1 SAMUEL
1 SAMUEL
Okila
MEZÜNG SAMUEL kaket nung Israel nüburtem obendangertem mapang nungi
chubatemi yimsü asüba tatentep mapang ka nung atalokba indang zülu. Iba
temelenshiji tongtibang nisung asem dak atalokba angur. Obendangertem rongnung
tulutiba ka aser tatembangji Samuel, Israel mezüng chuba Saul, aser Dawid,
shiba lanuwa taküm aser mapa indang Samuel aser Saul otsü den meyoktepa angur.
Tejen Lai otsü kakettem nung anguba ama iba kaket nükjidong,
"Tsüngrem dak tamang yutetba ajanga takok, saka tashi mangaba ajanga
lendong aser tasüba bena arur" ta sayur. Iba indang KIBUBAi Eli putir
dangi osang yokba nungji kanga jangja-a angur - "Kü akhüm tsüburtem asoshi
ni akhüm tsübutsü, aser ni sensamasatsürtemji ni aitsütsü" (2.30).
Israel nung chuba tem indang nüburtem tebilemba balala kaket nungji
zülua angutsü, saka KIBUBAji dang shitakba Israel chuba, saka nüburtemi mepishi
nung KIBUBAi parnok atema chuba ka shimtettsü, Tongtibang kaji chuba saka
nüburtem saka, tematiba Tsüngrem obendangba kübok liasü (2.7-10). Aser
Tsüngremer ozüng kübok nisung ajak, oda takar aser sensaker ajak kasa talenba
kübok liasü.
Keta Alibatem
Samueli Israel O Bendangba 1:1-7:17
Saul Chuba Akümba 8:1-10:27
Saul Chuba Mezüng küm 11:1-15:35
Dawid aser Saul 16:1-30:31
Saul aser Par Jabasotem Asüba 31:1-13
Keta AlibatemSamueli Israel O Bendangba 1 SAMUEL 1:1-7:17Elkana Aser Par Kibong Shilo Nung 1 SAMUEL 1:1-8Hanna Aser Eli 1 SAMUEL 1:9-18Samuel Asoba Aser eshitetba 1 SAMUEL 1:19-28Hannai Atenba Tenϋngsang Ken 1 SAMUEL 2:1-11Eli Jabasotem 1 SAMUEL 2:12-17Shilo nung Samuel 1 SAMUEL 2:18-36KIBUBAi Samuel Ajaba 1 SAMUEL 3:1-4:1Tezüngzüktepba Sϋngden Filistia Nungeri Bener Aoba 1 SAMUEL 4:2-11Eli Asüba 1 SAMUEL 4:12-18Finehas Tebutsü Asüba 1 SAMUEL 4:19-22Tezüngzüktepba Sϋngden Filistia Nunger Rongnung 1 SAMUEL 5:1-12Tezüngzüktepba Sϋngden Meyipa Israeli Aruba 1 SAMUEL 6:1-12Beth Shemes Nung Ozüng Sϋngden 1 SAMUEL 6:13-21Samueli Israel Madak O Bendangba 1 SAMUEL 7:1-17Saul Chuba Akumba 1 SAMUEL 8:1-10:27Nüburtemi Chuba Ka Meshiba 1 SAMUEL 8:1-22Sauli Samuel Ajuruba 1 SAMUEL 9:1-24Samueli Saul Chuba Asϋtsϋ Shimtetba 1 SAMUEL 9:25-10:16Israel Ajaki Ngua Saul Chuba Shimba 1 SAMUEL 10:17-27Saul Chuba Mezϋng Kϋm 1 SAMUEL 11:1-15:35Sauli Amon Nunger Akokba 1 SAMUEL 11:1-11Saul Chuba Akϋmba Indang Sangdong 1 SAMUEL 11:12-15Samueli Nüburtem den Jembiba 1 SAMUEL 12:1-25Filistia Nunger den Raraba 1 SAMUEL 13:1-7Saul den Pilaba 1 SAMUEL 13:8-15Tongbang Asoshi Terenemba 1 SAMUEL 13:16-23Yonathan Tasü Tait Mapa 1 SAMUEL 14:1-15Filistia Nunger Akokba 1 SAMUEL 14:16-23Tongpang Sϋlen Tatalokbatem 1 SAMUEL 14:24-30Yimsϋ Yimbong Anema Aibelenba 1 SAMUEL 14:31-48Sauler Kibong 1 SAMUEL 14:49-52Amalek Nunger den Raraba 1 SAMUEL 15:1-9KIBUBAi Saul Jentokba 1 SAMUEL 15:10-23Amajok Nung Sauli Tatok Meshiba 1 SAMUEL 15:24-35Dawid aser Saul 1 SAMUEL 16:1-30:31Dawid Chuba Asϋtsϋ- Shimtetba 1 SAMUEL 16:1-13Sauler Mapai Dawid Aiba 1 SAMUEL 16:14-23Goliati Israel Sepaitem Jazϋkba 1 SAMUEL 17:1-11Israel Nunger Tanendaki DawidAruba 1 SAMUEL 17:12-31Dawidi Goliat den Raratsϋ Jembiba 1 SAMUEL 17:32-40Dawidi Goliat Tepsetba 1 SAMUEL 17:41-54Saul Dangi Dawid Anir Aruba 1 SAMUEL 17:55-58Dawid aser Yonathan 1 SAMUEL 18:1-5Sault Dawid.Anema Niikmeremba 1 SAMUEL 18:6-16Dawidi Saul Jala Agiba 1 SAMUEL 18:17-30Sauli Dawid Arishiba 1 SAMUEL 19:1-7Sauli Dawid Takiim Anema Inyakba 1 SAMUEL 19:8-10Mikal Dawid Kϋmzϋkba 1 SAMUEL 19:11-17Saul aser Dawid Rama nung Samuel den 1 SAMUEL 19:18-24Dawid aser Yonathan 1 SAMUEL 20:1-42Dawid aser Nob nung Putir 1 SAMUEL 21:1-15Dawid Adulam Lungpok Aser Mizpanung 1 SAMUEL 22:1-23Dawidi Kella Kümzükba 1 SAMUEL 23:1-20Saul Ket Nungi Dawid Jentetba 1 SAMUEL 23:21-29Dawidi Saul Kϋmzϋka Yutsϋba 1 SAMUEL 24:1-25:44Dawidi Tanabenbuba Saul Kϋmzϋkba 1 SAMUEL 26:1-25Dawid Filistia Nunger Rongnung 1 SAMUEL 27:1-12Filistia O Israel na Raraba 1 SAMUEL 28:1-2Sauli Endor Arasentsϋr dang Asϋngdangba 1 SAMUEL 28:3-25Akisi Dawid Ziklagi Yokba 1 SAMUEL 29:1-11Dawidi Amalek Den Raraba 1 SAMUEL 30:1-31Saul aser Par Chirtem Asüba 1 SAMUEL 31:1-13Saul aser Par Chirtem Asüba 1 SAMUEL 31:1-131 SAMUEL 1
Elkana Aser Par Kibong Shilo Nung1Tang Efraim kidong nungi nisung ka tenüng Elkana, Efraim tenem linük Ramath yimti nung liasü, pa Yeroham chir, Efraim nunger Zuf chir Tohu aser Elihu semchir liasü. 2Pa kibutsü ana liasü: ka tenüng Hanna, aser ka tenüng Peninna, Peninna tanur ali, saka Hanna tanur mali asü.3Iba nisung küm shia yimti nungi, Shilo nung Temeranger Kibuba dangi tekülemtsü aser tenla agütsütsü atu. Aser Eli jabaso ana Hofni aser Finehas Kibuba putirtem, yangji liasü. 4Aser Elkanai tenla agütsüba anogo atongdang, pai tebutsü Peninna, aser la jabaso aser jala ajak nem tenlaba shi nungi shilem agütsü; 5Saka Hanna nembo pai shilem anasü agütsü, kechiaser pai la meim. Saka Kibubai la nu menden shibangtsür liasü. 6Aser la medemnunglai la nemnemtsüsa kanga jashidaktsü, kechiaser Kibubai la nu menden shibangtsü. 7Aji küm shia yamaji atalok. Kechiaser kodangsa Hanna Kibuba kidangi atu la medemnunglai lai jeba chi mechiyung tashi la jashidaktsü. 8Aser la kinungpu Elkanai la dang ashi, “Hanna, kechiba na ajeber aser mechiyunger? Kechiba ne mulung jashir? Jabaso ter dang nungi ne madang ni taoba masü no?”Hanna Aser Eli9Kenü anogo parnoki Shilo nung chiyunga jemer külen Hannai arameso. Tang Eli putir Kibuba tenla ki kiküm tongnü anasa pei menden nung mena liasü. 10La tanela nung kanga nünga liasü, aser Kibuba dang sarasadem dang lai kanga ajeb. 11 Lai tatemzükba ka atemzüka ashi, “Oh Temeranger Telok Kibuba, nai atangji ne kilitsür ala-ashi reprangra, aser ni bilemtetra aser ne kilitsür mamara, aser ne kilitsür nem jabaso ka agütsüra idangji pa taküm arishi anogo ajak Kibuba nem ni agütsütsü; aser pa tekolak nung kusünok kodanga mataloktsü.”12Lai Kibuba madang maneni sarasadem dang, Eli-i la tebang dak ranglok. 13Tang Hanna, la mulung nung sarasadem, la tebangmechi dang arakzü, saka la olabo mangashi; anungji la yi agi mesep ta Eli-i bilem. 14Aser Eli-i la dang ashi, “Na kopiga yi agi mesepa alitsü? Ne dak nungi yi endokang.”15Hanai langzü, “Yamaji masü, kü kibur, ni tanela nung kanga jashiba tetsür ka lir. Ni yi mesüra mejemtzü majemer, saka ni kü tanela Kibuba madang tokzüka yutsür. 16Ne kilitsür samesatsür ama tezüngshima, kechiaser ni kü tejashi tulu aser timtem tulu nungi sarasademdagi.”17 Eli-i langzü, “Tesünep nung oang, aser Israel Tsüngremi nai pa dang asüngdangba ajak ne dang mela-angma.”18 Lai ashi, “Ni ne tenzüklai ne tsüngdang taochi ngudakjangma.” Idangji lai pei lenmangi ao aser chiyung; aser la tejak nung tejashi joko maliasü.Samuel Asoba Aser Meshitetba19Anepdang yakta parnoki sak, aser Kibuba madang külem, aser pei ki Ramai parnok meyipa aru. Elkanai pei kibutsü Hanna den medem, aser Kibubai la bilemtet. 20Kodang mapang tonga aru, Hanna mashisa aküm aser jabaso ka aso. Lai pa tenüng Samuel ta aja, kechiaser lai ashi, “Ni pa Kibuba dang meshizük.”21Elkana aser par kibong kümshi tetepsetba tenla aser pai atemzükba ama tenlatem Kibuba nem agütsütsü atutsü mapang tonga aru, 22saka Hannabo matu, kechiaser lai pei kinungpu dang ashi, “Kodang tanurji mama tokdir, idangji ni pa Kibuba kidangi anir tua agütsütsü, aser pa arishi anogo tepiyong yangji alitsü.”23Tebuba Elkanai la dang ashi, “Ne dang ajungba ka sang, pa mama matok tashi yangi ata-ang, oda Kibubai dang pa o atalokjangma.” Anungji tetsür jagi kidang ata-a liasü, aser pei chir mama matok tashi lai pa anebalua liasü. 24Kodang tanurji mama tokdaktsü, lai la den nashi pungchi asem aser amzü efa ka, aser yi meso ka bener Shilo nung Kibuba kidangi pa anir aru, aser techirji ano tanur liasü. 25Aser parnoki nashi pungchiji tepset, aser tanurji Eli dangi anir aru. 26Aser lai ashi, “Oh kü kibur, na taküm ali nungji, kü kibur, Kibuba dang sarasadema, yangi na anasa noktaka alila tetsürto ni lir. 27Iba techir asoshi ni sarasadem; aser Kibuba dang ni kechi mepishi, pai kü nem agüja lir. 28Anungji nia pa Kibuba nem bendanga agütsür; pa taküm ali tashi pa Kibuba asoshi alitsü.” Aser yangji parnoki Kibuba külem.1 SAMUEL 2
Hannai Atenba Tenüngsang Ken1 Idangji Hannai sarasadem aser ashi,kü mulungjangi Kibuba nung pelar;Kibuba nung kü jangzü tashi tematibai ajungketa lir.Kü tebang kü tsükchir anema lapoka lir,kechiaser ne tekümtetba nung ni pelar.2 Kibuba ama shinga temeshi mali;ne dak alema tangar shinga mali,ozü Tsüngrem mesükba tangar Lung kecha mali.3Joko asüküm o kanga tejembi mesüra ne bang nungi mezümeküm o tatokdaktsü,kechiaser Kibubaji temetetba Tsüngrem ka lir,aser pai pa mapatemji odanger.4Temerangertem lijak raksaogo,saka tashi maitertem tashi agi nangri kanga lir.5Shirnok tepok sünga liasü,parnok chiyungtsü asoshi ayangi ao,saka yaseta alirtem joko mayar.Shiba tapung liasü lai tanur tenet soja lir,saka tanur aika asola rongjenseta lir.6 Kibubai tepseter aser taküm agütsür,leperi bener alur aser bener adokdaktsür.7 Kibubai takar aser sensaker yanglu.Pai ajemaludaktsür aser ajungketer.8Tamarenertem den mendaktsütsü, aserparnok nem tetushi menden amangdaktsütsüasoshi Pai auyi nungi sensaker mesor,timtem nungi mokokminer ajungketer;kechiaser alima tongshitemji Kibuba meyong lir,aser item madak pai alimaji yutsü.9Pa temeshipur tetsüng pai nüka alitsü,saka tamajungpur ammang nung ola makai yutsütsü;kechiaser nisung tashi agi dangbo takok mangutsü.10 Kibuba den toktepertem anüka ajensatsütsü,parnok anema Pai anüng nungi tsüngmok atentsü.Alima ajonga Kibubai o bendangtsü,pai pa chuba nem tashi agütsütsü,aser pai mezüja shimtetba tashi uludaktsütsü.11Idangji Elkana pei kidangi Ramai ao, saka tanur Samueli Eli putir madang Shilo nung Kibuba tenzük.Eli Jabasotem12Eli jabasotemji samesa nisung liasü. Parnoki Kibubaji mezüngok. 13Putirtemi yimsü amato nübur den yamai inyaka liasü; kodangsa nisungtemi tetepsetba tenla agütsüdir, putir tenzüker jagi shi metaya alidak jagi tatutsü asem aketba shijok ka bener arutsü. 14Po koba nung shiji metaya lidir idakji pai shijokji tuoktsütsü, aser shijok jagi tutetba ajakji putir meyong asütsü. Shiloi arur Israel nunger ajak dang parnoki yamaji inyak. 15Ano temoji marongdang yongi putir tenzüker jagi tetepsetba tenla agütsüba nisung dang ashitsü, “Putir asoshi asangtsü shi agüjang, kechiaser pai na nungi tasoba shi masü tazü dang agitsü.”16Saka nisungba jagi, “Asenoki temoji tamasa rongdi, ajiser nai kechisa aginür agiang” ta shira idangji putir tenzüker jagi ashi, “Masü nai aji kü nem tangsa agütsütsüla, aji mesüra ni tashiyim agi aji rakzüka agitsü.” 17Yamaji asangurtem temenenji Kibuba madang tulu liasü, kechiaser nisungtemi Kibuba dang tenlabaji parnoki yamaji mezüngmeshi.Shilo Nung Samuel18Saka Samuel tanur ka dang aser Kibuba madang, temeshi putir sobutsü kümpa sü agi nangri kanger tenzük. 19Ano küm shia tetsüi pa nem süpoksü tila ka yanglutsü, aser la kinungpu den küm shia tetepsetba tenla tenlatsü la atudang, aji küm shia bener arutsü. 20Aser Eli-i Elkana aser tebutsü moaja ashi, “Kibuba asoshi agütsüba melena, Kibubai iba tetsür agi ne nem metsü agüjangma.” Aser parnok pei kidangi ao. 21Aser Kibubai Hanna semdang aser la mashisa aküm, aser jabaso asem, aser jala ana aso. Aser tanur Samuel Kibuba madang ain.22Tang Eli kanga tambur aküm; aser Israel ajak dang par jabasotemi inyakba, aser koda sentep süki kikümbang nung tenzüker tetsürtem den parnoki nüktapangta benshiba, ajak pai angashi. 23Aser pai parnok dang ashi, “Kechiba nenoki ibala mapa inyaker, kechiyong nenoki tamajung benshiba iba nübur ajak nungi ni angashir. 24Masü, kü chirtem kechiyong ni angashiba osang ya tajung masü; nenoki Kibubar nüburtem ozüng raksadaktsür. 25Nisung kati ka anema temenen menara, Tsüngremi pa bendangtsü; saka nisung kati Kibuba anema temenen menara, shibai pa asoshi mepishitsü?” Aji sakasa parnoki tebu o manga, kechiaser Kibubai parnok tepsettsü mulungteter liasü.26 Aser tanur Samuel tain aküm, aser Kibuba aser nisung anaprongla den yimli angu.27Tsüngrem nisung ka, Eli dangi aru, aser pa dang ashi, “Yamai Kibubai ashir, Ni nebu kidong dangi parnok Ijip nung Farao kidang alarsa alidang kü sasa jungkai madok no! 28 Israel kidong ajak nungi kü putir asütsü, kü tenladaki atutsü, liangmesen arongtsü, kü madang putir temeshi sobutsü agitsü ni pa meshimtet no, aser Israel chirtemi tenlaba ajak ni nebu kidong nem magütsü no? 29Ajangla, kechiba ni lateta yutsüba kü tetepsetba tenlatem aser tenlatenjitemji nenoki mezüngmeshir? Kü nübur Israel puri tenlaba tajungtiba ajak agi nenok sasa teyiraba kümdaktsüba ajanga kü dang nungibo tali ne chirtem tushir? 30Anungji Kibuba, Israel Tsüngremi ashir, ni atangji ne kidong aser nebu kidongi teti kü madang jajatsüla ta ashi: saka tang Kibubai ashir, aji kü dang nungi talangka piladakjang; kechiyong kü akhüm tsüburtem asoshi ni akhüm tsübutsü aser ni sensamasatsürtem ni hau ta mezüngshitsü. 31Ajiang, ne kidang tambur kata malitsüsa ni ne tashi aser nebuer kibong tashi leptoktsütsü anogotem arudagi. 32Aser Israel nem azükaru agüjaka kü kidang toushi angutsü; aser ne kidang teti asoshi tambur kata malitsü. 33Aser ner nisung shiba ni kü meyong tenladak nungi melepdoki yuja ali, pa jagi ne tenük raksatsütsü aser ne mulungjang jashidaktsütsü alitsü; aser ne kidang nungi adokba ajak tebenjem mapang asütsü. 34 Aser ibaji jabaso ana Hofni aser Finehas madak ataloktsü, ibai na asoshi temaitsü alitsü; tenaprongla asütsü. 35Aser ni asoshi ni temulung alemba putir ka, kü mulung aser shisatsü nung aliba ama inyaktsüsa adoktsütsü, aser ni pa asoshi kidong ka yanglutsü; aser pai teti asoshi totzü mezüa kü teshimtetba madang jajatsü. 36Aser ne kidong anünga alir shiai pa dangi arua apudaka ashitsü, ‘Yimlibilema taribi telong ka aser amtsük tebang ka danga achitsüsa putir mapa kar nung nia enokjangma.’ ”1 SAMUEL 3
Kibubai Samuel Ajaba1Tang tanur Samueli Eli den Kibuba tenzük. Item anogo nungji Kibuba o senti liasü, aser mangdang bulua maliasü. 2Saka konung Eli, shiba tenük ramia kümer angutsü mokoki liasü, pa taktang nung mejanga liasü. 3Saka Kibuba milenji ano mesepi liasü, aser Kibuba kidang kong Tsüngrem süngden liasü, idakji Samuel amua aotsü ontaka liasü. 4Idangji Kibubai Samuel aja, aser pai langzü, “Ni yangi lir.” 5Aser pai Eli dangi asema oa ashi, “Ni yangi lir, kechiyong nai ni aja” Saka Eli-i ashi, “Ni na maja, meyipa oa mejanga liang.” Anungji pai or mejanga ali.6Ano Kibubai tanaben aja, “Samuel” aser Samueli shishi aser Eli dangi or ashi, “Ni yangi lir, kechiyong nai ni aja,” saka pai ashi, “Kü chir ni na maja, tanaben mejanga liang.” 7Tang aji Samueli Kibuba ola ta memeteti liasü, aser Kibuba O ano pa dangi jungkai madoki liasü.8Ano Kibubai tasembenbuba Samuel aja, aser pa shishi aser Eli dangi ao, aser ashi, “Ni yangi lir; kechiyong nai ni aja.” Aser Kibubai tanurji ajar ta Eli-i shitet. 9Anungji Eli-i Samuel dang ashi, “Oang, mejanga liang; pai na jarabang, nai yamai shiang: Jembiangma, Kibuba; kechiyong ne tenzükeri angashir.” Anungji Samuel ao aser pa alidak mejanga ali.10Idangji Kibuba arua idakji noktak, aser tanga mapang nung ajaba amaji, “Samuel! Samuel!” ta aja. Aser Samueli langzü, “Jembiangma, kechiaser ne tenzükeri angashir.” 11Aser Kibubai Samuel dang ashi, “Ajiang, ni Israel nung mapa ka inyaktsü, koba tangashir shia tenarongi asatsü. 12Iba anogo nung ni Eli kibong indang jembiba ajak, tetenzük nungi oda tatem tashi ni Eli anema inyaktsü. 13Kechiyong pai meteta aliba tai asoshi ni par kibong teti asoshi o bendangtsü, kechiaser par jabasotemi atakatem parnok sasa dak bena aru, aser pai parnok menoktang. 14Anungji Elir kibong tai menabaji tetepsetba tenla mesüra tenla agütsüba agi kodanga mepungdoktettsüsa ni Elir kibong dang azüngashiogo.”15Anepdang tashi Samuel mejanga ali, aser Kibubar ki kishitem lapok, aser Samueli Eli dang mangdangji ashitsü tsübu. 16Idangji Eli-i Samuel aja aser ashi, “Kü chir Samuel”. Pai langzü, “Ni yangi lir.” 17Aser pai ashi, “Kibubai ne dang jembibaji kechi? Ni ne dang mepishir, aji kü dang nungi temiim; ne dang pai jembiba ajak nai langka danga kü dang nungi miimshira, yamaji ne dang aser ano talia, Tsüngremi inyakangma.” 18Aser Samueli kecha miima meyui ajak ashi. Aser pai ashi, “Ibai Kibuba lir; pa dang kechi ajung aji pai inyakdakjang.”19Samuel ain, aser Kibuba pa den liasü, aser pa o ka danga ali nung metsükdaktsü. 20Aser Dan nungi Beersheba tashi Israel ajaki Samuel Kibuba atema ainkar asütsü shimtet ta metet. 21Kibuba tanaben Shilo nung jungkai adok; kechiyong Kibubai pei sasa Samuel dang Shilo nung Kibuba o agi jungkai adok.1 SAMUEL 4
1Aser Samuel o ajak Israel dangi aru.Tezüngzüktepba Süngden Filistia Nungeri Bener AobaTang Filistia nunger anema Israel tongbangi ao, aser Ebenezer nung anen; aser Filistia nungeri Afek nung anen. 2Aser Filistia nunger parnok sasa Israel anema taren küma ata aser kodang parnok tongbang raradak moapu nung ajurutep, Filistia nunger tsüngdang Israel tamakok angu; aser parnoki tongbang moapu nung nisung meyi pezü shi tepset. 3Kodang nüburtem tanendaki aru, idangji Israel tamburtemi ashi, “Filistia nunger madang tanü kechiba Kibubai asenok chirepdaktsü? Kibuba tezüngzüktepba temeshi süngdenji asenok den arutsüsa, aser tsükchirtem ket nungi asenok kümzüktsüsa Shilo nungi asenoki bener arudi.” 4 Anungji nisungtemi Shiloi yok aser idak nungjagi Temeranger Kibuba tezüngzüktepba süngden koba cherubim yongtsü nung liasü, parnoki bener aru; aser Eli jabaso ana Hofni aser Finehas, Tsüngremer tezüngzüktepba süngden denji liasü.5Kodang Kibuba tezüngzüktepba temeshi süngdenji bener tanendaki ait, Israel ajaki ola tulu agi ali agi atentena ayimten. 6Kodang Filistia nungeri parnok ayimtenba ola angashi; parnoki ashi, “Ibri nunger tanendak ayimtenba ola tulu tetezü kechi?” Kibuba süngden tanendaki arua liasü ta parnoki angatet. 7Aser Filistia nungertem tsübua liasü, kechiyong parnoki ashi, “Tanendaki Tsüngrem arua lir.” Aser parnoki ashi, Ayatai! Kechiyong akhidang iba amai maliasü. 8Ayatai! Item tashi tulu tsüngremtem ket nungi shibai asenok kümzüktsü? Temerenshi tapu tapu ajak agi Ijip nunger dak arem nung tongdaktsüba ya item tsüngremtem lir. 9Ibri nunger kübok nenok alar masütsü tashi itang, aser nenok sasa tebur ama sang, Oh nenok Filistia nunger; nenok sasa tebur ama sang, aser rara-ang.”10Filistia nungeri rara aser Israeli majet, anungji parnok nisung shia pei süki bushia ajen aser tetepsetba jenti liasü; kechiyong Israelpur tetsüng agi raraba temeranger meyi semer lao. 11Aser Tsüngrem süngdenji bener ao; aser Eli jabaso Hofni aser Finehas tepset.Eli Asüba12Tongbang nung jagi Benjamin kidong nisung ka asema oa, iba anogo nungsa pei sü shisar pa tekolak nung ali mezür Shiloi aru. 13Aser kodang pa aru, ajiang, süngkhüm anasa Eli pa menden nung mener penzüa liasü; kechiyong Tsüngrem süngden asoshi pa mulungjang atentena liasü. Aser kodang nisungji yimti-i aita osangji ashi nüburtem ajonga jebtep. 14Aser kodang Eli-i asatepba ola angashi, pai ashi, “Iba rongrongba ola tetezü kechi?” Nisungbaji ilunga arua Eli dang ashi. 15Tang Eli küm tukur-ti liasü; aser pa tenük junga munguteti liasü. 16Nisungba jagi Eli dang ashi, “Tongbang nungi arubaji ni lir aser ni tanü tongbang nungi jena aru.” Pai ashi, “Koma asü, kü chir?” 17Aser osang bener jagi langzüa ashi, “Filistia nunger madang nungi Israel jenogo, aser nübur jenti tepsetogo aser ano ne jabaso Hofni aser Finehas süogo, aser Tsüngrem süngdena rakzüker ogo.” 18Kodang pai Tsüngrem süngden indang ashi, süngkhüm anasa pa menden tesüleni tsüka, pa tekong raksa, aser asü; kechiaser pa tambur aser taret liasü. Pai küm lir Israel o bendang.Finehas Tebutsü Asüba19Pa jabaso Finehas kibutsü mashisa küma tanur asotsü anasa liasü; aser kodang lai Tsüngrem süngdenji bener ogo ta, aser la kinungpu tebu aser la kinungpu süogo ta osang angashi, lai mokrem aser tanur aso; kechiyong la madaki nuso ashiba aru. 20Aser la asütsü mapang nungji la yarir tetsürtemi la dang ashi, “Tetsübu, kechiaser nai jabaso ka sotsüogo.” Saka lai kecha melangzü mesüra kecha mebilem. 21Aser “Israel nungi sentsüwangshi pilaogo,” ta shia, lai tanurji Ikhabod aja, kechiaser Tsüngrem süngden rakzükadok aser la kinungpu tebu aser la kinungpu sama. 22Aser lai ashi, “Kibuba sentsüwangshi Israel nungi pilaogo; kechiyong Tsüngrem süngdenji rakzükogo.”1 SAMUEL 5
Tezüngzüktepba Süngden Filistia Nunger Rongnung1Kodang Filistia nungeri tezüngzüktepba süngdenji agi, parnoki aji Ebenezer nungi Ashdodi bener ao. 2Parnoki aji Dagon tsüngrem külemdak kidangi bener aita Dagon anasaji ayu. 3Aser kodang Ashdod nungeri tasüngnepji yakta shishi Dagon külemdak jagi ao, parnoki Kibuba Ozüng Süngden jakdang Dagonji tejak rembanga laoa angu. Anungji parnoki Dagonji bena arua pa alidak yutsü. 4Aser kodang parnoki tasüngnepji yakta shishir reprang Kibuba süngden madang Dagon pei tejak rembanga ali nung laoa liasü; aser Dagon tekolak aser pa tekabu anaprong lepzüker ali nung ataloka liasü; temang dang anünga liasü. 5Anungji tanü tashi Dagon putirtem mesüra Dagon kidangi arur shinga Ashdod nung Dagon ayudak ali nung majemshir.6Saka Ashdod nunger madak Kibuba teka sashia liasü, aser pai parnok samatsü, aser tepzünu wara agi Ashdod aser iba arrtsü madak kongshi. 7Aser kodang Ashdod nungeri aji oda angu parnoki ashi, “Israel Tsüngrem süngden asenok den mayutsü; kechiyong asenok madak aser Dagon asen tsüngrem madak pa teka tesashi lir.” 8Anungji parnoki yok aser Filistia nunger yimsüsür ajak aniten aser ashi, “Israel Tsüngrem süngden atema asenoki kechi inyaktsü?” Parnoki langzü, “Israel Tsüngrem süngdenji Gat dangi bener odakjang.” Aser Israel Tsüngrem süngden parnoki ajagi bener ao.9Saka kodang aji yimti jagi bener aru, Kibuba teka yimtiji anema liasü, aser yimti madaki taoksatsü tulu arua yimti nung alir tanur tain ajak dak kongshi, aser tepzünu komo parnok dak adokdaktsü. 10Anungji parnoki Tsüngrem süngdenji Ekroni yok, aser Tsüngrem süngden Ekroni arudang, Ekron nungeri ayimtena ashi, “Asenok aser asen nübur südaktsütsü parnoki Israel Tsüngrem süngden asenok dangi bener arua lir! 11Anungji parnoki Filistia nunger yimsüsür ajak aniten aser parnoki ashi, Israel Tsüngrem süngden yokadokang, iba jagi asenok aser asen nübur tepsettsü. Kechiyong yimti ajak nung kanga pusatepba liasü; Tsüngrem teka yangji kanga sashia liasü. 12Aser mesüi alir nisung tepzünu komo agi atong, aser yimti asatepba agi anüng tonga atu.”1 SAMUEL 6
Tezüngzüktepba Süngden Meyipa Israeli Aruba1 Kibuba süngdenji Filistia nunger lima nung ita tenet liasü. 2Aser Filistia nungeri putirtem aser tarutsü tia ashirtem jar ashi, “Kibuba süngden indang asenoki kechi asütsü? Ibaji talidaki kechi den yoktsü onok dang sayuang.”3Parnoki langzü, “Nenoki Israel Tsüngrem süngdenji meyipa yokra, aji tazüng teyok, saka tenla ka dena yokangma; atangji pa nem nenok asoshi tai tenla ka agütsütsüla. Idangji nenok anebtsü, aser kechiba pa teka nenok nungi magien aji nenoki metettsü.”4Idangji Filistia nungeri asüngdang, “Kechi temenen tenla onoki pa nem agütsütsü?” Parnoki langzü, “Filistia nunger yimsüsürtem yongsük apir hon agi yangluba tepzünu komo pungu, aser hon agi yangluba ayim koya pungu; kechiaser temerenshi kasa jagi nenok aser nenok yimsüsür ajak dak atong.” 5Anungji nenoki tepzünu komo aser alinük raksatsüba ayim koya noksa yangluang, aser nenoki Israel Tsüngrem nem tetushi agüjang. Ashiko pai nenok nungi nenok tsüngremtem aser nenok linük nungi pa teka agientsü. 6Ajangla kechiba nenoki Ijip nunger aser Farao ama nenok temulung meranger? Pai parnok madaki teraksatsüba lendong arudaktsür külenang parnoki parnok modaktsü-a ma? Parnoki odaktsü. 7Anungji oang, tang talungtsü tasen ka aser süngra kodanga matalokdangba mamatzü ayimba nashi tsüla ana renemang. Nashiji talungtsü nungji sentaklokang, saka item techanuji parnok nungi pila-a kidangi bener arung. 8Kibuba süngdenji bener arua aji talungtsü manungji yuang, aser hon agi yangluba osettem koba nenok tai asoshi tenla agütsür, aji süngden ka nung iba anasaji yujang, aser aji pei lenmangi otettsüsa yokang. 9Iba aobaji repranga ata-ang, aser aji pei litsü-i aoba Beth-shemes lenmangi tura, asenok dak timtem atalokdaktsüba ya pai asütsü, saka aji yamaji mesüra iba timtem ya pa ket agi masü, saka ya asenoki ajuruba timtem ka dang ta asenoki metettsü.10Nisungtemi yamaji inyak; aser mamatzü ayimba nashi ana agi, aser talungtsüji parnok dak sentak, aser parnok techanutem kidang shibanga ayu, 11Aser parnoki Kibuba süngden aser hon ayim koya aser tepzünu komo aliba süngdenji talungtsü nung yutsü. 12Nashi jagi tindangba lenmangi oa Beth-shemes lenmangi ao; parnok aodang tajichilen mesüra tabeleni memeyip; aser Filistia nunger yimsüsürtem parnok sülen Beth-shemes tashi ao.Beth-shemes Nung Ozüng Süngden13Beth-shemes nunger lenten nung wheat tsük ruya liasü; aser parnoki pei tenük rangketa yok aser temeshi süngdenji angu, aser aji ngua pelatep. 14Aser talungtsüji Beth-shemes nunger Yihusuar lui ait, kong lung tulu ka liasü yangji anen; aser parnoki talungtsü süngji sosa, aser Kibuba nem nashitemji tarongba tenla agütsü. 15Aser Levi nungeri Kibuba süngden, aser iba den aliba süngden kechi nung hon osettem liasü aji agizük aser itemji lung tulu manungji ayu; aser Beth-shemes nisungtemi iba anogo Kibuba nem tarongba tenla aser tetepsetba tenla agütsü. 16Aser kodang Filistia nunger yimsüsür pungui aji angu, iba anogo nungji parnok Ekroni meyipa ao.17Filistia nungeri Kibuba nem tai tenla asoshi meyipa agütsüba hon agi yangluba tepzünu komoji itemi lir: Ashdod asoshi ka, Gaza asoshi ka, Ashkelon asoshi ka, Gat asoshi ka, Ekron asoshi ka, 18aser hon agi yangluba ayim koyatemji yimsüsür pungu meyong Filistia nunger yimti ajak yongsük yari, atsübanga aliba yimti aser yimtsüng anaprong atema liasü; aser tanü tashi ano lung tulu koba manung parnoki Kibuba süngden ataloka yutsü aji Beth-shemes nunger Yihusuar lu nung lir.19Aser pai Beth-shemes nunger nisung kar tepset kechiaser parnoki Kibuba süngden dak ranglok; pai parnok rongnung nisung neter tepset aser nisungtemi mang ayim, kechiaser Kibubai nisungtem tepsetbaji jenti liasü.20Beth-shemes nungeri ashi, “Iba temeshi Kibuba Tsüngrem mangdang shibai noktaktettsü? Aser asenok nungi shiba dangi pa atutsü?” 21Idangji parnoki Kiriath-jearim nung alir dangi osang abener yokogo, aser ashi, “Filistia nungeri tanaben Tsüngrem süngden bener aruogo, nenok alung aser nenok dangi aji bener tuang.”1 SAMUEL 7
Samueli Israel Madak O Bendangba1 Kiriath-jearim nunger aru, aser Kibuba süngdenji bener atu, aser tenem nung Abinadab kidangi aji bener aru, aser Kibuba süngden ayutsü par chir Eleazar meshiteta ayu.2Kiriath-jearim nung ozüng süngdenji mapang talangka, oda küm metsü shi liasü, aser Israel kidong ajongai Kibuba dang teyari asoshi ayimten.3Samueli Israel kidong ajak dang jembia ashi, “Nenoki Kibuba dangi nenok mulungjang ajak agi meyipdi süra, ajangla nenok rongnungi bendanger tsüngremtem aser Ashtarot endokang, aser Kibuba dangi nenok mulungjang renemang, pa dang tenzükang, aser pai nenok Filistia nunger ket nungi kümzüktsü.” 4Idangji Israel nungeri Baalim aser Ashtarot endok, aser Kibuba dang tenzük.5Samueli ashi, “Israel ajak Mizpai sentepang, aser ni nenok asoshi Kibuba dang sarasademtsü.” 6Aser parnok Mizpai külemi sentep aser tzü taten, aser aji Kibuba madang shitokadok aser iba anogo nung lumi aser ashi, “Kibuba anema onoki tai menaogo.” Aser Samueli Mizpa nung Israel nunger o bendang.7Kodang Filistia nungeri Israel nunger Mizpa nung külemi sentepa lir ta angashi, Filistia yimsüsürtemi Israel anema atu. Aser kodang Israel nungeri aji angashi, parnoki Filistia nunger tsübua liasü. 8Israel nungeri Samuel dang ashi, “Asenok Filistia nunger ket nungi kümzüktsü asoshi Kibuba asen Tsüngrem dang maneni ayimtenang.” 9Samueli mama teyongdak san chanu ka agi, aser aji tarongba tenla rangbenKibuba dang tenla aser Samueli Kibuba dang Israel asoshi ayimten aser Kibubai pa dang langzü. 10Samueli tarongba tenla tenla-a alidang Filistia nungeri Israel anema tongbang raratsü anasa aru; saka iba anogo nung Filistia nunger madak Kibubai ola tulu agi metenoktsü, aser parnok kokdaktsü. 11Israel nungeri Mizpa nungi Filistia nunger aria ao, aser parnoki Bethkar tashi oa parnok alep. 12Ajiser Samueli lung ka bena aru, aser aji Mizpa o Shen tsüngda nung azüng, aser iba tenüng Ebenezer ta aja, aser ashi, “Ya Tashi Kibubai asenok yariogo.” 13Yamaji Filistia nungerji akok, aser parnok joko Israel litsüi maru: aser Samuel anogo tepiyong Kibuba Filistia nunger anema liasü. 14Filistia nungeri Israel nungi agiba yimtitem Ekron nungi Gat tashi Israel nem tanaben meyipa agidaktsü; aser Filistia nunger ket nungi Israeli parnok linük kümzüka ayu. Aser Israel o Amor nunger tsüngda nung yimjung liasü.15Samueli pa arishi tepiyong Israel o bendang. 16Pai küm shia tatongi Bethel, Gilgal, aser Mizpa semdang; aser item linük ajak nung pai Israel o bendang. 17Pa Ramai shilang, kechiaser yangji par ki liasü; aser yangji pai Israel o bendang; aser pai Kibuba dang tenladak ka yanglu.1 SAMUEL 8
Nüburtemi Chuba Ka Meshiba1Kodang Samuel tambur aküm, pai par jabasotem Israel madak obendangertem kümdaktsü. 2Tang par mezüng asoba tenüngji Yoel liasü, aser tanabuba tenüngji Abiya; parnok Beersheba nung o bendanger liasü. 3Par jabasotemi pa lenmang nung mejaja saka rongsenleni meyip, aser süpokrem agi, aser ochi o mebendang.4Tang Israel tambur ajak külemi sentep aser Samuel dangi Ramai aru, 5 aser parnoki pa dang ashi, “Na tambur lir, aser ne jabasotemi ne lenmang nung mejajar; anungji tangar kintem amaji onok madak o bendangtsü chuba ka kua.” 6Saka parnoki onok o bendangtsü onok nem chuba ka kua ta ashiba jagi Samuel mepeladaktsü, aser Samueli Kibuba dang sarasadem. 7Kibubai Samuel dang ashi, “Parnoki ne dang ashiba ajak nung parnok ola angang, kechiaser parnoki na magizük masü, saka ni parnok madak chuba asütsü parnoki magizük. 8Parnok Ijip lima nungi ni anir adokba anogo nungi parnoki inyakba mapa ajak mesüka tanü tashi parnoki ni senzüka tokja lir, aser tangar tsüngrem tenzük; yamaji ano parnoki ne danga inyaker. 9Anungji tang parnok o angang, aji saka nai retreta parnok dang tekümdangtsü shiang, aser parnok madak yimsü asütsüba chuba mapadong indangji parnok dang sayuang.”10Samueli Kibuba o ajak pa dang chuba meshiba nisungtem dang ashi, 11Pai ashi, “Nenok madak yimsü asütsüba chuba mapadongji ibai alitsü; pai nenok jabasotem agitsü aser parnok pa atema, pa talungtsü asoshi agitsü aser par talungtsü jakdang parnoki asemtsü. 12Pai parnok kar pei asoshi meyirijang madak aser kar tenem madak tanishir shimtettsü, pai karbo par li alu ladaktsütsü aser par lu rudaktsütsü par raraba oset aser talungtsü osettem yangludaktsütsü. 13Ner jalatemji pa asoshi teronem yanglur, sorochioker aser amtsük yanglurtem asütsü. 14Pai nenok lu aser nenok tsükmenatzü tsüki, nenok oliv tsüki oda item tajungtiba agitsü, aser itemji par tenzüker nem agütsütsü. 15Pai nenok tsük aser tsükmenatzü nungi ter shilem agitettsü aser aji pa tenzüker aser tongtipurtem nem agütsütsü. 16Nenok kilirtem aser kilitsürtem, nenok nashi telok tajungtiba aser nenok gado, pai par mapa nung yutsütsü. 17Pai nenok san telok nungi ter shilem agitsü, aser nenok par kilirtem asütsü. 18Kodang iba anogoji arudir, nenoki nenok asoshi shimtetba chubaji anema nenoki tashi agi ayimtentsü, saka Kibubai nenok dang melangzütsü.”19Saka nisungtemi Samuel o manga, parnoki ashi, “Masü, saka onok madak chuba ka alitsüla; 20oda onoka tangar kin amaji sütettsü; oda ozü chubai onok madak o bendangtsü aser onok jakdang aotsü, aser ozü tongbang raratsü.” 21Samueli nüburtem o ajak angashi, aser pai Kibuba narong nung tanaben angashidaktsü. 22Kibubai Samuel dang ashi, “Parnok ola angang, aser parnok nem chuba ka agüjang.” Aser Samuel-i Israel nungertem dang ashi, “Nenok nisung shia pei yimti-i oang.”1 SAMUEL 9
Sauli Samuel Ajuruba1Tang Benjamin kidong nungi nisung ka, Abiel jabaso, tenüng agi Kis liasü: Abielji Zeror jabaso, Zerorji Bekora jabaso; Bekoraji Afia jabaso, Benjamin nunger rongsen akar nisung ka liasü. 2Aser pa jabaso ka liasü, pa tenüng Saul, asangur aso tajung; aser Israel chir rongnung pa dang nungi aso tajungba kata maliasü; pa tapubang aser temalen nungi, pa nisung ajak dang nungi temaba liasü.3Saul tebu Kis meyong gado kar sama-a liasü. Anungji pai Saul dang ashi, “Kilirtem nungi nisung ka anir apusoa gadotemji bushiang.” 4Pai Efraim tenem linük sema ao, aser Shalisha linük sema ao, saka pai parnok mangu; idangji parnoki Shaalim linük sema ao, aser yangjia parnok maliasü; aser pai Benjamin nunger linük sema ao, saka parnoki itemji mangu. 5Kodang parnoki Zuf linüki aru, Sauli pa den aliba kilir dangji ashi, “Kübui Gado indang bilemba amadoker, asenok indangang shisa bulua lir, arung asenoki meyipa odi.”6Saka kilir jagi langzü, “Reprangang, iba yimti nung Tsüngrem nisung ka lir, pai ashiba ajak shitak ataloka aru nung ajaki akhümtsübua züngshir. Tang asenoki ajagi odi, ashiko asenoki koleni aotsü iba indang pai asenok dang shitettsüa kar.”7Idangji Sauli par kilir dang ashi, “Saka ajiang, asenok ora asenoki nisungba dang jagi kechi bener aotsü? Kechiyong asen juli nung amtsük agimaogo, aser Tsüngrem nisung dangi bener arutsü sempet kata mali, asenok den kechi aka?”8Kilir jagi Saul dang tanaben langzüa ashi, “Ajiang, kü ket nung taribi ka lir; asenok dang asen lenmang ashitsü ibaji ni Tsüngrem nisung nemji agütsütsü.” 9Akhidang Israel nung kodang nisung kati Tsüngrem nungi metettsü asüngdangdir, yamai pai ashi, “Arung, aser asenoki tangur dangi odi”, kechiyong tang ainkar ta ajaba dang akhidangbo tangur ta ja-a liasü. 10Idangji Sauli pa kilir dang ashi, “Junger; arung, asenoki odi.” Anungji Tsüngrem nisung aliba yimti jagi parnok ao.11Parnok yimti jagi atudang, parnoki aiürtem tzütai aoba ngua parnok dang asüngdang, “Yangi tangurji ali asü?” 12Parnoki parnok dang langzü, “Pa lir; ajiang, pa ne jakdang lir; tang ilungang; kechiyong pa tanü yimti-i aita lir; kechiaser nüburtem tanü tenem nung tetepsetba tenla agütsütsü. 13Nenok yimti-i aitli-i, nenoki pa indangindanga tenemi pa chiyungtsü matudang, pa angutsü; kechiyong pa maru tashi nisungtem mechiyungtsü, kechiaser pai tetepsetba tenla moatsür; aser tesülen shirnok aja parnok chiyunger. Anungji nenok tuang; kechiyong iba mapang nung nenoki pa angutsü.” 14Tenati yimti-i atu; aser parnok yimti-i aitdang, ajiang, tenemi atutsü parnok jakdang Samuel aru.15Tang Saul marudang anogo ka lia Kibubai ya oda shia Samuel dang jungkai adok: 16“Asüng iba mapang nung ni ne dangi nisung ka Benjamin linük nungi yoktsü, aser nai pa kü nübur Israel madak lenir asütsü totzü mezütsütsüla, pai kü nübur Filistia nunger ket nungi kümzüktsü; kechiyong ni kü nübur madak reprangogo, kechiaser parnok ayimtenba kü dangi arua lir.”17Kodang Samueli Saul angu, Kibubai pa dang ashi, “Ni ne dang jembiba nisungji ajiang! Kü nübur madak pai yimsü asütsü.” 18Idangji süngkhüm nung Sauli Samuel anasa aru, aser ashi, “Yimlibilema tangur ki kong ali kü dang shiangma.”19Samueli Saul dang langzü, “Tangurji ni lir; kü jakdang tenem jagi tuang; kechiyong tanü na kü den chiyungtsü aser anepdang ni na odaktsütsü, aser ne mulungjang nung aliba ajak ne dang ashitsü. 20Ne gadotem koba madoker anogo asem ogo, parnok dak ne mulung tagütsü; kechiyong parnok nguogo. Aser Israeli jangraba ajak shiba dak lir? Aji na asoshi, aser nebuer kibong ajak asoshi masü no?”21Sauli langzü, “Ni Benjamin nunger, Israel kidong rongnung tilaba masü no? Aser kü kibong Benjamin kibong ajak dang nungi tilaba masü no? Anungji kechiba nai iba amai kü den jembir?”22Samueli Saul aser pa kilir anir oa, aener taktangi parnok anir aru, aser tejatepertem shirnok nisung semer shi liasü, parnok rongnung tematiba menden nung parnok mendaktsü. 23Samueli sorochiokba dang ashi, “Ni ne dang balaka yujang, ta ashiba ni ne nem agütsüba shilem to bener arung.” 24Sorochiokbai tapubang aser iba manung aliba bena aru, aser aji Saul madang yutsü. Samueli ashi, “Kechi ne tsüngdang yutsütsü wazüka ayu, aji chiang, kechiyong ni nisungtem majadang aser mapang matongdang na asoshi yutsübaji ibai lir.” Anungji iba anogo Sauli Samuel den chiyung.Samueli Saul Chuba Asütsü Shimtetba25Kodang parnok tenem nungi yimti-i jagi alua, parnoki Saul asoshi kilem nung yipten ka alem, aser pa angji mejang aser pai Saul den kilem nung jembi. 26Ajiser Samueli anepungi kilem nung Saul ja-a ashi, “Ni na yokadoktsüsa shishiang;” anungji Saul shishi aser pa den Samuel yimtongi ao. 27Parnok yimti tatem tonga aludang Samueli Saul dang ashi, “Kilirji asen jakdang odakjang, saka nabo Tsüngrem O ni ne nem angashidaktsütsü noktaka ata-a liang.”1 SAMUEL 10
1Idangji Samueli totzü bongdangji bena arua aji Saul kolak nung shiloktsü, aser pa dak tebang mesep aser ashi, “Kibubai pei nübur Israel madak lenir asütsü ne dak totzü mezütsü masü no? 2Kodang na ni nungi tanü pila-a odir, nai nisung ana Benjamin litsü Zelza nung Rachel leper anasa nai ajurutsü.” Parnoki ne dang ashitsü, Gadotem koba nai bushia ao, ibato nguogo, aser nebui gadotem indang masü saka ne indang tebilemtsü ka-a ashir, ozü chir asoshi ni kechi inyaktsü? 3Ajiser idak nungjagi na tejakleni oang, aser na Tabor sülemdong dangi arutsü, aser yangji nai nisung asem Betheli Tsüngrem dangi tuya ajurutsü; kati nabong chanu asem aben, tangar kati amtsük asem aben, aser tangar kati yi bongdang ka bener; 4aser parnoki ne nem salem agüja amtsük asem agütsütsü; koba nai parnok ket nungi ana agizüktsü. 5Iba sülenji Filistia nunger temeranger alidak Tsüngrem tenemi na arutsü; aser kodang na yimti len jagi arudir, ainkar telok ka, tsürang kongki, asem, aser jemji balala parnok jakdang bener alua nai ajurutsü aser parnoki shina jembiya alitsü; 6Kibuba tanela ne madak tashi tulu agi arutsü, nai parnok den shina jembitsü, aser na nisung tanga ka kümadoktsü. 7Kodang item temaitsü ne dangi arudir, ne mapangi melaba ama inyakang; kechiyong Tsüngrem ne den lir. 8Na kü dangi jelia Gilgali aotsü; aser ajiang, ne dangi, tarongba tenla aser telungjem tenla tenlatsü: ni ne dangi maru tashi aser nai kechi inyaktsü ne dang mesayu tashi anogo tenet nai atatsüla.9Samuel nungi aotsü pa tesülen meyipdang, Tsüngremi pa nem temulungjang tasen ka agütsü: aser item temaitsü ajak iba anogo nungji atalok. 10Kodang parnok Gibea leni aru, ainkar telok kati pa den ajuruteptsü aru. Aoksa-a Tsüngrem Tanela pa madaki aru aser pai parnok rongnung shina jembi. 11Kodang akhidang metetepa alirtemi atangji pai ainkar den shina jembir ta angu, nisungtemi kati ka dang ashi, “Kiser jabaso dak atalokba ya kechi? Saula ainkar rongnung aden asü? 12 Anasa noktaker kati langzü, parnok tebu shiba lir? Anungji ibai apijemtsü shin o aküm, Saula ainkar rongnung aden asü? 13Kodang pai shina jembiba tatem aküm pa tenem jagi aru.”14Saul tebu tanubui pa aser pa kilir dang ashi, “Nenok koleni ao?” Aser pai ashi, “Gadotem bushitsü ao; aser onoki parnok mangu nung, onok Samuel dangi aru.” 15Aser Saul tebu tanubui ashi, “Yimlibilema Samueli ne dang kechi ashi, kü dang shiangma”; 16Aser Sauli tebu tanubu dang langzü, “Pai onok dang jangjajangja-a gadotem nguogo ta ashi.” Saka yimli mapa koba indang Samueli jembi, aji pai pa dang mashi.Israel Ajaki Ngua Saul Chuba Shimba17Samueli nisungtemji Kibuba dangi Mizpai aja, 18aser parnok dang ashi, “Yamai Kibuba Israel Tsüngremi ashir, Ni nenok Ijip nungi anitet aser Ijip nunger ket aser nenok kangshiba yimlitem ajak nungi ni nenok kümzük.” 19Saka tanü nenoki nenok Tsüngrem shibai nenok lendong aser tejashi ajak nungi kümzük paji nenoki magizüki ashi, “Masü, nai onok madak chuba ka yutsütsüla. Anungji tang nenok sasa Kibuba madang kin kin aser kidong kidong noktakang.”20Idangji Samueli parnok kin ajakji tejakleni arudaktsü, aser Kibubai Benjamin kin shimtet. 21Ano pai Benjamin kinji kidong kidong anasa anir aru Matri kinunger shimtet, aser Matri kinungerjia anasai anir aru aser Kis jabaso Saul shimtet, saka kodang parnoki pa bushi parnoki paji mangu.22Ano parnoki Kibuba dang asüngdang, “Nisungbaji yangi arua mali no?” Kibubai langzü, “Pa oset nangdendakji atsüka lir.” 23Anungji parnoki asema or nisungtem dangi Saul anir aru, shiba nisungtem dang nungi tapubang nungi shir temalen agi talangba liasü. 24Idangji Samueli nisungtem dang ashi, “Kibubai shiba shimogo nenoki nguali ma? Asenok rongnung pa mesüka shinga melika.” Aser nisung ajaki ayimtena ashi, “Chubaji talangka lidakjang.”25Ajiser Samueli nisungtem dang chuba yimli mapadong indangji ashi, aser aji kaket ka nung zülu, aser aji Kibuba madang ataloka ayu, aser Samueli nisung ajak pei kidangi yok. 26Aser Saula par kidangi Gibeai ao, aser pa den tasü tait nisung kar shir mulungjang nung Kibubai kongshi parnoka pa den ao. 27Saka samesa nisung kari ashi, “Iba nisung yagi asenok koda kümzüktsü?” Yamaji parnoki Saul sensatsü aser pa dangi sempet bener marutsü. Saka pai ola madoki ali.1 SAMUEL 11
Sauli Amon Nunger Akokba1Ita ka shi lir külen, Amon chuba Nahasi Gilead nung Yabes anema atua aji meketbang. Idangji Yabes nunger ajaki Nahas dang ashi, “Onok den tenangzüktepba ka yangluang, aser onoki na tenzüktsü.” 2Amon nunger Nahasi langzü, “Nenok tenük tajichi aroktok nung dang ni ibaji nenok den yanglutsü, aser aji Israel madak maksütsü asoshi ataloka yutsütsü.” 3Yabes tamburtemi pa dang ashi, “Israel litsü ajaki osang benertem yoktsü asoshi onok nem anogo tenet agüjangma, ajiser onok kümzüktsü shinga melira onoki ne dangi atutsü.” 4Idangji osang benertemji Saul alidak Gibea-i aru aser iba osang nisung ajak dang ashi, aser parnok ajaki ola adoka ajeb.5Tang Saul alu nungi nashitem sülen adokya liasü, aser pai asüngdang, “Kechiba nisungtemji jebteper?” Parnoki Yabes nisungtem oji pa dang ashi. 6Aser kodang item o pai angashi, Tsüngrem tanela tashi tulu agi pa madaki aru, aser pa mit kanga adok. 7Pai nashi jura ka bena aru, aser parnok anüka alangsar itemji Israel litsü ajaki osang benertem ket nung ya shia yok, “Shibaisa Saul sülen aser Samuel sülen marulir, yamai par nashitem dang inyaktsü.” Aser ajak madaki Kibuba tsübuba arua, parnok nisung ka amai sentep. 8Pai parnok Bezek nung züngdang, aser Israel nunger meyi noklang asem aser Yihuda nunger meyi semer liasü. 9Aser osang benertem dang parnoki ashi, yamai nenoki Yabes-Gilead nisungtem dang ashitsüla, “Asüng anü tsüka alidang nenok tekümzük alitsü.” Osang benertem aru aser Yabes nisungtem dang aji ashi; aser parnok pela-a liasü. 10Anungji Yabes nisungtemi ashi, “Asüng onok nenok dangi adoktsü, aser nenoki onok dak nenoki tajung ta bilemba ajak inyakang.”11Tasüngji Sauli nisungtemji telok asem küma lemsa, aser anepungi Amon nunger tanendak tiyong jagi aru, aser anepdang nungi anjongmeshi tashi parnok tepset. Tanüngbatemji anata külemi metoktsüi pei pei meten prokshia liasü.Saul Chuba Akümba Indang Sangdong12Idangji nisungtemi Samuel dang ashi, “Sauli onok madak chubatsü no ta ashibato shiba? Parnokji onok nem agüjang, onoki parnokji südaktsütsü.” 13Saka Sauli ashi, “Tanü Israel nung shinga mesüdaktsütsü, kechiaser tanü Kibubai Israel kümzükogo.”14Idangji Samueli nisungtem dang ashi, “Arung, asenok Gilgali odi, aser yimliji yanglushidi.” 15Nisung ajak Gilgali ao; aser parnoki Saul Gilgal nung chuba kümdaktsü; aser yangji parnoki telungjem tenla tenla, aser Saul aser nüburtem ajak kanga pelatep.1 SAMUEL 12
Samueli Nüburtem Den Jembiba1Samueli Israel ajak dang ashi, “Ajiang, nenoki kü dang asüngdangba ajak ni nenok dang angaogo, aser nenok madak chuba ka yutsüogo. 2Tarutsü nung pai nenok anitsü. Joko ni tambur aser kupu pua lir, aser kü jabasotem nenok den lir. Kü asangwa nungi tanü tashi nenok anishia aruogo. 3Yangi ni lir, ni anema Kibuba madang aser pai mezüja shimtetba madang kuli agüjang. Shir nashi ni agi? Mesüra shir gado ni agi Ni shiba kangshi mesüra ashioktsü? Kü tenük shibangtsüsa ni shiba nungi süpokrem agi? Ni yamaji inyaka lira ni nenok nem shia agütsüdi.”4Parnoki langzü, “Nai onok mashioktsüka mesüra mekangshika, aser nisung shinga ket nungi kecha magika.”5Samueli parnok dang ashi, “Nenoki kü ket nung kecha mangu ta nenok anema Kibuba aser pai mezüja shimtetba chubaji tanü kuli lir.” Aser parnoki langzü, “Kibuba kuli lir.”6 Samueli nüburtem dang ashi, “Mosa aser Aron shimtetba aser nenok tsüraburtem Ijip lima nungi anitetbaji Kibuba lir. 7Tana aji asünung, Kibuba madang pai nenok dang aser nenok tsüraburtem dang inyakba, Kibuba temeshi mapatem indang ajak ni nenok den lemsateptsü nenok noktaka liang. 8Kodang Yakob Ijipi ai, Ijip nungeri parnok rishikangshi, aser nenok tsüraburtemi Kibuba dang ayimten. Idangji Kibubai Mosa aser Aron yok, shirnoki parnok Ijip nungi anitet aser iba li nung lidaktsü. 9 Saka parnoki Kibuba parnok Tsüngrem amadok aser pai parnok Filistia nungertem, Moab chuba aser Sisera, aser Hazor telok tanishirtem ket nung parnok ayok, aser parnoki parnok anema rara. 10 Idangji parnoki KIBUBA dang ayimten aser ashi, “Onoki temenen menaogo, kechiaser onoki Kibuba senzüka toktsüogo, aser Baaltem aser Ashtarot tenzük, saka tang onok tsükchir ket nungi kümzükangma, aser onoki na tenzükdi.” 11 Kibubai Yeru-baal, Bedan, Yeftha, aser Samuel yok, aser ajaklen nenok tsükchir ket nungi nenok kümzük, aser nenok tekümzük nung alir.12Kodang Amon nunger chuba Nahas nenok anema arua angu, Kibuba nenok Tsüngrem nenok chuba aliba mapang nung nenoki ashi, “Masü, chuba katiang onok madak chubatsü.” 13Anungji tang nenoki shiba chuba shimtet aser shiba nenoki meshi, ajiang, Kibubai nenok madak chuba ka yuja lir. 14Nenoki Kibuba akhüm tsübutsü, aser pa tenzüktsü, aser pa o angatsü, pai melaba anema madoktsü süra, nenok aser ano chuba shibai nenok madak yimsü asür Kibuba nenok Tsüngrem sülen anitakertem süra junger. 15Saka nenoki Kibuba o mangatsü, saka Pa temelaba anema adokdi süra idangji nenok tsürabur tendak ama Kibuba teka nenok anema alitsü.16Anungji tang noktaka liang aser nenok madang Kibubai kechi mapa tulu inyakdir ajiang. 17Tanü wheat tsük aruba mapang masü no? Kibubai tsüngmok aser tzünglu yoktsüsa ni pa dang asüngdangtsü; nenoki chuba ka asüngdangba nung nenoki inyakbaji tamajung mapa tulu ta nenoki metettsü aser angutsü. 18Anungji Samueli Kibuba dang aja; aser Kibubai iba anogo nung tsüngmok aser tzünglu yok; aser nisung ajaki Kibuba aser Samuel kanga tsübu. 19Nisung ajaki Samuel dang ashi, “Onok masütsü asoshi Kibuba ne Tsüngrem dang ne tenzükertem asoshi sarasademangma; kechiyong onok temenen ajak nung, onok asoshi chuba ka meshiba iba temenen onok madak benloktsüogo.”20Samueli nisungtem dang ashi, “Tetsübu, nenoki atangji iba tamajung ajak inyakogo; aji saka Kibuba sülen anitakba nungi temeyip, saka nenok mulungjang ajak agi Kibuba tenzükang; 21tajangzük magütsüba mesüra kümzüktsü makokba amajok osettem sülen meyipa tuo. 22Kechiyong Kibubai pa tenüng tulu atema pei nübur senzüka metoktsütsü; kechiaser Kibubai pei asoshi nenok nübur ka kümdaktsütsü mulunga lir. 23Talisa ni asoshibo, nenok asoshi sarasademtsü anenba agi Kibuba anema temenen memenatsü Tsüngremi ni songtemangma; saka ni nenok lenmang tajung aser shitakba nung sayutsü. 24Kibuba tsübuang, aser nenok mulungjang ajak agi atangji nung pa tenzükang; kechiyong nenok asoshi koda mapa tulu pai inyak bilemdangang. 25Saka nenoki ano mejungi inyakdi süra, nenok aser nenok chuba anaprongla samatsü.”1 SAMUEL 13
Filistia Nunger Den Raraba1Saul chubatsü tenzükdang pa küm semer liasü; aser pai Israel madak küm lir yimsü asü. 2Aser Sauli pa asoshi Israel nisung meyi asem shimtet; meyi ana pa den Mikmas aser Bethel tenem linük nung, aser meyi ka par jabaso Yonathan den Benjamin litsü Gibea nung yutsü. Tanüngba nisungtem pei pei süki-i yok.3Gibea nung Filistia nunger temeranger telokji Yonathani akok, aser Filistia nungeri aji angashi. Idangji Sauli linük ajak nung jangzü apua ashi, “Ibri nungeri angang.” 4Aser Israel ajaki Sauli Filistia nunger kokogo aser ano Filistia nungeri Israel nunger tsübur ta angashi. Anungji nisungtemji Saul sülen Gilgal nung külemi sentep.5Israel nunger den raratsü asoshi Filistia nunger külemi sentep. Parnok kor talungtsü meyi semer, kor temeranger meyi trok, aser nisungtemji tzüyim küm lisem ama liasü. Parnoki Beth-aven anüdoklen Mikmas nung tua anen. 6Idangji parnoki Israel anema kanga sashia apuso. Israel nisungtem kechi mesayangi aküm. Anungji parnoki pei sasa lungpok nung, mungur nung, lung yongtsü, süngsem aser ongkentem nung atsükok. 7Ano Ibri nunger karbo Yordan ajanger Gadasa Gilead linüki ao. Saka Saulbo Gilgal nungsa liasü aser pa den aliba nisung ajak tetsübu agi atentena liasü.Saul den Pilaba8Samueli mapang atakteta toktsüba mapang tashi pai anogo tenet ata-a ali; saka Samuel Gilgali maru; aser nisungtem pa nungi prokshia liasü. 9Anungji Sauli ashi, “Kü dangi yangi tarongba tenla aser tesünep tenla yagi bener arung.” Aser Sauli tarongba tenlaji agütsü. 10Aser pai tarongba tenla tenlaba temlidang, ajiang, Samuel aru; aser pa nem salem agütsütsü Saul pa lenji ao.11Samueli asüngdang, “Nai kechi inyak?” Sauli langzü, “Kechiaser nisungtem ni toktsür prokshia aoba ni angu, aser mapang shitak nung na-a maru, aser Filistia nunger Mikmas nung külemi sentepa liasü. 12Anungji ni bilem, Filistia nungeri kü madak Gilgali alutsü aser ni Kibuba maongka memepishi; anungji ni kü sasa kangshia tarongba tenlaji agütsü.”13Samueli Saul dang ashi, “Nai tamashi inyakogo; nai Kibuba ne Tsüngrem temelaba koba pai ne dang mela aji meinyak; kechiyong ne yimli Israel madak teti asoshi Kibubai yanglutsür lila. 14Saka tang ne yimli anentsü Kibubai pei asoshi pa mulung asüba nisung ka bushiogo, aser Kibubai pa pei nübur madak tanishir asütsü shimtetogo, kechiaser Kibubai koba ne dang mela aji nai mebenshi.”15Idangji Samuel Gilgal nungi aramesoa pei lenmangi ao. Aser Saul den aliba nisungtem pa den külemi Gilgal nungi Benjamin nunger Gibeai ao. Sauli pa den aliba nisungtemji züngdang aser parnokji noklang trok shi liasü.Tongbang Asoshi Terenemba16Saul pa jabaso Yonathan aser tena den aliba nisungtemji Benjamin nunger Gibea nung anen, aser Filistia nungerji Mikmas nung anen. 17Aser yimakertemji Filistia nunger tanendak nungi telok asemsü kümer adok; telok ka Ofrai aoba lenmang, Shual lima dangi meyip; 18aser tangar telok Bethhoron lenmangi meyip; aser tangar telok arem tsütsülen Zeboiim lenten arrtsü leni meyip.19Tang Israel lima ajak nung yintsünger maliasü, kechiyong Filistia nungeri ashi, “Ibri nungeri parnok sasa nok aser nü yanglura koda.” 20Saka Israel nunger ajak pei alu alaba koterang, mertsüng, pu aser ninok ayitsü asoshi Filistia nunger dangi alu. 21Koterang aser mertsüng ayiba ta-aji senpak asem, aser pu o ninok ayiba ta-a sempak ana liasü. 22Aser tongbang anogo nung, Saul aser Yonathan den aliba nisungtem kar ket nungdanga nok mesüra nü maliasü. Saul aser par jabaso Yonathan ket nungdang liasü. 23Aser Filistia nunger temeranger telok Mikmas ongdang lenmangi ao.1 SAMUEL 14
Yonathan Tasü Tait Mapa1Kenü anogo Saul jabaso Yonathani pa nok o nü abenba asangur nisung dang ashi, “Arung Filistia nunger temeranger alidak külenjagi asenoki odi.” Saka pai aji tebu dang mashi. 2Gebia tezülen Migron nung jaremdong kübok Saul mena liasü; pa den nisung noklang trok shi liasü. 3Shilo nung Kibuba putir Eli jabaso Finehas jabaso Ikhabot adianu Ahitub jabaso Ahijai temeshi sobutsü sobua liasü. Aser shingaia Yonathan ogo ta memeteti liasü.4Filistia nunger temeranger telok dangi Yonathan aotsü ongdang lenmangtem tsüngda nung yangji külen lungren ka; aser külen lungren ka; ka tenüng Bozez, aser ka tenüngji Sene liasü. 5Lungren ka Mikmas tejaklen anüolentip tsütsü adoka liasü, aser kaji Geba anüdoklentip tejaklen liasü.6Idangji Yonathani pa nok o nü abensang dangji ashi, “Arung item memejeptokba temeranger telok dangi asenoki odi; ashiko Kibubai asenok asoshi langka inyaktsü, kechiaser aika agi mesüra ishika agi kümzüktsü Kibuba madangbo tamakoktsü mali.” 7Nok-o-nü abensangi langzü, “Ne mulung nung bilemba amaji inyakang, ni ne den lir; ana temulung ka dang lir.”8Idangji Yonathani ashi, “Ajiang, asenoki nisungtem ajanga odi, aser asenok sasa parnok dang sayudi. 9Parnoki asenok dang, Onok nenok dangi maru tashi ata-a liang, ta shira idangji asenok talidak asenoki marakzüi noktaka alitsü, aser parnok dangi asenok matutsü. 10Saka parnoki yamai shira, Onok dangi atung idangji asenok atutsü; kechiyong Kibubai parnok asenok ket nung agüja lir, aser asenok asoshi ibai temaitsü alitsü.”11Tenaprongla Filistia nunger temeranger telok dang sayu; aser Filistia nungeri ashi, “Ajiang, Ibri nunger parnok pei sasa atsüka alidak tapok nungi adoka lir.” 12Temeranger telok nisungtemi Yonathan aser pa nok o nü abenba dang ashi, “Onok dangi atung, onoki nenok dang langka sayudi.” Aser Yonathani pa nok o nü abensang dang ashi, “Kü sülen atung; kechiyong Kibubai parnok Israel ket nung bendanga agüja lir.” 13Yonathani pa teka aser pa tetsüng agi apua atu, aser pa nok o nü abensang pa sülen liasü; aser Yonathan madang parnok lao; aser pa nok o nü abensangi pa sülen parnok tepset. 14Ali tasazük tilaka nung danga Yonathan aser pa nok o nü abensang nati nisung metsü shi tepset. 15Aser tanendak, moapu nung, nisung ajak kanga atentena liasü; temeranger telok aser yimakertema atenten; aser menoknok anok; anungji yangji kanga tatentenba tulu liasü.Filistia Nunger Akokba16Saul mitkartemi Benjamin litsü Gibea nungi reprang aser Filistia nunger temerangertem pusatepa jenshiba angu. 17Idangji Sauli pa den aliba nisungtem dang ashi, “Tang temerangertemji züngdangang aser shibasa mali ajiang.” Parnoki kodang züngdang Yonathan aser pa nok o nü abensang yangji maliasü. 18Sauli Ahija dang ashi, “Yangi Tsüngrem süngden bener arung;” kechiyong Tsüngrem süngden iba mapang nung Israel chirtem den liasü. 19Sauli putir dang jembia alidang, Filistia nunger tanendak aliba rongrongshishiji maneni tali aküm; aser Sauli putir dang ashi, “Ne ket agienang.” 20Saul aser pa den aliba nisungtem külemi sentepa tongbangi aru: aser ajiang nisung shia nok pei medemer anema liasü, aser yangji pusatepba tulu liasü. 21Tang Ibri nunger akhidang Filistia nunger den alirtem shirnok meketa aliba linük nungi parnok den tanendaki atu, oda parnoka, Saul aser Yonathan den aliba Israel nunger den semlok. 22Iba amaji Israel nisung ajak shirnok Efraim tenem lima nung parnok sasa atsüka liasü, Filistia nunger jenogo ta parnoki angashidang oda parnoka tongbang nung parnok sülen nepeta anitak. 23Anungji iba anogo nung Kibubai Israel kümzük aser tongbangji Beth-aven ajanga ao.Tongbang Sülen Tatalokbatem24Iba anogoji Israelpurtem kanga timtema liasü, kechiaser Sauli nisungtem dang azüngashia ashi, “Nisung shibai aonung matong tashi aser ni kü tsükchirtem dak mang mayangdang chiyungtsü chidir atakatem kaoang.” Anungji shingaia chiyungtsü memenakdang. 25Aser nisung ajak aremi ai; aser yangji ali nung ninang mojitzü liasü. 26Kodang nisungtemi aremi aita liasü, ajiang, ninang mojitzü yima alu; saka nisung shingaia pei teka agi pei tebang nung matalok; kechiyong nisungtemi azüngashibaji tsübu. 27Saka Yonathani tebui nisungtem dang ozüng agüja azüngashibaji mangashi; anungji pa ket nung aliba mechi tatembanglakji songtoka ninang tzü tejeb nung asenoktsü, aser pa ket pa tebang nung atalok; aser pa tenük pranga aküm. 28Idangji nisungtem rongnung kati ashi, “Nebui nisungtem dang ajang ajanga ashi, Shibai iba anogo chiyungtsü chidir atakatem kaoang.”29Idangji Yonathani langzü, “Kubui linük timtemdaktsür, ajiang, koda kü tenük pranga kümdakja lir, kechiaser ni iba ninang mojitzü tera menakdang. 30Nisungtemi parnok tsükchirtem nungi temakzükba techinütsü chir ali asübo, tanü Filistia nunger tetepsetba koda tali süla.”Yimsü Yimbong Anema Aibelenba31Iba anogoji parnoki Mikmas nungi Aijalon tashi Filistia nunger den rara; aser nüburtem kanga lula-a liasü. 32Aser nisungtemi temakzükba madaki asüm aser san, nashi, nashi chanutem agi, aser parnok ali nung tepset; aser nüburtemi itemji azü dena achi. 33 Idangji parnoki Saul dang ya oda ashi, “Ajiang, nisungtemi azü dena achiba agi parnoki Kibuba anema temenen menar.” Pai ashi, “Nenoki külaka benshiogo: tanü kü dangi lung tulu ka mezüa yokang.” 34Sauli ashi, “Nenok sasa senshiang, aser parnok dang shiang, Nisung shiai pei nashi aser pei san, kü dangi bener arung aser parnokji tepsetang aser chiang; aser azü dena achiba agi Kibuba anema temenen temena, aser nisung ajaki pei nashi pa den paonungji bener aru, aser yangji parnok tepset. 35Sauli Kibuba dang tenla dak ka yanglu: aji mezüngbuba tenladak pai Kibuba dang yangluba lir.”36Sauli ashi, “Asenoki Filistia nunger sülen aonung ludi, aser mesangwa tashi parnok makdi, aser parnok kata taküm metoktsüli.” Parnoki langzü, “Ne dang kechisa ajung inyakang.” Saka putir jagi langzü, “Asenoki tamasa Tsüngrem dang asüngdangdi.”37Anungji Sauli Tsüngrem dang asüngdang, “Ni Filistia nunger anema alutsü asü? Nai parnokji Israel ket nung bendanga agütsütsü asü?” Saka Tsüngremi iba anogo pa dang melangzü. 38Idangji Sauli ashi, “Nenok tongtipur ajak yagi arung aser iba anogo kechi nung temenen mena aji ajiang. 39Kechiaser Kibuba shibai Israel kümzük Pa taküm ali nungji kü jabaso Yonathan dak tai liaka pa atangji asütsüla.” Saka nüburtem katia pa dang kecha melangzü. 40Idangji Sauli Israel ajak dang ashi, “Nenok külen tsütsüji noktakang; aser Yonathan küna külen tsütsü noktakdi.” Nisungtemi langzü, “Ne dang kechi ajung aji inyakangma.”41 Idangji Sauli ashi, “Oh Kibuba Israel Tsüngrem, kechiba tanü ne tenzüker dang nai melangzür? Iba tia ya kü dak aser kü jabaso Yonathan dak lira Urim; mesüra iba tia ya nüburtem den lira thummim ta agüjang.” Ibaji Saul aser Yonathan dak kao saka nüburtembo jenbu. 42Sauli ashi, “Ni aser kü jabaso Yonathan küna tsüngda nung an toktangang,” aser Yonathan dak aji kao.43Idangji Sauli Yonathan dang asüngdang, “Nai kechi inyak kü dang shiang.” Yonathani langzü, “Ni kü mechi tatembang agi ninang mojitzü tera menakdangogo. Aser tang ni asütsüla.” 44Sauli ashi, “Yonathan! Na atangji asütsü, yamaji mesüra Tsüngremi kü dak mezüngdangtetba tashitak agi, aser iba dang tali ne madaki arudakjang.”45Saka nisungtemi Saul dang ashi, “Yonathan, shibai iba tekümtet mapa tulu inyak pa asütsü no? Tsüngremi songtemang; Kibuba tenüng nung shidi, pa tekolak nungi kujang ka danga ali nung metsüktsü; kechiyong tanü pai Tsüngrem den inyakogo.” Anungji nisungtemi Yonathan tasütsü nungi kümzük. 46Idangji Filistia nunger sülen anidakba nungi Saul atu, aser nisungtem parnok talidaki ao.47Kodang Sauli Israel madak yimli agi pai ajaklen pa tsükchirtem anema rara: Moab, Amon chirtem, Edom, Zoba chubatem, aser Filistia nunger anema; aser kolenisa pa meyip, pai takok angu. 48Aser pai tasü ita inyak aser Amalek nunger atsüngdok, aser Israel shirnoki amak parnok ket nungi kümzük.Sauler Kibong49Tang Saul jabasotem Yonathan, Ishvi, aser Malkhiskua liasü; aser par jala ana tenüng yamai liasü; tantsüla tenüng Merab aser tanutsüla tenüng Mikal: 50aser Saul kibutsü tenüng Ahimaaz jala Ahinoam liasü; aser pa temeranger telok tir tenüngji, Saul tebu tanubu Ner jabaso Abner liasü. 51Saul tebu Kis liasü; aser Abner tebu Nerji Abiel jabaso liasü.52Sauli arishi tepiyong Filistia nunger anema rara tesashi rara liasü; aser kodang Sauli tashi tulu nisung kar mesüra tasü tait nisung kar angu, pai parnok pa asoshi ayu.1 SAMUEL 15
Amalek Nunger Den Raraba1 Samueli Saul dang ashi, “Kibubai pei nübur madak aser Israel chuba asütsüsa na mezüja shimtettsü ni yok. Anungji tang Kibuba O angang. 2 Yamai Temeranger Kibubai ashir, Amaleki Israel dang kechi inyak oda pa Ijip nungi adokdang pai lenmang nung noktangba asoshi ni Amalek merenshitsü. 3Tang oang aser Amalek makang, parnok akaba ajak meshimeshia samajang. Parnok kecha anünga teyutsü, saka tetsür, tebur, tanur aser kinütem; nashi, san, ut aser gado ajak tepsetang.”4Sauli nisungtem aja, aser Telaim nung parnok züngdang, tetsüng temeranger meyi noklang ana, aser Yihuda nisung meyi ter. 5Saul Amalek yimti-i aru, aser lenten nung pai mita ali. 6Sauli Ken nunger dang ashi, “Oang, pilaang, Amalek nunger den ni nenok samadakja lir; parnok rongnungi nenok luang; kechiyong Israel nunger Ijip nungi adokdang nenoki Israel chirtem dang yimlibilem sayu.” Anungji Ken nungerji Amalek nunger rongnungi pila-a ao.7Sauli Amalek nungertemji Havila nungi Shuri tashi Ijip anüdoklen tashi amak. 8Pai Amalek nunger chuba Agag taküm apu, aser nokpu agi nisungtem meshimeshia samatsü. 9Saka Saul aser nisungtemi Agag, san tajungtibatem, nashi tejebketbatem, san chanutem aser kechi tajung ajak mesamatsüi anünga ayu, saka tamajung aser teshimzük ajak meshimeshia samatsü.Kibubai Saul Jentokba10Idangji Kibuba o Samuel dangi ya oda arua ashi, 11“Ni Saul chuba kümdaktsüba asoshi jashir, kechiaser pai kü temelaba meinyak aser ni nungi pila.” Aser iba jagi Samuel jashidaktsü, aser aonung tepiyong pai Kibuba dang ayimten. 12Anepdang Samueli Saul ajurutsü ao. Saka Sauli pei asoshi nüngshilung ka Karmel nung yangluogo aser Gilgali meyipa luogo ta Samueli angashi. 13Samuel Saul dangi aru; aser Sauli pa dang ashi, “Kibubai na moajang, ni Kibubai melaba inyakogo.”14Saka Samueli ashi, “Süra kü narong nung san aser nashi asatepba koba ni angashir ya kechi tetezü?” 15Sauli langzü, “Itemji parnoki Amalek nungi bener aru; kechiaser Kibuba ne Tsüngrem nem tetepsetba tenla agütsütsü asoshi nisungtemi san aser nashi tajungtiba anünga ayu; aser tanüngbaji meshimeshia onoki samatsüogo.” 16Idangji Samueli Saul dang ashi, “Ata-a liang, Kibubai kü dang iba aonung kechi ashi aji ni ne dang shidi.” Aser pai pa dang ashi, “Shiangma.”17Samueli ashi, “Na ne nükdang tila liaka, na Israel kidongtem madak tazüngba mekümdaktsü no? Aser Kibubai na Israel madak chuba asütsü mezüja shimtet; 18aser Kibubai na mapa kati yok, aser ashi, oang aser parnok temenen nisung Amalik nunger mesamatsü tashi parnok anema rara-ang. 19Ajangla kechiba nai Kibuba o manga, saka temakzükba oset bushia asem, aser Kibuba tsüngdang kechi tamajung aji inyak?”20Sauli Samuel dang langzü, “Hau, ni Kibuba o angaogo, aser Kibubai kü dang sayuba lenmangi ogo, aser Amalek chuba Agag bener aru, aser Amalek nunger meshimeshia samatsüogo. 21Saka nisungtemi san aser nashi pungchi, samatsütsü aliba oset tongtibangtem, Gilgal nung Kibuba ne Tsüngrem nem tetepsetba tenla agütsütsü agi.”22Samueli ashi, “Kibuba o tashi angaba nung pelaba teka tarongba aser tetepsetba tenla tenladak Kibubai tepela ali asü? Ajiang, tashi angabaji tetepsetba tenla dang nungi tajungba, aser o angabaji san tepung temo dang nungi tajungba. 23Kechiyong anema apusobaji arasentsür temenen amato lir, aser temulung merangbaji süngyanglu külemba temenen amato lir; nai Kibuba o magizük nungji paia na chuba asütsü magizüker.”Amajok Nung Sauli Tatok Meshiba24Idangji Sauli Samuel dang ashi, “Ni temenen benshiogo; kechiyong ni Kibuba aser ne o temelaba ozüng anema inyakogo; kechiaser ni nisungtem tsübu aser parnok o anga. 25Anungji tang ni ne dang mepishir, Kü temenen tai tokang, aser ni Kibuba külemtsü na kü den meyipangma.” 26Saka Samueli Saul dang langzü, “Ni ne den memeyiptsü, kechiaser nai Kibuba o magizük aser Kibubai na Israel madak chuba asütsü magizüker.” 27Samueli oadoktsü meyipdang Sauli pa tetsünglen sobutsü nung amet aser aji shisatsü. 28Samueli pa dang ashi, “Tanü Kibubai Israel yimli na nungi shidangogo aser aji ne dang nungi tajungba ne kiyonger ka nem agütsüogo. 29Ano pa shiba Israel sentsüwangshi lir, pai meyazütsü mesüra temulung memelenshir; kechiaser temulung meyiptsüsa pa nisung ka masü.” 30Idangji Sauli ashi, “Ni temenen benshiogo; aji saka ni ne dang mepishir, kü nübur tambur madang aser Israel madang kü dang akhüm tsübu sayuangma, aser Kibuba ne Tsüngrem ni külemtettsüsa kü den meyipa arungma.” 31Anungji Samueli Saul sülen tanaben meyipa ao, aser Sauli Kibuba külem.32Idangji Samueli ashi, “Amalek nunger chuba Agag kü dangi yagi anir arung.” Aser Agag pa dangi pelashishia arua ashi, “Atangji tasüba taku süitema ogo.” 33Samueli ashi, “Ne nok agi tetsürtem tanur mali kümdaktsüba ama yamaji tetsür rongnung netsü tanur malitsü.” Aser Gilgal nung Kibuba madang Samueli Agag anüka lepsatsü.34Idangji Samuel Ramai ao aser Saul pei kidangi Gibeai ao. 35Samueli Saul dangi pa asüba anogo matong tashi joko maru; saka Samueli Saul asoshi mang ayim; aser Kibubai Saul Israel madak chuba kümdaktsüba asoshi sasa-a liasü.1 SAMUEL 16
Dawid Chuba Asütsü Shimtetba1 Kibubai Samuel dang ashi, “Ni Saul Israel madak chuba asütsü magizük nung, nai pa atema kopiga mang ayimtsü? Bongdangji totzü agi süngdakjang aser oang, Bethlehem nunger Yesse dangi ni na yoktsü; kechiaser ni asoshi chuba ka ni par jabasotem rongnung shimteta lir.” 2Samueli langzü, “Ni koda aotsü? Sauli aji angashira pai ni tepsettsü.” Kibubai ashi, “Ne den nashi tsüla chanu ka aniang, aser shiang, Ni Kibuba dang tetepsetba tenla tenlatsü aru. 3Aser tenladak jagi Yesse jaang, aser na kechi inyaktsü ni ne dang sayudi: aser shiba tenüng ni ne dang shidir nai pa dak ni asoshi totzü mezütsütsüla.”4 Kibubai jembiba amaji Samueli inyak, aser Bethlehemi aru. Aser yimti tamburtem pa lenji atentena arua ashi, “Na yimjung nung arura ma?” 5Pai ashi, “Yimjung nung: ni Kibuba dang tenlatsü arua lir; nenok sasa meshiteta liang, aser kü den tenladaki arung.” Pai Yesse aser par jabasotem meshitetdaktsü aser tenladaki parnok aja.6Kodang parnok tonga aru, pai Eliab dak reprang aser ashi, “Atangji Kibubai mezüja shimtetbaji pa madang lir.” 7Saka Kibubai Samuel dang ashi, “Pa tobur mesüra asoajen tereprang, kechiaser ni pa magizük; kechiaser Kibubai nisung ama merepranger, kechiaser nisungi tema repranger, saka Kibubai temulungjang repranger.”8Idangji Yesse-i Abinadab aja, aser pa Samuel madang süia odaktsü. Aser pai ashi, “Ibai Kibubai meshimtet.” 9Idangji Yesse-i Shamma anasa süidaktsü. Aser pai ashi, “Ibaia Kibubai meshim.” 10Aser Yesse-i par jabaso tenet Samuel madang süidaktsü. Saka Samueli Yesse dang ashi, KIBUBAi parnok meshimtet. 11Aser Samueli Yesse dang ashi, “Ne chir ajak yangi lir ma?” Pai ashi, “Ano tanubusang anünga lir, aser ajiang, pai san anüker.” Samueli Yesse dang ashi, “Yokang aser anir arung; kechiyong pa yagi maru tashi asenok mamentsü.” 12Pai yok, aser pa anir aru. Tang pa sentsü tajung, aser tenük tajung atenba asangur, aser tajinütsüka liasü. Kibubai ashi, “Aramesoang, pa dak totzü mezüjang; kechiyong ibaji pa lir.” 13Idangji Samueli totzüji agi aser pa adianutem lia pa dak totzü mezütsü; aser iba anogo nungi shir Kibuba tanela tashi tulu agi Dawid madak aru. Anungji Samuel aramesoa Ramai ao.Sauler Mapai Dawid Aiba14Tang Kibuba tanela Saul nungi pila-a oadok, aser Kibuba nungi temenen tanela kati pa timtemdaktsü. 15Saul tenzükertemi pa dang ashi, “Ajiang, Tsüngrem nungi temenen tanela kati na timtemdaktsür. 16Tang ozü kiburi ne tenzüker shir ne madang lir; kongki atemtsü nisung tesangra ka bushitsü mela-angma, aser kodang temenen tanela Tsüngrem nungi ne madangi arudir; pai kongkiji atemtsü aser na junga akümtsü.” 17Sauli pa tenzükertem dang ashi, “Tang ni asoshi kongki junga atemba nisung ka bushijang, aser pa kü dangi anir arung.” 18Idangji asangur rongnung kati langzü, “Ajiang, ni Bethlehem nunger Yesse jabaso ka kongki atemtsü tesangra nisung ka nguogo, aser pa tashi tulu, tasü tait aser raraba nisung, mapa nung tetangshi aser taginütsü nisung, aser Kibuba pa den lir.”19Anungji Sauli osang abener Yesse dangi yoka ashi, “Ne jabaso san den alibaji kü dangi yokang.” 20Yesse gado nung amtsük aser yi bongdang ka bendaktsü, aser nabong chanu ka aser itemji par jabaso Dawid den Saul dangi yok. 21Dawid Saul dangi aru, aser pa jakdang noktak: aser pai pa kanga meim; aser pa meyong nok o nü abenba pa aküm. 22Sauli Yesse dangi ya shia yok, “Ni ne dang mepishir, Dawid kü nükdang noktakdakjang; kechiyong kü tsüngdang pa yimli nguogo.” 23Aser kodang temenen tanela Tsüngrem nungi Saul madaki aru, Dawidi kongi bena aru, aser pa ket agi atem; anungji Saul süngzüka aküm aser junga liasü, aser temenen tanela pa nungi pila.1 SAMUEL 17
Goliati Israel Temerangertem Jazükba1Tang Filistia nungertem tongbang raratsü asoshi Yihuda meyong Soko nung külemi sentep, aser Efes-Damin nung Soko aser Azeka tsüngda tanendak yanglu. 2Saul aser Israel nungertema külemi sentepa Ela lenten nung amen, aser Filistia nunger anema raratsü taren kümteta liasü. 3Filistia nunger tenem külen aser Israel nunger tenem külen aser parnok tsüngda ali telemok ka liasü.4Filistia nunger tanendak nungi walunir ka tenüng agi Goliat, Gat nunger ka adok, shiba tar süklep trok aser aka ka liasü. 5Pa kolak nung yongmenyin korang ka sema liasü, aser pa merang semoksü sobua liasü; aser semoksüji yongmenyin shekel meyi pungu taret liasü, 6pa tetsüngji yongmenyin agi meia liasü aser tapubang tsüngda nung yongmenyin nü liasü. 7Pa nülakji sütaker alem amai liasü, aser pa nü o merang shekel noklang trok taret liasü aser pa jong abener ka jakdang ao. 8Aser pa noktaka Israel temeranger telok dang ayimtena parnok dang ashi, “Kechiba nenok tongbang taren sena noktaktsü adok? Ni Filistia nunger ka aser nenok Saul tenzükertem masü no? Nenok asoshi nenoki nisung ka shimtetang, aser pa kü dangi aludakjang. 9Pai kü den raratsü kokra aser ni tepsetra, idangji onok nenok alar asütsü; saka ni pa kokra aser pa tepsetra, idangji nenok kü lar asütsü aser onok tenzüktsü.” 10Aser Filistia nungbai ashi, “Tanü ni Israel temeranger telok anema ayongzüker; küna külemi rarateptsü kü nem nisung ka agüjang.” 11Kodang Saul aser Israel ajaki Filistia nungba otemji angashi, parnok aoksa aser kanga tsübu.Israel Nunger Tanendaki Dawid Aruba12Tang Dawidji Yihuda nung Bethlehem meyong Efrat nunger tenüng agi Yesse jabaso liasü; pa jabaso ti liasü; nisungbaji Saul tensa nung tambur, nisung rongnung arishir nisung ka liasü. 13Yesse jabaso tambusang asembo Saul sülen tongbangi or liasü; tongbangi aoba par jabaso asem tenüngji Eliab mezüng asoba, aser pa den tatong Abinadab aser tasembuba Shamma. 14Dawid tanubuti liasü: aser tambusang asemji Saul sülen anidak. 15Tang, Bethlehem nung pa tebuer san mesütsü Dawid Saul nungi oli aruli ta asü.16Filistia nungbai anogo lirnü tashi anepdang aser nikongtsütsü adoka kasaji jembia noktak. 17Yesse-i par jabaso Dawid dang ashi, “Tang nedi nunger asoshi iba kongnüng efa ka, aser item amtsük ter benang, aser itemji kara-a nedi nunger tanendaki bener oang. 18Aser item mamatzülong ter, meyi madak tir dangi benang, aser nedi nunger kodasa ali reprangang, aser parnok indang jungjunga metetang.” 19Tang Saul, aser Israel nisung ajak, Ela lenten nung Filistia nunger den rara-a liasü.20Dawid anepdang yakta shishi aser santemji tanüker nem toktsür tebu Yesse-i ashiba ama renemer apuso. Aser temerangertemji tongbang asoshi washia taren sena noktakya lia pai tanendakji tonga aru. 21Filistia aser Israel nunger temerangertemji tongbang asoshi tejak o tejak na jitepa noktaka liasü. 22Dawidi pa khuji chiyungtsü anebalur tanishirtem nem yutsür tongbanglen jagi pa tedi nunger dangi asema oa parnok koma lir ta asüngdang. 23Pai parnok den jembia alidang Filistia nunger walunir Gat nunger Goliati parnok taren nungjagi adoka mezüng ama kasa oji jembi, aser Dawidia itemji angashi. 24Kodang Israel nungertemi nisungbaji angu, parnok ajaki tetsübu nung pa nungi ajen. 25Israel nungertemi ashi, “Tang atua aliba nisungji nenoki angur südi? Israel jazüktsü pa atua lir. Shibai iba nisungji tepsetdir chubai pa rongsen tulu agi paji takar kümdaktsütsü aser pa nemji pa jala agidaktsütsü, aser pa tebuer kibong Israel nung ali melen kecha magi-i sademsadema lidaktsütsü ta nangzükogo.”26Dawidi pa anasa noktaka alirtem dang asüngdang, “Nisung shibai iba Filistia nungbaji tepsetdir aser Israel maksü nungi kümzükdir pa sempetji kechi asütsü? Taküm Tsüngremer temerangertem jazüktsüba iba memejeptokba Filistia nunger ya shiba? 27Shibai iba nisungji tepsetdir pa sempetji yamai alitsü ta nisungtemi pa dang langzü.”28Pai nisungtem den jembia alidang tedi tambusang Eliabi angashi, aser Dawid anema Eliab ain adoka ashi, “Na kechiba alu? Aser san ishikato arem nung shiba den toktsü? Na asüakümba aser ne mulungjang majungba ni metet; kechiyong tongbang reprangdangtsü na alua lir.”29Dawid ashi, “Ni tang kechi inyak aji o ka dang masü no?” 30Aser pai pa nungi tangar tsütsü meyip, aser iba amajisa jembi; aser nisungtemi tanaben mezüng amajisa langzü. 31Kodang Dawidi jembiba otem angashi, parnoki item Saul dang metetdaktsü; aser pai pa ajai yok.Dawidi Goliat Den Raratsü Jembiba32Dawidi Saul dang ashi, “Pa indang shinga temulung makai teli. Ne tenzüker aotsü aser iba Filistia nungba den raratsü.” 33Sauli langzü, “Iba Filistia nunger anema pa den raratsü na aotsü makok; kechiyong na tanur ka dang aser pa lanuwa nungi raraba nisung lir.”34Dawidi Saul dang ashi, “Ne tenzükeri pa tebuer san anük; aser kodang molusongzü ka mesüra shirem ka arua san telok nungi san chanu ka bener ao, 35ni iba sülen oa, pa tepset aser pa tebang nungi aji kümzük, kodang pai ni anema noktak, ni pa bangsemo nung am, aser pa dak zükokja pa tepset.” 36Ne tenzükeri molusongzü aser shirem anaprong tepset aser iba memejeptokba Filistia nungbai taküm Tsüngrem temeranger telok sensatsü nungji, parnok rongnung ka mesüka pa-a alitsü. 37Dawidi ashi, Molusongzü kabu nungi aser shirem kabu nungi ni kümzükba Kibuba, pai ni Filistia nungba ket nungi kümzüktsü. Sauli Dawid dang ashi, “Oang, Kibuba ne den liang.”38Sauli pei sobutsü Dawid nem sobutsü, aser pai pa tekolak nung yongmenyin korang semoktsü, aser pai pa merang sobutsü agi sobutsü. 39Dawidi pa nok pa sobutsü manung asem, aser pai aotsü merang, saka makok; kechiaser pai itemji yimya mesüpa, aser Dawidi Saul dang ashi, “Ni item deni aotsü makok; kechiyong ni item agi yimya mesüpa” aser Dawidi itemji sepzük. 40Pai pa ket nung mechi am, aser ayong nungi lung tesüsü pungu pa asoshi shimtet, aser pai abenba sannükdang amshiba shiküp juli nung enok, aser pa ket nung lung yokba shiküp liasü; aser pai Filistia nungba anasa ao.Dawidi Goliat Tepsetba41Filistia nungba Dawid anasa aru aser pa jong abenba pa jakdang ao. 42Kodang Filistia nungbai meketa reprang, aser Dawid angu, pai pa atalatsü; kechiyong pa aso-ajen aser tobur tajung tanur ka liasü. 43Filistia nungbai Dawid dang ashi, “Na kü dangi mechi amer arutsüba, ni azüa na?” Aser Filistia nungbai pei tsüngremtem tenüng atemer Dawid ataka jembi. 44Filistia nungbai Dawid dang ashi, “Kü dangi arung, aser ni ne shi anüng ozü aser arem shiruru nem agütsütsü.”45Idangji Dawidi Filistia nungba dang ashi, “Na kü dangi nok, nü aser sangja bener arur: saka nibo nai sensatsüba Israel temeranger telok Tsüngrem, Temeranger Kibuba tenüng nung ne dangi arur. 46Iba anogo Kibubai na kü ket nung bendanga agütsütsü; ni ne dak azüktsü, aser na nungi ne kolak leptoktsütsü, aser Filistia nunger telok tasü mang ni anüng ozü aser arem shiruru nem agütsütsü, ajagi alima ajaki Israel nung Tsüngrem ka lir ta metettsü. 47Aser item tesenteper ajaki Kibubai nok aser nü agi mekümzüker ta metettsü; kechiyong tongbangji Kibuba meyong, aser pai onok ket nung na agütsütsü.”48Kodang Goliat aramesoa Dawid den ajuruteptsü anasa aru, Dawid yakta ao, aser Filistia nungba den ajuruteptsü temeranger telok tsütsüi asem. 49Dawidi pei teka juli nung amuok, aser iba nungi lung ka agiteta ondaktsü, aser Filistia nungba dak tenütsü nung aon; aser lungji pa tekolaki ai, aser pa tejak rembanga ali nung lao. 50Anungji Dawidi Filistia nungba madak lung yokba shiküp ka agi takok angu, aser Filistia nungba dak aon, aser pa tepset; saka Dawid ket nung nok mali asü. 51Idangji Dawid asem aser Filistia nungba manung noktak, aser pa nokji atsüteta pa tekolak tangzük. Kodang Filistia nungeri parnok walunir asübaji angu, parnok jena ao.52Idangji Israel aser Yihuda nisungtemi tashi agi ayimtena aramesoa Gath tashi, oda Ekron süngkhümbongtem tashi Filistia nungertemji parnoki aria ao, anungji teyirur Filistia nungertemji lenmang nung Sharaim nung Gath aser Ekron tashi lao. 53Aser Israel chirtem Filistia nunger sülen aria aoba nungi meyip aser parnoki parnok tanendak amak. 54Aser Dawidi Filistia nungba tekolak agi, aser aji Yirusalemi bener aru; saka pai pa nok o nü pa süki nung ayu.Saul Dangi Dawid Anir Aruba55Kodang Filistia nunger anema Dawid aoba Sauli angu, pai temeranger telok tanishiba Abner dang ashi, “Abner iba asangur ya shir chir?” Abneri ashi, “Oh chuba, ni ashitsü makok.” 56Chubai ashi, “Asangubaji shir chirar nai asüngdangtepang.” 57Filistia nunger tepsetba nungi Dawid meyipa arudang, Abneri pa ania aru, aser pa Saul madangi pa ket nung Filistia nungba tekolak amer anir aru. 58Sauli pa dang asüngdang, “Asangur, na shir chir?” Dawidi langzü, “Ni Bethlehem nunger ne tenzüker Yesse chir lir.”1 SAMUEL 18
Dawid Aser Yonathan1Kodang Dawidi Saul den jembiba atem, Yonathani Dawid dak kanga sakloka aküm aser pai pei taküm ama Dawid meim. 2Panü nungjagi Sauli pa den Dawid ayu aser pa tebuer kidangi meyipa meyok. 3Idangji Yonathani Dawid den tezüngzüktepba ka yanglu, kechiaser pai pa pei ama meim. 4Yonathani sobua aliba pei sobutsüji agizüka Dawid nem agütsü aser pa sobusolemtsü oda nok, lijak, aser peremsen item ajakji agütsü. 5Sauli kolenisa Dawid yok, item ajak nung pai takok angu, anungji Sauli pa temerangertem madak tanishir kümdaktsü. Iba yagi nüburtem aser Sauler tanishirtem ajak pela-a liasü.Sauli Dawid Anema Nükmeremba6Dawidi Filistia nungba tepseter parnok kidangi arudang, Israel yimti ajak nungi tetsürtemi Saul chuba ajurutsü asoshi tsüngsanga ken tena kongki tema aru. 7 Parnoki tsüngsanga ken yamai aten: “Sauli meyirijang tepset aser Dawidi meyirijang ter tepset.”8Saul kanga rasa, aser iba jagi pa mepeladaktsü: aser pai ashi, “Parnoki Dawid nem meyirijang ter agütsü aser parnoki kü nem meyirijang dang agütsü: aser chuba yimli dak alema ano pa kechi akatsü?” 9Iba anogo nungi shir Sauli Dawid dak tenük yok.10Tananü Tsüngrem nungi temenen tanela ka Saul madak tashi agi aru aser tamataria jembi, aser Dawidi anogo shia pai inyakba ama pa ket agi kongki tema liasü: aser Saul ket nung nü liasü. 11Sauli nü tsüloktsü, kechiyong pai ashi, “Ni oda Dawid jara nung neploka atsüngtsü” Saka Dawidi anaben tashi pa tsüngdang nungi paidok.12Sauli Dawid tsübua liasü, kechiaser Kibuba pa den liasü, saka Saul nungibo pilar liasü.13Anungji Sauli pa nungi Dawid aenshidaktsü, aser meyi ka madak pa tanishir kümdaktsü, aser Dawidi itemji tongbangi anir ao. 14Kechisarena nung pai takok tulu angu, kechiaser Kibuba pa den liasü. 15Kodang pai kanga shisa kaa benshi aser takok angur ta Sauli ajitet, pai pa tsübua aküm, 16Saka Israel aser Yihuda ajaki Dawid meim, kechiaser parnok tsüngdang pa oli-aruli asü.Dawidi Saul Jala Agiba17Idangji Sauli Dawid dang ashi, “Kü jala tantsüla Merab yangi lir, ni la ne kibutsü asütsü agütsüdi; nai ni dang tasü ita tenzükang aser Kibubaer tongbang rara-ang.” Sauli pei sasa ashi, “Ni pa anema kü teka memekangli, saka Filistia nungeri ibaji inyakdaktsüdi.”18Dawidi langzü, “Ni chubar tanük akümtsüsa Israel nung ni shiba, aser ozü kibong mesüra kübur kinungera kechi?” 19Saka kodang Sauler jala Merab Dawid nem agütsütsü mapang atong laji Mehola nunger Adriel nem kibutsü asütsü agüjadok.20Tang Saul jala Mikal-i Dawid meim, aser kodang ibaji Saul dang ashi aji agi pa pela-a liasü. 21Pai pa sasa ashi, “Pa atema Mikalji sang ka alitsü aser Filistia nunger teka pa anema alitsüsa ni pa la nem agütsütsü.” Anungji Sauli Dawid dang tanabenbuba ashi, “Na kanük asütsü.” 22Sauli pa tenzükertem dang mela-a ashi, “Dawid den kibok nung jembitepang aser shiang, ajiang chubai ne dak pelar aser par tenzüker ajaki na meimer, par jala agitsü asoshi na atema mapang tajungji tang lir.”23Saul tenzükertemi item o Dawid dang ashi. Dawidi langzü, “Ni ama sensaker aser jenjang makaba nisung ka chubar tanük akümtsübaji atamata mapa ka asü?”24Saul tenzükertemi pa dang Dawidi kechi jembi aji ashi. 25Sauli langzü, yamai Dawid dang shiang, “Chubai senmen kecha magitsü saka chubar tsükchirtem dang mang ayangba temaitsü Filistia nunger tebur oset temakep dang noklang ka aginür.” Aji oda Sauli Filistia nunger ket nung Dawid südaktsütsü bilem.26Kodang pa tenzükertemi Dawid dang item oji metetdaktsü, Dawidi chubar tanük akümtsübaji junga bilem. Anungji anogoji mabensadang, 27Dawid aser par nisungtemi oa Filistia nunger noklang ana tepset. Pai parnok oset temakepji bener arua chubar tanük akümtsü asoshi pai meshiba ama itemji agütsü. Idangji Sauli pei jala Mikal kibutsü asütsü pa nem agütsü.28Sauli kodang Kibuba Dawid den liasü aser pei jala Mikali pa meim ta angu, 29Sauli Dawid tali tsübu aser pa masü tashi Dawid den tsükchir liasü.30Kodangsa Filistia nunger tongtipurtemi maneni tongbangi adok paibenji Dawidi parnok madak takok angu, oda Sauler tenzüker ajak dang nungi pai tali takok angu, anungji pa tenüng kanga nüngtugu aküm.1 SAMUEL 19
Sauli Dawid Arishiba1Sauli par chir Yonathan aser pa tenzüker ajak dang pai Dawid tepsettsü sentongji ashi. Saka Yonathani Dawid kanga meim, 2anungji pai Dawid dang ashi, “Kübu Sauli na tepsettsü bushir, ne sasa asüngnep mita liang, shingaia mangutsüsa temiimdak kati oa atsüka liang. 3Ni na alidak moapu jagi oa kübu dang ne indang jembiteptsü; aser ni langka danga lazükra ne dang ashitsü.”4Yonathani tebu Saul dang Dawid indang tajung jembia ashi, “Chubai pei tenzüker Dawid dak tamajung tebenshima; kechiaser pai na anema tamajung kecha mebenshi, aser pai kechisa inyak aji na asoshi tajangzük dang liasü. 5Kechiaser pai Filistia nunger den raradang pai pei taküm bendanga agütsü, aser Kibubai Israel ajak asoshi takok tulu agütsü. Nai aji ngua na pela-a liasü. Sürabangla kecha kuli maka sür kechiba nai tai maketba nisung Dawid tepsetba agi temenen menatsü?”6Sauli Yonathan o anga aser pai azüngashi, “Atangji Kibuba taküm alinung, ni Dawid metepsettsü.” 7Yonathani Dawid aja aser item ajakji ashi. Pai Saul dangi Dawid anir aru, aser akhi ama pai pa tsüngdang liasü.Sauli Dawid Taküm Anema Inyakba8Tanaben rara adoka Dawidi Filistia nunger den oa rara; pai parnok jenti tepset aser parnoki pa nungi ajen. 9Saul pei ket nung nü amer mena alidang tanela tamajung ka Kibuba nungi pa madaki aru; Dawidi kongki temya liasü. 10Sauli pei nü agi Dawid jara nung menaloka atsüngtsü merang saka Dawidi ibaji paitok aser Saul nüji jara nungji tsüngoktsü. Paonungji Dawidi jenteta liasü.Mikali Dawid Kümzükba11 Paonungjisa Sauli Dawid mita atatsü aser tasüngnepji tepsettsü asoshi nisung kar yok. Saka Dawid kibutsü Mikali pa dang ashi, “Ne taküm asoshi taonung nai mejenra asüngbo na tepsettsü.” 12Anungji Mikali kichiba ajanga Dawid ajongzüka yoka jendaktsü. 13Idangji Mikali kidang aliba süngyanglu ka bener arua iba kolak nungji nabong züng ataloka yutsü aser aji yipten ka nung sü agi meibanger yutsü.14Kodang Dawid aputsü asoshi Sauli nisungtemji yok, Mikal ashi, “Pa shiranga lir.” 15Idangji Sauli nisungtemji Dawid reprangtsü tanaben yoka ashi, “Ni pa tepsettsüsa pa yagi yipten nungji bener arung.” 16Saka kodang nisungtemji kilungi ait, yipten nung süngyanglu kolakji nabong züng agi meibanger liasü. 17Sauli Mikal dang ashi, “Kechiba nai ni yamai ashioktsür, aser kü tsükchir jenbudaktsü?” Mikali Saul dang langzü, “Pai kü dang ashi, ni odakjang, mesüra ni na tepsettsü.”Saul aser Dawid Rama nung Samuel den18Kodang Dawid jenteta ao, pai Ramai Samuel dangi arua Sauli pa dak inyakba ajak pa dang ashi. Idangji pa aser Samuel Naioti oa idakji ali. 19Iba osangji Saul dang ya oda metetdaktsü, “Ajiang Dawid Rama nung Naiot nung lir.” 20Anungji pai pa aputsü nisungtem yok. Saka kodang ainkar telok ka Samuel lenir sür ainkar o shina jembiba parnoki angu, Tsüngrem tanela parnok madaki alu, aser parnokia ainkar o shina jembi. 21Kodang iba indangji Saul dang ashi, pai ano nisung tali yok, aser parnokia shin o jembi. Anungji Sauli tasembena nisungtemji yok, aser parnokia shin o jembi.22Idangji pa-a Ramai ao, aser Seku nung aliba tzübu tulu jagi aru aser pai asüngdang. “Samuel aser Dawid kong ali? Kati ashi, parnok Rama nung Naiot yim nung lir.”23Pai Rama nung aliba Naiot len jagi ao, saka Tsüngrem tanela pa madakia alu, aser pai Naiot matong tashi ainkar o shina aru. 24 Pai pei süoshi agizüka yur Samuel madang ainkar o shina jembi. Aser iba anogo tepiyong aser aonung tepiyong mangsa ontaka ali. Anungji iba shin o ya parnoki ashi, “Ainkar rongnung Saula aden asü?”1 SAMUEL 20
Dawid Aser Yonathan1Idangji Rama nung Naiot nungi Dawidi ajen aser Yonathan dangi arua asüngdang, “Ni kechi inyak? Kü tai kechi aser nebui kü taküm bushitsüsa pa madang kü temenen kechi?” 2Yonathani langzü, “Yamaji kodanga masü. Na masütsü. Ajiang mapa tulu saka tila saka kübui kü dang memetetdaktsü kecha meinyaker, aser kechiba kübui ibaji kü dang nungi miimtsü? Aji kodanga yamaji masü.”3Saka Dawidi azüngashia ashi, “Nai ni koda meim aji nebui jungjunga meteta kar, aser na jashia lir ta pai ne dang aji memetetdaktsü. Atangji Kibuba tenüng atemer aser ne tenüng nung ni shidi, ni aser tasü na tsüngda nung jenjang ka dang lir.”4Idangji Yonathani Dawid dang ashi, “Nai kü nem kechisa inyakdaktsünür aji oda ni inyaktsü.”5 Dawidi langzü, “Ajiang, asüng Ita Tasen benjong lir, aser ni chiyungdak chuba den medeni malitsüla, saka nai ni moapu jagi yokang aser yanü tashi ni atsüka atadi. 6Ni madenbaji metetra pa dang shiang, Dawidi kü dang par yimti Bethlehemi ilunga aotsü kanga mepishi;” kechiaser kinunger ajak yangji küm shia tetepsetba tenla agüja arur. 7“Junger ta pai shira ne tenzüker kümzüktsü saka pai ain adokra pai ni tepsettsü mulungteta lir ta nai metetang. 8Anungji ne tenzüker dang meima benshiangma, kechiaser nai ne tenzüker den Kibuba madangi tezüngzüktepba dangi aitogo. Saka kü tai lirabang ne sasa ni tepsetang, kechiba nai ni nebu dangi anir aotsü?”9Yonathani ashi, “Aji oda kodanga masü, kübui ne dak tamajung inyaktsü mulungteta lir ta ni metetra aji ni ne dang mashitsü no?”10Idangji Dawidi asüngdang, “Nebui ne dang sashia langzü nunga ibaji shibai kü dang ashitsü?”11Yonathani Dawid dang ashi, “Arung anabo moapu jagi odi.” Anungji tenaprongla moapu jagi ao. 12Idangji Yonathani Dawid dang ashi, “Israel Tsüngrem Kibuba asenok kuli sangma, kodang iba mapang kasa nung asüng mesüra yanü ni kübu dang asüngdangtsü. Ne tsütsü tajung lira ni ne dangi osang yoka metetdaktsütsü no? 13Saka kübui ne dak tamajung inyaktsü alibaji ni meteter ne dang aji meshira aser na jenteta meyokra; Kibubai Yonathan dak tali benshiang. 14Saka ni taküm ali tashibo Kibubai sayuba ama kü dang yimlibilem sayuangma, aser nia taküm alitsü. 15 Aji oda kodang Kibubai Dawider tsükchirtem ajak alijak nungi leptokdanga ozü kibongbo teleptokma. 16Aser Yonathani Dawider kibong den tezüngzüktepba yanglua ashi,Kibubai Dawid tsükchirtem ket nungi aji akhangtsü.” 17Anungji Yonathan o Dawid nati temeim agi iba tezüngzüktepbaji akangshi kechiaser pai pei taküm ama pa meim.18Idangji Yonathani ashi, “Asüng Ita Tasen benjong lir, na madenbaji metettsü kechiaser ne mendenji tazüng alitsü. 19Yanüjiang ano na malibaji tali metettsü, anungji na tanga mapang nung atsüka alidakji oa ne sasa Ezel lung sülenji atsüka atang. 20Langka dak akar amai iba tsütsüji ni lijakjang asem kaloktsütsü. 21Aser ni kü kilir ka yoka itemji bener arung ta ashitsü. Ni pa dang: Ajiang lijakjangji ne tsütsü lir, aji bener arung ta shira; idangji na arung, kechiaser Kibuba taküm alinungji na asoshi yimjung alitsü.” 22Saka ni kilir dangji, “Lijakjangji na atena oa lir ta shira, idangjibo ne lenmangi ajentsüla, kechiaser Kibubai na yoka lir. 23Aser ana tsüngda tezüngzüktepba atema kechi ali, Kibubai aji teti ayutsü.”24Anungji Dawid alu nung atsüka ali, aser Ita Lanu benjong nung chubai chiyungdak pei sasa amen. 25Akhi ama pai jara anasa pa menden nung amen. Abner Saul anasa amen, aser Yonathan tebu den tejak jitepa amen; saka Dawid mendenji tazüng liasü. 26Saka panüji Sauli kecha mashi, kechiaser pai bilem oda “pa dak langka atalok südi aser ajagi pa memerükteti lir.” 27Tasüngji aji Ita Lanu benjong sülenjia Dawid mendenji tazüng liasü. Sauli pei chir Yonathan dang asüngdang, “Kechiba Yesse chir Dawid yashi o tanü na chiyungdaki marur?”28Yonathani Saul dang langzü, “Dawidi kü dang Bethlehemi aotsü kanga mepishi. 29Pai ashi, ‘Ni ne dang mepishir, ni odakjang; kechiaser ozü kinunger yimti nung tetepsetba tenla ka lir; aser küdi-i yangji adentsü kü dang ashi, aser tang, ni ne dang yimli ngura ni odakjang, ni ne dang mepishir aser kü adianutem dang nguyudakjang. Anungji pa chubar langbangi maru.’ ”30Idangji Yonathan anema Saul ain adok; aser pai pa dang ashi, “Na mashileni aoba tashi mangala tetsür chir, na pei maksütsü aser netsü mangsa aliba maksütsü atema Yesse chir nai shimtet ta ni memetet no? 31Kechiyong Yesse chir alima nung ali tashi, na aser ne yimli metoktsütsü, anungji tang yokang aser pa anir arung kechiyong pa atangji asütsüla.”32Yonathani tebu Saul dang langzü, “Kechi atema pa südaktsütsü? Pai kechi inyak?” 33Sauli pa tepsettsü pa nü tsüloktsü; aji agi Yonathani, tebui Dawid tepsettsü mulungtet ta metet. 34Anungji Yonathan kanga ain adoka langbang nungi arameso, aser ita lanu benjong tananübuba nung chiyungtsü kecha mechiyung; kechiyong pai Dawid asoshi jashia liasü, kechiaser tebui pa dak maksütsü inyak.35Anepdang Dawid den jembiba mapang nung Yonathani tanur ka anir aremi ao. 36Pai tanur dangji ashi, “Asümang, ni yokba lijakjangtemji tang bushiang.” Aser tanurji asema aodang, pai pa sülen lijakjang ka pa atena kadok. 37Kodang Yonathani kadokba lijakjang alidak jagi tanurji aru, Yonathani tanur sülen ayimten aser ashi, “Lijakjangji na atena or mali no?” 38Yonathani tanur sülen ayimtena ilungang, kara kara-a oang, anena teli ta ashi; aser tanur jagi lijakjangji benden Yonathan dangi bener aru 39Saka tanur jagi kecha memetet, Yonathan aser Dawid nati dang aji metet. 40Yonathani pei nok o nü pa tanur nem agüja ashi, “Oang, itemi yimti jagi bener iang.”41Tanurji oli dang Dawidi lungnang tsüngda nungi shishi aser pa tejak alilen mechiok aser asemben apudak; aser tena tebang meseptep aser külemi ajeb, Dawidi tashi agi ajeb aser kati ka den jebtep. 42Yonathani Dawid dang ashi, “Tesünep nung oang, kechiaser anapronglai Kibuba tenüng nung azüngashitepa lir, Kibuba ni aser ne tsüngda, kü metsü aser ne metsü tsüngda nung teti liang.” Dawid aramesoa pila-a ao, aser Yonathana yimti-i ai.1 SAMUEL 21
Dawid Aser Nob Nung Putir1 Idangji Dawidi putir Abimelek dangi Nobi aru. Abimeleki Dawid den ajuruteptsü atentena adok aser ashi, “Kechiba na kija dang, aser ne den shinga mali?”2Dawidi putir Abimelek dang langzü, “Chubai mapa ka inyaktsü kü nem nunglokja ashi, koba mapa asoshi ni na yoker aser ni kechi nungloktsür aji shinga nema temetetdaktsü. Aser kü asangurtem dang tesem ka nung kü den ajuruteptsü ni shiogo. 3Anungji tang ne ket nung kechisa ali? Kü nem amtsük pungu mesüra yangji kechisa ali aji kua.”4Putir jagi Dawid dang langzü, “Kü ket nung teti achiba amtsük kecha mali, aji saka asangurtemi tetsür nungi pei sasa meshiteta lira yangji temeshitetba amtsük kar.”5Dawidi langzü, “Atangji akhi yimya aeni aoba dang tali item anogo asem ya onok nungi tetsürtemji pila-a lir, anungji tanü balaka asangurtemji meshiteta melika ma?”6 Idakji teti meshiteter yua aliba amtsük koba amtsük talem agi melenba anogo nung Kibuba madang nungi agiena liasü iba dak alema tanga kecha mali nung putiri pa nem ibaji agütsü.7Panüji Saul tenzüker ka Kibuba madang tezüngzükba ka atema idakji liasü. Paji Edom nunger Doeg Sauler sannüker tongtiba liasü.8Idangji Dawidi Abimelek dang ashi, “Yangi ne ket nung nok mesüra nü mali no? Kechiaser chubar mapaji kanga ilungraba agi ni kü nok o nü mebentet.”9 Putir jagi langzü, “Ela lenten nung nai Filistia nunger Goliat tepsetba nok dang kü ket nung lir, putir temeshi sobutsü sülen aji sü ka agi aleper kar; nai aji aginüra agiang, kechiaser iba dak alema idaki kecha maka.” Dawidi ashi, “Iba nok dak alaka tajungba kechi ali, aji kü nem kua.”10Panüji Dawidi Saul nungi jena oa Gat chuba Akis dangi ao. 11 Saka Akis tenzükertemi pa dang ashi, “Ibai linük chuba Dawidto masü no, Pa indang ya oda ken maten no?“Sauli meyirijang tepset,saka Dawidibo meyirijang ter tepset.”12 Dawidi item olaji pei mulung nung ayu, aser Gat chuba Akisji onsara tsübua liasü. 13 Anungji pai parnok madang yiar ama pa yimya melenshia sayu; aser kikümbang kishi nung ajenshia pa metsü pei bangsemo manung, yanga aludaktsü. 14Idangji Akisi pei tenzükertem dang ashi “Reprangang, nisungbaji yiar ta meteter nenoki pa kü dangi anir arur no? 15Ni yiar agi anünga ali ama nenoki pa kü dangi anir aru no? Iba nisung kü kidangi aitdaktsütsü no?”1 SAMUEL 22
Dawid Adullam Lungpok Aser Mizpa Nung1 Dawidi yang nungjagi pila aser Adullam lungpok nung jenok. Kodang pa adianutemi aser kinunger ajaki aji angashi, parnok ajak ajagi ao. 2Aser nisung shirnok tajemzük tia nung sentsühtsürtem aser temulung mechi-i alirtem ajak külemi pa dangi senden, aser parnok madak pa tanishir aküm. Parnokji nisung noklang pezü shi liasü.3Yang nungjagi Dawidi Moab lima Mizpai ao, aser Moab chuba dang ashi, “Tsüngremi ni asoshi kechi inyaktsü aji ni memetet tashi, kübu aser kütsü nenok den arua lidakjangma.” 4Aser pai parnok Moab chuba madangi anir aru: aser Dawid mitsa nung aliba mapang tepiyong pa den liasü. 5Aser ainkar Gadi Dawid dang ashi, “Mitsa nung teli, aenshiang, aser Yihuda limai iang.” Idangji Dawidi aenshia ao, aser Heret aremi aru.6Sauli Dawid aser pa den aliba nisungtem bushitetogo ta angashi: tang Saul pa ket nung nü amer, aser pa tenzüker ajak pa anasa noktaka lia Rama tenem kolak nung tamarisk süngdong kübok Gibea nung mena liasü. 7Sauli pa anasa noktaka alir tenzükertem dang ashi, “Nenok Benjamin nüburtem, angang! Yesse chiri nenok nisung shia nem alu aser tsükmenatzü lu agütsütsü asü? Pai nenok ajak meyirijang madak tanishir aser noklang madak tanishir kümdaktsütsü asü? 8Oda nenok ajaki ni anema tasa asa aser kodang kü chiri Yesse chir den azüngashi aji kü dang metetdaktsütsü shinga mali aser ni asoshi jashia bilemtsür nenok rongnung shinga mali; mesüra kü chiri ni anema kü tenzüker ajiokja, tanü anogo amai mita aliba kü dang memetetdaktsür no?”9 Idangji Saul tenzüker madak aliba Edom nunger Doegi langzü aser ashi, “Ni Yesse chir Nobi Ahitab chir Ahimelek dangi aruba nguogo. 10Pa indang pai Kibuba dang asüngdang, aser pa nem chiyungtsü agütsü aser pa nem Filistia nunger Goliat nok agütsü.”11Idangji chubai Ahitab chir Ahimelek putir, aser pa tebuer kidang-kimang ajak Nob nung aliba putirtem ajatsü yok: aser parnok ajak chuba dangi aru. 12Sauli ashi, “Tang angang, na Ahitab chir” aser pai langzü, “Yangi ni lir, kü kibur.” 13Aser Sauli pa dang ashi, “Pai ni anema apusotsü aser tanü anogo amai ni mita ata-a alitsü kechiba nenoki ni anema tasa asa, oda nenoki Dawid nem amtsük, aser nok ka agütsü, aser pa indang Tsüngrem dang asüngdang?”14Idangji Ahimeleki chuba dang langzüa ashi, “Ne tenzüker ajak rongnung Dawid ama, shiba nanük lir, aser ne taküm anüker madak tanishiba lir, aser ne kidang tushia lir, pa ama temulung alemba shiba lir? 15Tanüang ni pa indang Tsüngrem dang asüngdang asü? Aji oda kodanga masü: chubai pei tenzüker dak mesüra par kidang-kimang dak kecha tai tagütsüma; kechiyong ne tenzükeri ya ajak ajema mesüra talia kecha memetet.”16Chubai ashi, “Atangji na asütsü, Ahimelek, na aser ne kidang-kimang ajak.” 17Chubai pa anasa noktakba pa anüker dang ashi, “Meyipang aser Kibuba putirtem tepsetang; kechiaser parnok teka Dawid den lir, kechiaser pa jena ao ta parnoki metet, aser aji kü dang memetetdaktsü.” Saka chuba tenzükertemi parnok teka Kibuba putirtem dak mesangtet. 18Chubai Doeg dang ashi, “Na meyipang aser putirtem dak teka sangang, aser Edom nunger Doegi meyip aser pai putirtem dak teka asang, iba anogo nung pai putir temeshi sobutsü sobur nisung tir-pungu tepset.” 19Aser putir yimti Nob pai nok agi tebur aser tetsür, tanur aser mamayonger, nashi pungchitem, gado aser santem lepset20Ahitab chir Ahimeleker par chir rongnung ka tenüng agi Abiathar jentet, aser Dawid sülen jena ao. 21Abiathari Dawid dang Kibuba putirtem Sauli tepsetogo ta ashi. 22Dawidi Abiathar dang ashi, “Kodang Edom nungba yangji liasü, pai atangji Saul dang ashitsü ta ni iba anogo nung metet; nebur kidang-kimang ajak asüba atema kü khu lir. 23Na kü den liang, tetsübu, kechiyong shibai kü taküm bushir, ne taküma bushir: saka kü den na kümzüka lir.”1 SAMUEL 23
Dawidi Keila Kümzükba1Parnoki Dawid dang ashi, “Ajiang, Filistia nungeri Keila anema raradagi, aser parnoki motsüngnem rakzükraktemdagi.” 2Aji asü nung Dawidi Kibuba dang asüngdanga ashi, “Item Filistia nunger den raratsü ni aotsü asü?” Kibubai Dawid dang ashi, “Oang, aser Filistia nunger den rara-ang, aser Keila kümzükang.”3Saka Dawid nüburtemi pa dang ashi, “Ajiang, yangi Yihuda nung asenok tsübuseta lir: Filistia nunger telok anema asenok Keilai odi süra koda tali asütsü? 4Idangji Dawidi Kibuba dang ano tanaben asüngdang. Kibubai pa dang langzü, Aramesoang, Keilai luang: kechiyong ni Filistia nungerji ne ket nung bendanga agütsütsü.” 5Dawid aser pa nisungtem Keilai oa, Filistia nunger den rara, aser parnok kiset shirurutem bena aru, aser parnok jenti tepset. Yamaji Dawidi Keila nungertem kümzük. 6Kodang Abiathar Ahimelek chir Dawid dangi Keilai jena ao, pai pa ket nung putir temeshi sobutsü bener alu. 7Dawid Keilai arua lir ta Saul dang ashi: aser Sauli ashi, “Tsüngremi kü ket nung pa agütsüogo; kechiyong süngkhüm aser tartangtsü aliba yimti kati ait nungji pa shibanga lir.” 8Aser nisung ajak dang raratsü Keilai alutsü, Dawid aser par nübur makbangtsü Sauli mela.9Dawid anema Sauli tamajung tasa asa ta meteta pai Abiathar putir dang ashi, “Yagi putir temeshi sobutsü bener arung.” 10Idangji Dawidi ashi, “Oh Kibuba Israel Tsüngrem, ni atema yimti samatsütsü Sauli Keilai arutsü angashir. 11Keila nisungtemi ni pa ket nung bendanga agütsütsü no? Ne tenzükeri angashiba ama Saul alutsü asü? Oh Kibuba Israel Tsüngrem, ni ne dang mepishir, ne tenzüker dang shiangma.” Kibubai ashi, “Pa alutsü.”12Idangji Dawidi ashi, “Keila nisungtemi ni aser kü nübur Saul ket nung agütsütsü asü?” Kibubai ashi, “Parnoki na bendanga agütsütsü.” 13Idangji Dawid aser pa nisungtem shirnok noklang trok shi liasü, arameso aser Keila nungi pila, parnoki otetleni ao. Dawid jenteta ogo ta Saul dang ashi nung pa moteti aküm.14Dawid arem nung mitsa nung ali, aser Zif arem tenem linük nung ali; aser Sauli anogo shia pa bushi, saka Tsüngremi pa ket nung bendanga magütsü.15Tang Dawidi tsübua liasü, kechiaser pa taküm bushitsü Saul Zif arem Hores nung adoka liasü. 16Tang Saul chir Yonathan aramesoa Dawid dangi Hores ao, aser Tsüngrem dak tasü aittsü pa ajongshi. 17Pai pa dang ashi, “Tetsübu kechiyong kübu ket agi na magitsü aser na Israel madak chuba asütsü, aser ne den atongba ni asütsü, aser ajia kübu Sauli meteter.” 18 Tenapronglai Kibuba madang tezüngzüktepba yanglu; aser Dawid arem nung ali, aser Yonathan pei kidangi ao.19 Idangji Zif nunger Saul dangi Gibeai atua ashi, “Dawidi ozü litsü Hores linük Hakela tenem koba lisem lima anüolentip nung lir, idakji pei sasa atsüka mali no? 20Anungji tang Oh chuba, kodang nai lunüdir alungma; aser chuba ket pa bendanga agütsütsübaji onok teinyaktsü asütsü.”Saul Ket Nungi Dawid Jentetba21Sauli langzü, “Nenoki kü dang meimba asoshi Kibubai nenok moajang. 22Oang aser pa kong lir aser shibai pa idakji angu iba indang kanga junga metetang, kechiaser pa kanga tekülak ta ni angashiogo. 23Pai kongsa miima jenoker itemji kanga junga metetang aser osang tejangja bener kü dangi arung. Idangji ni nenok den aotsü, aser pa linük nungji lira oda Yihuda kidong ajonga nung ni pa arishitsü.”24Anungji parnoki Saul dang tama Zifi ao. Tang Dawid aser pa nisungtemji Araba nung Yeshimom anüdoklentip aliba Maon arem nung liasü. 25Saul aser pa nisungtem Dawid bushitsü apuso. Saka pai aji angashia lung jagi alu aser Maon arem nung ali. Kodang Sauli aji angashi, pai Dawid aputsü asoshi Maon arem jagi alu.26Saul külen tsütsü tenemleni ao, aser Dawid o pa nisungtem tenem külen tsütsüi ao; aser Dawidi Saul tsübuba agi ilunga oadoknü; kechiyong Saul aser pa nisungtemi Dawid lungbang aser pa nisungtemi parnok aputsü meketbanga liasü. 27Saka osang abener ka Saul dangi arua ashi, “Na iluangang, aser arung, kechiaser Filistia nunger yimaki arua lir.” 28Anungji Dawid sülen aria aoba nungi Saul meyip, aser Filistia nunger anema ao; anungji parnoki iba linük dang ‘Jentetba Lung’ ta aja 29Dawid idak nungjagi atu, aser Engedi mitsa nung ali.1 SAMUEL 24
Dawidi Saul Kümzüka Yutsüba1Saul Filistia nunger aria aoba nungi meyipa arudang, Dawid Engedi arem nung lir ta metetdaktsü. 2Idangyongjisa Sauli Israel ajak nungi teshimtet nisung meyirijang asem shimteta Dawid aser pa nisungtem bushitsü asoshi Shio Lungbang anüdokleni ao. 3 Aser lenmang nung pa san ki lungpok ka alidaki aru; aser Saul khen amentsü ai. Tang Dawid aser pa nisungtem lungpok telungtiba nung liasü. 4Aser Dawid nisungtemi pa dang ashi, “Ajiang, Kibubai ne dang, Ajiang, ni ne tsükchir ne ket nung bendanga agütsütsü ta ashiba anogo; aser ne dang ajungba ka pa dang inyakang.” Idangji Dawid arameso, aser miima Saul sepoksü rangzük.5Tesülen Dawidi pei mulungjang nung kongshi, kechiaser pai Saul süpoksü rangzük. 6 Pai pei nisungtem dang ashi, “Tsüngremi shimtetba kü kibur dang iba inyaktsü pa Tsüngremer teshimtet ta meteter pa anema kü ket asangtsü Tsüngremi ni songtemangma.” 7Anungji Dawidi item o agi pei nübur songtem aser Saul anema apusotsü memela, aser Saul leprungki nungi shishi aser pei lenmangi ao.8Idangji Dawida leprungki nungjagi adok aser Saul dang ayimtena ashi, “Kü kibur chuba;” Sauli pa reprang, aser Dawidi pa tejak alilen apudaka akhümtsübu sayu. 9Dawidi Saul dang ashi, “Ajiang, Dawidi ne dang tamajung inyaktsü bushir ta ashiba nisungtem o nai kechiba angar? 10Ajiang, koda Kibubai na tanü leprungki nung kü ket nung bendanga agütsüba ne nüki nguogo; aser karibo na tepsettsü kü dang asüngdang, saka kü nüki na apayua kümzük; aser ni ashi, Ni kü kibur anema kü ket masangtsü, kechiyong pa Kibuba teshimtetba lir. 11Ajiang, kü ket nung ne tetsünglen sobutsü lir, iba yagi ni ne sepoksü tetsünglen rangdoktsü aser na metepset ta sayur; kü ket nung tamajung mesüra ozüng raksaba malia ta nai metetangma, aser nai kü taküm agitsü arishiaka ni na anema temenen mebenshi. 12Ana tsüngda nung Kibubai bendangangma, aser ne indang Kibubai mang yangangma; saka kü ketbo ne dak maitsü. 13Akhidang apijemtsü o ashiba ama, Tamajunger nungi tamajung mapa adoker, saka kü ket ne madak maitsü. 14 Israel chubai shiba aria adok? Nai shiba arishir? Azü tasü sülen asü, mesüra azüpong sülen? 15Anungji Kibuba o bendanger sang, aser ana tsüngda nung o bendang agüjang, aser ajiang, aser kü pukhüm kümang aser ne ket nungi ni kümzükangma.”16Kodang Dawidi item o Saul den jembiba anen, Sauli ashi, “Ya ne ola no, kü chir Dawid?” Aser Sauli ola adoka ajeb. 17Pai Dawid dang ashi, “Kü dang nungi na temeshiba lir; kechiyong ni ne nem tamajung agütsü nung naibo kü nem tajung agütsü. 18Tanü nai koda kü dang junga benshi aji nai metetdaktsüogo; kechiyong Kibubai ni ne ket nung bendanga agüjakasa, nai ni metepset. 19Kechiyong nisung kati pei tsükchir ajurudang, pai pa odang chioktsü no? Anungji nai tanü kü dang inyakbaji Kibubai ne nem tajung ajangzükdakjangma. 20Aser tang, ajiang, ni metet oda na atangji chuba asütsü aser Israel yimli ne ket nung yanglutsü. 21Anungji tang, oda nai kü sülen kü mitsa meleptoktsütsü aser nai kübur kibong nung kü metsü mesamatsütsü ta Kibuba agi azüngashiangma.” 22Dawidi Saul dang yamaji azüngashi. Aser Saul kidangi ao, saka Dawid aser pa nisungtem mitsai atu.1 SAMUEL 25
1Tang Samuel asü; aser Israel ajak külemi sentepa pa asoshi mang ayim, aser pa par kidang Rama nung arem. Aser Dawidi aramesoa Paran aremi alu.2Maon nung takar nisung ka liasü, shiba Karmel nung shishilemba mapa inyaka liasü, pa san meyi asem aser nabong meyi ka liasü, pai Karmel nung item nungi tezüngsa mejep. 3Pa tenüngji Nabal, Kaleb kidong nungi liasü. Pa tebutsü Abigail kanga tesangra aser tobur tajung, saka la kinungpuji yazü majung aser mit tetoktok liasü. 4Nabali par san tezüng mejeper ta Dawidi arem nung angashi.5Dawidi asangur ter yoka, parnok dangji ashi, “Nenok Karmeli tuang, aser Nabal dangi oa kü tenüng nung pa nem salem agüjang. 6Aser yamaji nenoki azükarua alisang dang ashitsü, Na aser ner kibong anaprong tesünep sang, aser na akaba ajak tesünep sang. 7Na san tezüng mejepdak lir ta angashir; ne sannükertem tang onok den liasü, aser onoki parnok mak mesüdaktsü, Karmel nung parnok aliba mapang tepiyong parnok meyong kecha mesamatsü. 8Ne asangurtem dang asüngdangang, parnoki ne dang ashitsü, anungji ne nükdang kü asangurtem yimli ngudakjangma; kechiyong onok benjong anogo tajung ka nung arur; yimlibilema, ne keti kechisa arudir ne tenzükertem aser ne chir Dawid nem agüjangma.”9Kodang Dawider asangurtem aru, parnoki Nabal dang Dawid tenüng nung item o ajak jembi, aser ajemajema ali. 10Nabali Dawid tenzükertem dang langzü, “Dawid shiba? Aser Yesse chir shiba? Tanü asüng alar jenti pei kibur nungi jenzüka aor. 11Ajangla ni kü amtsük aser tzü kü san tezüng mejepertem asoshi tepsetba shi ni memetetba nisung nem agütsütsü no?”12Anungji Dawider asangurtem parnok lenmangi meyipa arua pa dang item ajakji ashi. 13Dawidi pei nisungtem dang ashi, “Nenok nisung shia pei nok semang.” Aser parnok nisung shiai nok asem; aser Dawida pei nok asem; aser Dawid sülen nisung noklang pezü shi atu; aser noklang ana oset-tsüset den ali.14Saka asangur rongnung kati Nabal kibutsü Abigail dang ya oda ashi, “Ajiang, Dawid arem nungi asen kibur nem salem agütsütsü osang abenertem yok; aser pai parnok sensatsü. 15Saka parnoki onok dang kanga junga benshiogo, onok moapu nung kopiga liasü parnokji onok medemer liasü, onok mak mesüdaktsü mesüra onok kecha mesamadaktsü: 16san nüka onok parnok den aliba mapang tepiyong onok asoshi aonung aser anüngdang parnokji jara ama liasü. 17Tang anungji nai kechi inyaktsü metetang aser shisadangangma; kechiyong ozü kibur anema aser pa kibong ajak anema tamajung inyaktsü mulungteta lir; kechiyong pa dang shingaia o kata meshitettsüsa pa kümli majung lir.”18Idangji Abigaili ilunga amtsük noklang ana, yi mori ana, aser san pungu asang, aser jang atakba tatakzük pungu, tsükmenatzü tejep noklang ka, aser munguzünu amtsük noklang ana, itemji gado nung oshitsü. 19Aser lai asangurtem dang ashi, “Kü jakdang oang; ajiang, ni nenok sülen arur;” saka lai la kinungpu Nabal dang kecha mashi.20La gado nung mener tenem kübok leni aludang, ajiang, Dawid aser pa nisungtem la jakdang alu; aser lai parnok ajuru. 21Tang Dawidi ya oda shia liasü, “Atangji amajok nung ni iba nisung akaba ajak arem nung nüka liogo, anungji pa akaba kecha mesama: aser paibo tajung melen tamajung shia agütsür. 22Asüngnep tashi nung pa akaba ajak oda tebur chanu ka danga ni tokja lira, Tsüngremi yamaji mesüra tali Dawid dak inyakangma.”23Kodang Abigaili Dawid angu, lai ilunga gado nungi alu, aser Dawid madang la tejak mechioka ali nung apudak. 24Lai pa tsüngdang apudaka ashi, “Kü madak kü kibur taiji liangma: aser ne kilitsüri yimlibilema, ne narong nung jembidakjangma, aser ne kilitsür o angangma. 25Ni ne dang mepishir, kü kiburi iba samesa nisung oda Nabal tezüngshima: kechiyong pa tenüng amaji pa lir; pa tenüng Nabal lir, aser pa dak tamashi lir: saka ni ne kilitsüri nai yokba kü kibur asangurtem mangu.”26“Anungji tang kü kibur Kibuba taküm ali nungji, aser na taküm ali nungji, azü tokshiba nungi aser ne ket agi mang ayangtsü Kibubai sota ali nung, tang aji asünung ne tsükchirtem aser shirnoki kü kibur anema tamajung bushir, Nabal ama sangma. 27Aser tang iba sempet koba ne kilitsüri bener kü kibur dangi aru, aji kü kibur sülen anitakba asangurtem nem agüjangma. 28Yimlibilema ne kilitsüri aibelenba tai tokangma: kechiyong Kibubai kü kibur kibong takang ka kümdaktsütsü, kechiyong kü kiburi Kibuba tongbang rarar, aser ne dak ne taküm tepiyong tamajung mangutsü. 29Aser nisungi na arishitsü aser ne taküm bushitsü adokaka, teka nung kümzüka kü kibur takümbo Kibuba ne Tsüngrem alitsü; aser tsükchirtem takümbo lung lijak nungi ama pai endoktsü. 30Kodang Kibubai kü kibur dang tajung ajak ne indang jembiba ama inyakdir, aser Israel madak na chuba shimtetdir; 31oda kecha masü nung nai azü tokshiba, mesüra kü kiburi pei sasa pei ket agi mang ayang ta idangji kü kibur atema temulung zürepba, mesüra temulungjang nung temetsüdaktsü malitsü; aser kodang Kibubai ne dang junga benshidir, idangji ne kilitsüra bilemtetangma.”32Dawidi Abigail dang ashi, “Kibuba, Israel Tsüngrem shibai tanü na kü lenji yok, temoatsü sang: 33aser ne shisatsü temoatsü sang, koba agi tanü ni azü tokshiba tai aser kü sasa kü ket agi mang ayangba nungi ni sota ayu. 34Kechiyong atangji Kibuba Israel Tsüngrem taküm ali nungji, na ilunga maru asübo, ne dak tamajung inyaktsü aliba nungi shibai ni sotla aser anepdang sangwadang Nabal asoshi tebur chanu ka danga anünga melila.” 35Anungji pa asoshi lai bener aruba la ket nungi Dawidi agizük, aser pai la dang ashi, “Ner kidangi tesünep nung tuang; ajiang, ni ne ola angaogo, aser na agizükogo.”36Abigail Nabal dangi aru; aser ajiang, pai par kidang benjong ka, chubar benjong mesüka yanglua liasü; Nabal yi agi mesepa pa mulungjang kanga pela-a liasü; anungji anepdang sangwa matong tashi lai pa dang kecha mashi. 37Anepdang kodang Nabal nungi yiji oadoker liasü, pa kinungtsüi pa dang item ajak ashi, aser pa süchia oadok, aser pa lung ama aküm. 38Iba sülen anogo ter lir Kibubai Nabal dak azük nung pa asü.39Kodang Dawidi Nabal süogo ta angashi, pai ashi, “Kibuba shibai kü maksü Nabal dak mang ayang, aser pei kilir tamajung nungi sota ayu, temoatsü sang aser Nabal tamajung inyakba pa pei kolak manung meyipa Kibubai agütsüogo.” Aser Dawidi pa kibutsü asütsü yoka Abigail indang jembitep. 40Kodang Dawid kilirtem Karmeli Abigail dangi aru, parnoki la dang ashi, “Na Dawid kibutsü asütsü, pa dangi anir aotsü onok ne dangi yok.”41Lai aramesoa la tejak alilen mechiok, aser ashi, “Ajiang, ne kilitsür ne kibur tenzükertem tetsüng shitoktsütsü kilir ka dang lir.” 42Abigaili ilunga aramesoa gado ka nung amen, aser lar kilitsür pungu la sülen anitak; aser Dawid osang abenertem sülen la ao, aser pa kibutsü aküm. 43Ano Dawidi Yezreel nunger Ahinoam agi; aser tenaprongla pa kinungtsü aküm. 44 Tang Sauli pei jala Mikal Dawid kinungtsü Gallim nunger Lais jabaso Palti nem agütsür liasü.1 SAMUEL 26
Dawidi Tanabenbuba Saul Kümzükba1 Zif nunger kar Saul dangi Gibeai arua ashi, “Dawid ozü litsü lisem lima Yeshimon jakdang Hakila tenem nung atsüka lir.” 2Idangji Sauli aramesoa Israel teshimtet nisung meyi asem anir Dawid bushitsü Zif aremi alu. 3Aser lisem lima Hakila tenem nung Sauli tanendak yanglu koba Yeshmon jakdang liasü. Saka Dawid arem nung ali, aser Saul pa sülen aremi aru ta pai angu. 4Anungji Dawidi itdangiter yok, aser atangji Saul arua lir ta angatet. 5Dawidi aramesoa Saul tanendaki aru; aser Saul o pa temeranger telok tanishir Ner chir Abner kong liasü, aji angu; aser Saul talungtsü alidak telung len salu tsüki kübok anen, aser temerangertemi pa meketa tanendak yanglu.6Idangji Het nunger Ahimelek aser Yoab adianu Zeruia chir Abishai dang Dawidi ashi, “Shiba kü den Saul dangi tanendaki alutsü?” Abishai ashi, “Ni ne den alutsü.”7Anungji Dawid aser Abishai nisungtem dangi aonung aru; aser ajiang, Sauli pei nü pa tekolak anasa ali nung songtaka yur pa talungtsü alidak meketa mejanga ali: aser Abner aser pa nisung pa meketa liasü. 8Idangji Abishai Dawid dang ashi, “Tanü Tsüngremi ne tsükchir ne ket nung bendanga agütsüogo anungji tang ne dang mepishir, nü jagi ali nung tsüngloka ni pa dak khen dang tsüngdi, aser ni tanabenbo pa dak matsüngtsü.”9Dawidi Abishai dang ashi, “Pa tetepset kechiyong Kibubai mezüja shimtetba anema teka asang nung tai makai litettsü no?” 10Dawidi ashi, “Kibuba taküm ali nungji Kibubai pa dak azüktsü mesüra pa tasütsü anogo agi atongtsü; mesüra pa tongbangi alutsü, aser samatsü. 11 Kibubai mezüja shimtetba anema ni kü teka masangtsü songtemangma: saka tang ni ne dang mepishir, pa tekolak tsüngdang aliba nü aser tzü bongdangji benang aser asenoki odi.” 12Anungji Dawidi Saul nungi nü aser tzü bongdang agi, aser parnok oadok, aser nisung shingaia mangu, mesüra aji memetet, mesüra shinga mesak: kechiyong parnok ajak amua oa liasü: kechiyong Kibubai parnok sümanga odaktsü, 13Idangji Dawid tipleni apiga or tenem kolak nungji noktak; parnok tsüngda ongdang tuluka liasü. 14Dawidi nisungtem aser Ner chir Abner dang ayimten, “Abner, nai melangzüker no?” Idangji Abneri langzük aser ashi, “Chuba dang ayimtenba na shiba?”15Dawidi Abner dang ashi, “Na tasü tait nisung ka masü no? Na mesüka Israel nung shiba lir? Ajangla nai ne kibur chuba nüka mali asü? Kechiyong pur rongnung kati ne kibur samatsütsü aru. 16Nai inyakba ya tajungbo masü. Kibuba taküm ali nungji na asütsü tetemsü, kechiaser Kibubai mezüja shimtetba nai nüka maliasü. Aser tang, ajiang, chubar nü aser pa tekolak anasa tzü bongdangto kong ali?”17Sauli Dawid ola metet, aser ashi, “Kü chir Dawid, ya ne ola asü?” Dawidi ashi, “Ya kü ola lir, kü kibur, Oh chuba. 18Aser pai ashi, kechisü nung kü kiburi ne kilir arishir? Ni kechi inyakba asoshi? Mesüra kechi tai kü ket nung lir? 19Anungji tang ni ne dang mepishir, kü kibur chubai ne kilir o angangma; Kibubai ni anema na ajungmeso ta süra pai tenla agizükangma, saka ibai nisung chirtem sürabang, Kibuba madang parnok atakatem kaoang; kechiaser Kibuba senmang nung ni matentsüsa tanü ni aridoka ashi, Oang, tangar tsüngremtem külemang. 20Aji asünung tang Kibuba tsüngdang nungi pila-a oa kü zü ali nung tetsükdaktsüma; kechiyong kari tenem nung ozü bushiba amato, Israel chubai kü taküm bushitsü arua lir.”21Idangji Sauli ashi, “Ni temenen benshiogo; meyipa arung kü chir Dawid, kechiyong joko ni ne dak tamajung meinyaktsü, kechiaser tanü ne nükdang kü taküm senti liasü, ajiang ni suwar jilu ai, aser kanga dang aibelenogo.”22Dawidi langzü, “Oh chuba, nüji ajiang! aser asangur rongnung ka arua aji bener oang. 23Kibubai nisung shia nem pa temeshiba aser temulung alemba agütsütsü; kechiyong tanü Kibubai na kü ket nung bendanga agütsü, saka Kibubai mezüja shimtetba anema ni kü ket mesala. 24Tanü kü tsüngdang ne taküm dang apayu yamaji kü Kibuba madang apayudakjang, aser pai timtem tejashi ajak nungi ni kümzükdakjangma.”25Idangji Sauli Dawid dang ashi, “Na temoatsüba sang, kü chir Dawid, nai kechisa inyakdir atangji takok angutsü.” Anungji Dawidi pei lenmangi ao, aser Saul pei talidaki meyipa aru.1 SAMUEL 27
Dawid Filistia Nunger Rongnung1Dawidi pei mulungjang nung ashi, “Tang ni Saul ket nung kenübo samatsü. Filistia nunger linüki jena aitsüba dak alema ni asoshi kecha mali; aser Israel arrtsü ajak nung ni bushitsü Saul tezü atangtsü; yamaji pa ket nungi ni jentettsü. 2Anungji Dawid aramesoa pa den aliba nisung noklang trok anir, Gat chuba Maok chir Akish dangi aenshia ao. 3Aser Dawid Gat nung Akish den ali, aser pa nüburtem nisung shia pei kinunger den aser Dawida pa kinungtsü ana, Yezreel tsür Ahinoam, aser Karmeltsür Abigail, Nabal kinungtsü den ali. 4Aser Saul dang Dawid Gati jena ogo ta metetdaktsü; aser pai joko pa mebushi.”5Dawidi Akish dang ashi, “Tang ni ne nükdang yimli ngura, chuba yimti nung, yangi ni alitsüsa talidak ka kü nem parnoki agütsüdakjangma: kechiaser ne kilir kechiba chuba kidang ne den alitsü.” 6Idangji iba anogo nung Akishi pa nem Ziklag agütsü; aji asünung tanü tashi Ziklag Yihuda chuba meyong aküm.7Filistia lima nung Dawid küm ka ser ita pezü liasü.8Dawid aser pa nüburtem atu, aser Geshur nunger, Girz nunger, aser Amalek nunger amak; kechiyong Telam nungi Shuri oda Ijip limai aodang, aliba lima nung item kintemji liasü. 9Dawidi alimaji amak; aser tebur süshia tetsür süshia anünga meyutsü, aser san, nashi, gado, ut aser sobutsü bener oadok; aser pai Akish dangi meyipa aru.10Kodang Akishi asüngdang, “Nenoki tanü shir anema amak?” Dawidi langzü, “Yihuda nung Negeb, mesüra Yerahmeel nung Negeb mesüra Ken nung Negeb anema. 11Dawidi tebur süshia tetsür süshia Gati arutsü taküm metoktsü; yamaji mesüra, Dawidi yamai inyak, ta parnoki asenok indang osang agütsütsü ta bilem; aser Filistia lima nung aliba mapang tepiyong pai iba yimyaji benshi. 12Akishi Dawid dak amanga ashi, Pai pei nübur Israel nem jungjunga pa sempatsüsa kümdaktsüogo, aji asünung pa teti kü kilir alitsü.”1 SAMUEL 28
Filistia o Israel na Raraba1Item anogo nung Filistia nunger Israel den raratsü asoshi temeranger telok atenshi, aser Akishi Dawid dang ashi, “Nai jungjunga metetang, na aser ne nisungtem kü den temeranger telok rongnung aotsüla.” 2Dawidi Akish dang ashi, “Junger, ne kiliri kechi inyaktsü aji nai metettsü.” Akishi Dawid dang ashi, “Junger, teti kü kolak anüker ni na kümdaktsütsü.”Sauli Endor Arasentsür Dang Asüngdangba3 Tang Samuel sür liasü, aser Israel ajaki pa asoshi mang ayim, aser pa pei yimti Rama nung arem. Aser linük nungi Sauli ainkartem arasentsür aser arasener aridoker liasü.4Filistia nunger külemi atenshi, aser Shunem nung arua anen: Sauli Israel ajak külemi sentepdaktsü, aser Gilboa nung anen. 5Sauli Filistia nunger temeranger telok angudang, pa tsübua liasü, aser pa mulungjang kanga atenten. 6 Sauli Kibuba dang asüngdang, aser Kibubai pungmang agi süshia, Urim agi süshia, mesüra ainkar ajanga süshia pa dang melangzü. 7Idangji Sauli pa kilirtem dang ashi, “Arasentsür ka, ni la dangi aotsüsa aser la nungi asüngdangteptsü kü nem bushijangma.” Pa kilirtemi pa dang ashi, “Ajiang, Endor nung tanela aliba arasentsür ka lir.”8Sauli pei sasa melenshia tanga sobutsü sobur, pa aser pa den nisung ana ao, aser aonung parnok tetsür dang jagi arua ashi, “Ni ne dang mepishir, ne ain agi ni ne dang shiba tenüngsa shidir adokdakjangma.”9Tetsür jagi pa dang ashi, “Ajiang, Sauli kechi inyak nai meteter, koda pai ainketer aser arasentsür linük nungi leptokadok: anungji ni südaktsütsü kechiba nai kü taküm asoshi sang soa ayutsü.”10Sauli la dang Kibuba agi azüangshia ashi, “Kibuba taküm ali nungji, iba mapa atema ne dak kecha temerenshi makatsü.”11Idangji tetsür jagi ashi, “Ni shiba ne dangi adokdaktsütsü? Pai langzü, Kü dangi Samuel adokdakjang.”12Tetsür jagi Samuel angudang lai tashi agi ayimten; aser tetsür jagi Saul dang jembia ashi, “Kechiba nai ni ashioktsü? Kechiyong na Saul lir.”13Chubai la dang ashi, “Tsübua teli, nai kechi angu?” Tetsür jagi Saul dang ashi, “Ni ali nungi tsüngrem ka adoka angur.”14Pai la dang ashi, “Pa tereprangtsü kechi?” Lai ashi, “Tambur nisung ka adoker; aser pa sobutsü ka sobua lir.” Ibaji Samuel ta Sauli meteta aküm, aser pa tejak alilen shir, angema alu, aser akhümtsübu sayu.15Samueli Saul dang ashi, “Kechiba nai ni meinprungdakja anir adokdaktsü?” Sauli langzü, “Ni kanga tejashi nung lir, kechiyong Filistia nungeri ni anema rarar, aser Tsüngrem ni nungi pila-a ogo, aser joko kü dang ainkar agi süshia, pungmang agi süshia melangzür: anungji ni kechi inyaktsü aji kü dang metetdaktsütsü ni na aja.”16Samueli ashi, “Kibuba na nungi pila ta aser na anemer kümogo ta meteter kechiba nai kü dang asüngdanger? 17 Ni agi jembiba Kibubai ne dang inyakogo; kechiyong ne ket nungi Kibubai yimliji shizükogo aser aji ne kiyonger, oda Dawid nem agütsüogo.”18 Kechiaser nai Kibuba ola manga, aser pa tetsübutsü mit adokba Amalek anema nai meinyak, aji asünung Kibubai iba mapa ne dang tanü inyak. 19Ano Kibubai Israel den na dena Filistia nunger ket nung agütsü, aser asüng na aser ner jabasotem, kü den alitsü; ano Kibubai Israel temeranger telok Filistia nunger ket nung agütsütsü.20Idangji Saul ali nung songtoka lao, aser Samuel o agi kanga tsübua liasü; ano pa dak tashi makai aküm, kechiyong anogo ka tepiyong aser iba ammang tepiyong pai chiyungtsü mechiyung. 21Tetsürji Saul dangi aru, aser pa kanga timtemseta lir ta ngua, pa dang ashi, “Ajiang, ne kilitsüri ne ola angaogo, aser ni kü taküm kü ket nung agiogo aser nai kü dang jembiba o ni angaogo. 22Aji asünung tang ni ne dang mepishir, naia ne kilitsür ola angangma, aser ne madang amtsük tebang ka ni yutsütsü mela-angma; aser na ne lenmangi aodang na tashi akatsü chiangma.”23Saka pai magizük aser ashi, “Ni machitsü,” saka pa kilirtem aser tetsürlai senteper pa mepitem; aser pai parnok ola anga. Anungji ali nungi pa arameso, aser yipten nung amen. 24Tetsürji kidang nashi chanu tejebket ka liasü; aser lai kara-a aji tepset; aser lai amzü bena arua ajeper aji agi piyazü meinokba amtsük yanglu. 25Lai aji Saul madangi aser pa kilirtem dangi bener aru; aser parnoki achi. Idangji parnok arameso, aser paonungji oadok.1 SAMUEL 29
Akisi Dawid Ziklagi Yokba1Tang Filistia nunger parnok temeranger telok ajak Afek nung atenshi; aser Israel nunger Yezreel nung aliba ayong anasa anen. 2Filistia nunger tanishirtem noklangnoklang aser meyirijang-meyirijang sena ao; aser Dawid aser pa nisungtem tesülen Akish den arua mendangdaki sena ao. 3Idangji Filistia nunger tongtipurtemi ashi, “Item Ibri nunger kechi asür?” Akishi Filistia nunger dang ashi, “Ibai Dawid Israel nunger chuba kilir masü no? Pa kü den küm ana shi alir, aser pa kü dangi aruadokba anogo nungi tanü tashi nung ni pa dak tai kecha mangu.”4Saka Filistia nunger tongtipurtemi pa dang ain adok; aser Filistia nunger tongtipurtemi pa dang ashi, “Nai pa kong alitsü agütsü, angji alitsü nisungji meyipa odakjang, asenok den pa tongbangi teludaktsü, ashiko pa asenok anemer asütsü? Kechiaser iba nisungi pa kibur den koda puteptet? Item nisung tekolak agi masü no? 5 Ibai Dawid shiba indang tsüngsangdang kati ka dang ken tenyutepa“Sauli meyirijang tepset.“Aser Dawidi meyirijang ter ta ashiba to masü no?”6Idangji Akishi Dawid aja aser pa dang ashi, “Kibuba taküm ali nungji na ochishir, tanendak na kü den taru-tao kü tsüngdang tajung liasü; kechiyong na kü dangi aruba anogo nungi tanü tashi nung ni ne dak tamajung mangu, aji saka tongtipurtemi na maginür. 7Anungji tang meyipang, aser Filistia nunger kiburtem nai mepelai melidaktsütsü, sünepa oangma.”8Dawidi Akish dang ashi, “Ni kechi inyak? Ni kü kibur chuba tsükchirtem anema rarai moutettsüsa, oda tanü tashi ne madang papigati lia nai ne kilir dak kechi angu?”9Akishi langzüa Dawid dang ashi, “Ni metet, Tsüngrem tenyar ama kü tsüngdang na tajung lir; aji oda saka Filistia nunger tongtipurtemi ashi, Pa asenok den tongbangi matutsü. 10Aji asünung ne den aruba ne kibur kilirtem den anepdang yakta shishiang, aser nenok anepdang sakli-i, aser sangwadang aenshia oang.” 11Anungji Dawid, aser par nisungtem anepdang yakta aenshia Filistia nunger linüki meyipa aotsü shishi. Aser Filistia nunger Yezreeli atu.1 SAMUEL 30
Dawidi Amalek Den Raraba1Kodang Dawid aser par nisungtem asemnübuba nung Ziklagi aru, Amalek nungeri anüolentip aser Ziklag amak, aser Ziklag akok aser aji mi agi arong; 2aser tetsürtem aser yangji aliba ajak tila aser tulu apu; parnoki shinga metepset saka parnokji bener parnok lenmangi ao. 3Kodang Dawid aser pa nisungtem yimti-i aru, ajiang, aji mi agi rongtoker liasü; aser parnok kinungtsütem aser jala-jabasotem pur or liasü. 4Idangji Dawid aser pa den aliba nisungtemi parnok tashi makai maküm tashi ola adoka ajeb. 5 Dawid kinungtsü ana Yezreel nunger Ahinoam, aser Karmel nunger Nabal kinungtsü Abigail pur or liasü. 6Dawid kanga toushia liasü; kechiyong nisungtemi pa dak lung agi aontsü jembi, kechiaser nisung ajak tanela, pei jala-jabaso asoshi nisung shia jashia liasü; saka Dawidi pa Tsüngrem Kibuba nung pa sasa tashi itshi.7 Dawidi Ahimelek jabaso Abiathar putir dang ashi, “Ni ne dang mepishir, yagi kü dangi putir temeshi sobutsü bener arung, aser Abiathari Dawid dangi putir temeshi sobutsü ajagi bener arutsü.” 8Dawidi Kibuba nungi asüngdanga ashi, “Ni iba temeranger telok aria ora, ni meneptsü asü? Pai pa dang langzü, Aria oang; kechiyong nai atangji parnok meneptsü, aser takok ngua ajak tanaben angutsü.”9Anungji Dawid aser pa den aliba nisung noklang trok pa den ao aser Besor ayongi aru kong kar toktsü. 10Saka Dawid, aser noklang pezüi aria ao; kechiyong noklang anabo parnok lula-a aküm, aser Besor ayong ajanga moteti toktsü. 11Parnoki Ijip nunger ka moapu nung ngua parnoki Dawid dangi pa anir aru, aser pa nem amtsük agütsü, aser pai achi, aser parnoki pa nem tajemtsü tzü agütsü. 12Parnoki pa nem munguzünu amtsük telong ka, aser tsükmenatzü tejeb ana agütsü; aser pai aji chir külen, tashi ita aküm; kechiyong pai anogo asem aser aonung asem tashi amtsük machi, mesüra tzü majem.13Dawidi pa dang asüngdang “Na kechi nübu? Aser na kong nungi?” Pai langzü, “Ni Ijip nunger asangur ka, Amalek nunger ka kilir; aser kü kiburi ni toktsü, kechiaser anogo asem ogo ni shiranga liasü. 14Onoki Keret anüolentip koba Yihuda meyong aser Kaleb anüolentip amak; aser onoki mi agi Ziklag rongtoktsü.”15Dawidi pa dang ashi, “Nai iba temeranger telok dangi ni anir alutsü asü?” Pai ashi, “Nai ni metepsettsü mesüra kü kibur ket nung bendanga magütsütsü ta Tsüngrem agi kü dang azüngashiang, aser ni na iba temeranger telok dangi anir alutsü.”16Kodang pai pa anir alu, ajiang, parnok moapu ajak nung prokshia, chiyunga jemtepa aser benjong yanglua liasü, kechiaser Filistia nunger lima aser Yihuda lima nungi parnoki oset jenti makzüka liasü. 17Dawidi parnok anepdang nungi tananü buba aonung tsütsü tashi tepset; aser asangur nisung noklang pezü ut nung sanger jentetba dak alema nisung kata mejenbu. 18Aser Amalek nungertemi agiba ajak Dawidi tanaben angu; aser Dawidi pa kinungtsü anaprongla kümzük. 19Aser tila saka tulu saka, jabaso aser jala saka, terakzükba oset süshia parnoki agiba parnok asoshi madoksai mali asü: Dawidi ajak meyipa bener aru. 20Aser Dawidi san o nashi telok ajak agi, aser nisungtemi pa jakdang meina ayimten, “Ibai Dawidi makzükba oset lir.”21Dawidi nisung noklang ana dangi aru, aser parnok kanga lula nung Dawid sülen manidak; parnok Beosor ayong nung atadaktsü aser parnoki Dawid aser pa den aliba nisungtem lenji ao; aser kodang Dawid nisungtem anasa aru, pai parnok nem salem agütsü. 22Idangji Dawid den aoba nisung tamajung aser samesa nisungtemi langzüa ashi, “Parnok asenok den mao nungji, nisung shia anir oadoktsü asoshi pei kinungtsü aser par chirtem dak alema onoki parnok nem asenoki bena aruba temakzükba oset kecha magütsütsü.”23Idangji Dawidi langzü, “Kibubai koba asenok nem agütsü, shibai asenok wazüka ayu, aser asenok anema aruba temeranger telok asenok ket nung bendanga agütsü, iba jagi kü adianutem, nenoki yamaji meinyaktsü. 24Iba mapa indang shibai nenok dang angatsü? Kechiyong shibai tongbangi alu, pa shilem amaji shiba kü den anena ali iba amaji pa shilem alitsü, parnok kasasa lemsateptsü.” 25Aser iba anogo nungi tanü tashi iba amaji pai Israel asoshi tzüzüng-ozüng aser yimsü-ozüng ka yanglu.26Kodang Dawid Ziklagi aru, Yihuda tamburtem, oda pa tembartem dangi temakzüba oset yoka ashi, “Kibuba tsükchirtem nungi temakzüba sempet nenok asoshi ajiang.” 27Bethel nung alir dangi aser anüolentip Rama nung alir dangi, aser Yather nung alir dangi: 28Aroer nung alir dangi, aser Sifmot nung alir dangi aser Eshtemoa nung alir dangi; 29Rakal nung alir dangi, Yerahmeel nunger yimtitem nung alir dangi, Ken yimtitem nung alir dangi; 30Horma nung alir dangi, Korshan nung alir dangi, Athak nung alir dangi: 31aser Hebron nung alir dangi, aser kong Dawid aser pa nisungtem senzü item linük ajak dangi yok.1 SAMUEL 31
Saul Aser Par Chirtem Asüba1Tang Filistia nungeri Israel anema rara; aser Israel nisungtem Filistia nunger madang nungi ajen, aser Gilboa tenem nung tepseta laodaktsü. 2Filistia nungeri Saul aser par jabasotem sülen nepeta anitak; aser Filistia nungeri Saul jabasotem, Yonathan, Abinadab aser Mak-shua tepset. 3Aser tongbangji Saul anema sashia aküm, aser lijak amertemi pa menep; aser pa lijak amertemi pa kanga yirutsü. 4Idangji Sauli pa nok o nü abenba dang ashi, “Ne nok atsütetang, aser aji agi ni leptangang; ashiko item memejeptokertem arua ni lepsatsütsü aser samatsütsü. Saka pa nok o nü abensangi meinyak, kechiyong pai kanga tsübua liasü. Aji asünung Sauli pa nok bena arua aji agi pa sasa tepset. 5Kodang pa nok o nü abensangi Saul süogo ta angu, pai yamaji pa nok agi pa tepset, aser pa-a pa den asü. 6Yamaji iba anogojisa Saul aser pa jabasotem asem aser pa nok o nü abensang, aser par nisung ajak asü. 7Aser kodang Israel nisungtem külen tsütsü lenten nung alirtem aser Yordan atena oa alirtemi Israel nisungtem jenogo aser Saul aser pa jabasotem süogo ta angu, parnoki yimtitem toktsü, aser jena ao; aser Filistia nunger aru aser item nungji ali.”8Tasüngji kodang Filistia nungeri tepseta alir süoshi pongzüka aru, parnoki Gilboa tenem nung Saul aser par jabaso asem tepseta angu. 9Parnoki pa tekolak lepzük, aser pa nok o nü agizük, aser süngyanglu kidangi aser nisungtem dangi osang abentsü, meketa aliba Filistia limai yok. 10Parnoki pa nok o nü Ashtarot kidang ayu; aser parnoki pa temang Beth-shan jara nung sentaka ayu.11Kodang Filistia nungeri pa indang oda Saul dak inyakba indang Yabesh-gilead nung alirtemi angashi, 12tasü tait nisung ajak aramesoa ammang piyong jaja, aser Saul aser pa jabasotem temang Beth-shan jara nungi agizük; aser parnok Yabeshi bener aru, aser yangji arong. 13Aser nüburtemi parnoki parnok teret bena arua itemji tamarisk süngdong kübok rema yutsü, aser anogo tenet lumi.
Comments
Post a Comment