ESTHER

ESTHER

OKILA

ESTHER kaket ya Persia chuba asükwa ki Susa yimti nung aliba mapang atalokba otsü ka lir. Persia yimli nung chuba den tatong Hamani Yihuda nunger ajunga südaktsütsü tasa yanglua liasü. Saka Esther tebu tanubu Mordekai teyari ajanga aser Esther tasü tait aser bendanga agütsüba tamang mapa ajanga pei nübur tasütsü lendong nungjagi kümzükba angur. Yihuda nunger Purim benjong amungba aser iba tetezü indang kaket nungji terasa tezüluba angutsü.

Keta Alibatem         

Easter Chubatsür Akumba 1:1-2:23

Haman Tasa Tamajung 3:1-5:14

Haman Südaktsüba 6:1-7:10

Yihuda Nungeri Tsükchirtem Akokba 8:1-10:3

        Keta Alibatem

Easter Chubatsür Akumba ESTHER 1:1-2:23
Ahasuerus Chuba Benjong ESTHER 1:1-9
Chubatsür Vasti-i Maksüdaktsüba ESTHER 1:10-22
Esther Chubatsür Akümba ESTHER 2:1-18
Mordikai Chuba Taküm Kümzükba ESTHER 2:19-23
Haman Tasa Tamajung ESTHER 3:1-5:14
Hamani Yihuda Nunger Tepsettsü Atongba ESTHER 3:1-15
Estheri Yihuda Nunger Yaritsü Nangzükba ESTHER 4:1-17
Esther Chuba Aser Haman Benjongi Jaoker ESTHER 5:1-8
Mordekai Tepsettsü Tasa ESTHER 5:9-14
Haman Südaktsüba ESTHER 6:1-7:10
Chubai Mordekai Ajongketba ESTHER 6:1-14
Haman Suseta Südaktsüba ESTHER 7:1-10
Yihuda Nungeri Tsükchirtem Akokba ESTHER 8:1-10:3
Estheri Yihuda Nunger Kümzükba ESTHER 8:1-17
Yihuda Nungeri Parnok Tsükchir Tepsetba ESTHER 9:1-19
Purim Benjong Amungba ESTHER 9:20-32
Ahasuerus Aser Mordekai Uluba Indang ESTHER 10:1-3

ESTHER 1

Ahasuerus Chubar Benjong

1  Tang Ahasuerus tendak Ahasuerus chuba shibai India nungi Ethopia tashi province noklang ka ser metsür tenet nung yimsü süa liasü. 2Item anogo nung, kodang Ahasuerus chuba, Susa yimtiba nung aliba par yimli chuba menden nung amen, 3pa chubaba küm asembuba nung, pai par tongtipur aser par tenzüker ajak asoshi benjong ka yanglu; Persia aser Media temeranger telok tanishirtem, aser province nung tamarener aser tongtipurtem pa madang liasü. 4Idangji pai chuba yimli sentsüwangshi rongsen aser pa tamaren akhüm tulu tetushi anogo aika, oda anogo noklang ka ser tir sayua ali. 5Aser kodang item anogo abensa, chubai Susa yimtibai arua alir tulu tila, nisung ajak asoshi, chubar ki tsüki kima nung anogo tenet benjong yanglu. 6Teyindangba sü temesüng, tamak, aser mangia meremba sangzüa liasü, kümpa tanük sü aser nakrema meremba lisü agi taribi küri aser marbel tongshi nung sentaka liasü. Temangadaktsü mendentemji hon aser taribi, marbel lung temerem, aser temesüng, tenenya aser tanak agi alaba manung liasü. 7Yiji parnoki hon marok nung anganüa agütsü, marok anata memesüktep balala liasü, aser chubar yi jenti akaba nungi chubai mulungsoa agütsü. 8Aser tajembaji ozüng amato, khangtepa masü, kechiyong yamaji chubai par chuba ki ketdangpur ajak dang, oda nisung shiai mulungba ama parnoki inyaktsü mela. 9Ano chubatsür Vasti-i, Ahasuerus chuba meyong kidang tetsür asoshi benjong ka yanglu.

Chubatsür Vasti-i Maksüdaktsüba

10Anogo tenetbuba nung, chuba mulungjang yi agi sasapela-a alidang pai teyangluba nisung tenet, Ahasuerus chuba tsüngdang tenzükba, Mehuman, Biztha, Harbona, Bigtha aser Abagtha, Zethar aser Karkas, 11parnok dang nübur aser tongtipur dang chubatsür tobur ajungba sayutsü asoshi chuba madangi chubatsür Vasti la chuba korang semer anir arutsü mela, kechiyong la tereprangtsü tobur tajung liasü. 12Saka teyangluba nisung ajanga chubai melaba nung chubatsür Vasti-i manga, aji asünung chuba ain kanga adok, aser mi adoka rasa.

13Idangji chubai tashi temeteter nisungtem, shirnoki mapangtem meteta liasü, parnok dang ashi, kechiyong yamaji ozüng aser obendang metetba ajak dang chuba yimsü liasü; 14aser pa den atongba, shirnoki chuba tejak angu, aser chuba yimli nung menden temaba nung amen, item Karshena, Shethar, Admatha, Tarshis, Meres, Marsena, aser Memukan, Persia aser Media tongtipur tenet. 15Pai ashi, “Ozüng agi asenoki chubatsür Vasti dang kechi inyaktsü?” Kechiaser teyangluba nisungtem ajanga chuba Ahasuerusi melaba lai meinyak.

16Chuba aser tongtipur madang Memukani langzü, “Chubatsür Vasti-i chuba tsüngdang dang masü, saka ano tongtipur ajak dang aser Ahasuerus chubar province ajak nung aliba nübur ajak dang tai inyakogo. 17Kechiyong Ahasuerus chubai chubatsür Vasti dang chuba tsüngdangi anir arutsü mela, saka lai maru, ta kodang osang agütsüdir, chubatsür iba mapa indang tetsür ajak dangi parnok nükdang parnok kinungpur sensadakja arutsü. 18Tanü anogo nung Persia aser Media chubatsürtem shirnoki chubatsür mapaji angashi, parnoki tongtipur ajak dang yamaji ashitsü, aser yamaji sensamasaba aser terasaba bulua adoktsü. 19Chubai ya mulunga bilemra, chuba ozüng pa nungi odakjang, aser aji Persia nunger aser Media nunger ozüng rongnung züludakjang, oda aji memelenshitettsüsa, oda joko Vasti Ahasuerus chuba madangi marutsü, aser la dang nungi tajungba tangar ka nem chubai maongka menden agütsüdakjang. 20Kodang chuba ozüng koba pa yimli ajak nung pai metetdaktsüdir, kechiyong aji tulu lir, kinungtsür ajaki parnok kinungpur, tulu aser tila anaprongla dang tetushi agütsütsü.”

21Aji ashiba jagi chuba aser tongtipur peladaktsü; aser chubai Memukan o amaji inyak; 22kechiyong chubai province ajaki, pei pei zülu nung, aser pei pei oshi nung province shia dangi, oda nisung shia pei kibong nung kibur asütsü, aser pei nübur oshi amato aji sangoktsütsü pai shiti yok.

ESTHER 2

Esther Chubatsür Akümba

1Iba sülen kodang Ahasuerus chuba ain adokba süngjem, pai Vasti, aser lai kechi inyak aser la anema kechi ozüng agütsü aji bilemtet. 2Pa dang tenzükba chuba tenzükertemi pa dang ashi, “Chuba asoshi tobur tajung aiürtem bushidakjang; 3aser oda Susa yimtibai tetsürtem kidangi, chubar teyangluba nisung Hegai, tetsür anükba ket nung, parnoki tobur tajung tasüngtet aiür ajak külemi chubar yimli nung province ajak nung ketdangpur shima parnoki anitentsüsa; aser parnok merüktettsü asoshi parnok nem oset agütsüdakjang; 4aser aiür shibai chuba peladaktsüdir Vasti melen la chubatsür kümdakjang.” Aser aji agi chuba peladaktsü, aser pai yamaji inyak.

5Susa yimtiba nung Yihuda nunger ka, Benjamin kidong, Kis jabaso Shimei chir Jair jabaso tenüng agi Mordekai liasü; 6 shiba Babilon chuba Nebukadnezzari, Yihuda chuba Yehoiakin bener aoba den Yirusalem nungi tepuoker den pur ao. 7Aser pai tebu tanubur jala Hadasa, aji Esther mesütet, kechiyong la tebu aser tetsü maliasü, aser aiür chanuji tajinütsü aser tobur tajung liasü; aser kodang la tebu aser tetsü asü, Mordikai la pei jala ama mesütet. 8Anungji kodang chubai melaba aser pa ozüng angashi, aser kodang aiür aika Susa yimtiba Hegai ket nung külemi sentepa liasü, oda Esthera chubar kidangi tetsür anüksang Hegai keti anir ai. 9Aiür jagi pa peladaktsü aser pa maongka ngudaktsü. Anungji pai kara-a la nem la temang anebalutsü aser tobur junga kümdaktsütsü asoshi temezütsü mozü balala aser chiyungtsü tajung agüja la yaritsü asoshi chubar ki nungi tetsür tenet agütsü aser aiürtem anendak tajungtibai la anir odaktsü. 10Estheri la kechi nübur mesüra la kechi kin aji mashi, kechiyong Mordekai aji mashitsü la dang shir liasü. 11Aser Esther koma lir aser la kechi akümtsü aji metettsü Mordekai anogo shia tetsür ki kima jakdang jaja.

12Tetsür shia Ahasuerus chuba dangi aitsü asoshi ita terana ozüng agi terenemba mapang liasü. Ita trok teronem menemtsü totzü agi aser ita trok teronem tanang agi pei temang tobur junga akümtsü anebalua liasü. 13Iba amaji aiürji chuba dangi aru, aser lai kechisa aginü tetsür kidang nungi chubar kidangi aotsü la nem agüja liasü. 14Nikongdang la ao aser anepdang chubar teyangluba nisung Shaashgaz, shibai chubar tezüngatsütem anük, pa ket bushia tetsürtem tanabuba ki bushia meyipa aru; la dak chubai sakloka aser tenüng teta mejara, lai chuba dangi tanaben mai.

15Tang Mordekai shibai tebu tanubu Abihail jala Esther pei jala ama mesütet, kodang chuba dangi aitsü mapang atong, tetsür anükba Hegai teyangluba nisungi ashiba dak alema lai kecha masüngdang. Aser Esther dak repranger ajaki la dak saklok. 16Anungji ita terbuba nung, aji Tebet ita nung, pa chubaba küm tenetbuba nung, Ahasuerus chuba dangi par chuba kidangi Esther anir ai. 17Aser tetsür ajak dang nungi tali pai Esther meim, aser aiür ajak dang tali pa nungi la yimlibilem aser maongka angu; anungji pai la kolak nung chuba korang semoktsü, aser Vasti melen la chubatsür kümdaktsü. 18Idangji chubai par tongtipur aser tenzüker ajak asoshi benjong tulu ka agütsü, oda Esther benjong yanglu. Pai ano par province ajak nung anisüngzük agütsü, aser chubar jenti akaba nungi mulungben sempettem agütsü.

Mordikai Chuba Taküm Kümzükba

19Kodang aiürtem tanaben külemi sentep, idangji chubar kiküm nung Mordikai mena liasü. 20Mordekai la dang melaba ama Estheri ano pei sosem aser pei nübur kechi aji memetetdaktsü; kechiyong Estheri pai mesüa alidang amato Mordikai melabaji lai inyak. 21Item anogo nungji, Mordekai chubar kiküm nung mena alidang chuba teyangluba nisung ana, Bigthan aser Teres, shirnoki kikümbang nüka liasü, tena ain adok, aser Ahasuerus chuba dak teka aitsü bushi. 22Aji Mordekai meteta liasü, aser pai Esther chubatsür dang metetdaktsü; aser Estheri aji Mordekai tenüng nung chuba dang ashi, 23aser iba indang bushitep, aser shitak ta putet nung tenaprong süngdong ka nung soseta südaktsü; aser aji putipuyang kaket nung chuba madang zülua ayu.

ESTHER 3

Hamani Yihuda Nunger Tepsettsü Atongba

1Iba sülen Ahasuerus chubai Agag nunger Hamedatha jabaso Haman temaba mendeni tudaktsü, aser pa den alir tongtipur ajak dang nungi pa mendenji temaba tetushi nung yutsü. 2Chubar kikümbang nung alir chuba tenzüker ajaki apudak aser Haman dang akhümtsübu sayu; kechiaser chubai pa asoshi yamaji mela. Saka Mordekai mapudak aser akhümtsübu mesayu. 3Idangji chubar kikümbang nung alir chuba tenzükertemi Mordekai dang ashi, “Kechiba nai chubar ozüng raksatsür?” 4Tang kodang parnoki anogo shia pa dang jembi, aser pai parnok dang manga, Mordekai oji agidisü magilir ta sür, parnoki Haman dang ashi; kechiyong pai parnok dang pa Yihuda nunger ta shir liasü. 5Aser kodang Mordekai mapudaker, mesüra pa dang akhüm metsübur ta Hamani angu, idangji Haman kanga rasa. 6Saka pai Mordekai dang teka yia sensatsütsü bilema liasü, kechiyong parnoki pa dang Mordekai nübur indang ashi. Anungji Ahasuerus chuba yimli ajonga nung Yihuda nunger ajak, oda Mordekai nübur ajak samatsütsü Hamani tasa asa.

7Mezüngbuba ita, koba Nisan ita lir, Ahasuerus chubaba küm teranabuba nung parnoki Haman tsüngdang Pur toktang, koba tetezü anogo aser ita asoshi an toktangba lir. Aser aji ita teranabuba, Adar ita nung kao. 8Aser Hamani Ahasuerus chuba dang ashi, “Ne chuba yimli province ajaklen prokshia kin ka lir, aser par ozüng tangar chuba ajak nungi balaka; mesüra parnoki chuba ozüng mebenshir, anungji parnok oda toktsütsü chuba asoshi aji tajangzük masü. 9Ya chubai mulungra, oda parnok samatsütsü ta züludakjang, aser chuba terizüngdaki bener arutsü asoshi shirnok chubar mapa ketdangsüa ali, parnok nem ni taribi seret semer ozükba meyi ter agütsütsü.” 10Aser chubai pa ket nungi küri sepzük, aser Yihuda nunger tsükchir, Agag nunger Hamedath chir Haman nem aji agütsü. 11Chubai Haman dang ashi, “Nai ne tsüngdang kechi tajung ta bilemer yamaji parnok dang inyaktsü ni ne nem taribi aser ano nisungtemji agütsür.”

12Idangji mezüng ita anogo terasemnübuba nung chubar tezülurtemji aja, aser chubar yimli province ajak nung yimsüsürtem, governor aser tulur ajak dangi pei pei oshi nung ozüng ka kin shia dangi zülu. Itemji Ahasuerus chuba tenüng nung zülur pa küri agi ajen. 13Shiti abeneri Yihuda nunger ajak, tanura taina, tetsür-tanur anogo ka nung, oda ita teranabuba anogo terasembuba, aji Adar ita nung, raksatsütsü, tepsettsü, aser samadaktsütsü, aser agitsü asoshi aser parnok dak nungi makzüktsü osang province ajaki yok. 14Iba anogo asoshi parnoki renema alitsü atema, tezüluba kaket ka province shia nung ozüng agütsütsü tim ta, nisung ajak dang metetdaktsü. 15Chuba ozüng agi osang abenertem ilunga ao, aser ozüngji Susa yimtiba nung yanglu. Idangji chuba aser Haman yi ajemtsü amen, saka Susa yimtibo ratamatadaktsü.

ESTHER 4

Estheri Yihuda Nunger Yaritsü Nangzükba

1Kodang Mordekai tatalokba ajakji meteta aküm, pai tejashi agi pei süoshi shisa, aser aut mezüa anemsü abener yimti jara tashi oa tashi agi aser kanga kua mang ayim. 2Pai chuba kikümi ailen tashi ao, kechiaser shingaia anemsü abener chuba kikümi maitsüla. 3Province shia nung kongsa chubar ozüng aser temelabaji aru, Yihuda nunger rongnung mangyimba tulu, telumiba aser tajepba tulu liasü, aser aikati aut mezüa anemsü abener ontaka liasü.

4Esther-er aiürtem aser lar teyangluba nisungtem aru aser aji la dang ashi, aser chubatsürji kanga dang jashia liasü. Aser Mordekai abendaktsütsü, aser pa nungi anemsü endoktsütsü lai sü yok, saka pai aji magizük. 5Idangji Estheri Hathak, chubar teyangluba nisung rongnung ka shiba pai Esther reprangtsü shimtet, pa aja, aser ibai kechi aser kechiba aji metettsü Mordekai dangi aotsü mela. 6Anungji yimti moapu alidak, koba chubar süngkhüm jakdang liasü ajagi Mordekai dangi Hathak ao. 7Aser Yihuda nunger samatsütsü asoshi Hamani chubar sen rizüngdak sen ajak agi kwi agütsütsü nangzük, aser Mordekai pa dak atalokba ajak pa dang ashi. 8Aser parnok samatsütsü Susa nung yangluba ozüng zülubaji Esther dang sayutsü asoshi, aser aji la dang metetdaktsütsü, aser la dang chuba dangi la iang ta ashitsü, pa dang mepishitsü, aser pa madang pei nübur atema mepishitsü pai pa nem kaketji agütsü.

9Hathak arua Esther dang Mordekai otemji ashi. 10Idangji Estheri Hathak dang jembi, aser Mordekai dangi osang ka ya oda agütsü. 11“Chubar kilirtem aser chubar province nung nisung ajaki metet, oda shibasa, tebur süshia tetsür süshia, chubai majadang yongi taktang telungbai idir, pa asoshi ozüng ka dang, oda shiba dangi pa taküm lidaktsütsü hon nüsong chubai mesangdir pa dak alema ajak südaktsütsü; saka item anogo semer chuba dangi aitsü ni mejai lir.”

12Parnoki Esther otemji Mordekai dang ashi. 13Idangji Esther dangi telangzüba meyipa bener aotsü parnok dang ashi, “Yihuda nunger ajak yutsür nabo chuba kidang jenbutsü ta ne sasa tebilem. 14Kechiyong iba mapang nung na khenyongi ola madoki lira, idangji tanga tesem ka nungi Yihuda nunger dangi teyari aser tekümzüktsü adoktsü, saka na aser nebur kidongbo samatsü; aser ibala mapang asoshi na chuba yimli jagi arua alitsüa shibai metet?” 15Idangji Estheri Mordekai dangi telangzüba meyipa bener parnok yoka ashi, 16“Oang, Susa nung alir Yihuda nunger ajak külemi sentepang, aser ni asoshi lumiang, anogo asem aonung aser anüngdang techiyunga techiyung aser tajema tejem, ano ni aser kü kilitsürtema yamaji lumitsü; ajiser ni ozüng nung meliaka chuba dangi aitsü samara ni samatsü.” 17Angji Mordekai-i pei lenmangi ao aser Estheri pa dang melaba ajak inyak.

ESTHER 5

Estheri Chuba Aser Haman Benjongi Jaokba

1Tang tasemnübuba nung Estheri chubatsür sobutsü sobu, aser chuba ki tejaklen chubar ki taktang telungba nung noktak; aser chubai pei chuba menden nung chuba kidang ki lenjanglen shia mena liasü. 2Kodang chubai Esther kimalen noktaka angu, pa tsüngdang Estheri yimli angu; aser chubai hon nüsong pa ket nung aliba Esther dangi mesang. Anungji Esther anasa aru, aser chuba nüsong talak nung kongshi, 3Idangji chubai la dang ashi, “Nai kechi sünür, chubatsür Esther? Aser ne temepishiba kechi? Chuba yimli tesadanga ni ne nem agütsütsü.” 4Estheri ashi, “Chubai junger ta bilemra, chuba aser Haman ni pa asoshi renemba benjong jagi tanü arudakjang.” 5Idangji chubai ashi, “Estheri ashiba ama inyaktsü Haman ilunga arudakjang.” Anungji chuba aser Haman Estheri renemba benjong jagi aru.

6Chubai benjong nungji Esther dang ashi, “Ne taginüba kechi? Aser aji ne dang melatsü; aser ne temepishiba kechi? Chuba yimli tesadang tashi saka aji inyaktsü.” 7Idangji Estheri langzü, “Ya kü tasüngdangba aser temepishiba lir; 8Chubai kü dang yimli sayudi süra, aser chubai kü tasüngdangba melatsü mulungra, aser kü temepishiba inyakdi süra, chuba aser Haman ni parnok nem renemtsüba benjong jagi asünga arudakjangma, aser chubai ashiba amaji ni langzütsü.”

Mordekai Tepsettsü Haman Tasa

9Idangji Haman iba anogo pelaseta temulung pela-a ao; saka kodang Hamani chubar süngkhüm nung Mordekai pa madang menoktaki mesüra pa asoshi marakzüi angu, Mordekai anema kanga rasa-a liasü. 10Aji saka Hamani pei sasa aremzük, aser kidangi ao aser pai yoka pa tembartem aser tebutsü Zeres anir aru. 11Aser Hamani parnok rongnung pa sentsüwangshi, aser par chirnur jenti aser mapa ajak kechi nung chubai pa temabai tudaktsü, aser koda pa tongtipur aser chubar tenzüker madak pa uludaktsü, atonga ashi. 12Ano Hamani ashi, “Oda chubatsür Estheri lai renemba benjongi kü dak alema nisung shinga chuba den arutsü memelar, aser ano asüng lai chuba den külemi nia jaoka lir. 13Aji saka Yihuda nunger Mordekai chubar süngkhüm nung mena ali tashi ya ajak ni asoshi kecha nunga.” 14Idangji tebutsü Zeres aser la tembar ajaki pa dang ashi, “Pa süng sabang ka nung soseta südaktsütsü süklep tenem talang yangluang, aser anepdang iba manung Mordekai soseta südaktsütsüsa chuba dang jembiang, ajiser benjong jagi pelatepa chuba den iang.” Aser aji agi Haman peladaktsü aser pai soseta südaktsütsü süng sabangji yanglu.

ESTHER 6

Chubai Mordekai Ajongketba

1Paonungji chuba amua moutet, aser pai Putipuyang kaketji bener arutsü mela, aser itemji chuba madang azüng. 2Aser Bigthana aser Teres, chuba teyangluba nisung ana, kikümbang anüker, shirnoki chuba Ahasuerus dak teka aitsü bushi, parnok indang Mordekai ashi ta zülua angu. 3Aser chubai ashi, “Iba asoshi Mordekai dang kechi akhümtsübu aser tetushi inyak?” Idangji chuba tenzükertemi pa dang ashi, “Pa asoshi kecha meinyak.”

4Chubai ashi, “Chuba kima shiba lir?” Tang Mordekai asoshi renemba süng sabang nung pa soseta südaktsütsü chuba den jembiteptsü chubar temaba kima nung Haman aita liasü. 5Aser chuba tenzükertemi pa dang ashi, “Ajiang, Haman chuba kima noktaka lir.” Aser chubai ashi, “Pa aitdakjang.” 6Anungji Haman ait. Aser chubai pa dang ashi, “Chubai shiba dang tetushi sayutsü pelar iba nisung dang kechi inyaktsü?” Tang Hamani pei mulung nung ashi, “Chubai kü dak alema shiba dang tetushi sayunütsü? 7Aser Hamani chuba dang ashi, ‘Chubai tepela sayunüba nisung asoshi, 8Chubai sobuba chuba sobutsü, aser chuba amenba kor, aser tekolak nung chuba korang semtsür, anir arudakjang. 9Aser nisung shiba dang chubai pela-a tushinür pa dak parnoki abendaktsütsü aser yimti yimtong ajanga kor rongdong nung mendaktsütettsü asoshi sobutsü aser korji chubar tamarener tongtipur ka nem bendanga agüjang, aser pa jakdang, Nisung shiba dang chubai pela-a tushinür pa dang yamai inyaktsü, ta ayimdakjang.’ ”

10Idangji chubai Haman dang ashi, “Yakta sang, nai ashiba amaji sobutsü aser kor bena arung, aser yamaji chuba süngkhüm nung amenba Yihuda nungba Mordekai dak inyakang. Nai jembiba ajak kecha meinyaki teli.” 11Idangji Hamani kor aser sobutsü agi, aser Mordekai nem sobutsü, aser yimti yimtong ajanga sanger odaktsü, aser pa jakdang, ‘Chubai pela-a tushinüba nisung dang yamai inyaktsü ta ayimten.’

12Mordekai tanaben chubar süngkhümi aru. Saka Hamanbo pa süko meir jeba par kidangi ilunga ao. 13Aser Hamani tebutsü Zeres aser la tembar ajak dang pa dak atalokba ajak ashi. Idangji par tashi temetetertem aser tebutsü Zeresi pa dang ashi, “Mordekai shiba tsüngdang na laotsü tenzüka lir, Yihuda nunger süngjang süra, nai pa anema makoktsü, saka atangji pa tsüngdang na laotsü.” 14Pa den ano parnoki tejembidak nung chubar teyangluba nisung aru, aser ilunga Estheri renema aliba benjongi Haman anir ao.

ESTHER 7

Haman Soseta Südaktsüba

1Anungji chuba aser Haman Esther den benjong achitsü aru. 2Chubai tanaben yi benjong tananübuba nung Esther dang ashi, “Chubatsür Esther, ne temepishiba kechi? Aji ne nem agütsütsü, aser ne taginüba kechi? Chuba yimli tesadang tashi saka aji inyaktsü.” 3Idangji Estheri chuba dang langzü, “Oh chuba ni ne tsüngdang yimli ngura, aser ya chubai mulungra, kü taküm kü nem meyipa agüjang, aji kü tasüngdangba, aser kü nübur taküm mela-ang, aji kü temepishiba. 4Kechiyong ni aser kü nübur raksatsütsüba, aser tepsettsüba, aser samatsütsü onok yokogo. Saka onok oda tebur aser tetsür alar asütsü ayok asübo, ni ajemajema lila, kechiyong touashi jagi chuba timtemdaktsüba malang.”

5Idangji Ahasuerus chubai jembia Esther chubatsür dang ashi, “Pei mulungjang nung yamaji inyaktsü bilema tasü ita bilemba, pa shiba aser kong lir?” 6Estheri ashi, “Anemer ka aser tsükchir ka, iba tamajung Haman.” Idangji chuba aser chubatsür madang Haman tsübua liasü. 7Aser ain adoka chuba yi benjong nungi arameso aser chuba tsüki jagi ai. Aser Esther chubatsür dang pa taküm asoshi mepishitsü Hamani noktak; kechiyong chubai pa anema tamajung shisatetba pai angu. 8Idangji chubai chubar tsüki nungi meyipa yi benjongi ai, aser Esther menden manung Haman apudaka liasü. Idangji chubai ashi, “Pai kü madang chubatsüra mezüngmeshitsü.” Chuba o pa bang nungi adokli-i teyangluba nisungtemi Haman tejak nembangtsü.

9Idangji chuba madang aliba teyangluba nisung rongnung ka, Harbonai ashi, “Ajiang, ano Mordekai shibai chuba asoshi o tajung jembi, pa asoshi Hamani soseta südaktsütsü süng süklep tenem talang yangluba Haman kidang lir.” Aser chubai ashi, “Iba manung pa soseta südakjang.” 10Anungji parnoki Mordekai asoshi yangluba süng manungji Haman soseta südaktsü. Idangji chuba ain adokba sünem.

ESTHER 8

Estheri Yihuda Nunger Kümzükba

1Iba anogo nung Ahasuerus chubai Yihuda nunger tsükchir Hamaner ki Esther chubatsür nem agütsü. Aser Mordekai chuba dangi aru, kechiyong Estheri chuba dang la aser pa koda sentaktep aji ashi. 2Chubai pa küri, koba pai Haman nungi agizük, aji sepzük, aser aji Mordekai nem agütsü. Aser Estheri Mordekai Haman ki madak yutsü.

3Ano Estheri chuba dang tanaben jembi, aser pa tsüngdang apudak, aser Agag nunger Haman tamajung mapa, aser Yihuda nunger anema pai tasa asa-a aliba endokjang ta nüktzü yima pa dang mepishi. 4Idangji chubai hon nüsongji Esther dangi mesang. Anungji Esther arameso, aser chuba madang noktak. 5Lai ashi, “Chubai mulungra, aser ni ne tsüngdang yimli ngura, aser chuba madang tim ta süra, aser ni pa nükdang saklokra, Agag nunger Hammedath jabaso Hamani atongtetba shititem koba pai chubar province ajak nung aliba Yihuda nunger samatsütsü zülu, aji melenshia züludakjangma. 6Kechiyong kü nübur madak tamajung arutsü aliba ni koda sür aremzüktettsü? Mesüra kü sosem samatsüba, ajia ni koda aremzüktettsü?” 7Idangji Ahasuerus chubai chubatsür Esther dang aser Yihuda nunger Mordekai dang ashi, “Ajiang, ni Esther nem Hamaner ki agütsüogo, aser pa süng nung soseta parnoki südaktsüogo, kechiaser pai Yihuda nunger madak teka ai. 8Nenoki ano Yihuda nunger indang nenoki mulungba ama züluang, chubar tenüng nung, aser chuba küri agi aji ajenang; kechiyong koba chuba tenüng nung zülua lir, aser chuba küri agi ajena lir, aji nisung shingaia meyipa magitettsü.”

9Iba mapang nung chubar tezülurtem, ita tasembuba, aji Sivan, anogo metsür asembuba nung jatep, aser Mordekai Yihuda nunger dang melaba ajak amaji, aser yimsüsüba governor aser province nung tongtipur, India nungi Ethiopia tashi, province noklang ka ser metsürtenet, province shia dangi pei pei zülu nung, aser nübur shia pei oshi nung, aser Yihuda nunger dangia parnok zülu nung, aser parnok oshi nung aji zülu. 10Aser pai Ahasuerus chuba tenüng nung zülu, aser aji chuba küri agi ajen, aser shitiji shiti abeneri kor nung mener, kor tekara chubar mapa nung amshia aliba, kor teshimtet nungi adokba nung mener yok; 11kechi nung chubai yimti shia aliba Yihuda nunger dangi parnok sasa külemi senteptsü, aser parnok pei taküm asoshi noktaktsü, aser parnok dak amtakba ajak raksatsütsü, tepsettsü, aser samadaktsütsü, oda province-a dena, aser parnok chirnur aser tetsürtem aser parnoki makzükba oset terakzükba ama agitsü mela. 12Ahasuerus chuba province ajak nung kenü anogo nung, teranabuba ita, aji Adar ita anogo terasembuba anogo nung aji inyaktsü shimtet. 13Tezüluba kaket ka, oda province shia nung ozüngji agütsütsü, ta kin ajak dang metetdaktsü, aser Yihuda nungeri iba anogo nungji parnok tsükchir dak mang ayangtsü renema alitsüla ta metetdaktsü. 14Anungji kor tekara, chubar mapa nung amshiba nung mener, obelenertem chuba ozüng agi ilunga aser kara-a ao, aser ozüngji Susa yimtiba nunga metetdaktsü.

15Chuba madang nungi Mordekai chuba sobutsü tanen aser temesüng sobur, aser kümpa sü tajung aser nakrema meremba sobutsü sobur ao; aser Susa yimti nung washiba aser pelatepa liasü. 16Yihuda nunger atema ibai tepela aser longsotepba liasü, oda pelatepba aser tetushi mapang ka liasü. 17Aser province shia, aser yimti shia, kolenisa chubar temelaba aser pa ozüng aru, Yihuda nunger pelaba aser tepelatepba, benjong yanglua liasü. Aser linük nung nisung jenti Yihuda nunger aküm, kechiaser Yihuda nunger tsübuba parnok madak liasü.

ESTHER 9

Yihuda Nungeri Parnok Tsükchir Tepsetba

1Tang ita teranabuba, koba Adar ita lir, iba ita terasemnü buba nung, kodang chuba temelaba aser ozüng inyaktsü anasa atong, Yihuda nunger tsükchirtemi parnok madak kibur akümtsü imlaba anogo nung; aji saka meyiper, oda parnok madak parnoki sempaba Yihuda nungeri ang kibur küma liasü. 2Yihuda nunger parnok sasa külemi parnok yimti nung Ahasuerus chuba province ajak nung, parnok dak amtaktsü bushirtem dak teka aitsü sentep, aser shingaia parnok anema menoktaktet; kechiyong nisung ajak madak tetsübuba liasü. 3Aser province nung tongtipur ajak, yimsüsür aser governor ajak, aser chubar mapa inyakertemi Yihuda nunger yari, kechiaser Mordekai tsübuba parnok madak liasü. 4Kechiyong chubar kidang Mordekai tulu liasü, aser pa nüngsang province ajak leni ao; kechiyong iba nisung Mordekai tuluba tuluba aküm. 5Yihuda nungeri parnok tsükchirtem nok agi, aser tetepsetba aser teraksatsüba agi akok, aser parnoki kechi sünü, parnok sempar dang yamaji inyak. 6Aser Susa yimtiba nung Yihuda nungeri nisung noklang pungu tepset aser samatsü. 7Aser Parshandatha, Dalfon, Aspatha, 8Poratha, Adalia, Ariadatha, 9Parmasta, Arisai, Aridai, Vaizatha. 10Hammedatha chir Haman jabaso ter, Yihuda nunger tsükchir parnoki tepset; saka temakzükba oset nung parnoki teka mai.

11Iba anogo nung Susa yimtiba nung tepseta alirtem yongsükji chuba dang metetdaktsü. 12Aser chubai Esther chubatsür dang ashi, “Yihuda nungeri Susa yimtiba nung nisung noklang pungu tepsetogo aser samatsüogo, aser Haman jabaso ter; ajangla province tanga nung parnok kechi inyak. Tang ne tasüngdangba kechi? Aji melatsü mesüra ne taginüba kechi? Aji inyaktsü.” 13Idangji Estheri ashi, “Chubai mulungra, Susa nung alir Yihuda nunger dang tanü ozüng ama asünga inyaktsü mela-angma, aser Hamaner jabaso ter süngdong nung metadakjangma.” 14Aser chubai yamaji inyaktsü mela, aser Susa nung ozüng ka agütsü, aser parnoki Hamaner jabaso ter meta. 15Susa nung aliba Yihuda nunger Adar ita anogo terpezü buba nung parnok külemi sentep aser Susa nung nisung noklang asem tepset; saka temakzükba oset nung parnoki teka mai.

16Yihuda nunger province tanga nung alirtem külemi sentep, aser parnok taküm asoshi noktak, aser parnok tsükchir nungi anisüngzük angu, aser parnok sempartem meyi neterpungu tepset; saka temakzükba oset nung parnoki teka mai. 17Ibai Adar ita anogo terasem buba nung inyak, aser terpezünü buba nung parnoki anisüngzük, aser aji benjong akaba aser pelatepba anogo ka yanglu. 18Saka Susa nung alir Yihuda nunger terasemnü buba aser terpezünü buba nung sentep, aser terpungunü buba nung anisüngzük, aser aji benjong akaba aser pelatepba anogo ka yanglu. 19Anungji Yihuda nunger shirnok yimtsüng nung lir, shirnok yimtsüki makadak alir. Adar ita anogo terpezübubaji tepelaba aser benjong aser anisüngzük anogo, aser katia katia sempet agütsütepba anogo yanglu.

ESTHER 10

Ahasuerus aser Mordekai Uluba Indang

1Ahasuerus chubai linük madak, aser tzüyimkhüm linüktem madak ali melen meshi. 2Pa ain aser tashi, aser Mordekai uluba indang tabensa züluba, koba nungsa chubai pa uludaktsü, itemji Media aser Persia chubatem putipuyang kaket nung zülua mali no? 3Kechiaser Yihuda nunger Mordekai Ahasuerus nübur den atongba liasü, aser Yihuda nunger rongnung pa tulu aser par chubai keta asen, kechiyong pai pei chuba ajungtsü bushi, aser pei kin ajak dang tesünep o jembi.