenok ku memesüi teli, mesüra nenok süoshi teshisa. Nenoki yamaji inyakra nenok asütsü, aser nübur ajak madak Kibubai ain adoka alitsü. Saka Israel nunger ajongai Kibubai mi yoka parnok südaktsüba asoshi mang yimdakjang. 7Süki kiküm nungi nenok metugutsüla, mesüra nenok asütsü, kechiaser Kibuba totzü mezütsüba agi nenok meshiteta lir.” Anungji Mosai ashiba ama parnoki inyak.

Putirtem Atema Ozüng

8 Kibubai Mosa dang ashi, 9“Na aser ne jabasotem yi mesüra mejemtzü jemer sentep süki-i maitsüla, yamaji inyakra nenok asütsü. Ibai putu ajak nung nenok atema ozüng alitsü. 10Nenoki temeshi o memeshiba tsüngda nung, aser temerük o memerük tsüngda nung balala metettsüla. 11Kibubai Mosa ajanga agütsüba ozüngji nenok Israel nunger ajak dang sayutsüla”

12  Mosai Aron aser par jabaso tanüngba ana Eleazar aser Ithamar dang ashi, “Kibuba dang tenlaba chiyungtsü tenla tanüngbaji piyazü meinoki yanglur tenladak anasa chiang; kechiaser iba tenlaji kanga temeshi lir. 13Temeshidak aji chiang; kechiaser Kibuba nem agütsüba tenla nungi na aser ner jabasotem shilemji lir. Aji Kibubai kü dang melabaji lir. 14 Saka na aser ner kibong asoshi Kibuba dang temulunger tenla aser putir asoshi koba tenla balaka agütsü, mamalong aser tepi, aji nenoki achitsüla. Itemji temeshidak tesem ka nung nenoki achitsüla. Ibai na aser ner chirtem asoshi telungjem tenla nüngu agütsübaji lir. 15Tetenlaba tepi aser tayipshiba mamalongji, mi agi tenlaba temo den parnoki Kibuba madang tayipshiba tenla asoshi ayipshitsü bener arutsüla. Kibubai melaba ama na aser ner chirtem asoshi teti shilem alitsü.”

16Mosai temenen tenla asoshi nabongji bushi, saka aji rongtoker liasü. Anungji Aron jabaso Eleazar aser Ithamar dang pa kanga ain adoka ashi, 17 “Kechiba nenoki temenen tenlaji temeshidak machi? Ibai kanga temeshi lir, aser nüburtem temenen pungitsü atema Kibubai ya nenok nem agütsü. 18Ni melaba ama nenoki iba azüji tenladaki bener mait nung nenoki aji kimalen achitsü tim liasü.”

19Aroni Mosa dang langzü, “Tanü nisungtemi parnok temenen tenla aser tarongba tenla Kibuba dangi bener arubaji ni chir ali asünunga Kibubai aji agizükdi ma?” 20Kodang Mosai aji angashi, pa mulung chia liasü.

LEVI 11

Temerük Aser Memerükba Shiruru

(Taz. 14.3-21)

1 Kibubai Mosa dang ashi, 2“Israel nungertem dang shiang, alima nung taküm shirurutem rongnung nenoki itemi achitsü akok: 3shiruru koba temesüla rangma aser rem shilu mejaker itemji achitsü akok. 4Rem shilu mejakba aser temesüla rangmaba rongnungi itemi machitsüla: ut, rem shilu mejaker, saka temesüla merangma, anungji ya memerükba shiruru lir. 5Shisen, rem shilu mejaker saka temesüla merangma, anungji nenok asoshi aji memerükba shiruru lir. 6Ano azümongshi, kechiaser iba yagi rem shilu mejaker, saka temesüla merangma, nenok asoshi aji memerükba shiruru lir. 7Nenoki ak shi machitsüla. Parnok temesüla rangma lir, saka rem shilu memejaker, aji nenok asoshi memerükba shiruru lir. 8Item shiruruji nenoki machitsüla mesüra parnok tasü mang daka nenoki tekongshi, kechiaser itemji nenok asoshi memerük.

9“Ango rongnung tashikangjok aser tip keta aliba chiang, 10saka tashikangjok aser tip maliba ango nenoki machitsüla. 11Itemji memeshibatem lir. Itemji nenoki machitsüla, mesüra parnok tasü mang daka nenoki mekongshitsüla. 12Tzü nung aliba shiruru tashikongjok aser tip maliba kecha nenoki machitsüla.

13“Ozü rongnung nenoki itemi machitsüla. Orija, hogon aser pokpo. 14Tzü ozü aser ibala mesükba ozütem, 15waro tapu ajak, 16ostrich, tzüyim nung aliba mongzü tapu balala ajak, 17pokpo tila aser tulu, aser komorant azü; 18molu padak, ango achiba pelican ozü, 19stork azü, heron ozü tapu balala, ungerkentenbung, aser lah.

20“Tashikang atenba shiruru tila kobai ali nung ayazür, itemji memerüki alitsü. 21Saka ali nung joka aobatembo nenoki achitsü akok. 22Nenoki süngku, kijok aser sürapong itemji achitsü akok. 23Saka tashikang atenba shiruru ano kobai ali nung ayazür, itemji memerüki alitsü.

24“Shibaisa item shiruru tasü mang dak kongshidir aonung tashi memerüki alitsü. 25Shibaisa item tasü mangji bena arudir, pei süoshi shitoktsüla aser aonung tashi memerüki alitsü. 26Shiruru kobasa temesüla rangsa-a lir, saka jungjunga mepakma aser rem shilu memejaker, itemji nenok asoshi temenen alitsü, aser shibaisa idakji kongshidir memerüki alitsü. 27Tetsüng pezüi jajaba shiruru rongnung temebu agi jajaba shirurutemji nenok asoshi memerük lir; shibaisa item tasümang dak kongshidir aonung tashi memerüki alitsü. 28Shibai item tasü mang abener, pei süoshi shitoktsüla aser aonung tashi memerüki alitsü. Nenok madang itemji memerüki alitsü.

29“Ali nung senzüba rongnung nenok atema memerükbaji itemi lir: süsang aser koya, tzürang tapu balala, 30kitsüngtetsü aser tokong tzürang, sangken, lisem sangken aser sangken arasentsür. 31Shibai item tasü mang dak kongshidir aonung tashi memerüki alitsü. 32Item tasü mangtemji langka nung danga atalokra, süng agi yangluba oset dak süshia, süoshi mesüra juli dak mesüra koba oset südir saka aji memerüki alitsü. 33Ali po dak item tasü mang tsükra, idakji aliba ajakji memerüki alitsü, aser ali poji raksatsüla. 34Chiyungtsü kar iba po nungi tzü agitettsü yanglura, aji memerük alitsü aser tajemtsü asoshi langka idakji lira aji memerük alitsü. 35Item tasü mangtemji langka dak danga tsükra aji memerüki alitsü, amtsük awangba saka po saka anüka raksatsüla; kechiaser itemji nenok asoshi memerük alitsü. 36Saka tzüpokdak mesüra tzü taa ayuba ajibo merüka alitsü. 37Item rongnung kar dang teproktsü metsüjang dak tsükra, metsüjangji temerük alitsü. 38Saka metsüjangji tzü nung metena alidang tasü mangji iba manung tsükra, metsüjangji memerük alitsü.

39“Aser nenoki achiba shiruru kar süra, shibai tasü mang dak kongshidir, aonung tashi memerük alitsü, 40shibaisa iba tasü mang chidir, pai pei süoshi shitoktsüla, aser aonung tashi memerük alitsü; ano shibai iba tasü mang abener pai pei süoshi shitoktsüla, aser nikongdang tashi memerük alitsü.

41“Ali nung senzüba shiruru tila kecha nenoki machitsüla. 42Jua aoba saka tetsüng pezü agi jajaba saka, tetsüng aika agi jajaba saka itemji memerük lir. 43Itemji achiba agi nesasa memerüki teküm. 44 Kechiyong ni Kibuba nenok Tsüngrem, nenok sasa temeshi liang, aser nenok temeshi liang, kechiyong ni temeshi. Ali jakdang nungzüa ayazüba kecha shiruru agia nenok memenentsüla. 45Ni nenok Tsüngrem, asütsü asoshi nenok meshiteta liang kechiaser ni temeshi lir.”

46Shiruru aser ozü sangnu, tzü nung arakzüba taküm shiruru ajak asoshi iba ozüng, 47temerük aser memerük bendanga metettsü, aser shiruru rongnung tachila aser tamachila itemji nenoki bendanga metettsü asoshi item ozüngtem ya lir.

LEVI 12

Tanur Sor Meshitetba

1 Kibubai Mosa dang ashi, 2“Israel nungertem dang shiang: tetsür mashisa kümra, aser lai jabaso ka sora idangji la anogo tenet memerüki alitsü, aji tetsür ita shilem aodang memerüki aliba amato alitsü. 3Anogo tinü buba nung tanurji mejeptoktsüla. 4Anogo semer asem tashi tetsürji asüngteta alitsüla, la merüktetba anogo tashi oset kecha nunga mekongshitsüla mesüra tekülemdaki marutsüla.

5“Lai tetsür ka sora, la ita shilem aodang anogo ter-pezü memerüki aliba amato la memerüki alitsü, aser la meshitetba anogo mabensa tashi anogo roker trok asüngteta alitsüla.

6“Kodang jabaso saka jala saka meshitetba anogo abensadir, sentep süki kikümi putir dangi lai küm ka tain san chanu ka tarongba tenla asoshi, aser posü mesüra guduru ka temenen tenla asoshi bener arutsüla. 7Putir jagi Kibuba dang la tenlaji agütsütsü, aser la meshiteta alitsü. Tetsürtemi tanur tebur süshia, tetsür süshia asoba aben ibai inyaktsüla.

8“Tetsür jagi san chanu ka bener marutetra, pai posü ana mesüra guduru ana tarongba tenla asoshi, aser tangabaji temenen tenla asoshi ta agütsütsüla aser putiri la asoshi temenen pungitsü aser la meshiteta alitsü.” 

LEVI 13

Zütsüra Atema Ozüng

1 Kibubai Mosa aser Aron dang ashi, 2“Nisung kar temang teküp kar mesonga mesüra komo adoka ibaji temesüng kümra, aser menatepba tashitak kümra, idangji pa Aron putir dangi anir arutsüla. 3Putiri komoji tendanger, komobang nung kuji mesünga aser tanga shi teküp dang nungi komoji tarokba lira, aji menatepba tashitak zütsüra asütsü. Anungji putiri iba nisungji memerük ta sangdongtsüla. 4Saka komoji mesünga liaka iba tereprangtsü teküp dang nungi tarokba mesüra, aser kuji mesünga mekümra, putiri iba nisungji anogo tenetnü balaka ayutsüla. 5Anogo tenetnü lir putiri ano pa tendangtsü, aser anogo tenetnü iba nisung balaka ayutsü. 6Ano putir jagi anogo tenetnübuba nung pa tendangtsü, aser komoji taneber aser temang tanga nung adoka melira, iba nisung temerük aser komo adokba dang ta sangdongtsüla, aser pa merüka alitsü. 7Saka putiri pa merüka lir ta sangdonger külen komoji teküp sünga prokshia lira, pai tanaben putir dangi arua sayutsüla. 8Putiri pa tanaben tendanger komoji prokshia lira, aji zütsüra asütsü, aser iba nisungji memerük ta sangdongtsüla.

9“Kodang nisung ka dak zütsüra adoka lidir, putir dangi arutsüla, 10aser putiri pa tendangtsü, aser teküp nung mesünga koma adoka aser ajagi kuji mesünga kümdakja shi tasen adoka lira, 11ibaji manebtettsüba zütsüra lir. Putiri pa memerük ta sangdongtsüla; aser iba nisung balaka nung ayutsü menüngdak, kechiaser pa memerük lir. 12Zütsüra jagi nisungba tekolak nungi tetsüng tashi adoka lira, 13aser putiri iba nisung temang ajak zütsüra agi sünga adoka lir ta ngura; pai iba nisungji memerük ta sangdongtsüla. Pa teküp ajak temesüng dang kümer lira, pa memerük alitsü. 14Saka kodangsa pa dak komo tasen adokdir, pa memerük alitsü. 15Putiri pa tanaben tendangtsü aser pa dak komo tasen temai adoka ngura, pai pa memerük ta sangdongtsüla. Komo tasen adokba tetezü aji zütsüra lir anungji nisungbaji memerük alitsü. 16Saka kodang komoji anebdir aser teküpji mesünga kümdir, pai putir dangi aotsüla, 17aser putiri pa tendanger, pa komoji mesünga kümer lira, pa merüka lir, aser putiri pa merüka lir ta sangdongtsü.

18“Kodang nisung kar tepzünu adoka anebdir, 19aser tepzünu adokdakji mesünga temesong ka adoka mesüra merembena waka lidir, idangji pai putir dang sayutsüla. 20Putiri pa tendangtsü aser tanga teküp dang nungi tarokba aser kuji temesüng küma lira, idangji putiri pa memerük ta sangdongtsüla. Ibaji zütsüra komo tepzünu nung adokba lir. 21Saka putiri pa tendanger, kuji temesüng mekümi aser teküp dang tarokba mesüra, putiri pa tenetnü pa balaka nung ayutsü. 22Komoji teküp nung prokshia lira, putiri pa memerük ta sangdongtsü, aji zütsüra temaitsü lir. 23Saka aji memelenshi-i lira aji tepzünu tarak dang alitsü, aser pa temerük ta sangdongtsü.

24“Nisung kar temang nung mi agi arongba komo lira, aser aji mesünga mesüra merembena kümra, 25putiri pa tendangtsü. Mesonga alidak kuji temesüng aser tereprangtsü teküp dang nungi tarokba süra aji zütsüra mi komo nung adokba lir. Anungji putiri pa memerük ta sangdongtsüla. 26Saka temesong nung kuji temesüng masü, aser tereprangtsü teküp dang nungi tarokba mesüi ngura, putiri paji anogo tenetnü balaka ayutsü. 27Anogo tenetnü buba nung putiri pa tendangtsü, aser aji teküp tanga nung adoka lira, aji zütsüra asütsü, aser putiri pa memerük ta sangdongtsü. 28Saka temesongji idakjisa lira, aser teküp nung prokshia melira, aji zütsüra masü. Putiri pa temerük ta sangdongtsü, kechiaser aji mi komo dang lir.

29“Kodang tebur süshia tetsür süshia tekolak nung mesüra teküm nung komo lidir, 30putiri aji reprangtsüla, aser tereprangtsü teküp dang nungi tarokba süra, aser iba kuji tenenya aser tenemnem lira, ibaji anakra komo tekolak mesüra teküm nung adokba zütsüra, anungji putiri nisungbaji memerük ta metetdaktsütsüla. 31Putiri iba anakra komo dak repranger tereprangtsü teküp dang nungi tarokba mesüra, aser iba nung ku tanak melira; idangji iba nisungji putiri anogo tenetnü balaka nung ayutsü. 32Tenetnü buba nung putiri komoji reprangtsü, aser aji prokshia moi lira, aser iba nung ku tenenya melira aser aji tereprangtsü teküp dang nungi tarokba mesüra, 33idangji komo alidakji yutsür pa kuji sütoktsüla aser ano anogo tenetnü balaka nung ayutsüla. 34Tenetnü buba nung putiri komoji reprangtsü, aser aji prokshia moi lira, aser tereprangtsü teküp dang nungi tarokba mesüra, pa merüka lir ta putiri metetdaktsütsüla. Nisung jagi pei süoshi shitoktsü aser merüka alitsü. 35Saka pa merüka lir ta metetdaktsür külen pokloka ora, 36putiri pa tanaben reprangtsü, aser komoji prokshia lira putiri ku tenenya mebushiaka nisungbaji memerük lir. 37Saka pa nükdang komoji kasa dang lira, aser ku tanak meia lira, komoji anebogo, aser pa merüka lir ta putiri metetdaktsütsüla.

38“Kodang tebur süshia tetsür süshia temang nung teküp temesüng poktetdir, 39putiri pa reprangtsüla. Pa teküp nung pokteta alibaji puyia mesünga lira, aji teküp nung tarak adokba dang, anungji pa temerük lir.

40“Kodang tebur ka pa tekolak nungi ku tsütoka lemtsü kümaka pa temerük lir. 41Pa tenütsü nung ku makai lemtsü kümaka, pa merüka lir. 42Saka ku tsütokdak nungi merembena temesüng temaitsü lira, ajibo zütsüra, aser merembena temesüng adoka lira, 43putiri aji reprangtsü, aser pai aji tekolak mesüra tenütsü nungji merembena mesünga komoji zütsüra ama adoka ngura, 44paji memerük ta putiri metetdaktsütsüla.

45“Zütsüra aketba nisung jagi süoshi teshisa abentsüla, aser pei kolak memesütsüla, pei tebangmechi nembanger, ‘Memerük, memerük!’ ta ayimtentsüla. 46Pa komoji maneb tashi pa memerüki alitsü, aser tanendak nungi pila-a alitsüla.

Süoshi Dak Zütsüra Aketba Indang

47“Kodang süoshi dak zütsüra keta lidir, sü saka kümpa sü saka, 48mesüra shiküp aji tezüng mesüra kümpa sü agi atakba, mesüra shiküp agi yangluba saka, 49ibaji nakremtoa mesüra meremtoa lira aji zütsüra komo lir aser putir dang sayutsüla. 50Putiri aji reprangdanger osetji anogo tenetnü balaka nung ayutsüla. 51Anogo tenetnübuba nung pai aji reprangdanger aji prokshia lira, osetji memerük, 52Putiri aji rongtoktsüla, kechiaser aji menatepba zütsüra koba mi agi rongtoktsü tim.

53“Saka putiri aji repranger zütsüraji tanga süoshi dak prokshia melira, 54pai ibaji shitokdaktsütsüla aser anogo tenetnü balaka nung ayutsüla. 55Komo aketdakji shitoker külen putiri aji reprangtsü, aser sentsü memelenshi mesüra prokshia moi liaka aji memerük; zütsüraji kolen lidir liaka aji mi agi rongtoktsüla.

56“Putiri aji reprangdanger komoji mena küma lira, süoshi saka shiküp saka pai aji shizüka endoktsüla. 57Ano aji süoshi mesüra shiküp nungji adokra kibur jagi osetji mi nung rongtoktsüla. 58Osetji pai shitoker külen komoji samar lira, pai aji tanaben shitoker aji merüka alitsü.”

59Ibai süoshi nung aketba zütsüra atema ozüngji lir, oda kümpa sü mesüra tezüng sü, tatakba mesüra temechiba mesüra shiküp agi yangluba; item asoshi merük memerük indang telemtetba agütsütsü asoshi temelaba ozüngji lir.

LEVI 14

Zütsüra Meshitetba Ozüng

1 Kibubai Mosa dang ashi, 2 “Zütsüra aketba nisung meshitettsüba anogo nung yamai inyaktsüla; pa anebogo ta asüba anogo nungji putir dangi arutsüla, 3aser putiri pa tanendak nungi anir oa komoji aneb asü maneb aji reprangtsü. 4Putiri tenla asoshi temerük ozü ana, cedar süng, lisü temerem, aser esop bener arutsü melatsü. 5Idangji putiri ozü rongnungi ka ali po nung tzü temerük alidak manung tepsettsüla, 6aser ozü kaji cedar süng, lisü temerem, aser esop den külemi ozü ka tepsetba azü nungji pai metentsü. 7Zütsüra nungi shiba meshidoktsür, pa dak azüji tenetben rüklokja pa meshitetogo ta metetdaktsütsü, aser ozü kaji moapu nung taküm chioktsüla. 8Nisung jagi pei süoshi shitoka ku ajak sütoktsü aser tzü chigutsüla. Aser pa merüka alitsü pa tanendaki aitsü, saka temalen anogo tenetnü alitsüla. 9Tenetnü buba nung pa tekolak, bangsemo, aser nüksemo, aser pa temang ku ajak sütoktsüla.

10“Tinü buba nung tarak maket san tepung chanu ana aser tsüla ka küm ka tain abentsüla, aser chiyungtsü tenla asoshi amzü tanük totzü den meyokteper jangku asem totzü tatazük marok asem bener arutsüla. 11Putiri nisungba dangji item tenlatemji sentep süki-i bener arutsüla. 12Putiri san tepungji ka aser totzü tatazük marok asemji Kibuba nem tayipshiba tenla asoshi agütsütsü. 13Pai sanji temeshidak kong temenen tenla aser tarongba tenla asoshi shiruru tepseter idakji tepsettsü, pai yangji inyaktsüla kechiaser temenen tenla ama tai tenlaji putir meyong, aser ibai temeshi lir. 14Nisung shiba meshitettsü ali, putiri san züji kar agi pa tajichi tenaronglak nung teka tajichi jemtsüba, aser tetsüng tajichi kemtsüba nung mezütsütsü. 15Ano putiri totzüji tera pa tekabu tabelen nung shioktsütsüla, 16pai teka tajichi temeyong ka azü nungji metener Kibuba madang tenetben rükloktsütsüla. 17Pai shiba meshitettsü ali tekabu nungi totzü tera san zü tera ta agiteter tajichi tenaronglak, teka tajichi jemtsüba aser tetsüng tajichi jemtsüba nung putiri mezütsütsüla. 18Tekabu nung anünga aliba totzüji pai nisungba tekolak nung mezütsütsü, aser pa asoshi putiri Kibuba madang temenen pungitsüla

19“Iba sülen putiri temenen tenlaji agütsütsü, aser meshitetba mapaji inyaktsü. Aser pai tarongba tenla asoshi shiruruji tepsettsü. 20Aser aji chiyungtsü tenla den tenladak agütsütsü. Yamaji putiri nisungba asoshi meshitetba mapaji inyaktsü aser nisungji merüka alitsü.

21“Nisungji sensaker aser pai item ajakji, magütsütetra, pai ayipshiba tenla aser temenen pungitsü asoshi san tepung chanu ka, aser amzü jangku totzü tatakzük marok asem den meyokteper bener arutsüla. 22Pai ano posü ana, mesüra guduru ana, ka temenen tenla asoshi, aser ka tarongba tenla asoshi bener arutsüla. 23Tinübuba nung Kibuba madang sentep süki kiküm nung pa meshitettsü asoshi itemji putir dangi bener arutsüla. 24Putiri tai tenla asoshi san chanu, aser totzü agütsür, aser aji Kibuba dang tayipshiba tenla asoshi agütsütsü. 25Pai san chanuji tepseta iba züji kar agia nisungba tajichi tenaronglak, teka tajichi jemtsüba, aser tetsüng kemtsüba nung mezütsütsü. 26Putiri totzüji pa tabelen nung tera shiloktsütsü, 27aser pa teka tajichi temeyong ka agi aji Kibuba madang tenetben rükloktsütsü. 28Putiri nisungba teka nungi totzü den ozüngji pa tajichi len tenaronglak, teka tajichi jemtsüba, aser tetsüng tajichilen kemtsüba nung mezütsütsü. 29Pa tekabu nung anünga aliba totzüji nisungba tekolak nung mezütsütsü, aser pai yangji temenen pungiba mapaji inyaktsü. 30Iba sülen pai posü mesüra guduru ana tenlatsü, 31ka temenen tenla asoshi, aser ka chiyungtsü tenla den külemi tarongba tenla agütsütsü. Yamaji putir jagi temenen pungiba mapaji inyaktsüla. 32Ibai zütsüra adoker shirnoki pei meshitetba atema tenla ajak magütsüdir, parnok asoshi ozüng lir.”

Kibong Nung Zütsüra

33 Kibubai Mosa aser Aron dang ashi, 34“Kodang ni nenok nem agütsüba Kanan limai nenok arua lidir, aser iba lima nungji ki ka nung ni zütsüra adokdaktsüdir, 35ki Kibuba jagi putir dangi oa, ozü dak zütsüra lir ama ni angu ta ashitsüla. 36Kidang aliba ajak memerüki kümalir ta putiri komoji reprangi maidang, parnoki kiji azüngtettsütsü pai ozüng agütsütsüla. Iba sülenang pa ki jagi aotsüla, 37aser zütsüraji reprangtsü. Iba tereprangtsü nakrema mesüra meremtoa jara nungi ngura, 38pai kiji toktsütsü aser anogo tenet shibangtsü. 39Tenetnübuba nung pai tanaben arua reprangtsü, zütsüraji ki jara nung pokloka lira, 40lung koba nung putiri zütsüraji angur aji tanendak yimti tezülen memerükba tesem ka nung enoktsü ozüng agütsütsüla. 41Iba sülen pai ki telunglen okshia shitoktsüla aser parnoki lung menatepba kiji yimti amunglen memerükba tesem ka nung endoktsüla. 42Lung koba pai endok aji melena tanga lungtem agia aji ali tasen agi yangji menateptsüla.

43“Lungji melener külen aser kiji aishia shitoka ali mezür külen, ano komoji adokra, 44putiri oa aji reprangtsü, aser komoji adoka lira kiji memerük. 45Kiji bensar iba lung, süng aser temenatepba item ajakji yimti nungi pila-a memerükdak tesem kati bener aotsüla. 46Kiji shibanga alidang kari ajagi yira, aonung tashi memerüki alitsü. 47Kari idakji amdakra mesüra chiyungra pai pei süoshi shitoktsüla.

48“Ki dakji ali mezür külen putir arua reprangdang komoji kidang pokloka moi lira, idangji putiri kiji merüka lir ta metetdaktsütsü, kechiaser tashitakji junga anebogo. 49Ki meshitettsü asoshi ozü ana cedar süng, lisü temerem aser esop abentsüla. 50Pai ozüji ka alipo ka nung tzü temerük lir, iba manung tepsettsüla. 51Aser pai cedar süng, esop, lisü temerem aser ozü takümji tzü temerük manung tepsetba ozü zü nungji metentsü aser ki dakji tenetben rükloktsütsü. 52Yamaji pai ozü zü, tzü temerük, ozü taküm, cedar süng, esop aser lisü temerem jagi kiji meshitettsüla. 53Iba sülen ozü takümji pai yimti tezülen moapu nung taküm chiyoktsüla, aji oda pai ki meshitettsüla.” 54Ibai zütsüra tapu ajak asoshi, aser anakra asoshi ozüng lir. 55Süoshi nung mesüra ki dak aliba zütsüra, 56shi nung komo adokba, mesüra teküp nung sentsü temesüng adokba, 57kodang memerüki, mesüra kodang merüka lir, item ajak indang ozüng lir.

LEVI 15

Temang Memerüki Akümba

1 Kibubai Mosa aser Aron dang ashi, 2“Israel nunger dang shiang kodang tebur kar pei oset nungi langka yima adokdir, iba ayimbaji memerük lir. 3Pa tayimba memerükba ozüng ya: pa shi nungi yimaka, mesüra yima aliba nungi anenaka, aji pa dak memerüki lir. 4Yipten koba nung pa mejangdir, memerüki alitsü. 5Shibaisa pa yipten nung mendir, pai pei süoshi shitoktsüla aser tzü chigutsüla aser aonung tashi pa memerüki alitsü. 6Aser yima aliba nisung amendak shibai iba manung mendir, pa süoshi shitoktsüla, aser pa sasa tzü chigutsüla, aser aonung tashi memerüki alitsü. 7Yima aliba nisung dakji shibaisa kongshidir pei süoshi shitoker tzü chigutsüla, aser aonung tashi memerüki alitsü. 8Yima aliba nisung jagi merüka alir kar dak metsü metsüloktsüra, pai pei süoshi shitoker tzü chigutsüla, aser aonung tashi memerüki alitsü.

9“Talungtsü koba nungsa yima aliba nisungji mendir aji memerük alitsü. 10Pa amenba dakji shibaisa kongshidir aonung tashi pa memerüki alitsü, pei süoshi shitoker tzü chigutsüla aser aonung tashi memerüki alitsü. 11Yima aliba nisung jagi pei teka meshitoki shiba dak kongshidir, iba nisung pei süoshi shitoker tzü chigutsüla, aser aonung tashi memerüki alitsü.

12“Alipo koba daksa yima aliba nisungi kongshidir, jakreptsüla. Süng agi yangluba osettsüset koba daksa pai kongshidir, aji shitoktsüla.

13“Yima aliba nungi kodang pa anebdir, pai anogo tenet atatsüla, aser tzü temerük nung pei süoshi shitoka tzü chigutsüla aser pa merüka alitsü. 14Tinübuba nung pai posü ana mesüra guduru ana sentep süki kiküm nung Kibuba dangi bener arua putir nem agütsütsü. 15Putiri aji ka temenen tenla asoshi, aser ka tarongba tenla asoshi agütsütsü. Yamaji putiri pa merüktetba maparenji inyaktsü.

16“Kodang tebur kar dak nungi tetzü yimtokdir, pa tzü chigutsüla, aser aonung tashi memerüki alitsü. 17Süoshi süshia shiküp süshia kechi nungsa tetzüji lidir, tzü agi shitoktsüla, aser aji aonung tashi memerüki alitsü. 18Kodang tebur aser tetsür medemdir, tenaprongla tzü chigutsüla, aser aonung tashi memerüki alitsü.

19“Kodang tetsür kar ita shilem odir, la anogo tenet memerüki alitsü. Kari la dak kongshira aonung tashi memerüki alitsü. 20La ita shilem aoba mapang nung amenba mesüra ondakba itemji memerüki alitsü 21La yipten nung shibaisa kongshidir pei süoshi shitoker tzü chigutsü, aser aonung tashi memerüki alitsü. 22Lai amenba dak shibaisa kongshidir, pei süoshi shitoker tzü chigutsü, aser aonung tashi memerüki alitsü. 23Yipten süaka mesüra la kechi nung amener, shibaisa idakji kongshidir aonung tashi memerüki alitsü. 24La ita shilem aoba mapang tebur shibai la den medemdir, anogo tenetnü memerüki alitsü, aser yipten koba nung pa ondaker memerüki alitsü.

25“Tetsür kar ita shilem aoba dak alaka ano azü yimra aji manen tashi la memerüki alitsü, oda ita shilem aodang la memerüki aliba ama la alitsü. 26Yipten koba nung la ontaker aser iba langbang kechi nungsa la mendir memerüki alitsü. 27Kari item dakji kongshira, pei süoshi shitoker tzü chigutsüla, aser aonung tashi memerüki alitsü. 28La azü ayimbaji anener külen lai anogo tenet atatsüla, aser la merükteta alitsü. 29Tinübuba nung lai posü ana masüra guduru ana sentep süki kikümi Kibuba dangi tenla bener arua putir nem agütsütsü. 30Putiri ozüji ka temenen tenla asoshi agütsütsü, aser ka tarongba tenla asoshi agütsütsü, yamaji la meshitetba maparenji putiri inyaktsü.

31“Parnok rongnung aliba kü tekülemdak süki parnoki parnok memerükba agi menenja parnok masütsü asoshi, Kibubai Mosa ajanga Israel chirtem nem item tekümdangtsü agütsü.”

32Item ozüng ya tebur shiba dak nungi tetzü ayimer, 33aser tetsür shiba ita shilem aor, mesüra la memerüki aliba mapang tebur shibai la den medemer, item asoshi ozüng lir.

LEVI 16

Kümtettsü Anogo

(Zün. 29.7-11)

1Aron jabaso ana, parnoki memeshiba tenla Kibuba nem agütsüba yong parnok sür külen Kibubai Mosa den jembi. 2 Pai ashi, “Pa masütsü asoshi Temeshiba taktang kong Tezüngzüktepba süngden yua lir, iba taochi jakdang mapang tatong nung yiang ta Aron dang shiang, kechiaser taochi menden manung ni mepet nung adoktsü, pai aji mangara pa tepsettsü. 3 Pai Temeshitiba taktang jagi nashi pungchi chanu ka temenen tenla asoshi benerang aitsü akok.”

4Idangji Kibubai item mela-a ashi, “Aron Temeshitiba taktangi maidang, pa tzü chigutsüla aser pai putir sobutsü: kümpa sü aser semoktsü, teperem naiba aser kolakjen naiba, itemji sobutsüla.

5“Israel nungertem telok nungi nabong tepong ana temenen tenla asoshi aser tarongba tenla asoshi san tepong ka agitsü. 6Aroni temenen tenla nashi pungchi tepung ka tenlatsüla, aji pa aser par kibong temenen pungitsü asoshi inyaktsüla. 7Iba sülen pai nabong tepong anaji sentep süki kiküm nung Kibuba madang ayutsü. 8Idakji pai nabong ana madakji ka Kibuba asoshi aser ka Azazel asoshi ta zülur an toktangtsü. 9Nabong koba dak Kibuba asoshi an toktangba kao, aji temenen tenla agütsütsü. 10Nabong ka koba Azazel asoshi shimtet aji taküm dang Kibuba nem agütsütsü, aser nisungtem temenen pungitsü asoshi ibaji Azazel lisem lima nung chioktsü.

11“Kodang Aroni pa aser par kibong temenen tenla asoshi nashi pungchi tenladir, pungitsü asoshi pai nashi pungchiji tepsettsü, 12pai mijang agi sünga aliba susa ka aser teronem tanang menemba tekabu ana sünga, aji bener temeshiba taktangi arutsüla. 13Idangji Kibuba madang mi nung teronem menembaji arongtsü aser iba mokozü jagi Tezüngzüktepba süngtenji aser taochi mendenji nembangtsü, aser pa masütsü. 14Pai nashi pungchi züji agitsü aser pa temeyong agi taochi menden manung rükloktsütsü, aser azü kar tezüngzüktepba süngden jakdang tenetben rükloktsütsü.

15  “Iba sülen nisungtem temenen tenla asoshi nabongji tepsettsü, aser iba züji Temeshitiba Taktangi bener arua taochi menden tezüngzüktepba süngden jakdang rükloktsütsü, oda pai nashi pungchi zü rükloktsüba ama. 16Yamaji pai temeshiba taktangji Israel nungertem memerükba aser parnok temenen nungi meshitettsü, sentep süki asoshia pai kasaji inyaktsüla, kechiaser ibai tanendak tiyong nung koba memerükdak lir. 17Kodang Aroni Temeshitiba Taktangi yia pa, par kibong aser Israel nunger ajak asoshi yir adokdang nisung shinga süki nungji malitsüla. 18Iba sülen pai tenladaki oa pa meshitettsü asoshi tarongba tenla agütsütsü, pai nashi pungchi zü tera aser nabong zü tera bener arua tenladak tezülen meketa rükloktsütsü. 19Pa temeyong agi azüji tera tenladak tenetben rükloktsütsü. Yamaji pai Israel chirtem temenen nungi aji merüktettsü aser aji meshiteta akümtsü.

Temenen Melen Nabong Chiokba

20“Kodang Temeshitiba taktang, sentep süki, aser tenladakji meshitetdir, Aroni nabong takümji Kibuba nem agütsütsü. 21Pai pa teka agi nabong kolak nungji ataloka yur, Israel nungeri menaba tai ajak, parnok temenen, aser ozüng raksaba nangzüktsüla, aji oda nabong kolak dak aji melenoktsütsü. Iba asoshi shimtetba nisung nem nabongji agüja aji aremi anir oa chioktsüla. 22Parnok temenen ajak nabong jagi bener azüngmeyakdak lisem lima ka nung aji chioktsü.

23  “Idangji Aroni sentep süki jagi aotsü aser Temeshitiba Taktangi maidang sobuba putir sobutsüji sepzüka idakji yutsütsü. 24Pai temeshidak tesem ka nung tzü chigutsü aser pai süoshi sobutsüla. Iba sülen pai adoka pei temenen aser nüburtem temenen pungitsü asoshi tarongba tenla agütsütsü. 25Temenen tenlatemji pai tenladak sabang manung arongtsüla. 26Nisung shibai Azazel asoshi lisem lima nung nabongji chiok, tanendaki meyipa meshilangdang pei süoshi shitoktsüla. 27 Temenen tenla asoshi agütsüba nashi pungchi aser nabong zü koba temenen pungitsü asoshi, Temeshitiba Taktang jagi bener aru, aji tanendak tezülen teküp, shi, aser poknüng den külemi arongtsüla. 28Nisung shibai itemji aronger, pai pei süoshi shitoktsü aser tanendaki maidang tzü chigutsüla.

Menen Pungi Mung Amungba

29  “Ibai nenok asoshi teti yimsü ka alitsü: Ita tenetbuba anogo terbuba nung sensopur süshia bendanger amungi arur süshia mapa kecha meinyaki lumitsüla. 30Kechiaser iba anogo nungji nenok meshitettsü, aser nenok menen pungitsü, idangjiang nenok temenen nungi merükteta alitsü. 31Ibai nenok asoshi temeshi amungnü koba nung nenoki lumir aser mapa kecha meinyaktsüla. Ibai nenok asoshi teti atema yimsü ka alitsü. 32Putir shiba tebu melena temaba putir asütsü asoshi bendanga agüja shimtetdir, pai pei temenen pungitsüla, aser putir sobutsü sobur 33Temeshitiba taktang sentep süki, tenladak sabang, putir, aser nübur telok ajonga asoshi menen pungi inyaktsü. 34Ibai nenok asoshi teti atema yimsü ka amai alitsü, Iba mapa ya nenok küm nung khen alitsü, oda Israel nungertem ajonga atema temenen pungitsü inyaktsüla.” Anungji Kibubai ashiba ama Mosai inyak.

LEVI 17

Azü Machitsü Indang

1 Kibubai Mosa dang ashi, 2“Aron aser par chirnurtem aser Israel chir ajak dang shiang: Ibai Kibubai melaba lir. 3Israel kidong rongnung shibaisa tanendak tezülen nashi, san mesüra nabong tepsetdir, 4aser aji tekülemdak sentep süki nung Kibuba nem tenla magütsüra, azü tokshiba tai pa madak alitsü, aser pa azü tokshiba yong pei nübur nungi pa jentoktsü. 5Israel nungertemi koba tenla moapu nung tepseter, aji Kibuba dangi bener arua sentep süki kiküm nung telungjem tenla asoshi putir nem agütsütsüla. 6Putiri iba züji sentep sü ki tenladak sabang nung rükloktsütsü aser temoji teronem tajung asoshi Kibuba dangi arongtsü. 7Joko Israel neburtemi Kibuba dang tamang makatetba mapa inyaka moapu shiruru tepseta tenla agüja jabujari mapa meinyaktsü. Ibai parnok atema putu ajak nung ozüng alitsü.

8“Nai parnok dang shiang, Israel kidang kari mesüra nenok den aliba bendanger rongnung shibai tarongba tenla, mesüra tetepsetba tenla agütsüdir, 9aser aji Kibuba dang tenlatsü asoshi sentep süki kikümi bener marulir, iba nisung pei nübur rongnungi jentoktsü.

10  “Israel kidong rongnungi mesüra nenok rongnung aliba bendanger shibai shi den azü chidir, pa anema Kibuba alitsü, aser pei nübur nungi jentoktsü. 11 Kechiaser shi takümji azü nung lir, anungji meimchir menen pungitsü asoshi azü ajak tenladak sabang nung agütsütsüla ta Kibubai mela. Azü koba nung taküm lir aji agi menen pungir. 12Anungji ni Israel nunger dang ashi, nenok süshia nenok den aliba bendanger süshia azü machitsüla.

13“Israel kidong kari mesüra nenok den alir bendanger rongnung kari tachitsü asoshi temerük shiruru mesüra ozü kar kasetra shiji achitsü saka iba züji ali agi yapanga toktsütsüla. 14Kechiaser shi takümji azü nung lir, anungji Kibubai Israel kidong dang azü machitsü indang ashi, aser kari aji mangara pa pei nübur rongnungi jentoktsü.

15“Israel kidong süshia bendanger süaka, tasü shi, pei sasa asüba süaka shiruru tangari shisatsüba süaka shibai itemji chidir, pei süoshi shitoktsü aser tzü chigutsüla, aser pa nikongtsütsü pa merükteta mapang matong tashi atatsüla. 16Pai yamaji meinyakra pei temenen pai abentsü.”

LEVI 18

Shiazü Medemba Anema Ozüng

1 Kibubai Mosa dang ashi, 2“Israel nungertem dang shiang, Ni Kibuba nenok Tsüngrem lir. 3Nenok aliba Ijip lima nung inyakba ama mesüra Kanan nunger koba limai ni nenok anir odagi parnoki inyakba ama nenoki meinyaktsüla. 4 Kü ozüngtem tashi angang, aser ni nenok dang melaba inyakang, ni Kibuba nenok Tsüngrem lir. 5Ni nenok nem agütsüba yimsü ozüngtem nenoki benshiang; aji benshiba agi nisung taküm alitsü. Ni Kibuba lir.

6“Shingaia pei sosem den nüktapangtatsü asoshi anasai maotsüla. Ni Kibuba lir. 7Nai netsü shiba nebu kibutsü lir la maksüdakja la den temedem. 8 Nai nebu kinüngtsü den maksü tebenshi, aji nebu maksü lir. 9 Ne adianu, nebu mesüra netsü jala, kidang mesüra tangalen asoba den temedem. 10Nai pei semchir den temedem, kechiaser aji na asoshi maksü lir. 11Nai rabitsür jala den temedem: kechiaser la ne adianu lir. 12 Nai nebu adianu den temedem, kechiaser la nebu kinunger lir. 13Nai netsü adianu den temedem kechiaser la netsü kinunger lir. 14Nai nebu tambu mesüra tanubu kinüngtsü den temedem kechiaser la namu lir. 15 Nai ne jabaso kinungtsü den temedem kechiaser la ne jabaso kinungtsü lir. Nai la mak tesüdaktsü. 16 Nai nedi mesüra nenu kinungtsü den temedem aji nedi mesüra nenu maksü lir. 17 Nai tetsürla aser la jala den temedem, lar jabasor jala mesüra lar jalar jala den temedem; parnokji anasatiba kinunger lir. Aji larlapongba lir. 18Nai ne mezüng kibutsü taküm alidang teyi mesüra tenu den toktepa kibutsü asütsü maksü tebenshi.

19  “Tetsür ita shilem aoba mapang la den temedem. 20 Nai ne kiyonger kinüngtsü den temedem. Aji agi na la den külemi menentsütsü. 21 Nenok chir shinga Molek Tsüngrem külemtsü magütsütsüla. Kechiaser nenoki nenok Tsüngrem tenüng memenentsütsüla, Kibubai lir. 22 Tebur shingaia tebur den memedemtsüla; ibaji Tsüngremi sempar. 23 Tebur süshia tetsür süshia shingaia shiruru den memedemtsüla, aji tesempatsü lir.

24“Ne sasa ibala kecha nunga temenen temena, kechiaser ni nenok jakdang aridokya aliba kintemi ibala ajak nung menena lir. 25Alinükjia menena lir. Anungji iba temenen asoshi Kibubai parnok merenshitsü, aser alinüki iba nüburtem saktsüdoktsü. 26Saka nenoki kü ozüng aser temelabatem benshitsüla. Sensopur süshia nenok den aliba bendangeri süshia iba tesembatsü mapaji meinyaktsüla. 27Kechiaser ibala mapaji item nisungtem shir nenok dang tama iba linük nung liasü, parnoki inyakba agi alinükji menentsü. 28Nenoki linükji menentsüra, nenok jakdang tamasa aliba nisungtem saktsüdokba ama nenoka saktsüdoktsü. 29Kari danga yamala tesempatsü mapaji inyakra, parnokji pei nübur nungi jentoktsüla.”

30Aser Kibubai ashi, “Kü ozüngtem nenoki angang, aser nenok jakdang aliba nisungtemi inyakba sülen manidaktsüla, nenoki ibalaji inyaker pei sasa menena teküm. Ni Kibuba nenok Tsüngrem lir.”

LEVI 19

Temeshi Aser Ochi Ozüng

1 Kibubai Mosa dang ashi, 2 “Israel nungertem ajak dang shiang. Nenok temeshi liang, Kechiaser ni Kibuba nenok Tsüngrem temeshi lir. 3 Nenok nisung shiai pei tetsü aser tebu aküm tsübutsüla, aser amungnü amungtsüla. Ni Kibuba nenok Tsüngrem lir.

4  “Süngyanglu dangi temeyip, kecha teyanglu aser temuluba tsüngrem kecha teyanglu aser tekülem. Ni Kibuba nenok Tsüngrem lir.

5“Kodang nenoki Kibuba nem yimjung tenlatem agütsüdir, ibaji nenok tenüng nung agizüktettsüsa tenla-ang. 6Shiji nenoki tenlaba anogo aser tasüng tashi nung achitsüla. Anogo tasemnübuba tashi shi kar danga anünga lira ajibo mi agi rongtoktsüla. 7Ibaji tasemnübuba tashi chira, aji temenen alitsü, aser tenlaji ni magizüktsü. 8Shibaisa aji chidir, pai pei temenen abentsü. Kechiaser Kibuba dang kechi temeshi lir aji pai menentsüogo, aser iba nisung pei nübur nungi jentoktsü. 9 Kodang linük nung alu rudir, ner lu chirongbang tongabo lua teru mesüra ner lu nung nai tsüktok meshimtsüla. 10Ner tsükmenatzü lu nungi jetzüka tsükba süngjang bendeni tanaben maotsüla, itemji sensaker aser aenertem asoshi tokjang. NiKIBUBA nenok Tsüngrem lir.

11  “Nai tauya, tashioktsü, mesüra tiyazü tejembi. 12 Kü tenüng agi tiyazü azüngashi tesü, kechiaser aji agi nenoki kü tenüng menentsür. Ni Kibuba nenok Tsüngrem lir.

13  “Nai shinga tekülakokdaktsü, mesüra rakzükraktem tesü. Nai aniba ayanger nem ta-a magütsüi anepdang tashi teyu. 14 Nai narongjaker atakatem tesü mesüra nükpoker jakdang temetsüdaktsü meyutsütsüla; saka nai ne Tsüngrem tsübutsüla. Ni Kibuba lir.

15  “Nai o bendangdak ochi mashiba kecha meinyaktsüla, sensaker tejak tereprang mesüra tulur dang balaka tebenshi saka ajak dang ochi agi o bendangang. 16Shinga atema tiyazü o meprokshitsüla, aser kodang nisung kar lendong nung lia ne kuli agi pa kümzüktettsüsa lidir nai iba atema jembiang. Ni Kibuba lir. 17 Nai ne mulungjang nung adianu mesembatsüla, saka nai pa atema temenen bena marutsü asoshi otia arüjang. 18 Nai shinga daka mang mayangtsüla mesüra ne nüburtem mesembatsüla, saka nai na kiyonger dang pei ama meimtsüla. Ni Kibuba lir. 19 Nenoki ozüng benshiang. Nai ne kiset shiruru tapu balala den techanu temerepdaktsü, nai ner lu nung metsü tapu ana meproktsüla; mesüra oset balala ana meyoktepa yangluba süoshi ne dak mabentsüla.

20“Alatsür shiba nisung kari aniasünga lir, saka la chioktsü asoshi talang magütsüi alidang tangar nisung kati la den medemra, parnok metepsettsü, kechiaser la ano mechioki liasü. 21Nisungba jagi Kibuba dangi sentep süki kikümi san tepong ka tai tenla abentsüla. 22Tai tenla asoshi agütsüba san tepong jagi putiri Kibuba madang nisungba temenen pungidaktsütsü aser Tsüngremi pa tai adoktsü.

23“Kodang nenok Kanan limai arua chiyungtsü asoshi süngdong tapu aisü temdir nenoki tejangji küm asem tashi anempong ta züngshitsüla, item küm nungji nenoki süngjangji machitsüla. 24Küm pezübuba nung süngjang ajakji temeshi alitsü, aji Kibuba dang tenüngsang tenla alitsü. 25Saka küm pungububa nung nenoki iba tejangji achitsü. Yamaji inyakra nenok nem tali rendaktsütsü, ni Kibuba nenok Tsüngrem lir.

26  “Nenoki kecha oset azü dena machitsüla; nenoki tarutsü indang tetezütsü mesüra arasentsür temezünger mapa teinyak. 27 Nenoki tenapa meketa kar bangsemo tatempanglak memejeptoktsüla. 28Asür asoshi ne mangyimba sayutsü atema ne mang nung mateptsüla mesüra temaitsü ayak kecha mateptsüla, Ni Kibuba lir.

29  “Ne jalatem nüktapangtatsür küma temenen tebenshidaktsü, aji oda mesüra linükji nüktapangta akümtsü aser temenen agi asüngtsü. 30 Kü amungnü benshiang aser kü tekülemdak aküm tsübuang.Ni Kibuba lir. 31 Arasentsür mesüra asür tanela den jembiba nisung dangi nenoki meyipa to, kechiaser parnoki nenok menendaktsütsü. Ni Kibuba nenok Tsüngrem lir.

32“Tambur dang akhümtsübuang aser parnok tsübutsüla, aser ne Tsüngrem tsübuang. Ni Kibuba lir. 33 Ner linük nung aliba aener dang mejungi tebenshi. 34Ne den aliba aenerji nai senso pur ka ama benshiang. Na ama parnok danga meimang, kechiaser nenok Ijip lima nung aener süa liasü. Ni Kibuba nenok Tsüngrem lir.

35  “Tiyazü tasadangba, toudangba, mesüra tazüngba amshiba agi shinga tashioktsü. 36Ochiba tasadangba, toudangba, aser ochiba tasazük nenoki amshitsüla. Nenok Ijip nungi anir adok, ni Kibuba Tsüngrem lir. 37Nenoki kü temelaba ozüngtem aser kü o bendang ajak ayutsüla aser item sülen anitaktsüla. Ni Kibuba lir.

LEVI 20

Tashi Mangaba Temerenshi

1 Kibubai Mosa dang ashi, 2“Israel nunger dang shiang. Nenok rong nung süshia shibai pei chir Molek tsüngrem nem agütsüdir, pajibo südaktsütsüla. Israel telok ajaki pa dak lung agi aontsüla. 3Shibai pei chir Molek tsüngrem nem tenla agütsüdir, aser kü temeshi tekülemdak menendaktsür, kü temeshi tenüng maksüdaktsüdir ni iba nisung anema noktaktsü. 4Saka iba nisung inyakba anema Israel nungertemi kecha meinyakra aser pa mesüdaktsüra, 5ni kü sasa iba nisung aser par kinunger ajak anema, aser shirnokisa kü dang tamang makatetba mapa inyakba agi Molek Tsüngrem külemer parnok ajak anema ni noktaktsü, aser parnok jentoktsü.

6“Süli aoba aser arasenertem dangi parnok dang asüngdangba nisung anema ni noktaktsü aser ni pa nüburtem nungi jentoktsü. 7Nenok sasa meshiteta liang, kechiaser ne Kibuba nenok Tsüngrem lir. 8Nenoki kü ozüngtem yuang, aser itemji inyakang, kechiaser ni Kibuba aser ni nenok temeshi yanglu. 9 Kari pei tebu mesüra tetsü atakatemra, pa südaktsütsü, pai tebu mesüra tetsü atakatem nungji pa zü pa tekolak manung alitsü.

10  “Tebur shibai tangar kinungtsü den nüktapangtadir, nüktapangtasang aser nüktapangtala tenaprongla südaktsütsüla. 11 Shibai pei tebu kinungtsü den nüktapangtadir pai tebu maksüdaktsüogo. Tebur aser tetsür anaprongla südaktsütsü, parnok zü pei kolak manung alitsü. 12Shibai pei jabaso kinungtsü den nüktapangtadir tenaprongla südaktsütsü, kechiaser parnoki kinunger den larlapongba benshiogo, parnok anaprongla südaktsütsüla; parnok zü parnok kolak nung alitsü. 13 Tebur kari tebur den tetsür den ama medemra, tenapronglai tesempatsü benshiogo, parnok südaktsütsüla; parnok zü pei dak alitsü 14Tebur kati tetsür ka aser la tetsü kinungtsü asütsü agira, aji temenen lir. Nenok rongnung yamala tamajung mapa malitsü asoshi tebursang aser parnok ajak mi agi rongsettsüla.

15  “Nisung kati shiruru den medemra paji südaktsütsüla; aser nenoki shirurujia tepsettsüla. 16Tetsür kari shiruru dangi oa medemra, nenoki tetsürla aser shiruruji tepsettsüla. Parnok atangji südaktsütsüla; parnok zü parnok madak alitsü.

17  “Nisung kati pei teyi mesüra tenu, pei tebuer jala mesüra tetsür jala agia nüktapangtara, aji maksü mapa lir; parnokji pei nübur nükdang nungi jentoktsüla. Pai pei aianu dak maksü benshi nungji pei menen pai abentsüla. 18 Nisung kari tetsür ita shilem aoba mapang la den nüktapangtara, pai la azü ayimba jungkai adokdaktsür aser laia aji miima mayu nungji tenaprongla pei nübur nungi jentoktsüla. 19 Nai netsü tetsü mesüra nebu aianu den nüktapangta tebenshi, kechiaser iba jagi sosem adianu maksüdaktsür. Parnoki larlapongba menen abentsü. 20Nisung kari pei tebu tambu mesüra tebu tanubu kinungtsü den nüktapangtara, pai pei tebu tambu mesüra tanubuji maksüdaktsür. Parnoki pei tai abentsü, aser parnok techir meli-i asütsü. 21 Nisung kari pei tedi-tenu kinungtsü agira, aji memerükba lir, pai pei tedi-tenu odia maksüdaktsür. Parnok tanur malitsü. 22Kü ozüng aser temelaba ajak nenoki benshiang, sürapangla alinük kobai ni nenok anir odagi aji agi nenok mesaktsüdoktsü. 23Nenok jakdang ni aridoktsüba kintem yimsü amato nenoki mebenshitsüla, kechiaser parnoki kü madang item ajak inyak nung ni parnok sempar. 24Saka iba temo aliba lima nenok nem agütsütsü ta ni nangzükogo. Tangar kintem nungi nenok balaka shimtetba Kibuba nenok tsüngrem ni lir. 25Anungji nenoki temerük aser memerükba shiruru aser ozüngtem benteta ayutsüla. Memerükba shiruru mesüra ozü shi nenoki machitsüla, kechiaser itemji memerük ta ni shimtettsüogo, aser aji achiba agi nenok pei sasa memerük kümdaktsür. 26Nenok kü dang temeshi liang kechiaser ni Kibuba temeshi lir. Nenok kü meyong asütsü asoshi kintem dang nungi balaka shimtetogo. 27Tebur süshia tetsür süshia shiba dak süli-aoba mesüra arasenba tanela lidir südaktsütsüla. Parnok dak lung agi aontsüla, parnok zü parnok dak alitsü.”

LEVI 21

Putirtem Atema Ozüng

1 Kibubai Mosa dang ashi, “Aron chirtem putirtem den jembiang aser shiang. Putir shingaia pei nübur mangzüdak munga pei sasa memerüki mekümdaktsütsüla. 2Oda pei kimang, tetsü mesüra tebu, pei jabaso mesüra jala, aser tedi-tenu dak alaka. 3Mesüra kibong mekümi aliba adianu shiba kinungpu mali aser pa den semloka alir, la asoshi pai pei sasa menentsü akok. 4Pai kibong akümba agi sosemba adianutem asüdanga idakji pa sasa menentsüla.

5  “Putir shingai pei tenapa meketa ku mesüdoktsüla, mesüra bangsem o tatempanglak mesüdoktsüla, mesüra shi nung kecha memejeptoktsüla. 6Parnok pei Tsüngrem tsüngdang meshiteta alitsü, aser pa tenüng memenentsütsüla. Kechiaser Kibuba dang mi agi tenlaba aser chiyungtsü tenla parnoki Tsüngrem dang tenlar, anungji parnok temeshi alitsüla. 7Parnoki nüktapangtatsür, mesüra tetsür shiba tasüngtet masü, aser pei kinungpuri balaba tetsür magitsüla kechiaser putirji Tsüngrem madang temeshi lir. 8Putirji temeshi ta nüburtemi züngshitsüla, kechiaser pai chiyungtsü tenla ajak kü nem agütsür. Ni Kibuba lir, ni temeshi. 9Putir jala kar nüktapangtatsür kümra, lai tebu mezüngmeshir, la mi nung arongtsüla.

10“Temaba putir shiba kolak nung temezütsüba totzü shilokja lir aser putir temeshi sobutsü, sobutsü shimteta lir, pai mangyim sayutsü atema pei kolak memesüi pei süoshi shisar mesayutsüla. 11Tasümang alidaki pa maotsüla, pai pei tsürabur tasümang alidaki oa pa sasa memenentsüla, 12mesüra tekülemdak nungi adoka pei Tsüngrem memenentsütsüla, kechiaser Tsüngremi totzü mezüja bendanga agütsüba pa madak kar. Ni Kibuba lir. 13Pai tasüngtet aiür kibutsü agitsüla, 14pai amitsür, mesüra balaba, mesüra nüktapangtatsür magitsüla, saka nübur nungi tasüngtet aiür pai kibutsü agitsüla.

15“Yamaji mesüra pai pei chirtem shirnok temeshi alitsü tim parnok menendaktsütsü. Ni Kibuba lir. Aser ni pa temaba putir asoshi shimteta ayu.”

16 Kibubai Mosa dang ashi, 17“Aron dang shiang, temang nung timtem aketba ne chir shiranga lira kü nem chiyungtsü tenla magütsütsüla, 18Temang nung timtem aketba nisung shingaia tenlaji magütsütsüla, nükpoker, tsüngtsüker, mesüra tejak telemta; 19Teperem tatsük mesüra teka tatsük; 20teperem tatsük mesüra rajang; tenük tashitak aketer mesüra anakra aketba, aser teyangluba nisung. 21Aron putir semchirtem rongnung kar danga temang timtem lira pai kü nem chiyungtsü tenla magütsütsüla. 22Yamala nisungi kü nem agütsüba chiyungtsü tenla aser temeshi chiyungtsü tenlaba ajak achitsü akok. 23Saka pa dak timtem alinung pai sentep süki temeshidak sabang tonga maotsüla, pai itemji memenendaktsütsüla, kechiaser ni Kibuba lir, aser ni itemji temeshi yanglu.”

24Anungji Mosai item ajak Aron aser par chirtem, aser Israel chir ajak dang ashi.

LEVI 22

Tenlatem Atema Ozüng

1 Kibubai Mosa dang ashi, 2“Aron aser par chirtem dang shiang, nenoki kü temeshi tenüng mezüngmeshi tesü, anungji Israel purtemi kü nem bendanga agütsüba tenlaji akhümtsübua benshiang. Ni Kibuba lir. 3Parnok dang shiang, nenok chirtem rongnung kari memerükteti Israel nungertem kü nem bendanga agütsüba anasa tenladaki arura, iba nisungji kü jakdang nungi jentoktsüla. Iba putir ajak asoshi nenok atema ozüng alitsü. Ni Kibuba lir.

4“Aron chir rongnung kar dak zütsüra keta lira mesüra langka ayimba agi kangshia lira, pai pa merükteta maküm tashi temeshi tenlatemji achitsü makok, mesüra putir kari tasü mang dak kongshiba agi memerüki kümdaktsütsü, mesüra yima aliba nisung ka dak kongshiba agi, 5mesüra memerükba shiruru dak mesüra nisung dak kongshiba agi pa memerüki kümdaktsütsü. 6Putir shiba memerüki akümer, pa aonung tashi memerüki alitsü, ano pa tzü mechigu tashi temeshidak tenlaba chiyungtsü kecha achitsü makok. 7Anü yir külen nisungji merükteta alitsü, iba sülen temeshi tenlatem koba pa chiyungtsü lir aji achitsü akok. 8Pai pei sasa asüba mesüra tanga shirurui tepsetba shiruru kecha machitsüla. Iba yagi pa memerüki kümdaktsür, Ni Kibuba lir.

9“Putir ajaki ni agütsüba ozüngtemji benshitsüla. Yamaji mesüra parnoki temeshi ozüngtemji mebenshira parnoki temenen aser iba yongji parnok asütsü, parnok temeshi nung yangluba Tsüngrem Ni Kibuba lir.

10“Putir dak alaka tangar shinga oda putir den semloka alir mesüra ayanger shingaia tenlaji machitsüla. 11Saka pai alar kar pa sen agi alia lira, mesüra par kidang asobatemi putiri agizükba tenlatemji achitsü akok. 12Putir jala saka tanga inyaker kati agira temeshi tenlabatemji lai achitsü makok. 13Saka putir jala kar amia lira mesüra tanur mesoi palar la tebu dangi meyipa arua lira, tebui agizükba temeshi tenlatemji lai achitsü akok. Putir kinünger dak alaka tangar shingaia aji achitsü makok.

14“Nisung kari aibelena temeshi tenlaji chira, pai iba nungi shilem pungu enoker putir nem agütsütsü. 15Israel nungertem Kibuba nem agütsüba tenlaji putiri memenentsütsüla. 16Temeshi tenla den parnok nem chidaktsüba agi parnok dangi temerenshi, marudaktsütsüla. Itemji temeshi yangluba Ni Kibuba lir.”

Magizüktetba Tenlatem

17 Kibubai Mosa dang ashi, 18“Aron aser pa jabasotem aser Israel chirtem dang oda ya shiang: Israel kidangi saka Israel rongnung alir bendanger saka, kodang tarongba tenla süshia, temulungtetba tenla süshia agütsüdir tarak maketba shiruru tenlatsüla. 19Tenlaji agizüktettsüsa nashi pungchi san mesüra nabong tepung tarak maket agi tenlatsüla. 20 Saka tarak aketba shiruru kecha nenoki metenlatsüla: kechiyong aji nenok asoshi magizüktsü. 21Kodang nisung kari Kibuba nem yimjung tenlatem parnok tatemzükba tenla mesüra temulungtetba atema agütsüdir, ibaji agizüktettsüsa tarak mesüra pungmen maket, asütsüla. 22Tenük tapok, telemta aketba yamala komo keta aliba tenladak chiyungtsü tenla asoshi Kibuba dang metenlatsüla.

23“Nashi mesüra san süshia rajang mesüra telemta temulungtetba tenla asoshi agütsütsü akok: saka tatemzükba tenla asoshi aji magizüktsü. 24Shiruru tepung kobasa tejang ajemrepa mesüra menüngrepa, mesüra raksa-a lidir, yamalaji Kibuba dang metenlatsüla. Nenok lima nung ibala meinyaktsüla. 25Nenoki yamala shiruruji Tsüngrem nem chiyungtsü tenla agütsütsü asoshi bendanger ket nungi magizütsüla.”

26 Kibubai Mosa dang ashi, 27“Kodang nashi, san, mesüra nabong tepung mepudir, aji anogo tenet tetsü den alitsü. Anogo tinübuba nungi ibaji Kibuba nem mi agi tenlaba asoshi agizüktsütsü. 28Nashi süshia san süshia nabong süshia, tetsü aser techanu künüyongi metenlatsüla. 29Kodang nenoki Kibuba nem tenüngsang tenla agütsüdir, aji agizüktettsü nenoki tenlatsüla. 30Panüjisa aji achitsüla, aser anepdang tashi nenoki aji anünga mayutsüla.

31“Kü temelabatem nenoki benshiang, ni Kibuba lir. 32Nenoki kü temeshi tenüng temenentsü, Israel nunger ajongai ni temeshi ta metetang. Nenok temeshi yangluba ni Kibuba lir: 33aser Ni nenok Tsüngrem asütsü asoshi Ijip lima nungi nenok anitet, Ni Kibuba lir.”

LEVI 23

Benjong Anogotem

1 Kibubai Mosa dang ashi, 2“Israel nunger dang shiang: Itemi ni shimtetba benjongtem, Kibubai shimtetba benjongtem lir. 3 Nenoki anogo trok pei asoshi mapa inyaktsü, saka anogo tenetnübubaji Amungnü, aser aji anisüngzük anogo sentepnü ta bilemtetang. Iba anogo nung nenok kecha meinyaktsüla saka tekülemdak nenok ajak arutsüla. Nenok kong lidir liaka Amungnüji Kibuba meyong lir. 4Itemi Kibuba teshimtet benjong, teshimtet mapang nung nenoki metetdaktsütsüla.

Süia Aoba Aser Piyazü Meinokba Am Benjong

(Zün. 28.16-25)

5“Süia aoba benjongji mezüngbuba ita anogo ter-pezübuba nikongdang Kibuba nem tetushi agüja amungtsüla. 6 Terpungububa piyazü meinokba am benjong tenzüktsü, anogo tenet tashi piyazü enokba amtsük kecha nenoki machitsüla. 7Benjong mezüng anogo nung temeshi sentep ka akatsüla. Aser nenoki mapa kecha meinyaktsüla. 8Anogo tenet nenoki Kibuba nem chiyungtsü tenla agüjang, Anogo tenetbuba nung temeshi sentep ka akatsüla aser nenoki mapa kecha meinyaktsüla.”

Mezüng Süngjang Tenla Benjong

9 Kibubai Mosa dang ashi, 10“Israel nunger dang shiang: Kodang ni agütsüba linüki nenok arua alu rudir, nenoki mezüngbuba süngjang tsükpong putir dangi bener arutsüla. 11Nenok agizüktettsüsa pai Kibuba madang aji tenla balaka ama putiri aji tenlatsüla. Amungnü süir tasüngji putiri aji agütsütsüla. 12Nenoki tsükpong tenlaba denji külemi tarongba tenla asoshi küm ka tain san tepong ka nenoki tenlatsüla. 13Iba den ano chiyungtsü tenla asoshi am tanük totzü den meyokteper iba shilem ter nung ana tenlatsüla. Iba tenla teronemji Kibuba madang tajung lir. Nenoki ano tajemtsü tenla yi hin shilem pezü nung ka tenlatsüla. 14Nenoki item tenlaji Tsüngrem dangi bener maru tashi amtsük süshia jang atongba mesüra asenjang kongnüng süshia kecha machitsüla. Iba ozüng ya nenok asoshi putir ajak atema alitsü.

Aluruba Benjong

(Zün. 28.26-31)

15  “Nenoki Kibuba dang tsükpong tenla bener aruba Amungnü süir tasüng nungi hapta tenet nenoki züngdangang. 16Amungnü tenet buba süir tasüng anogo, tenemnü buba nung nenoki Kibuba nem asen-chi agütsütsüla. 17Kibong shiai amtsük anana tenla balaka asoshi Kibuba dangi abentsüla. Amtsükji amzü tanük jangku ka ka nung piyazü enoka yanglutsüla, aser aji mezüng süngjang Kibuba asoshi alitsü. 18Amtsük denji külemi tarak maket küm ka tain san tepung tenet, nashi pungchi chanu ka aser san tepung ana nenoki agütsütsüla. Itemji Kibuba madang teronem tajung asoshi tarongba tenla den külemi chiyungtsü tenla aser tajemtsü tenla alitsü. 19Ano temenen tenla asoshi nabong tepung ka, aser telungjem tenla asoshi küm ka chanu san tepung ana nenoki tenlatsüla. 20Putiri mezüng süngjang amtsük den san chanu anaji tenla balaka asoshi Kibuba madang itemji temeshi alitsü. 21Panüji nenok mapa kecha meinyaktsüla, saka temeshi sentep alitsü, nenok alidak ajak nung ibai teti asoshi ozüng alitsü.

22“Kodang nenok alu rudir, ner lu chirongbang ajonga marutsüla, ner lu nung motok meshimtsüla, itemji sensaker aser aener asoshi tokjang, Ni Kibuba nenok Tsüngrem lir.”

Jangzü Apuba Benjong

(Zün. 29.1-6)

23 Kibubai Mosa dang ashi, 24“Israel nunger dang shiang, ita tenet buba mezüngbuba anogo nung nenoki anisüngzükang, aser Temeshi sentep nung Jangzü apuba agi nenok Tsüngrem nem tenüngsang agüjang. 25Nenoki mapa kecha teinyak, saka Kibuba nem chiyungtsü tenla agüjang.”

Temenen Pungiba Anogo

(Zün. 29.7-11)

26  Kibubai Mosa dang ashi, 27“Iba ita tenetbuba anogo terbubaji Temenen pungitsü anogo lir. Panüji nenoki kecha machitsüla, ibai nenok asoshi temeshi sentepnü alitsü, aser Kibuba nem chiyungtsü tenla agüjang. 28Panüji nenoki mapa kecha meinyaktsüla, kechiaser Kibuba nenok Tsüngrem nenok asoshi temenen pungidaktsütsü ibai Temenen pungiba anogo lir.

29“Kari panüji langka chira, pabo pei nübur rongnungi jentoktsü. 30Aser kari panüji mapa inyakra, Kibubai iba nisung südaktsütsü. 31Nenok alidak ajak nung teti asoshi ibai ozüng alitsü. 32Anogo tekunübuba nikongdang tashi nenoki ibai metsüngshia reta amungtsüla, aser iba mapang nungji nenoki kecha machitsüla.”

Semtu Benjong

(Zün. 29.12-40)

33  Kibubai Mosa dang ashi, 34“Israel nunger dang shiang. Anogo terpungububa ita tenetbuba nung Kibuba asoshi semtu benjong tenzüktsü aser aji anogo tenetnü tashi alitsü. 35Mezüngnüji telok temeshi sentep ka akatsü, aser nenok mapa kecha meinyaktsüla. 36Anogo tenetnü anogo shia nenoki chiyungtsü agütsütsüla, anogo tinübuba nung nenoki temeshi sentep ka akatsüla: ibai benjong shibangba sentep alitsü, nenok mapa kecha meinyaktsüla.

37“Itemi Kibubai atakteta yutsüba benjongtem lir, kong nenok temeshi sentep akar, aser chiyungtsü tenla, tarongba tenla, tenlatem aser tajemtsü tenla, anogo shia tataktet mapang nung agütsütsüla. 38Item benjongtemji teti amungba amungnü den külemi, aser item tenlatemji nenoki teti agütsüba dak alema, nenok azüngashiba atalokba tenla, aser nenoki mulungba tenla Kibuba nem agütsütsü alitsü.

39“Kodang nenok alutem ruzükdir, iba benjong ya anogo tenetnü, anogo ter-pungububa ita tenetbuba nung amungtsü, mezüngnüji anogo balaka bendanga agütsüba anisüngzük anogo alitsü. 40Panüji nenoki süngdong nungi süngjang tajungtiba, asangdong kongsang aketba aser to aketba süngsang bener arua Kibuba nenok Tsüngrem nem tetushi agüjang. 41Anogo tenetnü tashi nenoki benjongji amungtsüla. Iba ozüng ya nenok putu ajak nung ayutsüla. 42Tenetnü nenoki sempak nung alitsüla. Israel nung asoba senso ajak semtu nung alitsüla. 43Anungji Kibubai Israel nunger Ijip lima nungi aniteta semtu nung lidaktsü ta nenok semchirtemi metettsü. Ni Kibuba nenok Tsüngrem lir.”

44Anungji Israel nunger dang shimtetba benjong anogotem indang Mosai metetdaktsü.

LEVI 24

Milendong Atalokdak

(Ani. 27.20-21)

1 Kibubai Mosa dang ashi, 2“Israel nunger nem iba ozüng ya agüjang; Oliv totzü temenüngzükba tajungtiba milen asoshi bener arung, angji tekülemdak milenji teti tsükloka alitsü. 3Sentep süki Ozüng Süngden temalen Aroni aji nikongdang nungi anepdang tashi Kibuba madang maneni yutsütsüla.Ya putu ajak nung ozüng ka alitsü. 4Hon temeja milendong nung Aroni Kibuba madang maneni milen yutsütsüla.

Tsüngrem Dang Amtsük Tenlaba

5  “Amzü tanük agi amtsük terana yangluang, amtsük shia nung am tanük jangku ana agi yangluang. 6Amtsükji taren ana, taren shia trokrok, hon temeja langbang manung Kibuba madang ayutsüla. 7Kibuba dang amtsük tenlaba bilemtettsü asoshi, taren shia liangmesen temeja yujang. 8Amungnü shia Israel nunger tenüng nung amtsükji Kibuba madang teti yutsütsüla. Ibai Israel chirtem asoshi teti atema ozüng lir. 9Amtsükji Aron aser par chirtem asoshi alitsü, parnokia aji temeshi dak achitsüla, kechiaser aji putir asoshi Kibuba nem chiyungtsü tenla agütsüba kanga temeshi lir.”

Ochi Obendangba Tatishitsü

10Israeltsür chir ka shiba tebu Ijip nunger liasü, Israel nunger rongnung oa, aser tanendak Israel nunger ka den rara. 11Israeltsür chir jagi Kibuba tenüng atakatema atalatsü; anungji parnoki pa Mosa dangi anir aru, pa tetsü tenüng Shilomit, Dan kidong nung Dibri jala liasü. 12Kibuba mulung kechi aji memetet tashi parnoki pa shibanga ayu.

13Idangji Kibubai Mosa dang ashi, 14“Atakatem asüsangji tanendak kimai anir arung. Pai ashiba angashir shiai kuli asütsü asoshi parnok teka pa tekolak nung nemetang; aser telok ajaki pa dak lung agi aontsü. 15Israel nungertem dang shiang; shibaisa pei Tsüngrem atakatemdir, pai pei temenen abentsü. 16Shibai Kibuba tenüng ataladir, pa südaktsütsü, Israel chir süaka bendanger süaka kodang pai Kibuba tenüng ataladir, Israel telok ajaki pa lung agi onseta südaktsütsüla.

17  “Shibai nisung tepsetdir, pa südaktsütsüla, 18shibai tangar meyong shiruru tepsetdir temenok agütsütsüla, taküm melen taküm agütsütsüla.

19“Kari pei kiyonger yirudaktsüra pai inyakba ama yamaji pa dak inyaktsü. 20 Teret melen teret, tenük melen tenük, tepu melen tepu. Pai tangar yirudaktsüba ama pa daka yirudaktsütsü. 21Shibaisa shiruru tepsetdir aji menokdaktsütsü. Saka shibai nisung tepsetdir pa südaktsütsü. 22 Bendanger süaka Israel nungertem süaka ajak asoshi iba ya alitsü, kechiaser ni Kibuba nenok Tsüngrem lir.”

23Kodang Mosai Israel nungertem dang itemji ashi, parnoki tanendak kimalen anir adoka lung agi onseta südaktsü. Yamaji Israel nungeri Kibubai Mosa dang ashiba ama inyak.

LEVI 25

Küm Tenetbuba

(Taz. 15.1-11)

1  Kibubai Sinai tenem nung Mosa dang ashi, 2“Israel nunger dang shiang; kodang ni nenok nem agütsüba linüki nenok arudir, küm tenetbuba nung KIBUBA dang linüki amungnü amungtsüla. 3Küm trok nenoki alu nung metsü prokang, aser tsükmenatzü kongsang mejeptokang, süngjangtem bendena yuang. 4Saka küm tenetbubaji linük ajak anisüngzükba küm, KIBUBA nem bendanga agütsüba küm alitsü, nenok alu nung metsü teprok mesüra tsükmenatzü kongsang temejep. 5Nenok alu nung pei sasa atangba metsü aser nenoki memejeptoki atangba tsükmenatzü süngjang kecha nenoki mebendentsüla; linük asoshi aji bendanga anisüngzükba küm alitsü. 6Iba kümji nenoki alu nung metsü meprokaka nenok alar aser alatsür, nenok den ayanga alirtem asoshi, 7nenoki kiset shirurutem aser arem shirurutem asoshi chiyungtsü alitsü. Linük nungi kechisa adokdir aji nenok asoshi chiyungtsü alitsü.

Jubilee Küm

8“Amungnü küm tenetben tenet koba agi küm lir tuku abensar aji nenoki züngang. 9Ita tenetbuba anogo terbuba, temenen pungiba anogo nung linük ajaklen jangzü ola tulu yokang. 10Yamaji tenembuba kümji nenoki meshitetang, aser linük alir ajak dang nüji tia sangokjang. Ibai nenok asoshi jubilee alitsü, nenok nisung shia pei meyong oset kechisa tangar dang ayok, pakümji pei oset kibur aser senmang dangi, aser nisung kar alar asütsü sen yong yoka lira, pai kinunger dangi meyipa aotsü. 11Küm tenembubaji nenok asoshi jubilee alitsü, nenoki metsü meproktsü mesüra pei sasa meibajia marutsü, mesüra memejeptoki aliba nungi tsükmenatzü mebendentsü. 12Ibai nenok asoshi jubilee aser temeshi alitsü, alui pei sasa kechi tangtsü aji dang achitsüla.

13“Iba jubilee kümji nisung shiai pei oset kechisa tangar dang ayok aji pei kibur dangi meyipa aotsü, 14nenoki pei kiyonger dang ali kar yoka, mesüra pa nungi alira, nenoki kati ka dang külaka tebenshi. 15Taruba jubilee küm yongsük aser ali nungi metsü adoktsüba küm apir jenjangji ataktsüla. 16Ano kümji aika süra iba yari jenjangji tulu saka kümji ishika dang süra iba yari jenjang ajemtsüla, kechiaser ali nungi adoktsüba metsü jenjangji apir aji atoktsüla. 17Nenok kati ka mashioktsütsüla, saka Tsüngrem tsübuang. Ni Kibuba nenok Tsüngrem lir. Ibai Israel nunger küm tenetbuba amungnü küm tetezü lir.

Küm Tenetbuba Nung Teinyaktsü

18“Kü temelaba aser kü ozüngtem kümdanga benshiang, aser nenok linük nung kümzüka alitsü. 19Aser alui pei tejang tangtsütsü, aser nenoki aginüba ajak ngua aser nenok tepok sünga alitsü.

20“Onoki metsü meprokra, aser alu merura küm tenetbuba nung onoki kechi achitsü? ta kari asüngdangra, 21Kibubai küm trokbuba nung kümsem atangtsü süngjang tangdaktsütsüsa aliji moatsütsü. 22Kodang küm tibuba nung nenoki metsü prokdir nenoki aontsük chia alitsü, aser küm tukububa aluruwa matong tashi nenok aon chia chiyungtsü.

Oset Meyipa Anguba

23“Nenoki ali teti asoshi mayoktsüla, kechiaser aji nenok meyong masü, saka Tsüngrem meyong lir, nenok kü den aener aser semloka alirtem dang lir. 24Kodang nenoki ali yokdir ali kiburi tanaben aji alangzüktsü melatsüla. 25Nenok adianu kar sensaker küma par rongsen kar ayoktsüsa kümra idangji pa anasa aliba kimang kati arua aji ruzüktsü. 26Nisung kar aji ruzüktsü adianu melira aser tesülen pa takar küma aji ruzüktsü lenmang kar ngura; 27pai ayokba nisung nemji tanüngba asoshiji meyipa agütsütsü, aser pai pei rongsen meyipa agitsü. 28Saka pai aji tanaben agitsü sen makara, pai kechi ayok aji talizükba ket nung jubilee küm tashi alitsü, aser pakümji pei rongsen tanaben pai agütsütsü.

29“Jara agi atsübanga aliba yimti nungi kari talidak ki yokra aji yoker küm ka renteterbo, pai aji alangzüktsü akok, 30saka küm ka tsüngda nung pai aji malangzükra pai tanaben aji alangzüktsü makok, aser pa shibai aji ali, kiji teti asoshi pa aser par semchirtem meyong akümtsü. Jubilee nunga ibaji meyipa magütsütsü. 31Saka yimtsüngtem nung jara agi atsüa aliba kiji alu den kasa ama züngshitsü. Item kiji kiburtem meyipa alangzüktsü akok, aser jubilee nung meyipa agütsütsüla. 32Aji saka Levi yimlitem nung aliba parnok kitem asoshi, kodang parnoki aginüdir idangji alangzüktsü akok. 33Parnok yimtitem nungi Levi nunger kari ki ka yokra, aser aji malangzükra jubilee kümbo ajia meyipa agütsütsü; kechiaser Israel kin rongnung Levi yimtitemji teti asoshi parnok meyong lir. 34Saka parnok yimti meketa shiruru chimdak yimli kodanga mayoktsüla, ibai teti parnok senmangji lir.

Sensaker Nem Aputsüba

35  “Israel nunger ne sosem adianu kar sensak tenra aser pei tepok mesüngra pa taküm alitsü atema ne den semloka alir aener dang yariba ama nai pa dang yaritsüla. 36Pa nungi kecha nunga tetemlok tagi, saka Tsüngrem tsübuang aser ne adianu na anasa lidakjang. 37 Nai pa nem sentem agi sen taputsü mesüra na tajangzük angutsüsa chiyungtsü kecha teyok, 38nenok nem Kanan lima agütsütsü aser nenok Tsüngrem Ijip lima nungi anitetba Kibuba nenok Tsüngrem ni lir.

Alar Chiokba

39  “Na anasa alir Israel nunger sosem sensak tena, pei sasa alar asütsü ne dang yokra nai pa nem alar mapa meinyakdaktsütsüla. 40Jubilee küm matong tashi semloka alir ayanger ka ama pa ne den alitsü, 41iba sülen pa aser par chirtem na toktsür pei meyong aser kinunger dangi meyipa aotsü. 42Kechiaser Israel nüburji kü kilir asütsü ni Ijip lima nungi anitet; parnok alar ama mayoktsüla, 43parnok dang tashiyim agi yimsü masütsüla, saka ne Tsüngrem tsübuang. 44Nai alar aser alatsür yunüra, meketa aliba kintem nungi alitsü akok. 45Ano nenok den semloka alir bendanger chirtem nungi nenoki alar alitsü akok. Item tanur ner lima nung asortemji nenok meyong alitsü. 46Aser parnokji ner chirtem asoshi senmang ama nai yutsütsü akok aser parnok dang tenzüktsü, saka ne adianu Israel nunger shinga daka tashiyim agi yimsü masütsüla.

47“Aener mesüra ne den semloka alir kar takar küma lira, aser ne adianu sensak tena, aener mesüra ne den semloka aliba dangji alar asütsü yokra mesüra par kinunger kar dang yokra, 48pai pei sasa alangzüktsü akok; pa adianutem rongnung kari alangzüktsü akok. 49Oda tebu tambu mesüra tebu tanubu, mesüra pa sosem kari pa alangzüktsü akok. 50Pa alangzükba nisung denji pai angatettepa, pa ayokba küm nungi jubilee küm tashi pa alizükba jenjangji küm yongsük apir ayanger ka ta-a agütsüba jenjang agütsütsüla. 51Ano küm aika anünga lira, itemji apir pai meyipa agütsütsüla. 52Aser jubilee küm atongtsü küm ishika dang anünga lira, ibaji apir pai jenjangji agütsütsüla. 53Küm shia ayanger aliba kilir ama pa ne den alitsü, aser kiburi pa dak tashiyim mamshitsü nai reprangtsüla. 54Pei sasa saka adianui saka pa malangzükaka, jubilee küm pa aser par chirtem chioktsüla. 55Israel nungertemji teti asoshi alar asütsü makok, kechiaser parnokji Kibuba kilirtem lir. Pai parnok Ijip lima nungi anitet, pa parnok Tsüngrem lir.”

LEVI 26

Tashi Angaba Temoatsütem

(Taz. 7.12-24; 28.1-14)

1  Kibubai ashi, “Nenoki süngyanglu kecha teyanglu, mesüra süngyanglu noksa angenteta süshia, tongshi süshia nenoki teyu, mesüra nenoki apudaktsü atema kecha lung agi yanglua teyu. Ni Kibuba nenok Tsüngrem lir. 2Nenoki kü amungnütem mungang aser kü tekülemdak akhüm tsübuang. Ni Kibuba lir. 3 Nenoki kü ozüngnung jajara, aser ni melaba angara, 4ni mapang shitak nung tzünglu yoktsü aser ali-i tejang tangtsütsü. 5Nenok mo anetba, tsükmenatzü aongba metsü prokba mapang tonga alitsü, aser linük nung nenok kümzüka alitsü.

6“Linük nung ni yimjiyimjung agütsütsü aser nenoki shinga metsübui ontaka alitsü. Linük nung shiruru tamajung ajak ni aridoktsü, aser idakji rara kodanga malitsü. 7Parnok madak nenoki takok angutsü, 8nenok nisung pungui noklang ka, aser noklang kati meyi ter akoktsü. Nenok nok madang parnok laotsü. 9Ni nenok moatsütsü aser nenok tejang jenti kümdaktsütsü, aser kü tezüngzükba nenok den yanglutsü, 10Nenok aon tsük talangka rizünga ayuba tachitsü akatsü, aser tasen atema nenoki aontemji agientsü. 11 Kü tekülemdak süki ni nenok rongnung yutsütsü, aser kü nelai nenok mesempatsü. 12Ni nenok rongnung jajatsü aser nenok Tsüngrem asütsü, aser nenok kü nübur asütsü. 13Nenok parnok lar makümtsü asoshi Ijip lima nungi nenok anitetba ni Kibuba nenok Tsüngrem lir. Ni nenok süngra tasütangba raksatsüogo, aser nenok metong metonga jajadaktsüogo.

Tashi Mangartem Merenshiba

14“Saka nenoki kü dang mangara aser pa temelaba meinyakra, 15aser ni melaba magizükra, aser kü tezüngzüktepba raksara, 16idangji ni dang ya inyaktsü; ni nenok dangi timtem yoktsü wara tashitak, ramen, koba agi nenok tenük pokdaktsütsü aser nenok taküma agitsü. Nenoki amajok nung metsü proktsü, kechiaser tsükchiri nenok akoktsü aser parnoki aji achitsü, 17Kü jak nenok anema alitsü, anungji tsükchir jakdang nenok chinütsü, shirnoki nenok sempar parnoki nenok madak yimsü asütsü; shingaia aria marudang nenoki ajentsü.

18“Yamaji süra nenoki kü dang mangara, ni nenok temerenshi tenetben agi tali merenshitsü. 19Nenok asükümba tashi ni raksatsütsü, aser ni tzünglu meyoktsü, anüngji merang ama akümtsü aser aliji yongmenyin ama takong kümdaktsütsü. 20Nenoki amajok nung meranga inyaktsü kechiaser ali-i tejang metangtsütsü aser süngdongi süngjang metangtsütsü.

21“Ano nenoki kü den maneni küptepra, aser kü dang mangara nenok temenen yari ni tenetben agi tali timtem yoktsü. 22Ni nenok rongnung arem shiruru tesashi yoka nenok chirtem aser nenok kiset shirurutem samadakja nenok ishiba dang kümdakja, nenok lenmangtem azüngmeyaka kümdaktsütsü.

23“Item temerenshi ajanga nenoki kü dang mangai maneni kü den küptepra, 24idangji ni nenok dangi meyiptsü aser tenetben agi tali merenshitsü. 25Kü tezüngzüktepba nenoki raksaba yong ni nenok merenshitsü atema ni nok bener arutsü, nenok kümzüktsü atema yimtitem nung atenshira, manebtetba tashitak ni nenok rongnung yoktsü, aser tsükchir ketnung nenok bendanga agütsütsü.

26“Kodang nenok chiyungtsü ni sotdir, tetsür teri am asangba po ka nung dang külemi amtsük yanglutsü, aser nenok nem amtsük odanga dang agütsütsü, nenoki aji chiaka tip matemtsü. 27Yamaji saka nenoki kü dang mangai tsükchitepra, 28idangji ni ain adoka meyiptsü aser nenok temerenshi akhidang nungi tenetben agi tali tamajungba agi merenshitsü. 29Nenok ayabaji kanga sashiba agi nenoki pei chir shi achitsü. 30Tenem nung nenok tekülemdak ni raksatsütsü, aser anü süngyanglutem tepsatsütsü, aser nenok tasümangtem iba manung toktsütsü. Ni nenok sempatsü. 31Nenok yimtitem aser tekülemdak ni raksatsütsü, aser nenok teronem tajung ni memenemtsü. 32Ni nenok linük azüngmeyaka kümdaktsütsü aser idakji alir nenok tsükchirtem aji ngua süngmangtsü. 33Nenok madak ni rara arudaktsütsü aser ayimsünga linüktem rongnung prokshidaktsütsü. Ner lima teraksa kümdaktsütsü aser ner yimtitem azüngmeyaka kümdaktsütsü. 34Azüngmeyaka aliba mapang linüki amungnü alitsü, tsükchir lima nung nenok aliba mapang tashi linüki anisüngzüka pei amungnü amungtsü. 35Linükji kopiga azüngmeyaka lidir papigaji anisüngzük akatsü; yamaji nenok alidang mungutetba anisüngzük akatsü.

36“Shirnok anisüngzüka lir, parnok mulungjang tetsübu agi süngdaktsütsü, aser oda süngo to ka mopungi onshiba ola agi parnok jashidaktsütsü, parnok rara nungi ajenba ama asemtsü, aser shingaia aria marudang parnok laotsü. 37Shingaia aria maru sernung nok nungi ajen ama parnok kati ka dak metsüdaka laotsü, aser tsükchir anema noktaktsü nenok dak tashi malitsü, 38Nenok bendang lima tepuokdak asütsü aser tsükchirtem linüki nenok meyokadoktsü. 39Nenok anüngzüka alirtem pei temenen aser nenok tsürabur temenen yong tsükchir lima nung yareta aotsü.

40“Saka parnoki ni anema ozüng raksaba, kü den tsükchitepba, parnok temenen aser parnok tsürabur temenen nangzükra, 41aser koba yong parnok tsükchitepba tsükchir linüki parnok anir aru, parnok asükümba temulungjang meyipa parnok temenen nangzükra, 42 ni kü tezüngzüktepba koba Yakob, Isak aser Abraham den yanglu, bilemtettsü aser linükji ni bilemtettsü. 43Linükji parnoki toktsütsü, aser parnok meli-i azüngazünga alidang linüki pei amungnü amungtsü aser parnoki pei ozüng aser temelaba magizükba tai nangzüktsüla. 44Aji oda süaka parnok tsükchir linük nung aliyonga parnok kü den tezüngzükba raksaba agi parnok khenyongi samatsüsa ni parnok magizüki mesüra parnok sempa-a malitsü, kechiaser ni parnok Tsüngrem Kibuba lir. 45Saka parnok atema parnok tetsü teboutem shirnok kintem madang ni parnok Tsüngrem asütsü asoshi ni Ijip lima nungi anitet; parnok den kü tezüngzüktepba ni bilemtettsü. Ni Kibuba lir.”

46Item temelaba yimsü ozüng aser obendangba ya ajak Kibuba pa aser Israel chirtem tsüngda Mosa ajanga Sinai tenem nung yanglu.

LEVI 27

Kibuba Nem Tatemzükba Sempet Agütsüba Indang

1 Kibubai Mosa dang ashi, 2“Israel chirtem dang shiang, kodang nisung kati Kibuba dang palaka tatemzükba sen agi nisung jenjang yangludir, 3küm metsü nungi küm roker tashi tebur jenjang yanglubaji temeshidak shekel aliba amaji taribi shekel tenem alitsüla; 4Aji tetsür süra jenjang yanglubaji shekel semer alitsüla. 5Parnokji küm pungu nungi metsü tashi süra tebur jenjang shekel metsü, tetsür jenjang ter. 6Parnok ita ka nungi küm pungu tashi süra, tebur jenjang shekel pungu, tetsür jenjang taribi shekel asem, 7Parnokji küm roker tema tain süra tebur jenjang taribi shekel terpungu tetsür jenjang taribi shekel ter. 8Tatemzüksang jagi jenjangji magütsütettsüsa sensaka lira, pa-a putir tsüngdangi anir arutsü aser tatemzüksangi agütsütettsüsa putiri jenjangji ajema yanglutsü.

9“Tatemzükbaji shiruru ka Kibuba nem tenla agütsütsüba süra Kibuba nem agütsütsüba tenla ajakji temeshi alitsü, 10nisung shibai ibai atemzük, pai tanga shiruru den aji memelenteptsüla, mesüra tajung ka tamajung asoshi, tamajung ka tajung asoshi memelenteptsüla, pai yamaji melentepra shiruru anaprongji temeshi aser Kibuba meyong alitsü. 11Saka tatemzükbaji memerükba shiruru ka süra, aser Kibuba nem magütsüba shiruru süra, pai aji putir dangi anir arutsü. 12Putiri shiruruji tajung asü jenjangji putiri yanglubaji tatembang alitsü. 13Kiburi aji alangzüknüra jenjang dakji pungusü shilem nung shilem ka pai enoksemer agütsütsüla.

14“Kari pei ki Kibuba asoshi bendanga meshitetnüra, putir kiji tajung majung ajak repranger jenjang atettsü. Putiri kechi jenjang yangludir aji tatembang alitsü. 15Ki bendanga meshitetsangi aji alangzüknüra jenjang dakji pungu sü shilem nung shilem ka enoker agütsütsüla.

16“Kari pei senmang alu kar Kibuba asoshi meshitettsü bendanga agütsüra alu nungji metsü prokba yari jenjangji atettsüla, aluji barley yimji ka atenshi süra iba jenjangji taribi tenem. 17Aluji jubilee küm nungi meshitettsü bendanga agütsüra, iba jenjangji akhi ama alitsü. 18Saka aluji jubilee küm sülen ang meshitettsü bendanga agütsüra tanabuba jubilee küm tashi nung küm kwi anünga ali putiri aji züngdanger jenjangji achema atettsü. 19Shibai aluji bendanga agütsü pai alangzüknüra jenjang dakji pungu sü shilem nung shilem ka agütsütsüla. 20Pai aji Kibuba nungi tama malangzüki yur tangar dang yokra, pai aji kodanga alangzüktsü makok. 21Tanabuba jubilee nung kodang aluji chiokdir, aji teti asoshi Kibuba dang temeshi alitsü aser aji putir meyong akümtsü.

22“Kari sen agi alizükba alu kar Kibuba nem bendanga meshiteta agütsüra, 23Jubilee küm apir putiri iba jenjangji atettsü; aser nisungba jagi iba jenjangji panüjisa agütsütsü, aser aji Kibuba asoshi temeshi alitsü. 24Jubilee küm aluji pei kibur mesüra par senmanger dangi meyipa aotsü. 25Jenjang ajak temeshidak aliba shekel amaji alitsüla; shekel gera metsü asütsü.

26“Mezüng mepuba shiruru ajak Kibuba meyong. Anungji shingaia ibaji Kibuba nem temulunger tenla ama magütsütsüla. Nashi süshia san süshia aji Kibuba meyong lir. 27Saka mezüng mepubaji memerükba shiruru süra, aji jenjang yangluba dak shilem pungusü nung shilem ka enoksemer alitsüla. Kibubai aji malangzükra kasa jenjang jagi kar dang ayoktsüla.

28  “Shingaia teti asoshi Kibuba nem bendanga agütsüba nisung süshia, shiruru süshia, alu süshia teti asoshi mayoktsüla, mesüra malangzüktsüla. Ibaji teti asoshi Kibuba meyong lir, 29nisung shiba samatsütsü asoshi bendanga agüja lir, aji malangzüktsüla. Pabo südaktsütsüla.

30  “Ali nungi adokba süshia, süngdong süngjang süshia ter nung shilem ka Kibuba meyong lir. 31Kari ter shilemji alinüra, pai iba jenjangdakji pungusü nung shilem ka enoksemer alitsüla. 32Nashi telok aser san telok nungi ter shilemji koba tanükeri züngdanger ter bubaji Kibuba asoshi temeshi alitsü. 33Kiburi tajung meshimtsüla, mesüra memelenteptsüla. Pai shiruruji melentepra, anaprongji Kibuba meyong alitsü, aser aji malangzüktsüla.” 34Itemi Sinai tenem Israel nungertem asoshi Kibubai Mosa dang melaba ozüngtem lir.