2 PUTIPUYANG

2 PUTIPUYANG

OKILA

Mezüngbuba aser Tanabuba PUTIPUYANG Kaket ana ya maneni sendaktepa lir. Talisa idaki Solomon uluba indang, anüdoklentep chuba Yeroboami Solomen jabaso Rehoboam anema noktakba, itemji shia angutsü. Iba mapang nungi (586 B.C shi nung) Yirusalem laoba tashi Yihuda yimli madak tatalokba balala indang otsü idaki telemsa angutsü.

            Keta Alibatem

Solomon Yimsüsüba Mapang 1:1-9:31

            (a) Mezüng Küm 1:1-17

            (b) Tenla Ki Yangluba 2:1-7:10

(c) Tesülen Küm 7:11-9:31

Anüdoklentep Kintemi Anema Apusoba 10:1-19

Yihuda Chubatem 11:1-36:12 Yirusalem Laoba 36:13-23

           Keta Alibatem

Solomon Yimsüsüba Mapang            2 PUTIPUYANG 1:1-9:31

(a) Mezüng Küm           2 PUTIPUYANG 1:1-17

Solomoni Shisatsü Meshiba

(1 Ch.3:1-15)  2 PUTIPUYANG 1:1-13

Solomon Tashi aser Rongsen

(Ch. 10.26-29; 2 Pu. 9:25-28)              2 PUTIPUYANG 1:14-17

(b) Tenla Ki Yangluba 2 PUTIPUYANG 2:1-7:10

Tenla Ki Yanglutsü Renemba                2 PUTIPUYANG 2:1-2

Tair Chuba Hiram Den Tangatettep

(1 Ch.5:1-18)  2 PUTIPUYANG 2:3-16

Tenlaki Mapa Tenzükba

(1 Ch. 6:1-38) 2 PUTIPUYANG 2:17-18

Solomoni Tenla Ki Yangluba

(1 Ch.6:1-22)  2 PUTIPUYANG 3:1-14

Yongmenyin Tongshi Ana

(1 Ch.7:15-22)              2 PUTIPUYANG 3:15-17

Tenlaki Asoshi Osettsüsettem

(1 Ch.7:23-51)              2 PUTIPUYANG 4:1-5:1

Tenla Kidangi Ozüng Süngden Bener Aitba

(1 Ch.8:1-11)  2 PUTIPUYANG 5:2-10

KIBUBA Sentsüwangshi          2 PUTIPUYANG 5:11-14

Solomoni Nüburtem Den Jembiba

(1 Ch.8:12-21)              2 PUTIPUYANG 6:1-11

Solomon Sarasadem

(1 Ch.8:22-53)              2 PUTIPUYANG 6:12-42

Tenla Ki Meshitetba

(1 Ch.8:62-66)              2 PUTIPUYANG 7:1-10

(c) Tesülen Küm            2 PUTIPUYANG 7:11-9:31

Solomon Dangi Tsüngrem Tanaben Adokba

(1 Ch.9:1-9)     2 PUTIPUYANG 7:11-22

Solomon Mapa Balala

(1 Ch.9:10-28)              2 PUTIPUYANG 8:1-18

Chubatsür Shebai Semdangba

(1 Ch.10:1-13)               2 PUTIPUYANG 9:1-12

Solomon Rongsen Tulu

(1 Ch.10:14-29; 2 Pu.1:14-17)            2 PUTIPUYANG 9:13-28

Solomon Asüba

(1 Ch.11:41-43)            2 PUTIPUYANG 9:29-31

Anüdoklentip Kintemi Anema Apusoba       2 PUTIPUYANG 10:1-19

Rehoboam Anema Noktakba

(1 Ch.12:1-19)               2 PUTIPUYANG 10:1-19

Yihuda Chubatem       2 PUTIPUYANG 11:1-36:12

Shemaiai Shinba

(1 Ch.12:21-4)               2 PUTIPUYANG 11:1-17

Rehoboami Yimti Yangluba  2 PUTIPUYANG 11:5-17

Rehoboam Kibong Akümba  2 PUTIPUYANG 11:18-23

Ijipi Yihuda Amakba

(1 Ch.14:25-28)           2 PUTIPUYANG 12:1-12

Rehoboam Asüba

(1 Ch.14:21-22, 29-31)            2 PUTIPUYANG 12:13-16

Abijai Yeroboam den Raraba

(1 Ch.15:1-8)  2 PUTIPUYANG 13:1-22

Asa Yimsüsüba

(1 Ch.15:9-1:5)             2 PUTIPUYANG 14:1-8

Ethiopia den Raraba 2 PUTIPUYANG 14:9-15

Asa Mapatem 2 PUTIPUYANG 15:1-19

Israel den Timtem

(1 Ch..15:17-22)          2 PUTIPUYANG 16:1-6

Ainkar Hanani               2 PUTIPUYANG 16:7-10

Asa Tashitak aser Asiiba

(1 Ch..15:23:24)          2 PUTIPUYANG 16:11-14

Yehoshafat Yimsüsüba           2 PUTIPUYANG 17:1-9

Yehoshafat Uluba       2 PUTIPUYANG 17:10-19

Ainkar Mikaiai Tamakok Indang Shinba 

(1 Ch..22:1-28)             2 PUTIPUYANG 18:1-27

AhabAsüba

(1 Ch. 22:29-40)          2 PUTIPUYANG 18:28-34

Ainkari Yehoshafat Arütsüba               2 PUTIPUYANG 19:1-3

Yehoshafat YimIi Asentenshiba         2 PUTIPUYANG 19:4-11

Edom den Raritba       2 PUTIPUYANG 20:1-4

Yehoshafat Sarasadem aser Takokba            2 PUTIPUYANG 20:5-30

Yehoshafat Yimsüsüba Tatembang

(1 Ch.22:41-50)            2 PUTIPUYANG 20:31-37

Yehoram Yimsüsüba

(2 Ch.8:16-19)               2 PUTIPUYANG 21:1-7

Edomi anema Apusoba

(2, Ch.8:20-22)             2 PUTIPUYANG 21:8-10

Elija Shiti           2 PUTIPUYANG 21:11-17

Yehoram Tashitak aser Asüba

(2 Ch.8:23-24)              2 PUTIPUYANG 21:18-20

Ahazia Yimsüsüba

(2 Ch.8:25-29; 9:14-16, 27-29)           2 PUTIPUYANG 22:1-9

Athaliai Yimli Agiadokba

(2 Ch.11:14-16)            2 PUTIPUYANG 22:10-12

Athali'a anema Apusoba

(2 Ch.11:4-16)               2 PUTIPUYANG 23:1-7

Yoash Chuba ta Sangdongba

(2 Ch.11:9-12)               2 PUTIPUYANG 23:8-21

Yoashi Tenlaki Yanglushiba

(2 Ch.12:1-16)               2 PUTIPUYANG 24:1-14

Yoash Aibelendaktsiiba          2 PUTIPUYANG 24:15-27

Amazia Yimsüsüba,

(2 Ch.14:1-26)               2 PUTIPUYANG 25:1-4

Edom anema Rara

(2 Ch.14:7)      2 PUTIPUYANG 25:5-16

Israeli Yihuda Akokba

(2 Ch.14:17-20)           2 PUTIPUYANG 25:17-24

Amazia Asüba

(2 Ch.14:17-20)           2 PUTIPUYANG 25:25-28

YihudaChuba Uzzia Yimsüsüba

(2 Ch.14:21-22, 15:1-3)          2 PUTIPUYANG 26:1-15

Asükümba aser Aibelenba

(2 Ch.15:4-7) 2 PUTIPUYANG 26:16-23

Yotham Chuba Yimsüsüba

(2 Ch. 15:32-38)          2 PUTIPUYANG 27:1-9

Ahaz Chuba Yimsüsüba

(2 Ch.16:1-4)  2 PUTIPUYANG 28:1-4

Israeli Siria den Rara

(2 Ch.16:5-6; Isa. 7:1)              2 PUTIPUYANG 28:5-7

Asiria i Yihuda Yaritsü Memulungba

(2 Ch.16:7-9) 2 PUTIPUYANG 28:8-15

Asiria i Yihuda Yaritsü Memulungba

(2 Ch.16:7-9) 2 PUTIPUYANG 28:16-21

Ahaz Temenen aser Tasüba

(2 Ch:16:12-20)           2 PUTIPUYANG 28:22-27

Hezekia Chuba Yimsüsüba

(2 Ch.18:1-8)  2 PUTIPUYANG 29:1-2

Tenlaki Meshitetba     2 PUTIPUYANG 29:3-19

Tekülemdak Meshitetba         2 PUTIPUYANG 29:20-36

Süia Aoba Benjong asoshi Terenemba          2 PUTIPUYANG 30:1-12

Silla Aoba Benjong Amungba              2 PUTIPUYANG 30:13-27

Par Yimsü Asentenshiba

(2 Ch. 18:14)  2 PUTIPUYANG 31:1-10

Putir aser Levitem Mapalem Tenzükshiba   2 PUTIPUYANG 31:11-21

Asiriai Yirusalem Amokmerenba

(2 Ch.18:3-19.34; Isa.36:1-22; 37:8-38)       2 PUTIPUYANG 32:1-19

Sennakerib Akokba aser Pa Asüba

(2 Ch.19:35-37)           2 PUTIPUYANG 32:20-23

Hezekia Takatait aser Takok

(2 Ch.20:12-21; Isa.39:1-8)  2 PUTIPUYANG 32:24-26

Hezekia Takatait aser Takok

(2 Ch.20:12-21; 1sa.39:1-8) 2 PUTIPUYANG 32:27-33

Manase Chuba Yimsüsüba

(2 Ch.21:1-9)  2 PUTIPUYANG 33:1-9

Manase Temulung Meyipba

(2 Ch.21:17-18)            2 PUTIPUYANG 33:10-17

Manase Asüba

(2 Ch.21:17-18)            2 PUTIPUYANG 33:18-20

Amon Yimsüsüba aser Asüba

(2 Ch.21:19-26)           2 PUTIPUYANG 33:21-25

Yosia Yimsüsüba

(2 Ch. 22:1-2) 2 PUTIPUYANG 34:1-2

Süngyanglu Külemba anema Yosiai Noktakba        2 PUTIPUYANG 34:3-7

Kaket Ngutetba

(2 Ch.22:3-20)              2 PUTIPUYANG 34:8-21

Hulda Ainkar dang Asüngdangyaba 2 PUTIPUYANG 34:22-28

Tezüngzüktepba Akangshiba

 (2 Ch.23:1-20)             2 PUTIPUYANG 34:29-33

Süia Aoba Benjong Amungba

(2 Ch.23:21-23)            2 PUTIPUYANG 35:1-19

Yosia Yimsüsüba Tatembang

(2 Ch.23:28-30)           2 PUTIPUYANG 35:20-27

Yehoahaz Yimsüsüba

(2 Ch.23:30-35)           2 PUTIPUYANG 36:1-4

Yehoiakim Yimsüsüba             2 PUTIPUYANG 36:5-10

Yirusalem Laoba         2 PUTIPUYANG 36:13-23

Zedekia Yimsüsüba

(2 Ch.24:18-20; Yer.52:1-3a) 2 PUTIPUYANG 36:11-14

Yirusalem Laoba

(2 Ch. 25.1-21; Yer. 53.26-30)             2 PUTIPUYANG 36:15-21

Cyrusi Tepuokdak Alir Chiokba

(Ezr.1:1-4)        2 PUTIPUYANG 36:22-23

2 PUTIPUYANG 1

Solomoni Shisatsü Meshiba

(1 Ch. 3.1-15)

1Dawid chir Solomoni pei sasa pei yimli yanglu, aser Kibuba pa Tsüngrem pa den liasü aser onsara uludaktsü. 2Aser Israel ajak nung meyirijang madak aser noklang madak walunir dang, obendangertem, aser Israel nung lenir ajak tebou semchir rongnung tambusang dang Solomoni jembi. 3Idangji Solomon aser pa den telok ajak, Gibeon nung aliba tekülemdak tenemi ao; kechiyong Tsüngrem sentep süki koba Kibuba tenzüker Mosai arem nung yanglu, aji yangji liasü. 4 Saka Tsüngrem temeshi süngden Kiriath-jearim nungi Dawidi iba asoshi renema alidaki bener atua liasü, kechiyong Yirusalem nung iba asoshi pai süki yanglua liasü. 5 Ano Hur chir Uri jabaso Bezaleli yongmenyin tenladak yanglua alibaji, yangji Kibuba tekülemdak süki madang liasü. Solomon aser tesentepertemi Kibuba bushi. 6Aser Kibuba madang yongmenyin tenladaki Solomon atu, aji sentep süki nung liasü, aser iba manung tarongba tenla meyi ka tenla.

7Paonungji Solomon dangi Tsüngrem adok, aser pa dang ashi, “Ni ne nem kechi agütsütsüar asüngdangang.” 8Aser Solomoni Tsüngrem dang ashi, “Nai kübu Dawid dang mechiokba temeim tulu sayuogo, aser pa melen ni chuba kümdaktsüogo; 9Oh Kibuba Tsüngrem, kübu Dawid dang ne tenangzükba tang atalokjangma, kechiyong alijak nung lisem kwika, paika nübur madakji nai ni chuba kümdaktsü. 10Iba nübur madang ni adokli yili ta asütsü shisa taka aser temetetba shisatsü dang kü nem agüjangma, kechiyong shibai ne nübur paika madakji yimsü sütettsü?” 11Tsüngremi Solomon dang langzü, “Ibai ne mulungjang nung ali nungji, aser nai rongsen, sen, khonang, mesüra na sempartem taküm memeshi, aser oda arishi talang memeshi, saka kü nübur shir madak ni na chuba kümdaktsü parnok madak nai yimsü sütettsü na asoshi shisatsü aser temetetba ang meshi. 12Shisatsü aser temetetba ne dang melaogo. Ni ano senti oset, rongsen, aser khonang, chubatem shinga ne tejaklen makaba mesüra ne sülena shinga ibala makatsüba ne nem agütsütsü.” 13Anungji Gibeon tekülemdak tenem nungi aser sentep süki nungi Solomon Yirusalemi aru, aser pai Israel madak chuba.

Solomon Tashi Aser Rongsen

(1 Ch. 10.26-29; 2 Pu. 9.25-28)

14  Solomoni talungtsü aser kor temeranger külemi aniten; pa talungtsü noklang terpezü liasü aser kor temeranger meyi terana liasü, parnok pa talungtsü yimtitem nung aser Yirusalem nung chuba den lidaktsü. 15Aser chubai taribi aser hon Yirusalem nung lung ama bulua talubosa kümdaktsü, aser pai cedar süngdong Shefela nung mungu süngdong ama jenti kümdaktsü. 16 Aser Solomoni kortem Ijip aser Kue nungi bena aru, aser chubar shishirtemi itemi Kue nungi jenjang talang agüja ali. 17Parnoki Ijip nungi talungtsü ka taribi shekel noklang trok agi alia aben, aser kor ka nung noklang ka ser tenem agütsü; yamaji parnok ajanga itemi Het chuba ajak aser Siria chubatem dangi yok.

2 PUTIPUYANG 2

Tenla Ki Yanglutsü Renemba

1Tang Solomoni Kibuba tenüng asoshi tenla ki ka aser pa asoshi chuba ki ka yanglutsü shisatet. 2Aser khu abentsü nisung meyi neter aser tenem lima nung lung atsüngtsü meyi tir, aser parnok madak reprangtsü meyi asem noklang trok, Solomoni lemzüktsü.

Tair Chuba Hiram Den Tangatettep

(1 Ch. 5.1-18)

3Solomoni Tair chuba Hiram dangi o yok, “Nai kübu Dawid den benshiba aser pa sasa talisa ki ka yanglutsü cedar süng pa dangi yokba ama, yamaji kü den benshiangma. 4Ajiang, Israel asoshi teti benshitsü melaba ama, pa madang teronem tanang liangmesen arongtsü asoshi, aser Kibuba Tsüngrem madang ayuba amtsük maneni tenlatsü aser anepdang aser nikongdang tarongba tenla asoshi, amungnütem aser ita lanutem aser Kibuba ozü Tsüngrem asoshi benjongbentsü nung pa nem aji bendanga agütsütsü asoshi ni ki ka yanglutsüba lir. 5Ni yanglutsü aliba kiji tulu alitsü, kechiyong ozü Tsüngremji tsüngrem ajak madak nungi tuluba lir. 6 Saka anüng, oda tematiba anüngia pa masem nungji, shibai pa nem ki ka yanglutsütsü akok? Pa madang liangmesen arongdak ka dak alaka pa asoshi ki ka yanglutsütsüba nia shiba aka? 7Anungji tang hon, taribi, yongmenyin, aser merang, aser nakrema meremba, azü sentsü, aser anüng sentsü angdong ibala inyaker, ano noksa amenoktsü ashiba, Yihuda nung aser Yirusalem nung kü den alir tashirtem shirnok kübu Dawidi yua lir parnok den alitsü tetangshi nisung ka kü dangi yokang. 8Ano kü dangi cedar süng, cypress süng, aser algum süngtsük Lebanon nungi yokang, kechiyong ne tenzükertemi Lebanon nung süngtsük koma arangtsü aji ni meteter. Aser ne tenzükertem kü tenzükertem den alitsü, 9oda ni asoshi süngtsük jenti bendentsü, kechiyong ni yanglutsü aliba kiji tulu aser tesüngmangtsü alitsü. 10Aser ajiang ne tenzüker süng alenertem nem ni chiyungtsü tatak meyi metsü, barley tsük tatak meyi metsü, yi gallon meyi metsü, aser totzü mori tatakzük meyi metsü agütsütsü.”

11Idangji Tair chuba Hirami shiti ka nung langzüa pai Solomon dangi yok: “Kibubai pei nübur meimba yong pai na parnok madak chuba kümdaktsü.” 12Hirami ano ashi, “Israel Tsüngrem Kibuba temoatsü süang, shibai anüng aser alima yanglu, shibai Dawid chuba nem shisa taka jabaso ka agütsü, pei shisatsü amshitetba aser tangatetba sempet agütsüba agi, shibai Kibuba asoshi tenla ki ka, aser pei asoshi chuba ki ka yanglutsü.”

13“Tang ni tetangshi nisung ka, tangatetba sempet aliba, Huram-abi, 14Dan jala rongnung tetsür ka jabaso yokogo, aser tebuji Tair nisung. Hon, taribi, yongmenyin, merang, lung, süng, aser nakrema meremba, anüng sentsü, aser azü sentsü angdong aser kümpa angsem, aser noksa amenokba mapa tapu ajak inyaktsü, aser pa nem inyaktsü agütsüba tapu ajak inyaktsü akokba, ner mapa mongin nisungtem den, kü kibur Dawid, nebu, par mapa mongintem den inyaktsü pai angazüka lir. 15Tang aji asünung wheat aser barley tsük, totzü aser yi, koba kü kiburi jembiogo; pai pa tenzüker dangi yokdakjang; 16aser kwika tenüngdaktsü Lebanon nungi onoki lensüktsü, aser aji rong agi tzüyim nung Yopai ne dangi bener arutsü, angji nai aji Yirusalemi bener atutsü.”

Tenlaki Mapa Tenzükba

(1 Ch. 6.1-38)

17Idangji tebu Dawidi parnok tenüng züluba ama Israel lima alir bendanger ajak Solomoni tenüng zülu; aser meyi noklang ka tenemer asem ser noklang trok liasü. 18Parnok meyi neter nem pai khu abentsü agütsü, meyi tir tenem lima nung lung angentsü, aser nisungtem mapa inyakdaktsütsü tanishir meyi asem ser noklang trok shim.

2 PUTIPUYANG 3

Solomoni Tenla Ki Yangluba

(1 Ch. 6.1-22)

1  Idangji Dawidi shimtetdak, Yebus nunger Ornam motsüngnem nung tebu Dawid dangi Kibuba adokdak, Moria tenem Yirusalem nung Solomoni Kibuba ki yanglutsü tenzük. 2Pa chubaba küm pezübuba ita tanabuba anogo anabuba nung pai yanglutsü tenzük. 3Tsüngrem ki yanglutsü asoshi itemi Solomon asameyang lir; metong, akhidang tasazük süklep agi, süklep roker, aser lenten süklep metsü. 4Aser ki tejaklen kilempokji metong nung ki lenten den süklep metsü; aser iba touchiji süklep noklang ka ser metsü. Telunglenji pai hon temeja agi yangloka yanglu. 5Aser ki tulubaji pai fir süng agi taren küma yanglu, koba pai hon temeja agi yangloka yanglu, aser iba manung asangdong aser merangsen yanglu. 6Tobur ajungtsü asoshi pai kiji senti lung agi azüdaktsü; aser honji Parvaim hon liasü, 7Pai ano kiji, sanen, tzüin, iba jaratem, aser iba kishitem, hon agi yangloka yanglu, aser jaratem manung cherubim yanglu.

8  Aser pai temeshitiba ki yanglu; aser iba metongji ki lenten den sütepa, süklep metsü, aser lentenji süklep metsü yanglu; aser pai aji hon angdong seret semerer ozükba noklang trok tashi agi yangloka yanglu. 9Aser kojal touzükbaji hon shekel tenem liasü. Aser pai taktang temabaji hon yangloka yanglu.

10  Temeshitiba ki nungji pai cherubim noksa ana yanglu; aser pai itemji hon yangloka yanglu. 11Aser cherubim tashikangtemji süklep metsü talang liasü; cherub ka tashikangji süklep pungu, ki jara tonga liasü; aser tashikang kajia yamaji süklep pungu; cherub ka tashikangji tonga liasü. 12Aser cherub ka tashikangji süklep pungu, ki jaraji tonga; aser ano tanga tashikangjia süklep pungu cherub tashikang denji kongshitepa liasü. 13 Item cherubim tashikangtemji parnok sasa süklep metsü sarar liasü; aser parnoki pei tetsüng agi noktak, aser parnok tejak ki tsütsü shia liasü. 14 Aser pai teyindangba süji anüng sentsü, nakrema meremba aser azü sentsü, aser kümpa angsem agi yanglu, aser iba manungji cherubim yanglu.

Yongmenyin Tongshi Ana

(1 Ch. 7.15-22)

15Ano pai ki jakdangji tongshi ana süklep semer pungu touchi yanglu, aser temalen tamenok dak yokbaji ka ka shia nung süklep pungu. 16Aser tongshibang nungi pai merangsen azük ama enloktsü; aser pai jarem naro noklang ka yanglu, aser itemji merangsen nungji ketdaktsü. 17Aser pai tongshiji tenla ki jakdang ayu, ka tajichilen, aser ka tabelenlen; aser tajichilen aliba dangji tenüng Yakin, aser tabelen aliba tenüngji Boaz aja.

2 PUTIPUYANG 4

Tenlaki Asoshi Osettsüsettem

(1 Ch. 7.23-51)

1  Pai yongmenyin tenladak ka yanglu; süklep metsü talang, aser lenten nung süklep metsü lenten, aser touchi nung süklep ter, 2Ano pai yongmenyin Tzüyim ka menok aji tenari liasü, külen Tzüyim ka menok; ajia tenari liasü, külen bang nungi külen bang tashi süklep ter, aser touchi nung süklep pungu, meketlung nung süklep semer. 3Iba kübok meso mesüka noksa liasü, koba agi Tzüyim meketbanga süklep ter liasü. Meso mesük noksaji taren ana nung temenok dang menoksema yanglua liasü. 4Aji nashi pungchi terana manung noktak, asemi anüdoklentip shia, aser asemi anüolen shia, aser asemi anüolentip shia aser asemi anüdoklen shia; aser Tzüyimji parnok madak temalen; aser parnok tatembanglak ajakji Tzüyim telunglen shia liasü. 5Aser aji süngtsüng tekabu ka lema liasü, aser iba bangji marok bang mesüka yanglua liasü, labu naro ka mesüka; iba nungji mori tatakzük meyi metsür pezü sema liasü. 6 Pai ano sujong ter yanglu, aser pungu teka tajichilen, aser pungu tabelenlen iba nung shitoktsü atema ayu; tarongba tenla atema osettem parnoki iba nung shitok; saka Tzüyimjibo putirtem shitoktsü atema liasü.

7  Aser pai hon agi milendong ter temelaba amato yanglu, aser pai itemji tenla kidang ayu, pungu tajichilen aser pungu tabelenlen. 8 Pai ano langbang ter yanglu, aser itemji tenla kidang ayu, pungu tajichilen, pungu tabelenlen. Aser pai hon susa noklang ka yanglu. 9Ano pai putirtem atema kilempok, aser kilempok tuluji, aser kilempok asoshi kishitem yanglu, aser item kishitem yongmenyin yangloka yanglu. 10Aser pai tzüyimji tentsü anüdoklen ki tezülen ayu.

11Hurami potemji, aser tateptsü aser susatemji yanglu. Anungji Tsüngrem kidang Solomon chuba asoshi pai inyakba mapaji tatem atem; 12tongshi anaji, aser susatem, aser tongshibang nung aliba noksa anaji aser tongshibang noksa yokba nembangtsü temechiba ana; 13aser temechiba ana asoshiji jarem jang noklang pezü; temechiba shia nung jarem jang taren ana-na tongshibang nung aliba tongshibang noksa susa anaji nembangtsü asoshi. 14Pai ano tamentakdak yanglu, aser tamentakdak manung teshitokdak susatem yanglu; 15Tzüyim ka, aser iba teküboklen nashi ter-ana. 16Aser ano chipotem aser tateptsü, aser shi tushiba, aser Solomon asoshi aser Kibuba ki asoshi yongmenyin sentsüprang agi Hurami marok ausu ajak yanglu. 17Yordan lenten nung chubai itemji, Sukkot aser Zerada tsüngda nung ajongli nung mulua yanglu. 18Solomoni item oset jenti yanglu, anungji yongmenyin touzükjibo mebushitet.

19Anungji Kibuba kidang aliba oset ajak yanglu; hon agi yangluba tenladak, tenla kidang ayuba amtsük asoshi langbangtem, 20milendong aser yimsü ozüng amato, tenla kidang telungba madang arongtsü hon temeja agi yangluba milentemji; 21narotem, milentem, aser mi mijeprutem, temejatiba hon agi yangluba; 22misü enokbatem, susatem, liangmesen asoshi ausutem, misü, hon temeja agi; aser tenla ki asoshi tesembangtsütem temeshitiba taktangi ailen telungba kishitem asoshi aser tenlaki kishitem asoshi hon agi yanglu.

2 PUTIPUYANG 5

1  Yamai Kibuba ki asoshi mapa ajak Solomoni inyakba renem. Aser Solomoni tebu Dawidi meshiteta ayuba osettem benden, aser taribi, hon, aser Tsüngrem kidang chipo anpo ajak rizünga ayu.

Tenla Kidangi Ozüng Süngden Bener Aitba

(1 Ch. 8.1-11)

2Dawid yimti, koba Zion lir, iba nungi Kibuba temeshi süngden bener atutsü asoshi Israel tamburtem aser kidong tongtipur ajak, Israel nunger tebou semchirtem tanishirtem Solomoni atenshidaktsü. 3Israel ajak chuba dangi ita tenetbuba benjongi atenshi. 4Aser Israel tambur ajak aru, aser Levitemi temeshi süngdenji bena aru. 5Aser süki nung aliba temeshi süngden, sentep süki, aser temeshi chipo anpo ajak parnoki bener atu, itemji Levi putirtemi bener aru. 6Aser Solomon chuba aser pa dangi adenshia alir Israel telokti temeshi süngden madang san aser nashi tenla jenti tepsetbaji mezüngdangteti liasü. 7Anungji putirtemi Kibuba tezüngzüktepba temeshi süngdenji iba talidak, ki telungba temeshitiba taktang, cherubim tashikang küboki bener aru. 8Kechiyong cherubimi parnok tashikangtemji temeshi süngden alidak temalen parnok tashikang sara-a liasü, anungji cherubimi temeshi süngden aser süngra asoshi tenembangtsü ki yanglu. 9Aser süngratemji kanga talang asünung süngra tatemlenjibo tenla ki telungba madang temeshidak nungi ngua liasü, saka itemji kimalen nungi angutsü makok, aser tanü tashi itemji yangji lir. 10Temeshiba süngden nungji Kibubai Israel nüburtem Ijip nungi adokdang tezüngzüktepba yangluba koba Mosai Sinai tenem nung lungpak ana yanglu, iba dakji alaka tanga kecha maliasü.

Kibuba Sentsüwangshi

11Kodang putirtem temeshidak nungi adoka liasü; kechiyong dena alir putir ajak parnok sasa meshiteta liasü, aser parnok telemsa makai liasü; 12ano Levitem shirnok kentenertem liasü, parnok ajak, oda Asaf, Heman, Yehuthun, aser parnok chirtem, aser parnok adianutem, angsem sü sobur, laya aser tsürang kongki, tawaba kongki bener tenladak anüdoklen tatemlen noktak, aser parnok den putir noklang ka ser metsü jangzü apua liasü. 13Kodang jangzü apurtem aser kentenertem, Kibuba tenüngsang aser tepela sayuba nung ola ka dang ama liasü; aser kodang parnoki jangzü aser laya aser ken kongkitem agi parnok ola adokdaktsü, aser Kibuba tenüng sanga ashi, “Kechiyong pa tajung lir, kechiyong pa yimlibilem teti lir.” Idangji kiji, oda Kibuba kiji mepet agi asüng. 14Anungji mepet alibayong putirtemi tenzüktsü menoktaktet, kechiyong Kibuba sentsüwangshi agi Tsüngrem kiji asüng.

2 PUTIPUYANG 6

Solomoni Nüburtem Den Jembiba

(1 Ch. 8.12-21)

1Idangji Solomoni ashi, “Kibuba, nai tammang temelem nung alitsü ta shiogo. 2Saka ni ne nem talidak ki ka, aser na teti alitsü talidak ka yanglutsüogo.”

3Idangji chubai pa tejak meyipa Israel telokti moatsü, aser Israel telokti noktak. 4 Aser pai ashi, “Israel Tsüngrem Kibuba moajang, shibai pei tebang agi kübu Dawid dang jembi, aser pei teka agi atalokdakja ashi, 5‘Ijip lima nungi kü nübur anir adokba anogo nungi ki ka yanglutsü asoshi Israel kidong ajak nung, oda yangji kü tenüng alitsü ni yimti kecha meshimtet; mesüra kü nübur Israel madak tanishir asütsü nisung shinga meshimtet; 6saka ni kü tenüng lidaktsütsü Yirusalem shimtetogo; aser kü nübur Israel madak Dawid shimtetogo.’ 7Tang Israel Tsüngrem, Kibuba tenüng asoshi ki ka yanglutsütsü kübu Dawid mulung nung liasü. 8Saka Kibubai kübu Dawid dang ashi, Kü tenüng asoshi ki ka yanglutsü ne mulung nung aliba atemaji nai junga inyakogo, 9aji saka nai kiji meyanglutsü; saka ne shi aser azü nungi adokba ne jabasoi kü tenüng asoshi kiji yanglutsü. 10Aser Kibubai pai nangzükba oji atalokdaktsü, kechiyong kübu Dawid talidak nungi ni adoka lir, aser Kibubai nangzükba ama, Israel chuba menden nung amener, aser Israel Tsüngrem Kibuba tenüng asoshi kiji yangluogo. 11Aser yangji Kibuba tezüngzüktepba koba pai Israel chirtem den yanglu aji Temeshi Süngden nung yua lir.’ ”

Solomon Sarasadem

(1 Ch. 8.22-53)

12Israel telok ajak madang Kibuba tenladak madang pa noktak, aser pa teka songtok; 13kechiyong Solomoni süklep pungu talang, lenten süklep pungu, aser touchi süklep asem yongmenyin sabang ka yanglu, aser aji kilempok nung ayu; aser iba manung pa noktak. Idangji Israel sentepa alir ajak madang pai temokok agi apudak, aser pa teka anüngleni songtok, 14aser pai ashi, “Oh Kibuba, Israel Tsüngrem, kotak nung mesüra alima nung na mesük Tsüngrem mali; ne tenzükertem shirnoki pei mulungsentsü ajak agi ne madang jajar parnok dang tezüngzüktepba benshi aser mechioktetba temeim nai sayur. 15Nai ne tenzüker kübu Dawid dang nai kechi nangzük aji inyak; hau, nai ne bang agi jembir aser tanü ne ket agi aji ataloktsüogo. 16 Tang aji asünung, Oh Kibuba, Israel Tsüngrem, ne chirtemi pei lenmang nung nai kü madang jajaba ama kü ozüng nung kümdanga jajara, kü madang Israel chuba menden nung amentsü na kodanga nisung agi anünga malitsü, ta ne tenzüker Dawid kübu dang nai nangzükba benshiangma. 17Tang aji asü nung, Oh Kibuba, Israel Tsüngrem, ne tenzüker Dawid dang nai jembiba ne oji akangshidakjangma.”

18  “Saka atangjila alima nung nisung den Tsüngrem lidi ma? Ajiang, anüng aser tematiba anüngi na masar; ajangla iba ki koba ni yanglu koda tila ka dang lir! 19Aji saka Oh Kibuba kü Tsüngrem ne madang ne tenzükeri ayimtenba aser sarasademba dang anga-a, ne tenzüker sarasadem aser mepishiba dang anga-angma. 20 Oda iba ki tsütsülen ammang sangwa nai ne tenüng kolen ayutsü ta ashi, ilenji ne tenük lapokangma; angji iba talidak tsütsüji ne tenzükeri sarasademba nai angashitsü akoktsü. 21Aser ne tenzüker aser ne nübur Israeli iba talidak tsütsülen kodang sarasademdir, parnok dang angangma. Hau, nai ne talidak, koda kotak nungi angangma; aser kodang nai angashidir, tai tokangma.”

22“Nisung kati pei kiyonger anema temenen menara, aser pa azüngashidaktsütsüsa pa madak züngyazüngku yutsüra, aser iba kidang ne tenladak madangi pa adoka azüngashira; 23idangji taisang mapaji pai pei kolak manung lepa bendakja, aser ochibaji kümzüka pa temeshiba yari pa nem tajangzük agüja nai kotak nungi angashiang, aser inyakang aser ne tenzüker o bendangang.”

24“Ne nübur Israeli na anema temenen menaba yong parnok tsükchir madang tamakok ngura, kodang parnoki tanaben meyipdir, aser ne tenüng agizükdir, aser kodang sarasademdir aser mepishidir; 25idangji nai kotak nungi angashiang, aser ne nübur Israel temenen tokangma, aser nai parnok nem aser parnok tsürabur nem agütsüba limai parnok anir arungma.”

26“Kodang parnoki na anema temenen menaba yong anüng shibanga tzünglu marulir, parnoki iba talidak tsütsü sarasademra aser ne tenüng agizükra, aser parnok temenen nungi meyipra, nai parnok kodang timtem agi kangshidir; 27kodang ne lenmang tajung koba nung parnok jajatsü tim, aji parnok dang nai sayudir, idangji nai kotak nungi angashiangma, aser ne tenzükertem, ne nübur Israel temenen tokangma.”

28“Linük nung ayawara lira, tashitak wara, mopungra, tsünütsü tashitak, süngkusen, mesüra mesen lira; parnok yimti kar nung parnok tsükchirtemi makbangra; kechisa temerenshi mesüra kechisa shirangshiji lidir; 29nisung shia pei timtem tekangshi, aser pei tejashi meteta iba ki tsütsü pei teka mekanga, kechi sarasadem aser temepishiba nisung kari mesüra ne nübur Israel ajaki yokdir; 30idangji nai kotak ne talidak nungi angashiang aser tai tokang, aser nisung shia, shiba mulungjang nai meteta lir, pa pei lenmang yari agüjangma, kechiyong nai, oda nai dang, meimchir mulungjang metet; 31angji parnoki nai ozü tsürabur nem agütsüba lima nung kopiga lidir, parnoki ne lenmang nung jaja-a na tsübutsü.”

32“Yamaji kodang aener ka, shiba ne nübur Israel masü, kodang pai alima talang nungi, ne tenüng tulu aser ne teka tashi tulu, aser ne tepen songtoka aliba atema arudir; kodang parnok arudir aser iba ki tsütsü sarasademdir; 33idangji nai kotak ne talidak nungi angashiang, aser aener jagi kechi atema na jadir iba yari inyakang; angji alima nübur ajaki ne tenüng metettsü, aser na tsübutsü aser ne nübur Israeli metetba ama, ni yangluba iba ki ne tenüng agi ajar ta parnoki metettsü.”

34“Ne nübur parnok tsükchirtem anema tongbangi ora, koba lenmangi nai parnok yokdir, aser iba yimti koba nai shimtet, aser ki koba ne tenüng asoshi ni yanglu, parnoki ne dangi iba tsütsü sarasademra; 35idangji parnok sarasademba aser parnok temepishiba nai angang aser parnok asoshi inyakangma.”

36“Parnoki na anema temenen menara, kechiyong temenen memenaba nisung shinga mali aser nai parnok dang ain adoka aser tsükchir nem bendanga agüja, iba yongji alinük talangkati mesüra ana nung pur oa lira; 37aji saka koba li nung parnok pua ali, parnok sasa bilemtetra aser meyipra, aser parnok puoka aliba lima nung ne dangi temepishiba yoka, ‘Onoki temenen menaogo, onoki mashileni ao aser tamajung inyakogo’ ta shira; 38parnok tepuokdak linük koba nung parnok pua oa ali idakji temulungjang ajak agi aser parnok tanela ajak ne dangi meyipra, aser par linük koba nung parnok pur oa ali idakji temulungjang ajak agi aser parnok tanela ajak ne dangi meyipra, aser par linük tsütsü sarasademra, koba nai par tsürabur nem agütsü, aser yimti koba nai shimtet, aser ne tenüng asoshi ni yangluba ki tsütsülen sarasademra; 39idangji parnok sarasademba aser parnok temepishiba, nai kotak nungi, oda ne talidak nungi angashiangma, aser parnok asoshi tim mapa sota aser na anema temenen menaba ne nübur dang tai tokangma. 40Tang, Oh kü Tsüngrem, ni ne dang mepishir, idaki sarasademba dangi ne tenük lapokang, aser ne narong tenjang. 41Aser tang aramesoang, Oh Kibuba Tsüngrem, aser ne anisüngzükdaki oang, na aser ne tashi tulu Temeshi Süngden ne putirtem, Oh Kibuba Tsüngrem, tekümtet agi sobudakjang, aser ne temeshi puri na ajungba nung pelashishidakjang. 42Oh Kibuba Tsüngrem, nai mezütsüba tejak meyipa tuodaktsü! Ne tenzüker Dawid asoshi ne mechiokba temeim bilemtetangma.”

2 PUTIPUYANG 7

Tenla Ki Meshitetba

(1 Ch. 8.62-66)

1  Tang Solomon sarasadem atemdang, anüng nungi mi alua tarongba tenla aser tetepsetba tenlatemji meyokadok; aser Kibuba sentsüwangshi agi tenla ki asüng. 2Aser putirtemi Kibuba kidangi meitet, kechiaser Kibuba sentsüwangshi agi Kibuba kiji asüng. 3 Israel chir ajaki mi aludang repranga ali, aser parnok sasa parnok tejak atemleni mechioka alu, aser külem, aser Kibuba dang tepela sayua ashi, “Kechiyong pa tajung; kechiyong pa yimlibilem teti alir.”

4Idangji chuba aser nisung ajaki Kibuba madang tetepsetba tenla agütsü. 5Solomon chubai nashi pungchi meyi metsür-ana aser san meyi noklang ka ser metsü tepseta tenla agütsü. Yamaji chuba aser nisung ajaki Tsüngrem ki meshitet. 6Aser putirtemi parnok pei mapa nung noktak; Levitemia Kibuba nem tepela sayutsü asoshi Kibuba er kongkitem, koba ajanga Dawid chubai Kibuba nem tenüngsang agütsü; aji am, kechiyong pa yimlibilem teti alir, parnok mapa agi tenüngsang agütsü; parnok jakdang putirtemi jangzü apu; aser Israel ajaki noktak.

7 Kibuba ki jakdang tiyongbuba kilempokji Solomoni meshitet; kechiyong pai yangji tarongba tenla, aser yimjung tenla temo jagi tenla; kechiaser yongmenyin tenladak koba Solomoni yanglu aji agi tarongba tenla, aser chiyungtsü tenla, aser temoji mesemi liasü.

8Iba mapang nung Solomoni benjongji tenetnü ali, aser Israel ajak pa den telokti kanga tulu ka, Hamati aoba lenmang nungi Ijip ayongnu tashi liasü. 9Aser tinübuba nung parnok tatembang mungdang ka ali; kechiyong tenladak meshitetba anogo tenet, aser benjong anogo tenet parnoki amung, aser tatembang anogo nungji tatembang benjongji liasü. 10Aser ita tenetbuba anogo metsür-asembuba nung pai nisungtemji parnok ki bushia yok, aser Dawid dang, aser Solomon dang aser pa nübur Israel dang Kibuba ajungba asoshi, pelaseta aser temulungjang tepela agi sünga ao.

Solomon Dangi Tsüngrem Tanaben Adokba

(1 Ch. 9.1-9)

11Yamaji Solomoni Kibuba kiji aser chubar kiji renem. Kibuba ki nung aser pei ki nung Solomoni inyakba asameyangba ajak pai takok ngua inyak. 12Idangji Kibuba aonung Solomon dang adoka ashi, “Ni ne sarasadem angashiogo, aser talidak ya ni atema tepsetba tenla ki ka alitsü. 13Tzünglu marudaktsütsü ni anüng shibangadokra, mesüra ni süngku dang linük meyokadoktsü melara, mesüra kü nübur rongnung ni tashitak wara yokra; 14kü nübur shirnok kü tenüng agi ja-a, lir parnok sasa ajemaludi süra, aser sarasademra, aser kü tejak bushira, aser parnok lenmang tamajung nungi meyipra, idangji ni kotak nungi angashitsü, aser parnok temenen atoktsü, aser parnok lima anebtsütsü. 15Tang idaki sarasadem asüba dangi kü tenük yoktsü, aser kü tenarong atentsü. 16Kechiyong tang iba ki, kü tenüng yangji teti alitsü asoshi ni shimtet aser meshitet, aser kü tenük aser kü mulungjang teti yangji alitsü. 17Aser ne indangbo, nebu Dawidi inyakba ama nai kü madang jajadi süra, aser ne dang melaba ama ajak nai inyakdi süra, aser kü telatet ozüng aser kü o bendangbatem benshidi süra, 18 Idangji nebu Dawid den ni züngzüktepa, Israel nung yimsü asütsü nisung na asoshi kata meli-ibo malitsü, ta ashiba ama, ni ne yimli yanglutsü.”

19“Saka nenoki meyipa oadokra, aser kü telatet ozüng aser kü temelabatem koba ni nenok madang yutsü, aji toktsür tangar tsüngremtem tenzüka aser parnok külemdi süra; 20ajangla ni parnok nem agütsüba lima nungi tera dena ni parnok atsüdoktsü; aser iba ki koba kü tenüng asoshi ni meshiteta kümdaktsü, ni kü nükdang nungi endokadoktsü, aser nisung ajak rongnung aji ni tansütsü shin aser aji tatishitsü ka kümdaktsütsü. 21Aser iba ki, koba kanga talang lir, süisübonger nisung shiai süngmangtsü, aser ashitsü, ‘Kechiba Kibubai iba lima aser iba ki dak yamai inyak?’ 22Aser parnoki langzütsü, ‘Kechiaser parnoki pei tsürabur Tsüngrem, shibai parnok Ijip lima nungi anitet pa senzüka toktsü, aser tangar tsüngremtem dak sot aser parnok külem; aji asünung pai parnok madak timtem ajak ya arudaktsü.’”

2 PUTIPUYANG 8

Solomon Mapa Balala

(1 Ch. 9.10-28)

1Küm metsü tatembang nung, koba nung Solomoni Kibuba ki aser par ki yanglu, 2Hirami pa nem agüja aliba yimtitem Solomoni yanglushi, aser Israel nübur item nungji lidaktsü.

3Solomon Hamath-zobai ao aser aji agi. 4Arem nung pai Tadmor yanglu aser Hamath nung terizüngdak yimtitem pai yanglu. 5Pai ano Beth-horon yimbang aser yimlang yanglu, jara, süngkhüm, aser tartangtsü agi yimtitem atsütanga ayu, 6aser Balath, aser Solomoni yangluba terizüngdak yimti ajak aser pa talungtsütem asoshi yimti ajak, kor temeranger asoshi yimtitem, aser Yirusalem nung, aser Lebanon nung, aser pa yimli ajak nung kechisa Solomoni aginü aji yanglu. 7Het nunger, Amor nunger, Periz nunger, Hiv nunger, aser Yebus nunger anünga alirtem, shirnok Israel nunger masü, 8parnok sülen linük nung tokja aliba parnok chirtem, shirnok Israel chirtemi mesamatsü, parnok nungi Solomoni putisü ka agi, aser yamaji tanü tashi lir. 9Saka Israel chirtem nungibo Solomoni pa mapa asoshi kilir mekümdaktsü; saka parnok raratem, aser par arkotong rongnung tongti, aser par talungtsü aser pa kor temeranger madak yimsüsürtem liasü. 10Aser itemi Solomon chubar sosang tongtipur liasü, noklang ana ser tenem, parnoki nisungtem madak yimsü asü.

11Solomoni Farao jala Dawid yimti nungi pai la asoshi yangluba kidangi anir aru, kechiyong pai ashi, “Kübutsü Israel chuba Dawid kidang malitsü, kechiyong Kibuba temeshi süngden arua alidakjibo temeshi lir.”

12Idangji Solomoni Kibuba tenladak koba pai kilempok madang yanglu yangji tarongba tenla Kibuba nem agütsü; 13 anogo shia inyaktsü tenüngdaktsü amato, Mosai melaba ama amungnü, ita tasen, aser küm shia benjong asem, piyazü meinokba amtsük benjong, hapta benjong, aser tekülemdak süki benjong. 14Tebu Dawid yimsü ozüng amato, parnok mapa asoshi putirtem telemsa pai shimtet, aser anogo shia teinyaktsü tenüngdaktsü aliba ama, Levi putirtem madang tasangtsü aser tenzüktsü mapa asoshi, aser süngkhüm asoshi süngkhüm anükertem parnok telemsa nung; kechiyong Tsüngrem nisung Dawidi yamaji mela. 15Aser kechisarena indang aser terizüngbatem indang chubai kechi putirtem aser Levitem dang mela, iba nungi parnoki atsünga mao.

16 Kibuba ki kimung yangerba anogo nungi aji merenem tashi Solomon mapa ajak yamai renem. Yamaji Kibuba ki takok ngua renem.

17Idangji Edom linük nung, tzüyimküm nung Eziongeber aser Elothi Solomon ao. 18Aser Hirami pa dangi pa tenzükertem ajanga rongtem aser tzüyim indang metetba tenzükertem yok, aser Solomon tenzükertem den külemi parnok Ofiri ao, aser yang nungjagi hon seret semermer ozükba noklang pezü aser tenem bena aru aser Solomon chuba dangi aji bener aru.

2 PUTIPUYANG 9

Sheba Chubatsüri Semdangba

(1 Ch. 10.1-13)

1  Kodang Sheba chubatsüri Solomon nüngsang angashi, Yirusalem nung tasüngdangba tasak agi Solomon tendangtsü asoshi telok tulu anir, teronem menemba abenba uttem, aser hon jenti sentilung bener la aru; aser kodang la Solomon dangi aru, lai pa den la mulungjang nung aliba ajak jembitep. 2Aser Solomoni la tasüngdangba ajak la dang ashi; aser Solomoni la dang mashiba kecha miima mali asü. 3Kodang Sheba chubatsüri Solomon shisatsü, aser pai yanglua aliba ki, 4pa chiyungtsü langbang, par kilirtem amenba, par tenzükertem, aser parnok sobutsü; ano pa marok abenertem, aser parnok sobutsü; aser Kibuba kidangi koda pa atur aji angudang joko lai kecha tashitsü makai liasü.

5Lai chuba dang ashi, “Ozü lima nung ne mapatem aser ne shisatsü indang ni angashiba osang atangji liasü: 6aji saka ni parnok oji ni maru tashi, aser kü tenük agi mangu tashi ni mamang; aser ajiang, ne shisatsü uluba tesadanga kü dang meshi-i liasü; kechiyong ni angashiba nüngsang nungi na alema lir. 7Ne nüburtem tepelatsü, aser item ne tenzüker tepelatsü, shirnoki ne madang maneni noktaker, aser ne shisatsü angashir. 8Kibuba ne Tsüngrem temoatsü sang, shibai Kibuba ne Tsüngrem asoshi chuba asütsü, pa chuba menden nung na mendaktsütsü ne dak pela-a liasü, parnok teti asoshi yutsütsü, aji asünung pai pa parnok madak o bendangtsü aser ochi inyaktsü chuba kümdaktsü.” 9Lai chuba nem hon seret semermer ozükba noklang ka ser metsü, aser teronem menemtsü jenti, aser senti lung agütsü: ano Sheba chubatsüri Solomon chuba nem teronem menemba agütsüba amaji kecha nunga maliasü.

10Ano Hiram tenzükertem aser Solomon tenzükertem, shirnoki Ofir nungi hon bener aru, algum süng aser senti lungtem bener aru. 11Chubai algum süng agi Kibuba ki aser chubar ki asoshi taren küma jenjang yanglu, aser kentenertem asoshi tzürang kongki aser tawaba kongkitem yanglu; aser Yihuda lima nung akhidang ibala kecha mungudang. 12Solomon chubai Sheba chubatsür nem lai aginüba ajak, lai kechisa asüngdang, lai chuba dangi bener aruba dak alema agütsü. Anungji la meyip aser la tenzükertem lar limai meyipa shilang.

Solomon Rongsen Tulu

(1 Ch. 10.14-29; 2 Pu. 1.14-17)

13Tang küm ka nung Solomon dangi aruba hon seret semermer ozükba noklang trok ser roker-trok liasü; 14aji shishir aser shidi abenertemi bener aruba medeni liasü. Aser Arabia chuba ajaki, aser linük governortemi Solomon dangi hon aser taribi bener arutsü. 15Solomon chubai hon agi atsüngba jong tulu noklang ana yanglu; jong shia nung hon shekel noklang trok liasü. 16Pai hon agi atsüngba jong noklang asem yanglu; jong shia nung hon shekel noklang asem sem agi; aser chubai Lebanon arem ki nung itemji ayu. 17Chubai ano shidipu chuba menden tulu ka yanglu, aser aji hon temeja agi yangbang. 18Aji chuba menden nungji metenloka liasü, aser tip anatsülen teben atalokdak aser molusongzü anasa noktaka liasü. 19Aser jenjang trok manungji jenjang ka ka tatemlen shia nungji molusongzü terana noktaka liasü; aser kecha chuba yimli nung ibaji mesükabo maliasü. 20Aser Solomon chuba tajemba marok ajak hon liasü, aser Lebanon arem ki marok-enrok ajak hon temeja liasü. Solomon tendakbo taribiji kecha züngshia maliasü. 21Kechiyong chubaji Hiram tenzükertem den Tarshisi aoba rongtem liasü; küm asem shia khen Tarshis rongtem hon, taribi, shidipu, shingo aser juju ozü bener aru.

22Anungji rongsen aser shisatsü nung Solomon chuba alima chuba ajak dang temaba liasü. 23Aser alima chuba ajak Solomon madangi pa mulung nung Tsüngremi enoktsüba shisatsü angadangtsü bushia aru, 24aser parnok nisung shiai pei sempet, taribi marok, ausu, hon marok, süoshi, nok o nü, teronem menemtsü, kor, aser gado, küm shia paikaji angu. 25 Aser kor aser talungtsütem asoshi Solomon ki meyi pezü liasü, aser kor, temeranger meyi terana, parnokji pai talungtsü yimtitem nung aser Yirusalem nung chuba den lidaktsü. 26 Aser pai chuba ajak madak Eufrata nungi Filistia linük tashi, aser Ijip litsü tashi yimsü asü. 27Aser chubai Yirusalem nung taribiji lung ama, aser cedar süngji Shefela mungudong süng ama talubosa kümdaktsü. 28 Aser Solomon asoshi Ijip nungi aser linük ajak nungi kor bener aru.

Solomon Asüba

(1 Ch. 11.41-43)

29Tang Solomon mapa tanüngba tetenzük nungi tatem tashi, ainkar Nathan otsü nung, aser Shilo nunger Ahijai shinba nung, aser Nebat chir Yeroboam mapang tangur Iddo mangdang nung zülua melika ma? 30Solomoni Yirusalem nung Israel ajak madak küm lir chuba. 31Solomon tebu nunger den mejang, aser tebu Dawid yimti nung arem; aser par chir Rehoboami pa melen chuba.

2 PUTIPUYANG 10

Rehoboam Anema Noktakba

(1 Ch. 12.1-19)

1Rehoboam Shekemi ao, kechiyong Israel ajak pa chuba kümdaktsütsü Shekemi arua liasü. 2Kodang Nebat chir Yeroboami aji angashi, kechiyong pa Ijip nung Solomon chuba tsüngdang nungi ajagi jena oa liasü, Yeroboami Ijip nungi meyipa aru. 3Parnoki yok aser pa aja; aser Yeroboam aser Israel ajak aru, aser parnoki Rehoboam dang jembia ashi, 4“Nebui onok süngra taret kümdaktsü; tang aji asünung nebu mapa tasakji, aser onok madak pa süngra taretji tepungbaba kümdakjang, aser onoki na tenzükdi.” 5Aser pai parnok dang ashi, Anogo asem lir tanaben kü dangi arung aser nisungtemji senshi.

6Solomon taküm alidang pa madang noktakba tamburtem den Rehoboam chubai asüngdangtepa ashi, “Iba nübur nem telangzüba meyipa agütsütsü nenokia kechi tebilemba kü nem agütsür?” 7Aser parnoki pa dang ashi, “Nai iba nübur dang meima benshira aser parnok peladaktsüra aser parnok dang o tajung jembira, idangji teti parnok ne tenzükertem asütsü.” 8Saka tamburtemi pa nem agütsüba oji pai sentokadok, aser pa madang noktaker pa den yinteter asangurtem denang o lemtep. 9Aser pai parnok dang ashi, “Iba nübur nem telangzüba agütsütsü nenokia kechi tebilemba kü nem agütsür?” Parnoki kü dang, “Nebui onok dak benloktsüba süngra tepungpaba kümdakjang,” ta ashir. 10Aser pa den yinteter asangurtemi pa dang ashi, “Ne dang, nebui onok süngra taret kümdaktsüogo, saka nai aji onok nem tepungpaba kümdakjang, ta jembiba nisungtem dang nai yamai shiang, Kübu teperem dang nungi kü temeyong chanula temelemba lir. 11Aser tang kübui nenok dak süngra tasak apudaktsü süra, ni nenok nem süngra taliang apudaktsütsü; kübui tareptsü agi nenok merenshi, saka nibo nenok jepja agi merenshitsü.”

12Anungji asemnübuba nung arung, ta chubai ashiba ama Yeroboam aser nisung ajak Rehoboam dangi tasemnübuba aru. 13Aser chubai parnok dang sashia langzü; aser Rehoboam chubai tamburtem o sentoktsü, 14aser asangurtem o amaji Rehoboam chubai parnok dang jembia ashi, “Kübui nenok süngra taret apudaktsü, saka ni iba dak tali enloktsütsü; kübui nenok tareptsü agi merenshi; saka nibo jebja agi merenshitsü.” 15Anungji chubai nisungtem dang manga; kechiyong Kibubai pei o atalokdaktsütsü atema Nebat chir Yeroboam dang Shilo nunger Ahija ket agi pai koba jembi aji Tsüngrem nungi adoktsüba liasü.

16  Kodang Israel ajaki chubai parnok dang manga ta ajitet, nisungtemi langzüa ashi, “Dawid dak onok kechi shilem aka? Yesse chir dak onok senmang maka; nisung shia pei süki bushiang; tang na Dawid, pei ki reprangang.” Anungji Israel ajak pei süki bushia senshi. 17Saka Yihuda nung aliba Israel chirtem asoshibo, parnok madak Rehoboam chuba. 18Idangji Rehoboam chubai mapa anishir Hadoram yok; aser Israel chirtemi lung agi aon nung pa asü. Aser Rehoboam chubai Yirusalemi ajentsü, pei talungtsüi atutsü ilunga ao. 19Anungji Israeli tanü tashi Dawid kidong anema apusoa aru.

2 PUTIPUYANG 11

Shemaiai Shinba

(1 Ch. 12.21-24)

1Kodang Rehoboam Yirusalemi aru, pai Yihuda aser Benjamin kidongtem, meyi noklang ka ser tir teshimtet nisung, temerangertem, yimliji tanaben Rehoboam dangi bener arutsü; Israel anema raratsü, jaten. 2Saka Kibuba O Tsüngrem nisung Shemaia dangi arua ashi, 3Solomon chir Rehoboam Yihuda chuba, aser Yihuda nung Israel aser Benjamin ajak dang jembia shiang, 4“Yamai Kibubai ashir, Nenok matutsü, mesüra nenok adianu den meraratsü; nisung shia pei kidangi meyipang; kechiyong iba mapa ni nungi lir.” Anungji parnoki Kibuba oji anga, aser Yeroboam anema aotsü aliba nungi meyip.

Rehoboami Yimti Yangluba

5Rehoboam Yirusalem nung ali, aser Yihuda nung tekümzüktsü asoshi yimtitem yanglu. 6Pai Bethlehem, Etam, aser Tekoa yanglu, 7aser Beth-zur, Soko, Adullam, 8Gath, Maresha, Zif, 9Adoraim, Lakhis, Azeka, 10Zora, Aijalon, aser Hebron ya Yihuda nung aser Benjamin nung tekümzüktsü yangluba yimtitem lir. 11Aser pai mitsatemji tashi ita yanglu, aser tanishirtem yangji toktsü, aser chiyungtsü rizüngdak, totzü, aser yi ayu. 12Aser yimti ajak nung pai jong aser nü ayu, aser parnok kanga tashi ita kümdaktsü. Anungji Yihuda aser Benjamin pa meyong liasü.

13Israel ajak nung alir putirtem aser Levitem parnok talidak ajak nungi pa dangi ao. 14Kechiyong Levitemi parnok chiyimdak lima aser parnok akabatem toktsü, aser Yihuda aser Yirusalemi aru: kechiyong Yeroboam aser par chirtemi, oda parnoki Kibuba asoshi putir mapa meinyaktsüla ta aridokadok: 15 aser pai tenem tekümlemdak asoshi, aser san tepung süngyanglu, aser pai yangluba nashi chanutem asoshi putirtem shimtet. 16Shirnoki pei mulungjang nung Kibuba Israel Tsüngrem bushitsü mulungtet, parnok Israel kidong ajak nungi Yirusalemi Kibuba, parnok tsürabur Tsüngrem dangi tenlatsü aru. 17Parnoki Yihuda yimli tashi ita kümdaktsü, aser küm asem asoshi Solomon chir Rehoboam tekümzük nung lidaktsü, kechiaser parnoki küm asem Dawid aser Solomon lenmang nung jaja.

Rehoboam Kibong Akümba

18Rehoboami Dawid chir Yerimot jala Mahalat kibutsü asütsü agi, shiba tetsü Yesse semchir Eliab jala Abihail liasü. 19Lai pa nem jabasotem sotsü; Yeus, Shemaria, aser Zaham. 20La sülenbo pai Absalom jala Maaka agi; lai pa nem Abija, Attai, Ziza, aser Shelomit sotsü. 21Rehoboami pa kinungtsü aser tezüngatsü ajak dang alia Absalom jala Maaka meim. Pai kinungtsü terti aser tezüngatsü roker agi, aser jabaso metsür ti aser jala roker liasü. 22Rebohoami pa adianu rongnung Maaka chir Abija tanishir tongtiba shimtet, kechiaser pai pa chuba kümdaktsütsü bilema liasü. 23Aser pai shisa ka-a benshi, aser Yihuda aser Benjamin linük ajak nung, mitsa yangluba yimti ajak nung par jabasotem lemsa-a toktsü; aser pai parnok nem chiyungtsü teperi agütsü, aser parnok asoshi kibutsütem agütsü.

2 PUTIPUYANG 12

Ijipi Yihuda Amakba

(1 Ch. 14.25-28)

1Kodang Rehoboam yimli akanga aser tashi ita aküm, pai Kibuba ozüng sentokadok, aser pa den Yihuda ajak dena liasü. 2Aser Rehoboam chuba küm pungububa nung, parnoki Kibuba dang temulung malem nung, Ijip chuba Shishak Yirusalem anema, 3talungtsü noklang terana aser kor temeranger meyi roker atu. Aser pa den arurtem Ijip nungi Libya, Sukkim, aser Ethiopia nunger mezüngdangteti liasü. 4Pai Yihuda mitsa aliba yimtitem agi aser Yirusalem tonga aru. 5Idangji ainkar Shemaia Rehoboam dangi aser Yihuda tamarenertem dangi aru, Parnok Yirusalem nung Shishak anema sentepa liasü, aser parnok dang ashi, “Yamai Kibubai ashir, Nenoki ni toktsü, anungji ni nenok Shishak ket nung toktsü.” 6Idangji Israel tamarenertem aser chubai parnok sasa ajemalua aküm aser ashi, “Kibuba shitak lir.” 7Kodang Kibubai parnok sasa ajemalu ta angu, Kibuba O Shemaia dangi aru; “Parnoki pei sasa ajemaluogo; ni parnok mesamatsütsü, saka ni parnok nem tekümzük kar melatsü, aser Yirusalem madak Shishak ket agi kü terasaba memeküploktsütsü, 8aji saka parnok pa tenzükertem asütsü, angji parnoki kü mapa aser alima yimlitem mapa metettsü.”

9  Anungji Ijip chuba Shishak Yirusalem anema atu; pai Kibuba kidang terizüngbatem aser chubar ki rongsen bener oadok; pai kechisarena ajak bener oadok. Pai ano Solomoni yangluba jongtem bener oadok. 10Aser Rehoboam chubai item melena yongmenyin jongtem yanglu, aser itemji chubar ki kishi anüker bangdakpur ket nung agütsü. 11Aser kwiben chubaji Kibuba kidangi odir, tanüker jagi itemji arua bener oli, aser meyipa tanüker taktang jagi bener aruli asü. 12Kodang pai pa sasa ajemalua aküm, Kibuba terasabai, oda pa meshimeshiabo mesamatsü aser Yihuda nung tia tajungba liasü.

Rehoboam Asüba

13Anungji Rehoboam chubai pa sasa Yirusalem nung akangshi aser chuba Rehoboam pai chubatsü tenzükdang küm lir ka liasü, aser pai Yirusalem nung küm tertenet chuba; iba yimti Kibubai Israel kidong ajak nungi pa tenüng yangji ayutsü shimteta liasü. Tetsü tenüng Naama, Ammontsür liasü. 14Aser pai tamajung inyak, kechiyong pai Kibuba bushitsü pa mulungi mait.

15Tang Rehoboam mapa tetenzük nungi tatem tashi, itemji ainkar Shemaia aser Iddo ainkar putipuyang kaket nung zülua mali no? Yeroboam aser Rehoboam tsüngda nung rara maneni liasü. 16Aser Rehoboam pa tsürabur den mejang aser Dawid yimti nung arem; aser par jabaso Abija pa melen chuba.

2 PUTIPUYANG 13

Abijai Yeroboam Den Raraba

(1 Ch. 15.1-8)

1Yeroboam chuba küm ter-ti buba nung Abijai Yihuda nung chubatsü tenzük. 2Pai Yirusalem nung küm asem tashi chuba. Tetsü tenüng Mikaia, Gibea nunger Uriel jala liasü. 3Tang Abija aser Yeroboam tsüngda nung rara liasü. Abijai tasü tait arüshir telok anir tongbangi ao; teshimtet nübu meyi noklang pezü; aser Yeroboami tashi tulu temeranger meyi noklang ti anir pa anema tongbang noktak. 4Idangji Efraim tenem lima nung aliba Zemaraim tenem nung Abija noktak, aser ashi, “Kü dang angang, Oh Yeroboam aser Israel ajak! 5Israel Kibuba Tsüngremi Israel madak chuba mapaji teti asoshi Dawid nem aser par chirtem nem tezüngzüktepba metsü, ka agütsü ta nenoki metettsü tim masü no? 6Aji saka Dawid chir Solomon tenzüker Nebat chir Yeroboami pei kibur anema noktak aser bangdak anema apuso; 7aser samesa nisung teseplep kari pa meketa sentep aser Solomon chir shisa agi meperiba Rehoboam anema apuso aser pai parnok anema menokdaktet.”

8“Tang nenoki Dawid chir ket nung Kibuba yimli anema noktaktsü bilemer, kechiaser nenok telok tulu aser nenok nem Yeroboami hon nashi süngyanglu yanglutsüba nenok den lir. 9Nenoki Kibuba putirtem, Aron chirtem, aser Levitem aridok aser tangar lima nübur mesüka nenok asoshi putirtem mayu no? Shibaisa nashi pungtu chanu ka mesüra san tepung tenet bener pei sasa bendanga agütsütsü arur kecha tsüngrem masü parnok putir ka makümer no? 10Saka onok asoshibo, Kibubaji onok Tsüngrem lir, aser onoki pa metoktsü; onokbo Aron chirtemi aser Levitemi putir mapa agi Kibuba dang tenzüker; 11aser parnoki anepdang aser aonung shia tarongba tenla aser teronem tanang aronger, aser langbang temerük nung amtsük nangtena ayur, aser hon milendong nung milentemji aonung shia aronger, kechiaser Kibuba onok Tsüngremi melaba onoki benshir; saka nenokibo pa toktsü. 12Ajiang, onok kolak nung onok den Tsüngrem lir, aser nenok anema tongbang jazüktsü putirtemi tongbang jangzü aputsü bena lir. Oh Israel chirtem, Kibuba ne tsürabur Tsüngrem anema terara; kechiyong nenoki makoktsü.”

13Saka parnok madak tesülen nungi meketa Yeroboami arü amentsü yok; yamaji pa temeranger telok Yihuda tejaklen liasü, aser arümenertem parnok sülen liasü. 14Kodang Yihudai reprang, ajiang, tongbangji parnok jakdanga tesülena liasü; aser parnoki Kibuba dang ayimten, aser putirtemi jangzü apu. 15Idangji Yihuda nisungtemi tongbang washi. Kodang Yihuda nisungtemi washi, Tsüngremi Abija aser Yihuda madang Yeroboam aser Israel ajak tamakok ngudaktsü. 16Israel nunger Yihuda jakdang jena ao, aser Tsüngremi parnok ket nung parnok agütsü. 17Abija aser par nisungtemi parnok jenti tepset; anungji Israel laoa tepsetba teshimtet meyi noklang pungu. 18Yamaji Israel nunger iba mapang nung arakmok, aser Yihuda nisungtemi akok, kechiaser parnoki Kibuba par tsürabur Tsüngrem dak tamang ayu. 19Aser Abijai Yeroboam aria ao, aser pa nungi yimtitem agi, Bethel iba yimtitem dena aser Yeshana iba yimtitem dena, aser Efraim iba yimtitem dena. 20Abija anogo nung Yeroboami pei tashi meyipa mangu; aser Kibubai pa dak azük, aser pa asü. 21Saka Abija tashi tuluba aküm. Aser pai kinungtsü terpezü agi, aser jabaso metsür ana aser jala tertrok liasü. 22Tanüngba Abija mapa, pa jakla aser pai jembizükba, Iddo ainkar otsü nung zülua lir.

2 PUTIPUYANG 14

Asa Yimsüsüba

(1 Ch. 15.9-15)

1Anungji Abija tebu nunger den mejang, aser parnoki Dawid yimti nung pa arem, aser par chir Asa-i pa melen chuba; pa tendak linük sünep sünepa küm ter liasü. 2Aser Asai Kibuba pa Tsüngrem nükdang koba tajung aser shitak aji inyak; 3kechiyong pai bendanger tenladak aser tenem tekümlemdak agien, aser temeshi tongshitem raksatsü, aser Asherim ajemzüka yok; 4aser Kibuba par tsürabur Tsüngrem bushitsü, aser ozüng aser temelaba inyaktsü mela. 5Ano Yihuda yimti ajak nungi pai tenem tekülemdak aser anü noksatem bener oadok; aser pa kübok yimliji anisüngzük liasü. 6Aser pai Yihuda nung mitsa yimtitem yanglu; kechiyong linükji süngjema liasü, aser item küm nung pa rara makai liasü; kechiaser Kibubai pa nem anisüngzük agütsü. 7Kechiyong pai Yihuda dang ashi, “Asenoki item yimti yangludi, aser itemji jara aser mitsabang, süngkhüm aser tarütangtsü agi meketbangdi; linükji ano asen meyong, kechiaser asenoki Kibuba asen Tsüngrem bushi; asenoki pa bushi aser pai ajaklen asen nem anisüngzük agütsü.” Anungji parnoki yanglu aser azükaru. 8Aser Asa jongkok aser nü abener arishir telok ka liasü, Yihuda nungi meyi noklang asem; aser Benjamin nungi jong aser lijak abener, meyi noklang ana ser tir; item ajak tasü tait tashi tulu nisung liasü.

Ethiopia Den Raraba

9Parnok anema Ethiopia nunger Zera arishir telok meyi noklang ka aser talungtsü noklang asem adok, aser Maresha tashi aru. 10Idangji pa den ajuruteptsü Asa ao, aser parnoki Maresha aser Zefatha lenten nung tongbang tareni noktak. 11Asai Kibuba pa Tsüngrem dang ayimtena ashi, “Kibuba, na alema, tashi tulu aser tashi maiter tsüngda nung shinga mali; onok yariang. Oh Kibuba ozü Tsüngrem, kechiyong onoki ne dak temulung alemer, aser ne tenüng nung iba telok anema onok arua lir, Oh Kibuba, na ozü Tsüngrem, na anema item nisungi takok tungudaktsü.” 12Anungji Kibubai Asa aser Yihuda madang Ethiopia nunger akok; aser Ethiopia nunger jena ao. 13Asa aser pa den alirtemi parnok Gerar tashi aria ao; aser Ethiopia nunger kata taküm anünga mali tashi lao; kechiyong Kibuba madang aser pa temeranger telok madang parnok sama; aser parnoki temakzükba oset jenti bener ao. 14Aser Gerar meketa yimti ajak parnoki amak; kechiyong Kibuba tsübuba parnok madaki aru; aser parnoki yimti ajak amak; kechiyong temakzükba jenti item dak liasü. 15Parnoki kiset shiruru anüker sükitema amak, aser san jenti aser ut bener oadok, aser Yirusalemi shilang.

2 PUTIPUYANG 15

Asa Mapatem

1Tsüngrem tanela Oded chir Azaria dangi aru; aser pai Asa den ajuruteptsü ao, 2aser pa dang ashi, “Nenoki kü dang angang, Asa, aser Yihuda aser Benjamin ajak; nenok Kibuba den aliba mapang pa nenok den lir; aser nenoki pa bushira, nenoki pa angutsü; saka nenoki pa sentokra pai nenok sentoktsü. 3Tang mapang talang ka atangji Tsüngrem makai Israel liasü, aser sayutsü putir makai, aser ozüng makai liasü; 4saka kodang parnok timtem nung parnoki Kibuba Israel Tsüngrem dangi meyip aser pa bushi, parnoki pa angu. 5Item mapang nung shiba odir mesüra shiba arudir pa tesünep maliasü, kechiyong alinük alir ajak makmakshishi tulu agi timtemdaktsü. 6Parnok anüka raksa, kini kin anema aser yimti-i yimti anema; kechiyong Tsüngremi parnok timtemtsü tapu tapu agi kangshi, 7saka nenok tasü ita liang, aser nenok teka tashi meiti teli; kechiyong nenok mapa ajangzüktsütsü.”

8Kodang Asai item o aser Oded ainkari shinba angashi, pa tasü ita aküm, aser Yihuda aser Benjamin lima ajak nungi, aser pai agiba Efraim tenem lima yimtitem nungi tesempatsütem endok; aser pai Kibuba kilempok madang aliba Kibuba tenladak tasen kümdaktsü. 9Aser Yihuda aser Benjamin ajak, aser Manase aser Simeon nungi parnok den semloka alirtem pai sentepdaktsü; kechiyong kodang parnoki Kibuba Tsüngrem pa den lir ta ajitet Israel nungi nisung jenti pa dak semlok. 10Asa chubaba küm terpungububa ita asembuba nung parnok Yirusalem nung atenshi. 11Parnoki temakzükba bener aruba nungi parnoki iba anogo nungji Kibuba nem nashi noklang tenet aser san meyi tenet agi tenla. 12Aser Kibuba par tsürabur Tsüngrem, parnok mulungjang ajak agi aser parnok tanela ajak agi bushitsü züngzüktep; 13aser shibaisa Kibuba Israel Tsüngrem mebushilir, asangur chanu süaka tambur süaka, tebur süaka tetsür süaka südaktsütsü. 14Aser ola tulu agi, aser washiba agi, aser jangzü aser kornet jangzü apua parnoki Kibuba dang azüngashi. 15Aser Yihuda ajaki tezüngzüktepba nungji pelatep; kechiyong parnoki parnok mulungjang ajak agi azüngashi, aser parnok tejangraba ajak agi pa bushi; aser parnoki pa angu; aser Kibubai parnok nem parnok meketa anisüngzük agütsü.

16Ano Asa chuba tetsü Maaka, chubatsür mesüdaktsütsü asoshi pai agien, kechiaser lai tesempatsü noksa Ashera asoshi yanglu; aser Asai la noksaji lepzüka yok, aser ibaji auyi kümdaktsü, aser aji Kidron ayongnu nung arong. 17Saka tenem tekümlemdakbo Israel nungi bener mao; aji saka Asa mulungjang pa anogo piyong shitak liasü. 18Tsüngrem kidangi tebui bendanga agütsüba oset, aser pai pei sasa bendanga agütsüba oset, taribi, hon aser marok-ausutem pai bener aru. 19Aser joko Asa chubaba küm semer-pungububa küm tashibo rara maliasü.

2 PUTIPUYANG 16

Israel Den Timtem

(1 Ch. 15.17-22)

1Asa chubaba küm semer trokbuba nung, Israel chuba Baashai Yihuda anema atu, aser Yihuda chuba Asa dangi shinga metugutsü mesüra maitdaktsütsü asoshi pai Rama yanglu. 2Idangji Asai Kibuba kidang nungi aser chubar kidang terizüngdak nungi taribi aser hon agi, aser itemji Damaska nung aliba Siria chuba Ben-hadad dangi yoka ashi, 3“Kübu o nebu na tsüngda nung aliba ama ana tsüngda nunga lungjema lidi; ajiang, ni ne dangi taribi aser hon yokdagi; oang, Israel chuba Baasha den nenok telungjem raksa-ang, angji pai kü dang nungi atsünga aotsü.” 4Aser Benhadadi Asa dang anga, aser Israel yimtitem anema pai arüshir telok madak walunirtem yok, aser parnoki Ijon, Dan, Abelmai, aser Naftali terizüngdak yimti ajak atsüngtet. 5Kodang Baashai aji angashi, pai Rama yangluba nungi anen, aser pa mapa anendaktsü. 6Idangji Asa chubai Yihuda ajak agi, aser Baashai ki yangluya aliba Rama lung aser süng parnoki bener ao, aser item jagi pai Geba aser Mizpa yanglu.

Ainkar Hanani

7Iba mapang nung Asa chuba dangi ainkar Hanani arua pa dang ashi, “Nai Kibuba ne Tsüngrem dak temulung melemi Siria chuba dak temulung alembayong, na nungi Siria temeranger telok jena odaktsüogo. 8Ethiopia nunger aser Libya nunger talungtsütem aser kor temerangertem arüshir telok jenti masü no? Aji saka nai Kibuba dak temulung alem nung, pai parnok ne ket nung agütsü. 9Kechiyong shirnok mulungjang Kibuba tsütsü shitak lir parnok atema pa tashi sayutsü alima ajonga madak pa tenük oli-aruli ta senzür. Iba nung nai tamashi inyakogo; kechiyong tang nungibo na rara alitsü.” 10Idangji Asai ainkar dang ain adok, aser pa tepuokdak ayu, kechiyong iba yongji pai pa den mit adoka liasü. Aser iba den külemi Asai nisung kar taochi makai kangshi.

Asa Tashitak Aser Asüba

(1 Ch. 15.23-24)

11Asa mapa, tetenzük nungi tatem tashi, Yihuda aser Israel chubatem kaket nung zülua lir. 12Pa chubaba küm semer tukububa nung Asa tetsüng nung tashitak atu, aser pa tashitakji kanga mejungi aküm; aji saka pa tashitak asoshi pai Kibuba mebushi, saka mozü shitetertem ang bushi. 13Aser pa chubaba küm lirka buba nung süa, pa tsürabur den mejang. 14Parnoki pa Dawid yimti nung, pa sasa angenteta aliba leper nung arem, aser teronem tanang aser tapu tapu teronem menemtsü mozümora meteter tetangshiri renemba agi süngdaktsüba yipten pai ayu; aser pa tushia parnoki mi tulu apu.

2 PUTIPUYANG 17

Yehoshafat Yimsüsüba

1Par chir Yehoshafati pa melen chuba, aser Israel anema tashi itshi. 2Aser mitsa yangluba Yihuda yimti ajak nung pai temeranger ayu, aser Yihuda lima nung, aser Efraim yimtitem koba tebu Asai agi, yangji temeranger tanüker telok ayu. 3Aser Kibuba Yehoshafat den liasü, kechiaser pai tebu Dawid mezüng jajaba lenmang nung jaja, aser Baal tsüngrem mebushi; 4saka tebu Tsüngrem bushi, aser pa temelaba nung jaja, aser Israeli inyakba sülen mao. 5Anungji pa ket nung Kibubai yimli akangdaktsü; aser Yihuda ajaki Yehoshafat dangi sempet bener aru aser pa rongsen aser khonang jenti liasü. 6Aser Kibuba lenmang nung pa mulungjang tasü ita liasü; aser talisa Yihuda nungi pai tenem tekümlemdak aser Asherim agiendaktsü.

7Ano pa chubaba kümsembuba nung tanishirtem, Benhail,Obadia, Zekaria, Nethanel, aser Mekaia Yihuda yimtitem nung tesayur mapa atema yok, 8aser parnok den Levi nunger Shemaia, Nethanea, Zebadia, Ashael, Shemiramot, Yehonathan, Adonija, Tobija aser Tob-adonija; item Levi nunger den Elishama aser Yehoram putirtem yok. 9Aser parnoki Kibuba ozüng kaket nungi Yihuda yimtitem ajaklen sayu, parnoki Yihuda yimti ajak sema nüburtem dang sayu.

Yehoshafat Uluba

10Yihuda meketa aliba yimli ajak madak Kibuba tsübuba liasü, anungji Yehoshafat anema parnoki merara. 11Aser Filistia nunger karibo Yehoshafat nem sempet bener arutsü, aser putisü asoshi taribi agütsü; aser Arabia nungeria pa nem san tepung meyi tenet ser noklang tenet aser nabong tepung meyi tenet ser noklang tenet bener aru. 12Yehoshafat kanga ulua aküm; aser pai Yihuda nung lungki aser terizüngdak yimtitem ulura yanglu. 13Aser Yihuda yimtitem nung pa mapa jenti liasü, aser Yirusalem nung tashi tulu sarirtem liasü. 14Aser tebu semchirtem züngdangba yamai liasü; meyirijang madak tanishir Yihuda; Adna arkotong, aser pa den tashi tulu rarar nisung meyi noklang asem; 15pa den atongbaji Yehohanan, arkotong, aser pa den meyi noklang ana ser tir; 16aser pa den atongba Amasia, Zikhri chir, shibai pei sasa Kibuba nem mulungbena agütsü; aser pa den temeranger nisung meyi noklang ana; 17Benjamin nungi Eliadas temeranger nisung ka, pa den lijak aser jong abener meyi noklang ana; 18aser pa den atongba Yehozabad den meyi noklang ka ser tir raratsü terenem. 19Mitsa yangluba yimtitem nung Yihuda ajak nung chubai toktsüba dak alaka itemi chubar mapa nung liasü.

2 PUTIPUYANG 18

Ainkar Mikaiai Tamakok Indang Shinba

(1 Ch. 22.1-28)

1Tang Yehoshafat rongsen aser tetushi jenti liasü; aser pai Ahab den lungjem. 2Aser küm ishika lir pa Ahab dangi Samariai alu. Aser Ahabi san aser nashi jenti pa asoshi, aser pa den alir asoshi tepset, aser pa den Ramoth-Gilead anema atutsü ajongmeso. 3Aser Israel chubai Yihuda chuba Yehoshafat dang ashi, “Na kü den Ramoth-Gileadi atutsü asü?” Pai pa dang langzü, “Ni na ama dang, aser kü nübur ne nübur ama dang lir; aser onok ne den rara nung adentsü.”

4Yehoshafati Israel chuba dang ashi, “Ni mepishir, tanü Kibuba O asoshi asüngdangang.” 5Idangji Israel chubai putirtem sentepdaktsü, nisung noklang pezü liasü, aser pai parnok dang ashi, “Onok Ramoth-Gilead tongbangi atutsü asü mesüra ni atasatsü?” Aser parnoki ashi, “Tuang, kechiyong Tsüngremi chuba ket nung aji agütsütsü.” 6Saka Yehoshafati ashi, “Kibuba ainkar tanga ka asenoki asüngdangtsü kata mali no?” 7Israel chubai Yehoshafat dang ashi, “Kibuba dang asüngdangtsü asoshi ano nisung ka, Imla chir Mikaia lir; saka ni pa sempar, kechiyong pai kodanga kü indang tajung meshinür, saka teti tamajung dang shinür.” Yehoshafati ashi, “Chubai yamai teshima.” 8Idangji Israel chubai tanishir ka jar ashi, “Imla chir Mikaia yakta anir arung.” 9Tang Israel chuba aser Yehoshafat chuba, sobutsü sobur, chuba menden nung mena liasü; aser Samaria süngkhümi ailen motsüngnem nung parnok mena liasü; aser parnok madang ainkar ajaki shina liasü. 10Aser Kenaana chir Zedekiai pei sasa merang agi tezü yanglua ashi, “Yamai Kibubai ashir, Item yagi nenoki Siria nunger mesamatsü tashi nenoki nungtoktsü.” 11Aser ainkar ajaki yamaji shina ashi, “Ramoth-Gileadi tuang aser takok nguang; Kibubai aji chuba ket nung bendanga agütsütsü.”

12Mikaia ajai aoba osang abensangi ashi, “Ajiang, ainkar ajaki chuba asoshi o tajung kasa dang lir; ne o-a parnok o ama sang, aser ojung jembiang.” 13Saka Mikaiai ashi, “Kibuba taküm ali nungji, kü Tsüngremi kechi ashir, aji ni jembitsü.” 14Kodang pa chuba dangi aru, chubai pa dang ashi, “Mikaia, onok Ramoth-Gileadi rarai atutsü asü mesüra ni atasatsü?” Aser pai langzü, “Tuang aser takok nguang; parnok ne ket nung agütsütsü.” 15Saka chubai pa dang ashi, “Ni kwiben ne dang Kibuba tenüng nung atangji dang jembiang ta na azüngashia shidaktsütsü?” 16 Aser pai ashi, “Ni Israel ajak tenem nung sannüker mali ama prokshia nguogo; aser Kibubai ashi, ‘Itemi kibur mali, yimjung nung pei kidang ajak meyipa odakjang.’ ” 17Israel chubai Yehoshafat dang ashi, “Ni ne dang kü indang pai tamajung alema kecha tajung meshintsü ta meshika ma?” 18Aser Mikaiai ashi, “anungji KIBUBA O angang, ni Kibuba chuba menden nung mena, aser kotaker telok ajak pa tajichi aser tabelen noktaka nguogo; 19aser Kibubai ashi, ‘Shibai Israel chuba Ahab, pa Ramoth-Gilead nung tuagi laodaktsütsü asoshi mesüzüktsü.’ Aser kati ka dang ashi, aser tangar kati tanga ka dang ashi. 20Idangji tanela ka tejakleni arua Kibuba madang noktaka ashi, ‘Ni pa mesüzüktsü.’ Aser Kibubai pa dang ashi, ‘Kechi tasa agi?’ 21Aser pai ashi, ‘Ni aotsü, aser par ainkartem tebang ajak nung tiyazü tanela enoktsütsü.’ Aser pai ashi, ‘Nai pa mesüzüktsü, aser nai takok angutsü; oang aser yamaji inyakang.’ 22Anungji tang ajiang, Kibubai item ne ainkar tebang nung tiyazü tanela enoktsüogo; Kibubai ne indang tamajung jembiogo.” 23Idangji Kenaana chir Zedekia anasa aru aser Mikaia tenibung nung züka ashi, “Kibuba tanelai koba lenmangi kü dak nungi ne dangi jembitsü ao?” 24Mikaiai ashi, “Ajiang, ne sasa atsüka alitsü asoshi taktang telungbai aiba anogo nung nai angutsü.” 25Aser Israel chubai ashi, “Mikaia pua arung, aser yimti nung governor Amon dangi aser chuba chir Yoas dangi anir oang; 26aser shiang, yamai chubai ashir, ‘Iba nisung tepuokdak yuang, aser ni yimjung nung meyipa maru tashi, chi terara aser tzü terara agi mesüang.’” 27Mikaiai ashi, “Na yimjung nung meyipa arura Kibubai kü den mejembi. Aser pai ashi, Nenok nübur ajak angang.”

Ahab Asüba

(1 Ch. 22.29-40)

28Anungji Israel chuba aser Yihuda chuba Yehoshafat Ramoth-Gileadi atu. 29Aser Israel chubai Yehoshafat dang ashi, “Ni kü sasa miimshia tongbangi aitsü, saka nabo ne sobutsü sobuang.” Aser Israel chubai pa sasa miimshia sobutsü sobu; aser parnok tongbangi ao. 30Tang Siria chubai pa talungtsütem madak arkotongtem dang mela-a ashi, “Tila mesüra tulu den terara, saka Israel chuba den dang rara-ang.” 31Aser kodang talungtsü arkotongtemi Yehoshafat ngua parnoki ashi, “Ibai Israel chuba lir.” Anungji pa anema raratsü parnoki meyip, aser Yehoshafati ayimten, aser Kibubai pa yari, aser Tsüngremi parnok pa nungi aenshidaktsü, 32kechiyong kodang talungtsütem arkotongi aji Israel chuba masü ta metet, pa aria aoba nungi parnoki meyip. 33Saka nisung kati pei lijak züzüa ka atsüa aru aser Israel chuba dak tapu teloktep nung kaloktsü; anungji pai pa talungtsü anisang dang ashi, “Meyipang, aser tongbang nungi ni bener oang, kechiyong ni yiruogo.” 34Aser iba anogo tongbang sashia aküm, aser Israel chubai pa talungtsü nung tua mener Siria nunger tsütsü shir akpur meshi tashi ata-a ali; aser anü talui pa asü.

2 PUTIPUYANG 19

Ainkari Yehoshafat Arütsüba

1Yihuda chuba Yehoshafat Yirusalem nung par kidangi yimjung nung shilang. 2Aser ainkar Hanani chir Yehu pa lenji ao, aser Yehoshafat chuba dang ashi, “Nai tamajunger yaritsü, aser Kibuba sempar ang meimtsü no? Iba mapang asoshi Kibuba madang nungi ne madak terasaba arua lir. 3Aji saka ne dak tajung kar ni ngua lir, aji, nai linük nungi Ashera endoktsüogo, aser Tsüngrem bushitsü ne mulungjang agüja lir.”

Yehoshafat Yimli Asentenshiba

4Yehoshafat Yirusalem nung ali, aser pai Beersheba nungi tenem lima Efraim tashi nisungtem rongnung oli aruli ta senzüa, aser parnok tanaben par tsürabur Tsüngrem, Kibuba dangi anir aru. 5Aser atsübanga aliba Yihuda yimti ajak linük nung o bendangertem dang ashi, 6“Nenoki kechi inyaker shisadangang; kechiyong nisung asoshi masü, saka Kibuba asoshi nenoki o bendanger, aser pa nenok den o bendangba nung lir. 7Anungji tang Kibuba tsübuba nenok den liang; kümdangang, kechiyong asen Tsüngrem dak tai menaba, mesüra nisung jak reprangba, mesüra süpokrem agiba kecha mali.”

8Ano Yehoshafati Yirusalem nung Levi nunger aser putir aser Israel kidong tambur kar Kibuba asoshi aser mangatettep nung obendang agütsütsü shim. Aser Yirusalem nung arua parnok ali. 9Aser pai parnok dang mela-a ashi, “Yamai nenoki temulung ajak agi, temulung lemteta, aser Kibuba tsübuba nung inyaktsüla. 10Kodangsa nenok adianutem parnok yimli nung alirtem nungi azü tokshiba indang, ozüng mesüra temelaba indang, telatet ozüng mesüra tatakzük ozüng indang, nenok dangi rongronga arudir, oda Kibuba madang parnok tai memenatsü aser nenok madak aser parnok madak terasaba marutsü nenoki parnok dang tekümdangtsü sayuang; yamaji inyakang aser nenok tai memenatsü. 11Aser ajiang, Kibuba mapa ajak nung nenok madak puti-unger Amaria lir; aser Ishmael chir Zebadia, Yihuda kidong yimsüsür chubar mapa ajak nung ketdang lir; aser nenok jakdang ketdangpursa Levi nungeri tenzüktsü. Tasü ita inyakang, aser tajung pur den Kibuba liangma.”

2 PUTIPUYANG 20

Edom Den Raraba

1Iba sülen Moab nunger, Ammon nunger, aser parnok den Meun nunger, Yehoshafat anema tongbang rarai aru. 2Aser kar arua Yehoshafat dang ashi, “Na anema telok tulu ka tzüyim atena or Siria nungi arudar; aser ajiang, parnok Hazazon-tamar, aji Engedi, nung lir.” 3Aser Yehoshafati tsübu, aser pa sasa Kibuba bushitsü apuso; aser Yihuda ajonga nung lumitsü ayimoktsü. 4Aser Kibuba nungi teyari bushitsü asoshi Yihuda külemi sentep; oda Yihuda yimti ajak nungi parnoki Kibuba bushitsü aru.

Yehoshafat Sarasadem Aser Takokba

5Yihuda aser Yirusalem mungdang nung, Kibuba kidang, kilempok nung Yehoshafati noktak; 6aser ashi, “Oh Kibuba, ozü tsürabur Tsüngrem, kotak nung na Tsüngrem masü no? Aser kintem yimli ajak madak na yimsüsür masü no? Ne ket nung ain aser tashi lir, anungji shingai na anema menoktakteter. 7 Oh ozü Tsüngrem, iba linük alirtem ne nübur Israel madang aridoker ne tembar Abraham metsü nem teti asoshi agütsü masü no? 8Aser parnok yangji ali, aser ne tenüng asoshi iba nung temeshidak ka yanglua ashi, 9‘Onok madak lendong arura, nok, obendangba, tashitak wara, mesüra ayawara arura, onoki iba ki madang aser ne madang noktaktsü, kechiyong iba kidang ne tenüng lir, aser onok timtem nung ne dang ayimtentsü, aser nai angashitsü aser nai kümzüktsü.’ 10Aser tang Amon, Moab, Seir tenem nisungtem ajiang, shirnok Ijip nungi arudang nai Israel nem memakdaktsü aser parnoki paidok aser mesamatsü. 11Ajiang, nai onok nem senmangtsü agütsüba, ne meyong nungi onok aridoktsü arua onok nem parnoki ajangzüktsüdi asür. 12Oh ozü Tsüngrem, nai parnok madak o mebendangtsü no? Kechiyong onok anema aruba iba telok tulu anema onok tashi maka. Kechi inyaktsü onoki memetet, saka onok tenük ne madak lir.”

13Yihuda ajak Kibuba madang, parnok tilatem, kinungtsütem, aser parnok chirnur dena noktak. 14Idangji sentepa alir rongnung Zekaria chir Yahazeil, Asaf chirtem Levi nunger madaki Kibuba tanela aru. 15Aser pai ashi, “Angang, Yihuda aser Yirusalem alir ajak, aser na Yehoshafat chuba. Yamai Kibubai nenok dang ashir, nenok tetsübu, mesüra iba telok tulu asoshi temulung makai teli; kechiyong tongbangji nenok meyong masü, saka Kibuba meyong lir. 16Asüng nenoki parnok anema luang; ajiang, parnok Ziz leni atuba lenmangi arutsü, aser Yeruel arem anüdoklen lenten tatembang nung nenoki parnok angutsü. 17Iba tongbang nung nenoki raratsü tenüngdaktsü malitsü; pei noktakdak liang, marakzüi noktakang, aser nenok den Kibuba tekümzükji ajiang, Oh Yihuda aser Yirusalem; tetsübu, mesüra temulung makai teli; asüng parnok anema oang; kechiyong Kibuba nenok den lir.”

18Yehoshafati pei tejak alilen mechioka alu; aser Yihuda aser Yirusalem alir ajak Kibuba madang apudaka külem. 19Levi nunger, Kohat chirtem, Kora chirtemi ola tashi agi Kibuba Israel Tsüngrem tenüng asangtsü noktak.

20Parnok anepdang yakta shishi aser Tekoa aremi ao; aser parnok aodang Yehoshafat noktaka ashi, “Kü dang angang, Oh Yihuda aser Yirusalem alirtem; Kibuba nenok Tsüngrem dak amangang, yangji nenok kümzüktsü; pa ainkar dak amangang, yangji nenok takok ngudaktsütsü.” 21Aser pai nisungtem den o tongteper külen, temeranger telok jakdang, temeshi sobutsü sobur Kibuba dang ken atentsü aser tenüng sanga, “Kibuba nem tenüngsang agüjang, kechiyong pa yimlibilem teti alir,” ta parnok aodang ashitsü pai shimtet, 22aser kodang parnoki ken atentsü aser tenüng asangtsü tenzük, parnok anema aruya aliba Amon, Moab, aser Seir tenem chirtem anema Kibubai arü mena atadaktsü, angji parnok tongbang chirepdaktsü. 23Kechiyong Ammon aser Moab chirtemi Seir tenem alirtem anema noktak, parnok ajonga tepsettsü aser samatsütsü asoshi; aser kodang parnoki Seir alirtem temshia tatem kümdaktsütsü nisung shiai kati ka, katia ka samatsütsü yari.

24Kodang Yihuda arem mitsa jagi aru, parnoki telokti tsütsü reprang; aser ajiang, parnokji ali nung laoa aliba tasü mangtem liasü, kata jena mao. 25Kodang Yehoshafat aser par nisungtemi parnok nungi temakzükba rongsen agitsü aru, aser parnoki nashi jenti den osettem, süoshi aser senti osettem koba parnoki pei asoshi joko mebenmatsüsa benden; aser oset benden dang parnok asemnü tashi liasü; aser osettemji onsara liasü. 26Aser pezünübuba nung parnoki parnok sasa Beraka lenten nung sentep; kechiyong parnoki yangji Kibuba tushi; aji asünung iba linük dang tanü tashi Beraka lenten ta ajar. 27Idangji parnok Yirusalemi tanaben pelatepa aotsü, parnok jakdang Yehoshafat tamaser Yihuda aser Yirusalem nisung shia meyipa ao; kechiyong Kibubai parnok tsükchir madak parnok pelatepdaktsü. 28Aser parnok Yirusalemi Kibuba kidangi tawaba kongki, tzürang kongki aser jangzü bener aru. 29Aser kodang Israel tsükchirtem anema Kibubai rara ta angashi, alinük chuba yimli ajaki Tsüngrem tsübu. 30Anungji Yehoshafat yimlibo yimjung nung liasü; kechiyong pa meketa Tsüngremi yimjung agütsü.

Yehoshafat Yimsüsüba Tatembang

(1 Ch. 22.41-50)

31Yehoshafati Yihuda nung chuba; aser pa chubatsü tenzükdang küm semer pungu liasü; aser Yirusalem nung pai küm metsür pungu chuba; aser tetsü tenüng Azuba, Shilhi jala liasü. 32Aser pai tebu Asai jajaba lenmang nung jaja, aser Kibuba nükdang kechi tajung aji inyaka iba nungi pila-a mao. 33Aji saka tenem tekümlemdakjibo bener mao; mesüra nisungtemi par tsürabur Tsüngrem dak temulung agüja maliasü. 34Tang Yehoshafat mapa, tetenzük nungi tatem tashi Hanani chir Yihu otsü, koba Israel chubatem otsü nung enoka lir, yangji item zülua lir.

35Iba sülen Yihuda chuba Yehoshafat Israel chuba Ahazia shibai mejungi inyak, pa sasa pa den aden. 36Aser pai pa den Tarshisi aotsü rong yangluba nung aden; aser parnoki Eziongeber nung rongtemji yanglu. 37Idangji Maresha nunger Dodavahu chir Eliezeri Yehoshafat anema shina ashi, Ahazia den nai ne sasa aden nungji, Kibubai ne mapa nung teraksa adokdaktsütsü. Aser rongtemji raksadok, aser parnok Tarshisi moutet.

2 PUTIPUYANG 21

Yehoram Yimsüsüba

(2 Ch. 8.16-19)

1Yehoshafat tebu nunger den mejang, aser Dawid yimti nung tebu nunger den arem; aser par chir Yehoram pa melen chuba. 2Pa tenu nunger Yehoshafat chirtem liasü; Azaria, Yehiel, Zekaria, Azaria, Maikel aser Shefatia: ya ajak Israel chuba Yehoshafat chirtem liasü. 3Aser parnok tebui parnok nem sempet tulu, taribi, hon, aser Yihuda nung jara yoka aliba yimtitem dena agütsü; saka yimlijibo pai Yehoram nem agütsü, kechiaser pa mezüng jabaso liasü. 4Tang kodang Yehoram tebu yimli manung ain, aser pa sasa tashi ita aküm, pai tenu nunger ajak aser Yihuda tongtipur kar nok agi lepset. 5Yehoram chubatsü tenzükdang küm semer ana liasü; aser pai Yirusalem nung küm ti tashi chuba. 6Aser Ahab kinungeri inyakba ama, pai Israel chubatem lenmang nung jaja, kechiyong pa kibutsü asütsü Ahaber jala agi; aser Kibuba tsüngdang kechi majung aji pai inyak. 7 Aji saka Kibubai Dawid kidong mesamatsü, kechiaser pai Dawid den tezüngzüktepba ka yanglua, aser pai pa nem aser par chir nem teti milen ka agütsütsü nangzüka liasü.

Edomi anema Apusoba

(2 Ch. 8.20-22)

8  Pa tendak Edomi Yihuda yimli anema apuso, aser par chuba ka ayu. 9Idangji Yehorami par arkotongtem aser talungtsütem pa den anir ajanga ao; aser aonung pa shishi, aser pa meketa aliba Edom nunger, aser talungtsü madak arkotong tepset. 10Anungji tanü tashi Yihuda yimli anema Edomi noktaka lir. Iba mapang nungji Libnaia pa yimli anema noktak, kechiaser pai tebu nunger Tsüngrem, Kibuba senzüka toktsü.

Elija Shiti

11Talisa, pai Yihuda tenem lima nung tenem tekülemdak yanglu, aser Yirusalem alirtem jabujaria kümdaktsü, aser Yihuda mashileni anir ao. 12Aser Elija ainkar nungi pa dangi shiti ka arua ashi, “Yamai Kibuba, nebu Dawid Tsüngremi ashir, Nebu Yehoshafat tsüngsü nung mesüra Yihuda chuba Asa tsüngsü nung nai mejaja nungji, 13aser Israel chubatem tsüngsü nung jaja nungji, aser Yihuda o Yirusalem alirtem Ahab kinungeri inyakba mesüka, jabujaria odaktsü nungji, aser nebu chirtem ne dang nungi tajungba aliba nenu nunger nai tepset nungji; 14ajiang, Kibubai ne chirtem, ne kinungtsütem, aser na akaba ajak dak temerenshi tulu ka agi merenshitsü; 15aser ne sasa tashitak tamajung ka ne tepok tashitak, oda anogo shia tashitak agi ne poknüng madok tashi merenshitsü.”

16Yehoram anema Kibubai Filistia nunger, aser Arab nunger, Ethiopia nunger anasa alirtem ajungmesoa ain adokdaktsü; 17aser Yihuda anema parnok atu, aser rakpoka ajagi ait, aser chubar kidang aliba rongsen ajak bener oadok, par jabasotem aser kinungtsüa dena; aji asünung tanubusang Ahazia dak alema pa jabaso kata anünga maliasü.

Yehoram Tashitak Aser Asüba

(2 Ch. 8.23-24)

18Aser ya ajak sülenji Kibubai pa tepok nung kodanga manepba tashitak ka temdaktsü. 19Mapang tatong nung, küm ana lir külen, tashitak agi pa poknüng sazüka alua, tekangshi tulu nung asü. Tebu nunger asoshi mi apuba ama par nüburi pa atema tushia mi mapu. 20Pa chubatsü tenzükdang küm semer ana liasü, aser pai Yirusalem nung küm ti chuba; aser shingaia mesasai pa pila-a ao; aser parnoki pa Dawid yimti nung arem, saka chubatem leper nung marem.

2 PUTIPUYANG 22

Ahazia Yimsüsüba

(2 Ch. 8.25-29; 9.21-28)

1Yirusalem nung alirtemi par chir tanubusang Ahazia pa melen chuba kümdaktsü; kechiyong nisung Arabia nunger den arur yimmakertemi tambulenbo ajak tepsetadok. Anungji Yihuda chuba Yehoram jabaso Ahaziai chuba. 2Pa chubatsü tenzükdang Ahaziai küm lir ana liasü; aser tetsü tenüng Omri jala Athalia liasü. 3Pai Ahab kinunger tsüngsü nung jaja; kechiyong tamajung inyaktsü pa tetsüi ajungshia liasü. 4Aser Ahab kinunger amaji, Kibuba madang kechi majung aji pai inyak; kechiyong tebu sür külenbo, pa samatsüsa, pa sayurtemji parnok liasü. 5Pai ano parnoki sayuba sülen jaja, aser Israel chuba Ahab chir Yoram den, Ramoth-Gilead nung Siria chuba Hazael anema raratsü ao; aser Siria nungeri Yoram yirutsü. 6Aser Siria chuba Hazael anema pai raradang parnoki pa dak Rama nung yirutsüba zübu Yezreel nung anebtsü pa meyipa ao. Aser Yihuda chuba Yehoram chir Azaria Yezreel nung Ahab chir Yoram semdangi alu, kechiaser pa shiranga liasü.

7Tang Ahazia samatsübaji, pai Yoram dangi aoba agi, Tsüngrem nungi liasü; kechiyong kodang pa arua liasü, pai Nimshi chir Yehu anema Yehoram den ao, shibai Ahab kinunger leptokadoktsü Kibubai shina liasü. 8Kodang Yehui Ahaber kibong madak tebendangba inyaka liasü, pai Yihuda tongtipur, aser Ahazia tenur chirtemi, Ahazia tenzüka angu, pai parnok tepset. 9Aser pai Ahazia bushi, aser pa Samaria nung atsüka lia apu, aser parnoki pa Yehu dangi bener arua tepset; aser parnoki pa arem, kechiyong parnoki ashi, “Pa Yehoshafat semchir lir, shibai pa mulungjang ajak agi Kibuba bushi.” Aser Ahazia kinungeri chuba yimliji sota ayutsü tashi mali asü.

Athaliai Yimli Agiadokba

(2 Ch. 11.14-16)

10Tang Ahazia tetsü Athaliai lar chir süogo ta angashidang, lai arameso, aser Yihuda kidong chubar metsü ajak tepset. 11Saka chubar jala Yehoshafati Ahazia jabaso Yoas agienadok aser tetepsettsü aliba chubar jabasotem nungi paji bener oadok, aser lai pa aser pa bentsülaji taktang ka nung ayu. Yamaji putir Yehoiada tebutsü, (kechiyong la Ahazia teyi liasü,) Yehoram chubar jala, Yehoshafati pa Athalia nungi miima ayu, anungji lai pa metepset. 12Aser pa parnok den Tsüngrem kidang küm trok tashi miima liasü; aser Athaliai linük madak chuba.

2 PUTIPUYANG 23

Athalia Anema Apusoba

(2 Ch. 11.4-16)

1Küm tenetbuba nung Yehoiadai pei sasa tashi itshi, aser noklang madak tanishir, Yeroham chir Azaria, Yehohanan chir Ishmael, Obed chir Azaria, Adaia chir Maaseia, aser Zikri chir Elishafat, den züngzüktep. 2Aser parnok Yihuda ajakleni oa aser Yihuda yimti ajak nungi Levi nunger aniten, aser Israel tebu semchir tambutem aniten, aser parnok Yirusalemi aru. 3Aser Tsüngrem kidang tesenteper ajaki chuba den tezüngzüktepba ka yanglu. Aser pai parnok dang ashi, “Ajiang, Dawid chirtem indang Kibubai jembiba amato, chubar chiri yakta chubatsü. 4Nenok inyaktsü mapa ya; nenok putirtem aser Levi nunger shirnok amungnü teinyaktsü mapa temer arudir, shilem asem nung kabo kikümbang anüktsü, 5aser shilem asem nung ka Kimung Süngkhüm nung alitsü, aser nisung ajak Kibuba kilempok alitsü, 6Putirtem aser tenzükertem Levi nunger dak alema shinga Kibuba kidangi teidaktsü; parnokbo aitsü akok, kechiyong parnok temeshi lir, saka nisung ajaki Kibubai melaba benshitsüla. 7Levi nunger nisung shia pei nok o nü bener chuba meketa alitsü; aser shibasa aitdir lepsettsü. Pa kodang aitdir, aser kodang adokdir, nenok chuba den liang.”

Yoash Chuba Ta Sangdongba

(2 Ch. 11.9-12)

8Levi nunger aser Yihuda ajaki putir Yehoiadai melaba ama ajak inyak. Parnok shiai, shirnok amungnü nung mapa atemtsü, shirnok amungnü nung mapa tenzüktsü, parnok denji pei nisungtem anir aru; kechiyong putir Yehoiadai telemsaji senshia meyoki liasü. 9Aser putir Yehoiadai noklang madak tanishirtem nem nü, jongkok aser jongtem, Dawid meyong Tsüngrem kidang aliba bendanga agütsü. 10Aser pai nisung shia pei ket nung nok o nü bener, ki tajichilen nungi ki tabelen tashi, chuba meketa, tenladak aser ki anasa toktsü. 11Idangji parnoki chubar chir anir adok, aser pa dak chuba korang semtsü, aser pa nem kuliji agütsü, aser pa chuba kümdaktsü; aser Yehoiada aser pa chirtemi pa dak totzü mezütsü; aser parnoki ashi, “Tsüngremi chubaji kümzükang.” 12Kodang Athaliai nisung asümtepba aser chuba tenüng asangba ola angashi, lai nisungtem dangi Kibuba kidangi aru; 13lai reprang, aser ajiang, chubaji pei tongshi anasa lenjang nung noktaka ali, aser arkotong aser jangzü apurtem chuba anasa; aser linük nisung ajak pelatep aser jangzü apu, kentenertemi ano kongki tema tenüngsang ken tena anishi. Idangji Athaliai pei süoshi shisa aser ashi, “Ashioktsüogo, ashioktsüogo.” 14Aser Yehoiada putiri tesenteper madak aliba noklang madak arkotongtem anir adok aser parnok dang ashi, “La tulurtem tetsüngda jagi anir adokang; aser la sülen shiba anitakdir, pajia nok agi lepsetang; kechiyong putir jagi ashi, Kibuba kidangbo la tetepset.” 15Anungji parnoki la dak teka ai; aser la Kor Süngkhüm ajanga chubar ki jagi ao; aser yangji parnoki la tepset.

16Aser Yehoiadai pa aser nisung ajak aser chuba na tsüngda nung, oda parnok Kibuba meyong nübur asütsü ta tezüngzüktepba ka yanglu. 17Aser nisung ajak Baal kidangi ao aser aji raksatsü, aser pa tenladak aser pa nela noksa anüka raksatsü, aser Baal putir Mattan tenladak madak tepset. 18Aser Kibuba ki asoshi Levi putirtemi tuyuba ama, Mosa ozüng nung zülua aliba ama, pelatepa aser ken tena, Dawidi melaba ama, Dawidi Kibuba kidang lemsaja aliba ama, Kibuba nem tarongba tenla agütsütsü, Yehoiadai tanükertem shim. 19Aser Kibuba ki kiküm nung langka nung memerüki lira shinga maitsü asoshi kiküm anükertem pai yutsü. 20Aser pai noklang madak arkotongtem, aser tamarenertem, aser nisungtem madak governortem, aser linük alir ajak anir Kibuba kidang nungi chubaji kiküm ajanga chubar kidangi miner aru, aser chubaji yimli chuba menden manung mendaktsü. 21Anungji linük nisung ajaki pelatep, aser yimtiji tiptema liasü; kechiyong parnoki Athalia noklang nok agi tepset.

2 PUTIPUYANG 24

Yoashi Tenlaki Yanglushiba

(2 Ch. 12.1-16)

1Yoash chubatsü tenzükdang küm tenet liasü; aser pai Yirusalem nung küm lir tashi chuba; aser tetsü tenüng Zibia, Beersheba nungi liasü. 2Aser putir Yehoiada arishi piyong Yoashi Kibuba nükdang kechi shitak aji inyak. 3Yehoiadai pa asoshi kibutsü ana agidaktsü; aser jabaso aser jala pa nungi jakzük.

4Iba sülen Yoashi Kibuba ki yanglushitsü bilem. 5Pai putir aser Levitem külemi sentepdaktsür ashi, “Yihuda yimtitem dangi oang, aser Israel ajak nungi küm ka nungi ka tashi nenok Tsüngrem ki yanglushitsü sen bendenang, aser nenoki ilungtepa inyakang. Saka Levitemi aji ilunga meinyak. 6 Aser chuba jagi tongtipur Yehoiada aja aser ashi, Kechiba Yihuda aser Yirusalem nungi Kibuba tenzüker Mosai ozüng süki asoshi saruba Levi nunger nungi nai memeshi? 7Kechiyong tetsür tamajung Athalia chirtemi Tsüngrem kidangi rakpoka ait; aser ano Kibuba kidang bendanga agütsüba oset ajak Baal asoshi amshiogo.”

8Anungji chubai mela, aser parnoki süngden ka yanglu, aser aji Kibuba ki kimalen ayu. 9Aser Yihuda aser Yirusalem ajak nung, Tsüngrem tenzüker Mosai arem nung Israel nem saru tsüktsü melaba Kibuba asoshi bendentsü metetdaktsü. 10Aser tongtipur ajaki aser nisung ajaki pelatep, aser tatem matong tashi parnoki bener arua süngden nungji enoktsü. 11Aser kodangsa Levitemi süngdenji chubar ketdangpur dangi bener aru, parnoki yangji sen jenti angudang, chubar tezüluba aser temaba putir sosang-nati süngdenji azüngtettsü, aser aji bener oa tayudakji toktsüli asü. Yamaji parnoki anogo shia inyak, aser sen jenti benden. 12Aser chuba aser Yehoiadai Kibuba ki yanglushitsü merang aser yongmenyin mapa inyakertem asoshi taa agütsü. 13Yamaji mapa inyakertemi inyak aser parnoki mapaji parnok ket nung inyaka ao, aser parnoki Tsüngrem kiji tiptema yuja, aji tashi itdaktsü. 14Aser kodang parnoki renem, parnoki tanüngba senji Yehoiada-i chuba dangi bener aru, aser iba jagi Kibuba ki asoshi marokenrok tekülemdang amshitsü, aser tarongba tenla asoshi, aser teronem menemtsü asoshi ausu, aser hon aser taribi marok-enrok yanglu. Aser parnoki Yehoiada arishi tepiyong maneni Kibuba kidang tarongba tenla agütsü.

Yoash Aibelendaktsüba

15Saka Yehoiada tambur aser arishi talang liasü aser pa asü; pa asüdang küm noklang ka ser semer liasü. 16Aser parnoki pa Dawid yimti nung chuba rongnung rema yutsü, kechiyong pai Israel nung, aser Tsüngrem aser par kibong tsütsü tajung inyak.

17Tang Yehoiada sür külen Yihuda tongtipur aru aser chuba dang apudak. Idangji chubai parnok dang anga, 18aser parnoki Kibuba, par tsürabur Tsüngrem toktsü, aser Asherim aser süngyangluji külem; aser parnok iba tai asoshi Yihuda aser Yirusalem dangi terasaba aru. 19Aji saka parnok Kibuba dangi ania arutsü pai parnok dangi ainkartem yok; aser parnoki parnok anema shin; saka parnoki tenarong magütsü.

20  Tsüngrem tanela Yehoiada putir chir Zekaria madaki aru, aser nisungtem madak pa noktak, aser parnok dang ashi, “Yamai Tsüngremi ashir, Nenok azükaru masütsüsa kechiba nenoki Kibuba ozüng raksar? Nenoki pa senzüka toktsü nung paia nenok senzüka yutsüogo.” 21Aser parnoki pa anema tasa asa, aser chubai melaba agi Kibuba kilempok nung parnoki lung agi pa dak aon. 22Yamai Yoash chubai tebu Yehoiadai pa dang temeim inyakba pai mebilemtet, saka par chir tepset. Pa asüdang pai ashi, “Kibubai ya meteta mang yangangma.” 23Küm tatem nungbo Siria nunger temerangertem Yoash anema atu; aser parnok Yihuda aser Yirusalem anema aru, aser nisung rongnung tongtipur ajak samatsü, aser parnok nungi rakzükba ajak Damaska chuba dangi yok. 24Kechiyong Siria temeranger telok tila ka dang aru; aser Kibubai parnok ket nung telok kanga tulu ka bendanga agütsü, kechiyong parnoki par tsürabur Tsüngrem, Kibuba senzüka toktsü. Yamaji parnoki Yoash madak temerenshi inyak.

25Kodang parnoki pa kanga yirur toktsür ao, pa kilirtemi pa anema tasa asa, kechiaser pai Yehoiada putir chir azü tokshi, aser pa yipten nung pa tepset. Anungji pa asü; aser parnoki pa Dawid yimti nung arem, saka parnoki pa chubatem leper nung marem. 26Pa anema tasa asartemji Ammontsür Shimeat chir Zabad, aser Moabtsür Shimrit chir Yehozabad liasü. 27Pa chirtem indang, pa anema khuret aika indang, aser Kibuba ki yanglushiba indang chubatem kaket nung teratet agütsüba nung zülua lir. Aser pa chir Amazia pa melen chuba.

2 PUTIPUYANG 25

Amazia Yimsüsüba

(2 Ch. 14.1-26)

1Amazia chubatsü tenzükdang pa küm metsür pungu liasü; aser pai Yirusalem nung küm metsür tuku chuba: aser tetsü tenüng Yehoaddan, Yirusalem nungi liasü. 2Aser pai Kibuba nükdang kechi shitak aji inyak, saka temulungjang chichiba agibo masü. 3Aser yimliji pa ket nung akanga akümdang, tebu tepsetba kilirtemji pai tepset. 4 Saka parnok chirtembo pai metepset, saka Kibubai melaba Mosa ozüng kaket nung, “Tsürabur asoshi tanur masütsü; saka nisung shia pei tai asoshi asütsü,” ta aliba amato pai inyak.

Edom Anema Rara

(2 Ch. 14.7)

5Idangji Amaziai Yihuda nisungtem sentepdaktsü, aser parnok kidongren agi, Yihuda aser Benjamin kin aika, meyirijang aser noklang tanishirtem kübok yutsü; aser pai küm metsü nungi temalen züngdang, aser rarai otettsü pur, aser nü aser jong abentsü akoker meyi noklang asem liasü. 6Aser taribi seret semermer ozükba noklang ka yong pai ano Israel nungi tasü tait nisung meyi noklang ka taa agüja agi. 7Saka Tsüngrem nisung ka arua ashi, “Oh chuba, Israel temeranger telok ne den tuodaktsü; kechiyong Kibuba Israel den aser item Efraim nunger ajak den dena mali. 8Saka iba yari na rara nung tashi aittsü ta bilemra, Tsüngremi tsükchir madang na laodaktsütsü; kechiyong yaritsü aser laodaktsütsü Tsüngrem dak ain lir.” 9Aser Amaziai Tsüngrem nisung dang ashi, “Saka ni Israel temeranger telok nem taribi seret semermer ozükba noklang ka agütsübaji koda asütsü?” Aser Tsüngrem nisung jagi langzü, “Iba dang nungi kanga tali agütsütsü Kibubai koka lir.” 10Idangji Efraim nungi pa dangi aruba temeranger telok, tanaben kidangi aotsü yokadok. Aser parnoki Yihuda den kanga ain adok, aser tetsübutsüka ain adoka kidangi meyip.

11Saka Amaziai tasü ait, aser pei nübur anir ao, aser Metsü Lenten jagi ao aser Seir nunger meyi ter alep. 12Aser Yihuda nungeri tanga meyi ter taküm apu, aser parnok lungbangi anir atu aser lungbang nungi nungzüka yok aser parnok ajak anüka akuset. 13Saka Amaziai meyipa temeranger telok shir pa den tongbangi modaktsüi meyipa yok, parnoki Samaria nungi Beth-horon tashi Yihuda yimtitem amak aser meyi asem tepset aser jenti rakzükraktem.

14Edom nunger tepsetba nungi Amazia arur külen, pai Seir tsüngremtem bener aru, aser pei tsüngrem asütsü ayu, aser parnok külem, aser parnok nem tenla agütsü. 15Anungji Kibubai Amazia dak ain adok aser pa dangi ainkar ka yoka pa dang ashi, “Kechiba nai nübur tsüngremtem koba agi par nübur nenok ket nungi mekümzük parnok bushi? 16Saka pa jembia alidang chubai pa dang ashi, Onoki na chuba nem shisatsü agütsür ka kümdaktsü asü? Anenang! Kechiba na südaktsünür? Anungji ainkar jagi anen, saka ashi, Tsüngremi na samatsütsü mulungteta lir ta ni metet, kechiaser nai ya inyak aser ni sayuba manga.”

Israeli Yihuda Akokba

(2 Ch. 14.17-20)

17Idangji Yihuda chuba Amaziai shisatsü agi, aser Israel chuba Yehoash Yehoahaz chir dangi yoka ashi, “Arung, asenok tejak o tejak na reprangtepdi.” 18Aser Israel chuba Yehoashi Yihuda chuba Amazia dangi yoka ashi, “Lebanon nung ai kati Lebanon nung cedar süngdong dangi, Ner jala ozü chir kibutsü asütsü agüjang ta shir yok; aser Lebanon arem shiruru kati aiji ajemsatsü. 19Nai ashir, ‘Ajiang, ni Edom dak azük, aser ne mulungjang asüküma uluadok.’ Saka tang kidang liang; kechiba na aser ne den Yihuda dena laotsüsa nai timtem bena arutsü?”

20Saka Amaziai manga; kechiyong aji Tsüngrem nungi liasü, pai parnok tsükchir ket nung parnok agütsütsü asoshi, kechiaser parnoki Edom tsüngremtem bushi. 21Anungji Israel chuba Yehoash atu; aser pa aser Yihuda chuba Amazia, Yihuda meyong, Beth-shemes nung tongbang nung kati ka den ajurutep. 22Aser Israeli Yihuda akok, aser nisung shia pei kidangi ajen. 23Aser Israel chuba Yehoashi Beth-shemes nung Yehoahaz jabaso Yehoash chir Yihuda chuba Amazia apu aser pa Yirusalemi bener aru, Yirusalem jara, Efraim Süngkhüm nungi Kinük Süngkhüm tashi süklep noklang pezü raksatsü. 24Aser pai hon aser taribi ajak rakzük, Tsüngrem kidang anguba marok-enrok ajak, aser item den Obed-edom dena; pai ano chubar ki rongsen, aser pua aliba nisungtem rakzük, aser Samariai pa meyipa ao.

Amazia Asüba

(2 Ch. 14.17-20)

25Yihuda chuba Amazia, Israel chuba Yehoahaz sür külen küm terpungu taküm ali. 26Tang tanüngba Amazia mapa, tetenzük nungi tatem tashi, Yihuda aser Israel chubatem kaket nung zülua melika ma? 27Pai Kibuba madang nungi meyipa oadokba mapang nungi parnoki pa anema Yirusalem nung tasa asa, aser pa Lakhisi jena ao, aser angji pa tepset. 28Aser parnoki pa kor nung bener aru; aser Dawid yimti nung tebu nunger den arem.

2 PUTIPUYANG 26

Yihuda Chuba Uzzia Yimsüsüba

(2 Ch. 14.21-22; 15.1-7)

1Yihuda nunger ajaki Uzzia agi, shiba küm ter-trok liasü, aser tebu Amazia melen pa chuba kümdaktsü. 2Tebu nunger den chubaji mejanger külen, pai Elot yanglushi aser tanaben aji Yihuda nem agütsü. 3Uzzia chubatsü tenzükdang pa küm ter trok liasü, aser Yirusalem nung pai küm tenemer ana chuba; tetsü tenüng Yirusalem nunger Yeholia liasü. 4Tebu Amaziai inyakba ajak ama pai Kibuba nükdang kechi shitak aji inyak. 5Pai pei sasa Zekaria tendak Kibuba bushi, aser Zekariai Tsüngrem tsübuba pa dang sayu; aser kopiga pai Tsüngrem bushi, papigaji Tsüngremi pa azükarudaktsü.

6Pa oa Filistia nunger anema rara, aser Gat jara, Yabine jara aser Ashdod jara raksatsü; aser Ashdod litsü nung aser Filistia nunger rongnung yimtitem yanglu. 7Tsüngremi Filistia nunger anema aser Gur-baal nung alir Arab nunger, aser Meun nunger anema pa yari. 8Ammon nungeri Uzzia nem putisü agütsü, aser pa nüngsang Ijip litsü tashi prokshia ao, kechiyong pa kanga tashi ita aküm. 9Ano Uzziai Yirusalem Kinük Süngkhüm nung aser Lenten Süngkhüm nung aser kinüklen lungki yanglu aser itemji noktanga yanglu. 10Aser arem nung pai lungkitem yanglu, aser tzübu aika tsüngpoka yanglu, kechiaser pa kiset shiruru jenti, Shefela aser lenten nung liasü, aser tenem nung aser tsükmenatzü lu inyakertem liasü, kechiyong pai aliji meim. 11Ano Uzzia raratsü asoshi temeranger telok liasü, aser aji tezülur Yeiel aser ketdangpur Maaseia, Hanania melaba ama, aji chubar arkotong rongnung ka, parnoki yongsük yangluba amato telok telok liasü. 12Kidong tamburen yongsük ajanga temerangertemji meyi ana ser noklang trok. 13Parnok kübokji temeranger telok meyi noklang asem ser tenet aser noklang pungu, parnoki tsükchir anema chuba yaritsü tashi tulu den raratsü koka liasü. 14Aser Uzziai parnok asoshi, oda telok ajak asoshi, jong, nü, merang korang, rara sobutsü, lijak aser teyoktsü lung renemtsü. 15Yirusalem nung pai tetangshi nisungtemi puratetba lijakjang yoktsü aser lung tulu yoktsü asoshi lungki manung aser kinüklen yanglua liasü. Aser pa tenüngsang ayimsünga prokshia ao, kechiyong pa yamaji tashi ita akümtsüsa Tsüngremi pa tesüngmangtsü ka yari.

Uzzia Asükümba Aser Aibelenba

(2 Ch. 15.4-7)

16Saka pa tashi ita akümdang pa pei tesamatsü asoshi asükümadok, aser pai pa Kibuba pa Tsüngrem anema ozüng raksa; kechiyong pai tenladak liangmesen arongtsü Kibuba tenla kidangi ai. 17Aser pa sülen Azaria putir ai, aser iba sülen tasü tait nisung Kibuba putir tir tena ai; 18 aser parnoki Uzzia chuba anema noktak, aser pa dang ashi, “Uzzia Kibuba dang liangmesen arongtsübaji ne mapa masü, saka liangmesen arongtsü bendanga agütsüba Aron chir putirtem asoshi lir; temeshidak nungi tuguang; kechiyong nai ozüng raksaogo; mesüra Kibuba Tsüngrem nungi na pei tetushi asoshi mangutsü.” 19Idangji Uzzia ain adoka rasa; liangmesen arongtsü pa ket nung susa liasü; aser putirtem den pa rasa-a alidang, Kibuba kidang, tenladak anasa, putirtem madang pa tenütsü nung zütsüra adok. 20Aser putiunger Azaria aser putir ajaki pa dak reprang, aser ajiang, pa tenütsü nung zütsüra liasü. Aser parnoki pa yakta nungteta yok, aser pa pei sasa tugutsü ilunga liasü, kechiaser Kibubai pa dak azük. 21Aser Uzzia chuba pa asüba anogo tashi zütsüra keta liasü, aser zütsüra aket nungji ki balaka nung ali, kechiyong Kibuba ki nungi pa aenshidakja liasü. Aser par chir Yotham chubar kibong aser nübur madak yimsü süa ali.

22Tang tanüngba Uzzia mapa tetenzük nungi tatem tashi Amoz chir Isaia ainkari züluogo. 23 Aser Uzzia tebu nunger den mejang, aser parnoki pa tebu nunger den chubatem aremdak li anasa arem, kechiyong parnoki ashi, “Pa zütsüra aketer.” Aser par chir Yothami pa melen chuba.

2 PUTIPUYANG 27

Yotham Chuba Yimsüsüba

(2 Ch. 15.32-38)

1Yotham chubatsü tenzükdang küm metsür pungu liasü; aser pai Yirusalem nung küm tertrok chuba; aser tetsü tenüng Zadok jala Yerusha liasü. 2Tebu Uzziai inyakba ajak ama pai Kibuba nükdang kechi tajung aji inyak; aji saka pa Kibuba tenla kidangi mai. Nisungtemi ano temenen mapatem maneni inyak.

3Pai Kibuba ki temaba süngkhümji yanglu aser Ofel jara manung pai tulu ka yanglulok. 4Ano pai Yihuda tenem lima nung yimtitem yanglu aser arem nung pai mitsatem aser lungkitem yanglu. 5Pai ano Ammon nunger den rara aser parnok akok. Aser Ammon nungeri pakümjisa pa nem taribi seret semermer ozükba noklang ka, aser wheat tzük tatak meyi noklang ka, aser barley tsük meyi ter agütsü. Kümnabuba aser kümsembuba nunga Ammon nungeri pa nem jenti agütsü. 6Anungji Yotham tashi tulu aküm, kechiaser pai pei lenmang Kibuba pa Tsüngrem madang ayu. 7Tang tanüngba Yotham mapa aser pa raraba ajak, aser pa lenmangtem, ajiang, itemji Yihuda aser Israel chubatem kaket nung zülua lir. 8Pa chubatsü tenzükdang pa küm metsür pungu liasü, aser Yirusalem nung küm tertrok tashi chuba. 9Aser Yotham tebu nunger den mejang, aser parnoki Dawid yimti nung pa arem; aser par chir Ahazi pa melena chuba aküm.

2 PUTIPUYANG 28

Ahaz Chuba Yimsüsüba

(2 Ch. 16.1-4)

1Ahaz chubatsü tenzükdang küm metsü liasü; aser pai küm tertrok tashi Yirusalem nung chuba; aser pa tebu Dawid ama mesüi Kibuba nükdang kechi tajung ibaji meinyak. 2Saka pai Israel chubatem lenmang nung jaja, aser ano temulusaba Baaltem noksa yanglu. 3Ano pai Hinnom chir lenten nung liangmesen arong, aser Kibuba Israel chirtem madang aridokba limapur kintem tesempatsü mapa amato pei chirtem mi nung arong. 4Aser pai tetepsetba tenla agütsü aser tenem tekülemdak nung, ungsem nung aser süngdong tajem ajak kübok liangmesen arong.

Israeli Siria Den Rara

(2 Ch. 16.5-6; Isa. 7.1)

5  Aji asünung Kibuba Tsüngremi Siria nunger ket nung pa bendanga agütsü; aser parnoki pa akok, aser telok jenti pur ao, parnok Damaskai bener arua Israel chuba, shibai pa madak jenti tepseta takok angu, pa ket nung agütsü. 6Kechiyong Remalia chir Pekai Yihuda nung anogo ka nung meyi noklang ka ser metsü tepset, parnok ajakji tasü tait nisungtem; kechiaser parnoki Kibuba, par tsürabur Tsüngrem senzüka toktsü. 7Aser Efraim nunger tashi tait nisung ka Zikri-i, chubar chir Maaseia, chubar kidang tanishisang Azrikam, aser chuba den atongba Elkana tepset.

Oded-i Noktangba

8Israel chirtemi par adianu meyi noklang ana, tetsürtem aser jala-jabasotem, pur ao aser parnok nungi oset jenti rakzüka bener ao, aser aji Samariai bener aru. 9Saka yangji Kibuba ainkar ka, tanüng agi Oded liasü; aser Samariai aruba telok lenji ao, aser parnok dang ashi, “Ajiang, Kibuba nenok tsürabur Tsüngrem, Yihuda den ain adoka alibayong, pai nenok ket nung parnok agütsü, aser nenoki mit adoka parnok tepsetba kotak tonga tuogo. 10Tang nenoki Yihuda aser Yirusalem chirtem alar aser alatsür kümdaktsütsü atonger; saka nenok rongnunga Kibuba nenok Tsüngrem anema tai menaba mali no? 11Anungji tang nenoki kü dang angang, aser nenok adianutem nenoki pur aortemji meyipa yokang; kechiyong Kibuba tetsübutsü terasaba nenok madak lir.”

12Idangji rara nungi arurtem anema Efraim tanishirtem Yohanan chir Azaria, Mishillemot chir Berekia, Shallum chir Yehizkia, aser Haldai chir Amasa, parnok noktak, aser parnok dang ashi, 13“Nenoki yagi tepuokertem bener marutsüla; kechiyong tang aliba onok temenen aser tai dak tali bendenloktsüba nenoki Kibuba anema onok dak tai bena arutsü atonger; kechiyong onok tai tulu lir, aser Israel anema tetsübutsü terasaba lir.” 14Anungji nok o nü abenertemi pur arurtem aser terakzükba osettem tongtipur aser sentepa aliba telok madang toktsü. 15Aser tenüng teta ashiba nisungtemji arameso aser tapurtemji ania aru, aser terakzükba oset nungi parnok rongnung mangsa alir ajak abendaktsü, parnok nem tsüngsem semdaktsü, chiyungtsü aser tajemtsü bena arutsü, aser totzü mezütsü, aser parnok rongnung tashi maiter ajak gado nung mendaktsü, parnoki pei adianu dangi, asangdong aliba Yeriko yimti-i anir aru. Ajiser parnok Samariai meyipa ao.

Asiria i Yihuda Yaritsü Memulungba

(2 Ch. 16.7-9)

16Iba mapang nung Ahaz chubai Asiria chubatem dangi pa yaritsü asoshi yok. 17Kechiyong Edom nungeri tanaben arua Yihuda amak, aser nisungtem pur ao. 18Filistia nungeria lenten yimtitem, aser Yihuda anüolentip amak aser Beth-shemes, Aijalon, Gederot, Soko iba yimtsüngtem, Temna aser iba yimtsüngtem aser, Gimzo aser iba yimtsüngtem agi, aser parnok yangji ali. 19Kechiyong Israel chuba Ahaz meji Kibubai Yihuda ludaktsü, kechiyong pai Yihuda dak taochi makai inyak aser Kibuba anema kanga mejungi tai mena. 20Aser Asiria chuba Tigath-pileser pa dangi aru, aser tashi itdaktsütsü melen lendong agütsü. 21Aser Kibuba kidang nungi aser chuba ki aser tongtipur ki nungi shilem ka agitet, aser aji Asiria chuba nem putisü agütsü; saka aji agi pa meyari.

Ahaz Temenen Aser Pa Asüba

(2 Ch. 16.12-20)

22Ano iba ama lendong nung Ahaz chubai taliang Kibuba dak tamang makateti aküm. 23Kechiyong Damaska tsüngremtem kobai pa akok, parnok nem tetepsetba tenla agütsü; aser pai ashi, “Siria chubatem tsüngremtemi parnok yari, anungji ni parnok nem tetepsetba tenla, ni yaritsü asoshi agütsütsü.” Saka itemji pa aser Israel ajak asoshi tesamatsü liasü. 24Aser Ahazi Tsüngrem kidang marok-ausutem külemi benden, aser Tsüngrem kidang aliba marok-ausutem anüka lepsatsü, aser Kibuba ki kishi shibanga yutsü; aser pai Yirusalem kinük ajaklen tenladak yanglu. 25Aser Kibuba, par tsürabur Tsüngrem jashidakja, Yihuda yimti shia nung pai tangar tsüngrem dang liangmesen arongtsü tenem tekülemdak yanglu. 26Tang tanüngba pa mapa, aser pa sentong ajak, tetenzük aser tatem, ajiang, itemji Yihuda aser Israel Chubatem kaket nung zülua lir. 27 Aser Ahaz tebu nunger den mejang, aser parnoki pa yimti nung, oda Yirusalem nung arem, kechiyong parnoki pa chubatem leperi bener maru, aser par chir Hezekiai pa melen chuba.

2 PUTIPUYANG 29

Hezekia Chuba Yimsüsüba

(2 Ch. 18.1-8)

1Hezekiai chubatsü tenzükdang pa küm metsür pungu liasü, aser pai Yirusalem nung küm metsür tuku tashi chuba; aser tetsü tenüng Zekaria jala Abija liasü. 2Aser Kibuba nükdang kechi shitak liasü, tebou Dawidi inyakba ajak amato, pai inyak.

Tenlaki Meshitetba

3Pai pa chubaba küm mezüngbuba nung, mezüngbuba ita nung Kibuba ki kishitem lapok, aser itemji yanglushi. 4Aser pai putirtem aser Levitem anir ait, aser anüdoklen tesademdak sentepdaktsü, aser parnok dang ashi, 5“Kü dang angang, nenok Levitem; tang nenok sasa meshitetang, aser Kibuba nenok tsürabur Tsüngrem ki meshitetang aser temeshidak nungi memerükba oset bener oang. 6Kechiyong asen tsüraburi tai mena, aser Kibuba asen Tsüngrem madang kechi majung aji inyak, aser pa senzüka toktsü, aser parnok tejak Kibuba alidak nungi meyipa oadok, aser parnok tesülen shitsü. 7Aser kilempok kishitem shibangadok, aser milen remsepadok, aser liangmesen marong, mesüra Israel Tsüngrem nem temeshidak tarongba tenla magütsü. 8Aji asünung Kibuba terasaba Yihuda aser Yirusalem madak liasü, aser paji parnok asoshi tetsübutsü aser taoksatsü ka aser temokongtsü ka liasü, nenoki pei tenük agi anguba amaji, pai parnok bendanga agütsü. 9Kechiyong, angang, asen tsürabur nok agi lao-ogo, aser asen jabaso-jalatem aser asen kinungtsütem iba asoshi tepuokdak lir. 10Tang Kibuba Israel Tsüngrem den, oda pa tetsübutsü ain adokba asenok nungi oadoktsü asoshi tezüngzüktepba ka yanglutsü kü mulungjang nung lir. 11Kü chirtem, tang temulung magütsüi teli; kechiyong Kibubai nenok pa madang noktaktsü, aser nenok pa tenzükertem asütsü, liangmesen arongtsü shimtetogo.”

12Idangji Levitem arameso, Amasai chir Mahat, Azaria chir Yoel, Kohat nunger chirtem, aser Merari chirtem, Abdi chir Kish, Yahallel chir Azaria, aser Gershom nunger, Zimma chir Yoa, Yoa chir Eden. 13Elizafan chirtem Shimri aser Yeuel; Asaf chirtem, Zekaria aser Mattania; 14aser Heman chirtem, Yehuel aser Shimei; Yeduthun chirtem Shemaia aser Uzziel. 15Aser parnoki par adianutem jaten, aser parnok sasa meshitet aser Kibuba o chubai melaba amato, Kibuba ki telungbai aji meshitettsü ai, 16aser putirtemi Kibuba ki telungbai aji meshitettsü ai, Kibuba ki kimaleni bener adok. Aser Levitemi aji Kidron ayongi bener aotsü bena aru. 17Tang mezüngbuba ita mezüngnü meshitettsü tenzük, aser ita tinübuba nung parnoki Kibuba kilempoki aru; aser parnoki tinü nung Kibuba ki meshitet; aser mezüngbuba ita anogo ter trokbuba nung parnok tatem atem. 18Idangji parnok chuba ki kilung nung Hezekia chuba dangi ai, aser ashi, “Onoki Kibuba ki ajak meshitetogo, aser tarongba tenladak, amtsük langbang aser yangji aliba marok-ausu ajak, 19ano Ahaz chubai pa chuba dang pai tai mena-a endokba marok ausu ajak onoki renemogo aser meshitetogo; aser ajiang, itemji Kibuba tenladak madang lir.”

Tekülemdak Meshitetba

20Idangji Hezekia chuba yakta shishi, aser yimti tongtipur sentepdaktsü, aser Kibuba kidangi atu. 21Aser nashi pungchi tenet, san tepung tenet, san chanu tenet, aser nabong tenet, yimli asoshi temenen tenla asoshi aser temeshidak asoshi aser Yihuda asoshi parnoki bener aru. Aser pai Aron chir putirtem dang Kibuba tenladak itemji tenlatsü mela. 22Anungji parnoki nashi pungchitemji tepset, aser putirtemi azüji agizük, aser aji tenladak rüklok: aser parnoki san tepungtem tepset, aser azüji tenladak rüklok; aser parnoki ano san chanutem tepset, aser azüji tenladak rüklok. 23Aser temenen tenla asoshi parnoki nabong tepungji chuba aser sentepa alir telok madangi anasa bener aru, aser item dak parnok teka agi nemet; 24aser putirtemi parnok tepset, aser parnoki tenladak manung azü mezüja Israel ajak asoshi temenen pungitsü tenla; kechiyong chubai Israel ajak asoshi tarongba tenla aser temenen tenla agütsütsü tim ta ozüng agütsü.

25 Kibuba kidang Levitem laya, tawaba kongki, aser tzürang kongki, Dawidi melaba ama, aser chubar tangur Gad, aser Nathan ainkar pai yutsü; kechiyong pa ainkartem agi temelabaji Kibuba nungi liasü. 26Aser Levitemi Dawid kongkitem aser ainkartemi jangzü amer noktak. 27Aser Hezekiai tenladak tarongba tenla agütsütsü mela. Aser tarongba tenlaji tenzükdang, Kibuba nüng asangtsü tenzüka jangzü aser Israel chuba Dawid kongkitem den tenzük. 28Aser tesenteper ajaki külem, kentenertemi aten, aser jangzü apurtemi apu; ya ajak tarongba tenla merenem tashi maneni ali. 29Kodang parnoki tenla agütsüba atem, chuba aser pa den dena alir ajaki apudak aser külem. 30Ano Hezekia chuba aser tongtipuri Levitem dang Dawid ken aser tangur Asaf otem agi Kibuba tenüng asangtsü mela. Aser parnoki tepela agi ken aten, aser parnoki tekolak mechioka külem.

31Idangji Hezekiai ashi, “Tang nenok pei sasa Kibuba nem bendanga agütsüogo, anasa arung aser tetepsetba tenla aser tenüngsang tenla bener Kibuba kidangi arung.” Aser kwikati temulung nung mulungteta liasü tarongba tenla bener aru. 32Aser tesenteper teloki bener aruba tarongba tenlatemji nashi pungchi neter, san tepung noklang ka, aser san chanu noklang ana; item ajak Kibuba nem tarongba tenla liasü. 33Aser temeshitet osettemji nashi pungchi noklang trok, aser san meyi asem. 34Saka putirtemji ishikadang liasü, anungji tarongba tenla ajakbo parnoki merongtemtet; anungji mapaji matem tashi, aser putirtem parnok sasa memeshitet tashi, parnok adianu Levitemi parnok yari; kechiyong putirtem dang nungi Levitem temulungjang nung meshitettsü atema tali temetongba liasü. 35Tarongba tenla jenti aliba dakji alema, yimjung tenla temo, aser tarongba tenla asoshi tajemtsü tenla liasü. Yamaji Kibuba mapaji tiptema ayu. 36Aser Tsüngremi nisungtem asoshi renemtsüba asoshi Hezekia aser nübur ajaki pelatep; kechiyong mapaji ajongbena atalok.

2 PUTIPUYANG 30

Süia Aoba Benjong Asoshi Terenemba

1Hezekiai Israel aser Yihuda ajak tajai yok, aser Efraim o Manase dangi shiti yoka, Kibuba Israel Tsüngrem atema Süia Aoba benjong ayutsü Yirusalem nung Kibuba kidangi arung ta zülu. 2 Kechiyong chuba aser pa tongtipuri aser Yirusalem nung tesenteper ajaki, ita tanabuba nung iba benjong akatsü bangjemtet. 3Kechiyong putirtem parnok sasa nisung peria meshiteta mali nung, aser nisungtema parnok sasa Yirusalem nung sentepa malibayong iba mapang nungji ya akatsü mokoki liasü. 4Aser chuba aser tesenteper ajak madang mapaji shitak liasü. 5Anungji Beersheba nungi Dan tashi, oda parnok Yirusalem nung Kibuba, Israel Tsüngrem asoshi Süia Aoba benjong akatsü arutsüla ta sangdonga yoktsü parnoki ozüng ka yanglu; kechiyong zülua aliba amajibo telok tulu mesentepdang. 6Anungji Israel aser Yihuda ajak dangi chuba aser tongtipur nungi, aser chubai melaba ama, Nenok Israel chirtem, Kibuba, Abraham, Isak, aser Israel Tsüngrem dangi meyipang, angji Asiria chubatem ket nungi nenok jenbua alirtem dangi meyipa arutettsü ta zülua shiti benertem ao. 7Nenok tsürabur aser nenok adianutem ama teli, shirnoki parnok Kibuba Tsüngrem dang temulung melemi liasü, ibayongji nenoki anguba amaji, pai parnok azüngmeyaka kümdaktsü. 8Nenok tsüraburtem ama tekong temerang saka nenok sasa Kibuba nem bendanga agüjang, aser pa tenla kidangi arung, koba pai teti asoshi meshiteta lir, aser nenok nungi pa tetsübutsü ain adokba meyipa oadoktsü asoshi Kibuba nenok Tsüngrem tenzükang. 9Kechiyong nenoki Kibuba dangi meyipra, nenok adianutem aser nenok chirtem tapurtemi aochitsü, aser iba limai meyipa arutsü. Kechiyong Kibuba nenok Tsüngrem taochi aser yimlibilem lir, aser nenoki pa dangi meyipra, pa tejak nenok nungi memeyiptsü.

10Anungji obelenertem yimti ka nungi yimti ka ajanga, Zebulun tashi ao; saka parnoki parnok menütsü aser sensatsü, 11Asher, Manase, aser Zebulun nisungtem ishika dang parnok sasa ajemalu aser Yirusalemi aru. 12Chuba aser tongtipuri Kibuba o agi melaba ama inyaktsü asoshi temulungjang ka parnok nem agütsütsü Tsüngrem teka Yihuda madak liasü.

Süia Aoba Benjong Amungba

13Nisung jenti, piyazü meinokba am benjong akatsü asoshi ita tanabuba nung Yirusalemi sentep. 14Parnoki külemi inyaktsü tenzük aser Yirusalem nung aliba tenladakji agien, aser liangmesen arongtsü asoshi tenladak aliba ajakji parnoki bener ao aser Kidron lenten nung enoktsü. 15Aser ita tanabuba anogo terpezübuba nung parnoki Süia Aoba benjong san chanuji tepset. Aser putirtem aser Levitem maksüdaktsü, anungji parnok sasa meshitet, aser Kibuba kidangi tarongba tenla bener aru. 16Tsüngrem nisung Mosa ozüng amato parnoki pei mapa nung noktak; Levitem ket nungi agizükba azüji putirtemi rüklok. 17Kechiyong tesenteper rongnung aika pei sasa memeshitet liasü; anungji Levitemi, memerüki aliba nisung shia asoshi, aji Kibuba madang temeshi kümdaktsütsü Süia Aoba benjong san chanuji tepset. 18Kechiyong Efraim, Manase, Issakar, aser Zebulun nungi nisung jenti memeshiteti liasü, saka zülua aliba ama mesüi Süia Aoba benjong achi. Saka Hezekiai parnok asoshi sarasadema ashi, 19“Nisung shibai Kibuba par tsürabur Tsüngrem, pei mulungjang agi bushir, merüktettsü atema tenla ki tetuyuba ozüng amato mesüaka, tajung Kibubai nisung shia dang tai tokangma.” 20Aser Kibubai Hezekia dang angashi, aser nisungtemji anebtsü. 21Aser Yirusalem nung alirtemi tepela tulu agi piyazü meinokba am benjongji anogo tenet amung; aser Levi aser putirtemi anogo shia, parnok tashi ajak agi Kibuba dang tenüng asang. 22Hezekiai Levitem shirnoki Kibuba mapa junga tangshia inyak ajak dang ajungshia jembi. Anungji nisungtemi anogo tenet, yimjung tenla tepseta parnok tsürabur Tsüngrem Kibuba nem tenüngsang agüja benjongji achi.

23Idangji tesenteper ajongai ano tenetnü benjongji akatsü mulungtet, aser tenetnü tepela agi amung. 24Kechiyong Yihuda chuba Hezekiai tesenteper nem nashi pungchi meyi ka aser san meyi tenet tenla asoshi agütsü, aser tongtipurtemi tesenteper nem nashi pungchi meyi ka aser san meyi ter agütsü. Aser putir aikati parnok sasa meshitet. 25Aser Yihuda nungi tesenteper ajonga, aser Levi nunger aser putirtem, Israel nungi adokba tesenteper ajonga, aser Israel lima nungi arua amungertem, aser Yirusalem nung arua amungertem, pelatep. 26Anungji Yirusalem nung tepela tulu liasü, kechiyong Israel chuba Dawid chir Solomon mapang nungi iba amai Yirusalem nung melidang. 27Anungji putirtem aser Levitemi arameso aser nisungtem moatsü, aser parnok ola angashi, aser parnok sarasademba kotak temeshidak tashi atu.

2 PUTIPUYANG 30

Süia Aoba Benjong Asoshi Terenemba

1Hezekiai Israel aser Yihuda ajak tajai yok, aser Efraim o Manase dangi shiti yoka, Kibuba Israel Tsüngrem atema Süia Aoba benjong ayutsü Yirusalem nung Kibuba kidangi arung ta zülu. 2 Kechiyong chuba aser pa tongtipuri aser Yirusalem nung tesenteper ajaki, ita tanabuba nung iba benjong akatsü bangjemtet. 3Kechiyong putirtem parnok sasa nisung peria meshiteta mali nung, aser nisungtema parnok sasa Yirusalem nung sentepa malibayong iba mapang nungji ya akatsü mokoki liasü. 4Aser chuba aser tesenteper ajak madang mapaji shitak liasü. 5Anungji Beersheba nungi Dan tashi, oda parnok Yirusalem nung Kibuba, Israel Tsüngrem asoshi Süia Aoba benjong akatsü arutsüla ta sangdonga yoktsü parnoki ozüng ka yanglu; kechiyong zülua aliba amajibo telok tulu mesentepdang. 6Anungji Israel aser Yihuda ajak dangi chuba aser tongtipur nungi, aser chubai melaba ama, Nenok Israel chirtem, Kibuba, Abraham, Isak, aser Israel Tsüngrem dangi meyipang, angji Asiria chubatem ket nungi nenok jenbua alirtem dangi meyipa arutettsü ta zülua shiti benertem ao. 7Nenok tsürabur aser nenok adianutem ama teli, shirnoki parnok Kibuba Tsüngrem dang temulung melemi liasü, ibayongji nenoki anguba amaji, pai parnok azüngmeyaka kümdaktsü. 8Nenok tsüraburtem ama tekong temerang saka nenok sasa Kibuba nem bendanga agüjang, aser pa tenla kidangi arung, koba pai teti asoshi meshiteta lir, aser nenok nungi pa tetsübutsü ain adokba meyipa oadoktsü asoshi Kibuba nenok Tsüngrem tenzükang. 9Kechiyong nenoki Kibuba dangi meyipra, nenok adianutem aser nenok chirtem tapurtemi aochitsü, aser iba limai meyipa arutsü. Kechiyong Kibuba nenok Tsüngrem taochi aser yimlibilem lir, aser nenoki pa dangi meyipra, pa tejak nenok nungi memeyiptsü.

10Anungji obelenertem yimti ka nungi yimti ka ajanga, Zebulun tashi ao; saka parnoki parnok menütsü aser sensatsü, 11Asher, Manase, aser Zebulun nisungtem ishika dang parnok sasa ajemalu aser Yirusalemi aru. 12Chuba aser tongtipuri Kibuba o agi melaba ama inyaktsü asoshi temulungjang ka parnok nem agütsütsü Tsüngrem teka Yihuda madak liasü.

Süia Aoba Benjong Amungba

13Nisung jenti, piyazü meinokba am benjong akatsü asoshi ita tanabuba nung Yirusalemi sentep. 14Parnoki külemi inyaktsü tenzük aser Yirusalem nung aliba tenladakji agien, aser liangmesen arongtsü asoshi tenladak aliba ajakji parnoki bener ao aser Kidron lenten nung enoktsü. 15Aser ita tanabuba anogo terpezübuba nung parnoki Süia Aoba benjong san chanuji tepset. Aser putirtem aser Levitem maksüdaktsü, anungji parnok sasa meshitet, aser Kibuba kidangi tarongba tenla bener aru. 16Tsüngrem nisung Mosa ozüng amato parnoki pei mapa nung noktak; Levitem ket nungi agizükba azüji putirtemi rüklok. 17Kechiyong tesenteper rongnung aika pei sasa memeshitet liasü; anungji Levitemi, memerüki aliba nisung shia asoshi, aji Kibuba madang temeshi kümdaktsütsü Süia Aoba benjong san chanuji tepset. 18Kechiyong Efraim, Manase, Issakar, aser Zebulun nungi nisung jenti memeshiteti liasü, saka zülua aliba ama mesüi Süia Aoba benjong achi. Saka Hezekiai parnok asoshi sarasadema ashi, 19“Nisung shibai Kibuba par tsürabur Tsüngrem, pei mulungjang agi bushir, merüktettsü atema tenla ki tetuyuba ozüng amato mesüaka, tajung Kibubai nisung shia dang tai tokangma.” 20Aser Kibubai Hezekia dang angashi, aser nisungtemji anebtsü. 21Aser Yirusalem nung alirtemi tepela tulu agi piyazü meinokba am benjongji anogo tenet amung; aser Levi aser putirtemi anogo shia, parnok tashi ajak agi Kibuba dang tenüng asang. 22Hezekiai Levitem shirnoki Kibuba mapa junga tangshia inyak ajak dang ajungshia jembi. Anungji nisungtemi anogo tenet, yimjung tenla tepseta parnok tsürabur Tsüngrem Kibuba nem tenüngsang agüja benjongji achi.

23Idangji tesenteper ajongai ano tenetnü benjongji akatsü mulungtet, aser tenetnü tepela agi amung. 24Kechiyong Yihuda chuba Hezekiai tesenteper nem nashi pungchi meyi ka aser san meyi tenet tenla asoshi agütsü, aser tongtipurtemi tesenteper nem nashi pungchi meyi ka aser san meyi ter agütsü. Aser putir aikati parnok sasa meshitet. 25Aser Yihuda nungi tesenteper ajonga, aser Levi nunger aser putirtem, Israel nungi adokba tesenteper ajonga, aser Israel lima nungi arua amungertem, aser Yirusalem nung arua amungertem, pelatep. 26Anungji Yirusalem nung tepela tulu liasü, kechiyong Israel chuba Dawid chir Solomon mapang nungi iba amai Yirusalem nung melidang. 27Anungji putirtem aser Levitemi arameso aser nisungtem moatsü, aser parnok ola angashi, aser parnok sarasademba kotak temeshidak tashi atu.

2 PUTIPUYANG 31

Par Yimsü Asentenshiba

(2 Ch. 18.14)

1Tang kodang ya ajak renem, dena alir Israel ajak Yihuda yimtitem bushia ao aser temeshi tongshitem lensüka yok aser tekülemdak tenem aser tenladak Yihuda aser Benjamin, Efraim aser Manase ajak nung parnoki ajakji mesamatsü tashi raksatsü. Idangji Israel ajak pei yimtitemi, nisung shia pei akaba bushia shilang.

2Hezekiai putirtem aser Levitem telemsa shimtet, nisung shia pei telemsa mapa balala, putirtem aser Levitem tarongba tenla aser yimjung tenla asoshi, Kibuba tanendak aser süngkhüm tenzüktsü aser tepela aser tenüngsang agütsütsü. 3 Chubai pa akaba nungi tenlabaji tarongba tenla asoshi liasü; anepdang aser nikongdang tarongba tenla, aser amungnü asoshi tarongba tenla, ita tasen, benjongbentsü telemtet, Kibuba ozüng nung zülua aliba ama inyak.

4  Pai Yirusalem nung alir dang putirtem aser Levitem nem parnok shilem agütsütsü mela, aji oda parnokia Kibuba ozüng nung tashi aittsüsa aser nendaka tenzüktsü. 5Temelaba ozüngji prokshidang, Israel nungeri mezüng atangba tsük jenti, yi, totzü, ninang mojitzü, aser alu nungi adokba ajak sempet agütsü; aser parnoki kechisarena nung ter shilem jenti bener aru. 6Aser Yihuda yimtitem nung aliba Israel aser Yihuda nübur nashi aser san ter shilem aser Kibuba parnok Tsüngrem nem bendanga agüja aliba oset bener aru, aser itemji nangtena toktsü. 7Ita tasembuba nung parnoki bendena alibaji telong küma tenzük aser itemji ita tenetbuba nung renem. 8Kodang Hezekia aser pa tongtipuri nangtena alibaji angu, parnoki Kibuba aser par Israel moatsü. 9Aser Hezekiai putirtem aser Levitem dang bendena aliba indangji asüngdangtep. 10Temaba putir Azaria shiba Zadok kidong nungi liasü, pai pa dang langzü, “Parnoki Kibuba kidangi tenla bener aruba mapang nungi asenoki chiogo aser periogo, aser jenti anüngogo; kechiyong Kibubai pei nübur moatsüogo, aji asünung asenok jenti anünga kar.”

Putir aser Levitem Mapalem Tenzükshiba

11Idangji Hezekiai parnok dang Kibuba kidang taktang renemtsü mela, aser parnoki renem. 12Aser parnoki temulung agüja tenla, ter shilem, aser bendanga agütsüba osettem bener aru. Item madak ketdangpur tongtibaji Levi nunger Konania liasü, aser tenu Shimei tanabuba liasü; 13Yehiel, Azazia, Nahat, Asahel, Yerimot, Yozabad, Elil, Ismakhia, Mahat, aser Banaia itemji, Hezekia chuba aser Tsüngrem kidang par tongtiba Azaria shimtetba amato, Konania aser tenu Shimei kübok teyaritepertem liasü. 14Aser Levi nunger Imna chir Kare, anüdoklen süngkhüm anüksangji Tsüngrem nem temulunger tenla agütsüba madak kibur liasü, Kibuba asoshi rizünga aliba tenla aser temeshitiba osettem lemsatsütsü. 15Eden, Miniamin, Yeshua, Shemaia, Amaria, aser Shekania parnoki temulung agüja yimtitem nung putir parnok adianutem shilem lemsaja, tain aser tanur kasa, telemsa balala agi, 16kidong otsü agi zülua alir dak alema, teburtem küm asem nungi temalen, shirnok Kibuba kidangi anogo shia pei mapa ama aitdir, parnok pei mapa amato tenzüktsü asoshi, parnok telemsa telemsa ama, yaria liasü. 17Putirtem tenüng zülubaji parnok tebu nunger ren nungi liasü; Levi nungerji küm metsü tain aser tamalen pei mapa amato telemsa telemsa agi liasü. 18Putirtem parnok pei tanur tilatem, parnok kibutsütem, parnok jabasotem, aser parnok jalatem, teloki ajonga tenüng zülua liasü, kechiyong parnok sasa meshiteta temulung lema liasü. 19Aser Aron jabasotem, putirtem, shirnok yimli nung liasü parnok meyong yimtitem nung liasü, yimti ishika nung putir rongnung tebur shia aser Levi rongnung shirnok tenüng zülua liasü parnok nem shilem agütsütsü tenüng agüja liasü.

20Yamaji Hezekiai Yihuda ajak nung inyak; aser Kibuba pa Tsüngrem madang kechi tajung aser shitak aser temulung alemba liasü aji inyak. 21Aser Tsüngrem ki mapa nung pai anitakba mapa ajak, ozüng aser temelaba amato, pa aser Tsüngrem bushiba nung pai amtakba mapa shia pai pa mulungjang ajak agi inyak aser azükaru.

2 PUTIPUYANG 32

Asiriai Yirusalem Amokmerenba

(2 Ch. 18.3—19.34; Isa. 36.1-22; 37.8-38)

1Iba mapa aser item temulung lemtetba mapa sülen Asiria chuba Sennakerib arua Yihuda amak aser pai akoktsü ta bilema mitsa yangluba yimtitemji anema arü amen. 2Aser kodang Hezekiai Sennakerib arua Yirusalem anema raratsü asoshi lir ta ajitet, 3pai yimti temalen tzübu aliba tzüji anendaktsütsü asoshi par tanishirtem aser temerangertem den bangjemtep; aser parnoki pa yari. 4Aser nisung jenti sentep aser parnok tzübu ajak aser linük ajanga ayimba ayongji anendakja ashi, “Kechiba Asiria chubatemi arua tzü jenti angutsüla?” 5Pai mulung mulunga inyakdaktsü, aser raksa-a aliba jara ajak meso, aser iba manung lungki yangerlok, aser iba temalen pai jara tanga yanglu; aser pai Dawid yimti Millo tashi itdaktsü. Pai ano nok o nü aser jong jenti yanglu. 6Aser pai nübur madak arkotongtem yutsü, aser yimti süngkhüm amungdang parnok pa dangi sentepdaktsü, aser parnok sünepdakja jembia ashi. 7“Tashi itang aser pelashishia liang, Asiria chuba asoshi tsübua mesüra aoksa-a teli, mesüra pa den aliba telok ajakji tetsübu, kechiyong pa den aliba dang nungi asenok den aliba tashi tuluba ka lir: 8pa den shi nok o nü dang lir, saka asen denbo asenok yaritsü aser asen tongbang raratsü Kibuba asen Tsüngrem lir.” Aser Yihuda chuba Hezekia o nungji nisungtemi temulung alem.

9Iba sülenji Asiria chuba Sennakeribi pa tenzükertem den pa Lakhis nung liasü. Pai Yihuda chuba Hezekia dangi yok, aser Yirusalem nung aliba Yihuda ajak dangi yoka ashi, 10Yamai Asiria chuba Sennakeribi ashir, “Yirusalem amakba tizüka atatsüsa nenoki kechi nung temulung alemer? 11Ayawara aser tzüra agi südaktsütsüsa Asiria chuba ket nungi asen Kibuba Tsüngremi asenok kümzüktsü ta shia Hezekiai nenok mesüzüker masü no? 12Iba Hezekia yagi, nenoki tenladak ka nung külemtsü, aser iba manung nenoki, liangmesen arongtsü, ta Yihuda aser Yirusalem dang mela-a pa tekülemdak tenem aser tenladak bener odaktsü masü no? 13Linük nübur ajak dang ni aser kübu nungeri kechi inyak nenoki memetet no? Linük nung kin tsüngremtemi kü ket nungi parnok lima kümzüktsü koka liasü ama? 14Nenok Tsüngremi kü ket nungi nenok kümzüktsüsa, kübu nungeri meshimeshia samatsütsü, kintem tsüngrem ajak rongnung kü ket nungi pei nübur kümzüktsü koka Tsüngrem shiba liasü? 15Tang anungji Hezekiai nenok tashiokdaktsü, mesüra iba amai nenok temesüzükdaktsü, mesüra nenoki pa dang tamang; kechiyong kin kecha tsüngremia mesüra yimli-i kü ket nungi, aser kübu nunger ket nungi pei nübur kümzüktsü koka maliasü süra, nenok Tsüngrem iang kechi kü ket nungi nenok kümzüktsü?” 16Aser pa tenzükertemi ano tali Kibuba Tsüngrem anema aser Hezekia anema jembi. 17Ano pai, Israel Tsüngrem, Kibuba sensatsütsü shiti ka zülua ashi, “Kin tsüngremtemi parnok pei nübur kü ket nungi mekümzükba amaji, yamaji Hezekia Tsüngremi pei nübur kü ket nungi mekümzüktettsü.” 18Aser parnok amok merena, aser parnok timtemdaktsütsü parnoki ola tulu agi Yihuda nunger o agi jara nung Yirusalem nunger dang, parnoki yimtiji agitsü ta ayimten. 19Aser parnoki Yirusalem Tsüngrem, nisunger teka agi inyakba mapa kümdakja jembi.

Sennakerib Akokba Aser Pa Asüba

(2 Ch. 19.35-37)

20Hezekia chuba, aser Amoz chir Isaiai, iba atema sarasadem aser Tsüngrem dang ayimten. 21Aser Kibubai kotak tenyar ka yok, pai Asiria nunger tanendak tashi tulu nisung ajak, tanishirtem aser arkotongtem leptokadok. Anungji pai pei linüki akseta shilang. Aser kodang pai pei tsüngrem kidangi ait, pei chirtem kari yangji pa nok agi lepset. 22Asiria chuba Sennakerib ket nungi, aser tangar ket ajak nungi, Kibubai Hezekia aser Yirusalem nübur kümzük, aser ajaklen parnok anisüngzük agütsü. 23Aser aikati Yirusalemi, aser Yihuda chuba Hezekia dangi senti oset sempet bener aru; anungji iba mapang nungi kin ajak tsüngdang pa ulutsü.

Hezekia Shirangba

(2 Ch. 20.1-11; Isa. 38.1-8)

24Item anogo nung Hezekia tasütsüsa shirang; aser pai Kibuba dang sarasadem; aser pai pa dang jembi, aser pa nem temaitsü ka agütsü. 25Saka Hezekiai pa nem tajangzük agütsüba ama lepa magütsü; kechiyong pa mulungjang asüküma liasü; anungji pa madak aser Yihuda aser Yirusalem madak terasaba liasü. 26Saka Hezekiai pa mulungjang asükümba nungi pa aser Yirusalem nung alirtem ajemalua aküm. Anungji Hezekia anogo nungbo Tsüngrem terasaba parnok dangi maru.

Hezekia Takatait Aser Takok

(2 Ch. 20.12-21; Isa. 39.1-8)

27Hezekia rongsen jenti aser tetushi liasü. Aser pai item asoshi terizüngdak taribi asoshi, aser teronem menemtsü asoshi, aser jong asoshi, aser senti chipo-anpo tapu ajak asoshi yanglu. 28Tsük, yi aser totzü anguba asoshi terizüngdak; aser shiruru tapu ajak aser san telok ki yanglu. 29Yamaji pei asoshi yimtitem aser san telok aser nashi telok asoshi jenti yanglu; kechiyong Tsüngremi pa nem rongsen jenti agütsü. 30Iba Hezekiaisa Gihon tzütem temaba tzübu noktang, aser itemji Dawid yimti anüolen jagi indang indanga mesür alu. Aser pa mapa ajak nung Hezekia azükaru. 31Aji saka Babilon chubar tenyartem shirnoki pa dangi linük nung temaitsü inyakba indang asüngdangteptsü yok, Tsüngremi pa mulungjang nung kechi ali ajak metettsü asoshi tendangtsü oda toktsü. 32Tang Hezekia mapa tanüngbaji, aser pa mapa tajungji, ajiang, itemji Yihuda aser Israel chubatem kaket nung, Amoz chir Isaia ainkar mangdang nung zülua lir. 33Aser Hezekia tebu nunger den mejang, aser parnoki pa Dawid chirtem leper leni atulen rema yutsü. Aser Yihuda aser Yirusalem alir ajaki pa asüdang tetushi sayu. Aser par chir Manase pa melen chuba.

2 PUTIPUYANG 33

Manase Chuba Yimsüsüba

(2 Ch. 21.1-9)

1Manase chubatsü tenzükdang pa küm terana liasü; aser pai Yirusalem nung küm tenemer pungu tashi chuba. 2 Aser Israel chirtem madang nungi Kibubai aridokba tesempatsü kintem mapa amaji, kechi Kibuba madang majung itemji inyak. 3Kechiyong tebu Hezekiai raksatsüba tenem tekülemdakji pai tanaben yanglushi; aser Baaltem asoshi pai tenladak yanglu, aser Ashera yanglu, aser anüng nung aliba ajakji külem, aser parnok tenzük. 4 “Yirusalem nung kü tenüng teti alitsü” ta Kibubai shia aliba Kibuba kidang pai tenladak yanglu. 5Aser Kibuba ki kilempok anasa pai anüng nung aliba telok ajak asoshi tenladak yanglu. 6Aser Hinnom chir lenten nung pai pei chirtem mi nung tenla asoshi rongdaktsü; arasentsür tetakzükba aser atakatema sarasademba inyak, aser arasentsür mapa inyak, arasentsür tanela alir dangi, aser sangmongbi dangi ao; pai Kibuba tsüngdang pa ain adokdaktsütsü tamajung jenti inyak. 7 Aser pai yangluba noksa Tsüngrem kidang ayu iba tenla ki indang Tsüngremi Dawid aser Solomon dang ashi, “Iba kidang aser Yirusalem nung koba Israel kin ajak nungi ni shim, ni kü tenüng teti ayutsü, 8aser Israel puri dang ozüng ajak, telatet ozüng aser Mosa ajanga agütsüba yimsü ozüng ni parnok dang melaba ajak kümdanga inyakdi süra, joko ni nenok tsürabur nem agütsüba lima nungi Israel tetsüng magiendaktsütsü.” 9Manase-i Yihuda aser Yirusalem alir mesüzük aji asünung Israel jakdang Kibubai kintem shirnok samatsü parnok dang nungi tali tamajungba inyak.

Manase Temulung Meyipba

(2 Ch. 21.17-18)

10 Kibubai Manase aser pa nübur dang jembi, saka parnoki temulung magütsü. 11Anungji Kibubai parnok madaki Asiria temeranger walunirtem anir aru, aser parnoki Manase teni nung jui enoktsü aser pa alener Babiloni bener aru. 12Aser kodang pa timtem tejashi nung liasü, pai Kibuba pa Tsüngrem yimli angutsü mepishi aser pa tsürabur Tsüngrem madang kanga ajemalua aküm. 13Pai pa dang sarasadem, aser Tsüngremi pai mepishiba agizük aser pa sarasadem angashi, aser tanaben pa yimli Yirusalemi anir aru. Idangji ang Manase-i Kibubaji Tsüngrem ta metet.

14Tesülen pai Gihon anüolen Dawid yimti nung Ango Süngkhümi ailen jara temaba yanglu, aser aji Ofel tashi yanglua ao, aser aji kanga ojia yanglu; pai ano Yihuda mitsa aliba yimti ajak nung walunirtem ayu. 15Aser Kibuba kidang nungi pai bendanger tsüngremtem aser süngyangluji bener ao, aser Yirusalem aser Kibuba ki tenemtem nung pai yangluba tenladak ajakji, pai yimti tezülen itemji endokadok. 16Pai ano Kibuba tenladak yanglushi aser iba manung yimjung tenla aser tenüngsang tenla tepseta tenla; aser pai Yihuda dang Kibuba Israel Tsüngrem tenzüktsü mela. 17Aji saka nisungtemi ano tenem tekülemdak nung tenla agütsü, saka aji Kibuba parnok Tsüngrem dang liasü.

Manase Asüba

(2 Ch. 21.17-18)

18Tang tanüngba Manase mapa, aser Tsüngrem dang pai sarasademba, aser Kibuba Israel Tsüngrem tenüng nung pa den tangurtemi jembiba otem, ajiang, itemji Israel chubatem putipuyang nung zülua lir. 19Aser pai sarasademba, aser koda Tsüngremi pa temepishiba agizük, aser pa temenen, temulung alemba; aser pa sasa ajemalua makümdang pai tenem tekülemdak yangluba, Asherim aser süngyanglu noksa ayuba, ajiang, itemji putipuyang kaket nung zülua lir. 20Manase pa tsürabur den mejang, aser parnoki pa par kidang arem, aser par chir Amoni pa melen chuba.

Amon Yimsüsüba Aser Asüba

(2 Ch. 21.19-26)

21Amon chubatsü tenzükdang küm metsür ana liasü, aser pai Yirusalem nung küm ana tashi chuba. 22Pai Kibuba tsüngdang kechi majung liasü tebu Manase-i inyakba amato inyak. Tebu Manase-i yangluba süngyanglu ajak nem tenla agütsü, aser parnok tenzük. 23Tebu Manase pei sasa ajemaluba amato pai Kibuba madang pa sasa ajemalua maküm, saka iba Amon yagi tali taliang tai bendenlok. 24Aser pa kilirtemi pa anema tasa asa aser par kidang pa tepset. 25Saka linük alirtem shirnoki Amon chuba anema tasa asa, parnokji tepset; aser nüburtemi par chir Yosia pa melen chuba kümdaktsü.

2 PUTIPUYANG 34

Yosia Yimsüsüba

(2 Ch. 22.1-2)

1  Yosia chubatsü tenzükdang küm ti liasü, aser pai Yirusalem nung küm semerka chuba. 2Kibuba madang kechi shitak liasü pai inyak, aser tebou Dawid lenmang nung jaja; aser pai tajichi mesüra tabeleni memeyip.

Süngyanglu Külemba Anema Yosiai Noktakba

3Kechiyong pa chubaba küm tibuba nung pa ano tanur ka dang alidang, pai tebou Dawid Tsüngrem bushitsü tenzük; aser küm terana buba nung Yihuda aser Yirusalem nungi tenem tekülemdak, Asherim aser süngyanglu noksa chitetba aser mulutetba bushiteta endoktsü pai tenzük. 4 Aser parnoki pa tsüngdang Baal tenladak raksa, aser iba manung noktaka aliba liangmesen tenladak lepzüka yok; pai Asherim, teyangluba aser mulutetba noksatemji anüka raksatsü aser pai itemji auyi kümdaktsü aser shirnoki item dang tenla parnok leper manung aji paloktsü. 5 Pai ano putirtem teretji tenladak manung arong, aser Yihuda aser Yirusalem meshitet. 6Aser Manase, Efraim, aser Simeon yimtitem nung, Naftali tashi oagi, item temeket teraksa manung, 7pai tenladaktemji akusatsü aser Ashera aser noksatemji anük-anüka akusa, aser Israel ajak nung liangmesen tenladak ajak lepzüka yok. Ajiser pa Yirusalemi meyip.

Kaket Ngutetba

(2 Ch. 22.3-20)

8Tang pa chubaba küm terti buba nung, pai linük aser kiji meshiteter külen, Azalia chir Shafan, yimti governor Maaseia, Yoahaz otsü zülusang chir Yoa, Kibuba pa Tsüngrem ki yanglushitsü pai yok. 9Temaba putir Hilkia dangi parnok aru aser Kibuba kidangi bener aruba senji bendanga agütsü, aji Levitem, kima tanükertemi Manase aser Efraim nungi aser Israel tanüngba ajak nungi aser Yihuda aser Benjamin ajak nungi aser Yirusalem alirtem nungi sarutenba liasü. 10Parnoki aji Kibuba ki ketdangpur, shirnoki mapa inyakertem repranger, parnok nem agütsü; aser Kibuba kidang mapa inyakertemi aji ki melenshitsü aser yanglushitsü asoshi agütsü. 11Parnoki aji mistritem nem aser ki yanglurtem nem, lung tsüngteta aliba aser tongnü asütsü, aser süng pempi asütsü, aser Yihuda chubai shizüka aotsü toktsüba ki asoshi agütsü. 12Aser nisungtemi mapaji temulung agüja inyak. Aser Yahat aser Obadia, Levi nunger, Merari chirtem; aser Zekaria aser Meshullam, Kohat nunger chirtem, parnok madak reprangtsü pai toktsü. Levi nunger kentenba kongki ashir ajak, 13khu abenertem madak liasü, aser mapa tapu shia inyakba ajak anishi; aser Levi nunger karbo tezülur, aser tongtipur, aser süngkhüm anükertem liasü.

14 Kibuba kidangi bener aitba senji parnoki bener adokdang, Mosa ajanga agütsüba Kibuba ozüng kaket Hilkia putiri angu 15Idangji Hilkiai tezülur Shafan dang ashi, “Kibuba kidang ni ozüng kaketji nguogo;” aser Hilkia kaketji Shafan nem agütsü. 16Shafani kaketji chuba dangi bener aru, aser ano chuba dang ashi, “Ne tenzükertem nem agütsüba ajak parnoki inyakdagi. 17Kibuba kidang anguba sen ajak parnoki azüngtetogo aser aji ketdangpur aser mapa inyakertem nem agütsüogo.” 18Idangji tezülur Shafani chuba dang ashi, “Putir Hilkiai kü nem kaket ka agütsü.” Aser Shafani aji chuba madang azüng.

19Chubai ozüng otemji angashidang pai pa süoshi shisa. 20Aser chubai Hilkia, Shafan chir Ahikam, Mika chir Abdon, tezülur Shafan, aser chubar kilir Asaia dang ashi, 21“Oang, Kibuba dang ni asoshi aser Israel aser Yihuda nung anünga alirtem asoshi, kaket bena aruba indangji asüngdangang; kechiyong asenok dak meküploktsüba Kibuba terasaba ya tulu lir, kechiaser iba kaket nung züluba ama inyaktsü asen tsüraburtemi Kibuba o mebenshi.”

Hulda Ainkar Dang Asüngdangyaba

22Anungji Hilkia aser shirnok chubai yoka liasü, sobutsü taktang anüksang Hasra chir Tokhat jabaso Shallum kibutsü Hulda ainkarla dangi ao, tang la Yirusalem tanabuba talidak kidang liasü, aser la dang iba indang jembi. 23Aser lai parnok dang ashi, “Yamai Kibuba Israel Tsüngremi ashir; Kü dangi nenok yokba nisung dangji shiang. 24Yamai Kibubai ashir, Ajiang, ni iba linük aser iba nung alirtem madak tamajung arudaktsütsü, Yihuda chuba madang azüngba atakatem ajakji arudaktsütsü. 25Kechiaser parnoki ni senzüka toktsü aser parnok ket agi inyakba ajak agi ni jashidaktsütsü asoshi, parnoki tangar tsüngremtem nem liangmesen rongtsüogo, anungji kü terasaba iba madakji mekeploktsütsü aser meremseptsü. 26Saka Yihuda chuba shibai Kibuba dang asüngdangtsü nenok yok, yamaji nenoki pa dang shiang. Yamai Israel Tsüngrem Kibubai ashir; Nai angashiba otem indangji, 27ne mulungjang meyipa ali nungji aser iba linük aser iba nübur indang anema angashidang nai Tsüngrem madang ajemaluba yong, aser nai kü madang ajemalua aküm, aser ne süoshi shisa aser kü madang ajeb nungji, aji angashiogo ta Kibubai ashir. 28Ajiang, ni na tsürabur dangi bener arutsü, aser na pei leperi yimjung nung arudaktsütsü, aser tamajung koba ni iba talidak aser iba nübur madak bener arutsü ali aji ne tenük agi mangutsü.” Aser parnoki chuba dangi oji meyipa bener aru.

Tezüngzüktepba Akangshiba

(2 Ch. 23.1-20)

29Idangji chubai yok aser Yihuda aser Yirusalem tambur ajak sentepdaktsü. 30Aser chubai Yihuda nisung ajak aser Yirusalem alir aser putirtem aser Levitem, nisung ajak tulu aser tila, anir Kibuba kidangi atu; aser nisung ajaki angashia tezüngzüktepba kaket otem koba Kibuba kidang angu aji pai azüng. 31Aser chubai pei talidak noktak aser Kibuba sülen jajatsü aser pa temelabatem benshitsü aser pa kulitem aser pa telatet ozüngtem pa mulungjang aser pa nela ajak agi, iba kaket nung zülua aliba tezüngzüktepba inyaktsü Kibuba madang tezüngzüktepba yanglu. 32Idangji pai Yirusalem nung aser Benjamin nung dena alirtem iba nungji noktakdaktsü. Aser Yirusalem alirtemi Kibuba parnok tsürabur Tsüngrem tezüngzüktepba amaji inyak. 33Aser Israel chirtem meyong linük ajak nung tesempatsü ajak bener oadok, aser Israel nung alir ajak Kibuba parnok Tsüngrem tenzükdaktsü. Pa anogo ajak nung parnoki Kibuba parnok tsürabur Tsüngrem nungi meyipa moi anidak.

2 PUTIPUYANG 35

Süia Aoba Benjong Amungba

(2 Ch. 23.21-23)

1Yosiai Yirusalem nung Kibuba asoshi Süia Aoba Benjong amung; aser parnoki ita mezüngbuba anogo terpezü buba nung Süia Aoba Benjong san chanuji tepset. 2Aser pai putirtem parnok pei mapa nung shimtet aser Kibuba kidang mapa nung parnok ajungshi. 3Aser Levitem shirnoki Israel ajak sayu aser shirnok Kibuba dang temeshi liasü parnok dang pai ashi, “Temeshi Süngdenji Dawid chir Solomon, Israel chubai yangluba kidang yuang; joko nenok tapu nung aputsü tenüngdaktsü mali. Tang Kibuba nenok Tsüngrem aser pa nübur Israel tenzükang. 4 Israel chuba Dawidi züluba amato aser par chir Solomoni züluba amato nenok sasa nenok tebu semchir-ren agi telemsa renemang. 5Aser nenok adianu chirtem tebou semchir ren agi lemsaba amaji temeshidak noktakang, aser Levitem tebou semchir shia shilem ka lemzükjang. 6Süia Aoba Benjong san chanu tepsetang, aser nenok sasa meshitetang, aser nenok adianutem asoshi Mosa ajanga Kibuba o amato renemang.”

7Yosiai nüburtem chirtem nem tenla san chanutem, nabong chanutem shiruru telok nungi meyi semer, aser nashi pungchi meyi asem agütsü; itemji chubar meyong nungi liasü. 8Aser par tongtipuri mulungben agi nisungtem nem, putirtem nem aser Levitem nem agütsü. Hilkia, Zekaria, aser Yehiel, Tsüngrem kidang tongti ketdangpurtemi putirtem nem Süia Aoba Benjong asoshi san chanu aser nabong chanu meyi ana noklang trok aser nashi pungchi noklang asem agütsü. 9Ano Kanania, aser par adianu Shemaia aser Nethanel, aser Hashabia aser Yeiel aser Yozabal, Levi nunger tongtipuri, Levitem nem Süia Aoba Benjong tenla san chanu aser nabong chanu meyirijang pungu aser nashi pungchi noklang pungu agütsü.

10Yamaji mapa renem, aser putirtem pei talidak noktak, aser Levitem chubai melaba ama pei telemsa amato noktak. 11Aser parnok Süia Aoba Benjong san chanu tepset, aser parnok ket nung agizükba azü putirtemi rüklok aser Levitemi itemji teküp asa. 12Aser Mosa kaket nung zülua aliba ama, Kibuba nem tenlatsü asoshi oda itemji parnoki chirnur tebou semchirtem telemsa nem lemsa-a agütsütsü asoshi parnoki tarongba tenlatemji bendanga ayu. Parnoki nashi pungchitemjia yamaji lemsa. 13 Aser yimsü amato parnoki Süia Aoba Benjong san chanuji mi nung awang; aser temeshi tenlatemji chipo nung, kerapo nung, aser susa nung meta, aser yakta telokti dangi bener ao. 14Tesülen parnoki pei asoshi, aser putirtem asoshi renem, kechiaser Aron chir putirtem aonung matong tashi, tenla sabang nung temo aser tarongba tenla asoshi mazüngi liasü; anungji Levitemi parnok asoshi aser Aron chir putirtem asoshi renem. 15 Dawidi melaba ama kentenertem Asaf chirtem pei talidak liasü, aser Asaf, Heman, aser Yeduthun chubar tanishir, aser kiküm anükertem süngkhüm shia nung liasü; parnok pei mapa nung toktsür aotsü tenüngdaktsü maliasü, kechiyong parnok adianu Levitemi parnok asoshi renem.

16Anungji Kibuba mapa ajak anogo kasa nung, Süia Aoba Benjong amungtsü, Kibuba tenladak tarongba tenla agütsütsü Yosia chubai melaba ama inyak. 17 Aser tarurtem Israel chirtemi iba mapang nung Süia Aoba Benjong, aser piyazü meinokba am benjong tenetnü amung. 18Aser Samuel ainkar anogo nungi Israel nung iba amajibo Süia Aoba Benjong malidang; mesüra Yosiai amungba amaji Israel chuba katia Süia Aoba Benjong, putirtem, aser Levitem, aser Yihuda aser Israel ajak, aser Yirusalem alir tatenertem lia memungdang. 19Yosia chubaba küm tertibuba nung iba Süia Aoba Benjong amung.

Yosia Yimsüsüba Tatembang

(2 Ch. 23.28-30)

20Item ajak sülenji, kodang Yosiai tenla ki renema liasü, Ijip chuba Neko Karkhemis anema raratsü Eufrata leni atu; aser Yosia pa anema ao. 21Saka pai pa dangi otongdartem yoka ashi, “Na Yihuda chuba, ni ne den kechi inyaktsü? Tanü ni na anema aru masü, saka koba kin den ni rarar iba anema lir; aser Tsüngremi ilungang ta kü dang melaogo. Tsüngrem, shiba kü den lir, pai na samaja lir pa anema menoktaki anenang.” 22Aji saka Yosiai pa nungi tejak memeyip saka pa den raratsü asoshi pa sasa miimshia inyak, aser Tsüngrem bang nungi aruba, Neko otemji manga, aser Megiddo lenten nung raratsü aru. 23Aser lijak ameri Yosia chuba dak aka; aser chubai pei kilirtem dang ashi, “Ni ajongnenang, kechiyong ni kanga yiruogo.” 24Anungji pa kilirtemi pa talungtsü tanabuba nungji yutsü, aser Yirusalemi pa bener aru; aser yangji pa asü, aser tebou nunger leper nung pa arem. Aser Yihuda aser Yirusalem ajaki Yosia asoshi mang ayim. 25Aser Yerimiai Yosia asoshi mang ayim; aser ken tener tetsür-tebur ajaki tanü tashi Yosia indang mang yima jembir aser parnoki Israel nung itemi yimsü ozüng ka kümdaktsü; aser ajiang, itemji Aiatai nung zülua lir. 26Tang Yosia mapa tanüngbaji, tetenzük aser tatem, aser pa mapa tajungtemji Kibuba ozüng nung zülua aliba ama, 27ajiang, itemji Israel aser Yihuda Chubatem kaket nung zülua lir.

2 PUTIPUYANG 36

Yehoahaz Yimsüsüba

(2 Ch. 23.30-35)

1Idangji linük nüburi Yosia chir Yehoahaz, ania arua tebu melen Yirusalem nung chuba kümdaktsü. 2Yehoahaz chubatsü tenzükdang pa küm metsür asem liasü; aser pai Yirusalem nung ita asem chuba. 3Aser Ijip chubai paji Yirusalem nungi atsüngtok aser taribi seret semermer ozükba noklang ka aser hon seret semer ozükba ka putisü agi. 4 Aser Ijip chubai tenu Eliakim Yihuda aser Yirusalem madak chuba kümdaktsü, aser pa tenüng Yehoiakim ta melendaktsü. Aser Nekoi tedi Yoahaz agi aser Ijipi pa bener ao.

Yehoiakim Yimsüsüba

(2 Ch. 23.36—24.7)

5  Yehoiakim chubatsü tenzükdang küm metsür pungu liasü; aser pai Yirusalem nung küm terka chuba; aser pai Kibuba pa Tsüngrem madang kechi majung aji inyak. 6 Pa anema Babilon chuba Nebukadnezzar atu, aser Babiloni pur aotsü yinzü agi pa alen. 7Nebukadnezzari ano Kibuba kidang marok-ausutem Babiloni bener ao, aser itemji par chuba kidang ayu. 8Tang Yehoiakim mapa tanüngbaji aser pai inyakba tesempatsütemji, aser kobasa pa dak ajitet, ajiang, itemji Israel aser Yihuda Chubatem Kaket nung zülua lir; aser par chir Yehoiakini pa melen chuba.

9Yehoiakin chubatsü tenzük dang küm terti liasü; aser pai Yirusalem nung ita asem ser anogo ter chuba aser Kibuba madang kechi majung aji inyak. 10 Tanaben küm meyipa arudang Nebukadnezzar chubai Kibuba kidang senti marok-ausutem dena, pa Babiloni bener ao, aser tenu Zedekia Yihuda aser Yirusalem madak chuba kümdaktsü.

Zedekia Yimsüsüba

(2 Ch. 24.18-20; Yer. 52.1-3a)

11Zedekia chubatsü tenzükdang küm metsür ka liasü; aser pai Yirusalem nung küm terka tashi chuba: 12aser Kibuba pa Tsüngrem madang kechi majung aji pai inyak; Yerimia shibai Kibuba bang nungi jembi, pa madang ajemalua maküm. 13 Pai Nebukadnezzar, shibai pa nem Tsüngrem tenüng nung azüngashidaktsü, pa anema noktak; saka Kibuba Israel Tsüngrem anema pai tekong aser pa mulungjang meranga aküm. 14Tanishir putir aser nisung ajaki iba amaji onsara temulung magütsü, kintem tesempatsü mapa sülen anitaka liasü; aser Kibuba ki koba pai Yirusalem nung meshitet aji parnoki menentsü.

Yirusalem Laoba

(2 Ch. 25.1-21; Yer. 52.3b-11)

15 Kibuba parnok Tsüngrem parnok dangi osang benertem, yakta shishili yokli ta asü; kechiaser pei nüburtem dak aser pa talidak pa taochi liasü: 16saka Kibuba ain adokba parnok anema madok tashi, tanebtsü makai maküm tashi parnoki Tsüngrem osang abenertem sensatsü, aser pa otem atalatsü, aser pa ainkartem tilu.

17  Anungji pai parnok madak Kaldea nunger chuba anir aru, pai parnok asangurtem parnok temeshidak kidang nok agi lepset, aser aiür-asangur mesüra tain mesüra asar, danga taochi mesayu; parnok ajak pai pa ket nung agütsü. 18Aser Tsüngrem kidang marok-ausu ajak, tulu aser tila, aser Kibuba kidang rongsen, aser chubar rongsen, aser par tongtipur meyong, item ajak pai Babiloni bener aru. 19 Aser parnoki Kibuba ki arong, aser Yirusalem jara raksatsü, aser chuba ki aliba ajak mi agi rongdok, aser marok-ausu tajungbo ajak raksatsü. 20Aser shirnok nok nungi jenbu, pai Babiloni bener ao; aser Persia yimli yimsüsüba matong tashi parnok pa aser par chirtem lar küma liasü. 21 Yerimia bang agi Kibuba o jembiba ataloktsü asoshi, linüki pei amungnü memungi liasü. Küm neter abensadaktsütsü asoshi linükji azüng azünga toktsüba anogo ajak, linüki amungnü mamung.

Cyrusi Tepuokdak Alir Chiokba

(Ezr. 1.1-4)

22Tang Persia chuba Cyrus mezüngbuba küm nung, Yerimia bang agi jembiba Kibuba O ataloktsü asoshi Kibubai Persia chuba Cyrus tanela ajongmeso, anungji pa yimli ajak nung pai o sangdong aser züludaktsü. 23 Yamai Persia chuba Cyrusi ashir, “Kibuba, anüng Tsüngremi, alima yimli ajak kü nem agütsüogo, aser Yihuda nung aliba Yirusalem nung pa nem ki ka yanglutsü kü dang melaogo, nenok rongnung shirsa pa nüburtem lir, Kibuba pa Tsüngrem pa den denangma, aser pa uludakjang.”