EZRA

EZRA

OKILA

Ezra kaket ya PUÜPUYANG Otsü kaket den maneni sentaktepa zülua lir. Idaki Yihuda nungertem kar Babdon tepuokdak nungi meyipa shilanger Yirusalem yanglushia parnok tekülem asentenshiba indang zülu. Itemji yamai lir: (1) Persia chuba Cyrus temelaba ajanga mezüngbuba telok tepuokdak nungi shilangbaz (2) Tenla Ki yanglushiba aser meshitetba, Yerusalem nung Tsüngrem külemtsü asentenshiba. (3) Küm ishika sülen Tsüngremer ozüng tesayur mongyin Ezrai anir Yihuda nungertem Yirusalemi meyipa shilangba, Pa lenisüba kübok par lokü aser tamangba yimsü tali tajungba küma yanglushia Israel nüburtem tanela senmang aser tekülemba kümzüka ayu

Keta Alibatem       

Tepuokdak Nungi Mezüng Shilangba 1:1-2:70

Tenla Ki Yanglushiba aser Meshitetba 3:1-6:22

Tepuokdak Nungi Ezra aser Tangar Shilangba 7:1-10:44

        Keta Alibatem  

Tepuokdak Nungi Mezüng Shilangba EZRA 1:1-2:70

Tepuokdak Alirtem Meyipa Aruba EZRA 1:1-11

(2 Pu.36:22-23)

Tepuokdak nungi Arurtem Tenüng EZRA 2:1-70

(Neh. 7.4-73)

Tenla Ki Yanglushiba aser Meshitetba EZRA 3:1-6:22

Yirusalem Nung Tekülem Tenzükshiba EZRA 3:1-7

Tenla Kimung Yangerba EZRA 3:8-13

Tenla Ki Yangluba Anema Noktakba EZRA 4:1-5

Yirusalem Yanglushiba Anemertem EZRA 4:6-24

Tanaben Tenla Ki  Tenzükba (520-515 B.C) EZRA 5:1-17

Dairus Chuba Telangzüba EZRA 6:1-5

Dairusi Mapaji Maneni  Inyaktsü Melaba EZRA 6:6-12

Tenlaki Renemer Meshitetba EZRA 6:13-18

Süia Aoba Benjong(515 BC) EZRA 6:19-22

Ezra Yirusalemi Shilangba EZRA 7:1-10

Artazerkzesi Ezra Nem Temelaba Agatsüba EZRA 7:11-26

Ezrai Tsüngrem Tenüng Asangba EZRA 7:27-28

Ezra Den Külemi Tepuokdak Nungi Shilangba EZRA 8:1-14

Tenla Kidang Tenzükertem EZRA 8:15-23

Tenla Ki Asoshi Sempettem EZRA 8:24-30

Yirusalemi Shilangba EZRA 8:31-36

Bendanger Den Kipalenbuba Aitsüba EZRA 9:1-4

Ezrai Sarasademba EZRA 9:5-15

Nüburtem Telangzüba EZRA 10:1-5

Bendangtsür Kinungtsü Aser Parnok Tanurtem Jentokba EZRA 10:6-17

Bendangtsür Agirtem EZRA 10:18-44

EZRA 1

Tepuokdak Alirtem Meyipa Aruba

(2 Pu. 36.22-23)

1  Persia chuba Cyrus chubaba mezüng küm nung, Kibuba O Yerimia ajanga jembiba atalokdaktsütsü asoshi, Kibubai Persia chuba Cyrus mulung ajongmesodaktsü. Anungji pai pa yimli ajaklen osangtajung ka sangdongdaktsü aser aji tezüluba nung yamai zülu:

2  “Persia chubai yamai ashir; Kibuba anüng Tsüngremi kü nem alima chuba yimli ajak agüja lir, aser pai Yihuda nung aliba Yirusalem nung pa nem ki ka yanglutsü kü dang melaogo. 3Nenok rongnung shibasa pa nübur lir, pa Tsüngrem pa den denang, aser pa Yihuda nung aliba Yirusalemi tuang, aser Kibuba, Israel Tsüngrem ki yanglushidakjang. Yirusalem nung aliba Tsüngremji pa lir. 4Aser shibasa kechi nungsa anüngzüka ali, Yirusalem nung Tsüngrem ki asoshi oda temulunger tenla dak alaka, pei alidak alir nisungtemi taribi, hon oset aser shiruru agi yaritepang.”

5Idangji Yihuda aser Benjamin kidong tamburtem, putirtem aser Levitemi, oda shirsa Yirusalem nung aliba Kibuba ki yanglutsü atutsü Tsüngremi ajungshia liasü, parnok arameso. 6Aser parnok anasa shirnoksa liasü, oda mulungso tenlaba dak alaka ano parnoki taribi, hon, shiruru, aser senti oset agi parnoki yari. 7Aser ano Kibuba kidang chipo anpotem koba Nebukadnezzari Yirusalem nungi bener oadok, aser par tsüngrem kidang yua liasü, itemji Cyrus chubai agitet; 8itemji Persia chuba Cyrusi senyur Mithredat ket agi bener adok aser itemji Yihuda tongtipur Sheshbazzar nem züngzüka agütsü. 9Aser item züngdangbaji ya: hon su semer, taribi su meyi ka, kotari metsürtuku; 10hon susa semer, taribi susa noklang pezü ser ter, aser tanga marok enrok meyi ka. 11Hon aser taribi marokenrok ajak agi meyi pungu ser noklang pezü. Item ajakji Sheshbazzar aser tepuokertem Babilon nungi Yirusalemi arudang bener adok.

EZRA 2

Tepuokdak Nungi Arurtem Tenüng

(Neh. 7.4-73)

1Tang item province nung shirnok Babilon chuba Nebukadnezzari Babiloni pua anir ao tanaben anir adokertemji lir; aser Yirusalem aser Yihudai nisung shia pei yimti-i meyipa aru; 2Zerubbabel, Yeshua, Nehemia, Seraia, Reelaia, Mordekai, Bilshan, Mispar, Bigvai, Rehum aser Baana aru.

3Israel nunger nisung yongzük: Parosh nungi jakzükba meyi ana noklang ka ser neter ana. 4Shefatia nungi jakzükba noklang asem ser neter ana. 5Ara nungi jakzükba noklang tenet ser neter pungu. 6Pahath-moab nungi jakzükba, Yehua aser Yoab na ajanga, meyi ana, noklang ti ser terana. 7Elam nungi jakzükba meyi ka noklang ana ser tenemer pezü. 8Zattu nungi jakzükba, noklang tuku ser lir pungu. 9Zakkai nungi jakzükba noklang tenet ser roker. 10Bani nungi jakzükba noklang trok ser lir ana. 11Bebai nungi jakzükba noklang trok ser metsür asem. 12Azgad nungi jakzükba meyi ka noklang terana. 13Adonikam nungi jakzükba noklang trok ser roker trok. 14Bigvai nungi jakzükba meyi ana tenem ser trok. 15Adin nungi jakzükba noklang pezü ser tenem ser pezü. 16Ater nungi jakzükba, Hezekia nungi, tukur ti. 17Bezai nungi jakzükba noklang asem ser metsür asem. 18Yora nungi jakzükba noklang ka terana. 19Hashum nungi jakzükba noklang ana ser metsür asem 20Gibbar nungi jakzükba tukur pungu. 21Bethlehem nungertem noklang ka metsür asem. 22Netofa nunger tenem ser trok. 23Anathot nunger noklang ka ser metsür ti. 24 Azmavet nungi jakzükba lir ana. 25Kiriatharim, Kefira, aser Beeroth nungi jakzükba noklang tenet ser lir asem. 26Rama aser Geba nungi jakzükba noklang trok ser metsür ka. 27Mikmas nunger noklang ka ser metsür ana. 28Bethel aser Ai nunger noklang ana ser metsür asem. 29Nebo nungi jakzükba tenem ser ana. 30Magbish nungi jakzükba noklang ka ser tenem ser trok. 31Tangar Elam nungi jakzükba meyi ka noklang ana ser tenem ser pezü. 32Harim nungi jakzükba noklang asem ser metsü. 33Lod, Hadid, aser Ono nungi jakzükba noklang tenet ser metsür pungu. 34Yeriko nungi jakzükba noklang asem ser lir pungu. 35Senaa nungi jakzükba meyi asem noklang trok ser semer.

36Putirtem; Yeshua kidong Yedaia nungi jakzükba noklang tuku ser neter asem. 37Immer nungi jakzükba meyi ka ser tenem ser ana. 38Pashhur nungi jakzükba meyi ka noklang ana ser lir tenet. 39Harim nungi jakzükba meyi ka ser tertenet.

40Levi nunger: Yeshua aser Kadmiel, Hodavia chirtem, nungi jakzükba neter pezü. 41Kentenertem: Asaf nungi jakzükba noklang ka ser metsür ti. 42Tenlaki kishinükertem nungi jakzükba: Shallum nungi, Ater nungi Talmon nungi, Akkub nungi Hatita aser Shobai nungi jakzükba ajak agi noklang ka aser semer tuku.

43Tenla ki nung tenzükertem; Ziha nungi jakzükba, Asufa nungi jakzükba, Tabbaot nungi jakzükba. 44Keros nungi jakzükba, Sia nungi jakzükba, Padon nungi jakzükba. 45Lebana nungi jakzükba, Hagaba nungi jakzükba, Akkub nungi jakzükba; 46Hagab nungi jakzükba, Shamlai nungi jakzükba, Hanan nungi jakzükba; 47Giddel nungi jakzükba, Gahar nungi jakzükba, Reaia nungi jakzükba; 48Rezin nungi jakzükba, Nekoda nungi jakzükba, Gazzam nungi jakzükba; 49Uzza nungi jakzükba, Pesea nungi jakzükba, Besai nungi jakzükba; 50Asna nungi jakzükba, Meunim nungi jakzükba, Nefusim nungi jakzükba; 51Bakbuk nungi jakzükba. Hakufa nungi jakzükba, Harhur nungi jakzükba; 52Bazlut nungi jakzükba, Mehida nungi jakzükba, Harsha nungi jakzükba; 53Barkos nungi jakzükba, Sisera nungi jakzükba, Tema nungi jakzükba; 54Nezia nungi jakzükba, Hatifa nungi jakzükba.

55Solomon tenzükertem nungi jakzükba: Sotai nungi jakzükba, Hassoferet nungi jakzükba, Peruda nungi jakzükba; 56Yaala nungi jakzükba, Darkon nungi jakzükba, Giddel nungi jakzükba; 57Shefatia nungi jakzükba; Hattil nungi jakzükba. Pokheret Hazzebaim nungi jakzükba. Ami nungi jakzükba.

58Tenla ki nung tenzüker aser Solomon tenzüker nungi jakzükba ajak agi noklang asem tukur ana liasü.

59Tel-mela, Telharsha, Cherub, Addan, aser Immer yimtitem nungi atur itemi liasü; saka parnoki parnok tejakzükdak, parnok Israel nungi asü masü mesayutet. 60Delaia nungi jakzükba, Tobai nungi jakzükba. Nekoda nungi jakzükba, noklang trok ser tenem ser ana. 61Aser putirtem nungi jakzükba: Habaia nungi jakzükba, Hakkaoz nungi jakzükba, Barzillai nungi jakzükba, pai Gilead nunger Barzillai jalatem nungi kinungtsü agi, aser parnok tenüng agi aja. 62Itemi parnok tejakzükdak tenüng züluba bushitep nung mangu; aji asü nung parnok menenadokogo ta züngshi aser putir mapa nungi jendokadok; 63 aser governori parnok dang ashi, oda putir kati Urim aser Thummim den menoktak tashi parnoki temeshitiba osettem machitsüla.

64Tesenteper ajak agi meyi lir ana noklang asem ser roker liasü; 65Iba dak alaka parnok kilir aser kilitsür meyi tenet noklang asem ser semer tenet liasü; aser parnok kentener tebur aser tetsür noklang ana liasü. 66Parnok kor noklang tenet semer trok liasü; parnok kor o gado nungi jakzükba noklang ana lir pungu liasü; 67parnok ut noklang pezü semer pungu; parnok gado meyi trok noklang tenet ser metsü.

68Kidong tamburtem kari, Yirusalem nung aliba Kibuba kidangi arudang, Tsüngrem ki iba talidak noktakdaktsütsü asoshi parnoki mulungbensa tenla agütsü. 69Parnoki akokba yari mapa atema terizüngdak hon sen meyi roker ka, aser taribi pound meyi pungu, aser putir sobutsü noklang ka agütsü. 70 Anungji putirtem, Levitem, nübur kar, aser kentenertem aser tenla ki nung tenzükertem parnok yimtitem nung ali, aser Israel ajak parnok yimtitem nung ali.

EZRA 3

Yirusalem Nung Tekülem Tenzükshiba

1Kodang ita tenetbuba aru, aser Israel nunger yimtitem nung liasü, nisungtemi parnok sasa nisung ka amai Yirusalemi sentep.

2  Idangji Yozadak chir Yeshua, aser pa adianu putirtem, Shealtiel chir Zerubbabel, aser pa adianutem noktak, aser Tsüngrem nisung Mosa ozüng nung zülua aliba ama, parnoki Israel Tsüngrem tenladak, iba manung tarongba tenla tenlatsü asoshi yanglu. 3 Parnok meketa aliba nisungtemji parnoki tsübua liakasa, parnoki tenladak kimungji yanglu, aser iba manung parnoki Kibuba nem anepdang aser aonung shia tarongba tenla agütsü. 4 Aser zülua aliba amato. Parnoki semtu benjong amung, aser yimsü ozüng amato yongsük agi anogo shia tarongba tenla, tenüngdaktsü yari tenla. 5 Iba sülenji maneni tarongba tenla, ita tasen tenla, lemteta aliba Kibuba nem bendanga agütsüba benjongtem, aser nisung shia shirnoki temulunger tenla tenlaba parnoki amshi. 6Ita tenetbuba mezüng anogo nungi parnoki Kibuba nem tarongba tenla tenlatsü tenzük; saka Kibuba tenla ki kimungbo ano meyangeri liasü. 7Parnoki ano lung mistri nem, aser süng mistri nem sen agütsü, aser chiyungtsü, tajemtsü aser totzü, Sidon nunger aser Tair nunger nem, Lebanon nung cedar süng tzüyimi, Yoppa leni, Persia chuba Cyrus nungi parnoki temelaba anguba ama, bener arutsü asoshi agütsü.

Tenla Kimung Yangerba

8Tang Yirusalem nung Tsüngrem ki dangi parnok aruba tanabuba küm nung ita tanabuba nung, Shealtiel chir Zerubbabel, Yozadak chir Yeshua aser tanüngba parnok adianu putirtem aser Levitem, aser tepuokdak nungi Yirusalemi adoker ajaki mapaji tenzük; aser Kibuba ki mapa reprangtsü atema, Levitem küm metsü nungi temalen parnoki shimtet. 9Idangji Tsüngrem kidang mapa inyakertem reprangtsü, Yeshua aser par chirtem aser adianutem, Kadmiel aser par chirtem, Yihuda chirtem den külemi noktak’ aser Henadak chirtem, parnok chirtem aser parnok adianu Levitem dena noktak.

10  Kodang kisürtemi Kibuba ki kimungji yanger, putirtem pei sobutsü sobur jangzü amdaktsü, aser Asaf chir Levitem, Israel chuba Dawidi melaba ama Kibuba asangtsü laya amdaktsü. 11 Aser parnoki kati ka dang Kibuba tenüng sanga aser tepela sayua ashi, “Kechiyong pa tajung lir, kechiyong Israel tsütsü pa yimlibilem teti alir.” Aser kodang parnoki Kibuba tenüng asang, nisung ajaki ola tulu agi ayimten, kechiaser Kibuba ki kimungji yangera liasü. 12Saka putirtem aser Levitem aser kidong tongtipur aser tamburtem mezüng yangluba ki angurtemi parnok nükdang iba ki kimung yangerba ngua ola tulu adoka ajeb; aser aikati tepela agi ayimten. 13Anungji nisungtemi tepela agi ayimtenba ola o tajepba ola naji mebendangteti liasü, kechiaser nisungtemi ola tulu agi ayimten, saka olaji talang nungia angashia liasü.

EZRA 4

Tenla Ki Yangluba Anema Noktakba

1Kodang Yihuda aser Benjamin anemertemi Kibuba, Israel Tsüngrem nem tenla ki ka, meyipa aruba tepuokba chirtemi yangludaki ta angashi, 2 idangji parnoki Zerubbabel dangi aser kidong rongnung tongtipur dangi aru aser parnok dang ashi, “Nenok den onoki külemi yangludi; kechiyong nenok amaji onoki ner Tsüngrem külemer; aser onokia Asiria chuba Esarhaddon, shibai onok yagi anir atu, iba anogo nungi pa nem tetepsetba tenla agütsür.” 3Saka Zerubbabel, Yeshua aser tanüngba Israel kidong rongnung tongtipuri parnok dang ashi, “Ozü Tsüngrem nem ki ka yanglutsü onok den nenok kecha tenüngdaktsü maka; saka Persia chuba Cyrusi onok dang melaba ama, onok sasa dang Kibuba, Israel Tsüngrem nem yanglutsütsü.”

4Idangji linük alirtemi Yihuda purtem tasü meiti kümdaktsü, aser ki yanglutsü tsübua parnoki kümdaktsü, 5aser parnok sentong meyipsatsütsü parnok anema ozüng shitetertem ao, aser Persia chuba Cyrus anogo tepiyong, oda Persia chuba Dairus chubaba tashi minprung.

Yirusalem Yanglushiba Anemertem

6  Ahasuerus chuba dang, pa chubaba tetenzük nungi parnoki Yihuda aser Yirusalem alirtem anema tai agüja zülu.

7Artazerkzes tendak Bishlam, Mithredat, Tabeel aser tanüngba parnok medemertemi Persia chuba Artazerkzes dangi zülu; shitiji Aramaic o nung zülu aser meyipzük. 8Temeranger walunir Rehum aser tezülur Shimshai-i Yirusalem anema Artazerkzes chuba dangi yamai zülu; 9idangji temeranger walunir Rehum aser Shimshai tezülur, aser parnok medemertemi zülu; “Dinai nunger, aser Afarsat nunger, Tarpel nunger, Afarsi nunger, Arkhevi nunger, Babilon nunger, Shushan nunger, Debhai nunger aser Elam nunger, 10aser tanüngba kintem shirnok tulusang aser tamarener Ashurbanipali anir aru, aser Samaria yimti nung toktsü, aser Eufrata ayong atener aliba tanüngba linük nung, aser yamaji.” 11Aser iba shiti ya parnoki Artazerkzes chuba dangi yok; “Eufrata ayong atener aliba lima nung alir ne tenzükertemi ne dangi salem yoker. 12Na nungi atuba Yihuda nunger onok dangi Yirusalemi arua lir ta chubai metetangma; parnoki teküptep aser tamajung yimti yangludagi aser jara renemdagi, aser kimung yanglushidagi. 13Chubai ya metetangma, oda iba yimti ya yanglura aser jaratem renemra, parnoki ali melen sen mesüra apu sen magütsütsü, aser tatem nungbo iba yagi chubatem meyong ali melen lendong kümdaktsütsü. 14Tang onoki chubar metsü achibayong, chuba maksü repranga alitsü onok asoshi tim masü nung, aji onoki yokogo aser chuba dang kuli agütsür; 15oda nebu nunger kaket nung züluba bushiteptsü asoshi; zülua ayuba kaket nungji nai iba yimti ya teküptep yimti, chubatem aser province asoshi majung, aser akhidang nungi iba yimti nung parnoki linük anema adok ta metettsü; iba yongji iba yimti raksatsü. 16Iba yimti yanglura aser jaratem renemra, iba tetezü ayong atenerbo na shilem makatsü, ta chuba dang onoki kuli agütsür.”

17Idangji chubai langzü, “Temeranger walunir Rehum aser tezülur Shimshai dangi aser tanüngba parnok medemer Samaria nung alir dangi, aser ayong atena aliba tanüngba linük dangi salem, 18koba shiti nenoki onok dangi yok, kü madang jangja-a züngogo. 19Ni ozüng ka agütsü, aser bushitepogo aser iba yimti akhidang nungi chubatem anema adok, aser teküptep aser linük anema iba nung adok ta nguogo, 20Ayong atener aliba linük ajak madak ano yimsü süa Yirusalem madak chuba tulutem liasü; aser parnok nem ali melen, aser sen saru balala agüja liasü. 21Ni ozüng ka meyanglu tashi iba yimti meyanglutsü nenoki item nisung anentsü ozüng agüjang. 22Aser iba nung nenok anüanüa teli; aser kechiba chuba akoksatsüsa teraksa adokdaktsütsü?”

23Kodang Artazerkzes chubai zülubaji Rehum aser Shimshai madang aser parnok medemertem dang azüng, parnoki ilunga Yirusalemi Yihuda nunger dangi ao, aser parnoki tashiyim agi mapaji anendaktsü. 24Idangji Tsüngrem ki mapa Yirusalem nung alibaji anenadok; aser aji Persia chuba Darius chubaba küm tanabuba tashi anena ali.

EZRA 5

Tanaben Tenla Ki Mapa Tenzükba (520-515 B.C)

1  Tang ainkartem, Hagai aser Iddo chir Zekariai, Israel Tsüngrem shiba parnok madak liasü pa tenüng nung Yihuda aser Yirusalem nung alir Yihuda nunger dang shina jembi. 2 Idangji Shealtiel chir Zerubbabel aser Yozadak chir Yeshua arameso aser Yirusalem nung aliba Tsüngrem tenla ki yanglushitsü tenzük; aser parnok den yaria, Tsüngrem ainkartem liasü.

3Iba mapang nung ayong atener aliba province nung governor Tattenai aser Shethar-bozenai aser parnok medemertem parnok dangi aru aser yamai parnok dang ashi, “Shibai nenok dang iba ki yanglutsü aser renemtsü mela?” 4Parnoki ano asüngdang, “Iba ki yanglur tenüngtem shibasa?” 5Saka par Tsüngrem tenükji Yihuda nunger tamburtem madak liasü, aser Darius dangi iba indangji tonga maru tashi, ajiser iba indang shiti agi telangzüba memeyiptsü tashi, parnoki parnok manendaktsü.

6Ayong atener aliba governor Tattenai aser Shethar-borzenai, aser ayong atener aliba par medemer nungi Dairus chuba dangi yokba shitiji ibai liasü. 7Parnoki pa dangi shiti ka yok, kechi nung yamai zülua liasü; “Darius chuba dangi, ajak yimjung sangma. 8Ya chubai metetangma oda onok Yihuda province-i aser Tsüngrem tulusang tenla kidangi ao; lung tulutem agi ibai yangludagi, jara nung süngpak yokdagi, aser mapaji lema lema parnok ket nung azükarua odagi. 9Yangji tamburtem dang onoki asüngdang, shibai nübur nem iba ki yanglutsü, aser iba jara renemtsü ozüng agütsü? 10Onoki parnok dang parnok tenüng oda parnok tanishirtem tenüng onoki zülua ne nem metetdaktsütsü asoshi asüngdang. 11Aser parnoki onok dang yamai langzüa ashi, ‘Onok anüng ali Tsüngrem tenzükertem lir, aser akhidang yangluba ki ka koba Israel chuba tulu kati yanglu aser renem, iba ki tanaben onoki yanglushidagi.’ 12 Saka ozü tsüraburi anüng Tsüngrem jashidakja ain adokdaktsü nung, pai Kaldi nunger Babilon chuba Nebukadnezzar ket nung agütsü, pai iba ki raksatsü, aser nisungtem Babiloni bener oadok. 13 Saka Babilon chuba Cyrus mezüngbuba küm nung, Cyrus chubai iba Tsüngrem ki yanglutsü ozüng agütsü. 14Ano pai Tsüngrem kidang hon aser taribi chipo-anpotem koba Nebukadnezzari Yirusalem nung aliba tenla ki nungi bener oa liasü, aser Babiloni tenla kidangi bener aru, item chipo-anpo Cyrus chubai Babilon tenla ki nungi agizük, aser itemji nisung ka tenüng agi Sheshbazar nem bendanga agütsü, shiba pai governor kümdakja liasü; 15aser pai pa dang ashi, Item chipoanpo bener oang, Yirusalem nung aliba tenla kidang yuang, aser Tsüngrem kiji iba talidak yangluang. 16Idangji Shesh-bazari aru, aser Yirusalem nung aliba Tsüngrem ki kimung yanger, aser iba mapang nungi tang tashi yangluyonga aru, aser ano aji merenem lir. 17Anungji chuba madang junger süra, Cyrus chubai Yirusalem nung iba Tsüngrem ki yanglutsü asoshi ozüng yanglu asü meyanglu, aji chubar terizüngdak bushidakjang, aser iba indang chubai aginüba onok dang metetdakjangma.”

EZRA 6

Dairus Chuba Telangzüba

1Idangji Darius chubai ozüng ka yanglu, aser kaket terizüngdak Babilon nung yua alidak bushitep. 2Aser Ekbatana nung, Media province nung chuba kidang shikeplong ka angu, aser yangji yamaji zülua ayuba angu, 3“Cyrus chuba mezüng küm nung Cyrus chubai ozüng ka yanglu; Yirusalem nung Tsüngrem ki indang, kiji yangludakjang, aji parnoki tetepsetba tenla tenladak, aser iba kimung tashi ita azüngdakjang, iba touchi nung süklep roker, aser iba lenten süklep roker; 4lung tulu taren asem, aser süngpak taren ka, aser teindokba senji chubar kidang nungi agütsüdakjang; 5Ano Yirusalem nung aliba tenla ki nungi Nebukadnezzari agizüka Babiloni bener aruba Tsüngrem kidang aliba hon aser taribi chipo-anpotemji, tanaben shia agüjang aser Yirusalem nung aliba tenla kidangi bener oang aser pei talidak yujang; aser itemji Tsüngrem kidang ayutsüla.”

Dairusi Mapaji Maneni Inyaktsü Melaba

6“Anungji tang ayong atener aliba governor Tattenai, Shethar-bozenai, aser ne medemertem shirnok ayong atena oa lir, nenok idak nungjagi pila-a liang. 7Iba Tsüngrem ki mapa oda tokjang, aser Yihuda nunger governor aser Yihuda nunger tamburtemi iba Tsüngrem ki pa talidak yangludakjang. 8Ano iba Israel Tsüngrem ki yanglutsü asoshi item Yihuda nunger tambur dang nenoki kechi inyaktsü ni ozüng ka yanglur; chubar osettem nungi, aser oda ayong atena oa aliba putisü bendenba nungi, oda parnok metitemtsü asoshi item nisung nem mapang shitak nung teindokba sen agüjang. 9Aser kechisa parnok tenüngdaktsü lir, nashi pongtu, san tepung aser san anüng Tsüngrem nem tetepsetba tenla nung arongtsü asoshi, wheat tsük, metsü, yi aser totzü Yirusalem nung putirtemi meshiba ama metitemi anogo shia agüjang; 10angji parnoki anüng Tsüngrem nem teronem tanang tetepsetba tenla agütsütsü asoshi, aser chuba taküm aser par jabasotem asoshi sarasademtsü. 11Ano ni ozüng ka yangluogo, oda shibaisa iba ozüng melenshidir, par kidang nungi bembi ka atsütetdakjang, pa ajongmesor angji alenlokang; aser iba asoshi par ki rüjalung kümdakjang. 12Tsüngrem shibai pei tenüng yangji yua lir, nübur mesüra kin kobai iba ozüng melenshidir mesüra iba Tsüngrem ki Yirusalem raksatsütsü merangdir Tsüngremi endokadokangma. Ni Dariusi ozüng ka yangluogo; aji shitak dang inyakdakjang.”

Tenla Ki Renemer Meshitetba

13Idangji ayong atena oa aliba Tattenai governori, Shethar-bozenai aser parnok medemertemi, Darius chubai ozüng yokba ama yamaji ajak kümdanga inyak. 14 Aser ainkar Haggai aser Iddo chir Zekariai shinba ajanga Yihuda nunger tamburtemi yanglu aser azükarua aküm. Aser Israel Tsüngremi melaba ama, aser Cyrus, Darius aser Persia chuba Artazerkzes ozüng amato, parnoki yanglu aser aji renem. 15Aser iba ki Adar ita tasemnü nung renem, koba Darius chubai chubaba küm trokbuba nung liasü.

16Israel chirtem, putirtem, Levitem, aser pur aoba chirtem tanüngba puri, iba Tsüngrem ki meshitetba tepela agi amung. 17Aser iba Tsüngrem ki meshitetba nung parnoki nashi pungchi noklang ka, san tepung noklang ana, san chanu noklang pezü agi tenla; aser Israel ajak asoshi temenen tenla atema, nabong tepung terana, Israel kidong terana asoshi tenla. 18Aser Mosa kaket nung zülua aliba ama parnoki putirtem parnok telemsa, aser Levitem pei mapa ama, Yirusalem nung Tsüngrem mapa asoshi toktsü.

Süia Aoba Benjong (515 B.C)

19  Ita mezüngbuba anogo terpezünübuba nung pur aoba chirtemi Süia Aoba Benjong amung. 20Kechiyong putirtem aser Levitemi parnok sasa külemi merükteter liasü; parnoki pur aoba chir ajak asoshi aser parnok adianu putirtem asoshi, aser parnok pei asoshi Süia Aoba Benjong san chanu tepset. 21Aser Israel chirtem tepuokdak nungi tanaben adokertem, aser linük nung mamangba pur memerükba nungi shirnoki Israel Tsüngrem Kibuba bushitsü asoshi pila-a ali parnok ajaki achi, 22aser piyazü meinokba am benjong tepela agi anogo tenet amung; kechiyong Kibubai parnok peladaktsü, aser parnok ket nung Israel Tsüngrem tenlaki mapa nung tashi itdaktsütsü parnok dangi Asiria chuba mulung meyipdaktsü.

EZRA 7

Ezra Yirusalemi Shilangba

1Tang item süleni, Persia chuba Artazerkzes chuba alidang, Seraia chir Ezra, Azaria chir, Hilkia chir. 2Shallum chir, Zadok chir, Ahitub chir, 3Amaria chir, Azaria chir, Maraiot chir, 4Zerahia chir, Uzzi chir, Bukki chir, 5Abishua chir, Finehas chir, Eleazar chir, Aron putir chir. 6Iba Ezra Babilon nungi atu; aser Mosa ozüng nung pa tetangshi tezülur ka liasü; koba Kibuba Israel Tsüngremi agütsü; aser Kibuba, pa Tsüngrem pa dak alinungji, pai asüngdangba ajak chubai mela.

7Artazerkzes chuba küm tenetbuba nung, Israel chirtem kar, putirtem, Levitem, kentenertem, kishinükertem, aser tenla ki tenzükertem Yirusalemi atu. 8Aser pa Yirusalemi ita pungububa nung aru, koba chuba küm tenetbuba nung liasü, 9Kechiyong ita mezüngbuba mezüngnü nung pai Babilon nungi atutsü tenzük, aser aji ita pungububa anogo mezüngnü liasü. Pa Tsüngrem taochi teka pa madak liasü. 10Kechiyong Ezrai Kibuba ozüng bushitsü aser aji inyaktsü, aser Israel nung telatet ozüng aser o bendang sayutsü pai temulung toka liasü.

Artazerkzesi Ezra nem Temelaba Agütsüba

11Tang putir Ezra, tezülur aser Kibuba ozüng nung aser Israel nem agütsüba telatet ozüng nung tetangshi, pa nem Artazerkzes chubai agütsüba shitiji ya: 12“Artazerkzes chubatem madak chubai, Ezra putir, anüng Tsüngrem ozüngtem tezülur dangi: 13tang ni ozüng ka yanglur, oda Israel nübur kari, mesüra kü yimli nung parnok putirtem aser Levitem, shibai Yirusalemi aotsü mulunga lir, ne den aotsü akok. 14Kechiaser chubai aser par shisa agütsür teneti Yihuda aser Yirusalem indang ne ket nung aliba ne Tsüngrem ozüng amato bushiteptsü yoka lir, 15aser chuba aser pa shisa agütsürtemi Israel Tsüngrem, shiba Yirusalem nung alir, pa nem mulungsoa taribi aser hon agütsüba bener aotsü, 16aser nai Babilon province ajak nung anguba taribi aser hon, nübur aser putirtemi mulungben tenla, parnok Tsüngrem ki, koba Yirusalem nung lir, iba asoshi tenla dena bener aotsü; 17aji asünung nai kanga nentaka iba sen agi nashi pungchi, san tepungtem, san chanutem, parnok chiyungtsü tenla aser tajemtsü tenla alitsü, aser Yirusalem nung aliba ne Tsüngrem ki tenladak parnok tenlaang. 18Aser tanüngba taribi aser hon jagi ne madang aser ne adianutem madang kechisa inyaktsü junger ta bilemer, aji nenoki Tsüngremi mulungba ama inyakang. 19Aser chipoanpo ne Tsüngrem ki mapa asoshi ne nem agütsübaji nai Yirusalem Tsüngrem madang bendanga agüjang. 20Aser ano ne Tsüngrem ki asoshi kechisa tenüngdaktsü lir, aji nai chubar senpung nungi agüjang.”

21“Aser ni oda Artazerkzesi ayong atener alir senyur ajak dangi ozüng ka yanglur, oda Ezra putir, anüng Tsüngrem ozüng züluri kechisa nenok nungi tenüngdaktsü kümdir, aji yakta inyakang, 22taribi seret semermer ozükba noklang ka tashi, wheat tsük tatak noklang ka tashi, aser yi mori noklang ka tashi, aser totzü mori noklang ka tashi aser metsü kwika ta mezüngdangi agüjang. 23Anüng Tsüngremi kechisa melar, shitak yamaji dang anüng Tsüngrem ki asoshi inyakdakjang; kechiyong kechiba chuba aser pa chirtem yimli madak kechiba Tsüngrem terasaba lidaktsütsü? 24Ano ya onoki melar, putirtem, Levitem, kentenertem, kishinükertem tenla kidang alirtem, mesüra iba Tsüngrem kidang tenzüker kar dang danga ali melen, putisü, akhangtsü ozüng mali.”

25“Talisa, Ezra, nai Tsüngrem shisatsü ne dak aliba yari inyakang, ayong atener alir nübur ajak o bendangtsü governor aser obendangertem shimtetang, oda ne Tsüngrem ozüng meteter ajak; aser item memeteter dang nai sayuang. 26Aser shibaisa ne Tsüngrem ozüng aser chuba ozüng mebenshilir, pa madak o bendang shitak agüjang, tasütsü süshia, linük nungi aridoktsü süshia, osettsüset rakzükba süshia, mesüra tepuokdak ayutsü süshia.”

Ezrai Tsüngrem Tenüng Asangba

27Ezrai ashi, “Kibuba asen tsürabur Tsüngrem temoatsü sang, shibai iba amai chuba mulungjang nung, Yirusalem nung aliba Kibuba ki tobur jungdaktsütsü asoshi enoktsü; 28aser kü dang chuba aser par shisa agütsürtem madang, aser chubar tulur tanishirtem madang taochi sayu. Aser Kibuba teka kü madak aliba yari nai tashi itdaktsü, aser ni Israel nungi tongtipur kü den atutsü külemi aniten.”

EZRA 8

Ezra Den Külemi Tepuokdak Nungi Shilangba

1Tang Artazerkzes chuba tendak kidong tongtipur kü den Babilon nungi atur parnok jakzükbatem itemi lir. 2Finehas kidong nungi Gershom; Ithamar kidong nungi Daniel; Dawid kidong nungi Hattush. 3Shekania kidong nungi; Parosh kidong nungi Zekaria, aser pa den parnok tebur noklang ka ser tenem yongsük nung dena liasü. 4Pahath-moab kidong nungi Zerahia chir Elihoemai, aser pa den tebur noklang ana. 5Shekania kidong nungi Yahaziel chir aser pa den tebur noklang asem. 6Adin kidong nungi Yonathan chir Ebed, aser pa den tebur tenem. 7Elam kidong nungi Athalia chir Yeshaia aser pa den tebur neter. 8Shefatia kidong nungi Mikal chir Zabadia, aser pa den tebur tir. 9Yoab kidong nungi Yehiel chir Obadia, aser pa den tebur noklang ana ser terti. 10Shelomit kidong nungi Yosifia chir, aser pa den tebur noklang ka ser roker. 11Bebai kidong nungi Bebai chir Zekaria, aser pa den tebur metsür ti. 12Azgad kidong nungi Hakkatan chir Yohanan, aser pa den tebur noklang ka ser ter. 13Adonikam kidong nungi, tesüsa arurtem, itemi parnok tenüng lir: Elifelet, Yeuel, Shemaia, aser parnok den tebur roker; 14aser Bigvai kidong nungi Uthai aser Zabbud aser parnok den tebur neter.

Tenla Kidang Tenzükertem

15Ni parnok Ahava leni yima aoba ayong nung sentepdaktsü, aser yangji onok anogo asem liasü; aser ni nisungtem aser putirtem reprangdang nung Levi nungi jakzükbatembo mali asü. 16Idangji ni Eliazar, Ariel, Shemia, Elnathan, Yarib, Elnathan, Nathan, Zakaria aser Meshullam tongtipur tajai yok; ano Yoiarib aser Elnathan shirnok tangatetertem liasü, 17ni parnok Iddo, shiba Kasifia nung tongtiba liasü, pa dangi yok; aser Iddo aser par adianutem tenla kidang tenzükertem Kasifia nung alir dang kechi parnoki ashitsü aji shiok, oda parnoki ozü Tsüngrem ki asoshi tenzükertem anir arutsüla. 18Aser ozü Tsüngrem teka tajung ozü den dena alibayong parnoki onok dangi Mahli nungi jakzükba atong ala akaba nisung ka anir aru, Levi chir Israel chir; aser Sherebia, par chir aser adianu terti, 19aser Hashabia, aser pa den Yeshaia Merari nungi jakzükba aser pa adianu metsü 20aser tenla ki tenzükertem shirnok Dawid aser tongtipuri Levi nunger mapa asoshi agütsü, noklang ana ser metsü parnok ajak tenüng teta aja.

21Idangji Ahava ayong nung, oda ozü Tsüngrem madang onok sasa ajemalutsü, aser pa nungi onok asoshi aser onok chirnur asoshi aser ozü oset ajak asoshi lenmang tindang ka bushitsü ni telumiba ka ayongzük. 22Kechiyong lenmang nung tsükchirtem anema onok yaritsü chuba nungi temeranger telok aser kor temerangertem meshitsü ni akseta liasü; kechiyong onoki chuba dang ashi, “Tajung asoshi shirnoki pa bushir ajak den ozü Tsüngrem teka dena lir; saka pa ain aser pa terasaba pa sentoker ajak madak lir.” 23Anungji onoki lumi aser iba asoshi ozü Tsüngrem bushi aser onoki mepishiba pai anga.

Tenla Ki Asoshi Sempettem

24Putir tongtipur terana ni bendanga ayu, oda Sherebia, Hashabia, aser parnok den par adianu ter, 25aser parnok nem taribi, hon, aser chipo-anpo, oda ozü Tsüngrem ki asoshi tenla koba chuba, aser par shisa agütsürtem aser par tongtipur aser yangji dena alir Israel ajaki tenla-a liasü, aji ozüka agütsü. 26Ni parnok ket nung taribi seret semermer ozükba noklang trok ser tenem, taribi chipo-anpo seret semermer ozükba noklang ka; aser hon seret semermer ozükba noklang ka; 27hon susa metsü, hon sen meyi ka jenjang; aser hon ama senti, yongmenyin tajung sentsüprang marok ana agütsü. 28Ni parnok dang ashi. “Kibuba dang nenok temeshi lir aser marok-enroktem temeshi lir: aser taribi aser honji Kibuba nenok tsürabur Tsüngrem dang temulunger tenla lir. 29Nenoki puti-ungertem, Levitem aser Kibuba tenla ki taktangtem nung Israel kidong tekolaktem madang itemji seret ozüka magütsü tashi itemji nenoki reprangang aser nükang.” 30Anungji putir aser Levitemi Yirusalem ozü Tsüngrem kidangi itemji bener arutsü taribi aser hon aser chipo-anpotem touzükji agizük.

Yirusalemi Shilangba

31Idangji onoki Yirusalemi aotsü, ita mezüngbuba anogo teranabuba nung Ahava ayong nungi aenshia ao; aser ozü Tsüngrem teka onok madak liasü, aser tsükchir aser lenmang nung mita alir ket nungi pai onok kümzük. 32Onok Yirusalemi aru, aser yangji anogo asem amung. 33Pezünübuba nung taribi hon aser chipo-anpotemji Uria putir jabaso Meremot ket nungi ozük; aser pa den Finehas chir Eleazer liasü; aser parnok den Yeshua chir Yozabad, aser Binnui chir Naodia, Levi nunger liasü; 34ajongaji züngdanga aser ozüka agizük; aser touzükba ajakji iba mapang nung zülua ayu.

35Tepuokba chirtem, shirnok bendanglen tepuokdak nungi aru, parnoki Israel Tsüngrem nem tarongba tenla agütsü. Israel ajak asoshi nashi pungchi terana, san tepung tukur trok san chanu neter tenet, temenen tenla asoshi nabong tepung terana; item ajak Kibuba nem tarongba tenla agütsü. 36Parnoki ano chubar temelabaji chubar yimsüsür nem, aser ayong külen aliba governortem nem agütsü; aser parnoki nisungtem aser Tsüngrem ki nung teyari agütsü.

EZRA 9

Bendanger Den Kibalembuba Aitsüba

1Item mapa inyaker külen, tongtipur kü dangi sentepa ashi, “Israel nüburi, putirtemi, aser Levi nungeri, linük nung alirtemi, Kanan nunger, Het nunger, Periz nunger, Yebus nunger, Ammon nunger, Moab nunger, Ijip nunger, Amor nunger, tesempatsü mapatem nungi mepilai lir. 2Kechiyong parnok asoshi aser parnok chirtem asoshi parnok jalatem agiogo; yamaji temeshi kin linük alirtem den parnok sasa meyoktepa kümogo; hau, tongtipur aser yimsüsürtemi ang tama raksaogo.” 3Kodang ni iba mapa angashi, ni kü sü aser sepoksü shisa, aser kü kolak nungi ku aser bangsemo tokzük, aser bangkaseta amen. 4Idangji tepuokdak nungi arurtemi tai menaba atema Israel Tsüngrem o nung atentener shiai kü dangi sentep; aser aonung tenlaba matong tashi ni bangkaseta amen.

Ezrai Sarasademba

5Aonung tenla kidang ni kü telumi nungi, oda kü sü aser sepoksü shisar arameso; aser kü temokok agi apudak aser Kibuba kü Tsüngrem dangi kü teka songtok; 6aser ni ashi “Oh kü Tsüngrem, ne dangi kü tejak angüma atutsü ni aker, kü Tsüngrem; kechiyong ozü kolak manung ozü temenen tali kümogo, aser ozü tai agi anüng tonga atuogo. 7Ozü tsürabur tendak nungi tanü tashi onok kanga temenen nung lir; kechiyong onok tai yong onok, ozü chubatem, aser ozü putirtem linük alir chubatem ket nung, nok agi asü, tepuokdaki ao, rakzükraktemdaktsü, aser tanü ama maksütsü bendanga agütsüogo. 8Tang kenpiga asoshi tanüngba kabo jenbutsü, aser pa temeshidak tajemetdak ka toktsütsü, oda ozü Tsüngremi ozü tenük sangwadaktsütsü, aser alar tia nungi onok tera asentenshitsü Kibuba ozü Tsüngrem nungi taochi sayuogo. 9Kechiyong onok alar tia nung alirtem, aji saka ozü Tsüngremi onok alar tia nung onok senzüka metoktsü, saka onok asentenshidaktsütsü, ozü Tsüngrem ki noktakdaktsütsü aser iba teraksa yanglushitsü, aser Yihuda o Yirusalem nung onok nem jara ka yoktsü asoshi Persia chubatem madang onok nem yimlibilem ngudaktsü.”

10“Saka tang, Oh, ozü Tsüngrem, iba süleni onoki kechi ashitsü? Kechiyong onoki ne temelaba senzüka toktsüogo, 11koba ne tenzüker ainkartem agi mela-a ashi, nenoki agitsü aoba linükji, linük nübur memerükba ajanga memerükba linük lir, parnok tesempatsütem ajanga, koba agi aji külen tatem nungi külen tatem tashi parnok memerükba agi sünga lir. 12 Tang aji asünung nübur jalatem par jabasotem nem tagidaktsü, mesüra parnok jalatem nübur jabasotem nem tagidaktsü, mesüra nenoki kodanga parnok yimjung mesüra azükaru tebushi; angji nenok tashi aittsü, aser linük nungi tajung achitsü, aser aji nenok senmanger nem teti asoshi toktsütsü. 13Tang ozü tamajung mapa aser tai tulu asoshi ya ajak onok madaki aruakasa, na ozü Tsüngrem, ozü tai dak alangba dang nungi tajemba agi onok merenshi, aser iba amai tanüngba onok nem agütsü nungji, 14tanaben onoki ne temelabatem raksadi ma? Aser item tesempatsü inyakba nübur den sosemtepdi ma? Tanüngba kata metoktsütsüsa mesüra kata mejenbutsüsa, nai onok mesamatsü tashi nai onok dang ain madoktsü no? 15Oh, Kibuba, Israel Tsüngrem, na ochishir lir; kechiyong tanü aliba amai onok jenbua alir tanüngba tokja lir; ajiang, ne madang onok temenen nung lir; iba yongji shingaia ne madang noktaktsü makok.”

EZRA 10

Nüburtem Telangzüba

1Kodang Ezrai sarasadema aser tai nangzüka, jeba aser mechioker Tsüngrem ki madang liasü, pa dangi Israel nungi tebur, tetsür aser tanurtem telok tulu ka külemi sentep; kechiyong nisungtemi kanga ajeb. 2Yehiel chir Shekania, Elam chir rongnung kati, Ezra dang ashi, “Asen Tsüngrem anema onoki tai menaogo, aser linük alir bendangtsür agiogo; aji oda süaka iba indang tanga Israel asoshi teimla lir. 3Tang aji asünung kinungtsür ajak aser parnok nungi asoba ajak yokadoktsü, kü kiburi aser asen Tsüngrem temelaba ozüng nung atentenertemi shisa agütsüba ama, asen Tsüngrem den asenoki tezüngzüktepba ka yangludi; aser ajiang ozüng amato inyakdakjang. 4Shishiang; kechiyong ya ne mapa lir aser onok ne den lir; tashi itang aser inyakang.” 5Idangji Ezra arameso, aser putir tongtipur, Levitem aser Israel ajak nem iba sentong amaji parnoki inyaktsü azüngashidaktsü. Anungji parnoki azüngashi.

Bendangtsür Kinungtsü Aser Parnok Tanurtem Jendokba

6Idangji Tsüngrem ki madang nungi Ezra shishi, aser Eliashib chir Yehohanan taktangi ai, aser kodang pa ajagi aru, pai chi mechiyung, mesüra tzüa majem; kechiyong tepuokertem tai asoshi pai mang ayim. 7Aser parnok Yirusalemi parnok sasa atenshitsüla ta Yihuda aser Yirusalem ajak nung tepuokdak nungi shilanger ajak dangi o sangdong; 8aser asemnü tsüngda nung shibaisa marulir, tongtipur aser tamburtem o amato, pa akaba ajak agiadoktsü, aser pa tepuokertem telok sentepba nungi pilatsüla.

9Idangji Yihuda aser Benjamin nisung ajak asemnü tsüngda nung Yirusalem nung atenshi; aji ita tukububa liasü, ita anogo metsübuba nung, aser nisung ajak Tsüngrem ki madang moa nung amen, aser iba mapa asoshi aser tzünglu tulu arubayong atentena liasü. 10Idangji putir Ezra noktak, aser parnok dang ashi, “Nenoki tai menaogo aser Israel temenen tali kümdaktsütsü bendangtsür agiogo; 11anungji, nenok tsürabur Tsüngrem, Kibuba dang tai nangzükang, aser pai mulungba inyakang; aser linük nübur nungi aser bendangtsürtem nungi pila-ang.” 12Idangji telokti ajaki langzü aser ola tulu agi ashi, “Onok indang nai ashi ama onoki inyakdi. 13Saka nütsüng jenti, aser ya tzünglu kanga aruba mapang, aser onoki moa nung noktaktsü makok, mesüra ya anogo ka ana mapa masü; kechiyong iba mapa nung onoki kanga tai menaogo. 14Tang asenok tongtipur telok ajak asoshi noktaka lidakjang, aser yimtitem nung alir shirnoki bendangtsür agiogo parnok mapang tatakzük nung arudakjang, aser parnok den yimti shia nungi tamburtem, asenok nungi asen Tsüngrem tetsübutsü terasaba meyipa mao tashi, iba mapa ya bendanga meyok tashi parnok arudakjang.” 15Asahel chir Yonathan aser Tikva chir Yakzeia dang iba mapa anema noktak; aser Levi nunger Meshullam aser Shabethai parnok yari.

16Tepuokdak nungi shilangertemi yamaji inyak. Aser putir Ezra aser parnok tebou semchirtem kinunger rongnung tanishirtem, aser parnok ajak tenüng ja-a shimtet; aser ita terbuba mezüngnü mapaji reprangtsü parnoki amen. 17Aser ita mezüngbuba mezüngnü nung bendangtsür agir ajak den parnok mapa atem.

Bendangtsür Agirtem

18Putir chir rongnung bendangtsür agirtemji Yozadak chir Yeshua nungi jakzükbatem, aser pa adianutem, Maaseia, Eleazar, Yarib, aser Gedalia. 19Parnok kinungtsürtem jendokadoktsü ta parnoki tenangzükba agütsü; aser tai mena-a ali nung, san telok nungi tepung ka parnok temenen atema parnoki tenla. 20Immer nungi jakzükba; Hanani aser Zebedia, 21Harim nungi jakzükba; Maaseia, aser Elija, aser Shemaia, Yahiel, aser Uzzia. 22Pashhur nungi jakzükba Elioenai, Maaseia, Ishmael, Nethanel, Yozabad aser Elasa.

23Levitem nungi: Yozabad, Shimei, aser Kelaia (aji Kelita), Pethahia, Yihuda, aser Eliezer. 24Aser kentenertem; Eliashib; aser kishi nükertem: Shallum, Telem aser Uri.

25Israel nungi: Paros nungi jakzükba; Ramia, Izzia, Malkhija, Mijamin, Eliazar, Malkhija, aser Benaia. 26Elam nungi jakzükba: Mattania, Zakaria, Yehiel, Abdi, Yeremot, aser Elija. 27Zattu nungi jakzükba; Elioenai, Eliashib, Mattania, Yeremot, Zabad, aser Aziza. 28Bebai nungi jakzükba; Yehohanan, Hanania, Zabbai, Athlai. 29Bani nungi jakzükba; Meshullam, Malluk, Adiaa, Yashub, Sheal, Yeremot. 30Pahathmoab nungi jakzükba; Adna, Chelal, Benaia, Maaseia, Mattania, Bezalel, Binnui; aser Manase. 31Harim nungi jakzükba; Eliezer, Isshija, Malkhija, Shemaia, Shimeon; 32Benjamin, Malluk, Shemaria. 33Hashun nungi jakzükba; Mattenai, Mattata, Zabad, Elifelet, Yeremai, Manase aser Shimei. 34Bani nungi jakzükba; Maadai, Amram, aser Uel; 35Benaia, Bedeia, Cheluhi; 36Vania, Meremot, Eleashib; 37Mattania, Mattenai aser Yaasu; 38Bani, Binnui, Shimei, 39Shelemia, Nathan, aser Adaia; 40Maknadebai, Shashai, Sharai; 41Azarel, aser Shelemia, Shemaria, 42Shallum, Amaria, Yosef. 43Nebo nungi jakzükba; Yeiel, Mattithia, Zabad, Zebina, Iddo, Yoel, Benaia. 44Item ajaki bendangtsür agi; aser parnok kar kinungtsüri tanur soja liasü.