ANITET

ANITET

    Okila

Anitet kaket tetezü, "Küpa aoba" mesüra "Apusoba." Israel nunger otsü nung tongtibang tatalokba ka indang iba kaket nung angur: oda Israel nungertem Ijip alar tia nungi anitetba aser Ijip nungi pila-a tenangzükba limai aoba. Iba kaket nung tongtibang shilem pezü angur: 

(1) Ibri nungertem alar tia nungi salaba; 

(2) Parnok Sinai tenemi aoba; 

(3) Sinai tenem nung Tsüngremi pei nüburten nem ozüng tapu balala agütsüba; 

(4) Israel nunger atema tekülemdak süki renemtsü, putir mapa aser tekülemdak benshitsü ozüngtem. 

Tongtibangsa Tsüngremi pai nübur alar tia nungi aniteta tarutsü nung kin ka kümteta otettsü Tsüngrem sendong indang idaki angutsü. 

Pei nübur Ijip alar tia nungi anitettsü atema Tsüngremi Mosa shimtetba aser ano Mosa Ozüng Ter, tapu metsü nung alibaji kanga tongtibang lir. 

    Keta Alibatem  

Israel Nunger Ijip Alar Tia Nungi Anitetba   1:1-16:21 

(a) Ijip Nunger Lartem   1:1-22 

Ijip Nung Israel Nunger Rishikangshiba   1:1-22

(b) Mosa Asoba aser Pa Lanuwa    2:1-4:31

Mosa Asoba   2:1-10

Midian Limai Mosa Jena Aoba   2:11-25

Tsüngremi Mosa Ajaba   3:1-22

Tsüngremi Mosa Nem Sayatenya Tashi Agütsüba   4:1-31

(c) Mosa aser Aron Farao Tsüngdang    5:1-11:10

Mosa aser Aron Farao Dangi Aoba   5:1-21

Mosai KIBUBA Dang Rasaba   5:22-6:1

Tsüngremi Mosa Den Jembiba   6:2-13

Mosa aser Aron Kinungertem   6:14-27

KIBUBAi Mosa aser Aron Den Jembiba   6:28-7:13

Ijjp Nung Temerenshi Tenzükba: Azü Wara   7:14-25

Ijip Nunger Temerenshi: Allu Wara   8:1-15

Azüpong Wara   8:16-19

Manga Telok Wara   8:20-32

Kiset Shiruru Wara   9:1-7

Tepzünu Wara   9:8-12

Rürlung Tsükdaktsüba   9:13-35

Süngku Wara   10:1-25

Mezüng Asoba Ajak,Tepsetba   11:1-10

(d) Süia Aoba Benjong aser Ijip Nungi Pilaba    12:1-16:21

Süia Aoba (Lev. 23:3-8; Zün. 28:16-15; Taz. 16:1-8)   12:1-13

Piyazü Meinokba Am Benjong   12:14-20

Mezüng Suia Aoba   12:21-28

Mezüng Asoba Asüba   12:29-36

Israel Nungeri Ijip Toktsür Apusoba   12:37-42

Süia Aoba Benjong Ozüng   12:43-51

Mezüng Asoba Bendanga Agütsüba   13:1-2

Piyazü Meinokba Am Benjong   13:3-10

Mezüng Asoba   13:11-16

Mepet Tongshi Aser Mi Tongshi   13:17-21

Temerem Tzüyim Ajangba   14:1-31

Mosa Ken   15:1-18

Miriam Ken   15:19-21

Temerem Tzüyim Nungi Sinai Temen Tashi   15:22-18:27

Tzü Taku   15:22-17

Mana Aser Opiya   16:1-36

Lung Nung Tzü Adokba (Zün. 20:1-13)   17:1-7

Amalek Nunger Den Raraba   17:8-15

Yethroi Mosa Semdangba   18:1-27

Ozüng aser Tezüngzüktepbatem   19:1-24:18

Sinai Tenem Nung   19:1-25

Ozüng Ter (Taz.5:1-21)   20:1-17

Nüburtemi Tsübuba (Taz. 5:22-33)   20:18-21

Tenladak Sabang Atema Ozüng   20:22-26

Alartem Atema Ozüng (Taz. 15:12-18)   21:1-11

Azü Tokshiba Anema Ozüng   21:12-27

Shiruru Kibur Teyinaktsü   21:28-36

Temenok Agütsüba Indang   22:1-31

Ochi aser Taochi   23:1-9

Amungnü Ozüng   23:10-13

Benjong Asem (Ani. 34:18-26; Taz. 16:1-17)   23:14-19

Tsüngrem Tenyari Lenmang Renemtsüba   23:20-33

Tezüngzüktepba Akangshiba   24:1-11

Mosa Sinai Tenem Nung   24:12-18

Süki Tekülem Indang aser Tezüngzüktepba Indang Terasa   25:1-40:38

Tekülemdak Tenlaba (Ani. 35:4-9)   25:1-9

Tezüngzüktepba Süngden   25:10-22

Amtsük Tenla Asoshi Langbang   25:23-30

Milendong AtaIokdak (Ani. 37:17-24)   25:31-40

Tekülemdak Süki (Ani. 36:8-38)   26:1-37

Tenladak Sabang (Api. 38:1-7)   27:1-8

Tekülemdak Süki Kimalen (Ani. 38:9-20)   27:9-19

Milen aser Totzü (Lev. 24:1-4)   27:20-21

Putir Sobutsü (Ani 39:1-7)   28:1-14

Tekü Semoktsü (Ani. 39:8-21)   28:15-30

Putir Sobutsütem (Ani. 39:22-31)   28:31-43

Putirtem  Meshitetba (Lev. 8:1-36)   29:1-37

Anogoshia TenIa (Zün. 28:1-8)   29:38-46

Liangmesen Arongba Sabang (Ani. 37:25-28)   30:1-10

Talangzükba Sen   30:11-16

Yongmenyin Susa   30:17-21

Temezütsü Totzü   30:22-33

Liangmesen   30:34-38

Süki Yanglutsü Tetangshi Nisüngtem (Ani 35:30-36)   31:1-11

Amungnü   31:12-18

Hon Agi Muluba Nashi (Taz. 9:6-29)   32:1-35

Israel Purtem Sinai Tenem Nungi Apusoba   33:1-6

Tekülemdak Sentep Süki   33:7-11

Mosa aser KIBUBA Sentsüwangshi   33:12-23

Lungpak Tasen (Taz. 10:1-5)   34:1-9

Tezüngzüktepba Akangshiba (Ani. 23:14-19; Taz. 7:1-5, 16:1-17)   34:10-28

Mosa Tenem Nungi Aluba   34:29-35

Amungnü Ozüng   35:1-3

Temeshi Sabang Nung Tenlaba (Ani. 25:1-9)   35:4-9

Süki Asoshi Osettem (Ani. 39:42-43)   35:10-19

Nüburtemi Tenla Bener Aruba   35:20-29

Bezalel aser Oholiab (Ani. 31:1-11)   35:31-36:1

Nüburtemi Sempet Bener Aruba   36:2-7

Tekülemdak Süki (Ani. 26:1-37)   36:8-38

Tezüngzüktepba Ozüng Süngden (Ani. 25:10-22)   37:1-9

Amtsük Tenla Sabang (Ani. 25:23-30)   37:10-16

Milendong Atalokdak (Ani. 25:31-40)   37:17-24

Liangmesen Arongba Sabang (Ani. 30:1-5, 27-38)   37:25-29

Tarongba Tenla Sabang (Ani. 27:1-8)   38:1-7

Yongmenyin Susa (Ani. 30:18)   38:8

Sentep Süki Kimalen (Ani. 27:9-19)   38:9-20

Tekülemdak Amshiba Merang Osettem   38:21-31

Putir Sobutsütem (Ani. 28:1-14)   39:1-7

Tekü Semoktsü (Ani. 28:15-30)   39:8-21

Putir Sobutsü (Ani. 28:31,43)   39:22-31

Mapa Renemba (Ani. 35:10-19)   39:32-40:33

Sentep Süki Nung Mepet (Zün. 9:15-23)   40:34-38

ANITET 1

Ijip Nung Israel Nunger Rishikangshiba

1Israel chirtem Ijipi Yakob den arurtem parnok pei pei kibong itemi: 2Reuben, Simeon, Levi, Yihuda, 3Issakar, Zebulun, Benjamin, 4Dan, Naftali, Gad, aser Asher. 5Yakob dak jakzükba parnok ajak agi nisung neter. Saka Yosefbo Ijip nung liasü. 6Joko Yosef aser pa tedi nunger iba putu nisung ajak asü. 7Saka Israel chirtemji azükarua aser jenti rena tashi ita aküm aser parnok jagi alinükji asüng.

8Iba tensaji Ijip nung Yosef memetetba chuba tasen ka adok. 9Pai pei nüburtem dang ashi, “Reprangang, Israel purtem asenok dang nungi teimba aser tashi taitba kümogo. 10Tang parnok nütsüng renlokba anema asenoki lenmang kar bushitsüla. Kechiaser rara adokra parnoki asen tsükchir den dener asenok den raratsü; aser asen lima toktsür aotsü.”

11Anungji Ijip nungeri alartem tanüker tokja parnok rishikangshia mapa inyakdaktsü, aser parnoki Farao tsük rizüngdak Pithom aser Ramses yimtitem yanglu. 12Saka parnokji kodaka rishikangshi, patakaji züin, aser linük ajak asüng nung Ijip nungeri Israel nungerji tsübu. 13Anungji Ijip nungeri Israel chirtem dak taochi makai rishikangshitsü tenzük. 14Aser parnok taliba jenjang kanga saka kümdaktsü. Saka parnok dang maochi-i alu mapa tapu tapu inyakdakja, ajongli agi lungru yangludaktsü, aser parnok nem mapa tasak rishikangshia inyakdaktsü.

15Idangji Ijip chubai Ijiptsür nuso yarir Shifra aser Pua dang ashi, 16“Kodang nenoki Ibritsürtem nu amungdang yaridir, tanurji jabaso süra tepsetang, saka jala süra laji taküm lidakjang.” 17Saka nuso yarirtem jagi Tsüngrem tsübu nung Ijip chubai ashibaji manga, aser parnoki jabasotem metepset. 18Anungji nuso yarirtemji Ijip chubai jar asüngdang, “Kechiba nenoki yamai inyak aser jabasotemji taküm lidaktsü?”

19Nuso yarirtemi Farao dang langzü, “Ibritsürji Ijiptsür ama masü, parnok kanga tekümdang, aser jeretperar, onok metongjongi parnok sasa bentetadoker alir.” 20Yamaji nuso yarirtem dang Tsüngremi meima benshi, aser nisungtemji tali renloka tashi ita aküm. 21Nuso yarirtemi Tsüngrem tsübu nungji pai parnok kibongtem rendaktsü. 22 Idangji Faraoi nisung ajak nem ozüng ka yamai agütsü, “Ibri nunger jabaso ajak Nile ayong nung ajongokjang, saka jalatembo taküm lidakjang.”

ANITET 2

Mosa Asoba

1Iba mapang nungji Levi kidong nungi nisung kati Levitsür ka agi; 2Tetsürji mashisa aküm aser jabaso ka aso; aser lai pa jabaso tajung ka ta ngua, lai pa ita asem miima ayu. 3Aser kodang lai pa miimbangtsü makok ta ajitet, tzütok molok ka bena arua; temenateptsü aser süngtzü agi nübang; aser lai tanurji idakji ajungoker ayongküm rangbangnü nung yutsü. 4Tenu dakji kechi atalokdir ta teyi-i apiga nung noktaka ata-a liasü.

5Farao chubar jala ayong nung tzü chigutsü alu, aser lar kilitsürtem ayongküm nung senzüdang aoksa-a rangbangnü nung molokji lai angu, aser aji bena arutsü lai kilitsür ka yok. 6Aser lai aji lapok, aser tanurji angu; aser ajiang tanur jagi ajeb. Aser lai pa apayu, aser ashi “Ibai Ibri chir rongnung ka lir.”

7Idangji tanur teyi-i Farao jala dang asüngdang, “Na asoshi Ibritsür rongnungi nubentsür ka bushitsüdi ni?”

8Farao jalai langzü, “Hai Oang”. Anungji tetsürji oa tanurba tetsüji aja. 9Farao jalai ashi, “Iba tanur ya bener oa ni asoshi bentsüang aser ni ne nem taa agütsütsü.” Anungji lai tanurji bener oa bentsü. 10Kodang tanurji tain aküm, lai pa Farao jala dangi anir aru aser pa lar chir aküm. Lai pa tenüng Mosa ta aja kechiaser lai ashi, “Ni pa tzü nungi ajungtet.”

Midian Limai Mosa Jena Aoba

11  Mosa tain kümer kenü pei nübur rishikangshiba reprangdangtsü ao. Pei adianu Ibri nunger ka dang Ijip nunger kati zükya angu. 12Mosai pa meketa reprang, aser kodang pai nisung shinga mangu, pai Ijip nungbaji tepset aser lisem agi yabanga yutsü. 13Tasüngji pa arudang Ibri nunger ana raratepa angu, aser tai inyaksang dang pai ashi, “Kechiba nai ne medemer dak azüker?”

14Nisungba jagi langzü, “Shibai na onok madak yimsüsür aser obendanger ka kümdaktsü? Ijip nungba tepsetba amato nai nia tepsetnür asü?” Idangji Mosai tsübua pei sasa ashi, “Ni inyakba mapato nisungtemi metetogo.” 15Kodang chubai ya angashi, pai Mosa tepsettsü bushi, saka Mosa Midian limai jena oa idakji ali, aser pai tzübu ka anasa amen. 16Midian nung putir ka jala tenet liasü, parnoki tebu san telok nem tzü jemdaktsütsü asoshi tzüpong sünga tzü ata. 17Saka sannükertem kar arua parnok aridok; saka Mosai noktaka parnokji kümzük aser pai yaria san telok nem tzüji jemdaktsü. 18Kodang parnok tebu Ruel dangi meyipa aru, pai asüngdang, “Kodaser tanübo nenok yamai kara-a aru?”

19Parnoki langzü, “Sannükertem ket nungi Ijip nunger kati onok kümzük. Pai onok atema tzüa tatsü, aser santem nema tzü jemdaktsü.” 20Aser pai jalatem dang asüngdang, “Pa kong lir? Kechiba nenoki nisungbaji odang toktsü? Asenok den chiyungtsüsa pa jaang.”

21Mosai nisungba denji alitsü mulunga liasü, shibai pei jala Zippora Mosa nem kinungtsü asütsü agütsü. 22Lai pa nem jabaso ka sotsü, aser Mosai Pa tenüng Gershom ta aja, kechiaser pai ashi, “Bendang lima nung ni aenersa ali.”

23Küm ishika süir külen Ijip chubaji asü, saka Israel chirtem timtem tekangshi tali dang aküm, anungji parnoki teyari asoshi nünga ayimten. Parnok alar tia nungi tanüngba olaji Tsüngrem dangi atu. 24 Tsüngremi parnok olaji angashi, aser Abraham, Isak aser Yakob den pai tezüngzüktepba ayuba bilemtet. 25Pai Israel chirtem alar tia nung alibaji ngua parnok asoshi aria bilem.

ANITET 3

Tsüngremi Mosa Ajaba

1Tang Mosa toko Yethro Median putir meyong san nüka liasü. Pai san telokji lisem lima ajanga anir oa Tsüngrem tenem Horebi aru. 2 Aser süngsem tiyong nung milak ka nung Tsüngrem tenyar pa dangi adok; aser pai reprang, aser ajiang, süngsem nungji mi jangrua liasü. 3Anungji Mosai ashi, “Ya kanga tebangkatsü ka, kechiba süngsemji maronger ni anasa or aji reprangdi.”

4Kodang Mosa anasa arubaji Kibubai angu, süngsem tiyong nungi pai Mosa dang ja-a ashi, “Mosa! Mosa!” Aser pai langzü, “Ni yangi lir.”

5Tsüngremi ashi, “Yangi anasa taru, ne tsüngsem semzükang, kechiaser koba ali nung na noktaker aji temeshi lir. 6Ni ne tetsü-tebou Tsüngrem, Abraham, Isak aser Yakob Tsüngrem.” Idangji Mosai Tsüngrem dak rangloktsü tsübu nung pai pei tejak miim.

7Ano Kibubai ashi, “Ni atangji kü nüburtem Ijip lima nung ala-ashiba nguogo; parnok tanükertemi timtem agütsüba nungi kümzüktsü ajepba ola ni angashiogo. Parnok tia ajak ni meteta kar. 8Ijip nunger ket nungi parnok kümzüktsü, aser iba lima nungjagi aniteta alinük tajung aser tesadem ka mamatzü aser ninang mojitzü yima aliba lima; kong Kanan nunger, Het nunger, Amor nunger, Periz nunger, Hiv nunger, aser Yebus nunger lir, ajagi parnok anir aotsü ni alu. 9Tang Israel purtemi nünga ajepba ola ni angashiogo, aser Ijip nungeri parnok rishikangshiba ni nguogo. 10Anungji tang arung, kü nübur Ijip lima nungi anitettsü asoshi ni na Farao dangi yokdi.” 11Saka Mosai Tsüngrem dang ashi, “Farao dangi or Ijip nungi Israel chirtem anitettsüsa ni shiba?”

12Aser pai ashi, “Atangji ni ne den alitsü; aser ni na yok ta metettsü asoshi na atema temaitsü ya alitsü: kodang nai nüburtem Ijip lima nungi anir arudir, külemi nenoki iba tenem nung Tsüngrem tenzüktsü.”

13Mosai Tsüngrem dang ashi, “Kodang ni Israel nunger dangi oa ‘Nenok tsürabur Tsüngremi ni yok’ ta shidir, parnoki kü dang pa tenüng shiba ta asüngdangra, ni parnok dang kechi ashitsü?”

14Tsüngremi Mosa dang langzü, NIJI NI LIR, Israel chirtem dang nai yamai ashitsüla, “NI LIRi” nenok dangi ni yok.” 15Tsüngremi ano Mosa dang ashi, “Ya nai Israel chirtem dang shiang, Kibuba nenok tsürabur Tsüngrem, Abraham, Isak aser Yakob Tsüngremi nenok dangi ni yok: ya teti asoshi kü tenüng, aser aji oda putu ajak nung ni bilemtettsüba lir. 16Oang aser Israel tamburtem külemi sentepdaktsür parnok dang shiang, Ni Kibuba, parnok tsüraburtem Tsüngrem, Abraham, Isak aser Yakob Tsüngrem kü dangi adoka ashi, ni nenok dangi arua Ijip nungeri nenok dak inyakba ajak nguogo. 17Ni nenok Ijip nunger alar tia nungi aniteter, Kanan nunger, Hit nunger, Amor nunger, Periz nunger, Hiv nunger aser Yebus nunger lima kong mamatzü aser ninang mojitzü ayimer, iba lima jagi anir aotsü ni nangzükogo.

18“Nai ashiba ajak kü nüburtemi angatsü. Na aser Israel tamburtem Ijip chuba dangi or pa dang ashitsüla, ‘Kibuba, Ibri nunger Tsüngrem onok dangi jungkai adokogo. Tang onok ozü Kibuba Tsüngrem dang tenlatsü asoshi arem nung anogo asem lenmang odakjang ta mepishir.’ 19Tashi tait teka kati meinyakra Ijip chubai nenok modaktsütsü ta ni metet. 20Saka ni kü teka songtoka Ijip nunger dak kü sayatenya mapatem ajak agi azüktsü. Iba sülenji pai aonung nenok odaktsütsü.

21  “Ni Ijip nunger nem nenok meimdaktsütsüsa inyaktsü aser kodang nenok apusoa odir, nenok teka tazüng muodaktsütsü. 22Tetsür shiai pei kiyonger Ijiptsür dang aser Ijiptsür kar den semloka lira parnok nungi ki osettem süoshi, hon, taribi aser sentilung meshizüka bener aotsü.”

ANITET 4

Tsüngremi Mosa Nem Sayatenya Tashi Agütsüba

1Idangji Mosai Kibuba dang langzü, “Saka nüburtemi kü dak mamangi Kibuba ne dangi jungkai madok ta shira koda?” 2Kibubai pa dang asüngdang, “Ne ket nung alibaji kechi?” Pai langzü, “Mechi ka.”

3 Kibubai ashi, “Aji ali nung tsükdakjang.” Kodang Mosai aji ali nung tsükdaktsü, aji agi per ka aküm; aser pai iba tsüngdang nungi ajen. 4Idangji Kibubai Mosa dang ashi, “Ne teka songtoka iba teben nungji ametang.” Mosai pa teka songtoka per dakji amet aser aji agi mechi ka aküm. 5Kibubai ashi, “Israel nungertem dang nenok tsürabur Tsüngrem, Abraham, Isak aser Yakob Tsüngrem ne dangi jungkai adok ta parnoki amangtsü asoshi yamaji inyakang.”

6Ano Kibubai Mosa den tanaben jembi, “Ne teka süpok nung yuang.” Mosai yamaji inyak; aser kodang pai pei teka adok pa teka zütsüra agi rüjep ama temesüng aküm. 7Idangji Kibubai ashi, “Ano ne süpok nung ne teka yuang.” Pai yamaji inyak, aser kodang pa teka adok, akhi ama aji tanaben aneber liasü. 8Kibubai ashi, “Parnoki mezüngbuba sayatenya dakji mamangra, mesüra temulung magütsüra, parnoki tanabubajibosa amangtsü. 9Aser parnoki item sayatenya ana idakji mamangi nai ashibaji magizükra, idangji nai Nile ayong nungi tzü tateta ali nung shilokjang, aser tzü jagi azü akümtsü.”

10Saka Mosai Kibuba dang ashi, “Masü, Kibuba nibo teyokma. Kechiaser ni akhidang nungi aser nai ne tenzüker den jembir külena ni o nung tsüngro masong; aser ni o jembitsü temeli mekiki.”

11 Kibubai pa dang ashi, “Nisung bang shibai yanglu? Shibai nisung temeli tsükdaktsür aser tenarong jakdaktsür? Shibai parnok nem ngudaktsür mesüra tenük pokdaktsür? Aji ni Kibubai inyaker masü no? 12Anungji tang oang, aser o jembitsü asoshi ni yaritsü, aser nai kechi jembitsü aji ne dang sayutsü.”

13Saka Mosai langzü, “Masü Kibuba, yimlibilema tangar kar yokangma ta ni mepishir.” 14Idangji Mosa anema Kibuba ain adok, aser pai ashi, “Levi kidong nungi nedi Aron mali no? Pai junga jembiteter ta ni metet. Tang pa ne den ajuruteptsü arudar, aser kodang pai na ngudir pa mulung pela-a alitsü. 15Nai pa den jembitsü, aser otemji pa tebang nung enoktsütsü, aser ni nenaprong yaritsü aser nenoki kechi inyaktsü aji ni sayutsü. 16Aser nübur dang na asoshi pa o tongtar asütsü, aser pa na asoshi tebang ama aser na pa asoshi Tsüngrem ama alitsüsa adoktsü. 17Saka mechi ne teka nung amtsüla aser iba jagi nai sayatenya temaitsütem inyaktsüla.”

Mosa Ijipi Meyipa Aruba

18Idangji Mosai toko Yethro dangi shilang aser pa dang ashi, “Ijip lima nung kü adianutem ano taküm ali asü mali meyipa oa reprangdangtsü ni odakjang ta mepishir.” Yethroi Mosa dang ashi, “Junga oang.” 19Ano Mosa Midian lima nung alidang Kibubai pa dang ashi, “Ijipi meyipa oang, kechiaser na tepsettsü bushirtem to ajak süogo.” 20Anungji Mosai pei kinungtsü aser jabasotem gado nung mendaktsü, aser pa ket nung Tsüngrem mechiji amer Ijip limai ao.

21Ano Kibubai Mosa dang ashi, “Kodang na Ijip limai meyipa odir, ni ne nem tashi agütsüba ama, Ijip chuba Farao madang sayatenya temaitsü ajak sayuang. Saka nüburtem modaktsütsü asoshi ni pa temulung meranga kümdaktsütsü. 22Idangji nai Farao dang yamai ashitsüla, ‘Ni Kibubai ashir, Israel kü mezüng chir.’ 23Ni ne dang shiogo, Kü chiri ni tenzüktsü aser külemtsü asoshi odakjang; saka nai pa modaktsüra ni ne mezüng jabaso tepsettsü.”

24Parnok aodang lenmang nung tanendak Kibubai Mosa ajuru aser pa tepsettsü bushi. 25Idangji Mosa kinungtsü Zipporai lung techira ka bena arua pei jabaso teküp mejeptoktsü, aser Mosa tsüngdang tokja ashi, “Atangji ni atema azü agi kiyimsangji na lir.” 26Anungji Kibubai Mosa odang toktsü. Idangji mejeptoktsüba yong lai ashi, “Azü agi sosemba kiyimsang na lir.”

27 Kibubai Aron dang ashi, “Mosa den ajuruteptsü na lisem lima jagi oang.” Aser pai oa Tsüngrem tenem nung Mosa ajurua kanga pelatep. 28Aser Kibubai pa dang ashiba o ajak, aser pa sayatenya temaitsü kechisa inyaktsü Kibubai mela, item ajakji pai Aron dang ashi.

29Idangji Mosa o Aron na oa Israel tambur ajak külemi sentepdaktsü. 30Aser Kibubai Mosa dang ashiba o ajak Aroni parnok dang ashi. Ano Mosai parnok tsüngdang temaitsütemji inyaka sayu. 31Aser nüburtemi amang, aser kodang parnok Kibubai semdangogo aser parnok rishikangshi tia nguogo ta angashi, idangji parnoki apudaker külem.

ANITET 5

Mosa Aser Aron Farao Dangi Aoba

1Iba sülen Mosa aser Aron Farao dangi oa ashi, “Yamai Israel Tsüngrem Kibubai ashir, ‘Lisem limalen oagi parnoki ni asoshi benjong ka akatsü kü nüburtem odakjang.’ ” 2Saka Faraoi asüngdang, “Kibubaji shiba? Kechiba ni pa dang angatsü aser Israel pur yoktsü? Ni Kibubaji memetet, aser ni Israel pur meyoktsü.”

3Tenati langzü, “Ibri nunger Tsüngrem onok dangi jungkai adokogo. Kibuba ozü Tsüngrem dang tenlatsüsa asemnü lenmang aotsü onok dang mela-angma. Onoki yamaji meinyakra pai tashitak agi mesüra nok agi asenok merenshitsü.”

4Faraoi Mosa aser Aron dang ashi, “Kechiba nenoki nüburtem parnok mapa nungi anizüker onür? Nenok pei mapai oang! 5Reprangang, nenok nüburtem jenti renogo aser nenoki parnok pei mapa nungi anendaktsünür.”

6Panüjisa Faraoi alar madak tanishir aser mapa lemsatsürtem dang mela-a ashi, 7“Akhidang ama lungru yanglutsü atema nenoki parnok nem monü tagütsü, saka parnok sasa oa monü bendendakjang. 8Saka akhidang parnoki lungru kwika yanglu, paikaji yanglutsü nenoki parnok dang akangtsüla iba nungi ajema mekümdaktsütsüla. Parnok azümesen; ajagi ‘Ozü Tsüngrem dang tenlatsü onok odakjang’ ta parnoki ayimtener. 9Nüburtem nem mapa tasakba agüjang, aser mazüngi inyakdakjang, idangjibo parnoki tiyazü jembiba o angatsü mapang mangutsü.”

10Aser alar madak tanüker aser parnok mapa lemsatsürtem oa nisungtem dang jembia ashi, “Yamai Faraoi ashir, Ni nenok nem monü magütsütsü. 11Nenok sasa oa, kong nenoki monü ngudir bendenang, kechiaser nenok mapa kecha majemdaktsütsü.” 12Anungji nisungtemi Ijip lima ajaklen monü melena modong abentsü Ijip lima ajaki prokshi ao. 13Aser alar madak tanishirtemi akhidang monü agütsür yangluba nungi ajema meyanglutsüla ta rongshia ozüng agütsü. 14Alar madak tanishirtemi parnok kübok ayuba Israel nunger madak mapa ketdangpurtem dak züka asüngdang, “Akhidang lungru yangluba ama kechiba nenoki yashi aser tanüa mapa merenem?”

15Idangji Israel nunger mapa ketdangpurtem Farao dangi arua ashi, “Kechiba ne kilirtem dang nai yamai maochi-i benshir? 16Ne kilirtem nem monü magütsü, saka akhi ama dang lungru yanglutsü ozüngbo agütsür! Ne kilirtem dak azüker, ya ne nübur tai lir.”

17Saka Faraoi langzü, “Nenok azümesen aser mapa meinyaknür, iba yongji nenoki ashir, ‘Kibuba dang tenlatsü onok odakjang.’ 18Tang nenok mapai oang! Nenok nem joko monü magütsütsü, aji saka nenoki akhi ama lungru tatakzük abensa-a yanglutsüla.” 19Monü magütsüi lungru akhidang yangluba ama yanglutsüla ta ashiba jagi Israel nunger mapa ketdangsürtemji lendong nung lir ta metet.

20Parnok Farao madang nungi adokdang Mosa aser Aron parnok ata-a lia ajurutep. 21Aser parnoki tena dang ashi, “Nenati Farao aser pa tenzükertem, parnok teka nung onok amokja onok tepsettsü sempadaktsü nung, Kibubai nena repranga o bendangangma.”

Mosai Kibuba Dang Rasaba

22Idangji Mosai Kibuba dangi meyip aser ashi, “Kibuba! Kechiba nai ne nübur dang yamai mejungi benshir? Kechiba nai ni yagi yok? 23Kechiyong ni Farao dangi ne tenüng nung arua jembir külen nungi pai iba nübur dang mejungi benshir. Aser nai ne nübur khenyongi mekümzüker.”

ANITET 6

1 Kibubai Mosa dang ashi, “Tang ni Farao dang kechi inyaktsü ali aji nai angutsü. Kechiaser kü tashi tait teka agiang pai kü nüburtem yoktsü. Hau, tashi-tait teka agi pai pei linük nungi parnok aridoktsü.”

Tsüngremi Mosa Den Jembiba

2  Ano Tsüngremi Mosa dang ashi, “Ni Kibubaji lir. 3Ni Abraham, Isak aser Yakob dangi Ajak Takoksang Tsüngrem ama jungkai adok, saka parnok dang kü temeshi tenüng KIBUBA ta mejadaktsüi liasü. 4Kanan lima kong parnok aener ama liasü, aji parnok nem agütsütsü ni parnok den kü tezüngzüktepba yangluogo. 5Iba dak alia Ijip nungeri alar tia nung ayuba Israel chirtemi anüngba ola ni angashiogo, aser ni kü tezüngzüktepba bilemtetogo.

6“Anungji Israel chirtem dang shiang, ‘Ni Kibuba lir; ni nenok Ijip nunger alar tia nungi anitettsü, aser parnok lar akümba tia nungi ni nenok kümzüktsü. Ni kü teka songtoka aser obendangba tulu agi nenok alangzüktsü. 7Nenok kü nübur asütsü aser ni nenok Tsüngrem asütsü. Aser kodang ni nenok Ijip alar tia nungi anitetdir idangji nenoki ni Kibuba, nenok Tsüngrem ta metettsü. 8Abraham, Isak aser Yakob nem koba alinük agütsütsü asoshi ne teka mekanga azüngashiogo, aji agi ni nenok anir arutsü, aser aji nenok senmang asütsü asoshi ni agütsütsü. Ni Kibuba lir.’ ”

9Mosai item o ajakji Israel nungertem dang ashi, saka parnok temulung zürep aser ala-ashi ulura nungji parnoki pa dang manga.

10Idangji Kibubai Mosa dang ashi, 11“Farao dangi oang, aser pai Israel nungertem par lima nungi odakjang ta shiang.” 12Saka Mosai langzü, “Israel nungertemia kü dang manga nung, ni ama temeli mekikir ka dang Faraoi koda angatsü?” 13Idangji Kibubai Mosa aser Aron dang ashi, “Israel nungertemji Ijip lima nungi anitettsü ni melaogo ta Israel nungertem aser Ijip chuba Farao dang shiang.”

Mosa Aser Aron Kinungertem

14Item ya parnok kibongtem tongtipur lir: Yakob mezüng asoba jabaso Reuben chirtem: Hannok, Dallu, Hezron aser Karmi. Ya Reuben kinungertem. 15Simeon chirtem, Yemuel, Yamin, Chad, Yakin, Zohar aser Kanantsüri asoba Shaul, aji Simeon kinungertem. 16 Levi chirtem parnok putu balala shia nung tenüng itemi: Gershon, Kohat, aser Merari. Levi arishi küm noklang ka ser semer tenet liasü. 17Gershon chirtem: Labni aser Shimei, aji parnok kidongren. 18Kohat chirtem: Amram, Izhar, Gebron aser Uzziel. Kohat arishi küm noklang ka ser semer asem liasü. 19Merari chirtem: Mahli aser Mushi. Itemji Levi kidong dak jakzükba kidongtem lir.

20Amrami pa kinungtsü asütsü pa tebu tenu Yokebed agi aser lai pa nem Aron aser Mosa sotsü. Amram arishi küm noklang ka ser semer tenet liasü. 21Izher chirtem: Kora, Nefeg aser Zikni. 22Uzziel chirtem: Mesheal, Elzafan aser Sithri.

23Aroni pei Aminadab jala Nashon tenu Elisheba kinungtsü asütsü asoshi agi, aser lai pa nem Nadab, Abihu, Eleazer aser Ithamar sotsü. 24Kora chirtem: Assir, Elkana aser Abiasaf. Parnokji Kora nungi jakzükba kidongtem lir. 25Aroner chir Eleazari Putiel jalatem nungi kinungtsü ka agi, aser lai pa nem Finehas sotsü. Item ya Levi kidongtem nungi tongtipurtem lir.

26Ano Aron aser Mosa dang Kibubai ashi, “Israel nungertem Ijip lima nungi anir oadokang.” 27Aser parnoki Ijip chuba Farao dang Israel chirtem alar tia nungi anir odakjang ta Mosa o Aron nati ashi.

Kibubai Mosa aser Aron Den Jembiba

28Kodang Kibubai Mosa den Ijip lima nung jembi, 29pai ashi, “Ni Kibuba lir, ni ne dang ashiba ajak nai Ijip chuba Farao dang ashitsüla.” 30Saka Mosai Kibuba dang langzü, “Ni o jembi mashi nung Faraoi kodaser kü dang angatsü?”

ANITET 7

1Idangji Kibubai Mosa dang ashi, “Ni na Farao madang Tsüngrem ama aser nedi Aron na asoshi ainkar asütsü. 2Ni ne dang melaba ajak nai jembitsü, aser nedi Aroni Israel nungertem par linük nungi odaktsütsü asoshi Farao den jembitsü. 3 Aser ni sayatenya aser temaitsütem jenti Ijip lima nung züindaktsütsü asoshi Farao temulung meranga kümdaktsütsü, 4pai ne dang mangatsü. Idangji ni kü teka mekanga obendangba tulu agi ni Ijip dak kongshitsü, aser ni kü nüburtem anitettsü. 5Kodang Ijip anema kü teka mekangdir, aser Israel nungertem Ijip lima nungi anitetdir idangji parnoki ni Kibuba ta metettsü. 6Yamaji Kibubai melaba ama Mosa o Aron nati inyak. 7Parnoki Farao den jembidang Mosa arishi küm tir, aser Aron arishi küm tir asem liasü.”

Aron Mechi

8 Kibubai Mosa o Aron na dang ashi, 9“Sayatenya ka ajanga nai kuli sang ta Faraoi ne dang shira, Aron dang shiang, ne mechiji Farao jakdang tsükdakjang, aser aji agi per ka akümtsü.” 10Anungji Mosa o Aron nati Farao dangi oa Kibubai ashiba ama inyak. Aroni Farao aser pa yimsüsürtem jakdang pa mechiji tsükdaktsü; aser aji agi per ka aküm. 11Idangji Faraoi Ijip tashi temeteter, temezünger aser ain sayurtem aja, aser parnokia pei miim tashi agi yamaji inyaktet. 12Parnokia pei mechi tsükdaktsü, aser aji agi per aküm. Saka Aron mechi jagi itemji meyokadok. 13Aji saka Farao mulung meranga aküm, oda Kibubai Mosa o Aron na dang ashiba ama pai tena danga manga.

Ijip Nung Temerenshi Tenzükba: Azü Wara

14 Kibubai Mosa dang ashi, “Farao temulung meranga lir, aser pai nüburtem odaktsütsü memulunger. 15Anungji anepdang Farao ayongi aodang pa den ajurutepang. Ne mechi koba agi per aküm, aji amer Nile ayongküm nung pa ata-a liang. 16Aser nai pa dang shiang, Kibuba, Ibri nunger Tsüngremi ne dang o ya ashitsü ni yok. Lisem lima lenji oagi parnoki ni külemtsü asoshi parnok yokang. Saka tang tonga nai mangar. 17Yamai Kibubai ashir: Iba yagi nai ni Kibuba ta metettsü. Reprangang kü ket nung aliba mechi yagi Nile ayong dak azüktsü, aser tzüji azü akümtsü. 18Ayong nung aliba ango asütsü aser tzü nungji teshinem menemtsü; aser Ijip nungeri ayong nungi tzü nungji tateta ajemtsü makoktsü.”

19Aser Kibubai Mosa dang ashi, “Aron dang shiang, ne mechi am-ang aser azü kümdaktsütsü atema ne teka Ijip tzü, ayongtem manung aser item tzümesü aser tzütu manung ne teka songtokang, aser Ijip lima ajak nung, süng aser lung susa nung azü alitsü.”

20 Kibubai melaba amaji Mosa o Aron nati inyak. Farao aser pa tenzükertem jakdang Aroni pa mechi mekang aser Nile ayong dak azük, aser tzüji azü aküm. 21Nile ayong nung aliba tzüji mejemtet. Aser Ijip lima ajak nung azü liasü.

22Saka Ijip nunger temezüngertemia parnok miim ain ajanga kasaji inyak, anungji Farao mulung meranga aküm; aser Kibubai ashiba ama pai Mosa o Aron na dang manga. 23Faraoi pei kidangi meyipa ao aser iba indang kecha süoki ia mebilem. 24Aser Ijip nungeri Nile ayongji meketa tajemtsü tzü bushia ali atu, kechiaser parnoki ayong tzüji mejemtet. 25Kibubai Nile ayong dak züker anogo tenet abensa.

ANITET 8

Ijip Nunger Temerenshi: Allu Wara

1Idangji Kibubai Mosa dang ashi, “Farao dangi oa Kibubai yamai ashir ta shiang, ‘Ni külemtsü asoshi kü nüburtem yokangma. 2Saka nai parnok modaktsüra, ni ner lima ajak allu wara agi tongdaktsütsü. 3Aser Nile ayongji allu agi asüngtsü. Parnok ner kidangi atutsü aser ne yipten taktangi aittsü, aser ner yipten manung aser ne yimsüsürtem kidangi aser ne nübur madak, ne am awangba su nung, aser susa telungi aittsü. 4Allutem jagi na, ne nübur aser ne yimsüsürtem madaki aya-a atutsü.’ ”

5Idangji Kibubai Mosa dang ashi, “Aron dang shiang, Ayongtem, tzümesütem, tzütutem madak mechiji amer ne teka songtokang, aser Ijip lima ajaklen allu adokdakjang.” 6Anungji Aroni Ijip tzü ajak madak pei teka songtok, aser Ijip lima ajak allu agi asüng. 7Saka temezüngertemia parnok miim tashi amshia Ijip nung allu adokdaktsü.

8Idangji Faraoi Mosa o Aron na aja aser ashi, “Ni aser ozü nübur nungi allu samadaktsütsü atema Kibuba dang mepishiang, aser ni nenok Kibuba dang tenlatsü odaktsüdi.”

9Aser Mosai Farao dang ashi, “Nai yimlibilema shiangma: na aser ne kidang nungi allu samadaktsür ayong nungji dang liang ta ni na, ne yimsüsür, aser ne nübur asoshi kodang mepishitsütsü?”

10Faraoi ashi, “Asüng ni asoshi mepishijang.” Mosai ashi, “Nai ashiba ama ni inyaktsü, idangji Kibuba ozü Tsüngrem dak alema tangar tsüngrem shinga mali ta nai metettsü. 11Nile ayong nung aliba dak alaka na, ne yimsüsürtem aser nüburtem nungi allu samatsü.” 12Anungji Mosa o Aron na Farao nungi pilar külen Mosai Kibuba dang Farao aser par nüburtem anema adokdaktsüba allutemji samatsü atema mepishitsü. 13Aser Mosai mepishiba ama Kibubai inyak, kidang, kimalen aser alu nung aliba allutem ajak asü. 14Anungji Ijip nungeri itemji telong telong küma benden aser linük ajaklen teshinem menem. 15Kodang allu asüba ajanga Farao anisüngzük angu, pa ano tanaben temulung meranga aküm, aser Kibubai ashiba amato pai Mosa o Aron na dang manga.

Azüpong Wara

16Anungji Kibubai Mosa dang ashi, “Aron dang shiang, Ijip lima ajak nung azüpong poktetdaktsütsü ne mechi mekangang, aser ali nung auyi dakji zükang.” 17Aroni ali auyi dakji pa mechi jagi azük aser Ijip lima ajak nung auyi jagi azüpong kümer nisung aser shiruru ajak daki atu. 18Aser temezüngertemia pei miim tashi ajanga azüpong adokdaktsütsü merang, saka parnoki tamakok angu. Anungji nisung aser shirurutem madak azüpongji liasü. 19Idangji temezüngertemi Farao dang ashi, “Ibai Tsüngremi inyakba mapa lir” Saka Farao temulung meranga aküm, aser Kibubai ashiba ama pai Mosa o Aron na dang manga.

Manga Telok Wara

20Idangji Kibubai Mosa dang ashi, “Anepdang yakta saker Farao ayongi aruba ata-a liang aser pa dang shiang, ‘Kibubai yamai ashir, kü nüburtemi ni külemtsü yokang. 21Nai kü nüburtem meyokra ni ne dangi, ne yimsüsürtem, ne nüburtem aser ner kidangi manga telok yoktsü. Manga jagi Ijip nunger ki aser parnok alidak moapu ajak asüngtsü. 22Saka alima nung niji Kibuba ta metettsü atema panüji kü nübur alidak Goshen lima ni balaka sadanga ayutsü aser yangji manga melidaktsütsü. 23Yamaji kü nübur o ne nübur na tsüngda nung ni telemsa ayutsü aser asüng iba sayatenya mapaji ataloktsü.’ 24Aser Kibubai yamaji inyak aser manga telok tulu Farao kidangi aser pa yimsüsür kidangi yok. Yamaji Ijip lima ajak manga telok jagi raksatsü.

25Idangji Faraoi Mosa o Aron na jar ashi, “Nenoki oang saka iba li nung dang nenok Tsüngrem dang tenla-ang.”

26Saka Mosai langzü, “Yamaji inyaktsü tim masü. Onoki Kibuba ozü Tsüngrem dang tenlatsü alibaji Ijip nunger nükdang tesempatsü lir. Parnok tsüngdang kechi tesempatsü lir ibaji onoki tenla agütsübaji ngura, parnoki onok dak lung agi maontsü no? 27Onoki lisem lima jagi anogo asemnü lenmang aotsüla, aser idakji Kibuba ozü Tsüngrem dang tenlatsüla.”

28Anungji Faraoi ashi, “Kibuba nenok Tsüngrem dang tenlatsü ni nenok odaktsütsü, saka nenoki talangka maotsüla. Tang ni asoshi mepishijangma.”

29Mosai langzü, “Ni na nungi pila-a alidang manga teloktemji na, ne yimsüsürtem aser nüburtem nungi asüng odaktsütsü asoshi ni mepishitsütsü. Saka Kibuba dang tenlatsü asoshi nüburtem tanaben modaktsüli ta Faraoi külaka tebenshima.”

30Idangji Mosai Farao tsüngdang nungi pila-a oa Kibuba dang mepishi 31aser Mosai mepishiba amaji Kibubai inyak. Farao, pa yimsüsürtem aser nüburtem nungi manga ajak oadok. 32Saka ano Farao mulung meranga aküm aser pai nüburtemji meyok.

ANITET 9

Kiset Shiruru Wara

1Idangji Kibubai Mosa dang ashi, “Farao dangi oang aser pa dang shiang, Kibuba Ibri nunger Tsüngremi ashir, ‘Kü nüburtem ni külemtsü asoshi odakjang. 2Nai parnok meyoki anosa sota yura, 3ni tetsübutsü tashitak wara ka, moapu nung aliba ne kiset shirurutem, kor, gado, ut, nashi, san aser nabong madaki wara yoka na merenshitsü. 4Saka Kibubai Israel nunger kiset shiruru aser Ijip nunger kiset shiruru na tsüngda sadangtsü, aser Israel nunger kiset shirurubo kata masütsü.’ ” 5Aser Kibubai mapang ka atakteta ashi, “Asüng linük nung Kibubai ya inyaktsü.”

6Asüngji Kibubai aji inyak. Ijip nunger kiset shiruru ajak asü, saka Israel nunger kiset shirurubo ka danga masü. 7Aser Faraoi nisung kar yoka Israel nungertem kiset shirurutem reprangdaktsü aser parnok meyong ka danga mesüi liasü, saka Farao mulung matsüshi-i liasü aser pai Israel nungerji meyok.

Tepzünu Wara

8Idangji Kibubai Mosa o Aron na dang ashi, “Mimung nungi aut tekapu ka sünga bena arung; Mosai aji Farao tsüngdang anünglen paketjang. 9Item auyi tanük jagi Ijip lima ajak asüngtsü aser aji agi tesem ajaklen nisung aser shiruru ajak dak tepzünu kümer adoktsü.” 10 Anungji parnoki mimung nungi autji agitet aser Farao tsüngdang noktak; aser Mosai aji anünglen pakettsü aser aji agi nisung aser shiruru ajak dak tepzünu komo aküm. 11Aser tepzüno komo adokba agi temezüngertemi Mosa jakdang menoktaktet, kechiaser parnok aser Ijip nunger ajak dak tepzünuji adoka liasü. 12Aser Mosa den jembiba amato, Kibubai Farao mulung meranga kümdaktsü, aser pai parnok dang manga.

Rürlung Tsükdaktsüba

13Idangji Kibubai Mosa dang ashi, “Anepdang yakta shishiang aser Farao den ajurutepa pa dang shiang, Kibuba Ibri nunger Tsüngremi yamai ashir: ‘Kü dang külemtsü asoshi kü nübur yokang. 14Kechiaser tangbo alijak ajak nung ni ama shinga mali ta nai metettsü atema kü temerenshi ajak ne dangi, ne yimsüsürtem aser ne nübur ajak dangi ni yoktsü. 15Ni ne dak kongshitsüsa kü teka mekang asübo aser ne nüburtem madak tashitak wara agi kü teka mekang asübo tangibo nenok meshi meshia samatsür lila. 16Saka ne dang kü tashi sayutsü aser kü tenüng alima ajaklen sangoktsütsü asoshi ni na taküm kümzüka yutsüogo. 17Tang tashi kü nüburtem anema tekong meranger aser kü nübur meyoker. 18Anungji asüng iba kasa mapang nung ni rürlung kanga tesashi tsükdaktsütsü, koba Ijip akümba anogo nungi tanü tashi kodanga matalokdang. 19Anungji tang ne kiset shiruru telok aser moapu nung aliba ajak anitentsü yokang; kechiaser moapu nung aliba nisung aser shiruru shia, kidangi anir marui alibatem madak rürlung kanga sashia ni tsükdaktsütsü.’ ”

20Farao yimsüsürtem shirnoki Kibubai ashiba oji tsübua liasü, parnoki pei alartem aser kiset shirurutem kidangi aniok. 21Saka shirnokisa Kibuba o manga, pai pei alartem aser kiset shirurutem moapu nung dang toktsü.

22Idangji Kibubai Mosa dang ashi, “Ijip lima ajak nung nisung aser shiruru madak aser Ijip lima ajaklen süngo-lio ajak madak rürlung tsükdaktsütsü asoshi ne teka anünglen mekangang. 23Aser Mosai pa teka anünglen mekang aser Kibubai tsüngmok aser rürlung yok aser ali madak tsüngi ayi. Aser Kibubai Ijip lima ajaklen rürlung tsükdaktsü. 24 Oda Ijip kin ka kümer parnok dak kodanga matalokdangba tsüngpret pereta, tsüngmok moka rürlung tulu tsük. 25Aser Ijip lima ajaklen moapu nung aliba nisung aser shiruru ajak dak rürlung jagi aon. Süngdong aser süngo-lio ajak iba jagi raksatsü. 26Saka Israel nungertem alidak Goshen linük dang rürlungji metsük.”

27Idangji Faraoi Mosa o Aron na jar ashi, “Tanbo ni temenen menaogo, Kibubaji shitak lir, atangji aser kü nüburtemi tai menaogo. 28Kibuba dang mepishijang, kechiaser tsüngmok amokba aser rürlung tsükba yagi periogo! Ni nenok yokadokdi; nenok idaki talangka ata-a telima.”

29Mosai langzü, “Ni yimti nungi tuguli kü teka mekanga Kibuba dang mepishitsüra tsüngmokji anenadoktsü aser rürlung joko malitsü, aser alimaji Kibuba meyong ta nai metettsü. 30Aji saka, ni metet, na aser ne yimsüsürtemi Kibuba ano metsübur.”

31Tang kümpa aser barley tsük rürlung agi raksatsü, kechiaser barley tsükpok aser kümpa temechi adoka liasü. 32Saka wheat tsük aser spelt tsükbo meraksatsü, kechiaser itemjibo ano madoki liasü.

33Mosai Farao nungi pila aser yimti nungi adoka pei teka mekanga Kibuba dang mepishi, aser tsüngmok amokba, rürlung tsükba tzünglu aruba ajak anen. 34Saka kodang tzünglu, rürlung aser tsüngmok anenbaji Faraoi angu, pai tanaben temenen mena. Idangji pa aser pa yimsüsürtem temulung meranga aküm. 35Aser Mosa ajanga Kibubai jembiba amato Farao temulung meranga aküm aser pai Israel nungertem meyok.

ANITET 10

Süngku Wara

1Idangji Kibubai Mosa dang ashi, “Farao dangi oang, kechiaser parnok rongnung kü sayatenya temaitsütem sayutsü asoshi pa aser pa yimsüsürtem temulung ni merangdaktsüogo. 2Ano ni Ijip nunger den sashia inyakba aser koba temaitsütemsa parnok rongnung inyak, item indang nenok chirtem aser semchirtem dang ashitsü aser nenok ajaki ni Kibuba ta metettsü asoshi lir.”

3Anungji Mosa o Aron na Farao dangi oa ashi, “Kibuba, Ibri nunger Tsüngremi ashir, ‘Kü madang mapang kopiga nai mazüzüki alitsü? Kü dang külemtsü asoshi kü nüburtem odakjang. 4Nai parnok modaktsüra, ni asüng ner limai süngko arudaktsütsü. 5Parnok onsara nung majitettsüsa metembangtsü. Rürlungi aliji meraksatsübatem aser moapu nung meiba süngdonglidong ajak item jagi chimatsü. 6Ner ki, yimsüsürtem ki aser ne nüburtem ki ajak item jagi asüngtsü. Nebu mesüra nebou nunger iba lima nung lir tanü tashi yamaji kodanga mungudang.’ ” Iba sülen Mosai Farao nungi pila.

7Farao yimsüsürtemi pa dang ashi, “Iba nisung yagi kopiga asenok nem timtem agütsütsü? Kibuba parnok Tsüngrem dang külemtsü asoshi Israel nungertemji odakjang. Ijip raksatsüogo ta nai ano mebilemteter no?”

8Anungji Mosa o Aron na Farao dangi anir arua pai parnok dang ashi, “Kibuba, nenok Tsüngrem külemtsü nenok oang, saka shirnoksa aotsü?”

9Mosai langzü, “Onok den tanurtain ajak aotsü. Onok jala-jabasotem, onok san, nabong aser nashi telok ajak; kechiaser Kibuba dang onoki benjong ka akatsüla.”

10Faraoi parnok dang ashi, “Ni nenok tetsür tanur ajak odaktsütetra Kibuba nenok den liangma, saka nenok tebilembaji tajungbo masü. 11Yamaji masü! Nenok teburtem oang aser Kibubaji külemang kechiaser aji nenok taginüba lir.” Yamaji shia Mosa o Aron na Farao tsüngdang nungi aridok.

12Idangji Kibubai Mosa dang ashi, “Ijip limai süngku arua alinük nung aliba süngo-lio ajak aser rürlung agi meraksai anünga toktsübaji achitsü asoshi Ijip madak ne teka mekangang.” 13Anungji Mosai pei mechi Ijip lima madak mekang, aser panü aser paonungji süngku Kibubai anüdoklen mopung ka pai alinük madak sashia ondaktsü. Anepdang akümdang mopung jagi süngko oner arua liasü. 14 Aser süngko jagi Ijip lima ajak metembang, kechiaser parnok telok tulu liasü. Yamaji akhidang kodanga maru, mesüra yasür-a marutsü. 15Parnoki alimaji naknaka maküm tashi metembang. Linük nung süngo-lio ajak rürlung agi meraksai anünga toktsüba süngdong aser süngjanglijang ajak parnoki chima. Ijip lima ajaklen süngdong nung süngo-lio mesüra süngjanglijang kecha anünga meyutsü.

16Idangji Faraoi ilungseta Mosa o Aron na jar ashi, “Kibuba nenok Tsüngrem aser nenok anema ni temenen menaogo. 17Anungji tang kü temenen tokang ta ni nenok dang mepishir aser iba tasütsüsa merenshiba timtem ya kü dang nungi agientsü Kibuba nenok Tsüngrem dang mepishijang.” 18Aser pai Farao nungi adoka Kibuba dang mepishi.

19Mosai Farao nungi pila aser Kibubai anüdoklen mopungji anüolen mopung tesashi ka agi meyipdakja süngkuji Temerem Tzüyim nung aridoktsü. Aser alima ajak nung joko süngku ka danga maliasü. 20Saka Kibubai Farao mulung merangdaktsü aser pai Israel nunger modaktsü.

Ijip Madaki Tammang Aruba

21Idangji Kibubai Mosa dang ashi, “Ijip lima madaki nüburtemi metettsüsa tammang tulu ka arua nembangtsü asoshi ne teka mekangang.” 22 Mosai anünglen pa teka mekang aser anogo asemnü Ijip lima ajak nung ammang tulu liasü. 23Aser Ijip nunger parnok kati ka mungutepi aküm aser anogo asem shinga pei ki toktsür motet. Saka Israel nunger alidakbo ajaklen tesangwa liasü.

24Idangji Faraoi Mosa jar ashi, “Ne den tetsür tanur ajak anir oa Kibuba külemang. Saka nenok san, nabong aser nashi telok dang idaki anünga tokjang.”

25Saka Mosai langzü, “Kibuba, ozü Tsüngrem dang tenlatsü aser tarongba tenla agütsütsü asoshi nai onok nem shirurutem agütsütsüla. 26Onok kiset shirurutem onok den ajak aotsüla, parnok ka danga anünga metoktsütsüla. Kibuba, ozü Tsüngrem dang tenlatsü asoshi onoki shiruruji shimtettsüla. Aser koba shiruru agi pa dang tenlatsü, iba tesemji matong tashi onoki kecha metettsü makok.”

27 Kibubai Farao temulung merangdaktsü aser pai parnok odaktsütsü memulung. 28Idangji Faraoi Mosa dang ain adoka ashi, “Kü dang nungi oadokang! Na kümdangang kü dang ne jak yasürbo tengudaktsü, kechiaser nai küjak anguba anogo nungjisa na asütsü!” 29Mosai langzü, “Nai ashiba amaji sang! Joko nia ne jak kodanga mangutsü.”

ANITET 11

Mezüng Asoba Ajak Tepsetba

1Idangji Kibubai Mosa dang ashi, “Farao aser Ijip madaki ni ano temerenshi ka arudaktsütsü. Iba sülenjibo pai nenok odaktsütsü, aser pai kodang aji inyakdir, pai nenok ajak khenyongi aridoktsü. 2Tang Israel nungertem dang shiang aser tetsür-tebur ajaki pei kiyonger dang hon, aser taribi meshitendakjang.” 3Ijip nunger tsüngdang Israel nunger yimlibilem angutsüsa Kibubai kümdaktsü. Aser Farao tenzükertem aser nüburtem madang Mosa kanga nüngtugu liasü.

4Mosai ashi, “Kibubai yamai ashir, ayatrem nung ni Ijip ajanga süitsü, 5Ijip lima nung mezüng asoba jabaso ajak oda chuba menden nung amentsüba Farao mezüng jabaso nungi tenzüka tsüen aliba alatsür jabaso tashi, aser kiset shirurutema mezüng mepuba ajak asütsü. 6Ijip lima ajaklen mangyimba tulu alitsü, oda ibaji mesüka kodanga mangashidang mesüra yasür-a mangashitsü. 7Saka Israel nunger anema, nisung mesüra shiruru anema azü katia masangtsü. Idangji ni Kibubai Ijip nunger o Israel na tsüngda koda balala ayu aji nenoki metettsü.” 8Tatem nung Mosai ashi, “ne yimsüsürtem ajak kü dangi arua parnok sasa kü madang apudaktsü, aser parnoki kü dang ne nüburtem ajakji anir oang ta ashitsü. Iba sülenjiang ni aotsü.” Aser Mosai ain adoka Farao tsüngdang nungi ao.

9Idangji Kibubai Mosa dang ashi, “Ijip lima nung kü sayatenyatem tali renloktsü asoshi Faraoi ne dang mangatsü.” 10Aser Mosa o Aron nati item sayatenyatem ajakji Farao tsüngdang inyak, saka Kibubai Farao temulung merangdaktsü aser pai Israel nungertem par lima nungi aotsü memela.

ANITET 12

Süia Aoba

(Lev. 23.3-8; Zün. 28.16-17; Taz. 16.1-8)

1  Ijip lima nung Mosa o Aron na dang Kibubai ashi, 2“Iba ita ya nenok asoshi küm nung mezüngbuba ita alitsü. 3Israel pur ajak dang nenoki ya shiang: Iba ita anogo ternübuba nung nisung shiai san chanu ka ka pei pei kibong shia asoshi agitsüla. 4Kibong kati dangbo san kaji magimatsüsa kibongji kanga ilara, par anasa aliba kiyonger den nisung yongsük yari san chanu ka agitsü akok. Ano san chanuji nisung kati kodaka achir iba yari nenoki apir inyakang. 5Shiruruji nai san rongnungi mesüra nabong nungi agitsü akok, saka aji tepung tarak maket aser küm ka chanu asütsüla. 6Iba ita anogo terpezünübuba nikongdang matong tashi nenoki ibaji yua atatsüla, aser iba nikongdang Israel nunger telok ajaki shiruruji tepsettsüla. 7Shir kibong nungsa aji chidir, parnoki azüji agizüka kikümdong anatsülen aser kiküp nung mezüloka yutsütsüla. 8Paonungjisa parnoki shiji mi nung tsüker, süngo-lio taku aser piyazü meinokba amtsük den achitsüla. 9Shiji tazü mesüra sor machitsüla, saka mi nung ronger, oda tekolak, tetsüng aser poknüng dena achitsüla. 10Anepdang tashi nenoki aji anünga mayutsüla; kar anüngzükra aji nenoki mi agi rongdoktsüla. 11Nenoki yamai achitsüla: nenoki nangri kanger, tsüngsem semer, nenok mechi teka nung amer aji ilunga achitsüla. Ibai Kibuba Süia Aoba Benjong lir.

12“Paonungjisa ni Ijip lima ajanga süitsü aser Ijip nung mezüng asoba jabaso aser mezüng mepuba shiruru ajak ni tepsettsü, aser Ijip nunger tsüngremtem anema ni o bendangtsü. Ni Kibuba lir. 13Kechiaser kikümdong nung azüji nenok asoshi temaitsü alitsü; kodang nenok kikümdong nung azüji ngudir, ni nenok süia aotsü aser Ijip nunger dak atongba wara jagi nenok dak mekongshitsü.

Piyazü Meinokba Am Benjong

14  “Nenoki iba anogo ya tebilemtetba amung ka, putu ajak nung ya metsüngareta amungtsüla. Kibubai inyakba mapatem bilemteta pa dang nenoki iba Benjongji yimsü ka ama Kibuba dang amungtsüla.” 15Kibubai ashi, “Anogo tenet tashi piyazü meinokba am nenoki achitsü. Anogo mezüngnübuba nenoki ki nungi piyazü ajak endoktsüla, kechiaser shibaisa mezüngnü nungi tenetnü tashi piyazü enokba am chidir, iba nisung Israel nungi leptoktsü. 16Anogo mezüngnü aser tenetnübuba nung nenoki temeshi sentep ka akatsüla. Item anogotem nungjibo mapa kecha meinyaktsüla, saka nisung shiai kodaka achitsü tim aji dang renemtsü akok.

17“Piyazü meinokba Am Benjongji nenoki amungtsüla, kechiaser iba anogo nung ni nenok Ijip lima nungi anitet. Anungji ibai putu ajak nung teti asoshi nenok yimsü Benjong ka ama amungtsüla. 18Mezüngbuba ita nung anogo terpezünübuba nikongdang nungi metsür-kabuba nikongdang tashi nenoki piyazü enokba am kecha machitsüla. 19Anogo tenetnü nenok kidang piyazü kecha mungudaktsütsüla. Shibaisa piyazü enokba chidir iba nisungji aener saka sensopur saka Israel telok nungi leptoktsü. 20Piyazü enoka yangluba kecha machitsüla, nenok kongsa lidir; nenoki piyazü menokba am dang achitsüla.”

Mezüng Süia Aoba

21Idangji Mosai Israel tambur ajak jatener parnok dang ashi, “Nenoki oang aser kibong yari san chanuji shimteta süia aoba tenla tepsetang. 22Aser nenoki esop tejeb ka bener arua su nung aliba azü nung metenang, aser su nung azüji kiküp aser kikümdang anatsülen mezülokang, aser nenok shinga anepdang tashi pei ki kikümbang nungi tetugu. 23Kodang Ijip nunger tepsettsü Kibubai aji ajanga süidir, nenok kikümdang anatsülen aser kiküp nung azüji ngudir, pai nenok kiji ajanga süitsü, aser tesamatsüba tenyari nenok kidangi aita nenok tepsettsü pai memelatsü.

24“Iba yimsü temelaba ya nenok aser nenok semchirtemi teti benshitsüla. 25Kodang Kibubai nenok nem agütsütsü nangzükba amato nenok linük jagi arudir, nenoki ibai inyaktsüla. 26Iba amung tetezü kechi? ta nenok chirtemi asüngdangra, 27nenoki yamai langzütsü; ‘ibai Kibuba nem tetushi agütsüba Süia Aoba Benjong lir. Kechiaser Ijip nung pai Israel kibongtem süia or Ijip nunger tepset, saka pai asenokbo kümzük.’ ” Idangji nüburtem apudak aser külem. 28Aser Mosa o Aron na dang Kibubai melaba ama parnoki oa yamaji inyak.

Mezüng Asoba Asüba

29Tang ayatrem nung Ijip lima nung aliba chuba menden nung amenba Farao mezüng jabaso nungi tepuokdak alirtem mezüng jabaso tashi aser mezüng mepuba shiruru ajak Kibubai tepset. 30Paonungji Farao, pa tenzükertem aser Ijip nunger ajak shishi; aser Ijip ajonga nung mangyimba tulu liasü; kechiaser ki ka nungdanga masübaji maliasü. 31Aser paonungjisa Faraoi Mosa o Aron na jar ashi, “Na aser Israel nunger ajak apusoa oadokang! Kibubai ashiba ama pa külemtsü nenok kü nübur rongnungi oadokang. 32Nenok san, nabong aser nashi ajak anir oang, aser nia moajangma.”

33Ijip nungeri Israel nunger apusoa aotsü ajungshi kechiaser parnoki ashi, “Nenok idakisa lira onok ajak asütsü.” 34Anungji amzü aser am ajepsaba susa parnok sü agi aleper tapubang nung apulok. 35 Aser Mosai ashiba ama Israel nungertemi inyak, aser Ijip nunger dang nungi hon, taribi, aser süoshi meshizük. 36Kibubai Ijip nungeri Israel nunger nem yimlibilem sayutsü mulungsentsü agütsü. Yamaji Israel nungertemi Ijip nunger akoksaja par rongsen bener ao.

Israel Nungeri Ijip Toktsür Apusoba

37Israel chirtem tetsür-tanur medeni tebur parnok meyi noklang trok shi Ramses nungi Sukkot tashi tetsüng agi jaja. 38Tangar nisungtema telok tuluka, san, nabong nashi aser kiset shiruru ajak anir parnok den külemi ao. 39Parnoki Ijip nungi amzü bener aruba jagi parnoki piyazü meinokba am yanglu, kechiyong ibaji piyazü meinoki liasü, kechiaser parnok Ijip nungi ilunga apusoa yok nung parnok asoshia chiyungtsü kecha merenemtet.

40  Israel nungertem Ijip lima nung aliba mapangji küm noklang pezü ser semer liasü. 41Küm noklang pezü ser semer tatem buba küm nungji K ibuba nüburtemi Ijip toktsür apuso. 42Aser parnok Ijip nungi anitetba aonung K ibuba i mita ata nung; iba kasa aonungji parnoki Kibuba nem tetushi agütsütsü putu ajak nung mita ata.

Süia Aoba Benjong Ozüng

43Mosa o Aron na dang Kibubai ashi, “Süia Aoba Benjong ozüng itemi lir. Bendanger shinga nema ibai mechidaktsütsüla, 44saka nai sen agi alizükba alar kar lira paji mejeptoktsür külen pai ibaji achitsü akok. 45Khen atema semloka alir aser ayangi arur shingaia ibai machitsüla. 46Koba kidangsa ibaji renemdir idakji dang aji achitsüla, iba shiji kimaia bener metugutsüla, aser shiruru teretji ka danga nenoki meraksatsüla. 47Israel nungertem ajaki ibai benshitsüla.”

48Ne den amunger aener kari Kibuba Süia Aoba Benjong nung dennüra, tamasa par kidang alir tebur ajak mejeptokjang; aser pa yimsopur ka ama iba benjong nungji dendakjang. Saka memejeptokba tebur shingaia ibaji machitsüla. 49Yimsopur aser nenok rongnung munga alir aener ajak asoshi ozüng ya kasa alitsü.

50Mosa o Aron na dang Kibubai melaba ajak Israel nungertemi tashi anga inyak. 51Iba anogo nungjisa Kibubai Israel nungertem telok telokji Ijip nungi anitet.

ANITET 13

Mezüng Asoba Bendanga Agütsüba

1 Kibubai Mosa dang ashi, 2 “Mezüngbuba asoba tebur ajak kü nem bendanga agüjang. Nu menden lapokba mezüng asoba Israel nunger, aser shiruru mezüng mepuba saka kü meyong lir.”

Piyazü Meinokba Am Benjong

3Mosai nüburtem dang ashi, “Ijip nunger alar tia nungi Kibuba tashi tulu agi nenok anitetba iba anogo nung bilemtetang aser piyazü enokba am kecha machitsüla. 4Tanü iba Abib ita nung nenok apusor. 5Nenok tsürabur dang nangzükba lima: Kanan nunger, Hit nunger, Amor nunger, Hiv nunger aser Yebus nunger aliba lima mamatzü aser ninang mojitzü yima aliba lima jagi kodang Kibubai nenok anir arudir; nenoki iba benjong ya mezüngbuba ita nung amungtsüla. 6Anogo tenetnü tashi piyazü meinokba am achitsü aser tenetnübuba nung Kibuba atema benjong ka alitsü. 7Item anogo tenetji songtema piyazü meinokba am achitsü aser piyazü enokba kecha nenok rongnung mesüra nenok litsü nung mungudaktsütsüla. 8Iba anogo nung nenok chir dang yamai shiang, ‘Ni Ijip nungi adokdang Kibubai ni asoshi kechi inyak iba yong ni ya inyaker.’ 9Kibuba ozüngji nenok bang nung alitsü asoshi ya nenok teka nung temaitsü ka aser nenok tenütsü nung tebilemtetba ka amai alitsü. Kechiaser Kibuba tashi tait teka agi pai nenok Ijip nungi anitet. 10Nenoki iba yimsü benjongji küm shia mapang shitak nung amungtsüla.”

Mezüng Asoba

11Kodang Kibubai nenok aser nenok tsürabur dang nangzükba Kanan limai nenokji anir arudir, 12 nenoki nu menden lapokba mezüngbuba jabaso ajak aser nenok akaba shiruru tamasa mepuba shia nenoki Kibuba asoshi bendanga yuang. Itemji Kibuba meyong lir. 13Tamasa mepuba gado shiaji nenoki san chanu ka agi alangzükang, aji nenoki malangzükrabang nenoki gado tekongji mesener yujang. Nenok jabaso rongnung mezüng asoba jabaso ajak nenoki alangzüktsüla.

14Ne jabasoi tarutsü nung “Ya kechi tetezü?” ta asüngdangra, idangji nenoki pa dang shiang, “Kibuba tashi tait teka agi pai Ijip nunger alar tia nungi asenok anitet.” 15“Kodang Faraoi matsüshi-i temulung meranga alar tia nungi asenok modaktsü, idangji Kibubai Ijip nung mezüng asoba jabaso aser, mezüng mepuba shiruru ajak tepset. Anungji nu menden mezüng lapoka mepuba kiset shiruru tepung ajak Kibuba nem ni tenla agütsür, aser Ijip mezüng asoba jabaso ajak ni alangzüker. 16Ibai nenok teka aser tenütsü nung temaitsü ka ama alitsü, kechiaser Kibuba teka tashi tait agi pai Ijip lima nungi asenok anitet.”

Mepet Tongshi Aser Mi Tongshi

17Kodang Faraoi nüburtem odaktsü, Filistia lima ajanga aoba lenmangji tatsüba saka, Tsüngremi parnok iba lenmanglen jagi anir mao. Tsüngremi ashi, “Ashiko parnoki rara ajurudang parnok temulung melenshia kümer Ijip limai tanaben meyipa aotsü.” 18Saka pai lisem lima lenmang talangba, Temerem Tzüyim leni ani. Israel nungerji rara asoshi renemer Ijip nungi apuso.

19  Mosai Yosef teret aben, kechiaser Yosefi Yakob chirtem dang ajang ajanga azüngashidakja ashi, “Tsüngremi atangji nenok semdangtsü, aser idangji nenoki kü teret iba lima nungi bener aotsüla.”

20Parnoki Sukkot toktsür arua Etham lisem lima atongtsü anasa arua anen. 21Aser Kibubai parnok jakdang lenmang anitsü asoshi anüngdang mepet tongshi ka aser aonung parnok nem tesangwa agütsütsü asoshi mi tongshi ka ta parnok jakdang ao, anungji parnoki aonung aser anüngdang jaja. 22Anüngdang mepet tongshi aser aonung mi tongshi ta parnok jakdang liasü.

ANITET 14

Temerem Tzüyim Ajangba

1Idangji Kibubai Mosa dang ashi, 2“Israel nungertem dang meyipa or Pihahirot jakdang Migdol aser Temerem Tzüyim tsüngda anenang ta shiang. Temerem Tzüyim anasa Baalzefon jakdang anendakjang. 3Israel nunger lisem lima nungji taolen maka nemzüya alitsü ta Faraoi bilemtsü. 4Ni Farao temulung merangdaktsütsü aser pai nenok aria arutsü. Saka Farao aser pa temerangertem ajak madak sentsüwangshi ni angutsü, aser Ijip nungeri ni Kibuba ta metettsü.” Anungji Israel nungertemi parnok dang ashiba amaji inyak.

5Kodang nüburtem jena ogo ta Ijip chuba dang ashi, pa aser pa yimsüsürtemi nisungtem anema temulung meyipadok aser ashi, “Israel nunger asenok metenzüki parnok oadoktsüsa asenoki kechi inyak!”. 6Anungji pai pei kor talungtsü renemer pei temerangertem anir ao. 7Pai kor talungtsü tajungtiba noklang trok shimtet aser Ijip talungtsü ajak item madak tanishirtem dena anir ao. 8Kibubai Farao temulung merangdaktsü aser Israel nunger tasü ita aser KIBUBA tekümzükba nung takok ngua oya aliba anema aria ao. 9Ijip nunger temerangertem, kor, talungtsü aser tanishirtemi Israel nungerji aria ao aser parnok Baalzefon jakdang Pihahirot anasa Temerem Tzüyimküm nung anena lia menep.

10Kodang Farao anasa aru, Israel nungeri parnok aria aruba Ijip nungerji angu, parnoki tsübuadok aser Kibuba dang teyari asoshi ayimten. 11Idangji parnoki Mosa dang ashi, “Ijip lima nung leper maliba yong onok lisem lima nung südaktsütsü nai anir aru asü? Ajiang! Ijip lima nungi anir adoka nai onok dak yamai kechiba benshir? 12Ijip nunger tenzüka lidi onok odang tokjang ta onoki Ijip nung ne dang meshika ma? Kechiaser lisem lima nung asü dangbo Ijip nunger tenzüka alitsü onok asoshi tajungba süla.”

13Aser Mosai nisungtem dang ashi, “Nenok tetsübu, marakzüi noktaka liang, aser Kibuba tekümtet koba nenok asoshi pai tanü inyaktsü, aji reprangang; kechiaser tanü nenoki anguba Ijip nungerji nenoki tanaben kodanga mangutsü. 14Kibubai nenok asoshi raratsü, nenokbo ajemajema dang liang.”

15Idangji Kibubai Mosa dang ashi, “Kechiba nai teyari asoshi kü dang yamai ayimtener? Israel nunger dang tejakleni oang ta shiang. 16Ne mechiji mekanga tzüyim manung ne teka songtoka tzüji sadangang aser Israel nunger tzüyim tiyong nung ali takong manung jajatsü. 17Aser Ni Ijip nunger temulung kanga merangdaktsütsü, aser parnoki Israel nungertem aria aotsü, idangji Farao temerangertem, talungtsü aser item tanishirtem ajak madak kü sentsüwangshi angutsü. 18Kodang Farao talungtsütem aser par kor anishirtem madak ni takok ngudir, Ijip nungeri ni Kibuba ta metettsü.”

19Idangji Tsüngrem tenyar shiba Israel nüburtem jakdang oya liasü, pai meyiper parnok süleni alu. Aser mepet tongshijia tejaklen nungi meyipa parnok süleni alu, 20aser aji Ijip nunger tanendak aser Israel nübur tanendak tsüngda liasü. Ammang tepiyong mepet tongshi jagi Ijip nunger alidak tammang kümdaktsü, saka Israel nunger alidakbo tesangwa agütsü, anungji telok katia ka anasa maru.

21Idangji Mosai pei teka Temerem Tzüyim manung songtok, aser Kibubai aonung piyong anüdoklen mopung tesashi ka ondaktsü aser tzüyimji ali takong kümdakja sadang, 22 aser Israel nunger Temerem Tzüyim jagi ali takong manung ai. Parnok tajichilen aser tabelen ajaklen tzüji jara ama liasü. 23Idangji Ijip nungeria parnok aria arua tzü jagi parnok kortem aser talungtsütem anir ai. 24Sangwa mapang Kibubai mepet tongshi aser mi tongshi ajanga Ijip temerangertem madak reprangzüka yok, aser parnok mangmangdaktsü. 25Pai parnok talungtsütem tetsüng sot nung parnoki kanga timtema anishi, anungji Ijip nungeri ashi, “Asenok Israel nunger madang nungi jena odi, kechiaser Kibubai parnok asoshi asenok anema rarar.”

26Idangji Kibubai Mosa dang ashi, “Ijip nunger talungtsü kortem aser parnok temerangertem madak tzü agi atsüngbanga odaktsütsü asoshi ne teka Temerem Tzüyim madak songtokang.” 27Mosai pei teka Temerem Tzüyim madak songtok, aser anepdangbo tzüji mezüng ama atsüngbanga aküm. Aser Ijip nungeri tzü nungi ajentsü merang, saka Kibubai parnok Tzüyim nungji araksetdaktsü. 28Aser tzüji meyipa arua parnok talungtsütem, kortem aser temerangertem oda Israel nunger aria aruba Farao temerangertem kwika tzü jagi ai, parnok kata mejenbuteti samatsü.

29Saka Israel nungerbo tzüyim nungji ali takong manung jaja, aser parnok asoshi tzüji jara ama parnok tajichi aser tabelen anatsülen liasü. 30Iba anogo nung Kibubai Israel nunger Ijip nunger ket nungi kümzük aser Israel nungeri Ijip nungerji tzüyimküm nung tasü aliba angu. 31Kodang Ijip nunger anema Kibubai mapa tulu inyakbaji Israel nungeri angu, parnoki Kibuba tsübu, aser parnoki Kibuba aser pa tenzüker Mosa dak amang.

ANITET 15

Mosa Ken

1  Idangji Mosa aser Israel nungertemi Kibuba dang ken tenlokja ashi:

“Ni Kibuba dang ken atentsü, kechiaser pai sentsüwangshia takok nguogo.

Kor aser idakji asangertem pai tzüyim nung ajungoktsüogo.

2 Kibubaji kü tashi aser kü ken; pa kü tekümtet kümogo.

Paji kü Tsüngrem lir aser ni pa tesünep asangtsü,

kübu nunger Tsüngrem, aser ni pa ulutsütsü.

3 Kibubaji temeranger ka lir; pa tenüngji Kibuba lir.

4Farao talungtsütem aser temerangertem telok pai tzüyim nung ajungoktsüogo;

yimsüsürtem teshimtet arkotongtem Temerem Tzüyim nung araksetdaktsüogo.

5Tzü tarok jagi parnok mobang;

lung ka ama parnok tzüyim telungi iogo.

6Oh Kibuba, ne teka tajichi tashi ain nung sentsüwangshi lir.

Oh, Kibuba, ne teka tajichi agi tsükchir anüka ajasatsüogo.

7Ne tamarenba tashi tulu agi nai ne tsükchirtem atsüngdokogo;

ne ain chiokba agi parnok monü ama rongtoktsüogo.

8Ne teni nungi apuoktsüba agi tzüyim telung tashi nungtenadok,

tzümetsüngji jara ka ama noktakadok, tzüyim telung tzüji telung kümadok.

9Tsükchiri asüküma ashi, ‘Ni parnok aria aotsü, parnok ajatettsü,

ni temakzükba osettem lemsa-a agitsü; parnok madak kü tejangraba tip atemtsü;

ni kü nok atsütettsü, kü teka agi parnok samatsütsü.’

10Saka nai ne tangula mopung ondaktsü, aser tzüyimi parnok mobang;

Yongmenyin ama tzüyim tulu tarok jagi parnok telungi alu.

11Oh Kibuba na mesük tsüngremtem rongnung shiba ali?

Temeshiba nung sentsüwangshia, sentsüwangshi nung tetsübutsü ka,

na mesüka tesüngmangtsü sayatenya mapa inyakba nung shiba ali?

12Nai ne teka tajichi songtok,

aser ali-i parnok meyokadok.

13Nai alangzükba nüburtem ne temeim takang agi len ani;

ne tashi ain agi parnok ne temeshidak limai ani.

14Kintemi aji angashidang tsübua atententsü,

Filistia nunger dak tetsübutsü agi atong.

15Edom tongti purtemi aoksatsü;

Moab nunger tulutem atententsü,

Kanan nungertem tasü peletadoktsü.

16Tetsübutsü aser tajemtsü agi parnok atongtsü.

Oh Kibuba, ne nüburtem mesüitem tashi,

alar tia nungi nai anitetba ne nüburtem mesüitem tashi,

ne tashi tait teka agi parnok lung ka ama marakzüi kümdaktsü.

17Oh Kibuba, na alitsü nai yangluba talidak; ne teka agi yangluba tekülemdaki,

nai parnok anitet, aser pei tenem nung parnok yutsütsü.

18 Kibubai teti tatem makai chubatsü.”

Miriam Ken

19Israel nunger tzüyim tiyong nung ali takong manung jajadaktsü. Saka kodang Farao kortem aser talungtsütem den par temerangertem tzüyim jagi ai, Kibubai parnok madak tzüji arudaktsü aser parnok mobang. 20Idangji Aron teyi ainkarla Miriami la teka nung asüm aben aser tetsür ajaki la sülen asüm tema tsüngsanga ao. 21Miriami parnok dang ken yamai tenyu:

“Kibuba dang nenoki ken tenang,

kechiaser pai sentsüwangshia takok nguogo;

Kor aser iba nung asangba pai tzüyim telungi ajungoktsüogo.”

Tzü Taku

22Kodang Mosai Israel purtem Temerem Tzüyim nungi aniteter külen Shur linüki aru, parnoki lisem lima nung anogo asemnü jaja-aka tzü mangu. 23Aser kodang parnoki Marai aru, parnoki Mara tzüji mejemtet, kechiyong tzüji taku liasü; anungji iba tenüng Mara ta aja. 24Aser nisungtemi Mosa anema nemnema ashi, “Asenok kechi ajemtsü?” 25Aser pai Kibuba dang ayimten; aser Kibubai pa dang süngdong ka sayu, aser pai aji tzü nung enoktsü nung tzüji tanang aküm. Yangji Kibubai parnok asoshi yimsü-ozüng ka yanglu, aser yangji pai parnok tendang. 26Pai ashi, “Nenoki Kibuba Tsüngrem ola angadi süra, pa tsüngdang kechi shitak aji inyakdi süra, aser pai melabatem nung temulung agütsüdi süra, Ijip nunger dak ni tongdaktsüba tashitak kata ni nenok dak metongdaktsütsü; kechiaser na anebtsüba Kibubaji ni lir.”

27Idangji tzüpokdak terana aser asangdong neter alidak, Elim tonga parnok aru, aser yangji parnok tzü anasa anen.

ANITET 16

Mana Aser Opiya

1Idangji Israel nunger Ijip nungi adoker külen ita tanabuba anogo terpungububa nung Elim nungi apusoa Sinai aser Elim tsüngda nung aliba Sin lisem limai aru. 2Aser Israel nungeri lisem lima nungji Mosa aser Aron na anema nemnem, 3aser tena dang ashi, “Kodang onoki Ijip nung shi aonpo anasa mener onoki chinüba chiyungtsütem tiptema chia liasü, idangto Kibubai onok tepsetogo ta lilasang koda jungla. Saka iba nüburtem ajonga taya agi lisem lima nung südaktsütsü nenoki anir aru.”

4  Idangji Kibubai Mosa dang ashi, “Ni nenok asoshi anüng nungi chiyungtsü tsükdaktsütsü. Anogo ka peri chiyungtsü dang parnoki oa anogo shia bendentsüla. Yamaji iba nüburi ozüng nung jajadisü mejajalir ni tendangtsü. 5Troknübuba nungbo parnoki bener arubaji anogoshia bendenba dang nungi anasü asütsüla.”

6Anungji Mosa o Aron nati Israel nunger dang ashi “Ijip lima nungi nenok anitetbaji Kibuba ta nikongtsütsü nenoki metettsü. 7Anepdang nenoki Kibuba sentsüwangshiji angutsü, kechiaser nenoki pa anema nemnemba pai angashiogo. Nenoki onok anema nemnemtsüsa onoka shir?” 8Ano Mosai ashi, “Nenok nem nikongdang shi aser anepdang nenoki chinüba ama amtsük agütsübaji Kibuba lir, kechiaser nenoki pa anema nemnemba pai angashiogo, aser onoka shir aka! Kodang nenoki onok anema nemnemer, nenoki atangji Kibuba anema nemnemer.”

9Mosai Aron dang ashi, “Israel nunger ajak Kibuba tsüngdangi arung ta shiang, kechiaser parnoki nemnemba pai angashiogo.” 10Aroni Israel nunger telok den jembidang parnoki, lisem lima len reprang, aser Kibuba sentsüwangshi mepet nung adok. 11Kibubai Mosa dang ashi, 12“Israel nungeri nemnemba ni angashiogo, parnok dang ya shiang, nikongdang nenoki shi achitsü, aser anepdang nenoki chinüba ama amtsük chia tip atemtsü, aser nenoki Niji nenok Kibuba Tsüngrem ta metettsü.”

13Anungji nikongdang opiya ozütem atua tanendak zükbanga atem aser anepdang tanendak meketa azüngtsü tanang aika tsük. 14Kodang azüngtsüji akong, telong atenba azüngtsü jagi jang ama telonglong lisem nungji liasü. 15 Kodang Israel nungeri aji angu, parnok kati ka den jembitepa ashi, “Ya Kechi?” kechiaser parnoki aji kechiar memetet liasü.

Mosai parnok dang ashi, “Ya nenok Kibubai agütsüba chiyungtsü lir, 16Kibubai melabaji ya lir; nenok nisung shia pei chishi shitenang. Nenok pei süki nung aliba nisung shia asoshi jangku ka ka shitenang.”

17Anungji Israel nungertemi yamai inyak, kari tali, kari matoksai ta shiten, 18 Kodang jangku jagi aji atakdang, shibai tali shiten pa anünga maka, aser shibai tera dang shiten pa meperi-i maküm; oda nisung shia pei peri dang shiten. 19Aser Mosai parnok dang ashi, “Nisung shingaia anepdang tashi aji mayutsüla.” 20Saka kari Mosai ashiba mangai anepdang tashi ayu, aji mesen yia teshinem menem, anungji Mosai parnok anema ain adok. 21Anepdang shia nisung shiai pei chishi shiten; aser anü tsüka akümdang aji yimsa-a oadok.

22Troknübuba nungbo parnoki anasü agi tali chiyungtsüji shitena ayu, nisung shia jangku anana. Kodang telok tanishir ajaki arua Mosa dang iba indang ashi, 23 pai parnok dang langzü, “Kibubai melaba ozüngji ya lir: Asüng meshimeshia anisüngzükba anogo. Kibuba atema temeshi amungnü. Nenoki kechi amtsük awangtsü ali, aji wangang, aser kechi temolutsü ali aji moluang. Tanüngbaji anepdang tashi nenok asoshi yuang.” 24Mosai ashiba ama parnoki aji anepdang tashi ayu, aser aji meraksai mesüra mesen meyi-i liasü. 25Mosai ashi, “Aji tanü chiang, kechiaser tanü Kibuba asoshi Amungnü lir, tanübo nenoki aji moapu nung mangutsü. 26Nenoki anogo troknü chiyungtsü bendentsü, saka tenetnübubaji amungnü lir, panüji kecha malitsü.”

27Tenetnübuba nunga nisung kari chiyungtsü bendeni ao, saka kecha mangu. 28Idangji Kibubai Mosa dang ashi, “Nenoki ni melaba aser kü ozüngtem kopiga mebenshi-i alitsü? 29Ajiang, Ni Kibubai nenok nem amungnü agütsü anungji nenok nem troknübuba nungbo ananü atema amtsük agütsüogo. Nenok nisung shia pei talidak dang liang, nisung shinga tenetnübuba nungbo pei talidak nungi metugutsüla.” 30Anungji tenetnübuba nung nüburtemi anisüngzük.

31Israel kini iba chiyungtsü dangji “Mana” ta aja, aser aji koriander süngjang ama tereprangtsü temesüng aser tachitsü ninang mochitzü den yangluba amtsük ama liasü. 32Aser Mosai ashi, “Ya Kibubai melaba ozüng lir, ni nenok Ijip lima nungi aniteter lisem lima ajanga anir arudang kechi agi nenok mesüa liasü, aji nenok semchirtemi angutsü atema putu ajak asoshi jangku ka sünga aji rizünga yuang.” 33 Mosai Aron dang ashi, “Mori ka bena arua jangku ka sünga manaji enokang aser nenok semchirtem putu ajak asoshi Kibuba tsüngdang aji rizünga yuang.” 34Kibubai Mosa dang melaba ama Aroni aji Ozüng Süngden jakdang rizünga ayutsü ataloka yutsü. 35 Nisung aliba linük kati parnok maru tashi küm lir tashi mana agi mesü. Yamaji Kanan linük litsü matong tashi parnoki mana chia liasü. 36(Jangku kaji yimchi ka metsürti shilem nung ka lir.)

ANITET 17

Lung Nungi Tzü Adokba

(Zün. 20.1-13)

1Israel nunger telok ajak Sin lisem lima nungi apusoa Kibubai melaba ama alinük balala nung anen anena ao. Parnoki Refidim nung anen, saka idakji parnok asoshi tajemtsü tzü maliasü. 2Anungji parnoki Mosa den bangsentepa ashi, “Onok nem tajemtsü tzü kua?” Mosai langzü, “Kechiba nenoki kü den bangsenteper aser nemnemer? kechiba nenoki Kibuba atitanger? 3Saka nüburtemji kanga tzüra nung parnoki Mosa anema nemnem. Parnoki ashi, Onok, onok chirtem aser onok kiset shirurutem tzüra agi südaktsütsüsa kechiba nai onok Ijip lima nungi aniteter aru?”

4Idangji Mosai Kibuba dang ayimtena ashi, “Item nüburtem dang ni kechi inyaktsü? Parnoki kü dak lung agi aontsü renema lir.”

5 Kibubai Mosa dang ashi, “Ne den Israel tambur kar anir parnok tejakleni oang. Aser Nile ayong dak azükba mechi to ne teka nung amang. 6Horeb nung ne jakdang lung manung ni noktaktsü. Aser nai lung dakji zükang aser nüburtem asoshi tajemtsü tzü idak nungjagi adoktsü.” Mosai Israel tamburtem jakdang yamaji inyak.

7Mosai iba meta dangji Massa aser Meriba ta aja, kechiaser Israel nungertemi Kibuba anema nemnem aser pa atitanga ashi, “Kibubaji asenok rongnung ali asü mali?”

Amalek Nunger Den Raraba

8Idangji Amalek nunger arua Refidim nung Israel purtem den rara. 9Mosai Yihusua dang ashi, “Amalek nunger den asenoki raratsü asoshi nüburtem rongnung shimang. Ni asüng Tsüngrem mechi kü ket nung amer tenem kolak nung noktaktsü.” 10Mosai pa dang melaba ama Yihusuai inyak aser Amalek nunger den rara. Mosa, Aron, aser Hur tenem kolak jagi atu. 11Kodangsa Mosai pei teka mekanga liasü idangji Israel nungeri akok, aser kodangsa pa teka aludir, Amalek nungeri akok. 12Kodang Mosa teka mekangba ania aküm, Aron aser Hur nati lung ka bena arua ayu aser iba manung Mosa amen, aser tena pa anasa kati külen, kati külen ta pa teka ajungketa amer anü malu tashi mainshi-i liasü. 13Yamaji Yihusuai Amalek nunger ajak nok agi laodaktsü.

14  Idangji Kibubai Mosa dang ashi, “Tebilemtettsü atema ibai kaket ka nung züluang. Yihusua narong agi angashia ibaji züngang. Ni anüng kübok Amalek nunger indang mebilemtettsüsa ni parnok samatsütsü.” 15Mosai tenladak ka yanglu aser iba dang “Yihova-nissi” ta aja. 16Pai ashi, “Kibuba nisan talang kati ajungketang! Kibubai Amalek nunger anema putusa putu raratsü.”

ANITET 18

Yethroi Mosa Semdangba

1Tang Median putir Mosa toko, Yethroi Tsüngremi Mosa aser Israel nübur Ijip lima nungi koda anitet, item ajak indang angashi. 2 Mosai pei kinungtsü Zippora Yethro dangi yokba pai angazük, 3 aser lar jabaso anata dena yok, jabaso ka tenüngji Gershom ta aja, kechiaser pai ashi, “Ni bendang lima nung aenersa liogo.” 4Aser tangar tenüngji Eliezer ta aja, kechiaser pai ashi, “Kübu nunger Tsüngrem kü teyari liasü, aser pai ni Farao nok nungi kümzük.”

5Aser Tsüngrem tenem nung Mosa anena liasü, ajagi Yethroi Mosa tebutsü aser lar jabaso anir atu, 6aser kati Mosa dang ashi, “Ajiang, neko Yethro, ne dangi, nebutsü aser lar jabaso ana den arudar.” 7Anungji Mosai pa toko den ajuruteptsü ao aser pa madang apudak aser kanga pelatep, aser parnok junga ali mali asüngdangtepa Mosa süki telungi ai. 8Israel pur kümzüktsü asoshi Kibubai Farao aser pa nüburtem dak kechisa inyak; item ajak indang Mosai toko dang ashi. Ano lenmang nung timtem tuokrong ajuruba nungi Kibubai parnok koda kümzük item indang ashi.

9Kodang Israel pur kümzüktsü asoshi Kibubai Ijip nunger dak inyakba osang Yethroi angashi, pa kanga pela-a liasü, 10aser Yethroi ashi, “Ijip nunger ket aser Farao ket nungi kümzüksang Kibuba sangang! Kibuba shibai pei nüburtem alar tia nungi anitet, pa sangang! 11Kibubaji tsüngremtem ajak dang nungi tuluba ta ni tang meteter, kechiyong Ijip nungeri Israel pur dak kanga mezüngmeshia benshi nung pai ibaji inyak.” 12Idangji Mosa toko Yethroi Tsüngrem asoshi tarongba tenla aser tetepsetba tenlatem bena arua agütsü aser Aron aser Israel tamburtem ajak Tsüngrem tsüngdangi arua Mosa toko den amtsük achi.

Tanishirtem Shimba

(Taz. 1.9-18)

13Tasüngji Mosai nüburtem rongnung ken-o mangatettep bendangtsü amen, aser nüburtemi anepdang nungi nikongdang tashi Mosa meketa noktaka ali. 14Kodang pai nüburtem dang inyakba ajakji tokoi angu, pai ashi, “nüburtem asoshi nai yamai inyakba ya kechi? kechiba ne kija dang amener aser nüburtem anepdang nungi nikongdang tashi noktakdaktsür?”

15Mosai toko dang langzü, “Kechiaser nüburtemi Tsüngrem nungi asüngdangtsü kü dangi arur. 16Kodang nisung ana tsüngda nung mangatettep ken-o ka arudir parnok kü dangi arur, aser koba shitak aji ni bendanger; aser parnok dang Tsüngremer telatet ozüng ni metetdaktsür.”

17Idangji Mosa tokoi ashi, “Nai inyakba mapaji tajung masü. 18Na aser ne dangi aruba nübur ajak anisetadoktsü; kechiaser mapaji na asoshi onsara taret lir, ne kijai dangbo ibai inyaktsü makoktsü. 19Nai kü dang angang, ni ne nem tasa kar agütsüdi, aser ne den Tsüngrem dena liang. Nüburtem atema Tsüngrem tsütsü na sang, aser parnok kenotemji Tsüngrem dangi bener arung. 20Nai parnok dang ozüng, aser telemtetba sayuang, aser parnoki kechi nung jajatsü aser kechi mapa inyaktsü aji nai parnok dang sayutsüla. 21Iba dak alaka nüburtem nungi Tsüngrem tsübuba, süpokrem sempaba, ochishir nisungtem aser mapa akoktsüba pur rongnungi meyirijang, noklang, tenem aser ter madak yimsüsütsü shima yuang. 22Nüburtem madak mapang ajak nung parnok nem o bendangdakjang. Ken-o tulu tasaktemji ne dangi bener aruba dak alema, tila ajak parnok sasa bendangdakjang. Anungji parnoki yamaji ne khu lemsateptsü, aser na asoshi aji tepungbaba aser temelaba alitsü. 23Nai yamaji inyakra, aser Tsüngremi ne dang yamaji anisüngzük agütsütsü, aser nüburtema pei talidaki tesünep nung aotsü.”

24Anungji tokoi ashiba ama Mosai anga, aser yamaji inyak. 25Pai Israel nunger ajak rongnungi mapa akokertem shim aser parnokji meyirijang, noklang tenem aser ter madak tanishir kümdaktsü. 26Mapang ajak nung parnoki nüburtem tsüngda ken-o bendang, aser ken-o tasak Mosa dangi abenba dak alaka ken-o tila ajak parnoki pei sasa bendang.

27Mosai toko dang tepila o ashi, aser Yethroi pei kidangi meyipa ao.

ANITET 19

Sinai Tenem Nung

1Israel nunger Ijip lima nungi adoker külen ita asembuba anogo mezüngnü parnok Sinai lisem limai aru. 2Parnok Refidim nungi apusoa Sinai lisem limai aru, aser Sinai tenem jakdang anen. 3Aser Mosa Tsüngrem dangi atu.

Kibubai tenem nungi Mosa aja aser ashi, nai yamai Yakob kidong aser Israel nungertem dang shiang, 4 “Ni Kibubai Ijip nunger dak kechi inyak, aser koda mungzü tashikang manung nenok kümzüka kü dangi anir aru, aji nenoki nguogo. 5 Tang nenoki kü dang angadi süra, aser kü tezüngzüktepba benshidi süra, idangji kin ajak madak nenokji kü senti nübur asütsü, kechiaser ali ajak kü meyong lir, 6ni asoshi nenok putir yimli ka aser temeshi kin ka alitsü. Nai Israel nunger dang item o ashitsüla.”

7Anungji Mosai lua nüburtem rongnung tamburtem ajak jar Kibubai pa dang melaba ajak ashi. 8Idangji nüburtem ajak külemi langzü, “Kibubai ashiba ajakji onoki inyaktsü.” Aser Mosai nübur otemji Kibuba dang ashi.

9 Kibubai Mosa dang ashi, “Angang, ni ne den jembidang nüburtemi angashitsü, aser ano ne dang teti amangtsüsa, ni ne dangi mepet temelem nung arur.”

10 Kibubai Mosa dang ashi, “Nüburtem dangi oang, aser tanü o asüng na nai parnokji meshiteta yuang aser parnok süoshi shitokdakjang, 11aser tasemnübuba asoshi renema liang: kechiaser tasemnübuba nung nisung ajak tsüngdang Sinai tenem manung Kibuba alutsü. 12Nai nüburtem asoshi arrtsü meketa yuang aser shiang, nenoki tenem jagi matutsü, aser arrtsü nungji mekongshitsü atema kümdangang; shibaisa tenem nungji kongshidir atangji paji südaktsütsü. 13Shingaia pa dak mekongshidang pa lung agi mesüra lijak agi kaseta endoktsüla. Shiruru saka nisung saka taküm malitsü. Saka kodang jangzü mapang talangka apudir, idangjibo parnok tenem jagi atutsüla.”

14Idangji Mosai tenem nungi nüburtem dangi alua parnok meshiteta yutsü, aser parnoki pei süoshi shitok. 15Mosai parnok dang ashi, “Tasemnübuba asoshi renema liang. Tetsür tebur medemba nungia pila liang.”

16  Tasemnübuba anepdang tenem manung tsüngmok aser tsüngpret den mepet temelem, aser jangzü ola kanga tulu liasü, anungji tanendak aliba nüburtem ajaki atenten. 17Tsüngrem den ajuruteptsü Mosai nüburtemji tanendak nungi anir adok; aser parnok tenem tsüng nung noktak. 18Sinai tenem ajak mokozü agi asüng; kechiaser iba madak Kibuba mi nung alu. Mokozüji misem mokozü amai atu aser tenem ajak kanga anokshi. 19Jangzü olaji tali tesashiba aküm, Mosai Tsüngrem den jembi aser Pai tsüngmok nungi pa dang langzü. 20Kibuba Sinai tenem kolaki alua pai Mosa tenem kolak jagi aja, aser Mosa atu. 21Kibubai pa dang ashi, “Nüburtemi nungtepa Kibuba reprangdang parnok aika sama-a lir, luang aser parnok dang tekümdangtsü o shiang. 22Putirtema shirnok ni anasa arudir, parnok sasa meshitetdakjang, aji oda mesüra ni parnoka merenshitsü.”

23Mosai Kibuba dang ashi, “Nüburtemi tenem jagi matutsü, kechiaser nai onok nem tekümdangtsü o agütsüogo; kechiaser onok dang tenem meketa arrtsü ayutsü nai mela, aser aji meshitettsü ashi.”

24 Kibubai langzü, “Luang aser ne den Aron anir atung. Saka putirtem aser nüburtemi arrtsü atena kü dangi matutsüla, aji oda mesüra ni mit adoka parnok merenshitsü.” 25Anungji Mosai nüburtem dangi lua Kibubai pa dang ashiba o ajak ashi.

ANITET 20

Ozüng Ter

(Taz. 5.1-21)

1Tsüngremi item o ajak jembia ashi, 2“Na Ijip lima alar ki nungi anitetba ne Tsüngrem Kibubaji ni lir. 3Nai kü madang tangar tsüngremtem kecha telidaktsü. 4 Anüng temalen aser ali teküboklen mesüra tzü telunglen item nung aliba mesüka pei atema süngyanglu kecha na atema teyanglu. 5 Nai parnok madang tapudak mesüra parnok tekülem, kechiaser ni Kibuba temeshiba ne Tsüngrem lir. Ni tsürabur temenen atema par chirtem putu asem pezü tashi merenshitsü. 6Saka shirnoki kü dang meimer aser kü ozüngtem benshir parnok dang putu meyirijangsa meyirijang ni aochitsü.

7  “Nai Kibuba ne Tsüngrem tenüng amajok nung tetetshi, shibai amajok nung pa nüng tetshidir, Kibubai pa maitsüi meyutsütsü.

8  “Amungnü meshiteta mungang. 9 Anogo troknü tasena mapa ajak inyakang, 10saka tenetnübubajibo Kibuba ne Tsüngrem Amungnü lir. Iba anogo nung nai, jabaso, jala, kilir aser kilitsür, kiset shiruru mesüra ne den aliba aeneri mapa kecha teinyak. 11 Kechiaser anogo trok nung Kibubai anüng-ali, tzüyim aser idakji aliba ajak yanglu; aser tenetnübuba nung anisüngzük. Anungji ni Kibubai Amungnü moaja meshitet.

12 “Nebu aser netsü akhüm tsübuang, angji Kibuba ne Tsüngremi koba linük ne nem agütsür, yangji na arishi talangka alitsü. 13 Nai nisung tetepset.

14  Nai nüktapangta tebenshi. 15 Nai tauya. 16 Nai ne kiyonger anema tiyazü kuli teyi. 17 Nai ne kiyonger azüabung tesü, nai ne kiyonger kinungtsü, mesüra par kilir mesüra kilitsür, aser par nashi, gado mesüra ne kiyonger meyong kecha azüabung tesü.”

Nüburtemi Tsübuba

(Taz. 5.22-33)

18  Kodang nüburtemi tsüngpret preta tsüngmok amoka aser jangzü ola angashi, aser tenem nung mokozüji angu, parnoki tetsübu agi atenten, aser talangka pila-a oa noktak. 19Parnoki Mosa dang ashi, “Nai onok den jembiang aji onoki angadi. Saka onok süadoka lir Tsüngremi onok denbo tejembidaktsüma.”

20Mosai nüburtem dang langzü, “Tetsübuma, ibai nenok temenen memenai Tsüngrem dang tashi anga alitsü atema nenok tendangtsü pa aruba lir.” 21Saka nüburtemi ojita nung noktaka ata, saka mepet temelemdak kong Tsüngrem liasü aji anasabo Mosa dang ao.

Tenladak Sabang Atema Ozüng

22Idangji Kibubai Mosa dang ashi, “Israel nungertem dang yamai shiang, Ni nenok den anüng nungi jembiba nenok sasa nguogo. 23Nenoki kü dak alema taribi mesüra hon tsüngremtem kecha meyanglutsüla.” 24Ni asoshi ali agi tenladak sabang ka yangluang aser iba manungji tarongba tenla, yimjung tenla nenok san aser nashi tenla-ang; kongsa kü tenüng bilemtetdaktsütsü asoshi tekülemdak ni shimdir, ni ne dangi arutsü aser na moatsütsü. 25 Nai kü nem tenla sabang ka lung agi yanglutsürabang lungji angenteta meyanglutsüla, kechiaser lung tangentettsü osetji mekanga tura nai aji menendaktsür. 26Mesüra na mangsa aliba mungudaktsütsü atema nai kü tenladaki mejaketa matutsüla.

ANITET 21

Alartem Atema Ozüng

(Taz. 15.12-18)

1“Parnok madang item yimsüozüngtem lateta yujang, 2 nai Ibri nunger alar ka alira, pai na küm trok tenzüktsü. Küm tenetbuba nung kecha talang magütsüi pa chioktsüla. 3Pa kibong mekümi kija arua lira, pa kija dang aotsü, saka pa kinungtsü den arua lira, pai pei kinungtsü den aotsü. 4Pa kiburi pa nem kinungtsü ka agüja lira aser pa nem jala-jabaso soja lira, kinungtsü aser lar chirtemji kibur meyong alitsü, aser pa kija dang aotsü. 5Saka alar jagi ni kü kibur, kübutsü aser kü chirtem meimer, aser nüji küma moner ta shira, 6idangji pa kiburi Tsüngrem tsüngdangi pa anir aotsü; aser kishi mesüra kikümbang nung pa noktaka yutsütsü aser pa kiburi merang shijok agi pa tenarong atutsü. Idangji pa teti asoshi par lar akümtsü.”

7“Nisung kati pei jala alar asütsü asoshi yokra, lar teburtem ama labo nüji küma meyoktsü. 8Lai pei kibur shibai pei asoshi la ayu, pa mepeladaktsüra, idangjibo pai la meyipa alangzüktsütsüla; kiburi la dang timi mebenshi nungji pai la bendanger dang ayoktsü pa dak tashi malitsüla. 9Pai pei jabaso nem la agidaktsüra, pai la dang jala ka ama benshitsüla. 10Nisung kati kinungtsü anabuba agira, pai mezüng agiba kinungtsü nem chiyungtsü, süoshi aser la kiyimba tim shilem ajema mekümdaktsütsüla. 11Pai la dang item tim mapatem meinyakra, lai pa nem sen talang kecha magütsüi la aotsü akok.

Azü Tokshiba Anema Ozüng

12  “Shibai nisung dak zükdir aser pa tepsetdir pa atangji südaktsütsüla. 13 Saka nisungba jagi ibaji inyaktsü mebilemi inyakadokra aser aji Tsüngremi ataloktsüba ka süra, paji ni shimtettsüba yimti kati jena aotsü, aser yangji pa jenoktsü. 14Saka nisung kati asa-a dang pei kiyonger tepsettsü tasa asara, kü tenla sabang nungi pai anir oa pa südaktsütsüla.

15“Shibai pei tebu mesüra tetsü dak zükdir, atangji südaktsütsüla.

16  “Tangar dang ayoktsü mesüra pei kidang alar ama ayutsü asoshi shibai nisung auyadir, pa atangji südaktsütsüla.

17  “Shibai pei tebu mesüra tetsü atakatemdir, pa atangji südaktsütsüla.

18“Nisung ana raratep dang kati ka dak lung agi onra, mesüra teka agi tsüngra, aser teyiruba nisungji tasütsü mesüi yipten nung ontaka alitsüsa kümra; 19aser pai saker pei mechi amer jajaa otetra, shibai azük paji memerenshitsü, saka nübutsük asoshi pai item taa agütsütsü, aser pa junga maküm tashi anebalutsüla.

20“Nisung kari pei ajok agi par alar mesüra alatsür dak zükra, aser alarji süadokra, nisungbaji merenshitsüla. 21Saka alarji anogo ka ana nung jungadokra kiburji memerenshitsü. Kechiaser alarji pa rongsen ama lir.

22“Teburtem raratepdang mashisa aliba tetsür ka dak zükshia tanurji ano jungi südaktsüra, saka la dak tamajung kecha matalokra; tetsürla kinungpui pa dang meshiba ama atangji pa dang senchi achitsüla, aji obendangeri lemtettsüba ama pai agütsütsü tim. 23Saka tetsürlaji kanga mejungi yiruadokra pai taküm melen taküm agütsütsüla, 24 tenük melen tenük, tepu melen tepu, teka melen teka, tetsüng melen tetsüng. 25Tarongba melen tarongba, zübu melen zübu, tazükba melen tazükba.

26“Nisung kari pei alar mesüra alatsür dak tenük nung zükra aser aji raksatsüra, pai tenük atema alarji chiokadoktsüla. 27Aser alar mesüra alatsür dak pai tepu ka züktoktsüra, iba atema alarji chiokadoktsüla.

Shiruru Kibur Teinyaktsü

28“Nashi pungchi kati tebur mesüra tetsür kar dak tasütsüsa tongra, aji lung agi onsettsüla, aser iba shiji machitsüla. Saka kiburjibo memerenshitsüla. 29Saka nashi pungchi jagi akhidang nungi nisung dak tonga lira, aser iba indang kibur dang metetdaktsür liaka, pai aji meshibangi toktsüra aser iba jagi nisung kar tongsettsüra, aji lung agi onsettsüla aser kiburjia atangji südaktsütsüla. 30Saka kibur dangji pa taküm alang senchi meshira, kechi talang lir pai aji agütsütsüla. 31Nashi pungchi jagi tebur chanu ka mesüra tetsür chanu ka dak tongra, kasa ozüng jagisa merenshitsüla. 32Nashi pungchi jagi alar mesüra alartsür dak tongra, nashi kibur jagi alar kibur nem taribi sen semer agütsütsüla aser nashi pungchiji lung agi onsettsüla.

33“Nisung kari kangla ka tura, mesüra kangla ka tur aji menembangi alidang nashi mesüra gado idakji asongdaktsüra, 34pai iba temenok agütsütsüla. Shiruru kibur nem pai talangji sen agütsütsü aser shiruruji pa meyong alitsü. 35Aser nisung kar meyong nashi pungchi-i tangar shiruru yirutsüra aser aji südaktsüra, idangji taküm alibaji yoker senji tena lemdangtsü, aser tasüba shiruru kasa lemdangtsü. 36Saka akhidang nungi nashi pungchi jagi atongba meteta lir nung kiburi aji meshibangi lira, kibur jagi shiruru melen shiruru agütsütsüla, aser shiruru tasüji pa meyong alitsü.

ANITET 22

Temenok Agütsüba Indang

1“Nisung kari nashi pungchi mesüra san ka auyar aji tepsetra mesüra yokra, pai nashi pungchi ka melen nashi pungu aser san ka melen san pezü agütsütsüla. 2Auür ka kidangi ia lia pura, aser tasütsüsa pa dak zükra, pa zü asoshi pa tai malitsü. 3Saka anü adoka alidang aji atalokra, pa azü tokshiba asoshi tai alitsü. Pai auyaba atema temenok agütsütsüla, saka pa kecha makara, pai auyaba temenok atema pa ayoktsü. 4Saka pai auyabaji taküm lia ngura, nashi, gado mesüra san pai anasü agütsütsü tim.

5“Nisung kari pei shiruru chioka tangar alu mesüra tsükmenatzü lu chidaktsüra, pai par lu mesüra tsükmenatzü lu tajungtiba agi temenok agütsütsü tim.

6“Kari mi yoka iba jagi tangar lu nung tsük aser noktaka aliba tsük mesüra alu ajonga rongdoktsüra, shibai mi asen, pai temenok agütsütsü tim.

7“Nisung kari pei kiyonger ket nung taribi mesüra oset yutsüba auyar oadokra, aser auürji putetra, pai shilem anasü agütsütsü tim. 8Saka auürji meputetra, kibur shibai osetji pai yokdaktsü pai pei kinunger oset dakji teka ai asü mai, metettsü atema o bendangdaki anir aotsüla.

9“Oset samaba indang mangatettepba oda nashi, gado, san süoshi mesüra tesamaba ajak atema obendangdaki bener arutsü tim; Tsüngremi shiba aitsüdir pai tangarba nemji anasü agütsütsü tim.

10“Nisung kari pei kiyonger nem gado mesüra nashi, san, shiruru kar ayutsü agütsüra, aser shingaia mungui aji süadokra mesüra zübu ketra aser aridokadokra, 11pai pei kiyonger oset nung amtak asü mamtak Kibuba madang azüngashitsü tim; kibur jagi iba azüngashibaji agizüktsü tim, aser joko temenok magütsütsü. 12Saka aji pa nungi aua or lira, pai iba kibur nem temenok agütsütsü. 13Saka shiruruji arem shirurui tepseta lira, nisungba jagi tanüngbaji kuli atema bener arutsüla, aser arem shirurui tepsetba atema pai temenok magütsütsü.

14“Nisung kari pei kiyonger nungi shiruru ka apura aser shiruru kiburji malidang aji yirura mesüra süadokra, nisungba jagi temenok agütsütsü tim. 15Saka ibaji kibur lia atalokra nisungba jagi iba temenokji magütsütsü. Ibaji taa asoshi ayuba süra, taa asoshi agütsüba senji temenok agütsüba ama alitsü.

Libaliro aser Yimsü Ozüng

16  “Nisung kari tasüngtet aser ano ani masüngi aliba aiür mesüzüka la den nüktapangtara, pai la atema anisen agütsütsüla aser la agitsüla. 17Saka aiürla tebui pa dangi meyokra, pai aiürla asoshi anisen agütsütepba ama la tebu nem sen agütsütsü tim.

18  “Nai Arasentsür shinga taküm melidaktsütsüla.

19  ‘Shibaisa shiruru den medemdir, pa atangji südaktsütsüla.

20  “Shibaisa Kibuba dak alema tangar tsüngrem dang tenladir, pa meshimeshia samajang.

21  “Nai aener dang tamajung tebenshi, mesüra parnok tekangshi, nenok Ijip lima nung aenersa liasü ta bilemtetang.

22“Amitsür mesüra lajar tekangshi. 23Nenoki parnok kangshira, ni Kibubai parnoki teyari asoshi ayimtenba ola langzütsü, 24aser ni mit adoka nenok tepsettsü. Nenok kinungtsürtem amitsür akümtsü, aser nenok chirtem tebu mali kümdaktsütsü.

25  “Nenok den aliba kü nübur sensaker kar nem nai sen aputsüra, sen taputsür ka ama nai pa dang tebenshi aser pa nungi sentem magitsüla. 26 Ne kiyonger kar den nai nangzükteper parnok süoshi agira pa nem anü maidangsa aji meyipa agütsütsüla, 27kechiaser pa asoshi aji dang tabentsü sü lir. Pa kechi nung mejangtsü? Kodang pai teyari asoshi ayimtendir, ni pa dang langzütsü, kechiaser kü dak taochi lir. 28 Nai Tsüngrem sensamasa masütsüla mesüra ne nübur madak yimsüsür atakatem masütsüla.

29“Ne tsük, yi aser oliv totzü nungi kü dang tenlatsü temenu. Ne mezüng asoba jabaso kü nem agütsütsüla. 30Aser ne mezüng mepuba nashi, san kü nem agütsütsüla. Itemji anogo tenetnü tashi tetsü den alitsü, aser tinübuba nung kü nem agütsütsüla.

31  “Nenok kü temeshi nüburtem asütsü, anungji nenoki arem shirurui tepsetba shiruru shi kecha machitsüla; saka nenoki aji azü nem agüjang.

ANITET 23

Ochi aser Taochi

1“Nai tiyazü osang teprokshi, aser tamajunger ka asoshi tiyazü kuli ajanga teyari. 2Tamajung inyaktsü asoshi telok tuluba sülen nai tanitak, mesüra obendangdak ochi meyipsatsütsü merangba telok tsütsü na teten. 3 Obendangdak sensaker anema nai tejak tereprang.

4  Nai ne tsükchir nashi mesüra gado lenmang aia oya ajurura, pa dangi aji anir arujang. 5Ne dang sempaba nisung ka meyong gadoji khu agi neneter mepitaka ngura, nai ibaji ajanga odangbo maotsüla, saka aji yaritsüla.

6Nai obendangdak sensaker anema ochiji temeyipsatsü  7Tiyazü kuli agi shinga aija temerenshi, aser tai makaba aser ochishir nisung nai tetepset, kechiaser shibaisa temenen mapa inyakdir, ni parnokji aitsütsü. 8Nai süpokrem tagizük, kechiaser süpokrem ajanga shitak inyaktsüba lenmang nungi nisung tenük pokdakja tai makaba nisungtem timtemdaktsür.

9  “Nenoki aener tekangshi, kechiaser nenok Ijip lima nung aenersa liasü, anungji aener mulungjang nenoki meteta lir.

Amungnü Ozüng

10  Küm trok tashi nai alu nung metsü proka iba nungi tejang bendenang. 11Saka ne nübur sensakertem achitsü asoshi küm tenetbuba nungbo ali nungji nai metsü meproki tokjang; aser parnoki kechi anüngzükdir aji moapu nung aliba shirurui achitsü. Iba amaji nai ne tsükmenatzü lu aser oliv tsüki asoshia inyakang.

12  “Anogo trok nai ne mapa inyakang, aser ne nashi aser ne gado anisüngzüktsü aser ne alartsür jabaso aser aener anisüngzüktsü asoshi tenetnübuba nung na anisüngzüktsü.

13“Ni nenok dang ashiba ajak angang: tangar tsüngremtem tenüng tetetshi, mesüra ne tebang nungi shinga nema tangashidaktsü.”

Benjong Asem

(Ani. 34.18-26; Taz. 16.1-17)

14Küm nung asemben nenoki ni asoshi benjong amungtsüla. 15 Ni nenok dang melaba ama: Piyazü meinokba am Benjong nenoki amungtsüla. Anogo tenet tashi piyazü meinokba amtsük chiang. Ibaji Ahib ita anogo shitak nung amungtsüla, kechiaser iba ita nung nenok Ijip lima nungi adok. Anungji shinga kü tsüngdangi teka tazüng marutsüla.

16  “Kodang alu nung nai prokba nungi mezüngbuba süngjang bendentsü mapang tongdir, aluruba Benjong mungang. Aser küm tatem nung kodang ne metsütem alu nungi bendendir, Terizüngba Benjong mungang. 17Küm nung item Benjong asem amungdangji nenok tebur shiai ni Kibuba ne Tsüngrem külemtsüla.

18“Ni asoshi tetepsetba tenlaba zü den piyazü enokba am metenlatsüla. Item benjong nung ni atema tepsetba shiruru temoji anepdang tashi mayutsüla.”

19  “Küm shia nai züsentetba nungi mezüngbuba süngjangji Kibuba ne Tsüngrem dangi bener arutsüla. Nai nabong techanu shi pei tetsüdi mamatzü nung masotsüla.

Tsüngrem Tenyari Lenmang Renemtsüba

20“Na lenmang anitsü aser ni renemja akaba linük jagi na anir arutsü asoshi ni ne jakdang tenyar ka yoktsü.” 21Nai pa dang angang aser pai kechisa shidir aji inyakang. Pa anema tapuso, kechiaser ni pa yok, kü tenüng pa den lir aser pa anema noktakba atema tatok magütsütsü. 22Saka nai pa ola angadi süra, aser ni ashiba ajak inyakra, idangji ne tsükchir ka aser ne anemertem dang nia anemer ka alitsü. 23Kechiaser kü tenyar ne jakdang aotsü aser Amor nunger, Het nunger, Perez nunger, Kanan nunger, Hiv nunger aser Yebus nunger dangi ni na anir arutsü; aser ni parnok leptokadoktsü. 24Parnok tsüngremtem tsüngdang tapudak, mesüra tekülem, aser par yimsü-yimbongtem tebenshi. Parnok tsüngremtem aser par tekülemba temeshi tongshitemji anüka raksajang. 25Aser nenoki nenok Tsüngrem Kibuba tenzüktsü, aser pai ne chiyungtsü aser tzü moatsütsü: aser nenok rongnung tashitak ajak agienadoktsü. 26Ne linük nung shingaia pei-i tanur abenba meraksatsü mesüra tapung makümtsü. Ni ne nem arishi talang agütsütsü.

27“Na anema aruba tsükchirtem kin dangi ni tetsübutsü aser mangatettep adokdaktsütsü aser ni ne tsükchirtem ne jakdang nungi meyipa tesüleni jena odaktsütsü.” 28Ne jakdang nati yoka iba jagi ne lenmang nung aliba Hiv nunger, Kanan nunger aser Hit nunger ni aridoktsü. 29Ni parnok küm ka nung dangbo maridoktsü, yamaji mesüra alimaji azüngazünga küma na asoshi arem shirurutemji tali züintsü. 30Na aika renloka kümer linükji magi tashi ni parnokji terara dang aridoktsü. 31Ne litsü Temerem Tzüyim nungi Filistia nunger tzüyim tashi, lisem lima nungi Eufrata ayong tashi alitsü; kechiaser yangji aliba nisungtemji ne ket nung ni bendanga agütsütsü, aser nai parnok aridoktsü. 32Parnok den mesüra parnok tsüngremtem den nai kecha tezüngzüktepba mayutsüla. 33Ni anema parnoki na temenen menadaktsütsü asoshi, nai ne linük nungji parnok telidaktsü. Nai parnok tsüngremtem külemra, aji na asoshi sang ka asütsü.”

ANITET 24

Tezüngzüktepba Akangshiba

1 Kibubai Mosa dang ashi, “Na, Aron, Nadab, Abihu aser Israel nunger tambur neter kü dangi tenemi atung, aser meta apiga nungi apudaka külemang. 2Ne dak alema tangar shinga ni anasai marutsüla. Nüburtemji keta tenem jagia matutsüla.”

3Mosai arua nüburtem dang Kibubai melaba o aser ozüngtem ajak ashi, aser parnok ajaki külemi langzü, “Kibubai ashiba ajakji onoki inyaktsü.” 4Kibubai melaba ajak Mosai zülu aser tasüngnepji anepdang pai yakta saaka tenem tsüng nungji tenladak aser tongshi terana agi yanglu. Tongshi shia Israel kidong ka ka temaitsü liasü. 5Aser pai Israel asangurtem Kibuba dang tarongba tenla aser nashi pungchi tepseta telungjem tenlatem agütsütsü yok. 6Mosai shiruru züji tesadang ka susa nung ayu, aser tesadang kaji tenla sabang nung rükloktsü. 7Idangji pai tezüngzüktepba kaket koba Kibuba ozüngtem zülua lir, aji agiteta nüburtem madang tashi agi azüng aser parnoki langzü, “Onoki Kibubai ashiba ajak angatsü aser pai melaba ajakji inyaktsü.”

8  Idangji Mosai susa nung aliba azüji bener arua nüburtem dak rüklokja ashi, “Ibai nenok Kibubai tezüngzüktepba agiba züji lir, koba temelabatem benshitsü pai nenok nem agütsü.”

9Idangji Mosa, Aron, Nadab, Abihu aser Israel tambur neterji atu, 10aser parnoki Israel Tsüngrem angu. Pa tetsüng kübok merük merüka aliba anüng sentsü ama sapfir lung agi labanga aliba angu. 11Tsüngremi item Israel lenirtem madak pa teka memekang, aser parnoki Tsüngrem angu; aser parnoki chia ajem.

Mosa Sinai Tenem Nung

12 Kibubai Mosa dang ashi, “Kü dangi tenemi atung, aser nüburtem atema kü temelaba ozüngtem koba ni lungpak nung zülua lir, aji ne nem agütsüdi.” 13Mosa aser pa teyarir Yihusua na renemer Tsüngrem tenemi atu. 14Mosai tambur dang ashi, “Onok tanaben meyipa malu tashi nenok yangi dang ata-a liang. Aron aser Hur na nenok den lir, nenok rongnung mangatettep kar adokra parnok dangi oang.”

15Kodang Mosa Sinai tenem jagi atu mepeti aji sübang. 16Aser Kibuba sentsüwangshi Sinai tenemi alu. Anogo troknü tashi mepet jagi tenemji sübanga liasü, aser tenetnübuba nung Kibubai mepet nungi Mosa den jembi. 17Israel nunger nükdang tenem nung Kibuba sentsüwangshi milak ama liasü. 18 Aser Mosai mepet jagi yia tenem nung anogo lir aser aonung lir liasü.

ANITET 25

Tekülemdak Tenlaba

(Ani. 35.4-9)

1 Kibubai Mosa dang ashi, 2“Ni asoshi Israel nungeri tenla ka ka benang ta dang shiang. Nisung shiai pei mulungtetba ama kechi tenladir aji agizükang. 3Nai agizüktsüba tenlaji hon, taribi, yongmen yin, 4sü tajung, anüng sentsü, nakrema meremba, tezüng sü, sü temerem, nabong züng agi yangluba sü; 5san tepung küp sentsü temerem nung aremba shiküp tanak, akashia süng; 6milen asoshi oliv totzü, temezütsü asoshi totzü aser teronem menemba liangmesen; 7oniks lung, temenoktsü lung, putir teku nung semoktsü asoshi sentsüprang lung. 8Ni parnok rongnung alitsü asoshi nüburtemi kü nem temeshi tekülemdak tenladak tekülemdak ka yanglutsütsüla. 9Ibaji koma yanglutsü aji ni ne dang sayutsü aser nai yamaji yanglutsüla.

Tezüngzüktepba Süngden

10“Aser parnoki akashia süng agi süngden ka yanglutsüla, metong nung süklep ana ser tesadang; lenten süklep ka ser tesadang; aser touchiji süklep ka ser tesadang asütsüla. 11Ibaji hon temeja agi temalen aser telunglen ajak yangbangtsüla, aser hon agi tatembanglen ajakji südangtsüla. 12Aser idakji hon tayi pezü ketdakjang aser aji tetsüng pezü nungji külen tayi ana, aser külen ana ta akettsüla. 13Akashia süng agi süngra yangluang aser aji hon agi yangbangtsüla, 14aser süngdenji abentsü asoshi itemji tayi nungji enokang. 15Süngraji tayi nungji enoka ayutsüla aser aji magitettsüla. 16Ni ne nem agütsütsü aliba lungpak ana koba nung kü temelaba ozüngtem zülua lir aji süngden nungji enoka yuang.

17  “Aser nai hon temeja agi tenembangtsü yangluang: ibaji metong nung süklep ana ser tesadang, aser iba lentenji süklep ka ser tesadang. 18Aser tenembangba tatem anatsülenji jungjunga atsüngba hon cherubim ana nai yangluang. 19Aser tatem külen cherub ka aser külenji cherub ka ta yangluang: aser iba tatembang ana manung cherubimji temekettsü denji ka dang küma nenoki yangluang. 20Aser cherubimji parnok tashikang agi akhümbanger, parnok tashikang azüklen sarar alitsüla. 21Aser süngden temalenji nai temekettsü den ayutsüla; aser ni ne nem agütsüba ozüngji temeshi süngden telung nung nai yuang. 22Aser yangji ni ne den ajurutepdi, aser Ozüng Süngden manung cherubim ana tsüngda nung temekettsü nungji Israel chirtem dang temelaba koba ni ne nem agütsütsü, ajak indang ni ne den jembitsü.

Amtsük Tenla Asoshi Langbang

23“Akashia süng agi langbang ka, metong nung süklep ana, lenten süklep ka aser touchi nung süklep ka ser tesadang yangluang. 24Aji hon temeja agi yangbangang aser hon agi tatembang ajakji meketa yangbangtsüla. 25Aji meketa tekapu ka lema tebanglak keta yangluang, aser iba tebanglakji hon agi züdanga yangluang. 26Iba atema hon tayi pezü yanglua, itemji tetsüng pezü nungji enokang. 27Langbang abentsü asoshi süngra tebanglak anasa tayitemji alitsüla. 28Süngraji akashia süng agi yangluang aser aji hon agi yangbangang. 29Hon temeja agi nai su, marok aser tezüoktsüba marok, susatem tezüoktsü asoshi yangluang. 30 Langbangji tezüngzüktepba süngden jakdang ayutsüla, aser langbang manung kü dang tenlatsüba amtsükji teti yujang.

Milendong Atalokdak

(Ani. 37.17-24)

31“Ano hon temeja agi milendong atalokdak ka yangluang. Temtsüng aser tedongji hon agi jungjunga tsünga yanglutsüla, 32aser marok koba naro temechi mesüka yanglur, ibaji milendong atalokba denji ka dang küma anatsülenji kongsang trok tipleni sangshia, tip shia kongsang asemsem oa yanglutsüla; 33Kongsang ka nung almond naro apungba ama marok asem, temechi ka aser naro ka; aser kongsang ka nungji almond naro apungba ama marok asem, temechi ka aser naro ka, yangji milendong nungi kongsang trok sangshia alitsü. 34Aser milendong nungji almond naro apungba ama marok pezü, iba temechitem aser narotemji: 35aser kongsang ana kübok temechi ka iba denji ka küma, milendong nungi kongsang trok sangshia oa alitsü. 36Iba temechitem aser kongsangtemji iba den temang ka dang: ajongaji hon temeja agi ka küma atsüngba mapa alitsü.

37“Milendong atalokdak asoshi milen tenet yanglur idakji ataloka yuang, aser iba jagi tejaklen nungi tesangwa agütsütsü. 38Milen nung enokba angsü mejeptokba aser iba susaji hon temeja agi yangluba asütsüla. 39Milendong aser iba yangluba nung amshitsü asoshi hon temeja seret semer agitsüla. 40 Ni ne dang tenem nung inyaktsü sayuba ama nai itemji kümdanga yanglutsüla.

ANITET 26

Tekülemdak Süki

(Ani. 36.8-38)

1“Ano, nai tekülemdak sükiji teyindangba sü ter dena yangluang, temechiba kümpa sü tanük, anüng sentsü, nakrema meremba aser jakja-a meremba sentsü, cherubim keter tetangshi mapa inyaker mapa ama nai yangluang. 2Teyindangba sü shia metong nung süklep metsür-ti, aser teyindangba sü lenten shia süklep pezü asütsüla: teyindangba sü ajak tasazük kasa alitsüla. 3Teyindangba sü pungu külemi metentepang, aser tanga teyindangba sü pungujia külemi metentepang. 4Aser temaba teyindangba sü ka manung temetentepba sübang azüngba tatem nungi nai tepungoktsü anüng sentsü agi yangluang, aser yamaji teyindangba sü, temetentep tanabuba tematiba tatembanglak manung nai yangluang. 5Teyindangba sü ka nung nai tepungoktsü tenem yangluang, aser tanabuba temetentep teyindangba sü tatembang nungji tepungoktsü tenem nai yangluang. 6Aser nai hon lakepsen tenem yangluang, aser teyindangba sütemji lakepsen jagi külemi metentepang: angji tekülemdak sükiji ka akümtsü.

7Aser tekülemdak süki manung süki asoshi nai nabong züng agi teyindangba sü yangluang; itemji teyindangba terka nai yangluang. 8Teyindangba sü shiaji metong süklep semer aser teyindangba sü terkaji tasazük kasa alitsüla. 9Nai teyindangba sü pungu balaka aser tanga teyindangba sü trokji balaka nung ta metentepang, aser süki tejaklen asoshi teyindangba sü trokbubaji reptepang. 10Aser tatongtep ka nung tatembuba teyindangba sü tatem nungji tepungoktsü tenem nai yangluang, aser tanabuba tatongtep tatembuba teyindangba sütem nungjia tepungoktsü tenem yangluang. 11Aser nai yongmen yin agi lakepsen tenem yangluang, aser sükiji ka küma metenteptsü asoshi lakepsenji tepungoktsü nungji enokang. 12Aser süki teyindang sü temalen sangzüa anünga alibaji, tekülemdak süki manung tesülen yindangtsüla. 13Aser süki teyindangba sü metong nung anüngba külen tsütsü süklepji aser tangalen ano külen süklepjia, nembangtsü asoshi tekülemdak süki tip külen manung sangzüa alitsüla. 14Aser süki tenembangtsü asoshi san tepung küp temerem küma remer, aser iba manung shiküp tajung agi temeyibangtsü nai yangluang.

15“Süki asoshi nai akashia süng agi azüklen yangerang. 16Süngtsük shia metong nung süklep ter, aser lenten nung süklep ka ser tesadang asütsüla. 17Süngtsük shia nung tesepoktsü süngbang anana kati ka den metentepa alitsüla; yamaji tekülemdak süki süngtsük ajak nai yangluang. 18Aser tekülemdak süki asoshi süngtsük metsü anüdoklentip shia nai yangluang. 19Aser süngtsük metsü teküpoklenji nai taribi agi tesembangtsü lir yangluang; süngtsük ka nung tesepoktsü süngbang ana asoshi tarepteptsü ana aser ano süngtsük tanga ka asoshiji tesepoktsü süngbang ana asoshi tesembangtsü ana; 20aser tekülemdak süki tanabuba tip külenjia anüdoklentip süngtsük metsü: 21aser item asoshi tesembangtsü taribi agi yangluba, süngtsük nung tesembangtsü ana, aser ano süngtsük tanga asoshi tesembangtsü ana. 22Aser anüolen tsütsü tekülemdak süki tesülen asoshiji, nai süngtsük trok yangluang. 23Aser tekülemdak süki tesülen kinük asoshiji, nai süngtsük ana yangluang. 24Aser itemji teküboklen balaka, temalenbo mezüngbuba küri nungji metentepa alitsü; yamaji anaprong asoshi alitsü, item jagi kinük anaji akümtsü. 25Terazük ti alitsü, tamentakdak taribi agi yangluba, tamentakdak tertrok; terazük ka kübok tamentakdak ana, aser tanga terazük kübok tamentakdak ana.

26Akashia süng agi tarütangtsü terpungu tekülemdak süki tip külen asoshi süngtsük pungu, 27tip külen pungu, aser tip külen anüolen tsütsü asoshi pungu ta alitsü. 28Süngtsük tiyong nung tarütangbaji süki tatem külen nungi külen tatem tashi asütsüla. 29Aser idakji hon yanglokang aser hon tayitemji tarütangtsü asoshi idakji metenlokang, aser item dakjia hon yanglokang. 30Ni ne dang tenem nung sayuba ama nai tekülem sükji yanglutsüla.

31“Anüng sentsü, nakrema meremba, jakja-a meremba, tezüng sü temerem agi tetangshi mapa inyakteter nem cherubim keter temeyibangba süji yangludakjang. 32Aji hon mezülokba akashia süng tongshi tezü taribi tesembangtsü pezü manungji sangzüa yujang. 33Teyindangba süji tekülemdak süki kilem kübok itaka yuang, aser iba telunglen jagi Ozüng Süngdenji bener aitang. Teyindangba sü jagi Temeshi tesem aser Temeshitiba tesem bendangtsü Tezüngzüktepba süngden manung yuang. 34Aser temeshitiba taktang nung taochi menden manung nai ozüng süngdenji yuang. 35Langbangji Temeshitiba taktang nung aliba tezülen, süki anüdoklentip aser milendong atalokdak anüolentip tsütsülen yuang.

36“Tekülemdak süki kikümdong nungji teyindangba süji anüngsentsü, nakrema meremba, aser tezüng sü temerem den meyoktepa mechiba asütsüla. 37Teyindangba sü asoshi teyidaktsü akashia süng agi tongshi pungu yanglur, idakji hon yangloktsüla, aser aji hon agi yangluba teyinloktsü denji metenteptsüla. Iba atema yongmen yin tesembangtsü pungu yangluang.

ANITET 27

Tenladak Sabang

(Ani. 38.1-7)

1“Nai akashia süng agi tenla dak sabang metong nung süklep pungu, aser lenten nung süklep pungu yangluang, tenladakji pezüsülen tasazük kasasa aser tongshi nung süklep asem. 2Tenladak kinük pezüsülenji tezü ka ka yangluang, anungji tezü aser tenladakji temang ka dang asütsü, aser tenladakji yongmen yin yanglokang. 3Chipo-anpo ajak, aut endokba po, mijepru, autteptsü susa, shijok, item ajak yongmen yin agi yangluang. 4Yongmen yin agi menja yangluang aser iba temalen kinük pezü nungji yongmen yin agi tayi pezü yangluang. 5Menjaji tesadang ka tashi tenladak atutsüsa sadem telunglenji yuang. 6Akashia süng agi süngraji yangluang aser aji yongmen yin agi yangpangang, 7itemji kinük ajaklen tayi nungji enoker iba nungji tenladakji abentsüla. 8Tenladakji süngtsük agi küroka yangluang. Tenem nung ni ne dang inyaktsü tuyuba ama itemji yanglutsüla.

Tekülemdak Süki Kimalen

(Ani. 38.9-20)

9“Nai tekülemdak süki kima yangluang: anüolentip asoshi külen tsütsü kima atema temechiba kümpa sü tajung, süklep noklang ka tip külen asoshi sangzüa alitsüla; 10aser iba tongshi metsü, aser item tesembangtsü yongmen yin agi yangluba metsü; tongshi nung jui metenteptsü atema yanglubaji taribi alitsüla. 11Aser yamaji anüdoktip tsütsü metong nung süklep noklang ka sangzüa asütsüla, aser iba tongshiji metsü aser item tesembangtsü yongmenyin agi yangluba tongshi metsü jui metenteptsüji taribi asütsüla. 12Anüolen tsütsü kimaji süklep tenem tongshi ter, aser tesembangtsü ter. 13Anüdoklen tsütsü aliba kima lentenji süklep tenem asütsüla. 14Kikümdong külen asoshi teyindangba süji süklep metsü: anüng sentsü, nakrema meremba, tezüng sü temerem, aser temechiba sü tanük, sü dak noksa enoker inyakba mapa aser item asoshi tongshi pezü den tesembangtsü pezü agitsüla. 15Aser ka asoshiji süklep terpungu sangzüa alitsüla: item asoshi tongshi asem aser tesembangtsü asem. 16Aser kima kiküm asoshi teyindangba sü süklep metsü, anüng sentsü, nakrema meremba, aser jakja-a meremba, aser temechiba kümpa sü tanük, noksa enokeri inyakba mapa; item tongshi pezü aser tesembangtsü pezü. 17Kimalen lenten meketa aliba tongshi ajakji taribi yinzü agi alenteptsüla. Iba juiji taribi aser tesembangtsüji yongmen yin asütsüla. 18Kima lenten metong nung süklep noklang ka, lenten nung süklep tenem, aser touchi süklep pungu asütsüla. Teyindangba süji temechiba sü tajung aser tesembangtsüji yongmenyin asütsüla. 19Tekülemdak süki nung amshiba osettsüset ajak, tasongtsü aser süki kimalen tangenteptsü oset ajakji yongmenyin agitsüla.

Milen Aser Totzü

(Lev. 24.1-4)

20“Israel nunger dang milenji teti jangrua alitsü asoshi oliv totzü tajungtiba bener arutsü nai parnok dang mela-ang. 21Sentep süki nung teyindangba sü temalen koba Ozüng Süngden jakdang lir, idakji kü madang Aron aser par jabasotemi milenji nikongdang nungi anepdang tashi Kibuba madang jangrua ayutsüla. Iba ya Israel nunger aser parnok semchirtem tarutsü putu ajak asoshi teti tezüngzüktepba ozüng alitsü.

ANITET 28

Putir Sobutsü

(Ani. 39.1-7)

1“Israel nunger rongnungi nedi Aroni pa jabasotem Nadab, Abihu, Eleazer aser Ithamar, anir arudakjang. Anungji parnoki kü tsüngdang putir ama tenzükdaktsü. 2Nedi Aron asoshi putir sobutsütem tobur junga aser mera keta temeshi sobutsü yanglutsüla. 3Mapa nung tetangshi nisung ajak shir nemsa ni tesangra shisatsü agüja lir, parnok dang Aron atema tekülem nung abentsü süoshi yanglutsütsü nai shiang; anungji pai ni asoshi putir mapa bendanga tenzüktsü. 4Item süoshi parnoki yanglutsüla, teku semoktsü, putir temeshi sobutsü, temalen asemba semoksü, teptang aketba semoksü, kolakjen sü, aser peremlen ka. Parnoki itemji putir sobutsü nedi Aron aser pa jabasotem asoshi yanglutsüla, aji oda parnoki kü dang putir mapaji tenzüktsü. 5Parnoki hon aser anüng sentsü, nakrema meremba, tezüng sü temerem kümpa sü tanük tajung agi aji yanglutsüla.

6“Temeshi sobutsüji anüng sentsü, nakrema meremba, tezüng sü temerem, aser kümpa sü tanük tajung agi sangra-a mechitepa yanglutsüla. 7Aji tatem anatsülen metentepa tapubang nung pungoktsü tayi ana alitsüla, aser aji külemi akanga mesülokang. 8Aser iba manung sangra-a yangluba peremlenji aji mesüka aser iba den ka dang alitsüla; hon, anüng sentsü, nakrema meremba, jakja-a meremba, aser kümpa sü temechiba tajung.

9“Aser nai oniks lung ana bena arua iba manung Israel kidong tenüng angenpoka züluang; 10parnok jakzükba ama tatongi shia lung ka nung trok aser tanüngba trokji lung ka nung angenpoka züluang. 11Tangenba nisungi lung nung tenüng züluba ama, nai Israel chirtem tenüng lung ana nungji angenpoka zülutsüla; aser aji nai hon keptang nung amenokang. 12Aser Israel chirtem asoshi tebilemtettsü lung alitsü asoshi tapubang nung pungoka sü tila ana manung aji nai ayutsüla. Aser tebilemtettsü asoshi Kibuba madang parnok tenüngji Aroni pa tapubang ana nung abentsüla. 13Aser nai hon agi keptang yanglutsüla; 14hon temeja agi yinzü ana, lisü peretepa ashiba ama yangluang aser hon keptang nungji enoktsüla.

Teku Semoktsü

(Ani. 39.8-21)

15“Nai tesangra agi obendangba teku semoktsü putir temeshi sobutsü yangluba amaji nai yanglutsüla, hon, anüng sentsü, nakrema meremba, jakja-a meremba, aser temechiba kümpa sü tajung agi aji yanglutsüla. 16Süji tatembang pezüsülen tasazük kasasa aser aji reptepa alitsüla. Ibaji metong nung aka ka, aser lenten nunga aka ka. 17Iba nungji senti lung taren pezü amenloktsüla. Mezüngbuba taren nungji ruby, topaz aser garnet. 18Tanabuba taren nungji emerald, sapfir aser diamond; 19tasembuba taren nungji jacint, aget aser amethis. 20Pezübuba taren nungji beryl, oniks, aser jasper. Item amenokdakji hon agi meketbangtsüla. 21Lung teranaji Israel kidong terana temaitsü asütsü asoshi lung shia nungji Israel chirtem tenüng ka ka angenpoka zülutsüla. 22Teku semoktsü manungji hon temeja lisü agi mesentepa yinzü yanglutsüla. 23Teku semoktsü temalen denji sendaktepa hon tayi anaji yangluang, 24hon yinzü anaji teku semoktsü tatembanglen tayi ana nungji enokang. 25Temesentepba yinzü külen tatem anaji keptang ana tatembanglen enoktsüla, aser aji putir tapubang nung pungokba temeshi sobutsü sü tejaklen sendakang. 26Aser hon agi tayi ana yangluang aser aji putir teku semoktsü temtsünglen temeshi sobutsü anasa enokang. 27Ano hon tayi ana yanglua temeshi sobutsü tapubang anasa sü ana teküpoklenji mesülokang. Iba tejaklen temetentepdak sangra-a atakba teperem naiba sü temalenji sentakang. 28Teku semoktsü nung aliba tayiji putir temeshi sobutsü nung aliba tayi dakji anüng sentsü, temechiba sü agi alenlokang, anungji teku semoktsüji teperem naiba dakji sentaktsü aser aji sepshia makümtsü.

29Kodangsa Aroni temeshidaki yidir, Kibuba madang pai mamai bilemtetdaktsütsü asoshi Israel chirtem tenüng angenpoka züluba koba pa temulungjang manung atalokba obendangba teku semoktsü lir, pai aji teti abentsüla. 30 Aser nai obendangba teku semoktsü nung Urim aser Thummim enoktsüla; aser Kibuba madangi Aron teku manung itemji alitsüla; aser Aroni maneni Israel chirtem obendangba pa mulungjang manung Kibuba madang abentsüla.

Putir Sobutsütem

(Ani. 39.22-31)

31“Putir temeshi sobutsü ajongaji anüng sentsü temeja asütsüla. 32Sü tiyong nungji tekolak asoshi tapok apatsüla, aser aji meshisatsü asoshi tapokji meketa artsüla. 33Semoktsü ajaklen jarem meketa mesüa, anüng sentsü, nakrema meremba, aser tezüng sü temerem agi yanglutsüla, aser itemji meketa hon sangshia yangluang. 34Hon sangshi ka sülen jarem naro ka, ta paitepa semoksü temtsüng sobutsü meketa naia oang. 35Tekülem dang Aroni aji asemtsüla. Kodangsa tenzüktsü asoshi Temeshi taktangi pa kü dangi aitdir, mesüra kü dang nungi tugudir, iba sangshi olaji angashitsü, aser pa masütsü.

36“Nai Hon temeja agi lungpak ka yanglua, tenüng ajenba nung angenoka züluba amai, Kibuba DANG TEMESHI, ta iba manung züluang. 37Ibaji anüng sentsü agi mechiba kolakjen manung alitsüla. 38Aron tenütsü manung ibaji alitsüla. Anungji Israel nüburtemi kü dang aibelena tenla kar agüjaka, Ni Kibubai, parnok tenlaji agizüktsü.

39“Nai sentsü balala tsünutepa atakba kümpa sü tanük agi semoksü yanglutsüla, aser nai kümpa agi semoksü yanglutsüla, aser nai kümpa sü tanük agi kolakjen ka aser noksa yoka peremlen ka ta yangluang.

40Aser Aron jabasotem asoshi, parnok sentsüwangshi aser tobur ajung asa-a semoksü, peremlen, aser korang nai yangluang. 41Item sobutsüji nedi Aron aser pa jabasotem nem semokjang. Iba sülen parnok dak totzü mezüja putir mapa inyakdaktsütsü asoshi parnokji bendanga agüja shiteta yuang. 42Aser parnok mangsa aliba nembangtsü asoshi teperem nungi tepi tashi semoktsü parnok nem yanglujang. 43Aser kodang parnoki temeshi daki kü dang mepitsü asoshi yidir mesüra kodang parnoki temeshi daki anasa külemtsü asoshi arudir, itemji Aron aser pa jabasotem dak alitsü; angji parnok dak tai matutsü aser masütsü; aji teti asoshi pa aser pa dak jakzükbatem asoshi ozüng alitsü.

ANITET 29

Putirtem Meshitetba

(Lev. 8.1-36)

1“Parnokji meshiteta putir mapa nung kü madang tenzüktsü asoshi nai yamai Aron aser pa jabasotem dang inyaktsüla. Tarak maket nashi pungchi ka aser san tepung ana agitsüla. 2Aser wheat am tajung nungi piyazü meinoki amtsük yangluang, aser aji totzü den meyokteper amtsük yangluang. 3Itemji molok ka nung bendenang, aser nai aji nashi pungchi aser san ana denji külemi kü nem tarongba tenla agüjang.

4“Aron aser pa jabasotem süki kishi jagi anir arua parnok tzü chigudakjang. 5Aser nai süoshiji bener arua, putir temeshi sobutsü nung aketba süoshi aser putir temeshi sobutsü aser teku semoktsüji nai Aron dak semokjang, aser sangra-a atakba putir temeshi sobutsü nung peremlen jagi mesüang. 6Pa kolak manung kolakjenji semokjang, aser aji temeshi korang manung semokjang. 7Temezütsüba totzüji bena arua pa tekolak nung shilokja mezüja shimtetang.

8“Pa jabasotem anir arua parnok dak semoksüji sobujang; 9parnok dak peremlenji naijang aser parnok kolak manung korang semokjang. Aji oda nai Aron aser pa jabasotem mezüja shimtettsüla, aser nai iba temelaba ozüng agi parnok aser parnok semchirtemi kü madang teti putir ama tenzüktsü.

10“Sentep süki dangi nai nashi pungchiji anir arutsüla, aser Aron o pa jabasotemi iba kolak dakji teka agi nemettsüla. 11Süki kiküm jakdang temeshi dak Kibuba madang nashi pungchiji tepsettsüla. 12Nai nashi pungchi züji tera bena arua ne temeyong agi tenladak sabang tezü nungji mezütsüla. Tanüngba azüji tenladak tsüngdang shilokjang. 13Poknüng meyibanga aliba temo ajak, temesen, tezüngjang ana, aser idakji aliba temo agizüka tenladakji rongang. 14Saka shi, teküp aser jana, tanendak tezülen rongang. Aji temenen tenla lir.

15“San tepungji ka agiang, aser Aron aser pa jabasotemi san tepung kolak dakji teka agi nemetdakjang. 16Aser aji tepsetang aser iba züji tenladak meketa rüklokjang. 17San tepungji anüka alangsatsüla. Iba poknüng aser tetsüngji shitoker alangsa-a aliba shi aser tekolak denji yuang. 18 San tepung ajongaji tenladak sabang manung rongang; aji Kibuba dang tarongba tenla lir, ya teronem tajung asoshi mi agi Kibuba dang tenlaba lir.

19“San tepung kajia bena arung, aser Aron o pa jabasotemi san kolak dakji nemetdakjang. 20Aser aji tepsetang aser azüji agiteta Aron aser pa jabasotem tenaronglak tajichi teka tajichi jemtsüba manung, aser tetsüng tajichi jemtsüba manung mezüjang, aser tanüngba azüji tenladak sabang meketa rüklokjang. 21Tenladak aliba azü aser temezütsü totzüji bena arua Aron aser pa süoshi, pa jabasotem, aser parnok süoshi nung aji rüklokjang. Idangji pa, pa jabasotem aser parnok süoshiji ni atema temeshitetba asütsü.

22“San tepung temo, telunglen meyiba temo, temesen, tezüngjang ana meyiba temo, aser tepi tajichiji lepzükang. Kechiaser ibai bendanga agütsüba san tepung lir. 23Amtsük tulu ka, totzü enokba amtsük telong ka aser piyazü meinokba amtsük tapu ka Kibuba tsüngdang aliba molok nungi agiang. 24Item chiyungtsü ajakji Aron aser pa jabasotem teka nung amokjang, aser aji KIBUBA tsüngdang tayipshiba tenla ka ama ayipshiang. 25Parnok ket nungi nai itemji agia aji tenladak sabang manungji Kibuba dang teronem tajung asoshi rongang, ibai kü dang mi agi tenlaba lir.

26Aroni meshitettsüba san tepung tekuji nai alangtetang aser aji tayipshiba tenla ama Kibubamadang ayipshiang aser aji ne shilem alitsü. 27Tayipshiba tenla kü nem agütsüba san tepung teku aser tepi koba putir shilem lir, aji Aron aser pa jabasotem asoshi lir. 28Aji Israel chirtem nungi Aron aser par jabasotem teti asoshi parnok shilem alitsü, kechiaser aji angati agütsüba tenla ka lir, ya Israel purtem nungi parnoki yimjung tenla lir, oda Kibuba dang parnok tenlaba lir. 29Aron meyong temeshi sobutsüji pa sülen par jabasotem asoshi alitsü, aji semer parnoki bendanga meshiteta ayutsü. 30Aron jabasotem shibasa pa melena putir kümdir aser tenzüktsü asoshi Temeshitiba taktang jagi yidir pai anogo tenetnü tashi putir sobutsüji sobua alitsüla.

31“Aser nai bendanga agütsüba san tepungji bena arua temeshidak iba shi asotsüla. 32Aser sentep süki kiküm nung Aron aser par jabasotemi san chanu shi aser molok nung aliba amtsükji achitsüla. 33Temenen tatokba asoshi tenla koba bendanga agütsü, aji parnoki achitsüla. Parnok dak alaka tangar shingaia aji achitsü makok kechiaser ibaji temeshi lir. 34Iba bendanga agütsüba shi mesüra amtsükji kar anepdang tashi anüngra aji, mi agi rongtoktsüla; ibaji machitsüla kechiaser aji temeshi lir.

35“Ni ne dang melaba ajak amato nai Aron aser pa jabasotem bendanga agütsübaji anogo tenet tashi agia iba meshiteta ayuba mapaji inyaktsüla. 36Anogo shia temenen pungiba tenla nashi pungchi ka ka tenlatsüla. Iba jagi tenladakji meshitettsü, aser aji meshiteta kümdaktsütsü asoshi totzü mezüang. 37Yamaji anogo tenetnü inyakang. Idangji tenladakji kanga junga meshitettsü, aser kechi agisa tenladakji kongshidir temeshi alitsü.

Anogoshia Tenla

(Zün. 28.1-8)

38“Tenladak anogoshia küm ka techanu san ana-na tenlatsüla. 39Sanji anepdang ka aser nikongdang ka ta tenlatsüla. 40Mezüngbuba san dakji amzü seret ka totzü temeja hin ka den meyokteper tenlatsüla, aser ano tajemtsü tenla asoshi yi hin ka shilokjang. 41San tanabubaji nikongdang tenlatsüla, aser anepdang tenla nung agütsüba ama iba denjia amzü, totzü aser yiji agütsütsüla. Ibaji ni asoshi chiyungtsü tenla amato lir; ni Kibubai iba mi agi tenlaba teronem nungji pelatsü. 42Putu ajak nung kü dang nenoki süki kikümdong nung ibai arongtsüla. Aser ni idakji kü nüburtem den ajurutepa nenok den jembitsü. 43Yangji ni Israel nunger den ajuruteptsü, aser sükiji sentsüwangshi agi meshitettsü. 44Ni sentep süki aser tenladakji meshitettsü, aser Aron o pa jabasotemi putir mapa inyaktsü atema ni parnok meshitettsü. 45Aser ni Israel nungertem den alitsü, aser ni parnok Tsüngrem asütsü. 46Aser parnoki ni Kibuba parnok Tsüngrem shibai parnok Ijip lima nungi anitet aji metettsü, anungji ni parnok rongnung alitsü. Ni Kibuba parnok Tsüngrem lir.

ANITET 30

Liangmesen Arongba Sabang

(Ani. 37.25-28)

1“Ano liangmesen arongtsü asoshi akashia süng agi tenla sabang ka yangluang. 2Aji metong nung süklep ka, lenten süklep ka aser touchi nung süklep ana. Kinük pezüsülen ajak kasa aser tezütemjia iba denji kasa dang asütsüla. 3Temalen aser tip meketa, aser iba tezüji hon temeja agi yangluang, aser ano aji meketa hon agi yangbangang. 4Tenla sabang tamentakdak kübokji hon tayi ana yangluang, aser itemji abentsü asoshi kinük anatsülen süngra ana-na yangluang. 5Süngraji akashia süng agi yanglur, idakji hon nülokang. 6Aser tezüngzüktepba Ozüng Süngden aliba tenembangba jakdang kong ni ne den ajuruteptsü idakji aliba süngden anasa aliba teyindangba sü jakdangji nai tenla sabangji yuang.

7“Kodang Aroni anepdang shia milenji renemdir, pai teronem menemba liangmesenji tenla sabang manung arongtsüla. 8Nikongdang kodang pai milenji tsüklokdir, pai kasaji inyaktsüla. Liangmesenji putu ajak nung tanen makai teti arongtsüla. 9Iba manung memeshitetba liangmesen, mesüra tarongba tenla, mesüra chiyungtsü tenla kecha nenoki metenlatsüla. Ano nenoki iba manung tajemtsü tenla kecha meshiloktsütsüla. 10Temenen pungitsü asoshi tenlaba shiruru azüji sabang nung tezü dakji rüklokja küm nung khen Aroni sabangji meshitettsüla. Küm shia teti nenoki yamaji inyaktsüla. Kibuba dang ibai temeshitiba sabang alitsü.”

Talangzükba Sen

11Idangji Kibubai Mosa dang ashi, 12“Kodang nai Israel nunger yongsük züngdangdir, idangji parnok dangi lendong marutsü atema nisung shiai Kibuba nem pei taküm asoshi talang tenla agütsütsüla. 13 Yongsük nung dena alir shiai tekülemdak amshiba touzük amato shekel tesadang ka agütsütsüla, aser iba nungjagi Kibuba nem shekel tesadang ka tenla agüjang. 14Shirnok yongsük nung dena lir küm metsü nungi temalen züngsem shiai Kibuba meyong tenlaji agütsütsüla. 15Taküm tenla temenen nungi pungitsü asoshi Kibuba nem kodang parnoki tenla agütsüdir, shekel tesadang ka dak tali takari magütsütsüla aser sensakeria ajema magütsütsüla. 16Aser nai temenen pungiba senji Israel chirtem nungi agitsüla, aser aji sentep süki mapa atema bendanga yuang, aji nenok temenen pungitsü asoshi Kibuba madang Israel chirtem asoshi tebilemtettsü alitsü.”

Yongmenyin Susa

17 Kibubai Mosa dang ashi, 18 “Yongmenyin agi susa ka tetsüng dena yangluang. Aji süki aser tenla sabang na tsüngda yuang aser shitoktsü asoshi idakji tzü enokang. 19Aron aser pa jabasotemi iba tzü nungjagi parnok teka aser tetsüng shitoktsüla, 20oda parnok süki mesüra tenla sabangi Kibuba dang mi agi tenlaba tenlatsü asoshi arudang parnok masütsü asoshi parnoki iba tzü jagi shitoktsüla. 21Parnok masütsü asoshi parnok teka aser tetsüng shitoktsüla. Iba ozüng ya parnok aser parnok semchirtem asoshi teti benshitsüla.”

Temezütsü Totzü

22  Ano Kibubai Mosa dang ashi, 23“Teronem menemtsü tzü shekel noklang pungu, teronem menemba süngshi iba tesadang, shekel noklang ana ser tenem, aser teronem menemba ensemtzü noklang ana ser tenem, 24aser akashia noklang pungu, temeshidak tatakzük aliba amato oliv totzü hin ka, nai bena arung, 25aser nai teronem menemtsü yangluri yangluba teronem ama temeshi temezüba totzü yangluang, aji temeshi temezüba totzü alitsü. 26Aser sentep süki, Ozüng Süngden, 27langbang aser marok o ausu ajak, milendong aser iba atema oset, aser liangmesen tenladak, 28tarongba tenla sabang aser idakji aliba marok-enrok, aser tamentakdak item ajak nung mezütsü asoshi nai aji amshiang. 29Aji ajak dang temeshitiba asütsü asoshi nai itemji meshiteta yuang, aser item dak kechi agisa kongshidir itemjia temeshi alitsü.

30“Aron aser pa jabasotem putir mapa inyakdaktsütsü asoshi nai parnok dak totzü mezüja meshitetang. 31Aser Israel nunger dang ya shiang, ibai kü madang nenok putusa putu asoshi temeshi temezüba totzü alitsü. 32Ibai nisung mashi-i temang nung meshiloktsütsüla, aser ibai mesüka nenoki kecha meyoktepa meyanglutsüla. Ibai temeshi lir aser ibai dang temeshi alitsü. 33Shibaisa iba mesüka meyoktepdir mesüra shibaisa ibai bendanger dak enloktsüdir, pa pei nübur nungi leptoktsü.”

Liangmesen

34 Kibubai Mosa dang ashi, “Nai teronem tajung, stakte aser onika, aser galbanum bena arung; liangmesen temeja teronem menemtsü; aser ibaji shia touzük kasa alitsü; 35aser ibaji teronem menemba yangluri yangluba ama metsü enoka, temeja aser temeshi nai iba jagi yangluang: 36aser aji karbo anüka menüngsar sentep süki nung Ozüng Süngden tsüngdang yujang, yangji ni ne den ajuruteptsü, aji na asoshi temeshitiba alitsü. 37Aser teronem koba nai yangludir, iba meyoktepba amaji nai pei asoshi meyanglutsüla: aji Kibuba asoshi ne dang temeshi alitsü. 38Shibaisa ibaji mesüka temenemtsü yangludir, pa pei nübur nungi leptoktsü.”

ANITET 31

Süki Yanglutsü Tetangshi Nisungtem

(Ani. 35.30—36.1)

1Tang Kibubai Mosa dang ashi, 2“Yihuda kidong nungi Uri jabaso Hur chir tenüng agi Bezalel ni shimtetogo, 3ni pa Tsüngrem tanelai sünga kümdaktsüogo aser tashi agütsüogo. Ni pa nem tangazükba, aser mapa tapu ajak inyaktettsü tangatetba agütsüogo. 4Hon, taribi, aser yongmenyin agi tesangra mapa tapu tapu yanglutsü; 5amenoktsü asoshi senti lung akusa-a aser süng agi tapu tapu jiteta yanglutsü asoshi ni pa nem tetangshi shisatsü agütsüogo. 6Pa den yaritepa inyaktsü asoshi ni Dan kidong nungi Ahisamak jabaso Oholiab shimtetogo. Ano tangar nisungtem nema ni shisa ka-a aser sangra-a mapa inyaktsü aser ni ashiba ama yanglutettsü parnok nem tesangra shisatsü agütsüogo. 7Sentep süki, tezüngzüktepba Ozüng Süngden, iba tesempangba, aser süki nung aliba oset ajak, 8langbang aser idakji aliba osettem, milendong atalokdak, hon aser liangmesen arongba osettem, 9tarongba tenla sabang aser iba osettem, shitoktsü asoshi tzü ayuba susa aser iba tamendaktsü; 10aser tobur junga yangluba süoshitem, Aron aser pa jabasotem putir mapa tenzükdaktsütsü asoshi temeshi putir sobutsü, 11temezütsüba totzü, aser temeshidak asoshi teronem menemba liangmesen, ni ne dang melaba ama parnok ajaki inyaktsüla.”

Amungnü

12Idangji Kibubai Mosa dang ozüng agüja ashi, 13“Nai Israel chirtem dang jembia yamai shiang, atangji nenoki kü amungnü amungtsüla, kechiaser nenok meshiteta yutsüba Kibuba nia ta nenoki metettsü asoshi putusa putu ni aser nenok tsüngda nung ya temaitsü ka lir. 14Amungnüji meshiteta mungang kechiaser nenok asoshi ibai temeshi lir. Kari iba anogo memungi mapa kar inyakra, iba nisungji pei nüburtem rongnungi leptoktsü. 15 Nenok mapa inyaktsü asoshi anogo troknü tashi kar, saka tenetnübubajibo ni asoshi temeshi anogo lir. Kari iba anogo nungji mapa inyakra pa südaktsütsüla. 16Aji asünung Israel nungeri iba anogoji tezüngzüktepba anogo temaitsü ama teti benshitsüla. 17Ibai Israel nunger aser ni tsüngda nung teti atema temaitsü ka alitsü, kechiaser ni Kibubai anogo trok tashi nung anüng aser alima yanglu; aser anogo tenetnübuba nung ni mapa nungi anisüngzüka mungzük.” 18Kodang Sinai tenem nung Tsüngremi Mosa den jembibaji anen, Tsüngremi pei temeyong agi lungpak ana nung pa temelaba ozüngtemji zülur Mosa nem agütsü.

ANITET 32

Hon Agi Muluba Nashi

(Taz. 9.6-29)

1  Kodang Mosa tenem nungi mapang talangka malui liasü ta nüburtemi meteta aküm, parnoki külemi Aron dangi adenshia pa dang ashi, “Mosa shibai asenok Ijip lima nungi aniteta anir aru, pa kechi aküm onoki memetet; anungji asenok len anitsü asoshi tsüngrem ka yanglujang.”

2Aroni parnok dang ashi, “Nenok kinungtsürtem, nenok jala-jabasotemi anua aliba hon küritemji kü dangi bener arung.” 3Anungji nisung ajaki pei pei hon küriji Aron dangi bener aru. 4 Pai parnok ket nungi itemi agizük, aser aji mulusa-a nashi süngyanglu ka mulutet. Idangji nüburtemi ashi, “Ibai asenok tsüngremji lir o Israel, shibai asenok Ijip lima nungi anir aru!”

5Kodang Aroni hon agi mulutetba nashi süngyanglu jakdang tenladak sabang ka yanglu, pai yamai sangoktsü, “Asüng Kibuba asoshi benjong ka alitsü.” 6 Tasüngji parnoki yakta shishia tarongba tenla asoshi shiruru ka anir aru, aser yimjung tenla agütsü. Iba sülen parnoki külemi mener chia ajem aser kati ka den asayateptsü tenzük.

7Idangji Kibubai Mosa dang ashi, “Yakta meyipa luang, kechiaser ne nübur shirnok nai Ijip nungi anizüka anir aru; parnok raksa-a kümogo. 8Ni melaba lenmang nungi parnok meyipogo, parnoki hon agi nashi süngyanglu ka muluteta iba nemji tarongba tenla agüja külemdaki. Ibaji parnok tsüngremtem, shibai parnok Ijip lima nungi anir aru ta parnoki ashir. 9Ano Kibubai Mosa dang ashi, iba nübur tekong temerang ta ni nguogo. 10Anungji kü ain tulu parnok anema adoka parnok samatsütsü asoshi tang kü kija tokjang. Aser ni na agi kin tulu ka kümdaktsüdi.”

11  Mosai Kibuba Tsüngrem dang mepishia ashi, “Kibuba, ne nübur shirnok nai ne ain tulu aser tashi tait teka agi Ijip lima nungi anizüka anir aru, parnok anema kechiba na mit adoker? 12Tamajung atema pai parnok anizüka anir aru, tenem nung parnok tepsetdaktsütsü, aser ali jak nungi pai parnok samadaktsütsü atema ta kechiba Ijip nunger nem jembidaktsütsü? Na tetsübutsü ain aitba nungi meyipang, aser ne nübur anema tamajung inyaktsü aliba nungi ne mulung melenshiangma. 13 Ne tenzüker Abraham, Isak aser Yakob; parnok dang nai azüngashiba bilemtetangma. Anüng petinu ama ni ne metsü rendaktsütsü, aser ni iba lima indang jembiba ajak ne semchirtemi teti asoshi senmang amangtsü, ya ajak nai nangzükba to bilemtetangma.” 14 Anungji Kibubai pei nübur madaki koba lendong yoktsü ta ashi, iba nungi pa temulung meyip.

15Mosai meyipa oa pei teka nung aliba ozüng lungpak ana koba nung ozüng anatsülen zülua liasü, aji bener tenem nungi meyipa alu. 16Lungpakji Tsüngremi züluba liasü, aser iba nung angenpoka züluba ozüngtemjia pai züluba liasü.

17Kodang Yihusuai nüburtem asatepba olaji angashi, pai Mosa dang ashi, “Tanendak rara ola amai angashir.”

18Saka Mosai langzü, “Ola ya takok anguba ola masü mesüra tamakok anguba ola-a masü, saka ya kentenba ola ka ama nibo angashir.”

19Kodang Mosa tanendak anasai aru, pai nashi pungchi süngyanglu aser tsüngsangtepbaji ngua pa kanga ain adok, aser pai lungpakji tenem tsüng nung ondakja aji jaksatsü. 20Aser parnoki mulutetba nashi süngyangluji pai bena arua mi nung arong, aser aji auyi küma menüngsar külen tzüma nung paloktsü; aser Israel nüburtem nem aji jemdaktsü. 21Pai Aron dang asüngdang, “Nai item nisungtem dak temenen patakati enoktsütsüsa parnoki ne dang kechi inyak?”

22Aroni langzü, “Kü kibur, na ain sashia tatokma; iba nübur koma majung aji nai meteta lir, 23kechiaser parnoki kü dang ashi, ‘Mosa shibai onok Ijip lima nungi anizüka anir aru, pa kechi aküm, onoki memetet; anungji onok len anitsü asoshi onok nem tsüngrem ka yanglujang.’ 24Aser ni parnok dang shiba ket nungsa hon agi yangluba osettem ali aji bener arung ta ashi, aser shirnok ket nungsa itemji liasü parnoki aji bener arua kü nem agütsü. Aji ni mi nung enoktsü, aser iba nungjagi nashi süngyanglu ya adok.”

25Aroni nüburtem jabang mayimi kümdaktsüba ajanga tsükchirtemi sensatsüogo ta Mosai angu. 26Anungji pai tanendak süngkhüm nung noktaker ayimtena ashi, “Shibasa Kibuba tsütsü lir, pa kü dangi arung!” Aser Levi chirtem ajak pa anasa atenshi, 27aser pai parnok dang ashi, “Israel Tsüngrem Kibubai yamai ashir, nenok nisung shiai pei nok am-ang aser süngkhüm külen nungi külen tatem tashi oa pei adianu, tembar aser kiyonger bushia tepsetang.” 28Anungji Levi chirtemi Mosa o amaji inyak, aser parnoki iba anogo nungji nisung meyi asemshi tepset. 29Idangji Mosai parnok dang ashi, “Tanü nenoki pei jabasotem aser adianutem tepsetba ajanga Kibuba madang nenok putir mapa asoshi bendanga agütsüogo. Anungji Kibubai nenok tanü moatsüogo.”

30Asüngji Mosai nüburtem dang ashi, “Nenoki tetsübutsüka temenen menaogo. Saka ni tang Kibuba dangi tua nenok asoshi temenen pungitsü atema ni pa dang mepishitsü.” 31Idangji Mosai Kibuba dangi meyip aser ashi, “Iba nüburtem yagi tesüngmangtsüka temenen menaogo. Parnoki pei asoshi hon agi süngyanglu tsüngrem ka yanglur ibaji külemogo. 32 Aji saka yimlibilema nai parnok tai tokangma; saka yamaji mesüra kaket koba nung nai ne nüburtem tenüng zülua ali iba nungjagi kü tenüngji aidokangma.”

33Saka Kibubai Mosa dang langzü, “Shibaisa ni anema temenen menaogo, ni pa kü kaket nungi aidoktsü. 34Anungji tang luang aser ni ne dang tuyuba linük jagi nüburtemji anir aramesoang. Ajiang kü tenyar ne jakdang aotsü; aji saka parnok temenen atema ni parnok merenshitsü anogo arudagi.” 35Anungji Kibubai parnok madaki tashitak wara ka arudaktsü, kechiaser parnoki Aron nem hon agi nashi süngyanglu ka yangludaktsü.

ANITET 33

Israel Purtem Sinai Tenem Nungi Apusoba

1  Idangji Kibubai Mosa dang ashi, “Na aser ne nübur shirnok Ijip nungi nai anir adok, nenok ajak yang nungi aenshia ni Abraham, Isak aser Yakob dang ne semchisemnur nem agütsüdi ta azüngashia nangzükba lima jagi oang. 2Ni ne jakdang tenyar ka yoktsü, aser Kanan nunger, Amor nunger, Hit nunger, Periz nunger, Hiv nunger, aser Yebus nunger ajak ni aridoktsü. 3Nenok ali temo aser ninang mojitzü yima aliba lima kati aor. Saka nenok tekong temerang asünung, ni nenok lenmang nung samaja lir ta nibo nenok den maotsü.”

4Kodang nüburtemi iba osang angashi, parnoki mang ayim, aser parnok shingaia kisen aser küri naro magi. 5Kechiaser Kibubai Mosa dang ashi, “Nenok tekong temerang nisungtem lir. Ni nenok den kenpiga danga ora, ni nenok meshi meshia samatsütsü. Nenok dak kechi inyaktsü ali aji metettsü atema nenok kisen, aser küri naro agizükang.” 6Anungji Horeb tenem toktsür aodang Israel nungeri joko kisen küri naro magi.

Tekülemdak Sentep Süki

7Tang Mosai tanendak tezülen, tanendak nungi sükiji apiga bener oagi yangluli asü; aser iba dangji sentep süki ta aja. Aser nisung kari Kibuba dang langka asüngdangyanüra ajagi ao. 8Kodangsa Mosai sentep süki jagi aitsü apusodir nisungtemi pei süki kikümbang nung noktaker Mosa ajagi mai tashi repranga ali. 9Kodang Mosa süki jagi ai idangji mepet tongshi süki kiküm jagi alua noktak aser mepet tema nungi Kibubai Mosa den jembi. 10Kodangsa nüburtemi mepet tongshiji süki kiküm nung noktaka angu, parnoki pei süki kiküm nung apudaka Kibuba külem. 11Aser nisungi pei tembar den jembiba ama Kibubai Mosa den tejak o tejak na jitepa jembi. Kodang Mosa tanendaki meyipa shilang, pa yarir asangur ka Nun jabaso Yihusua süki nungji liasü.

Mosa AserKibuba Sentsüwangshi

12Idangji Mosai Kibuba dang ashi, “Item nüburtem anir oang ta nai kü dang ashir, aji saka kü den shiba yoktsü ajibo nai kü dang mashir. Aji saka ni na metet aser nai kü jakdang taochi nguogo ta shiogo. 13Tang ni ne jakdang taochi ngura, ne lenmangtem kü dang sayuang, anungji ni na metettsü, aser na nungi ni maneni taochi angutsü. Ano iba kin ya ne nübur asütsü asoshi nai shimtet ta bilemtetangma.” 14Kibubai langzü, “Kü tatenba ne den aotsü aser ne nem anisüngzük agütsütsü.”

15Mosai langzü, “Ne tatenba onok den marura, onok yang nungi anir tuoma. 16Na onok den marura nüburtemi aser ni ne jakdang taochi nguogo ta kodaser metettsü? Alijak nung alir nisung ajak dang nungi ni aser iba nübur balaka kümdaktsübaji na tatenba onok den aoba agi masü no?” 17Aser Kibubai Mosa dang ashi, “Nai mepishiba ama ni aji inyaktsü, kechiaser kü tsüngdang nai yimjung nguogo aser ni ne tenüng junga metet.” 18Idangji Mosai mepishia ashi, “Yimlibilema kü dang ne sentsüwangshi sayuangma.”

19  Kibubai langzü, “Ni ne jakdang ni ajungba ama kü sentsüwangshi ngudaktsüdi aser kü temeshi tenüng metetdaktsüdi. Ni Kibuba, aser ni shir dang aochidir parnok dang aochitsü, aser shir dang aria bilemdir parnok dang aria bilemtsü. 20Ni ne nem kü tejak mungudaktsüli, kechiaser nisungi ni ngur taküm alitsü makok. 21Aser Kibubai ashi, ajiang ni anasa talidak ka lir, aser nai lungma nungji noktaktsüla. 22Kodang kü sentsüwangshi süidir, ni na lung jakma nungji yutsüdi, aser ni süitema mao tashi kü teka agi na nembangtsüdi; 23aji ser külen kü teka agiendi, idangji nai kü terongdong angutsü, saka kü tejakbo mangutsü.”

ANITET 34

Lungpak Tasen

(Taz. 10.1-5)

1Tang Kibubai Mosa dang ashi, “Mezüng inyakba ama nai lungpak ana angentetang, aser nai jaksaba lungpak nung aliba ozüngtemji ni idakji züludi, 2Asüngnep aji renema bener Sinai tenem kolaki atung, aser yangji tenem kolak nung nesasa kü madang liang. 3Ne den shinga matutsüla, aser tenem anasa nisung shinga mungudaktsütsüla, oda san telok mesüra nashi telok kecha tenem tsüng nungji mechiyimdaktsütsüla”. 4Anungji Mosai mezüng amato lungpak ana angentet aser Kibubai ashiba ama anepdang yakta aji pai teka nung amer Sinai tenemi atu.

5 Kibuba mepet manung alua pa den noktak, aser pa temeshi tenüng Kibuba ta metetdaktsü. 6 Aser Kibubai pa jakdang süi, aser ya metetdaktsü, “Ni Kibuba, yimlibilem aser aria bilemba agi sünga aliba Tsüngrem, shiba ain adoktsü meilungi, temeim aser tamang katetba agi sünga lir. 7Meyirijangsa meyirijang asoshi taochi sayur, tai, ozüng raksaba aser temenen asoshi tai atoker, saka aji agi kodanga tai menaba meshiteta mekümdaktsür; tsürabur tai atema chirnur dak, semchisemnur dak, putu asembuba aser pezübuba dak tashi mang ayanger.”

8Mosai yakta ali nung apudak aser Kibuba külem. 9Pai ashi, “Oh Kibuba, ni ne jakdang taochi ngura, ni ne dang mepishir, na onok den arungma. Iba nüburtem tekong temerang, saka nai onok tai-temenen tokangma, aser onok ne senmanger ama agizükangma.”

Tezüngzüktepba Akangshiba

(Ani. 23.14-19; Taz. 7.1-5; 16.1-17)

10Idangji Kibubai Mosa dang ashi, “Tang ni Israel nunger den tezüngzüktepba tasen ka yanglur. Parnok jakdang ni sayatenya mapa tulu ka, oda alima nung shinga kin daka meinyakba mapa ka ni inyaktsü. Ni Kibubai kechi mapa tulu inyaktsü ali, aji nisung ajaki angutsü, kechiaser ni nenok asoshi inyaktsü alibaji tetsübutsü mapa ka lir. 11Tanü ni ne dang melaba ozüngtem angang. Ni Amor nunger, Kanan nunger, Hit nunger, Periz nunger, Hiv nunger aser Yebus nunger ne jakdang nungi aritoktsü. 12Nenok aotsüba lima nisungtem denji tenangzüktepba kecha meyanglutsüla, kechiaser aji oda süra ibaji nenok atema sang tamajung ka asütsü. 13 Saka nenoki parnok tenladak, parnok temeshi tongshitem anüka raksatsütsüla, aser parnok Ashera tsüngrem lepzüka yoktsüla.

14“Nenoki tangar tsüngrem kecha tekülem, kechiaser ni Kibuba tenükmiba Tsüngrem lir. 15Ashiko linük nung aliba nisungtem den nai tezüngzükba ka yangluba agi parnok tsüngrem sülen jabujaria anidaktsü, aser parnok tsüngrem dang tepseta tenlatsü, aser kari na jara nenoki tetenlaba shi achitsü; 16aser nenok jabasotemi parnok jalatem agidaktsütsü, aser parnok jalatemi parnok tsüngrem sülen jabujaria anidaktsü, aser nenok jabasotema parnok sülen jabujaria anidakdaktsütsü. 17 Nenoki pei asoshi süngyanglu tsüngrem kecha teyanglu.

18  “Nai piyazü meinokba Amtsük Benjong mungang. Ni ne dang melaba ama Ahib ita nung temeshitetba anogo tenetnü piyazü meinokba amtsük achitsüla, kechiaser iba ita nungji nenok Ijip lima nungi apusoa adok.

19  “Nu menden nungi mezüng asoba jabaso aser mezüng mepuba nashi aser san nungi tepung ajak kü meyong lir. 20 Saka nenoki mezüng mepuba gado shia san chanu ka agi alangzüktsüla. Nai aji malangzükra, iba tekongji raksatsütsüla. Mezüng asoba jabaso ajak alangzükang aser shinga teka tazüng kü dangi marutsüla.

21  “Nenoki anogo trok mapa inyakang, saka anogo tenetnübuba nungjibo anisüngzüktsüla, alu alaba mapang mesüra aluruwa mapang nunga nenoki anizüngzüktsüla.

22  “Kodang alu nung nai prokba nungi metsü arutsü mapang tongdir, nai hapta Benjong mungang, aser küm tatem nung kodang ne metsütem alu nungi bendendir, Terizüngba Benjong mungang.

23“Küm nung asemben tashi nenok tebur shia ni Kibuba Israel Tsüngrem dangi arua külemtsüla. 24Nenok jakdang nungi ni kintem kodang aridokdir, nenok litsüji ulushitsü, item benjong asem mapang nungji nenok kü dangi atudang, aser shingaia nenok Kibuba ner Tsüngrem madang nenok noktaktsü asoshi küm nung asemben tashi aludang linük azüabung masütsü.

25  “Kü tenla tepsetba züji nenoki piyazü enokba amtsük den magütsütsüla; mesüra süia aoba benjong atema tepsetbaji anepdang tashi metoktsütsüla.

26  “Nenok li nung tamasa meyiba rongnung mezüng atangba süngjang nenoki nenok Kibuba Tsüngrem kidangi bener arung. Nenoki nabong chanu pei tetsüti mamatzü nung memetatsüla.”

27 Kibubai Mosa dang ashi, “Item o ya nai züluang; kechiaser item o agi ni ne den aser Israel den tezüngzüktepba yangluogo.” 28Idakji Mosa anogo lir aser aonung lir Kibuba den ali, aser pai amtsük machi mesüra tzü majem. Aser pai lungpak nung tezüngzüktepba ozüng terji zülu.

Mosa Tenem Nungi Aluba

29  Kodang Kibuba den jembir külen ozüng lungpak anaji bener Mosa tenem nungi alu, pa tejak sentsüpranga liasü, saka pai aji memetet liasü. 30Aron aser Israel nungertemi kodang Mosa angu pa tejak sentsüpranga liasü, aser parnoki pa anasai aotsü tsübu. 31Saka Mosai parnok aja aser Aron o Israel tanishirtem ajak pa dangi ao, aser pai parnok den jembi. 32Iba sülen Israel nungertem pa anasa sentep, aser Sinai tenem nung Kibubai agütsüba Ozüngtemji tashi anga-a benshitsü pai parnok nem agütsü. 33Mosai parnok den jembizüker külen pai tejak sü ka agi meibang. 34Kodangsa Mosai sentep süki-i Kibuba den jembitsü odir pai süji luzüka ayu, aser pa adoka pa dang melaba ajak Israel purtem dang ashi, 35parnoki pa tejak sentsüpranga angu. Anungji ano tanaben Kibuba den jembitsü mai tashi pai pe tejak sü agi meibang.

ANITET 35

Amungnü Ozüng

1Mosai Israel nunger ajak sentepdaktsür parnok dang ashi, “Item nenoki benshitsü asoshi Kibubai melabaji lir: 2 anogo troknü mapa inyakang, saka tenetnübubaji ni Kibuba atema bendanga meshiteta anisüngzüka amungba anogo lir. Kari iba anogo nungji mapa inyakra pa südaktsütsüla. 3Amungnü nenok talidak kecha nunga mi maputsüla.”

Temeshi Sabang Nung Tenlaba

(Ani. 25.1-9)

4Mosai Israel nunger dang ashi, “Ibai nenok dang Kibubai melabaji lir: 5Kibuba dang tenla benang. Nenok nisung shia pei mulungba ama hon, taribi mesüra yongmenyin; 6Sü tajung, anüng sentsü, nakrema meremba, tezüng sü, temerem, nabong tezüng agi yangluba sü; 7san teküp temerem nung asoba, shiküp tanük, akashia süng, 8milen tesangwa asoshi totzü, temezüba totzü, aser teronem tanang asoshi liangmesen; 9oniks lung, aser putir temeshi sobutsü aser teku semoktsü nung enokba senti lungtem.

Süki Asoshi Osettem

(Ani. 39.32-43)

10“Nenok rongnung temulung agüja tesangra mapa inyaktetertem ajak arua Kibubai melaba ama ajak inyakang. 11Iba tekülemdak süki temeibangba aser tarüdangtsü, tongshi-tongnü item tesembangtsü; 12tezüngzüktepba Ozüng Süngden, iba süngratem, tenembangtsü aser teyindangba temeiba sü; 13langbang, aser iba süngra, aser idakji sendakba oset-tsüset ajak; Tsüngrem nem agütsüba amtsük; 14tesangwa asoshi milendong; aser iba atema osettsüset, milen aser tesangwa asoshi totzü, 15sabang aser liangmesen arongdak süngra, temezütsü totzü, teronem tanang asoshi liangmesen, tekülemdak süki kishi teyindangba; 16tarongba tenla tenladak yongmenyin menja, iba süngra aser tamentakdak, teka shitokba susa aser iba tamentakdak; 17tekülemdak kilempok nung teyindaktsü yanglubatem, tongshitem aser item tesembangtsü, süki kikümbang nung teyindangba sü; 18tekülemdak süki temalen teyidaktsü, aser kimalen asoshi teyidaktsü, aser item lisütem. 19Temeshidak tenzük dang putir sobuba akhüm taket temeshi sobutsü, putir Aron aser pa jabasotem asoshi temeshi sobutsütem.”

Nüburtemi Tenla Bener Aruba

20Israel chir telokti Mosa tsüngdang nungi pila-a ao. 21Aser sentep süki mapa asoshi, aser iba mapa ajak asoshi, aser temeshi sobutsü asoshi, nisung shiai pei mulung aser tanela agi ajungshiba shiai Kibuba dangi bener aru. 22Tebur aser tetsür kwikati mulungsoa liasü, parnok arur sü nung tulokba, tenarong nung anuba küri, tenüng ajenba küri azük aser prangshiba hon tapu ajak bener arua Kibuba nem bendanga agütsü. 23Shirnok ket nungsa sü tajung, anüng sentsü, nakrema meremba, mesüra shiküp tajung liasü, parnoki bener aru. 24Ano shirnok ket nungsa taribi mesüra yongmenyin agütsütettsüsa liasü, parnoki itemji Kibuba dang tenla aser shirnoki akashia süng Kibuba dang tenlatettsü koka liasü, itemji mapa tapu ajak nung amshitsü koka liasü. 25Tesangra tetsürtemi pei teka agi ayinba ang anüng sentsü, nakrema meremba tezüng sü temerem bener aru. 26Ano tetsürtem shiri pei ket agi ang aintsü meteta liasü parnoki nabong tezüng agi ang yanglu. 27Tanishirtemia putir temeshi sobutsü aser teku semoktsü nung amenoktsü asoshi oniks senti lung bener aru. 28Teronem menemba, milen tesangwa asoshi totzü, temezütsü totzü, teronem asoshi liangmesen; 29Israel chirtemi temulunger tenla Kibuba dangi bener aru; Kibubai Mosa teka agi yanglutsü melaba amato, pei mulungjang nung ajungshiba tebur aser tetsür shiai mapa ajak asoshi benden.

Bezalel Aser Oholiab

(Ani. 31.1-11)

30Idangji Mosai Israel nunger dang ashi, “Yihuda kidong nungi Uri jabaso Hur semchir Bezalel Kibubai shimtetogo. 31Tsüngremi pei tanela agi paji süngdaktsüogo, aser tangatetba, tangazükba aser mapa tapu ajak inyaktettsü, tangatetba shisatsü agütsüogo. 32Hon, taribi aser yongmenyin nung tapu balala sangrateta inyaktetba mapa ajak, 33senti lung akusa-a aser süng agi tapu balala jiteta yanglutsü, aser mapa tapu ajak asoshi, 34Kibubai pa aser Dan kidong nungi Ahisamek jabaso Oholiab nem parnok teka mapa tangar dang sayutettsü shisatsü agütsüogo. 35Tesangra mapa balaka inyaktsü, angenteta yangluba mapa balaka, tesangra mapa inyaker aser anüng sentsü, nakrema meremba, jakja-a meremba kümpa sü tanük agi noksa enoka yangluba mapa aser sütaker mapa, mapa tulu aisü inyakertem, item mapa inyaktsü pai parnok nem shisatsü agütsüogo.”

ANITET 36

1Tang Bezalel, Oholiab aser süng mapashir shir nem Kibubai shisatsü aser tangatetba agütsü, aser shiri temeshi süki yanglutsü meteta lir; Kibubai melaba ama parnok ajaki yamaji inyaktsüla.

Nüburtemi Sempet Bener Aruba

2Idangji Mosai Bezalel, Oholiab aser nübur shir nemsa tetangshi shisatsü Kibubai agütsü, aser shirnokisa mulungsoa arua mapa inyakner parnok ajak aja. 3Israel nungeri tekülemdak asoshi agütsüba tenla ajak parnoki Mosa nungi agizük, ano nüburtemi anepdang shia Mosa dangi temulunger tenla mamai bener aru. 4Aser tesangra shisatsü akaba nisung ajak, shirnoki tekülemdak mapa ajak inyak, parnok nisung shia pei mapa nungi aru; 5aser parnoki Mosa dang ashi, “Mapa inyaktsü Kibubai yanglutsü melaba dang nungi kanga agi tali nisungtemi bener arur.”

6Anungji tekülemdak asoshi tebur süaka tetsür süaka joko shingaia tenla teben ta tanendak ajak nung Mosai osang sangdong; anungji nüburtemi joko bener maru. 7Kechiaser parnok akaba osetji, Kibuba mapa ajak yanglutsü teperi liasü, aser aji atangji onsara liasü.

Tekülemdak Süki

(Ani. 26.1-37)

8Mapa inyaktsü tetangshi nisungtem rongnungi tajungtiba purtem shimteta tekülemdak süki teyindangba sü ter anüng sentsü, nakrema meremba, aser tezüng sü temerem cherubim den mechitepa parnoki yanglu. 9Teyindangba sü shiaji metong nung süklep metsür-ti aser lenten nung süklep pezü teyindangba sü ajak tasazük kasa dang liasü. 10Parnoki item sü punguji külemi ka küma metentep, aser tanüngba pungujia ka küma metentep. 11Sübang manung sütsüngji anüng sentsü agi tepungoktsü keta yanglu, yamaji tanga teyindangba sü nungjia parnoki yanglu. 12Teyindangba sü ka nung tepungoktsü tenem, aser tanabuba metentepba tatembanglak nungjia tepungoktsü tenem keta yanglu. 13Ano parnoki hon agi jui tenem yanglua sü anaji ka küma metentep. Anungji tekülemdak sükiji ka dang liasü.

14Tekülemdak süki manung süki asoshi teyindangba sü nabong züng agi pai yanglu: pai teyindangba sü ter-ka yanglu. 15Teyindangba sü shia metong süklep semer liasü, aser teyindangba sü shia lenten süklep pezü; teyindangba sü ter-kaji tasazük ka dang liasü. 16Item teyindangba sü pungu pai külemi metentepdaktsü aser teyindangba sü trokji külemi metentepdaktsü. 17Aser temetentep temaba tatembang nung pai tepungoktsü tenem yanglu, aser tanabuba metentepba sü temaba tatembang nung pai tepungoktsü tenem yanglu. 18Aser süki külemi ka kümdaktsütsü atema pai yongmen yin agi lakepsen tenem yanglu. 19Aser süki nembangtsü atema san tepung küp temerem küma aremba pai yanglu, aser temalen nabong küp agi tenembangtsü yanglu.

20Idangji parnoki sükiji akashia süng agi azüklenji yanger. 21Süngtsük shia metong nung süklep ter, aser lenten süklep ka ser tesadang liasü. 22Aser süngtsük shia nungji temetenteptsü asoshi tongshibang ana-na keta liasü. Yamaji tekülemdak süki süngtsük ajakji yanglu. 23Sentep süki anüolentip terenemtet süngtsük metsü, 24aser iba kübokji taribi agi tesembangtsü lir keter yanglu. 25Süki anüdoklentip len terenemtet süngtsük metsü, 26aser item asoshi taribi agi tesembangtsü keter; süngtsük ka kübok tesembangtsü ana aser tanga süngtsük kübokji tesembangtsü ana. 27Aser tekülemdak süki tesülen anüolen tsütsü pai süngtsük trok yanglu. 28Aser tekülemdak süki tesülen kinük asoshi pai süngtsük ana yanglu. 29Kinüklen süngtsük anaji alilen metentep aser aji azüklen tematiba tashi tua metentepa liasü. Kinüklen süngtsük anajia yamajisa yanglu. 30Anungji süngtsük ti denji taribi tesembangtsü ter-trok, süngtsük shia tesembangtsü ana-na keta liasü.

31Parnoki ano akashia süng agi tekülemdak süki tarüdangtsü külen pungu yanglu. 32Tekülemdak süki külen asoshi pungu, aser tekülemdak süki anüolen asoshi tarüdangtsü pungu yanglu. 33Süngtsük tiyong nung külen tatem nungi külen tatem tashi tonga tarüdangtsüji yanglu. 34Süngtsük nungji hon yanglok, aser hon tayitemji tarüdangtsü sottsü asoshi yanglu, koba daka hon yanglok.

35Teyindangba süji anüng sentsü, nakrema meremba, aser tezüng sü temerem agi cherubim dena mechitepa sangra-a pai yanglu. 36Akashia süng agi tongshi pezü yanglua tema nungji hon yanglok, aser aji hon jui agi kepeta yanglu. Item asoshiji taribi tesembangtsü ketdaktsü. 37Süki kiküm asoshi tetongdangtsü atema anüng sentsü, nakrema meremba, tezüng sü temerem aser sü tajung agi mechitepa yanglu. 38Ibaji atema hon tongshi pungu jui tena yanglu, aser iba naiba temalen tongshibang nungji hon yangloktsü, aser iba tesembangtsüji yongmenyin liasü.

ANITET 37

Tezüngzüktepba Ozüng Süngden

(Ani. 25.10-22)

1Tang Bezaleli Tezüngzüktepba Ozüng Süngdenji akashia süng agi yanglu. Ibaji metong nung süklep ana ser tesadang, lenten süklep ka ser tesadang aser touchi nung süklep ka ser tesadang liasü. 2Pai iba süngden tema aser telung nungji hon temeja yanglok, aser aji meketa hon agi züdang. 3Iba tetsüng pezü nungji pai hon tayi pezü ketdaktsü, külen tayi ana aser külen ana. 4Pai akashia süng agi süngra yanglu aser idakji hon yanglok, 5aser süngden tetsünglen süngra tayi nungji enoktsü. 6Ano hon temeja agi pai tenembangtsü yanglu; koba metong nung süklep ana aser tesadang, lenten nung süklep ka ser tesadang liasü. 7Taochi menden tatembang anatsülen hon agi atsüngba cherubim ana pai yanglu. 8Taochi menden tatem külen cherub ka aser külen cherub ka. Aser aji taochi menden denji ka küma yanglu. 9Aser cherubimji parnok tashikang temaleni sarar, parnok tashikang agi taochi menden awabanger, tejak jitepa, cherubim tejakji taochi menden tsütsü shia liasü.

Amtsük Tenla Sabang

(Ani. 25.23-30)

10Pai akashia süng agi langbang ka metong nung süklep ana, lenten süklep ka, aser touchi nung süklep ka ser tesadang yanglu; 11aser aji hon temeja agi yangbang aser ibaji meketa hon agi züdang. 12Parnoki ano ibaji meketa tekabu ka lema tebang keta yanglu, aser ajia hon agi züdang. 13Aser iba asoshi hon tayi pezü ketdaktsü, aji tetsüng pezü nung kinük pezü aliba nung tayi enok. 14Langbangji abentsü atema süngra atalokdak tatembanglen atsünga tayitemji enoka liasü. 15Pai akashia langbangji abentsü asoshi süng agi süngraji yanglu aser idakji hon yanglok. 16Langbang manung ayutsü asoshi hon temeja agi yangluba su, marok, aser tezüoktsü, marok aser susa ajak yanglu.

Milendong Atalokdak

(Ani. 25.31-40)

17Milendongji pai hon temeja agi yanglu: milendong iba temtsüng aser tetong pai menokteta yanglu; iba maroktem, temechitem, aser narotemji iba den ka dang liasü.

18Iba nungi kongsang trok milendong atalokdak, tip külen nung kongsang asem, aser ano tip külen kongsang asem adoka liasü. 19Almond naro apungba ama yangluba kongsang ka nung marok asem, temechi ka aser naro ka; kongsang ka nungjia almond naro apungba ama yangluba marok asem, temechi ka aser naro ka: yamaji milendong nung jagi kongsang trok aobaji liasü. 20Aser milendong nungji marok pezü almond naro apungba ama, temechitem aser narotem yanglua liasü. 21Milendong atalokdak sangshia aoba kübok temechi ka mezüngbuba kongsang ana kübok, tanabuba temechiji tanabuba kongsang kübok, aser tasembuba temechiji tasembuba kongsang kübok; kongsang trok kübokji sangshia liasü. 22Temechi, kongsangtem, aser milendong atalokdak, ajakji hon temeja agi atsüngba liasü.

23Aser pai milen tenet aser iba angsü aser misü mejeptokba, hon temeja agi yanglu. 24Item oset ajak aser milendong atalokdak asoshi aser susaji dena hon temeja seret semer-pezü agi yanglu.

Liangmesen Arongba Sabang

(Ani. 30.1-5,27-38)

25Parnoki akashia süng agi liangmesen arongba sabang ka lenten metong ajak tasazük kasa: metong nung süklep ka, lenten süklep ka aser touchi nung süklep ana yanglu. Tezütemji iba denji ka dang liasü. 26Iba temalen aser tip meketa aser tezütemji hon temeja agi yanglu aser ibaji meketa hon agi züdang. 27Aser aji abentsü asoshi iba tip anatsülenji, süng tatem sottsü asoshi hon agi züdanga yangluba kübok hon tayi ana yanglu. 28Pai süngraji akashia süng agi yanglu, aser idakji hon yanglok. 29Aser temezütsü asoshi temeshi totzü, teronem menemtsü atema teronem tanang aser liangmesen teronem menemtsü parnoki yanglu.

ANITET 38

Tarongba Tenla Sabang

(Ani. 27.1-8)

1Tarongba tenla sabangji parnoki akashia süng agi yanglu. Ibai kinük pezüsülen kasasa metong nung süklep pungu, lenten süklep pungu aser touchi nung süklep asem yanglu. 2Kinük pezüsülenji tezü ka ka yanglu, aser aji sabang denji ka dang küma yanglu, aser parnoki idakji yongmenyin yanglok. 3Tenladak amshiba oset-tsüset, chipo, tateptsü su susa, shijok aser mijepru, item ajakji yongmenyin agi yanglu. 4Tenladak asoshi yongmenyin agi menja ka satem telunglen tenladak tom ka tashi parnoki yanglu. 5Aser süngraji enoktsü asoshi kinük pezüsülen tayi pezü yanglok, 6Pai süngraji akashia süng agi yanglu, aser idakji yongmenyin yanglok. 7Aser taputsü aji tenladak kinük pezüsülen tayi nungji enoktsü. Parnoki aji süngtsük agi küroka yanglu.

Yongmenyin Susa

(Ani. 30.18)

8Sentep süki kishi züngdang tenzükba tetsürtem asoshi tanüdangtsü, yongmenyin agi pai merükmejutsü susa aser tamentakdak yanglu.

Sentep Süki Kimalen

(Ani. 27.9-19)

9Pai kima yanglu, anüolentiptsütsü kima yangluba nungji temechiba kümpa sü tajung, süklep noklang ka mesanga ayu; 10item tongshi metsü, aser item tesembangtsü metsü, yongmenyin agi yangluba; tongshi jui aser tenaibaji taribi liasü. 11Aser anüdoklentiptsütsü süklep noklang ka, tongshi metsü, aser tesembangtsü metsü, yongmenyin agi; tongshi jui aser tenaidangbaji taribi agi yanglu.

12Anüolen tsütsü teyindangba süji süklep tenem, tongshi ter, aser tesembangtsü ter: tongshi, jui aser tenaibaji taribi agi yanglu. 13Anüdoklen kong kikümbang liasü aji süklep tenem liasü. 14Kikümbang külen tsütsü teyindangba süji süklep terpungu, tongshi asem, aser tesembangtsü asem, 15aser kikümbang külen teyindangba süji süklep terpungu, tongshi asem aser tesembangtsü asem. 16Kima teyindangba sü ajakji temechiba sü tajung agi yanglu. 17Tongshi tesembangtsütemji yongmenyin agi yanglu, saka jui, tenaidangba, aser temalen tongshibangji taribi agi yanglu. Kimalen tongshi ajakji taribi agi naitepa liasü.

18Kima kikümbang asoshi tetongdangbaji noksa enoka yangluba anüng sentsü, nakrema meremba tezüng sü temerem aser temechiba kümpa sü tajung agi tobur junga yanglu. Ibaji metong nung süklep metsü, aser kima teyindangba denji liro medema touchi nung süklep pungu liasü. 19Idakji yongmenyin tongshi pezü aser tesembangtsü asoshi pezü yanglua liasü. Item jui taribi agi aser item temalen iba tongshibang aser tenaidangbaji taribi liasü. 20Tekülemdak süki tasongtsü ajak aser kima temeketji yongmenyin agi yanglu.

Tekülemdak Amshiba Merang Osettem

21Tekülemdak süki asoshi osettem bendenba ya lir, oda kuli ayuba tekülemdak, koba Mosai Levi nungeri inyaktsü mapa ta mela-a Aron putir jabaso Ithamar ketdangsüa inyakdaktsü. 22Aser Yihuda kidong Hur semchir aji Uri jabaso Bezaleli Kibubai Mosa dang melaba ajak inyak. 23Aser pa den Dan kidong nungi Ahisamak jabaso Oholiabi lung nung angenpoka züluba, aser tesangra mapa inyaker ka noksa enoka anüng sentsü nakrema meremba, jakja-a meremba aser kümpa sü tanük agi inyaka liasü.

24Tekülemdak jungjunga renemdang hon agiba ajak agi seret noklang ti aser neter, aser shekel noklang tenet ser semer, aji temeshidak seret odangba agi liasü. 25 Aser yongsük nung aliba telok nungi taribi seret meyirijang asem, aser shekel meyi ka noklang tenet ser neter pungu, aji temeshidak seret odangba agi liasü.

26Nisung shia beka ka ka, aji temeshidak aliba agi shekel tesadang ka, aser küm metsü nungi temalen tebur ajak agi meyi noklang trok ser asem, noklang pungu ser tenem. 27Aser taribi seret meyirijang asemji temeshidak tesembangtsü asoshi aser tetongdangba tesembangtsü asoshi liasü; aser taribi seret meyi asem asoshi tesembangba noklang ka, tesembangtsü shia seret semermer. 28Aser tanüngba taribi shekel meyi ka noklang tenet ser neter pungu jagi tongshitem jui, temalen tongshibang nung yangloka tenaidangtsü pai yanglu. 29Aser tenla bendenba yongmenyin ajak agi seret meyi ka ser noklang ka, aser shekel meyi ana ser noklang pezü liasü. 30Aser iba jagi sentep süki nung tesembangtsü, aser yongmenyin agi yangluba tenladak, aser iba asoshi yongmenyin temeja, aser tenladak osettsüset ajak, 31aser kima nung tesembangtsü, aser tekülemdak süki tasongtsü, aser kima meketa tasongtsü ajak yanglu.

ANITET 39

Putir Sobutsütem

(Ani. 28.1-14)

1 Kibubai Mosa dang melaba ama parnoki Aron asoshi temeshi sobutsü anüng sentsü, nakrema meremba, aser tezüng zü temerem agi temeshidak tenzükdang asemtsü asoshi putir sobutsü parnoki yanglu.

2Pai putir temeshi sobutsüji hon, anüng sentsü, nakrema meremba, tezüng sü temerem aser temechiba kümpa sü tajung agi yanglu. 3Aser parnoki honji apu-apua tapak tapak küma yanglu, aser noksa yanglurtemi anüng sentsü aser nakrema meremba sentsü aser jakja-a meremba sentsü agi inyaktsü atema yinzü küma aji mejepsa. 4Iba asoshi tapubang nung sepoktsü atema külemi metentepa parnoki yanglu; aji tatembang anatsülen külemi metentepa liasü. 5Teberem nung naiba süjia iba denji mesüktepa hon, anüng sentsü, nakrema meremba, aser tezüng sü temerem agi yanglu, aji Kibubai Mosa dang melaba amato yanglu.

6Parnoki oniks lungji hon kepdang manung amenlok, aser idakji angenpoka Israel chirtem tenüng zülua ayu. 7Kibubai Mosa dang melaba ama, Israel chirtem atema tebilemtettsü senti lung asütsü asoshi putir sobutsü tapubang nungji sendak.

Teku Semoktsü

(Ani. 28.15-30)

8Pai teku semoktsüji, putir temeshi sobutsü amaji, tesangra mapa agi inyak; aji hon, anüng sentsü, nakrema meremba, jakja-a meremba aser temechiba kümpa sü tajung agi yanglu. 9Aji tip pezüsülen kasa liasü; teku semoktsüji parnoki anasü yanglu, metong nung aka ka, aser lenten nung aka ka, aji anasü liasü. 10Iba manung parnoki lung taren pezü amenlok: mezüngbuba taren nungji sardins, topaz aser karbankel lung, 11tanabuba taren nungji emerald, sapfir, aser tongbang lung; 12tasembuba taren nungji jacint, aget, aser amethis; 13pezübuba taren nungji beryl, oniks, aser jasper lung. Itemji hon keptang nungji amenloka liasü. 14Lung terana nungji lung shia dakji Israel chirtem tenüng ka ka angenpoka yanglu, aser aji Israel kidong terana asoshi temaitsü liasü.

15Teku semoktsü manung parnoki lisü ama yinzü hon temeja agi mesentepa yanglu. 16Aser parnoki hon keptang ana, hon tayi ana, teku semoktsü tatembang ana nungji sentaka yanglu. 17Aser temesentepba hon yinzü anaji parnoki küri ana manung, teku semoktsü tatem külen sentak. 18Aser temesentepba yinzü külen aliba tatembang anaji, parnoki hon keptang ana nungji sentak, aser aji tapubang nung sepokba putir temeshi sobutsü ajaklen sentaktsü. 19Aser parnoki hon tayi ana yanglu, aser putir temeshi telung sobutsü temtsünglen tatembanglak teku semoktsü tatembang ana manung aji sentak. 20Parnoki ano hon tayi ana yanglu, aser aji putir temeshi sobutsü tejaklen tapubang nung sepokba ana dakji sendak, aji telunglen temetenlokdak anasa sangra-a yangluba temechiba sü tajung agi tenaibaji yanglu. 21Kibubai Mosa dang melaba ama teku semoktsüji sangra-a yangluba tenaiba manung ataloka alitsü, aser aji putir temeshi sobutsüji seplasepshia mesangzütsü asoshi teku semoktsü tayiji putir temeshi sobutsü tayi dak anüng sentsü angsü agi sendak.

Putir Sobutsü

(Ani. 28.31-43)

22Putir temeshi sobutsü ajakji anüng sentsü agi yanglua liasü. 23Tekolak asoshi tapok apabaji meshimatsü atema sübangji meketa arütep. 24Teperem sü temalen jarem mesüka anüng sentsü, nakrema meremba, tezüng sü temerem, aser temechiba kümpa sü agi meketa yanglu. 25Parnoki hon temeja sangshiji teperem sü meketa jarem narotem mesüka tetsüngda nungji sentak. 26Sangshi ka, jarem naro ka, sangshi ka, jarem naro ka ta, Kibubai Mosa dang ashiba ama, teperem sü meketa tenzükba mapa atema yanglu.

27Parnoki Aron aser pa jabasotem asoshi tezüng sü tajung agi semoksü yanglu, 28aser kolakjen, korang, aser tetsüng semoktsü, temechiba kümpa sü, 29sü tajung agi aser peremlen agi, anüng sentsü, nakrema meremba, tezüng sü temerem agi noksa yangluri yangluba ama tobur junga yanglu, aji Kibubai Mosa dang tuyuba ama inyak. 30Parnoki hon temeja agi temeshi korang yanglu aser idakji Kibuba ASOSHI MESHITETBA ta angenpoka zülu. 31Aser iba dakji parnoki temechiba anüng sentsü agi kolakjen manung sendaktsü asoshi yanglu; aji Kibubai Mosa dang melaba ama liasü.

Mapa Renemba

(Ani. 35.10-19)

32Yamaji sentep süki tekülemdak mapa ajakji renem. Israel nungeri Kibubai Mosa dang melaba ajakji parnoki inyak. 33Parnoki tekülemdak süki asoshi oset-tsüset ajak: jui, süngtsük, terenemtet tarüdangtsü, tongshi aser tesembangtsü, item ajakji Mosa dangi bener aru, 34aser san tepung küp temerem küma aremba temeyibangtsü shiküp tajung, teyindangba sü; 35Ozüng Süngden aser taochi menden apuba süngra, 36langbang aser idakji amshiba osettsüset ajak Tsüngrem tsüngdang ayuba amtsük, milen, aser osettsüset ajak, aser milen asoshi totzü; 37hon temeja milendong, iba milentem, oda tatongi shia ayutsüba milentema, aser iba osettsüset ajak, aser tesangwa asoshi totzü; 38aser hon agi yangluba tenladak, aser temezütsü totzü, aser teronem menemtsü tanang, aser süki kishi asoshi tetongdangtsü; 39yongmen yin agi yangluba tenladak, aser iba nung yongmenyin agi menja yangluba, iba tema süngra, aser iba atema oset-tsüset ajak, aser merükmejutsü susa aser iba tamentakdak; 40kima teyindangbatem, iba atema tongshitem, aser iba tesembangtsü, aser kima kiküm tetongdangtsü aser iba lisütem, aser iba tasongtsü, aser sentep süki asoshi tekülemdak süki mapa atema osettsüset ajak; 41temeshidak tenzüktsü asoshi süoshi tajung yangluba, aser putir mapa tenzüktsü asoshi Aron putir asoshi süoshi aser par jabasotem asoshi süoshitem. 42Kibubai Mosa dang melaba ama Israel chirtemi mapa ajak inyak. 43Aser Mosai mapa ajakji angu, aser ajiang, parnoki aji renem; Kibubai Mosa dang melaba ama, yamaji parnoki inyak aser Mosai parnok moatsü.

ANITET 40

1 Kibubai Mosa dang ashi, 2“Mezüngbuba ita mezüng anogo nung sentep süki tekülemdak nai yangluang, 3aser Ozüng Süngdenji teyindangba sü jagi iba jakdang tongdangang. 4Langbangji bener aitang aser idakji osettsüset ajak tatongi rizünga yuang. Milen atalokdakji bener aitang aser idakji osettsüset ajak tatongi rizünga yuang. Milen atalokdakji bener aita iba manung milenji tsüklokang. 5Nai Hon agi yangluba liangmesen arongba sabangji Ozüng Süngden jakdang yuang, aser süki kiküm teyindangbaji yindangang. 6Aser sentep süki, tekülemdak süki kishi jakdang nai tarongba tenladak yuang. 7Sentep süki aser tenladak sabang tsüngda nung susa nung tzüji yuang. 8Ibaji meketa kima ketdakjang aser kiküm tetongdangtsü yindanga yuang.”

9“Temezütsü totzüji bener arua tekülemdak shia nung amshiba oset ajak dak aji mezüjang, aji agi tekülemdak aliba osettemji meshiteta kümdaktsütsü. 10Iba sülen tarongba tenla sabang aser idakji aliba oset-tsüset ajak dak totzü mezüja meshitetang, aser itemji meshiteta kümdaktsütsü. 11Nai ano susa aser iba tamentakdakjia yamajisa meshitetang.”

12“Aron aser pa jabasotem sentep süki kiküm jagi anir arua parnok tzü jagi shitokjang. 13Aron dak putir temeshi sobutsü sobujang, aser putir mapa nung pai ni tenzüktsü atema nai pa dak totzüji mezüja meshitetjang. 14Nai par jabasotem anir arua parnok dak semoksü semokjang. 15Aser parnoki putir mapa nung nai tenzüktsü atema ni parnok tebu dang inyakba ama, nai parnok dak totzü mezüjang; aser parnok totzü mezütsübaji parnok putu songtema parnok atema alitsü.”

16Yamaji Mosai inyak: Kibubai pa dang melaba ama ajak pai inyak. 17Küm tanabuba, mezüngbuba ita, mezüngbuba anogo nung tekülemdak sükiji meso. 18Aser Mosai tesembangtsütemji amendaka yua, süngtsüktemji razüka, aser tarütangtsü yoka, tongshitem azünga tekülemdak süki yanglu. 19Aser pai tekülemdak süki metenloka ayu, aser temalen iba manung temeyiba agi nembang, aji Kibubai Mosa dang ashiba amato liasü. 20Aser pai ozüngji bena arua Ozüng Süngden nung enoka ayu, aser Ozüng Süngden nung süngratemji rüoka ayu, aser temalen temeshi süngden manung, taochi mendenji ayu; 21aser pai ozüng süngdenji tekülemdak süki-i bener aru, aser tetongdangtsü atema teyindangba ayu, aser ozüng süngdenji tongdanga ayu; aji Kibubai Mosa dang melaba amato liasü.

22Tekülemdak süki anüdoklentip tsütsü sentep süki teyindangba sü temalen pai langbangji ayu, 23aser Kibubai melaba ama iba manung amtsükji tiptema ayu. 24Aser anüolentip tekülemdak süki tsütsü langbang tejaklenji, pai milendongji ayu. 25Kibubai melaba ama Kibuba madang pai milenji tsüklok. 26Pai hon agi yangluba tenladak sabangji süki teyindangba sü tejakdang ayu, 27aser Kibubai Mosa dang melaba ama teronem tanang asoshi liangmesen arong. 28Pai tekülemdak süki tetongdangtsü sü ayu, 29aser sentep süki nung tekülemdak süki kishi züng nung pai tarongba tenla aser chiyungtsü tenla agütsü; aji Kibubai Mosa dang melaba ama liasü. 30Sentep süki aser tenladak sabang tsüngda nungji pai susaji ayu, aser shitoktsü asoshi idakji tzü ayu. 31Mosa, Aron aser pa jabasotemi idakji parnok teka aser tetsüng shitok. 32Kibubai melaba ama kodangsa parnok süki jagi idir, aser tenladak sabang anasa arudir parnoki idakji shitok. 33Mosai tekülemdak süki aser sabang meketa kima yanglu aser kima kiküm tetongdangba ayu. Yamaji pai mapa ajak renem.

Sentep Süki Nung Mepet

(Zün. 9.15-23)

34  Idangji mepet agi sentep sükiji akhümbang, aser Kibuba sentsüwangshi agi tekülemdak sükiji asüng. 35Aser Mosai sentep süki jagi aitsü mokoki liasü, kechiaser iba manung mepet liasü, aser KIBUBA sentsüwangshi agi tekülemdak süki sünga liasü. 36Aser kodangsa mepetji tekülemdak süki nungi ajungket, idangji Israel chirtemi parnok lenmang nung jajaba tepiyong tejakleni apusoa ao; 37saka mepetji majungketi lira, aji ajungketa matuba anogo tashi parnoki mapuso; 38kechiaser parnok lenmang nung jajaba tepiyong, Israel kidong ajaki ngua, tekülemdak süki manung anüngdang Kibuba mepet aser aonung mi liasü.