2 SAMUEL
2 SAMUEL
OKILA
TANABUBA SAMUEL ya MEZÜNG SAMUEL
kaket den otsü ajak sentaktepa dang zülua lir. Ibai talisa Dawid mezüng Yihuda
nung yimsü asüba (tapu 1-4) aser iba sülen yimli ajonga madak oda anüdoklentip
yimli Israel dena (tapu 5-24), pa chuba yimli kübok yur yimsü asüba otsü lir.
Dawidi pa yimliji tashi tait aser tuluka yangertsü sendong nung pa yimli kübok
alirtem den dang masü, saka bendanger yimlitem den tongbang raraba otsü ka lir.
Idaki Dawidji Tsüngrem dak tamang
takang ayuba aser bendanga agütsüba chuba ka ama dangbo masü, saka pei
nüburtemi pa dak tamang katettsüsa ochishir chuba ka ama angur. Aji saka ana
pei tejangrabatem ataloktsü atema tetsübutsü temenen menaba nisung ka liasü.
Saka kodang ainkar Nathani iba temenen pa dang rateta ashi, pai pei temenen
nangzüktsü aser kechi temerenshi pa dangi yok itemji pai agizükteta liasü.
Dawidi takok tulu anguba aser pa tasü
tait mapatem jagi Israel ajongai tesülena paji nükshia liasü; aser parnoki
kodang chuba ka atema yongya, parnoki iba chubajibo "Dawider jabaso
ka" oda Dawid metsü nungi pa mesük ka adokdakjang ta kati ka den
shishitepa liasü.
Keta Alibatem
Dawidi Yihuda Madak Yimsü Asüba 1:1-4:12
Dawidi Israel Ajak Madak Yimsü Asüba 5:1-24:25
(a) Mezüng Kümtem 5:1-10:19
(b) Dawid aser Bathsheba 11:1-12:25
(c) Lendong aser Timtem 12:26-20:26
(d) Tesülen Kümtem 21:1-24:25
TANABUBA SAMUEL
Keta Alibatem
Dawidi Yihuda Madak Yimsü Asüba 2 SAMUEL 1:1-4:12
Dawidi Saul Asüba Osang Angashiba 2 SAMUEL 1:1-16
Dawidi Saul aser Yonathan Asoshi Mang Ayimba 2 SAMUEL 1:17-27
Dawid Yihuda Nung Chuba Akümba 2 SAMUEL 2:1-11
Israel O Yihuda Tsüngda Rara 2 SAMUEL 2:12-3:1
Hebron nung Dawid nem Sotsüba Tanurtem 2 SAMUEL 3:2-21
Abner Tepsetba 2 SAMUEL 3:22-30
Abner Aremba 2 SAMUEL 3:31-39
Ishboshet Tepsetba 2 SAMUEL 4:1-12
Dawidi Israel Ajak Madak Yimsü Asüba 2 SAMUEL 5:1-25:25
(a) Mezüng Kümtem 2 SAMUEL 5:1-10:19
Israel Ajak Madak Dawid Chuba Akiimba (1 Pu.11:1-9; 14:1-7) 2 SAMUEL 5:1-16
Filistia Madak Takok Anguba (1 Pu. 14.8-18) 2 SAMUEL 5:17-25
Ozüng Süngden Yirusalemi Bener Aruba (1 Pu. 13.1,-14; 15.25-16.6, 43) 2 SAMUEL 6:1-23
Ainkar Nathan O (1 Ch. 17:1-15) 2 SAMUEL 7:1-17
Dawid Tenüngsang Sarasadem (1 Pu. 17.16-27) 2 SAMUEL 7:18-29
Dawidi Takok Anguba (1 Pu., 18:.1-1.7) 2 SAMUEL 8:1-14
Dawid Yimli Nung Yimsüsürtem 2 SAMUEL 8:15-18
Dawid aser Mefiboshet 2 SAMUEL 9:1-13
Dawider Otongdariem Mezüngmeshiba (1 Pu. 19:1-19) 2 SAMUEL 10:1-5
Ammon Nunger den Raraba 2 SAMUEL 10:6-14
(b) Dawid Aser Bathshaba 2 SAMUEL 11:1-12:25
Dawid aser Bathsheba 2 SAMUEL 11:1-27
Nathani Dawid Arütsüba 2 SAMUEL 12:1-15
Bathshebai Asoba Tanur Asüba 2 SAMUEL 12:16-23
Solomon Asoba 2 SAMUEL 12:24-25
(c) Lendong Aser Timtem 2 SAMUEL 12:26-20:26
Dawidi Rabba Amakba (1 Pu.20:1-3) 2 SAMUEL 12:26-31
Ammon Aser Tamar 2 SAMUEL 13:1-22
Absalomi Ammon Tepsetba 2 SAMUEL 13:23-39
Yoabi Absalom Meyipa Anir Aruba 2 SAMUEL 14:1-24
Absalom Dawid Den Putepdaktsba 2 SAMUEL 14:25-33
Absalomi Tasa Tamajung Asaba 2 SAMUEL 15:1-12
Dawidi Absalom Nungi Ajenba 2 SAMUEL 15:13-37
Dawid Aser Ziba 2 SAMUEL 16:1-4
Shimei-i Dawid Atakatemba 2 SAMUEL 16:5-14
Absalom Yirusalem Nung 2 SAMUEL 16:15-23
Hushai Absalom Anisaba 2 SAMUEL 17:1-13
Dawid Dang Tekümdangtsü Ashiba Aser Jentetba 2 SAMUEL 17:14-29
Absalomer Telok Akokba 2 SAMUEL 18:1-8
Absalom Asüba 2 SAMUEL 18:9-18
Dawid Dang Absalom Asüba Indang Ashiba 2 SAMUEL 18:19-33
Dawidi Absalom Asoshi Mangyimba 2 SAMUEL 19:1-8
Dawid Yirusalemi Meyipa Shilangba 2 SAMUEL 19:9-18
Dawidi Shimei Dang Temeim Sayuba 2 SAMUEL 19:19-23
Dawidi Mefiboshet Dang Temeim Sayuba 2 SAMUEL 19:24-30
Dawidi Barzillai Dang Temeim Sayuba 2 SAMUEL 19:31-39
Chuba Asoshi Yihuda O Israel na O toktepba 2 SAMUEL 19:40-43
Sheba Dawid Anema Nokdakba 2 SAMUEL 20:1-22
Dawid Tongti Kedangpurtem 2 SAMUEL 20:23-26
(d) Tesülen Kümtem 2 SAMUEL 21:1-24:25
Ayawara Aser Saul Kinungerte Südaktsüba 2 SAMUEL 21:1-14
Filistia Nunger Den Raraba (1 Pu.20:4-8) 2 SAMUEL 21:15-22
Dawid Takok Ken (Tke.18) 2 SAMUEL 22:1-51
Dawid Tatembang O 2 SAMUEL 23:1-39
Dawidi Nütsüng Yongsük Züngdangba (1 Pu.21:1-27) 2 SAMUEL 24:1-25
2 SAMUEL 1
Dawidi Saul Asüba Osang Angashiba1Saul sür külen, kodang Dawidi Amalek nunger kokteter meyipa aru, Ziklag nung pai ananü ali. 2Aser tasemnü, ajiang, nisung ka pei süoshi shisar, pa kolak nung ali mezür, Saul anendak nungi aru. Aser kodang Pa Dawid dangi aru, pai ali nung apudaka akhüm tsübu sayu. 3Dawidi pa dang asüngdang, “Na kong nungi aru?” Pai langzü, “Ni Israel temeranger telok nungi jentet.”4Dawidi pa dang ashi, “Kodasa odar shiangjo.” Aser pai langzü, “Tongbang jia nisungtem jenshiogo, aser nisung aika laoa süogo; Saul aser par jabaso Yonathan süogo.”5Idangji pa den jembiba asangur dangji Dawidi ashi, “Saul aser par jabaso Yonathan asü ta nai koda metet?”6 Aser pa dang ashisang asangur jagi langzü, “Tia agi ni Gilboa tenem nung lishia ata, aser yangji Saul pei nü nung metaloka liasü; aser ajiang, talungtsütem aser kor nung amenertem pa anasa liasü. 7Aser pai pa sülen reprangdang pai ni ngua aja. Aser ni langzü, ‘Ni yangi lir.’ 8Aser pai kü dang ashi, ‘Na shiba?’ Ni pa dang langzü, ‘Ni Amalek nunger.’ 9Idangji pai kü dang ashi, ‘Yagi arung aser ni tepsetang, kechiaser ni kanga mejungi yiruogo aser tasür lir.’ 10Anungji ni pa anasa noktak, aser pa tepset, kechiaser pa laor külenbo pa asütsü ta ni metet; aser pa tekolak nung aliba chuba korang aser pa teben nung aliba kap ni bena aru, aser ni itemji yangi kü kibur dangi bener arua lir.”11Idangji Dawidi pei süoshi dak amet, aser itemji shisa; aser yamaji pa den alir ajaki inyak. 12Parnoki mang ayim aser ajeb aser Saul aser par jabaso Yonathan aser Kibuba nüburtem asoshi aser Israel kidong asoshi aonung tashi lumi, kechiaser nok agi parnok lao.13Pa dang ashisang asanguba dangji Dawidi ashi, “Na kong nungi aru?” Pai langzü, “Ni aener ka chir, Amalek nunger lir.”14Dawidi pa dang ashi, Kibubai shimtetba samatsütsü asoshi ne ket aitsü kodaser nai metsübui liasü? 15Aser Dawidi asangur rongnung ka jar ashi, “Oang, aser pa laodakjang.” Aser pai pa dak azük nung pa asü. 16Kechiaser Dawidi pa dang ashi, “Ne zü ne kolak manungsa benang; kechiyong ne bang agi na anema kuli agüja ashi, Ni Kibubai shimtetba tepsetogo.”Dawidi Saul Aser Yonathan Asoshi Mang Ayimba17Saul aser pa jabaso Yonathan madak iba aiatai ken agi Dawidi asüku ken aten. 18 Ibai Yihuda nunger dang sayutsüla ta pai ashi; ajiang, ibai Yasher Kaket nung zülua lir.19“Oh, Israel, ne sentsüwangshi, ne temaba tesemtem nung tepseta lir!Tashi tulurtem koda laoa lir!20Gat nung aji teshi Ashkelon yimdong nung aji tesangdong; Filistia nunger jalatem pelatepa lir,memejeptoker jalatemi washilokja lir,Gat nung aji teshi,Ashkelon yimdong nung aji tesangdong.21“Nenok Gilboa tenemtem,ne madak azüngtzü mesüra tzünglu taludaktsümesüra iba liji tabung lidakjang.Kechiyong yangji nokinketer jong menentsü,Saul jong, totzü agi memezütsü.22Tetepseter zü nungi, tashi tulur temo nungiYonathan lijak meyipa maru,Aser Saul nok tazüng meyipa maru.23“Saul aser Yonathan, tena temeimtep aser tobur ajung,taküm nung aser tasü nunga tena mepila;mongzü dang nungi tena tekaraba liasü,molusongzü dang nungi parnok tashi taitba liasü.24“Nenok Israel jalatem, Saul asoshi jebang.Shibai nenok meraketa jakjaa meremba sü agi abendaktsü,shibai nenok süoshi nung hon yangloktsü.25“Tongbang tiyong nung nokinketertem koda laoa lir!Yonathan ne temaba menden nung tepseta lir.26“Ni na asoshi asükua lir, kü adianu Yonathan;kü madang pa kanga jangratemtsü liasü;kü dang ne temeim tesüngmangtsüka liasü.Tetsür temeim dang nungia taoba.27“Tashi tulurtem koda laoa lir,aser rara nok o nütem sama-a lir!”2 SAMUEL 2
Dawid Yihuda Nung Chuba Akümba1Iba sülen Dawidi Kibuba dang asüngdang, “Yihuda yimti kar dangi ni tudisü” Kibubai pa dang langzü, “Tuang.” Dawidi ashi, “Ni koleni atutsü” Pai langzü, “Hebroni.” 2Anungji Dawidi pa kibutsü ana, Yezreel tsür Ahinoam, Karmel nunger Nabal kibutsü Abigail den ajagi atu. 3Aser Dawidi pa den alir nisung shia, pei kibong den atu; aser parnok Hebron yimtitem nung ali. 4Aser Yihuda nisungtem aru, aser yangji Yihuda kidong madak chuba asütsü parnoki Dawid dak totzü mezütsü.Parnoki Dawid dang ashi,“Saul mang aremertemji Yebesh-gilead nisungtem lir.” 5Dawidi osang abenertem Yabesh-gileadi yoka parnok dang ashi, “Nenoki nenok kibur, oda Saul dang iba temeim sayuba, aser pa remtsüba atema Kibuba nungi nenok temoatsü sang! 6Tang nenok dang Kibubai temoatsü aser temeim sayuangma: aser nenoki ibai inyakba asoshi nia nenok nem iba temeim lepa agütsütsü. 7Anungji tang nenok teka tashi itang, aser tasü itang; kechiyong nenok kibuba Saul süogo, aser Yihuda kidongia parnok madak chuba asütsü kü dak totzü mezütsüogo.”8Tang Sauler temeranger telok arkotong, Ner jabaso Abneri Sauler jabaso Ish-boshet aser Mahanaimi anir aru; 9aser pai Gilead aser Ashur nunger madak, Yezreel, Efraim aser Israel ajak madak pa chuba kümdaktsü. 10Sauler jabaso Ish-boshet pai Israel madak chubatsü tenzükdang küm lir liasü, aser pai küm ana chuba. Saka Yihuda kidongibo Dawid sülen anitak. 11Aser Hebron nung Yihuda kidong madak Dawid chuba süa aliba mapangji küm tenet ser ita trok liasü.Israel o Yihuda Tsüngda Rara12Ner jabaso Abner, aser Saul jabaso Ish-boshet tenzükertem, Mahanaim nungi Gibeoni adok. 13Aser Zeruia jabaso Yoab, aser Dawid tenzükertema adoka parnoki Gibeon awatsüng anasa ajuru; aser parnok, ka awatsüng külen, aser kaji awatsüng külen tsütsü amen. 14Abneri Yoab dang ashi, “Ni ne dang mepishir, asangur nisungtemji aramesodakjang aser onok madang asayadakjang.” Yoabi ashi, “Parnok aramesodakjang.”15Idangji parnok arameso aser züngdanga süia ao; Benjamin kidong Saul jabaso Ish-boshet asoshi terana Dawid tenzükertem asoshi terana. 16Aser parnok nisung shiai pei medemer kolak nung amet, aser pei medemer tesa nung pei nok settoktsü; anungji parnok külemi lao; angji iba linük koba Gibeon nung lir, Helkath-hazzurim aja.17Iba anogo nung tongbangji kanga sashia liasü; Abner, aser Israel nunger Dawid tenzükertem madang tamakok angu. 18Aser Zeruia jabaso asemji Yoab, Abishai aser Asahel yangji liasü, aser Asahel shitsü-mesü tetsüng ama tepungba liasü. 19Aser Asaheli Abner sülen aria ao; aser Abner sülen anitakdang taoi pei tajichi mesüra tabeleni memeyip. 20Idangji Abneri pa sülen repranga ashi, “Ya na no, Asahel” Aser pai langzü, “Ya ni.”21Abneri pa dang ashi, “Ne teka tajichileni mesüra tabeleni meyipang, aser nai asangur rongnung ka puang, aser nai pa nok o nüji agiang.” Saka Asaheli pa sülen anitaka aoba nungi memeyip. 22Abneri tanaben Asahel dang ashi, “Kü sülen nai manitaki meyipang: kechi atema ni na ali-i tsüngzüka yoktsü? Ajangla nedi Yoab dang ni kechi koda kü tejak sayutsü” 23Aji saka pai meyipa mao; aji asünung Abneri pa tepok nung nület agi atsüng, angji pa sülen nüji ateta adok; aser pa yangji laoa asü; aser Asahel laoa asüdakjagi arur ajak marakzüi noktak.24Saka Yoab aser Abishai nati Abner sülen aria oa; Gibeon lisem lima lenmangi aoba Gia madang aliba Amma tenem parnoki atongdang anü ai. 25Aser Benjamin chirtem parnok sasa külemi Abner sülen sentep, aser telok ka aküm, aser tenem ka nung noktak. 26Idangji Abneri Yoab jaa ashi, “Nok agi teti meyokadoktsü asü? Tatemsabo taku asütsü ta nai memetet no? Kopiga tashi nai nisungtem dang parnok adianu arishia anitakba nungi meyipang ta memelai alitsü?”27Yoabi ashi, “Tsüngrem tenüng atemer shidi, Nai mejembi-i lilasang, atangji anepdang yongi nisungtem oadoker lila, aser parnok adianutem sülen manitaki lila.” 28Anungji Yoabi jangzü apu, aser nisung ajak anen, aser joko Israel sülen aria mao, mesüra joko merara.29Abner aser par nisung ajak paonungji Araba ajanga oa Yordan ayong aten, aser Mahanaimi aru. 30Abner sülen aria aoba nungi Yoabi meyipa aru: aser nisung ajak pai külemi sentepdakja alidang, Dawid tenzüker nisung tertuku aser Asahel maliasü. 31Saka Dawid tenzükertemi Benjamin aser Abner nisungtem noklang-asem ‘ser roker tepseter liasü. 32Aser parnoki Asahel ajonga arua, Bethlehem nung tebu leper nung arem. Aser Yoab aser par nisungtem aonung tepiyong jaja, aser Hebron atongdang sangwa.2 SAMUEL 3
1Saul aser Dawid kinunger tsüngda nung rara talangka liasü, aser Dawid tashi taitba taitba aküm, saka Saul kinunger tashi maitba maitba aküm.Hebron Nung Dawid Nem Sotsüba Tanurtem2Hebron nung Dawid nem jabasotem sotsü: aser par tambusangji Amnon, Yezreel tsür Ahinoam chir. 3Tanabubaji Karmel nunger Nabal kibutsü Abigail nungi Kileab; tasembubaji Heshur chuba Talmai jala Maaka chir Absalom; 4pezübubaji Haggit chir Adonija; pungububaji Abital chir Shefthia; 5aser trokbubaji Dawid kibutsü Egla nungi Ithream. Parnokji Hebron nung Dawid nem sotsü.Abneri Dawid Dangi Aoba6Saul kidong aser Dawid kidong tsüngda nung rara aliba mapang nung, Saul kidong Abneri pa sasa tashi ita yanglu. 7Tang Saul tezüngatsü ka tenüng agi Rizpa, Aia jala liasü: aser Ish-bosheti Abner dang ashi, “Kübu tezüngatsü dangi kechiba na ao?”8Idangji Ish-boshet o nung Abner kanga ain adoka ashi, “Ni Yihuda meyong azü kolak asü?”Tanü ni Saul kidong, pa adianu nunger aser pa tembartem dang temeim sayuogo, aser Dawid ket nung na bendanga magütsü; aji saka nai tanübo iba tetsür indang kü dak tai agütsür. 9Tsüngremi Abner dang yamaji inyakang, aser Kibubai kechi Dawid dang azüngashi aji ni pa asoshi meinyaktetrabang, ano talia inyakang; 10 Saul kidong nungi yimliji meyipteptsü, aser Dawid chuba menden Israel aser Yihuda madak, oda Dan nungi Beersheba tashi yanglutsü.” 11Aser Ish-bosheti Abner dang o kata melangzü, kechiaser pai pa tsübu.12Abneri osang benertem Hebroni Dawid dangi yoka ashi, “Ali ya shir meyong? Kü den ne tezüngzüktepba yangluang, aser ajiang, Israel ajak ne dangi bener arutsü kü teka ne den alitsü.”13Dawidi ashi, “Junger, ni ne den tezüngzüktepba ka yudi: saka na nungi ni langka aginür, aji nai kü tejak angutsü arudang, tamasa nai Saul jala Mikal anir maru tashi, nai kü tejak mangutsü.” 14Aser Dawidi osang benertem Saul chir Ish-boshet dangi yoka ashi, “Kübutsü Mikal shiba asoshi ni Filistia nunger tajiküp noklang ka agi anisen agütsü la kü nem bendanga agüjang.” 15Aser Ish-bosheti yoka la kinungpu Laish jabaso Paltiel nungi anir ao. 16Aser la kinungpu la den jeba ao, aser la sülen Bahurim tonga anitak. Idangji Abneri pa dang ashi, “Meyipa oang” aser pa meyipa ao.17Abneri Israel tebu-teditem den jembia ashi, “Taoba mapang nung nenok madak chuba asütsü nenoki Dawid bushi. 18Tang ajangla aji inyakang; kechiaser Kibubai Dawid indang jembia ashi, Kü tenzüker Dawid ket agi Filistia nunger ket nungi aser parnok tsükchir ajak ket nungi ni kü nübur Israel kümzüktsü.” 19Abneri ano Benjamin kidong dena jembi: ano Abneria Hebron nung Dawid narong nung Israel aser Benjamin kidong ajongai junger ta asüba ajak ashi.20Anungji Abner Dawid dangi Hebroni pa den nisung metsü den aru. Aser Dawidi Abner aser pa den alir nisung nem benjong ka agütsü. 21Aser Abneri Dawid dang ashi, “Ni aramesoa odi, aser Israel ajak kü kibur chuba dangi anitentsü, idangji ne den parnoki tezüngzüktepba yanglutsü, aser ne nelai jangraba ajak madak nai chubatsü akok.” Aser Dawidi Abner yok; aser pa yimjung nung ao.Abner Tepsetba22Tang Dawid tenzükertem aser Yoab yimaklen nungi aru, aser parnok den temakzüba oset jenti bener aru: saka Abnerbo Dawid den Hebron nung maliasü; kechiyong pai pa yokadoker liasü, aser pa tesünep nung or liasü. 23Kodang Yoab aser pa den alirtem temeranger telok arua liasü, parnoki Yoab dang ashi, “Ner chir Abner chuba dangi aru, aser pai pa yokadokogo, aser pa yimjung nung ogo.” 24Idangji Yoabi chuba dangi arua ashi, “Nai kechi inyak? ajiang, Abner ne dangi aru; kechiba nai pa yokadok? 25Ner chir Abnerji nai metet, na külakoktsütsü, aser na oli aruli asüba, aser nai inyakba ajak metettsü pa aru.”26Kodang Yoab Dawid nungi adok, pai Abner sülen osang benertem yok, aser parnoki pa Sira tzübu nungi meyipa anir aru: saka Dawidi aji memetet. 27Aser kodang Abner Hebroni meyipa aru, Yoabi pa tezüleni pa den tanemi jembitsü amungi anir ait, aser yangji pa dak tepok nung setoktsü, yangji pa, Yoab tenu Asahel zü tokshiba asoshi asü.28Tesülen aji Dawidi angashidang, pai ashi, “Ni aser kü yimli, Ner chir Abner zü nungi teti asoshi Kibuba madang tai maket lir; 29aji Yoab kolak manung, aser tebuer kidong ajak madak tsükdakjang; aser Yoab kidong nung temang nungi ayimba, mesüra zütsüra aketer ka, mesüra ajok nung metaloker ka mesüra nok agi asür ka, mesüra chiyungtsü agi anünger ka medeni telidaktsü. 30Anungji Yoab aser tenu Abishai tenati Abner tepset, kechiaser pai tena adianu Asahelji Gibeon tongbang nung tepset.”Abner Aremba31Idangji Dawidi Yoab aser pa den alir nisung ajak dang ashi, “Nenok süoshi shisa-ang, aser anemsü agi nenok nangri kangang, aser Abner mang yimang.” Aser Dawid chubai mang apuba sülenji anitak. 32Aser parnoki Hebron nung Abner arem, aser chubai ola adok aser Abner leper nung jebloktsü; aser nisung ajaki ajeb. 33Aser chubai Abner asoshi iba mangyim ken tena ashi,“Tamachi nisung asüba amai Abner asütsü no?34Ne teka maleni liasü,mesüra ne tetsüng merangsen agi mesentak,tamajunger madang nisung ka laoba mesüka na yamaji lao.” Aser tanaben nisung ajaki pa asoshi ajeb.35Idangji nisung ajaki ano anüngdang alidangsa Dawid mesüzüka chiyungdaktsütsü aru, saka Dawidi azüngashia ashi, “Anü maidang ni chiyungtsü mesüra langka menakdangra, mesüra langka süra, Tsüngremi kü dang yamaji, mesüra talia inyakangma.” 36Nisung ajaki aji meteta-adok, aser aji agi nisungtem peladaktsü aser chubai inyakba ajak nung parnoki pela. 37Anungji nisung ajaki aser Israel ajaki panüji Ner chir Abner tepsettsüji chuba nungi masü ta angatet. 38Idangji chubai pa tenzükertem dang ashi, “Nenoki tanü Israel nung chuba chir ka aser tulur nisung ka laoa lir ta memetet no? 39Ni mezüja shimtetba chuba ka saka tanü ni tashi meiti lir: Zeruia chirtem item nisung ni asoshi onsara tesashi lir. Kibubai tamajung inyaker nem pei mapa yari ajangzükdakjang.”2 SAMUEL 4
Ish-boshet Tepsetba1Kodang Saul jabaso Ish-bosheti Hebron nung Abner süogo ta angashi pa tasü meiti aküm, aser Israel nunger ajak tetsübu agi asüng. 2Tang Saul jabaso Ish-boshet telok madak arkotong ana liasü; ka tenüng Baana, aser kaji tenüngji Rekab, Beeroth nunger Rimmon chir, Benjamin chirtem nungi liasü; kechiyong Beerota Benjamin nung züngsema liasü. 3Kechiyong Beeroth nunger Gittaimi jena ao, aser tanü tashi yangji bendanger senso süa alir.4 Saul chir Yonathan jabaso tenüng agi Mefiboshet liasü. Kodang Saul aser Yonathan asüba indang Yezreel nungi osang aru idangji pa küm pungu tain liasü, anungji pa yarilai paji bener ajen. Saka lai aritepa ajen dang pa tsükdaktsü aser tsüngtsüker aküm.5Beeroth nunger Rimmon jabasotem, Rekab aser Baana, ao aser anü tatsük dang Ish-boshet, pa anjongmeshi anisüngzüka lia, par kidangi aru. 6Tetsü shibai kikümbang nüka liasü, laji wheat shimdang anünüa amua oadoker liasü, anungji Rekab o tenu Baana nati laji ajanga ai. 7Kodang tenati kilung jagi ai pa pei yipten nung mejanga lia tenati pa tepok nung atsüng aser pa tekolak tangzüka bener aonung tepiyong Araba lenmangi ao. 8Aser parnoki Ishboshet kolak Dawid dangi Hebroni bener arua chuba dang ashi, “Ne taküm bushisang aser tsükchir Saul jabaso Ish-boshet kolak ajiang; aser tanü kü kibur chuba Saul aser pa metsü dak Kibubai mang yangogo.”9Dawidi Rekab aser tenu Baana Beeroth nunger Timmon chirtem dang langzü, Kibuba taküm ali nungji, shibai kü nela anemer ajak nungi kümzük, 10 kodang kati, “Ajiang, Saul süogo,” ta osang tajung bener aru ta bilema ashi, ni pa dak sot, aser Ziklag nung pa tepset, aji pa osang asoshi tajangzük liasü. 11Nisung tamajungeri temeshi nisung pei kidang pei yipten nung lia tepset nung koda taliang asütsü, ni tang ne ket nungi pa zü makangtsü asü, aser na alima nungi bener moli ma? 12Aser Dawidi par asangurtem dang mela-a parnok tepset, aser parnok teka aser tetsüng alangtoktsü, aser parnok Hebron awatsüng anasa itaka toktsü. Saka parnoki Ish-boshet kolak agia aji Hebron nung Abner leper nung arem.2 SAMUEL 5
Israel Ajak Madak Dawid Chuba Akümba(1 Pu. 11.1-9; 14.1-7)1Idangji Israel kin ajak Dawid dangi Hebroni arua ashi, “Ajiang, onok ne teret aser ne shi. 2Akhidang, kodang onok madak Saul chuba liasü, Israel anir adoksang aser anir aitsangji na liasü; aser Kibubai ne dang ashi, ‘Nai kü nübur Israel mesütsü, aser Israel madak ne chuba asütsü.’ ” 3Anungji Israel tebu-tedi ajak chuba dangi Hebroni aru; aser Dawid chubai parnok den Hebron nung Kibuba madang tezüngzüktepba ka yanglu: aser parnoki Israel madak Dawid chuba asütsü totzü mezütsü. 4Dawid chubatsü tenzükdang pa küm semer liasü, aser pai küm lir chuba. 5Hebron nung pai Yihuda madak küm tenet aser ita trok chuba; aser Yirusalem nung pai Israel aser Yihuda ajak madak küm semer asem chuba.6 Chuba aser pa nisungtemi Yirusalem nung Yebus nunger anema apuso. Yebus nungertemi Dawidi ajagi maitettsü ta bilema ashi, “Na yagi maitettsü, nükpoker o tsüngtsükertemi na aridoktsü.” 7Saka Dawidi Zion mitsaji maktet aser aji “Dawid Yimti” aküm.8Panüji Dawidi ashi, “Shibaisa Yebus nunger tepsetdir, tzümesü lenmang jagi tuang, aser Dawid sempartem nükpoker aser tsüngtsükertemji tepsetang.” Aji asünung “Nükpoker aser tsüngtsükertemi Kibuba kidangi maitsüla” ta jembir.9Dawid mitsa nung ali, aser iba dangji Dawid yimti ta aja. Dawidi Millo nungi tenzüka telunglen yimti yanglu. 10Dawid tuluba tuluba aküm, kechiyong Kibuba, Temeranger Tsüngrem, pa den liasü.11Tair chuba Hirami Dawid dangi osang benertem den cedar süng, aser mistritem, aser lung mistritem yok: aser parnoki Dawid nem chuba ki ka yanglutsü. 12Aser Kibubai pa Israel madak chuba kümdaktsü, aser par nübur Israel atema pa yimli uludaktsü ta Dawidi metet.13Hebron nungi arur külen Dawidi Yirusalem nungi tezüngatsü aser kibutsü tali agi; aser ano Dawid nem jabaso aser jala sotsü. 14Itemi Yirusalem nung pa nem sotsüba tenüngtem lir; Shammua, Shobab, Nathan, Solomon; 15Ibhar, Elishua, Nefeg, Yafia; 16Elishama, Eliada, aser Elifelet.Filistia Madak Takok Anguba(1 Pu. 14.8-17)17Kodang Israel madak chuba asütsü Dawid dak totzü mezüja shimtetogo ta Filistia nungertemi angashi, parnoki pa aputsü atu. Dawidi aji angashia mitsai alu. 18Tang Filistia nunger arua parnoki Refaim lenten sünga anen. 19Aser Dawidi Kibuba dang asüngdanga ashi, “Ni Filistia nunger anema atutsü asü? Nai parnok kü ket nung bendanga agütsütsü asü?” Kibubai langzü, “Tuang, kechiyong atangji ni Filistia nunger ne ket nung bendanga agütsütsü.”20Anungji pai Baal-Perazimi aru, aser pai yangji parnok akok; aser pai ashi, “Tzümetsüng nungpokba mesüka kü tsükchirtem kü madang Kibubai nungshitsüogo.” Anungji pai iba linük dang Baal Perazimb ta aja. 21Aser parnoki parnok süngyanglu yangji toktsü, aser Dawid aser par nisungtemi itemji bener ao.22Ano Filistia nungeri tanaben atua Refaim lenten sünga atur anen. 23Anungji Dawidi ano Kibuba dang asüngdang nung pai langzü, “Tejaklen nungi parnok dangi tetu saka tesülen nungi parnokji meketbangang aser balsam süngdong jakdang nungjagi parnokji arimesoang. 24Kodang nai balsam süngdong kolak manung lokti süiba ola angashidir, idangji nai parnok anema apusotsüla, kechiaser ibaji Filistia nunger temerangertem tepsettsü atema, Kibuba ne jakdang aoba temaitsüji alitsü.” 25Kibubai melaba ama Dawidi inyak, aser Filistia nungertemji Geba nungi Gezer lenmang tashi makyonga ao.2 SAMUEL 6
Ozüng Süngden Yirusalemi Bener Aruba(1 Pu. 13.1-14; 15.25—16.6,43)1Dawidi tanaben Israel teshimtet nisung ajak, meyi semer külemi sentepdaktsü. 2 Dawidi aramesoa pa den alir nisung ajak den Baalejudai ao aser yang nungjagi Tsüngrem temeshi süngden bener atutsü ao, kong Temeranger Kibuba tenüng, shiba cherubim madak mena lir pa tenüng nung ajar. 3 Aser parnoki Tsüngrem süngdenji talungtsü tasen ka nung ayu, aser tenem nung aliba Abinadaber ki nungi bener adok; Abinadaber jabaso Uzza aser Ahio, nati talungtsü tasenji ani. 4Aser tenem nung aliba Abinadab ki nungi parnoki Tsüngrem süngden denji bener adok; aser süngden jakdangji Ahio jaja. 5Aser Fir süng agi yangluba, tzürang kongki, tawaba kongki, tambourine kongki, castanet kongki, aser laya kongki, kongki tapu ajak agi Dawid aser Israel kidong ajaki Kibuba madang atem.6Kodang parnok Nakon motsüngmen tonga aru, Uzzai teka adoka Tsüngrem süngden dakji amet; kechiyong nashitemji metsütak. 7Idangyongji Kibuba ain Uzza anema adok aser yangji aibelenba asoshi tepset; aser pa Tsüngrem süngden anasa asü. 8Aser Dawid mepelai liasü, kechiaser Kibuba Uzza anema ain adok, aser iba linük dangji Perez Uzza ta tanü tashi ajar.9Panüji Dawidi Kibuba tsübua liasü; aser pai ashi, “Kibuba süngden koma kü dangi arutsü” 10Anungji Dawidi Kibuba süngdenji Dawid yimti-i belena bener meinü; saka Dawidi aji Git nunger Obed-edom kidangi aenshia bener ai. 11 Aser KIBUBA süngdenji Git nunger Obed-edom kidang ita asem ali: aser Kibubai Obed-edom, aser par kibong ajak moatsü.12Dawid chuba dang ya metetdakja ashi, “Tsüngrem süngden alibayong Kibubai Obed-edom kibong, aser pa meyong ajak moatsüogo.” Aser Dawid oa Obed-edomer kidang nungi Tsüngrem temeshi süngdenji bener adok, aser Dawid yimti-i pelatepa bener ai. 13Kodang Ozüng Süngden apurtemji mera trok ao, pai nashi pungchi ka aser nashi chanu teyira ka ta tepseta tarongba tenla agütsü. 14Dawidi nangri dang kanger Kibuba madang pa tashi ajak agi tsüngsang, 15Aser pa den Israel kidong ajaki washia, aser jangzü ola agi Kibuba süngdenji bener adok.16 Kibuba süngdenji Dawid yimti-i bener aitdang, Sauler jala Mikal kichiba nungi repranga yok, aser Dawid chuba Kibuba madang jokshishia tsüngsangba ngua lai la mulungjang nung pa sensatsü. 17Aser parnoki Kibuba süngdenji bener ait. Dawidi iba asoshi süki süa aliba tayudak tiyong nung aji toktsü, aser Dawidi Kibuba madang tarongba tenla aser yimjung tenla agütsü. 18Kodang Dawidi tarongba tenla aser yimjung tenla tenlabaji atem, pai nisungtem Temeranger Kibuba tenüng nung moatsü. 19Aser nisung ajak rongnung, oda Israel telokti ajonga rongnung, tetsür-tebur shia nem, amtsük ka ka, shijeb, aser kismis pai agütsü.Yamaji nisung ajak pei kinunger moatsütsü meyipa ao. 20Kodang Dawid pei kinunger moatsütsü meyipa aru, Saul jala Mikal pa lenji arua ashi, “Tanübo Israel chuba koda sentsüwangshia liasü, shibai tanü pei sasa par kilitsürtem madang, samesa purtem taaktsü makai pei sasa mangsa aliba ama mangsa liasü!”21Dawidi Mikal dang ashi, “KIBUBA madang ni tsüngsanger, shibai Kibuba nübur, Israel madak, ni tanishir asütsü, nebu aser par kibong ajak madak ni shimtet; anungji ni Kibuba madang tsüngsangtsü. 22Aser iba dang nungi ni tali tamajungba asütsü, aser ni kü tsüngdang samesa asütsü: saka nai ashiba kilitsürtem, parnok madang ni tetushi nung alitsü.” 23Aser Saul jala Mikal asüba anogo tashi tanur maliasü.2 SAMUEL 7
Ainkar Nathan O(1 Ch. 17.1-15)1Kodang chuba pei kidang ali, aser tsükchirtem meketa aliba ajak nungi Kibubai pa nem anisüngzük agütsü. 2Chubai Nathan ainkar dang ashi, “Tang ajiang, ni cedar agi yangluba ki ka nung alir, saka Tsüngrem süngdenbo süki teyindangba kübok alir.”3Nathani chuba dang ashi, “Oang, ne mulungjang nung aliba ajak inyakang; kechiyong Kibuba ne den lir.”4Saka paonungjisa Kibuba o Nathan dangi arua ashi, 5“Oang, aser kü tenzüker Dawid dang shiang, Yamai Kibubai ashir, Nai kü nem talitsü ki yanglutsütsü asü? 6Kechiyong Israel chirtem Ijip nungi ni anir adokba anogo nungi, oda tanü tashi, ni ki ka nung melidang, saka süki ka nung lia jajaogo. 7Ajaklen kechi nungsa ni Israel chirtem den jaja, ni Israel kidong ajak den, shirnok dang ni kü nübur Israel mesütsü melaogo, parnok dang kechiba nenoki kü nem cedar agi ki ka meyanglutsü? ta ni mashi.”8Anungji tang yamai nai kü tenzüker Dawid dang ashitsü, “Yamai Temeranger Kibubai ashir, Kü nübur aser Israel madak na tanishir asütsü asoshi, chiyimdak san sülen anitakba nungi ni na agi; 9aser na kolenisa ao ni ne den liasü, aser ne madang nungi ne tsükchir ajak leptoktsü; aser alima nung alir tulurtem tenüng ama ni na tenüng tulu ka kümdaktsütsü 10Aser kü nübur Israel asoshi ni tesem ka shimtettsü, aser parnok tema toktsütsü, angji parnok pei talidak alitsü, aser joko maenshitsü, mesüra mezüng amato, tamajungba chirtemi parnok mekangshitsü, 11oda kü nübur Israel madak obendangertem shimtetba anogo nungi; aser ne tsükchir ajak nungi ni na anisüngzükdaktsütsü. Ano Kibubai ne nem ki ka yanglutsütsü ta Kibuba ashir. 12 Kodang ne anogotem temdir, aser na ne tsürabur den mejangdir, ni ne sülen metsü adokdaktsütsü, koba ne mang nungi adoktsü, aser ni pa yimli yanglutsü. 13Pai kü tenüng asoshi ki ka yanglutsü, aser ni pa yimli chuba menden teti asoshi yanglutsü. 14 Ni pa tebu asütsü, aser pa kü chir asütsü: kodang pai tai benshidir ni pa nisunger arrtsüng agi azüktsü aser nisung chirtem merenshitsü. 15Saka Saul shiba nungi ni kü yimlibilem bener ao, aser ne madang nungi endokadokba ama, kü yimlibilem pa nungibo mepilatsü. 16Aser ne ki aser ne yimli ne madang teti asoshi akanga alitsü; ne chuba menden teti asoshi yanglutsü.” 17Item otem aser mangdang ajak, yamaji Nathani Dawid dang ashi.Dawid Tenüngsang Sarasadem(1 Pu. 17.16-27)18Idangji Dawid chubaji ia Kibuba madang amen; aser ashi, “Oh, Kibuba Tsüngrem, nai ni papigati bener arutsüsa ni shiba aser kü kibonga kechi aka? 19Aser Oh, Kibuba Tsüngrem, ne nükdangbo ya oda tilaka dang asü? aser ano nai ne tenzüker tarutsü kibong indang mapang talangka lia jembiogo; aser ibai nüburtem asoshi tansütsü ka südakjang, Oh, Kibuba Tsüngrem! 20Ano Dawidi kechi tali ne dang shitettsü? Kechiyong nai ne tenzüker meteter, Oh, Kibuba Tsüngrem. 21Ne otem atema aser ne mulungjang ama, ne tenzüker nem item mapa tulu metetdaktsütsü, nai ajak inyakogo. 22Anungji na tulu lir, Oh, Kibuba Tsüngrem, kechiyong onok narong agi angashiba ajak ama, na ama shinga mali, mesüra ne dak alema Tsüngrem kecha mali. 23 Aser kechi kin ka alima nung ne nübur mesüka, oda Israel mesüka, shirnok Tsüngremi pei asoshi kin ka asütsü alangzüktsü ao, pa tenüng ka kümdaktsütsü, aser na asoshi mapa tulu inyaktsü, aser ne linük asoshi tetsübutsü mapa inyaktsü, ne nübur madang, koba ne dangi Ijip nungi, kintem nungi aser parnok tsüngremtem nungi alangzük? 24Aser nai ne Israel purtem na asoshi teti atema Tsüngrem nübur kümdaktsü aser na KIBUBA parnok Tsüngrem aküm.25“Tang, Oh Kibuba Tsüngrem, ne tenzüker indang nai jembiba o, aser par ki indang aji teti asoshi nai akangshitsür, aser nai jembiba ama inyakangma. 26Aser ne nüng teti asoshi merendakja, shiang, Temeranger Kibubaji Israel madak Tsüngrem: aser ne tenzüker Dawid kibongji ne madang yanglutsü. 27Kechiyong na, Oh Temeranger Kibuba, Israel Tsüngrem, ne tenzüker dangi jungkai adoka shiogo, Ni ne nem ki yanglutsütsü: aji asünung ne tenzükeri ne dang pa mulungjang nung iba sarasademtsü tasü aiter.28“Aser tang, Oh, Kibuba Tsüngrem, na Tsüngrem lir, aser ne otem atangji lir, aser nai iba mapa tajung ya ne tenzüker dang nangzükogo. 29Aji asünung tang ne tenzüker ki nai tenzükjang aser moajangma, angji ne madang aji maneni alitsü: kechiyong nai Oh, Kibuba Tsüngrem, aji jembiogo: aser ne temoatsü agi ne tenzüker ki teti asoshi moajangma.”2 SAMUEL 8
Dawidi Takok Anguba(1 Pu. 18.1-17)1Iba sülen Dawidi Filistia nunger akok, aser parnok agi; aser Dawidi parnok ket nungi Metheg-amma agi. 2Ano pai Moab akok, aser parnok ali nung ontaka toktsür, taren sena parnok asadang; aser pai taren ana shia südaktsütsü asazüktsü, aser taren sünga ka taküm ayutsü asazüktsü. Aser Moab nungerji Dawid tenzükertem aküm, aser putisü bener arutsü.3Dawidi Zoba chuba, Rehob jabaso Hadadezer, pa pei litsü Eufrata ayong nung meyipa agitsü aodang akok. 4Pa nungi Dawidi kor temeranger meyi ka ser noklang tenet, aser tetsüng temeranger meyi metsü agi, aser Dawidi talungtsü kor ajak tepi leptoktsü, saka parnok rongnung talungtsü noklang ka asoshi rizünga ayu.5Kodang Siria nungertemi Zoba chuba Hadadezer yaritsü aru, Dawidi Siria nunger meyi metsürana tepset. 6Idangji Dawidi Damaska nung aliba Siria nung temeranger telok ayu aser Siria nungertem Dawid tenzüker aküm, aser parnoki putisü bener arutsü. Aser kolenisa pa ao yangji Kibubai Dawid nem takok agütsü. 7Aser Hadadezer ket nung hon jongtemji Dawidi agi, aser itemji Yirusalemi bener aru. 8Beta aser Berethai nungi, Hadadezer yimtitem nungi Dawid chubai yongmenyin jenti aben.9Kodang Hamat chuba Toi-i Hadadezer temeranger telok ajak kokogo ta angashi, 10idangji Toi-i par chir Yoram Dawid chuba dangi, pa nem salem agütsütsü, aser pa moatsütsü yok, kechiaser pai Hadadezer anema rara aser pa akok; kechiyong Hadadezeri pa den anemer liasü.Yorami pa nem hon, taribi aser yongmenyin jenti agütsü. 11Ano itemi Dawid chubai Kibuba nem bendanga agütsü, pai agia aliba kin ajak nungi bendanga agütsüba taribi aser hon dena bendanga agütsü. 12Edom nungi, Moab nungi, Ammon chirtem nungi, Filistia aser Amalek nunger nungi, aser Zoba chuba, Rehob chir Hadadezer nungi makzükba osettem.13 Pai meyipa arudang, pai Edom nunger Metsü Lenten nung meyi terti akok. 14Pai Edom ajak nung temeranger telok ayu; aser Edom nunger ajak Dawid tenzükertem aküm. Yamaji Kibubai Dawid aolen ajak takok agütsü.Dawid Yimli nung Yimsüsürtem15Dawid Israel ajak madak chuba; aser pei nübur ajak madak o bendang aser ochiba inyak. 16Aser temeranger telok madak Zeruia chir Yoab liasü; aser Ahilud chir Yehosafat otsü zülur liasü; 17Ahitub chir Zadok, aser Abiathar chir Ahimelek, putirtem liasü; Seraia tezülur liasü; 18Yehoiada chir Benaia Keret aser Pelet nunger madak liasü; aser Dawid chirtem putir liasü.2 SAMUEL 9
Dawid aser Mefiboshet1 Dawidi ashi, “Yonathan tenüng nung ni temeim sayutettsüsa Sauler kibong nungi kar anünga ali asü” 2Sauler kidang tenzüker ka tenüng agi Ziba liasü, parnoki pa Dawid dangi aja; aser chubai pa dang asüngdang, “Na Ziba asü” Pai langzü, “Ne tenzüker pa lir.” 3 Chubai ashi, “Sauler kidang kar ni pa dang Tsüngremi meimba sayutsüsa lir ma” Zibai chuba dang langzü, “Ano Yonathaner jabaso tetsüng tatsük ka lir.” 4Aser chubai pa dang ashi, “Pa kong ali” Zibai chuba dang langzü, “Ajiang, Lodebar nung, Ammiel jabaso Makir kidang pa lir.” 5Idangji Dawid chubai yoka Lodebar nung, Ammiel chir Makir kidang nungi pa anir adok.6Saul jabaso Yonathaner chir Mefiboshet, Dawid dangi arua pei tejak mechioka akhümtsübu sayu. Aser Dawidi “Mefiboshet” ta aja. Aser pai langzü, “Ne tenzüker ajiangma!” 7Dawidi pa dang ashi, “Tetsübu, kechiyong ni ne dang nebu Yonathan tenüng nung temeim sayutsü, aser nebou Saul meyong ajak ne nem meyipa agütsütsü; aser na maneni kü langbang nung chiyungtsü achitsü.” 8Aser pai akhümtsübu sayua ashi, “Ni azü tasü ka ama memeyongba dak nai reprangtsüba ya nia kechi aka?”9Idangji chubai Saul tenzüker Ziba jar ashi, “Saul aser par kidang aliba ajak ni ne kibur jabaso nem agütsüogo. 10Nai pa asoshi ali angentsü, na, aser ne jabasotem, aser ne tenzükertem, aser nai süngjang bendentsü, angji ne kibur jabaso chiyungtsü akatsü; saka ne kibur chir Mefiboshetbo teti kü langbang nung chiyungtsü.” Tang Ziba jabaso terpungu aser kilir metsü liasü.11Idangji Zibai chuba dang langzü, “Kü kibur chubai pei kilir dang melaba amaji ne tenzükeri inyaktsü.” Mefiboshet chubar jabaso rongnung ka ama, chuba langbang nung chiyung. 12Aser Mefiboshet jabaso tebur chanu ka liasü, pa tenüng Mika. Aser Ziba kidang alir ajak Mefiboshet kilirtem liasü. 13Anungji Mefiboshet Yirusalem nung ali, kechiyong pa maneni chubar langbang nung chiyung; aser pa tetsüng anatsü tatsük liasü.2 SAMUEL 10
Dawider Otongdartem Mezüngmeshiba(1 Pu. 19.1-19)1Iba sülen Ammon nunger chuba asü aser par chir Hanuni pa melen chuba. 2Idangji Dawidi ashi, “Nahas jabaso Hanun dang, tebui kü dang meimba ama ni temeim sayutsü.” Anungji Dawidi tebu indang pa süneptsütsüba pa kilirtem yok. Aser Dawid kilirtem Ammon chirtem limai aru. 3Saka Ammon chir tongtipurtemi parnok kibur Hanun dang ashi, “Dawidi nebu dang akhümtsübu sayur ta nai bilemer, ne dangi pai tesüneptsürtem yok ta bilemer asü? Dawidi pei kilirtem ne dangi yimti bushitsü, aser aji lazüktsü, aser aji laodaktsütsü meyok no?”4Anungji Hanuni Dawid kilirtemji pua parnok bangsemo tesadang südoktsü, aser parnok süoshi techimilen rangtoktsür yokadok. 5Kodang parnoki aji Dawid dang ashi, pai parnok lenji yok; kechiyong nisungtemji kanga akseta liasü. Aser chubai ashi, “Nenok bangsemo madok tashi Yeriko nung liang, aser aji ser meyipa arung.”Ammon Nunger Den Raraba6Kodang Ammon chirtemi Dawid madang parnok tesempa tena kümogo ta ajitet, Ammon chirtemi Bethrehob aser Zoba nung alir Siria nunger, tetsüng temeranger meyi metsü, aser nisung meyi ka den Maaka chuba aser Tob nisungtem meyi terana jaok. 7Aser kodang Dawidi aji angashi, pai Yoab aser temeranger telok ajak tashi tulu nisungtem yok. 8Idangji Ammon chirtem adoka süngkhümi ailen tongbang taren ana noktak; Zoba aser Rehob nung alir Siria nunger, aser Tob aser Maaka nisungtem, moapu nung liasü.9Tang kodang Yoabi tongbangji pa anema tejaklen aser tesülen alibaji angu, pai Israel teshimtet nisung ajak nungi shimtet, aser Siria nunger anema tongbang taren sena noktak. 10Tanüngba nisungtemji pai tenu Abishia ket nung bendanga agütsü, aser pai Ammon chirtem anema parnok taren sena toktsü. 11Pai ashi, “Siria nungerji ni asoshi onsara tashi tulu süra, idangji nai ni yaritsü: saka Ammon chirtem na asoshi onsara tashi tulu süra, idangji ni arutsü aser na yaritsü. 12Tasü ita liang, asen nübur asoshi, aser asen Tsüngrem yimtitem asoshi asenoki teburchi kümdi: aser Kibubai pa madang junger ta asüba inyakangma.”13Anungji Yoab aser pa den aliba nisungtem Siria nunger anema tongbang anasa aru, aser parnoki pa tsüngdang jena ao. 14Kodang Siria nunger jena ogo ta Ammon nungeri angashi, parnoki Abishai madang nungi jena yimti-i ai. Idangji Ammon chirtem nungi Yoab meyipa Yirusalemi aru.Tsükchir Madak Takok Anguba15Kodang Siria nungeri Israel madang chinuogo ta ajitet, parnok sasa külemi sentep. 16Aser Hadadezer yoka Eufrata ayong atena oa aliba Siria nunger bener aru: aser parnok Helami Hadadezer temeranger telok arkotong Shobaki parnok anir aru. 17Kodang aji Dawid dang ashi, pai Israel ajak külemi sentepdaktsü, aser Yordan atener Helami aru. Aser Siria nungeri Dawid anema tongbang noktak, aser pa den rara. 18Aser Siria nungeri Israel madang ajen; aser Siria nunger talungtsü noklang tenet, aser kor temeranger meyi lir, aser parnok temeranger telok arkotong Shobak yirutsü, anungji pa yangji asü. 19Aser kodang Hadadezer tenzükertem chuba ajaki Israel madak parnok chinudaktsüogo ta angashi, parnoki Israel den yimjung yanglu, aser parnok tenzük. Anungji Siria nungeri joko Ammon chirtem yaritsü tsübu.2 SAMUEL 11
Dawid Aser Bathsheba1 Tang metsü mapang arudang, chubatem tongbangi aoba mapang nung, Dawidi Yoab, aser pa den par tenzükertem, aser Israel ajak yoka parnoki Ammon chirtem samatsü, aser Rabba makbang. Saka Dawidbo Yirusalem nung dang ali.2Idangji kenü, anü taoi, Dawidi pa yipten nungi aramesoa, chubar ki kilem manung jaja; aser kilem nungi pai tetsür ka tzü chigua angu; aser tetsürji tobur kanga junga liasü. 3Dawidi osang abener yoka tetsürla indangji asüngdangtep. Aser kati ashi, “Ibai Eliam jala Bathsheba, Het nunger Uria kinungtsü masü no?” 4Dawidi osang benertem yok, aser la ania aru; aser la pa dangi ait, aser pai la den nüktapangta; kechiyong memerükba nungi la merükteter liasü; aser la pei kidangi meyip. 5Aser tetsürji mashisa aküm; aser lai osang bener yoka Dawid dang metetdakja ashi, “Ni mashisa kümogo.”6Dawidi Yoab dangi yoka ashi, “Het nunger Uria kü dangi yokang.” Aser Yoabi Uria Dawid dangi yok. 7Aser kodang Uria pa dangi aru, Dawidi pa nungi Yoabi koma inyak, aser nisungtemi koma inyak, aser rara koda odar ta asüngdang. 8Aser Dawidi Uria dang ashi, “Ner kidangi luang, aser netsüng shitokang.” Uria chubar kidang nungi pila, aser chuba nungi pa sülen sempet anidakdaktsü. 9Saka Uriabo pa kibur tenzüker ajak den chubar kishi züng nung mejang, aser par kidangi malu. 10Kodang parnoki Dawid dang, Uria par kidangi malu ta ashi, Dawidi Uria dang ashi, “Na aenlen nungi meshilang no? Ajangla ner kidangi kechiba malur?”11Uriai Dawid dang ashi, “Temeshi süngden, aser Israel, aser Yihuda, sempak nung lir; aser kü kibur Yoab, aser kü kibur tenzükertem moapu tesa nung anena lir; ajangla ni ozü kidangi, chia-ajemtsü aser kü kibutsü den mejangtsü ludi ma? Na ali tashibo, aser ne tanela taküm ali tashibo, ni iba amaji meinyaktsü.”12Dawidi Uria dang ashi, “Tanüa yangi liang, aser asüngbo ni na odaktsütsü.” Anungji Uriai panüji aser tasüngji Yirusalem nung ali. 13Kodang Dawidi pa aja, pai pa madang chia ajem; aser pai pa yi agi mesepdaktsü: aser aonungbo pai pei yipten nung pa kibur tenzükertem den mejanga alitsü ao, saka par kidangibo malu.14Ajiser anepdang, Dawidi Yoab dangi shiti ka zülu, aser aji Uria ket nung yok. 15Aser pai shiti nung ya oda zülu. “Tongbang tesashitiba jakdang nenoki Uria tokjang, aser nenok pa nungi atsüngenang, angji pa dak amshitsü, aser asütsü.” 16Aji asünung, Yoabi yimti madak amakdang kong tashi tait nisungtem ali yangji pai Uria toktsü. 17Aser yimti nung alir nisungtemji adok, aser Yoab den rara, aser yangji Dawid tenzükertema dena lao; aser Het nunger Uria asü.18Idangji Yoabi osangbener yoka rara indang tatalokba ajak Dawid dang ashi; 19aser pai osang abener dangji mela-a ashi, “Kodang nai chuba dang rara indang ajak ashibaji tatem kümdir, 20idangji chuba ain adokdaktsüra, aser pai ne dang ya oda shira, kechiba nenoki raratsü yimti anasa ao? Jara nungi parnoki akoktsü ta nenoki memetet no? 21 Yerubeshet chir Abimelek shibai tepset? Tetsür kati jara nungi temenüngba lungpak temaba madak tsükdakja, pa Thebes nung masü no? Kechiba nenok jara anasa ao idangji nai ashitsü, ‘Ne tenzüker Het nunger Uria süogo.’ ” 22Anungji osang abenerji oa Dawid dang Yoabi pa kechi atema yok ajak ashi. 23Aser osang abener jagi Dawid dang ashi, “Nisungtemi onok madak jenjang tajung ngua, onok den moapu nung raratsü adok, saka süngkhüm tashi onoki meyipa rarayonga ao. 24Aser ne tenzükertem dak takartemi jara nungi aka; aser chubar tenzüker karbo süogo, aser ano ne tenzüker Het nunger Uria süogo.”25Idangji Dawidi osang abener dang ashi, “Yamai nai Yoab dang shiang, Iba yagi na mepelai telidaktsü, kechiyong nok agi kata kata meyokadoker: ne tongbang yimti anema tali tashi taitba kümdakjang, aser aji laodakjang.”26Kodang Uria kibutsüi tebuba asüba indang angashi, lai la kinungpu asoshi mang ayim. 27Aser kodang mangyimbaji atem, Dawidi la par kidangi anir arua pa kibutsü aküm, aser pa nem jabaso ka sotsü, saka Dawidi inyakba mapa agi Kibuba mepeladaktsü.2 SAMUEL 12
Nathani Dawid Arütsüba1 Kibubai Nathan ainkar Dawid dangi yok. Aser pa dangi Nathan arua ashi, “Yimti ka nung nisung ana liasü; ka takar aser kaji sensaker. 2Takar nisungji san aser nashi telok jenti liasü; 3saka sensaker nisungji san tsüla chanu ka, koba pai alia mesütet, iba dak alaka kecha maliasü; ibaji pa den külemi aser par chirtem den yintet; iba jagi pa pei chiyungtsü nungi achi, aser pa pei marok nungi ajem, aser pai teku nung mangadaka liasü, aser pa madang jala ka amai liasü. 4Aser takar nisung dang jagi aener ka aru, saka pai pei san telok mesüra nashi telok nungi, pa dangi aruba aener asoshi magi, saka sensakersang meyongji agi, aser pa dangi aruba nisung asoshi aji renemtsü.”5Nisungba anemaji Dawid ain kanga adok, aser pai Nathan dang ashi, “Kibuba tenüng atemer shidi, iba inyakba nisungji tasütsü tetemsü; 6aser pai san chanuji pezüsü meyipa agütsütsüla, kechiaser pai ya inyak aser pai taochi mesayu.”7Nathani Dawid dang ashi, “Nisungbaji na lir.” Yamai Kibuba Israel Tsüngremi ashir, “Ni na Israel madak chuba asütsü mezüja shimtet, aser ni na Saul ket nungi kümzük; 8aser ni ne nem ne kibur ki agütsü, aser ne teku nung ne kibur kinungtsütem agütsü, aser ne nem Israel aser Yihuda ki agütsü, aser aji tera dang asübo, ni ne nem item dang tali bendenloktsür lila. 9Kechiba nai Kibuba tsüngdang koba tamajung aji inyaktsü pa o sensatsü? Nai Het nunger Uria nok agi tepsetogo, aser tebutsü ne kinungtsü asütsü agi, aser pa Ammon chirtem nok agi tepset. 10Tang aji asünung, ne kidang nungi nok kodanga mepilatsü; kechiaser nai ni sensatsü, aser Het nunger Uria kibutsü ne kibutsü asütsü agi. 11 Yamai Kibubai ashir, Ajiang ni ne kidang nungi na anema tamajung adokdaktsütsü, aser ne nükdang nungi ni ne kibutsütem agitsü, aser parnok ne kiyonger nem agütsütsü, aser pai ne kibutsütem den anü matsüngdang mejangtsü. 12Kechiyong nai aji miima inyak, saka ibai ni Israel ajak madang aser anü madang inyaktsü.”13Dawidi Nathan dang ashi, “Ni Kibuba anema tai menaogo.” Nathani Dawid dang ashi, “Kibubai ne menen endoktsüogo; na masütsü. 14Aji saka, iba mapa yong nai Kibuba tsükchirtem nem atalatsütsü mapang tulu agütsüogo, ne nem sotsüba tanurji atangji asütsü.” 15Aser Nathan pei kidangi meyipa ao.Bathshebai Asoba Tanur AsübaAser Kibubai Uria kibutsüi Dawid nem sotsüba dak azük, aser pa kanga shiranga aküm. 16Aser tanur asoshiji Dawidi Tsüngrem dang kanga mepishi; aser Dawidi lumi, aser taktangi ai, aser ammang piyong ali nung ondaka ali. 17Aser par kidang tamburtemi aramesoa pa ali nungi pa mesotsü noktak; saka pai meshishi, mesüra parnok den mechiyung. 18Tang tenetnübuba nung tanurji asü. Aser Dawid kilirtemi tanurji süogo ta pa dang ashitsü tsübua liasü, kechiyong parnoki ashi, “Ajiang, tanurji ano taküm alidang asenoki pa den jembi, saka pai asenok ola manga, ajangla asenoki tanurji süogo ta pa dang shira, pai pei sasa dak tamajung kar meinyakli ma?”19Kodang Dawidi pa kilirtem tanemi jembitepa angashi, pai tanurji süogo ta shitet: aser pai pei kilirtem dang ashi, “Tanurji sür asü” Aser parnoki langzü, “Pa süogo.” 20Idangji Dawid ali nungi arameso, aser tzü chigur pa sasa totzü mezür, süoshi melen aser Kibuba kidangi arua külem. Ajiser pai pei kidangi aru; aser chiyungtsü meshi aser parnoki aji pa madang yutsü aser pai achi.21Aji saka pa kilirtemi pa dang ashi, “Nai inyakba ya kechi tetezü? Tanur taküm alidang nai pa asoshi lumi aser ajeb; saka kodang tanur asü, na shishia chiyungtsü achir?”22Pai ashi, “Kodang tanur ano taküm liasü, ni lumi aser ajeb, kechiyong ni asoshi Kibubai kü dang yimlibilem sayutsü aser tanurji masütsüa shibai metet? 23Saka tangbo pa süogo, kechiba ni ajebtsü? Ni pa meyipa bener arutetdi ma? Ni pa dangi aotsü, saka paibo kü dangi meyipa marutsü.”Solomon Asoba24Dawidi pa kibutsü Bathsheba süngzükdaktsü, aser la dangi ia, la den mejang, aser lai jabaso ka aso, aser pai pa tenüng Solomon aja aser Kibubai pa meim. 25Aser ainkar Nathan ket nung osang yok, aser pai pa tenüng Yedidia ta aja, kechiyong Kibubai pa meim.Dawidi Rabba Amakba(1 Pu. 20.1-3)26Tang Yoabi Ammon chirtem Rabba anema rara, aser chubar yimtiji agi. 27Yoabi osang benertem Dawid dangi yoka ashi, “Ni Rabba anema raraogo,aser, ni tzü yimtiji agiogo. 28Anungji tang tanüngba nisungtem külemi atenshidakjang, aser yimti anema arü menang, aser aji agiang, aji mesüra ni yimtiji agia, aji kü nüngten agi jaadoktsü.” 29Anungji Dawidi nisung ajak atenshidaktsü, aser Rabbai oa iba anemaji rara, aser aji agi. 30Pai chuba korangji Ammon nunger chuba Molek kolak nungi agi, aser iba odangbaji hon seret semer liasü, aser iba nungji senti lung liasü; aser aji Dawid kolak nung semoktsü. Aser pai yimti nungi makzükba osettem jenti bener aru. 31Yangji aliba nisungtem pai anir adok aser süngrangtsü, merang mejeptetba, merang po agi mapa inyakdaktsü, aser lungru yangludak inyaktsü yok. Yamajisa pai Ammon nunger yimti ajak dang inyakdaktsü. Idangji Dawid aser nisung ajak Yirusalemi shilang.2 SAMUEL 13
Amnon Aser Tamar1Dawid chir Absalom tenu tobur tajung aiür ka liasü shiba tenüng Tamar liasü; aser Amnoni la kanga meim. 2Aser tenu Tamar aginüba agi Amnon kanga jashia shirangadok; kechiyong la tasüngtet aiür ka liasü; aser la dang langka inyaktsü Amnon asoshi tasak ta ajitet. 3Saka Amnon tembar ka liasü, shiba tenüng Yonadab, Dawid tenu Shemea jabaso liasü: aser Yonadab kanga tesangra nisung ka liasü. 4Aser pai pa dang ashi, “Oh chuba chir, kechiba na yamai anogo aben tejak mekümer mangadaka alir? Kechi asü, nai mashitsü no” Amnoni pa dang ashi, “Ni küdi Absalom tenu, Tamar meimer.”5Yonadabi pa dang ashi, “Na yipten nung ontaka liang, ne sasa shiranger jilu iang: aser kodang nebu na reprangi arudir, pa dang shiang, yimlibilema künu Tamar arudakjang, aser kü madang chiyungtsü renemdakjang, angji ni aji angutsü, aser la ket nungi aji achitsü akok.” 6Yamaji Amnon ontaka ali, aser pa sasa shiranger jilu ai, aser kodang chubaji pa reprangi aru, Amnoni chuba dang ashi, “Yimlibilema künu Tamar arudakjang, aser la ket nungi ni achitsüsa kü madang amtsük ana yangludakjang.” 7Dawidi osangbener yoka Tamar dang yamai shiok, “Nedi Amnon kidangi oang, aser pa nem chiyungtsü renemjang.” 8Tamari tedi Amnon kidangi ao; aser pa ontaka liasü. Aser lai amzü agia aji ajepsa-a pa tsüngdang amtsükji asang. 9Aser lai am asangba poji bena arua pa madang aji agitet, saka pai mechili asü. Aser Amnoni ashi, “Nisung ajak kü madang nungi odakjang.” Yamaji nisung ajak pa nungi pila. 10Aser Amnoni Tamar dang ashi, “Chiyungtsüji taktangi bener aitjang, aser aji ni ne ket nungi achitsü.” Tamari lai yangluba amtsükji agi, aser tedi Amnon taktangi itemji bener ait. 11Kodang lai itemji pa dang tachitsü anasa bener aru, pai la dak amet, aser la dang ashi, “Kü nu, arung aser kü den mejangang.” 12Lai pa dang langzü, “Nung, odi, ni tekangshi, kechiyong Israel nung iba amai meinyaktsüla; nai iba tamachi mapa teinyak. 13Aser ni asoshia, kü maksü ni koleni bener otettsü? aser na asoshia, Israel nung tamachi rongnung na ka asütsü. Tang aji asünung, ni ne dang mepishir, chuba dang jembiang; kechiyong pai na nungi ni mesottsü.” 14Aji saka pai la dang manga aser pa la dang nungi tashi taitba asünung, pai la kangok, aser la den mejang.15Ajiser Amnoni la onsara sempa kechiyong tang tesempa koba agi pai la sempa ibaji pai la aginüba dang nungi tuluba liasü. Amnoni ashi, “Aramesoang aser oadokang.”16Lai pa dang ashi, “Yamaji masü, kechiaser ni yokadoktsüba iba tai tulu ya nai kü dang inyakba dang nungi tamajungba lir.” Saka pai la dang manga.17Idangji pa tenzüker kilirtem pai pa dangi jaa ashi, “Iba tetsür kü dang nungi anir oang, la sülen kishi shia yujang.” 18La süoshi talang sema liasü, kechiaser ibalaji chubar jalatem tasüngtet aiürtem sobutsü liasü. Idangji pa kiliri la anir adok, aser la sülen kishi shibangtsü. 19Tamari la kolak nung aut palok, la süoshi shisa aser la teka la kolak nung ataloker ola tulu agi jeba pei lenmangi ao.20Tedi Absalomi la dang ashi, “Nedi Amnon ne den liasü a-na? Saka tang kü tenur ajemajema liang, pa nedi lir; ibai temulungjang nung shishia tebilem.” Anungji tedi Absalom kidang la ola madoki semloka ali; oda teraksa tetsür ka.21Kodang Dawid chubai item ajak angashi, pa kanga ain adok. 22Absalomi Amnon dang tajunga tamajunga mejembi; kechiyong Absalomi Amnon sempa, kechiaser pai tenu Tamar dak teka ai.Absalomi Amnon Tepsetba23Küm ana abensar Efraim anasa aliba Baa-hazor nung Absalom san züng mejeper den liasü, aser Absalomi chubar jabaso ajak aja. 24Absalom chuba dangi arua ashi, “Tang ajiang, ne kilir san züng mejepertem arua lir; yimlibilema, chuba aser pa kilirtem, ne kilir den aotsü mela-angma.”25Chubai Absalom dang ashi, “Masü, kü chir, na asoshi khuret ka küma lir asenok ajakbo moli.” Aser pai pa dang kanga mepishi nung temelaba agütsü, saka pa mao,26Idangji Absalomi ashi, “Aji mesüra ni ne dang mepishir, künu Amnon kü den odakjang.” Chubai pa dang ashi, “Kechiba pa ne den aotsü” 27Saka Absalomi pa dang kanga mepishi nung pai Amnon aser chubar chir ajak pa den odaktsü.28Absalomi pa kilirtem dang mela-a ashi, “Amnon mulungjang yi agi pelaba ajioka yuang; aser kodang ni nenok dang, Amnon tepsetang ta shidir, idangji pa tepsetang, tetsübu ni nenok dang memela no? Tasü ita liang, aser teburchi sang.” 29Aser Absalom kilirtemi Amnon dang Absalomi melaba ama inyak. Idangji chuba chir ajak arameso, aser nisung shia pei gado nung mener ajen.30Parnok lenmang nung alidang, Dawid dangi osang arua ashi, “Absalomi chubar chir ajak tepsetogo, aser parnok kata anünga mali.” 31Idangji chubai aramesoa pa sü shisa, aser ali nung ontak; aser kilir ajaki parnok süoshi shisa-a anasa noktak. 32Dawid tenu Shimea chir, Yonadabi langzüa ashi, “Kü kiburi chubar chir asangur ajak tepset ta tebilem; kechiyong Amnon dang süogo, kechiyong pai tenu Tamar menentsüba anogo nungi ibai Absalom bang agi jembiba ama mulungteta inyakba lir. 33Tang aji asünung kü kibur chubai pei mulungjang nung ia, chubar chir ajak asü ta tebilem; kechiyong Amnon dang asü.”34Saka Absalom jena ao. Aser mita repranga aliba asangur jagi pa tenük rangketa yoka reprang, aser ajiang, tenem tsütsü lenmang jagi nisung jenti aruba angu. 35Yonadabi chuba dang ashi, “Ajiang, chuba chirtem arua lir, ne kiliri ashiba amato atalokogo.” 36Pai jembizükli ajiang, chuba chirtem aru, aser parnok ola adoka ajeb; yamaji chubai aser pa kilir ajaki kanga ajeb.37 Saka Absalom jena ao, aser Geshur chuba, Ammihut jabaso Talmai dangi ao. Aser Dawidi par chir asoshi anogoshi mang ayim.38Anungji Absalomi Geshuri oa yangji küm asem liasü. 39Dawid chuba tanela nung Absalom dangi aotsü yongya-a ali, kechiyong Amnon asüba asoshibo, pa tejashi süngzüker liasü.2 SAMUEL 14
Yoabi Absalom Meyipa Anir Aruba1Tang Zeruia chir Yoabi chuba mulungjang Absalom tsütsü shia lir ta ajitet. 2Anungji Yoabi Tekoai yoka idak nungjagi shisa taka tetsür ka anir arua la dang ashi, “Ni ne dang mepishir, ne sasa mangyimer jilu iang, aser mangyim sobutsü sobuang; aser totzü temezü, saka mapang talangka tasür asoshi mang yima alir tetsür ka ama liang: 3aser chuba dangi iang, aser pa dang iba amai jembiang.” Anungji Yoabi la bang nung otemji enoktsü. 4Aser kodang Tekoatsür jagi chuba dang jembi, lai la tejak alilen mechioka akhümtsübu sayua ashi, “Yariang, Oh chuba.”5Chubai la dang asüngdang, “Na kechi agi timtemdaktsür?” Lai langzü, “Ni amitsür ka lir, aser kü kinungpu süogo. 6Aser ne kilirla jabaso ana liasü, aser tenapronglai moapu nung raratep, parnok bendangtsür shinga maliasü, aser kati ka dak azük, aser pa tepset. 7Aser ajiang, kinunger ajongai ne kilirla anema adokogo, aser parnoki ashi, tenu tepsetsangji bendanga agüjang, angji tenu shiba pai tepset pa taküm asoshi onoki pa tepsettsü, aser yamaji senmangera samatsütsü, yamaji anünga aliba kü mijang parnoki remseptsütsü, aser kü kinungpu nem alima nung tenüng mesüra tanüngba metoktsütsü.”8Chubai tetsürla dang ashi, “Ne kidangi oang, aser ni ne indang ozüng agütsütsü.”9Tekoatsür jagi chuba dang ashi, “Kü kibur, Oh chuba, taiji kü madak, aser kübur kibong madak lidakjang; saka chuba aser pa chuba mendenbo tai makai liang.”10Chubai langzü, “Kari ne dang langka shira, pa kü dangi anir arung, aser pai ne dak tanaben kodanga mekongshitsü.”11Idangji lai ashi, Yimlibilema chubai Kibuba ne Tsüngrem nem, ozü mang ayangeri joko metepsettsü, aser kü jabaso mesamatsütsü bilemtetdakjangma. Aser pai ashi, “Kibuba taküm ali nungji, ner jabaso kujang kata ali nung metsüktsü.” 12Idangji tetsür jagi ashi, “Ne kilitsür nem kü kibur chuba nem o ka shidakjang.” Aser pai ashi, “Shiang.”13Tetsür jagi ashi, “Kechiba ajangla iba amai Tsüngremer nübur asoshi tasa asa? Kechiyong chubai pai aridokadokba jabaso tanaben kidangi anir maru nungji iba ama jembiba jagi chubajia tai aketer ka amai lir. 14Kechiyong asenok ajak sülanglang, aser ali nung tzü shitokadokba tanaben bendentsü makokba amai lir; saka Tsüngremi taküm bener maor, saka shiba aridoka ali, pa nungi sendokba ka masütsü asoshi tasa asar. 15Tang aji asünung kü kibur chuba dang iba o jembitsü ni aru, kechiaser nisungtemi ni tsübudaktsü; aser ne kilitsüri bilem, ni chuba dang jembitsü; ashiko chubai pa kiliri mepishiba inyaktsü akok. 16Kechiyong chubai angashitsü, aser par kilirji, nisung shibai ni aser kü jabaso Tsüngrem senmang nungi samatsütsü ali pa ket nungi kümzüktsü. 17 Aser ne kilitsüri bilem, kü kibur chuba o agi ni anisüngzük nung toktsütsü; kechiyong kü kibur chubaji, tajung aser tamajung shitetba Tsüngrem tenyarji mesüka lir, Kibuba ne Tsüngrem ne den liangma.”18Idangji chubai tetsürla dang langzü, “Ni ne dang asüngdangba kecha kü dang nungi miima teli.” Aser tetsür jagi ashi, “Tang kü kibur chubai jembiangma.”19Chubai ashi, “Ya ajak nung Yoab ket ia alia na?” Aser tetsür jagi langzü, “Na ali tashi, kü kibur chuba, shingaia kü kibur chuba nungi teka tajichi nungi tabeleni meyiptsü makok; kechiyong ne kilir Yoabi kü dang mela-a ashiba lir, atangji item o ajak ne kilitsür bang nung pai enoktsü: 20tia melenshidaktsütsü asoshi ne kilir Yoabi inyak, aser alima nung mapa ajak metettsü Tsüngrem tenyar shisatsü akaba mesüka kü kibur shisa taka lir.”21Chubai Yoab dang ashi, “Tang ajiang, ni ya melar, oang asangur Absalom tanaben anir arung.”22Yoabi ali nung apudaka akhümtsübu sayu, aser chubaji moatsü aser Yoabi ashi, “Chubai pa kiliri mepishiba mela nungji, tanü ne kiliri, Oh kü kibur chuba, ne matsüngdang ni taochi nguogo ta meteter.”23Anungji Yoab aramesoa Geshuri oa Absalom Yirusalemi anir aru. 24Saka chubai ashi, “Pa par kidangi meyipa odakjang, saka pa nem kü tejak tengudaktsü.” Aser Absalom pei kidangi meyipa ao, aser chuba dangi maru.Absalom Dawid Den Putepdaktsüba25Tang Israel ajak nung Absalom ama tobur ajungba asangtsüsa tangar maliasü, pa tetsüng temepu nungi tekojong tashi tajitettsü kecha maliasü. 26Küm tatembang shia pai pei kolak asü, kechiaser kuji reta akümdang pai südokadokli asü, pai pa tekolak kuji odang, chubar toudangba shekel noklang ana otet. 27Absalom nem jabaso asem, aser jala ka sotsü, la tenüng Tamar, aser la tobur tajung liasü.28Absalom Yirusalem nung küm ana renteta liaka pai chuba tejak mangu. 29Idangji Absalomi pa chuba dangi otettsü asoshi Yoab tajai yok, saka Yoab pa dangi maru. Ano pai tanabenbuba yok, saka Yoabi maru. 30Anungji pai pa kilirtem dang ashi, “Ajiangjo, Yoaber lu ozü lu anasa lir, yangji pa barley tsüklu lir; oang aser iba nung mi senang.” Yamaji Absalom kilirtemi alu nung mi asen. 31Idangji Yoab aramesoa Absalomer kidangi arua pa dang ashi, “Kechiba ne kilirtemi kü lu nung mi senoktsü”32Absalomi Yoab dang langzü, “Ajiang, kechiba ni Geshur nungi anir aru? Ni asoshi yangjiang ali tajungba süla ta asüngdangtsü asoshi na chuba dangi yoktsü yagi arung ta ne dangi o yok. Aji asünung tang ni chuba tsüngdangi odakjang, aser kü dak tai lira pai ni tepsetdakjang.”33Idangji Yoabi chuba dangi oa pa dang ashi, aser pai Absalom aja. Anungji pa chuba dangi aru, aser chuba madang alilen apudak; aser chubai Absalom tebang mesep.2 SAMUEL 15
Absalomi Tasa Tamajung Asaba1Iba sülenji Absalom pei asoshi talungtsü ka, kortem, aser pa jakdang asemtsü nisung tenem renem. 2Absalomi yakta shishi, aser süngkhüm lenmang tezülenji noktakli asü, aser nisung kar chuba dangi o bendangtsü asoshi oya alidang Absalomi pa aja aser asüngdang, “Na kechi yimti nungi” Kodang pai, “Ne kilir Israel nung iba aser iba yimti nungi”, ta shidir, 3Absalomi pa dang ashi, “Ajiang, nai meshibaji tajung aser shitak dang; saka ne o angatsü chubai nisung shinga yoka mali.” 4Ano Absalomi ashi, “Linük nung obendangerji ni ka asübo oda ken-o akar nisung shia kü dangi arua, ni pa dang ochi o bendang agütsüla” 5Kodangsa nisung kari pa dang akhümtsübu sayutsü anasa aru, pai pei teka adoka pa dak amet, aser tebang mesep. 6Yamaji Absalomi chuba dangi o bendangi arur Israel ajak dang inyak; yamaji Absalomi Israel nunger temulungjang mesüzük.7Küm pezü tatembang nung Absalomi chuba dang ashi, “Ni ne dang mepishir, Hebron nung Kibuba dang ni koba atemzük, kü tatemzükba agütsütsü ni odakjang. 8Kechiyong ne kiliri Geshur nung alidang Siria nung atemzükba ka atemzük aser ashi, “Atangji Kibubai ni Yirusalemi bener arura, idangji ni Kibuba tenzüktsü.”9Chubai pa dang ashi, “Yimjung nung oang.” Anungji pa aramesoa Hebroni ao. 10Saka Absalomi Israel ajakleni itdangiter yoka ashi, Nenoki jangzü ola angashili, “Hebron nung Absalom chuba lir,” ta nenoki ashitsüla. 11Aser Absalom den Yirusalem nungi pai nisung noklang ana jar ao, aser parnok züzüa dang ao; kechiaser parnoki iba tasaji kecha memeteti liasü. 12Aser kodang Absalomi tetepsetba tenla agüja liasü, pai Dawid nem shisa agütsüsang, par yimti Gilo nungi, Gilo nunger Ahithofel tajai yok. Aser anema tasa asabaji tashi ita aküm, aser Absalom den nisung tali züin.Dawid Absalom Nungi Ajenba13Osang abener ka Dawid dangi arua ashi, “Israel nunger mulungjang Absalom sülen oadokogo.” 14Idangji Yirusalem nung pa den alir par kilirtem dang Dawidi ashi, “Aramesoang, aser asenoki jendi; aji mesüra asenok asoshi Absalom nungi tejenbulen maka pai asenok yakta menepa lir, aser asen madang tamajung agi tonga lir aser nok agi samaja lir ilunga odi.”15Chubar kilirtemi chuba dang langzü, “Ajiang, kü kibur chubai kechi lemteter aji inyaktsü ne kilirtem renema lir.” 16Anungji chubaji aser pa sülen par kibong ajak ao. Aser chubai ki anüktsü tezüngatsü ter toktsü.17Aser chubaji, aser pa sülen par kibong ajak ao, aser ki tatemba nung parnok anen. 18Aser par kilir ajak pa anasa süia ao; aser Keret nunger, Pelet nunger aser Gat nungi pa sülen anitaker noklang trok ajakji, chuba jakdang ao. 19Idangji chubai Git nunger Ittai dang ashi, “Na onok den kechiba arur? Meyipa oang aser chuba denji liang; kechiyong nabo bendanger, aser ner lima nungi aridoker ka lir. 20Na yashiang aru, aser nia koleni aor memeteti ali nung tanü ni na onok den nemzüdaktsütsü no? Meyipa oang, aser ne den ne adianutem anir oang; aser Kibubai ne dang marakzüba temeim aser temulung alemba sayuangma.”21Saka Ittai chuba dang langzü, “Kibuba ali nungji, aser kü kibur chuba taküm ali nungji, tasütsü saka mesüra taküm asoshi saka yangji ne kilira alitsü.”22Dawidi Ittai dang ashi, “Ajangla süia oang.” Anungji Git nunger Ittai süia ao, pa den alir par nisung ajak den aser tilatem ajak den ao. 23Aser linük nübur ajaki süia aodang tashi agi ajeb, aser chuba Kidron ayongnu ajanga ao, aser nüburtem ajak arem tsütsüi süia ao.24Levi nunger den, Abiathar aser Zadok atema Tezüngzüktepba Tsüngrem Ozüng Süngdenji bener aru; aser yimti nungi nisungtem süia mao tashi parnoki Tsüngrem süngdenji yua ata. 25Idangji chubai Zadok dang ashi, “Tsüngrem süngdenji meyipa yimti jagi bener iang. Tsüngrem tsüngdang ni taochi ngura, pai ni meyipa bener arutsü aser pai ibai kü nem ngudaktsütsü; 26saka pai kü dang ni ne dang mepelar ta shira ajiang, yangi ni lir, pa madang kechi ajungar, aji kü dang inyakdakjang.” 27Ano chubai putir Zadok dang ashi, “Ajiang, yimti jagi yimjung nung meyipa oang, na aser Abiathar, ner jabaso ana den, ne chir Ahimaaz, aser Abiathar chir Yonathan. 28Ajiang, ni arem lenten nung na nungi kü nem metetdaktsütsü o maru tashi ata-a alitsü.” 29Anungji Zadok aser Abiathar nati Tsüngrem süngdenji Yirusalemi meyipa bener ao; aser parnok yangji ali.30Saka Dawid Oliv tenemi tetsüng tesa tekolak nembanger jeba atu aser pa den aliba nüburtem ajaki tekolak nembanger, jeba atu. 31Aser Dawid dang Absalom den tasa tamajung asartem den Ahithofel dena lir ta metetdaktsü. Aser Dawidi ashi, “Oh Kibuba, ni ne dang mepishir, Ahithofel sentongji tamashi kümdakjangma.”32Kodang Dawid Tsüngrem külemdak tenem kolak jagi aru, ajiang, Ark nunger Hushai pei süoshi shisar aser tekolak nung ali mezür pa lenji aru. 33Dawidi pa dang ashi, “Na kü den ora, na ni asoshi khuret ka asütsü. 34Saka na yimti jagi meyipra, aser Absalom dang, ‘Oh chuba ni ne kilir asütsü; akhidang ni nebuer kilir liasü, anungji tang ni ne kilir asütsü’, ta shira idangji nai ni asoshi Ahithofel sentong madak takok angutsü. 35Putir Zadok aser Abiathar ne den mali no? Anungji kechisa nai chuba kidang nungi angashidir, aji putir Zadok aser Abiathar dang shiang. 36Ajiang, parnok jabaso ana parnok den yangji lir, Ahimaaz, Zadok jabaso, aser Yonathan Abiathar jabaso; aser parnok ajanga nai kechisa angashidir kü dang ashitsü.”37Anungji Dawid tembar Hushai, yimti jagi Absalom Yirusalemi ia alidang aru.2 SAMUEL 16
Dawid Aser Ziba1 Kodang Dawid tenem kolakji tera süia ao, Mefiboshet kilir Ziba, pa lenji gado jura ka nung menden enoker, amtsük telong noklang ana, tsükmenatzü tejep noklang ka, mei süngjang noklang ka, aser yi mori bener aru. 2Aser chubai Ziba dang ashi, “Kechiba nai itemi bener aru”Zibai langzü, “Gadotemji chubar kibong amentsü asoshi, amtsük aser mei süngjangtemji asangurtem achitsü asoshi, aser yiji shirnok arem nung lula-a kümdir parnok asoshi lir.”3 Chubai asüngdang, “Aser ne kibur jabaso kong ali” Zibai chuba dang langzü, “Ajiang, pa Yirusalem nung alir; kechiyong pai ashi, Tanü Israel kidongi kübu yimli kü nem meyipa agütsütsü.” 4Idangji chubai Ziba dang ashi, “Ajiang, Mefiboshet meyong ajak ne meyong lir.” Zibai ashi, “Ni akhümtsübu sayur, ne madang teti ni taochi ngudakjangma, kü kibur chuba.”Shimei-i Dawid Atakatemba5Kodang Dawid chuba Bahurimi aru, Sauler kinunger nungi nisung ka adok, shiba tenüng Shimei, Gera jabaso liasü; pai atakatema aru. 6Aser Dawider kilir ajak dak lung agi aon. Tang nübur ajak aser temeranger ajak pa teka tajichi aser tabelen liasü. 7Shimei atakatema ayimten, “Oadokang, oadokang, na azü tokshiba nisung, tagidak makaba nisung! 8Saul shiba menden nung nai chubar, pa kibong azü tokshiba ajak ne madak Kibubai mang yangogo; aser Kibubai yimliji ne chir Absalom ket nung agütsüogo. Ajiang, ne tesama ne madak lir; kechiyong na azü tokshiba nisung lir.”9Idangji Zeruia chir Abishai chuba dang ashi, “Kechiba iba azü tasü ka ama yagi kü kibur chuba atakatemer? Ni tugudakjang, aser pa tekolak agidi.”10Chubai ashi, “Nenok Zeruia chirtem, nenok den ni kechi inyaktsü Kibubai pa dang ashiba yong pai atakatemer süra, Dawid atakatemdakjang, ajangla nai kechiba yamai inyak ta shibai ashitsü” 11Dawidi Abishai aser pa kilir ajak dang ashi, “Ajiang, kü jabaso shiba kü zü nungi aru, pai kü taküm bushir; iba Benjamin nunger yagi tang koda tali inyaktsü akok? Pa oda tokjang, aser pa nem atakatemdakjang, kechiyong Kibubai pa dang mela. 12Ashiko Kibubai kü timtem madak reprangtsü, aser tanü ni atakatemba asoshi Kibubai tajung agi kü nem shia agütsütsü akok.” 13Anungji Dawid aser par nisungtem lenmang nung aodang tenem tezülen tsütsü Shimei ao aser pa aodang atakatem, aser pa dak lung ondaktsü aser anak paloktsü. 14Aser chuba aser pa den alir nisung ajak aniseter Yordan atong, aser yangji anisüngzük.Absalom Yirusalem Nung15Absalom aser Israel nisungtem ajak, aser pa den Ahithofel Yirusalemi aru. 16Kodang Ark nunger Hushai, Dawid tembar, Absalom dangi aru, Hushaii Absalom dang ashi, “Chuba arishia liang! Chuba arishia liang”17Absalomi Hushai dang ashi, “Ibai ne tembar dang ne meimji asü? Kechiba nai ne tembar den mao”? 18Hushai Absalom dang ashi, “Masü, saka Kibubai shiba shimtet aser item nüburtem, aser Israel nisung ajak shimtet ni pa meyong asütsü, aser pa den ni alitsü. 19Ni tanaben shiba dang tenzüktsü? Par jabaso tsüngdang ni metenzüktsü no? Ni nebu tsüngdang tenzükba ama, ni ne den alitsü.”20Idangji Absalomi Ahithofel dang ashi, “Ne tebilemba shiang, aseni kechi inyaktsü?”21Ahitheofeli Absalom dang ashi, “Nebu züngatsütem shirnok pai kinüktsü toktsü parnok dangi iang; aser Israel ajaki na nebu asoshi tesempatsü kümogo ta angashitsü, aser ne den alir ajak teka tashi ita akümtsü.” 22 Anungji parnoki Absalom asoshi kilem manung süki yanglu; aser Absalomi Israel tsüngdang tebu züngatsürtem dangi ai. 23Item anogo nungji Ahithofeli agütsüba oji Tsüngrem o nung tongtepa jembiba o ama liasü; yamaji Dawid aser Absalom tenaprongi Ahithofel oji reta agizük.2 SAMUEL 17
Hushai Absalom Anisaba1Ano Ahithofeli Absalom dang ashi, “Tang ni nisung meyi terana shimdi, aser ni apusotsü aser taonung Dawid sülen aria odi: 2aser pa aniseta aser teka tashi meiti alidang ni pa madaki arutsü, aser pa tsübudaktsütsü; aser pa den aliba nisung ajak ajentsü, aser ni chubaji dang lepzüka yoktsü. 3Aser nisung ajak ni ne dangi kiyimla pei kinungpu dangi aruba ama anir arutsü. Nai nisung ka taküm dang bushir, aser nübur ajak yimjung nung alitsü.” 4Aser sentong jagi Absalom aser Israel tambur ajak peladaktsü.5Idangji Absalomi ashi, “Ark nunger Hushai jaang, aser pa tashitsü kechi ali aji asenoki angadi.” 6Kodang Hushai Absalom dangi aru, Absalomi pa dang ashi, “Ahithofeli yamai jembiogo, pai ashiba amaji asenoki inyaktsü asü? Aji mesüra nai shiang.”7Idangji Hushai Absalom dang langzü, “Tanbo Ahithofeli jembibaji majung. 8Nai metet nebu aser pa nüburtem tashi tulu nisungtem lir, aser moapu nung shirem pei chanu rakzüka bener oadokba shirem ka amai parnok adoka lir. Iba dakji alema nebu rara nung mongyin lir, anungji nisungtem denji aonung malitsü. 9Ajiang, tanga pa pei sasa kangla ka nung, mesüra tesem ka nung atsüka lir. Kodang mezüngbuba raradangji nisung ka laodir, shibaisa aji angashidir ashitsü, Absalom sülen anidaker nisung rongnung tepsetogo. 10Idangji tasü tait nisung shiba mulungjang molusongzü mesüka lir, tetsübu agi khenyongi yimsa-a aotsü; kechiyong Israel ajaki nebu tashi tulu nisung aser pa den alirtemjia tasü tait nisungtem lir ta metet. 11Saka teloktiji tzüyim anasa lisem ama, Dan nungi oda Beersheba tashi Israel ajak ne dangi sentepdaktsütsü ni tebilemba ashir, aser na dena tongbangi aotsü. 12Yamaji tesem ka nung pa kong ajurudir asenok pa madaki arutsü, aser azüngtzü ali nung tsükba memetet ama pa dak tsüktsü; aser pa aser pa den alir ajak asenoki kata metoktsütsü. 13Pa yimti kati iadokra, idangji Israel ajaki iba yimti jagi lisü bener arutsü, aser asenoki lenten jagi, oda lungsang kata yangji metoktsü tashi atsür aitsü.”Dawid Dang Tekümdangtsü Ashiba Aser Jentetba14Absalom aser Israel nisung ajaki ashi, “Hushai sentongji Ahithofel sentong dang nungi tajungba, kechiyong Kibubai Ahithofel sentong tajungji tamakok kümdaktsütsü mela, angji Kibubai Absalom madak tamajung bener arutsü.”15Idangji putir Zadok aser Abiathar dang Hushaii ashi, “Yamai Ahithofeli Absalom aser Israel tamburtem nem shisatsü agütsü; aser yamai ni shisatsü agütsüogo. 16Hushaii ano tanaben ashi, Karaa oang! Dawid dangi osang yokang, pa dang ayongküm nung mena teli ta shiang aser taonungsa Yordan atena oang ta shiang; aji mesüra chuba aser par nisung ajak meyokadoktsü.” 17Tang Yonathan aser Ahimaaz Enrogel nung ata-a liasü; kilitsür kati oli parnok dang shili ta asü, aser parnoki oa Dawid chuba dang shili asü; kechiyong parnok yimti jagi aibaji shinga nema mungudaktsütsüla. 18Saka tebur chanu kati parnok ngua Absalom dang ashi; anungji tenaprong yakta oadok, aser Bahurim nung ki kati aru, shiba tzübu ka par kima nung liasü; aser parnok ajagi alu. 19Nisungba tebutsü jagi sü ka bena arua tzübubangji lembanga yutsü, aser iba manung tsük yashia apu; aser iba indang shingaia kecha memetet. 20Absalom kilirtemji tetsür dangi aru parnoki asüngdang, “Ahimaaz aser Yonathan kong ali” Tetsür jagi parnok dang langzü, “Parnok ayonglen tzü jagi tuogo.” Aser parnoki bushi saka parnok mangu, anungji parnok Yirusalemi meyip. 21Parnok or külen, parnok tzübu nungi adoker oa Dawid chuba dang parnoki ashi, “Nenoki apusoang, tzü ajanga yakta oang; kechiyong na anema Ahithofeli yamai tasa agütsüogo.” 22Idangji Dawid aser pa den alir nisung ajak arameso, aser parnok Yordan ajanga ao: anepdang sangwa dangbo parnok Yordan ajanga maor kata maliasü.23Kodang Ahithofeli pai tasa agütsüba mebenshi ta angu, pai pa gado nung menden renem, aser par yimti-i oadok, aser pei ki tiptema ayu, aser pa sasa soseta asü, aser pa tebu leper nung arem.24Idangji Dawid Mahanaimi arudang Absalom aser Israel nungertem Yordan ajanga ao. 25Yoab melen temeranger telok madak Absalomi Amasa yutsü. Amasaji Ishmael nunger nisung ka tenüng Ithra jabaso liasü, pai Nahas jala Abigal agi, laji Yoab tetsü Zeruia tenu liasü. 26Israel aser Absalom Gilead linük nung anen.27Kodang Dawid Mahanaimi aru, Ammon nunger Rabba nungi Nathan jabaso Shobi, aser Lodebar nungi Ammiel jabaso Makir, aser Gilead nunger Barzillai Rogelim nungi, 28yiptentem, susatem, aser ali potem, wheat tsük, barley tsük, chiyungtsü, kongnüng, matsüklashi aser luli 29ninang mojitzü aser mamatzü lung, aser kiset shiruru mamatzü nungi, Dawid aser pa den alirtem achitsü asoshi bener aru; kechiyong parnoki ashi, “Nisungtem arem nung yaseta aser aniseta aser tzüraseta lir.”2 SAMUEL 18
Absalomer Telok Akokba1Dawidi pa den alir nisungtem züngdang, aser parnok madak meyirijang arkotong aser noklang arkotong yutsü. 2Dawidi temeranger telokji yok, shilem asem nung ka Yoab kübok, shilem asem nung ka Yoab tenu Zeruia jabaso Abishai kübok, aser shilem asem nung ka Git nunger Ittai kübok yok. Aser chubai nisungtem dang ashi, “Nia kü sasa nenok den aotsü.”3Saka nisungtemi ashi, “Nabo maotsü, kechiaser onok jena ora parnoki onok indang mebilemtsü. Onok tesadang ka süakasa parnoki onok indang mebilemtsü. Saka nai onok meyi ter langa lir, aji asünung yimti nungi nai onok dangi teyari yok tajungba lir.”4Chubai parnok dang langzü, “Nenok madang kechi tajungtiba lir aji ni inyaktsü.” Anungji temeranger telok noklang noklang aser meyirijang meyirijang aodang chubai süngkhüm anasa noktak. 5Aser chubai Yoab, Abishai aser Ittai dang ozüng agütsü, “Kü tenüng nung asangur Absalom dang apayua benshiang.” Aser nisung ajaki Absalom indang chubai tanishirtem dang ozüng agütsübaji angashi.6Anungji temeranger telokji Israel anema moapu jagi ao: aser tongbangji Efraim arem nung rara. 7Aser yangji Israel nisungtem Dawid tenzükertemi akok, aser iba anogo nungji meyi metsü tepset. 8Tongbangji linük ajak nung prokshi, aser iba anogo nung nok dang nungi aremi nisung tali meyokadok.Absalom Asüba9Absalom Dawid tenzükertem den ajurushia ata, aser Absalom kor nung sanga liasü, aser korji sülemdong tulu ka süngsang temelem küboki ao, aser pa tekolak sülemdong nungji akang akanga zükokadok, aser pa anüng aser ali tsüngda nung sangzüa toktsür korjibo ojen ao. 10Aser aji nisung kati ngua Yoab dang ashi, “Ajiang, ni Absalom sülemdong ka nung sangzüa angu.”11Pa dang ashiba nisung dangji Yoabi ashi, “Kechi, nai pa angu! Kechiba idangjisa nai pa lepzüka meyok? Ni ne nem pelashishia taribi telong ter aser peremsen ka agütsüla.”12Saka nisung jagi Yoab dang ashi, “Kü ket nung taribi telong meyi ka am-a liaka ni chubar chir anema kü teka masangtsü: kechiyong onoki angashia chubai na Abishai aser Ittai dang mela-a ashi, Kü mechi asangur Absalom kümzükang. 13Aji oda ni pa taküm anema ashikülaka inyaka lira aser chuba nungi kecha miima mali, idangjibo na ne sasa atsüngena noktakla.”14Yoabi ashi, “Ni ne den iba amai mapang meindoktsü.” Aser pai pa ket nung sangja asem am, aser Absalom sülemdong nung taküm alidang pa temulungjang nung tsüloktsü. 15Aser Yoab nok o nü abener asangur teri Absalom meketbang aser pa tepset.16Idangji Yoabi jangzü apu, aser temeranger telok Israel aria aoba nungi meyipa aru, kechiyong Yoabi parnok sot. 17Parnoki Absalom bena arua arem nung ongken tulu ka nung enoktsü, aser pa manung lungnang tulu ka nanga yutsü; aser Israel ajak nisung shia pei kidangi ajen.18Tang Absalomi pa taküm alidang pa asoshi chubar lenten nung tongshi ka azünga ayu, kechiyong pai ashi, “Ni kü tenüng bilemteta ayutsü jabaso mali.” Anungji pai tongshiji pa tenüng agi aja, aser aji tanü tashi Absalom tongshi ta ajar.Dawid Dang Absalom Asüba Indang Ashiba19Idangji Zadok chir Ahimaazi ashi, “Ni tang chuba dangi osang bener oda Kibubai pa tsükchirtem tashi nungi pa kümzükogo ta ashitsü asema odi.”20Yoabi pa dang ashi, “Na tanü osang bener maotsü, nai tanga anogo ka nung osang bener aotsü akok saka tanübo nai osang kecha mabentsü, kechiaser chubar chir süogo.”21Idangji Yoabi Kushi nungba dang ashi, “Oang, chuba dang nai kechi angu shiang.” Kushi nungbai Yoab madang apudak, aser asema ao. 22Idangji Zadok chir Ahimaazi tanaben Yoab dang ashi, “Kechi arudir arung, nia Kushi nungba sülen asemdi” aser Yoabi ashi, “Osang asoshiji na kecha tajangzük mangutsü ta meteter na kechiba asemtsü, kü chir.” 23Pai ashi, “Kechi arudir arung, ni asemtsü.” Anungji pai pa dang ashi, “Asemang.” Idangji Ahimaaz lenten lenmang nungji asem, aser Kushi nungbaji ajatet.24Tang Dawid süngkhüm ana tsüngda nung mena liasü, aser tanükerji süngkhüm kilem jara jagi atu, aser kodang pai tenük rangketa yoka reprang, pai nisung ka kija asemba angu. 25Aser tanüker jagi chuba dang ashi. Aser chubai ashi, “Pa kija süra, pa bang osang bena lir.” Aser paji anasai aru.26Tanüker jagi tangar nisung ka aruya angu, aser tanüker jagi süngkhümnükerji jar ashi, “Ajiang, tangar kata kija asemdagi! Chubai ashi, paia osang bener arur.”27Tanüker jagi ashi, “Ni bilem nung tamasa asembajibo Zadok chir Ahimaaz asemba mesüker.” Aser chubai ashi, “Pa nisung tajung, aser osangtajung den arur.”28Idangji Ahimaazi chuba dang ayimoktsütsü, pa jak alilen shir mechioker ashi, “Kibuba ne Tsüngrem temoatsüba sang, shibai kü kibur chuba anema teka mekangertem bendanga agütsü.”29Chubai ashi, “Asangur Absalom junga lir ma?” Ahimaazi langzü, “Yoabi kodang ne tenzüker yok, ni rongrongshishi tulu ka angu, saka kechiar ni memetet.”30Chubai ashi, “Aenshiang, aser yangi noktakang.” Anungji pai aenshi aser marakzüi noktak.31Idangji Kushi nungba arua ashi, “Kü kibur asoshi osangtajung! Kechiyong Kibubai tanü ne ket nung na anema apusor tashi ajak bendanga agütsüogo.”32Chubai Kushi nungba dang asüngdang, “Asangur Absalom junga lir ma” Aser Kushi nungbai langzü, “Kü kibur chuba tsükchirtem, aser tamajung asoshi na anema apusor ajak, iba asangurji mesüka sangma.”33Idangji chubaji kanga temulung raksa, aser süngkhüm temalen taktang jagi tua ajeb; aser pa aodang, pai ashi, “Oh kü chir Absalom, kü chir, kü chir Absalom! Ne melen niang sülasang. Oh Absalom, kü chir, kü chir”2 SAMUEL 19
Dawidi Absalom Asoshi Mangyimba1“Ajiang chuba jebdagi aser Absalom asoshi mang yimdagi,” ta Yoab dang metetdaktsü. 2Anungji iba anogo nung takokji nisung ajak asoshi mangyimba aküm; kechiyong iba anogo nung nisungtemi ashi, “Chubai pei chir asoshi jashia lir.” 3Aser tongbang nung temerangertemi akseta ajenba mesüka parnoki iba anogoji yimti jagi yaka mesüi ai. 4Chubai pei tejak nembang, aser ola tulu agi ayimten, “Kü chir Absalom, Oh Absalom, kü chir, kü chir”5Idangji Yoab chuba kidangi aita ashi, “Tanü nai ne tenzüker ajak maksü agi tejak nembangtsüogo, shirnoki tanü ne taküm, jabaso, jalatem aser ne kibutsütem aser ne züngatsütem taküm kümzük, 6kechiaser na sempartem nai meimer aser na meimertem nai sempar. Kechiyong tanishirtem aser tenzükertem ne matsüngdang kecha masü ta tanü nai jangjadaktsüogo; kechiyong tanü ni ya ajiteter oda Absalom taküm lilasang aser onokang ajak sür lilasang, idangjiang na pelala. 7Tang aji asünung aramesoang, oagi ne tenzükertem süngzükdakja jembiang, kechiaser Kibuba agi ni azüngashir, na morabang taonung ne den nisung kata malitsü; aser ibai na asoshi ne asangwa nungi tang tashi ne madak tamajung aruba ajak dang nungi tamajungba asütsü.” 8Idangji chubai aramesoa süngkhüm nung amen. Aser nisung ajak dang ashi, “Ajiang, chubaji süngkhüm nung mena lir.” Aser nisung ajak chuba madangi aru.Dawid Yirusalemi Meyipa ShilangbaTang Israel nunger ajak pei kidangi jena or liasü. 9Aser Israel kin ajonga bangsentepa ashi, “Chubai asen tsükchirtem ket aser Filistia nunger ket nungi asenok kümzük; aser tang pa Absalom mechi nenok nungi jena ogo. 10Saka Absalom, shiba asenok madak asenoki mezüja shimtet, tongbang nung süogo. Aji asünung kechiba chuba tanaben bener arutsü indangbo shingaia kecha mejembir?”11Chubai iba osang putir Zadok aser Abiathar dangi yoka ashi, Yihuda tamburtem dang shiang, Kechiba chuba par kidangi meyipa bener arutsü indang Israel ajaki jembiba chuba dangi arur, nenok ang tesütiba asür? 12Nenok kü adianutem, nenok kü teret aser kü shi, ajangla kechiba chuba meyipa bener arutsü nenok tesütiba asür? 13Aser nenoki Amasa dang shiang, “Na kü teret aser kü shi masü no? Tang nungi Yoab melen na kü temeranger telok tanishir ka mesüra Tsüngremi kü dang yamaji, aser ano talia inyakangma.” 14Pai Yihuda pur ajak mulungjang nisung ka ama atsüa aru; aji asünung parnoki chuba dangi o yok, “Meyipang, na aser ne tenzüker ajak.” 15Anungji chuba Yordani meyipa aru. Aser oagi chuba lenji aser Yordan ajanga chubaji anir arutsü Yihuda Gilgali aru. 16 Aser Gera chir Shimei, Benjamin nunger, Bahurim nungi, Yihuda nisungtem den Dawid chuba ajurutsü ilunga apuso. 17Aser pa den Benjamin nisung meyi ka liasü, aser Saul kidang tenzüker Ziba, pa den jabaso terpungu aser pa tenzüker metsü, asema chuba madangi Yordani alu. 18Aser chubar kinunger anir arutsü, aser pai kechi junger ta bilemer aji inyaktsü parnoki ao.Dawidi Shimei Dang Temeim SayubaGera jabaso Shimei, pai Yordan ajanga arudang pai chuba madang apudak. 19Pai chuba dang ashi, “Kü kiburi kü dak tai tesot ma mesüra kü kibur chubai Yirusalem toktsüba anogo nung ne tenzükeri koda tai inyak aji tebilemtetma; chubai aji temulung nung teyuma. 20Kechiyong ne tenzükeri ni temenen menaogo ta metet; aji asünung, ajiang, kü kibur chuba lenji Yosef kidong ajak nungi mezüngbuba tanü ni arua lir.”21Zeruia chir Abishai langzü, “Iba asoshi Shimei mesüdaktsütsü no, kechiaser pai Kibubai mezütsüba atakatemogo”22Saka Dawidi langzü, “Nenok Zeruia chirtem, nenok tanü kü anemertem ama asütsüba, ni nenok dang kechi inyaktsü? Tanü Israel nung kar südaktsütsü asü? Kechiyong ni tanü Israel madak chuba ta ni memetet asü.” 23Aser chubai Shimei dang ashi, “Na masütsü” ta azüngashia ashi.Dawidi Mefiboshet Dang Temeim Sayuba24 Saul semchir Mefiboshet chuba lenji alu; chuba pila-a aoba anogo nungi pa kümzüka meyipa aruba anogo tashi, pai pa tetsüng anebalu masü, mesüra pa bangsemo memejep, mesüra pa süoshi meshitok. 25Kodang chuba lenji pai Yirusalem nungi aru, chubai pa dang asüngdang, “Mefiboshet, kechiba na kü den mao”26Pai langzü, “Kü kibur, Oh chuba, kü kilir Zibai ni ashioktsü; kechiyong ne kiliri pa dang ashi, ni chuba den aotsü ni amentsü renemjang. Kechiyong ne kilir tetsüng tatsük lir. 27Pai ne kilir kü kibur chuba dang sensamasatsü. Saka kü kibur chuba Tsüngrem tenyar mesüka lir; aji asünung ne madang ajungba ka inyakangma.” 28Kechiyong kübur kinungerbo ajak kü kibur chuba madang tasütsü purtem dang lir; saka ne kilirbo shirnok ne langbang nung chiyunger parnok rongnung yutsüogo. Aji asünung joko chuba dang ano ayimtentsüba ni kechi tim aka? 29Chubai pa dang asüngdang, “Kechiba ne indang nai ano jembir? Ni ashir, na aser Ziba na tsüngda senmangji lemdangang.” 30Aser Mefiboshiti chuba dang langzü, “Hau, kü kibur chuba kümzüka arua ali nungji, pa nem ajak agidakjang.”Dawidi Barzillai Dang Temeim Sayuba31 Gilead nunger Barzillai Rogelim nungi alu; aser pai chuba Yordan ajanga meinoktsütsü ao. 32Tang Barzillai kanga tambur oda küm tir liasü: aser pai chuba nem pa Mahanaim nung alidang chiyungtsü agütsü; kechiyong pa kanga takar liasü. 33Aser chubai Barzillai dang ashi, “Na kü den arung, aser ni na asoshi Yirusalem nung anebalutsütsü.”34Barzillai ashi, “Ni chuba den Yirusalemi atutsüsa, ni ano arishi küm anogo kwika alitsü? 35Ni tanü küm tir lir, tajung-tamajung ni metetdi ma? Ne kilir pai kechi achir mesüra pai kechi ajemer aji chidangtetdi ma? Tebur ken tener ola mesüra tetsür ken tener dang ni ano angatsü kokdi ma? Ajangla kechiba ne kilirji kü kibur chuba atema khuret talila ka kümdaktsütsü? 36Ne kilir chuba den Yordan ajanga tatsüka aotsü akok. Kechiba chubai kü nem iba amai lepa agütsütsü? 37Yimlibilema ne tenzüker meyipa odakjang, angji ni kü yimti nung, kübu aser kütsü leper anasa asütsü akoktsü. Saka yangi ne kilir Kimham lir; pa kü kibur chuba den odakjang; aser pa asoshi ne dang kechisa ajung aji inyakang.”38Chubai langzü, “Kimham kü den ajanga aotsü, aser ni pa asoshi kechi ne madang ajung aji inyaktsü; aser nai kü nem inyakdaktsünüba ajak ni na asoshi inyaktsü?” 39Aser nisung ajak den chubaji Yordan ajanga ao, aser chubai Barzillai dak tebang mesep, aser pa moatsü; aser pa pei alidaki meyipa ao.Chuba Asoshi Yihuda o Israel na o Toktepba40Anungji chuba Gilgali ajanga ao, aser pa den Kimham dena ajanga ao; aser Yihuda nübur ajaki, aser ano Israel pur tesadangi chubaji ajanga anir aru. 41Aser ajiang, Israel pur ajak chuba dangi arua ashi, “Kechiba asen adianu Yihuda purtemi na auür oadok, aser chuba aser par kinungertem, Yordan ajanga, aser pa den Dawider nisungtem bener aru.”42Yihuda pur ajaki Israel purtem dang langzü, “Kechiaser chubaji onok sosem ana lir: ajangla kechiba iba atema nenok ain adoka alir? Chubar meyong onoki chitsü asü? Mesüra pai onok nem sempet agütsü asü”43Idangji Israel purtemi Yihuda pur dang langzü, “Chuba dak onok shilem ter lir, aser ano nenok dang nungi onok tali lir; ajangla kechiba nenoki onok sensatsür? Onok chuba meyipa anir arutsü jembiba onok mezüngbuba masü no?” Saka Yihuda purtem oji Israel pur o dang nungi tesashiba liasü.2 SAMUEL 20
Shebai Dawid Anema Noktakba1 Tang Benjamin kidong ka, Bikri jabaso, samesa nisung ka tenüng agi Sheba liasü, aser pai jangzüji apua ashi, “Onok Dawid dak shilem kecha maka, Yesse chir dak onok kecha senmang maka, nisung shia pei süki bushiang, Oh Israel!” 2Anungji Israel pur ajak Dawid nungi aenshia ao, aser Bikri chir Sheba sülen anidak, saka Yihuda nungerbo akang akanga chuba sülen Yordan nungi Yirusalemi anitaka ao.3 Dawid pei kidangi Yirusalemi aru, aser ki anebalutsü toktsüba tezüngatsür terji pai agi, aser ki ka nung tanüker kübok ayu, saka parnok dangi mai. Anungji parnok tasüba anogo matong tashi amia aliba amato parnok shibanga liasü.4Idangji chubai Amasa dang ashi, “Anogo asem tsüngda nung Yihuda nisungtem yangi jatepang, aser na dena yangi liang.” 5Anungji Amasai Yihuda ajatsü ao; saka mapang tatakzük nungji pai menuadok. 6Dawidi Abishai dang ashi, “Tang Bikri chir Shebai Absalom dang nungi tali tamajungba asenok dak inyaktsü; pa sasa atsübanga aliba yimtitemi yir timtem adokdakja lir, ne kibur tenzükertem anir pa aria oang.” 7Abishai sülen Yoab, Keret, Pelet nunger aser temeranger nisung ajak ao; parnoki Yirusalem nungi Bikri chir Sheba aria ao. 8Kodang parnok Gibeon nung aliba lung tulu anasaji liasü, parnok den ajuruteptsü Amasa aru. Tang Yoab temeranger sobutsü sobua liasü, aser iba manung peremsen ka, pa teperem nokleptsü nung nok ka sema liasü, aser pa tejakleni aodang aji tsükadok. 9Aser Yoabi Amasa dang asüngdang, “Na junga lir ma, kü adianu” Aser Yoabi Amasa asoshi pa dak tebang meseptsü bangsemo nung pa teka tajichi agi amet. 10Saka Amasai Yoab ket nung nok alibaji mangu; anungji Yoabi pa dak temang nung lepoktsü, aser tanaben melepoktsü dang pa jana ali nung sazüka pa asü.Idangji Yoab aser tenu Abishai Bikri chir Sheba aria ao. 11Aser Yoaber nisung kati Amasa anasa noktaka ashi, “Shibaisa Yoab junger asür, aser shibaisa Dawid asoshi lir, pa Yoab sülen anitakang.” 12Amasa lenmang tiyong nung pei zü nung longzüa liasü. Aser anasa arurtemi pa ngua, anenadok; aser kodang nisungba jagi nisung ajak anenbaji ngua, pai Amasaji lenmang nungjagi aluleni atsür ai, aser pa dak sü ka amungloktsü. 13Kodang pa lenmang nungi agien idangji nisung ajak Yoab sülen Bikri chir Sheba aria ao.14Shebai Israel kidong ajak arrtsü ajanga Beth-maaka nunger Abel dangi ao; aser Bikri nunger ajak sentep, aser pa sülen anidaka ai. 15Aser Yoab den alir nisung ajak aru aser Bethmaaka nung pa longbang; yimtiji anema parnoki ali mejongketa yanglu, aser aji mitsa den indangtepa noktak, aser jara laodaktsütsü parnoki ajenpoka liasü. 16Idangji shisa taka tetsür kati yimti nungi aja, “Angang! angang! Yoab dang shiang, ni pa den jembitsü yagi aru. 17Aser pai la anasa aru aser tetsür jagi asüngdang, na Yoab asü? Pai langzü, Hau. Idangji lai pa dang ashi, Ne kilitsür o angangma. Pai langzü, Ni angadagi.”18Idangji lai ashi, “Abel nung dang parnok nem shisa asüngdangjang ta akhidang parnoki shia liasü, aser yamaji parnoki mapa tatem aküm. 19Israel nung yimjung aser temulung alemer rongnung ka lir; nai yimti ka koba Israel nung tetsü ka lir aji samatsütsü bushir; kechiba nai Kibuba meyong senmangji meyokadoktsü”20Yoabi langzü, “Ni meyokadoktsü mesüra samatsütsüjibo tejembia mejembidaktsünür! 21Aji shitak masü. Saka Efraim tenem lima nung nisung ka, tenüng agi Bikri chir Shebai, Dawid chuba anema teka mekangogo, pa dang chiokang, aser ni yimti nungi atsüngendi.”Tetsür jagi Yoab dang ashi, “Ajiang, pa tekolak jara manung ajongzüka yoktsü.” 22Idangji tetsür jagi la shisatsü ajak agi nisung ajak dangi ao. Aser parnoki Bikri chir Sheba kolak lepzük, aser aji Yoab nem ajongzüka yok. Anungji pai jangzüji apu, aser parnok yimti nungi pei kidangi nisung shia senshia ao. Aser Yoab Yirusalemi chuba dangi meyipa ao.Dawid Tongti Ketdangpurtem23Tang Yoab Israel temeranger telok ajak madak tanishir liasü; aser Yehoiada chir Benaia Keret aser Pelet nunger tanishir liasü; 24aser Adoram mapa inyakertem madak kibur liasü; aser Ahilud chir Yehoshafat tezülur madak kibur liasü; 25aser Sheva obendangdak tezülur liasü, aser Zadok aser Abiathar putir liasü; 26aser ano Jair nunger Ira Dawid atema putir liasü.2 SAMUEL 21
Ayawara Aser Saul Kinungertem Südaktsüba1Dawid tendak küm asem ayawara liasü; aser Dawidi Kibuba tejak bushi. Aser Kibubai ashi, “Ibai Saul asoshi aser azü tokshiba pur kibong asoshi lir, kechiaser pai Gibeon nunger südaktsü.” 2Chubai Gibeon nunger aja, aser parnok den jembi. Tang Gibeon Israel chirtem masü, saka Amor nunger tanüngbatem lir; aser Israel chirtemi parnok dak mekongshitsü azüngashiaka, Sauli Israel aser Yihuda nunger indang tamajung bilema parnok tepsettsü bushi. 3Dawidi Gibeon nunger dang asüngdang, “Nenok asoshi ni kechi inyaktsü? Nenoki Kibuba senmang moatsütsüsa ni koma teputepdaktsüba adokdaktsütsü?”4Gibeon nungeri pa dang langzü, “Onoki, Saul mesüra par kibong nungi taribi mesüra hon meshitsü asoshi masü; mesüra Israel nung nisung kar danga südaktsütsüji onok asoshi masü” Aser pai ashi, “Nenok asoshi ni kechi inyaktsü”5Chuba dang parnoki mepishi, “Nisung shirnoki onok meyok aser onok samatsütsü tasa asa, aser Israel litsü ajak nung onok talidak makai lidaktsütsü atong, 6oda parnok jabaso tenetji onok nem agüjang, angji onoki Kibuba madang Gibeon nung Kibuba tenem manung parnok soseta südaktsütsü.” Chubai langzü, “Ni parnokji agütsütsü.”7Saka chubai Kibuba tenüng nung tezüngzüktepba, Dawid aser Saul jabaso Yonathan tsüngda nung alibayong Mefiboshet taküm kümzük. 8 Saka Aia jala Rizpa, lar jabaso anaji, Armoni aser Mefiboshet, shirnok lai Saul nem sotsü; aser Saul jala Merab jabaso pungu, shirnok lai Meholat nunger Barzillai jabaso Afriel nem sotsü, parnok chubai agi; 9aser pai parnok Gibeon nunger ket nung agütsü, aser parnoki parnok Kibuba madang tenem nung soseta südaktsü, aser parnok tenetji külemi sama. Aluruwa mezüng anogotem nung, barley tsük aruba tetenzüklen parnokji südaktsü.10Idangji Aia jala Rizpai anemsü bena aru, aji la asoshi lungma nung lema ayu, aser aluruwa tetenzük nungi anüng nungi tzünglu parnok dak metsük tashi ali, aser anüng ozütem iba manung anüngdang arutsü lai memela, mesüra moapu shirurutema aonung marudaktsü.11Kodang Saul züngatsü Aia jala Rizpai kechi inyak aji Dawid dang metetdaktsü. 12 Dawidi oa Yabeshgilead nisungtem nungi Saul aser par chir Yonathan teret bena aru. Filistia nungertemi Gilboa nung Saul tepsetba anogo nung, kong Filistia nungertemi parnok tepset, Bethshan lentongbang lenjem nungi parnoki auya bena oa liasü; 13aser idak nungjagi pai Saul aser pa chir Yonathan teret bener atu; aser shirnok soseta südaktsü parnok teret parnoki benden. 14Parnoki Saul aser pa chir Yonathan Zela nung Benjamin linük tebu Kis leper nung arem, aser chubai melaba ajak parnoki inyak, aser iba sülen Tsüngremi linük asoshi mepishiba anga.Filistia Nunger Den Raraba(1 Pu. 20.4-8)15Filistia nungeri tanaben Israel den rara, aser Dawid pa tenzükertem den külemi lua Filistia nunger anema parnoki rara aser Dawid ania aküm. 16Ish-bibenob aso tulutem nungi jakzükba ka, shiba nü odangba merang seret semer tesadang liasü, aser shiba nok tasen ka sema liasü, pai Dawid tepsettsü bilem. 17 Saka Zeruia chir Abishai Dawid yaritsü aru, aser Filistia nungba den rara aser pa tepset. Idangji Dawider nisungtemi pa dang mepishi, “Nai Israel milen remsepdakja lir, na joko onok den tongbangi maotsü.”18Iba sülenji ano Gob nung Filistia nunger den tanaben rara liasü, idangji Saf shiba aso tulutem nungi jakzükba liasü, paji Hushat nunger Sibekai tepset. 19Ano Gob nung Filistia nunger den tanaben rara liasü; aser Bethlehem nunger Yaareoregim jabaso Elhanani Git nunger Goliat tepset, pa nüdongji sütaker alem amai liasü. 20Aser ano Gat nung tanaben rara liasü, yangji soja asoba nisung ka teka shia nung temeyong trokrok, aser temepu shia nung temesüla trokrok, ajak agi metsürpezü keta liasü, aser pa-a aso tulutem nungi jakzükba liasü. 21Kodang pai Israel anema ayongzük, Dawid tenu Shimei jabaso Yonathani pa tepset. 22Par pezüji Gat nung aso tulu kin nungi jakzükba liasü, aser parnok Dawid aser pa tenzükertem ket nung lao.2 SAMUEL 22
Dawid Takok Ken(TKe. 18)1 Kibubai Dawid pa tsükchirtem ket aser Saul ket nungi kümzük, pai Kibuba dang iba ken ya aten,2 Kibuba kü lung kü mitsa,aser kü kümzükba lir.3Kü Tsüngrem, kü lung, shiba dak ni jenoker,kü jong aser kü tekümtet, kü mitsa aser kü jenokdak.Kü kümtetdakba, nai ni tekangshi nungi kümzüker.4Ni Kibuba dang aja, shiba tenüng asangtsü tetemsü lir.Aser ni tsükchirtem nungi kümzüka lir.5Tasüba tzüsem agi ni meketbanga liasü,tesamatsü tzükeprak agi ni aoksadaktsü.6Sheol lisü agi ni naibanga liasü,tasüba sang agi noktanga liasü.7Kü tejashi nung ni Kibuba dang aja;kü Tsüngrem dang ni aja.Pa tenla ki nung pai kü ola angashi,aser kü ayimtenba pa narongi aru.8Idangji alima anokshi aser atenten,anüng tamentakdaktem arakzü aser anokshi,kechiaser pa rasa-a liasü.9Pa teni nungi mokozü adok,aser pa tebang nungi temeyokba mi;pa nungi mijang twangwang jangrua adok.10Pai anüng mokremdaktsü, aser alu;pa tetsüng kübok ammang temelem liasü.11Pai cherub nung amen, aser yima ao;pa mopung tashikang manung angu.12Pai pa meketa akhümbanga ammang tzütem adenshia,anüngtem mepet temelem yanglu.13Pa madang sentsüprang agiMijang jangrudaktsü.14 Kibubai anüng nungi tsüngmok amok,aser tematibai pa ola adok.15Pai lijakjang yok, aser tsükchirtemji prokshidaktsü;tsüngi-tsüngpret agi parnok jenshidaktsü.16Idangji tzüyim bonglangtem ngua kümdaktsü,alima tamentakdaktem moa kümdaktsü,Kibubai parnok arürtsüba agi,pa teni tangu sashiba agi adokdaktsü.17Temalen nungi alua pai kü dak sot,tzü jenti nungi pai ni agitet;18Kü tashi tait tsükchir nungi pai ni kümzük.Ni sempartem nungi kümzük;kechiyong parnok ni asoshi onsara tashi tulu liasü.19Kü lendong anogo nung parnok kü madaki aru;saka Kibubai ni kümzüka liasü.20Tesademdak tesem kati ano pai ni anir adok:pai ni kümzük, kechiaser pai kü dak pela.21Kü temeshiba yari Kibubai ni ajangzükdaktsü:kü teka merükba yari pai kü nem meyipa agütsü.22Kechiyong ni Kibuba lenmang nung jaja,aser kü Tsüngrem nungi asükma pila-a mao.23Kechiyong pa ozüngtem ajak kü madang liasü:aser pa telatet ozüngtem nungi ni mepila.24Pa madang ni tai atongtsü makai liasü,aser ni tai nungi pila-a liasü.25Aji asünung Kibubai kü temeshiba yari;pa nükdang ni merükteta aliba yari meyipa agütsü.26Tamang kateter dang nai ne sasa tamang katetba,tai makaba nisung dang nai ne sasa tai maka sayutsü;27Temerüker dang nai ne sasa temerük sayutsü,aser tekirak pur dang nai ne sasa togima sayutsü.28Nai ajemalurtem kümzüktsü; Saka asükümer ludaktsütsü,ne tenük parnok madak lir.29Kechiyong na kü milen lir, Oh Kibuba;aser Kibubai kü ammang sangwadaktsütsü.30Hau, na ajanga ni temeranger telok akureptsütsü akok,aser kü Tsüngrem ajanga ni jara manung jokdanga akok.31Tsüngrem asoshibo, pa lenmang tabensa;Kibuba oji tentangogo;pa dak temulung alemertem asoshi paji jong ka lir.32 Kibuba dak alema Tsüngrem shiba lir?Aser asen Tsüngrem dak alema shiba lung lir?33Tsüngrem kü tashi tait mitsa lir:aser kü lenmang kümzüka yanglutsü.34 Pai kü tetsüng mesü tsüng mesüka kümdaktsü;aser temalen talang nung kümzüka yutsür.35Rara asoshi pai kü teka sayuteter;anungji kü tepen agi yongmenyin lijak azüa arur.36Ano nai ne tekümtet jong kü nem agütsüogo:aser ne teyari agi ni tulu kümdaktsü.37Nai kü kübok kü jenjang sadema kümdaktsü,aji asü nung kü tsüng majudok.38Ni kü tsüchirtem aria ao, aser parnok samatsü;aser parnok mesamatsü tashi ni tanaben memeyip.39Parnok mesaktettsüsa ni parnok ajensatsüaser parnok laoa lir.Hau, parnok kü tsüng kübok laoa lir.40Kechiyong tongbang asoshi nai kü dak tashi agi nangri kangtsü,nai kü tskchirtem kü tetsüng kübok yutsü.41Kü sempartem ni leptoktsütsü asoshi,nai ano kü tsükchirtem kü dangi parnok terongdong tendaktsü.42Parnoki reprang, saka kümzüktsü shinga maliasü;parnoki Kibuba dang ayimten,saka parnok dang pai melangzü.43Ni parnok ali auyi tila küma menüngsa,yimdong lishi ama ni parnok ajensatsü,aser prokshidaktsü.44Nai ano kü nübur raratepba nungi ni kümzük;nai ni kintem tekolak asütsü yutsü;ni memetetba nüburtemi ni tenzüktsü.45Aenertemi parnok sasa kü dang hai-haura ka-a tashi angatsü,parnoki kü indang angashili-i,parnoki kü dang tashi angatsü.46Bendangertem temulung azüla-a aotsü,aser parnok sasa atentena parnok mitsatem nungi adoktsü.47 Kibuba taküm lir; aser kü lung temoatsü sangma,aser kü tekümtet lung, kü Tsüngrem ulua kümdakjang:48Tsüngrem shibai ni asoshi mang yangtsür aserkü küboki nisungtem aitdaktsür,49Shibai kü tsükchirtem nungi ni anitet;nai kü anemertem madak uludaktsür,aser tesashi nisung nungi ni kümzüker.50 Anungji, Oh Kibuba, kin rongnung ni ne nem tenüngsang agütsütsü.Aser ne tenüng asoshi tenüngsang atentsü.51Pa chuba nem takok tulu pai agütsütsü;aser pai mezüja shimtetba Dawid dang,aser pa metsü dang teti asoshi yimlibilem sayur.2 SAMUEL 23
Dawid Tatembang O1Itemi Dawid tatembang otem lir. Yesse chir Dawidi ashir, shiba Tsüngremi ajungket, Yakob Tsüngremi mezüja shimtetba Israel tenüngsang ken tajung atensang.2 Kibuba tanelai ni ajanga jembir,aser pa o kü meli nung liasü,3Israel Tsüngremi ashi,Israel Lungi kü den jembi;“Nisung madak ochi shia yimsüsürji Tsüngrem tsübuba nung yimsü asürji,4anü adokdang ama, pa anepdang sangwa ama alitsü,mepet maliba anepdang anü sangwa yaloktsü ama,ali nungi ai adokdaktsüba tzünglu mesüka alitsü.”5Kechiyong Tsüngrem den kü ki yangji mali no?Kechiyong pai tatem maka tezüngzüktepba kü den yanglua lir,kechisarena nung tatongi shia aser kümzüka yanglu;kechiyong pai kü teyari aser kü tejangraba ajak matalokdaktsütsü no?6Kechiyong Tsüngrem metsübur nisung ajak endokadokba mesüka lir;kechiyong parnok teka agi amtsü makok;7Saka parnok dak kongshiba nisung jagi pa sasa merang aser nüdong amer;aser parnok talidak khenyongi parnok mi agi rongtoker.Dawider Nüngtugu Temerangertem8Itemi Dawider nüngtugu temeranger tanishirtemji lir: Yosheb-basshebet Takemon nunger ashiba parnok asem rongnung ka tongtiba liasü; pai noklang ti anema pa nü mekang aser khenyongi tepset.9Ano temeranger nisung asem rongnung pa den atongbaji Ahohi chir Dodo, par chir Eleazar liasü. Tongbang raratsü Filistia nunger adenshia alidang aser Israel nunger atsünga aodang pa aser Dawidi parnok anema noktang. 10Pa arameso aser pa teka ania maküm tashi, aser nok nung pa teka menaloka maküm tashi pai Filistia nunger lepzüka yok; aser iba anogo Kibubai takok tulu inyak; aser pa sülen nisung tetepsetertem nungi oset alatsü dang aru.11Pa den atongbaji Harar nunger Agee chir Shamma liasü. Filistia nungeri Lehi nung luli agi sünga aliba linük ka nung külemi sentep, aser Israel purtemji Filistia nunger nungi jena ao. 12Saka pai ali tiyong nungji noktak, aser aji noktang, aser Filistia nunger tepset; aser Kibubai takok tulu ngudaktsü. 13Alu arutsü mapang anasa tongtipur semer rongnungi asem Adullam lungpoki alu, kong Dawid liasü, idangji Filistia nunger telok ka Refaim lenten nung anena liasü. 14Idangji Dawid mitsa nung liasü; aser Filistia nunger temeranger telokji Bethlehem nung liasü. 15Dawidi menungraseta ashi, “Oh kari danga Bethlehem tzü süngkhüm anasa alibato kü nem agütsülasang.” 16Idangji temeranger nisung asem jagi Filistia nunger tanendak nempoka ao, aser süngkhüm anasa aliba Bethlehem tzüji tatet, aser aji Dawid dangi bener aru. Saka pai ibaji majem; pai Kibuba nem aji shiloktsü. 17Pai ashi, “Oh, Kibuba, ni ya meinyaktsüsa kü dang nungi talangka piladakjang. Nisung shirnoki pei taküm bendanga ao parnok zü ni jemdi ma?” Aji asünung iba nung jagi pai majem. Temeranger nisung asemjagi yamaji inyak.18Zeruia chir Yoab tenu Abishai semer rongnungji tongtiba liasü. Aser pai pa nü noklang asem anema mekang aser parnokji tepset, aser asem dakji alema khonang ka bener aru. 19Semer rongnungji pa nüngtugutiba liasü, aser parnok tanishir aküm; saka pai asemjibo matong.20Yehoiada chir Benaia Kabzeel nungi, tasü tait nisung, mapa tulu inyaker ka liasü, pai Moab nung Ariel chirtem ana tepset. Pai ano alu aser rürjeb tsüka lia molusongzü ka ongken ka nung tepset. 21Aser pai Ijip nunger aso tajung ka tepset. Ijip nungbaji pa ket nung nü ka liasü, saka Benaia ajok ka amer alu, aser Ijip nungba ket nungi nüji rakzük, aser pai pei nü agi tsüngset. 22Itemji Yehoiada chir Benaiai inyak, aser temeranger asem dakji alema khonang bener aru. 23Semer dang nungi pa nüngtuguba liasü, saka pai asemjibo matong. Aser Dawidi paji pa tanüker kümdaktsü.24Temeranger semerji itemi liasü: Yoab tenu Asahel, Bethlehem nungi Dodo chir Elhanan; 25Harod nungi Shamma, Harod nungi Elika; 26Palti nunger Helez, Tekoa nungi Ikkesh chir Ira; 27Anathot nungi Abiezer, Hushat nunger Mebunnai; 28Ahoshi nunger Zalmon; 29Netofa nungi Banana chir Heleb, Benjamin nunger Gibea nungi Ribai chir Ittai; 30Pirathon nungi Benaia, Gaash ayong nungi Hiddai; 31Arbathi nunger Abialbon, Bahurim nungi Azmavet; 32Shaalban nungi Eliahba, Yashem, Yonathan chirtem, 33Harar nunger Shamma, Harar nunger Sharar chir Ahiam; 34Maaka nungi Ahasbai chir Elifelet, Gilo nungi Ahithofel chir Eliam; 35Karmel nungi Herzro, Arbi nunger Paarai; 36Zoba nungi Nathan chir Igal, Gad nunger Bani; 37Ammon nunger Zelek, Zeruia chir Yoab nok o nü abensang Beeroth nung Naharai; 38Ithri nunger Ira, Ithri nunger Gareb; 39Het nunger Uria: ajak agi semer tenet.2 SAMUEL 24
Dawidi Nütsüng Yongsük Züngdangba(1 Pu. 21.1-27)1Ano Israel anema Kibuba ain adoka pai parnok anema Dawid ajungmesoa ashi, “Oang, Israel aser Yihuda züngdangang.” 2Anungji chubai Yoab aser pa den alir temeranger telok tanishirtem dang ashi, “Israel kidong ajak sema, Dan nungi Beersheba tashi oang, aser ni nisung yongzük metettsü asoshi züngdangang.”3Saka Yoabi chuba dang ashi, “Tang Kibuba ne Tsüngremi nisungtem züindakjangma, parnok kwika südir saka, noklang bena, aser kü kibur chuba tenük agi aji ngudakjangma; saka kechiba kü kibur chubai iba mapa inyakner?” 4Saka Yoab aser temeranger telok tanishirtemi chuba ozüngji angatsüsa aküm. Anungji Yoab aser temeranger telok tanishirtemi chuba tsüngdang nungi Israel nütsüng züngdangtsü ao.5Parnoki Yordan ajanga Aroer nungi tenzük, aser lenten nung aliba nungi, Gad tsütsü aser Yazer leni ao. 6Parnoki Gileadi aru, aser yang nungjagi Het nunger lima Kadesi aru; aser parnok Dani aru, aser Dan nungi parnoki meketa Sidoni ao. 7Iba sülen Tur mitsa aser Hiv aser Kanan nunger yimtitemi aru; aser tesüba Beersheba nung Yihuda nung Negebi tugu. 8Yamaji linük ajak sema parnok ao, ita tuku aser anogo metsü nungang parnok Yirusalemi aru. 9Yoabi chuba nem nütsüng yongsük osang agütsü: Israel nung nok amer tasü tait meyi noklang ti liasü, aser Yihuda nungi meyi noklang pungu liasü.10Saka Dawidi nisungtemji züngdanger külen pa mulungjangi pa dak atsüng. Aser Dawidi Kibuba dang ashi, “Ni kechi inyak iba nung ni temenen tulu menaogo; saka tang, Oh Kibuba, ni ne dang mepishir, ne tenzüker tai temenen bener oadokangma, kechiaser ni kanga tamashi inyakogo.”11Kodang Dawid anepdang shishi, Kibuba O Dawider ainkar Gad dangi arua ashi, 12“Oang aser Dawid dang shiang, Yamai Kibubai ashir, Ni ne nem mapa asem agütsür; item rongnungi ka shimtetang, angji ni ne dang aji inyaktsü.” 13Anungji Gad Dawid dangi aru aser pa dang metetdakja ashi, “Ne linük nung ayawara küm asem ne dangi arudaktsütsü asü? Mesüra na ne tsükchirtemi arishidang ita asem jena aotsü? Mesüra ne linük nung anogo asem tashitak wara adokdaktsütsü? Tang nai shisadangang aser ni yoksang dangi kechi telangzüba agütsütsü bilemdangang.”14Dawidi Gad dang ashi, “Ni timtem tulu nung lir, tang asenoki Kibuba ket nung tsükdi; kechiyong pa yimlibilem tulu lir; saka ni nisung ket nung tetsükdaktsü.” 15Anungji anepdang nungi mapang tatakzük tashiji Kibubai tashitak wara yok, aser yangji Dan nungi Beersheba tonga nisung meyi neter asü. 16Kodang tenyari Yirusalem tsütsü samatsütsü pa teka songtok, Kibubai tamajung nungi pa mulung atsüshi, aser nisung rongnung tesamatsüba tenyar dangji ashi, “Ojang sang; tangbo ne teka sotadokang.” Aser Kibuba tenyarji Yebus nunger Arauna motsüngnem anasa liasü.17Idangji Dawidi Kibuba dang, pai nisungtem samatsüba tenyarji angudang jembi, “Angang, ni temenen benshiogo, ni mejungi inyakogo; saka item santemi kechi inyak? Yimbilema ne teka ni anema aser ozü kibong anema sangma.”18Panüji Gad Dawid dangi arua pa dang ashi, “Tuang, Yebus nunger Aruana motsüngnem manung Kibuba asoshi tekülemdak ka yangluang.” 19Gadi ashiba ama Dawidia Kibubai melaba ama atu. 20Aser Araunai repranga yok, aser chuba aser pa tenzükertem pa tsütsüi aruya angu: aser Arauna tugua pai chuba madang pa tejak alilen shia apudak. 21Aser Araunai ashi, “Kü kibur chuba kechi atema aru” Aser Dawidi langzü, “Kibuba dang tenladak ka yanglutsü atema na nungi motsüngnem alitsü, angji nisungtem nungi temerenshiji anenadoktsü.”22Araunai Dawid dang ashi, “Kü kibur chubai pa tsüngdang kechi ajung aji agiang aser tenla-ang: tarongba tenla asoshi nashi, aser tsük netzükba oset aser süng asoshi süngratem yangi lir: 23ya ajak, Oh chuba, Araunai chuba nem agütsür.” Aser Araunai chuba dang ashi, “Kibuba ne Tsüngremi na agizükangma.” 24Saka chubai Arauna dang langzü, “Masü, saka ni aji na nungi jenjang ka agi alitsü: ni angati anguba agi kü Kibuba kü Tsüngrem nem tarongba tenla magütsütsü.” Anungji Dawidi motsüngnem aser nashitemji taribi shekel tenem agi ali. 25Yangji Dawidi Kibuba nem tenladak ka yanglu, aser tarongba tenla aser yimjung tenlatem agütsü. Anungji linük asoshi temepishiba Kibubai langzü aser Israel nungi temerenshiji pila.
Comments
Post a Comment