1 CHUBATEM
1 CHUBATEM
OKILA
Mezüng CHUBATEM kaket ya Israel nung chubatemi yimsü asüba otsü, koba
SAMUEL kaket nungi tenzük, ibaji maneni aruba indang züluba otsü lir. Iba kaket
shilem asem küma lemsatsü akok: (1) Israel aser Yihuda madak Solomon chuba
akümba aser tebu Dawid asüba, (2) Solomon yimsüsüba aser takoktem, talisa
Yirusalem tenla ki yangluba, (3) Anüdoklentip aser anüplentip ta chuba yimli
ana küma lemdangba, aser küm noklangzüng tukibuba tiyongtsü tashi item madak
yimsü asürtem.
CHUBATEM kaket nung kin ka takok aser tamakok angubaji chuba shiba südir
saka pai Tsüngrem dak kodaka tamang kateta liasü, iba jagi ta nüburtem
tangatetba liasü. Süngyanglu külemba aser tashi mangabajagi lendong jenti bener
arüja liasü. Anüdoklentip chubatemi item tetendangba nungji aiben tamakok ngua liasü,
saka anüolentip chubatem rongnungbo temeyoktep liasü.
Mezüng CHUBATEM kaket nung tongtipangsa KIBUBAr tasü tait ainkartemi
nüburtem dang süngyanglu mekülemtsü aser Tsüngrem dang tashi angutsü indang
shia liasü. Talisa Elija otsü aser Baal putirtem den Karmel tenem nung ain
toktepba yamala indangji idaki angur.
Keta Alibatem
Dawid Yimsüsüba Tatembang 1:1-2:12
Solomon Chuba Akümba 2:13-46
Solomon Yimsüsüba 3:1-11:43
a) Mezüng Küm 3:1-4:43
b) Tenla Ki Yangluba 5:1-8:66
c) Tesülen Kümtem 9:1-11:43
Yimli Lemsaba 12:1-22:53
a) Anüdoklentip Kintemi Anema Noktakba 12:1-14:20
b) Yihuda aser Israel Chubatem 14:21-16:34Keta Alibatem
Dawid Yimsüsuba Tatembang 1 CHUBATEM 1:1-2:12Dawid Chuba Taküm Tatemlen 1 CHUBATEM 1:1-10Adonijai Chuba Menden agi Raktepba 1 CHUBATEM 1:11-27Nathan O Bathsheba na Tasa 1 CHUBATEM 1:28-40Dawid Melena Solomon Chuba Shimba 1 CHUBATEM 1:41-53Dawidi Solomon dang Tsüngi OAshiba 1 CHUBATEM 2:1-9Dawid Asüba1 CHUBATEM 2:10-12Solomon Chuba Akümba 1 CHUBATEM 2:13-46Adonija Asüba 1 CHUBATEM 2:13-24Abiathar Merenshiba aser Yoab Asüba 1 CHUBATEM 2:25-35Shimel Asüba 1 CHUBATEM 2:36-46Solomon Yimsüsüba 1 CHUBATEM 3:1-11:43a) Mezüng Küm 1 CHUBATEM 3:1-4:43Solomoni Shisatsü Meshiba (2 Pu. 1:3-12) 1 CHUBATEM 3:1-28Solomon Yimli nung Tongti Nisüngtem 1 CHUBATEM 4:1-19Solomon Yimsüsüba Mapang Yimjiyimjung 1 CHUBATEM 4:20-28Solomon Shisatsü 1 CHUBATEM 4:29-34b) Tenla Ki Yangluba 1 CHUBATEM 5:1-8:66Solomoni TenIa Ki Yanglutsü Renemba 1 CHUBATEM 5:1-18Solomoni TenIa Ki Yangluba 1CHUBATEM 6:1-37Solomon Chuba Ki 1 CHUBATEM 7:1-14Yongmenyin Tongshi (2 Pu. 3:15-17) 1 CHUBATEM 7:15-26Yongmenyin Nüktang 1 CHUBATEM 7:27-39Tenla Kidang Osettsüsettem (2 Pu. 4:11-5:1) 1 CHUBATEM 7:40-51Ozϋng Sϋngden Tenla Kidangi Bener Aitba (2 Pu. 5:2-6:2) 1 CHUBATEM 8:1-9KIBUBA Tatenba Tenla Kidangi Aruba 1 CHUBATEM 8:10-13Solomoni Nϋburtem Den Jembiba (2 Pu. 6:3-1:1) 1 CHUBATEM 8:14-21Solomon Sarasadem (2 Pu. 6:12-42) 1 CHUBATEM 8:22-53Solomon Temoatsϋ Sarasadem 1 CHUBATEM 8:54-61Tenla Ki Meshitetba (2 Pu.7:4-10) 1 CHUBATEM 8:62-66c) Tesülen Kümtem 1 CHUBATEM 9:1-11:43Solomon Dangi Tsϋngrem Tanaben Adokba (2 Pu.7:11-22) 1 CHUBATEM 9:1-9Solomon Hiram Den Akangtepba (2 Pu.8:1-2) 1 CHUBATEM 9:10-14Solomoni Inyakba Mapatem (2 Pu.8:3-18) 1 CHUBATEM 9:10-28Chubatsϋr Shebai Solomon Semdangba (2 Pu. 9:1-12) 1 CHUBATEM 10:1-13Solomon Chubar Rongsen (2 Pu. 9:13-28) 1 CHUBATEM 10:14-29Solomon Tsϋngrem Nungi Pilaba 1 CHUBATEM 11:1-13Solomon Tsϋkchirtem 1 CHUBATEM 11:14-25Yeroboam Dang Tsϋngrem Tenangzϋkba 1 CHUBATEM 11:26-40Solomon Asϋba (2 Pu. 9:29-31) 1 CHUBATEM 11:41-43Yimli Lemsaba 1 CHUBATEM 12:1-22:53(a) Anüdoklentip Kintemi Anema Noktakba 1 CHUBATEM 12:1-14:20Shekem Nung Mungdang (2 Pu.10:1-19) 1 CHUBATEM 12:1-20Shemia Shin O (2 Pu.11:1-4) 1 CHUBATEM 12:21-24Yeroboam Tsϋngrem Nungi Pilaba 1 CHUBATEM 12:25-33Bethel Tenladak Aitsϋba 1 CHUBATEM 13:1-10Bethel Nung Tambur Ainkar 1 CHUBATEM 13:11-34Yeroboam Chir Asϋba (931-910) 1 CHUBATEM 14:1-16(b) Yihuda aser Israel Chuba tern 1 CHUBATEM 14:21-16:34Yihuda Chuba Rehoboam (931-913) (2 Pu.15:12-13) 1 CHUBATEM 14:21-31Yihua Chuba Abijam (913-911) (2 Pu.13:1-14:1) 1 CHUBATEM 15:1-8Yihuda Chuba Asa (911-870) (2 Pu.15:16-16:6) 1 CHUBATEM 15:9-24Israel Chuba Nadab (910-909) 1 CHUBATEM 15:25-32Israel Chuba Baasha (909-886) 1 CHUBATEM 15:33-16:7Israel Chuba Ela (886-885) 1 CHUBATEM 16:8-14Israel Chuba Zimri (885) 1 CHUBATEM 16:15-20Israel Chuba Omri (885-874) 1 CHUBATEM 16:21-28Israel Chuba Ahab (874-853) 1 CHUBATEM 16:29-34(c) Elija Ainkar 1 CHUBATEM 17:1-19:21Elija Aser Ayawara 1 CHUBATEM 17:1-7Elija Aser Zarefath Amitsϋr 1 CHUBATEM 17:8-24Elija Aser Obadia 1 CHUBATEM 18:1-15Elija Aser Ahab 1 CHUBATEM 18:16-19Karmel Tenem Nung Tenlaba 1 CHUBATEM 18:20-40Tsϋngsarusa Anenba 1 CHUBATEM 18:41-46Elija Horebi Aoba 1 CHUBATEM 19:1-18Elisha Ajaba 1 CHUBATEM 19:19-21(d) Israel Chuba Ahab 1 CHUBATEM 20:1-22:40Siria Nunger Den Raraba 1 CHUBATEM 20:1-12Ahabi Benhadad Akokba 1 CHUBATEM 20:13-22Siria Nunger Den Tanaben Raraba 1 CHUBATEM 20:23-34Ainkar Kati Ahab Aitsϋba 1 CHUBATEM 20:35-43Naboter Tsϋkmenatsϋ Lu 1 CHUBATEM 21:1-3Ahab Aser Yezebel 1 CHUBATEM 21:4-16Elijai Tsϋngrem Obendangba Sangoktsϋba 1CHUBATEM 21:17-29Ramoth-Gilead Anema Raratsϋ Ahab Sendong (2 Pu.18:2-27) 1 CHUBATEM 22:1-4Tiyazϋ Ainkartemi Takok Indang Shinba 1 CHUBATEM 22:5-12Tamakok Indang Mikaia Ainkari Shinba 1 CHUBATEM 22:13-28Ramoth-Gilead Nung Ahab Laoba 1 CHUBATEM 22:29-38Ahab Yimsϋsϋba Tatembang 1 CHUBATEM 22:39-40(e) Yihuda Chuba Yehoshafat aser Israel Chuba Ahazia 1 CHUBATEM 22:41-53Yihuda Chuba Tehoshafat (2 Pu.20:31-21:1) 1 CHUBATEM 22:41-50Israel Chuba Ahazia 1 CHUBATEM 22:51-53
1 CHUBATEM 1
Dawid Chuba Taküm Tatemlen1Tang Dawid chuba tambur, aser arishi küm nung tain liasü; aser parnoki pa nem sü abentsü, saka pai talem mangu. 2Anungji par kilirtemi pa dang ashi, “Kü Kibuba chuba asoshi tasüngtet aiür ka bushidakjang aser la chuba tsüngdang noktakdakjang aser pa anebaludakjang; kü Kibuba chubai talem ngutettsüsa ne teku nung la mangalokdakjang.” 3Anungji parnoki aiür tobur tajung ka Israel temeket ajak nung bushi, aser parnoki Shunam-tsür Abishag ngua la chuba dangi anir aru. 4Aser aiürlaji tobur kanga tajung liasü; aser lai chuba yaria mesü, saka chubai la memetet.Adonijai Chuba Menden Agi Raktepba5 Tang Haggit chir Adonijai pei sasa ulua ashi, “Ni chuba asütsü,” aser pai kor talungtsütem, kor temeranger aser nisung tenem pa jakdang asemtsü renem. 6Tebui kecha südanga, “nai kechiba yamai inyak?” ta shia pa mejashidaktsü, aser pa aso-ajen kanga tajung liasü, shiba Absalom sülen aso. 7Aser pai Zuria chir Yoab aser putir Abiathar den sensak sema parnoki Adonija sülen anitaka pa yari. 8Saka putir Zadok, Yehoiada chir Benaia, ainkar Nathan, Shimei, Rei aser tamarenertem shir Dawid den liasü, parnokji Adonija den maliasü. 9Adonijai san, nashi aser tejebketba shirurutem Zoheleth lung, tzüpokdak lenmang anasa tetepsetba tenla agütsü. Pai pa adianutem ajak, chuba chirtem, Yihuda nüburtem aser chuba kilirtem ajak chiyungdaki jaok. 10Saka ainkar Nathan, Benaia aser tamarenertem aser pei adianu Solomonbo maja.Nathan o Bathsheba na Tasa11 Idangji Solomon tetsü Bathsheba dang Nathani asüngdang, “Haggit chir Adonija pa sasa chuba akümba indang nai mangashi na? Ano Dawid chubai iba indang kecha memetet! 12Anungji tang ni na aser ne jabaso Solomon taküm kümzüktsü asoshi tasa kar sayudi, 13Oang aser Dawid chuba dang shiang, ‘Kü kibur chuba, kü chir Solomon kü melen chubatsü ta nai kü dang azüngashia meshika ma? Ajangla kechiba Adonijai chubar? 14Ano Nathani ashi, Na pa den jembia alidangjisa nia ajagi arutsü aser nai ashibaji akangshidaktsütsü.’15Anungji Bathsheba chuba dangi oa kidangi ai. Pa kanga tambur aser Shunamtsür Abishagi pa anebalua liasü. 16Bathshebai apudaka chuba dang akhümtsübu sayu, aser chubai asüngdang, “Nai kechi aginür?”17Lai pa dang ashi, “Kü Kibuba, nai Kibuba ne Tsüngrem agi azüngashia ne kilitsür dang ashi, Shitak kü sülen ne chir Solomoni chubatsü, aser pa kü chuba menden nung amentsü. 18Tang ajiang, Adonijai yimsü asür, aser na kü Kibuba chubai aji memetet; 19aser pai nashi aser tejebketba shiruru aser san teperi tepseta chuba chir ajak, aser putir Abiathar aser temeranger tanishiba Yoab pai aja, saka pai ne tenzüker Solomonbo maja. 20Tang kü Kibuba chuba, Israel chirtemi kü Kibuba chuba sülen shiba chuba menden nung amentsü aji parnok dang shidaktsütsü ne dak repranga lir. 21Mesüra ya ataloktsü, kodang kü Kibuba chuba pei tetsü-teboutem den mejangdir, oda ni aser kü chir Solomon tamajung purtem rongnung züngsemtsü.”22Ajiang, kodang lai maneni chuba den jembia alidang, ainkar Nathan ait. 23Aser parnoki chuba dang, Ainkar Nathan arua lir ta ashi. Kodang pa chuba dangi aru, pa tejak alilen mechioker pai chuba tsüngdang apudak. 24Nathani ashi, “Oh chuba, kü Kibuba, Adonijai kü sülen chubatsü aser pa kü chuba menden nung amentsü ta nai ashi no? 25Kechiyong pa tanü luogo aser nashi aser tejebketba shiruru aser san teperi pai tepseta chubar chirtem, temeranger tanishirtem aser putir Abiathar pai aja; aser ajiang, parnoki pa tsüngdang chia jema ashir, Adonija chuba arishia liang.” 26Saka oda ne tenzüker, ne putir Zadok, aser Yehoiada chir Benaia aser ne jabaso Solomon pai maja. 27Ibai kü Kibuba chubai inyak asü, aser nai ne tenzükertem dang kü Kibuba chuba menden nungji pa sülen shiba amentsü ibaji memetetdaktsü asü?Dawid Melena Solomon Chuba Shimba28Idangji Dawid chubai langzüa ashi, “Kü dangi Bathsheba jaang” aser la chuba alidaki arua pa tsüngdang noktak. 29Chubai azüngashia ashi, Lendong ajak nungi kü tanela kümzükba Kibuba ali tashi, 30“atangji Kibuba Israel Tsüngrem agi ni ne dang azüngashiba ama, kü sülen atangji ne chir Solomoni chubatsü aser ni melena pa kü chuba menden nung amentsü; atangji tanü ashiba ama ni inyaktsü.”31Idangji Bathshebai pei tejak alilen mechioka apudak aser chuba dang akhümtsübu sayua ashi, “Kü Kibuba chuba Dawid tatem makai liang.”32Dawid chubai ashi, “Putir Zadok, ainkar Nathan aser Yehoiada chir Benaia kü dangi jaang.” Aser parnok chuba tsüngdangi aru. 33Chubai parnok dang ashi, “Nenok den nenok Kibuba tenzükertem aniang aser kü chir Solomon kü gado nung mendakjang aser pa Gihoni anir luang. 34Putir Zadok aser ainkar Nathani Israel madak chuba asütsü pa totzü mezüja shimtetang aser nenoki jangzü apua Solomon chuba talangka liang ta shiang. 35Idangji nenok pa sülen atutsü, aser pa arua kü chuba menden nung amentsü; kechiyong pai ni melena chubatsü aser pa Israel aser Yihuda madak tanishir asütsü shimtet.”36Yehoiada chir Benaiai chuba dang langzüa yamai ashi, “Amen, Kibuba kü kibur chuba Tsüngremi yamaji shidakjang. 37Koda kü kibur chuba den Kibuba liasü, aji oda pa Solomon den liang aser kü kibur Dawid chuba menden dang nungi pa chuba menden tuluba süjang.”38Anungji putir Zadok, ainkar Nathan aser Yehoiada chir Benaia, Kheret aser Pelet nunger alua Dawid chuba meyong gado nung Solomon mendaktsür Gihoni pa anir aru. 39Aser putir Zadoki süki nungi totzü pungdang agitet aser Solomon dak mezütsü aser parnoki jangzü apua nisungtemi ashi, “Solomon chuba talangka liang!” 40Aser nisung ajak pa sülen atua jemji apua tepela tulu agi pelatep, anungji parnok ola agi ali atenten.Adonija daki Tetsübu Aitba41Adonija aser pa den alirtem chia ajemba tema arudang parnoki aji angashi. Kodang Yoabi jangzü ola angashi, pai ashi, “Kechisünung iba nanüng tulu ya yimti nung adoker?” 42Pai tejembidak nung, ajiang, putir Abiathar chir Yonathan aru, aser Adonijai ashi, “Ajiang, kechiyong na tetemsü nisung aser osang tajung abensang.”43Yonathani Adonija dang ashi, “Atangji asen kibur Dawid chubai Solomon chuba kümdaktsüogo. 44Chubai putir Zadok, ainkar Nathan, Yehoiada chir Benaia, Kheret aser Pelet nunger pa den yok, aser parnoki chuba gado nung pa mendaktsü. 45Putir Zadok aser ainkar Nathani pa Gihon nung chuba asütsü totzü mezüja shimtet, aser parnok iba nungjagi pelashishia atu, anungji yimti nung tanaben ola adoker. Nenoki angashiba olaji iba nanüng olaji lir. 46Solomon chuba menden nung menogo. 47Aser talisa chuba tenzükertemi asen kibur Dawid moatsütsü arua ashi, Ne Tsüngremi Solomon ne tenüng dang nungi tajungba kümdakjang, aser ne chuba menden dang nungi pa chuba menden tuluba kümdakjang. Aser chubai pei sasa yipten manung apudak. 48Chubaia yamai ashi, Kü tenük agia nguteta tanü kü chuba menden nung amentsü shibai agütsü, iba Israel Tsüngrem Kibuba temoatsüba.”49Adonija tembar ajaki tsübua arameso aser nisung shia pei lenmangi ao. 50Aser Adonijai Solomon tsübu aser pai aramesoa noktaker oa tenladak tezü nung amet. 51Solomon dang ashi, “Ajiang, Solomon chuba Adonijai tsübur; kechiaser ajiang, pai tenladak tezü nung amer ashir, Solomoni nok agi pei lar melepsettsü ta kü dang tamasa azüngashiang.”52Solomoni ashi, “Pai pei sasa nisung tetemjen ka ta sayutetra, pa tekolak nungi ku jang kata ali nung metsüktsü; saka pa dak tamajungba ngura, pa asütsü.” 53Anungji Solomon chubai yok aser parnoki pa tenladak nungi anir alu. Aser pa arua Solomon chuba dang akhümtsübu sayu, aser Solomoni pa dang ashi, “Ne kidangi oang.”1 CHUBATEM 2
Dawidi Solomon Dang Tsüngi o Ashiba1Tang Dawid asütsü anogo tonga aru nung pai pei jabaso Solomon dang ashi, 2“Ni alima ajak yimya lenmangi odagi, anungji na tashi itang, aser ne sasa nisung ka ta sayuang. 3Kibuba ne Tsüngrem ne den yuang, pa lenmang nung jajaang aser pa tzüzüng ozüng, pa ozüng, pa telatet ozüng aser pa kuli, Mosa ozüng nung züluba amato nai kechisa inyaker, aser ne sasa nai kolenisa odir idakji renloktsü nai yuang. 4Kü indang jembiba Kibubai pa o atalokdaktsütsü, ne chirtemi pei mulungsentsü ajak agi aser pei tanela ajak agi ochiba nung kü jakdang jajatsü, parnok mapa nung temulung agütsüra, Israel chuba menden nung nisung ka mendaktsütsü na tamakok maludaktsütsü ta Kibubai ashir.”5 “Zeruia chir Yoabi kü dang kechi inyak ajia tali nai metet, Israel temeranger tanishir telok ana dang pai kechi inyak aser Yether chir Amasa shiba pai tepset, aser yimjung mapang nung rara-a azü tokshi, aser pa teperem nung naia aliba nangri nung, aser tsüngsem nung iba raraba azü enlok. 6Anungji ne shisatsü tangatetba ama inyakang, saka pa ku temesüngji tesünep nung leperi teyuok. 7Saka Gilead nunger Barzillai chirtem dang temeim sayuang, aser ne langbang nung chiyungba pur parnok südakjang, kechiyong ni ne adianu Absalom nungi ajen dang parnok kü dangi aru.”8 Ano ajiang, Gera chir Shimei, Bahurim nungi Benjamin nunger shibai ni Mahanaimi aoba anogo nung kü dang atakatem, parnok ne den lir, saka pa kü den Yordan nung ajuruteptsü alu, aser ni Kibuba agi azüngashia ashi,“Ni na nok agi mesüdaktsütsü. 9Tang aji asü nung pa tai maka tabo tezüngshi, kechiyong na shisa taka nisung; aser nai pa dang kechi inyaktsü aji metettsü, aser nai pa ku temesüngji azü den leperi abentsü.”Dawid Asüba10Tang Dawid pei tebutem den mejang aser Dawid yimti nung arem. 11 Dawidi Israel madak chubabaji küm lir liasü. Hebron nung pai küm tenet chuba, aser Yirusalem nung pai küm semer-asem chuba. 12 Aser tebu Dawid menden nung Solomon amen aser pa yimli kanga ulua yanglu.Adonija Asüba13Idangji Haggith chir Adonija Solomon tetsü Bathsheba dangi aru. Aser lai asüngdang, “Na yimjung nung arur asü?” Pai langzü, “Yimjung nung.” 14Ano pai ashi, “Ne dang ni ashitsü langka lir.” Lai langzü, “Shiang.”15Pai ashi, “Yimliji kü meyong ta nai metet aser kü nem chubadaktsütsü Israel chir ajaki kü dak repranger, saka yimliji meyipogo aser künu meyong kümogo; kechiyong ibaji Kibuba nungi pa meyong liasü. 16Tang ni ne dang langka mepishir, Kü dang ma ta teshi,” aser lai pa dang ashi, ‘Shiang.’ 17 Pai ashi, ‘Shunam tsür Abishagji kü kinungtsü asütsü agüjang ta nai Solomon dang ashitsü ni mepishir.’ 18Bathshebai langzü, ‘Hau, ni na asoshi chuba den jembitsüdi.’19Anungji Bathshebai Adonija asoshi Solomon den jembitsü ao. Aser chubai aramesoa la den ajuruteptsü noktak aser pa sasa la tsüngdang apudak aser pei chuba menden nung amen, aser pai tetsü amentsü asoshi menden ka agütsü aser lai pa tajichi len amen. 20Idangji lai ashi, “Ni ne dang langka mepishinür, kü dang ma ta teshi.” Chubai la dang ashi, “Oja, asüngdangang, ni ne dang ma ta mashitsü.” 21Lai ashi, “Shunamtsür Abishagji nedi Adonija kinungtsü asütsü agüjang.”22Solomon chubai langzüa tetsü dang ashi, “Adonija asoshi Shunamtsür Abishag kechiba nai asüngdanger? Pa asoshi yimlijia asüngdangang, kechiyong pa küdi, pa asoshi aser putir Abiathar asoshi, aser Zeruia chir Yoab asoshia asüngdangang.” 23Anungji Solomon chubai Kibuba agi azüngashia ashi, “Item tasüngdangba agi Adonija taküm magira Tsüngremi iba dang tali kü dang inyakang! 24Anungji tang Kibuba shibai ni noktakdaktsü, aser kübu Dawid chuba menden nung ni mendaktsü aser shibai pei nangzükba ama kibong yanglutsü, pa ali tashi tanüsa Adonija südaktsütsü.” 25Anungji Solomon chubai Yehoiada chir Benaia nem ozüng agütsü, aser pai Adonija dak lepoktsü aser pa asü.Abiathar Merenshiba Aser Yoab Asüba26 Putir Abiathar dang chubai ashi, “Na ner lu Anathoti jenang, kechiyong na asütsü tetemsü, saka ni na tangbo mesüdaktsütsü, kechiyong kübu Dawid jakdang Kibuba Tsüngrem temeshi süngden nai apu aser kübu timtemba ajak nung na-a timtema liasü.” 27 Anungji Shilo nung Eli kibong asoshi kechi jembi, Kibuba o ataloktsü asoshi Kibuba putir nungi Solomoni pa aridok.28Iba osangji Yoab dangi aru, kechiyong Yoabi Absalom tsütsü memeyipaka, pai Adonija tsütsü meyip. Aser Yoabi Kibuba süki nung jenok, aser tenladak tezü nung amet. 29Yoabi Kibuba süki nung jenokogo aser ajiang, pa tenladak sabang nung lir ta Solomon chuba dang ashi. Idangji Solomoni Yehoiada chir Benaia yoka ashi, “Oang aser pa tepsetang.” 30Benaia Kibuba süki-i arua pa dang ashi, “Chubai yamai ashir, ‘Arung’ saka pai langzü, ‘Masü, ni yangi asütsü.’ ‘Benaiai tanaben chuba dangi osang bener arua Yoabi yamaji ashir aser pai kü dang yamaji langzü ta ashi.’31Chubai pa dang ashi, “Pai ashiba ama inyakang, aser kübu ki nungi aser ni nungi kecha kuli makai Yoabi pi zü tokshiba, tai bener aotsü asoshi pa tepsetang aser remang. 32Kibubai pa züji pa tekolak manung yutsütsü, kechiaser pai pa dang nungi tajungba aser temeshiba nisung ana pei nok agi tepset. Aser kübu Dawidi memeteti pai Ner chir Abner, Israel temeranger telok arkotong, aser Yether chir Amasa, Yihuda temeranger telok arkotong tepset. 33Anungji parnok zü Yoab kolak nung alitsü aser pa semchisemnur kolak nung teti alitsü saka Dawid aser pa semchisemnur dang aser pa kidong aser pa chuba menden nung Kibuba nungi teti tatem makai yimjung alitsü.”34Anungji Yehoiada chir Benaia atu aser pa dak pungloka pa tepset aser arem nung pei kidang paji arem. 35Chubai Yehoiada chir Benaia temeranger telok pa melena arkotong kümdaktsü. Aser chubai putir Abiathar melena putir Zadok pa menden nung mendaktsü.Shimei Asüba36Chubai Shimei tajai yoka pa dang ashi, “Nai Yirusalem nung na asoshi ki ka yangluang aser nai iba nungjagi tuo. 37Kechiyong koba anogo nung nai Kidron ayong ajanga odir, nai ya jungjunga metetang, na shitak asütsü aser ne züji ne kolak manung alitsü.”38Shimei chuba dang langzü, “Chubai Ashibaji junger; kü Kibuba chubai ashiba ama, ne tenzükeri benshitsü.” Aser anogo aika Shimei-i Yirusalem nung liasü.39Saka küm asem tema arudang, Gath chuba, Maaka chir Akhish dangi Shimei-er alar ana jena ao. Aser parnoki Shimei dang ashi, ‘Ajiang, ne tenzükertem Gath nung lir.’ 40Shimei aramesoa pa gado renemer Akhish dangi pei tenzüker bushitsü Gathi oa pai alartem Gath nungi anir aru.41Shimei Yirusalem nungi Gathi or tanaben meyipa aruogo ta Solomon dang ashi. 42Chubai nisung yoka Shimei jar ashi, “Kibuba agi ni ne dang azüngashidakja aser na nungtema meshika ma, koba anogo nung nai Yirusalem nungi odir aser senzüdir na shitak asütsü ta meshika ma?” Aser nai kü dang ashi, “Ni angashiba oji kanga junger, ni angatsü.” 43Süra kechiba nai Kibuba madang azüngashiba aser ne dang melaba o shitak mayu? 44Chubai ano Shimei dang ashi, “Nai kübu Dawid tsüngdang inyakba, ne mulungjang nung miima yua aliba tamajung ajak ni metet, anungji chubai ne temenen mapatemji ne kolak nungsa enloktsütsü.” 45Saka Solomon chuba moatsütsü, aser Dawid chuba menden Kibuba tsüngdang teti tatem makai tashi ita alitsü.46Anungji chubai Yehoiada chir Benaia dang ozüng agüja pai oa pa dak lepoktsü aser pa asü. Aser Solomon teka nung yimliji tashi ita yanglu.CHUBATEM 3
Solomoni Shisatsü Meshiba(2 Pu. 1.3-12)1Solomoni Ijip chuba Farao den temba ayim, aser pa jala agi, aser chuba ki, Kibuba ki aser Yirusalem jara meketa Dawid yimtiji merenem tashi pai la anir arua ali. 2Iba mapang tashi nungji Kibuba tenüng nung ki yanglua maliasü, anungji nüburtemi tenem aser tesem balala nung tetepsetba tenla agütsüya liasü. 3Solomoni Kibuba meim aser pa tebu Dawidi lateta yutsüba ozüng nung jaja, aji saka paia tesem balala nung tarongba tenlatem tepseta tenla. 4Chubai külemtsü asoshi Gibeoni ao, kechiyong ibaji tenem talang liasü, aser iba tenla dakji Solomoni tarongba tenla meyirijang ben tashi tenlar liasü. 5Gibeon nung aonung pungmang ka nung Solomon dangi Kibuba adoka ashi, “Ni ne nem kechi agütsütsü aji meshiang.”6Solomoni ashi, “Dawidi ne jakdang ochiba aser temeshiba nung, aser ne den temulungsentsü temerük agi jajaba yari, nai ne tenzüker Dawid, kübu dang temeim tulu sayu, aser tanü anogo ama, nai pa nem jabaso ka pa chuba menden nung amentsü agütsü. 7Tang Oh Kibuba kü Tsüngrem, kübu Dawid melena nai ne tenzüker chuba kümdaktsü; ni tanur ka dang asünung, koda oli aruli ta senzütsü ni memetet. 8Aser nai shimtetba kin tulu koba nisung jenti asüba yong züngdangtsü makok, parnok rongnung ne tenzüker lir. 9Anungji ne nübur telok tulu o bendangdang tajung-tamajung metettsü asoshi tangatetba mulungsentsü ne tenzüker nem kua, kechiyong ne nübur telok tulu ya shibai o bendangtsü akoktsü?”10Solomoni iba asüngdangba nung Kibuba temulung achi. 11Tsüngremi pa dang ashi, “Kechiaser nai ya-ang asüngdang aser nai ne arishi talang asoshi mesüra na takar asütsü asoshi mesüra ne tsükchir taküm asoshi masüngdang, saka nai ochi obendangba angatettsüang asüngdang; 12ajiang, ne o ama ni inyakogo, oda ne jakdang na mesüka tangar shinga malitsü mesüra ne sülen na ama shinga madoktsü asoshi, ajiang, ni ne nem shisatsü aser tangatettsü mulungsentsü agütsüogo. 13Nai koba masüngdang ajia ne nem agütsüogo, oda chuba rongnung ne mapang nung na mesüka shinga malitsü asoshi ni rongsen aser tenüngsang ne nem agütsüogo. 14Aser nai nebu Dawidi jajaba ama kü telatet ozüng aser kü temelaba amshia jajara, idangji ni ne arishi talang kümdaktsütsü.” 15Aser Solomon sak, aser ajiang, ibai pungmang ka liasü, aser pai Yirusalemi arua Kibuba temeshi süngden tsüngdang noktak aser tarongba tenla aser yimjung tenla agüja pa kilirtem asoshi benjong tulu ka yanglu.Solomoni O Tasak Ka Bendangba16Idangji nüktapangtatsür ana arua chuba tsüngdang noktak. 17Tetsür kati ashi, “Oh kü Kibuba, iba tetsür aser ni ki ka nung külemi alir, aser lai ngua ni tanur ka aso. 18Aser ya adok, ni tanur ka sor anogo asem lir, iba tetsüria tanur ka aso, aser onok külemi liasü, aser iba kidang küna dak alema tangar shinga maliasü. 19Iba tetsüri asoba tanurji aonung lai nenset. 20La ayatrem nung sak, aser ni mejanga lia lai ni nungi ozü chir tanur mangji bener oa pei teku manung yur, lar chir tasübaji kü teku manung yutsü. 21Kodang kü chir nem mama yongdaktsütsü ni sak, ajiang, tanurji tasü liasü, saka kodang ni anepdang iba indang bilem, ajiang, kü den aliba tanurji kü chir masü.”22Tangar tetsür jagi ashi, “Masü, taküm alibaji kü chir aser tasübaji ne chir.” Aser laia ashi, “Masü, tasübaji ne chir aser taküm alibaji kü chir;” yamaji chuba tsüngdang parnoki jembi.23Idangji chubai ashi, “Katia ashir, Taküm alibaji kü chir, aser tasübaji ne chir; ano katia ashir, Masü, saka tasübaji ne chir, aser taküm alibaji kü chir.” 24Chubai ashi, “Kü nem nok ka kua.” Aser parnoki chuba tsüngdangi nok ka bener aru. 25Aser chubai ashi, “Taküm aliba tanurji ana küma lepdanger, tesadang ka ka nem, aser tesadang ka la nem ta agüjang.”26Idangji tetsürla shiba taküm aliba tanur tetsü liasü, lai chuba dang ashi, kechiyong lai tanur asoshi pei shi agi shia bilema lai ayimten, “Oh kü kibuba, taküm aliba tanurji la nem agüjang, kodakang aji melepsetka.” Saka tangar tetsürjagi ashi, “Iba tanurji la indanga masütsü mesüra kü indanga masütsü, ibaji lepdangang.”27Idangji chubai langzüa ashi, “Taküm aliba tanurji la nem agüjang, tanurji tetepset ta ashilaji tanur tetsüji lir.”28Israel nunger ajaki chubai obendangbaji angashia parnoki süngmang, kechiaser obendangtsü, Tsüngrem shisatsü pa dak lir ta parnoki angu.1 CHUBATEM 4
Solomon Yimli Nung Tongti Nisungtem1Solomon chubai Israel ajak madak yimsü asü, 2aser itemi pa tongtipurtemji liasü: Zadok chir Azaria putir; 3Shisha chirtem, Elihoref aser Ahija tezülurtem; Ahilud chir Yehoshafat tezüluba bendanga ayusang; 4Yehoiada chir Benaia temerangertem arkotong; Zadok aser Abiathar putirtem liasü; 5Nathan chir Azaria linük yimsüsürtem madak ketdangbuba; Nathan chir Zabud putir: aser chuba tembar; 6Ahishar chuba ki madak tanishir, Abda chir Adoniram: mapa inyakertem rongnung tanishir.7Solomoni ano Israel ajak nung chiyungtsü madak, aser chuba kidang ketdangsür terana ayu. Parnok nisung shiai ita ka ka atema chiyungtsü anebaludaktsü. 8Parnok tenüng yamai liasü: Efraim tenem linük nung Ben-hur; 9Makaz, Shaalbim, Beth-shemes, Elon aser Beth-Hanan, Ben-Deku; 10Arubboth nung Ben-hesed jabaso, pa linükji Sokoth nungi Hefer arrtsü tashi. 11Dor linük ajonga nung Ben-abinadod jabaso, Solomoner jala Tafat pa kinungtsü liasü, 12Taanak aser Megiddo, Zarethan anasa aliba Beth-shean ajak Yezreel kübok Beth-shean nungi Abel-mehola aser Yokmeam tashi nung Ahilud chir Baana liasü; 13Ramoth-Gilead nung Bengeber (pa den Yiar yimtem Manase chir Gilead nung aliba ano Argob linük koba Bashan nung lir, iba jara aser yongmenyin tasüdangtsüba yokba yimti tulu roker); 14Mahanaim linük nung Iddo chir Ahinabad; 15Naftali linük nung Ahimaz, pai Solomon jala Basemat agi; 16Asher aser Aloth nung Hushai chir Baaona; 17Issakar linük nung Parua chir Yihoshafat; 18Benjamin linük nung Ela chir Shimei; 19Gilead nung Amor chuba linük Sihon (aser Bashan chuba Og nung Uri chir Geber). Item madak paji dang yimsüsür liasü.Solomon Yimsüsüba Mapang Yimjiyimjung20Yihuda aser Israel nüburtemji tzüyimkhüm lisem ama mezüngdangtettsüsa liasü, parnokji chia-jema aser pelatepa liasü. 21 Solomoni Filistia lima Eufrata ayong nungi Ijip arrtsü tashi yimli ajak madak yimsü asü. Parnoki pa nem sempettem agütsü aser Solomon taküm piyong pa tenzük.22Anogo ka asoshi Solomoner chiyungtsü renembaji: amzü tajung tatakzük semer jang tatakzük roker, 23nashi tejebket ter, chiyima senzüba nashi metsü, san noklang ka, shitsü, mesü, shio aser an teshimtet, itemji liasü.24Solomoni Eufrata ayong anüolen nungi Tifsa aser Gaza yimti anüolen tashi yimsü asü, aser meketa aliba kin ajak den pa yimjung liasü. 25Pa yimsüsüba mapang Yihuda aser Israel nungertem Dan nungi Beersheba tashi kümzüka liasü, aser nisung shia pei tsükmenatzü aser mungudong liasü.26 Solomon kor talungtsü meyi lir, aser kor temeranger meyi terana liasü. 27Aser ketdangpurtemi Solomon chuba asoshi aser Solomon chubar langbangi aruba pur ajak asoshi chiyungtsü pei ataba ita nung agütsü, parnoki kecha agia anünga metoktsü. 28Barley tsük aser kortem asoshi monü raraba kor tekara parnoki ketdangpurtem dangi nisung shia melaba ama bener aru.Solomon Shisatsü29Tsüngremi Solomon nem shisatsü, tangatetba aser temulung tulu, molu lisem ama agütsü. 30Solomon shisatsü anüdoklen alir chirtem aser Ijip shisatsü ajak dang nungi taoba liasü. 31 Kechiaser pa nisung ajak dang nungi shisa takaba liasü, Ezrahit nungi Ethan, Heman, Kalkol, aser Darda, Mahol chirtem dang nungi alaka, aser kin ajak madak pa tenüngsang liasü. 32 Aser pai apijemtsü meyi asem jembi aser pa ken meyi ka ser pungu liasü. 33Aser pai süngdong taküm indang Lebanon nung aliba cedar süngdong nungi oda jara nung meyiba esop indang tashi jembi: pai shiruru indang, ozü indang aser jua aoba shiruru aser angotem indang jembi. 34Aser Solomon shisatsü angatsü asoshi nisung ajak aser alima chubatem shirnoki pa shisatsü indang angashi parnok ajak aru.1 CHUBATEM 5
Solomoni Tenla Ki Yanglutsü Renemba(2 Pu. 2.1-8)1Kodang Tair chuba Hirami Solomonji tebu Dawid melen chuba asütsü shimtetogo ta angashi, pai Solomon dangi pei otongdartem yok; kechiaser pa Dawid den tembar liasü. 2Solomoni iba osang Hiram dangi yok:3“Pei tsükchirtem Kibubai pa tetsüng kübok mayu tashi rara aika pa meketa aliba yong kübu Dawidi pa Tsüngrem Kibuba tenüng asoshi ki ka meyanglutet, aji nai metet. 4Saka kü Tsüngrem Kibubai kü nem ajaklen anisüngzük agütsü; idaki tsükchira mali mesüra tamajunga mataloker. 5 Ajiang, kü Tsüngrem Kibuba tenüng asoshi ni ki ka yanglutsü nükjidong ayur, kechiyong kübu Dawid dang Kibubai ashir, Ne chir, shiba ne kidang ne chuba menden nung ni mendaktsütsü, kü tenüng asoshi pai kiji yanglutsü. 6Anungji tang Lebanon nungi cedar süng parnoki kü nem leptsütsü nai mela-ang, aser kü tenzükertem ne tenzükertem den alitsü, aser nai meshiba ama ne tenzükertem asoshi ni taa teperi agütsütsü, kechiyong Sidon nunger ama süng arangtsü onok rongnung tajung mali ta nai metet.”7Hirami Solomon o angashia, pa kanga pela ashi, “Tanü Kibuba tenüng sangang; pai iba kin tulu madak Dawid nem shisa taka jabaso ka agütsüogo.” 8Aser Hirami Solomon dangi yoka ashi, “Nai kü dangi yokba osang ni angashiogo; cedar aser fir süngpak indang nai ashiba ni ajak inyaktsü.”9Kodang tenzükertemi itemji Lebanon nungi tzüyimi bener alutsü, aser ni itemji alenteper tzüyim nung aotsüsa nai ashiba tesem jagi yoktsü, aser nai itemji bener aotsü asoshi ni saladaktsütsü, aser kü kibong asoshi chiyungtsü agütsütsü ni aginüba ama nai renemjangma.10Anungji Hirami Solomon nem pai aginüba ajak ama cedar aser fir süngpak agütsü. 11Solomonia Hiram nemji wheat tsük tatakzük meyi metsü par kibong chiyungtsü asoshi aser totzü temeja tatakzük metsü agütsü: yamaji küm shia Solomoni Hiram nem agütsü. 12Kibubai Solomon nem pai pa dang nangzükba ama shisatsü agütsü, aser Hiram o Solomon na tsüngda nung yimjung liasü, aser parnoki külemi telungjem yanglu.13Solomon chubai Israel ajak nungi mapa inyakertem aniten, aser parnok telokji nisung meyi semer liasü. 14Pai parnok ita ka ka asoshi Lebanoni meyi ter yok, aser parnok idakji ita ka liasü, aser ita ana kidang liasü; Adoniram parnok telok madak liasü. 15Solomon khu abener meyi neter ayu, aser tenem nung lung angenteter meyi tir liasü. 16Solomoner tongtibang ketdangpurtem mapa nung alir dak alaka, mapa inyaker madak ozüng agütsür meyi asem ser noklang asem liasü. 17Chubai ozüng agütsü, aser parnoki lung tulu aser sen jenti alangba tatsüngba lung agi ki noktakdaktsütsü asoshi lungji atsüng. 18Aser Solomon o Hiram na ki yanglurtem aser Gebal nunger ki yanglurtemi itemji inyak, aser süngpak aser lung parnoki ki yanglutsü asoshi renem.1 CHUBATEM 6
Solomoni Tenla Ki Yangluba1Israel chirtem Ijip lima nungi adoker küm noklang pezü tirbuba; Solomoni Israel ajak madak chubaba küm pezübuba, ita tanabuba Ziv ita nung, pai Kibuba kiji yanglutsü tenzük. 2Aser Kibuba ki koba Solomoni yanglu, metong nung süklep roker, lenten nung süklep metsü aser ali nungi ajungketba nung süklep semer liasü. 3Temeshi tenla ki jakdang ki tila ka or metenloka yanglubaji lenten aser metong nung süklep metsütsü, aser ki jakdang lenten nung süklep ter liasü. 4Ki asoshi pai kichiba telunglen ulua aser temalen ilaa yanglu. 5Ki jara dak tsükloka pai taktang meketa yanglu, aser ki jara dak tsükloka temeshi aser temeshitiba ki anaji meketa tezülen ki taktang yanglulok. 6Tekübokba taktangji lenten nung süklep pungu liasü, aser tiyongba taktangji lenten nung süklep trok liasü, aser asembuba taktangji süklep tenet liasü, ki jara meketa tezülen asoshi pai lung temerang agi sanen manungji ki jara metaloktsüsa yanglu.7Ki yangludang lung atsüngdak renema akaba lung agi aser kiji asüdang yintem mesüra pu mesüra merang oset akoshiba kecha mangashi-i dang yanglu.8Ki tajichilen tiyongba taktang asoshi kishi liasü, aser tiyongba taktang jagi parnoki apu agi atu: aser tiyongba nungi tasembubai atu. 9Yamaji pai kiji yanglu aser renem, aser kiji sanen aser cedar süngpak agi yanglu. 10Pai ki dakji tsükloka taktang süklep pungu-ngu talang yanglu aser kiji cedar süngpak agi tashi ita angentepa yanglu.11 Kibuba o Solomon dangi arua ashi, 12“Koba ki nai yanglua ali nai kü telatet ozüngtem nung jajara aser kü ozüngtem tashi angara aser ni melabatem yura, ni nebu Dawid dang ashiba kü o ni ayutsü. 13Ni Israel chir rongnung alitsü, aser kü nübur Israel mesendoktsü.”14Anungji Solomoni kiji yanglu aser aji renem. 15Pai telunglen jaraji cedar süng agi yanglu, atem nungi tsüngbang tashi pai süng agi renem aser pai atemji mitsüktsü süng agi nembang. 16 Atem nungi jara tashi pai süklep metsü ki tezülenji cedar süng agi sülok, pai aji telunglen Temeshitiba taktang asoshi yanglu. 17Kiji temeshitiba tenla ki jakdang, süklep lir talang liasü. 18Ki telunglenji naro aser noksa enoker cedar süng agi yanglu, ajakji cedar süng dak alaka lung kata mamshi.19 Kibuba den nangzüktepba temeshi süngden ayutsü asoshi, pai ki telunglen tiyong nung taktang ka yanglu. 20Telungba taktangji metong nung süklep metsü, lenten nunga süklep metsü aser ali nungi ajongketba nungjia süklep metsü liasü, aser idakji pai hon temeja enoka yanglu, aser pai tenladakji cedar süng agi yanglu. 21Solomoni ki telunglenji hon temeja agi yanglu, aser temeshitiba taktang temalenji ajanga hon agi lisü ama yanglur mesanga ayu; aser idakjia pai honsa enok. 22 Pai ki ajakji hon enoka yanglu aser temeshitiba taktang nung aliba tenladak ajongaji hon agi yanglu.23 Temeshitiba taktang nungji pai oliv süng agi cherubim noksa ana yanglu, talang nung süklep ter-er liasü. 24Cherub ka tashikangji süklep pungu liasü, tashikang ka tatembang nungi tashikang ka tatembang tashi nungji süklep ter. 25Tangaba cherubji süklep ter liasü, cherub anapronglaji tasazük aser tereprangtsüjia kasadang liasü. 26Cherub ka ali nungi talang nung süklep ter liasü, aser kajia yamaji liasü. 27Aser pai cherub noksaji ki telunglen enok, aser cherub tashikangtemji salar tashikang ka agi jara dak kongshia aser tashikang ka agi jara ka dak kongshia enok, aser ki tiyong nung parnok tashikangji kongshitepa liasü. 28Aser pai cherub noksaji hon agi mezübang.29Pai ki nungji jara ajakji meketa cherub aser asangdong aser naro noksa agi telunglen aser temalen ajak nung yanglu. 30Aser ki atemji telunglen aser temalen hon agi yanglu.31Temeshitiba taktangi aitsü asoshi pai oliv süng agi kishi tapu ana yanglua tongnü, aser kishi tongnütemji jara shilem pungu nung ka yanglu. 32Anungji pai oliv süng agi kishi ana yanglu; aser pai iba manungji cherubim noksa, asangdong aser naro noksa hon enoka yanglu; aser pai cherubim aser asangdong noksa nungji hon enoka yanglu. 33Yamaji pai tenla ki telungi aitsü asoshia oliv süng agi kishi yanglu, jara shilem pezü nung ka, 34aser mitsüktsü süng agi kishi ana; kishi ka anasü koleptsüsa aser kishi kaji anasü koleptsüsa yanglu. 35Aser iba manungji pai cherubim, asangdong, aser naro noksa enoka yanglu, aser pai item mapa manungji hon enoka yanglu.36Tatsüngba lung taren asem enoka aser cedar agi sanen taren ka enoka telunglen taktangji yanglu.37 Kibuba ki kimungji küm pezübuba Ziv ita nung renem. 38Aser küm terkabuba nung, Bal ita koba ita ti buba lir, iba ita nung ki shilem ajak aser noksa taginüba ajak renem. Aji yangludang pai küm tenet agi.1 CHUBATEM 7
Solomon Chuba Ki1Solomoni pei asoshi chuba ki yanglu, aser pai ibaji küm terasem nung renem. 2Pai chuba kiji Lebanon süng agi yanglu, metong nung süklep noklang ka, lenten nung süklep tenem aser ali nungi ajungketba nung süklep semer, aji cedar tongshi taren pezü manung yanglu. 3Aser sanen lir-pungu manungji cedar süng agi nembanga yanglu, itemji nüktang taren ka nung terpungu manung liasü. 4Taren asem nung sanen liasü, aser kichiba indangtepa tatongtep asem liasü. 5Kishi aser kichiba ajakji tasazük kasa, itemji taren asem-sem kati ka den jitepa liasü.6Pai tongnü taktang yanglu; metong nung süklep tenem, aser lenten süklep semer; item jakdang kilempok tongnütem aser sanentem liasü.7Pai ki yanglulokba nungji obendangba menden yanglu, oda kilempokji obendangdak, aser itemji cedar süng agi nembanga yanglu. 8 Aser pa alitsü ki, kilempok külen aliba taktangjia ibaji mesüka yanglu. Pai ano iba kilempok mesüka Farao jala shiba pai agi la jala asoshi ki ka yanglu.9Item ajakji sen aika alangba lung liasü, tatsüngba lunga dena, tasazükba ama süngrangtsü agi arangba süng temalen aser telunglen liasü, kimung apusoba nungi tatem tashi temalen nungi telungba taktang ajak liasü. 10Kimung nungji sen aika alangba lung liasü, lung tulua dena, lungji süklep ter aser süklep ti liasü. 11Aser temalen sen aika alangba lung liasü, tasazükba ama tangentetba lung aser cedar süng liasü. 12Telungba taktangji meketa tangentetba lung taren asem, aser cedar süng agi sanen taren ka. Kibuba ki telungba taktang aser ki yanglulokba mesüka liasü.Hiram Mapa13Solomon chubai Tairi yoka Hiram anir aru, 14Pa tebuji Tair yimti nung yongmenyin atsünger tajung ka liasü, pa tetsüji Naftali kidong nungi amitsür ka liasü. Paji yongmenyin mapa inyaktsü asoshi tesangra aser tangatetba nisung ka liasü. Pai Solomon chuba dangi arua par mapa ajakji inyak.Yongmenyin Tongshi(2 Pu. 3.15-17)15Hirami yongmenyin agi tongshi ana menoka süklep terti aser süngtsüng nung süklep terana ta yanglu. 16Aser pai tongshitem kolak nungji ayutsü temuluba yongmenyin agi tongnübang noksa ana yanglu: tongnübang noksaji ka süklep pungu aser kajia süklep pungu ta yanglu. 17Tongnütem manung aliba tongnübang noksa asoshiji lisü aser yinzü agi yangluba dena liasü; tongnübang noksa ka asoshi tenet, aser tongnübang noksa ka asoshijia tenet liasü. 18Anungji pai jarem noksa yanglua tongshibangtem temalen tongshibang noksa nembangtsü asoshi mechitepa yangluba meketaji taren ana liasü aser yamaji pai tanga tongshibang noksa asoshia yanglu.19Kilempok nung aliba tongshitem temalen aliba tongshibang noksatemji labu naro yangluba, süklep pezü liasü. 20Aser temechitepba tezülen tepok anasaji tongshi ana manungji ano tongshibang noksa liasü, aser tanga tongshibang kaji meketa temalen tareni jarem naro noklang ana liasü.21Tenla ki kilempok nungji pai tongshi azüng, aser pai tajichi tongshiji azüng, aser iba tenüngji Yakin aja, pai tabelen tongshiji azüng aser iba tenüngji Boaz aja. 22Aser tongshi manungji labu naro ama tobur junga yanglua liasü, yamaji tongshi mapaji renem.Yongmenyin Tzüyim(2 Pu. 4.2-5)23Pai tatem külen nungi tatem külen tashi meketa temolutetba yongmenyin tzüyim ka, süklep ter yanglu, aser tajungketba nung ibaji süklep pungu liasü, aser aji meketa süklep semer taren ka nung yanglu. 24Iba kübok süklep semer tashi tzüyim meketa liasü; aji merang agi yangluba meso taren ana küma liasü. 25Aji nashi pungchi terana manung noktak, aser nashi pungchi asem anüdoklentip shia, asem anüolen shia, asem anüolentip shia aser asem anüdoklen shia yanglu; aser item manungji tzüyimji yanglu, aser item ajak techimilenbo telunglen liasü. 26Aser ibaji süngtsüng nung teka ka lema liasü; aser ayongbangji labu naro noksa enoka ali agi yangluba marok amai yanglu, aser idakji mori tatakzük meyi ana liasü.Yongmenyin Nüktang27Pai yongmenyin agi nüktang ter yanglu, nüktang shia metong nung süklep pezü, lenten nung süklep pezü, aser ali nungi ajongketba nung süklep asem liasü. 28Aser nüktangji yamai liasü, nüktang tatembangji lung o lung na tsüngda nung jungjunga tiptema yanglua liasü. 29Aser nüktang tatembang nungji molusongzü, nashi pungchi aser cherubim noksa yanglua liasü, aser molusongzü aser nashi pungchi noksa nungji tanga sangra-a yangluba mapa tajung enoksema liasü. 30Nüktang shia yongmenyin talungtsü pezü aser yongmenyin talungtsü lungtepdak liasü; aser kinük pezüsülen susa ka ayudak tetsüng liasü. Item tetsüngji narozük agi yangluka liasü. 31Aser tongnübang tebanglen aser temalen süklep ka liasü; aser iba tebanglen tongshi tamentakdak ama longlonga süklep ka ser tesadang; ano iba tebanglenji nok agi jiteta yangluba noksa liasü; aser item meketbaji telonglong masü, kinük pezüsü adoka liasü. 32Temeketba kübok talungtsü pezü liasü; talungtsü lungtepdakji tamentakdak liasü; aser talungtsü temalen atuba süklep ka ser tesadang. 33Talungtsüji kor talungtsü ama liasü; item talungtsü lungtepdak, tezülen, temalen aser metentepdak ajak temuluba yin liasü. 34Tamentakdak shia kinük pezüsülen nüktang pezü liasü; nüktangji tamentakdak den ka küma liasü. 35Tamentakdak temalen süklep tesadang ka longlonga meketzüka liasü, aser tamentakdak tema nung item metentepba aser temeketbaji iba den ka küma liasü. 36Aser iba metentepba aser temeketba tiplen pai cherubim, molusongzü, aser asangdong tawa agi melaba tashi narozük yangluka renem. 37Iba amaji pai tamentakdak ter yanglu; ajakji ka ama kasasa yin agi mulu, tasazük aser tereprangtsüji kasa liasü.38 Pai yongmenyin susa ter yanglu; susaji shia bath lir aiba, susa süklep pezüzü, aser tamentakdak ter shia susaji kaka liasü. 39Tamentakdaktemji ki tajichilen pungu aser ki tabelen pungu pai toktsü; aser tzüyimji pai ki anüdoklen kinüklen toktsü.Tenla Kidang Osettsüsettem(2 Pu. 4.11—5.1)40Pai po tateptsü aser susatemjia yanglu. Anungji Hirami Kibuba ki nung Solomon chuba asoshi mapa ajakji renem:41Tongshi ana;Tongshibang nung susa mesüka yangluba tongshi ana;Tongshibang noksa yokba nembangtsü temechiba ana;42Taren ana asoshiji jaremjang noklang pezü;taren shia jaremjang noklang ka ka tongshibang noksaaser susaji nembangtsü asoshi;43Nüktang ter den susa ter;44Tzüyim aser iba kübok nashipungchi terana;45Po, tateptsü aser susatem.Kibuba ki asoshi Hirami Solomon chuba nem yanglutsüba item oset ajakji yongmenyin agi yanglua liasü. 46Yordan lenten nung chubai itemji, Sukot aser Zarethan tsüngda nung ajongli nung mulua yanglu. 47Yongmenyin osetji onsara asü nung itemji odangtsü asoshi mebushiteti liasü. 48 Anungji Solomoni Kibuba kidang aliba oset ajak yanglu: hon tenladak, tenla kidang ayuba amtsük asoshi hon langbang, 49hon temeja agi milendongtem, tenlaki telungba madang, tajichilen pungu, aser tabelen pungu; naro milen, aser mi mijepru, itemji hon temeja agi; 50marok, misü endokba, susa, liangmesen asoshi sütem, aser meso item ajakji hon temeja agi; aser temeshitiba taktangi aiba telungba kishitem asoshi hon küpja, aser tenlaki kishitem asoshi, hon agi yanglu.51 Yamaji Kibuba ki asoshi mapa ajak Solomon chubai renem. Aser Solomon tebu Dawidi meshiteta ayuba osettem, taribi, hon, aser chipo-anpo bener aita Kibuba kidang terizüngdak ayu.1 CHUBATEM 8
Ozüng Süngden Tenla Kidangi Bener Aitba(2 Pu. 5.2—6.2)1 Idangji Kibuba den tezüngzüktepba Ozüng Süngden Dawid yimti Zion nungi bener arutsü asoshi Solomoni Israel nunger tambur aser kin tanishir ajak, aser Israel chir rongnung tongtipur ajak Yirusalem nung Solomon kidang sentepdaktsü. 2 Aser Israel nunger ajak Ethanim ita nung, aji ita tenetbuba, Solomon chuba kidangi sentep. 3Putirtemi ozüng süngdenji aben aser Israel tambur ajak aru 4Aser parnoki Kibuba süngden, sentep süki, süki nung akaba temeshi marok ajak putirtem aser Levi nungeri bener aru. 5Ashitsü aser züngdangtsü mokoki nashi pungchi aser santem tenla agüja Solomon chuba aser Israel nunger ajak iba anasa sentep. 6Kibuba den tezüngzüktepba temeshi süngdenji putirtemi temeshi daki oda cherubim tashikang küboki bener aru. 7Kechiyong cherubim tashikang kübok temeshi süngden aser idakji aliba süng ajak akhümbanga liasü. 8Aser süngji talang, asünung temeshi taktang nungi temeshidakji ngua liasü, saka tezülen nungibo süngji mangu, aser tanü tashi itemji idakji lir. 9 Israel nunger Ijip lima nungi adokdang, Kibubai kechi tezüngzüktepba Israel chirtem den yanglu, idangji Mosai idakji Horeb nung lung agi yangluba lungpak ana temeshi süngden nung enoktsüba dak alema idakji tanga kecha mali asü.Kibuba Tatenba Tenla Kidangi Aruba10 Kodang putirtem temeshi kidang nungi adok, mepet agi Kibuba kiji sübang. 11Aser putirtemi tenzüktsü menoktaktet kechiyong Kibuba sentsüwangshi agi Kibuba kiji asüng.12 Idangji Solomoni ashi,“Kibubai pa mepet temelem nung alitsü ta shiogo.”13Na teti alitsü asoshine nem tamaren ki ka sütsüogo.Solomoni Nüburtem Den Jembiba(2 Pu. 6.3-11)14Israel nunger sentepa alir ajak noktaka lia, chubai parnok tsütsü tejak shir nüburtem ajak moatsü. 15Idangji pai ashi, “Israel Tsüngrem Kibuba temoatsüba sang, pai pei tebang agi kübu Dawid dang nangzükba pai pei teka agi aji atalokdaktsü ta ashi. 16 Kü nübur Israel nunger Ijip lima nungi anitetba anogo nungi ni kü tenüng alitsü asoshi Israel kidong nungi ki yanglutsü asoshi yimti kata meshimtet, saka kü nübur Israel madak Kibur asütsü asoshi ni Dawid shimtet. 17 Tang kübu Dawid mulung nung Israel Tsüngrem Kibuba tenüng asoshi ki ka yanglutsü bilema liasü. 18Saka Kibubai kübu Dawid dang ashi, Ne mulungjang nung kü tenüng asoshi ki ka yanglutsü bilembaji junger; 19 saka nai kiji meyanglutsü, aji saka ne dak nungi jakzükba ne chiri kü tenüng asoshi kiji yanglutsü.”20“Kibubai jembiba ama, pai pei o akanga ayu, kechiyong kübu Dawid nungi ni jakzük, aser Kibubai nangzükba ama Israel chuba menden nung ni amen, aser Israel Tsüngrem, Kibuba tenüng asoshi kiji yanglu. 21Ni idakji Ozüng Süngden asoshi taktang ka yanglu, aser asen tebutem den parnok Ijip lima nungi aniteta anir arudang, tezüngzüktepba süngden idakji yua lir.”Solomon Sarasadem(2 Pu. 6.12-42)22Israel nunger telok sentepa aliba tsüngdang Solomoni Kibuba tekülemdak tenla sabang jakdang noktaker pei teka anüngleni mekanga ashi, 23“Oh Kibuba, Israel Tsüngrem, anüng temalen mesüra ali telunglen na ama tangar Tsüngrem mali; pei mulungsentsü ajak agi ne tsüngdang jajartem dang, nai tezüngzüktepba aser yimlibilem sayur. 24Nai ne tenzüker Dawid kübu dang nangzükba yua aru, tanü anogo ama, nai ne bang agi jembi, aser ne teka agi aji atalokdaktsü. 25 Tang anungji, Oh Kibuba, Israel Tsüngrem, kübu Dawid dang ne tenzükeri nangzüka ashi, ne chirtemi dang pei mapa nung temulungjang tanga arua aser nai jajaba ama parnoki kü tsüngdang jajara, Israel yimli nung kü jakdang amentsü ni shinga tamakok maludaktsütsü. 26Tang anungji, Oh Israel Tsüngrem, nai kübu Dawid ne tenzüker tsüngdang jembibaji atalokdakjang ta ni sarasademer.27 “Saka atangji Tsüngrem alima nung alitsü asü? Ajiang, anüng aser anüngma nung aliba osettemi na masemer, ni yangluba ki yabo toktsür! 28Saka ne tenzüker sarasadem, aser pai mepishiba nai angashi. Oh Kibuba, kü Tsüngrem, ne tsüngdang iba anogo nung ne tenzükeri ayimtenba aser sarasademba nai angang. 29 Ne tenük iba ki tsütsüleni aonung aser anogo shia rangloktsü, iba tsütsüleni meyiptsü ta nai ashiba ama,“Kü tenüng idakji alitsü,” ne tenzüker sarasademba tsütsüji meyipa sarasademtsü ta nai ashi. 30Kodang iba ki tsütsüleni shia ne tenzüker aser ne nübur Israel nungeri sarasademdir, nai angang; hau ne talidak kotak nungi nai angang, aser kodang nai angashidir, idangji tai tokang.31“Nisung kati pei kiyonger anema tai menara, aser pai azüangashidaktsütsü atakatem o toktsüra, aser pai arur ne temeshi tenla sabang nung ne kidang azüngashira, 32idangji nai kotak nungi angang aser inyakang, ne tenzüker tamajungba pei mapaji pei kolak nung abentsüsa, temeshi pur metenja pei temeshiba yari agütsütsü o bendangang.33“Parnoki na anema tai menaba yong, kodang ne nübur Israel nunger tsükchir tsüngdang tamakok aludir, parnoki ne dangi arur, ne tenüng nangzükra, aser iba kidang ne tenüng nung sarasademra, 34idangji nai kotak nungi angang, aser ne nübur Israel nunger dang tai tokang aser parnok tsürabur dang nai nangzükba limai tanaben parnok anir arung.35“Parnoki na anema tai menaba yong, kodang kotak kishi shia tzünglu marulir, parnoki iba tsütsüleni meyiper sarasademra, nai kangshi dang parnok temenen nungi meyipa ne tenüng nung parnoki nangzükra, 36idangji kotak nungi nai angang, ne tenzükertem, aser ne nübur Israel dang tai tokang, kechiaser parnoki jajatsü asoshi nai lenmang tajung sayur, aser nai parnok asoshi senmang agütsüba ne li jagi parnok dangi tzünglu yokang.37“Linük nungji ayawara lira, tekangshi timtem lira, temokong agi azüngtsü tera lara jangkok aser longpen lara, tsükchiri parnok pei yimtitem nung meketbangra, kechi warashira aser shilushira lidir, 38kechi sarasademsa aser shibaisa kodang asüngdangdir, mesüra ne nübur Israel ajaki pei mulungjang nung timtem meteta pei teka mekanger iba ki tsütsülen shir sarasademdir, 39idangji na alidak kotak nungi nai angang, aser tai tokang aser nai nisung shia mulungjang metet nungji, pei mapa yari nai nisung shia nem atajang. 40Anungji onok tetsü-teboutem nem nai agütsüba lima nung parnok alidang, parnoki mapang ajak nung ne dang tsübutsü.41“Ano ne nübur Israel masü, bendanger shiba ne tenüng nung linük talang nungi arudir, 42kechiyong parnoki ne tenüng tulu aser ne tashi tait teka aser ne teka songtoker ataba angashitsü pai iba ki tsütsüleni sarasadema arudang, ne talidak kotak nungi nai angang. 43Alima kin ajaki ne tenüng metettsü asoshi ne nübur Israeli na tsübuba ama na tsübutsü asoshi, aser iba ki koba ni yanglu, ya ne tenüng agi ajar ta metettsü asoshi bendangeri ajaba ama inyakang.44“Ne nüburi pei tsükchir anema raratsü ora koba lenmang agi nai parnok yoktsü, nai shimtetba ki tsütsülen shia parnoki ne dang sarasademer, aser ne tenüng asoshi ni koba ki yanglu, iba tsütsülen shia parnoki kodang sarasademdir 45idangji parnoki sarasademba aser mepishiba nai kotak nungi angang, aser parnok kümzükang.46“Parnoki na anema tai menara kechiyong tai memenar nisung shinga mali, aser nai parnok dang jashira, aser tsükchir lima talangi mesüra anai pur aotsüsa parnok pei tsükchir ket nung bendanga agütsüra, 47saka parnok pei tsükchir lima nung alidangji pei sasa bilemdanga ne tsütsüi meyipra, parnok tepuokdak lima nungji lia ne dang, onoki tai mena, aser aibelena inyak, onoki mejungi benshi ta mepishira, 48tsükchir lima, aser parnok tepuoker lima nung lia parnoki parnok mulung ajak agi aser parnok tanela ajak agi ne dangi meyipra, aser ne dang parnoki pei li tsütsü koba nai parnok tetsü-teboutem nem agütsü, aser koba nai shimtet, aser koba ne tenüng nung ni yanglu, ibaji repranga sarasademra, 49idangji parnoki sarasademba aser mepishiba nai kotak nungi angang aser parnok timi yuang. 50Ne nübur shiri tai mena parnok dang tai tokang, aser na anema parnoki kechi nung tai mena aji tokang aser shirnoki parnok pur ao parnok tsüngdang taochi sayuang. 51Kechiyong parnok ne nübur aser ne senmangertem, parnok nai Ijip lima timtem tekangshi nungi aniteta anir aru.52“Ne tenzükeri mepishiba aser ne nübur Israeli mepishia kodang parnoki ne dang ayimtendir, nai ne tenük lapokang aser angang. 53Kechiyong ne senmanger asütsü asoshi nai parnok alima kintem nungi piladaktsü, aser ne tenzüker Mosa teka ajanga nai jembi aser Oh Kibuba Tsüngrem, nai ozü tetsü-tebuotem Ijip lima nungi anir aru.”Solomon Temoatsü Sarasadem54Kodang Solomoni Kibuba dang sarasademba aser mepishiba tatem küma aru, temokok agi apudaka sarasademba aser anünglen teka mekanga sarasademba nungi aser Kibuba tekülemdak nungi pa aramesoa aru. 55Idangji ola tulu agi ayimokja adoka Israel nübur ajak pai noktaka moatsü. 56 Aser pai ashi, “Kibuba shibai pei tenzüker Mosa teka ajanga nangzük, pai nangzükba ka nung danga pai tamakok malu, aser pai nangzükba ama pei nübur Israel nem pai anisüngzük agütsü nung pa tenüng sangang. 57Kibuba Tsüngrem asen tetsü-teboutem den aliba ama asenok den liang, pai asenok tetoktsü mesüra asenok senzüka teyutsüma. 58Asen mulungsentsü pa tsütsüi meyiptsü, aser pa lenmang nung jajatsü, pai asen tetsü-teboutem dang melaba ayutsü aser telemtet ozüngtem ayutsü asoshi pai yariangma. 59Item o koba ni Kibuba tsüngdang mepishir, item anogo shia asen Tsüngrem Kibuba anasa liang, aser anogo shia nüngdakba ama, pei tenzüker aser nübur timi yuang. 60Anungji Kibubaji Tsüngrem aser pa mesükba shinga mali ta alima kintemi metettsü. 61Pa telatet ozüng nung jajatsü, aser pai melaba anogo shia yutettsü asoshi asen Kibuba Tsüngrem ama nenok temulung tabensa liang.”Tenla Ki Meshitetba(2 Pu. 7.4-10)62Chuba aser Israel nunger kwi pa den liasü, ajaki Kibuba dang tenla agütsü. 63Solomoni yimjung tenla Kibuba dang nashi pungchi meyi metsür ana, san aser nabong meyi metsü noklang ka tenla. Anungji chuba aser Israel chirtemi Kibuba ki meshitet. 64Iba anogo nungjisa chubai Kibuba ki jakdang aliba obendangdak kiji meshitet. Kechiyong idakji tarongba, chiyungba aser tejebketba yimjung tenla agütsü, kechiaser Kibuba ki jakdang aliba tenla dakji tarongba, chiyungba aser tejebketba tenla agütsütsü kanga tila liasü.65Anungji Solomoni iba mapang nungji benjong yanglua pa den Israel nunger telok tulu ajak Hamath nungi Ijip ayong tashi, aser Tsüngrem Kibuba jakdang anogo tenet benjong liasü. 66Aser tinübuba nung, pai telokji odaktsü, aser parnoki chubaji moatsü, aser Kibubai pa tenzüker Dawid aser Israel dang tajung inyakba asoshi pelashishia pei kidangi meyipa ao.1 CHUBATEM 9
Solomon Dangi Tsüngrem Tanaben Adokba(2 Pu. 7.11-22)1Kodang Solomoni Kibuba ki, aser chuba ki aser pai inyaknüa aliba ajak tema aru, 2 Kibubai Solomon tsüngdangi Gibeon nung adokba ama tanaben adok. 3Aser Kibubai pa dang ashi, “Kü tsüngdang nai mepishiba aser sarasademba ni angashiogo; kü tenüng teti alitsü asoshi ni nai yangluba ki meshitettsüogo. Aser kü tenük aser kü temulungjang teti tatem makai idakji alitsü. 4Aser nebu Dawidi jajaba ama nai kü tsüngdang temeshiba nung ochi mulungjang agi jajara, aser ni ne dang melaba ama inyakra, aser kü ozüngtem aser o bendangbatem yura, 5 ni nebu Dawid dang nangzükba ama, ne yimli Israel madak ni na teti chubadaktsütsü, aser shingai na Israel yimli madak tamakok maludaktsütsü. 6Saka nenoki aser nenok chirnuri ni nungi pilara, aser ni melaba aser kü ozüng meyura, aser pila or tangar tsüngremtem tenzüka parnok külemra, 7ni parnok nem agütsüba lima nungi Israel leptoktsü, aser iba ki koba kü tenüng asoshi ni meshitet, ni endoktsü, aser tangar kin tsüngdang Israel tansütsü kin ka alitsü. 8 Iba ki koba talang, süisübonger ajaki ngua süngmangtsü, aser parnoki süngmangtepa jembitsü, ‘Kechiba Kibubai iba li nung aser iba ki dak yamai inyak?’ 9Aser parnoki langzütsü, Kechiaser parnoki pei tetsü-teboutem Ijip lima nungi anir aruba Tsüngrem amadoker, tangar tsüngrem dak amanga külem aser tenzük; anungji Kibubai parnok dangi iba tai bener aru.”Solomoni Hiram Den Akangjungshitepba(2 Pu. 8.1-2)10Solomoni Kibuba aser chuba ki, anaji küm metsü tashi nung renem. 11Tair chuba Hirami Solomon nem cedar aser fir süng, aser pai aginüba ama hon agütsü nung Solomon chubai Hiram nem Galil lima nungi yimti metsü agütsü. 12Saka kodang Solomoni pa nem agütsüba yimtitemji reprangtsü asoshi Hirami Tair nungi aru, item dakji pai temulung mesüi liasü. 13Anungji pai ashi,“Kü adianu, nai kü nem agütsüba yimtitem ya kechi?” Aser pai iba linük dangji Kabul ta aja, aji oda tanü tashi ajar. 14Hirami Solomon nem hon seret touzük mori noklang ka metsü bener yok.Solomoni Inyakba Mapatem(2 Pu. 8.3-18)15Solomon chubai Kibuba aser par ki; Millo aser Yirusalem jara Hazar, Megiddo aser Gezer yanglutsü asoshi mapa inyakertem aniten. 16Ijip chuba Faraoi tua Gezer agi, aser aji rongtoktsür idakji alir Kanan nunger tepset aser aji pei jala, Solomon kinungtsü nem zük agütsü. 17Solomoni Gezer aser Beth-horon yanglushi. 18Lisem lima nung Baalath aser Tamar, 19chiyungtsü rizüngdak yimtitem, kor talungtsü, kor anishirtem asoshi oda pai Yirusalem aser Lebanon nung aser pa yimli ajak nung pai kechisa yanglunü item ajakji yanglu. 20Amor, Het, Periz, Hiv, aser Yebus shir Israel nunger masü, 21parnok chirtem shir Israel purtemi meshimeshia mesamatsütet parnokji tanü tashi Solomoni alar tia nung ayu. 22Saka Israel nunger rongnungbo Solomoni shinga alar tia nung meyutsü, saka parnok rarartem, par kilirtem, par chuba jabasotem, par walunirtem aser par kor temerangertem madak yimsüsür liasü.23Solomon mapa nung tongtipurtemji noklang pungu ser tenem liasü, mapa nung alirtem anishitsü parnok dak tashi liasü. 24Saka Farao jala Dawid yimti nungi adoker, la nem Solomoni yanglutsüba ki jagi aru, idangji pai Millo yanglu. 25 Küm nung asemben tashi Solomoni tarongba aser yimjung tenla Kibuba asoshi yangluba tenla sabang manung agüja aru, Kibuba tsüngdang aliba tenladak liangmesen ronga tenla. Yamaji pai kiji renem.26Edom li koba Temerem Tzüyim Eloth anasa lir, idakji Eziongeber nung Solomon chubai rong yanglu. 27Hirami pei kilirtem, rong anishirtem shirnoki tzüyim meteta liasü, parnokji Solomoner kilirtem den yok. 28Aser parnoki Ofiri arua hon touzük mori noklang pezü ser metsü idak nungjagi Solomon dangi bener aru.1 CHUBATEM 9
Solomon Dangi Tsüngrem Tanaben Adokba(2 Pu. 7.11-22)1Kodang Solomoni Kibuba ki, aser chuba ki aser pai inyaknüa aliba ajak tema aru, 2 Kibubai Solomon tsüngdangi Gibeon nung adokba ama tanaben adok. 3Aser Kibubai pa dang ashi, “Kü tsüngdang nai mepishiba aser sarasademba ni angashiogo; kü tenüng teti alitsü asoshi ni nai yangluba ki meshitettsüogo. Aser kü tenük aser kü temulungjang teti tatem makai idakji alitsü. 4Aser nebu Dawidi jajaba ama nai kü tsüngdang temeshiba nung ochi mulungjang agi jajara, aser ni ne dang melaba ama inyakra, aser kü ozüngtem aser o bendangbatem yura, 5 ni nebu Dawid dang nangzükba ama, ne yimli Israel madak ni na teti chubadaktsütsü, aser shingai na Israel yimli madak tamakok maludaktsütsü. 6Saka nenoki aser nenok chirnuri ni nungi pilara, aser ni melaba aser kü ozüng meyura, aser pila or tangar tsüngremtem tenzüka parnok külemra, 7ni parnok nem agütsüba lima nungi Israel leptoktsü, aser iba ki koba kü tenüng asoshi ni meshitet, ni endoktsü, aser tangar kin tsüngdang Israel tansütsü kin ka alitsü. 8 Iba ki koba talang, süisübonger ajaki ngua süngmangtsü, aser parnoki süngmangtepa jembitsü, ‘Kechiba Kibubai iba li nung aser iba ki dak yamai inyak?’ 9Aser parnoki langzütsü, Kechiaser parnoki pei tetsü-teboutem Ijip lima nungi anir aruba Tsüngrem amadoker, tangar tsüngrem dak amanga külem aser tenzük; anungji Kibubai parnok dangi iba tai bener aru.”Solomoni Hiram Den Akangjungshitepba(2 Pu. 8.1-2)10Solomoni Kibuba aser chuba ki, anaji küm metsü tashi nung renem. 11Tair chuba Hirami Solomon nem cedar aser fir süng, aser pai aginüba ama hon agütsü nung Solomon chubai Hiram nem Galil lima nungi yimti metsü agütsü. 12Saka kodang Solomoni pa nem agütsüba yimtitemji reprangtsü asoshi Hirami Tair nungi aru, item dakji pai temulung mesüi liasü. 13Anungji pai ashi,“Kü adianu, nai kü nem agütsüba yimtitem ya kechi?” Aser pai iba linük dangji Kabul ta aja, aji oda tanü tashi ajar. 14Hirami Solomon nem hon seret touzük mori noklang ka metsü bener yok.Solomoni Inyakba Mapatem(2 Pu. 8.3-18)15Solomon chubai Kibuba aser par ki; Millo aser Yirusalem jara Hazar, Megiddo aser Gezer yanglutsü asoshi mapa inyakertem aniten. 16Ijip chuba Faraoi tua Gezer agi, aser aji rongtoktsür idakji alir Kanan nunger tepset aser aji pei jala, Solomon kinungtsü nem zük agütsü. 17Solomoni Gezer aser Beth-horon yanglushi. 18Lisem lima nung Baalath aser Tamar, 19chiyungtsü rizüngdak yimtitem, kor talungtsü, kor anishirtem asoshi oda pai Yirusalem aser Lebanon nung aser pa yimli ajak nung pai kechisa yanglunü item ajakji yanglu. 20Amor, Het, Periz, Hiv, aser Yebus shir Israel nunger masü, 21parnok chirtem shir Israel purtemi meshimeshia mesamatsütet parnokji tanü tashi Solomoni alar tia nung ayu. 22Saka Israel nunger rongnungbo Solomoni shinga alar tia nung meyutsü, saka parnok rarartem, par kilirtem, par chuba jabasotem, par walunirtem aser par kor temerangertem madak yimsüsür liasü.23Solomon mapa nung tongtipurtemji noklang pungu ser tenem liasü, mapa nung alirtem anishitsü parnok dak tashi liasü. 24Saka Farao jala Dawid yimti nungi adoker, la nem Solomoni yanglutsüba ki jagi aru, idangji pai Millo yanglu. 25 Küm nung asemben tashi Solomoni tarongba aser yimjung tenla Kibuba asoshi yangluba tenla sabang manung agüja aru, Kibuba tsüngdang aliba tenladak liangmesen ronga tenla. Yamaji pai kiji renem.26Edom li koba Temerem Tzüyim Eloth anasa lir, idakji Eziongeber nung Solomon chubai rong yanglu. 27Hirami pei kilirtem, rong anishirtem shirnoki tzüyim meteta liasü, parnokji Solomoner kilirtem den yok. 28Aser parnoki Ofiri arua hon touzük mori noklang pezü ser metsü idak nungjagi Solomon dangi bener aru.1 CHUBATEM 11
Solomon Tsüngrem Nungi Pilaba1 Solomon chubai bendangtsür aika, Farao jala dena, Moab, Amon, Edom, Sidon aser Het-tsürtem meim, 2 saka item kintsür asoshi Kibubai Israel nunger dang ashi, “Nenoki parnok den kibalembu masütsüla, aji oda süra nenok mulungjang par tsüngrem dangi anitsü.” Saka Solomoni parnok kanga meimadok. 3Pa kinungtsü aser chubatsür noklang tenet liasü, aser tezüngatsü noklang asem liasü, aser pa kinungtsütemi pa mulungjang mashileni odaktsü. 4Kechiyong kodang Solomon tain aküm, pei kinungtsütemi pa mulung parnok tsüngremtem dangi ani aser pa mulung tebu Dawid ama mesüi pai Kibuba Tsüngrem nungi pila-a oadok. 5Kechiyong Solomoni Sidon tsüngrem Ashtoreth aser Ammon tesempatsü Molek tsütsüi meyip. 6Solomoni Kibuba tsüngdang kechi majung aji benshia tebui inyakba ama mesüi, pai Kibuba nungi pila. 7Ajiser Solomoni Moab nunger tesempatsü Khemosh aser Ammon chirtem tesempatsü Molek asoshi Yirusalem anasa aliba tenem nung tekülemdak yanglu. 8Yamaji pei bendanger kinungtsür ajak shiri liangmesen ronga parnok tsüngremtem dang tenla parnok asoshi pai inyak.9 Kibubai Solomon dang kanga jashi, kechiaser Israel Tsüngrem Kibuba shiba pa tsüngdangi anaben adok, pa nungi pa mulung pila. 10Iba atema pa dang tangar tsüngrem dangi maotsüla ta ashi; saka Kibubai kechi mela aji pai meinyak. 11Anungji Kibubai Solomon dang ashi, “Nai yamai inyak nung aser nai kü den tezüngzüktepba aser kü telatet ozüngtem koba ni ne dang mela aji mayu nung ne yimliji atangji ni raksatsütsü aser ne tenzüker ka nem aji ni agütsütsü. 12Saka nebu Dawid tenüng tajung atema ne mapang nung ni aji meinyaktsü, saka ne chir mapang nung ni aji raksatsütsü. 13Saka ano ni yimli ajakji meraksatsütsü, kü tenzüker Dawid asoshi, aser Yirusalem koba ni shimtet iba atema, ne chir nem ni kin ka agütsütsü.”Solomon Tsükchirtem14 Kibubai Edom nunger Hadad Solomon anema tsükchir kümdaktsü, pa Edom nung chuba senmanger liasü. 15Kechiyong kodang Dawid Edom nung liasü, temeranger tanishiba Yoab rara nung tepsetertem aremtsü tur liasü, aser Edom nung tebur ajak tepset. 16Kechiyong Edom nung tebur ajak metepsetma tashi Yoab aser Israel ajak idakji ita trok liasü. 17Hadad den tebu kilirtem Edom nunger kar parnoki Ijipi jena ao; idangji Hadad tila tanur ka dang liasü. 18Parnoki Midian nungi apusoa Parani aru, aser pai Paran nungi nisung anir parnoki Ijip limai Ijip chuba Farao dangi aru nung pa nem ki ka aser chiyungtsü den ano pa nem alia agütsü. 19Farao chuba nungi Hadadi taochi tulu angu nung pai kinungtsü Tafenes tenu, pa kinungtsü asütsü agütsü. 20Tafenes tenui pa nem jabaso ka Genubath sotsü aser pa Farao chuba kidangi Tafenesi yok, yamaji Farao kidang par chirtem rongnung Genubath liasü.21Kodang Ijip nung Hadadi Dawid pei tetsü-teboutem den mejangogo ta angashi, aser temeranger tanishiba Yoab süogo ta angashi, Hadadi Farao dang, “Ni or kü nübur indang bilemtsü yokang,” ta ashi.22Idangji Faraoi pa dang ashi, “Saka kechi agi nai kü dang temulung machir aser ajiang, kechiba nai ne limai onür!” Pai langzü, “Masü, aji saka ni odang odakjang.”23Eliada chir Rezon shiba pei Kibuba Zoba chuba Hadadezer nungi ajen, Tsüngremi pa anema tsükchir adokdaktsü. 24Aser pai temeranger telok ka madak tir kümer, aser pei nübur pa dangi aniten, aser kodang Dawidi parnok tepset, parnok Damaskai oa idakji lia Damaska nung chuba aküm. 25Solomon yimsüsüba tepiyong Hadadi tamajung inyakba atema pa Israel tsükchir aküm aser pai Israel sempa aser Siria madak chuba.Yeroboam Dang Tsüngrem Tenangzükba26Nebat chir Yeroboam, Zereda li Efraim nunger Solomon tenzüker ka, shiba tetsü amitsür ka tenüng agi Zerua liasü, paia pei teka chuba anema mekang.27Pai pei teka chuba anema mekangbaji ya liasü: Solomoni Millo yanglu, aser pei tebu Dawid yimti teraksa yanglushi. 28Yeroboamji tasü tait nisung ka liasü, aser Solomoni iba asangur nisungji kanga dang teinyak ta ajitet, aser Yosef kidong nung mapa ajakji pa nem bendanga agütsü.29Iba mapang nung, kodang Yeroboam Yirusalem nungi ao, Shilon nunger Ahija ainkari pa lenmang nung angu; tang Ahija pei sasa sobutsü tasen sobua liasü; aser tena dang moapu nungji liasü. 30Ahijai sü tasen koba sobua liasü aji agizüker terana küma shisa. 31Pai Yeroboam dang ashi, “Nai shilem ter agiang, kechiaser Israel Tsüngrem Kibubai ashir, ‘Ajiang, ni Solomon ket nungi yimliji rakzüktsü aser ne nem kidong ter agütsütsü.’ 32Saka kü tenzüker Dawid tenüng atema aser Yirusalem tenüng atema Israel kidong ajak nungi shimtetba yimtiji kidong ka ni agitsü. 33Kechiaser parnoki nia amadok, aser Sidon nunger tsüngrem Ashtoreth, Moab nunger tsüngrem Khemosh, aser Ammon chirtem tsüngrem Milkom dang kechi tim lir aji meinyaki aser kü ozüngtem aser kü obendangbatem meyui aser pei tebu Dawid ama mesüi parnoki kü lenmang nung mejaja. 34Yamaji saka yimli ajakjibo ni pa nungi magientsü, saka kü tenzüker Dawid, shibai kü temelaba aser kü telatet ozüng benshi, pa atema, ni pa taküm tepiyong chuba kümdaktsütsü. 35Saka par chir nungi ni yimliji agientsü, aser ni ne nem kidong terji agütsütsü. 36Aser Dawidi Yirusalem nung kü jakdang milen ka ayutsü asoshi, koba ni kü nüng atema idakji ayutsü shimtet, par chir nem ni kidong ka agütsütsü. 37Ni na agitsü, aser ne tanela ajak agi aginüba ama nai Israel ajak madak chubatsü. 38Ni melaba nung nai tashi angara, aser kü nükdang kechi tim aji inyaka, kü lenmang nung jajara, aser kü tenzüker Dawidi ama, kü ozüngtem aser ni melabatem yura, ni ne den alitsü, aser ni Dawid asoshi yanglutsüba ama, ni na atema ki shitak yanglutsütsü aser ne nem Israel agütsütsü. 39Iba asoshi ni Dawid metsü merenshitsü, saka teti asoshibo masü.’ ”40Anungji Solomoni Yeroboam tepsettsü bushi, saka Yeroboam aramesoa Ijip chuba Shishak dangi jena oa; aser Solomon masü tashi Ijip nungji liasü.Solomon Asüba(2 Pu. 9.29-31)41Tang Solomon mapa tanüngba, pai inyakba ajak, aser pa shisatsü ajakji Solomon mapatem kaket nung zülua melika ma? 42Solomoni Israel ajak madak Yirusalem nung chubabaji küm lir liasü. 43Aser Solomon tsüraburtem den mejang, aser tebu Dawid yimti nung pa arem aser par chir Rehoboami pa melena chuba.1 CHUBATEM 12
Shekem Nung Mungdang(2 Pu. 10.1-19)1Rehoboam Shekemi ao, kechiaser Israel ajak Shekem nung pa chuba kümdaktsütsü atema arua liasü. 2Kodang Nebat chir Yeroboami aji angashi, idangji pa Solomon nungi jena oa Ijip nung aliba, pai Ijip nungi meyipa shilang. 3Anungji parnoki Yeroboam tajai yok, aser pa den Israel ajak Rehoboam dangi oa pa dang ashi, 4“Nebui onok nem süngra taret agütsüogo aser mapa tasak inyakdaktsüogo. Saka nai iba khuret taretji pungbadaktsüdi süra, onoki na tenzükdi.” 5Pai parnok dang langzü, “Anogo asem asoshi pila-ang aser tanaben kü dangi arung,” aser nisungtemji meyipa ao.6Rehoboam chubai tamburtem den shisa bushia jembitep, item tamburtemji tebu Solomon taküm alidang tenzükertem liasü; “Item telok dang langzütsü asoshi kechi shisa agütsütsü” ta pai asüngdang. 7Parnoki pa dang ashi, “Nai tanü item nisung tenzüker ka ama nai parnok tenzükra, aser parnok dang langzüa o tajung jembira, parnokji teti asoshi ne tenzükertem asütsü.”8Saka tamburtemi pa dang kechi ashi aji pai sendokadoker asangurtem shirnok pa den külemi ain, aser shir pa tsüngdang noktak, parnok nungiang pai tasa agi. 9Pai parnok dang ashi, “Shiri kü dang nebui benloktsüba khu pungba-a kümdakjang ta ashi, parnok dang langzütsü asoshi nenokia kechi tasa kü nem agütsütsü?”10Asangurtem shir pa den külemi ain parnoki pa dang yamai ashi, “Ne dang shirnoki asüngdang nai parnok dang yamai shiang, Nebui onok khu taret kümdaktsü saka nai pungba-a kümdakjang ta ashirtem dangji, ‘Kü temeyong tilaba ya kübu teperem dang nungia temelemba. 11Tang kübui nenok khu reta kümdaktsü süra idakji ni tali enloktsütsü, aser kübui nenok dak tazüktsü agi merenshia lira ni nenok dak jebja agi merenshitsü.’ ”12Chubai ashiba ama anogo asemnübuba nung Yeroboam aser Israel ajak Rehoboam dangi aru. 13Pai tamburtemi pa dang ashiba sendokadok nungji nisungtem dang kanga mejungi langzü, 14aser asangurtem tasa agütsüba ama pai langzüa ashi, “Kübui nenok khu taret yanglutsü süra, idakji ni ano enloktsütsü, aser kübui nenok dak tazükba agi azük süra, ni nenok dak jebja agi merenshitsü.” 15Anungji yamaji chubai nisungtem dang manga, kechiyong aji Kibubai pa o atalokdaktsütsü asoshi Kibubai Shilon nunger Ahija agi Nebat chir Yeroboam den jembir liasü.16 Kodang Israel nungeri parnok dang chubai mangar ta meteta aküm, parnoki chuba dang ashi,“Dawid den onok kechi shilem aka!Yesse chir den onok senmang maka;Oh Israel, tang nenok pei ki sükitem bushia meyipang,Oh Dawid nenok sasa pei ki ajiang.Anungji Israel puri pei süki-i meyip.”17Saka Yihuda yimtitem nung alir Israel chirtem atemabo, parnok madak Rehoboami chuba.18Idangji Rehoboam chubai Adoniram shiba mapa tanishir liasü pa yok nung Israel ajaki pa dak lung agi aon aser pa asü. Aser Rehoboam chuba pei kor talungtsü nung yakta tua mener Yirusalemi jena ao. 19Anungji Israeli tanü tashi Dawid kidong anema noktaker. 20Kodang Israel nungeri Yeroboam meyipa aruogo ta angashi, parnoki pa dangi telok aja, aser Israel ajak madak pa chuba kümdaktsü aser Dawid kidong tsütsüi meyiper Yihuda kidong dak alema shinga mali asü.Shemia Shin O(2 Pu. 11.1-4)21Kodang Rehoboam Yirusalem tonga aru, pai Yihuda aser Benjamin kidong ajak nungi teshimtet pur rarartem meyi noklang ka ser tir Israel kidong anema raratsü aser Solomon chir Rehoboam dangi tanaben yimliji meyipa bener arutsü sentepdaktsü. 22Saka Tsüngrem nisung Shemia dangi Tsüngrem O arua ashi, 23“Yihuda chuba, Solomon chir Rehoboam dang, aser Yihuda aser Benjamin kidong ajak dang aser tanüngba nisungtem dang yamai shiang. 24Kibubai yamai ashir, nenoki matutsüla mesüra Israel pur ne adianutem anema meraratsüla, aser nisung shia pei kidangi meyipang; kechiaser aji ni nungi lir.” Anungji Kibuba O ama pa o anga-a nisung shia pei kidangi meyipa ao.Yeroboam Tsüngrem nungi Pilaba25Ajiser Efraim tenem lima nung Yeroboami Shekem yanglushi aser idakji ali, aser pai idak nungjagi apusoa or, Penuel yanglu. 26Yeroboami pei mulung nung ashi, “Dawid kidong dangi yimliji tang meyipa arudi ma? 27Yirusalem nung Kibuba kidang iba nüburtemi tenla tenlatsü tura, idangji iba nübur mulungjang parnok kibur, Yihuda chuba Rehoboam dangi meyiptsü, aser ni tepsettsü aser Yihuda chuba Rehoboam dangi meyiptsü.”28 Idangji chubai shisatsü agir hon agi nashi pungchi ana yanglu, aser pai parnok dang ashi, “Nenok asoshi Yirusalemi atutsüji kanga dang tasak, nenok Ijip lima nungi anir atuba tsüngremtem ajiang, Oh Israel!” 29Pai ka Bethel nung aser kaji Dan nung yutsü. 30Iba mapa ya temenen ka kümadok, kechiaser nisungtemi kajia külemtsü asoshi Dan tonga ao. 31Pai tenem tekülemdak yanglu, aser nisungtem rongnungi pai putirtem shimtet, saka parnokji Levi chirtem masü.32 Yeroboami ita tibuba terpungunübuba nung benjong ka Yihuda nung aliba mesüka adokdaktsü, aser pai Bethel nung inyakba ama tenla sabangi tua, pai yangluba nashi pungchitem nem tenla agütsü, aser pai putirtemji Bethel nung yutsü. 33Ita tibuba anogo terpungububa pai Bethel nung tenladak koba yanglu ajagi atu, ibaji pai pei mulung nung bilema aliba itaji liasü; aser pai Israel chirtem asoshi benjong ka yanglua tarongba tenla agütsütsü asoshi pai tenladaki atu.1 CHUBATEM 13
Bethel Tenladak Aitsüba1Tang Yeroboam tenladak anasa noktaker tarongba tenla agütsütsü mapang nung Yihuda nungi Tsüngrem nisung ka Kibuba O ajanga Betheli aru. 2 Aser Kibuba O agi tenladak anema pai ayimtena ashi, “Oh tenladak, tenladak, Kibubai yamai ashir, ‘Ajiang, Yosia tenüng agi Dawid kidong nungi tanur ka asotsü, aser tenem tekülemdak putirtem shirnoki ne madak tarongba tenla aronger parnok ne madak tenlatsü aser nisungtem teret ne madak arongtsü.’ ” 3Aser pai iba anogo nungjisa temaitsü ka agüja ashi, “Kibubai jembiba temaitsüji ajiang, tenladakji raksatsü, aser iba manung aliba autji endoktsü.” 4Kodang chubai Bethel nung tenladak anema Tsüngrem nisungi jembibaji angashi Yeroboami pei teka tenladak nungi songtoka ashi, “Pa puang.” Saka teka koba pai pa anema songtok aji ashirepadok, aser pei tekaji tanaben pei dangi atsüa arutsü mokoki aküm. 5Aser Kibuba O agi Tsüngrem nisungi jembiba ama, tenladak raksa, aser tenladak nungi aut adok. 6Idangji chubai Tsüngrem nisung dang ashi, “Kü teka junga anebtsü asoshi ne Tsüngrem dang nai ni asoshi mepishijang.” Yamaji Tsüngrem nisungi Kibuba dang mepishitsü, aser chuba teka akhi ama tanaben anebadok. 7Idangji chubai Tsüngrem nisung dangji ashi, “Kü den kidangi arua anisüngzükang aser ni ne nem sempet ka agütsütsü.”8Saka Tsüngrem nisungi chuba dang ashi, “Nai ne ki tesadang ka kü nem agüjaka, ni ne den maotsü, mesüra ni iba linük nung machitsü aser majemtsü; 9kechiaser Kibuba O agi kü dang yamai ashi, Nai amtsük machitsü mesüra tzü majemtsüla mesüra koba lenmangi na aru iba jagi na meyipa marutsüla.” 10Anungji pai pa aruba lenmang jagi meyipa moi tanga lenmang kati meyipa ao.Bethel Nung Tambur Ainkar11Tang Bethel nung ainkar tambur ka liasü, aser par chir ka arua Bethel nung iba anogo nung Tsüngrem nisungi kechi inyak ajak ashi, pai kechisa chuba dang ashi, tebu danga item ajakji ashi. 12Tebui parnok dang asüngdang, “Pa koleni ao?” Tang pei chirtemi Yihuda nungi aruba Tsüngrem nisungji kongi ao aji ngua liasü. 13Pai pei chirtem dang ashi, “Ni asoshi gado ka renemjang” aser parnoki pa asoshi gadoji renemtsü aser pai idakji amen. 14Pai Tsüngrem nisung sülen anitaka pai pa sülemdong züng ka nung mena angu. “Na Yihuda nungi aruba Tsüngrem nisungji asü” ta asüngdang. 15Pai “Nia” ta langzü; idangji pai pa dang ashi, “Kü den kidangi arung aser chiyungang.”16Pai ashi, “Ni ne den meyipa marutsü mesüra maotsü mesüra ni mechiyungtsü mesüra iba li nungi ni ne den tzüa majemtsü kechiaser Kibuba O agi aji kü dang shiogo. 17Nai mechiyungtsü mesüra idakji tzüa majemtsü, mesüra na kolen nungi aru aji agi meyipa maotsüla.”18Ainkar tambur jagi pa dang ashi, “Nia na amaji ainkar ka lir, aser kotak tenyar kati Kibuba O agi pa chiyunga ajemtsü asoshi anir arung ta ashi:” Saka aji pai pa ashiokja jembiba liasü.19Anungji pai anidaka oa par kidang chia-ajem. 20Parnok chiyungba langbang nung amendang pa meyipa anir arusang ainkar dangi Tsüngrem O aru. 21Aser Yihuda nungi aruba Tsüngrem nisung dang yamai ashi, “Kibuba bang nungi adoka ashiba nung nai tashi manga nungji, aser nai ne dang melaba Kibuba ozüng mayu nung, 22saka meyipa arua chiyunga ajem, koba Kibubai techiyung aser tejem ta ashiba manga nungji ne temang ner tsürabur aremdak leperi meyipa maotsü.”23Kodang pai chia-ajem pai meyipa anir arusang ainkarji mendaktsütsü asoshi pai gado renemtsü. 24Kodang pa ao, lenmang nung molusongzü ka ajurua pa tepset aser pa temang lenmang nung merepdok aser gadoji pa anasa noktaka liasü, aser molusongzüji tasü mang anasa noktaka liasü. 25Ajiang, nisung kar süia ao aser tasü mang lenmang nung merepdaka angu aser molusongzü idakji noktaka liasü, aser parnoki arua ainkar tambusang dang aji ashi.26Kodang ainkari aji angashi, pai ashi, “Kibubai ashiba tashi mangaba Tsüngrem nisungji pa lir, aji asünung Kibubai pa molusongzü nem bendanga agütsü, aser Kibuba O agi pa dang ashiba ama pa tepseta molusongzüi shisatsüogo.” 27Pai pei chirtem dang ashi, “Ni asoshi gado renemjang;” aser parnoki aji renemtsü. 28Pa aodang lenmang nung tasü mang merepdaka angu, aser gado o molusongzü na tasü mang anasaji noktaka liasü, molusongzüi tasü mangji machi mesüra gadoa meyirutsü. 29Ainkari Tsüngrem nisung tasü mangji bena arua gado nem bendaktsür yimti-i bener arua mang yima pa arem. 30Pai tasü mangji pei leper nung ayu, aser parnoki pa asoshi mang yima ashi, “Aia, kü adianu” 31Pa remer külen pai pei chirtem dang ashi, “Kodang ni südir Tsüngrem nisung aremdak leper nungji nia remang, pa teret anasa kü teret yuang. 32Kechiaser Bethel nung tenladak anema, aser Samaria yimtitem nung kidong ajak anema koba pai Kibuba O agi ayimten ajak shitak atalokogo.”33Iba sülenjia Yeroboami pei temenen lenmang nungi memeyip, saka tanaben ano nisungtem rong nungi putirtem shim, aser shibaisa mulungtet, pai parnok meshitetja putirtem yamaji shim, 34Yeroboam kidong asoshi ibaji temenen aküm, oda par kidongji meshimeshia alima ajak nungi meleptoktsü tashi samatsü.1 CHUBATEM 14
Yeroboam Chir Asüba (931-910)1Iba mapang nung Yeroboam jabaso Abija shiranga aküm. 2Aser Yeroboami pei kinungtsü dang ashi, “Aramesoang, aser Yeroboam kinungtsüa ta memetetdaktsütsüsa yimlibilema ne sasa sobuang, aser Shiloi oang. Aser ajiang, idakji ainkar Ahija shibai ni item madak chuba asütsü ta jembi pa dangi oang, 3Aser nai amtsük ter den amsang tera den ninang mojitzü meso ka bener pa dangi oang aser pai ne dang tanurji kechi akümtsü aji ashitsü.”4Yeroboam kinungtsüi yamaji inyak aser aramesoa Shiloi Ahija kidangi aru. Tang Ahija tenük agi mangu, kechiaser pa tambur liasü. 5Aser Kibubai Ahija dang ashi, “Ajiang, Yeroboam kinungtsü lar jabaso indang asüngdangtsü arur, kechiaser pa shiranga lir; yamai la dang shiang, kechiaser la arudang lai tangar tetsür ama arutsü.”6Kodang Ahijai la kishizüng anasai aruba tsüngken angashia ashi, “Aitang, na Yeroboam kinungtsü, kechiba nai tangar tetsür ama sayur! Kechiaser na asoshi osang tamajung kü dang metetdaktsüogo. 7Israel Tsüngrem Kibubai yamai ashir ta Yeroboam dangi or shiang, ni na ne nübur rongnung uludaktsü, aser pei nübur Israel madak chuba kümdaktsü, 8aser Dawid kidong nungi yimliji rakzüka ne nem agütsü; saka kü tenzüker Dawid shibai kü ozüngtem ayu, aser shibai pei mulung ajak agi ni ashiba sülen anidak aser kü nükdang ajungba dang inyak, pa ama na masü; 9saka nai ne jakdang alir ajak dak alia tamajung inyak, aser ni nungi pila-a or tangar süngyanglu tsüngremtem yanglu, aser ni jashidakja ne sülen ni toktsü. 10 Anungji ajiang, ni Yeroboam kidong anema tamajung bener arutsü, aser Yeroboam nungi tebur chanu ajak leptoktsü; shiba shibanga ali aser Israel nung ali ajak yamaji ki aokertemi scü ama Yeroboam kidong nungi meshimeshia ajak mesama tashi okdoktsü. 11Yeroboam kinunger shiba yimti nung südir azütemi achitsü aser shiba moapu nung südir, anüng ozütemi achitsü, kechiaser Kibubai yamaji jembiogo.12“Anungji na aramesoang aser ner kidangi oang, aser kodang na ner yimti-i idir, ne chir asütsü. 13Israel nunger ajaki pa asoshi mang ayimtsü, aser aremtsü, kechiaser Yeroboam kidong dak Kibuba Israel Tsüngremi pa tsütsü tajung tera angu anungji pa dang leperi aotsü. 14Ano Kibubai Yeroboam kidong iba anogo nungji leptoktsü asoshi Israel madak chuba ka adokdaktsütsü. Aser kechi? tanga aji takoktsü. 15Kechiaser tzü nung kümbok arakzüba ama Kibubai Israel anokzüdaktsütsü aser iba ali tajung koba tetsü-teboutem nem agütsüba lima nungi Israel tera den meküpdoktsü aser parnok Eufrata külenji prokshitsü, kechiaser parnoki Kibuba ain adokdakja tekülemdak yanglu. 16Pai Yeroboam tai asoshi Israel jentoktsü kechiaser koba tai pai mena, iba taiji Israel nema menadaktsü.”Yeroboam Asüba17Anungji Yeroboam kinungtsü aramesoa Tirzai aru, aser la ki anasa arudang tanurji süadok. 18Kibuba O agi pa tenzüker Ahija ainkar ajanga jembiba ama Israel nunger ajaki pa arem, aser pa asoshi mang ayim.19Yeroboam mapa tanüngba, koda pai rara aser chuba, aji Israel nunger chubatem putipuyang kaket nung zülua lir. 20Yeroboami chubaba küm metsürana liasü, aser pa tebutem den mejang, aser pa chir Nadabi pa melen chuba.Yihuda Chuba Rehoboam (931-913)(2 Pu. 15.12-13)21Solomon chir Rehoboami Yihuda nung chuba. Rehoboam chuba akümdang, pa küm lirka liasü, aser pai küm tertenet Kibubai Israel kin ajak asoshi shimtetba Yirusalem nung pei tenüng ayutsü asoshi chuba, aser tetsü tenüng Ammontsür Naama liasü.22 Kibuba tsüngdang kechi tamajung aji Yihudai inyak, aser parnok tebutemi inyakba dak alia pei temenen agi Kibuba jashidakja tai mena. 23 Kechiaser parnoki tenem aser süngdongzüng shia nung tokong külemdak aser tongshi aser Ashera tekülemdak yanglu. 24Idakji tebur o tebur na jabujari temenen liasü. Kibubai Israel chirtem nungi agienba kintem tesempatsü temenen ajak parnoki benshi.25Rehoboam chuba küm pungububa nung Ijip chuba Shishaki Yirusalem anema raratsü atu; 26 aser Kibuba ki rongsen aser chuba kidang aliba rongsen ajak bener ao, aser Solomoni hon agi yangluba jong ajak pai bener ao. 27Anungji Rehoboam chubai item melen yongmenyin agi jong yanglu, aser chuba temeranger kishi nüker tanishirtem ket nung bendanga agütsü. 28Kodangsa chuba Kibuba kidangi ao temerangertemi itemji aben aser tanükdak ayu.29Rehoboam mapa tanüngba indang aser pai inyakba ajak, Yihuda chubatem putipuyang kaket nung itemji zülua melika ma? 30Aser maneni Rehoboam o Yeroboam na tsüngda nung rara liasü. 31Rehoboam pei tetsü-teboutem den mejang aser Dawid yimti nung pei tebutem den arem. Pa tetsü tenüng Ammontsür Naama liasü, aser pa melen par chir Abijami chuba.1 CHUBATEM 15
Yihuda Chuba Abijam (913-911)(2 Pu. 13.1—14.1)1Tang Nebat chir Yeroboam küm tertibuba nung Abijami Yihuda madak chubatsü tenzük. 2Pai Yirusalem nung küm asem chuba, aser pa tetsü tenüng Absalom jala tenüng Makaa liasü. 3Aser tebui akhidang inyakba temenen nung pai jaja, aser tebou Dawid ama mesüi Kibuba pei Tsüngrem tsüngdang pei mulungjang tetemsü mali asü. 4 Saka Dawid tenüng atema Kibuba pa Tsüngremi pa sülen pei chir noktaktsü atema pa nem Yirusalem yanglutsü asoshi milen ka agütsü. 5 Kechiaser Dawidi Kibuba tsüngdang kechi tim aji inyak, aser pa dang kechisa inyaktsü pa taküm piyong mela, oda Het nunger Uria dang inyakba dak alema pai ajak inyak. 6Abijam taküm piyong Rehoboam o Yeroboam na tsüngda rara liasü. 7Ahijam mapa ajak aser pai inyakba Yihuda nunger chubatem putipuyang kaket nung zülua melika ma?8Abijam tebutem den mejang aser Dawid yimti nung parnoki pa arem, aser pa melen pa chir Asai chuba.Yihuda Chuba Asa (911-870)(2 Pu. 15.16—16.6)9Israel nunger Yeroboam chuba küm metsübuba nung Yihuda madak Asai chubatsü tenzük. 10Yirusalem nung pai küm lirka chuba, aser pa tetsü tenüng Absalom jala tenüng Makaa liasü. 11Tebu Dawidi inyakba ama Kibuba tsüngdang kechi tim aji pai inyak. 12Aser pai tebur o teburna jabujari mapa endokdaktsü aser tsüraburtemi yangluba süngyanglu ajak pai endok. 13Ano tetsü Maka chubatsür süa aliba nungi pai anendaktsü kechiaser lai Ashera asoshi tesempatsü süngyanglu ka yanglu, aser Asai iba süngyangluji lepsatsü, aser Kidron lenten nung aji arong. 14Tenem tekülemdakji pai magienaka; aji saka Asa mulungsentsü pa taküm ajak nung Kibuba den ochishia liasü. 15Pai Kibuba kidangi pa tebui meshiteta ayuba oset ajak bener aru, aser pai meshitetba oset yongmenyin, aser hon maroktem Kibuba ki dangi bener aru.16Asa aser Israel nunger chuba Baasha na tsüngda nung parnok taküm piyong rara liasü. 17Israel chuba Baashai Yihuda anema atu, aser Yihuda chuba Asa dangi shinga oli aruli ta mesüdaktsütsü atema pai Rama yanglu. 18Asai Kibuba kidang oset ayudak aliba hon aser taribi ajak agi, aser chuba kidang aliba oset ajak agia itemji pei tenzükertem nem agütsü, aser Asa chubai Damaska nung aliba Siria chuba Hezron chir Tabrimmon, par jabaso Ben-hadad dangi yoka ashi, 19“Kübu aser nebu na tsüngda nung yimjung aliba ama ana tsüngda nunga yudi. Ni ne dangi hon taribi sempet yokdagi. Israel chuba Baashai ni nungi atsünga aotsüsa: oang, pa den yimjungji raksa-ang.”20Ben-hadadi Asa chuba dang anga, aser Israel yimtitem anema pa temeranger telok tanishirtem yoka, Ijon, Dan, Abel-beth-Maka aser Khinnerota ajak, aser Naftali ajak amak. 21Kodang Baashai aji angashi, pai Rama nung ki yangluba anen, aser Tirza nung ali.22Idangji Asa chubai Yihuda lima ajak nung osang prokshi, shinga anünga metoktsü; aser parnoki Rama nung aliba lung, aser süng koba agi Baashai yanglu item ajak bener ao, aser Asa chubai Benjamin nung Geba aser Mizpa yanglu. 23Tang Asai inyakba mapa ajak, pa tashi ajak aser pai inyakba ajak aser pai yangluba yimti ajak, Yihuda nunger chubatem putipuyang kaket nung zülua melika ma? Saka pa tain akümdang tetsüng nung komo adok. 24Asa tetsü-teboutem den mejang aser pei tsürabur den pa pei tebu chuba yimti nung arem, aser pa melena pei chir Yehoshafati chuba.Israel Chuba Nadab (910-909)25Yihuda chuba Asai kümnabuba chubadang Nadab chir Yeroboami Israel madak chubatsü tenzük, aser pai Israel madak küm ana chuba. 26Pai Kibuba jakdang kechi tamajung aji inyak, aser tebui jajaba ama jaja-a pei temenen agi Israel nunger temenen menadaktsü.27Ahija chir Baasha, Issakar kidong anema pai apuso, aser Baashai Gibbeton nung koba Filistia nunger meyong liasü pa idakji tepset, kechiaser Nadab aser Israel nunger ajaki Gibbeton makbangya liasü. 28Yihuda chuba Asai küm asembuba chubaba mapang nung Baashai pa tepset aser pa melena chuba. 29Pa chuba kümli-i, Yeroboam kidong ajak pai tepset, Yeroboam asoshi taküm alir shinga pai metoktsü, aser Kibubai ashiba ama kechi pai Shilon nunger pa tenzüker Ahija agi jembi, yamaji pai pa samatsü. 30Kechiyong Yeroboam temenentem koba pai mena aser koba pai Israel nunger nem tai menadaktsü, aser Kibuba Israel Tsüngrema ain adokdaktsü.31Nabadi inyakba mapa aser pai kechisa inyak, itemji Israel nunger chubatem putipuyang kaket nung zülua melika ma? 32Aser Asa o Baasha na tsüngda nung parnok arishi piyong rara liasü.Israel Chuba Baasha (909-886)33Yihuda chuba Asai küm asembuba chubadang Ahija chir Baashai Tirza nung Israel ajak madak chubatsü tenzük, aser küm metsürpezü chuba. 34Pai Kibuba tsüngdang kechi temenen aji inyaka Yeroboam lenmang nung jaja aser pei temenen agi Israel nungera temenen menadaktsü.1 CHUBATEM 16
1 Kibuba O Hannai chir Yehu dangi Baasha anema ashi, 2“Auyi nungi ni na ajungket aser kü nübur Israel madak na chuba kümdaktsü, saka nai Yeroboam lenmang nung jaja aser kü nübur Israel temenen menadaktsü, aser parnok temenen agi ni jashidaktsü. 3Ajiang, ni Baasha aser pa kibong meshimeshia oktoktsü, aser ni ne kibong Nabat chir Yeroboam kibong ama kümdaktsütsü. 4Aser shiba Baasha den yimti nung südir, azütemi achitsü aser shiba pa den moapu nung südir, anüng ozütemi achitsü.”5Tang Baashai inyakba mapa aser pa tashi, Israel nunger chubatem putipuyang kaket nung zülua melika ma? 6Baasha pei tsürabur den mejang, aser Tirza nung arem aser pa chir Elai pa melena chuba.7Tang talisa Hanani chir Yehu ainkar ajanga Kibuba O Baasha aser par kibong anema aru, kechiaser pai Kibuba jakdang kechisa tamajung liasü aji inyak. Yeroboam kibong mesüka aser pai pa tepsetba ama, pai pei teka agi inyakba agi Kibuba jashidaktsü.Israel Chuba Ela (886-885)8Yihuda chuba Asai küm metsürtrokbuba chubaba küm nung Baasha chir Elai Tirza nung Israel madak chubatsü tenzük, aser küm ana chuba. 9Par kor talungtsü tesadang ka madak tanishir, pa tenzüker Zimri-i pa anema apuso, tang pai Arza kibong koba Tirza kibong madak liasü, idakji pa yi jema liasü. 10Zimri-i oa, pa tepset aser pa melena chuba, koba Yihuda chuba Asai küm metsürtenetbuba chuba dang liasü.11Kodang pai chubatsü tenzük, pa chuba menden nung menli-i, Baasha kibong ajak lepseta, tebur chanu kata pai metoktsü, mesüra par kimang mesüra par tembar kata meyutsü. 12Yamaji Kibuba O agi ashiba ama Baasha kibong ajak Zimri-i samatsü, koba Yehu ainkar agi Baasha anema jembia liasü; 13kechiaser Baasha temenen ajak, aser par chir Ela temenen ajak koba parnoki mena aser Israel Tsüngrem Kibuba anema parnok süngyanglutem agi Kibuba jashidakja Israel tai menadaktsü. 14Tang Ela tanüngba mapa aser pai inyakba ajak Israel chubatem putipuyang kaket nung zülua melika ma?Israel Chuba Zimri (885)15Yihuda chuba Asa küm metsürtenetbuba chubadang, Tirza nung Zimri-i anogo tenet chuba. Tang Israel temerangertem Filistia nunger yimti Gibbeton anema sentepa liasü. 16Kodang tanendak alir Israel nisungtem Zimri-i tasa tamajung agi chubaji tepsetogo ta angashi parnoki temeranger tanishir Omri Israel madak chuba kümdaktsü. 17Omri Israel nunger ajak anir Gibbeton nungi atu, aser parnoki Tirza meketbang. 18Kodang Zimri yimtiji agiogo ta angu, pai chuba kidangi ai, aser mi agi pai chuba kiji rongtoktsü aser pa-a rongseta asü. 19Kechiaser pai Kibuba madang kechi tamajung aji benshia Yeroboam lenmang nung jaja aser kechi temenen pai mena iba jagi pai Israel tai menadaktsü. 20Tang Zimri tanüngba mapa aser pai anema apusoba ajakji Israel nunger chubatem putipuyang kaket nung itemji zülua melika ma?Israel Chuba Omri (885-874)21Idangji Israel nunger ana küma sadang, nisung tesadang kati Ginat chir Tibni chuba kümdaktsütsü pa sülen anidak, aser tesadang kati Omri sülen anitak. 22Saka shiri Omri sülen anitak, parnoki Ginat chir Tibni sülen anitakertemji akok; anungji Tibni asü aser Omri-i chuba. 23Yihuda chuba Asa küm semerka buba chubadang Omri Israel madak chubatsü tenzük, aser küm terana chuba; pai Tirza nung küm trok chuba. 24Pai Shemer dang nungi Samaria tenemji taribi touzük mori ana agi ali, aser pai tenem nung ki yanglu, iba tenem kibuba Shemer nüngtem, pai yangluba yimti tenüng Samaria ta aja.25Omri-i Kibuba Tsüngrem tsüngdang kechi tamajung aji inyak, aser pa dang tama alir ajak dang nungi tamajungba inyak. 26Kechiaser pai Nebat chir Yeroboam lenmang nung jaja, aser pa tai agi Israel nungera tai menadaktsü, aser chuba amajok mapa agi Israel Tsüngrem Kibuba ain adokdaktsü. 27Tang Omri mapa tanüngba kechi pai inyak, aser pa tashi koba pai sayu, itemji Israel nunger chubatem putipuyang kaket nung zülua melika ma? 28Anungji Omri pei tebutem den mejang, aser pa Samaria nung arem. Iba sülen pa chir Ahabi pa melen chuba.Israel Chuba Ahab (874-853)29Yihuda chuba Asai küm semertibuba chubaba küm nung Omri chir Ahabi Israel madak chubatsü tenzük, aser Omri chir Ahabi Samaria nung Israel madak küm metsür ana chuba. 30Omri chir Ahabi Kibuba jakdang kechi majung aji pa jakdang alir ajak dang nungi tamajungba tai mena. 31Nebat chir Yeroboam temenentem nung jajatsüji mapa temela ka amai, pai Sidon nunger chuba Etbaal jala Yezebeliji pei kinungtsü asütsü agi, aser pai Baal dangi oa tenzüka pa külem. 32Baal kidang pai Baal asoshi tekülemdak yanglu, koba pai Samaria nunga yanglu. 33Ahabi Ashera yanglu, aser pai Israel Tsüngrem Kibuba jashidaktsütsü akhidang chubatem dang nungi tali inyak. 34Pa tendak Bethel nunger Hieli Yeriko yanglu, pai pei mezüng jabaso Abiram tenla-a kimungji tenzük, aser süngkhümtemji pei jabaso tesübuba Segub agi tenla-a yanglu, aser ibaji Nun chir Yihusuai Kibuba O jembiba ama atalok.1 CHUBATEM 17
Elija Aser Ayawara1 Tishbi nunger Elija shiba Gilead nung liasü, pai Ahab dang ashi, “Israel Tsüngrem Kibuba shiba ni tenzüker, pa taküm alinung, kü oi memelarabangla alima nung küm asem tashi azüngtzü mesüra tzünglu marutsü.”2 Kibuba Oji pa dangi arua ashi, 3“Yang nungi apusoa anüdokleni oang, aser Yordan jakdang Kherith ayong anasa atsüka liang. 4Yangji nai ayong tzüji ajemtsü aser idakji na mesütsü ni warotem dang melatsü.”5 Kibuba O agi ashiba amaji pa oa pai inyak; kechiaser pa oa Yordan jakdang Kherith ayong nung liasü. 6Warotemi amtsük aser shi anepdang aser aonung pa nem bener arutsü, aser pai ayong tzüji ajem. 7Kenpiga lir ayongji kongadok, kechiaser alima nung tzünglu maru.Elija Aser Zarefath Amitsür8 Kibuba O pa dangi arua ashi, “Aramesoang aser Sidon nung aliba Zarefathi na oang aser idakji liang; 9 ajiang, ni amitsür ka dang na kümzüktsü melaogo.” 10Anungji pai aramesoa Zarefathi ao, aser kodang pai yimti süngkhümji atong, ajiang, amitsür ka idakji süng koya liasü, aser pai la jar ashi, “Yimlibilema ni ajemtsü asoshi tzü tera bener arung.” 11Lai aji bener arutsü oya alidang, pai la ja-a ashi, “Chi tekapu ka ni asoshi bener arujang.”12Lai langzü, “Kibuba ne Tsüngrem taküm alinung ni ashir, kü ket nung amtsük kata mali, saka jangbong nung jang tekapu ka dang lir aser bongdang nung totzü tera ka lir, aser ajiang, kü chir küna aji chir asütsü atema ni süng bendener.”13Elijai la dang ashi, “Tetsübu, oang aser nai ashiba ama inyakang, saka tamasa kü nem amtsük tila ka yanglua aji kü nem bener arujang, aser tesülen na aser ne chir asoshi yangluang. 14Kechiaser Israel Tsüngrem Kibubai yamai ashir, Kibubai alima nung tzünglu meyok tashi ne jangbong aser totzü bongdang tazüng makümtsü.”15Lai oa Elijai ashiba ama inyak aser Elija aser lar kibong anogo aika chia-ajem. 16Elijai Kibuba o agi jembiba ama jangbong aser totzü bongdang kodanga tazüng maküm.17Iba sülen tatsüka lir tetsürlar chirji shirangadok. Pa shirangba kanga tamajungba küma süadok. 18Anungji lai Elija dang ashi, “Tsüngrem nisung nai kechiba kü dang yamai inyaker. Kü temenen bilemtetdaktsütsü aser kü chir südaktsütsü kechiba na yagi aru?”19Pai la dang ashi, “Ne chir kü nem kua,” pai pa tetsürla teku nungi ajungzük, aser pa alidak temaba taktangi anir atua pa yipten nung yutsü. 20Pai Kibuba dang ayimtena ashi, “Oh kü Tsüngrem Kibuba, ni anena aliba amitsür kidangi nai par chir tepseta lendong bener aru a ma?” 21 Pai asemben tashi tanur dakji nemeta Kibuba dang ayimtena ashi, “Oh kü Tsüngrem, iba tanur tanela pa dangi meyipa arudakjang” ta ni sarasademer. 22Elija ola Kibubai angashi, aser tanur tanelaji tanaben pa dangi meyipa arua pa shia aru.23Elijai tanurji ajunga aru, aser pai taktang nungi paji temaba kidangi anir aru, aser pai pa tetsü nem agüja ashi, “Ajiang, ne chir taküm lir.” 24Tetsürlai Elija dang ashi, “Na Tsüngrem nisung ta ni meteter, aser ne bang nung Kibuba Oji shitak lir.”1 CHUBATEM 18
Elija Aser Obadia1Mapang talangka lir külen kümsembuba nung Kibuba O Elija dangi arua ashi, “Nai Ahab dangi oa ne sasa sayuang, aser ni alimai tzünglu yoktsü.” 2Anungji Elijai Ahab dangi oa pa sasa sayu.Tang Samaria nung ayawaraji kanga sashia liasü. 3Ahabi chuba ki kibur Obadia aja, shiba Kibuba dak bendanga amanger ka liasü. 4Kodang Yezebeli Kibubar ainkartem tepseta liasü. Obadiai ainkar noklang ka anir, parnokji tenem lungpok nung miima yur chi aser tzü agi mesü. 5Ahabi Obadia dang ashi, “Ali nung tzüpokdak aser ayong ajak ajanga, kor aser gadotem taküm kümzüktsü asenoki rem ngushia, shiruru ajak sama lir bushia oang.” 6Anungji parnoki alushiji lemsar apuso, aser Ahab tesem ka leni aser Obadia tesem ka leni ta ao.7Obadia lenmang nung alidang, ajiang, pai Elija ajuru, aser pai pa ajitet aser pei tejak alilen mechia lur asüngdang, “Na kü kibur Elija asü?” 8Pai langzü, “Paji ni, oang aser ne kibur dang shiang ajiang, yangi Elija lir.”9Pai ashi, “Ne tenzüker Ahab ket nung bendanga agütsür, ni tepsettsüsa ni kechi tai ali?” 10Kibuba ne Tsüngrem ali tashi, kin mesüra yimli kata metoktsüi kü Kibubai na bushi; aser parnoki kodang pa yangi mali ta ashi parnoki na mangu ta pai kin aser yimli agi azüngashi. 11Tang nai ashir, “Oang ne Kibuba dang shiang, ajiang, yangi Elija lir. 12Ni na nungi oli-i, ni memeteti Kibuba tanela agi na bener aotsü, aser kodang ni Ahab dangi or shidir, pai na mangutsü aser ni tepsettsü. Aji saka ne tenzükeri lanuwa nungi Kibuba tsübur. 13Ni kechi inyak aji kü Kibuba dang mashia ma? Kodang Yezebeli Kibuba ainkartem tepset, ni Kibuba ainkar noklang ka parnok lungpok ana nung tenem nem shibanga yur, tzü aser amtsük agi mesü. 14Aser tang nai ashir, Oang, ne Kibuba dang shiang, Ajiang, Elija yangi lir; aser pai ni tepsettsü.” 15Elijai ashi, “Temeranger Telok Kibuba shiba tsüngdang ni noktaker pa ali tashi, ni kü sasa shitak pa dang tanü adoka sayutsü.”Elija Aser Ahab16Anungji Obadia Ahab den ajurutsü ao. 17Kodang Ahabi Elija angu, Ahabi pa dang asüngdang, “Israel timtemdaktsübaji na ama?” 18Pai langzü, “Ni Israel tim metemdaktsü, saka na aser nebu kibongi Kibubai melabatem amadok aser nai Baal sülen anidak. 19Anungji tang yokang aser Israel nunger ajak Karmel tenem nung, aser Yezebel langbang nung chiyungertem Baal ainkertem noklang pezü ser tenem, aser Ashera ainkertem noklang pezü kü dangi sentepdakjang.”Karmel Tenem Nung Tenlaba20Anungji Ahabi Israel chir ajak dangi yok, aser ainkar ajak Karmel tenem nung sentepdaktsü. 21Elija nisungtem anasai arua ashi, “Nenoki iba tebilemba ana nung kopiga alitsü, Kibubaji Tsüngrem süra pa sülen anidakang aser Baal süra, pa sülen anidakang.” Saka nisungtemi pa dang o kata melangzü. 22Idangji Elijai nisungtem dangji ashi, “Kibuba ainkar ni, oda ni dang anünga lir; saka Baal ainker noklang pezü ser tenem lir. 23Parnoki nashi pungchi ana asenok nem agütsüdakjang, aser parnoki parnok asoshi nashi pungchi ka shimtetdakjang aser ibaji anüka alangsar süng manung ajonglokang, saka mi tapudaktsü, aser nia nashi pungchi kaji yamaji inyaktsü aser süng manungji ajongloktsü saka mi metsüloktsü. 24Nenoki nenok tsüngrem dang sarasademang, aser nia Kibuba tenüng nung sarasademtsü, aser Tsüngrem shibai mi agi langzüdir, paji shitakba Tsüngrem lir.” Aser nisung ajaki langzüa ashi, “Aji shitak lir.”25Elijai Baal ainkertem dang ashi, “Nenoki nenok asoshi nashi pungchi ka shimtetang, aser tamasa aji renemang, kechiaser nenok aika, aser mi tapu saka nenok tsüngrem tenüng nung sarasademang.” 26Parnok nem agütsüba nashi pungchiji parnoki agi, aser parnoki aji renem, aser anepdang nungi teruto tashi parnoki Baal tenüng nung ayimtena sarasadema ashi, “Oh Baal, onok dang angang.” Saka ola kata maliasü aser melangzü. Aser tekülemdakji parnoki pungtena ayimten.27Anjongmeshi nung Elijai parnok menüja ashi, “Tashi agi ayimtenang, kechiaser pa-a Tsüngrem ka, pa ken tena ali südi, mesüra pa oadok, mesüra aeni ao asü, aser pa mejanga lira mesotsüla.” 28Parnoki tashiba agi ayimten, aser parnok yimya amato azü madok tashi nok aser nü agi temang nung wa-a tsünga ayimten. 29Kodang anjongmeshi süia ao, nikongtsütsü tashia parnoki ayimten, saka ola kata maliasü, kechiaser shingaia melangzü mesüra shingaia parnok mezüngshi.30Elijai nisungtem dang ashi, “Ni anasai arung;” aser nisung ajak pa anasai aru. Aser pai Kibuba tekülemdak raksa-a alibaji yanglushi. 31Elijai Yakober chirtem kidong yongsük ama lung terana bener aru, shiba dangi Tsüngrem O arua ashi, “Israelji ne tenüng asütsü.” 32Kibuba tenüng nung pai lung agi tekülemdak ka yanglu, aser metsüjang tatakzük ana sema pai külentzü tuluka atu. 33Aser pai süngji timi anang aser nashi pungchiji anüka alangsar süng manungji enok, aser pai ashi, “Tzü mori tulu pezü sünga tenladak manungji shilokjang aser süngdakji enokang.” 34Pai ashi. “Anaben tashi yamaji inyakang;” aser parnoki tanaben inyak. Pai ashi, “Tasembena inyakang;” aser parnoki tasembena inyak. 35Aser tenladak ajakji tzü agi asüng aser külentzüjia tzü agi sünga enok.36Nikongdang tekülemba mapang nung Elija ainkar anasa arua ashi, “Oh Kibuba, Abraham, Isak aser Israel Tsüngrem, tanü ne tenzükeri item ajak dang ne O ama ni inyaker, aser Israel nung naji Tsüngrem ta metetdakjang, 37Oh Kibuba, item nisung yagi naji Kibuba Tsüngrem ta metettsü aser nai parnok mulung meyipdaktsütsü asoshi nai kü dang angang, kü dang angang.”38Idangji Kibuba miji alu, aser tekülemdak lung, süng, ali aser külentzü nung tzü ajakji menakrepa arong. 39Kodang nisungtemi aji angu parnoki ali nung apudaka ashi, “Kibubaji Tsüngrem, Kibubaji Tsüngrem.” 40Elijai parnok dang ashi, “Baal ainker kata tejendaktsüi sotang.” Aser parnoki parnok apu aser Elijai Kishon ayongi anir lua parnok yangji tepset.Tsüngsarusa Anenba41Elija Ahab dang ashi, “Aramesoang, chia jemang, kechiaser tzünglu talubu arutsü ola lir.” 42Anungji Ahabi chia ajemtsü asoshi atu, aser Elija Karmel tenem jagi atu aser pai ali nung apudaka pei tejak temokok ana tsüngda nung ayu. 43Pai pei tenzüker dang ashi, “Tang tuang aser tzüyim tzütsüji ajiang.” Aser pai tua repranger ashi, “Kecha mali;” aser pai ashi, “Ano tenet ben tashi tuang.” 44Aser tenetbenbuba nung pai ashi, “Nisung teka tila ka ama tzüyim nungi mepet adokdagi.” Aser pai ashi, “Tuang aser Ahab dang shiang, Lua tzünglu agi na majadangtsüsa ne kor talungtsü renemang.” 45Aser mapang tatsüka tsüngda nung mepet aser mopung agi anüng manga aküm, aser tzünglu tulu ka aru. Aser Ahabi Yezreeli kor nung sanger ao. 46Yamaji Kibuba teka Elija dak liasü, aser pai pei teperem nung nangri kanger Ahab madang Yezreel tsütsüi asema ao.1 CHUBATEM 19
Elija Horebi Aoba1Elijai inyakba ajak aser pai ainkertem koda nok agi tepset item ajakji Ahabi Yezebel dang ashi. 2Idangji Yezebeli Elija dangi osang bener ka yoka ashi, “Ni ne takümji asüng iba mapang nung parnok rongnung ka amaji meyanglutsüra, tsüngremtemi kü dang talia inyakang.” 3Kodang Elijai aji angashi, pai aramesoa pei taküm asoshi ajen, aser Yihuda lima Beershebai arua pei kilir idakji yutsü.4Saka pai pei sasa anogo ka lenmang azüngmeyakdaki ao, aser süngtong ka kübok amen, pa pei sasa asütsü asoshi mepishia ashi, “Tang ya joko teperi, Oh, Kibuba, kü taküm bener oang, kechiaser ni kü tsürabur dang nungi tajungba masü.” 5Aser pai süngtong kübokji mejang, aser ajiang, kotak tenyar kati pa dak kongshia ashi, “Aramesoang aser chiang.” 6Aser pai reprang, aser ajiang, pa tekolak madang mijang nung awangba amtsük aser tzü bongdang ka liasü; aser pai aji chia jemer tanaben mejang. 7Aser Kibuba kotak tenyar tanaben arua pa dak tanaben kongshia ashi, “Aramesoang aser chiang, kechiaser na asoshi lenmangji kanga talang.” 8Aser pai aramesoa chia-ajem aser iba chiyungtsü tashi nungji anogo lir aser lir aonung Tsüngrem tenem Horebi atu.9Pai lungpok kati arua idakji ali, aser ajiang, Kibuba O pa dangi arua ashi, “Elija, na yangi kechi inyaker?” 10Pai langzü, “Kibuba Tsüngrem temerangertem asoshi ni kanga dang nükmir, kechiaser Israel chir ajaki ne tezüngzüktepba raksa-a ne tekülemdak raksa aser nok agi ne ainkartem tepset, aser oda ni kü kija dang anüng aser parnoki taküma agitsü bushir.”11Pai ashi, “Oang aser Kibuba tsüngdang tenem nungji noktakang,” aser ajiang, Kibuba ajanga süi, aser mopung tulu arua tenemtemji shisatsü, aser Kibuba tsüngdang lungtemji jaksa, saka Kibubaji mopung nung maliasü; mopung sülen menoknok anok, saka menoknok nungji Kibuba maliasü; 12aser menoknok sülen mi aru, saka mi nungjia Kibuba maliasü; aser mi sülenji ola tila ka aru. 13Kodang Elijai aji angashi, pa sü agi pei tejak meyipanger ao, aser lungpok anasaji noktak aser ajiang, pa dangi ola ka arua ashi, “Elija, na yangi kechi inyaker.” 14Aser pai ashi, “Kibuba Tsüngrem temerangertem asoshi ni kanga dang nükmir, kechiaser Israel chir ajaki ne tezüngzüktepba amadoker, ne tekülemdak raksa aser nok agi ne ainkartem tepset aser oda ni kija dang toktsü; aser parnoki kü taküma agitsü bushir.”15 Kibubai pa dang ashi, “Ne lenmangi meyipa Damaska azüngmeyakdaki oang aser kodang na tonga odir, Siria madak chuba asütsü nai Hazael mezüja shimtetang. 16Israel madak chuba asütsü nai Nimshir chir Yehu mezüja shimtetang, aser Abel-mehola nunger Shapat chir Elisha na melena ainkar asütsü nai mezüja shimtetang. 17Hazel nok nungi jenbuba nisungji Yehui tepsettsü, aser Yehu nok nungi jenbuba nisungji Elishai tepsettsü. 18 Saka ni Israel nung Baal tsüngrem tsüngdang mapudakertem aser pa dak tebang memesepertem meyi tenet ni asoshi yutsütsü.”Elisha Ajaba19Anungji pa yang nungjagi pila, aser Shafat chir Elisha shiba nashi pungchi jura terana den alu alaya lia pai angu, aser Elija pa anasa oa pa süji pa dak amloktsü. 20Pai nashi pungchitemji toktsür Elija dangi asema oa ashi, “Ni kübu aser kütsü dak tebang meseptsü ne dang mepishir, aser ajiserang ne sülen anidaktsü.” Pai pa dang ashi, “Meyipa oang, ni ne dang kechi inyak?” 21Pai pa sülen manidaki meyipa oa, alu alaba nashi pungchitemji anir arua tepset aser alu alaba oset jagi shiji metar nisungtem nem agütsü aser parnoki aji chi. Idangji pai apusoa Elija sülen oa pa dang tenzük.1 CHUBATEM 20
Siria Nunger Den Raraba1Siria chuba Ben-hadadi pa temeranger telok ajak aniten, aser pa den chuba semer ana, kor aser kor talungtsü liasü; aser pai tua Samaria meketbang aser iba anema rara. 2Israel chuba Ahab dangi yimti-i pai osang abenertem yoka ashi, 3“Ben-hadadi yamai ashir,” “Ne taribi aser ne honji kü meyong, ne kinungtsütem aser ne chirtem aser oda tajungtiba ajakji kü meyong.” 4Aser Israel chubai langzüa ashi, “Nai ashiba ama, Oh chuba, kü Kibuba, ni akaba ajak ne meyong.”5Osang abenertemji tanaben arua ashi, “Ben-hadadi yamai ashir, Ni shitak ne dangi yamai shia yok, nai ne taribi, ne hon, ne kinungtsütem, aser ne chir ajak kü nem bendanga agütsütsü; 6saka asüng iba mapang nungi ni kü tenzükertem yoktsü, aser parnoki ne ki aser ne nükdang kechisa tajung ali itemji parnok teka nung agitsü aser parnoki itemji bener aotsü.”7Idangji Israel chubai linük nung tambur ajak jatena ashi, “Iba nisung yagi kechi koda tamajung bushir aji ajioka yuang ta ni mepishir, kechiaser pai kü kinungtsütem, kü chirtem, kü taribi, aser kü hon asoshi yok, aser ni pa dang menangzüki mali.”8Tamburtem aser nisung ajaki pa dang ashi, “Nai pa dang tanga, mesüra tenangzük.” 9Anungji pai Ben-hadad osang abenertem dang ashi, “Chuba kü Kibuba dang shiang, nai tamasa ne tenzükertem dangi kechi asoshi yok aji ni inyaktsü, saka ibaibo ni meinyaktsü.” Aser osang abenertemji pila aser pa dangi tanaben osang bener aru.10Ben-hadadi pa dangi yoka ashi, “Kü sülen anidaker ajak asoshi Samaria auyi tekapu ka ka peria süra, tsüngremtemi kü dang talia inyangkang.” 11Idangji Israel chubai pa dang ashi, “Temeranger sobutsü sobur pei sasa asüküma tebilem, ta pa dang shiang.” 12Kodang Ben-hadad aser chubatem tanendak chia jema liasü, ya angashia pei tenzükertem dang ashi, “Nenoki renemer tareni noktakang.” Aser yimtiji anema renemer tareni parnok noktak.Ahabi Ben-hadad Akokba13Ajiang, ainkar ka Israel chuba Ahab dangi arua ashi,“Nai item telok tulu ya ngurma ta Kibubai ashir? Ajiang, tanü ni iba telok ne ket nung bendanga agütsütsü, aser nai ni Kibuba ta metettsü.” 14Ahabi asüngdang, “Shibai?” Pai ashi, “Linük nung chuba chirtem asangurtemi ta Kibubai ashir.” Idangji pai ashi, “Shibai tongbangji apusotsü?” Pai langzü,“Nai tenzüktsü;” 15aser pai linük nung chuba chirtem asangurtem külemi sentepdaktsü, aser parnok noklang ana ser semer ana liasü, aser parnok sülen pai nisung ajak sentepdaktsü, Israel chir parnok meyi tenet liasü. 16Aser parnok teruto nung ao. Saka tanendak semtu nung Ben-hadad aser pa den yariteper, pa aser chuba semerana chia jema liasü. 17Aser linük nung chuba chirtem aser asangurtem tamasa ao, aser Ben-hadadi yokba asangurtemi pa dang ashi, “Samaria nungi aruba nisung tejaklen arudagi.” 18Aser pai ashi, “Parnokji yimjung asoshi aruaka mesüra raratsü aruaka parnok taküm dang puang.”19Anungji itemi yimti nungi oa, linük nung chuba chirtem asangurtem, aser parnok sülen anidaker temeranger telok lir. 20Aser parnok ajaki pei nisung tepset, aser Siria nungerji jena ao, aser Israel nungeri parnok aria ao, aser Siria nunger chuba Ben-hadad kor nung mener pei kor anishirtem den jena oa pa kümzük. 21Israel chubai oa kortem aser kor talungtsü ajak tepset, aser Siria nunger aika tepset. 22Israel chuba anasai ainkar arua pa dang ashi, “Oa ne sasa tashi ita kümang, aser nai kechi inyaker aji meteta yuang, kechiaser taruba küma Siria chubai na anema arutsü.”Siria Nunger Den Tanaben Raraba23Siria chuba tenzükertemi pa dang ashi, “Parnok tsüngremji tenemtem tsüngrem lir, anungji parnok asenok dang nungi tashi taitba; saka asenoki parnok anema lenten nungji raradi, aser shitak parnok dang nungi asenok tashi taitba asütsü. 24Aser ya inyakang, nisung shiai pei alidak nungi chuba aoba lenmang jagi oang, aser talidak tanishirtem tokjang. 25Nai samaba temeranger telok melen temeranger telok, kor asoshi kor, kor talungtsü asoshi kor talungtsü, aser na asoshi temeranger telok ta renema yuang aser parnok anema asenoki lenten nungji raratsü aser shitak parnok dang nungi asenok tashi taitba asütsü” aser parnoki ashibaji anga-a yamaji inyak.26Kümnabuba metsü mapang nung Ben-hadadi Siria nunger ajak aniten, aser Israel anema raratsü Afeki atu. 27Israel chirtem külemi adenshia chiyungtsü renem, aser parnok anema oa Israel chirtem napong chanu telok tila ana ama anena liasü, saka Siria nungeri linükji asüng.28Tsüngrem nisung ka anasa arua Israel chuba dang ashi, “Kibubai yamai ashir, Siria nungeri yamai jembir, Kibubaji tenem tsüngrem, saka pa lenten tsüngrem masü, anungji ni iba telok tulu ya ne ket nung bendanga agütsütsü aser nenoki niji Kibuba ta metettsü.”29Anogo tenet tashi parnoki kati ka anema noktak aser tenetnübuba nung tongbangji ajurutep aser Israel chirtemi Siria nunger anogo ka nung danga tetsüng temeranger meyi noklang ka tepset. 30Saka tanüngbatemji Afek yimti-i jena ao, aser tanüngba meyi metsürtenet madak jaraji tsük, aser Ben-hadad yimti jena oa taktang telung nung jenok.31Pa tenzükertemi pa dang ashi, “Tang ajiang, Israel chubatem yimlibilem akaba chubatem ta onoki angashi, asenoki anemsü abener aser tekolak nung lisü nair, Israel chuba dangi oa mepishidi ta ne dang mepishir; ashiko pai ne taküm kümzüktsü.” 32Anungji parnoki anemsü abener aser tekolak nung lisü nair Israel chuba dangi arua ashi, “Ne tenzüker Ben-hadadi ashir, Ni taküm lidakjang ta mepishir.” Aser pai ashi, “Pa kü adianu, tanga pa taküm lir ma” ta pai asüngdang. 33Tang nisungtemi kümdanga reprang aser pai mulungba asü masü aji aritepa asüngdang, aser parnoki “Ne adianu Ben-hadad” ta ashi. Idangji pai, “Nenoki oa pa anir arung,” ta ashi. Yamaji Ben-hadad pa dangi anir aru, aser pai pa kor talungtsü nung arudaktsü. 34Aser Ben-hadadi pa dang ashi, “Yimtitem koba kübui nebu nungi agi, aji ni meyipa agütsütsü, aser kübui Samaria nung inyakba ama, nai Damaska nung na asoshi shishilembadak yanglutsü.” Ni ne den iba tezüngzüktepba yanglua na yoktsü ta Ahabi ashi. Anungji pai pa den tezüngzüngtepba ka yanglur pa odaktsü.Ainkar Kati Ahab Aitsüba35Ainkartem chir rongnung kati Kibubai melaba ama pa medemer dang ashi, “Kü dak zükang ta ni ne dang mepishir;” saka nisungbajagi pa dak azüktsü memulung. 36 Idangji pai pa dang ashi, “Kibuba ola dang nai tashi manga nungji, ajiang, na ni nungi pilali molusongzü kati ngusettsü.” Aser pai pa nungi pilali dang molusongzü kati pa tepset. 37Idangji pai tangar ka ngua pa dang ashi, “Kü dak zükang ta ni ne dang mepishir.” Aser nisungbajagi pa dak züka pa yirutsü. 38Anungji ainkarji pila aser tangar nem majitetdaktsüi lenmang nung chuba ata-a liasü. 39Chubaji süia arudang, pai chuba dang ayimtena ashi, “Ne tenzüker rara tiyongi ogo, aser ajiang, nisung kati kü dangi meyipa nisung ka bener arua ashi, ‘Iba nisungi yuang, kodakirnaka sür pa taküm samara, pa taküm asoshi ne taküm agitsü, mesüra taribi touzük mori ka nai agütsütsüla.’ 40Aser ne tenzüker kangara mazüngi ali nungji pa oa adok; aser Israel chubai pa dang ashi, Nai mulungtetba amaji ne o bendangba alitsü.”41Pai ilunga or pa tekolak nungi süji agien aser Israel chubai paji ainkar rongnungi ta ajitet. 42Aser pai pa dang ashi, “Nai koba taküm tepsettsü asoshi ne ket nung agütsü paji jena yok nungji, pa taküm melena na, aser par temeranger melen ne temeranger taküm agitsü ta Kibubai ashir.” 43Aser Israel chuba pei kidangi jashiseta meyipa ao aser Samariai aru.1 CHUBATEM 21
Naboter Tsükmenatzü Lu1Tang Samaria chuba Ahab chuba ki anasa Yezreel nung Yezreel nunger Nabot ket nung tsükmenatzü lu ka liasü. 2Aser Ahabi Nabot dang asüngdang, “Atsüki ka yanglua tsünüsembongtsü adokdaktsütsü asoshi ne tsükmenatzü luji kü nem kua, kechiaser ibai kü ki anasa aser iba dangi tajungba tsükmenatzü lu ka mesüra ni ne nem sen agütsüdi.” 3Naboti Ahab dang ashi, “Kübu senmang ne nem agütsütsüji Kibubai nungtemer.”Ahab Aser Yezebel4Ahab pei kidangi temulung kanga mepelai meyipa aru, kechiaser Yezreel nunger Naboti kü lu senmangtem ni ne nem magütsütsü ta pa dang ashi; aser pai pei yipten nung metaloker pei tejak nembanger kecha machi. 5Saka pei kinungtsü Yezebel arua pa dang ashi, “Kechi agi ne tanela jashidaktsür, aser kechiba nai mechiyunger?” 6Pai la dang ashi, “Yezreel nunger Nabot dang ne tsükmenatzü lu sen agi alidi ta ni asüngdang, mesüra nai mulungra tanga tsükmenatzü lu ka agütsüdi ta ni ashi, saka pai ni ne nem kü tsükmenatzü lu magütsütsü” ta ashi. 7Pa kinungtsü Yezebeli pa dang ashi, “Nai Israel yimli madak tang yimsü masür ama? Aramesoang, arung, chia-jema aser na pela-a liang. Yezreel nunger tsükmenatzü luji ni ne nem agütsütsü.”8Anungji lai Ahab tenüng nung Nabot aliba yimti nung alir tamburtem aser tamarenertem dangi shiti zülur kanga junga pa nüng zülu aser kanga junga nembanger yok. 9Lai shiti nungji yamai zülu, “Nübur ajak telumiba anogo ka sangdongang aser Nabot tenem ka nung jokteta mendakjang. 10Pa anasaji samesa nisung ana mendakjang aser pai Tsüngrem aser chuba anema atakatemogo ta tena nem kuli südakjang. Iba sülenji pa lung agi onseta südakjang.” 11Yimti nung alir teloki, tamburtemi aser temerangertemi Yezebeli shiti nung zülua parnok dang ashiba ama parnoki inyak. 12Aser parnoki nübur ajak ayongten aser nisung ajak madang Nabot tenem nung mendaktsü. 13Aser samesa nisung ana pa anasa amen, aser Nabot anema nisungtemi angashia noktaka kuli ashi, “Naboti Tsüngrem aser chuba atakatemer.” Idangji parnoki pa yimti nungi atsür adoka pa dak lung agi ona pa onseta südaktsü. 14Idangji parnoki Yezebel dangi osang yoka ashi, “Nabot lung agi onseta südaktsüogo.” 15Kodang Yezebeli Nabot lung agi onseta südakogo ta angashia, Yezebeli Ahab dang ashi, “Aramesoang aser Yezreel nunger Nabot tsükmenatzü lu koba pai sen yong magütsüli ta ashi aji agiang; kechiaser Nabot taküm mali, pa süogo.” 16Kodang Ahabi Nabot süogo ta angashi, Yezreel nunger Nabot tsükmenatzü lui pai oa aser aji pai agi.Elijai Tsüngremer Obendangba Sangoktsüba17 Kibuba o Tishbi nunger Elija dangi arua ashi, 18“Samaria nung aliba Israel nunger chuba Ahab den ajuruteptsü na aramesoa oang; ajiang Nabot tsükmenatzü lu agitsü asoshi pa oa lir.” 19Kibubai yamai ashir ta nai pa dang shiang, “Pai tepseter tangar meyong agi nungji Nabot zü koba azüi menak iba azü jagi ne züa menaktsü ta Kibubai ashir.” 20Ahabi Elija dang ashi, “Oh kü tsükchir, nai ni angur na?” Pai langzü, “Ni na angur kechiaser Kibuba tsüngdang kechi tamajung lir aji benshia nai ne sasa na ayok. 21Ajiang, ne madang ni tamajung bener arutsü aser ni na nungi meshimeshia oktokadoktsü, aser Ahab nungi tebur chanu ajak leptokadoktsü, alar saka nüji saka Israel nung anünga aliba ajak samatsütsü. 22Aser Nebat chir Yeroboam kibong aser Ahija chir Baasha kibong ama ne kibong kümdaktsütsü, kechiaser nai ni jashidaktsü aser Israel nunger nem temenen mendaktsü.” 23 Aser Yezebel asoshia Kibubai yamai jembia ashi, “Yezreel jara kübok azütemi Yezebel achitsü.” 24‘Shiba Ahab yimti nung südir azütemi achitsü aser shiba alu nung südir anüng ozütemi achitsü.’25 Kibuba tsüngdang kechi tamajung lir aji pa kinungtsü Yezebeli ajungmeso nung yamaji inyaktsü pei sasa yoka achiba Ahab ama tangar shinga mali. 26Aser pai Amor nungeri inyakba ama süngyanglu külema tesempatsü inyak, kechiaser shirnok Kibubai Israel nunger nungi parnok aridok.”27Kodang Ahabi ya angashi, pai pei süoshi shisa, aser pei temang nung anemsü abener lumia kanga dang timtem tulu agi. 28Idangji Tishbe nunger Elija dangi Kibuba O arua ashi, “Ahabi kechi koda pei sasa ajemalur aji nai nguali ma? 29Ni pa mapang nung tamajung kecha magütsütsü, saka pa chir mapang nung par kibong nem ni timtem agütsütsü.”1 CHUBATEM 22
Ramoth-Gilead Anema Raratsü Ahab Sentong(2 Pu. 18.2-27)1Siria o Israel na tsüngda nung rara makai küm asem süi. 2Saka küm asembuba nung Israel chuba dangi Yihuda chuba Yehoshafat alu. 3Israel chubai pa tenzükertem dang ashi, “Ramoth-Gileadji asenok meyong ta nenoki memetet no? Saka Siria chuba nungi aji agitsü asoshi asenoki kecha meinyak.” 4Aser pai Yihoshafat dang asüngdang, “Ramoth-Gilead anema raratsü nai kü den aotsü asü?” Yihoshafati Israel chuba dang langzü, “Nia na amaji dang, ne nüburji kü nübur aser ne kortemji kü kortem lir.”Tiyazü Ainkertemi Takok Indang Shinba5Yehoshafati Israel chuba dang ashi, “tamasa Kibuba O nai asüngdangang ta ni ne dang mepishir.” 6Idangji Israel chubai ainkar noklang pezü shi külemi sentepdaktsü, aser parnok dang ashi, “Ramoth-Gilead anema ni raratsü asü mesüra aremzüktsü?” Parnoki ashi, “Oang, kechiaser Kibubai chuba teka nung aji bendanga agütsütsü.” 7Saka Yehoshafati ashi, “Asenoki asüngdangtsü asoshi idaki Kibuba ainkar ka mali ama?” 8Aser Israel chubai Yehoshafat dang ashi, “Kibuba dang asüngdangtsü Imlah chir Mikaia ano lir, saka ni pa sempar, kechiaser pai ni asoshi tamajung dak alema tajung meshin;’ aser Yehoshafati ashi, “Chubai yamai teshi.” 9Idangji Israel chubai ketdangpur ka jar ashi, “Yakta Imlah chir Mikaia anir arung.”10Tang Israel chuba aser Yihuda chuba Yehoshafat chuba sobutsü sobur Samaria süngkhümi ailen moa nung pei pei chuba menden nung amen, aser ainkar ajaki parnok tsüngdang shina jembi. 11Khenaana chir Zedekiai merang agi jangzü yanglur ashi, “Siria nunger mesama tashi ya agi ni parnok den raratsü, ta Kibubai ashir.” 12Ainkar ajaki yamaji jembia ashi, “Ramoth-Gileadi tuang aser takok ngua liang, kechiaser Kibubai aji chuba nem bendanga agütsütsü.”Tamakok Indang Mikaia Ainkari Shinba13Osang abener Mikaia tajai oa pai pa dang ashi, “Tang ajiang, obang ka agi ainkartem oji chuba madang tajung lir, ne o-a parnok rongnung ka ama sang aser tajung jembiangma.” 14Aser Mikaiai ashi, “Kibuba taküm ali tashi, Kibubai kü dang kechi ashir aji ni jembitsü.” 15Kodang pa chuba dangi aru, chubai pa dang ashi, ‘Mikaia, asenoki Ramoth-Gileadi raratsü aotsü asü, mesüra asenoki aremzüktsü?” Aser pai langzü, “Tuang aser takok nguang, chuba ket nung aji Kibubai bendanga agütsütsü.” 16Aser chubai pa dang ashi, “Kibuba tenüng nung ochi dak alema kecha mejembitsüla ta ni ne dang kwiben ashitsü?” 17 Aser pai ashi, “Santem sannüker maliba ama, ni Israel nunger tenem nung prokshia angu, aser Kibubai ashi, Itemi tanüker mali, parnok nisung shia pei kidangi yimjung nung meyipa odakjang.”18Israel chubai Yihoshafat dang ashi, “Ni ne dang pai ni asoshi tamajung dang ashi tajung meshintsü ta meshika ma?” 19 Aser Mikaiai langzü, “Anungji nai Kibuba O angang: ni Kibubaji pa menden nung mena angu, aser kotak nung telok tulu pa anasa tajichilen aser tabelen mena ni angu. 20Kibubai ashi, “Ahabi Ramoth Gileadi tur pa tamakok aludaktsütsü asoshi shibai pa külakoktsütsü?” Aser kati balaka aser kati balaka ta tapu tapu ashi. 21Idangji tanela ka arua Kibuba tsüngdang noktaka ashi, ‘Ni pa külakoktsütsü.” 22Aser Kibubai pa dang ashi, “Kechi agi?” Aser pai ashi, “Ni aotsü aser ainkar ajak bang agi tiyazü jembidaktsütsü.” Aser pai ashi, “Nai pa külakoktsütsü aser yamaji akoktsü, oang aser yamaji inyakang. 23Anungji tang ajiang, Kibubai item ne ainkar tebang nung tiyazü jembitsü agütsüogo, aser Kibubai na asoshi tamajung jembiogo.”24Idangji Khanaana chir Zedekia anasa arua Mikaia tenibung nung maokja ashi, “Ne den jembitsü Kibuba tanela ni nungi ne dangi koma ao?” 25Mikaiai ashi, “Ajiang, kodang na ne sasa atsüktsü asoshi taktang telungbai idir iba anogo nung nai angutsü.” 26Aser Israel chubai langzü, “Yimti nung aliba governor Amon dangi Mikaia anir oang aser chuba chir Yoash dangi anir oa shiang: 27Chubai yamai ashir, “Iba nisung tepuokdak nung yuang, aser ni yimjung nung maru tashi amtsük terara aser tzü agi pa mesüang.” 28Mikaiai ashi, “Nai yimjung nung dang meyipa arura, Kibuba ibo kü dang kecha mashi.” Aser pai ashi, “Oh nisungtem, nenok ajaki angang.”Ramoth-Gilead Nung Ahab Laoba29Anungji Israel chuba aser Yihuda chuba Yehoshafat, Ramoth-Gileadi atu. 30Israel chubai Yehoshafat dang ashi, “Ni kü sasa chuba-a ta memetetdaktsütsü asoshi kü süoshi melentsü aser raradaki aotsü, saka nabo ne süoshi agiang.” Israel chubai pei sasa majitetdaktsütsüsa sobutsü sobur tongbangi ao. 31Tang Siria chubai pa talungtsü temeranger walunir semerana dang ozüng agüja ashi, “Israel chuba dak alema tulu mesüra tila ka dena terara.” 32Kodang temeranger temerangertemi Yehoshafat angu, parnoki ashi, “Atangji ibai Israel chuba” aser parnoki pa anema raratsü apuso. Aser Yehoshafati ayimten. 33Kodang temeranger temerangertemi ibai Israel chuba masü ta meteta aru, parnoki pa aria moi meyipa aru.34Nisung kati züzüaka lijak bena arur yok, aser Israel chuba dak teku semoktsü teküboklen kashi, anungji pai kor talungtsü anisang dang ashi,” Ne teka meyipang aser telok rongnungi ni pila-a anir oang, kechiaser ni kanga mejungi yiruogo.” 35Iba anogo nungji tongbang sashia aküm, aser pei kor talungtsü den Siria nunger anema ata-a liasü, aser talungtsü teküboklen ajak pa dak nungi adokba azü agi asüng aser chuba nikongtsütsü asü. 36Anü talui temeranger telok alidak ajakleni osang yoka, “Chuba süogo, anungji nisung shia pei yimtaki aser pei yimti-i oang” ta osang agütsü. 37Parnoki Samariai arua chuba tasü mang Samaria nungji arem. 38Aser parnoki kor talungtsüji Samaria nung aliba tzütu nung shitok, aser iba tzütuji nüktapangtatsürtem temang shitokdak liasü; Kibubai ashiba ama azütemi pa zü menak.Ahab Yimsüsüba Tatembang39Tang Ahab tanüngba mapa aser pai inyakba aser senti ki koba pai yanglu, aser yimti kobasa pai yanglu, Israel chubatem putipuyang kaket nung itemji zülua melika ma? 40Anungji Ahab chuba pei tebutem den mejang aser pei chir Ahaziai pa melena chuba.Yihuda Chuba Yehoshafat(2 Pu. 20.31—21.1)41Israel chuba Ahabi küm pezübuba chubaba mapa nung Asa chir Yehoshafati Yihuda madak chuba. 42Yehoshafati kodang chubatsü tenzük pa küm semer pungu tain liasü, pai Yirusalem nung küm metsür pungu chuba. Pa tetsü tenüng Shilhi jala Azuba liasü. 43Pai pei tebu Asa lenmang nung jaja, aser Kibuba tsüngdang kechi tim lir aji inyaka pai iba nungi meyipa mao. Aji saka tokong tenem tekülemdak magieni liasü aser nisungtemi ano item tenem tekülemdak nungji tenla-a liangmesen ronga liasü. 44Aser Yehoshafati Israel chuba den yimjung yanglu.45Tang Yehoshafat tanüngba mapa aser pai sayuba tashi, aser pai koda rara itemji Yihuda chubatem putipuyang kaket nung zülua melika ma? 46Aser tebur jabujaritepertem tanüngba koba tebu Asa anogo nung liasü, itemji pai alinük nungi samadaktsü. 47Edom nung chuba mali asü, teshimtet ka dang chuba liasü. 48Ofiri hon abeni aotsü asoshi Yehoshafati Tarshis rong yanglu. Saka rongtem Eziongeber nung raksadok nung motet. 49Idangji Ahab chir Ahaziai Yehoshafat dang ashi, “Kü tenzükertem ne tenzükertem den rong nung odakjang.” 50Saka Yihoshafati memulung. Aser Yehoshafat tebutem den mejang, aser pei tebu Dawid yimti nung arem, aser pei chir Yeborami pa melena chuba.Israel Chuba Ahazia51Yihuda chuba Yehoshafati küm tertenetbuba chubaba mapang nung Samaria nung Israel madak Ahab chir Ahaziai chubatsü tenzük aser pai Israel madak küm ana yimsü asü. 52Aser Kibuba jakdang kechi tamajung pai aji inyak, aser pei tebu aser tetsü Nebat chir Yeroboam lenmang nung jaja, aser pai Israel nungera tai benshidaktsü. 53Pai Baal tenzük aser külem, aser tebui inyakba ajak agi Israel Tsüngrem Kibuba ain adokdaktsü.
Comments
Post a Comment